رواية المنجمة للكاتبة كفاية كاظم الفصل الثاني
لو ما لگيتها شسوي؟
وكفت التقط انفاسي نزلت الجنطة بالكاع وصفنت بالفضاء بعد هذا السؤال الطرحة عقلي واني امشي بنصاص الليالي كلبت شعري بيدي وضحكت اهز راسي اخذت جنطتي ارجعها على جتفي وكملت طريقي واني اجاوب سؤالي بنفسي.
كواكب: تلمني الشوارع اني بنت شارع وهما كالو كل واحد يرجع لاصلة وهاي اني رجعت لاصلي وحيدة بلا احد رجعت تلمني الشوارع.
امشي واصوات اخواتي وصريخهن يخترق راسي يريد ينفجر عقلي ادك على راسي بيدي وگلبي يفوور ناار يفوور صورة نيزك براسي ماتروح شلون منهارة وراي!
اجة جلب باتجاهي ينبح ماسويت شي كملت مشي وهو يريد ياكنلي بس مايكدر شغلتة بس ينبح مشيت بخطوات باردة لبيتها وصلت لفرعها والبزازين تلگتني ماهتميت ولا خفت رغم الطريق اظلم دامس ماكو اي انارة هناك جمدت بمكاني من حط فوك راسي طير اسود من ذني الطيور اليحطن فوك بيتها طار بسرعة.
رفعت راسي اشوفة اختفى سحلت جنطتي بعد مابية حيل ودخلت بيتها الحافظتة شبر شبر لكيتها واكفة بالباب مبتسمة ضحكت واني ضحكت وياها تركت سير جنطتي من ايدي وكتفت ادية لصدري.
كواكب: شفتي يدراهم رجعتلج وهاي اجيتج بعد ما طردوني
دراهم: فوتي حبوبة فوتي جوة جا اني مشتاكتلج
هههههههههههه لا دراهم لا ماتشاق لاحد عبث
شمرت جنطتي بزاوية الغرفة وكعت هناك اخلي راسي بين رجلية واهز بجسمي عصرت راسي بثنين ادية اصيح بصوت عالي.
كواكب: شووووكت دررراااهم شوووكت ااارتااااح گليليييي كلشيي ماحصلت من الدنيييا وينهمم همااا عنييي وين
صارت قريبة مني تمسح على راسي
دراهم: بعد بعد خليج قوية وربج يدبر كلشي
رفعت راسي الها عيوني مليانة دموع حجيت بكسرة
بس اريد واحد يساعدنا شنو ذنب نيزك والصار وياها؟ شنو ذنب شهب بالجاي يصير وياها؟ شنو ذنب نجمة ذالينها ذل ويشتغلون عليها؟ اميرر امير طفل صغير شنو ذنبة يكبر بينهم اااااالله ااااكبر عيشتيششش.
دراهم: كلة هذا اختبار اني مو هيج عرفتج وين ذيج الشعلة التحرك حررررك
طفت طفت
غمضت عيوني بيدها جسمي استرخة ما اشوف شي بس الظلام وصوتها اسمعة تكلي.
هسة شتشوفين
ظلام
لا لااا هسة اليفرحج شنو؟
ضحكت ضحكة متقطعة ومددت جسمي بالكاع الف روحي بقمصلتي خليت ادية جوة راسي واني اكلها
كواكب: وحق من خلقهم لاطشرهم وحقة هو خالقهم لاخليهم رماد ووگف على رمادهم اني كواكب يا دراهم كواكب اشهدي علية اشهدي على بنت الشوارع.
غفيت ماحاسة على شي ولا ادري بالحوالية كعدت الصبح امط بجسمي متكسرة خالتي مخدة وما نايمة عليها نايمة على ايدي كمت من مكاني رحت اغسل واشوفها واكفة بيدها صحن بية حنطة تنثر والغربان تلتم تاخذ حبات حنطة وتصعد وهي تضحك ومتونسة بهذا المنظر.
كواكب: مو المفروض حمام؟
حاجتني وهي ترجع تنثر مرة لخ وتطلع صوت الهن
دراهم: الحمام اله ناسة والغرابين السود الهن دراهم
رحت اغسل واحجي وياها
والله يا دراهم سالفتج غريبة انتي.
دراهم: كل واحد عنده سالفة تختلف عن الثاني يا كواكب
اي والله صدكتي
دخلت جوة اتحمة على الصوبة النفطية وهي لحگتني كعدت واني صبيتلها جاي والي كعدنا نتريك واني اسالها.
وين اختفيتي صارلج فترة
لفيت على ديرتي ورجعت
عبالي ما راح ترجعين
دراهم: موتي هنا تصير لا تخافين على هسة كليلي شلون نمتي
احلة نومة ماحسيت بشي
يلا تريكي وكومي
لشغلي بعد وكت.
المثلج مايضيع وكتة كاعد كومي شوفي مستقبلج لاتضلين مثل الغرابين والبعيجية منتظرين امثالي
حشاج دراهم ليش انتي وين اكو منج مرة
دكومي المنجمة يريدونها بشغل
كمت على حيلي اكلها
بعد ما اكشف لواحد دراهم شو يختفون لو يلزكولي
لو طگة لو اطلع مخة
ضحكت واني ابتسمت
كواكب: ساعة السودة من كشفت لذاك المدهور
لاتردينة لو اجاج يلا اتحركي لشغلج.
بس كومي شوية كووومي
عوفيني نجمة عوفينييي اااموت شلج بيه شلييج
نجمة: استغفرالله رربي وتااالي؟
لفت روحها بالبطانية ترجف رجف من الصخونة لاتقبل تاكل ولا تكوم من مكانها تسوي شي بس تبجي وتاكل روحها بروحها من طلعت كواكب ولهذا اليوم صار اسبوع اسبوع كامل وهي هذا وضعها تخبلتتت وانهاارت وي طلعتها بالشفاعات تاكل كم لكمة لخاطر ابنها مثل ماقبل شوية جبرناها.
بس كملي بعد اكلي ولج نيزك.
نيزك: ما اشتهي بلعومي مررر بس اكل تلعب روحي عوفني بنات
انفتح الباب ودخل يباوعلنا وحدة وحدة يسال بعيونة عليها خزرتة ودرت وجهي عنة تقدم علينة يحجي بقلق ويسالنة بخوف.
يوسف: شنو صاير بنات؟ شهب شبيها نيزك
بس سمعت صوتة طفرت تصيح علية بعصبية
نيزك: اطلعععع لككك اطلععع حقيررررر طلعوووة مناااا مارريد اشووف شكلة ولججج نجووومممم.
دفعتني بحرگة روحها لايبة من القهر كمت من مكاني وهو باقي مفهي يباوعلها وعيونة مدمعة يتقدم عليها يريد يشوف شبيها واني منعتة صرت كدامة فتحت ادية ما اخلية يتقدم...
