رواية مرواد الظلمة الجزء الثاني للكاتبة هيلانا الفصل السادس
رجع عمي وولدة وياهم عمو اعكاب وبعد هم من أعمامهم ما أعرفهم يهدون بيهم بس عمي متعصب
نصير: هدني وليرحم فاضل ولك هدددني اليوم أشيلهم من الصباب
اعكاب: -انعل ابليسك ابو حسن وتعوذوا من الشيطان اعمام أنتم لا تضحچون الديرة عليكم بالعباس زحمة شنهي شمالكم تسدنتوا
طك عمي تفتكة بالكاع وكال: -اييي انا تسودنت ومن كون ما حطيت أجياد وطخيتة بالحوصلة موش ازلمة ولا شاربي أعلية أدرى هوة وراهة.
كالتلة مرت عمي بعصبية: -ااااطلع منها يعكاب لا ادش بالنص من كون ابنك المجتول ماكعدت اتحايز ثار حسن يجبونة يجبونة يااهو كايلك ماعدنة زلم
عكاب: - عوينت ابوي تريدين تجاتلينهم برة برة طبي لاحجرتچ لا توزين ولدج ورجلج
زمخ عليها هزت ايدها ومشت جوة ماعرف شنو من طبيعة هالمرة يعني ما تفكر
لا بولدهة ولا رجلها ماتخاف عليهم شلون هيج تشجع بيهم على المشاكل.
رجع كالة: -السموحة يخوي بس جثرت الثارات ما تولد غير البغض والكره وكل يوم طايح واحد من الوليدات وضن بعد ما بينة حيل نتحمل فگد واحد موش موت حسن هد حيلنا وكسرنة
: اكلك كعدة مااااكعد الا أجيب ثارر حسن
: -ياهوو كالك بيت سالم وراهة
: اناااا ادري
الكل ساكت ديسمعون أبوهم ومبينة نار بعيونة وكلبة مليان حقد هو صح حقة بس يعني
عمي عكاب هم ما يلام يعني اذا واحد يكتل من الثاني بعد ما تخلص الثارات.
رجعت نمت بفراشي. وأني أفكر أشلون تخلص
وشوكت أرجع لبغداد
معقولة هنا تنتهي حياتي وأضل طول عمري هيج
وأموت وحيدة بمكان غريب
ونبي أني خطية يربي فدوة ما تباوعلي
عينك عليه يتيمة ومحد إلى ويداعيلي
وراهة بكم يوم
أشرب حليب مال أصخول هو صح بي زفرة بس طيب كاعدة بغرفة رضية وحدي أتعشة
وأسمع أعياط مرت عمي طبعا هي هيج بلادي تحب أتعيط وتسوي أكشن بدون سبب.
تاخذلها عرگة وياي ودكلي صويحبج البغدادي كتل أبني أنوب تعيفني وتفرها على ولدهة
مابيكم خير ما دورتوا كتال أخوكم وأخذتوا ثارة
وراها ترجع على بناتها هم شوية تملح ريجهه بيهن
بعدين يعم الهدوء وراها هيج قبل النومة نكعد اندك جوبية وهي هم تجي فتكب العيطة
ماعرف على شنو بس مستلمة الولد خطية تهد عليهم غير هدة عندي ضغط عندي سكر وأنتم أدكون جوبية
عبالك همة دكاترة وما يعالجوها وراها تتعارك شوي ويه عمي هم.
ورضية تحاول تراضيهم مو ميتة عليهم بس حتى حياتنا تمشي لعد اذا يضلون يتعاركون يسونها زقوب علينا
هاي مرت عمي رضية اعتقد ما تحب عمي ولا تغار عليه ولا جنه مرتة الصغيرة دوم منطيته لليسرة
افلاحة املاجة وطبعا كل يوم احنا على هالوضوع
واني هم كمت اسلك الهم قابل شسوي
واليوم أتعشيت حليب وخبز اشعير لان مالحكت على عشة وياهم جنت أغسل أماعين يم البحيرة ومن أجيت لكيتهم مكملين عشة.
