رواية المنجمة للكاتبة كفاية كاظم الفصل السابع
كعدت الصبح راسي يوجعني بعد ماكدر اتحملة الخياط ياذيني كالت كواكب بدلي اخذج لبست بسرعة وطلعنا للمستشفى رادت نيزك تجي ماخلتها كواكب كالتلها اني اروح وانتي ابقي بالبيت، دخلنا كصينا باص ورحنا ننتظر سرانة كالت كواكب خل نصعد بالمصعد رحنا وكفنا كدامة جان نازل انتظرنة دقايق وانفتح رفعت راسي وفتحت عيوني بصدمة اخر شخص بالعالم اتوقع اشوفة اباوع لكواكب هم نفس حالتي مصدومة لزمت ايدها
وهما نزلو من المصعد.
بلعت ريك متوترة احس روحي سخنت مامتوقعة اشوفهم بهيج مكان دنكت راسي العب بيد كواكب رفعت عيوني اله يباوع لحالتي باستغراب كال: -نجوم بابا سلامتج شنو صاير وياج؟
باوعت لايدي المجبسة يباوعلها باوعت بوجهة بزعل كواكب كلتلة: -حادث
رد بخوف وحزن
فقار: الحمدلله على سلامتج محد بلغنا اكول ماكو
نجمة: اي والله استاذ بعد ماتواصلت وي احد.
هزيت راسي باسى وكواكب تخزر بيهم خزر تباوعلهم من فوك ليجوة كالتلي بصوت مسموع: -منين ذولة تعرفينهم؟
استاذ فقار مدير بالشركة وهذا الاستاذ ابو عيون الملونة ماعرف اسمة بس يصير ابن عمة مو استاذ يصير ابن عمك ميس كلتلي هيج؟
فقار: بالضبط ابن عمي الغالي ضغيم
طبطب على ظهرة يباوعلة بابتسامة وهو يباوع لكواكب باستغراب مايحجي شي كال استاذ فقار
شنو ضيغم جنك تعرفها؟
ابتسم ورفع شعرة كال بابتسامة: -اووو كواكب هاي شلون ماعرفها
خزرتة بحقد كالت
كواكب: معثور مو بيدك
ضيغم: صدفة سعيدة منجمتي
كواكب: شو صار بيها ياء تمللك خيررررر
ضيغم: دخيل ربج ماجنت منتبة اسف عمي طلعتي تعرفين وتركزين بالكلام اكثر مني
كواكب: ترة اني دارسة لا عبالك تعبر علية.
ابتسم مدنك راسة يحك بلحيتة يريد يضحك والله يريد يضحك بس كاتم ضحكتة خرب روحج كواكب شبيج مجلوبة تصيحين على الناس انوب مو اي ناس ابن عم المدير.!
فقار: نجوم هاي اختج؟
اي استاذ هاي كواكب اختي
فقار: اتشرفنا انسة كواكب
ابتسمت بوجههة وصفنت علية خررب خررب ولج كواكب لا هسة يكوول غير شي قطعت صفنتها من كال ضيغم: -ماعندة شي لاتصفنين بوجهة
كواكب: لتدخل
ضيغم: صار بس عادي احجي وياج على انفراد.
كواكب: لان هاي اخر مرة تشوفني فموافقة
راحت كدامة مكتفة اديها وهو مبتسم بلطلافة شكد لطيف مبين ومحترم هالاستاذ بس راح اموت كواكب منين تعرفة صارو قريب مني اكدر اسمع اصواتهم.
ضيغم: شنو صار، وياج كواكب؟
ماعرف شكول وحتى لو ردت اكول مايخصك شي
صح مايخصني بس ناوي اساعدج لان طلعتي بوجهي
وراح اختفي عن وجهك شرايك؟
يمكن صدفة ترجعني التقي بيج
كلشي جائز
اساعدج بقضية الدعوة العليج.
لا لا اني شاردة ومشردة اخواتي بس افتح القضية يلكفوني والله ماتصير خير
انتي سالفتج كلش معقدة
التعقيد يمي ويوكف يا معقدة ضيم
فقار: حلوة هالصدفة نجوم؟
التفتت على استاذ فقار ابتسمت وكتلة
ها استاذ اي كلش
ايدج توجعج؟
شوية هيج
مكسورة هي؟
اعتقد تمزق ما انتبهت شنو كال الدكتور
فقار: تأذيج نجوم
ها لا استاذ بس استاذ انت مريض شو مابيك شي ليش جاي للمستشفى!؟
لا مو مريض نجوم
هم كلت شكلك مابية شي
فقار: تريديني اتمرض نجوم؟
يااااا استاذ صدك جذب ليش خو تعزل الشركة بعد كلها مرضى
ضحك يروح لضغيم اجت كواكب سحبتني من ايدي ودخلتني للمصعد الثاني لان هذا تحرك اباوعلها صفنت ورجعت باوعتلي متوترة كالت.
هذا الرجال منين تعرفينة نجوم؟
فقار قصدك؟ هذا مدير كتلج مال شركة
ها شركة!
اي رحت مرة وحدة داومت علساس يدربوني ميس صديقتي عدها واسطات هواي اصلاً يصيرون اصدقاء ابوها
نجوم نجوم
هاا
اريدج تجمعيلي معلومات على فقار
ياااا.
حبابة نجوم اذا داومتي يمهم حاولي تسحبين لسانة
غير تكليلي ليش تريدين معلومات عنة؟!
هيييج يعجببببني
اييي بس صوتج انفضحنا
نزلنا من المصعد وهي حالتها مو طبيعية متوترة ماعرف اوصف وضعها كعدنا ننتظر سرانا وهي تهز برجلها مكتفة اديها كامت تفتتر بالمرر مدنكة راسها بالكاع واديها ليورة شابكتهن رفعت راسها باوعتلي واجت يمي كالت: حباب استاذ فقار؟
اي كلش بس البشر ماينعرف معدنة من اول لقاء
لا لاهو حباب واضح
شبيج كواكب؟
كواكب ماتعرف روحها شبيها نجوم ماحب واحد يسالني هذا السؤال لان ماعندي جواب الة
هزيت راسي وسكتت عنها بس والله گلبي يتگطع عليها كواكب بالذات انقهر على تشتتها وضياعها الله اعلم شنو بداخلها من ضيم وقهر مرات احسها تشيل هم الناس فوك همها.
وصل سراي واني صرت ارجف اخذتني كواكب هي تحجي وي الدكتور كالتلة تاذيها غيرلي العلاج وخلاني احرك اصابيعي بصعوبة كملنا منة بعدها صعدنا للمضمدة تفتح الخياطات والله كمت ارجف والدمعة بوسط عيني واكفة بعد مراجع واحد وادخل ما تحملت وانفجرت بالبجي مخلية ايدي على عيوني ومنطية وجهي للحايط كواكب حارت شنو تحجي وياي تمسح على ظهري وتكلي.
عمري نجوم شبيج ما تاذي تخليلج مخدر لاتبجين بس تتاذين ماخليها تكملج.
كواكب والله توجع
ماتوجع نجوم امشي اجة دورنا راح يروح
تسحب بية واني وجهي عبارة عن دموع وخشمي يسيل امسح بية بيدي الصاحية ماعرف شنو من حظ شايلة ولا اعرف شنو من صدفة خااايسة لابعد الحدود شافني شافنييي تسحل بية واني بهذا وضعي ابتسم على شكلي الحقير واجة يكل الكواكب
قبس: لا لا شنو جاهلة وتسحلين بيها مو عيب بنية جبيرة عاقلة فاهمة متخرجة وتدور وظيفة هذا حالها! لا نجمة لااا تبجين هسة اشتريلج جبس بس تسكتين.
نجمة: انجببب يلا ولي منا كوواكب ماتشوفيننة شيكول علية اكتلية بسجينتج واني ادخل سجن بمكانج
كواكب: خيرررر سالمييين
قبس: اووو كواكب هاي كواكب ضلت بنفسي شوفتها
كواكب: دخيلك ربي مدري منين تطلعلي هاي الشكول انت منووو وشتررريد؟
قبس: سلامتك ضلعي والله لو انتي جاية تداومين عدنا جان صرتي ضلعي الثاني بدال سمار الخيسة
كواكب: ديلة امشي منا سرانا راح يروح لا تعطلنا
قبس: ولا يهمج اجيبلج اكبر دكتور بس كولي.
كواكب: ديلة بلة لان فكر كامت تطلعلي هاي الشكول الطاكة لو عندي فلوس انقرضو
قبس: احنا واحد ولو فلوسك فلوسي ضلعي
نجمة: من كون كسرو عظامك ان شاءلله
هاج اكلنس خنينتج سالت عيب امسحيها منا دكاترة راح تفضحينا
مدلي اكلنس يريد يمسح وجهي احس اختنكت من الفشلة وقلت ادبة دفعت ايدة وصرت ابجي بالزايد
قبس: لا يا خطية يا نجمة تبجين مثل الجهال ما ياذونج نجوم تؤ تؤ تؤ شوف ايدها مكسورة وخطية وجهج بيه زراك شوية.
مسحت وجهي اسحب كواكب من ايدها واگلها
نجمة: كوااااكب دچييية دچييية واني ادخل السجن بمكانج يلا دجية
نفخت بملل وسحلتني كدامة تصيح بالمراجعين: -سررانا هذا سرانا صارلنة شكد منتظرينة
دخلتني واني بس ابجي وامسح بدموعي جابت اكلنس تمسح بوجهي وتحجي وي الممرضة فتحو الخياطات واني انتهيت رغم خلتنلي تخدير
طلعتني كواكب تحضن بية وتسكتني يكول جاهلة صدك حتى نسيت عليمن ابجي من الوجع لو من الفشل!