نجمة: اطلع منا يلا يوسف اطلع
يوسف: شكو شبيها نيزك ترى هسة اجيت من الشغل محاجينها؟
نيزك: ويهممك لجججج طلعيييية مارريد اسسسسمع صووووتة ينرررفزززني ينرررفزززني
نجمة: اطلع بس اطلع كدامي رراح تمووووت شبببيك اااطلع.
طلع كدامي وركبتة عليها ضلت مكسورة دارت وجهها عنة تلف بروحها وترجف طلع برا الغرفة وجهه مبهوت يسال بحركة گلب.
يوسف: شبيهاااا هاي؟ شنو صاير وياها نجمممة.
نجمة: مريضة عوفها مو بحال شي هسة هي
يوسف: منو وياها هما السبب مو.؟
افنان: هلا بوليدي اشوفة اجة ملهوف على امة گلبها عليها اجاها طاير طيور يكول هاي امي التعبت والربت يركض لوجهة الشؤوم
يوسف: يممممة
افنان: يابعد اامك واهلها هلا بوليدي هلا بوحيدي.
سحبتة تبوس بية وتعاتب عفتهم ورجعت لنيزك بعدني ما دخلت الغرفة صاحتلي نور انضف غرفتها هزيت راسي وبدون اي نقاش صعدت فوك لغرفتها لكيتها مكلوبة كلاب ملابسها منثورة والغراض هووسة هووية ولا يكول بشر عايش بيها حتى الحيوان مرتب اكثر منهن تمنيت مو هذا حالنا جان كدرت شلون اردهن بس هسة مجبورة اسويلهم كلشي بدون ما اجادل مستقبلي بيد الحثالة امثالهن.
انضف واقنع بنفسي نجمة حبيبتي اليريد شي يترك شي مو كلها تنجمع سوى الدنيا ماتقدملنا كلشي جاهز لازم نضحي ونتعب حتى نحس بثمرة تعبنا بالنهاية.
نظفت الغرفة بالكامل سويتها تلمع تغير حالها من حال الى حال عضيت اصبعي بقهرر وتحسبت عليهن بحرگة گلب بعمري ما راح اشوف مثل خيستهن ونذالتهن نذلات بكل معاني الكلام، طلعت وصار بوجهي سامر رجعت ليورة وهو لا ارادي عيونة على جسمي صارت ابتسم وهو مثبت عيونة على تفاصيل جسمي.
سراج: اكول نجمة وين وصلتي بالدراسة؟
راح اتخرج بس هاي السنة
اها بسرعة كبرتي وشبيتي امس جنتي تكمزين بالشارع
هزيت راسي وعبرتة قبل لايخلص كلامة ويتمادى للاسف الكدامي حيوان مو بشر، لاگاني سراج سرعت خطواتي حتى اتخطاهم وكفت من صاح بيه.
سراج: اوووگفي اكلج
كول
شهبة وين شهبة شو ما اشوفها؟
شترريد منها؟ عووفهاا
سراج: ما اعوفها للمووووت.
دگ گلبي بجنون ووجهي اشتعل نار من كلامة كال مايعوف شهبة كال اي كال للممووت للمووت ااخ لو تسمع شهب والله تتخبل، نزلت على السريع بوجهي لغرفتهن شهب تلاعب بامير وتسكت بية اما نيزك على وضعها تريد تموت من وراهم شسوو بيها شسوو رحت يم شهب المتجاهلتني وما تشوفني بعينها.
اسويلج اكل؟
شهب: روحي كملي تنظيف وطبخ ماريد منج شي اذا جعت اعرف اطبخ واندل المطبخ
نجمة: هسة شحجيت وياج!
شهب: لاتحجييين ويااي شيي.
نيزك: بسجن ولجن شهببب شبيج
شهب: لا تدافعيلها ااانتي
ماحجيت وياها شي بقيت اعضعض بشفايفي حتى ماتنزل دموعي، اخذت اموري وطلعت عيوني ضلت وراها شكد حاقدة علية هالشهبة! تحسرت بقهر ورحت لنيزك الكعدت على حيلها تريد تحجي كعدت بصفها اسمعلها واسحب بديها اشوف حرارتها...
نيزك: اكلج
كولي نازوكة
نيزك: شوكت دوامج؟ باجر مو؟
اي باجر ليش كولي
باجر من ترجعين للدوام ترحين تدورين كواكب وتعرفين اوضاعها.
بس وين الكاها؟ هي الها اثر
نيزك: تلكينها ب بيتها المشؤم رجعت رجعت
ررجعت!
هي كالت رجعت راحتلها راحتلها
احتمال كالت احتمال رجعت
گلبي يگلي رجعت وهي يمها باجر ترحين لبيتها وتشوفينها الي.
صار، اجيبلج اكل
انتي ماعندج شغلة بس الاكل؟
شسوي مثلاً؟ ماعندي شي اقدمة الجن بس هاي الاشياء البسيطة
ابتسمت وكمت من مكاني انرسمت ابتسامة على وجهي وگلبي وروحي من خلال حديثي البسيط وياها ضحكت اكلها.
نجمة: اليوم الغدة غير صددكن تاكلن اصابعجن وراة انتظريني مو تنامين بين مايكمل اصبة واجيج
طلعت اركض اكمل شغلي دخلت المطبخ اشتغل بسرعة ومندمجة بتفكيري قاطعني سؤالة التففتت علية.
يوسف: خل اخذها للدكتور خليها تبدل
لو تموت ما تروح وياك ااانسى
اجة يمي يحجي بعصبية وجهة كله خوف عليها
يوسف: وجههة احمر حييل ولج نجمة لا يصيرر بيها شي ترى الصخونة مو شوية ياما ناس ماتت من وراها.
ادري والله ادري بس شسوي ماتقبل تطلع من حالتها من راحت كواكب ولهذا اليوم هي هيج انت تعرف شلون متعلقة بيها لا تسال وتتفاجأ اختها ماتدري شي عنها ومطرودة من البيت تريدها تفرح؟
يوسف بحسرة: اتمنى تحبني ربع حبها لكواكب تدرين شيصير لو تحبني.؟
اسكت اسكت لا تگلبها بينة تحبك بعد الصار يعععععع صدك يعععع
يوسف: حتى انتي نجمة!
اي حتى اني ولا تنسى هاي اختي لاتشوف علاقتي بيهن سطيحة ترة ذني اعز من روحي وكل اليأذيهن يأذيني صاحبنا واحد وعدونا واحد
درتلة ضهري وكملت اشتغل اعوفة ياكل بروحة خلية يستاهل شلون ناس ماتعرف قيمة الشي الا من تخسرة كملت الغدا برياني دجاج قبل لايجن ويوكفن فوك راسي عزلت قطع دجاج لاخواتي وضميتهن بالفرن حتى لايشوفنهن وياخذنهن.
صار وقت الغدة كلها التمت عمي ولدة بس سراج ماكو يمكن بغرفتة نقلت الاكل وكملتة رجعت للمطبخ خدرت جاي وطلعت اشوف شهب اصيحلها تتغدى قبل شوية شفتها بالحديقة طلعت ورجلية جمدن من شفت سراج يتقرب عليها وهي ترجع ليورة خايفة وترجف تموت من الخوف بس تشوفة مو واكف كدامها وبهذا القرب،!
