رواية المنجمة للكاتبة كفاية كاظم الفصل الرابع عشر
طلع ينشف بوجهة غاسل حتى راسة مسح ركبتة وخلة المنشفة عليها اجة سحبني من ايدي كعد وكعدني بحضنة طاوق خصري بيدة اخذ مني نفس وهو مغمض عيونة كال.
ضرغام: احجي الحقيقة وتبقين وياي؟
بصوت يرجف جاوبتة: احجي الحقيقة
فتح عيونة باوعلي بذبول وبضياع جاوبني
اني ضايع بعيونج الوسيعة
رجف جسمي من كلامة ردت ابتعد شدد علية
ضرغام: حبيتج اني نيزك لاتكسرين بية
بهذي السهولة!
نطقتها واني اباوع بعيونة مسح على خدي باصبعة.
ضرغام: اني ماحب بس حبيتج
تصنمت بيدة وهو يقرب خشمة يشتم بخدي يحجي بهمس: مثل الطلقة شگيتي گلبي ودخلتي
ابتعد مبتسم يكمل ياشر على كلبة
الفرق بينج وبينها هي تموت الواحد بساعتة وانتي تخلينة معلل يتمنى الموت
نيزك: مو هيج اني والله
ازيد وازيد
عوفني امشي
لا ابقي نسولف
بس
بطلت ما المسج
باوعت لايدة المطوقتني رفع حاجبة ماعاجبة كال
اني كلت لمس شبيج لا تحجين اسكتي
احجي هو اريدك تحجي
شوكت تريدين نتزوج.
دنكت راسي ماعرف شكول رفع راسي باصابعة
ضرغام اني محطمة ماكدر نفسيتي.
كطعت كلمتي غصيت بيها عيوني تلالي بالدموع حضن وجهي بيدة كال: ارممج بس سلميلي روحج
لاتشردين مني خليج بقربي وانتي تزهرين
بللت شفتي بحيرة
نيزك: اخاف من التجربة
لا تخافين من گلب هاويج
سكتت ماعندي رد احس خدعة كلامة وبنفس الوقت احسة حقيقة تهت.
ضرغام: اسويلج عرس تلبسين بدلة اخذج لمكان بعيد منا شدكولين؟
وجهي احسة يطلع منة نار انربط لساني ربط رجع يشدد علية بقوة يكلي: عوفيها علية بس لا ترفضين.
اشوف اختي بالاول شدكول
حجيتها وفتحت ادية كمت صار كدامي يحجي
عوفي اختج بحالها انتي جبيرة مو زغيرة حتى ماتعرفين تاخذين قرارج
اني ماكدر اطلع من شورها
هي تكرهني وتحبج هواي ما تنطيج الي
لا تخاف كواكب مو هيج تفكر اذا زين تكول زين ماطولة بية خير إلى تقدمة على كلشي
اسوي كلشي بس لاتكولين لا
مشيت خطواتي مبعثرة لحكني يكول.
باجر نحظر لكلشي لانطولها
مارديت علية اريد بس اطلع عقلي متشتت بية الف فكرة شي يضرب بشي اني ماريد شي بس اريد كواكب تكعد وياي ونسولف بكلشي هي كالت لايتقربلج اكيد عدها شي.
ضرغام: جاوبيني لا تسكتين
غمضت عيوني من عصر خصري بيدة نترت ايدة صوتي يرجف كتلة: بكيفك
طلعت بسرعة ماصدك عافني اطلع جسمي يرجف وجهي نار حتى راسي يوجعني شسويت بية نعلعلة
غسلت وجهي بمي بارد والباب اندك بقوة رحت افتحة امشي بسرعة.
قبس: خرب نايمين شنووو
بهتت ملامحي بوجهة كال
قبس: عبالي ضرغام ردت ادفر
جوة ضرغام
ابتعدت اخلية يدخل
قبس: شلونكم
الحمد الله زينين
ذهب موجوده
لا مو هنا
ولا تكعد
دخل جوة واني وراة اشوفة يباوع منا ومنا شهب بالغرفة هي واموري مالهم صوت راح لغرقة ضرغام دفرها برجلة ساكت مايحجي شي ماكو رد من جوة دار وجهة باوعلي ودنك راسة يريد يضحك شكيت بية شي ويضحك علية رحت من شباك المطبخ شفت نفسي مابية شي شبية هذا!
رجعتلة بعدة يدفر بالباب ولا حجة شي بعدة ساكت صاح ضرغام من جوة.
ااانعللل ابوووكم الباااب ولد النعااال
هم مارد علية طلع ضرغام فتح الباب لاف نفسة بالمنشفة جان يسبح درت عيوني عنة وقبس دخل ضربة بوكس على بطنة تمالخو جوة.
قبس: منو ابن النعااال ولكك
ضرغام: حيوووان ادفررر ليش غير زمااال مططي رجلك اطول من وجهك
الازرگ الخايسس تتنمر.
يتمالخون ولا يكول كبار تعجبت بيهم ضرغام صاح بية: كاافي مو لاف روحي لف لا يتطشر العرض
ماكو غريب خل يطشر
رحت اركض للمطبخ شبيهم ذولة واني بمكاني اسمع قبس يكلة: جان انتظرتني نتزوج سوى ماشايف
ضرغام: بكيفييي يلا ولييي
جان انتظرت العرس
ما احب الانتظار برررا يلا
غطيت وجهي بيدي هذا شلون يفكر من المستحة صرت نار دخل للمطبخ فتح الثلاجة طلع موز كال
اختج وين شو ماكو
جوة شرايد منها
اريدها.
فتحت عيوني على وسعهن مصدومة من كلمتة كمل مبرر: احجي وياها هو عادي اخذها شوية وترجع
سكتت حايرة كال: يحتاج اعرفها على نفسي صارت الخطوبة فجأة
حقك
خليها تبدل منتظرها
دخلت جوة بس فتحت الباب لكيتها بوجهي جانت تستمع لكلامة واموري هم وياي لازك بيها ضاعت ابتسامتها من شافتني دخلت وسديت الباب.
شعندج واكفة هنا
شهب: وياي
لا وي اموري ماما امير شعندك هنا
امير: ازة الاسجر(الاشكر) نليد نسوفة
رفع حاجبي وهي تسد بحلكة تكلة.
