رواية المنجمة للكاتبة كفاية كاظم الفصل الثامن والعشرون
جنت هستوني كاعدة من النوم طلعت اريد اسوي ريوك انخمش گلبي من سمعت صرخة نيزك تصيح
يمة اااااااااابني
بعد اريد اكوم ماكدر رجلية ماتن طلعت شايلتة بحضنها وحلكة يذب دم اسود وجهة وايديها اتلطخت كلب عيونة وكعت بالكاع تصيح.
ولك يمة ااااااميررررررررررر.
توسعت عيوني برعب وگلبي دك بجنون زحفت زحوف وهي بالكاع فقدت تصرخ وامير منتهي ايدي ترجف اريد اضرب على وجهة ماكدرت خفت من شكلة التمن علينة مصدومات واحس نيزك فصلت عن العالم شايتلة ياسمين جابلها عباية واخذتة تركض بية اكوم بنيزك اصرخ بيها تكوم وياهن فقدت ملخت روحي تملخ من شفت حالتها هزيتها بقوة ودموعي تنزل.
كومي نيزك اموري اخذوة روحي وياهم.
بقت جاحظة عيونها وجهها مصبوغ دم طفرت وعفتها طلعت وراهن اركض جاي يشغلون بالسيارة ردت اصعد وصاح بية عمي جواد ارجع ضليت بحيرة اروح وياة لو وي اختي ثنينهم حالتهم حالة طلعت سهلة تركض لابسة نعال تك وتك تصيح بيه
روحي يم اختج احنا يمة الوليد.
رجعت بخوف اركض لكيت جوري تغسل بوجهة كعدت كدامها ترجف من فوك ليجوة خفت عليها تضربها جلطة اديها يابسات اخذتهن افرك بيهن ودموعي تهطر هطر الزم بوجهها واحجي وياها بلكت تستوعب.
نيزك فدوة بس احجي شي بس احجي لاتبقين هيج امير اخذوة للمستشفى هسة يرجعونة مابية شي.
الحايط اذا حجة هي حجت التمن عليها البنات اخذنها سحل يسحلن بيها رجليها ماتخليهن بالكاع كعدت تفر بعيونها علكتهن تخبلت من شفتها هيج خفت ترجع لحالتها القديمة اخذت تليفون بيبي ذهب اتصلت بضرغام يجي بيبي ذهب تقرا عليها ايات قرآن وتمسح على راسها شكد حجت عليها المرة بدون فايدة.
دقايق ودخل ضرغام يركض فحطان وجههة احمر شافها بحلق عيونة بخوف وركض صار كدامها لزم اديها يفرك بيها نزعها الشال خلة ايدة على صدرها يفرك بية صاح بينة بصوت عالي متخبل.
عباية وجواريب بسررررعة
ذهب: على كيفك حبوبا
ضرغام: راح تنجلط ذهب شتحجين.
طفرت وراهن سحبت صاية وشالي لبستهن على السريع وطلعت اركض وراة لبسها بيدها وشالها يركض بيها مثل ماركضت بابنها صعدت وياهم يمشي بسرعة جنونية وكل شوية يلتفت علية يصيح بية افرك صدرها.
دخلت ايدي افرك احس الشرايين تصلبت لزمتها من وجهها انتبهت لدموعي وصفنت بوجهة شهكت احجي وياها: فدوة نيزك مالنا غيرج فدوه احجي
حاولت تحجي لسانها ثگيل عصرت ايدها بقوة اهزلها براسي بس كون تحجي لايصير بيها شي.
بصعوبة جمعت ونطقت كلماتها.
نيزك: م مات م مات بحضني نفس ب بنتي
شهب: ما مات والله مابية شي
رفعت اديها كلها دم يابس نزلتهن افهمها
شهب: تلكينة واكع على حلكة وانشك
هزت راسها بلا صارت تلوب بمكانها عبالك عدها طلوك تضغط على اسنانها بقوة ماتكدر تحجي صحت بضرغام لاتنجلط حسيت راح تضربها جلطة وتقضي عليها ماكو دقايق واحنا كدام المستشفى
نزل ضرغام فتح الباب وشالها يركض بيها ويكول
ضرغام: لان حبيتج ما فرحت بيج.
گلبي تلوع بيج لوعات ريتني ماحبيتج وضليتي سالمة
امشي وراهم وبطني تمغص بيه بصوت عالي صاح ضرغام: سديييييييية بسرررررعة حالة طارئة
ركضو بالسدية نقلها وياهم يركض واني اركض اخاف لا اضيعهم ضرغام بقة يم الدكتورة يشرح حالتها هزت راسها ودخلت بقة برا واكف يمسح بوجهها ويرفع راسة للسما يهمس بكلام.
وصلت يمه امسح بعيوني ودموعي ماتوكف باوعلي بخوف يطمني.
ضرغام: شبيج ولج راح تموتين نصير بثنين امشي اكعدي بوية.
بصوت يرجف والشهكة خانكتني حاجيتة
ضرغام امير فدوه خابرهم شبية امير
طلع تليفونة اتصل بيهم مايردن نزلة يكلي
منو الراح وياهم
عمك جواد اخذهن
هز راسة واتصل جاوبة ابتعد مني يفتر بالممر ماعفتة وافتريت وراة اريد اسمع شيكلة
ضرغام: سوولة ناظور اخاف السبب بامعائة
حجة حجة؟ لايخاف اشترولة حلويات شيكولون الدكاترة سوولة المهم نعرف العلة
سد التليفون اندار لكاني وراة مسحت عيوني
شهب: شلونة امير فدوه.
ضرغام: جايين يسوولة تحاليل بعدة مامعروف سبب النزف بس زين فتح عيونة توة
ضرغام ليش ينزف من حلكة دم اسود وغمض عيونة
والله ماعرف هسة الدكاترة تعرف السبب وانتي اكعدي لاتفترين
رحت كعدت وهو خطية يفتر رايح راجع يوصل للباب ويرجع طلعت الدكتورة تحجي وياها كمت من مكاني صرت يمهم قبل لاتمشي كالت.
نيزك: انطيتها ابرة مهدئ المريضة تحتاج راحة ابعدوها عن الضغط والنقاشات الحادة رجاءً.
هز راسة راحت واحنا دخلنا يمها ممرضة تعدل بالمغذي خلصتة وطلعت بقينا احنا التلاثة اباوعلها بشرتها شاحبة ولاتدري بالدنيا كعد يمها ضرغام لزم ايدها واخذ اصبعها البية الحلقة يفرة بيدها ويحجي وياها بصوت ناصي عبالك تسمعة.
ضرغام: جنت اظن هالزواج يغير حياتج للافضل.
ماجنت هيج متوقع بيت صغير وابنج وياج اعيشكم مدللين حتى اختج اجيبها وياج والله كلت اجيبها لخاطرج حتى لو نتعارك وهي ماتطيقني اسكت عنها لخاطرج اهم شي انتي مرتاحة
زحف تقرب منها نزل نفسة وباسها على خدها بهدوء انسحبت بسرعة وعفتة يسولف وياها ثنينهم خطية لا هي تهنت ولا هو بقيت كاعدة بمكاني اغطي رجلية الطالعات بالصاية رفعت راسي لكيت كدامي دكتور شوية جبير اكبر من فقار بس مرتب يباوعلي على وجهة ابتسامة.
الدكتور: ليش تبجين وحدج وين اهلج؟
هنا
انتي منين جاية
منا
عبالي من امريكيا
هزيت راسي لا وهو يريد ياكلني عبالك اريد اكوم بس صاير كدامي ماكدر رجع يسال بية.
