رواية المنجمة للكاتبة كفاية كاظم الفصل الثاني والثلاثون
وكف كلبي بلحظتها من شفت اختي مشمورة بالشارع ودمها بطولها لطمت على راسي وصرخت بصوت عالي جرح حنجرتي اريد اركض واوصللها ماكدر رجلية ماتن رجلية ركضت وطحت على وجهي كمت زحوف وصلت الها تخبلت من منظرها وجهة مغطى بالدم ماكدرت الزمها صرت اللطم واصرخ ماتت اختي ماتتت التمتو على صوتي وكل اليطلع ينصدم مذهول من منظرها صرت ما اسمع شي بس صورتها كدام عيني رفعت ايدي ترجف
ضربت وجهها عيونها مغمضتهن وتنزف.
شهبة لاتعوفيني وحدي لاياخذج الحادث مثل ما اخذ اهلنا
انبلع لساني بعد ما كلت هالجملة شالوها ركضت وراها مالحكت بيهم صعدت بالسيارة الثانية ما اشوف شي الدنيا صارت ضلمة بعيوني والله
اختي بساع بساع تروح مني جانت يمي طلعت لكيتها سابحة بدمها.
اخذوها الدكاترة منا للطوارى انصدمت كعدت بمكاني لا احرك ايد ولا رجل حتى عيوني احس بيهن واكفات مايرمشن بوقتها الزمن وكف عندي وعقلي وگلبي ثنينهم خبر واحد يهدمهن وانتهي عقلي اني رايح من زمان وكلبي تعبان، حسيت على ادين تحضني وتعدل شالي ما اهتميت فتحت عيوني بقوة ارمشن بيهن الصورة مو واضحة ضرغام لازم وجهي افتهمت يكلي احجي دفعت ايدة وكمت عفتة وكعدت بغير مكان رجعت على صفنتي حتى بجي ما بجيت.
مر الوقت عدهم ولا اعرف شكد ساعة اكثر شفت الدكتور طلع يحجي وياهم ركضت يمة اسمع كلامة
الدكتور: المريضة جانت حامل للاسف خسرت الطفل وحالتها خطرة ضربة براسها وعدها كسور محتاجة عملية لرجلها اذا طلعت منها نسويلها
دكتور اختي تعيش؟
الاعمار بيد الله مانكدر نحدد سيطرنا على الوضع احتمال جبير تصير عدها مضاعفات ونخسرها
لزمت كلبي وكلبت عيوني اتذكر قبل لا اوكع رفعني ضرغام.
ورد: القلق والخوف دخل بكلوبنا قبل لا يدخل بيتنا رحت لجوري تخبلت وعيونها ما تبطل دموع بس تبجي وجهها صار دم.
كومي غسلي كومي راح تموتين
جوري: راح تموت تموت الدم الدم اخذها
ضربت على رجلها متخبلة شافتها ركضت اني ماشفتها طلعت لكيتها ماخذينها، ذهب اخذوها الولد صعد ضغطها طاحت علينا والبيت انهجم هجم دخل فقار صعد لغرفتة ونزل يركض لاكاة عمي نعمان كلة.
نعمان: عرفتو صاحب السيارة.
اي عرفنا هذا ابن عمها ناوي يكتلها موت
كالها وطلع يركض وعمي وراة يصيح
اشتكو عليهم
خل انلزمة بالاول بعدين بعدين
طلع وخلانا برعب حقيقي امة انتهت وهي صحتها مو تمام تردد بس كلمة وحدة.
هاجر: راح يكتلة ويدخل سجن
وكلنا نعرف لو قبس لزمة يكتلة موت لان عصبي وامة رجعت تخابر بية وتبجي يكلها وصلت
سهلة حايرة بامير انصدم الطفل بس يبجي شاف الحادث كدام عينة صار لبست عبايتها واخذتة
صاحت لحسن.
ولك يما ماتاخذني والولد راح يموت
حسن: وين اخذج كولي
امشينا ناخذة للزيارة هذا انصدم وهو منا شلون جان ادخلة على اهل البيت لايصير بية شي
خطية راح يركض يبدل وهي لمت اله ملابس بجنطة صغيرة اخذتهن وطلعت لاكاها فرقد
وين رايحة؟
امشي حسن
عبرته وراحت وهو وراها يصيح بصوت عالي لزمها من زندها ما سكتتلة صيحت علبة.
عوفني شرررايد مني هسة احنا بيا حااال عوووفني
گ اني ماتكليلي وين راح
للزياة ارتاح مارايحة لصاحبي.
دفر الباب بقوة خسفة راح وراها شوية رجع حسن
يحجي وي روحة: هسة اني شسويت يريد يكتلني الا شوية
بقينا على اتصالات وياهم وذهب رجعت منتهية شربت العلاج وغفت وهي كاعدة تسبح وتدعي رحت اركض افتح الباب دخل ضرغام شايل نيزك بيدة وجهها ولابية قطرة دم منتهية البنية مشيت وراة وكلهن يباوعلة يخزرن بية عبالك من البطر شايلها صعدها لغرفتها خلاها على فراشها واني وامي يمها كعد يم راسها نزع شالها وهي تدير بعيونها.
ياسمين: البنت منتهية بس لا انجلطت رجعت
ضرغام: تلاحكناها بسرعة تعبانة وكلبها تعب
ذب حسرة يتاملها من غفت وحدها طلعنا وقبس اجة يركض دفر باب غرفتة كلنا ركضنا وراة لكينا فاتح صندوك بية مسدس يترس بالشاجور طلق وجهة دم صاير ويتنفس سريع سحبة ضرغام بقوة منة
هجم علية بصوت عالي يصيح
قبس: جيبببببة لك جيبة ابرد كلبيييي بيهممممم
ضرغام: وتبقى من كل عقلك مؤبد تررروح بيها يا زمال عوف السلاح عندك ادين وعارررك.
صارو يتلاوون على السلاح واحد يسحبة من الثاني امي سحبتني بالزاوية ختلنا نباوعلهم من الخوف نست تطلعنا من الغرفة ضرغام قفل ما ينطية وقبس تخبل ضربة بوكس على وجهة ماحس الا انركع قبس بالحايط وصوت الضربة قوي.
صاح قبس متالم وهجم على ضرغام طلع ضرغام يركض بيدة السلاح لان يعرف بس ياخذة قبس يكتلهم موت كون طايحين بيدة جمدنا بمكانا من سمعنا صوت طلقة ثارت والصريخ جوة كب طلعت امي تصرخ واني وراها وكفت ايدي على حلكي من شفت ايد اسيل تصب دم وتصرخ ركضلها ضرغام وقبس بهت بمكانة لزم ايدها والبيت رجتة رجت بالصريخ ضرغام ركض علية اخذ شالي من ركبتي لفة على ايدها ودفعها من ضهرها ينزلها وهي ماتقبل تمشي تصيح.
ايدي راحت ايدييييي
ضرغام: باللحم باللحم
اسيل: راح امووووت يا لحم كسرت العظم
ضرغام يدفع بيها بس يريد تنزل ياخذها للمستشفى وهي منتظرة يشيلها ما تنزل وكعت بالكاع اغمى عليها وقبس بخفة سحب السلاح المجلب بيد ضرغام ونزل يركض ضرغام عاف اسيل ونزل يركض وراة بقت اسيل فوك التمن عليها واني نزلت اركض وراهم خفت يتكاتلون علمود سلاح وهما ثنينهم مخبلين علساس اني احلهم بس نزلت اشوف شيصير.
قبس صعد بسيارتة ركض ضرغام باخر لحظات لحك علية وصعد شغلها بسرعة جنونية بس الدخان خلاة وراة رجعت على صوت سندس ادك وتلطم وتصيح...
يمة عافها مووواتة وراح كتلها كتلها وراح ولا همة لو ذيج ركض بيها بس هي عافها تموووت هو كتلها عمدااا ولكم الا اخلية يخيس بالسجون واشهد علية.
عمي نعمان موجود صعد مايتجرا يشيلها وهي شوية ثكيلة كامت من شافت النسوان تكومها راحت تمشي وتدعي تبجي من الوجع كعدت لازمة اذني اطن من الصوت طلعت نيزك تمشي خطوة خطوة لازمة الحايط حركت شفتها تريد تحجي صوتها ماينسمع تعبانة كلش رفل لزمتها سندتها دخلتها لغرفتها ماقبلت تريد تنزل رحت وراها باوعت بوجهي لزمت اديها وكعدت.