ومرت عمتي كالت ضميتلج مركة شجر بالموكد بس الشرادة أكلتهن
الشرادة البقرة هاي المتوحشة ودوم ترفس.
احسهه ماخذة خاوة علينا حتى عشاي تاكلة
رجعت للغرفة رضية لكيتها مشغلة نار بالمنقلة
والغرفة دافية واكو حليبة حميتها وكعدت اكل
رفعت راسي من دخلت عذراء تبجي أجت تمسح بدموعها أخذت الكلاص الحليب من ايدي
خلتة على صفحة ونامت بحضني حجت وهي تبجي مخلية راسها على فخدي
: -أزنيبة متت قهر وجج كلبي طك.
جاوبتها وأني أمد أيدي أخذ أكلاصي مال الحليب
والله حليب الصخول طيب بس طبعا مال البقرات
بعد أطيب حتى الكالوسيومات زادن عندي نهار كله أتريك واتعشى حليب
: -شبيج أمج وياج ماكو غيرها
رفعت راسها: -منهو كالج أمي
: -ليش منو غيره سابينة أسباية
: -اي امي دكلي بنات عمج أتزوجن وبذرتهن ترست الربضة و أنتِ لادفع ولا نفع يمي بعدج بعگل ياهل
: -هي أمج شبيها مستعجلة على الزواج بعدج أصغيرة
: أندري
: -شگد عمرج
: -14.
: لعد بعدج شسالفه
: -موش احنا الزوم نتزوج كبل ال18 عبن التعبر18
يطلع عليها حجي ويكولون محد يايهة عايبة
: شنو هالمسلتة بعدج طفلة
: -اي والله أحجي ويه امي
: على اساس هي امج شلون تحبني وتاخذ كلامي
اوف أتخيل تزوجن يمة وأضل أكرب وحدي
حجت بضحكة: -اخرتها ناخذ رجل
: لعد اني هم ازوج لو يرجعوني لبغداد شكو باقية هنا لا يمه ابقى بس اني والولد اطك واموت من الضوجة
: -يااع منهو يرضى تزوجين عبن أنتِ هساع ارملة المرحوم.
: اهوو اشلون سالفة الله يرحم حسن شنو محلفكم ما ازوج يجوز اني اريد بيت وعائلة
: ايع مفلفلة اشمالج
: -والله ماادري
لمت اديها وغمتني وكامت، رجعت أشرب حليب دتخيل حياتي وحيدة
البنات يزوجن والولد هم يزوجون كلهم وابقى وحدي
لا ولد ولا تلد واعيش وحيدة يمة دخيلك ياابو الحسن
ثاني يوم جنت أنضف بالديوانية هاي الديوانية صايرة بربضة شوي بعيدة عن ابيوتنا
وعذراء يمي لازمة الدلة مال الكهوة وتصيح
: -تكهوة ياشيخ تكهوة.
: دكعدي لا يجيج عمي
: ماايييي اليوم عمج بالسوك عبن صار رئيس جمعية
تفاجت ذبيت المخدة من ايدي: -شوكت هالحجي وليش هسه دريت عود ما دكلولي وياكم
: البارحة وهوة أنتِ قير نمتي يم رضية ومادريتي وهساع كتلج ماضميت عنج
: -ايي تمام زين شنو رئيس جمعية شيسوي عمي.
: سمعت من ابوي كال رئيس الفلاحين وشغلة يعرف الكيعان شگد وكل فلاح شگد عندة كيعان هيجي كال وبعد ماييي جثير للديرة عبن مشتريلة بيت بالسوك موش دوامة بالاتحاد أسبوع ولزوم دوم هناك
: -الله حلو يعني بعد ما نشوف عمي
: يااع جا شنهي الحلو
: -اقصد حلو صار عدنة شخص بالدولة
: ااييي وچ بعد أتعيقل على بنات عمي عبن ابوي صار بالدولة والاتحاد
: -اييي كلش حلو
: بس امي موش على بعضه صار جم يوم مدلغمة حتى ما فرحت بشغلة أبوي.
