رواية المنجمة للكاتبة كفاية كاظم الفصل الثلاثون
كواكب: ليالي مظلمة، وجع مميت، حياة خالية من كلشي اشك اني عايشة وتمنيت ميتة ولا واصلة لهيج مكان ولهيج حالة تمنيت متحملة سالم وذلة وذل العالم بس لا الاني بية والوجع الينهش روحي نهش.
واكفة انهش بجسمي ومن كثر من حكيتة الدم طلع بيدي افتر اضرب بنفسي من الوجع ارجع افلش بالباب وبعلو صوتي اصررخ اصررخ من محد يرد علية اركع راسي بالحايط امشي واضرب نفسي اريد اموت واخلص المن عايشة.
حسيت كلبي وكف والنفس ضاع مني كعدت طابكة رجلية ودموعي تنزل بالكاع خليت ادية كدام عيوني متزلغات عبالك بزون مخرمشني وايدي الثانية مايتباوع بيها من الحرك تشوهت وكلشي ما مستخدمتلها بقت هيج بعلتها راح تطيب.
ساعة ساعة تمر نسيت العالم نسبت اني منو مايجي ولايخطر بالي شخص غير الاعرج اريد يضربني ابرة راح اموت وانتهى لو يلحك علية لو لا.
من الالم اشيل بروحي واركعها نمت صفح او يمكن اغمى علية فتحت عيوني بيدة بطل مي وهو واكف يديرة فوك راسة مسحت وجهي جسمي يرجف زحفت زحوف وكعدت عدل مديت ايدي واكلة بصوت يرجف.
اضربني ابرة اضربني فدوة راح اموت
ضرب ايد بيد وكعد على الكرسي خلة رجل على رجل يكلي: سامعة الابرة بيش انتي؟
رحتلة وكعت جوة رجلية اتوسل بية
راح اموت انقذني بيها انقذني
غالية غالية
انت الحقنتني ااااانت اني ماكتلك.
عودت جسمي علية وهسة تكلي غالية
ضربت على رجلية جسمي تعبان واذا ما اخذها اصير ماي ماكدر اعين نفسي دموعي تجري ومن الوجع انحب وابجي وصوتي طبك من البجي ماحن ولا شوية علية يضحك من يشوف حالتي يستلذ بعذابي.
مسحت وجهي بيدي وحجيتلة
اني ماردت اشتكي عليك
ليش مو اشتغلت وياك وحتى فلوس ماخذت منك
ليش سويت بية هيج ماجنت عبالي هيج تاذيني ليش اذيتني واني ماسويت شي.
سكتت فحطانة لزمت كلبي بيدي يريد يوكف وعساة يوكف ويخلصني صفن بحالتي وبخبث كال
الاعرج: انتي نهايتج الموت عرفتني كلشي عنا ماريد اكتلج وهم تسجل علينة جريمة
اكتلي نفسج بيدج واخلصي وخلصينا
نطقها وجههة مابية معاني رحمة شيطان رجيم حاقد على بني ادم طلع وعافني اموت رجع بعد وقت بيدة صينية اكل خلاها كدامي واني روحي تلوب على الابرة مو بعيني شي دفعت الاكل اصرخ واتوسل بية يساعدني دفعني بقوة واشر على الصينية يكلي.
انتي حددي مصيرج
التفتت وي الاكل سجينة تلمع لمع قبل لايطلع شلتها وشمرتها دنك ماصارت بية طاحت برا سد راح جابها رفعها بيدة ابتسم بخبث وكال.
تحتاجينها.
شمرها وطلع زحفت نسيت عندي رجلين والله نسيتهن شلتها بيدي افر براسي اريد اشمرها حتى لا اذي نفسي بيها دقايق لو بقت يمي اشرح نفسي واموت كمت شفت فتحة بالحايط صايرة فوك وكفت بداية الغرفة وشمرتها رجعت علية حاولت مرة ثانية وثالثة يلة كدرت اخلص منها طحت على وجهي بعد ماعندي قدرة لاي شي بالدنيا منتظرة هالسم يسممني واموت بمكاني.
ماحسيت بالدنيا شبيها مابيها اكعد اصرخ واذي روحي وارجع اغيب عن الوعي وحدي اموت اعيش محد يدري عني وبنت الشوارع الشوارع تلفها كلتها بالبداية وهاي النتيجة لو بنت وعندي اهل ماصار بية هيج بس
اني بنت شارع وهاي نهاية الشوارع.
ماعرف الدنيا صبح ليل الحياة يمي واكفة على نقطة وحدة فتحت عيوني الرؤيا مغوشة اشوف شكل قامة بس مو واضح رفعني من الكاع ردت اوكع من ايدة ثبتني على الحايط سحب ايدي طلع ابرة حقنها بيدي عافني وطلع مرت فترة يلة رجعتلي الحياة واختفى الوجع رجع بيدة اكل.
اكلت هسة يلة انفتحت شهيتي هسة يلة حسيت بالجوع صينية كاملة اكلتها بدقايق الاكل مو ارجف ترس ملابسي ونصة واكع بالكاع اخذت شربت مي وهو يباوعلي رن تليفونة اخذة يفتر كدامي ويحجي بية...
قامة: صار لا مو هسة بس يروح مفعولة ماتفيد اريدها بدون طاقة مفعولها مو قوي بس اليوم يمشيها.
بقة ساكت والطرف الثاني يحجي براسة اخذت قسط من الراحة والانتعاش بعدها بساعات اختفى المفعول وحسيت روحي تطلع من جديد كل مايخلص مفعولها اموت على البطيء ومحد يمي ابجي اصرخ واعذب بروحي انفتح الباب دخل الاعرج ركضتلة اتووسل بية والسيناريو ينعاد نفسة بس هالمرة بدل الدور هو وغير كلامة
الاعرج: امشي وياي وراها احقنلج.
مشيت وراة بلا وعي ولا تفكير كلشي مابراسي متخبلة وعقلي بغير عالم المكان خرابة كدامنة غرفة مهدومة هدم ومن بعيد صوت واحد يون قبل لايفوت مد ايدة سحب سلاح واخذ ايدي خلاه وبقت بين ايدة عيونة بعيوني ويحجي بهدوء
اكو جلب تخلين طلقة بكصتة وتعاليلي احقنلج غير هذا الحجي ما احقنج لو تموتين كدامي
سحب ايدة ونفسة ابتعد وكع المسدس من ايدي صرخت وراة متخبلة.
ما اكتل والله ما اكتل مو مجرمة ااااااني.
وهو يمشي اشر بيدة وبرود يموووت مال
بكيفج بعد
اختفى وبقيت بس اني واكفة ماتحملت كعدت بالكاع اشلع بشعري من الوجع زاد الونين كمت امشي للغرفة بخطوات بطيئة وانفاس مسموعة وكفت بالعتبة مديت بس راسي شهكت وخليت ايدي على حلكي من شفت شخص مربط ويون من التعذيب ردت اطلع خفت من شفتة هيج وكفت اسمعلة من كال.
ساعديني فكيني راح يموتوني.
ماكدرت اتقرب علية توسلني هواي توسل بية تحركت اخطي خطواتي بحذر وتعب حاولت افتحة الحبل مربوط بقوة واني حيل مابية.
روحي جيبي سجينة وافتحيني
هزيت راسي طلعت ورجعت الوجع هاج علية وشكلة تخيلتة شيطان كاعد بلا وعي رحت اضرب بية واصرخ طلعت شفت الاعرج واكف يضحك ومكتف ادية دفع المسدس برجلة علية وكلي.
يلا اكتلية حتى احقنلج
وكان سوالي سحر نفذت كلامة شلت المسدس ومن شافني واكفة كمل يكلي.
هذا كاتل ومغتصب ولاعب لعب يستاهل يموت
اخذي ثار البنات والناس المسكينة وها احقنلج وراها حتى ترتاحين.
تحركت بحزم امشي بلا تفكير بس اريد انفذ علمود الجائزة المنتظرتها دخلت الغرفة وصلت يمة رفعت المسدس وهو يحجي لو اتخبل ثارت طلقة وانرجيت ليورة وكعت وببلا ما اباوعلة طلعت ازحف على ادية وركبي بذني بس صرختة من رميت بعدها وانكطع صوتة سحبني الاعرج من طلعت يضحك اخذ ايدي طلع الابرة حقني وسحلني للغرفة شمرني وقفل الباب بقيت وحدي
بعد فترة سمعت صوتة يحجي.