طالبة انتي مو؟
فزيت على صوت ضرغام وراي يصيح بية
وانت شعلييييك طالبة متخررجة دكتور انت لو شغلتك تسال بالرايح والجاي!
اندارلة ورجع يباوعلي اصفر وجهة واني من شفت ضرغام وعصبيتة ردت اوكع ابتسم الدكتور وكلة.
بس كسرت خاطري شفتها وحدها تبجي عبالي وحدها هنا استرخص اني
مشة بسرعة وهذا خازرة باوعلي اصتكيت بمكاني من الخوف بررت: والله هو اجة اني هنا كاعدة
ضرغام: وانتي شكو واحد يسالج تحجيلة قصة حياتج!؟
لا والقرآن بس.
بعد لاتجاوبين هيج شكول اي واحد غريب او تعرفينة لاتجاوبينة.
هزيت راسي عافني وطلع رحت كعدت يم نيزك اباوعلها والقهر كتلني صعبة اشوف اختي كل يوم تطيح كدام عيوني مواتة ومابيدي اسوي شي والله حيلي اخذتة كل يوم انهبط عليها اشافت من عمرها
انفتح الباب دخل ضرغام خازرني بعصبية عوزة بس يكتلني هسة اني شسويت دخل وسد الباب بيدة بطل مي وعصير مدهن إلى اخذتهن من ايدي ينتر بية.
مو عفتج برا شدخلج خرب تجلطين بفهاوتج عبالي وحدة ضحكت عليج واخذتج
لا شنو قابل اني طفلة.
لا جبيرة وعقلج يوسع بلد
برطمت اني منا مقهورة على اختي واجة هذا يرزل بية خليت المي والعصير على صفحة صحيت بية
اخذهن ماريدهن لاتبقى تصيح علية
نزلت دموعي غطيت وجهي بيدي ابجي وهو يكلي
هسة شسويت تبجين
ترزل بية الا اكول لقبس من اوصل
ضرغام: خفت من الاصفر دشربي عصيرج كدامي
سويت روحي ما اسمعة اخذة فتحة وانطانية يكلي
ضرغام: شوفي اني مو قبس عندي خلك اسكتج تاخذينة تشربينة لا اشمرج خارج المستشفى.
اخذتة من ايدة شربتة دفعة وحدة خفت منه والله شكلة يخوف هاي اختي شلون باقية وياة جنة وحش بس يخزر ويصيح.
ورة فترة كعدت نيزك ترمش بعيونها ضرغام لازمها لزم حتى مايخليني الزمها باس كصتها ولزم وجهها
بخفوت كالت.
ابني مات وين ابني؟
مابية شي هسة يجيبونة الج
ميت اشوفة وياخذونة؟
تحجي كلامها بجمود بدون اي تعابير بوجها مسح على خدها بحنية وبصوت خافت يجاوبها.
ضرغام: يضحك ويبوسج ويسولف عليج شنو هذا الحجي يا روحي.
بس هو مات بيدي
اشرت بعيونها على اديها ماتحركهن هز راسة وكام يكلها: هسة اجيبة وياة حلوياتة
طلع من الغرفة واشرلي اصير يمها خليتة يطلع تمددت بصفها خليت راسي بصدرها شميت ريحتها جلبت بيها بقوة ودموعي نزلت والله اعتبرها مثل امي واخاف عليها من الهوى رفعت راسي تكلي.
تبجين بية شي امير مو؟
راح وليدي راح؟
لا والقرآن نيزك هسة كال ضرغام اجيبة.
خلت ايدها على عيونها تضغط عليهن وتحجي بحركة وقهر: ولج شهبة لكيتة يذب دم لكيتة روحة راحت بحضني يمن عمت عيني علية
بقينا ننتظر ضرغام راح وضليت بخوفي على اختي لاتتهستر وتفكر صار بية شي لان تاخر ضرغام
عفتها وطلعت من الباب شهكت ورجعت ليورة من شفت قبس وضيغم جايين جمدت بمكاني اجة اخذني بحضنة يباوع بوجهي بخوف سالتة.
امير امير امير
قبس: بس يكملون التحاليل ويجيبونة
ضيغم ابتعد عنة دفعني قبس يكلي ادخلي جوة.
بقيت جوة منا لمن اجة ضرغام شايل امير نايم على جتفة شهكت ونيزك كامت من مكانها بالغلط انسحبت الكانونة والدم طفر ضرغام خلة ابنها بحضنها وسحبها اخذ كلنس يضغط على ايدها هي ولا تحس حتى بالها مو يمها تبوس بامير وتكلب بوجهة درت اشوفة ردت روحي من شفتة فاتح عيونة ويباوعلنة لزمت وجههة نيزك تمسح بية
نيزك: حبيبي امير يا نظر عيني زين انتي شو احجي يبعد روح امك خل اسمع صوتج ويبرد كلبي.
خلة راسة على صدرها حضنها يكلها
نانا اني دين
بوستة باخبال تبجي وترجف تشمة وتضغطة عليها
نيزك: والله مابية حيل اخسر من جديد عوضي امير انت الدنيا تلحكني على العوض
ضرغام مركز وياها راد يسحب امير ماقبلت
ضرغام: يلة نطلع بعد بالبيت اشبعي منه شوف ونومية بحضنج.
اخذه شالة على جتفة وامير كلش نحلان هذا الحركي خانس محد كللنة شبية دخلت سهلة باست نيزك وكومتها تعدل بيها طلعت قبلهم وضرغام لازم نيزك بيدة وامة مناك ساندتها سند رحت يم قبس وضرغام يباوعلي ماعاجبة سحبني قبس يكلة.
عيونك لا افكسهن
ضرغام: دطير انت وهاي الفاهية
قبس: تسواك
هز بيدة وراح حرك گلبي كلي قبس
هذا شبية وياج
خلاني ابجي بس يصيح علية واني اختي طايحة ويكلي اشمرج خارج المستشفى بس ما تشربين عصير.
قبس: اني اعلمة هالجلب
سمعنة ضرغام وصاح
الاصفر وانتي الفاهية خليني ساكت عليج
شهب: مو فاهية اني هسة شسويت
ضرغام: اسكت احسن اااخ والله طلع ذيج المرة مرة واني ما اطيقها
قبس: لاتبقى تشمر بالحجي عدها مشاعر وتتحسس.
رجعت وياهم ضيغم يحجي وي ضرغام ويمسح على ضهرة ضرغام دك على ضهرة وخلة صدرة على ايدة بامتنان طبعاً ملاحظة ضيغم علاقتة كلش قوية وي ولد عمة واشوفة وي ضرغام اكثر شي رغم شخصياتهم تختلف من السما للكاع راح قبس وضيغم لدوامهم واحنا رجعنا للبيت صعد ضرغام نيزك لحكتهم لكيتة منوم امير على الجرباية ويدور بملابس نيزك اندار مخليهن بيدة يكلها.
كومي اسبحي يلا عيني.
استحيت وطلعت هذا ضرغام ولا ينطي مجال كلة هو رحت لغرفتي سبحت احس دبكت نزلت جوة الجوع كلتني دخلت للمطبخ كمزت دعاء هي واسيل جانن يسولفن فتحت الثلاجة ودعاء بصوت مسموع كالت بعد ماجانت بالهمس تحجي...
دعاء: حبيبتي روحي للدكتورة العصر بلة صار بالطفل شي
اسيل: هو اكول لضرغام ياخذني
كلت بكلبي كونة زلمة ياخذج حتى نيزك تتخبل علية خليت القوري على النار اشتهيت اكل كيمر عرب بالثلاجة طلعت الصمون احمي بية على النار.