: -عادي هي أمج من المصنع مدلغمة
: ياااا ازنيبة لا تحجين على امي
ضحكت وكلتلها: - شبيه هي ما حجيتي وياها وفهمتي
: ما ادري كل ما اكلها شبيج يمه وعاطت بويهي يو تتفل عليه ودكلي الخلفة الزفرة
: -وعلي هاي امج مو صاحية خاب ولا تنحب
: -بس انا احبنه امي الزوم احبها
: اي اي واجب ضروري حقج
أجة خالد كال
: -وحدة منجن تروح تحضن ويه رائد بالكاع والاخرى تروح تسرح
عذراء: -جاياهو يضل بالبيت
خالد: رباب هنانة امشن يلا.
التفت عليه عذراء حجيت بسرعة: مااااروح والله
رجع خالد عليه مدري اشلون سمعني كال
: يااهي هاي الماتروح
: -انيي
: -انجبي وروحي لا تعانديني
طبعا هذا خالد السانة زفر همة كلهم همج ويجاوزون ماعدا سائد حباب وياي شوية
كتلة بتحدي: -والله ولا اروح وشتريد اسوي سوي كل ايوم اسرحي احلبي احصدي مليييت من حياتكم رجعوني لاهلي واااالله تعبت
جان بيدة شاروط ما احس غير ضربني على ظهري واني واكفة بكل قوتة شاغت روحي وصرخت.
كمزت من مكاني مبتعدة عنه وعذراء صارت كدامة
كال: -ياااهي الماتروح ااامشي لا اجسرج أتجسر وحك هو الحسين ااااامشي
ما أدري أشلون طلعت مني بس أنهديت عليه بالمسبة
: ياااحقير يااامابيك ذرة رجولة لو رجال ما تخلينا نسرح ويه الرعيان واحنا بنات خااب كم وعلى ولا تخوفني هو انت مرة
عاد هو عشرة ما يكضونة يريد يكتلني واني شردت ركض سائد مو هنا منو يحميني
طكيتهه ركضة للبحيرة وشفته من بعيد ايصيح.
: تين يو ما تين الا اخلي الچلاب تبجي اعليج اليوم ابيج أشعلة
كتلة: -اااكل نعل تروح فدوة لابوي
طبعا هذا الحجي اني يم البحيرة هي البحيرة مسافة عن ابيوتنا ومو ماكو عرب بس احنا من طرفها
فعادي اشوفة بربضة يصيح ويحجي وعذراء وعمة رضية شفتها طلعت
بقيت كاعدة يم البحيرة كلت أنتظر للعصر يروحون
الولد من يجي سائد ارجع
همة يخافون من سائد شوي فارض شخصيتة غصبا على الكل حتى عمي يميزة عنهم.
بقيت كاعدة العب بالماي برجلية أنوب كمت كلت لا اغرك مثل ذيج المرة
بس أني والله امسلت شجاني رديت عليه مو كل يوم أسرح اليوم كلش صرت مقاومة وانتفضت
هسه هيج أحسن كاعدة هنا مثل جلب
خاف يجيني واوي ياكلني
للعصر وأجة سائد شفتة من ابعيد من يم ربضة لاكتة عمة رضية مدري شكالتلة
واجة للبحيرة لابس اسود ولاف الجراوية
وحاطة التفكة بمتنه
كبل جان اكو تفك يسموهة بناتية مال بنات اتصير شوي حجمهة اصغير.