ابني وين اخواتي وين
ورد: امير اخذتة سهلة للزيارة و.
اريد اروح اجيب كواكب واجي اختي راح تموت.
سحبت عباتها خلتها على راسها ونزلت كوة تمشي
ورد: وين رايحة نيزك ارتاحي شوية مو اديج زركة من الكانولة وكوة تمشين
نيزك: احنا الما شفنا الراحة يا راحة هاي
نزلت تريد تمشي حفصة كاعدة بالصالة بس شافتها صاحت: هجمتن البيت هجم هسة الزلم تتكتل من وراجن والبنية طاحت بيها شلون عرضة شايلات بس المشاكل من وراجن
ورد: ماتشوفينها منتهية بيا حال هي
حفصة: ضلي يالعوبة متشبعات بالسحورة.
هزيت ايدي ومشيت شبيها هاي خبلة يا سحورة يا صخام بعدنا بالساحة واجة ضرغام مشت ماباوعتلة واكف بالباب مفتوح طلعت من يمة سحبها ورجعها للبيت.
وين رايحة ووووين؟
بروح خاوية سحبت روحها منه وتعدل بعبايتها
عوفني اروح اجيب اختي
ضرغام: يا اخت منهن اني اجيبهن
اني اروح
اني اروح لبيت دراهم اجيبها واجي
ابقي انتي ارتاحي
طلع قبل لاتحجي شي رجعت كعدت بالطارمة ايدها على راسها وتردد راحن اخواتي يما راحن ماكدرت احميهن.
كعدت يمها مابيدي شي بس ابجي لبجيها تقهر
بقينا برا اكللها ادخلي جوة تكلي اريد اختي هسه تجي ماكامت ولا تحركت.
شنو صاير؟
ها
تميم: اكو مشكلة بسمعج؟
لااعع
شكو شبيهم كابين
سولفتلة مختصر مفيد هز راسة راح يخابر رجع مبتسم بخباثة مر مني قبل لايدخل كال.
قبس لازم ابن عمهن الليلة يموت بيها
وداعاً يا قبس
كمت من مكاني الخوف نهشني نهش اريد احجي ماكدر راح مشيت وراة كتلة: منين سمعت هما ليش عافوة وحدة وياة بلة كتلة ذاك عصبي.
رفع اكتافة وصعد رجعت نيزك اصفرت كلتلي
سراج الدعمها؟
هزيت راسي اي لطمت على رجليها ورجعت على وجهها.
نيزك: يريد موتها يريد كالو مانعوفجن كالو
مهدور دمجن مايرتاحون اذا مايبردون كلوبهم بينا اجرمنا عدهم بعد انهدر دمنا راحت اختي شيرجعها النة راحت فرحتها خسرت ابنها ورجلها
رجع ضرغام من شافتة وحدة نزلت دموعها وعاتبتة
وينها ليش ما اجت وياك؟
ماموجودة
غطت وجهها تبجي اجة حضنها يبوس براسها بعدت عنة وطلعت كدامة.
ارجع للمستشفى اخذني
شتشوفين هناك مايقبلون تدخلينها وبالعناية المركزة ارتاحي هنا
اروح خليني لاتوكف بدربي
نيزك: طلعنا للمستشفى ساكتة بكلبي نيران مشتعلة تاكل بيه اكل خسرت اخواتي ضاعن من ايدي الجانن ينامن عليهة.
طلعت من صفنتي ركزت وياة من صار يخابر.
ضرغام: ها فقار سلموة للشرطة تسونة طرشي يمكم هذا مخبل بلة مات ماكافي دفرة دفرتين كافي خلو القانون يشوف شغلة
فقار: لا هو سلمتة كوة عن هذا المخبل.
مو ماعندي عقل حتى اسمع كلامة وابقية وياة
ضرغام: انجلب علية شلون طلعتوة منه
اني وضيغم
اه سمعت متعاركين هو وضيغم صايرين دفرات
عقلة بعدة مامستوعب الخبر اجة من السفر
تلكوة مرتك اندعمت ابنك مات وابن عمها داعمها
شتردونة يسوي؟
عمي دروحو هي ما تطيح بس بالفقير.
سد الخط منه حجة وياي مارديت علية لمسافة الطريق كتلة: خابر امك اشوف ابني شلون صار
شلون تعرفها شادة حرب من تكول ابني مو امير
مارديت علية اتصل.
ها فرقود وين انتو؟ العب بيها يابو سميرة
كملو زيارة واجرو بفندق لاترجعون
طكها بضحكة نترت بية
انطيني ابني احاجية
جيب اموري خل امة تسمع صوتة وياك دايرة
لاتخلية ضايج ونسة فررة. ها حبيبي امير الامراء
بعد روحي روحك هاك هاي امك
اخذتة حجيت وياة وي سهلة طمنتني علية يلا ارتاح كلبي وسكن صوتة كلش زين رجعتلة تليفونه شوية وصلنا للمستشفى نزلت كلبي انقبض اخاف من الدكاترة تسمعني شي واموت وراها.
ضرغام: احلفج بعزيز كلبج لاتبجين
الدمع لو يفيد كلها بجت هي عيونج
لوحة تنرسم مو تنهضم وتنزل دموعها
دخلت ومن شفت قبس كاعد كدام الغرفة ماتحملت
اشوف شكلة لو مو عيب من الناس الزمة اكتلة
هسة اجيتك شعندك جاي؟ روح كمل دياحتك
حب وتمعشگ المن رجعت المننن بعد ماخسرت ابنها وصحتها انتهت من وراك بس تدعي عليك هاي طاحت بيها ماصار بيك شي ولا احترك كلبك.
بكامل اناقتك وترتيبك كاعد هنا جنك مدير ااااااطلع منا ااااطلع ماريد اشوووف وجهك
سحبني ضرغام ضربت ايدة بقوة ارجف من العصبية.
طلعة منا طلعة خلي يرجع يساافر ادري كاعد هنا عيب من العالم رروح محد يحجي عليك ررروح
كطعت كلامي من دخل خالي ونجوم وراة تبجي وتمسح بدموعها الوجهة صاير قطعة حمرة شافتني اجت تركض فتحت اديها شمرت روحها تبجي وابجي وياها اخذتها على صفحة كعدنا راسها بحضني ودموعها تصب.
نجمة: تكسرت شهبة شلون لو طلعت وصحت
حملها الجانت فرحانة بيه راح هسة كون تعيش وترجع خايفة اني خايفة نيزك ضميني حيل
ضميتها بحضني انتهت خفت عليها لا كلبها يوكف صرت اقوة منها احجي عليها واصبر بيها طلبت الصبر من السيدة زينب عليها السلام خلت راسها على جتفي اجة خالي حجة ويانة وراح كعد رفعت راسي من شفت بطل مي باتجاهنا شفتة فقار اخذتة من ايدة عينة على نجوم وجهة انعفس من شافها.
شربيها وياج واغسلي وجهها.
وخرت راسها شربتها وغسلت وجهة بقة واكف يحجي وياها.
نجوم بابا على كيفج وي نفسج اني اعرف مو سهل الجاي تعيشون بية ادعيلها مو تبجين وتعمين عليها امسحي دموعج بابا
ضمت راسها بعباتي
فقار: نجوم لا تبجين
افصلج من الوظيفة بس تبجين
هم حرام عليك استاذ
وهم حرام عليج تبجين
بعد ما ابجي بس تنطيني اجازة
صار بعيوني
كالها وابتعد الكل صارت انظارة علينة بقينا كاعدين ماكو نتيجة وضعها نفسة وباجر عمليتها.
يسون رجلها نجوم اخذها خالي بقت مجلبة بية وتبجي.
عوفها خالي باجر ترجع
همام: وين تبقى اختج وبعدها بالمستشفى حتى مامخرينها باجر الصبح اجيبها تشوفها قبل لايسوولها عملية
راحت نجوم كوة خايفة وترجف طلعت وراهم
خالي عوفها يمي ارجع للبيت والصبح اجيبها وياي بعد عندك دوام انت
اقتنع وعافها بقينا ننتظر خبر والولد كوة عنهم باقين شوية وطلع الدكتور بعد ما جيك حالتها
الدكتور: فاقت المريضة باجر ان شاءلله عمليتها الصبح.