عدلت شالي بيدها تضم بشعري وتمسح بعيوني تكلي
خيولي لاتبجين
فشلني هسة يفضحني يم استاذ فقار والبنات
مايسويها ولو سوواها امسح بية الشركة وكولي ماكالت
اي عفية دجية يستاهل
هزت راسها تسلكلي طلعنا نمشي وصار كدامنا استاذ فقار حاضن مرة متوسطة العمر ويمشي بيها وضيغم وقبس محاوطينة من الجهات هي تحجي وياة وهو يسمعلها مدنك راسة الها مرينة منهم وكواكب عينها عليهم باوعتلها المرة تكل لفقار وتاشر عليها.
شوفها شوفها تباوع علية اني مو حلوة تضحكون علية
فقار: لا يمة تخبلين انتي
فعلاً هي تخبل بشرتها سمرة وعيونها واسعة ملونة لون سمائي فاتح نفس لون عيون قبس ملامحها تخبل تقربت عليها كواكب تكللها: -اني باوعت عليج لان جمالج جذبني مو العكس انتي حلوة
ابتسمت بفرح تكشر عن اسنانها كملت كواكب بابتسامة دكلها
هاي عيونج يخبلن ملونات وبشرتج هم تخبل
اشرت المرة على عيون كواكب تكللها بحماس: -مثل عيوونج حلوات حلوات.
كواكب: اي صح بس انتي احلة بهواي
عافت فقار وتقربت على كواكب لزمتها من اديها واحس كواكب صارت ترجف ماعرف طبيعة هالبنية بس كلش توترت وجهها صار احمر تباوع بوجههة المرة تحجي بقهر وحزن طاغي على ملامحها تكول
اني اني تحلمت بيها هي زعلانة مني هسة
كواكب: منو
هي هي زعلانة مني تريدني اجيها
سحبها فقار لحضنة وهي تريد تفلت منه تحجي وي كواكب كالتلة كواكب بصوت يرجف: -عوفها ماتعوفها تحجي
فقار: مريضة.
كواكب: حتى لو حتى الكلام ما ياذي المريض
مدت ايدها لكواكب تكلها اخذيني سبحبتها كواكب بصفها تحجي وياهم: -خلوها شوية وياي تحجي بلكت ترتاح هسة هي محتاجة تفضفض لشخص غريب.
لزمت وجهة كواكب تديرة عليها تكلها: -هما ما يعرفون مايعرفون اني احبها وهي تريدني عبالهم عفتها هي تريدني تجيني بالحلم كل يوم كل يوم ما تخليني انام تكلي جوعانة اني جوعانة هي ماتاكل هناك ماعدها اكل ويكتلونها يكتلونها جسمها ازرك محد يساعدها اني ما احبهم لان محد يساعدها منهم.
دموعي نزلت على حالتها شكلها يقهر تحجي بحركة والم ودموعها تجري سحبها فقار لحضنة يبوس براسها ويكلها: -والله يمة ما خليت اشكال الثوابات سويتلها كل يوم اتصدق للفقرة بثوابها شبيدي عليها وعليج
كواكب صافنة عليهم وعيونها مغوركة سحبتني من ايدي وكالتلهم: -انصحك تاخذها لاهل البيت هناك ترتاح نفسيتها ولاتنطونها علاج نفسي وهاي السوالف
كلها تأثر عليها بشكل سلبي
هز راسة كلها ان شاءلله.
باوعتلها نظرة اخيرة وكالتلها: -فرصة سعيدة خالة
الله يبرد گلبج ان شاءلله فرصة سعيدة فقار
فقار: -تشرفت اني كواكب
ابتسمت وسحبتني ابتعدنا عنهم اول ماوصلنا الدرج كعدت كواكب على الباية تخلي راسها برجليها تفرك بية دنكت عليها اسالها بخوف: -شبيج كواكب مو على بعضج؟
رفعت راسها عيونها حمر مدمعة كالت بخفوت.
كواكب: اني نقطة ضعفي النسوان الكبار وخاصة المتأذيات منهن بس اباوع بوجوهن احس بوجعهن ومرات يذكرني بامي وحنيتها ذني ما لازم يزعلن نجوم بس اااخ من الدنيا اااخ تبجيهن عيونهن الحلوة تخربهن تغار من الحلوات وتشمر عليهن بانواع الحزن
الله يباوعلها ان شاءلله
هزت راسها وكامت لزمتني من ايدي ابتسمت بفرح وسعادة جاي احس بيها لازمة ايدي يكول بنتها الصغيرة تحسسني بحنان امي من جانت تاخذنا وياها.
رجعنا للبيت لكينا سهلة عدنا ونيزك لابسة عباتها كالت: -همزين اجيتن جنت منتظرتجن حتى اطلع
كواكب: لا اله الا الله سالفة مالت اطلع مايبطلنها وين طالعة نيييزك؟
اشتري غراض وحاجات حتى نشتغل اروح وي خالة سهلة هي تعرف احسن مني
كواكب: امشن يلا اروح وياجن
نيزك: والبيت يبقة فارغ ترة كلشي يصير نسيتي كواكب هما جاي يدورون علينة!
كواكب: اني ما نسيت بس جنج انتي نسيتي وهل طالعة.
نيزك: شلون يعني نكعد ونسكت مانريد نطلع نشتغل
كواكب: بلة شافوج شتسوين يالمسعدة
نيزك: كواكب اطلع اطلع متفقة وي المرة وهسة فرغت حتى تاخذني
تلثمي وروحي الله وياج ماتطلعين وشكلج طالع حتى اذا تلاكيتي وي چلابهم مايعرفونج
هزت راسها بيأس وراحت تنقبت طلعت بس عيونها تخزر بكواكب تكلها: -وهسة
كواكب: لا هاي هي عاشت ايدج بس لو تغطين عيونج احسن
نيزك: -كوووااكب شنو السالفة شلون اشوف درربي.
كواكب: تشوفين عادي بس شوية الدنيا مثل الظلمة
ضحكت خالة سهلة وكالت: -سبحان الله ماعدجن اخو يحاسبجن عدجن كواكب واكفتلجن على التعسة
نيزك: والله الزلم ماتدقق مثلها هيج هيج ليزر تسويلنة ليش لابسة الوان شعرج عباتج حجابج وين طالعة يبووو تغث تغثث
سهلة: بعد احسن غير تخاف عليجن من ولد الحرام وهي ماخذة دور الام والاب عليجن
كواكب: جيب اليفتهم دروحي هسة روحي وعيونج طاكة طگوگ.
خزرتها نيزك بضوجة وراحت شهب تضحك عليهن من خزرتها كواكب دخلت تركض التفتت باوعتلي وصاحت: -وااانتي شكووو هنااا ماتدخلين جووة مو راسسج ياذيج
هزيت راسي بخوف ودخلت سترك ربي احفظني منها بقت شهب تلعب باموري واني رحت لتليفوني فتحتة ولكيت ميس شكد متصلة ضحكت بفرح ورجعت اتصلت بيها فتحت الخط.
نجمة: ها الخايسة العوبة ام الثقافة والتنعوص وين جنتي ولا تكول صاحبتي وين راحت هالفترة ماتت عاشت تفووووو عليج يا خاااينة.
ميس: دوكفي خل اغسل وجهي من تفالج وارد عليج
دنجبي انجبي يلة احجي يالمكارة
ميس: وووولج نجووووم ررراح اجيييج والقررران
لا شافج هو انتي مسيحية منيلج هاي الكلاوات تحلفين بالقرآن هو انتي قاريتة؟
ميس: والعباس راح اطفر عليج من الفوون املخج
اسم الله الزهرة ماصدك انتي مسيحية عمي المسيحين لطيفين املخج شنو هاي ماعدكم بالقاموس.
نجوم نرجع وحدة وحدة انتي اختفيتي لا عندج فون واعرف اخبارج من خلالة وبيتكم الجديد ما اندلة منين اعرف بالعتها وساكتة انتي ماتدرين حقج شلون كلبي نار عليج بس انتي وحدة عار نكارة
ديلا رجعت علية اي ست شخبار المعفن تلاكيتي وياة لا
اوووووف
هاي شنووو
غيري الموضوع لان السالفة مليوصة
اها انتي تحجين بية من تزوجون خوش خوش
نجوم ارجعي للدوام ترة ماطايقة الوضع بدونج
اليسمعج يكول وياج وياج افتر.
حتى لو المهم وياي بنفس المكان
المهم ما گلتيلي شنو صار وياج؟
ذبيت حسرة طويلة وبديت اسولفلها الصار بالتفصيل اسمع بس شهكاتها توصلني مصدومة كملت وهي حتى ماردت علية: -ميوسة الصار مايطلع لاي بشر بس يمج
امني بس نجوم شلون بيجن هسة والله كلبي حيطلع من الخوف عليجن
الله موجود شيكدرون يسوون كلشي ينحل هسة نيزك راح تفتح مشروع هي وشهب بالبيت وكواكب هم تشتغل واني اساعدهن بالاكدر علية والله يدبرها سهلة سهلة.
والله ماعرف شنو اكول الله عليج نجوم اي شي تحتاجين اني موجوده بس اتصلي بية
وداعت المعفن ادري مو جديدة علية.