سراج: شهبة ليش هيج ماتخليني اشوفج ليش؟ مشتاق مشتاق لهلوجة الحلو عسل جنج عسل دخيل ربج.
يحاول يلزم خدودها المنتفخات وهي تصدة عنها ترجف من الخوف بسرعة تدخلت اباوعلها بخوف
نجمة: سراج عمي يصيحك على الغدا.
التفت علية ورجع باوع لشهب بنظرتة الوصخة ابتسم بخباثة وهو يشوفها شلون خايفة منه ونافرة حتى شوفتة يستلذ بهذا المنظر مجنون سراج مجنون! راح والضحكة شاكة حلگة بقيت جامدة بمكاني اشوف اختي حبيبة روحي بحال مايسر العدو وماكدر اتقربلها اخاف تصدني وشنو يصير يانجمة لو صدتج اختج هاي ولج لو الف مرة صدتج ماتبتعدين عنها.
ماترددت لحظة واخذتها لحضني اعصر بديها صايرات ثلج ترررجف بقيت اطمنها مايسويلها شي وما يرجع يتحارش بيها مرة لخ.
نجمة: امشي امشي ماخلية يتقرب ثاني مرة منج لاتخافين
شهب: انتي مو كواكب حتى ماتخلينة يتقربلي بس كواكب تصدة وتكسر راسة
نجمة: اي ادري ادري بس اني هم ما اقصر واكدر اضربة وافضحة والم العالم علية
شهب: بس ماتسوين ولا راح تسوين شي
دفعتني عنها وگالت بحركة.
شهب: ما احبج اااني تسمعين نجمة اني اكرهج لانج منهم بس كواكب ونيزك اخواتي انتي مو اختي
سمعتي
گلبي وگف الدم جمد بعروگي نفسي ضاع روحي طلعت وياريتها طلعت من صدك اختي ماتريدني والله هي اعز من روحي بس هنا السبب بعدنا هذا هنا السبب بكرة شهب إلى خلنها ماتباوع بوجهي اخر مرة نمت حاضنة شهب هي من رجع سراج تحرش بيها وبيومها ماجانت واعية من الخوف نست هي تكرهني وماتحاجيني.
عيوني احسهن جمرن نار تطلع منهن امسح بدموعي وماتوكف عيوني بجي غسلت وجهي بمي بارد يلة سكتت بس کلبي بقة گلبي ينزف دم من كلامها يتردد باذني كلمة
تكرهني ماتحبني اختي الاعزها اكثر من روحي
نصيت القوري واخذت غداهن شكد جنت متحمسة ناكل سوى ونجتمع على صينية وحدة بس ماصارت نفسي انسدت من كلشي دخلت خليتة على الميز وطلعت بدون ما احجي شي وياها رجعت للمطبخ صبيت جاي واخذتة الهم بعد ما خلصو الزلم عشتو زلم گال...
واكفة اطحن بروحي واحجي بيني وبين نفسي بغير صوت رجعني للواقع كائن لطيف يسحب بملابسي نزلت اله اسمعلة واني مكزكزة علية.
امير: دول نانا دول هلي تزي نددوم (دكول نانا دكول خلي تجي نجوم)
رفعت ايدة بستها ورحت وياة دخلت وبقيت واكفة بالباب: -ها نيزك محتاجة شي؟
نيزك: تعاي تغدي تعالي
ماريد اني ماكلة تغدن انتن
امير: مو بتيفج يلا امسي وياي.
اخذني يسحول بية تسحول ابتسمت وكعدت وياهن اكل اباوع لنيزك توكل بابنها وتفلس لحم مثل ماتسوي لابنها تخلي كدامنا ثنينا احس من الفرحة راح اغص بالاكل كوة تماسكت نفسي وكملت الاكل بخير وسلامة.
صار الليل وكل شوية اشوف سراج وين لو اتاكد انو شهب وحدها يلا ارتاح راحت نور لبيت اهلها اخذتها صبيحة عمتها، الشغل كلة كملتة انهد حيلي هد البيت صار هدوء كلمن بغرفتة شغلت الصوبة النفطية وكعدت اقرا النهار كلة ما الحگ اقرا بية الا من ينامون واخلص منهم ومن طلباتهم واني جاي اقرا رفعت راسي على صوتها من گالت.
شهب: برأيج ليش مخلينج تدرسين وما بطلولج لهذا الوقت؟
كافي شهب راح اتخرج كافي.
ليش بس انتي تدرسين من عدنا؟ جاوبي ليش تسكتين.
روحي شهب
اجاوبج اني يخدمون عليج حتى يخلوج تدرسين صرتيلهم خدامة كلة هذا الذل علمود شهادة!؟
وكع القلم من ايدي صرت ارجف وجهي اشتعل نار خليت راسي بالكتب احجي بصوت يرجف اريدها تروح مني.
نجمة: نيزك نيزك شوفيها روحي.
شهب: والا متى تبقين بهذا حالج عبدة الهم دراسة وراح تخلصين بس عبالج راح تتحررين؟ لا ماراح تتحررين راح يبقون يذلون بيج مادام انتي عايشة هنا حتى زواج ما يزوجونج ليش فنج؟
نزلت دموعي بغزارة وخليت ادية على اذني بكل قوتي اهز راسي متخبلة ماريد اسمع لكلامها ماريد اسمع الحقيقة خليني عايشة بخيالي بعالمي الموازي بتخيلاتي اذا واحد سمعهن يفقد من الضحك علية بس هذا انسب حل اسوية اشرد من كلشي.
كااافي كاافي بس اتخرج اتحرر والله اتحرر ارجع نجمة القديمة انيي مو خدددامة مو خدددامة والله
شهب: تعودتي على العبودية نجمة مايفيد بعد
نطقت هالجملة وانصرفت بهدوء مخلفة وراها اعصار جاي احس بروحي تنهار والله روحي تنهار كل الجاي اسوية علمود دراستي حتى يرضون علية ويخلوني اكمل ماريد شي من الدنيا بس اخذ نتيجتي وراح اخذها بس بعد شنو؟
بعد ما انذليت وانهت اخواتي كرهني الجاي ادرس علمودهن كرهني لان بعيدة عنهن ودومي مو وياهن!
اتگلب بفراشي والدموع تارسة وجهي كابتة شهكاتي حتى لايسمعن من حسيت بيهن نايمات كمت من مكاني اشوف نيزك حاضنة ابنها وشهب حاشكة روحها وياها وجانت من ذيج الصفحة كواكب تنام بعلت ريگي ونهضت بهدوء طلعت برا الجو يگص گص واني وجهي وجسمي مشتعلين نااار.
كعدت استنشق هوى بارد شوية ارتاحيت وتنفست بس جمرة احسها مشتعلة بصدري شيطفيها حسيت اكو حركة التفتت مخروعة ماكو شي خفت ودخلت جوة صارت بوجهي نيزك.