انت تشوفة كلت مو اني
امير: تزابة هي دالت دوم وياي
ضحكت عليهم شرد منها وهي تعض باصابعها متحلفتلة: اني اعلمك الخااايس
امير: اني مو حايس اتي تزابة
ركض يختل وراي ويضحك وهي وجهة انصبغ عيونها دمعت تكلي: نيزك هو كلي كومي مو اني
نيزك: فهمت
امير: نانا تزابة هي
شهب: بسيطة اني اعلمك منو الجذابة
لابد وراي يمدلها لسانها وهي تريد تلوحة صحت بيها: امشي بدلي قبس يريدج.
جمدت بمكانها فاتحة عيونها تريد تحجي ماتكدر عكدت حاجبي كتلها: شبيج؟
مابية شي
روحي بدلي يريد يحجي وياج
نزلت عيونها متوترة مدت ايدها لامير تكلة: امشي نبدل نطلع
جلبت بية كتلها: روحي انتي وحدج امير شكو
امير: اني زلمة
رفعت ابوس بية: اروح فدوه للزلمة بس خليها تمشي وي عمو الحباب ومن تجي تجيبلك حلويات.
هز راسة موافق بسرعة يقتنع الحمدلله مايتعبني لايعناد ولا يخبث يبجي عليهن من يطلعن رغم متعلق بيهن، راحت بدلت ورجعت خدودها وردية رغم مامخلية شي لوجهة شبيها هاي هيج تخجل حتى ماحاجي وياها عود.
طلعت وياها امير يكلها: اليد العاب هوووواي
شافة ضرغام فتحلة ادية ضحك اموري من شافة واني على ضحكتة ضحكت باوعلي وراحلة يركض حضنة يبوس بية ويشم.
ضرغام: انت كيكة جكليتة تنگررررط مثل امك.
فتحت عيوني خازرتة همزين قبس بعيد باوعلي يضحك يلعب بشعر امير: اشتعلت روح امك مثل ما اني مشتعل
شبيييييييك
بعد بعد خلي النعال يسمع
قبس: النسوان المعدلة صكااارة عفية هيج اريدج رزايل وصياح هذا ما ينطي عين
ضرغام: اكول تروح منا لا اكوم اطيح حظ حظك
قبس: شوف حظك بالاول صرت سحالة
ضحك بصوت وضرغام صك سنونة يريد يكوم بس ذاك طلع صاح وراة: الككك يوووم الككك
قبس: مثلكك اني.
شهب: مشيت وراة الرجفة بجسمي شكلت شبية ماعرف ليش بس سمعت صوتة گلبي راد يطلع من صدري واحوالي تخربطت كلها صعد وهو يضحك واني بقيت كدام السيارة ماعرف وين اصعد ماعرف انثولت واني اباوعلة صاح بية.
ماتصعدين المن واااكفة
اي
همستها ورحت افتح الباب الورة صاح بية فتح باب الصدر اشرلي اندار رحت اتعثر بلاشي صعدت وكلشي بية متخربط عطرة تارس السيارة يرد الروح، سديت الباب كلي: ارجعي افتحية وسدية.
فتحتة وسديتة باوعتلة مد جسمة علية هذا گلبي احسه طلع من صدري رجلية جمدت وانفاسي انخفضت فتح الباب ورجع طبكة بقوة رجع لمكانة وشغل.
قبس: لاتصيرين فاهية اطبكية بقوة
اي هو اني مو فاهية
لا واضح
درت عيوني على الجام اررررريد اطلع ماريد ابقى وياة بنفس المكان گلبي راح يوووگف ليش هيج يصير بية معقولة حبيتة شبسرعة لااااا اكيد مو هيج.
قبس: شلونج شهبة
زينة وانت
علي الله.
سكت ماحجة شي واني رجعت درت وجهي عنة اريد ابقة اباوعلة بس استحي ومن تصد عيوني بعيونة اتبهذل كل ما اريد التفتت اشوفة الزم روحي كوة نص الطريق شوية انداريت علية اخذ منه لمحات، لاحظت اول شي بية يجذب المقابل نظافتة بحيث بشرتة تلمعع لمعع ماعرف شنو يستخدملها مرتب بشكل كصة شعرة لحيتة ماكو شي زايد محددها تحدد وهاي بالايام العاديه، شكارة حلو وجذاب هو مو كلش اشكر مثلي شعرة.
عيونة صارت بعيوني حرت وين انطي وجهي من المستحة راساً انداريت واحس وجهي جمررررر.
بعد ما التفتت ولاشوية هسة شيكول علية طاح حظي اني ليش هيج ماصدكت وصلنا نزلت اشتم هوى رحت امووت قفل السيارة واجة يمي باوع بوجهي ملامحة عصبية دووم تحسة مخنزر.
قبس: يلا امشي
مشيت وياة لمطعم اني حتى ماكتلة وين رايحين نسيت اكلة تصدكون؟
صرت كدامة من التوتر ادير بعيوني ما اريدهن يصدن بية هو يكلب بالمنيو كال: شوفي شتردين.
اني ما اريد
قبس: اطلبي على الواهس
اخذتة اكلب بية اكلات اني ما اعرفها فكتلةة
اطلبلي انت وياك
بس اتعلمي تطلبين بنفسج
ها
انطي رأيج بكلشي لا تكولين بكيفكم ابدد اتعلمي تفرضين وتنطين رايج حتى لو اني طلبت ستيك وانتي هم ردتي كولي اريد ستيك لحم مو مثلك ولا بكيفك
بطلت ما اريد اكل
ستيك لحم ثنين وبعد غيرها شتردين
سكتت مبوزة شفتي هسة هذا يعلم لو يرزل شبية
قبس: هسة ليش تزعلين داحجي من مصلحتج
تمام
هو شنو التمام.
شبيك هسة شتريد احجي؟
اسكتي بس لاتبوزين
سكتت ماحجيت شي يريد يعارك شنو، خلة ادية كدامة مرتجي عليهن كال.
اي عرفيني عن نفسج
ليش انت متعرفني؟
اعرف اسمج وعمرج
اي زين بعد شنو تريد تعرف
اليعجبج احجية
سكتت اعصر باصابع ادية حايرة منين ابدي وشنو احجي فريت عيوني بالمكان كال هو: يا صف وتركتي دراسة؟
رجعت عيوني اله وتعابير الحزن بينت على وجهي كتلة: ثاني متوسط
زين
اي قريب على الوزاري.
ذبيت حسرة ورجعت للسكوت كلبي ينعصر من ينجاب طاري الدراسة.
قبس: جنتي شاطرة كسولة؟
ابتسمت بحزن وكتلة: جنت كلش شاطرة حتى اشطر من نجمة
شنو جنتي مقررة ترحين من تتخرجين
ماعرف صراحة بس احب الطب
حلو
كلش احبة المدرسات جانن يصيحلي الدكتورة
يلوكلج
شردت عيوني وهو مركز وياي فاجاني من كال
قبس: هو عادي نصير اصدقاء؟
اذا ردت عادي
ميلت راسي وهو يسولف
قبس: هم عندج اصدقاء
لا حتى صديقات ماعندي
يمكن اني محظوظ لان اول صديق الج
يمكن.