نيزك: خالة بعد شنو نشتري؟
سهلة: ها هية كلشي جبناة
زين شلون نشيل هاي الغراض كلها
خابرت عليش هسة يجي يحملنا
ابتسمت بانكسار من ذكرت اسمة: -خالة هو ابنج مو
لا يعيني ابن رجلي اني عندي بس ضرغام
رفعت حاجبي بتعجب وكتلها: -امة وين عبالي انتي امة؟
امة عافتة وتزوجت من جان صغير واني ربيتة
شنو من ام هاي تعوف طفلها وهو بحاجتها.
ذبت حسرة وابتسمت بانكسار كالت: -هلوليد دمرتة امة هسة هو اخرس من وراها تمرض وهملتة ماراجعت بية وهو طفل خلتة كلش تمرض وصل الموت ركضنا بية بعد خسر صوتة
رجف جسمي ودموعي تجمعت بعيني كلتلها بصوت يرجف: -يعني خالة هو مو اخرس من الله!
كلشي مابية من جان صغير يحجي بس كتلج امة السبب هملتة
هسة هي وين؟
سافرت الله لا يهنيها دمرت مستقبلة وهسة هي بالخارج عايشة
وهو مايشوفها يروحلها او هي تجي.
يتعقد بس ينجاب طاريها احنا اهلة لا امة ولا ابوة ثنينهم بس بالاسم
حتى ابووووة هم!؟
ابوة هم دايح كليوم بمكان
خالة انتي منفصلة؟
سهلة: لايخالة بالاسم رجلي لايمة ولابصوبة حاسبتة حالة حال الغريب مرات يجينا ويروح مايضل هواي
سكتت گلبي مشعوط هسة شنو ذنبة على ابتسمت بحزن وكتلها: -طلعت الدنيا مليانة قصص بس مامعلونة للناس حتى ضن كل واحد بينا قصتة ماكو مثلها بالتعاسة بس بالحقيقة اكو مئات القصص الاتعس من قصتة.
اي والله يخالة قصص اشكال بس الباري يدري بيها
مسحت وجهي بحركة وكعدت استريح خليت كدامي المسواك والغراض صفنت افكر ب على شكد انقهرت علية رغم هي ماحجت تفاصيل حياتة بس اني حسيت بكل الم وجع مر بية.
من تكون الام سبب دمار ابنها شكد صعبة كل مايريد يحجي يتذكر امة السببب بكونة اخرس وخسر النطق بسبب اهمالها وهسة هي عايشة حياتها!
هسة وكت صفناتج عيونج طاكة
هااا
ضرغام: امشي كومي صارلي شكد كدامج ماحاسة علية.
كمت من مكاني اعدل بعباتي كتلة: -ما دري بيك والله
ضرغام: اي غير سارحة بعالمج الوردي
خلة الجكارة بحلكة وشال الغراض ابتسمت باستهزاء وكتلة: -ماكو عالم وردي
ضرغام: اكو عالم وردي معقولة ما شايفتة؟
لا مامر علية من قبل.
ابتسم بمكر وهز راسة شكلة يريد يضحك بس خايف الجكارة توكع من حلكة حسيتة يقصد شي صفنت افكر بكلامة عالم وردي شنو يعني؟ وكفت فاتحة عيوني على وسعهن افتهمت قصدة الخايس كال عالم وردي كال التفتت علية شافني وراة خزرتة بحقد وعبرتة صاح وراي: -عيونج غطيهن فرد مرة هسة انتي غطيتي وجهج غطيهن منظر مخليتهن
عكدت حواجبي وكتلة: -ميخصك بكيفي اتنقب اغطي اطلع انت شكو!؟
فتح عيونة مستغرب من ردة فعلي راساً عفتة ودخلت بالسيارة كعدت يم سهلة كتلها
: -خالة مو گلتي اخابر على يجي ياخذنا ليش هذا
سهلة: والله مادري عليش وين يلة هما اخوان ماكو فرق
هزيت ايدي باستهزاء وكتلها: -رب الفرق شجاب الثوم على الحلقوم
ضرغام: الثوم يسلم عليجن.
التفتت بسرعة علية فارزة خرب شوصلة هسة شمر الغراض بالسيارة وشرب الجكارة عيونة مقلصها علية خازرني شمرها وكال: -اني ثوم وعلى حلقوم؟ هاي ليش لان اني اسمر وعلى احلى مني شبهتيني بالثوم؟
حجيت بتوتر: -لا لا والله مو هيج قصدي
ضرغام: افتهمت قصدج عدل بس ليش ثوم ماتخافين من ربج حتى بالمركة ماينوكل
نيزك: -لا مو شوف.
خلة ايدة مقاطعني بلعت كلامي وهو صعد بالسيارة ساقها واني بقيت متفشلة وساكتة طلعت مني بدون قصد ماعبالي يسمعني لو ياخذ بخاطرة علية، شغل اغاني وامة ترزل بية.
سهلة: ولك طفي اللطام تريد تترسنا ذنوب وياك
ضرغام: هسة الا تسمعيني اسكتي حجية خليني مسلطن على كولة ذهب
سهلة: بس هي دواكم انتم ماتمشون بالعين والاغاتي.
صوت الاغاني عالي يطرش طرش ودخان الجكارة خنگني خنگ ضليت اكح اختنكت اريد افتح الجامة ماعرف منين تنفتح فتحتها خالة سهلة طلعت راسي وفتحت النقاب اتنفس طفة الاغاني هو وفتح جام الصدر صارت تهوية بالسيارة.
سهلة: خنكت البت طيح الله حظك
ضرغام: ماعرف عندج حساسية من التدخين
ماعندي حساسية بس انت هواي دخنت.
وصلنا لبيتنا نزل الغراض ضرغام ودك الباب فتحتة كواكب وانصدمت عيونها يريدن يطلعن من مكانهن من شافته هزت راسها بعدم تصديق تصيح لاااا ما مصدكة تشوفة هنا.
ضرغام: هلو كواكب ام دجة
كواكب: الاااا انت الااا انت شجابك متكللي شجاابككك
ضرغام: صدف وداعت المعثور صدف كعدتن بيتي بالصدف
كواكب: بيتككك شنووو بيتكككك.
انلاصت انلاصت هسة الا تحجييي خرب انة هسة شحجي خازرتني وهذا يتحوقر وياها يبتسم من يشوفها عصبية لزمتها. من ايدها اهمسلها: -عيب من خالة سهلة عيب كواكب صدفة والله صدفة صارت
سكتت بس لو بيدها تلعب السجينة على وجههة دخلت الغراض من ضرغام حك راسة وابتسم كال
ضرغام: اني اول زبون الج اريد جدرية دولمة مثل ذيج السويتيها وحبشكلات داريني سوي مقبلات وسوي اشكال الاكلات ماتخسرين اني اشتريهن كلهن.
ابتسمت بفرح وكتلة: -بعيوني صار
ضرغام: بالتوفيق
خزرتني كواكب تهز راسها متحلفتلي دخلت جوة وسهلة وياي تسوي بالتنور جابتة إلى خطية كالت مانستعملة عدنا مشمور ضال حرامات ليش تشترين
سوتة وراحت بدلت ملابسي وكعدت اني وشهب نحظر دولمة نشتغلها جبت كل غراضها نجمة اجت تساعدنا وكواكب فوك راسنا واكفة.
كواكب: شلون هذا بيته
والله ماعرف
يعني بيتة بيتة.
اهووو شلون سالفة ترة كاعدين بية بفلوسنا ايجار عمري مامان علية خففي توتر خففي
ماعرف ليش يطلعلي خرب شكلة
نجمة: ليش تكرهينة ترة مبين حباب
كواكب: لججج منووو هذااا الحباب ضررغام حباب ضررغام وجهة البعيجي حبااب!
نجمة: شبيج هسة اني كلت مبين مبين
كواكب: ترة مبين مو حباب انتن شنو ماعدجن بصيرة مو يكولون سماميهم في وجوهم الزين يبين زين والموزين واضح ذاك هو انتن معدومات البصيرة؟
نيزك: شلون هسة نريد نشتغل لاتصيحين فوك روسنا
كواكب: اسمعني كلجن البعيجي لاتحجن وياة ولا تباوعن بشكلة اي تعاااامل ماتتعاملن وياة والي تصرف مايعجب وي التتعامل وياة
خزرتني بحقد وطلعت
نجمة بهمس: هاي شبيها
والله مادري
رجعت تلبس بحذاتها تحجي بعصبية
اني راح اطلع
وين بس لاتشوفين بيت غير هذا للايجار؟
سكتت ماتحجي صحت بيها: -لا تترعنين وين نلكة بيت مثل هذا جاهز من كل الجوانب خلينا كاعدين وساكتين لا تفترين بينة ترى حيل بعد ماعدنا
كواكب: ررررايجة افجررر تطلبيني ما ارروح اشوف بيت اكعدي بيتة اكعدي على ريحتة
يااا واني شكو اعرفة يعرفني شبيجج انتي
سلامتج سلامتج اني اولي
ووووين مولية تعااي
لجهنم تريدين ترحين وياي
طلعت وراها صحت: -ياصوب جهنم مالتج صايرة
جاوبتني وهي تلبس الشفقة براسها.
