رواية المنجمة للكاتبة كفاية كاظم كاملة
ظلام دامس محاوط المكان هدوء مخيف يقاطعة صوت قطرات المطر الينزل على الارض الصلدة طفرت مفزوعة اثر كابوس مزعج كاد ان يقطع انفاسي من بشاعتة لزمت گلبي بيدي دگاتة عالية وجسمي كلة يرجف من الخوف جمعت شعري بيدي اردد.
كابوس نيزك كابوس اصحي ماكو شي
بلعت ريگ حلگي يابس ماعرف شكد صارلي نايمة اثر المرض باوعت لاخواتي النايمات بعمق وتعب تعبانات عمت عيني عليهن غطيتهن عدل وغطيت ابني وياهن نايم بنصهن حاشر روحة بحضن شهب
ابتسمت بتعب واني اشوفهم تلاثتهم نايميين سوى بس ثانية ثانية وحدة تبخرت ابتسامتي ودك گلبي بجنون نهضت عقلي طاير من راسي ومو بس عقلي گلبي هذا گلبي انشلع من صدري من ادركت هي ماموجودة وياهن!
دورت عيوني بالغرفة مالكيت الها اثر طلعت ادورها مثل المخبلة گلبي يريد يوگف اقنع بنفسي الكاها الكاها هسة تطلع كاعدة تباوع للمطر لافة نفسها بالبطانية بس ما لگيتها! ضربت على عيوني بثنين ادية گلبي فااار ماموجودة بالبيت كلة حتى بالمخزن ماكو ملخت شعري من حرگة گلبي الدنيا ليل وشتا مطر قوي برا الجو يموت خوف وبرد وينها هي وينها؟
ماكو غيرها يعرف وينها البيت صنطة كلها نايمة تمشيت لغرفتها صرت ادفر الباب بثنين ادية ورجلي اصيح بعلو صوتي.
نيزك: وووولج اطلعيييييي اطلعيييييي يالشيطاااااانة وينننن اختيييي ويننننن كواااااكب راحت كواكب وين وديتيهاااا وين ضيعتيها منيييي
ادية صرت ماحس بيهن من الضرب ولا حس بروحي الجاي تحترك بعز البرد صرت اچوي نار فتحت الباب تفرك بعيونها كعدت من عز نومتها تصيح.
افنان: خيررررر خيررر بنااات جبار مانخلص منجن ومن شرررجن شتريدين بنص الليل.
هجمت عليها خنكتها من رگبتها بثنين ادية اخنگ بيها وعيوني يريدن يطلعن من العصبية لازمتها بقسوة اخنك بيها واحجي روحي مفرفحة اريد اموت من القهر واموتها وياي بلكت ارتاح بموتتها.
نيزك: وووين وديتيي اختييي ووووين؟
حاولت تفك نفسها مني بس ماتكدرلي تخبلت عليها تخبلت واني بقمة عصبيتي اريد انهيها سنوني سن طبك على سن من العصبية حجت بصعوبة وهي تطلع نفسهة مني وتفتح ادية.
افنان: رجعت لاصلها كواكب اني شعلية وين ضامتها بجييييبي
بهتت ملامحي وقوتي خرت مني صرت تراب طايح بعد جملتها وتأثيرها علية وكفت انظم انفاسي وهي صارت تضحك بخباثة عدلت نفسها وكالت بخفوت قريب من اذني.
افنان: رجعت منين ما اجت هاي التحسبينها اختج بت شوارع وتحب الشوارع ماتحب كعدة البيت المحترمة عوفيها تعود لاصلها هي تعيش حالها حال بنات الشوارع شوكت تجوزن منهااا شوكت؟
رجعت ليورة اهز راسي بلا ماتسويها كواكب ماتسويها عفتها وراي ومشيت رجلية صايرة خيوط شلون ترجع لذاك المكان! بالليل وبنص البرد تطلع! لا ماتسويها ماتطلع كواكب شيطلعها بس كول هما شمسوين حتى تطلع، صاحت وراي بصوتها العالي متشمتة.
افنان: صدكتي هسة اختج شيطانة مايهمها شي ولا تخاف من شي احنا بنص بيوتنا ونخاف ضلن احرگن احرگن برواحتجن على بت الحرام
همست بانكسار ودمعتي نزلت بقهر.
