رواية المنجمة للكاتبة كفاية كاظم الفصل الرابع
متوترة
لا تبينين نجووووم لججج امشيي بدلي ترحين بذني ملابسج؟
نجمة: جيبي جيبي انتي بس ترزلين
اخذت منها الملابس ودخلت ابدل كملت بسرعة وطلعتلها توسعت عيونها وخلت ايدها على فمها تضحك منبهرة.
ميس: لجج اااالله شنو هذا الجمااال نجوووووم
والله
ياااا ولج امشيي شوفي نفسج بالمرراية تملخيييين.
ضحكت على حماسها ووصفها رحت اشوف نفسي بالمراية جنت لابسة سترة سودة وياها تنورة بنفس اللون وكلشي وي اللبسة اسود ماكسرتة بغير الكعب والجنطة بلون ماروني ضحكت بخبال اضم ضحكتي العالية.
نجمة: وولج ميسسس هااي منووو؟
تخبلين وولج نجووم انغرمتتت اني
حتى اني انغرمت بروحي يماااي احس نفسي مو اني هاي غير وحدة
انجبي هو انتي تخبلين بس ينرادلج تعديلات شويونة هييج نتفة.
نجمة: اكلج شو احس صرت مثل فريحة من تاخذ ملابس من صاحبتها وتروح للدوام اني اخذ منج واروح للشركة
ميس: اي وبعدين تحبين حبيبي ونتخارب هههههههاااي
امداج اي والله هسة اني ما لكيت غير حبيبج المعفن
هم صح ولج قلة زلم
اكلج ميوسة راح ارجع البسي القديم احس احسن
تقربت علية تسحبني من سترتي تجاهة.
ميس: بعد لاتحسين لا امسح الحمامات بحساسج الخايسس خوشش؟ اني كتلج تغيرين لبسج لان داخلين شركة وجدد الكل راح تصير عينهم علينة فردتج تطلعين اجملنا واحلانا وغصباً عليج تاخذين الملابس الجبتهن الج تداومين بيهن
ميسس
ها عيني هااا نجووم ولج هي فترة نتدرب يمهم ونولي على كولت اختج كواكب
نجمة: ههههههه ذكرتيني بيهااا ااالله
ارريد اشووفها خووش
خووش بس امشينا لا انجلط شنو هاي احس مو اني.
لبستلها قاط عبالها السيدة الاولى
هسة السيدة الاولى احسن منيي؟
بعدنا بسم الله وهيج صرتي
طلعنا وميس تدردم طول الطريق اما اني متوترة وخااايفة مكان جديد وهذا القاط الابستة مامرتاحة بية اول مرة البس رسمي ميس الغبية الا تلبسني كعبب واني هيج ماعرف امشي!
وصلنا للشركة اليوم اول يوم النة نتدرب لازمة ايد ميس وين ماتروح اني وياها ميس مو اول مرة تجي لهاي الشركة جاية قبل وي ابوها وهسة اجت لهنا بغاية صديقتي واعرفها اجت تشوف المعفن الاجلح الوصخ الخايس حسب كلامها الشركة لصديق ابوها بمكالمة وحدة رحبوو وهلو بينا حسيت نفسي فد شخصيية.
ميس: وولج نجووم زعطوطة انتي زعطوطة شبيج لاطشة بية
شبيج ميوسة شبييج.
ولج فشلتينة عبالك طفلة وين الكارزما وين المشية العلمتج عليها وولج شعلمتج ااني
اكتاف مستقيمة، راس مرفوع، خطوات ثابتة، ملامح جامدة، نظراتي اوزعها على الكل بحدة
ميس: عفية وانتي جنج جريذي عوزج بس تبجين يكول اول يوم الها بالروضة مو بالشركة
هاي ليش تحجين هيج علية ترة من دخلت روضة ابوي جان وياي هسة تذكرتة وراح ابجي
وكفت مبرطمة شفايفي الدمعة بطرف عيني تذكرت ابوي وصدك راح ابجي الف رحمة ونور لروحك يابة.
حضنتني ميس بسرعة تمسح على ضهري ومثل كل مرة تكلي.
ميس: لاتبيجين نجوم ابوج مايقبل تبجي هاي العيون الحلوة يوووو ولج مو وكتها شوفي بس نخلص دوام اخذج تبجين ها شدكولين؟
موافقة
هزيت راسي وابتسمت وهي كذالك تبادلني الابتسامة صعدنا مصعد وميس تنثر بشعرها وتعدل بحمرتها على المراية.
نجمة: وين صاعدين؟
ميس: لغرفة استاذ حسن يوزعنا لافرع.
تنهدت بقهر ورحت وراها لاگونا مجموعة من الاشخاص منتظرين برا غرفة الاستاذ حسن ماعرف متدربين مثلنا لو يقدمون على تعيين عبرتهم ميس وراحت للغرفة دگت الباب سمحلولها بالدخول واني صرت ارجف سحبتني من ايدي خازرتني تتوعدلي شسوي خايفة ماعرف مشاعري شنو غير لازم اتعود يلا اتصرف طبيعي! دخلت گلبي يريد يطلع هاي اني شبببية راح اموت سلمت علية ميس رد ااسلام بحرارة فرح بشوفتها تبادلو الحديث بسرعة اندمجو يسال على ابوها وامها للمعلومة ابو ميس صاحب شركة بس مو مثل مجالنا، هما يسولفون مثل واني الاطرش بالزفه بس اباوع بعيوني من تحجي ميس اباوعلها ومن يحجي الاستاذ اركز وياة وهيج خلصتها لو ماهو كال بابتسامة مريحة.
حسن: ماعرفتينا ميوسة على الطيفة الوياج
ميس: نجوم صديقتي
حسن: يا اهلا وسهلا بيكم بنات نورتونا
ابتسمت وجهي احسة صخن.
ميس: استاذ بس نجوم ماتعرف شي هنا ياريت توصي عليها يدلونها
حسن: تدلل نجوم
رمشت بعيوني ممتنة وميس تعصر باصابعي تحس بتوتري متوترة مو بس لان اول يوم اداوم لا هم لان مامبلغة احد غير نيزك وهي كالتلي لاتكلين لعمي لان مراح يقبل هو دراسة وكوة باقية لهذا السبب متوترة اول مرة اخطي خطوة بدون علمهم.
طلعنا وكل وحدة راحت لمكان والسبب كل وحدة اختارت المجال التحس نفسها تبدع بية دكيت روحي الا سوة بس ميس ماقبلت وحتى من تنازلت اروح وياها منعتني وكالت ما راح تنجحين بية اختاري المكان اليناسبج وهاي اول مرة امشي بدونها اني حتى القسم دخلتة علمودها لان هي صديقتي من الاعدادية ومتعلقة بيها.
وكفت كدام المصعد لازمة جنطتي بقووة اعصر بيها مامنتبهة لنفسي انمدت ايد كدامي تدوس زر المصعد التفتت بسرعة اشوف شخص لابس رسمي وعطرة يهفهف ابتسم بوجهي واني عيوني مدمعة من التوتر درت وجهي على المصعد من انفتح بقيت واكفة دخل هو واني مثل التمثال بقيت على وكفتي كال.