عادي اسألج بعد
عادي
ثلجت اطرافي من كال: شنو سراج بالنسبة الج
غمضت عيوني اهز راسي لا وضعي تخربط يمكن ماجنت محسبة يسألني هيج سؤال.
قبس: مو من حقي اسألج بس حبيت اعرف واتأكد اعرف
بصوت يرجف كتلة
من حقك تعرف اني سراج ماحبة اخاف منه هو مخبل مو صاحي يحبني بطريقة تخوف هو حتى شكلة يخوف شايفة انت؟
وجهة القندرة شايفة سويت وجهة جيس ملاكمة
احنا شردنا لان رادو يزوجوني اله لو صدك انتحرت بوقتها.
دنكت عيوني ايدي ترجف وكل جسمي سيرتة تذكرني بالماضي وتخوفني الله ينعلة هالقذر رفعت راسي شاهكة من ادية الباردة حاوطت ادية يضغط عليهن يعتذر يكلي.
قبس: اني اعتذر لان جبت طارية ماتخيلت هيج راح تتأذين اعتذر
عادي
سحبت ادية منه رجع لوضعة خلو الاكل اباوعلة ياكل بهدوء وكل شوية مسح حلكة بالاكلنس اكلت شوية وهو يحجي.
قبس: ماتاكلين المن طالبة هذا كلة
هو اني ماريد بس كلت على الواهس ف شبعت.
هذا لو سمار مثل الزمال لفاة لف ويرجع على اكلي
ضحك ياكل دك تليفونة بالحظة فتح خط والمكبر سوى عافة بمكاني وصوت ولد اجاني.
سمار: حيبيييي قبق وي انت؟
قبس: يم امك
اويي حبيبتي خليها تسويلي اكل وياها وانت نظف البيت مو بس كاعد
قبس: انظف خيستك الخايس
تروحلي فدوة
هذا منو العفط
حبيبي صافي
عارات ثنينكم
تغاااااار تغاااار
كون اشيل بلاعيمك ببلايس على هذا الصوت
يخبل صوتي بس انت هم تنغاار
راح اطفي شرايد.
سمار: حبيبي انت بس كلي وين حتى نجيك الدنيا ضوجة بدونك
خلي صافي يفيدك
صافي ينمل بسرعة بس انت اوييي يروحي شجاي تاكل
ستيك لحم
لاااااا واني ولك وواني
شعلية بيك اني ماتروح تاكل
اريد باااجة اشتهيت لو كايلي نروح سوى شبيك نحس الفلوس وندفعهن بالنص
استغفرالله باجة لاتلعب روحي
مثقف مو بيدك هسة كلي ويامن طااالع
ميخصك
لا مستحيل وي بنية طااالع؟
امممم
باوعلي وسد الاتصال قفل التليفون كمل يكلي
هذا صديقي سمار
حلو اسمة.
رفع راسة خزرني بررت: هيج حسيتة مميز
الله عليج ليش هيج اسمائجن غريبة صراحة
كواكب، نيزك، شهب، نجمة ؛
ماما تحب الفضاء ودراستة هواي تبحث عن الكون والفضاء حتى بغرفتها كواكب والكرة الارضية اما النجوم مهووسة بيهن دائماً ترسملنة بيدنا نجمة صغيرة جانت تكول النيزك نار يحرگ الكل ويدمر كلشي اذا مال عنة اما النجمة الكل يحبها ويتأملها مزينة السماء وقريبة على القمر
قبس: والشهب الكل يتمنى يشوفة حتى يتمنى امنية.
شهب: صحيح تكول الشهب بسرعة يجي وبسرعة يختفي ما تملة الناس بالعكس تتمنى يطول حتى تتاملة
قبس: الوالدة ذواقة الله يرحمها
ابتسمت بحزن ودنكت عيوني كتلة: آمين
كملنا وطلعنا بقيت برا واكفة اتأمل المكان اجة من بعيد اتاملة واسال نفسي بس لاحبيتة شلون حبيتة ماعرف بس احسة ينحب، صار كدامي طگطگ ركبتة وكال.
قبس: تتمشين شوية.
هزيت راسي مشينا سوى والهوى بارد يلفح وجوهنا شعور سعادة دخل گلبي وروحي من قربة اي اي اني حبيتة ولاول مرة احب بحياتي ليش وشلون لحد يسألني لان ماعرف الجواب.
صدفة اجيتي بحياتي
اعرف
اني ما ناوي اتزوج
مو ضروري تتزوجني اذا ماتريد اني هم ما اريد
مايصير بعد لازم نتزوج كدام الناس صارت وبيت عمج بس يفرغون يسوون مشاكل هسة هما ماكاعدين بس يكعدولج يأذونج.
سكتت املخ بشفتي وهو متردد يحجي باوع بوجهي وكال: هذا الاسبوع نتزوج
شنو
مثل ما سمعتي
دك گلبي بقوة احس راح اوكع على وجهي شنو بهذا الاسبوع زواجي يصير الفكرة ارعبتني وخلتني ارجف كمل كلامة بضياع كال.
اني ردت اكلج كلشي ماردت اضم عنج شي
بلعت ريگ انتظرة يحجي جنت محظرة دموعي لان متاكدة راح ابجي راد يحجي وهز راسة يكل لنفسة لا مو وكتها.
شهب: شنو المو وقتها؟
الزواج
اجلة
مايتاجل خل نتزوج والله كريم.
من التوتر والخوف والخجل كتلة: رجعني للبيت
قبس: بس انتي ليش هيج
رفعت راسي اكلة: شنو شبية
احسج متوترة وجهج احمر شكو
هو اني هيج
لا مو هيج انتي شوفي اديج ترجف شمسويلج هسة اني
سكتت حتى ماباوعت بوجهة بعد رجعت امشي للسيارة وهو يحجي: خليج ريلكس
تمام
رجعنا بالطريق كتلة: شكد عمرك انت
خير من الله
شكد يعني خير الله هواي
اكبر منج ب 9 سنوات
يعني اني 19 وانت 28
بالضبط
حلو
اي حلو الحمد لله بعدني شباب.