دعاء: اكول شهب امير شكالو علية
بعدني ماسالت ضرغام خطية التهى بنيزك
بس شفتة حتى نسيت
دعاء: ها خوش
اسيل: اكلج صدك انتي اسمج شهب بالجنسية!
هزيت راسي وصبيت جاي
اسيل: صدك لو اني اغيرة يلعب النفس اسم ولد هذا
شهب: عادي هو اسم مايهم
دعاء: دعوفي اسمها ماكتلج اختي ولاء راح تجي يمنة
اسيل: هلة بيها
سكتت دعاء تباوعلي صفنت سويت روحي ما اشوفها اكلت من شفتها وكالت.
دعاء: اكلج شهب اختي اذا اجت لاتختلطين بيها من بعيد لبعيد.
شهب: هسة خل نشوفها اول واكيد ما إلى علاقة بيها
دعاء: اي عفية لا تختلطين بيها كلش
كالتها وطلعت بعدها اسيل لحكتها بقيت اكل دخل تميم بقة واكف درت وجهي واشوفة والكمة بحلكي
عكد حواجبة وكلي.
رجلج وين؟
بالشغل
هز راسة وراح خلصت بسرعة وغسلت المواعين ردت اصعد واجو التؤم يباوعولي واحد ينغز بالثاني ويتهامسون مسحت ادية وكتلهم
ها شبيكم
حسين: اختنا
محسن: وتاج راسة
حسين: عادي نطلب طلب صغيررروني
كولو
تقرب حسين يحجي بهمس.
شوفي اريدج ترحين بغرفة حفصة حموصة وتكليلها اكو مرة بالباب تريدج بالاسم وشكد توسلت بيها تدخل ما قبلت
شهب: هي اكو مرة بالباب
حسين: اي اكو احنا ما نحجي وياها امشي بسرعة المرة دوختها الشمس بس لاتكولين احنا كنالج كولي اني شفتها
هزيت راسي ورحتلها للغرفة لكيتها كاعدة وحدها لزمت يدة الباب وكتلها: بيبي هاي مرية تريدج بالباب واكفة
حفصة: ياهي هاي
ماعرفها بس واكفة بالباب وماتقبل تدخل تريدج.
كلتها وصعدت فوك يم البنات مجتمعات بالغرفة ريا ورهف يقرن بكتب ورفل هي وردة يتابعن مسلسل جوري نايمة كعدت يمهن شوية وصعدت لغرفتي صليت ونمت للعصر كعدت على جية قبس عاكد حواجبة وصافن انتبهلي باسني بخدي.
هلو من زمان اجيت
اي
ماحسيت بيك
نومج ثكيل
شوية
قشعر جسمي من تلمست ايدة بطني رفع عيونة يباوع بعيوني ويسالني.
اشتهيتي شي؟
مشمش مجرش
صار وبعد
بقلاوة مثلجة
رفع حاجبة وابتسم
شنو هاي
هي بقلاوة بس باردة كلش
بعد
بس.
كولي لاتخلين شي بالج
خليت راسي بركبتة تنفست ماخلاني بعدني عنة
شهب: بس اشتم عطرك
ورة الفطور بس لا تسوين هيج هسة
ماسويت شي بس اشتهيت اشم رگبتك
عض شفتة يهز براسة منا ومنا خليت المخدة جوة راسي وكتلة: نيتي مو نفس ممتتخيل
قبس: هو بس تتنفسين عقلي يطفش افضل تبقين صامتة بشهر رمضان كلة
هزيت راسي وكمت بدلت عفتة ينام رحت لغرفة نيزك دكيت الباب جفلت بمكاني من فتحة ضرغام بقيت مثل التمثال بس اباوع بوجهة فتح الباب
ادخلي.
لا بعدين اجي
ذب نفس بوجهي واشرلي ادخل دخلت من الخوف طلع برا تقربت يم نيزك نايمة على وجههة وامير بصفها نايم كعدت يم راسة رفعت شعرة وبست فتح عيونة ذبلانة ابتسمت بوجهة وسحبتة بحضني حضني بقوة بهمس كتلة.
شلونك حبيبي؟
باوع بالغرفة وكلي
ما اليد هنا اليد وياس
تروح وياي للغرفة
هز راسة اي ونزل يسحب بيدي باوعت لنيزك نايمة بس اخذة وانزل خاف عبالها بية شي ندهتها وبصوت خافت كتلها...
نيزوكة اخذ اموري راح
اممم
اخذة؟
اخذية.
تنفست براحة من جاوبتني اخذتة ونزلت جوة كلهن كاعدات يطبخن امير ضام راسة بدشداشتي يسحب بية برا صاحت ذهب من بعيد.
تعال حبوبا احبك
اخذتة الها باستة وطلعت الف خلتة بيدة كالت
ذهب: شلون صرت هاك يبعد حبوبتك اشتري موطة
هز راسة ساكت طلعتة برا يلعب وي رضا بالعابة
كعدت اباوعلة ودخل فقار شايل ود بس دخلت صارت تبجي كمت اروح اشوف شبيها هزت ابوها تصرخ.
ود: ماريد هنا ماريد حباب اخذني منا.
فقار: شلون بابا شلون مو النهار كلة ما داخلين البيت
طلعت دعاء تركض سحبتها منه هي مجلبة بابوها
دعاء: تعالي حبيبتي يعمري ود عيب تبجين ومجلبة بابا خطية تعبان تعالي تعالي
ود: ما اريد اريد بابا
دعاء: خلي بابا يرتاح ويسبح بعدين نروحلة ويطلعنا نشتري حلويات والعاب
استمرت تحجي وياها وتقنع بيها تعوف ابوها وفعلا اخذتها شايلتها كاللها فقار.
بلا زحمة عليج سبحيها وبدلي ملابسها.
دعاء: تدلل ود اسويلها ضفاير حلوة لو تردين مثل باربي شعرج؟
ود: مثل باربي اريد
دعاء: صار صار يلة تعالي اسويلج
ذب نفس فقار يمسح بوجها صعد لغرفتة واحنة نلعب طلعت لازمة ود مسبحتها ومشطة شعرها تضحك بيها اجت تلعبها بالالعاب دقايق وراها نزل فقار من بعيد يباوعلة مبتسم ودعاء تكل لود
سوي بوسة لبابا
سوت وحدة شمرتها لفقار بحجة تعلم ود وتسوي مثلها وفقار يضحك الها ويسويلها بيدة باي.
اخذت امير صبيتة اكل بردت اله اوكل بية دخلت سندس جانت برا البيت ذبت عبايتها وصفكت بديها
خو انتي واختج خطاطير تنزلن على الحاظر تلكن الاكل جاهز
ياسمين: البنية حامل وصغيرة عوفيها قلت نسوان
سندس: ذيج اسيل هم حامل وتشتغل ماتكول لا هي واختها شاردات بغرفهن.
عفتها تحجي مارديت علية اكلت اني وامير غسلت الماعون امير يسحب بية نطلع بس مايحجي ولا يسولف ذاك هو ذبلان التفتنا على نيزك مفرعة وجههة احمر يصب عرك شافتنا ولزمت كلبها طاحت بالكاع ركضت الها وسهلة غسلت وجهها بمي بارد
سهلة: شبيج اخذي نفس كولي يا الله
سحبت امير الها تكلب بية حضنتة لصدرها
نيزك: عبالي صار بية شي كلبي وكف
شهب: مو كتلج راح اخذة كلتي اخذية
نيزك: ماكتلج اخذية يمتها كلت.