راح يصعد ماتصعدين؟
هاا
تعالي بسرعة.
راد ينسد واني رحت اركض يمة گلبي يدك بسرعة شنو هذا الثول الصابني مشة المصعد بينة واني بعدني ماخذة وضعية التمثال.
موظفة جديدة؟
ها استاذ شنو؟
حك طرف لحيتة وابتسم رجع كال
اكيد اول يوم الج دوام
اي والله استاذ هستوني اجيت اني حتى ماعرف شي هنا
تتعلمين كلها هيج بالبداية مايحتاج كل هذا التوتر
صح استاذ بس اني هاي صديقتي ميس العوبة عافتني ولايكول هي الجابتني هنا.
برطمت شفتي ودموعي انجمعن بعيني لا نجوم لا فدوة لا تبجين والله لو ميس تعرف بيج هيج مسوية الا تسحلني سحل.
انتي صديقة ميس؟
اي ميس الجلبة حتى الجلب احسن منها على الاقل وفي بعدنا بسم الله وعافتني وحدي
ميخالف تتعودين
انفتح المصعد مد ايدة ياشرلي على الخروجية
السيدات اولاً
منو كال؟ لا السيدين اولاً انزل استاذ انزل مايصير انت صعدت بالبداية تنزل اول واحد
السيدين neas.
ابتسم وطلع كدامي السيدين شنو السيدين هاي اني شكلتت يبووو عليج نجوم شبيج حتى حجي ماتعرفين تحجين بقيت بالمصعد حاشرة روحي بالزاوية رجعلي كال: -انزلي بابا راح ينزل
توسعت عيوني بخوف ونزلت بسرعة شبية اليوم ااااني!؟ مشة كدامي واني امشي وراة على كيف التفت علية ابتسمت بتوتر واحس وجهي نار كال.
وين كلولج ترحين
لاستاذ فقار كلولي هو يدربج راح تشتغلين وياة حباب دليني بية
ابتسم وكال
امشي وياي.
هزيت راسي امشي وراة خفف خطواتة صرت بصفة كال: لاتمشين وراي امشي بصفي
ليش استاذ؟
ممكن ان نصير اصدقاء
بادلتة الابتسامة ومشيت وياة لاكوة ثنين شباب سلمو علية رد عليهم.
خفة هالوجوة بس المشاكل من وراكم
هاااي شبيك حبيبي الغالي
باوعت بوجوهم وانبهتت ملامحي وهما كذلك انصدمو بشوفتي مثل ما اني انصدمت بشوفتهم
قبس: اااانتي؟
اانتم؟
سمار: انلاصتتتت يالكعبة
قاطعنا الاستاذ يسالهم ويباوعلي
منين تعرفونها؟
صارو واحد يباوع بوجهة الثاني حايرين شيكولون سكتو يفكرون بجذبة واني خازرتهم باوع بوجهي الاستاذ يريد جواب راساً كتلة واني اشر عليهم.
خطفوني ذولة استاذ عصابات شيسوون هنا
علامات الصدمة والاستفهام تضاعفت على وجهة صاح
شنوووو ولكممم
سمار: بس خل افهمك كول يا الله
سمار انجب انتتت امشوو كدااامي للغرفة.
الموظفين مرو يباوعون علينة والاستاذ تغير شكلة من الطافة للعصبية ولايكول هو نفسة ذاك اللطيف مشو كدامة للغرفة يحجون بينهم وقبس يخزر بية كبور حتى كبور لهيج عيون عيبت علية بوجهي وهو صاح بية.
قبس: هااااا
نجمة: هااااااا
سمار: ولك انجب شبيك ماتشوف ملك الموت محاوطنة.
دخلنا كلنة لغرفة الاستاذ واني اطكطك من الخوف تلث رياجيل واني وياهم وحدنا هو اني هيج ارجف الاستاذ زين حباب بس هذا قبس وسنار يعععع شلون ثنين كتف الاستاذ ادية منطي ظهرة للباب واحنا كدامة نتر بيهم.
احجووو يلة نسمع شنو خطفتو البنية
سمار: اني احجيلك السالفة
انت انجب الشفية يحجي
قبس: وهو شكوو حتى احجي شنوو صاااير سالفة وفضت كلها سوء فهم.
نجمة: استاذ جذابين والله خطفوني بسيارتهم حتى جنت جاية من الدوام خنكوني خنك ردت اموت بيد هذا قبس الاشكر
خزرني بعيونة يمة يخووف والله نظرتة حااادة ترعب سكتت والاستاذ خزرهم يكلي كملي
نجمة: اي استاذ والله اني ماعرفهم بس هما علمود الفلوس عليك الله استاذ اكو واحد صاحي ينسة بالسيارة جنطة دولارات فلوس؟
سمار: شعجب ماكلتي الاثول
نجمة: نفس الشي يبقة اثوول
قبس: ووولججج شلووون اعلگج باب الشررركة.
صاح بية الاستاذ خازرة سكت ولا صوت مبين يخاف منه وحتى اني خفت منة مسح وجهة وحجة بصوت هادئ يسالني.
خو ما سوولج شي؟
خنكوني و...
سمار: اني مالي غرض هذا قبس خنكج حتى تذكرين اني مقبلت ورزلتة ها؟
اي صح استاذ هذا حباب لو ماهو جان قبس كتلني
قبس: سفاااح قبسس يكتل بالرايح والجاي اااخ منج اااخ
الاستاذ: انجب خليها تكمل.
سمار: يابة سوء فهم هو عاف الجنطة بالباص لان جماعة الكلب ملاحگينة فاظطر يعوفها وينزل حتى اذا انلزم الفلوس مو عندة وهي ماخذتها عبالها ناسيها نزل هو وضيعهم منه الحلوة ضالة واكفة بالشارع عبالها يجي وياخذها بس جماعة الكلب شافوها وعرفو الجنطة لكفوها منها وقبس عبالة وياهم لو هي منطيتها الهم وبس تاكدت من السالفة عفنة البنية اني بالاساس ماردت ناخذها المهم هاي السالفة من الالف للياء يلة ابو الشباب خلينة نولي ورانا اشغال.
الاستاذ: وراكم انعال
اسمر: همزين محد ورانا
الاستاذ: اني اعتذر نيابة عنهم
لا عادي استاذ مايحتاج
خزرني قبس وطلع هو وسمار بقة بس الاستاذ اندار كعد بمكتبة يتأفاف واني بقيت على وكفتي.
نجمة: استاذ مو كلت اني اخذج لاستاذ فقار
ابتسم واشرلي على العلامة الكزاز على الميز مخليها مكتوب بخط واضح مدير القسم فقار الليث
توسعت عيوني وكبرت ابتسامي كلت بفرحة.
نجمة: هاااي انتت الاستااااذ ياااا شووف شلوون
فقار: شفتي.
ليش ماكلتي انت نفسك الاستاذ فقار
مفاجأة
ههههه حلو هاي استاذ صدك فاجأتني هههه
ماعرفتينة؟
نجوم
تشرفنا نجوم
لا لاا نجمة مو نجووم اسمي
ان كنتِ نجمة واحدة فالسماء ما اجملها ببساطتها وان كنتِ نجوم فلا يوجد اجمل من السماء بزينتها
تفضلي بكل الاحوال النجوم تزين المكان.