وتنحط بالمتن خفيفة مو ثكيلة اجة بتجاهي
ضحكت وكمت من مكاني أنكت بملابسي
هز ايدة عاكف وجهه ما راضي ضميت ضحكتي وسويت نفسي ضايجة قبل لا يحجي
حجيت احاول ادافع عن نفسي
: -خالد هو اتعارك وياي وطردني شوف باقية هنا وحدي همزين محد اجاني منا منا ودنيا اغروب
كال بضوجة: -بهذا السانج ياهو يدنة صوبج
: صدكت خالد مو
: -لا يابة وترة ماعرفت شنهي سالفة كالولي متعاركين وشاردة هنا وايتج
: -غير خالد متحلف بية وشاردة.
: -تعاي نعاود
: وخالد
: -قير اذا فك حلكة اطيح حظه
: والله نشمي وكفو منك
اجينه نمشي واسولف ويا كتلة بترجي
: -فدوة سائد ما اريد أسرح بعد
: -سهلة يصير خير
: -خاب لا دكول هيج كول صار تامرين
: ايباااه والله تتامرين ياهوو كالج اشتغل عند الخلفج انااا
: -اني اكلك
: ميخالف عمي اشتغل بس هيدي ولا كل يوم اطلابة
: عمي خوش زلمة انت لعيونك بعد ما اسوي مشاكل
ضحك وهز ايدة وصلنا هناك وطبعا خالد ما حجة من شاف سائد.
رحت اتعشيت وياهم ورضية توصي بيه حتى ما اسوي مشاكل انوب دكلي صايرة معذربة
هو إلى يعيش وياهم يعني شلون يصير اكيد يتعذرب
مرت ليلة على خير وخالد ما حجة خوف من سائد
الحمدلله
: :
الصبح
رحت أدور على الفاسة يم الصيرة مال الحطب
لكيت سائد حاطلة قواطي كازوز ويطك بيهن
بالتفكة باوعلي من أجيت كال
: -تعاي زنوب
: شتريد.
: -شوفي أنا ماكدر أضل أهفج وراج من ترحين لاحصاد والزرع شنهي رايچ أعلمچ عالتفكة حتى ياهو يحاجيج طكينة چيلة اذا انا موش حاضر
: -يمة بعدين يذبوني بالسجين
هز أيدة بسخرية وضحك: -عليش سجن وج عمي احنا هنانة نكتل ونذبة بالبزل يا شرطة يا سجن
: -ترة خفت حسيتكم مجرمين
: تعاااي عمي
أجيت يمة أنطاني التفكة أخذته منه متفاجى كالي
: -شوفيني نوامرج طيحجيلج جم بطل
: -يمعود ما اريد أتعلم.
حجة بجدية: مرات أسرحين وحدج واحنا عدنة خلافات ويه اعمامنا وعبن ما اريدن احد يتعرضلج تعلمي اصوبين حتى اتكسرين شكو واحد يفككر يدنة صوبج ترة البنات اعذيرة ورباب متعلمات والزوم أنتِ هم تتعلمين
: -ليش همة هم يدورن ثارات ويه النسوان
: لا موش هيجي بس الزوم ناخذ احتتياطتنة
بقيت صافنه على كازوات معقولة يصير هيج فزيت من صاح بيه: نيشلي عدل وطكيهه
هو سحبلي اقسام وأني لزمتها بس هي ثكيلة.
ضربت اول كازوتين ما اجت بيهن أنوب رابعة وكعت بيها وانكسرت وهو صوفرلي عود يشجعني
انوب اخذهة مني يضحك: -جااا يوصلج وانت ما صالختة جيلة فاهيه
: -هسه موزين صوبتلي وحدة
: لا عمي نعماللة عليج بس بعد شديلي حيلج اكثر
: -يلا كل يوم اتعلم واذا كتلتي واحد اكلهم هذا سائد علمني اني مرة فقيرة
: ااانخوج جااا موش خوش
ضحكت وعفت ورحت لبست جواريبي وتوزرت بالعباء وتنكبت طلعت من الغرفة.