سكتت وهي كالت اخذية صعدت اخذتة وياها بس وصل فوك صار يبجي نزلتة لابسة شالها فلت من ايدها وراح يركض بالحديقة بقت واكفة تباوعلة
نيزك شكلولة الدكاترة؟
مابية شي يكولون امعائة نظيفة
لعد شلون نزف من حلكة
يكولون يمكن عاض لسانة بس لسانة مابية شي كالو واكع احتمال واسنانة ضاربة اللثة افففف ماعرف بعد لا تسالين تعبت اني كلشي ولا ابني هو باقي خيط براسي بعد.
اجة ضرغام وبنفس الوقت اسيل طلعت لابسة تريد تطلع تقرب على نيزك يسالها وهي اجت نعمت صوتها وبوجع لازمة بطنها بارزتها تكلة.
اسيل: ضرغام بطني توجعني اخذني للدكتورة بعد ما اتحمل احس راح اسقط
باوع بوجهة نيزك دارت وجههة وراحت لبعيد كاللها
واني وين اعرف بالدكتورات اخذي امي وروحي يمااااااااا
طلعت سهلة تركض
ها يمة
هاي اخذيها للدكتورة.
اسيل: شبيك ضرغام شبسرعة تغيرت علية حتى كمت ماتصيحلي باسمي شغيرك دا اكلك راح اموت من الوجع امك تاخذني مشي
لا هذا ابوي ياخذجن اني تعبان يابة تعال اخذهن
خلة بيدة المفاتيح ودخل جوة بعدة ماصاعد وصاحت بصوت تبجي وتعصر بطنها رجع باوع نيزك خازرتة صعد فوك وسهلة اختبصت بيها الا تاخذها كالتلها: بطلت ماروح لغير يوم
سهلة: لا امشي هسة ماطول تحضرت
اخذوها وراحو حفصة كاعدة تحجي.
انكسر خاطري عليها هاي لو مرتة ذيج كلساع شايلها وطافر بية هاي وحد هم مرتة وام ابنة
ذهب: هسة انتي شعليج بيهم يمج كرباج
حفصة: هو انتن تلفن على الزلم لف تخلنهم ينسون حتى اهلهم تدافعيلها لان مثل صنفج
ذهب: والحسين غمة لو مو غمة جان عرفت شحجي وياج بس بعد غمة
حفصة: هسة شلون تخليني اكوملها
ذهب: دكومي بلة كومي اشوفج شتسوين
حسين: ررررررررمضان كررررريم
ضربتة بالعكازة ماصارت بية طفرها.
حفصة: وكون سم وغسل اليغسلك يا عار
محسن: شبيجن تتناكر مو يكلجن رمضان حرام وانتن صايمات
باوعتلي واشرت بيدها تحاجيني
تعاي الصفرة تعاي
ها بيبي
شلون تكليلي مرة بالباب تريدج وينها ولج تجذبين علية طلعت ما لكيتها
باوعت لحسين ومحسن ردت احجي وبسرعة حسين كال: حتى اني شفتها بيبي وكالت اريد حفوصة هسة
حفصة: انوب تعرفني بالاسم شو ماكو
محسن: يمكن طكتها الشمس وراحت
حفصة: يا منين هاي انوبة.
عفتها تفكر وتسولف بالمرة لاكتني ورد هستوها كاعدة من النوم
ابوي جوا
لا
ورضيو
جوة يلعب
اشتعلت روحة يلعب وياكل ويشرب واني لا
نزلت تركض صعدت لغرفتي...
لليل مثل كل يوم بالحديقة كلهم يجتمعون ويلعبون طاولي ودومنة الزلم بينهم كل ثنين نعمان وي جواد وعدنان هو وفرقد والنسوان كل ثنين سوى صواني حلويات عصاير وكارتونة مي بارد
اكلت وصعدت لغرفتي اتابع مسلسلي اخذت امير وياي غفة خطية اجة قبس شالة نزلة يم سهلة.
رحت بدلت وتحظرت خليت مكياج افتريت يم قبس وكتلة بابتسامة: شلوني حلوة
باوعلي بهيام هز راسة وزحف سحبني من ايدي وكعني بحضنة خلة شفتة على خدي اخذ نفس وكال بخفوت: تخبلين
اريد اخذ صورة
موبايلج مو امان اني اخذ بس شكلج
سحبت تلفونة مثبتني اخذنا سلفي
شهب: الله والله حلوة تخبل دزها إلى فدوة
ساكت يمشي شفتة على وجهي وصل لاذني سحبها باسنانة...
بيدة العطر رش منه وكال
باجر طيارتي مسافر اني
وين مسافر؟
شغل عندي
بس انت؟
اي.
شكد وترجع
ماعرف سنجوبة
واني
ارجعلج
من شاف ملامحي المستغربة بقرارة المفاجأ اجة كعد كدامي سحب ادية باسهن وكلي.
حافظي على نفسج والي بطنج ارجعلج اني
وابقى على تواصل وياج
لمعت عيوني بالدموع وكتلة
حطول
اشوف ما اطول لخاطرج
هزيت راسي وصوت الطبل عالي نزل يتسحر نزلت وياة انعس بس اريد اشبع منه شوف كلبي واجعني من روحتة تعودت علية كلش، ما جوعانة بس احب من يخلي اكل كدامي ويصبلي جاي حتى يخوطة إلى احس نفسي اريد اطير.
تسحرنا ونيزك وضرغام ما نزلو اسيل بقت عينها على الدرج مكسورة عبالها ينزلون. رحت وي البنات للمطبخ الصراحة كلشي ما اسوي لان قبس ما يقبل وهواي حجي يسمعنا كلت اساعدهن بالمواعين.
اباوع من الشباك جوري وضيغم كاعدين واحد مقابيل الثاني هي تسولف وتشرح بديها وهو يسمعلها مبتسم ماكو شوية وطفرت عليهم ورد طفرت جوري خلتها تدخل اجت معصبة تصيح.
جوري: الا تخلي روحها بالنص ماتعرف خصوصية صخام
صعدت واجت وردة تصيح.
شبيها هاي الخوينسة شردت مني اشافت بعبع اني اعلمها الخايسة
ورد: صعدت ورة جوري طنكورة احساس احس تركيبتها غريبة مرات احسها مو اختي اني وين هي وين سكتت من شفتها اتابع مسلسل ضربتها على ضهرها كمزت وصاحت.
جوري: يبووو شبيج هم وراي ازعاج ازعاج اخذ تليفوني واروح بغرفة بيبي ذهب
ورد: دولي جوري احساس.
فعلاً راحت الحساسة انقهرت عليها شو اني بس ازعج بيها هم خطية شوية ضميري أنبني ورجع مات بعد الجامع ماصايح امسكاك هجمت على حلوياتي طلعتهن من جوة الجرباية فتحت عصير وكوكو اكل بية وانفتح الباب دخل تميم جمدت بمكاني من شفتة وعيونة كصتني شربت عصير حتى ابلع اللكمة واشرت بيدي يطلع بس الخلاني ارجف دخل وسد الباب العصير صار يرجف بيدي
ورد: اطلع منا شعندك هنا
تميم: وردة
اطلع منا لا اصرخ.
ضحك وخلة ضهرة على الباب طلع باكيت الجكاير سحب وحدة شغلها ومدها باتجاهي.
تميم: تاخذين نفس
اطلع منا راح يجن البنات
فرصة اسحبي نفس تعالي بس خليها بشفتج لاتسحبين منها
يحجي بصوت ناصي ذبلان رحت للشباك فتحتة وكتلة: بس ماتطلع اصيح اخوي
فتح الباب وغمز بعينة كال
تاخذين منها نفس وانتي الممنونة.