لو باجر لو وراها اطلعها منا اي بعد عليها هي صارت خبرة سهلة لاتسوي شي انت
نمت ماعرف بقيت كاعدة المهم ماحسيت بشي ولا اتذكر شي كعدت على صوت الباب يتكسر خفت ورحت ضميت روحي بالزاوية خليت ادية على اذني ماطايقة اسمع اي شي الصوت يأذيني.
صرخت من انفتح الباب سمعت واحد شهك بصوت عالي فتحت عيوني بفضول سكنت كل حواسي وعيوني مفتوحات بقوة ماكدرت استوعب رجعت غمضت عيوني واجة كعد كدامي يتلمس وجهي مامصدك وايدة ترجف باوعت بوجهة عبالي اتحلم بعيونة صفنت واتذكرت ذاك اليوم بصوت تعبان نطقت بعدها شهكت.
ضيم
ايدة تلمست كل وجهي عيونة الملونة انترست دمع ونزلت دموعة من شاف شكلي مديت ايدي اشوف حقيقة لو حلم لزمتة ضحكت اهز راسي واصيح بصوت عالي...
حقيقة جذابة جذب كلشي جذب هسة اكعد
تركتة وتلمست الحايط دكيت علية ودموعي تنزل اصيح.
يالحايط شوف شلون بس اني وياك هنا كلهم عافوني اني وياك اموت يمك بس انت تشوفني وهما لا محد يمي كلهاااااا جذب.
دار وجهي مسح دموعة وشالني من الكاع غمضت عيونة من اجة عطرة بخشمي براسي مشهد قديم جنت بالسوك وهو وراي عطرة كفخني وريحتة اخذتني لعالم الورد عالم حلو وهسة هم مادري اني بالحقيقة كل ضني حلم وهوسة واصوات اسمع وصوتة عالي خلاني بالسيارة كعدت اباوع بعيوني اجة يرجف رفع شعري من وجهي لزمت ايدة اكلب بيها رفعت عيوني باوعت بوجهة ارمش.
عليك الله عليك الله انت ضيم ضيم هذا ابو عيون ابو العطور ابو السيارة يوصلني بيها يكلي تكسي اني؟
اي اي والله اني والله
شهك احس نفسة نكطع ضرب على راسة ودار شغل السيارة ماحجة وياي ماحسيت على روحي كاعدة نايمة كلشي ماحسيت الا من شالني ونزلني على الفراش جلبت بيدة ونهضت بصوت مطبك خشن من الصريخ توسلتة واني اشر بيدي.
ابرة اريد ابرة روح جيبلي راح اموت بس تخلص وجسمي يوجعني يموتني روح جيبلي ابرة.
اخذ ايدي المحتركة لطم على راسة وجهة احتقن سحبتها من ايدة ضميتها وراي.
روح روح ماتوجعني بس جيبلي ابرة كلشي مايوجعني
لزم وجهي بثنين ادية ونزل عيونة لعيوني يكلي
ماكو بعد ابر منتهية انتي شمسوين بيج
ادري ادري راح اموت بس جيبي ابرة هم ارجع اموت بعدين
هز راسة لا نترت ادية بقوة وفتحت عيوني على وسعهن هزيت راسي لا وصرخت بحركة...
اموت امووووووت والله اموووت واكتل روحي ماتعرف انت ماتعرررررف تعودت عليهن جيبلي روح فدوه جيبليييي
رجع سحب وجهي ثبتة واني بيدة ارجف بهدوء يفهمني.
تذكري انتي كواكب القوية الجانت تشتغل حتى تعيش اخواتها كواكب كرامتها فوك كلشي ماتذل روحها كواكب حتى شغل ماتقبل واحد يشغلها غير شغلها
شهكت وملت راسي دموعي تنزل بلا وعي
كواكب: مو اني هاي ذيج غير وحدة لاتذكرني بيها.
ضيغم: اذكرج بيها اذكرج بحياتج القديمة اذكرج باخواتج اخواتج يريدنج يبجن عليج اخواتج ماعدهن احد غيرج اذكرينها
ضربت على رجلي بقوة ماحس بالوجع تكطع كلبي بكلامة والله تكطع.
كواكب: نسني وعاشن نسني اخواتي كرهني وحقدن علية مايردني محد يريدني اني
هز راسة يمسح بدموعي رجع شعري ليورة كذلتي طولانة وتنزل.
ضيغم: يردنج والله يردنج يسالن عليج مايدرن بيج هذا حالج ونجمة تبجي تجيني تسال عليج ماشايفتها شلون تتوسل بية حتى اساعدج ارجعيلهن كواكب اختهن القوية
اني مو قوية شوف اريد ابرة وانام انساهن وانسى كلشي يلا روح جيبلي بسرعة
نامي شوية هسة اجيبلج.
رجع راسي على المخدة اول مرة بعد فترة طويلة انام على مخدة وفراش تلمستها بيدي ودموعي تنزل عليها بلا شعور ماعرف ولا اكدر اميز بين الحقيقة والوهم، رجع وياة واحد من شفتهم دخلو شهكت وكمت اريد اشرد كعد جوة الجرباية يسويلي بيدة ابقي كاعدة سحب ايدي والشخص الوياة يباوع لضيغم ويهز راسة لا
سحب ايدي وقدمها للولد طلع ابرة بس فارغة سحب دم منها وطلع ضيغم يخلي كطن على المكان سحبتها منه وتقربت...
هاي مو ابرة اخذ دمي ماضربني
دفعتة من صدرة اكلة
روح بساع جيبلي هسة يروح المفعول حتى وراها تضربني ماتوجع هواي وراها
اسمعيني راح تتعالجين من السم اليمشي بدمج
لااا لاااا والله اموووت اريد اريد هو الاعرج يضربني رجعني اله رجعني يضربني ابرة انت ماتضررربني
تتوجعين بس تطيبين اسمعي مني.
خلاني متخبلة هو مايحس بالالم مايدري شيصير بية من يخلص مفعولة وشلون انذبح احس جسمي يحرك بية يموتني اريد املخ روحي بس يخلص هذا مايدري ولا يحس.
طلعت وراة سمعتة يحجي هو والولد يكلة
نسبت الادمان عالية بجسمها مبينة من دمها اخذها للمستشفى يعالجونها
ضيغم: يموتونها مايرحمون بيها
اي تعاني كلش يكطعونة عنها ماينطوها بديل اقل مفعول حتى تتشافى بالتدرج
ضيغم: هسة شلون دكتور اعالجها اكدر اعالجها.
نصيحة ماتتحمل المستشفى عالجها حتى لو تطول بنيتها ضعيفة ماتتحمل تموت صارت هيح حالة وحدة نفس حالتها واصلة نسبة عالية
لا ماخذها ماخذها
واني وياك اي شي تحتاج
تسلم ماتقصر
سلم علية وراح اندار على صوتي من كتلة
ديربالك تفكر تاخذني للمستشفى الشرطة تسجني كتلت واحد اني وبقة المسدس يمة علية بصماتي اروح اعدام مؤبد
بهتت ملامحة واجة سحبني يريدني ادخل دفعتة عني مشيت اباوع للمكان كلة ثيل وزرع مشيت اصيح: وين جايبني وين.
اجرت بستان الج جنت ناوي اخذج شقة بس حالتج ماتسمح يحتاج مكان مفتوح بعيد عن البشرية
ضيغم: تمشي مو بوعيها اكو مي بالكاع تدوس بية حصو تسحك علية ماتحس تحجي ماينفهم نص كلامها دنكت شلتها تحجي اشكال الحجي شمرتها بالغرفة تخبلت علية ضرب وتضربني كوة لزمتها طلعت ابرة ضربتها بقت صافنة وهادئة كل ضنها نفس السم التاخذة عقلها صورلها نفس التاثر وصارت تعيش كان فعلاً بدة المفعول.
مسحت وجهي راح اطك من القهر حالها الماعندة كلب يبجي عليها جسمها مشخط ومجرح والرجفة محتلتة تمددت تعصر بالمخدة وبصوت ناصي تكلي
انت خوش رجال وكلهم نعل مايسون نعل
الاعرج نعال قامة نعال وغضنفر نعال لا مو نعال مريض هو شككوة خطية راد يموت بس هم جنة نعال الوصخ متحلفة اكتلة بس يصحى.
كملت تسب وتفشر تغلط عليهم واحد واحد ورجعت على غضنفر ماتدري بية الدولة تدور علية وايام وينلزم ينتهي الاعرج وكلهم انلزمو والفضل يعود لميار اي لميار.
