رواية المنجمة للكاتبة كفاية كاظم الفصل الرابع والثلاثون
كواكب: دك كلبي بقوة عصرت ايدي بقوة واهز براسي يكمل صفن بوجهي يشوف ردة فعلي برود نطق يكمل: سلم روحة للشرطة
بهتت ملامحي تقربت علية احجي وعيوني مدمعة گلبي وجعني وبقهر كتلة: شكد ينسجن؟
ها كلي فدوه والله خطية بعدة شباب صوج اهلة مو صوجة والله لو عندة اهل ماصار هيج
حد اسنانة ولزم ايدي بقوة عيونة كلهن حقد وغيرة.
ضيغم: وانتي شعليج بيه؟ شكم مرة كتلج شنو يعنيلج تكولين مايعنيلي شي؟ وهسة ارجع اسئلج شنو يعنيلج غضنفر؟
شبيك انت شبيك والله غضنفر خوش ولد
حتى ساعدني الكة اهلي وراح يدور عليهم
انت ماتعرفة من الصغر اهلة عافوة وحضنتة الشوارع واولاد الحرام بدال الاهل
سألتتتتج جاااوبي لاتطلعين من الموضوع
مسحت على عيوني بقوة ايدي ترجف رفعت عيوني خليتهن بعيونة وجاوبتة بثبات.
غضنفر جان صديق كرهتة هواي بس ماكدرت ابقة اكرهة انقهر علية ودوم تلتقي دروبنة سوى
تحبينة؟
هزيت راسي اي بدون مايخطر بالي شي
فتح عيونة على وسعهن مصدوم وجهة واذاناتة
صارن دم لزمت ايدة بقوة افهم بية وهو يريد ينفجر.
احبة مثل ماحب محمود ام حربي
مثل ما احب ذهب وميس هيج احبة
مثل ماحب ورد
نتر ايدي بقوة افتر بعصبية ورجع يصيح
احجي بوضوووووح خليني اعرررف
طررريقي تحبينة كوولي احبة مابيها شي.
حتى الزماااال من يسمع كلامي يفتهمممم
شبيك انت ماتفتهممممم مو كتلكككككك
كتلكككككك ماحبة مثل العشاااااق
فار دمة فورررر سحبني بقوة من تشيرتي يلوي بيه صار يخضني خض وجهة احتقن.
منوووو الزمااال ولج؟ انييي انطيتج مجال تغلطينننن منووووو الزمااال
الاعرج زمال هو وقامة
ماعرف ليش ماردت احجي بطبيعتي احس مايستاهل اكلة زمال مثل ماسمعت لا هذا ضيم ابو العطوررر ابتسمت ولزمت ايدة ابرر.
شوف يعني ماجنت اقصدك الزمال حشاك والله وحشا اهلك كلهم انت تنعد على الفراشات يا فراشة
صفن بوجهي مايعرف شيكول سحبت روحي منه
وطبكت ادية اصفك بيهن واكلة: فراشة الفراشات
ضيممم وضلايممم ابن المثقفين والصاكين صك
انعل ابوة اليتجاوز لو يغلط عليك
تقربت كرصتة من خدة رفع حاجبة مصدوووم
يلا خلينة نرجع مثل البشر نحجي لاتصير عصبي مايلوكلك اذاناتج صارن جمررر حرامات
ضيغم: منو وراج ام المصايب.
يلا يلا المثفف كلي هسة شكد ينحكم غضنفر
هم رجعنة
لا ان شاءلله اسكتتت ولكم راح اشك هدومي انوب ماينشكن برررروح جد جدددك كلي
ماعرف
كالها برود وراح واني هم درت وجهي ومشيت عكس اتجاهة كعدت جوة شجرة خليت راسي بحضني ودموعي نزلت ابجي مقهورة على غضنفر مهما صار بينة ما اكدر انسى احس بينا عشرة ولو احبة احبة مثل اي شخص حبيتة، هسة اكيد اعترف بكلشي وراح ينحكم واني شلون بية.
طفرت من مكاني رحت ادورة لكيتة يغسل بوجهة التفتت علية وجهة وشهرة كلهن مي حتى ركبتة
ركزت بعيونة برود نطقت لكن جواي نار.
يمتها تسلمني للقانون؟ اسلم روحي حتى يخففون عني المدة شدكول؟
دموعي نزلن من كلتها ماكدرت اتحمل مسحت عيوني بعكس ايدي وصوتي يرجف اكلة.
كلي شوكت والله مو كلبي خلص من القهرر
سحبني من ايدي جمدت بمكاني من حضني يمسح على شعري ويحجي بهدوء وحنية.
صارلي شكد اشتغل على الموضوع.
ماخليتهم يوصلونج ولا يحققون وياج باي شي
مو ياخذونج للسجن
كواكب: بس اني مطلوبة للدولة اول وتالي انسجن هاي الدولة ماتضيع شي
ابتعد وسحب وجهي مسح دموعي بجف ايدة
ضيغم: مايحتاج شمسوية انتي هو الاعرج وقامة انلزمو واعترفو على الاول والتالي وكل العصابة انلزمت بعد ما غضنفر سلم نفسة واعترف عليهم
انتي شنو ذنبج؟
كتلت واحد ضربتة بالمسدس
ما ميت مجرد ضربتية.
فتحت عيوني على وسعهن وكلبي يدك بجنون رفعت ايدي ترجف ااشر بيها واكلة بصوت يرجف
والله مامات شنو مات هو ليش سوى هيج
حتى بوقتها ضربني ابرة لان كتلت الزلمة
سحبني علية واني بس اريد افلت روحي واشرد.
ضيغم: هو لو باقية يمة تسوين اشكاال
هاي جانت يريد يجربج حتى تاخذ ايدج ومن يريد منج شغل مثل هذا يذكرج انتي قاتلة واحد فاول وتالي تنسجنين هذا هدفة
منو منو كال هيج هو كال؟
اي هو كال كلشي كالو
جنت اشتغل على الموضوع رادو ياخذون اقوالج خفت عليج انتي جنتي مو بصحتج
فماقبلت ولا راح اقبل كلشي يمهم صار كلام ميار
واعترافها واعترافهم الاعرج انتهى هو ومجموعتة
يروح يجي غيرة
المهم خلصتي.