طلع وركع الباب بقة جسمي يرجف حتى نفسي انسدت شمرت العصير والكوكو بسلة الزبل وسمعت الجامع يصيح امساك نزلت اركض شربت مي ابللت ملابسي وضيغم يصيح بية من بعيد.
علي كيفج مو هيج
مو شسمة بعد ياذن
مر مني قبس كفخني وكال
خبلة
ضيغم صيح بية هسة اني محاجيتة يضربني ويكلي خبلة بكدة اني
ضيغم: هسة شبيك بكد الزمال عقلك مخلية وياها الا اهينك واطيح حضك
قبس: عفية عفية علمود وحدة خبلة هيج تكلي
ضيغم: وردة الوردات هاي.
شمرتلة بوسة بالهوى وبقيت افتر بالبيت لاكتني اسيل فحطانة ماعرف شجانت تسوي مرت مني وراحت مديت راسي لحفصة تصيح.
يمة فلك انبكت باكوني يماااا
دخلت يمها وهي تحسب بفلوسها
شكو بيبي
انبكت حبوبا راحن فليساتي
منو الياخذ فلوس ماعدنا احد يمد ايدة على فلوس غيرة
لطمت على صدرها تصرخ فحطت
ولج حبوبا نبكت تعلميني
اجة ابنها وكعد يمها يحجي وياها طلع فلوسها يحسب وياها ومنا ومنا يجمعون كلها
هاي هية فلوسج محد ماخذ منج شي.
يااء جا تعلمني انبكت اكلة تحجون صدك
هسة احسبي وياي
بقة يعد ويحسب مني دخت وهي المرة داخت تكلة
جا انا متوهمة بس والله ما متوهمة بعد عندي فلوس
لا يمة متوهمة ذني كل فلوسج
عفتهم وطلعت للحديقة اريد العب بالمرجوحة مشتاقتلها وكفت بمكاني من سمعت ضيغم يهدد بقبس وبصوت عالي ينتر بوجها صاير ناررر.
ضيغم: وحق الله يا قبس اخذهااااا تعرررف شنو اخذهاااا واركع راسك بالف حااااايط لان انت زمااال.
شهكت وخليت ايدي على حلكي من ضربة بوكس قبس يصيح بية متخبل.
قبس: انعل ابوووك وانعل خيررررك شعلييييك شعلييييك والقرررررآن اكتلك مووووت بس تتقربلها
ابتعد عنة يصيح
ضيغم: اخذها وكول ما كال اذا ما اندمك ما اطلع اني ضيغم جوووواد
لحكة قبس يرجف اعصاب دفعة من صدرة راد يوكع ضيغم من وراة.
قبس: انهي حيااتك لا اعرف ولا تعرفني انسى احنا اخوان ولد عمممم انهييي كلشييي.
ضيغم: واني ما اتشرف يكون عندي اخ مثلك انتهت من هسة خوتنا ومن هاي اللحظة لا اعرفك ولا تعرفني ما سمعت كلامي وتجاوزت رفعتتتت ايدك علية
رفع ايدة يضرب بيها وجهة يريد يطك من العصبية يصيح محترك كلبة.
ضيغم: هاااي ايدك هاااي رفعتها علية وضربتني انتهيت انت بالنسبة الييي لك تعرررررفني كلكم تعرفوني الاحتررررام مبدئي بس انت زماااال
وضيغم بعد مايعرررفك ررروح وطز بيك
انطاة ضهرة ومشة صاح وراة.
قبس: روح ولك اني هم مالي غرض بيك وانت انهيها وياي لا تدخل بحياتي
وهو يمشي كال بحركة
ضيغم: ماتعرفون ضيغم ولكم عندي حنية اوزعها على العالم ماتخلص لا تستفزوني بالاذية اخذها وخليك تبجي تتوسل اذلك اذلك
راح لحكة هجم علية من ضهرة كلبة ضيغم وضربة بوكس نزل علية بوكسات بصدرة سحبة قبس من صدرة وكعة وضربة على خشمة ضربة خلاة ينزف
قبس: لا تخبلنييييييييي لا تستفزنييييييي
ضيغم: اشعل رررروحك شعععععععل.
ضربة واجة فقار فاتح عيونة على وسعهن صار بنصهم وضيغم لازم خشمة.
فقار: شبيكم ولكممم زعاطيط انتتو شنو هاااي شنوووو
قبس؛فقار خلة يركزززز بحياتة يعوفني كلة فهممممة
رفع ايدة ضيغم واباستفزاز كلة
حياتي اليعجبني اسويه واني اعلمك
راح يهجم قبس علية لزمة فقار جابة براجدي خلاة جامد بمكانة للحظة حتى ضيغم وكف واندار مصدوم يباوعلهم.
فقار: ليييش ووولك تهجممم علية يكول عدووك وهو اول الناااس يفزعلككككك.
اول الناس يركضلكممم بس انتووو ماتستاهلون واحد نفسة الجلب احسن منكمممم
اشر قبس علية مهضوم وكال
هو يتدخل بحياتي ويحرگ دمي
كمل طريقة ضيغم طلع من البيت وبقة فقار متخبل يصيح بقبس.
فقار: احن من امكك عليك يردلك الززززين ضيغم صار مو زين هسة هاي عظلاتك تطلعها على ابن عمك ولا هيج ولا هيج ضغيمممممم.
هز بيدة ولزم اعصابة لو بية يجيبة براجدي ثاني بس لزم اعصابة وطلع ورة ضيغم بقة بس قبس بمكانة يضغط بيدة ويفتحها مشيت اتختل لا يشوفني ويذب حركتة بية.
انداريت رحت لغرفتي كلبي يوجعني على اخوي ماتحملت ونزلت دموعي من اتذكركة يكول
عندي حنية اوزعها على العالم ماتخلص
صوتة والغصة البية ماتنوصف احسة صدك انكسر منه هو يموت عليهم ماعندة اخو جبير معتبرهم اخوانة يكول ماعندي ولد عم عندي اخوان.
توضيت وصليت ادعية والله كلبي نار علية البنات نامن طفيت الضوة و نمت بفراشي مايجيني النوم بالي يم ضيغم...
غفيت شوية واحس ايد حارة تجوي تتلمس بطني وعيوني اريد افتحهن ماكدر احس جسمي متبنج بس احس بكلشي اريد بس الزم هاي الايد تروح وترجع وتعصر بطني بقوة وترخي ركبتي احس بيها نفس وشي يبززني تمنيت لو اكدر اصرخ بس صعب علية.
تحركت ماعرف احد حركني وصوت نفس بذني يهمس همس.
اخذي نفس.
شي تخلة بحلكي ورجع انسحب بوسات حارة انطبعت على رگبتي وانعصرت شفتي بقوة احس بوجع بيها مو طبيعي.
فزيت الهث والنفس كوة اسحبة باوعت محد يمي والدنيا نهار البنات كاعدات ذني يدرسن مبسطات بكتبهن ورفل اتابع بالمسلسل باوعتلي تكلي...
باوعي هذا المسلسل يخبل.
باوعت داير مدايري ماكو شي كمت للحمام اباوع لشفتي مابيها شي ورفعت اشوف بطني من اتذكر المسات تمغصني غسلت ركبتي بمي واتذكر البوسات هاي حلم لو بالحقيقة شلون بالحقيقة هيج.
نزلت لجوري لكيتها بفراشها امددة وتلعب بتليفونها كعدت يمها صاحت بية: اهووو هم لحكتيني
ردت احجي ماكدر من شافت شكلي مو طبيعي شمرت التليفون وعدلت كعدتها بخوف تسالني
شبيج وردة.