اشرلي على الكراسي كعدت مخلية جنطتي بحظني فد متوترررة احس وجهي نااار صاير جاب علبة ضيافة مخليها كدامة قدمها إلى فتحها ابتسمت منذهلة من منظر الشكولاتة يجننن.
ااالله شنو هاي استاذ فدوووة تخبببل تخبببل
تفضلي
اخذت وحدة خليتها بيدي اباوعلها مغلفة وبيها فيكونة شكلها يخليك تكزكز عليها...
فقار: اكليها لاتبقين تباوعين عليها
لا بعدين مو هسة استحي.
لا تستحين عادي باجر عكبة تطلعين وي رجال اعمال تكعدون على نفس طاولة الاكل عادي
يممة استحي
ضحك يعكمش عيونة خليتها بيدي بعد مالح جاب لابتوب وبطل مي وعصير من البراد خلاهن كدامي وصار يشرحلي الشغل بكل رسمية وهدوء الشي الما افتهمة يعيدة إلى مرة ومرتين وتلاثة الى ان افهمة دفتري بيدي وكلشي يحجية اكتبة وراة سد الحاسبة ورجع ركبتة ليورة.
نجمة: اكول استاذ ليش ماكو طلاب
فقار: منو كال احنا ندرب طلاب؟
هاا يعني ماتدربون
لا بس انتو
ليش
حالات نادرة
قصدك واسطات قوية
هز راسة يأيدني كمت من مكاني احس تكسرت اجت بنية اخذتني وياها تخليني اطبق الشرحة الاستاذ.
شنو اسمج يحلوة
نجوم اقصد نجمة نجمة
فدوه ضاوية اسم على مسمى اني اسمي روان
حبيبتي عاشت الاسامي تشرفت بمعرفتج
رحت وياها لمكتبهن جانن اربع بنات كل وحدة ب مكتبها سلمت عليهن وروان عرفتهن علية وعرفتني عليهن دنيا، مارينا، غادة، طيبة بقيت ساكتة وهنا يسالن.
موظفة جديدة؟
روان: لا جاية تدرب
قصدج تتدرب وتتعيين
سكتت روان ما جاوبتها وسحبتني وياها تعلمني كل ما ارفع راسي اشوفهن يخزرن بية ويضحكن لو يحجن باللغاز ماهتميت الهن لان شغلي مو وياهن بقيت وي روان انصاع لتعليماتها من طبقت كلشي كتبت ملاحظات بالدفتر كالت خلي استاذ فقار يقراهن.
طلعت لغرفة استاذ فقار بس تيهتها خرب بالحظ انوب كل البيبان نفس اللون حسبت من واحد للعشرة والباب الصارت علية العشرة رحتلة لان مامعقولة كل الغرف ادك بوبها واشوف بيها استاذ فقار لو لا.
دكيت الباب ودخلت مالكيت احد دخلت ادور بعيوني وين راح هذا شو هاي الغرفة تختلف لو شلون.
يممممممممااااااا
قبس: وسم
كلبي يدك بقوووة همزين مامتت من الخرعة طلع كدامي فجاة الله ياخذة طلع روحي.
شتسوين هنا
اجيت لغرفة استاذ فقار.
احسبي حسابج يومين ماتبقين بالشركة مطرودة
مو هي شركة الخلفوك حتى تطردني منها
بالضبط شركة الخلفوني هاي واستاذ فقار اخوي واني من الله ما ارتاحلج وشوفتج تكأبني واني رجال ماحب الكأبه فاسويلج باي
كبرر حتى كبر اليكبرك ماعندك حيا حظوري
عبرتة وكلت هالكلام صاح وراي: ام السان اني اعلمج انتييي مطرودة منااا قليلة الادب
اذا اني قليلة الادب انت مامر عليك مصطلح الادب ولا تعرفة.
طلعت من الغرفة اركض شفت استاذ فقار يدخل لغرفتة ركضت ادخل وراة.
شبيج نجوم
حجيت واني الهث
استاذ تيهت غرفتك ودخلت لغرفة قبز مدري شسمة
استاذ طردني من الشركه ترضاها؟ يكلي هاي شركة الخلفوني وانتي مطرودة وهاي اني مامسويتلة شي والله
فقار: يولي لاتحجين وياه ماعندة اسلوب
استاذ هذا قليل ادب ويتجاوز
اني احاجية لا تهتمين
اي عفية استاذ بس انت حباب
انطيتة الدفتر قرا الملاحظات وابتسم
جيد نجوم
اي استاذ استاذ
ها بابا.
رفع عيونة بوجهي واني اشرت على العلبة اكلة
استاذ عادي اخذ وحدة ثانيية لابن اختي ذيج نسيتها واكلتها عود بقيتها الة
كدامج هي وصاحبها
تسلم استاذ
اخذت وحدة خرب روحج نجوم شبسرعة شمرتي ميانة وي الرجال كبر حتى كبر هسة يكول هاي ملطلطة ماماكلة شكولاتة ولا مرة امداني افشل والله.
اخذي نجوم بعد
ها يعني عادي مو عيب
لا مو عيب
هاي وحدة لاموري وحدة لنيزك وحدة لشهب كواكب من تجي اخذلها وحدة شكراً استاذ والله انت حباب.
ابتسم يعض بشفتة سويتلة باي بيدي وطلعت اخليهن بجنطتي مشيت بنفس الاتجاة الاجيت منه بوجهي صار المصعد دست الزر وكفت انتظر شوكت يفتح.
مو خوش صدفة جانت
التفتت على مصدر الصوت رفعت حاجبي وهو وكف بصفي على وجهة ابتسامة.
سمار: اسف نجوم اعرف الصار مو حلو بحق بنية بس بعد صار
نجمة: شعجب تعترف بالخطا؟ وتعتذر هم!
سمار: سمار ملك الجمال يترجة تسامحينة
طبك ادية سوى وخلاهن كدام وجهة ابتسمت وهو كال بتوسل كاذب.
سلطان: كرمال الغدير سامحيني
يلا لاتبجي مسامحتك بس صدك شكلك اتابع هنود؟
انتي صدك تحجين؟ اكو واحد يتابع هنود
اي هاي نسوان عمي افنان وصبيحة يتابعن بكل وقت حتى من ياخذون بركات من البقرة و.
كطعت كلامي من حسيت على نفسي شنو جاي احجي واخربط واخيط ااااني راح احجي قصة حياتنا اله همزين انفتح المصعد دخلت كبل وهو هم دخل.
ماكملتي سالفتج وصلتي لحد البقرة
هيج بعد لاتحاجيني
ممكن اعرف ليش؟
لان بسرعة احجي كلشي حتى قصة حياتي
حلووو جوي واجوائي
سكتت انزل راسي وما ارد علية مبين هذا يحب السوالف وروحة مرحة احسن من قبز المقبز ووويع عاكد حاجبة محد عاجبة الاجرب.
انفتح المصعد وطلعت امشي بسرعة ذبيت نفس عالي وركضت من شفتها بس شافتني كامت تلطم بالسكتة وتصيح بخفوت.