نيزك: دكتور يصير نشوفها
ممنوع
رجعنا للبيت ماخلونا ماجادلت وياهم هو اني على ساعة اطيح اخذت اختي نريد نصعد فوك كلهن متربصات النة خاصة من شافن ضرغام ويانة اجة
سندس: هسة اجيت ما سالت على البنت الصوبتها عاشت مااتت
ضرغام: وانتي شدخلج بس اريد اعرف التهي بروحج مالج غرض بالناس كلمن يدافع عن نفسة
ويحجي بحقة
سندس: اسكت على الباطل تردوني
اني صوجي ما اشتكيت عليك وحجيت الحقيقة.
طمطمتوها ولد الليث منا ومنا وين ترحون من الله
صعدنا كبل واسيل طلعت تحجي وتشكي بعد ما التفتت وراي اخذت نجوم لغرفتي قفلتها علية ونزعت عبايتي وشالي كعدت حيلي رايح.
نجمة: اكلج اني امشي يم البنات
انجبي ماتتحركين
يااا وضرغام
ماكو ضرغام يروح يشوفلة مكان ينام
بية بعد مايهمني اخذي راحتج.
غسلت وهي كلشوية تريد تطلع ماخليتها تعتب خطوة خارج الغرفة اجن البنات سالن عليها وبقن يمنا يسولفن وردة بقت يم نجمة ذممتهن مايطلعن يلا ارتاحيت ونمت كعدنا الصبح بدلنا وطلعنا للمستشفى كلوبنا خلصت بين ماخلصت العملية
وطلعت يوم كامل ادمرنا وين يلا رجعت لوعيها
تتلمس ابطنها وبس دموعها تنزل ماتحجي شي
طلعت بعد فترة من المستشفى بامر من الدكاترة بس جنازة رجعت صحتها النفسية صفر عافيتها راحت.
وجههة مورم رجلها عملية ماتتحرك الا بكرسي
ايدها مكسورة وعدها كسور.
نجمة تروح وترجع علينة واني كلبي نار عليهن كلهن خاصة كواكب احس واحد مربطني مايخليني اروح واشوفها ونجمة ماتخليني اروحلها وكلبي لاجمني مادري شلون كاعدة.
ضرغام من ذاك اليوم لليوم ماكعدنا بمكان واحد كعدت يم شهب بغرفتها وقبس نص الليل يلا يدخل للبيت.
لزمت ايدي شهب وعيونها مدمعة
فدوه امانة نيزك لاتخلينة يجيني ويشوفني.
لا تخافين اطردة بس يجي اله عين ويشوفج
ولو الصلافة صارت بفلس
كل يوم نجتمع يمها حتى ذهب تجي تسولف وتغير نفسيتها شوية وتنزل بس نبقى وحدنا ترجع تصفن ودموعها تنزل.
شهبة كافي صبري روحج حتى ترجع صحتج
بعد ما اعيش هنا اطلك
بس ترجع عافيتج ميخالف اطلكي
علي المسكنات تنام وتهون ومن يهيض الوجع تبجي ماتتحمل حرت شلون ارجع اختي.
شهب: عيوني على الساعة تمر ثانية ثانية الوجع مايخليني انام تمنيت موتني سراج بسيارتة.
ولا حطم حياتي خسرت ابني لا اكدر امشي ثكلت علية روحي كل يوم بالليل اكعد من الالم نيزك تنام وينفتح الباب بهدوء يدخل خطواتة مالهن اثر اسوي روحي نايمة واكطع نفسي ياخذلة فترة يرفع شعري ويدنك يبوس راسي لو يتلمس ايدي ويطلع بالبداية عبالي اتخيل الا ان تاكدت حقيقة اكعد الصبح كارهة روحي مثل ما كرهتة.
طلعت نيزك بعد ما بدلتلي ورتبت شكلي تخليلي حمرة خفيفة ولخدودي اصيح بيها متخبلة وهي تكلي: ماحب احد يشوفج مرعبلة وانتي بكل حالاتج موردة
نزلت تشتغل واسيل كل يوم عركة يكول نيزك ضربتها بالمسدس رغم هاي نيزك تجاوز الكلام وكانة ماصاير شي تمنيت اكدر اكوم واتحرك
خليت ايدي على عيوني انفتح الباب دخلت مبتسمة
ولاء: هلو شلونج
هلو
اجت كعدت يم راسي تباوع بوجهي وتسولف
اكلج شعرج هم صابغتة
لا هو هيج.
اخذت خصلة من شعري تلعب بيه اني مالي خلك حتى روحي بس استحيت اطردها هي مو دوم تجيني.
اكلج صدك راح تتطلكين
منين سمعتي
اختج كالت.
اي
حرامات بعدج صغيرة بس صراحة تحصلين رجل على هذا جمالج جنج كطنة
تلمست خدي ميلت راسي اخزرها انفتح الباب طفرت من مكانها شفتة درت وجهي للصفحة الثانية دخل واسمعة يكلها.
قبس: خير شعندج هنا؟
ولاء: ها مو وحدها خطية اجيت اونسها
اطلعي بعد لا تجين يمها
طلعت ومن مكاني حجيت بدون ما اباوعلة.
اطلع انت هم وبعد لا تجي
طبك الباب ودخل تقدم بقة واكف يم راسي
اطلع مناااا ولا تجي بالليل لان نيزك نايمة يمي ما احجي لاتحاول احنا انتهينا كم يوم وتصير رجال غريب عني حتى مايصير تباوع بوجهي.
لاتخلين هاي الزركة تدخل للغرفة
اطلع
انفتح الباب دخلت نيزك خزرتة ودخلت بحدة تحاجية: سالمين شكو بلا زحمه اطلع
قبس: بلا زحمة لمي ملابسج واطعلي من غرفتي
ههههههههه والله ضحكتني واني صايرة منو اليطلع؟
قبس: انتي اكو غيرج عندج غرفة وعندج رجال تفضلي لمي غراضج وروحي شوفي رجلج
نيزك: شعليك برجلي انت مالك غرض بينة
كفيتي وفيتي اطلعي من غرفتي
ما اطلع وشتريد سوي سووي يلا بلة
اختي ماتريدك انتي مو ماتردينة؟
شهب: خل يروح يتزوج حتى لو طبت ما ارجع
اريد اطلك خلنروح منا
لو مو الحركة صعبة عليج وكوة صعدناج جان رحنا سهلة انتظري بس هالفترة بعد ماتشوفين هالوجوة
قبس: الله يساعد ضرغام على صلافتج هاي
لسانج شطولة ترفعين الضغط.
بلسان احجي اخ لو احجية
واحد خازر الثاني بحقد بس طلع انسردت علية بالحجي محترك كلبها ماحجيت ولا كلمة حقها.
نيزك: عبالة اعوفلة الغرفة ولا كان صار شي يحلم هو وابن عمة، نزلت صاحتني ذهب تحجي وياي ارجع لغرفتي ما تجادلت وياها هواي تحججت باختي وهي تكلي اختج يمها رجلها يداريها هم ماخذ راحتة الا بغرفتة سكتت ولو هسة منو اليحجي ما ارجع.
اشتغل بالمطبخ وعيني على الحبل ملابس ضرغام ادك بيهن الشمس نخيت وردة تجيبهن راحت تركض عافتهن على الكاونتر وراحت لاخوها صاحهة بين ماخلصت شغلي تذكرتهن رحت اجيبهن وتفاجات من لكيت ملابسة الداخليات ماكو وهنا قبل شوية موجودات ماخليتها براسي لان اجة خالي ومرتة نجوم وياهم سلمت عليهم والبنات قامن بالضيافة نجوم وجههة صاير اصفر وذيج هي صاير وياها شي تنكشف بسرعة من تنقهر لو تتاذة.
اخذتها من ايدها بحجة تساعدني جوة وحجيت وياها بصوت ناصي عن لايسمعن.
ها نجمة خيرج شصاير وياج
مرت خالي مريضة يردون يسافرون والله شايلة اخاف يكلي ابقي يم اخواتج
اي ماتقبلين تجين يمنا؟
لو اموت والله ماكدر اشتغل وياهم واشوفهم بنفس البيت شحس انتو بيتكم شصاير كلة حياية ويذبن سم اكعد بالشارع ولا اكعد يمكم
تستحين من فقار وعلى شنو
هنا استحي شنو كاعدة بيتهم بس بالشركة لا عادي
شلون علاقتج وي فقار؟
باوعت بوجهها مركزة اشوف تتوتر لو تحمر خدودها حتى اعرف عدها شي تجاهة بس العكس نجوم اعرفها لو تحبة ما لمعت عيونها وابتسمت بكل عفوية تكلي.