جريت نفس باوعت للباب محد والغرفة فارغة تقربت منها ولزمت ايدها احجي بخفوت.
باعي من نمت حسيت.
سكتت ماكدر اكمل استحي حتى ماكدر الفضها شجعتني تكلي كملي دنكت عيوني وشرختلها
حسيت بيد تتلمس بطني وبوسات بركبتي
يمتها
واني نايمة
ماكمتي ماصرختي؟
ماكدرت احس متبنجة
حلم هذا عبالي وكف كلبي
ذبت نفس ورفعت موبايلها كملت تكلي
هاي شوفي شنو شفتي من لقطة فاسدة وتحلمتي هيج
ماشوف هيج لقطات والله
لعد شوفي تخيلتي شي ونمتي حسيتي هيج.
فتحت عيونها بقوة انصكعت بمكاني تقربت تهمس
اكلج خاف هذا القرين جاي اقرا عنه هواي هم هيج يسوي
يمة شنو هذا انوب
لا تخافين هذا بكل شخص يمكن يحبج
كمت منها اهز براسي وهي ضحكت تكلي
اتشاقة وياج لاتصدكين هذا حلم الواحد كلشي يتحلم بس حسيتية حقيقة لان قبل لا تكعدين تحملتي بيه
هزيت راسي وصعدت خايفة لاكتني شهب عيونها حمر شافتني برطمت.
ها شبيج
قبس سافر.
تعالت انفاسة وذابت نظراتة لمعت عيونة وبصعوبة نطق: رايدج نجوم
نجمة: موجوده اني اي شي تحتاج يمك
قدمت ايدي اشرح بحسن نية وهو صافن بية
اذا عندك سر شغلة صعبة سولفلي اني احب السوالف وخاصة الاسرار احتفظ بيهن
عيوني راحت لمكتبة هز راسة
يا اسرار اني وين وانتي وين
اكو اسرار بهذا المكتب
لزم راسة كعد على الكرسي خلة رجل فوك رجل ومرر ادية لازمهن سوى.
بلة شوفيني الاسرار سولفيلي.
ردت احجي ولزمت لساني هسة يكول ادور بغراضي هم عيب والله اتفشل سكتت وكتلة
انت اذا عندك اسرار كلي لا تروح منا ومنا
ابتسم بتعب وكال
ماعندي منا ومنا
استاذ هسة ارجع لمكتبي اكمل شغلي
اكول نجوم
نجمة
نفس الشي
المفرد والجمع ثنينهن يضون
ابتسم واني رحت لمكتبي اضحك واحجي
نجمة: حفظت هاي العبارة استاذ طبعت براسي
حتى دوم اتذكرها
كعدت ورجعت لكيتة يضحك كتلة
كلتلي سؤال وينة؟
بجيبي.
مد ايدة لجيبة رفعت عيوني لوجهة يضحك ذبيت نفس مسح وجهة وكال مبتسم مايكدر يضم ابتسامتة.
فقار: نجوم لو انتي بيج شي لو اني بية شي
اني مابية شي استاذ يمكن انت بيك شي
كام من مكانة افتر وكال
فقار: الحمدلله مابية شي بس انتي راد لعقلج توسيع
لزمت راسي حسيتة يضحك علية ماحجيت وياة ورجعت لمكاني مطنكرة خلصت الشغل وطلعت
ماحجيت وياة بعد رحت لغرفة ضيغم ما لكيتة من نزلت اطلع للبيت لكيتة واكف برا يخابر.
رحت باتجاهة انتبهلي خلص اتصالة واندارلي
نجمة: ها استاذ شنو ماعرفت شي عنها
ضيغم: بعدني بالبداية يحتاج وقت الكاها
لمعت الدموع بعيونها تريد تحجي ماكدرت ابتسمت اطمنها: اسبوع واجيبها الج لاتهتمين واخواتج كليلهن رحتلها وشفتها حجيت وياها ماتريد تشوفجن
فتحت عيونها مصدومة كملت اشرحلها.
حتى مايرحن الها ويكتشفن خليهن يحقدن عليها بالاخير يعرفن الحقيقة ويعذرنها بس هسة خلينا نشتغل ونلكاها اول بدون مشاكل وبدون ما وحدة تتاذة منهن ام امير كلش ماتتحمل وكلبها تعبان
عفتها وطلعت بسيارتي اسال وادور على غضنفر هواي انطوني اماكن تخصة وكل مكان اروحلة ما الكة اي اثر اله فص ملح وذاب هالولد!
طبكت السيارة ونزلت يم شخص اسمة حربة كالو صديقة ومبين شغلة بالاسلحة والعربدة سلمت علية يباوعلي بعين وحدة عينة الثانية مخصومة
ضيغم: اريد عنوان غضنفر
دك صدرة بصوت ثكيل خشن كال
حربة: اني موجود بيش اكدر اخدمك
اريد غضنفر بنفسة
احنا واحد كلنا ولد شارع وشغلنا واحد
ما اختلفنا عندي موضوع شخصي وياة
باوعلي من فوك ليجوة وطلع جكارة قدمها إلى رفضتها دخنها وكلي.
محد ينطيك معلومات عنة لو شما تسال
اكدر اعرف السبب؟
لا هو يغيب ويرجع محد يسال عنة
حتى لو بشغل
اصحاب الشغل معروفين انت مو منهم
عاجبني اصير منهم من الاخير شكد تريد وتنطيني معلومات عنة
اني ماكدر اكلك وين بالضبط بس احتمال مؤكد تلكاة بالاماكن الراح اكلك عليهن
حرك اصابعة بمعنى فلوس ومد ايدة طلعت محفظتي وطلعت مبلغ خليتهن بيدة ضحك يحسب بيهن.
حربة: هواي كريم انت
ادفعلك اضعافهن لو عرفت مكانة الصحيح.
كون هيج اخذ رقمي نتواصل واذا ما لكيتة اني ادور علية بكل زاوية خايس ومكان خايس
اخذت رقمة وطلعت بسيارتي للمكان ما لكيت احد وسالت محد انطاني جواب بعدها رحت للمكان الثاني ونفس الشي محد يعرف شي عنة اتصلت بحربة وكال.
اجيب اخبارة وعنوانة بس انطيني وكت
تعبت ونفسي ضاك وكل ما اتخيل هي بنية وبمكان خطر ومجهول تفتر الدنيا بية هالمرة حالف لو رجعتها ما اخليها تشتغل بالشارع ولو اني لو هي.
صح ماعرفها ولا تعودلي بس ينكسر كلبي عليها واشوف اخواتي اشوفها.
رجعت لدراهم وهي الوحيدة التطمني احس هاي مسؤليتي ولازم ارجعها.
دراهم: ها يبن الناس رجعت
ضيغم: فارغ
مو فارغ ترجع متروس
كعدت يمها وبفضول سالت
شنو تعرفين عنها
دراهم: هي تكلك
هي ماتسولف تعاملت وياها من قبل وصارت
صدف ومواقف تجمعنا بس ماعرفت الا القليل
اصبر وبليلة ويوم تعرف كلشي
بس لا تعوفها
ليش؟
غريبة، وحيدة، يتيمة، مكسورة تتظاهر القوة.
ضايعة منتظرة واحد يلمها
ليش الا اني بالتحديد!؟
ليش شفتها وتعاملت وياها؟
هي اجتني هي خلت عيونها علية وعلى سيارتي
بالذات هي غسلت جامة سيارتي
ها هية اختارتك من بين العالم لان شافت بيك حنية خليك وراها وجزاتك على الله
راح اجيبها واخليها تعيش براحة
تعيش مثل البناات المرتاحات.