ميس: ووولج اثگلي اثگلي الثكل حلووو
اووي هسة شنو سويت
هااي مشية نجوم هاي مشية عود هاي علمتج على الاتكيت لو مامعلمتج شلون؟
خاب دطيري انتي والاتمتيك والهيك
اتكيييت اتكيييت
هلااا بالحتيتتت
التفتنا ثنينا نشوف سمار واكف ورانا گلبت عيونها ميس وكالت برود: -هلا
سمار: اشكول شكول فوك ما اسلم عليج هسة
ميس: ما عاتبة عليك وحتى سلامك ما اريدة
سمار: دولي هسة على جمالج دباعي الگمر الوياج واتعلمي منه
گلب عيونة وراح
اكلج وين تعرفينة هذا؟
ميس: اعرفهم كلهم كتلج اني جاية هنا هواي
اي بس هو حباب ليش هيج وياة.
ما اطيقة وانتي هم لاتختلطين وتتعمقين وياهم شلون طلاب قسمنا هيج عامليهم
هو اني فترة واروح شعندي وياهم قابل
سحبتني من ايدي واخذتني للكافتريا كالبة وجههة ماعاجبها شي تمشي وتذمر بينها وبين نفسها.
نجمة: هسة احجي بصوت خل اسمع وياج
ميس: امشي وابقي ساكتة ترة روحي بخشمي واصلة
هسه انتي وين ماخذتنا
نتسمم ماتشوفينها كافتريا.
كعدنا على الطاولة اباوعلها تكلب بالمنيو درت عيوني اباوع بالكافتريا وابتسمت لا ارادي من شفت استاذ فقار دخل وياة شخص واضح من مستواة طويل جسمة رياضي متوازن بشرتة قمحية مايلة للابيض عيونة ملونة اصغر من استاذ فقار بالعمر يسولفون مندمجين سوى من انتبهلي استاذ فقار ابتسملي راساً درت وجهي عنة وهما كعدو بصف طاولتنة كلش لان الباقيات مليانة.
ماصار اكل هسة اطلبي اي شي حتى لو فلافل.
ميس: فلافل نجوم فلافل! ولج هذا الاستايل كلة ناكل فلافل! بشركة احنة ترة وشركة اهلية!
عود انتي مثقفة؟ هو اكل شعلية بالاستايل ديلا خل ناكل هوى على هاي سالفتج
طلبت طلبت لا تفضحينا ام بطن
بقينة ننتظر الاكل وميس عدلت شعرها وكامت كالت
هسة اجي بس اسلم.
عبرتني وراحت للطاولة البصفنة البيها استاذ فقار والوياة سلمت عليهم مبين تعرفهم ثنينهم تبادلو الحديث واني باقية بمكاني مخلية ايدي على خدي انتظرها شوكت تخلص عود هاي بدايتها ولعبت روحي شلون لو تعينت ملل تعب الجو مدري شلونة الموضفين مدري شلونهم اني مدري شلوني.
تف لاهلا ولا مرحبا
اجت كعدت بمكانها عابسة ملامحها
هم اجة لاهلا
منو؟
التفتتت اشوف سمار اجة وكعد وياهم عرفت هسة ليش ضاجت الانسة.
ترة حباب هذا الغثة الحقيقي
قبس؟
اي قبز عيييع
انجبي لاتحجين علية
شنو محامية الدافع عنة بكيفي احجي علية
اممم
ترة هو الخطفني؟ شفتة وانصدمت
اكو سبب هما مو عصابة
اي عرفت السبب
عوفج منهم يغثون غث شايف نفسة شوفة
نجمة: صح مغرور كلشش وحموضة
اتفق وبشدة
وصل الاكل وبلشنا ناكل ميس ساكتة بس عيونها عليهم ابد ما نزلتها.
اكلج ميوسة هما شنو اصدقاء ذولة
لا قبس وفقار اخوان وهذا الحلو ابن عمهم اجة جديد
وسمار صديق قبس
امم.
سكتت واني نسيتها ونسيت كلشي بقيت اكل متت جوع من الركضة خلصت اكلي وسحبت ماعون ميس
نجمة: انتي مسوية رجيم ماتاكلين مو
مو بالعافية حبي
دجيبي خل الرجيم يفيدج
سمار: ابن الحاااتة راح تشتغل وياااانة ولكم ما اصدكككك
قبس: انلاصت معقدين ثنين بدل الواحد
فقار: تقصد ملتزمين
قبس: لا هيج هوواي والله احتاج صاحبك ينفه عنا شوية
سمار: ياااا بووية صااحب الصاااك رراح يجينااا ولكمم هلاااا قبس اعذرني راح ابدلك بية.
قبس: حتى اشگك شگ بس تمشي وياة
سمار: شگني قااابل اححح تحمست احتاج كاس نبيذ
قبس: يقصد عصير القرنابيط
نجمة: شبعت راح اغسل واجي
ميس: روحي.
رحت للحمامات وذولة صوتهم عالي خاصة قبس وسمار اما ذولاك عكسهم هادئين واصواتهم ناصية دخلت غسلت وعدلت شعري لفيت حجابي من جديد وطلعت لكيت ميس كاعدة بصفها روان تحجي وياها والبنات اجن كعدن بطاولتنا كامت ميس واخذت جنطتها بيدها عافتهن وراها واشرتلي بيدها نطلع طلعت امشي وراها ما افتهمت منها اي شي بقت ضايجة طول الطريق وكل مرة اسالها تجاوبني...
ميس: مايسوى نجوم مايسوى شي
هو شنو المايسوى
محد يسوى وكلشي مايسوى.
ديلا بلة هسة شفتهمت منج
لا تفتهمين احسلج
شلون دخلتي تخبلين وفرحانة طلعتي ماتتحاجين
احتركت روح البالي
يروحلج فدوة
هو والوياة الحموضة ولد الحموضة
الغثة ولد الغثة
الوصخ الخايس
الريحتة تخنك خنك
تموت العدل وتعدل الميت
دكااااااافي يبوووووو
سودة بوجهة وبجهة الوياة
امين
نزلت اضحك على سوالفها كل ماتضوج تنعل البالها الف لعنة هو والوياة الحموضة الغثة الوصخ الوووو
يمة لو تحجي علية بعد ماتسكت.
باوعت لملابسي مابيهن شي ما اعتقد راح ينتبهون إلى ويمكن ينتبهون بس عادي يعرفون من ميس انفتح قيطان حذاتي هاي من نزعت الكعب لبستة بسرعة وشديت القيطاان شلون ماكان.
وصلت البيت ولكيتها عالكة افنان وي صبيحة اول ما دخلت راحت افنان لبناتها وصبيحة بقت تشيل روحها وتركعها دخلت بسرعة بدلت وسالت شهب على نيزك.
اكلج وين نيزك
ابنها مريض وراحت لكواكب.
دارت وجههة عني تباوع تلفزيون هزيت راسي و استلمت الببت تنظيف لو اني لو يبقة يخيس ذني ملتهيات بس بالمشاكل وحتى لو ماكو شي مستحيل يتعبن رواحتهن تففف حتى تففف عليهن.
اجتني صبيحة لابسة عباتها تريد تطلع
صبيحة: اني رايحة اخذ مينا للدكتورة عينج على البيت ولو هو مابقت بية غير دباب الغاز فلوسنا راحت عساها بحضج وبختج افنان كون يا حرامية
اني ادري شمسوية لرجلي وخلتة سكت.