وصلنا للبيت اشوف نجمة فاتحة الباب تاشر للكامرات مال بيت ضرغام جنها خبلة تموووت ضحك طبك السيارة بعيد ماتشوفنة هي اشر عليها يكلي: عليج الله اختج هاي مو خبلة؟
لا هاي جاي تاشر لنيزك حتى تشوفها هسة هي كاعده بالمطبخ
قبس: والقرآن اختج هاي خبلة
لا شبيك هي هيج طبيعتها مو خبلة شمسوية
خبلة ولسانها طووويل وتجفص وعرررمة هم
حرام لاتحجي عليها
انزلي انزلي ادافعيلها هي من تمدح العروس غير اختها وامها.
نزلت اضحك هو بقة واكف رحت لنجمة من شافتني تفاجات كفختها ودخلتها جوة استمتني بوس بعدين لزمتني استجواب.
نجمة: وووين جنتي طالعة ولج
وي قبس وهسة شافج ياشرين للكاميرا يكول اختج مخبلة هاي
خبر تگلاة ماكو غيرة مخببل وملطلط وغثة
ياا شبيج نجووم
كرصتني من زندي بحركة تكلي
خيولي هذا كاافر لا ادافعيلة
يااا شبيج
استغفرالله مو كافر بس هيج ماحبة خيولي شهب
ترة خوش رجال
ياااخووش يااخووش لج غثثثة وعصبيييي
مو كلش.
هو شنو المو كلش خيولي اتطلكي منه واتزوجي علي
شبيج نجووم
شبية على وين اكو منة
اتزوجية اذا عاجبج
لا انتي اتزوجية واخلصي حتى انتي ونيزك تكعدن بيت واحد وهم قريبات علية
مايصير تكولين هيج حرام اني هسة باعتبار زوجتة
بيج حجاية ماتنحجي
لاتعيدينها نجمة.
ابتعدت مني تكمز بحركة تذكرت مقهورة على ميس لان تحبة بس اني شبيدي عليها اذا اطلع من ذمتة وين اروح وعدمنو اكعد سراج وعمي مايعوفوني بحالي ابد كال هسة هما ماكاعدين واكيد جاي يسددون للقضية وسراج كالت امة مو زين مريض مجرد وقت يرجعون يداهمون حياتي خليني خاتلة بسد رجال محد يكدر يحاجيني منهم، ميس بنية شابة الف واحد يتمناها صح اني احبها بس ماعندي حل ثاني غير اتزوجة.
رحت لنجوم اهديها واكلها.
حقج تمنعين هذا الزواج اني اعرف ميس شنو بالنسبة الج وتردين خاطرها بس هذا الصار محد مخططلة ولا مخلينة على بالنا
اعرف والله اعرف بس ماكدرر اوافق على علاقتكم وهو حبيب صديقتي
صار بعد نجوم لازم تبلغينها
هزت راسها بنفي والدموع تجمعت بعيونها تكلي
نجمة: من زمان خابصتني بية خبس بس ماعرف هو سنين تحجي بية طلع قبس لج هي مو بس تحبة لا مهووسة بية
وهو يحبها؟
كلتها واحس كلبي يريد يطلع من مكانة يمكن لو كايلة اي جان رجلية ماتن.
نجمة: مانعرف هو رسمي وياها صديق مرات مابينهم شي
بس هي مو تحبة سنين شلون ما لاحظ هالشي
ميس مو من ذني البنات المفضوحات ماخلت يبين شي عليها كتمتة بداخلها والكتم يمووووت
هزيت راسي متفهمة مشاعرها حسيت نفسي اني نفسها هم جاي احبة من طرف واحد مشكلة هاي بس الفرق احنا راح نتزوج هي تنگطع علاقتهم تبقى اصدقاء وبس.
دخلت وياها جوة نسولف بس ما كلتلها هذا الاسبوع زواجنا خليها تعرف من نيزك افضل لان اني بالاصل مامقتنعة تجي هي تزودها علية.
كعدت وياها بالغرفة هي تكتب واني احجي وياها
هسة شبيج لا كلش تضوجين هيج
نجمة: اختي الاحبها عقد عليها الشخص الاكرهة
هسة ليش تكرهينة
خطفني وخنگني خاف ماتدرن لان اني ما احجي
فتحت عيوني بصدمة وهي بدت تحجي وتعد وتصف كل جملة تخلي غلطة وياها علية حجت وحجت واني ساكتة صاحت بية.
ماتحجين هسة من عرفتي حقيقتة سكتي
شهب: اني وانتي مانعرف شنو السالفة اكو لغز بالموضوع والا هو عندة سيارة ليش يصعد نفرات
حتى ميس كالت وفسرتلي ان هما جانو يلاحگونهم على الفلوس فهو نازل بدون مايحسون بية وصاعد باص حتى من يدخلون السيارة مايلكونة هو والفلوس
هما منو ذولة
اعداء ماعرف شنو بس ميس تكول فلوس شغل بينهم
ميس تعرف من ابوها؟
اي كلشي يسولفلها
وبعد شتعرف عنهم
اكثر شي سوالف شغل مو حياتهم الخاصة.
شهب: كملي قرايتج اني رايحة
اكوم اوصلج
صدك شلون الاوضاع هنا
زينة ناقصها وجودجن
ياريت خالي جاي قبل لاتصير السالفة
مايكدرلهم خالي يدخلون لنص بيتة ويطلعونجن بس مايكدرون يدخلون ناس غربة يخافون منهم.
طلعت وراي مشيت واشرتلها بيدي تدخل جوة مشيت سريع واشوف سيارة واكفة بعيد بيها شخص يشبهة سراج اني شفتة لو رحت اركض واكسر بالباب رجعت اباوع ماكو اختفت ومن دخلت حسيت نفسي جاي اتخيل واشبهة الناس بية هو مو سراج هو يشبهة سراج او يمكن اني تخيلي يشبهة بس الحقيقة لا!
نجمة: لزمت تليفوني معبسة ملامحي هسة شلون احجي وي ميس والله تكسر گلبي خرب روحك قبس انوب هاي اختي مدري شبيها جنها حبتة العوبة هو وين ينحب بس ذني مايفكرن.
راسلت ميس ماكو ماترد اكيد عدها شغل اليوم هي بالشركة شكد رادتني اداوم بس ماقبلت بقيت قافلة اني شكلي مو شكل شركة غيرها بغيرها دخلت اضحك على المقاطع جنت نايمة على بطني رافعة رجلية ليفوك فزيت وكعدت اعدل بشعري واخلي الموبايل بوجهي اقرا الاشعار الوصلني قلصت عيوني اقرا عدل.
نجمة: يااا يااا ولجن هذا استاذ فقار مراسلني يماااا.