كواكب: اشوف تاليتها شنو ادور شغل راح
كواكب لا تنلزمين
يمعودة وين قابل الشرطة تفتر بالشوارع لازمين صورتي بيدهم
ضحكت وهي طلعت سديت الباب وراها ادعليها ترجع سالمة رجعت اكمل الدولمة كالت شهب
شكد نسوي كدورة؟
مادري كالت سهلة اجت طلبات البارحة الدلالة ناشرة رقمي وجايتها طلبات لباجر نطبخهن غدا
شهب: اي شوفيهن شكد ولا تنسين اكو كمية صغيرة واكو كبار شوفي شكد من هاي وشكد من هاي
هم صح هسة شلون.
روحي شوفي خالة سهلة وجيبي رقمها هي ورقم الدلالة تفيدنا حتى نسوي بيج وهي تنشرلنا
ايدتها وكمت غسلت ورحت لبست اموري چلب وياي اخذتة ورحنا لبيتهم هو يريد يلعب بالشارع راح يركض واني واكفة بالباب اصيح بية: -تعال حبيبي تعال
ضرغام: عبالي على هاي
التفتت علية فتح الباب يباوعلي ابتسمت واموري شافة اجاة يركض شاله يبوس بية ويلاكفة بالهوى باوعلي وكال؛-اطلبج اعتذار
اعتذار على شنو!؟
ها يعني اني ثوم؟
هسة انت على هاي ترة مو قصدي هيج طلعت
تزوجيني نيزك
فتحت عيوني بصدمة وجهي صار نار ضحك وكال: -ترة مو قصدي هيج طلعت
كلبت عيوني خزرتة وهو اخذ ابني ودخل جوة طلعت خالة سهلة حجيت وياها على الموضوع وفهمت كلشي اخذت رقمها وذهب صاحتلي رحت اسلم عليها لكيتها كاعدة بالصالة وضرغام قريب منها مخلي امير بحضنة يلعب بية سلمت عليها وطلعت.
اسبوعين كاملات مرن واحنا نشتغل ماكاعدين اسوي دولمة وكبة والخبز اجلتة هالفترة ناوي اكبر المشروع واضيف اكلات اهل المنطقة حبو الاكل وصارو يطلبون بكميات بما انو كلهم موظفين الحمدلله كلشي مشة وحياتنا هادئة ما نواجة صعوبة بشي بقة صعب علينا موضوع التوصيل وكواكب كالت علية اني ادبرها نجمة رجعت تداوم وكواكب تغط غطات ابد ماتحجي شي من نسالها...
الفرحة غامرتنا بشغلنا الجديد وبحياتنا الجديدة لا مشاكل لا حرشة وصياح البيت هادئ صوت الادعية من الصبح نشغلة ونتريك بهدوء وشهية بعدها نشتغل وريحة الطبخ تارسة البيت والمنطقة.
اندك الباب راحت شهب فتحتة مديت راسي اشوف كواكب دخلت على الدراجة ضلينا فاكين حلوكنا صفطتها على الحايط نزلت وكالت
شبيجن ترة اشتريتها هاي مستعملة اساعدجن بالشغل
بس لا توصلين بيها اكل؟
اي اشتغل عدجن دلفري.
ابتسمت وهي بادلتني الابتسامة دخلت تكلب بالجداري تلكط وشهب تتعارك وياها ماتقبل هاي اقوى عركة بالبيت وي محلاها كواكب تتونس من تتعارك وي شهب لان على طول خانسة خابرتني خالة سهلة رحت افتح عليها خط.
هلا خالة شلونج
اريد جدر دولمة وين جدري؟
ها هلو ضرغام
ضرغام: لا تسلمين علية هسة اني جوعان خلگي ب.
كمل ليش سكتت
اخاف اخدش حيائج
ها لعد اسكت احسن
يلة ام امير دزيلي جدري لو اني اجي اخذة.
لا فدوه لاتجي كواكب هنا هسة تسويلها هوسة
ترة كواكب عاضها جلب ماتشوفينها مجلوبة
ترة ما اقبل تحجي عليها
يمعودة شلون عايشات وياها مادري
والله ماكو احن منها علينة ولا اكو احد يخاف علينة اكثر منها
واضح ام دجة لاتحاجنها لا دججن
يااء هسة شبيك وياها بس كون اعرف
ماعندي شي وداعت عيونج بس هي شادتها وياي
اي واضح على العموم راح يوصلك الاكل.
سديت الخط منة وجفلت بمكاني من شفتها دخلت گلبي صار بلعومي دخيلك يا على بس لا سمعتني احجي وياة شمرت المنشفة وتقربت علية اني بقيت جامدة لزمت ادية ثنينهن رفعتهن وباستهن ذبلت ملامحي ابتسمت بحزن وكالت بجدية.
كواكب: اليصير مرايتك يندل حسرتك وين
تركت ادية وكعدت على القنفة تمشط بشعرها كعدت يمها وخليت ايدي ورة ضهرها حضنتها رجعت راسها علية سكتت شوية ورجعت كالت.
كواكب: اكثر واحد يعرف منو نيزك اني اعرفج اكثر من روحج واخاف عليج اكثر من روحج
باوعت بعيوني وكالت.
الحب هو خدعة توكعنا بحفرة مليانة اشواك محد يتاذى غيرنا بيها ماكو غريب يحبج حب فطري منا لله نيزك حبيتي مرة وشفتي شنو صار بيج اني خسرتج بوقتها حتى انتي خسرتي نفسج لاتحبين مرة ثانية نريدج احنا.
شددت حضنتها ابوس براسها: -ماحب كواكب اني كلبي مات من زمان لاتصدكين گلبي يدك لشخص اني كل همي نعيش سوة مرتاحين والله بفلوس الدنيا ما اعوفجن ولاتنسين اني عندي ابن ما اتخلة عنكم بيوم كبرت وفهمت الحياة زين جبت عمري ندمانة لان ماسمعت منج من جنتي تكليلي يوسف جبان يوسف يكسرج من ذاك اليوم اني وياج كواكب بكلشي امشي واني مغمضة
كواكب تفديجن بروحها وتحرك اليتقرب عليجن.
حضنتها مبتسمة احسن بالسكينة محاوطتني من اكون بقربها كواكب اليشوفها يكول ماعدها مشاعر ولا تحب احد بس هي العكس والله العكس مليانة مشاعر وحنية من ماتت امي صارت هي بدالها رغم اني اكبر منها بس احسها امي شلون الابنية تروح وتحجي لامها كلشي يصير وتشاورها اني هيج وي كواكب.
نجمة: خااااايناااات ماتستتتحن انتن يعني واحناااا واحناااا يبووووو عليجن
شهب: ولا يكول اخواتهن بس هنا اخوات ريا وسكينة.
نيزك: بس لاتغارن تعالن تعالن
نجمة: شكرا مانريد تعالي شهبتي خليهن ذني وحدهن واحنا وحدنا
حضنت شهب تعصر بيها تغورنا عود ضحكت وكمت ضربتها على خدها وبستها: -لاتزعلين غير مرة نسوي حضن جماعي
نجمة: اي واني اول وحدة تحضنيها
صار بعيوني.
نجمة وشهب النهار كلة سوى يسولفن ويضحكن يمكن يردن يعوضن الايام المايحجن بيها سوى كواكب طايرة بيهن من الفرح واني ازيد والله واخيراً اجتمتنا ولتمينا الحب يحاوطنا كل هذا ويبقى خوف من المجهول متاكدين محد يعوفنا بحالنا.
حضرت جدر دولمة سفري وي مقبلات لبست عباتي وكتلهن اني طالعة كواكب ماعرف ليش ما حجت شي ولا كالت اني اوصلة مثل كل مرة بقت على كعدتها واني رحت لبيت ذهب دكيت الباب فتحة على ابتسم بوجهي واني كتلة: -شلونك علوش
هز راسة زين: -دومك زين ان شاءلله اكلت من طبخي؟
هز راسة اي كتلة: -شكد تقيمة برأيك
فتح ادية ثنينهن ضحكت اكلة: -عشرة من عشرة لا خلص راح اقدم برنامج الطبخ العالمي شو سويتلي واهس.
انطيتة الجدر وسهلة طلعتلي ابتسامتها على وجههة مو مرة تخبل كلها طاقة ايجابية سلمت عليها تكلي: -والله ريحتيني من الطبخ هالفترة عاشت ايدج كلها تمدح باكلج
حبيبتي بالعافيه
ذهب: ها ولج زيبك ما تطبين جوة
ها حجية والله راجعة للبيت
ذهب: تعاي شعدج راجعة للبيت خل اسولف وياج طاك گلبي اريد اسولف
نيزك: ماتجين لبيتنا تونسينة
ذهب: دتعاي هسة اخواتج شلونهن
يسلمن عليج حجية.
كعدت بالمطبخ واني كعدت كدامها ذبت حسرة وكالت؛-حبوبة انا اهم بيجن والله
ذبلت ملامحي بحزن وتنهدت كتلها: -الله موجود حجية والله ملينة منهم اني سنين متحملة وساكتة على دكاتهم بس بعد الصار ماتحملت اكثر
ذهب: يمة ذولة دمهم نكس مايخلونجن يدورونجن
خلي نعيش اليوم بيومة الله كريم حجية
انا اول ماشفتجن حسيت بيجن مهضومات ومضلومات وهل فكيت داري الجن
من اصلج والله ما ننسة وكفتج هاي.