وين وطالعة مو الدنيا باردة
نجمة: اشتم هوى شوية
نيزك: ياهوى هذا ياهوى يمة بهلبرد
لزمت وجهي الصاير ثلج بيدها الدافية ومسحت على عيوني غمضت براحة وهي تگول.
نيزك: هالعيون الحلوات جريمة يبجن والله جريمة
تعبت.
حجيتها وشهكت حضنتني لصدرها تمسح على راسي وضهري وتبوس بية حتى ادية باستهن نزلت دموعها بهدوء تگول بحسرة.
نيزك: جان كل همي اجمعجن واسعدجن وكلشي ماصار من هذا كلشي ماصار طشروجن من بين ادية رحتن مني واخذتن روحي والله اخذتنها كل وحدة جرحها بروحي واني السبب اني ماكدرت احافظ عليجن ماكدرت احميحن اني اخت مو زينة ابد مو زينة
لا تكولين هيج نيزك انتي قوتنا ننهار بس تنهارين نعم الاخت حركتي روحج حتى تضويلنا.
اش اشش اني ادري بروحي مو خوش اخت لاتبررين الي
ما ابرر نيزك بس انتي مابيدج شي انتي اكثر وحدة تأذت بينة وتعذبت.
سكتت من سمعت شهكتها وين رجعتها وين ليا ماضي هذا ابتعدت عنها ابوس بيدها وامسح بوجههة
نجمة: راح يجي يوم وناخذ ثارنا منهم حقنا مايضيع وربج موجود احنا قويات
صح قويات لو ما قويات مابعدنا نشتم هوى. يلا تعالي خل ننام باجر وراج دوام.
اخذتني بحضنها نمت هاليلة بامان باطمئنان مرتاحة واحسني بخفة الريشة كعدت الصبح اركض ركض عندي دوام وراي هوسة وتعزيل لكيت نيزك تسوي الريوك اشرتلي بيدها.
روحي بدلي اني بدالج.
ابتسمت لا لا ضحكت ضحكة انتعشت روحي بيها اكو احلة من هيج صباح؟ طلعت بسرعة بدلت واجيت للمطبخ عمي سالم وصبيحة وافنان كاعدين خلت نيزك الريوك كدامهم بدون ماتحجي شي وياهم اشرتلي اكعد واني مامتعودة اكل وياهم سويتلي لفة وعمي سالم يحجي وي مرتة صبيحة...
سالم: شتفن شلون صارن ادميات من راحت بت الحرام؟
افنان: حتى البيت هدووء كبل كل يومية عركة لا والله كل وكت.
سالم: الحمدلله من خلصنة منها ورجعن بناتنا حتى كرهنا من وراها واستهترن
نيزك: نكرهكم من سوالفكم وتعاملكم ويانا لو حتى بهاي خليتو كواكب
سالم: لاتجيبين طااري اسمهاااا
نيزك: تاج راسكم كواكب
اخذت الصينية وراحت وهو ضل يصيح ويحرك بروحة وراها.
سالم: وولجن كااافي مامليتن من الكتتتل نيززك ولجج انتي حيووان لسااانج هذا لساانج شوكت يجوز من المرادد مو حتى جسمج ماضل بية مكان صاحي.
صبيحة: ماتسكت عليمن تحرك بروحك اكوم اكفخها تكفخ وابرد گلبي
افنان: عوفو نيزك خوية سالم عندي حجاية وياك بس اهدا بعد اخوك
سالم: كولي مايردج الا لسانج
افنان: اني اشوف السويتة مو صحيح من طردت البنية بحالة عصبية وين تروح خطية
سالم: جاي تقصدين بت الحرااام
افنان: اي هي نكسب اجر بيها بنية مالها احد نرجعها للمخزن تكعد بية واني احاجيها ماتسوي مشاكل وماترادد
سالم: هذا الموضوع ماينفتح مرة ثانية انسد بابة.
شرب استكان الجاي دفعة وحدة وكام ينافخ طلع لدوامة وضلت افنان تعوج بحلكها صفنت تفكر لحد هاي الحظة متفاجاة بيها وبتصرفاتها هي ليش تزنهم عليها ويضربونها وليش من تطلع من البيت تلح حتى ترجع للبيت معقولة تنقهر فعلاً عليها مثل ماتكول هسة!
صبيحة: اشوفج تحبين كواكب
افنان: حبها برص البت وكحة ماتنحب بس شسوي ينكسر كلبي عليها تضل بنية ومالها احد اخاف ولد الشارع يلعبون بيها.
وشمدريج ما لعبو بيها وين تبات الليل ولو هي جنها ولد محد بحالها
عفتهن وطلعت وجهي يريد يطگ من الحرگة ايدي ترجف ررجف شلون تحجي عليها هيج ماتخاف من ربها كلنة نعرف كواكب شنو كواكب وحشية مثل مايسمونها اي اتفق بهلشي محد يكدر يقترب عليها ترتكب بية جريمة باي شكل من الاشكال، واحنا نعرف تبات عدها بس هالفترة هي اختفت ويجوز هسة رجعت لدارها!
قبل لا اطلع مريت على البنات شهب بعدها نايمة بس نيزك تريك باموري من شافني طفر يركض باتجاهي فتحت ادية حضنتة وبوستة بقوة.
امير: وين لايحة الوح وياس
نجمة: رايحة للدوام هناك شببح مايصير اخذك وياي خاف ياكلك
امير: نانا (نيزك) هنات سبح ياتل ندمة
نجمة: لا ماياكلني بس ياكل الاصغار يلا روح يم ماما واني اجيبلك وياي مصاص.
ضحك يصفك بيدة وراح يركض لامة يشمرلي بوسات بالهوى لكفتهن منه وسويتلهم باي طلعت واني اضحك على سوالفة وي طلعتي طلع يمشي بصفي.
شلونها نيزك
مايخصصك يلاااا
يوسف: شبيج نجمة شكلت اني هسة هو جاي اسأل عليها
مايحتاج تسال لان مالك شغل يمها
خزرني بحقد وراح خاب دطير والله يا الله شلون ناس وصلت للجامعة لاگتني ميس صديقتي سلمت عليها ومشينا لمحاضرتنا تحجي علية الموضوع نفسة للمرة الالف...
ميس: اكلج عمري احنا لازم نتدرب حتى تصير عدنا خبرة
نجمة: وين نتدرب؟
بشركة حتى نطور خبراتنا ومنا للتخرج بسرعة نتوضف لان عدنا خبرة
انتي تتعيين بكل الاحوال لا تخافين ضامنة نفسج
ميس: هاي شببيج نجووم خلينا نجرب البارحة بابا عرض علية هالفكرة بشركة صديقة نتدرب وشلون شركة تملللللخ من افضل الشركاات الاهلية
حلووو
يعني شنو افتهم من الحلوو مالتج.