منهم وسالفة الشرطة انسيها اني حليتها
وسديت الموضوع كلة لخاطر عيونج
خليت ايدي على عيوني ماكدر اسيطر على دموعي سحبت روحي منه ورحت بعيد ابجي براحتي مامصدكة تخلصت من هذا الكابوس البشع رفعت راسي للسما وابتسمت بامتنان.
كل مايشتتد الظلام يطلع الفجر
شكراً يارب العالمين من خليت الضوى يطلع علية
واخلص من الظلام.
ويبقى كلام ماكدر اكولة واشرح عنة مكبوت بداخلي التفتت اشوفة بعيد واكف يباوعلي منطيتة ضهري ابتسمت ومشيت باتجاهة مديت ايدي من وصلت يمة نزل عيونة الها ومد ايدة بيدي.
اني ماعرف شنو اكلك بس اردلها الك حتى لو شي بسيط
ريتج سالمة بس
والله احسن شي جابتك امك للدنيا
ضحك ومسح على لحيتة
امشي نسوي عصير
يلا انت سوي واني اسولفلك
احب سوالفج
تدرين اني فرحان لان عرفت جزء من حياتج
دكيت روحك دك شنو قصتج شنو قصتج.
يمعود شعليك لا اريد اعرف
دخل للمطبخ كعدت على الكاونتر وهو راح جاب سلة فواكة واجة اخذت منه موزة كشرتها اكل بيها وهو يسولف علية.
صدك شلون ضعتي من اهلج
ماعرف والله بس لاتلزك
هما اهل البنات ماكالو الج شي شلون لكوج
هئ لكوني بانفجار هسة عندي طكات براسي ماتشوفني خبلة اطباعي تختلف عن البشر
التفتلي مصدوم رفع حواجبة مامصدك
صدك تحجين
اممم حتى دراهم كلتلي بسبب الحادث صارت عندج بصيرة وصرت اعرف اكشف واصير منجمة.
جاب سلتة خلاها قريب مني يكطع ويسال باستغراب: شلون لكوج بانفجار؟
بالسوك قبل صار انفجار واني ماعرف اهلي ماتو بالانفجار لو قبلها شمروني بالسوك لو ضيعوني
هي ياما ماتو بالانفجار واني بقيت عايشة
ياما اني قبلها بفترة شامريني لان بت حرام
ياما.
رفع عيونة الي
ياما شنو؟
والله ماعرف ياضيم شكلك
الناس تكول بت حرام وشمروج وبعد مانعرف
لو عايشين جان سئلو عليه دورو جثتي مارادوها
بس هي واضحة لو ميتين لو مايردوني.
اخذت موزة منه ضرب ايدي
كافي خلصتيهن
انمونة هي موزة بربع
مو اسوية الج عصير
كشرتها اكل بيها دنك عيونه ويرجع يباوعلي
شو ماتاثرتي من حجيتيلي قصتج
يمعود جبت عمري اتاثر هسة خليني فرحانة بطعم الموز
هز بيدة يكلي
شخصيتج غريبة عجيبة
بس كون الله يخلصني من السم البجسمي
اضبط حساباتي بالدنيا وابدي من جديد
باعتبار الله كتبلي عمر جديد وتعلمت هواي شغلات بهاي الفترة
بس لاتردين ترجعين للشوارع.
شوايت الله على الشوارع هو عمري راح يخلص
خل اسمع لافكاري شوية
لو مشتغلة بالمركز ماصار إلى صار
اي ويدكن على راسي ويزمخن علية كلهن نافخات شفتهن شعرهن اصفر عوزهن بس يكفخني واشتغل وياهن امداني اي والله وامدة الفلوس الاحصلهن من هذا الشغل يذلن الواحد ذل عدا الزبونات
فد مكروهات يكللك بفلوسي وكواكب تعال تسكت
لا يابة شلون كواكب تسكت مايصير
بس والله حلو من دكيت وشم خلني ماكالن
هاي ام الوشم خوش بنية حبابة.
بس الوشم مو حلو تدرين
ابو الحية غير يسكت
ولا ينحجي وياج كلمة
كواكب اني
شترجة منج
دشتغل اشتغل
انت ممتن بحياتك الي
شكد اختلافية يربي
يلا اني هم ممتنة الك بحياتي
هز راسة يخلط بالخلاط نزلت اجيب الكلاصات
خليتهن يمة وهو يشتغل كلي: اغسليهن
مابيهن شي غير مغسولات
والتراب والجراثيم الموجودة بالجو
حياة المثقفين صعععععبة الله يساعدكم
اخذتهن غسلتهن بمي ورجعت خليتهن باوع بيهم ورفع عيونة: ليش بس بمي غسلتهن.
ان شاءلله تريد اجلفهن الك؟
جيبي اني اغسلهن
اخذهن بالزاهي يغسل هزيت ايدي والله يحرك الكلب هلهلت علية بلساني.
ديلا يالنضيف الماكو من نضافتك
جيب نشرب لا والله اخذهن الك اني اشرب بالخلاط
سحبت دولكة الخلاط فتحت قبقها شربت منها اجة سحبها من ايدة يصب بالكلاصات ماحجة شي.
اكلك مو تحسني صرت زينه
اكيد احسن من قبل بهواي بس بعدها مرحلة العلاج ماخلصت وبعدج ما تشافيتي
لا احس احسن.
ترا قبل شوي منطيج علاج بعدة مفعولة بدايتة
ماتشوفين لسانج شطولة
الحمدلله يربي بقة قليل
اخذت الكلاص شربتة بدفعتين وهو يباوعلي مستغرب مسحت حلكي بيدي وكتلة.
ها شبيك ترا اني مو مثقفة هيج متعودة امشي واكل الفة اكلها بدقيقة واني اشتغل اشرب عصيرك عود
طلعت وهو وراي يمشي يشرب من العصير شوية شوية: العصير طيب؟
كواكب: عاشت ايدك كلش طيب
ضيغم: تدرين احنا كشباب نحب نطبخ
لانفسنا ونرتب اكل
احفاد ليث وين اكو منكم بعد.