والله ماكو منه حباب وخوش رجال
وكلش حباب
عوفج منه حباب وهيج يعني شلون علاقتج بية
مو كتلج حباب ويعتبرني مثل بنتة
ان شاءلله ترجعلة ويعيشون براحة
ويرجع جمانة
هي والله حلوة وشخصية كون صدك يرجعها
شو حبيتها وهم خطية ود امها وياها ماتفترق عنها.
لو ما العيب جان اكلة يرجعها على ذمتة هو شكلة ينفذ
انجبي شعليج بية
ها هم كلت صح مالي علاقة بية هو يرجعها كون
ذبيت نفس ارتاحيت اني متاكدة ماعندها مشاعر تجاهة بس هو مو شاكة لا متاكدة بس نظراتة الها تحجي شي صعدت فوك وخالي صاحني رحت كعدت يمة بس اني وياة بقينا.
همام: خالي تعرفين راح نسافر هالفترة
اي كالتلي نجوم راح تاخذونها وياكم؟
اي لعد وين اعوفها بس اريد احجي وياج بغير موضوع هسة تكولين احنا بيا حال بس هي هاي بعد سنة الحياة.
هزيت راسي كمل يحجي
اختج تقدملها شخص زميلها هو عندهم شركة وناس مرتاحة هو الولد مؤدب وخلوق شايف نجمة وخطبها مني اني كلش عجبني وكلت اكلج
وهي تعرف لا
تعرف شلون ماتعرف هم حجيت وياها بعد هي تستحي ماحجت شي انتي هم اقنعيها وياج بعد وين تحصل هيج واحد هي هم تعبت خو ماتاخذ واحد فكر.
والله خالي المادة مو كلشي هل رجولتنا فلوسهم خير من الله ومامرتاحين
والله خالي المرة تتحمل الرجال وتجيبة بذكائها مو كل شوية وطفرت بوجهها وصاحت طلكني
هزيت راسي وطلعت صايرة فلا اتحمل كلام من احد لاكتني نجوم تدردم وي وردة اخذتها احجي وياها.
خالي كلي على هذا الولد الخطبخ
ها زيد
تعرفينة راضية بية
ماعرف
خالي عاجبة يريدني اقنعج
هسة راح يسافر
اي وكال ياخذج وياة
علييييي
كيفتي.
ولج اشوف الناس ميس العوبة صادفت بنفس البلد واني هم عندي فلوس اسوي جواز واطير وياهم
والخطابة
من ارجع انتي بكيفج
طارت كدامي باست وردة وطلعت تركض والله حيرة هم اجازف بيها واخليها تتورط مثلنا عفت الموضوع من ترجع اشوف الولد بوكتها الله كريم
ذبيت نفس روح روحي طالعة شفتها كبالي تنسد روحي من اشوفها.
اسيل: دعاء كلي لامج تاخذني للحافوفة اروح اعدل ابو اسد عاجبة اصبغ شعري عسلي
كتلة ادلل.
بقت تحجي طيري انتي وياة براسي سوالف اكبر منج ومنه زين بهاي سالفتها ولا ايدها الخابصتني بيها لحكتني ورد جلبت بية تحجي على السريع
نيزك والقرآن ضرغام مايطلع من غرفتة ويقفلها
من ينام وحدة اني اشوفة بعيوني تجي ادك الباب تحجي بصوت ناصي وترجع
م
رو منه التؤم حجو بصوت ناصي
حسين: تريدين نام يمة ولو خلانة نام بالكاع بس شنسوي واحد يحصل فلوس
لا والله ماريد نامو بغرفتكم ارتاحو
بس تدرين سندوسة سحارة لاتلزكج بسحر.
اسكتي عنها
شعندي ماخذة رجلها لو ضرتي
محسن: اشك بيها جانت يم السحارين
حسين: هي من دخلت للبيت تفتر بالسحارين
كالوها وراحو مابقت بالي عبالي يتشاقون دوم هما وياها هيج وحتى لو صدك شعلية بيها.
تعبانة ودايخة حتى امير كلة يم سهلة نساني نزلت اشوفة لكيتة يتابعون افلام كارتون هو وسهلة
خانسين على التبريد والهدوء.
ها سهلة شنو ابنج امير شو حسيت اني مو امة
سهلة: روحي امير هذا.
امير: نانا نانا ضيضم باسني وزابلي حلويات هواي
ضيضم شنو هذا جني
سهلة: لا يقصد ضيغم خطية دوم يجيبلة حلويات وياة
الله يوفقة
تروح وياي امير
امير: لا اليد اسوف هازا
ضحكت وصعدت ماعرف ليش رحت لغرفتي مو لغرفة شهب فتحت الباب اختنكت من دخلت.
ريحتها تلعب النفس لزمتني دوخة ذبيت روحي على الفراش نمت بسرعة وبالحلم اني بغرفة سودة وحدي املخ بروحي وضرغام واكف بالباب يباوعلي يريد يدخل مايكدر يحرك رجلية بس ادية فاتحهن يكلي تعالي واني اصرخ اجت مرة سودة وجهها يخوف مديت ايدي لضرغام يطلعني اتوسلة مادخل طلعت المرة سجينة من ثوبها صرخت وكعدت اصرخ كلبي يريد يوكف انفتح الباب صكيت بمكاني من شفت ضرغام وهو هم من شافني تفاجأ من ذاك اليوم هجرت الغرفة.
كمت اعدل بروحي اخذت شالي لبستة وجهي يصب عرك دخلت للحمام غسلت على السريع طلعت امسح بوجهي صار كدامي عبرت منا خلة ادية مانعني اطلع اخذت نفس فحطانة.
خليني افوت
ليش هاجرتني
كرهتك
واني اريدج واعشگج
حجي حجي كلة حجي وخر امشي.
عبرت لزمني من زندي حسيت نار واشتعلت بيه من سحب راسي يشتم بركبتي بلا وعي بكل قوتي والله ماجنت اريد اسوي هيج ضربتة بكل قوتي على وجهة وكعت ليورة اباوع بشكلة شيطان يريد يموتني زحفت ليورة وايدي بركبتي املخ بالمكان بدون وعي.
ورد: كاعدة بالمرجوحة اتمنى نرجع نعيش مثل قبل اركض اسولف البس براحتي تقيدت كلش حتى اهلي علاقتي قلت بيهم صار كل وقتي وي البنات بس هنا حبيتهن وتعودت على جوهن.
سحبت بطل عصيري اشرب عبالك بطل عرك وبسكويت عودان اقلد اليدخنون بعد اني اعصاب لحد يحاجيني تحركت من مكاني من سمعت صوت سنيدس وي اسيل يحجن بصوت خافت قريبات مني.
سندس: انطيني الفلوس مو تغلسين صارن عليج هواي القديمات مو تنسبنهن
اسيل: مو انطيتج فلوسهن بساعتهن
تريد بعد شسويلج انطيني
خوش انطيج بس لاتسوينها علية سودة
عندي فلوس لا تخافين
جمدت من التفتن شافني ابتسمت وهنا فتحن عيونها اشرت بيدي هلو وحجيت.
هستوني اجيت والعباس بس كللي الفلوس المن
سندس: وانتي شعليج مدخلة روحج بكلشي يلا روحي منا خفت
شبيج عيني سندوس انطيج عصير ولو انتي ما تستاهلين
هم ناقصني الزعاطيط ولي منا.
هزيت ايدي ورجعت لمكاني ذني يحجن بالفلوس واني كل همي العصير والجبس امداني بقيت كاعدة رفل تعاركت وي حسن ماعرف عليمن وبعد ولانزلت واخواتهن يسجن سج اما اختي هاي تكنيك فووول انتبهت للباب نزل ضيغم ردت الحكة وتذكرت زعلانة علية لان وصيتة على كرتونة نمبر وان وماجابلي يكلي مو زينة عليج شوية واندك الباب خليت شال على راسي وطفرت افتحة
ورد: منووو
انا البندورة الحمرة مزروعة بين الخضرة
فتحت الباب اضحك وكملت اغني.
تاكل مني ماتشبع وتصير خدودك حمرة
ضحكت بفشلة واشرت بيدي هلو
صافي: بس اخوج وين راح
بشرني حذاتي ما لكيتها
لا جاري البحث عنها
عفية عليك خوش ولد صاحب نخوة وغيرة
تميم: شكوووو
دخلت بسرعة وعفت الباب مفتوح وراي رجعت لمكاني فحطت سحبت نفسي وسحبت نستلة اكل بيها هسة هذا منين طلع شوية شفت ضيغم طلع مستعجل وحركت السيارة دخل تميم عدلت شالي توقعت مايشوفني لان كاعدة بظلمة اجة باتجاهي تحظرت للرزالة واني هم ارزلة خل يجرب.