خاب شمدريني ماتسكتين عني اني بيا حال منو يخليني اتدرب شافطة انتي هسة مو زين يخلوني ادرس
ميس: لج ياغبية يومين بالاسبوع بسس ومحد راح يحس لان انتي بالدوام عبالهم وهو أصلاً مكمل لدراستنا تطبيق عملي النة هذا
نجمة: الله كريم شبيج هسة
ميس: اشتعلتت روح البالي
دكولي هيج علمودة تسحولين بية بالشركات ناقصة تسحول اني
لا انجبي شجابة هالخايس المعفن الملطلط الدايح.
بعد بعد بعد شخليتي انوب فوك كل هذا وتحبينة كبر طمج لو نضيف ومو معفن شسويتي علية
ضحكت بصوت عالي تضرب رجليها بالكاع شكد اتنرفز من ضحكتها الفاضحتنا سحلتها من ايدها وهي تعت بروحها تريد تكمل ضحكتها...
ميس: ولج راح اموت خليني اضحك
نجمة: سم بكلبج ضحكة جاكوج تدكين رجليج بالكاع.
رجعت تضحك بعد عفتها وصعدت هسة تاخذلها ربع ساعة على هالحال والطلاب كلها تاشر عليها وتضحك يلا ترتاح رجعتلي دور بعيونها علية بالقاعة عبالك طفل ضايع يدور امة اشرتلها بيدي لان القاعة جبيرة اجت تركض وتطگطگ بكعبها شمرت روحهة بصفي حشر وشعرها تنثرة على صفحتي.
نجمة: يبووووو ولجججج
ميس: هسة شنو سويت اوي
وجعوي شعرج بعيوني صار هسة لو عمية عيني.
ميخالف ميخالف اني موجوده اقرالج الاسئلة والاجوبة هم على طاري الاجوبة حبابة رديلي بالامتحان
نجمة: توخرين مني لا ازگطج ززگط بس تخبصيني وتكرصين بية نجمووم مانجوم مو حتى المطي يسمعج ويعرفج تريدين غش مني واتحداج مرة بت مرة هالمرة تكعدين وراي بالامتحان حتى اركعج بالحايط
اووووي شكد عنيفة
احنا كلنة عنيفات سودة بوجهة البالج
يروحلجن فدوة ولعنفچن.
ضحكت وسحبت الملزمة اراجع للامتحان وهي مادة راسها وياي هلبنية روحي من الدنيا لاتزعل مني ولاتضوج من تصرفاتي العاوجة شكد بينة فرق بس ولا مرة حسستني احنا مختلفات من ناحية اللبس لو الطبقة المادية حتى بالشخصيات مانشبة بعض اعرفها من ايام الاعدادية ومستمرة صداقتنا in forver.
كملت محاظراتي وطلعت اضحك وهي مجلبة بية الا تلزمني من ايدي مستحيل تبطل هالحركة.
نجمة: دوولي كافي بابا اريد اولي للبيت عوفينيي.
ميس: بس اوصلج لباب الجامعة
اووي تخاف علية من ابو الامنية
شعبالج لعد النسوان الخشنة
وفعلا وصلتني لباب الجامعة يلا رجعت طلعت اضحك والله احلى شي هي صديقتي شكد تونس هالبنية رجعت واتذكرت نيزك لازم اشوف كواكب وادورها همزين اني راجعة من وكت اليوم حتى ما اتأخر بالرجعة.
صعدت باص وكعدت بالاخير لان اني اخر وحدة يذبني بدت الناس تتجمع والاخير محد يصعدلة بس اليجون متاخر فباقية وحدي صافنة على الجامة صفيت روحي على الجامة كلش لان كعد رجال بصفي لحظة خل اخذ نظرات يمممة هذا مو رجال هذا جنتل ماااان شنو هذا طالع من فلم اجنبي استغفرالله استغفرالله واتوب اليه ربي سامحني بس يكولون النظرة الاولى حلال يلا كافي نجمة لاتباوعيلة مرة ثانية صح هو اشكر وابيض وعطرة يهف هففف بس ميخالف غضي البصر بنتي.
تحركت السيارة وفعلا مارجعت انتبهت بس اسمعة يدك مخابرات جان متوتر نزل قبلي واني باقية اباوع للطريق جني مطي صفنة تجيبني وحسبة تاخذني عدلت ملابسي وانتبهت الجنطة الولد ناسيها يم رجلي والله خطية هذاا نساها باوعت من الجامة ماكو حيل ابتعدنا وصارلة هواي من نزل شلتها من الكاع خليتها بحضني ثگيلة جانت جاي اكلب بيها ومدري شلون انفتحت وفتحت حلگي وعيوني من وياها!
الجنطة متروسة شدات شدات فلوووس حمر على الوان اول مرة اشوف هيج نوعية فلوس حدي لحد خمسة وعشرين اما ذني لااا دولارات ماعرف اشكال رسماتهن بس بالمسلسلات شايفتهن!
من الرهبة رجفة اعتلت جسمي سديتها بسرعة لا واحد يشوفها طبكت السيارة ونزلو العبرية نزلت اكگطگ خووف ورهبة نزلتها وياي ردت اكل للسايق عليها بس شفتة مو راحة اذا انطيتة هالمبلغ معقولة يرجعة لصاحبة؟ الجواب اكيد لاااااا والله شكلة من ذولة الناس العلاسة ف نزلتها وياي بقيت واكفة بالشارع وكلني اررجف راح اموت من الخوف شلون اخذتها وياي؟ بس هم ليش ابقيها؟!
ساعة عدل اني واكفة بمكاني وجنطة الفلوس بيدي ماعرف شنو اسوي ولا وين اوديهن عقلي وكف عن التفكير منظر الفلوس وگفة تماماً تأملت صاحبهن يجي لان هنا المحطة ويدور على السايق واشوفة بس ماكو!
وبلحظة واني واكفة طبكت سيارة دفع رباعي كدامي مظللة كلت اكيد مو يمي بعدني ما متحركة اريد اوخر منها وانفتح الباب ماحس الا الجنطة انسحبت من ايدي وتحركت بنفس اللحظة جمدت!
كلشي بية جمد حتى فص عيني بهلسهولة اخذوها وابتعدو منو ذولة الاخذوها؟ صاحبها وين؟ وشلون عرفوها بيها فلوس شلووون راح اتخبل عقلي وكف شلون عرفو بيها فلووس؟!
بلعت ريك بخوف وتحركت هسة يلا حسيت على روحي اني صارلي زمن واكفة تحركت بخطوات سريعة ادور على سيارة تجي تاخذني بس عبث هنا الگة بهيج وقت قررت اعبر للشارع الثاني هناك اكو هواي يمرن متعودة اروح اذا ما الگة واني امشي على السريع سيارة طبگت علية همزين ماسوتني طشار بعدني مامستوعبة اني بخير انسحلت بقوة لداخل السيارة حتى ماكدرت اصرخ ايدة ضخمة گاطع نفسي صرت ارفس بيدة واصرخ عبث السيارة مو تمشي لا تطير بينة تطير صرت اصارع بيدة اختنگت اريد بس اشتم هوى.