اخذت مينا وطلعت تحجي على افنان وتسب بيها بقيت مذهولة شلون جانن كله عمري وحبيتي وشلون صارن وحدة تدعي على الثانية معقولة هاي الفلوس هيج تخرب! صح الخسارة جبيرة ولحد الان ماعرفو منو اخذهن واحد يشك بالثاني ديلة احسن من يتصاحبون.
مهدود حيلي ورجلية مكسرة من ورة الكعب وانظف طاح حظي عفت البيدي وركضت بكل حيلي من سمعت صوت شهب تصرخ وكف الدم بعروكي من شفت سراج بغرفتها وهي لازكة روحها بالزاوية تبجي وتصرخ مرعوبة انسطر راسي ورجعت بذاكرتي لذاك اليوم نفس الشي هم بس اني وهم سراج اجة يتحرش بيها واني جنت مصدومة ماعرف اتصرف بس اباوع بعيوني والله من الخوف ماعرفت اسوي شي وهي جانت تصيحلي اساعدها بس ماساعدتها.
ماساعدت اختي وهي باقصى حالات خوفها بقيت اتفرج عليها الا ان طلعتني من كلبها وعبالها اني ما اريدها.
لولا كواكب وتدخلها السريع بذاك اليوم شهب مو بخير خسرنا اختنا لوما كواكب بس هسة كواكب ماكو بس انتي يانجمة صيري كواكب اليوم.
شهب: فدوووة سرااااج عوووفني عوووفني الله يخليييك
سراج: الله لايخليني من عايف هذا الجمال
شهب: ووووولج يمااااااااااا.
صرخت صرخة من اعماق كلبها مخلية اديها على اذاناتها ركضت للكراج گلبي يدك بقوة سحبت من الحديقة بوري حديد ورجعت صارت بوجهي مرتة نور صحت بيها
ووولج رررجلج رجلججج يم اختتتتي امشيييي صيحييي بية
فتحت عيوني مصدومة من ردها
نور: خلية ياخذ اليريدة منها بلكت تحبل لو يزوجونها اله حتى تخلفلة لان اني ما اخلف واريد جهال
لججججج انتييي شتحجييييين!
دفعتها اركض وهي سحبتني قيدتني هي ضخمة وقوية.
نور: عوووفيهاا عوفيهااا هي اصلااا ماتريدددج ماتحببج ولج
لجججج اني مووو شهببب حتى اتاثرررر بكلامجن وخليتنها تكرهنيييي
فلتتت روحي منها ودفعتها على الدرج صرخت بالم وايدها صارت جواها ركضت والبوري بيدي دخلت اركض لكيتة كدامها مباشراً ينزع بقميصة بلا وعي ضربتة على راسة من وره صاح بالم والتفتت سطرني براجدي فرني فر كمت والدوخة بيه صحت بيه...
لككككك حيووووان عوووفهااااا.
خلة ايدة على راسة والدم ترسها شهب شردت وهو ركض وراها سحبها بيدة وهي ترافس سحبت البوري مرة ثانية وداس على ايدي برحلة صحت بصوت عالي من الالم ورجع مرة ثانية داس عليها اجت نور صاح بيها
تعاااي اخذيهاااا خل اشوووف شغليييي.
اجت حادة سنونها وهو عتني من شعري شمرني عليها تسحل بيه تخبلت انجنيت ذولة على شنو متفقين وشلون يفكرون اكو وحدة هي تسوي وي زوجها وين وصلو للحقارة والدنائة تايد رجلها يعتدي بنية حتى تجيبلها اطفال وووووين صايرة هاي وين!
بقيت اصارع وياها فحطتني جانت اكو دولكة مي على الميز سحبتها وردت اركعها براسها ماحس الا هو سحبها من ايدي وركعها براسي حسيت روحي راحت مني صرخت بالم وشهب تصرخ متخبلة سحلتني نور سحل وشمرتني برا بعد ماكدرت اقاومها طاقتي خلصت والدم غطا وجهي راسي صرت ماحس بيه من االالم خدر واحس بوشوشة بيه لزمتة بيدي والدم ينزل نور اختفت من كدامي من تذكرت شهب وشنو ناوين الها كمت بية مابية واسمع الباب يندك رحت امشي واتمايل بمشيتي فتحت عيوني كوة ونيزك وكواكب كدامي ظهرن همست.
شهب الحكلها الحكلها
باوعلي بصدمة وخوف راساً طلعت كواكب سجينتها من بطنها وراحت تركض نيزك انتهت تلطم وابنها تخبل يصرخ من شاف شكلي حجيت بصعوبة
مابية شي اني
نيزك: يمةةةةةةة رررراح تموتين يا نااااااااس ياااااااا عااااالم الحكولنااااااا اخوووواتي رااااااحن
ماااتتت نجمةةةة الحگولهاااا.
الباب مفتوح وهي تركض وتصرخ بعلو صوتها تحشم بالناس اني واكعة بالكاع وعيوني غوشت اموري متخبل يركض ورة امة وهي صوتها لم المنطقة تخبلت عقل ماضل براسها اجت شهب تركض شعرها مفتوح تبجي تلطم تصيح متخبلة.
شهب: كتلته كوووووواكب ماااااات سرررراج هووو ونورررررر كتلتهممممم
نسيت روحي ونسيت راسي والطاقة مدري منين اجتني كمت اركض جوة واشوف كواكب لازمة نور وتركع راسها بالحايط هي تصرخ ونور تصرخ من الالم.
خلت دمها بطولها عيني صارت على سراج بطنة تنزف داجته بطنة وضهرة من الطول للطول مشكوك وينزف صار يتكلب بالكاع وجسمة دم عبارة عن دم كواكب بيدها السجينة كلها دم هي وايدها تخبلت كواكب وفقدت عقلها تصرخ بخبال.
كواكب: تااااااذوووون اخوووواتي واخليكممممم سالميييين ووووولج اموووووتج اموووووتج
رادت تخلي السجينة بطن نور واني صرخت اسحبها من ايدها.
لاااااااا كوووواكبببببب لاااااا فدوووووة لاااااااااا.
كواكب: لججججج نجممممة رررادوووو يسوووون بيجننننن كااااارثة
اجو الجوارين التمو على سراج وهو يلقط انفاسة الاخيرة صدرة يصعد وينزل كلبي وكف والله وكف من الخوف دخلت نيزك ملخة نفسها تملخ وهي شافت المنظر لو تخبلت سحبت كواكب تدفع بيها وتصرخ.
نيزك: اشررردي اشرررردي رررراح تجييي الشرررطة تااااخذج اشرررردي.
كواكب: خللل اكتلهمممم كلهممم نيززك واحد واحد اكتلهم نحررر انحررهم حتى تخلصن واني اعيش بالسجن متطمنة عليجننن عوووووفينييييي هيييي مووووتة مووووتة
تسحب بروحها تريد ترجع لنور ونيزك تخبلت ذرة عقل مابقت براسها وجههة صار دم وتصررخ صررريخ مفجوعة تخاف على كواكب تاخذها الشرطة اختفن من كدامي ثنينهن واني بعد كعدت على صفحة وغمضت عيوني اسمع الناس تصايح.