الك بيها يبن الناس وعلى الله جزاتك
واخذها من منجمة قديمة واحفظها
الحية الدغت الايد الوكلتها انكص راسها.
وصاحب الحوبة والمظلوم يم الله رافع راسة.
وادور بيك الدنيا وتلف ماتلبس ولا يرهملك ثوب غير ثوبك.
كواكب: دكات كلبي تنبض بقوة وانفاسي ثكلت من سمعت كلمة اجاج الكفيل
فر راسي فر بلحظة وكمية تساؤلات منو الكفيل؟
اني منو إلى منو وراي منو يسال عني بهذا حالي؟!
طلعت وياة يسحب بية تحركت وكلني فضول اشوف الكفيل لحظة وحدة جمدت وفص عيني وكف من شفت ميار
اي ميار كاعدة بكل اناقتها وعطرها يهفهف بالباب ولفحني كامت من مكانها تمشي بكل ثبات وصلت يمي وكالت: هلو شلونج؟
رمشت بعيوني ماكدر استوعب وجودها هنا وكانها قرت افكاري وكالت.
امشي وقعي خل نطلع لان انقرفت من هذا المكان
تقدمت اوقع وابصم اوراق خلصت كل الإجراءات وطلعت مامصدكة خلصت مابقيت اتعفن بالسجن
طلعت خارج جدار السجن رفع راسي للسما ضحكت ونزلت دموعي وبدون تكلف حجيت.
كواكب: شكراً يارب عبالي محد يطلعني ماعرف راح ادزلي ناس يطلعوني من السجن ما خليتني اعفن وافقد الامل شكراً لانك قريب سميع الدعاء.
مسحت عيوني والتفتت على الصوت طلعت ميار والضباط وراها ياكلون بيها اكل بنظراتهم سوتلهم بيدها باي طلعت بصمتها فتحت السيارة واشرتلي صعدت فكرت ليش اروح وياها خليني اشرد منهم درت وجهي ومشيت عكس اتجاة سيارتها بس عبرت الشرطة طكيتها ركضة واني روحي رايحة ماماكلة شي ودايخة وكفت اجر النفس جرر فركت عيوني معقولة اتخيل الاعرج لو هذا هو وسيارتة!
طلع من سيارتة اشرلي بيدة يضحك رجعت منين ما اجيت ارجع وي ميار ولا ارجع وياة سيارتة طاكها السموم والحر خفت الكاها رايحة بس لكيتها بعدها متحركة تباوعلي من الجامة فتحت الباب وصعدت عطرها والهوى البارد لفحني صعدت وسديت الباب باوعتلها عيونها ليكدام بدون ما تباوعلي كالت.
رجعتي؟
لكيت الاعرج الاصلع ابن المطي
ضحكتت بقوة وباوعتليى
ميار: وتغلطين
انعل والديهم
لسانج طويل
شابعة تكفخ بس هم اكفخ اليحاجيني
عجبتيني صراحة.
حتى انتي صراحة
نثرت شعرها بدلع وشغلت السيارة ومستحيل اعبرها اذا ما اشبع فضولي واخذ معلومات عن كل شخص قابلتة وتعرفت علية منهم احفر سيرتهم بعقلي حفر
كواكب: ميار انتي منو؟ وشنو علاقتج بالاعرج
اني ميارة العيارة حبي
هم سمعت واضح بس اقصد شغلج
ضحكت بصوت هزيت راسي كلتلها
اعرف بشغلج بس اتوضحلي عندج شغلين بنفس الوقت واحد عادي والثاني لا
التفتت رافعة حاجبها
ميار: شنو قصدج بالموعادي وعادي.
الفهمتية بس اريد اعرف علاقتج بالاعرج
من الاخير ما تبوكين لساني
ها تمام هسة انتي وين ماخذتني
لمكانج
زين ليش اجيتي طلعتيني
الاعرج طلب مني
اي شنو علاقتج بية
اريد اعرف انتي شلون باقية وياهم بهذا لسانج
الاعمار بيد الله
عرفت مو بسهولة احصل منها معلومات هاي داهية هاي للحظة غزت عقلي الافكار واجيتها باسلوب ثاني
كواكب: تعرفين اني خاطفيني بالتهديد والاجبار مخليني يمهم؟
ميار: صيري ذكية واشتغلي بفلوسج وانتي بعدج صغيرة بين ماتكبرين بانية مستقبلج
من الحرام ابني مستقبلي
المثلنة مايعيشون بالحلال صعبة عيشة الحلال
شكد ما تبني بالحرام ينهدم لا تناقشيني بهذا الموضوع
تمام
اي ميار ساعديني اطلع اطلبي منهم يعوفوني
طبكت السيارة وفتحت بابي باوعتلها بتوسل
ميار ساعديني
هسة ما اكدر اساعدج ممكن بالمستقبل اذا خطرتي على بالي اساعدج.
نزلت من شفت الاعرج واكفلي بسيارتة لزمت دموعي عن لاينزلن وقبل لا تمشي توسلتها بنظراتي ابتسمت وكالت كلمتها الاخيرة.
هاي العيون وهاي النظرة يمكن تجيبني فد يوم وتغير طريقي
شخطت سيارتها رجعت وي الاعرج ماحجيت شي طول الطريق هو حجة وكال.
الاعرج: شفتي شلون طلعتج مثل الشعرة من العجين منين ماتفتر افتر وراها بالسجن عندي معارف ادبرلي شغل خارج السجن مايخسر اليشتغل وياي
هو اليشوفك خسران دنيا واخرة.
ضحك واني بعد ماحجيت شي ضليت افكر وافكر شلون اطلع روحي اني الدخلت نفسي بهيج متاهة وهسة لازم اطلعها الحجي مايفيد اكلهم عوفوني يعوفوني!
وصلت للبيت نزلت تلكتني بلقيس اول ماشافتني حضنتني وبخوف تسالني.
وين جنتي طار كلبي عليج
اريد اسبح كتلني الوصخ جوعانة
انتي همج بس الاكل
خل تنكلب احنا ميتين ميتين كلمن بساعتة ويومية.
دخلت جوة طلعت ملابسي ودخلت سبحت لكيتها محظرة الاكل كعدت اكل وهي كدامي تسال بية حجيتلها كلشي صار رفعت عيوني اشوف معاني وجهها.
بلقيس: تاملت بهاي ميار تدرين
يمعودة هاي ماتباوع لواحد واسقط من السقوط كلشي تريدينها تصيرلج تلعب على رتب وضباط تاخذ ممنوعات تخليهم مدمنين بالاكل ماعرف شلون توصللهم
بعد مادري حسيت
بلقيس لا تحسين شوفيلج غير طريقة
لكيتلج بس تمر فترة اني اشردج.
فتحت عيوني بقوة مامصدكة ولا مستوعبة كلامها
صدك تحجين لو تجذبين علية صدك تشرديني
اي اشردج بس يجي ابن عمي هو يطلعج منا
عندج ابن عم
عندي باعوني برخص بس لاتخافين اني اتفق وياة واخلية يطلعج
شلون يعوفونة ياخذني؟
وياهم هو مثل شغلهم يخلونة ياخذج
مر اليوم على امل جبير صرت انتظر ابن عمها ساعة ساعة وماكو رجعت اشتغل بس بالبيت استلم بضاعة من شباب ادك الباب تسلمني وتروح حسب الطلبات اوزعها ويجوني غيرهم اسلمهم وهكذا.