اتفق وياج بس ضرغام شوية يختلف يوصي اكب جاهز
واني امشي نعست وحسيت جسمي نحل فركت عيوني والتفتت علية: اكلك اني جنت نايمة هسة هم نعست
ماكو مشكلة روحي نامي
بس خلي للجروح البجسمج من الخبطة
امممم
رجعت للغرفة نمت على فراشي وخليت ايدؤ على عيوني حسيت بوجودة وخرت ايدي اباوعلة طلع علبة واجة يمي سحب ايدي وبقة يدهن بيها
ماتكدرين تخلين شوية على مكان الحرك
مالي خلك تصدك صدك بكيفك.
بقية يدهن بيها بحركات دائرية خلة عيوني تغمض كملها وسحب الثانية اثر حرك الجداحة هم غطاها بالكريم حجيت بنعاس واني اكلب على وجهي انام
بعد بيش اغطي عيوني
خليت راسي بالمخدة وهو واكف يمي
ضيم
اسمعج
الله يوفقك صدك انت رجال
كون كلهم يصيرون مثلك وما يأذون البنات بس يهتمون بيهن مثلك.
ثكلت انفاسي وايدة بشعري يمررها غفيت كعدت وهو ماكو شي اكيد بشغلة خلصت نص اليوم وحدي لليل كاعدة برا جوة الشجرة حبيتها وحتى سوالف سولفت عليها وشاركتها جزء من مخططاتي بعد ما اطيب واخلص من الادمان واعراضة المستمرة وياي ساعات اصير زينة واسولف وساعات اكرة روحي وتجيني كابة تخنكني وحتى نفسي ينكطع عني وافحط بسرعة التفتت من اجة
كمت اروح اشوفة بيدة علاليك كبار مرسومة عليهن بنات باوعت لوجهة تعبان ومقهور.
هلو.
شلونج كوكبة
الحمدلله وانت
ذب نفس عالي وانطاني العلاليك اخذتهن من ايدة رفعتهن بفضول سالتة: شنو ذني
امشي ندخل جوة اكلج قصتهن
مشة كدامي يفتح بدكم قميصة ويكفكف برداناتة نزع حذاتة وكف بنطرونة راح غسل ورجع مشة للغرفة ذب روحة على جرباتي بقيت اباوعلة تقدمت علية وكعدت بصف الجرباية.
شبيك
تعبان
واضح عليك التعب متعبينك ومحترك كلبك
كلش
منو اهلك
ابوي كلش كابة بينة
االله يهديكم
امين.
عدل كعدتة وسحب العلاكة من ايدي فتحها باوع بيها وسدها خلاها بحضنة وكال
اختج نجمة خطبوها و دكت علية تريدج بخطبتها موجوده انكسر كلبي عليها حتى بجي بجت
ردت احجي ماكدرت ولا استوعبت الخبر نزلت دموعي امسح بيهن ويرجعن ينزلن.
ههه عليك الله نجمة انخطبت وراح تزوج ما اصدك
درت وجهي امسح بدموعي وبوجهي ايدة صارت على ضهري: شو على اقل شي وبجيتي
العلاج خلاني اتحسس من كلشي.
سحبت نفس اصبر روحي ماعرف شنو شعوري بوقتها نجمة بعيني طفلة شلون تزوج ماكدر اتخيل هالشي درت وجهي علية وكذلتي رجعتها ورة اذني طفرت: كمل
احجي وياها كل الفترة الراحت هي تسال عليج
اي احجي وياها
لزمني خفقان وجهي صار نار اباوعلة يتصل ويباوعلي بنظرات حنونة بلعت ريكي نفسي يعلى وي صوت الرنة من كالت الو عيوني من الدمع ما اشوف بيهن ياربي شكد مشتاقة اشوف وجهها واسمع صوتها.
ضيغم: هلو نجمة شلونج
ماعرف كواكب شلونها.
وياج
نجمة: علييييك عليييي
سلمني التليفون ايدي ترجف ماكدر اسيطر عليه وكع من ايدي ادور علية بالكاع ما اشوف شي بعيوني نزل من مكانة شالة وفتح خط خلاة بيدة
همست بصوت مختنك: نجمة
صرخت بصوت عالي اطفر وتبجي مخنوكة
كواكب انتي كواااكب
اني كواكب نجمة
يابعدد رووح نجمة يابعد عمرر نجمة
كواكب والله اني حاقدة على نفسي بكد الكواكب والمجررات حاقدة عليها اني اختج وعفتج
حقج تكطعين علاقتج بينا محد يلومج.
لاتعتذرين تبقن وصلة من الكلب
شبية صوتج متغير
نجمة راح اجيج ماكدر احجي اريد اشوفج
فدوة تعالي والله ماكدر اسوي خطوبة وانتي ما حاظرة
صار نجمة صار اجي
كملت هالكلام ومن قوة الاشتياق والمشاعر الجتاحتني ماكدرت اكمل طلعت برا اخذ نفس وانظم بدكات كلبي يريد يطلع من الفرح مامصدك سمعت صوتها بعد فترة طويلة، لحكني ضيغم صار وراي لازم امتوني منا ومنا انداريت علية ولاباوعت بوجهة حضنتة احسة كتلة من المشاعر الدافية.
بيدة يمسح على ضهري بجيت بحضنة من فحطت ابتعدت اشتم هوى غسلت وجهي ورجعتلة.
ضيغم: مو اخواتج الحقيقيات وهيج تحبين
ماتعرف شلون يعاملني هنا عاملني مثل اختهن الحقيقية واكثر هاي نجمة كتلة من المشاعر
شحجي عنهن شحجي.
كافي بجي انتي اليوم هواي بجيتي
غيري جو وافرحي شوية امشي اراويج شي ونخطط للخطوبة
دخلنا للغرفة سحب العلاكة باوعلي وكال
غمضي عيونج
دولي
راح اكوم واخذها وياي
لا يلا راح اغمض.
غمضت عيوني من كال افتحي ضحكت اشوف فاتح فستان اخضر طوخ سحبتة منه اكلب بيه ركبتة عالية اكمامة طويلة وهو طويل جاي صبة وحدة مو عريض بية فيكات بالخياط وشوية اكسسوارات منه وبية.