بعد مادورت على غضنفر وايست الكاه قدمت بلاغ بيها مفقودة وانصدمت من كالو جانت بالسجن قبل فترة طلعت بكفالة عرفت تهمتها وطلبت ينطوني اسم الكفيل فلوس كلة فلوس يلا حجو فر راسي فر واحد من الضباط مد ايدة يحركها عرفتة يريد فلوس لان شافني انطي مايهمني.
طلعت وياة برا وحدنة نحجي
كلي منو ميار وانطيك التريدة
بدا يحجي عن ميار ومكانها ومنو هي حسيت ضغطي ارتفع كمت ما اشوف دربي كواكب شوداها على هيج ناس منين تعرفها ركبت سيارتي وانطلقت ادور عليها بسهولة لكيتها لكن بصعوبة حاجتني.
ميار: شرايد
تباوعلي من فوك ليجوة وتنفخ بالعلج ذبيت نفس ولعبت نفسي منها وحدة رخيصة.
ضيغم: خصم الحجي فلوس انطيج بكد ماتردين
المقابل
اريد عنوان كواكب
فتحت عيونها على وسعهن كامت من مكانها.
صارت كدامي تحجي بجدية غير عن قبل شوية
ميار: منين تعرف هاي البنية؟
نسيبتي اخوتها يدورن عليها تعبت واني ادور اريدج تكليلي وين هي انتي مطلعتها بكفالة.
رفعت شعرها وراحت تفتر خايفة تحجي رجعت يمي وكالت: اني ماعايزة فلوس هاي البنية بالذات انقهرت عليها توسلتني واني شكد يتوسلن بية ما اهتم ولايرف گلبي عليهن بس هي غير عنهن رادتني اساعدها ماطلعت من بالي ردت اعيش شعلية بيها بس بقت تتخيلي وعيونها انطبعن براسي نظراتها ماطلعن منا
اشرت على راسها وكعدت بملامح حزينة كملت.
جانت تشتغل وي الاعرج بالممنوعات خفت عليها صغيرة ردتها تساعد امي معوقة حياة احسن مناك ماكو عذاب وخطر اشتريتها من الاعرج ما انطاها الها يستفاد بيها يريدها يشغل
الاعرج منو هذا ساعديني الكاها والج التريدينة؟
شوف اني مسافرة بعد كم يوم راح تنكشف اوراقي لعبت وي واحد جبير بس يطلع منها يمحيني اجت عدلة وياك يمكن البنية بيها بخت اني طالعة طالعة اسلمك الاعرج قبل لايسلمني واني اطلع منها مثل الشعرة من العجين.
بقت تحجي كلشي عن هالعصابة بالتفصيل واني مسجل صوتها بدون علمها كملت وسحبت تليفونها تخابر.
ميار: الو عيوني
طكتها ضحكة وكملت تحجي بعد ماسمعت هواي
قلباي اريدك انت وين؟ يمي الك شغل ولو تدري شنو الك يمي ماتصدك اامممم اوكي
بقت تحجي وياة طلعت ماتحملت دخنت جكارة ورجعت لكيتها مكملة.
ها بشري شصار.
الك عنوانه عبالة اونسة بعدين يسلمني مايدري ياكل نعل مني واسلمة حددت موقعة روح بلغ علية واخذة اني طالعة اليوم وها ام عيون سلملي عليها
طلعت الدنيا ماواسعتني من الفرح احس رب العالمين فتح البيبان كلها حتى الكاها وخلاهم بينهم يتعاركون واحد ينطي بواحد ويريد يتخلص منه حتى تطلع هي مو سهلة وحدة نفسها باعتهم.
خبرت صديقي الضابط وياي بكلشي من البداية جهزو دوريات وطلعو قبلي القو القبض على ثنين كبار فتشو المكان ماصدكت عيوني راح اشوفها بعد كل الفترة الفاتت تمنيت ماشفتها بهاي الحالة شبة منتهية طلعتها وياي ماخليتهم ياخذونها لو ما صديقي الضابط اخذوها حققو وياهم واجباري ياخذونها مستشفى.
اتصلت بالضابط اسمع اخبارهم كال.
بعدة التحقيق مستمر وياهم مثل ذولة صعب يعترفون بس اول تالي يعترفون واحد منهم اعترف على الاعرج بشغلة وحدة وهي خطف البنية وتهديدها وحتى شغلها بالاجبار بس ماذكر شي يخصهم القضية مفتوحة وجاي نجرجر بيهم واحد واحد
تشكرت منه وطلعت وصيت حارس البستان خاف تطلع منا هو البستان بية باب واحد طلعت للسوك ماكو شي بالبيت تسوكت واتذكرت اجيبلها ملابس.
رحت لمحل بية تراكات بناتية وكلشي طلبت من البنية التبيع تجهزلي ملابس كاملة بس التراكات اني اختاريتهن لان ااعرف بيها مسودنة وماتلبس الالوان البناتية اختاريت مثل ماتحب واسعات والوان اساسية مرتبة بيهن شوية حركات.
رجعت للبيت محمل فتحت الباب على وضعها نايمة بس فاتحة عيونها ترمش فرغت المسواك طلعت الاكل صحتلها: تعالي اكلي.
نزلت جسمها اجت كعدت يمي بقت صافنة تباوع للاكل رفعت ايدها ترجف بشكل مو طبيعي رفعت عيونها مدمعة صوتها بية غصة كالت...
يوكع الاكل حيلي راح بس يرجع مو دوم
اني اوكلج بيدي
ابتسمت ودنكت راسها
كواكب: كلهم نعلة بس انت رجال ضيم رجال
ضحكت على سوالفها حتى وهي بهذا حالها تطلع سوالف من جوة الكاع اسويلها لفات واوكل بيها شبعت شربتها عصير بية علاج.
كواكب: اكل ضيم انت هم خطية وجوعان
اني شبعان معليج بية.
طبك مرض شعلية بيك صدك
راحت لفراشها غفت خايف اذا كعدت شتسوي.
عفت ملابسها على صفحة وطلعت كلشي من الغرفة حاد تقربت عليها سحبت ايدها فزت باوعت بعيوني
ذبيت نفس وبهدوء كتلها.
بس اخلي علاج للحرك
سكتت تباوعلي عقمتها وكلبي ينمرد عليها شلون تحملت كل هذا حلفت ماخليهم يشوفون الراحة
لفيتها وعفتها سولفت وعيونها بالسكف.
كواكب: هو الحرك حيل وجعني حيل بس كال هاي سهلة عبالي ماكو وجع مثلها بس بعدين عرفت وجع جسمي من الابر اكثر من الحرك بهواي
خلت ايدها على عيونها ودموعها تنزل
ضيغم: مثل ماحرك ايدج ايدة تحترك ومثل ماتعذبتي يتعذب اردلج حقج اني مو ضيم ونعال اذا مارد حقج
طلعت اخابر بالضابط وخلاهم يزيد بالتعذيب وخاصة الاعرج كلي يمي فهمتة وخابرت نجمة حرت شلون اكلها وشلون اخليها تشوفها بهذا حالها ماكدر.
نجمة: ها ضيغم لكيت اختي راح اموت عليها ماتحمل بعد.
لكيتها يمي هي زينة بس توافق اخليج تشوفينها وهسة عندي شغل بعدين نحجي بس هي زينة ويمي لاتخافين
سديتة منها ماكدر اسمعلها بس تكلي اريد اشوفها ماتحمل اجيبها وتنلاص بشوفتها ماكو دقايق وفقار حرك الموبايل علية اول مافتحت الخط اجة صوت يصيح بية...
فقار: شكووو تتصل بيهاااا شكو لك انت مو كلتلي مثل اختي تضحك علية انت شفتني زعطوووط كتلك عوفها البنية هاي لاتتقرب منها
ضحكت وهو يشيل بروحة ويركعها يغار الجلب عبالة عندي شي وياها كلها عرفت بفقار رايد نجمة الا هي شنو من عقل شايلة ماعرف يمكن الاحساس مشيول منها وهو زمال مايروح ويكلها يخلصنة عاد
ضيغم: يلة كملت انجب خل نلغي
فقار: اذا الزمككك اخنككك ضيغمممممم
وسم تعال افهمك السالفة.
ماكدر اضم عنة بعد راح يحقد علية ونجمة دوم اتواصل وياها واحجي وهذا شحجي مايصدك وحقة اذا ماكتلة الحقيقة يكرهني ويشك بية حتى البنية ياخذ نظرة عليها بسببي و اني اشاركة بكلشي دوم ينصحني وهسة محتار بشغلة.