تميم: شعندج تحجين وي الولد
صديق اخوي فتحتلة الباب وانت ميخصك
روحي جيبيلي مي فحطت
كعد بمكاني طفرت ابتسم ومد ايدة
روحي جيبيلي مي يلا حبابة
رررايحة
رحت جبتلة بطل وطلعت اطفر مديتة اله لكيت الدخان صاعد فوك: هاك اخذ
مد ايدة ياخذ المي شهكت من سحبني علية
وطيحني بحضنة بعدني مامستوعبة ومتحركة خلة راسة بركبتي يعض بيها وايدة الثانية مطاوقة بطني بقوة يضب عليها اريد اصرخ وانفتح الضوة
علينا وسندس صارت بوجهي تصرخ.
يبوووو الحكونا يا عالم ذولة ي
بالختلة.
كواكب: فتحت عيوني على وسعهن مامصدكة هذا هو لو جاي يتخيلي خليت اذني على الباب وصوتي يرجف: هذا انت، غ غضنفر
غضنفر: اي اي اجيتج والله ماعوفج اني
بس وخري من الباب راح اكسرة
ابتعدت وخليت ايدية على اذني من صوت التكسير رفعت عيوني على الباب شهكت من شفت شكلة ماتحركت بقيت بمكاني ضعفان وصاير اسمر متغير كلش باوعلي و ركض سحبني من ايدي نترتها منه
غضنفر: ها ولج كواكب شلونج
مو زينة من وراك.
لا والله مالي دخل بحالتج
روح ما ساعدتني عفتني عدهم موتوني
اشر على صدرة فاتح عيونة بوسع ومدمعة
واني كواكب واني شصار بية؟ ضحيت بروحي علمودج والله ضحيت وماردتها بس ردت اخلصج منهم وهسة تكولين ما ساعدتج!
نزلت دموعي مسحتهن
غضنفر: هسة يلا كمت وصرت ادور عليج
فات الاوان وموتوني اني ميتة هسة
امشي وياي
صرت مدمنة
سحبني من ايدي بقوة
غضنفر: امشي اعالجج وارجعج كواكب ام دجة
مشة بية طلعت من الغرفة نترت ايدة وضربتة بكل قوتي.
روح ما اروح وياااك روح
تقرب مني يحجي بحركة
لاتبقين وي هذا المثقف يسلمج للشرطة والله يسلمج
هزيت راسي وعفتة احجي
ما يسلمني هو يعالجني كال
لجججججج غبيييييية يسلممممج للقاااانون امشي وياييييي
الالم ياكل بية اكل والدنيا طالعة من عيوني وهذا يريد اروح وياة حتى لو مو بعقلي ما اروح وياة اروح للموت مرتين برجلي هواي غلطت بس ما اغلط هاي الغلطة بروحتي وياة ما اسويها لحكني يحجي وياي ويفهمني بهدوء.
امشي وياي محد يفيدج احنا نفس الصنف واحد يحن للثاني هذا غير عنة يختلف كلشي عندة نظامي بس يعالجج يسلمج للقانون تنسين الدنيا لو دخلتي محد يطلعج بعد
تمددت على الجرباية وخليت راسي بالمخدة مغمضة عيوني بقوة وهو يحجي مستمر.
امشي كواكب امشي ماضل وكت امشي وياي اني اجيت علمودج خاطرت بروحي مطلوب للدولة واسمي عدهم صار امشي وياي يلا كومي
ما اروح روووووووووووح
لا ترررررحين ولج انتي غبيييية ماتعرفين بية هذا.
ررروح منا ررروح
صرخت من رفعني شالني وطلع بيه ضرب بية بكل ماتبقى من قوتي عضيتة صرخت ماسمعني ولااهتم راد بس يطلعني وياخذني وياة طلعني من البستان الباب مفتوح شفت سيارتة لو تخبلت ورجعتلي الذكريات الوصخة شمرني ما مهتم وشغل السيارة تخبلت عليه شلعت شعري واصرخ ممرودة روحي انسلب مني الامان بطلعتي من ذيج الغرفة راح ارجع اعاني العشتة ينعاد مرتين.
غضنفر: كاااااافي بسسسس كاااافي شتردين شترديييين.
تنفست بصعوبة كوة كدرت احجي
رجعني ماريدك
لاف السيارة بنفس اللحظة وبصوت عالي محترك كلبة يصيح: خلية يسجنج خلية
يسلمج بدم باررد عود اتذكريني بعدين
روحي خلية يفيدج من يسلمج بيدة
مارديت علية بكلمة احس كلبي يريد يوكف والنفس صعب علية اتنفس وكف السيارة بالبستان مسحت وجهي وانداريت اباوعلة باوعلي والخذلان بعيونة
غضنفر: خاطرت بنفسي علمودج
ليش هيج عفتيني؟
انت ماتفيدني ماتحميني هو يحميني.
يعالجني ضيم اني مريضة عايف شغلة وبيتة
علمودي يريدني اطيب
بس تطيبين يسلمج للقانون
الاعرج انتي وياة تشتغلين
بالاجبار
انزلي
فتحت الباب ماكدرت ماعندي قوة فتح الباب نزلت التفتت علية وهو مدنك راسة مايريد يباوعلي.
روح منا اشتغل شغل زين
الاعرج انلزم مامجبور تشتغل وياهم
وهية اعترف عليك ابتعد منا لاتلزمك الشرطة
محد يطلعك من السجن.
كطعت كلامي ماكدر اطول بالحجي مشيت مارد علية انقهرت علية وانقهرت اكثر لان خاطر واجة حتى ياخذني شهكت بصوت عالي من لاكاني ضيغم والوجهة مصبوغ دم من شافني عيونة رادن يطلعن من محجرهن لزمني من زندي بقوة يريد يحجي سكت ورخت ايدة من شاف السيارة عافني وراح يركض التفتت انفتح الباب وطلع غضنفر بدل مايشرد.
هجم ضيغم على غضنفر لزمة من خوانيكة وغضنفر ساكت بقة باوعلي وكال.
اختارتك لا تخليها تنخذل بيك مثل.
ما انخذلت بيها ورجعتني فارغ
لاتسلمها للقانون
ماسمع منه ضيغم وضربة بوكس ارتد ليورة صرخت وهو يصرخ بوجهة.
ضيغم: شعندك جايها ماكفاك السويتو بيها
ضيعتو شبابها باليوم تموووت الف موتة وهسة جاي المن جاااي المن
رجعلة غضنفر الضربة يصيح بية
ماسويتلها شييي سويت كلشي بس حتى
يعوفونها اشتلغت بدالها ورطت روحي بشغل.
اكبر من راسي بس حتى يعوفونها وماينطوها شغل خطرررر خلوها عدهم لان يعرفووون راح انفذلهم شغل فديتها بعمرررري ما أذيتها اني
صار واحد يضرب بالثاني غضنفر مو نفس قبل صحتة متدهورة والحادث الصار وياة باخر فترة اخذت عافيتة صرخت وركضت علية من ضربة ضيغم بوكس على صدرة لزم مكان الضربة متالم ركضت عليه وخرت ايدة والدم نزل شهكت بصوت عالي وصحت.
طكتت عمليتة انت شسوووويت
ليش هيج وياااة.
انداريت علية عيونة علينة فاتح عيونة بصدمة صدرة يصعد وينزل اشرت بيدي اكلة.
روح روح جيب كطن ولفاف
عالجة خطية
ابتعد غضنفر لازم صدرة وسحب ايدي بقوة يكلي
ارجعي وياي شفتي شلون متوحش
مو بريء مثل ماتصورين
ركض ضيغم سحبني منة ولزم ايدة طك اصابيعة اني وياة صرخنا وضيغم راص على اسنانة يكلة
اكسرر ايدك ال تلزمها لو تحجي وياها
ثاني مرررة روح منا لا اسلمك للشرطة بيدي
وكواكب اموتها شسوي بيها اسوووي لانهاااا
مرررررررررتي.