هذا المن ولك بس لاراح تزوج
خطبت اختج شتلبسين بلة
وهذا الي
لا لذهب غير الج
صدك تحجي
شنو بس لا تردين ترحين بالتراك خو انتي عندج عادي وتلبسين نعال وترحين
ضحكت وعيوني تلمع بفرح
بس مالبسة
لون غامق جبتة مستور ايدج محتركة يغطيها.
بسيط مثل ماتحبين وجبت وياة حذاء ناصية
طلعها مامصدكة يكول عبالك بحلم
انت صدك تحجي؟ شمعرفك بسوالف النسوان
والله طركاعة شلون تخطر بالك هيج شغلات
محل ملابس بيه بنات يشتغلن اجي انطيها القياس والمواصفات تروح تجيبلي وتجي مثل ماطلبت اسهل منها ماكو امشي شوفية على قياسج
ما
كومي يلا ترة تعبان وانتي جاي اتعبيني
اني مالبس فساتين
شالة ضربني بية على راسي ابتعدت منه
امشي لج ررروحي
لج بعينك.
كومي لا اكوملج واعلمج على طولة اللسان
الا اجيب سجينة واعلمك شلون تطول لسانك وياي
قبل شوية صرتي مواتة تردين تموتين
عيرني بعد بعد
اخذت الفستان والحذاء مترددة كلش بس كلت خل نضحك اشوفة شلون يصير علية اني ويني وين الفساتين فضول شوية اجاني اشوفة شلونة علية
بدلت ورجعت اللبس بحذاتي وكفت بالباب جان متمدد على الجراباية نهض من شافني.
خاب اختنكت هي هاي هم سواية تسويها
شطولة وردنة شطولها
حلو عليج.
اضحك علية بكلبك ماوصيك لا شو اضحك عادي
بس تعالي
اجيت يالمثقف
المشكلة على طولي وقياسي بس ماحبيتة رغم كلشي بية حلو احس لو تلبسة وحدة من اخواتي يطلع يجنن عليهن.
مو حلو علية
حلو
مو حلو
يجنن
مو حلو
يخبل
هسة غير يسكت
عيني باجر ترحين بيه ماعندج غيرة واني شوية واروح لاهلي باجر اجي اخذج
ابقى بالليل وحدي؟
شنو تخافين
لا
رجعت بدلت نزعتهن وجبتهن بيدي خليتهن على الميز وباوعتلة: كوم مو تريد تروح
بعدين
لا روح هسة من وقت احسن.
البيت هوسة صاير يسد النفس قبل من تدخلين ينشرح صدرج هسة تختنكين خنك
بية طاقة سلبية من النفس العدكم
والله كوة ادخل وانام بية كرهتة
خليت مخدتي بالكاع وتمددت بمكانة افكر شلون باجر اشوف اخواتي شلون ابرر لنيزك واشرحلها الصار كلة وهي مرضها بسببي على هذا الحال غفيت
فزيت بالليل راح ضيغم اخذت شوية يلا كدرت انام ماكو ساعتين وكعدت غسلت واكلت فواكة شربت علاج وحماس بداخلي رهيب يدفعني ليكدام.
دخلت للغرفة عيني على الفستان اليوم خطوبة اختي اليوووم شلت الفستان تلمستة بيدي ابدل واروحلهن بشكل جديد شرايج كواكب؟
تحمست ورحت للحمام جلفت روحي جلفة وشكو شي خليت منه ريحتي صارت تعطط لبست وطلعت نشفت شعري احس ماضابط الفستان وي الشعر ضجت بعدين اقتنعت يمتها اني تهمني المظاهر.
رتبت روحي ولبست حتى حذائي وبقيت افتر يم الباب انتظر يجيني المثقف وياخذني صدك مثقف مو جذب احجي طريقة كلامة لبسة حتى اختيارة باللبس وغيرة مال ناس مثقفة، ماطول هواي واجة بكشختة المتعود عليها ابتسم من شافني واني من التوتر حتى حريت.
صباح الخير
ياصباح يمعود دمشي يلا امشي
خلي العالم واخواتي يضحكن علية
حلو اختياري
كلشش
ضحك مشينا
شبيج ضايجة
كلساع بمزاج صرت بس هسة لا ماضايجة
متوترة وانت شبيك ضايج.
من ورة الخطوبة ماعرف شلون طلعتنا صفح
تخيلي ماعرف بيها البارحة يلا دريت من اختج
انصدمت من عرفت
وشعندك وي اختي حتى تضوج اذا انخطبت
ضايج على واحد معجب بيها لحد الان مايعرف اخاف ينصدم اذا عرف انخطبت
منو هذا
فقار ابن عمي
هو متزوج لو نسيت
منفصل بس عندة بنية وهالفترة اوضاعة مخربطة بنتة بجهة وهو وجهة
سالفتة داجة هذا
كلش.
ذب حسرة صعدنا بالسيارة وهو ضايج على فقار ماحجيت شي وياة وطول الطريق ساكتين كل واحد يفكر بشي الى ان وصلنا نزلت رجلية ماشالتني والتوتر يحجي الف عندي دكيت الباب وايدي ترجف
نيزك: فتحت الباب وتجمدت بمكاني عيوني وكفن ماكدرت ارمش بعد عيونها تلمع بعيوني وبصوت مخنوك همست: شلونج نيزك.
هزيت براسي فتحت الباب بقت واكفة منتظرة مني رد فعل دخلت عيونها انملت بالدموع سديت الباب دارت وجهها تمسح بعيونها وضهرها يهتز من البجي
خليت ضهري على الباب اباوع لمكفاها ودموعي تنزل.
كواكب
اندارت بدون ماتحجي شي اجت حضنتني تبجي
حضنتها ابوس بيها واشتم ونجمة من بعيد تدفع بشهب بعربانة كاعدة ويباوعن النا ويبجن بعدتها من حضني رفعت وجهها بيدي بوستها وهي عيونها تجري دمع واديها ترجف.
نيزك: عندي عتب هواي عندي تعب الج
سوايتج وياي دكت بكلبي اريد احقد عليج ماكدر مو بيدي احبج واموت حتى اسمع اخبارج
بصوت كوة ينفهم بدون ماتحط عينها بعيني كالت
اسفة نيزك اسفة حقج علية
رجعتيلنا كواكب؟ ماصدك رجعتي وشفت وجهج
صدكي رجعت بعد مااعوفجن واروح
انخبصت بدموعها بس التفتت شافت شهب شهكت بصوت عالي رادت توكع على وجهها لو مالزمتها عيونها رادت تطلع من محجرها سندتها اخذتها الها.