دخلت على المراسلة اشوف الصورة الشخصية واتاكد من الاسم قبل لا اقرا الرسالة زين اي ولجن هذا حسابة باسمة وصورتة بمكتبة لابس قاط اسود شابك ادية سوى ومرجع ضهرة ليورة طالع بريفكت
رجعت اقرا المسج كاتب.
فقار: السلام عليكم شلونج نجوم وين مختفية؟
وين مختفية اني هسة شكلة دهر دهرني بس لساني شطولة ماعرف ارد كتبتلة كوة اكتب واعدل لان يطلع خطأ واني مامتعودة استخدم التليفون بالكتابة.
نجمة: وعليكم السلام استاذ شلونك.
اني زينة الحمدلله
بنفس اللحظة كتب
اذا زينة ليش ماتداومين
بطلت اني استاذ
فقار:؟
مو تعلمت كافي ماريد بعد
بكيفج هي
اي استاذ بكيفي انت هم مابيك حيل تعلم بية مشغولين انتو
نجوم اتصال عادي اتصل
سكتت اكل باضافري ياااا هذا صدك اتصل خليت التليفون بالكاع وطفرت من مكاني اكمز واصيح
ماااارد ماارد مااامااا خلي يتصل ويمل هسة.
مرة مرتين يتصل واني اباوعلة من فوك ماعرف احجي اني بس ميس اتصل بيها هو بالحقيقة كلامي مدري شلونة واجفص مو بالتليفون دخلت مرة خالي تكول: ها تليفونج يرن عبالي نايمة
لا كاعدة
ماتردين شكو؟
هذا المدير يتصل واستحي افتح
تستحين؟
مدري
هو شنو ماتدرين افتحي الاتصال عيب ماما
هزيت راسي وكعدت بالكاع تربعت ورجعت زلوفي ورة رفعتة من الكاع انقطع الاتصال باوعت لمرة خالي كتلها: راح شو هذا
حقة مل ارجعي اتصلي بية
خاف عيب.
ووولج عيب من ماتردين علية
اي يلة يلة اتصلت
اتصلت كمت من مكاني افتر فتح الاتصال اجاني صوتة يكلي: ها بابا نجوم
نجمة اني استاذ
ضحكت اكتم بضحكتي كال هو: اعرف بيج نجمة
عكدت حاجبي ودكيت رجلي بالكاع بعصبية كتلة
مو هيج استاااذ شنو نسيت غير تكلي الجمع والمفرد ثنينهن يضون
سمعت صوت ضحكتة تحرك من مكانة يكلي
فقار: ما نسيتي بعدج تتذكرين
ما انساها هاي استاذ دوم
احسن شي تسوينة
هسة استاذ شنو انت ردت
ترجعين تشتغلين ويانا.
ما اشتغل وياكم
وياي تشتغلين
هم ما اشتغل وياك
ليش انسة السبب؟!
هيج
شنو الهيج
استحي منك
ليش شمسوي اني
ما اكول
نجوم لاتعلين كلبي كتلج داومي. تعاي داومي ليش تعاندين اغير وظيفتج اذا ماعجبتج
بعدني هسة اني وراي امتحانات
مابقة شي كم شهر مو ميس وياج
اي بس ميس تختلف
فحطتيني نجووم
اسمعة شرب مي وراح يمشي بعدين فتح الجرارات وشي يخرخش اسمعة ابتسمت من كال
فقار: ما تردين شكولاتة؟
اريد استاذ هي والله طيبة ماكو مثلها شكد دورت.
لا تدورين لان مراح تلكين
شنو مخصصة بس الك
لا موصي عليها من الخارج ولعلمج مو كل احد انطية منها
احسن لا تنطي منها لو تخلص منين نجيب مثلها بقيها استاذ يمك ودزلي بيد ميس
مادز بيد ميس انتي تعاي واخذي العلبة كلها
عبالك انغر والله ولا تغرني بعد ما ارجع
الله كريم نشوف منو الماتجي
استاذ الموظفات يكرهني وحاقداات علية
شعليج بيهن انتي؟
وقبس هم حاقد علية يريد يحطلي سم باللفة
نسيبج راح يصير.
خيولي ولا اخلي يتزوج اختي هي اختي غير جمالها عالمي انوب حبابة وفقيرة
وهو ماناقصة شي
ناقصة اخلاق شوية
نجووم
استااااذ
صرت احس روحي مدرس من وراج
واني بكل الحالتين طالبة عندك
طالبة كسولة شالعة كلبي
لزمتتتتتك ليش تحجي علية يم ضرغام مو عيب استاذ ترة حتى حرام تحجي شكلين كدامي شي وكدامه شي ثاني
ماحاجي عليج نجووم
هو ضرغام كلي وحتى بقيت احجي عليك
مامحصل بس الحجي اني
بعد هالحجي كلة ختمنة الاتصال ب
ترجعين نجووم؟
ان شاءلله استاذ
ديربالج على نفسج
اكيد
سديت الاتصال اسمع ضحكتة شمرت التليفون على الميز هسة شبية يضحك هذا درت وجهي مرت خالي بعدها واكفة مبتسمة كلتلي.
نجمة شنو اكيد تكلين للرجال
هو ردت بس انهي الاتصال ماعرف شلون حجيت
انتبهي ثاني مرة كولي ان شاءلله لو مع السلامة او ممكن انت هم
تمام تمام فهمت
كعدت وهي اجت كعدت يمي للعلم مرة خالي مو جبيرة ابد، دفعتني بضحكة تكلي: شكو منو هذا الاستاذ المهتم الامرج هيج.
هذا استاذنا الحباب والله بس هو حباب
يا الله كون حباب كملي
شكمل هو اني اتدرب عندة بعدين كلي اشتغلي سكرتيرة خاصة عندي بس هسة ما اريد ارجعلهم
ليش ولج وين تلكين هيج فرصة
ما اريد
هما الخريجين وين يلكون شغل بعد التخرج فرصة هاي اجتج
سكتت افكر بالموضوع لاحقًا بقيت الم عطوبي وهي تكلي.
شكد عمرة هذا
منو استاذ فقار
اي
ماعرف بس شوية جبير
يعني شكد تقدرينة
وسط الثلاثين بس ليش
كملي وبعد
ترة هو اخو قبس يجي هنا لبيت ذهب.