نيزك: ولج كواكب لاتخبلييييني امشي لاتراويني شكلج بعد ماااات الولد ماااات ررروحي لا تخبليني
دفعتها بكل قوتي وكعت بالكاع الطم على رجلية واصرخ...
ررررروحي ولجججج رررروحي خابروووو الشررررطة ررروحييي مناااااا
كواكب: رايحة بس لاتتتتخبلييييين شوووفي اخواتج وابنننننج.
سويتلها بيدي روحي وهي راحت تركض كمت امشي واتعثر بعباتي اكوم واطيح احس روحي راحت صعدت كدام عيني من اجت الشرطة تخبلت منظر نجوم والشفتة مايطلع من راسي كارثة والله كااااارثة
صاارت ادور بنص الهوسة عليهن اخواتي ماكو وابني بس الناس الغربة والشرطة وكعت بالكاع بعد رجلية ما تحملني ولا عقلي يستوعب شي لطمت لطمت تخبلت اريد اخواتي وينهن تطشررن.
كومتني مرة جارتنا واني اصيح على اخواتي.
ياااا عليييي اخوووواتي يااااا عليييييي استرررهن يلعباااااس افزعلناااااا ماتتتت اختيييي مااااتتتت
الطم وابجي روح ماضلت بية نجمة ماتتت نجمة دمها بطولها اختي راحت كواكب للسجن كتلته موتتة راحن اخواتي والنسوان لازماتني يصيحن بية
اخذوهن للمستشفى خااالة هسة يجن
اجة ابني ميت ميت خوف يصرخ صريخ تخبل اخذتة لحضني ضميتة لكلبي وابجي بصوت عالي.
الشرطة تستفسر من الجيران وصبيحة اجت تخبلت من شافت الوضع هي عرفت وهي تخبلت تخبلت صارت تملخ بروحها طلعت تلحكهم للمستشفى والشرطة لحكتهم ونصهم بقو بالبيت هناك بالغرفة
بقيت على كعدتي منتهية وعيوني نار نار مو ابجي دمع لا دم والله دم احنا شسوينا بدنيانا وكل هاي الاذية ماخذين منطين دموعي تجري واصيح.
ليش ربي ليش هيج ويانا شسوينا احنا وياك شسوينا اهلنا شسوووو والله ناس فقرة وماكو اطيب منهم اخذتهم لرحمتك وعفتنا ليش ليش احنا شمسوين
جارتنا تصبر بية واني حتى ماكدرت اتحرك من مكاني حيلي راح حيلي انتهيت دخل يوسف يركض مبين مخبرينة بالصار اخذت ابني وطلعت بالشارع اشوف اختي ماتت والله والله احركهن كلهم بس لو صار بيها شي لاكتني افنان ويوسف يصيح بية
لججج ادخلييي ادخلييي جوووة.
ما رديت علية صوتي اختفى اجة يسحب بية دخلني للبيت كعدت بالكاع بس دموعي تجري على خدي كمت ماعرف شنو اسوي ناس تجي وناس تروح صريخ وهوسة واني حاضنة ابني وعلى كعدتي بقيت
طفر ابني من حظني وطفرت وراة اشوف شهب تمشي بنجمة لافين راسها وايدها مكسورة صابينها وشهب مخلية شال على راسها وشعرها طالع اما نجوم منتهية نجوم لطمت على رجلية اصرخ بحركة وشهب اجت تحضن بية وتجرف ررجيف.
اااخ بوووية تعال شوف بناتك شصار بيهن ولج يمة يالحنينة شوفي شسو بينة صفينة بلا والي ياهو اليجو يتمادى علينة
نجمة: كوومن ادخلن جوة كومن شهب كومي نيزك من الطريق
سحبتني شهب ونجمة لازمة ابني دخلنا غرفتنا لو شهب تسودنت تسودنت كعدت بالكاع تصرخ وتبجي اني ونجوم نسكت بيها ماكو تخبلت عساها بحضهم وبختهم ريتهم ما يتهنون على هذا العذاب والخوف الخلوها تعيشة.
صوت افنان تلعلع علينة وتغلط فوك ضيمنا واخواتي منا منتهيات لا والله ولا اسكت طفرت عليها اصيح بصوت عالي وهي ركضت لغرفتها واني وراها.
نيزك: لجججج افنان موتتتج على ايدييييي الا اطلع ضيمنا بيج نور هاي نور ماتوصل للراح اسوية بيج
افنان: ولكممممم يبووووو يا ناااااس ياعاااالم الحكووولي راح تموووتني.
دخلت غرفتها وسدت الباب واني ادفع بية متخبلة ما تطفى نار كلبي الا اربيها اجة يوسف يصيح بيها ويسحبني للغرفة واني ملختة تملخ.
نيزك: اااااالله ياااااخذكم حيوووانات حتى الحيواناااات ماتسوي سوايتكممم هاااي
يوسف: دكاااااااافي
صاح ودفعني بقوة والباب قفلة من ورة كمت من الكاع لازمة راسي بثنين ادية واصيح باخواتي
لا تبجننن اسكتتن اسكتتتن بس تعالن إلى تعالن.
كعدت على القنفة وهنا حاوطني وابني بحضني كوة هديت من نفسي وضبطت اعصابي امسح على راس شهب واردد: -هنا يلعباس هنا فزعتك يبو النوماس
نجمة زينة انتي راسج يوجعج
نجمة: ضربوني ابرة اريد انام تعبت
هزيت راسي وكمت فرشت فراش بالكاع مددتها وغطيتها وشهب اجت حضنتها وخلت راسها بصدرها تكلها.
شهب: اسفة نجمة كل الصار بيج اني سببة جنت اضنج مثل مايكولن عليج بس اثبتي العكس عكس ذاك اليوم.
نجمة: والله والله ذاك اليوم ماعرفت اسوي شي بس مايتكرر الصار مرتين شهبة انتي روحي والله
شهب: يا روحي نجوم
حضنتها تبوس بيها واني امسح بعيوني ابني نام بنصهم غطيتهم وداخلي يفور نار يفوور اباوعلهن نامن اخذت عباتي لبستها وطلعت برا بعد ماكدر اتحمل اريد اعرف الصار وياهم كواكب وين راحت
كلبي راح يوكف.
طلعت بالصالة والنسوان تروش لغرفة افنان شافني وكالن.
يا خطية اختج هسة شلونها.
سكتت اباوعلهن اريد اكلهن ردت وحدة بيهن
انطنها مسكن لو اخذنها للدكتورة ترى هذا اغاب
مو شوية
فتحت عيوني بصدمة وانهديت عليها
نيزك: لجججج انتييي شكااااعد تلغيييين
هسة فوك ما انصحج ونكول خطية صدك انتن ماتستحن
لج انتن الما تستحن شوفن شوفن. سمعتن بالصار ها مو.؟
تقربت عليهن وهنا خافن صرت بوجهن وكلت بحركة.