لسانها نعكد بس تاشر بيدها ماتكدر تحجي.
نيزك شبيها شهبة شبيها
نجمة: وكعت من الدرج وانكسرت لاتخافين
تطيب بس وقت يحتاجلها
دنكت تبوس بيها وبنجمة ودموعها ماوكفت حتى حجي بعد ماحجت بس تبجي رجعت حضنتها احس بكلبي نار كواكب مو هي كواكب ليمتها كواكب هيج تبجي!
اخذتها منهن تغسل وجهها وجهها انطعن دم التفتت اني بضهرها فتحت اديها ورجعت دموعها تنزل
كواكب: عادي ارجع احضنج؟
اخذتها بحضني ابوس واشتم عطرها يفح متغيرة وجوة عيونها سواد مو طبيعي اخذتها تكعد كلنا مامصدكين هي بنصنا بس شفت حالتها ماصدكت كلشي وصل عنها كواكب بيها شي.
تباوع بوجوهنا وتمسح بعيونها نجمة حضنتها تبوس بيها وتبجي بشكل مو طبيعي وهي تسكت بيها سكتن من دخل امير باوع بيها ورجع باوعلي رافع حواحبة يفكر وبصوت عالي صاح.
نانا هاااي تواتب.
هزيتلة راسي راحلها يركض حضنتة تبوس بية بقوة كعدتة بحضنها ترفع ايدة تخليها على خشمها وهو يسولف عليها.
تواتب اتي ماتو هوووواي ما ازيتي
احنا هناك عمو ققام (ضرغام)
يسبلي هواي هلويات والعاب وعمو ضيضم
زابلي تلهم هنات يهبوني
بقة يسولف وياها وهي تسمعلة بكل اهتمام
مرت خالي صاحت بنجمة تروح للصالون
رغم هي مريضة ماقصرت وياها اخذتها ورحت
صحت بكواكب: تمشين ويانة؟
هزت راسها لا وبصوت تعبان كالت
ابقى يم البنات تعبت.
عفست وجهها صاير اصفر
بيج شي مريضة؟
لا كلشي مابية
احس بيج شي مو انتي ذيج القديمة
لا
كواكب مو علية ولج حتى لبسج يختلف
انتي شوكت تلبسين فستان وشعرج طاخ بركبتج ومبقيتة ماكاصتة!
روحي وي نجوم
اروح وارجعلج ماعوفج وكولي لا حتى اكفخج على عينج مريضة كولي مريضة مسوية حادث كولي
خلصتيها علينا ماريدجن واعوف المكان بس تجن علية شردنة منج والعباس ماردنة شي بس نشوفج ااخ كواكب عندي حجي ايام مايخلص اذا سولفتة.
بس رايحة هسة واعرف قصتج
نجمة: رحنا للصالون اخذنا خالي بسيارتة نيزك ترجف اعصاب وبس تحجي وحدها، وصلنا للصالون حاجزين فستان اول مادخلنا استقبلونا وخلونا اول الناس، احس مالي واهس ولا فرحانة حتى اخواتي مافرحانات كل وحدة همها شي
خاصة كواكب من شفتها كلبي وجعني عليها ضيغم مايكلي شي وعلى هذا حالها تاكدت صاير شي جبير وياها.
لبست فستاني زهري بف تسريحة ومكياج ناعم خلصت بسرعة ورجعت وي خالي فرحان كلش بيهم.
اول مارجعنا من تركيا حجة وياي راح يجون ماعندي شي احجية لبست وتحظرت اجة هو وعمة ومرت عمة قدمتلهم جاي كعدت شوية يمهم وهما يتفقون على الحجي، ومن طلعت زيد استرخص يحجي وياي وبعد السلام كال.
ماريد تبلغين احد من زملائج بالعمل بين ماتصير خطوبة رسمية
ليش؟
خليها خطوبة بسيطة بالعرس اعوضج باحسن وافخم قاعة اسويها.
ما جان عندي اعتراض حتى اني هيج ردتها لان شهب مريضة وكواكب ماعبالي تجي، رجعنا للبيت ومرت خالي تصلي على محمد.
ماشاء الله سبحان الله لا احسدج خالة
فدوة لهلوجة الحلو
تعلقت بيها بشكل مو طبيعي وحبيتها كلش ماعرف شلون اعوفها دخلت وشهب من شافتني تريد تكوم تحضني دنكت بستها وامير يباوعلي بطرف عينة
هلو ميري.
راح ورة امة وكواكب نايمة نيزك تخزر بية وتحجي بحركة: هاي حالة حالتها نجوم تضحكين علية دكولين اروح اشوفها مابيها شي وكاعدة ماتشتغل
ما اجذب شبيج هي تحجيلج
كعدت واجو عيال نيزك بس جوري وردة تكول نيزك لحد الان مامتخطية صدمتها بابوها اكثر شي ماذيها سهلة باركتلي ولبستني ذهب هدية من ذهب تكول ضغطها مرتفع ماكدرت تجي فزت كواكب ونشغت بصوت عالي تباوع بالوجوة.
سهلة: هاي كواكب هلا وين هالغيبة تعالي ابوسج.
فركت عيونها وكامت سلمت عليهن ياسمين موجودة وياهن كعدت صفنت بيها طول ماهنا يسولفن هي صافنة واديها ترجف كامت تاكل
ونيزك تتفرفح ماكو شوية وكالو اجو اهل العريس
طلعن البنات اريد اطلع اشوف وياهن واصنف الناس بس تذكرت اني العروس ولازم اكعد وانجب
نيزك جابت طشت خلت رجلية وطشت مي عليهن والقران خلنة بحضني فتحنا على سورة الفتح وبين اصابعي خلن هيل ولبسني البرنص ماعرف المن هاي الاشياء يسوونهن بدا الشيخ يحجي.
وينطي مقدمة رجفت واخواتي محاوطاتني
نيزك تعدل بية وصل الشيخ بكلامة.