انتظرتة رحت افتريت بالبستان نضيف رجعت للغرفة نايمة انتظرت فقار وصل اباوعلة يمشي مايشوف كدامة عاكد حواجبة يريد بس يلزمني طلع موبايلة راد يتصل بية طلعتلة رجع موبايلة بقة خازرني تقربت علية ضربت على زندة.
شلونة ابن العم
فقار: انت خليت بيها ابن انعال جالطني كون اعمي عينك
فتحت عيوني مصدوم لزمني يبرر
فقار: ماقصد وداعت الخوة هيج محترك كلبي منك كون عيني تعمة قبل عينك
شبيك وياي مامسويلك شي
تعرف شبية لاتغشم روحك
البنية اختي خوش الف مرة كتلك
شعندك وياهة
اختها
عكد حاجبة سحبتة كعدنا واحد كبال الثاني وبديت اسولفلة كلشي بالتفصيل بقة مصدوم زعل وعاتبني.
واني ولك اخر من يعلم كل هذا واحد صدك طلعت مامعتبرني اخوك.
هسة هاي شجابها على هاي
فقار: وعلى مامعتبرني اخوك رايح وفحطان صارلك شكثر هسة يلا والله ماتوقعتها منك بلة صارلك شي بهاي الفترة بلا تاذيت ماحسبت حساب بالجذب كلي اني ماتريدني ضرغام دوم سالفتكم وحدة جان كتلة
ضيغم: راح تخليني اتندم لان سولفتلك
انجب خليني استوعب البنية زينة هسة
نامت هسة باجر لو بالليل تكعد وتتخبل علية
ماخذتها للمستشفى يحيرون بيها
ضيغم: لاتسولفها ماخذها لو على جثتي يشوغونها.
وانت هنا شنو دكتور خبير
علي تواصل وي الدكتور اجة شاف حالتها سحب منها دم يشوف نسبة المخدرات على اساسها يحدد العلاج تدري حالتها مو مال مستشفى حتى هو الدكتور كال حقن يحقنولها اخس من الحبوب واصلة مرحلة من الادمان جسمها متشبع بية
مسح وجهة يذب حسرات
فقار: ماتستاهل شنو ذنبها الصار وياها.
فقار حرت شلون اتعامل وياها الايام الجاية صعبة عليها حتى لو جبت ممرضة ماتكدرلها الدكتور يكول تصير وحشية اذا ماخذت الجرعة وهذا طبيعي هنا الممرضة ماتكدرلها
افتهمت قصدك جيب ممرضة وانشوف حالتها
راح يفتر رجع علية
فقار: اكدر اشوفها
لا
ليش لا؟
وليش تشوفها؟
الله مطيح حضك ليش اشوفها مثلاً
حالتها تعبانة من تصير زينة اخليها تحجي وياك
شوكت تكول لاخواتها
بس تصير زينة
هز راسة وراح رجع يكلي
شنو راح تبقة يمها
منو الها غيري؟
جيب ممرضة بسرعة
هو باجر توصل ان شاءلله
رجعت يمها كم بيدي لابتوب طلعتة وكعدت اشتغل
كل شوية اشوفها كعدت لو لا رفعت عيوني الها كعدت وكامت من مكانها باوعت بالمكان شافتني رفعت ايدها.
كواكب: انت هنا؟
يمج اني تعالي اكعدي يمي
ولي
ليش
احسن ولي
طلعت من الغرفة لحكتها طلعت برا تمشي بالبستان واني وراها التفتت من حست علية
شكو لاحكني
وين رايحة ماتكدرين تطلعين منا
اطلع وانعل ابوكم والله
استغفر الله.
عفتها تمشي وحدها بقيت بمكاني راحت ورجعت علية ترجف ودموعها تنزل تحك بركبتها صايرة دم.
كواكب: والله بدت تحركني يموتني جسمي صار اضربني وحدة راح اموت فدوة راح اموت هسة يزيد الوجع ماينقص
امشي اسبحي بمي بارد جبتلج ملابس اخذيهن
سحبتها من ايدها واني خايف من هالشي تبقة بنية وحرام بركبتي اذا الزمها بس اني مجبور لان حالتها ماتساعد دخلتها وكتلها.
جيبي ملابس واسبحي انتظرج برا.
كواكب: انهش بجسمي بدا يصير حار راج اتلوع من جديد دخلت للغرفة لكيت يم الجرباية علاكة طشرتها برجلي بقيت صافنة عليها اشكال الملابس حتى داخليات شلت روحي وركعتها بالكاع تمنيت الكاع تنشك وتبلعني هذا مايستحي منو كلة يجيبلي صخام اخذت تراك نيلي نص ردن عريض من الاطراف مخطط بابيض وبية علامة ليكدام دخلت للحمام المي برميل يطوف وبارد الليفة والشامبو وانواع بطالة كلة جديد مبين هسة جايبة.
سبحت واول مرة اسبح هيج من طلعت من البيت طولت بالحمام جسمي صار يحركني نشفت وطلعت لكيتة كدامي خزرتة بقوة ماحاجيتة...
ضيغم: ها بيج شي
انت واحد ماتستحي طلعت
شسويت
بالملابس الجايبهن
حلوات عليج
هو اني حلوة
وعلى قياسج مثل ماتحبين شنو رايج بيهن؟
مشيت ارفع بالتشيرت مثل ملابسي احب البس هيج هزيت راسي اي ودخلت ركبتي تبللت ماي
يكول مذبوحة خليت راسي بالمخدة شمر على راسي خاولي اشوفة فوك راسي وبامر كلي
نشفي شعرج.
جيبلي مكص صارلي فترة ما كاصتة يلعب روحي ويطخ بركبتي
نشفية هسة
بقيت على وضعي وعيوني صافنة بالفضاء فزيت من لكيتة ينشف بشعري اخذ الخاولي شرة على الباب راح فتح الثلاجة طلع عصير ولفات اجة يمي قدمهن الي.
تاكلين
اخذتهن منة وكعدت اكل بالفة رغم ماصارلي هواي من اكلت على كد الفترة البقيت بيها بلا اكل لو شينطوني اكل ما اكول لا بلعت الكمة كوة بيدي كلاص عصير شربني بلعت وكملت اكل وهو يشربني عصير منا لمن كملت.
يلا كومي غسلي وجبتلج فرشة اسنان كلشي جبت حتى بعد تنامين
مسحت حلكي بالتراك نطت عيونة ضحكت وعيبت علية: مو سمج هو.
سحلني واني ولا بية حيل اتعارك تمنيت ارفسة لو بية حيل اكلة جلب تسحلني هيج شمرني بالحمام سحب بطل ماعرف شنو ثاري طلع بية ضاغطة ضغطها ونزل بيدي فركتهن شال طاسة مي دارها على ايدي غسلت واخذ فرشة اسنان خلة بيها معجون خلاها بيدي على اعصابي فرشت اني الوجع ياكل بية هذا بطران خلصت مشيت للغرفة رجعت على الفراش نعست باوعت للثلاجة كمت فتحتها فتحت عيوني صارت تلمع ضحكت وكتلة.
هاي كلشي بيها منو جابها مالتمن هذا البيت والثلاجة مال يا عالم
كلة الج اكلي شتردين
طلعت موز اكل واتذكرت شلون جنت شريط حبوب جابة إلى انطيتة فلوسة هسة كلشي منه ومن الوجع نسيت افكر واني اكل بالموز كعدت اسولفلة على الاعرج وبلقيس من جنت يمهم وتنطيني اكل
نمت مادريت ومن كعدت ميتة هو طالع وقافل الغرفة علية دكيت الباب بخبال صحت باسمة رجعت اشلع بشعري وياريت يوكع مجلب.
دفرت كلشي كدامي شوية وانفتح الباب دخل هو شافني ابجي واصرخ وجهي احسة نار طلعت اركض لان اعرف ماينطيني ابرة سحبني لغير غرفة ضربتة شكد ولاعافني من حركت كلبي فشرت غلطت حرف مانطق عافني بغرفة فارغة مابيها غير فراش عكس ذيج بيها ثلاجة بيها جرباية وكوميدي بردة هاي كلشي ماكو كعدت لزمت راسي اصرخ
رجع انفتح الباب شفت بنية بسرعة سدتة عبالها مخبلة بعد محد فتحة.