اريدلجن حل يمة ماتظلن هيج وذولة يدورون عليجن
سامعة شي؟
سكتت دخل ضرغام سلم رديت علية السلام وكف يم الكاونتر كتف ادية يباوعلنا كال: -اني ماعرف عمج ولا ولدة بس اعرف كواكب شغلها قريب علينا تعرفين وكل فترة يجون ولد يسالون عليها اذا احد شايفها بمكان حتى ينطون مواصفاتها من عرفت سالفتجن فهمت ذولة يدورون عليجن
يعني مايعوفونة؟
ضرغام: ماكو ناس تعوف بناتها.
هههه بناتهم منين صرنا بناتهم والله لو يعاملونة نفس البشر مافكرنا نطلع من الباب بس هما طاغوت هذا سالم اكبر طاغوت
ضرغام: سالم مايعوف بنات اخوة والعالم وياة تأيدة
رجفت ايدي بحركة ودمعتي بطرف عيني صارت ماعرف شحجي گلبي يوجعني من القهر كالت ذهب
خالج مامنة خبر
نيزك؛ مانعرف شي عنة
ضرغام: واخوالجن البقية ماعدجن بس هذا الخال.
نزلت دموعي حارة تجوي خدي دنكت راسي من ذكرهم اليمرد الگلب احس الغصة خنگتني مسحت عيوني بعباتي وكلت بقهر: -اخوالي ازيد من سالم كلهم كلهم ناس ما تخاف من الله زوجني سالم ابن خالي كل مصايب الدنيا يسويها وهما وياة يأيدونة مابيهم واحد شريف اوصل الموت ماواحد يدخل لو ماخالي همام هددهم بالقانون ورفع دعوى يلة خلصت منهم ومن ذاك اليوم لهذا اليوم ما اعرف. شي عنهم ولو اموت ما اروحلهم ولا ادك بابهم.
لزمت ايدي ذهب تمسح عليها بحنية كالت: -انتن بحمايتي ذهب انا ذهب وما عاش اليندك بذهب
مشكورة حجية بس احنا ما نريد نسبب لاحد مشاكل بس يصير شي نعوف المنطقة ونشوف بيت ماندخل احد بمشاكلنا
ذهب: من يوم الدخلتجن لبيتي دخلتن بحمايتي وفنة اليحاجيجن اسحك على راسة تهي بهي ولجن انا اشتري الطلايب شراية نامن رغد فلوس وعندي وخلكي للطلايب طويل اتونس بالعرك
ضرغام: جدي مات من وراج ورة طلايبج.
ذهب: الله يرحمه فقير جان مالة علاقة باحد كل همة الفلوس والشغل وانتم غمان ولا بيكم زلمة بس ابو ود عمت عيني عينة
ضرغام: ابو ود جيبة ثگيل هل عميتي عينج علية
ذهب: ياهو البيكم عايز بس هو زلمة السبع
ضرغام: خلي نفسي مفتوحة للاكل لاتحجين بعد
ذهب: الغسل كون
كلب الدولمة بصينية صغيرة واجة كعد يمنة ياكل وجهي صار احمر هذا شبية مايستحي كاعد بنصنة ضربتة ذهب دكلة: -يا ما لكيت الا هنا تاكل البيت شكبرة شكدة كوووم كوووم.
ضرغام: هسة خليني اكل على واهس السوالف
ذهب: سم وقز القرط كوم كوم منا يلة
شال صينيتة وكام يحجي عليها: -رجل تريدين رجل الا ازوجج مخليج يمي دفع نفع بس مغثة
ذهب: دهر كون اليدهرك يمدهور روح روح يلعايص النايص
ضرغام: بحلكي حجاية لو ما اخدش حياء ذولاك الناس جان كلتها
راح واني كتلها: -اني رايحة ماخليتية كاعد
ذهب: خلية يولي كاعد يم النسوان
ذبت حسرة ورجعت كالت بنفس الوقت.
بس يمة ضرغام خوش زلمة ترة انا صح احجي عليهم من حلات روحي هما صح عدهم سوالف بس عدهم غيرة ونخوة وحمية
الله يحفظهم الج
ما كلتلي شكثر صارلج مطلكة
ذبيت حسرة وكتلها: -من جنت حامل راح يصير اربع سنوات تقريباً
وشكثر، عمرج من تزوجتي
16 وبال 19 تطلكت ضليت تلث سنوات متزوجة
وماصار عندج بس وحيد
لا صارت بنية وماتت بعدها بفترة تطلكت واكتشفت نفسي حامل
ورجلج الخيسة اااخ لو اكضة كل هذا الجمال ماعرف يحافظ علية.
ابشرج ماتهنة هسة بالسجن هاي رابع سنة اله راح يكملها
ابتسمت بخزن ونهضت من مكاني بگلبي نار تحرگني من ينجاب طاري الماضي العشتة ابتسمت اخفي وجعي وذهب كامت تكلي: -اذا يجونج خطابة تقبلين
لا
ليش حبوبا بعدج شابة وصارلج اربع سنوات من تطلكتي لوين تضلين كاعدة
حجية اني بيا حال ما تشوفين شصاير بينة اعوف اخواتي بهذا الحال.
انتي ماتعرفين انا شلون افكر انطي فرصة لروحج انتن بنات وحدجن رادلجن زلمة يدافعلجن ويعتبر اخواتج اخواتة مايخلي واحد يمسهن بسوء
الله كريم حجية شنو شبسرعة شفتيلي عريس
اول ماشفتج لكيتج العريس
بلة منين هذا الكيتية
اليتنوع الحلكج مساع
عكدت حاجبي بتسال كتلها: -منو؟
ذهب: يااا يااا فلك ولا جنج تعرفينة المدهور الياكل ويصيح محد تطبخ مثلها
دخل ضرغام بيدة الصينية كال: -محد يطبخ مثلج.
خلة الصينية على السنك وغسل ذهب تباوعلي واني صافنة من الصدمة اباوعلة طلع جكارة خلها بحلكة وشغلها كالت ذهب.
ذهب: هذا ضريغيم المخبل تنوعيلة عدل خاف اغشج بية هسة كولي ترضين بية اني خطبتج الة
عكدت حاجبي وهو كال: -شكو فافونة
ذهب: ولو انت ماتستاهل بس خطبتلك زيبك عيونها جنهن كلوبات ضاوية
ضرغام: اول مرة تسوين شي براسة حظ خوش من خطبتيها
ذهب: مو اكول تكيف وين لاكي هيج وحدة تخبل.
واكفة بمكاني جامدة وجهي اشتعل نار ذولة يتشاقون لو شنو نكث المي من ادية يباوعلي كال
ترة اني خطبتها بس هي مارضت
ذهب: ياااع وليش ماترضة صدك ولج
فتحت عيوني على وسعهن خازرتة كال
ضرغام: طگگيهن بعد بعد خاف هنا عايزات
ذهب: هسة ما كلتي هذا ضرغام ابو الغيرة ابو الحمية ابو النخوة العراقية تقبلين بية؟
نيزك: لاااااااا
باوعت بعيونة اترقب ردة نفخ دخان الجكارة وكال
نومت حمامة نمت غطيت راسي بأيدي من گتلي ما اريدك.
نيزك: اسفة اعتذر
ضرغام: تكسرين وتعتذرين شيفيد اعتذارج كسرتي گلبي والكسر شيصلحة؟ حوبتي جبيرة يم الله
فوگ الصدمة صدمتين وتلاثة واربعة وخمسة وستة لاا لاا لا معقولة هذا يحجي حتى كمت اشك بنفسي اني حبيبتة وهالكد تأثر من رفضتة.
ذهب: جا عود لبختة الج خوش لبخة لو ما لابختة شلون
ضرغام: يصير الرفض مربع بس ليش شبية اني نيزك؟
نيزك: مابيك شي بس ضروفنة تختلف اتمنالك التوفيق.
عفتهم وطلعت اركض وجهي مشتعل نار احسة وگلبي يدك بسرعة ذولة صدك يحجون لو يتشاقون من كل عقلهم احنا شاردين وماصارلنة كم يوم من اجينا هنا وهي خطبتني شعرفو منا معقولة بهاي السهولة؟!
دكيت الباب ادية ترجف فتحت نجمة الباب دخلت وهي تكلي: -شبيج نيزك وجهج احمر؟
مابية
نزعت عباتي وغسلت وجهي بماي بارد كتلها: -وين كواكب؟
راحت توصل طلبيات
وانتي شلونج بالدوام؟
زينة.
نجمة: ابتسمت ورحت انبطحت على القنفة لفيت خصلة من كذلتي على اصبعي ورجعت اتذكر اول يوم داومت بالشركة بعد الصار.
ميس تمشي بصفي لازمة ايدي وابتسامتها شاكة حلكها كل شوية وكالت: -فرحانة اني نجوم برجعتج
ضحكت بفرح وكتلها: -حتى اني والله فرحانة كلشش من شفتج
يلة يلة رجعت الحلوة رجعت رجعت
صوتج عيني لا يسمعون
مايهموني
اتفق بت الملياردير.
شمرت شعرها بغرور وضحكت تعجبني هالبنية ثقتها بنفسها شخصيتها تنحب ميوسة وكفنا كدام المصعد ننتظر ينزل حتى نصعد وميس تسولف.
ميس: لج تدرين شنو اتمنى
شنوو
اسحل طيبة وغادة سسسحل
اااالعب واني ابقة اصيح السبع يطلع دم والفاهي يطلع زاهي هي هي الدينو الدينو
هي هااي نجووم ولج المفروض تسحلينهن وياااااي
اي اي بس ايدي ماتشوفينها بعدها ملفوفة
يلة راح اجلها من تفتحين ايدج نتعارك ونسحلهن.