وووولك عوووفهاااا موو هييج هي اثووول
خرت روحي من عافني اشتم هوى وارجف كلني ارجف عيوني احسهن يردن يطلعن حتى حجي ماكدرت احجي بعد بس اسمع عركتهم.
عوووفهااا قبسس عووفهااا ولككك
قبس: ووولك سلمتهم الفلوووس ماشفتتتهاااا
دخل نفتهم السالفة منها لاتنخبص ونلوصها لوص
عدلت روحي اباوع بخوف اني بصف شباب ثنين يتنطحون وهذا قبس يريد يموتني انتبهلي السايق يگلي.
احجي وولج ماتحجييين.
نجمة: شحجيييي ولكمممم هدووووني شبيكممم مخابيييل ماعرررفكمم انيييي يمممممة
طرشتي اذني شلون صوت عليها ارجع قبس سد حلكها
يريد يسد حلكي واني انفجرت بية
ولكككك وخررر شتريدوون منييي يماااااا عصاباااات
قبس: لييش انطيتيهم الفلوووس
نجمة: وولكمم انتممم زماايل منووو انطة الصخاام منووو
قبس: السانج ااااكصة بس تتجاوزين بكلمة
عووووفني ابنننن القندرررة وووين ماخذيني.
راح تخطفنييي وتبيع اعضااائي الله لا يوفقكككك يا نذللل عارر على البشرية انتم تخطفون بالبنات الحلووات
كلشي شفت الا الجمال
ما اعررف جمااال والله
ضحكو ثنينهم رغم هذا الاشكر شكد عصبي بس ضحك عليمن زين ضحكو.
نجمة: شبية جمال تضحكون علية؟
سلامتة بس عوفية
اي والله مالي علاقةلابجمال ولا بكمال
وكفت السيارة التفتتت بخوف والسايق فتح الباب ونزل بقة بس قبس الاشكر كمت ابجي واصرخ.
العباس عليك لاتسوويلييي شييي ولك والله كوواكب تمووتك وتدخل بيك سجن ترة كواكب خبلة والله تروح بيها وانت بعز شبابك
احتركت روحج واحتركت روحي كواكب
تااج رااسك يا حقييير يحجي على كواكب وهو جنةابو بريص اشكرر
قرب وجهة مني رجعت ليورة كوة مسيطر على اعصابة.
قبس: كولي اي لولا خوش
خوش
الجنطة ليش اخذتيها
لانك غبي وعفتها وراك وين اكو واحد ينسة فلوس شدات اني جنطتي بيها بس الكروة وحاظنتها على كلبي.
شوفي كلمة زايدة ادفنج هنا ولا من شاف ولا من درة
الله يشوف كلشي لا عبالكم تنجون من اموت
هو راح ادزج اله بس احجيييي
شحجييي
وولك والله ردت اسلمها للسايق و.
دوشيششش مااات الملك عووف البت قبسس
التفت على صوت الولد الجان يسوق فتحلي الباب وقبس بقة ساكت يخزر بية نزلت بسرعة ورحت اركض صاح وراي.
مناااا ولج للشااارع العاام كبل اصعدي كية ولاهلج كبببل
نجمة: الله لايوووفقكم يا حقرراء عسااها بحضكم وبختكممم.
هسة يكول معتدين عليج
ركضت للشارع وعفتهم وراي جسمي كلة يرجف من الخوف اجت سيارة اشرتلها وكفت راساً صعدت وگلبي يدك بجنووون الصار كلة على بعضة مافهمتة حسيت روحي بفلم شنو جنطة شنو فلوس شنو ذولة صعدوني بسيارتهم وتالي خلوني اروح شي ما جاي استوعبة!
ايدي ترجف واني اشتغل اسمع افنان تحجي تحجي كوة لازمة روحي راح انفجر لو ارتكب بيها جريمة
افنان: وولج نيزك لاتغلسين حاااجيني اببني عووفية لا اسوي بيج الاسوء من الصار بيج
نيزك: هووو منوو يممم ابنننج منووووو؟
ركعت الماعون بالحايط صار طشار وعطت بحركة
ووخررري ابننج عنييي وخرررية اكرررههة اكرررهة موو يمةةة انييي مو يماااا
كامت على حيلها صارت كدامي سحبت شعري لزمت ايدها راصة على اسناني.
افنان: نيزك لاتخلين راسج براسي اسودنج والله اسودنج خاف بقة عقل براسج اطيرررة
نيزك: هههههههههاااااي ولج مسودنة اني هسة لو ارتكبت بيج جريمة ماحس وخري عنا احنا مخبلات بنات جبار فقددن عقوولهن
شلت دولكة كزاز ورفعتها بوجهة فتحت عيونها مصدومة حجيت بحركة واني ابتسم رعبتها تخاف من تشوفني بهاي الحالةة.
نيزك: افلشها براسج شدكولين هاا؟ احجيييييي اطيرررر رااسج
نيززززك!
التفتت علية واكف بالباب فاتح عيونة مصدوم.
نيزك: الله جابك تعاال تعال فهم امك منو الساحل روحة على منووو اني مو بحالك ولو يصبوك إلى ذهب ما اريدك افتهموووو
يوسف: شكاعد تسوين انتيي
تقربت علية والدولكة بيدي قدمتها اله
شوف اي واحد يأذيني ويأذي اخواتي انهية والله انهية كواكب راح ترجع هذا بيتنا خوش وانت وامك واي واحد بهذا البيت يحاجينة ارتكب بية جرائم مو جريمة.
خليت الدولكة وراة وعيوني تطلع نار منها اريد اكلهم بسنوني وهم ما ارتاح ااخ يا ناري التاكل بية باكل مشيت اطلع وسحبني من ايدي نترت ايدي منه وسطرتة راجدي على عيونة ماسمعت غير شهكة امة ومينا وراي...
نيزك: كتللللك لاتلززززمنيييي كتلككككك حذرررتك اكسررر ايدددك مرة ثااانية.
غمضت عيوني بالم من رجعلي الضربة وما اكتفة ضربني الثاني والثالث والرابع حاولت اصدة واحمي وجهي بس ماكدرت شلت الدولكة الكزاز وعبيتها براسة بلا وعي ماحسيت غير الكزاز ينتثر على رجلية والدم نزل غطا ملامحة ابتسمت براحة وايدي وجسمي كلة يرجف ماسمعت بعد غير صوت الصريخ العالي ونجمة سحبتني للغرفة كعدت على القنفة اتنفس بسرعة يستاهل كتلة اني كتلة لايلمسني بس مايفتهم يستاهل رفعت راسي اباوع على اخواتي شهب ترجف ونجمة تدك وتلطم صايرة ورة الباب...
نيزك: شبيجننن تررة يستاهللل يستفززني
نجمة: شسويتي ولججج نيززك منوو اليطلعجج منهم منووو
خرطت خدودها وجهة اصففرر كركم راح تموت البنية ماخذة الغرفة رايحة راجعة وتحجي بخوف
نجمة: كسرتي راسة ولج شلون شلون يمة الحگيلنة ولك بوية اطلع من گبرك تعال احميها منهم
انكسر گلبي من هاي حجايتها وتذكرت اهلي وشلون جنا عايشين بجالهم والله اميرات جنا هسة صرنا خدم ومكفخة بيدهم وسفة والله وسفة وهضيمة!