نكتل ونصلخ ونفلش اكبر راس اليندك بينة ندوسة برجلينة وانتن سمعتن شسوت كواكب خلتهم بين الحياة والموت دچجتة ادچج هو ومرتة وهسة نايمين بالمستشفى فلو جبتن طارينا نسحل بيجن الكاع واحنا بنات جبار
حرف حرف هذا الحرف ما نطقن انسحبن خانسات والله لو رادت بوجهي جان ملختهن وطلعت حركتي وخبالي عليهن بس سترن على انفسهن.
طلعت وصار بوجهي زلم تارسة الكراج رجعت وكعدت بالصالة مو مال اطلع وانسحل خل احفظ طاقتي افنان ساكتة ماحجت شي لان تخاف من خبالي تعرف شلون تبرد كلبها بيه تحيل عمي وتسوي سالفة هنا تفرح وتاخذ بثارها.
ضليت اكل بروحي وهي طلعت خزرتها بقوة صاحت
افنان: لاتضلين تخوزرين هيييج
افنان اسكتي افنان اموتج والخلق الحق
هسة دعوفي افنان والتهي بروحج شوفي مصيبتجن
عساها بحضجن وبختجن
بس لاتردين تشركيني بكلشي بيها عليها اني.
كونج مو بيها ولا عليها اسكتي
اي اكول اختج شلونها خو ما متاذاية
لججج افنان افنااااان لاتحجين هيييج وتعرفين شهب مابيها شي هالمكبسل قبل لا يسوي شي انسحل باقسى الطرق بنية بنية وصلتة الموت مدري هسة عايش لو مات
اي وراح تدخل سجن شنو عبالج تصول وتجول براحتها بت الشوارع مثل قبل بعد ماتشوف غير الحيطان
ووولجججج افناااااان اسكتتتتي لا اكووووم امووووتج.
دخلت جوة وبعد ماطلعت ضليت بناري اختي انسجنت الشرطة تدور عليها هسة كمت من مكاني، راح اموت بعد ماكدر اتحمل شفت يوسف صحتلة كالب وجهة والله مال كواكب تشوف شغلها وي خلقتة السزز.
شتريدين؟
شنو صار؟ هذا المكبسل مات عاش هو ومرتة
هو زين بس مرتة لا
شبييها هالنذلة
الراس مكان خطر وكواكب فلشتة تفلش هسة هي بالعناية المركزة.
تستاهل الس تستاهل حيل بيهم تروح تخلي رجلها يعتدي على اختي حتى يتزوجها بالغصب لو تحمل لان هي مايصير عدها اطفال تستاهل الموت هي كواكب موتتها لو ما احنا
ترة سجن تروح وهسة دعوتين عليها دعوة مال سراج ودعوة نور الشرطة تدور عليها يعني انتي تكيفين تدخل سجن!
مو كواكب غبية حتى تدخل سجن على سحكات بسيطة هي كالت انحرهم كلهم وادخل سجن حتى تخلصن منهم
مو صاحيات انتن
من وراكم ماخليتو عدنا عقول استلمو النتيجة.
عافني وطلع واني دخلت بالغرفة بعد ما طلعت نجوم تون سودة علية هم ايدها وهم راسها شربتها مسكن ورجعت نامت بقت بس شهب كاعدة صافنة بالفضاء
لاتصفنين لو تفيد الصفنات جان فادتني
شهب: الشرطة حققت ويانا
اي وشكالو
سالونا على الصار وكلشي سولفنة بالتفصيل الضابط بقى صافن كال شلون عايشات وي ناس لا زلمتهم عندة رجولة ولا نسوانهم عدهن غيرة وشرف
تتوقعين التأيد رجلها على الاعتداء عدها شرف؟
كلهن ك بس لاعبالج اسكت وحقة هو وحقة اذا ما بهذلتهم واطلع القضة والمضى من عيونهم اخذ حق الراح والجاي بس صبر
اني بعد ماكدر اعيش هنا نيزك
وين نروح وين منهم
لفت روحها ونامت كمت للمطبخ اسويلهم اكل كتلهم الجوع وايدي ترجف وهذا راسي يريد ينفجر من الصريخ الصرختة اخ يا خوف الخفتة عليهن بس الله اليدري بية هم يجي يوم وانسى لا والله ما انسى شي.
اخذت العشا الهن كوة ياكلن بس ما خليتهن غصب اكلن وامير وياهن كل شوية يبوس نجمة ويكول
امير: ااحو ندمة ااحو نانا نانا ندمة
نيزك: سودة علية اي حبيبي احوو خالة
رجع باسها وهي دنكت علية باستة
نيزك: شلون صرتي نجوم؟ اخذج للمستشفى؟
لا مايحتاج مابية شي
سمعت صوت عمي سالم برا طفرت من مكاني وكتلهن: -اقفلن الباب ما تفتحنة خوش.
طلعت وشهب قفلتة من جوة طلعت اجت صبيحة وجهة مزلغتة شمرت عباتها واجت علية ركضت للمطبخ فتحت الجرارات وطلعت سجينة خليته بيدي هي بعد ما لحكتني بس بقت تصيح وتدعي بالصالة طلعتلها.
صبيحة: ولجججن ك س شمسويات بابني دمة صفر وبين الحياة والموت
تنقهرين على ابنج ليش عزيزتي ترة هو عار والعار مايصير بية شي مثل المطي يكوم باجر
الله لايوفقجن ولجن تشمررن برواحتجن علية وبعدين تستشرفن وتلمن الناااس.
شوف شوف لا لا صبيحة لاتحاولين تحورينها ترة تخرب وتصير مو حلوة يعني مال ابنج مكبسل وبغرفتنا وهم لاعبين بخلقتة وانتي دكولين ذابين رواحتنا هو ابنج مو يكلبة بالاول
رفعت السجينة من رادت تهجم راحت لغرفتها تدعي وتفشر اشكال كامت تحجي هنا بس حجي جيب وحدة تصير كدامي يرجفن رجيف لان يدرن النتيجة شلون.
اجة عمي سالم خزرني ماحجة شي عبرني يروح صحت وراة.
شو ساكت ماتحجي شي ابنك يعتدى على بنت اخوك والصار كلة ولا يمك شناوي
روحي لاخواتج انفضحنا بين الناس بعد شتردين احجي ابني شخليتن بية حكجن اخذتنة شسوي بعد اكثر ذولاك نايمين بالمستشفى
من افعالهم ولو انت رادة من زمان ماصار إلى صار من اول مرة ثاني مرة اجينة وكنالك ماصدكت سمعت ماصدكت هسة ارتاحيت.
عافني ومشة بدون مايحجي زاد خوفي وتوتري شنو ناوي ليش بقة ساكت معقولة محظرلة مفاجأة النة لو صدك ماعندة شي يحجية هاي هي صار إلى صار.
مر اليوم واحنا بانكس حال عيني ماغمضت اسمع نجوم تون واني اموت قهر اموووت منا شهب كلساع تفز وترجع تنام من ادك على ظهرها خبلوهن وبهذلوهن كمت وي صوت الاذان گلبي يفوور عبالك نار مشتعلة بية رحت توضيت وبقيت اسمع صوت الاذان بداخلي عتب جبير اعاتب رب العالمين كل مرة اعاتبة هالمرة اسكت هو يشوف كلشي يحلها ويصفيها لابد يجي يوم وتصفى.