وطلع عرف بعد شتردين
واني شكو
اي صح شكو بلسانج هذا قبل شوية
شنو حجيت اااني
كولي شنو الما حجيتية
يااا شبيج خااالة
شكولاتة ونجوم ونجمة غزل علني
يااا شوف شوف وين الغزل ياخالة
االجمع والمفرد ثنينهن يضون مو غزل؟
وين الغززززززل يبوووووووو مووو غزل والعباس مو غززززل
نعلعلة عليج فضحتينااا مو مال واحد يحجي وياج انتي خبلة بالقرآن
طلعت ورجعت تكلي
خبلة وعوبة عقلج مطفي شغلية عوود.
بديتتي تذبين سمممج علية بعدنا بسم الله طلعتي دور مرة الخال الشريرة
اسمع صوت ضحكتها العالية من بعيد رجعت ادور مقاطع تضحك شو ضجت وين يلا اتصلت ميس استلمتني رزايل هي الفترة كلها ترزل بية واني ساكتة ومتحملة وين اكو مثلي اني.
ميس: ليش متحجين مثلاً
ماخذتج بعقلي
ام عقل الناضج
غصباً عليج
النجمة المضيئة
ابتسمت من سمعت صوتة انسحب التليفون من ميس واجاني صوتة يكلي.
سمار: ووين ولج وين صفة بيج الدهر
بالدنيا موجودة.
الحمدلله بعدج على قيد الحياة لج انقهرت عليج ليش هيج سويتي بينة
سويت اني
ماخليتيني اعيش مغامرات وياج جنت محظر افكار هواي الوحيدة المن جوي واجوائي
اي والله حتى انت مو تفسية
شعبالج لعد فرفوش اني اخ نجمة ااخ شحجي وشسولفلج على الغياب
سولف اليطلع منك
يكلج طيبة وغادة مسويات سفرة لام البنين لان بطلتي وماترجعين
شدراك انت مسويات
جابلي ثواب بس اني ما اكلتة لان مقهور عليج
يا روحي
تروحلج فدوه روحي.
انكطع صوتة واسمع صوت فقار العالي يرزل بية
شكووو دك مخابرااات وعايف الشغل شلووون بيك انت متكليي
سمار: ما جاي احجي وي غريب نجمتنة هاي
فقار: شكاعد تخرربط
هاي نجوم جاي اقنع بيها ترجعلي.
انسحب التليفون منه وانطبگ الخط بعد ما رجع اتصل انتظرت ميس تتصل بس ماكو، كمت خليت التليفون على الشحن ورحت وي مرة خالي اساعدها شوية ورة ساعة تقريباً اندك الباب عبالي خالي بس تعجبت من كواكب دخلت بدراجتها ركنتها رحت طفرت عليها ابوس بيها واضحك.
نجمة: لج هلااااااا بكواكب الفحل خرب والله مشتاقتلج
كواكب: خوش من اشتاقيتيلي
امشي ادخلي اسويلج اكل
ها خير رجعتي على سالفة اسويلج اكل.
ضحكت وهي وراي سلمت واني اسحل بيها لغرفتي كعدت واني حاضنتها اسولف وياها بلهفة.
وين ماوين
بالدنيا شلونج انتي
الحمدلله زينة انتي شلونج دراهم شلونها
والله دراهم شوية مو زينة
يااا خيرها
تمرضت بساع بساع هي بس تروحلهم ترجع مو زينة بس هالمرة كلش
اهلها
اي منعتها منهم ماتمتنع هما مايريدونها وبس يحركون بگلبها
ذبت حسرة واحتدت ملامحها بغضب
كواكب: بس لو تعوفهم جان ارتاح گلبي دعوفيهم ذولة المجلوبين.
عفتهم سولفيلي شتسوين هالفترة
اشتغل
شغليش
بعدني مامستقرة على شغلة جاي اجرب واترك ماكو شي يناسبني صدك شوكت ترحين تشترين قاط التخرج وهاي السوالف
ياتخرج
تخرج غضنفر الگ. شبيج هو غير راح تتخرجين
لو لا؟
اي
بعد شنو غير تجهزين لو اني لاطشة
سكتت ماعرف شحجي
نجمة: جاي يحضرون الها
وانتي شو ماكو امشي كومي امشي جنج ماتردين تسوين
اي
راااح اكووم ادفرج لج شنو ااااااي
مو شسمة.
كووومي لج هاي فلوس لاعبالج اني ناسية أصلاً اني منتظرة هذا اليوم واحسبلة يوم يوم
ضميت وجهي بحضنها همست
الفلوس نحتاجهن لغير شي
فداج فلوس الكون
تجن كلجن
واحنا الممنونين اكيد حتى غضنفر اذا تردين اجيبة
شسوي بية
خلية يعيش الشعور ويشوف الطلاب
سحلتني ابدل واروح وياها طلعنا ونيزك بالباب واكفة فاتحتة تباوعلنة كواكب حايرة تعوف الدراجة بشنو نروح صاحت عليها نيزك.
نيزك: ماتجين عيني شنو كلبتي على ذيج الصفحة.
كواكب: راجعتلج اسويها طاخ طيخ
نيزك: هسة سلمي حتى لو بالجذب
كواكب: ماعرف اجذب اني راجعتلج عود
هسة وين رايحات
نتسوگ
شنو تشترن
طماطة تردين اجيبلج
طلع ضرغام سحب نيزك دخلها جوة وكواكب صارت تستغفر بصوت عالي دارت وجهة عنهم ونيزك توخر بضرغام تگلة.
نيزك: شبيك بس اشوفهن وين رايحات
ضرغام: لا تخبليني كم مرة نبهتج لا تفتحين الباااااب
كواكب: هييييي انت البعيجي لاتصيح لا اجيك
ضرغام: تعاي شتسوين مثلاً.
كواكب: ادخل بيك سجن شتريد اكثر من هيج تحترم نفسك ولا تصيح بوجهة ترة ماباقية
ضرغام: مرتي وما اريد واحد يشوفها كفرنااااا
كواكب: دخليها بالاول تصير مرتك نجوم السما اقربلك
دخل وركع الباب بقوة وكواكب تسب وتغلط بية صارت اعصاب واني اسكت بيها.
نجمة: شبيج كواكب صار نسيبنة شوية غيري اسلوبج وياة
كواكب: اغير خلقتة الاجرب الساقط يحلم يلمس نيزك
بس هي بالبيت وياة.
خزرتني رجعت ليورة خايفة من عيونها كالت بحركة: نيزك ماتنطية وجهة اختي واعرفها مخليتة بس يتحسر عليها امشي ولاتحجين شي اكبر من راسج
سكتت جاي نمشي اجة ورانا على بسيارتة طبك صعدت كواكب يمة بالصدر واني ورة هي ترتاحلة تسولف علية وتسالة رغم تدري بية مايحجي.