سحبت ابني لحضني ابوس بية والعب بشعرة وخطية ياروحي خايف ميت خوف وليدي يباوع لنجمة ولشهب وخانس يضم روحة بحضني.
نيزك: بنات كافي لاتخافن وكلشي يصير لاتدخلن بس اخذن ابني عدجن وعوفني اني ما اموت ترة الضرب مايطلع روحي لو يطلعها جان من زمان طلعت وخلصت تعودت اني.
نجمة: نيزك ليش ماتسكتين ليييييش ماتتفادين شرهممم ولجنننن ليييش يأذونجن والله يأذونجن شفتن شلون حرگو گلوبنا بكواكب وطردوها من البيت هججوها ومو بس هاي كل كلمة نحجيها راح ناخذ بيها عقوبة جبيرة
شهب: بلا هسة مات نيزك
نيزك: مايموت شبيجن ترى مانبتت السجينة بگلبة بس ضربة بسيطة على راسة هسة يضمدوة ويرجع مثل الجلب
نجمة: ضرربة بسيطة! ولجججج تهشم راسة تهشم ماشفتية.
تحجي بعصبية وتاشر على راسها جاوبتها برود رافعة حاجبي.
نيزك: ويطبة طوب يستاهل هالعار هو وامة متفقين علية احلف عليهم عمدة سوو هيج وراهم غاية
سكتت والبيت هدوء صار عمي بالدوام والولد مو هنا وامة راحت وياة للمستشفى بس مينا كمت من مكاني ولبست عباتي جلبن بية البنات مرعوبات وابني وياهن حاوطت وجهة بدية اكلة بهدوء.
حبيبي اموري راح اجيبلك مصاص هاي نجمة خالتك ماجابتلك وياها جذابة لا خالة مو جذابة يمكن وكعن منها بالطريق يلا اني راح اجيبهن واجي بسررعة
بستة بخدة وانطيتة لشهب
اخذية العبي وياة العبو باح يلة حبيبيني
طلعت ونجمة وراي تلطم وتدك حركت روحها حرك
نجمة: وين ولج وين ناقصة هي حتى تزودينها نيزك انتي الجبيرة العاقلة ليش تتصرفين بخطوات مامدروسة وتتاذين.
حبيبتي نجوم عقلي شخط من العشتة وصرت ماهتم لشي خل يضربون وهسة اني طالعة عندي شغلة صغيرة ابقي يم شهب اقفلي الغرفة عليجن ولا تفتحينها لاي كائن منا لمن اجي اختج امانة عندج
نجمة: نيزك عمي لو عرف طالعة من البيت مايرحمج فدوة لاتطلعين
اعلى ما بخيلة خل يركبة عشنا وشفنا خليهم يشوفون اجاهم الدور.
طلعت مامهتمة بس مقهورة على اخواتي هسة هنا خايفات واني والله ماخايفة على روحي كد ماخايفة عليهن اعرفهن يتاذن اذا تأذيت وهما يستقوون عليهن.
طلعت امشي بخطوات سريعة وصلت لبيتها وگلبي تسارعت دگاتة وكفت اجر النفس جر واني اباوع لهيكل بيتها المنحوس بيت قديم شوفتة تسد النفس الباب مالتة مفتوح طلاقة وحدة والطيور السود تفتر داير ماداير البيت عبالك غابة بلعت ريك وصلت لعتبة الباب كفختني ريحة تقبض الروح دخلت مامهتمة لخوفي ولمشاعري وصلت لغرفتها المظلمة ابتسمت من شافتني ورجعت ضحكت ما اهتميتلها وحجيت بصوت عالي...
نيزك: وين اختي كواكب؟
دراهم: هلا بالاميرة نيزك تفضلي يمة
ماريد اكعد بس اريد اختي وينها؟
دورت بعيوني عليها مالها اثر كامت هي على طولها تمشي محدبة ضهرها من الكبر اباوع لوجههة اسمر ومليان تجاعيد ورسوم مركزة عيونها بعيوني واهذا اكثر شي يرعبني درت عيوني صفح عنها واسمع ضحكتها العالية.
دراهم: تخافين من المستقبل؟ تخافين من الراح اكولة.
نيزك: ماتهميني انتي منجمة والله عز وجل في كتابة الكريم قال وكذب المنجمون لاتصدكين روحج هواي خلگ منجمة
هزت راسها معترضة على طريقة كلامي وياها ابتسمت بمكر وكالت.
بس اختج هم منجمة؟
اختي مو منجمة مثلج اختي لعبتي بعقلها وخليتيها تتوهم هي عدها بصيرة تعرف الراح يصير علمتيها التنجيم
ههههاااهااا ما علمتها شي هي منجمة من كاعها
عووفي اختتي عووفيهااا
اختج هي بخير انتي عوفيها
ما اعوفها الج اجيت ارجعها وياي.
دكت عوجيتها بالكاع وكالت بحزم.
كواكب هي الراح ترجع ثارجن من بعيد لبعيد
بس احنا ماعدنا ثار وي احد دراهم!
ضحكت بصوت اعلى منتعشة روحها ركزت بعيوني
واخيراً كلتي اسمي دراهم هههاههاههه واخيراً عتبتي داري وخليتيني اشوف طولج الحلو
ابتعدت عنها اهز راسي بحركة
دراهم: تتذكرين ذاك اليوم مو؟
رجف جسمي وهزيت راسي لا وهي تحجي مامهتمة الي.
دراهم: تذكرين من كتلج راح تصبحن خدم وحياة الاميرات تنسنها تذكرين من كتلج راح تعيشن وانتي ميتة؟
كافي كلشي الله كاتبة يصير خلينا نعيش بدون قلق بالمستقبل ماجايتج على شي اني بس اريد اختي
اختج بالمكان الصحيح وبالطريق الصحيح راح تعثر هواي تعثر وتطيح بس اكو من اليگومها على طولها
هسة هي وين؟
بشغلها
لفيت عباتي على جسمي ورفعتها من الكاع هزيت راسي وطلعت حجت وراي خلتني غصب عني اوكف واسمعها.
دراهم: نيزك اتذكري الزرع المات الماي يحيية والزرعوة راح يحصدونة، زرعهم راح تموتة غيمة خبيثة مطرها مسموم. والوردات راح يفتحن ويفوح عطرهن وماكو مهموش بلا جذر احمي روحج من نارهم واسمعي للمهاميش لا تمشين برايج
دك گلبي بقوة من كلامها المشفر ماتكول شي دراهم عبث ابد كلامها تعرف شلون تصوغة مشيت بدون لا التفتت عليها طلعت من بيتها لازمة گلبي بيدي شجابني الها بعد هاي السنين ااخ منج ياكواكب ااخ.
رحت للسوك اشوفها هناك ماكو غير هذا المكان تروحلة وتشتغل بية بعدني واني امشي اسمع صوتها تبيع مخضر وتصيح بصوت عالي.