مر وكت طويل موت بطيء اسمية لو اشوفة حتى ابوس رجلة بس يساعدني كورت روحي ايدي جوة راسي واحجي وي روحي مثل المخبلة انفتح الباب رفعت. راسي كمت ورحتلة وكعت جواة رفعني ماكدرت اكوم لزمت ايدة اتوسل بية وابجي.
ساعدني ضيم جاي اموت ساعدني الله يوفقك لاتسوي بية هيج
شهكت كلبي انمرد من الوجع لزم وجهي هدات اسمعة كال.
ساعديني حتى اساعدج اريدج تلبسين شال وتطلعين وراي.
عافني وطلع رجع جابلي شال اخذتة منة لبستة وحتى ماسالتة ليش رحت وراة لكيت فقار باوعلي تمنيتة ماموجود ويشوفني صرت بضهر ضيغم
سحبت تشيرتة من ورة همست بصوت ناصي
يلة مو كلت اساعدج
بصوت ناصي وي فقار اسمعهم يحجون
ضيغم: الممرضة من شافتها شردت مايكدرلها
فقار: بس مو بوعيها خاف باطل يصير.
اندار سحبني كدامة باوعت بعيونة خايفة وهو شعور كمت احس بية بدون ماكو شي يخوفني التفتت شفت رجال يمشي هو والدكتور بس الرجال معمم رفع ايدة وكال.
السلام عليكم.
نيزك: حسيت الدنيا صارت سودة بعيوني ركضت واحس گلبي على ساعة يوكف وصلتلها شهكت ممرودة روحي تصرخ تلوب تعصر بطنها وجهة دم من البجي منين ما الزمها تصرخ وبس تبجي انداريت على دعاء صحت بيها: شبيها اختييي
والله مادري لكيتها تبجي كاعدة بنص الدرج عبالي طايحة نزلتها واجيتج
نيزك: شهبة حاجيني فدوه اروحلج طحتي ناخذج للمستشفى كولي؟
شهب: بطني توجعني نيزك.
لطمت على خدودي هاهية سقطت جنها ركضت دعاء جابت عبايات لبست ولبستها وسهلة ويانة تركض اخذنة واحد من عمهامهم وذهب تصيح بالمرة.
وجهة الفكر لاهلة بهل الطبة طيحتي نسوانة مثل ماجسحتي ذنيج
طلعت المرة هي وابنها ومرتة تصيح
هو صوجي اجيتج اعايدج لو ماجاية احسلي
طول الطريق شهبة تبجي واني الوب من القهر اباوع للكاع اخاف نزفت بعد كمت مافكر اخذتها اسحل بيها للدكتورة اخذتها ماخلتني ادخل وياها.
صرت اروح وارجع شوية واكع من طولي ماكو دقايق شفت ضرغام كبالي سحبني وجهة مبلوع
غمضت عيونة ولزم راسة يردد.
حسبالي صار بيج شي ويكلولي اختها
لزم رجلية وكعد على الكرسي يفرك بيهن ويصيح
اخ يا رجلية ماتن نيزك ماتن عبالي انتي
ثلث انعام من طلعتي سالمة
نزلت دموعي لزمتة من زندة وشهكت
ضرغام اختي حامل يمكن سقطت الطفل بس تصرخ
ضرغام: اسكتي لا تطيحين انمونة هو طفل لا تبجين يصير غيرة لو راح.
سحب راسي يبوس بية من شفت خوفة علية زدت بالبجي والله ماتوقعتة هيج شفت حالتة بعيني جانت تسولفلي شهب من طحت شلون طاح ماتخيلت هيج طلعت الدكتورة رحت احجي وياها وسهلة وراي.
ها دكتورة بشري
الدكتوره: الطفل مابية شي تقلصات صارت عندها ولوية قوية صاير عدها نزول كتبتلها على علاج ومثبتتات تمنع زوجها عنها هالفترة وان شاءلله ماكو شي
دخلنا عليها تبجي كعدت يمها لزمت اديها
بطنج بعدها توجعج.
هزت رأسها لا اريد احجي وشمرت روحها بحضني حضنتني بقوتها تشهك وتبجي رفعت راسها مثبتة بحضني...
نيزك: كافي شهب والقرآن اني كلبي تعبان احجي شبيج لاتبجين وتزيدينها علية اروحلج فدوة
شهب: مابية شي يلة خل نرجع
كامت لزمت ايدي تمسح بوجهها طلعنا ولاحجت بحرف طول الطريق ساكتة جاب ضرغام علاجها وبطل مي يكلها: اشربي هسة يلة حتى ياخذ مفعولة.
اخذت منة انطيتها القبل الاكل والبعد الاكل عفتة ضرغام يمشي على كيف وين يلة وصلنا للبيت لكينا ذهب كاعدة بالباب فاتحة شيلتها وتنخة من اجينة ضرغام بشرها.
سالم حفيدج فافونة اطمني
ذهب: والعباس البنية اهم شي عندي يروح ويجي غيرة اهم شي شهيبة
اخذتها من ايدي تبوس بيها وترزل
ذهب: بعد لاتنزلين لو تحترك الدنيا الاكل ويجيج فوك استري علينا بين ماتكضي هالفترة.
وهي بس تهز براسها اخذتها صعدتها لغرفتها كالت اريد انام طفي الضوة.
عليج الله مابيج شي ماتتوجعين
شهب: لا والله.
طفت الضوة نيزك وطلعت سدت الباب ورجعت انفجرت بالبجي خفت عليها وسكتت كلبي طك وراح ينفجر بجيت لمن حسيت راسي صدع نمت ودموعي منكعة وجهي حسيت بنيزك تكعدني بيدها صينية اكل خلتها يم راسي اكلت واني روحي لعبت وتريد تطلع ركضت للحمام استفرغت الكلتة قبل وهسة نيزك فوك راسي تلوب اخذت علاج وكتلها انزلي ماعندي شي راح اتابع مسلسل
نيزك: بس اتصلي بية لو ردتي شي.
اخذت الصينية طلعت ورها قفلت الباب وسحبت التليفون كعدت بالكاع ساندة ضهري على الحايط ماكدرت افتحة من كثر البجي البجيتة تالي جفت عيوني.
فتحتة اشوف المراسلة شخص غريب داز صورة قبس كاعد على كرسي ومخلي راسة على سدية مستشفى وايد بنية بشعرة ونص وجهها وجسمها طالع بالصورة مكتبوب جواها
وما الحب الا للحبيب الاولي.
بداية حملي بداية زواجي بعدني واشوف هيج شي كلبي والله خلص من شفتها ولحد هسة اريد استوعب ماكدر قبس خاني كل هالفترة اليسافر بيها تزوج علية شناقصني شمسويتلة شنو المامسويتلة! اريد افهم اني بشنو قصرت اتصلت بية بساعتها مارد وهسة هم رجعت اتصلت بية فتح الخط اول كلمة سمعها.
طلكني وارجعلها
قبس: شكو شبيج
شهب: طلكنيييي سمعتتت طلكني وابقى نايم يمها لا اني مرتك بعد اليوم ولا اعرفك انت انتهيت واحنا انتهيناااا تسمع.
قبل لا يحجي طبكتة بوجهة بقة يتصل شمرت التليفون بعيد عني كمت على حيلي رحت للكنتور طلعت بس ملابسي الاجيت بيهن حتى ما شايفهن واتذكرة من اشوفهن جمعت الاغراض، الاحتاجهن بجنطة صغيرة وكلشي عفتة وراي حتى ذهبي ماعايزة ولاعيني ضيكة واخذ منه.
لبست صايتي ولفيت شالي التليفون عفتة مشمور يضوي طلعت رحت لغرفة نيزك دكيتها اجاني صوت ضرغام يكول منو ماحجيت اسمعة يغلط رجعت دكيتة طلعلي انصدم من شافني فر بيدي.
ضرغام: شكو وين بهليل
اريد اختي
كلتها وشهكت ابجي طلعت نيزك دفعتة وسحبتني عيونها يردن يطلعن من شافتني مسحت وجهي ضرغام واكف يريد يسمع رفعت صوتي وكتلها
اريد اروح لبيت خالي وخلي قبس يطلكني
ضرغام: انوب تحجي بالطلاك دخيلك يا على شكو ولج
شهب: يسافر يم حبيبتة يروح واني الكم الله ياغافلين يتصل بية تالي الليل يحجيلة كلمتين يضحك علية بيهن ويروح يمها يخون بية ماريدة بعد لو روحي بية ماريدة.
حضنتني نيزك ماتعرف تحجي شي من الصدمة ضرغام اتصل بية واسمعة يغلط علية...