مو بت حرام هي شوكت تفتهمون؟ اكيد انتم السبب الخلاها تطلع اي اكيد
افنان: الجن يوووم الجن والله لعلگ راية بيضة من تنفجعن بوحدتجن
دخلت وركعت الباب وراها ماعرف شراح تحظرلي على هاي سوايتي وياها ولا بيش تحرك گلبي تفكيري كلة بكواكب اختي وشلون حالها هسة وهي وحدها؟ عيني صارت بعيون اخواتي كعدن على صوتي وجوهن مصفرة باهتة الخوف تارسها واني مو احسن منهن.
نيزك: راحت كواكب.
تقدمت نجمة باتجاهي تحجي وترجف
نجمة: نيزك لاتصدكين كواكب تطلع هما حجزونا بالغرفة من جنتي مريضة ونايمة اثر الابرة هي ضلت يمهم مااعرف شسوولها لو...
قاطعتها فاتحة عيوني على وسعهن وارجف رجيففف.
شنووو صااار ولجننن ليششش حجزوجننن بالغررفة يمتهااااا مو هسة طلعت الباب مامقفووول؟ !
نجمة: من جنتي نايمة سراج تحرش بشهب وكواكب كتلتة من بعدها مادري شصار بيها دخلونا بالغرفة وهي ضلت عبالي راح تبقى بالمخزن مثل كل مرة يحجزونها هناك.
باوعت الشهب مدنكة راسها وبس دموعها تنزل بهدوء تفرك بيها بقسوة مردتها مرد ومردت گلبي وياها تقدمت عليها، سألت بخوف وقلق احس گلبي وگف من شفت حالتها گوة طلعت مني الكلمة.
نيزك: شنو صار وياج شهب؟
نجمة: ماصار شي لاتخافين كواكب ماقصرت وياهم
دكيت على كلبي بقوة يووجعني من القهر على روحي وعلى اخواتي اخ يا گلبي على ساعة يوگف من القهر واخ يا كواكب والله روحي تنزف عليها دم انربط لساني ماكدرت احجي شي غير "الله ياخذني".
نجمة: وياخذنا وياج لو الله ياخذنا كلنا لو يعوفنا كلنة انتي تمرضتي شوية وصارت مصايب وراج شلون لو رحتي؟ !
نيزك: الله يفرجها ان شاءالله اروح ادور كواكب اني ابني ابني درين بالجن علينة غطنة زين
نجمة: لاتهتمين باموري يمنة بس وين تلكينها هسة لكواكب؟
نيزك: كالت رجعت منين ما اجت راح اروحلها اشوفها هناك
عفتهن مبهوتات ورحت للمطبخ سحبت العباية مخليتها ورة الباب وفتحت باب المطبخ الهوى البارد لفحني يجمد تجمد عيوني صارت تهل دمع مو من البرد من القهر الجو يجمد وين هي بهذا البرد والجو المگلوب!
عدلت عبايتي ولفلفت روحي بيها جابتلي شهب قمصلة مطرية خلتها على راسي تهمس همس
شهب: هاي انطيها لكواكب طلعت هيج
نزلت دموعها وراحت تركض جوة باوعت لنجمة الواكفة تباوعلي حيرتها مو اقل من حيرتي تاكل بشفتها بقهر وتعصر باصابعها.
نجمة: خايفة عليجن نيزك وين بهليل انتن بنات
لا تخافين الله ويانة مايعوفنة.
يرجعجن سالمات ويحميجن من اولاد الحرام و العثرات التطلع صفح
ابتسمت بضياع وهزيت راسي: -امين ديربالج على ابني
اشرت على عيونها وطلعت وراي تباوعلي طلعت بنص الليل وحدي والمطر يزخ فوك راسي الشوارع باررردة وضلمة فارغة من البشر والحيوان واني طالعة ادور اختي شي يصدكة العقل ادور على بنية شابة بنص الشوارع!
يتبع في الفصل الأول
فصول رواية المنجمة
- رواية المنجمة للكاتبة كفاية كاظم الفصل الأول
...باقي الفصول اتباعا كل يوم فصل