كواكب: محمووود بشررفك جيبلي جاي وياك وجرخ
محمود: اطلبج فلوس اللفة ما انطيتيني
كواكب: لاتصير جلف هسة بس اصرف انطيك فلوسك ماعندي خردة
تقدمت اشوف جنها ولد شعرها كاصتة مخربتة واصل لنص رگبتها ومكصكص لابسة قمصلتها السودة طويلة مطرية بيها كلاو نازعتة ولابسة بديها جفوف سود وتعبي مخضر رجعت تصيح.
كواكب: طمامة تلاثة بالف تعزيلة يلااا على النظيفففف
تجي الناس توكف وهي تلكط بيدها وتوزن نزلت دموعي بقهر هاي بنية هاي اليشوفها يكول بنية كلشي بيها يكول هذا ولد اااخ ياگلبي شلون مايوكف ريت عمية عيني ولاشايفة اختي بهذا الشغل وبهذا المكان مو المفروض مثل البنات تهتم بشعرها بلبسها بدراستها تعتني بشترها!
مووو هذاااا المفروض مووو؟
شافتني من بعيد جمدت بمكانها مسحت دموعي وهي طفرت من البسطية واجت تركض علية طاير گلبها تلزم بديه بخوف وتحجي بقلق.
كواكب: نيزك يمة نيزك انتي زينة ولج؟
حضنتها اشهك وابجي بقهر
نيزك: مو زينة والله مو زينة من يوم عفتيني ورحتي ماكدرلهم وحدي احتاجج وياي
بعدتني عنها تلزم بوجهي وتمسح بدموعي الناس الرايحة والراجعة تباوعلنة وهي تبوس بدية تحجي
وتمسح دموعي.
كواكب: ادري والله اني ماعايفتج وحدج الهم اني الهم كلهم اذا ما اخليهم مايندلون راسهم من ساسهم نيزك بس انطيني صبر بس صبر واني ارجعلج
ارجعي وياي للبيت
تؤ ما ارجع كافي تعبت منهم ذلوني هواي ذلوني خليني هنا مرتاحة
اخاف عليج والله اخاف عليج
لاتخافين علية محد يكدر يدوسلي على طرف اني كواكب لو نسيتي منو كواكب
هههههههه لا ولج شلون انسة منو كواكب
صدقة وغربان اروح لهاي الضحكة اذبحهم كلهم بس كون تضحكين.
بس عوفي الذبح وارجعي لخاطري
لا نيزك بس ارجع ما استفاد شي رجعتي مابيها فايدة النة كل ماجنت بعيدة كل ما استفاديت اكثر وانتن ترتاحن
لاترحين يمها كواكب!
قصدج دراهم؟
اي هي لاترحيلها انتي مو منجمة
هه صدك اني منجمة اكدر اعرف الشخص شبية من عيونة بس يعجبني اعرف اعرف
بس حرام والله حرام هالشغل
كلني حرام اني لاتنسين
عصرت اصابعها بقوة احجي ضاغطة على اسناني كوووواكب.
اهووو شبيج هسة من المشتغل بالتنجيم ماتشوفيني اصبح امسي بالسوك هنا
ركزت بعيوني دقايق وبدون لا اگللها كالت
كواكب: استفزوج نيزك مو؟ طلعم نيزك المخبلة
هزيت راسي اي وهي صافنة بعدها رمشت بعيونها وكالت باستعجال.
ارجعي للبيت بسرعة راح يرجعون يلا كلشي لاتسوين لاتخافين من شي لمي اخواتج وابنج وبس يلااا.
دفعتني امشي ليكدام بسرعة كلامها شدني واثر بية من بعيد التفتت عليها اشوفها راحت تركض تخلي الكلاو براسها اختفت عن نظري واني رجعت للبيت اركض ركض وصلت اول مادكيت الباب فتحتلي نجمة الباب تاكل بديها سحبتني من ايدي وركعت الباب، تمشي بية سريع وتحجي بخوف...
نجمة: ولج نجمة راح يجون علينا راح يجون
محد يكدر يحاجينة
نجمة: سمعتها تخابر بيهم تكول صاير عندة تهشم بالجمجمة
يطبهم مرض فوك المرض وهو اولهم.
محد راح يرحمج وهو اولهم
اخذتها ودخلت الغرفة سديت الباب اجة امير ماد ايدة يريد المصاص شلون نسيت اجيبلة وين ذولة خلو عندي عقل.! بوزت شفتي و نزلت لمستواة لزمت ادية ثنينهن وحجيت بزعل.
قبل شوية رحت اشتريتلك مصاصات هواي واجيت اركض اكول ذني لوليدي لاميري هسة يفرح بيهن حبيبي وطلعتلي السعلووة تكلي جيبيهن لو اكتلج كتلها ما انطيهن اكتليني هي شكالتي وابنج راح يبجي عليج
امير: تلنة نبسي (نبجي) عليس.
شفت فكلت خل انطيها المصاصات لان ابني جبير مايبجي مو حبيبي انت ماتبجي؟
اي اني سبيرررر
اروح فدوة للجبير
بوستة واخذتة بحضني والبنات صافنات علية كعدت على القنفة واشرتلهن يجن كعدن خايفات وبالعاتها لعبت بشعر ابني واني احجي بهدوء وبثقة.
لاتخافن بنات شبيجن واذا اجن كواكب ركضت وركضتها راح تفحطهم تفحط
شهب: ررحتي شفتي كواكب؟
اي شفتها بعد روحي
نجمة: شلونها
زينة زينة هي.
بعدنا نحجي وما نسمع غير صوت افنان تلعلع تتهدد علينا تغلط وتفشر باسوء الكلام سديت اذان ابني بخفة طفرت نجمة من سمعت صوت عمي سالم يصيح بصوت عالي...
سالم: ووووينهاااا نيزززك اليوووم اشرررب من دمهاااا موووتت الووولد شتررريد؟
صار يضرب بالباب احسة تخسف اخواتي يرجفن ويصرخن بس اني لا گلبي بارد افنان تضرب بالباب وياة وثنينهم يهددون ويريدوني اطلع حتى يفترسوني لميت اخوتي بحضني وابني اهدي بيهم واكلهم مايصير شي.
نجمة: نيززك يموووتج اليووم هوو حاامي عليج
سالم: لججج نيززززككككك اليوم اطلع روحج مثل ما طلعتي ررروحة
بهذا الوضع الحامي والتهديد والرعب الجاي نعيشة ماكو لحظات هييج لحظات والبيت انرج رج عطنا بخوف سادين اذاناتنا من قوة الصوت وكانة انفجار الاصوات اختفت دخت واني بمكاني انرجيت رج وابني وشهب يتصارخون مرعوبين.
جاي نسكت بيهم اني ونجمة وصار البيت هدوء بعدها الدوخة بية ماعرفت شنو الصار شي اقرب للزلزال ماكو دقايق ورجع الصريخ كب بالبيت ونجمة طفرت من ايدي...