الشيخ: اذا قبلتي بالزواج من زيد قولي نعم وانت وكيلي
دنكت كلبي يدك بقوة عاد الكلام تلث مرات يلة كلت
قبلت وانت وكيلي
خلص العقد صارت مباركات مرت عمة وياها بنات ونسوان باركن بشكل طبيعي ودخل زيد سلم على الموجودين واجة كعد يمي.
زيد: شلونج نجوم
نجمة اسمي
نجوم احلى
دمعت عيوني وهمست واني اتذكر كلامة
المفرد والجمع ثنينهن يضون.
كصننا الكيك واكنا واخذنا صور بعدها بشوية راحو وراها عيال نيزك اخذهم قبس بقة ضرغام صحت بالبنات اخذنة صورة جماعية نزعت فستاني وعلى السريع غسلت بقة شعري واكف طلعت الكيكة اكل منها واكص للبنات كوة ياكلن كواكب صفنة تجيبها وصفنة تاخذها وشهب حبيبتي تكسر الخاطر
اجة خالي يصيح لنيزك.
يلة خالو رجلج يريد يمشي
خل يمشي ماروح ابات هنا
همام: تحظري الج خمس دقايق مو اكثر الولد عندة شغل شيجيبة كلساع.
من نبرتة بالكلام زعلت نيزك وكامت تجهزت طفرت كواكب رحت وراها مديت راسي اشوفها شنو تحجي وي ضرغام الاول ما شافها انصدم وكال
اممم دجة وين هالغيبة
ليش تضوج اختي؟
ام اموري تاج وباج فرحة كلبي هاي
شوكت ضوجتها
مبين من وجهك هذا
بس اسمع اخبارك بسيطة
طلعت تدفع بشهب سلمت عليهن تمشي وتحجي ورة ضرغام: فرصة الك وحدة مو هواي نيزك بس كليلي علية من يضوجج
ضرغام: جنت خلصان منج
كواكب: اذا ما افحطك ما اتسمى كواكب.
كافي عصبية ليش ترجفين
دخلت جوة ونيزك تحجي علية لان يرد عليها رحت ورة كواكب سحلتني للغرفة صارت ترجف بشكل مخيف حتى صوتها يرجف.
سولفيلي شبيهن البنات بسرعة
مابيهن شي
حجيتها لان مبينة مريضة ماردت تتاذة بس تعرف.
بس ماكدرت ماحجي بسبب الحاها كعدت احجيلها كلشي بالتفصيل بالحركات والاصوات جبتلها كلشي سكتت من لزمت راسها بقوة وجههة صار دم كامت تفتتر تضرب على راسي وتصيح بيه اكمل من الخوف كملت، راحت غسلت واجتت تنكط مي
رفعت ايدها ترجف.
وانتي هذا شنو؟ منين هذا؟
هذا ولد
هسة كلت نعل ادري ولد منين
بالدوام شافني وخطبني من خالي
سالتو كبل انطيتو شرطتو شروط هيتة الوضع
خالي سال علية يكول خوش ناس
واضح اني رايحة هسة بس راجعة عن قريب.
فحطت لزمت كلبها وصوت تنفسها مسموع عبالك اختنكت كوة تجر الهوى صرت ارجف عليها باستني وكالت قبل لا تطلع: صحتي ماتسمحلي ابقى
راجعتلجن بس انطني وقت مو اني الاعوفجن وي ذولة الزمايل والله كلبي حاسني بيجن شي
انتي شبيج فدوه كولي هذا ضيغم حتى مايكلي وين لكاج
بس اصير زينة اجمعجن واحجيلجن
هاي نيزك زعلانة علية ماتدري شي
لا والله مازعلانة بالعكس ماشفتيهاشلون فرحانة بيج بس هي تحس بيج شي وانتي ماتحجين خافت عليج.
ادري بيها
طلعت وراها سيارة ضيغم طابكة بالركن راحت صعدت بالصدر رفعت ايدها تهدد بية دخلت جوة من راحو وخالي اجاني يكلي.
كواكب شعدها وي هذا ابن جواد
ماعدها شي
صاعدة وياة اذا ماعدها شي
سكتت ما جاوبتة ثاني يوم داومت للشركة عادي.
ومن شافن الحلقةةبيدي سالني وجوابي جان صدمة الهن باركلي ورجعت لمكتبي مكانة فارغ بس اني اشتغل بيه اطلع من الككو اكل وافكر بغيبتة حتى ماتواصل وياي هالفترة بس ليش يتواصل وياي شغل وماعدنا بعد شكو؟
مر اليوم والبعدة زيد حتى ماعندي تواصل وياة
بالليل اتصل بية توترت ومن يحجي بس اكلة ها لو اي بس من وصل لهنا جمدت.
زيد: منا ورايح تشتغلين ويانة بالشركة
وليش اشتغل وياكم ماريد مرتاحة بشغلي ومتعودة على الوضع.
غير اني خطيبج وراح نتزوج عن قريب اكيد
تجين تشتغلين يمي حتى تصيرين كدام عيني
مكان شغلي ما اغيرة مابية حيل اتعود على الشركة واصادق بنات من جديد بلة طلعن غثة واستاذ فقار حباب
اي وانتي وياة بنفس الغرفةة
عشاق اسد الباب عليكم واطلع اخذو راحتكم
فارت اعصابي وصحت علية بعصبية
احتررم نفسك واعرف شنو تحجي
لو عشاق وتعرفني عندي سوالف مو زينة
المن اجيت علية وخطبتني اكو واحد يخطب
بنية يعرف بيها عدها علاقة؟
شبيج تعصبتي ماجان قصدي
بس جاي افهمج ماكدر اخليج تشتغلين وياة
جنت اشتغل عادي ماحجيت شي
ولا جبت طاري الموضوع وهسة غيرت رايك
شوف هذا كلامك ماعبرلة الك هيج بساطة
تكول عشاق واسد الباب هاي عيب عليك
واني شغلي ما اعوفة وبعد لاتتجاوز
سديت الخط قبل لااسمع منه شي صرت ارجف من كلامة كال مايقصد شي حتى نوم ماكدرت انام من الحركة كلمتة ادك براسي دك رحت اشرب مي وسمعت خالي يكل لمرتة.