لااا فدوه هسة تعاركي مو بعدين اخاف على ايدي تنكسر ما اعارك اني
ااامداني اي والله
بقت تلطم واني اضحك عليها اني مال عرك والله انسحل منو يطلعني جفلنا ثنينا و التفتتنا على مصدر الصوت
مرحبا صبايا
ابتسمنا وردينا بصوت واحد: -اهلا استاذ
فقار: شلونكم بنات
ميس: بخير استاذ
فقار: نجوم شلونج بابا
زينة اني استاذ.
ابتسم وانفتح المصعد صعدنا اني وميس وهو وقبس صعدو ويانة قبس ساكت وكلعادة عاكد حاجبة محد عاجبة عدلت حجابي مدنكة راسي استحي من اكون وياهم بنفس المكان احس بتوتر.
فقار: شلونة ابوج ميس
ميس: احسن بهواي من قبل
فقار: مادام صار زين مايجي يزورنا
ان شاءلله ليش لا بس هو يطلبكم هواي زيارات
فقار: عن قريب نزورة ان شاءلله
نتشرف بيكم.
انفتح المصعد شمرت شعرها وسوت بيدها تفضل لقبس ابتسم ونزل نزلت وراة ابتسمتلي وراحت لقسمها وشغلها انغلق المصعد بقينا بس اني والاستاذ مرتجية على الجدار وصافنة بالكاع رفعت راسي من كال.
نجوم شلونها ايدج
ها استاذ زينة
شوكت تفتحينها
بعد كم يوم
مكسورة هي؟
اي استاذ اتذكر كتلك مكسورة
يأذيني منظرها
برطمت بوجهة وكتلة: -صح منظرها مو حلو بس ماكدر اكعد فاتني هواي اسفة اذا ازعج المنظر.
هز راسة بنفي وكال موضح: -ما متاذي من المنظر بابا بس احس بوجعج
ابتسمت ودنكت راسي كتلة: -الله يبعدك عن الاذى استاذ
امين نجوم امين
نجمة اني استاذ
المفرد والجمع ثنينهن يضوي
انفتح المصعد طلع واني وراة خفف خطواتة صرنا بنفس المستوى عدلت جنطتي وكتلة: -استاذ عادي اسال سؤال
اسألي بابا
والدتك شلون صارت؟
نفس وضعها
ابتسمت بحزن كتلة: -الله يشافيها استاذ والله خوش مرة مبينة حبيناها هواي
انتي واختج؟
اي كواكب.
سبعة كواكب مبينة ذيبة
اي والله ذيبة
احب النساء القويات اتعلمي منها حتى محد يتقرب صوبج
كالها بابتسامة هزيت راسي اني اصير مثل كواكب وين وين والله رادلي دورة اشهر عدها يلة اخذ ربع من شخصيتها وقوتها.
دخل مكتبة واني بقيت بالباب دكيت الباب كتلة
ادخل استاذ
كعد بمكتبة وهز راسة بابتسامة هادئة تغطي ثغرة
ادخلي نجوم مو مال عزيمة
هم صح بس هم مو صح ادخل بدون ما استأذن.
دخلت وبقيت واكفة وهو يگلب بالفايلات حجة وهو يشتغل: -اتفضلي اكعدي
كعدت اباوعلة بيدة القلم يوقع كال: -بطلي توتر خليج طبيعية بنتي
ليش هسة اني جنية استاذ؟
ابتسم ورفع راسة كال: -لا بابا بس اخذي وانطي لاتتقيدين انتي طالبة عندي اسألي اي شي فهمتي لو اشرح اكثر؟
ها اي فهمت راح اسال هو جنت ناوية اسالك هواي سؤالات
خليني اسمع سؤالاتج بسرعة.
طبكت ادية ورفعت عيوني ليفوك افكر اشو الاسئلة طارت من راسي خرب حظي والله جنت محظرتهن باوعتلة وكلت خل اسئل اي سؤال يخطر بالي كتلة
استاذ اذا خلصنة تدريب عادي اشتغل هنا
فقار: اكيد عادي
والله استاااذ عااادي؟
والله عادي
يااء صدك
شبيج نجوم
استاااذ فرررحت يعني لكيت شغل واني حايرة بزماني اكول ماكو وظيفة حتى فكرت اشتغل عمالة
اوووف عمالة فدنوب
ها لا يعني هيج شغلات منا ومنا.
عضيت لساني اردد بداخلي نجوم انجبي لا يطردج بالدفرات على هذا كلامج ابتسمت بفشلة وهو مبتسم ويشتغل بالاوراق البيدة كال: -لاتفكرين بعد نجوم
ليش استاذ والله اني خوش افكر عقلي متنوع الافكار حتى افيدكم بالشغل اطوركم
جيد جيد
هذا يسلكلي يااااا شوف شوف عينك عينك جاي يسلكلي انجبي نجوم شيسويلج غير انتي تمستلتين
فقار: شوكت تريدين تشتغلين؟
ها
ماحب اعيد السؤال رجائاً الكفيها من اول مرة بدون فهاوة
اي افتهمت والله استاذ.
يلة جاوبي
عادي استاذ اشتغل حتى لو وي الدراسة ماياثر علية وهو اني راح اخلص
جيد
صح جيد بس شنو اشتغل استاذ
حالياً اكو سكرتيرة بس
ياا سهلة يعني اشخبط بالاوراق
فقار: لا والله
اقصد بس كاعدة واكتب
لا مو هيج سكرتيرة خاصة باسمي شغلج يكون وياي كل اجتماعاتي تحظرين وترتبين مواعيد وباقي الشغل نعلمج علية
ان شاءلله استاذ
تعالي اشرحلج
اشرح
جيبي كرسيج
ها.
خزرني ودنك بالحاسبة يدكدك بيها كمت خليت الجنطة على المكتب مالتة ودفعت الكرسي برجلي هو متحرك بس يطلع صوت من احركة وكفتة شوية قريب منه وكعدت لازمة صبة ايدي بدة يشرح واني اهز براسي بنص الشرح قاطعتة اكلة: -استاذ
فقار: ها نجوم عندج اضافة؟
نجمة: لا استاذ بس اريد شكولاتة من ذيج الانطيتني منها ذيج المرة.
رفع حاجبة باستغراب من طلبي البمو محلة ابددد رجع ابتسم وحك لحيتة مد ايدة جوة جاب العلبة خلاها كدامي بلطف كال: -تفضلي بابا
والله استاذ بس انت حباب
ابتسم ورجع يشرح واني افتح واكل وبس اهز براسي رجعت كتلة: -استاذ استاذ
فقار: ها نجوم
استاذ عطشت اريد مي هذا الككو يعطش
اطلعي نجوم
يااا استاذ حتى انت تطردني مو اني اكول بس انت حباب
افاااا المكتب مكتبج ههههههه
باوعلي وارتفع شاربة كتم ضحكتة واني طنكرت وجهي صار نار.
شبيج؟ روحي اكلي واشربي مي وبطريقج لروان تشتغلين وياها بعدها ترجعيلي
يعني مو تطردني
مو عيب؟
صح والعباس عيب تطردون بنية حبابة مثلي
اي والله صح مانستحي
اخوك مايستحي ولا عندة ذوق
يولي
منو يولي
التفتت اشوف قبس فتح الباب ودخل صار كدامنا عاوج حلكة يباوعلنة طفرت من مكاني خازرتة بغضب.
فقار: دك الباب ابني من تدخل كم مرة اكلك
قبس: ليش عبالك داخل عليك بوضع اااااااااا هسة كلي منو اليولي
فقار: مرة بحياتك عبر شي تسمعة.
قبس: هسة غير يكلي منو اليولي
اخذت جنطتي ومشيت وصلت قريب من الباب وكتلة: -عليك يكول يولي مايعرف الادب ولا الاحترام وحتى كال مايستحي لان يطرد بنية حبابة مثلج
باوعت لاستاذ فقار فاتح عيونة يباوعلي بصدمة كتلة: -هو الاستاذ مامجذب ترة كلامة صح
قبس: وووووولج.
طلعت اركض من تقدم علية يمة همزين شردت ترة هذا قبس مخبل وملطلط يغلط عادي وحتى يضرب منو اليحاجية! وكفت اعدل جنطتي وشالي اتاكد من لفتة ذبيت نفس وكملت طريقي مرتااااحة حل حل حل حركت كلبة الوصخ المغرور جنة خبز مگسب على الصوبة
هاااااي يحلوو
عزاا بعينك كمزتني اءء مو عزا بعينك اسفة
سمار: تقبلت اعتذارج يلة
عفية
ها صدك ماتحمدتلج على السلامة
تسلم
هسة انتي وين رايحة؟
اشتري لفات.
جا مشينا نروح سوى اني هم جوعان اجت بوكتها
يااا شوف هذا رايحة اني عندي شغل يا اكل يا هذا
دمشي نروح ناكل
والشغل؟
ماطاير هسة روان عدها ريست نازلة جوة هي والبنات
ها خوش يعني عادي
عادي
غيرنا طريقنا ونزلنا جوة الكافتيريا بعدنا ماداخلين كتلة: -شتاكل؟
انتي شتاكلين
شعليك بية هي غيرة انت كول شتاكل
شعليج بيه انتي هم
بطلت ما اكل وياك
لا بشرفج غير نزلت حتى تسويلي واهس بالاكل
مااا بطلت
البرگر طيب
الكباب عروگ اطيب.