كواكب: وين ذهب بالبيت موجوده؟
هز راسة لا يقصد مو بالبيت
كواكب: ضرغام كاعد بالبيت مايطلع للمعرض.
سوالها بيدة نص ونص بقت تحجي على ضرغام واشكال التمنر تنمرت علية هو مبتسم ولو يكدر يحجي هم جان صاح بيها اسكتي.
وصلنا للمول طبك السيارة ونزل ويانة يمشي
كواكب: يمعود كفيت وفيت ارجع احنا نرجع
هز راسة لا واستمر يمشي ورانا كواكب تكلي بصوت ناصي: خافو عليج ماخلوني اخذج وحدج
ضرغام دزة لان طلعنا وحدنا
حبيبتي دزة علمودج مو علمودي
هسة ثنينا طلعنا شبيج
اني اعلمة بس ارجع.
دخلنا وكواكب كلشي ماتعرف بس تمشي وياي شاريد تجيبلي فرينا المحلات كلها اشتريت قاط وحذاء كعب وباقي الشغلات نصهن حصلنة عليهن والقليل بقة ميس اتصلت بية فتحت اتصال وياها اراويها وهي فرررحانة طايرة من الفرح تضحك مامصدكة تصيح بفرحة.
ميس: واخيراً نجووم ولج من البداية وخلصينة الا تشلعين گلبي
والله لو مو كواكب سحلتني فلا اجي بس حكم القوي على الضعيف
كون تكفخج تكفخ على هالسان هي مرة وحدة بالعمر.
جاي تحسسيني عرس هو
كواكب: احلى من العرس ولج غبية العرس يصير مرة ومرتين بس التخرج مرة وحدة بالعمر تختفلين بثمرة تعبج وتخلين صور تذكارية لهذا اليوم
كفايه: محتاجة كواكب تقنعني
مثل ماتقنع نجوم
نجمة: ولاتخلن الواحد يعيش شعور الحزن
كواكب: واني موجوده اتعارك وي الحزن لعيونج الحلوة
ميس: كواكب ماتصيرين اختي حبابة حتى لو بفلوس اشتريج ادفع بيج شكد ماتطلبون
نجمة: مانبيع حبيبتي يلا ولي
ميس: اريد مثلها ما.
نجمة: هي وحدة وصارت اختنا ماكو بعد
اخذت كواكب التليفون مني تحجي وي ميس تكلها
مثل نجوم انتي بمعزتها ما افرقج عن اخواتي ولو صارلج شي اول الواكفين الج
سحبت التليفون منها
يلا ميس ولي شوفي طريقج احنا راجعين
تفلت علية واني سديتة بوجهة طلعنة وكواكب اشترت لنيزك ولامير وشهب كل وحدة قطعة ملابس.
نجمة: هواي عليج منين تجيبين
كواكب: عندي فلوس و اني المن اشتغل.
تنفست براحة وفرح وسعادة مو لان اشتريت لا لان هي وياي وماناسيتني ولا ناسية حفل تخرجي رغم بعيدة عني وضروفها معاقة بس ماقصرت وياي بشي واحد يكول رايحة وي امي لازمة ايدها نمشي وعلى كدامنا منتظرة باوعتلي وكالت.
ترة مصاريف التخرج عزلتهن الج من الفلوس البگتهن
ضحكت وهي كملت تكول
اي مو من شغلي خاف ياخذج الحنين فكرت بيج وعزلتهن
يا روحي انتي.
رجعنا للبيت نزلت قبلي اخذت الغراض دخلت اراويها للبنات لان اعرف منتظراتني هي دخلت وراي بالباب واكفة سلمت على البنات شوية وصاحت.
وين ضرغام
نيزك: شتريدين منه؟
عندي حجي وياة
كواكب عوفية لاتسوين هوسة حبابة
انتي لاتدخلين واني ما اسوي هوسة بس احجي وياة واولي
طلع ضرغام على صوتها خزرتة بحقد تكلة
كواكب: امشي نطلع نسولف برا
ضرغام: شبية البيت يگرص ماتحجين بية
بكيفي.
طلعت بالشارع ونيزك مبهوت وجهة تباوعلهم ابتسم يكلها: نتفق على الحاضر والغايب
نيزك: تحجي صدك يا حاضر هذا هسة اخذني على كد عقلي
ماخذج انتي وعقلج
لاتحرگ كلبها فدوه انطيها على مايها
هز راسة موافق اكدت الة بكلامة
نيزك: اني ما اطلع من شورها
خزرها وكال: الباب ماينفتح.
طلع واحنا بقينا واكفين وحدة تباوع بوجهة الثانية نيزك تروح وترجع متوترة ومرت فوك الربع ساعة يلا دخل ضرغام وجهة يريد يطك من العصبية وبس صوت شخطة الدراجة سمعناها نيزك صوفرت دخل هو ما حجة شي اجتنا تكول بخوف
نيزك: تعاركو شصار بينهم
شهب: يمكن كلام عادي ماصار شي
نيزك: لج هي حتى مارجعت النا
راحت وراة وشهب تكلب بالغراض طلع مبدل بيدة السويج طلع من البيت ونيزك صافنة رحت اسالها
شبيج شنو كال
ما كال شي بس بدل وطلع.
تتوقعين شبينهم
ماعرف خايفة من هذا الشي
ماكو شي ان شاء الله
نيزك: من هذا اليوم كواكب مارجعت واني اكل بروحي اكل عليها ضرغام مايكعد بالبيت حتى غدا مايتغدة ومن اسال امة تكلي هو هيج جان مايجي للبيت بس من اجيتي صار يتحجج بالغدا ويجي هو هناك يتغدا.
حرت والحيرة حيرتين شبيهم ذولة كلبو وجوهم عني لاتهون علية اختي وحتى ضرغام جان يسولف ويتشاقة تعود عليه مهتم بينا هسة اختلف كلش حتى ما اشوفة شوكت يرجع لنص الليل ومن الصبح كلش يرجع اهلة مايحجون وياة ولا يسالونة ومن اسال ذهب تكلي.
عوفية يرجع وين طاير
مو خاف بسببي مايجي
وانتي شعليج
كلت
دخلية هم يشتاكلج وراكم عرس.
لزمت گلبي بيدي وبقيت بحيرتي، التهيت وي نجمة وتخرجها هي وميس يحظرن من تشوفني ضايجة احسها ينكسر واهسها صرت اضحك واتشاقة واني والله بالي مو وياي واحس روحي ضايعة.