صرخها بوجهة بعصبية وصوت عالي جمد غصنفر بمكانة وخر منة يباوعلي مامصدك يهز راسة يريد يحجي مايكدر ينطق راد يوصلني دفعة ضيغم
ضيغم: امشي منا وهاي دخلتك للبستان ومخدر الحارس هسة اكدر اسجنك بس روح ماريد اسويها بيك خير سلم نفسك واطلع رتب وضعك وعيش مثل البشررر
من ورة ضيغم اسمعة يحجي بصوت مخنوك
غضنفر: كواكب صدك يحجي تزوجت.
ماكدر يكملها صاح بحركة ادية على راسة
شلوووون شلووون تزوجتي.
ماكدرت احجي شي وعلى حالة انقهرت ودموعي تصب صب سحبني ضيغم من ايدي ايدة نارر تجوي جوي ولاحرف حجة وياي شمرتي بالغرفة الثانية وصاح بعصبية يريد يكتلني.
ووووين رحتوووو وينننن؟
رجعت ليورة هزيت راسي رجع يصيح
شجنتو تحجون؟ وين رحتوووو كليلي لا اروح اموتة شعندة وياج؟ ليش مستقتل عليج
ويركض يدورج؟
انتظر مني جواب ماكدرت احجي قفل الباب وطلع صاير نار غطيت وجهي بيدي ابجي وگلبي محروك منه وعلى غضنفر اكثر شي قهرني من كلة ضيغم.
روح سلم نفسك للشرطة.
اذا سلم نفسة للشرطة يضيع عمرة بالسجن بعدة شاب شنو شاف من عمرة! شمرت روحي بالفراش لفيت راسي وابجي عيوني راحت من الالم ومن الحرگة غفيت وكعدت وحدي بس اني بالغرفة كمت للباب كعدت بالكاع مابية حيل ودكيت علية محد يسمع ولا انفتح الباب من تعبت خليت راسي على الحايط غمضت عيوني وبهاي اللحظة لو الكة شي حاد اموت نفسي من الوجع.
بعد فترة تحرك الباب درت بس راسي شفتة دخل بيدة صينية اكل خلاها كدامي وطلع بدون ما يحجي دفعتها وصحت.
ماريد اكل اخذة خليني اطلع
وهو اني حتى مابية حيل اكوم بس احجي من مارد علية بجيت طلع استحقرت روحي خليت ايدي جوة راسي وكورت على نفسي
احس بدموعي تجوي خدي احجي وي نفسي واكلها شوكت ارتاح، شوكت اعيش طبيعي مثل البشر؟
صوت ام حربي اجة باذني اسمعهة تكلي
انتي سبعة اخياتج
طيحي وكومي ياهي الجانت التشتغل صبح ومسا؟
ياهي الجانت اشكال الشغل تشتغلة بس حتى تجمع فلوس لاخواتها وخاف ابن اختج يتمرض بالشتا
وماعدجن فلوس؟
انكطع صوتها وهمست
كواكب
اي كواكب لاتنسين ماضيج حتى تعيشين حاظرج
فتحت عيوني على صوت ضيغم يصيح كواكب ويضرب بخدودي باوعت بالمكان وين ام حربي مو جانت تحجي وياي!
نهضت ورجعت ضهري على الحايط صفنت بوجهة اباوعلة خلة ايدة بركبتي ملت راسي كش جسمي منه.
حرارتج مرتفعة تسبحين
تعبت شكد بعد واطيب؟
بعد.
سحبني من ايدي يكومني الملابس محظرهن بس اخذهن ايدة ورة ضهري يمشيني وصلني للحمام وراح سبحت والمي البارد ينطيني طاقة وحرارتي تخف طولت اذب مي وابقة شوية ارتاح وارجع اذب مي على راسي اندك الباب.
ضيغم: كوكبة تسمعيني؟
رجع يدك اقوة وكف يسمع مني كلمة
تسمعيني
اي
يلا خلصي لاتطولين
كملت وطلعت مشيت شوية طلع مشة وراي ماباوعتلة شلت بكلبي علية هواي رجعت لفراشي
اكعدي اكلي واخذي علاجج.
ماحاجيتة تمددت منطيتة ضهري مد ايدة على وجهي وخر شعري وهمس بصوت ناصي.
نشفي شعرج من تطلعين
مارديت علية جاب خاولي نشفة ودنك يمشطة غمضت عيوني مد ايدة يضرب بخدي بحدة رديت علية.
عوفني
اخذي علاجج واروح
رجعت سكتت شوية راح ورجع نهضني ماخليت عيوني بعيونة سحبت الصينية لفات وفواكة مكصكصهن اكلت من اللفة شربت مي تبللت نكتت ملابسي وكمت سحبني من ايدي رجعني كعدت تقرب علية وعيونة كلهن غيض قابلتة بنظرات تعبانة.
ضيغم: منو المسووي المصيبة اني لو انتي؟
جاوبي لاتسكتين؟
حياتي كلهن مصايب
يا مصيبة؟
نتر ايدي بقوة وجعتني وهو لاهمة كوة لازم اعصابة عيونة صايرة حمرة.
وين اخذج هذا الزمااال ورحتي وياة؟
مارحت رايد ياخذني يعالجني بس مارحت
شعندة وياج كولي
رفعت اكتافي بمعنى مادري ماتمشي يمة رجع يحقق وياي شكلة كلش عصبي.
ها يعني ماعندج شي وياة مووو؟
انتي شفتي شلون وجهة صااار من كتلة لاتاخذها.
لا لا وانتي من ضربتة كطعتي روحج ماهمج من ضربني بس من ضرربتة لا هنا غير المسالة تختلف تحبينة كولي اذا تحبينة وبينكم قصة حب عظيمة اجيت خربتها عليكم
تافة
جحض عيونة من ردي علية كمت لفراشي صيح علية: كاااافي تجاااوز ليييش ماتحترمين بكدج اني اسألج جاوبي
واني امشي جاوبتة
مو عاجبك مامجبور بية الجلاب تاكلني
طلعني اروح
كلمة وحدة براسها حظ تطلع منج ماكو.
خليها بالج هذا الحيوان لو شفتة جاي لو حاجي وياج اخلي طلقة براسة
يطبكم مرض واحد بالنجف واحد يخيس بالسجون اتعفن هذا شعرج يكمل ويدهن
عود فيد روحك بوكتها
اخذت العلاج وتمددت المبردة صارت حارة
خليت ادية على عيوني.
لو اطفي المبردة لو تترسها
بعد تعالي اخذيلج راجدي
من يصير بية حيل ليش لا
حلو العلاج بدا ياخذ مفعولة
طلع اسمعة برا طكطكة مر وقت قصير رجع يحجي وحدة او يمكن يسمعني.
جنت مخلي الها برميل وحدها تنترس هسة خلص وشكلت المطور اله
طفة الضوة جسمي بدا يسكن رفعت ايدي عن وجهي ولزمت كلبي يوجعني.
اخواتي شبيهن كلبي يوجعني عليهن
كلي صاير شي بيهن؟
لا
والله گلبي يوجعني بيهن شي
وحق الله هذا لو البعيجي مزعل اختي اسويها سودة علية لو ذاك والله اطين عيشتهم بس يحاجونهن
ذبيت نفس ورجعت حجيت
والله كلبي يوجعني صاير شي عليهن
كعد يمي ايدة على الجرباية مرتجي
شلون حسيتي بيهن.
اذا ثنين يحبون بعض وبينهم مشاعر حقيقية
اذا واحد منهم فرح ذاك يوصلة شعور الفرح حتى لو جان ماكو شي يفرحة والناس اليمة تستغرب من فرحة بهيج وقت واذا واحد طايح بمشكلة لو متأذي ذاك كلبة يحسة ويضوج حتى لو بمناسبة فرح موجود اليحبون توصل مشاعرهم
عجبني تفكيرج تدرين
ادري
ضحك كلي
عندج ثقة بنفسج حلو
روح اريد انام اهلك مايردونك
اني جنت ماعايش يمهم باخر فترة
يلا انتقلت وبس وقت النوم ارجع متعودين على
غيابي عنهم.
مايصير حتلو يبقون اهلك
اكو شي مهم واكو اهم
ماكو اهم من الاهل بالدنيا كلها لو الواحد عندة
مال قارون وعرش سليمان وماعندة اهل مابيهن فايدة
تتمنين لو اهلج موجودين
اتمنى جبار وهيلة عايشين
بناتهم ماتعذبن وعاشن براحة وحتى اهلي لو هما موجودين ينسوني ذكرهم
مادورتو على اهلج
دورو عليهم هواي بس مالكو الهم اثر
هو اليشمر غرض يروح لمكانة بعد!