ماكو كباب عروگ هنا
مو كتلك بطلت ما اكل
ثنين بركر حارة لو باردة
ماحب الاكل البارد اني
تمام اكعدي
راح واني كعدت هسة شنزلني انوب اكل وياة ديلا بلة مو عيب علية مو عيب امداني بس هو غشني واني روحي بالاكل برطمت اباوع بالمكان فعلاً شفت روان والبنات ملتمات ياكلن كمت من مكاني ورحتلهن
هاي بنااات شلونكم
خزرني وكملن اكلهن محد ردت بس روان كالت: -هلا حبيبتي نجوم شلونج.
زينة اني وانتن عيني شبيجن ماتردن السلام مو حاسبينجن مثل البشر ونسلم عليجن كبوور حتى كبوور عليمن شايفات رواحتجن
طيبة: لج هاي عليمن تغلطين البارحة جاية واليوم تتجاوز
غادة: عوفيها نشتكي عليها
نجمة: عادي اشتكن مايهمني اصلاً.
خزرتهن ورجعت لمكاني افوور افوررر عيععع عيععع شكد غثة شنو من بشر ذني شكد شايفات رواحتهن على شنو غير افتهم على جمالهن اليملخ اشو كلة تجميل والمكياج لبخ لبخ البشرة تصيح اختنكت اريد اتنفس امداهن اي والله.
سمار: ها شبيج
انتو منين تجيبون هاي الشكول لو اني اعزل الشركة وما اوظفهن يمي يععع شلون غثة
الحمدلله مو انتي صاحبة الشركة جان خليتي بس الحارس
وكم موظف فقير حباب
احنا ماندخل باب الشركة.
ما اخليكم حتى تباوعلولها من بعيد
ضحك واني رجعت اتذكرت موقفهن قبل شوية شلون احتقرني برطمت عاكدة حواجبي.
سمار: شيفكها بعد
والله ماعدهن ذوق والنبي ماعدهن ذوق هسة فوك ماواحد يسلم عليك ماترد وتتجاهلة
يمعودة انسي اجة الاكل
اجة الاكل وفعلاً نسيت بديت اكل واحس حلكي احترك عفست وجهي وفتحت القوطية اشرب منها
حاار حااار حاار يمة الساني
غير انتي ردتيها
فلك طرك كون يمتها ردت حار ليش تجذب انت.
شبسرعة نكرتي غير، انتي كلتلي ماحب الاكل البارد
ها قصدك من كلتلي بارد لو حار اني عبالي الاكل بارد يعني بايت لو هيج بارد فكلت حار بس مو بية فلفل
راح اغص الستر ربي الستر نجوم اكلي لاتحجين
اختنك يريد يضحك والاكل بحلكة سكتت عنة اكل وجهي احسة طگگ بس ماكدر اعوف اللفة حرامات منو ياكلها بعد.
عوفيها ولج وجهج طگگ
حرامات بعد تورطت لازم اكملها
هفيت على وجهي وهو ينطيني اكلنس يگلي امسحي اخذت منة وفزيت على.
فقار: هاي شنو تاكلون؟
سمار: لا نتزقنب
فقار: غير يحجي مثل البشر
سمار: من تسال مثل البشر يعني ماتشوفنا ناكل ليش تسال
فقار: والله لو ما ابوك جان طردتك من الشغل
سمار: مدير فاسق يوظف بالواسطات اني شدخلني يااااااااابة راح تموتين عوفيها
كطعت الاكل ورفعت راسي اشوفهم ثنينهم يباوعولي ابتسمت بفشلة وهما سكتو نزلت اللفة ومسحت حلكي بالكلنس باوعت لاستاذ فقار وكتلة.
استاذ هذا سمار جابلي لفلة بيها فلفل حار وسبايسي حتى ينتقم مني متفق هو وقبس
سمار: لااااا شلون عقل عندج
فقار: كالت
نجمة: استاذ اطردة مو خوش واحد جيبلك واحد حباب غيرة
فقار: من زمان اريد اطردة بس منتظر شكوة تجي علية وهسة اجت يلة سمار انت مطرود
سمار: سوف اشكيكم الى الله وخاصة انتي نجوم
فقار: نجمة اسمها
سمار: هسة شكلت نيزك
نجمة: اختي نيزك وووالله
سمار: لابرررربج
نجمة: اي والله وشهب وكواكب هم اخواتي.
سمار: امج لو شادة حيلها جانت سمت على اسماء المجرات كلها ماعندج اخو اسمة عطارد؟
ماعندي اخو وامي ميتة وحتى ابوي هم ميت يلة تذكرتهم وراح ابجي
ذبلت ملامحي بقهر وكتفت ادية دمعتي بطرف عيني بس ينجاب طاريهم مجرد اتذكر شكلهم ابجي.
فقار: لا بابا نجوم لا تبجين الله يرحمهم كلنا اهلج
سمار: اعتبريني امج ابوج اخوج اي شي بس لاتبجين
قبس: هاي شصاير هنا؟
سمار: تعال واسي نجمة خطية تذكرت اهلها الميتين وراح تبجي.
خزرتة ودمعتي مجلبة تجليب حك شعرة وكال بجدية: -نصيرلج اهل سهلة
ابتسمت وعدلت كعدتي: -شكراً الكم اني هسة ماراح ابجي عيب بالليل قبل لا انام ابجي عليهم احسن
قبس: لا ولج لاتبجين حرام عليج
سمار: الله يذبج بالنار بس تبجين
حتى انت الله يذبك بالنار، لان جبتلي لفة حارة
سمار: مو صوجج والله اني زمال اصيحج
فقار: منا وبعد لاتصيحها
نجمة: ترة هي لفة هسة ادفع فلوسها
بونجور حبايب.
قطعنا كلامنا والتفتنا على طيبة وغادة وراي صايرات رد استاذ فقار والباقي لبسوهن ما ردو.
فقار: اهلا بنات
طيبة: استاذ احنا جاينك بشكوة يعني احنا موظفات قديمات تجي وحدة زعطوطة بعدها مامتخرجة تهينى
نجمة: اني عمري 22 معقولة زعطوطة وترة مابقة شي واتخرج كم شهر بس
غادة: استاذ احنا ولا مرة اشتكينا على احد بس هالمرة هواي تجاوزت وهي ماصارلها يومين واحنا باعتبارنا موظفات نريد حقنا.
سمار: عدنا لفة مال نجوم سبايسي ماكملتها البنية تريدنها بدال حقجن؟
كتمت ضحكتي وهو يضحك عادي رفعت راسي لاستاذ فقار منتظرني احجي وقبس مبتسم بشماتة رافع حاجبة كمت من مكاني اوكف كدام الاستاذ اكلة
استاذ هسة هنة يحجن عدهن شهود؟ شمعرفك يحجن الصدك أصلاً اليوم اني وياك بقيت وبعدين اجيت اكل وي سمار شوكت تجاوزت عليهن؟
سمار: اتفق وياج نزلنا سوة من غرفتك للاكل ماملتقية باحد
غادة: يعني احنا نجذب استاذ؟
سمار: يمكن مشتبهات لو يتخايللجن لان نجوم هذا ثاني يوم الها شلحكت تجاوز مو عيب
نجمة: صح كلش عيب اصلا
اباوعلهن وجوهن احتقنت يريدن ينفجرن خزرتهم وكلت: -استاذ اروح اغسل احتركت وانت سمار ابقى كاعد نتحاسب
رحت للحمامات وهنا بقن يحجن وي استاذ فقار ويتماوعن كون الغسل على هيج شكول، جاي اغسل والتفتت على صوتها.
روان: اسفة نجوم على الصار
عادي اصلا ما زعلانة عليج انتي حبابة
روان: والله انتي الحبابة.
ضحكت واجت تغسل كالت: -لاتحتكين بيهن نجمة
شعندي وياهن ياعيني بس هنا اول ما اجيت ما ارتاحلي
اي لان صديقة ميس وهنا يموتن من ميس
حتى ميس ماتحبهن اكيد يغارن منها
اي لان ابوها منصب وهي جانت تجي دائما للشركة ماتراهمن
عدلت حمرتها ورشت عطر اتذكرت عطري بجنطتي طلعتة وفتحت القبق بحلكي رشيت شلون ماكان ورجعتة اندارتلي كالت: -احس الروج يطلع يجنن على لون بشرتج اخليلج.
رفعت اكتافي وكتلها: -بكيفج اذا مايضر. بالعكس اتونس من امكيج اني
اجت تقربت مني رسمتلي شفايفي وخلت شوية لخدودي مسحتهن بخفة ابتعدت تضحك متحمسة
روان: بداعتي تسطرررر.
باوعت لنفسي بالمراية وابتسمت لون الحمرة مخملي ماجنت احط مكياج ولا الون شفتي فحسيت بفرق كلش جبير تشكرت منها وطلعنا سوى لمكان الشغل كالت روان لاتحجين شي وياهن لهنا واني ما شايفة ميس اشتاقيتلها العوبة بدت روان تشتغل وتدربني ونفس الشي تكتب ملاحظات كالت خلي يسجلهن استاذ فقار الج وارجعيلي رحت وهنا يخزرن بية بس ماحجن شي رجعتلهن الخزرة وطلعت.
وصلت لغرفتة دكيت الباب كلي تفضل دخلت رفع راسة ابتسم ودنك يكمل شغلة كاعد بصفة ضغيم شافني ابتسم كتلة: -شلونك استاذ
ضغيم: كل الهلا
فقار: تعالي نجوم
صرت قريبة منه انطيتة الدفتر قرا وصار يشخط بالسجل مالتي رفعت راسي شفت ضغيم يباوعلي توترت ودنكت راسي كال.