ضرغام: قندررة وين انت؟ اشتعلت روحك هسة تجييي
سحبت نيزك ودموعي تنزل
راح اروح وي خالي خلية يجي ياخذني
ذبت كلامها بدون وعي بدون ماترمش حتى وهي صافنة كالت.
نيزك: خالي كال لاتجني الا خطار يفشلج خالي ويردج مايتحمل مسؤوليتج خالي خاصة بعدة سراج شارد.
شهب: والله ما ابقة بعددد خاني لان ماعندي واحد يطلع وراي لان ماعندي اهل لو عندي اهل مااعافني وسافر وياها
رفعتني نيزك عنها ترجف وضرغام دخل بالحمام صوتة صار يدوي بالغرفة يخابر بية بطني موتتني عفت البجي وخفت لاينزل الطفل ويصير عندي اسقاط كعدت اجة ضرغام شايط نزل عيونة يباوعلي توسلتة بنظراتي.
ضرغام فدوه طلعني منا ماكدر ابقة
والله هذا يحلف ويتكفر مامتزوج ولا خاين وهاي السالفة
شهب: ماريدة خل يروحلها بعد.
طلعت اسحل بجنطتي ونيزك وراي سحلها ضرغام دخلها جوة يكلها ملابسج نزلت كلهم كاعدين جوة صايرة هوسة رفعو عيونهم يباوعولي مستغربين
ماحجيت شي طلعت وكلها تصيح شكو ضرغام نزل يركض وراي هم مارد عليهم مشة وراي يصيح بية.
ضرغام: وين بهليل خل يجي ونفهم هسة احجي وياة بالاول افتهمي منه منين لكفتي انتي وحدج عرفتي خاينج
وكفت كدامة اشر بيدة وبحركة احجي
ذيج صورة وياها نايم تلعب بشعرة عمت عيني عمتتتت لو باوعت بوجهة خل يبقى وياها ماررريدة
فتحت الباب وطلعت كلهن طلعن ورانة يشتمن علوم ونيزك طلعت صاح بيهن ضرغام وطبك الباب عليهن رحت امشي اشوفلي سيارة تاخذني لطم على راسي وبصوت عالي وكفت خايفة سحب جنطتي شمرها بسيارتة.
ضرغام: ولا تتفاهمن عقلجن محجررر شفتي صورةة خل نفهم شكوو منووو منين وين كبل خاني تزوج علية اصعدي هناااا وين رايحة
فتح الباب صعدت ونيزك طلعت صاح بيها بعصبية
ادخلييي جوة لاتخليني اهلهلللل بالشارع
ولااهتمت اجت فتحت الباب وصعدت يمي شغلها وهي تمسح بوجهي وضرغام يخابر بية يكلة
ضرغام: رايحين للمحكمة نرفع قضية طلاق ولك تصييح علية شعليية لا اطيح حظك يطبك مرررض اليجي من ايدة الله يزيدة.
سحبت نيزك منة التليفون وكلتلةة
نيزك: شوف لا عبالك تلعب بكيفك شفتها تايهتلك محد الها وحق الخلق الحق يا قبس ماخليك تشوف شكلها ولا تلمحة بس تطلع متزوج عليها لو رايح الوحدة غيرررهة شناقصها اختي وتسافر تعوفها مكسورة خاطر بحجة شغل والله من انعل هيج شغل لابو اليرجعها الك
سحب التليفون منها ضرغام ورجع يخابر بية
ضرغام: روح اني شعلية طلاق راح اخذهن يقدمن ادفع فلوس وغيابي تطلك ارجع من اشتعلت روحك.
نيزك: خل يفيدة السفررر لايرجع كلة اطلقها غيابي واعلمة منو هاي المستحكرها الماعدها واحد يطلع وراها والعباس يا قبس مارجعها على ضرة لو حامل بعشررر جهال منك ولو اخذها واعوف العراق كلة وما اعوفها الكككك ابو السفرررات
ضرغام: حتى الموبايل شمرتة ماطلعت مخابرة هاي كلها تصيح وانتي طلعتي لسانج شطولة سكتي اختج تردين تخبلينها بهذا الليل.
نيزك: على شنو تتخبل علمود رجال هسة تمسح دموعها وتنسة عشيرتة ازوجها لواحد عمر مايوصل لمستواة
ضرغام: تلكاها بكد الفارة ولسانها يسكت عشاير يخررط خرررط مو نسوان عدهن لسانه يخلنك تحيررر شتحجي وياااهن
طول الطريق نيزك مفرفحة تحجي على قبس وبالغلط من تغلط علية ضرغام يصيح بيها مايقبل على ابن عمة عشتو وصلنا لبيت خالي مسحت وجهي نيزك وعدلت شالي تكلي.
مو تبجين من ندخل نسوي روحنا خطار لاتبجين خيولي مايستاهل وداعتج.
هزيت راسي ونزلنا فتحولنا الجهال الباب دخلنا نجمة استقبلتنا مامصدكة من شافت وجهي شهكت خلت ايدها على حلكها سحبتها نيزك تكلها ماكو شي
نجمة؛ والله جذابات شكو شبيجن كواكب بيها شي؟
نيزك: لا والله مابيها شي لاتخافين
اخذتها بحضنها تبوس راسها ونجمة تخبلت تفرفح تكلها: حتى امير ماجايباتة والله صاير شي.
دخلت بوجهي للغرفة نزعت وتمددت بفراش نجمة غطيت حتى راسي نيزك تسلم على مرة خالي وتحجي وياها نجمة احسها يم راسي مدت ايدها من الغطا خلتها على كصتي باردة واني صخنت
تهمس يم راسي.
: والعباس كلبي وجعني شبيج هذا الاصفر وياج صخام بوجهة كون ماجذبت ذيج البنية من تكول صخام بوجهة البالي.
سحبتها نيزك طلعتها ومتاكدة كعدت تحجيلهن حالتي غمضت اذكر ايامنة مابيها شي مو حلو ماكو حتى عركة النة طايرة بالسما جنت وخاصة بعد الحمل فرحتي صارت فرحتين ليش هسة خرب الاول والتالي؟ ليش راحلها بعد ماعلقني بية وخلاني احبة؟ بعد ماتطمن كلبي وحسيت بحبة واهتمامة كسرني هيج.! شيطيب كلبي بعد كسرة والكلب مو مثل العظم يتجبر.
غفيت بين الخيبة والخذلان حسيت على بوسات على وجهي كامل وعطر نجمة دخل خشمي حضنتني تمسح على خدودي وتحجي بخفوت حتى لا اكعد...
اني ولا ارتاحيتلة هالخايس المعفن والله اكرهة وهسة يلا عرفت ليش بسيطة والله نيزك لو اجة عليها اكتلة بشحاطة خالي ولا استحي خل فقار يطردني من الشركة علمود اخوة يولون بعد اخذ شهب ونروح نشتغل بغير شركات وبالاجتماعات نكشخ وخاصة شهب البسها قاط تصير، تطك بالكاع وهناك نشوفهم ونحرك كلبة خاصة بعد ما ازوجها صاحب شركة جبيرة واخلية يموت هالعارية
نيزك: ولج اسكتي كافي شبسرعة خططتي ورسمتي للسنوات التجي.
نجمة: وابنة. حتى لو ياخذها هو مو يجيبه هنا اعلمة على سوالف توكف شعر راسة اخلية يتفل علية ويكلة بابا الاصفر
نيزك ضحكت بالكتمان واني ماتحملت ضحكت بصوت هاي نجوم عقلها يختلف عنا عدها سوالف كارثية كرصت خدي دغدغ بية.
نجمة: خيولي المعفن راح لوحدة معفنة وعلى اندمة واني اختج نجمة مو هناك بالدوام اشوفة اضل احجيلة على الخطابة الازمة الباب انتقملج منه هو ويامن اندك هذا.
نيزك: عفت نجمة تسولف وتهمبل بالحجي وذيج تضحك على سوالفها هي نجمة حتى الامة ميتة يشوفها يضحك طلعت لكيت خالي ومرتة بالصالة يسولفون كعدت يمهم.
همام: خالو ان شاءلله ماكو شي ضرغام خابرة يمي يكول ماكو هيج شي
قابل تجذب لو تخترع فلم منها هي غير البنية الرايح وياها دازتلهم صورة الهم مخليتها ماتشوف دربها همزين ماوكعت من الدرج وسقطت
كالت مرة خالي.