بس انتي مو غرض انتي بنتهم من دمهم ولحمهم
بت حرام مارادو تتلثگ سمعتهم الحلوة.
سكتت كارهة الحجي بهذا الموضوع وكارهة سيرة اهلي وطاريهم واذا عايشين ادعي عليهم والهم بمثل ماصار بيه واكثر بهذلوني اهلي بهذلوني.
انطيتة ضهري ماشفتة بعد نمت عقلي بمكان وجسمي بمكان لا واني كاعدة مرتاحة ولا من نايمة ارتاح كل شوية افز اختنك ارجع كوة اجر النفس وارجع انام، الغرفة ضلمة نزلت من الجرباية اتلمس مشيت شوية حسيت اكو شي بالكاع دنكت اتلمسة صار بيدي شعرة عرفتة ضيغم نايم طفر من نومة كعدت بنفس المكان الكعدت بية بقيت كاعدة واتنفس بهدوء اريد املي ريتي ايدة صارت على زندي يسألني.
بيج شي؟ العلاج هذا قوي يسكنج الليلة.
صعب اتنفس اختنك
مضاعفات شسوي مابيدي شي
مو مثل قبل اخاف كمت اتخيل لاتعوفني وحدي
اريد انام
نامي ما اعوفج
سحبت مخدتة وتمددت نمت صفح حسيت حط راسة على نفس المخدة والعطر ترس خشمي ترس سكنت اتنفس ماتحملت الا احجي البكلبي واكلة
عطرك حيل حلو
احلى شي بالدنيا عطرك
حتى واني مامعروف اموت اعيش اتذكر عطرك وانام...
من فتحت جامة السيارة حتى تحاجيني قبل
لا اسمع صوتك شميت عطرك تمنيت مايمشي
الازدحام حتى ابقى اشتمة.
منج سمعت عطري طيب
بس منج واول مرة اسمعها
الناس تغار ماتحجي عن اليعجبها
وانتي بس عطري عجبج؟
اممم
تردين تشمينة اذا يعجبج
هزيت راسي لا ودرت وجهي منه ساكت مايطلع منه صوت طول حسيت بية نام داريت تقربت منه
عطرة يقترب اكثر تقربت اكثر غمضت عيوني
شعرة صار بوجهي ابتعدت سحبني بيدة من خصري يهمس بصوت ناصي.
لايبقة بنفسج اشتمية
لا مو هيج
الصبج ننسى الصار.
قرب راسي من ركبتة سحبت نفس ثنينة سكنا حتى اصواتنا اختفت نسيت كلشي وغفيت بسرعة عطرة ملى ريتي وخشمي، كعدت ما لكيتة بس عايف ريوك الباب مفتوح غسلت طلعت رجعت تريكت
واخذت علاج مخلية إلى ملابسي مجهزهن بصف الريوك يذكرني بالسبح وعلى طول درجة حرارتي ترتفع بسبب الجرع جنت من اخذهن ابرد واثلج ومن تخلص الجرعة يصير نار تحرك بية
اخذتهن سبحت طلعت شعري ينقط رفعت البجامة من جوة صعدتها جوة الركبة يلا ارتاحيت.
طلعت امشي بالبستان واباوع للسياج عاالي كلش والحايط ملبوخ حتى لو تخبلت وردت اطفر وين اخلي رجلي وبالنهاية اكو كزاز على الحافة
وصلت يم الباب ولد ضخم عظلاتة طاكة بجيبة سلاح مخلي كرسي وكاعد كدامة طلبة عليها قوري جاي واستكاين بسرعة انتبهلي عبالك عندة عيون بضهرة خزرني شكلة يخوف.
رجعت بدون ما احجي شي افتر واباوع للشجر كعدت بالفي جوة شجرة فحطت ارتاحيت شوية بس تنفست كمت انهش بجسمي عبالك بية جرب ومكان الحقن بضهري وبايدي يموتني يصير طلع دمي وما ارتاحيت رحت اركض ادور بالمطبخ على اي شي مالكيت كلشي دورت بدبة الغاز فارغة اكو وحدة مطلعينها برة مركونة اعتقد فارغة دورتها لكيت بيها جداحة التراب نايم عليها اخذتها وطلعت برا مكان الابرة يموتني قربت الجداحة وشعلتها علية ماحسيت بوجعها بس من منظرها خفت وشمرت الجداحة طلعت هجيت الطم على راسي من ورة رگبتي مووتتني رجعت ماعرفت ليش رايحة بعيد شستفاد دخلت للحمام البرميل متروس ماي خليت راسي لحد رگبتي دخلتة من اختنگ كلش اطلعة اخذ نفس وارجع اغط بالماي رفعت راسي على صوت صرخة التفتت عيوني من المي يحرگني اجاني يركض فاتح عيونة بخوف سحبني من ضهري يصيح علبة.
تخبلتي تردين تمووووتين انتي
مارديت علية اخذني يسحل بية من تشيرتي ويحجي يلوم بروحة ويباوعلي يشوف شكلي
العتب علية اني الخليت الباب مفتوح كلت تشتم نفس بلكت تصير احسن من مامحبوسة ومخنوكة بين ما اجي لو ميتة ومختنكة بالماي شكول لروحي
وكف يتنفس بصعوبة سحبني علية بعصبية يكلي
بابا انتي صاحية تسوين هيج؟
بس راسي حار صار كلت ابردة بالمي
اختنكتي بلا اختنكتي هو انتي كوة تتنفسين.
سحب نفس طويل واخذني للغرفة قبل لا ادخل نترت ايدة مني: ماريد ابقة هنا وحدي ماررريد
وين ترحين والله بس تصيرين زينة شهر بس شهر واحد تصيرين احسن تخف عنج الاعراض. اتحملي هسة
بجيت ونترت روحي منه اريد اشرد لمكان مابية بشر ولا واحد يشوفني واني هيج سيطر علية بقبضتة واني ابجي مديت ايدي الحركتها اشكيلة
شوف يوجعني والله راح اموت احس بية سم ويمشي بدمي بضهري جان يضربني هم موتتني.
بدلو دمي هو بالدم بدلو دمي خليني ارتاح
تجمد بمكانة من شاف شكل ايدي سحبها عيونة طكت لطم على وجهة وايدة صارت بيها رجفة ماكدر يحجي دخلني وقفل الباب حاولت بس افتحة ماكدرت ضربت علية اصرخ راح طلع علاكة الادوية سحبني بقوة من ايدي وكعدني بحضنة خلة رجلية بين رجلية ضبهن وسحب ايدي بالقوة عقمها ودهنها بالخلطة الجايبها لايدي باوع بعيوني
توجعج
هزيت راسي لا وبصوت يرجف جاوبتة.
بعدين توجعني هسة لا ماحس بيها وحتى الحرك الجبير مايوجعني بس مرات
سحب تليفونة من جيبة الخلفية جانت سودة بيها جمجمة صغيرة فوك ضحكت بصوت عالي بسرعة فتحة يكلب بالتطبيقات.
هاي انت صرت تنغار مني لان احب
الجماجم هو انت وينك وين هاي السوالف
حتى وانتي مو بصحتج تشمرين بالحجي
لاتتشمت بية حرام عليك
ما متشمت بس باوعي.
فتح فيديو ركزت وياة وگلبي رجف من شفت الاعرج مربوط مثل الجلب وجهة مزورك ودم بحلكة يابس وشخص يتقدم علية مبين بس صيخ احمرر الدخان يطلع منه رجف الاعرج يصرخ
لاسيدي لااااا والله اعتررفت بكلشي
بصوت خشن رد علية
انت تعرف الاريدة شنو حاول حاول تلف وتدور
غمضت عيوني من طبع الصيخ على ايدة على اثر صريخ الاعرج انهزيت وكع التليفون من ايدي ضميت راسي بزندة وهو يكمل المقطع خلص سخب راسي عيونة بيهن حقد جبير اله كلي.
خليه يحس بالالم الحرگ شوية
طلع روحي بساعتها ما انسى
ولا هو راح ينسى راح يدفع ثمن كلشي سواة
نصب إحتيال اعمال غير قانونية كل يوم يموت بالتحقيق
سكتت وخرت راسي من زندة اباوع بعيونة
هم راح تسلمني للشرطة؟
مسح على خدي باطراف اصابعة وهمس
صيري زينة
اذا صرت زينة تسلمني للشرطة؟
حضن راسي من ورة يلعب بشعري وخرت ايدة وكمت افتر والنار بكلبي يسلمني لللقانون مثل ماكال غضنفر بس اصير زينة اشرد منه ماعندي طاقة اتحمل سجن تعبت اني حيل تعبت.