درت وجهي اريد ادخل شفتة واكف يدخن يباوعلي خزرتة بحقد ورفعت ادية للسمة نشغت وكلت.
نيزك: عساها بحضك وبختك كلشي صار وياي اريد رب العالمين ياخذ حقي منك كل دمعة نزلت من عيني بسببك اريدة هو يحاسبك عليها بالدنيا قبل الاخرة روح كون ماتهنيت بشبابك مثل ما اني ماتهنيت وتخبلت بعز شبابي
ذب الجكارة بالكاع داسها كال
تمنيت تدعيلي بوقت الفجر مو تدعين علية ليش نيزك ليش والله لو منبتة سجينة بگلبي ولا كايلة هالكلام.
لاتخاف هم انبت سجينة بگلبك يجي يومك مو بعيد
سنيني خلصت واني منتظرج نيزك
شوف النجم شكد عالي لو تنزلة وتصوغة كلادة إلى ما راح اقبل بيك
بلساني گلتها انتهت والله وياك.
عسآني ل گلتها.
وعسى لساني انشل
ان شاءالله كلك تنشل.
كلتها ودخلت جوة كارهة شوفتة هالنذل العار المامحسوب على الزلم صليت وضليت كاعدة غفيت واني كاعدة افكر بكواكب وشفت امي وابوي كدام عيني باوعتلهم بحقد حاقدة عليهم ليش عافوني والمن بقيت ساكتة وابوي ابتسم يكلي.
بوية نيزك تهون تهون ديربالج على اخواتج وامانتي مو تنسينها
راحت امانتك راحت اخذوها من بين ايدي كواكب مو يمي.
راحت امي مسافة وجابت طفلة صغيرة لافة راسها باندج خايفة وملابسها قديمة ومتمزقة مسحت على خدها بحنان وباوعتلي كالت.
هاي كواكب اختج مو بعيدة عنجن لاتخلنها وحدها
دفعتها علية اجت تمشي وعيونها مليانة دموع وخوف فتحتلها ادية واخذتها بحضني ابتسمو يباوعولي واخر جملة كالها ابوي بقت محفورة براسي حفر كال.
لاترجعين من تشوفين الدرب بية عاگول فوتي بية حتى لو جرح رجليج اكو من يداويهن وتمرين منه تلكينة ورد
نيزك شبيج.
هااا شبية
كعدت امسح بكصتي العرك ماخذها وجهي حار عدلت كعدتي واخواتي مكابلاتني رفعت عيوني الهن
اكلجن ليش بالحلم اني زعلانة على اهلي؟ هاي كل مرة اني اباوعلهم بنفس النضرة لييش؟
شهب: اجوج بالحلم
اي اجوني بس ليش اني زعلانة عليهم
نجمة: انتي الوحيدة التذكرينهم بكلشي يصير وتذبين الصوج بيهم بكل مرة تكولين ليش عفتوني ورحتو تلومينهم وتعاتبينهم على شي مو بيدهم.
صح نجمة مرات احقد عليهم لان عافوني استغفر الله ربي لا حول ولاقوة الابالله
شهب: كومي غسلي وتعالي تريكي
نيزك: منو سوت الريوك؟
شهب: اني ونجمة من شفنا المطبخ فارغ كمنا سوينا بسرعة
كمت اغسل وعمي يحجي وي اهل نور الضاهر، مايدرون بتهم شمسوية عمي ما خلة عليها لاغلط ولا سب حتى اهلهم سبهم وسب تربيتهم هما مادري شيكللولة وهو تخبل يسب بسراج كام سد الموبايل واني تحركت شعجب وكف ويانة هالمرة شعجب!
ابنة بالمستشفى وجنتة وما حاجانة يمكن لان هما الغلطانين لحظة يمكن حقة مو يمنة ولا ياخذة منه احنا ياخذة من كواكب لان هي الخلتهم طشار ونومتهم مستشفيات احنة ما سوينة شي صح هسة افتهمت سالفتة.
غسلت ورجعت صبيحة من الصبح رايحة للمستشفى وافنان سوت الريوك واخذتة الة كعدو يتريكون سوة وما اعرف شنو يحجون من الصبح، دخلت تريكنا واني بعالم ثاني كواكب بيها شي ليش امي وابوي ذكروني بيها ودزوها علية؟ معقولة صار بيها شي؟
ماعرف شلون كاعدة وكل هالنار تحرك بية حررگ اريدهم بس يطلعون حتى ادور كواكب واشوفها دخلت افنان بالباب واكفة بقت كالتلي.
عمج يريدج كومي يالشفية
خير ياطير
خير خير.
صح خير ويمكم هم لاهاي هواي هه
عافتني وراحت واني كمت.
شهب: اكلج شنو يريد منج
اروح واشوف
دخلت للاستقبال كاعد وثاني المخدة جواة خلة الجكارة بالنفاضة وعدلت كعدتة بقيت واكفة فوك راسة كتفت ادية لصدري وكتلة.
شرايد كول
اكعدي بالاول وراج طرادة شنو
اشرلي اكعد كعدت لازمة اعصابي كوة اريد اعرف شنو البراسة شنو.
اليوم يخرج سراج من المستشفى وهذا الوضع بعد مايصرف النة انشهرنا وانفضحنا كدام العالم الى متى نبقة هيج عاجبجن الوضع؟ خل نخلي النقاط على الحروف
بلة خلي خلي بكيفك يلا اسمعك كمل
بوية نيزك وانتن بناتنا منا وبينا اسمعي ولا تتسرعين انتي العاقلة الجبيرة فهمي اخواتج الراح يصير.
اختج شهب صارت عليها سمعة وانتن بعد محد يدك بابجن بعد الصار وهذا سراج مخبل مايشوف غيرها نزوجها اله ونخلص هذا الحل الاول والاخير صح هو متزوج بس مايضر هو يحب اختج ومتخبل عليها
طفرت من مكاني فاتحة عيوني على وسعهن وجسمي كلة صار يرجف.
نيزك: شكااعد تحجي انت شكاااعد تحجي عقل عقل اكو براسكككككككك
سالم: تجاوز لا تتجاوزين جاي نحجي بتفاهم.
وووووين الحجييي بالموضوع ووووينة وينننننة لوووو تمووووت مايصيرررر البالككك خووش
مو بكيفج يعقد عليها بس يصير زين وانتي هم خل يوسف يعقد عليج المن ضالة كاعدة خل الولد يشوف حياتة ميتين عليجن وانتن ماتريدلجن واحد ماصارت هاي المن رايديجن للغريب ياكلجن لحم ويذبجن عظم ليش انتي ما جزتي من الغريب؟
ردت احجي الساني انربط من قوة الصدمة ماكدرت بعد احجي شي بس احس نفسي راح انجلط واموت بكاعي محد يلحك علية من افنان كالت.
ما زوجتج اله من شابة لا عبالج وانتي مطلكة تاخذينة لا نيزك اني ردتة ياخذج حتى ما اخليج بنفسة بس يچز منج ازوجة بت بيت وانتي ضلي للخدمة كلجن تضلن بهذا البيت ماتطلعن منه للموت
حركت رجلية بلا وعي امشي عيوني ما اشوف شي بيهن ولا اسمع شي غير هالكلام يتردد باذني.