راحو لسالم خطبوها منه اني كتلهم ذاك عمها وهو المسؤؤل عنها بمقام ابوها يوافق تجون مايوافق الله وياكم اني هم مابية حيل مشاكل على الاقل مو نفس اخواتها يحاربونها برضاتة صارت
وشعجب سالم قبل
هو يحب نجمة تعرفين نجمة طايعتهم ماتسوي مشاكل ولاترادد
الله يسعدها ان شاءلله.
رجعت كلبي يدك بقوة راحو لسالم وخطبوني منه شلون وافق بعد ما شافهم ناس عدهم فلوس معقولة لان يحبني وافق! التفكير اكل راسي طلعت ثاني يوم للدوام ماكو اي واهس احس بمللل مو طبيعي ماعرف شنو السبب واني كاعدة اكل ككو واشتغل ومخبوصة انفتح الباب رفعت راسي شهكت بفرحة وضحكت.
استاااذ واخيرررا رجعتتت
وكفت فرحانة من كل كلبي بجيتة بس من شفت ملامحة العصبية بهتت ملامحي سالتة بخوف
شبيك استاذ؟
تسالين شبية بعد مارحتي من ادية؟
نيزك: كرهت غرفتي وكرهت الدخلة الها بس مجبورة انام بيها كلة من ورة قبس ضرغام لحد الان علاقتي بية منتهية من جذب علية وراحلها روحي بعد ماتتقبلة لو كايلي بيها باب وجواب ماعندي ثقة بيه وصرت اشك يروح لغيري رغم هو من الشغل للبيت ينام من ما انطية وجهة صار مايحاجيني لان مل مني.
رحت لشهب غيرت ملابسها عطرتها ورتبتها وهاي بكل مرة ماتقبل قبس يبددلها رغم هو يحاول وياها.
بس هي ماتقبل الا اني اجت ولاء وهاي صايرة صديقتها احسن من دعاء تبقة يمها تسولف
نزلت اشتغل وجاي بية مابية اتحاشا كلامهن سهلة دوم تكلي راح تخلص السنة ويولن لاتنطين اهمية لكلامهن رغم يحرك الكلب واسيل تذب كلام كل يوم وهسة من شافتني اجت تحجي لدعاء.
اسيل: دعاوي حبيبتي اريد سيت نوم احمر ضرغام يحب الاحمر
دعاء: ادللي حبيبي هسة اوصيلج اني عندي فستاين مشلتحة ترهم مال نوم اذا تردين.
الله وايدج اليوم محظرتلة سهرة وطلب لون احمر اللبس يكول شفتج بكل الالوان واحلى لون عليج احمر
دعاء: بالعافية علية
عفتهن دمي يفووور لو الزم ضرغام افلش راسة يعني رايحلها ويسوي نفسة مايباوع لوجههة
ااخ يانار كلبي واني مطمنة اكول لا مايروحلها
كال يحب الاحمررر عبنة ثوووررر.
رحت للغرفة افور بس اريدة يجي واتعارك وياة.
نضفت الغرفة كلبتها كلاب رحت طلعت ملابس شهبة غسلتهن ورتبت كنتورها اصرف وقتي واذا حركتي بالشغل طلعت من سمعت صوتة يحجي وي حسن دخل للحمام بس وصلت افتريت بالغرفة وطلعت اشوف امير ماتغفل عنة سهلة دقيقة كاعدة وهو يلعب صعدت لاكاني قبس من كثر ماعصبي اذا واحد يكلة هو يضربة راجدي عبرتة صاح بية بصوت عالي.
اني شكم مرررررة كتلتج هاااي نعال لاتخلينها يمها بالغرفة ليييييش ماتفتهمين.
بعدني مامستوعبة شي شفت ولاء تبجي وتشكي لامها طلعت سندس تهلهل بلسانها.
شبيها بنتي ولد وتخاف على مرتك منهااا
رفع اصبعة بوجهها
مااارريدها تدخل غرفتي ولا تباوع بوجهة
مرررتي سمعتن سمعتتتت هي نعااال سمعتي
اذا شفتج جاااية حظ حظج اطييحة
ضربت سندس على صدرها وشهكت
ياااع ولك هيج تحجي اشفت على بتي جايبتة للبيت لو سوت نفس بناتكم بالختلات كاضهااا هاي لان فقيرة وماعدها شي.
قبس: كووة كاض روحي منج لو مو مرررة هسة اكضج وابرد كلبي بيج تسووواج ورررد تفهمين وتسوووى بناتج وحدة تركض ورة فقار والثانية عيونها فاكسة افكسهااا الج افكسها
علكها وصعد فوك ركضت وراة افتهم السالفة لايروح يحاجي شهب دخل ركض دخلت وراة
راح لشهب يكلها.
اني مو كتلج هاي لا ادخلينها للغرفة كتلج من تجي اطرررديها لو ماكلت؟
نيزك: لا تصيح عليها فهمني بهدووء
وانتي شكووووو مرتي لو مرتج؟
نيزك: اختي قبل لاتصير مرتك نصي صوتك واحجي
مسح وجهة صار دم واذاناتة جمرن من الحركة
شهب: والله البنية حبابة مسوت شي شبيك وياها
قبس: انتي شايفتها شلون تباوعلج لو ماشايفة
بفهاوة جاوبتة.
لا شلون
غم كصتة بعصبية تفرفح
لج اني رجلج ما اباوعلج هيج عيونها تريد تقترحج وتلعب بشعرررج افصم راسها هسة يلا ارتاح
نيزك: شبيها البنية ماشفنا عليها شي واذا
تباوعلها اختي حلوة اي واحد اذا يشوفها يباوعلها.
خزرني بقوة خفت منه ومن ضرغام ماخاف هيج
قبس: هاي الولد احسن منها هسة ذولة
المخبلين لو شافوها يدنكون روسهم ومايباوعولها هيج وانتي مو كتلج لاتلبسين نص ردن وتطلعين جسمج كلتتتتتت لو ماكلتتت
نيزك: اني لبستها لان محد يدخل هنا غير البنات
قبس: هاي بت الكلب انعل ابوها لابو الجابها هي وامها واختها البرابيك من اليوم لو دخلت وحدة منهن الغرفة اركع راسها بالحايط
راح يهفي للحمام حقة راح ينفجر خل يبرد.
شهب باقية ساكتة ماتفهم شي.