كواكب تصير اختج؟
اي استاذ
ضغيم: ماتشبهج بشي
فقار: هسة اني وقبس نتشابة لا مو كل اخوان يتشابهون
ضغيم: بس ذني غير احس كل وحدة من بيئة
فقار: عوف البنية ولا تلح.
ضغيم: هسة شكلت اني شبيك واكف على لساني
فقار: من تطلع من مكتبي اسألها اي شي خارج الشغل
ضغيم: تمام انتظرج برا
خزرة استاذ فقار وهو مخلي رجل على رجل يباوعلة بنظرات باردة باوعلي استاذ فقار صفن بوجهي راد يحجي ونسة كلامة حك راسة يتذكر قلص عيونة بوجهي وكال: -استمري على نفس المستوى كلش زين نجوم
ضغيم: كواكب نجوم حلو
فقار: ابني لاتدخل بكلشي شبيكم اليوم انتو وي اساميهن يعني ماسامعين بهيج اسامي.
ضغيم: هسة اني شكلت شبيككك تدخل بكلشي
خزرة ودنك يكمل بالنقل انفتح الباب بدون سابق انذار رفعت راسي اشوف رجال متوسط العمر بدلة رسمية انيقة ومظهر جذاب و وسيم دخل عطرة سابقة نهض ضغيم من مكانة يسلم علية وفقار هم نهض مبتسم اله مد ايدة يكلة: -نورت يابة
اسامة: منور بيك وليدي.
تبادلو الابتسامات اشرلة يكعد كعد مقابيل ضغيم يخلي رجل على رجل واني بقيت جامدة كون اتبخر هسةيمة راح اموت من المستحى باوعت لاستاذ فقار وهمست بصوت ناصي
استاذ اطلع اني هسة؟
صرت الطم بمكاني من سمعني ابوة وكال
اسامة: كملو شغلكم بابا اني ماعندي شي بس جيت اشوفكم
ابتسم فقار يعرفني اله
فقار: متدربة جديدة نجوم
اسامة: تشرفنا
اني الاشرف استاذ.
اني الاشرف شنوووو اني الاشرف شگلت هسة اني شكلت يبووي احس وجهي يطلع منة بواخ راح انصهر واموع من الفشلة اباوع لضغيم يباوعلي مبتسم وحتى فقار بادلتهم الابتسامة وخليت عيوني بالحاسبة فقار يشتغل بيها ويحجي وياهم.
فقار: شوكت رجعت من السفر يابة
اسامة: هاي جيتي
ضغيم: اكول عمي ماترتاح هيج تحب فقار الا تشوفة
اسامة: شعندي غيرة ابني الجبير شايل اسمي
ضغيم: وشايل شغلك هم.
اسامة: هي الولد المن تنراد غير لهاي السوالف اكول يابة امك شلونها؟
فقار: احسن
سكت وابوة كام هو وضيغم طلعو سوى بقيت بمكاني واكفة يكمل البيدة وينطهن إلى رفع راسة صفن بوجهي ابتعدت شوية ذب القلم وحك ركبتة راد يحجي وسكت دنكت راسة ورجع حجة بتردد
فقار: نجوم شفتج بيها ككو؟
خليت ايدي نسيت الحمرة اجت بيدي منها باوعتلة مركز وياي منتظرني احجي ابتسمت واخذت كلنس امسح ايدي واكلة: لا استاذ هاي حمرة.
بلع ريكة ومسح كصتة اشرلي على الباب ودنك عيونة كلي: اطلعي نجوم
فتحت عيوني بصدمة ردت احجي لا احرك المكتب شو هاي مرتين كلي اطلعي كمل بسرعة قبل لا احجي واني الفطيرة بسرعة انسى واسكت رفع الاوراق و كال: -خلي روان تشتغلهن.
هزيت راسي اخذتهن وطلعت من يمة نسيت كلامة لان كملة بالاوراق، سحبت نفس متوترة يمة جنت بمكان واحد وي شخصيات كبار ومناصب مثل هذول صعبة علية هو اني ماشايفة غير سالم ولدة الحثالة الله يقرضهم ان شاءلله ذولة احسهم من غير كواكب هههههه.
تمشيت لغرفتها واشوف كدامي قبس مكتف ايدة وعاكد حواجبة بضوجة يباوع لمكان باوعت للشي اليباوعلة اشوف سمار وياة ولد شاب بعمرة تقريباً حاضنة وطاير من الفرح يگلة.
سمار: لككك صافي ضلعي الثاني نورتنااا حياتيش
صافي: قلبيش انور بشوفتك
سمار: ماتحتاج حتى تغسل وجهك بعد اوووف يلفراك
صافي: ينعل ابو المسافات
سمار: عبالك وراثة عيوني جوزيات فص عيني زنجر من غبت عني
صافي: ياروحي اشوف عيونك صدك متغير لونهن جانن سود
اي مو اكلك زنجرن من كثر البجي
صافي: الشاعر الكبير
قبس: الشاعر، النعيل عساك بالعمى اغسلهن عيونك بنفط الكم واطيح زنجارهن.
يمة انتبة لوجودي خزرني بضوجة سويت روحي ما اشوفة انوب ضايج لايذب حركته بية تعديتهم وسمار من شافني يكلي.
احد اضلاعي رجعلي
قبس: احد نعالاتك المكطعات رجعلك
سمار: شوفي نجوم شلون ينغار
ها
قبس: اغار من شكولكم المزنجرة وجهة القندرة
ميس: هاي شنووو هاي منووو
التفتت على صوتها ابتسمت وهي اجت تطك بالكعب اجت حضنتي وكالت بابتسامة: -منو منورنا اليوم
صافي: هلو ميوسة شلونج.
ميس: اني زينة انت شلونك.
قبس: برتقالي لونة انتي شعليج!
التفتت علية فاتحة عيونها بصدمة خزرها بضوجة
ميس: لا قبس ميصير ترة
صافي: زين اني ميس انتي شلونج
قبس: مو قبل شوية كالتلك زينة هي كلساع شلونج ما شلونج
صافي: ها صدك نسيتني والله
ميس: راح تشتغل يمنا صافو
قبس: نعالووو احسن
سمار: نراضيك بجيس جبس بس اسكت
ميس: هسة شنو عزيمة على جيت صافي
قبس: مو مطهرينا حتى تعزمين علمودة.
انبلعت وجوهنا من الفشلة وهو عندة عادي يقصف مامهتم كلنا سكتنا كال سمار مغير الموضوع: -ها نجوم شلونها الاكلة
همزين ذكرتني ادفع الحساب
ميس: يا حساب هذا
نجمة: حساب اللفة
سمار: وقوطية الببسي مو تنسينها
نجمة: لا ما انساها بس اني ما كملتهن
سمار: يلة قابل انطيني نص السعر
ابتسمت وكتلة: -خوش بس كول شكد
سمار: ماعدنة نسوان تدفع فلوس بس عدنة نسوان تعزم اعزميني بدالها
نجمة: خوش اعزمك على لفة نفسها مو تريد غير شي.
هز راسة ويضحك حاضن صافي كال: -اعرفج على وليدنا صافي جان يشتغل ويانة بعدين طلع راح هو وضغيم يشتغلون سوى وهسة رجع النة
نجمة: اتشرفنا استاذ صافي
قبس: استاذ كبببل واني اخو المدير ما تكليلي استاذ
صافي: بس ينغار
نجمة: اني عندي شغل باي
اشرت بيدي ورحت بسرعة الوضع حامي لاتصير عركة واني انجعص بالنص بس والله سوالفهم وعركتهم حلوة سمار وصافي اصدقاء مبينين وقبس يغار منهم لان هو صديقة سمار هسة تصير مرافس الظاهر.
رحت لروان البنات بس يخوزرن بية المشكلة اني مامسويتلهن شي شنو هذا الحقد الشايلاتة طبيعي غلست عنهن وكملت اشتغل وي روان شوية وميس اجت وراي تنثر بشعرها ولا تبطل هالحركة خزرنها وهي تحاهلتهن اجت سلمت على روان وبقت ويانا كاعدة.
روان: اكول ميوسة ماعندج شغل
ميس: من الصبح اشتغل حتى ماطلعت ريست خلصت شغلي وشغل غيري مليييت
روان: بسرعة تعلمتي الشغل
ميس: أصلاً اني اعرف هواي بس رادلي شوية دفعة.
نجوم علموها لان اول مرة تحظر هيج مكان وتتطلع على الشغل
روان: نجمة كلش زينة بسرعة تلكفها مامتعبتنا
نجمة: شفتي اني شلون ذكية
ميس: وين اكو بذكائج انتي نجوم
ابتسمت وبقت كاعدة يمنا منا لمن خلص شغلنا وطلعنا ميس تحجي تحجي من بدا الدوام هي مخزنة تسولفلي الصغيرة والجبيرة ماتسكت ثبرتني ثبر بغير واني بس اهز براسي شحدي لو كتلها اسكتي لو كافي.
طلعنا وصار بوجهنا ضغيم فتنا منة وميس سلمت علية باوعلي وكال: -نجمة عادي احجي وياج شوية
اكيد استاذ
باوعت بوجهة ميس هزت راسها وراحت للسيارة بقيت كدامة باوع بوجهي وكال:
كواكب شنو قضيتها
ها استاذ شنو يعني
تدرين بيها ورقتها احتركت؟