تعب نفسي قبل مايكون جسدي نهاية مرهونة حياة معدومة وبيوم كاعدة احسب الكميات ما اطلع خارج البيت ماريد اشوف احد شلون اطلع واخلي عيوني بعيون الناس ذنب جبير احس بية اندك الباب رحت فتحتة وكل ضني ولد اسلمة كمية
بس انصدمت من فتحت الباب!
نجمة.
الايام تركض ركض ماعرف شبسرعة يخلص اليوم والاسبوع بهاي الفترة تغيرت هواي اشياء اولهن واهمهم اوضاعنة بالشركة بسبب مرض بنت فقار وحالتها التقهر مجلبة بابوها وكان العالم تريد تاكلها
واستاذ فقار متاذي عليها ومتغير هواي حتى نفسيتة تعبانة.
جان عندة اجتماع وهي ماتقبل تعوفة لغى الاجتماع لخاطرها ما هان علينة نشوفة محتار وضايج كال لسمار وضيغم يرحون بمكانة.
سمار: احتاج قبق ماكدر اروح وحدي اعذروني اخ اروح هسة الحكة وخل اليصير يصير ارجعة سحل سحل للعراق
باوعلي وكلي
خو انتي ارتاحي منة ماموجود يمج العبي براحتج
نجمة: نسيبي ترة شنو السالفة الله يرجعة سالم
سمار: صدكتج عود
جمعنا البنات ودخلنا لغرفتة بيدنا نفاخ وشعالات رحنا يم ود نفر بيهن ونصفك تغيرت ملامحها تباوعلنة باستغراب.
نجمة: عيد ميلاد سعيد يحلوة
فقار: بس مو عيد ميلادها اليوم
استاذ دمشيها خل نسوية ليوم ونحتفل.
تحتفلن بس بنفاخ وشعالات!
باوعتلهن بفشلة كالت رزان
استاذ هاي فكرة نجوم احنا هم ما فكرنا بيها
حكيت خدي وسحبت ود منة كوة جريتها جر منه
نجمة: استاذ مو صايمين شنسوي بالكيك هي كيكة تنوكل
دغدغتها خليتها تضحك والبنات يصفكن شعلن الشعالات تغيرت ملامحها من كئيبة الى سعيدة متونسة اخذتها سما تفر بيها بدون مايشوفها الاستاذ بقيت بس اني يمة وهنا يمها.
ها استاذ روح للاجتماع واحنة يمها والله ما نخليها تضوج ولا شوية ثق بينة استاذ
كعد مسح وجهة بتعب كلي
مو قصة ثقة بس ود تعبت عليها هواي يلا رجعت طبيعية لو خل نكول احسن بس هسة وبعد كل تعبي رجعت للاسوء تعبت نجوم تعبي راح على الخالي بلاش شلون ارجعها طبيعية ماتتوحش من البشر.
ماعرف شكول استاذ بس خليها تختلط بينا عادي جيبها وياك وبالاجبار تتعود علينة نحجي وياها تتقبلنة مثل هسة.
مو مشكلة سهلة هاي بس البيت ما تريدة تتخبل علية بكل وقت هناك احير شلون اسكتها خايف لا يوكف كلبها
لا استاذ لا تكول هيج وعلى مابيها شي ان شاءلله
استاذ اخذها زورها اهل البيت
نجمة هي من صغيرة انصدمت سهلة على الزيارة
شلون انصدمت استاذ هو اني اشوفها مجلبة بيك بس مو هيج عمي قبل احسن بهواي.
قبل كم سنة هي يم امها عايفتها وحدها بالبيت عدها كلب حراسة باقي ينبح عليها ويلحس بيها همزين ما اكلها بيومها صارخة صريخ لدرجة كلبها تاذة والكلب ما عافها الباب مقفول والجيران سمعو الصوت مخابرين امها يلا جاية واتخيلي كل هذا الوقت هي والكلب بهذا الحال
عبست ملامحي ودمعت عيوني
والله استاذ تقهر خطية لو واكف كلبها عاشت برعب الحمدلله ماصار بيها شي.
نجوم شيبتني اخذت من صحتي يلا تعافت واتخطت صارت تروح حضانة وي الاطفال عادي بس هسة لا رجعت للاسوء
ان شاءلله هم تتخطى استاذ روح هسة انت وعوفها يمنا والله بعد نغير مزاجها ونخليها تفرح
ابتسم وكال
ما ملزمين ركزو بشغلكم
استاذ لا تدخل احنا كبار واعيين نعرف شغلنا كلش زين
متاكدة
روح للاجتماع بسرعة بسرعة لاتكلب علية.
كام يضحك راح لود باسها وهي مكيفة وي البنات كلت بس يروح ارزل شهب ليش مايلعبنها بالبيت بس تذكرت من يكول بالبيت مااتريد احد ماتريد البيت
من شافها ملتهية وياهن كال بحيرة
اروح خاف تبجي
روح استاذ احنا نسكتها بس تبجي هسة اجي وياك لو ميحتاج
لا ميحتاج ابقى وي البنات وامانة لاتاخذون من وقتكم بنات
رزان: استاذ شنو قحط مانعرف ندير شغلنا روح انت شوف شغلك الحلوة بضيافتنا
ابتسم بامتنان وطلع سدينا باب المكتب سما اخذت.
ملف صلد صارت تدك علية وذيج تغني وتركص مثل السوريات مو بس ود تضحك عليهن طحت بالكاع من الضحك وهنا مستمرات صارن مضحكة علمودها اخذتها روان من ايدها بلطافة كلتلها.
تنزلين ناكل حبيبي
هزت راسها لا
روان: يا ليش حبيبتي مو جوعانين تقبلين اموت
من الجوع.
برطمت شفتها اخذت ايدها ونزلت لميت ملفات شغلي ونزلت وراهن اموت بسوالفهن وفد فرحانة من غيرلانها جو نزللها بركر وعصير ياكلن ويسولها طيارة ولو هي البنية مثقفة مو مال هاي السوالف تاكل وحدها وبهدوء.
راح الوقت واني مامخلصة شغل خلصتها سوالف اخذت طاولة وحدي اشتغل بيها بعيد عنهن ومناك ياشرلي ويضحكن غميتهن من جوة ماخليت واحد يشوف غصن بالضحك.
واني اكتب واشتغل مندمجة رفعت راسي على عطر شخص غريب رفعت حواجبي مصدومة ومتفاجاة من جيتة ابتسم يباوعلي.
تفضل
زيد اني
اتذكرتك
اي عندي موضوع كلش مهم وياج
عندي شغل لحظة انت شلون دخلت
ضحك بصوت عالي جذب عيون الكاعدين
زيد: عمي صاحب شركة نسيتي شغلنا نفس شغلكم؟
المهم عندي شغل انت فارغ اني مو فارغة
من تخلصين شغل انتظرج برا.
كالها وراح علامات الاستفهام ترسن راسي والبنات من بعيد يباوعلي يريدن احجيلهن شرايد مني سويتلهن بيدي ماعرف وصعدت فوك كعدت اشتغل وشكو شغل زايد عند استاذ فقار كمت كملتة اله خطية مايلحك يشتغل هالفترة.
انفتح الباب كل ضني استاذ فقار لو وحدة من البنات بس طلع لا هاي ولا هاي دخلت امراة ثلاثينية طويلة وجسمها مرتب وشكلها جميل اضلمها اذا اكول مقبول لابسة رسمي كعبها يرن من تتقدم باوعتلي باستغراب كمت من مكاني وكتلها...
تفضلي ست منو حظرتج؟
مدت ايدها صافحتها وعيونها بعيوني كالت
وياج ام ود زوجة استاذ فقار.