اريد علاج قوي زين مني وساكتة ما لاطشة راسي بالحايط وخلصانة
ماكو علاج غير الانطيتة الج الصبح
الروتين اله دور بالعلاج
لاتضل تحجي مثقف مافتهم شنو تقصد
احجي مثلنا
اقصد الاكل الصحي يلعب دور بالعلاج.
المكان المتواجدة بية السبح يساعد على تخفيف الالم الناتجة من الجرعات القوية
اخواتي زينات؟
شمرت روحي على الفراش نمت على وجهي وعلكت رجلية على الحايط سكت ماحجة رجعت حجيت يصوت اعلى والوجع يدك براسي.
مو جاي اسئلك عن اخووواتي ماتحجي
زينات
ولد عمك انعل يومهم والله بس يحاجونهم كلهم
مو تايهات الكم
صيري زينة بسرعة لخاطرهن.
ادوس على روحي سنوني احسهن شي يطبك على شي ويموتني غفيت ماحاسة على روحي ومن كعدت لكيتة يصلي برا فارش مصلايتة فركت عيوني وكعدت اباوعلة خلص ورفع ايدة يدعي
ادعيلي وياك مو تنسى
وياك ادعي لاخواتي
هي دعوة بلاش ماتخسر شي
لف مصلايتة كام يضحك يهز براسة
ضيغم: دعيتلج بدون ماتوصيني
وادعي لاخواتي وياك
شصارت هاي
هسة انت سيد مثلاً لو وصي دعائك مستجاب كلش من ايدك لباب السما
احير شرد عليج هسة
احسن
يلا كومي ناكل.
رحت وراة دخل للمطبخ جاب علاكة بيدة وفرشة بيدة الثانية خلاة الاكل بالكاع فرش وبدا يرتب بيو كعد اشرلي اروحلة كمت من مكاني كعدت كدامة
باوعت بية نزل عيونة متجاهلني.
شنو تستفاد اذا صرت زينة؟
اكلي
عايف شغلك ليش اني استاهل عرفة ولفة وياك
جاي اشتغل عن بعد لابتوبي جايبة
اخلص شغلي ملفات اكملهن وامشي شغل واني يمج
شوكت ما اشوف
نايمة اغلب وقتج ماتحسين
ها بس من اطيب اكلك هواي حجي وبعدين اروح
اكلي
سمج
ما تاكلينة؟
لا عادي بس شعجب
سويت جدول اكلات وصة الدكتور بيهن
والسمج زين ردت اشوي هنا بس ما لحكت
سوى لفة خلاها بحلكي مباشرة ولاياكل بس اني
اكل انت شنو امي انت بس الام هيج تسوي
يزعجج هالشي
لا بس اكل اني اكل
مو عظام ماتحسين بيهن
هزيت راسي اكل منا ومنا وهو ياكل ويوكلني كملت غسلت قبلة بعدة ياكل على كيف رفع راسة كلي
روحي سوي جاي ماطول خلصتي
ماعرف
رفع حواجبة مستغرب
صدك تحجين لو تشاقين؟
ليش اجذب والله ما اسوي شي.
جاي جاااي مي وتخلين علية الجاي
اي بس مااسوي مالي خلك لهاي السوالف
جانن اخواتي يسون واني بس اكل واشرب ينطني
ضحكت على تعابير وجهة وكعت اسولف علية
اني اشتغل افكر شلون اطلع فلوس
انطيني امسح جام سيارات ابيع مخظر
اي شغل اشتغل من ارجع منتهية مالي شغل
بسوالف البيت اكل لفة واني اركض
وهيج تعلمت
اي انت تعرف تطبخ شتعرف بلا؟
تردين تستغليني بالطبخ؟
لا اكو واحد يموت من الجوه اكل كلشي موجود
هههههه صريحة كلش
اي كمل.
خايف احجي وبنص الحجي ترجعين تتخبلين
واغص بالاكل
فدوة إلى اتحملني بين ما اطيب
وعيش مثل ماجنت
هو اليدخل بالشط يطلع يابس؟
ترجع تيبس مو مشكلة بس اطگك الشمس شوية
وانتي مريضة تلكفينها على الطاير حلو
مثل عطرك
ضحك بصوت عالي وجهة صار احمر عاف الاكل وراح يغسل صحت وراة: دكمل كمل اكلك
شبعت
اكل الزلم على كد افعالها ترة
خزرني كانة يكول لا والله كتمت ضحكتي راح افتريت اضرب واكسر باغصان الشجر من بعيد صاح علية.
مخررربة للطبيعة شبيج
نزلت ادية واندريت كعدت جوة الشجرة انتجيت عليها فيها غطاني مديت ادية اباوعلهن يلعبن النفس من غير الحرك خطوط خطوط صايرات دم يكول واكعة ومتكردة بالكاع رفعت تشيرتي اشوف بطني نفس الحالة اضافري طولانات واذي روحي بيهن بدون ماحس.
درت وجهي صحت علية
ضيممممم تسمعني وياااك
شرايدة من الضيم
اضافري طولانات اخاف ادجك بيهن وتموت.
هز ايدة واني اضحك درت وجهي خليت راسي على رجلية تذكرت سجينتي ودراجتي اعز شغلتين على كلبي الشفقة هم ما انساها والله اشتاقيتلهن ضاعن مني هناك، التفتت من اجة كعد يمي بيدة مكص صغير رفعة كال...
ماكو مقراضة جبت مكص
مديت ايدي بحذر يكص اضافري
من تخلص كص شعري وياك
شبية شعرج قصير
اني اكصة ولا منيتك
مقتنعة بكلامج
لا لان مريضة مادري شحجي
بس قبل اي مقتنعة.
كمل اضافري وتعاركنا اريد اكص شعري ما انطاني المكص كال اني اسوية عدلة بيدة وكص من الكذلة شوية وطفر يكلي: عدلتة الج
سكتت من حسيت بطني تكص بية كص عفتة وكمت للغرفة عصرتها بقوة هسة اني ناقصني وجع وكتج انتي فزيت من شفتة وراي نزلت ايدي من طاحت عينة عليها
شبيج شردتي
اطلع منا
شنو اليوجعج
علي اساس ماتعرف
ليش جايبني هنا اذا ماتعرف اليوجعني
روحي تمددي وي ملابسج تلكين احتياجات
فتحت عيوني بصدمة رفعت ايدؤ اصيح بوجهة.
شبييييك شبيييك انت يلا منا مناااا
رفع اكتافة وبكل برود شعلني من كال
مابيها شي شبيج
دورت على شي اضربة شرد وسد الباب خليت ايدؤ على وجهي نار صار وحتى رجفتي زادت ما يستحي هذا كلش رجعت على ملابسي علاكتين نكتتهن كلشي جايب ماجنت شايفتهن كلهن هسة هذا شلون ارجع اباوع بشكلة واحجي وياة طبيعي مثل قبل.
سمعت صوتة يكلي تردين جاي
ماجاوبتة شوية رجع كال.
رايح اني بالثلاجة يمج مي بارد اشربي حاولي تشربين واكل موجود اتحملي الوجع لباجر يلا اكدر انطيج
ابرة تسكنج
ماجاوبتة اختفى صوتة حاولت هواي انام تعبت كلش تعبت يلا نمت كعدت بس وحدي موجوده.
مالي نفس لشي افتح الثلاجة بيها كلشي بس ماعندي شهية اكل بقيت افتر وافتر تعبت كعدت بصف الباب دكيت حجيت صحت محد موجود يرد علية من الشباك اباوع اريد بس واحد يجيني يطلعني منا بلعومي صار يوجعني وجسمي احس دود يمشي علية من كد ماحكيتة انطعن دم تعبت ونمت يم الباب الليل كلة افز محد يمي صبح الصبح اني منتهية كاعدة وانود اعصر راسي ساعة اخلية بين رجلية برا اصوات عصافير تقلقني وتوترني ماريد اسمع شي مر وقت واني على كعدتي بين الوهم والحقيقة سمعت صوت ضيغم من بعيد طفرت للشباك ما اشوف بس اسمع صوتة يحجي وي واحد صوتة غريب يكلة.
احنا نعرف شغلنا وياها
لاتدخل انت مو شغلك هذا.