واخيراً شفت ضرغام اليوم ما طالع من البيت طلع من الغرفة لابس بدلة رسمية سودة بقت عيوني معلكة بيه راح ورجع واني صافنة شهب تهز بية تكلي: شبيج ولج عيونج
شطالع هذا
لايكلة كلش
ماشفت بحياتي كلها واحد لايكلة الرسمي والاسود هيج مثلة
صراحة اي.
بس شوية ضابة ضاب المفروض اعرض مو؟
ذاك هو وكليلة المفروض تلبس اعرض
خزرتها وحسيت على روحي شجاي اخرط اني داتغزل بية لو شنو بالضبط مافهمت روحي شلت جنطتي واموري يطفر كدامنة طلعنا كلنة اي اليوم حفلة تخرج نجوم فرحانين اكثر منها تعبت وشافت الضيم يلا وصلت فرحتنة ماتنوصف بيها الوحيدة بينا كملت وتمسكت بالدراسة رغم الصعاب.
سهلة عفتها تطبخ كالت تسوي عشا بمناسبة تخرج نجوم شكد لحيت تروح ويانة بس ماقبلت كالت هنا نحتفل طلعنا كلنا ناقصتنة كواكب ضرغام مشغل اغاني طول الطريق فرحان يضحك يباركلها كل شوية.
وصلنا للجامعة كواكب هي وميس كدامنة لكيتها انبهرت بشكلها ولبسها مو ميس الحلوة الانيقة في كل زمان ومكان لا كواكب الطالعة شكل ثاني لابسة قاط اسود بسيط مابية شغل سادة وشعرها شوية طولان لابسة طاك اسود مرجعتة بية احس گلبي يريد يطلع من الفرح بشوفتها حضنتها ابوس بيها واتغزل والبنات وياي كل وحدة تحجي شكل.
كواكب: كافي يلا اسكتن
نجمة: بالقرآن تموتين احلة مني
كواكب: لا شافج القرآن على هذا الجذب مو وكتها نجمة.
ميس: اجنبية بامتياز نفس الاستايل والشكل
كواكب: هذا غضنفر هم هيج يكول
نيزك: انتي بس لو تعوفين هذا الاملح
كواكب: شبية املح غضنفر مو املح ولا اقبل تحجين علية احلى من رجلج جنة غراب لابس اسود وهو اسود بعيجي بامتياز
نيزك: هسة اني ما ادافعلة بس واحد يحجيها لله ضرغام اسمر وسمارة خفيف اليسمعج يكول صدك ازرك هيج
عفست وجهة تخزر بية وتصيح: انوب لابس مثلي خرب وجهة الازرك.
غلست عنها وسكتت كواكب كلش تبالغ بوصفها لضرغام اليسمعها يكول وحش مايكول البنات صارت تحوم علية صارت شكو يارب تحركت من مكاني من شفت وحدة تحجي وياة وتضحك هاي شلون اجت فتحت وياة موضوع وشلون هيج راساً ضحكت.
ضرغام ماشفت اموري
عد شهب ذولاك
روح شوفة اني اريد اخذ صور
رفع حاجبة متفاجا من كلامي حتى اني متفاجاة بروحي اخذ صور شنو واني حتى مو بالي اشوف البنات ياخذلهن المصور التفتت علية يكلي.
ضرغام: اني اخذلج خيولي المصور
مو احلى
لا اني احلى اصور واسحبهن الج
سحبني ياخذني بمكان فارغ واني مصدومة العيون علينة ولامهتم هو وكفني بالحديقة يعدل وكفتي وياخذلي صور بتليفونة.
ضرغام: دنكي راسج شوية وابتسمي
سويت مثل مايكول واني كل ماينطي تعليمات اطبقهن اخذلي هواي وضعيات اجة يراويني واني عيوني يلمعن بفرح صور تجنن محترف بالتصميم
ها شلوني
صدك عاشت ايدك يخببببلن والقرآن
والقرآن انتي التخبلين.
ضحكت وبنفس اللحظة جمدت من حضني بقوة ياخذ النة صور هو مبتسم واني جامدة ماخذة وصعية التمثال بالصور ادفع بية اكلة.
ضرغام طلاب عيب لايشوفونة
ناهبج اني لو طالب وياج بالقسم غير مرتي
اي بس مو هنا
بكيفي واريد ابوسج هنا بس كوة لازم روحي.
دفعتة بقوة ورحت اركض يسويها هذا ويخزينة اجة يضحك ويباوعلي دنكت ابتعدت عنة وجهي احسة نار وهو عيونة علية سحبتني كواكب ناخذ صور جماعية كلنا سوى اخذنا وميس لازكة بكواكب حاضنتها تاخذ صور هي وياها بس ونجمة تخربها عليهن تحشر روحها
ميس: نجووم ولييي هواي اخذتي وياي اريد بس اني وياها
نجمة: هي شنو غير اختي ترة ما اخليها تاخذ.
كوة سحبناها وخليتهن ياخذن صور راحن سوة بزيهن وشهب تصور بيهن فرحانة تضحك على المدرجات اهل ميس اجو ابوها يعتذر منها يكلها اجلت الاجتماع واجيت.
دموعي نزلت واني اشوف اختي خريجة شهب تطش عليهن جكليت ماعرف تضحك لو تبجي عيونها علينة نجوم مدمعة فرحانة كل شوية تخطف نظرة منا مامصدكة هي خلصت وانتهت معاناتها وي الدراسة بعد محد يهددهة بيها.
حضني ضرغام لصدرة يبوس براسي ويمسح بدموعي يكلي: تمنيتج هنا وي الطالبات وافرح بيج
ابتسمت بوجهة اكلة: والله اني فرحانة واحس بروحي متخرجة نجوم سوت الماكدرنا نسوية
بوجودجن طبعاً
خلصت الحفلة وخلصت دموعي وياها نزلت حضنتني وانفجرت بالبجي كلنا نسكت بيها ومكياجها خرب سحلناها نعدل بية وهي الشهگة لازمتها كواكب مكتفة اديها تتأملنة بعيونها سحبتها بستها من كصتها ورفعت اديها بستهن سحبتهن تكلي.
بس اديج ينباسن.
اروحلج فدوة
اني الاروح الجن فدوة ماتتخيلين شكد فرحانة
حضنتها واجت نجوم تبوس بيها تكلها
لو ما انتي تحاميلي ما اتخرج اني
تسكت هي ماتعرف ترد سحلتنا ميس وياها تكول
ضمن حيلجن ورانا حفلة
مشينا اني وكواكب سوة اخذتني على صفحة تكلي
نيزك بس ترجعين تلمين غراضج بدون محد يعرف
بخوف سالتها
شكو شنو صاير
ما نبقة يمهم بعد.