والله حقها بعدها صغيرة وعروس جديدة الله يساعدها اشو تخبل اليشوفها يصلي على محمد شناقصها ويروح يدور غيرها
نيزك: زلم بعد يتنفسوووون نسوان خل تفيدهم النسوان
همام: خالو مارحتي وي رجلج ماقبل تبقين هنا
واعوف اختي بهذا حالها من كل عقلة
مو ابنج هناك
ابني سبع متعود على سهلة ينام يمها هسة نايم بس هو يدور حجج
شوية واندك الباب راح خالي يفتحة طلعت وراة اشوف دخل ضرغام شايل امير على كتفة نايم.
ضرغام: هذا امير رج البيت رج بالصريخ على امة
ها ارتاحيتي كتلج تعاي وياي جلبتي هنا ولايكول عندج ابن
اخذتة منه يهز براسي سوى روحة يتثاوب مط ادية يكل لخالي: بعد طفيت صارلي يومين مانايم ماكدر ارجع للبيت خاف اكلبها
همام: روح نام وليدي بالاستقبال امشي جيبلي لرجلج فراش
دخلت جوة خليت امير بفراشي ونجمة تخابر بميس تكللها على قبس وتغلط علية
نجمة: شفتي همزين ماتزوجج همزين.
دمشي راوينة شوارع تركيا بلكت تلكين ممثلين حلوين مامتزوجين تخليني احجي وياهم وينعجبون بية حتى اسافر يمج وهناك اروحلهم نتزوج
ركعتها شهب على كصتها وميس منتهية على سوالفها: سرعة التخطيط رهيبة عندج كلشي جاهز مابيها مجال
اخذت فراش وكتلهن: نامن من وكت مو تبقن سهرانات وانتي شهب مو تبجين بعد نجوم اذا سمعتيها بجت اكتليها
نجمة: بدون ماتوصيني هسة اخليها تكوم تركص واصورها اله اكلة شوف شلون تخطت.
هزيت ايدي وطلعت خفت لاتسويها صدك هاي دخلت الاستقبال شمرت الفراش ضرغام كاعد مرتجي على مخدات ورافع حاجبة تخوصرت
ها عيني امير يبجي هو غير جايبة نايم
ضرغام: ماجاي عليج شنو ماكدر انام بس هذا الدايح خبصني الا ابات يمكم يخاف على مرتة
يخاف عليها وهيج يسوي لو مايخاف شلون
اشتعلت روحة عوفية
فرشت الفراش وسديت الضوة كتلة
يلة تصبح على خير طالعة اني
والعباس اكوم وراج واسحلج تعالي نامي يمي
اروح يم اخواتي احسن
اطلعي وشوفي.
لا اتهدد
ما اهدد بس تعالي حتى فلوس اورقلج
سديت الباب ورحت يمة
اجيت علمود الفلوس مو علمودك
ايا ب
ايا سرسري
لطمت حلكي بقيت فاتحة عيوني
اسفة ماقصد
سرسري قابل ولا هلطمة عليهن مايستاهلن
جيب فلوس اول لا اكوم
اخذي انطمر اخذي
خلة راسة بركبتي سحبت محفظتة طلعت فلوس ورقت خليتهن بصدري.
خل ينامن رغد حلال عليهن
كعدت الفجر صليت ندهت ضرغام ماعفتة الا كام صلى ورجع نام هم ناقصني رجلي مايصلي الفجر.
رحت يم البنات لكيتهن نايمات سوى وامير حاشر روحة بنجمة غطيتهم عدل ورحت للمطبخ عجنت وكعدت سويت فطاير ادري بيهن يحبنها ومثل هيج وقت جانت تطلع كواكب للشغل تنتظرني اكمل تاخذ وتمشي تلطع كل يوم اكعد اسويلها ريوك واطلع وراها اوصيها.
كعد خالي لكة الريوك جاهز والجاي مخدر صبيتلة ياكل ويمدح بية كال.
طلبت اجازة اليوم علمود اختج بس هم كعدت من الصبح متعود بعد
مايحتاج تطلب اجازة جان داومت.
والله اخاف لا يجي واحد وانتن وحدجن
سكتت عفتة يتريك شوية كعدو كلهم نجمة ماتريد تروح للدوام رزلتها يلا راحت تريد تشوف قبس وتتعارك وياة طلعت ادردم وشهب سوت روحها نايمة اخذت ريوك لضرغام من كعد واكلت شوية وياة.
شنو ماتروح للشغل اليوم؟
لا ابقة هنا من ترحن اروح
منو كالك نرجع
خزرني ياكل
نيزك: شهب ماترجع
عود خوش هنا الكعدة حلوة.
اجة خالي عفتهم يسولفون ريكت شهب وامير جاي اغسل بالمواعين واندك الباب بقوة راح خالي فتحة والتفتت على شهب من سمعت صوت قبس.
شهب: ركضت للغرفة ماريد اشوفة ولا اسمع صوتة بعد اليوم قفلت الباب علية وكعدت مخلية ادية على اذاناتي ماكو دقايق ودكت نيزك الباب
اطلعي يريد يحجي وياج
كليلة خل يرجع ماريد احجي وياة
مو خبصنا بس اسمعية
انخفضت انفاسي من سمعت صوتة ورة الباب يكلي: افتحي الباب اشوفج بس احجي وياج.
ماريد احجي وياك اسكت ولا اريد اسمع صوتك بعد ارجعلها لاتجيني اني غصب صرت عليك روح اتهنى وياها.
شهكت ودموعي نزلت دك الباب بقوة يحجي يريد افتحة كمت دورت بالجرارات لكيت هتفون نجمة وموبايل الجهال مشمور خليت الهتفون باذني وشغلت التليفون بعالي صوتة كمت ما اسمع شي اختفى صوتة تمددت بمكاني والباب يندفر غمضت وكل شوية افتح عيوني خاف انكسر الباب تفاجات من شفت الساعة 11 شبسرعة وشلون ماحسيت وخرت الهتفون من اذني كمت خليت اذني على الباب ماسمعت صوت فتحتة على كيف طلعت راسي شفت نيزك من بعيد تشتغل يمكن تطبخ شافتني ذبت البيدها غسلت واجتني صايرة اعصاب.
شبيج طيرتي كلوبنا البيت هجمة هجم علينة بالصياح وانتي ماكو الباب راد ينكسر غير تحجين غير يطلع صوتج اخرستي
احسن
نتوسل بيج بس اطلعي خالي اني مرة خالي مايتفاهم خلانا بقلق نفسي سوت شي بروحها كتلة مو انت يوسرزيف يريد بس يضربني ماجذبت نجمة من تحجي علية وتكرهة
هسة وين راح؟
ذاك بالشارع كاعد بسيارتة ضرغام طلع وعافة حارس يكلي
شكو مايروح لبيتة المن رجع
خاف ولد نعال يجون من يسمعون بية وهو سوبر مان صاير.
راحت تكمل شغلها طلعت فواكة كعدت اكل شوية طلعت بالكراج بقيت احوس اريد اشوف شلون شكلة بيدي كشر موزة ماشمرتة شفت خالي جوة فتحت الباب على كيف مديت عيوني ماشفتة طلعت راسي شفتة مخلي راسة على الاستيرن عبالي كاعد بس من رفع راسة يلا تاكدت كاعد راد ينزل من بعيد شمرت علية الكشر وطبكت الباب سلقيتة وهو يدك بية بقوة عطرة ويصيح
افتحي البااااب.
ما افتحة روح منا ماريدك بعد روح سافر ما اموت وراك اتزوج واتزوج اني مدير شركة نجمة تعرفني علية
شهكت من تحرك الباب وطفر من فوك مشيت خطوتين لزمني وخالي يصيح بية.
قبس: شسويلها يعني بس احاجيها وارجعها الك
روح جيبلي صايتها
سحبت روحي منه مجلب بية ماكدرت اخلص روحي استنجدت بخالي يطلعني بس سوى العكس جاب صايتي وشالي انطاهن اله يلبسني واني اسحب بروحي من شفت نيزك بجيت وهي لازمة الجفجير اجت تصيح بية بعرك...
الطفل نازل لا تصخم وجهك وتسوي بيها كارثة تحجي وياها بتفاهم لاتصيح بوجها حامل ماتتحمل همجية جنك مخبل احنا تحمالناك هي ماتتحمل
ولاكانة سمع اخذني غصب عني صعدني بالسيارة قفل بوبها وشغل باوعت لشعرة لو انجنيت ملخت ايدة وراسة وهو يسوق واني ابجي واضرب بية
روحلها روح تلعب بشعررررك الخاااايس المعفن بعد ماريدك
فتح عيونة على وسعهن خفت من منظرة سكتت وهو مصدوم يحجي: اني معفن! خايس انيي يمتهااا.