شهب: هسة شصار والله ماصار شي جنت اباوع بالتليفون هاي حتى اشوف مكياج
يجوز شاف شي انتي ماشفتية
ما ارتاحلها استغفر الله ماريد احمل ذنب البنية
هي صح تباوعلج وتصفن عليج بس استغفر الله
مو هيج بالها.
شهب: هسة شكو كلبتيها استغفر الله
شيطان هي
هسة هي بعد ماتجي وانتهت وانتي هم اطردبها لو اجت عليج بعد هلرزالة بس المخبلة تدخل الغرفة.
رجعت لغرفتي ضرغام بعدة بالحمام دكيت الباب قوي مايرد علية: ضرغام افتح الباب شبيك
ماجاوبني بقيت بقلق احجي مايرد ردت اطلع اصيح احد وفتح الباب اخذت نفس راح يمشط شعرة حتى ماكلف روحة وباوع بوجهي رش عطر ماتحملت ما احجي.
بعد انقل ملابسك جوة ليش صاعد نازل
سكت ماجاوبني لو احس حركني بنار
طلع فوراً عبالك ماسمعني ردت انجلط الا شوية نزلت اشوفهم كابة بينهم بس مو النسوان هالمرة الزلم وضيغم موجود صاير نار.
جواد: كم مرة كتلك انت لا تدخل اني ابوها وحددت باجر خطوبتها من ابن عمها شعليييك انت
ضيغم: مو بكيفكم اسحلة سحل اليتقرب منهة ماتريدة ولا اناسب هيج شكوول
نعمان: وشبية ابني ماعاجبك داير شغلي
رجال مال وحلال وابن عمها ويحبها وتحبة
شتريد بعد
ضيغم: تحب نعال احسن
نعمان: جوووواد كل لابنك لايتجاوز
جواد: اطلع منا هو انت شوكت صرت اخوها
شو خلصت عمرك وحدك عايش وماتهتم الا بروحك
هسة صارت اختك اطللع مناااا.
ضيغم: مو بيتكم هذا حتى تطردني منه
بيت جدي والي حصة بية مثل ما الكم
نعمان: عود ننطيك حصتك وروح خلصنا
ماتحمل اكثر يبقة الولد صار دم شوية وينفجر طلع وضرغام هز ايدة وراح وراة صعد جواد لغرفة ورد اني بالباب اشوفهم واسمع البنية من ذاك اليوم انتهت حتى نفستها زفت وردة وذبلوها
جواد: شوفي باجر عقدج انتي وياة حضري روحج
فتحت عيونها على وسعهن تهز راسها بلا.
ورد: ما اريدة والله ماريدة كتلكم كلكم كتلكم هو هو سوة هيج والله كتلكم احلف على القرآن هاي الحقيقة والله بابا
بابا سودتي وجهي هو منو الماشافكم خاتلين سوى طمي سالفتج احسن ماطول اعترف وطلع رجال باجر عقدج مفهوم هذا الردتية صار
هو طلع منا وهي ملخت روحها تهسترت نريد نلزمها مانكدر وجههة طلع دمة تبجي وتصرخ.
يمة والله كتلج ليش محد يصدكني لييييش
ماريدة والله ماريدة.
سكتت بعد مافحطت وتعبت من الصريخ والبجي عيونها دم صارن وجهة تزلغ خطية شعرها كطعتة غفت وهي تردد بكلب مكسور.
ابوي كسر كلبي ماصدكني ابوي
اني بنتة ماصدكني صدك بالناس
الغربة ونسى ورد منو نسى الجان يكلها
انتي مثل الورد ماحن كلبة علية من شافني ذبلت
دموعنا تصب وياها خاصة امها انكسرت عليها طلعت تكول: اخاف احجي وابني يخسر كلشي
هو ماصارلة فترة من رجعت علاقتة بابوة.
مشيت اشوف رفل كاعدة جوة الدرج مخلية ايدها على حلكها تبجي وهاي من صارت السالفة حتى مايدخلن لغرفة ورد دوم اشوفهن برا عازلات رواحتهن وضايجات عليها، صعد حسن وصارت عينة عليها بدون مابتهم لوجودي راح سحلها من رجليها يطلعها من جوة نترت روحهة منه وطفرت تركض وهو يصيح: شبيج تبجين.
رجعت لغرفتي تعب وطفيت اخذت علاجي وبدلت بس اني مو نيزك الصارت قبل كم شهر ماتت ذيج قبل لاتستمر وكفت على المراية ارطب ادية وهو دخل افتر بالغرفة يريد يحجي التفتت وسندت ادية منا ومنا على الميز مرتجية علية.
كول احجي شبيك
انتي هنا
اي وين اروح
والله لعبت روحي من الغرفة
فتحت عيوني على وسعهن غصة صارت بلعومي
نيزك: اطلع روحلها منو لازمك
تقرب مني عافس وجهة نطق كلماتة صوب كلبي بيهن: صارت تلعب روحي منج.
ماعرف شلون جنت اشوفج حلوة
أصلاً ماعرف شلون حبيتج
اشرت على نفسي ماكدر انطق من الصدمة
ضرغام: عطرج يخنگ وخايس مثلج
طلع عافس وجهة خلاني بصدمة استوعب كلماتة ماكدر استوعب والله معقولة هذا ضرغام الجان بس يريد يشم عطري حتى بس ينام!
گلبي لزمني خفقان كلت مايصبح علية صبح اليوم شربت حب مايفيد من الحركة احس روحي تطلع كلشي سويت ما فاد لميت ملابسي بس خل يصبح صبح انام بالشارع ولا ابقة يمهم وجهة الفجر نمت ماحسيت بنفسي من كعدت متاخرة غسلت وجهزت جنطتي لبست عباتي وطلعت اسلم على شهب واروح وهو الصياح كب كلهم مديت راسي من المحجر كلهم لابسين دشاديش وشيخ بالصالة يحوسون.
وووين راحت بالبت شوفيها بالحديقة امشييي
طلع تميم يدور برا رجع ينكت بيدة.
مالها اثر شردت البت
صعدو ركض لفرفتها دوروها ماكو نزلن البنات من فوك وجوهن صفر صاحو بيهن بخوف ردن
ماكو وردة
عدنان: شردت بنتك
جواد: اني كتالها...