روح الخاين معفن وخايس وانت خاااين
حزت روحي منك
ولا يخلون الواحد ياكل نعل ويحجي
طبك السيارة بنص الشارع ضرب على راسة بقوة خنست من شفتة هيج درت وجهي عنة امسح بعيوني دارني بقوة من زندي.
باوعيلي احجي وياج باوعيلي
اباوعلك على شنو؟ تحجي على شنو؟ لا مااحاجيك ولامنعت من السفر وحتى ماكتلك اخذني وياك هيج سويت تخون بية واني روحي مفرفحة عليك نساااوة اتنسى عليك
كلت هاي ماتحاجيني مو شفتني فقيرة كول؟
مسحت عيوني سحبني وخرت ايدة ذب نفس بهدوء يحجي عكس النار الشابة بية.
قبس: بالقرآن وبلانجيل بالتوراة بكل الكتب والمقدسات احلفلج مارحت حتى اخونج لو اتزوج عليج ماكو مرة بحياتي غيرج بشنو احلفلج وتصدكين؟
مايحتاج تحلفلي الصورة اكبر دليل نايم يمها تلعب بشعرك وانت يمها
مسح وجهة واني باوعلة بحقد وخذلان سكتت انتظرة يحجي كال.
قبس: اني اكلج رحت اسافر على شنو لاتفهمين غلط وبحررررف ماجذب اني ماخاف ولا اجذب اكلج الصدق بنية.
كطعت كلامة اهز براسي
بنية كلت عدها اسم شسمها كول اسمها
زها
بالعافية عليكم حبكم الاول وصدك لو كالت وما الحب الا للحبيب الاولي اني قنااادر بيش الكيلو
هاي صديقتها عبالج ماعرفت والقرآن عرفت هي اخذت تليفوني اتصلت بية وماخذة رقمج حتى تخربج علية هي زهاااا مواتة بيها سرطان ايامها انعدت ورادت تشوفني تحجيلي الحقيقة.
رفضتك مو لان ماتحبك رفضتك لان مريضة وخاف قبل كرهتها هسة رجعت مشاعرك تجاهة وهي بعدها تحبك اني طرف ثالث رجعت
قبس: مووواتة مووواتة اليشوفها يبجي على حالها ياا حب يا زووواج
نزلنييييي اطلع مارريد تحجي بيها ماريد اسمع باسمها ولا اريدك تبررلي خيانتك خليتني مثل العمية من البداية ما كلتلي لو كايلي تفهمتك بس هسة ما افهم الا البراسي.
مو بكيييفج هذا الصار بقيت يمها امها خلصت فلوسها ماعدهم احد اعوووفها وهي مووواتة منوو اليشيل جثتها منو اليوكف بدفنتها لو ماتت
جذاب ماتموت والله تعيش نزلني
دار شغل السيارة بكل سرعتها لزمت بطني وصار كل همي ابني حجيت وياة بهدوء لان عقلة قفل
قبس ابني نازل لا اسقط على كيفك
خفف سرعة بس هم سريعة طبك كبال بيتهم بجيت وجلبت بمكاني نزل فتحلي الباب سحبني واني ابجي.
ماريد ارجع وياك اريد خالي.
ماهمة رفضي ولا دموعي اخذني يسحل بية ومن حسيت ماكو مهرب مسحت دموعي خفت يتشمتن بية ذني الحياية صدك كلهن يباوعلنا صعدت بارادتي دخلت غرفتي ردت افقلها دخل ماكدرت رحت للحمام سبقني سحبني اخذني كعدني على الجرباية صار كدامي.
لاتباوعيلي هيج كتلج كلشي
كتلك مايهمني روح ابجي عليها واتذكر ايامكم سوى كلها لو كايتلي جان ماعفتج اعالجج ماعوفج روح يلة لا تبقة كدامي.
ررررااااح تخبلينييييييي ماااااكو هيييييج شيييي بنية مرررريضة مررررريضة انتهت قصتي ويااااها من سنين
رجعت ليورة خفت لايضربني والباب اندك يصيحون علية طلع وقفل الباب بعد ما اجة نمت وما الوم نيزك من تنام تنسى كعدت سبحت بدلت وتعطرت حتى مكياج خليت اكتل روحي وابقى ابجي علية اكيد لا.
كعدت كدام الثلاجة طلعت الحلويات اكل بيهن انفتح الباب شفتة درت وجهي سويت روحي ماشفتة قفل الباب كملت اكلي دخل للحمام طلع يبدل خلص كعد يمي سحب راسي وباس ركبتي بقوة جمدت مامتوقعة طول بالبوسة وخرت منه رجع سحبني يبوس بوجهي عشوائي مغمض عيونة
ويحجي بهمس.
هسة ردت روحي وحق المقدسات
ما اصدكك بعد لو تنكلب
لا تصدكيني بس لاتبتعدين عني.
لا تصدك ابقى وياك وتخوني تحلم
ماجاي اخونج نجمة لو صار بيها شي تعوفينها؟
اسم الله على اختي لاتجيب طاريها
تعوفينها جاوبي؟
بس هي مو اختك حبيبتك هي
من بعد ماتزوجتج صارت كل البنات اخواتي وتبقى بينة مواقف وملح وزاد شلون اعوفهن وحدهن هيج
لاتكعد تبررلي
دفعتة مني ماطايقة يحجي بالموضوع دك تليفون سحبة وفتحتة اجة صوت مرة جبيرة تكلة.
ها قبس وصلت الحمدلله على سلامتك
وصلت
زها سالت عليك كلتلها رجع
شعوط كلبي من اخذت التليفون من امها تخابر بية بصوت تعبان: شلونك قبس
االحمدلله.
كالها وباوعلي مديت راسي وياة بالتليفون الفضول كتلني سكتت من شفت ملامحها والمرض مامخلي لاحاجب لارمش شعرها لافتلها ربطة علية بس رغم هذا حلوة وملامحة هادئة شافتني عيونها لزكت بية.
هلو شلونج اني زوجة قبس اعرفج عن نفسي
زها: هلو حبيبتي واني اسفة بدال صديقتي صورت ودزت بدون علمي الله يشهد ماردت اسوي بينكم مشاكل واني بهذا حالي وضعي قبس رجال ونعم منة وكف ويانة بالغربة وماخلانة نحتاج شي الله يحفظكم لبعض.
همست امين وبعدت منة كمت بسرعة ختم الاتصال وكام وراي سحبني ودموعي ينزلن.
قبس: كبرتيها وهي صغيرة
انت كبرتها ماحجيتلي شي تروح وترجع ماكلتلي
غلطت اعتذر المفروض اكلج بعد شنو حتى تفض
ماتروحلها بعد ولا تتواصل وياها خل اخوك لو ضرغام نيزك تقنعة بدالك اذا كلش كلش يحتاجن يروحولهن
صار.
مر اليوم قبس بس يراضي ويقنع وكلبي مامرتاح ولايصعد وكل ما اباوع بالصورة اشتعل نار كال مثل اخوها وهي تلعب بشعرة! من شاف التليفون اكلب بية مسح الصورة وهم ضلت بالي...
نزلت جوة اكو بنية جايتنة ونيزك كلتلي اخت دعاء تباوعلي تخزر خزر بحيث رحت وهي عيونها وراي دخلت للمطبخ شفتها اجت رادت تحجي ودعاء سحبتها دخلتها جوة استغربت شبيهن وخاصة دعاء ابد مامرتاحة.
اكلت وصعدت نيزك هي واسيل جر وعر صايرة نجمة سووى سفرة الشرمة وراحت وياهم خابرتنا تبلغنا، صعب اذا اكول رجع كلشي لمكانة وبعد الصار ماتوقع راح يرجع كلشي مثل ماجان.
كعدت من النوم بين ماغسلت لكيت ورقة على الميز سحبتها رجفت حركة من قريتة كاتب.
قبس: سافرت اني زها حالتها خطرة ماكدرت اعوفها امها توسلتني ارجعلها
اتصلت بية ابجي واناشغ فتح الخط بسرعة
بكلب شايط دعيت من كل كلبي.
كون الله يحرگ كلبك مثل ماحركت گلبي.
ماجنت متوقعة هاي الدعوة راح تستجاب بسرعة
لو ادري مادعيت.