ورباب هم كملت رحنه نجيب حطب مثل كل يوم من نهر ابو المعاطي
اخذنة الطريق أنسولف بس رباب هواي تتلفت
حسيتها مو على بعضها وحيل
تارسة اخدودهة حمرة وحاطة كحل حجر بعيونها
وحاطة محلب (بخور عجايز) عطرة يكفخ
وصلنا هناك كعدنة نحطب كل وحدة بصفحة انوب هي كالتلي
: -ازنيبة ااانا رايحة ازبر بطن النهر
: تمام بس مو تبعدين اني هنا أنتظرج
: -ااي اي انطريني هنانة مو تين وراي وتعيفين حطابتج تيي النسوان تبوكهن.
: هسه هن يبوكن حطب غير يبوكن شي بي خير
خلت ومشت واني بقيت احطب كطعت هواي اعروك
من اشجار الاثل والنبك سويتلي كارة جبيرة
وكعدت يمها ارتاح شوي لان تعبت وكلت انتظر
رباب تجي الدنيا الظهر
بس ماعرف الساعة شگد هسه مر وقت هواي
ورباب ماكو قلقت كلت وين راحت البنية
خاف انوب طلع الها شي لو صار وياها شي
أخذت الفاسة ومشيت بتجاه بداية النهر
اني جنت احطب بمسافة بعيدة عنه والنهر هذا مو جاف مابي ماي فمتروس ترس اشجار وزور.
مليان وانوب غميج يخوف بس صوت الحمام والطيور ينسمع ظهرية كلش
مشيت وأني اصيح: -رباب وينج
وصلت لنص النهر والاشجار مخضرة فوكة وكل ما أمشي اكثر كل ما المكان يظلم
من كثر مابي اشجار صاير جنه جحر ختلة بقيت امشي على كيفي ولازمة الفاسة اباوع وراي
بعدت هواي عن دخلتي وايحور واوية كلش هواي
بس لا البنية اكلها واوي
بس هو الواوي اصغير وين ياكل رباب
وكفت واني اسمع صوت ضحك وهمس.
ميزت صوت رباب وهي دكول: -يااع رياض هدني ولك بس لا تييي مرت اخوي هساع تهيس بطيت عليها
كالها بهمس: -بعد مطكة وحدة وروحي
احس جمدت بلعت ريكي ومشيت بسرعة ادور الصوت وينه
لحد ما وصلت وياريت ما اجيت ولا شفت جانت نايمة بحضن واحد اول مره اشوفة
ونازعة ملابسهه ومتغطية بالعباء مالتها وهو كام وكف يمها يلبس بملابسة
شافتني وشهكت بخوف وهو اندار انصدم من شافني جر دشداشتة ولبسها بسرعة.
بقيت جامدة من الصدمة ماعرفت شحجي يربي
هاي شمسوية هو بسرعة لبس
وطفر مشة بدون ما يباوعلي حتى
راد بس يشرد وهي بقت مخلوسة
: لج رباب شمسوية
حجت بسرعة تلبس بثوبها
: -موووش هيجي اوووكفي اكلج ففدوة ازنيبة لا تحجين لامي عليه
درت وجهي عنها ورجعت ركض للكارة مالتي ادية ترجف وهي اجت وراي لابسة ملابسها
وعيونها حمر تبجي لزمت ايدي سحبتها منها
بسرعة
: -لااااا تلزميني أنتِ نجسة قذرة
: عاينلي بس احجيلج والله.
: -شتحجين رباب ااااانتِ بنية ما مزوجة شلون اسوين هيج عملة ما خفتي من اخوانج وابوج اذا دورا يكتلوج شلون مطية نفسج يالثولة هاااا وهذا الولد منووو اكيدد ااانتم متفقين قبل لا ننجي
كعدت يم الشجرة واني واكفة يمها افتر احس هذا هواي عليه اني خطية ما استوعب هيج اسوالف
: -منو هذاا الولد اااحجي
: رياض
: -منين هذا
: -اخوو اجياد بيت عمي سالم
: دهر دهرج لعد مو عدكم عداوة وياهم.
: -انا احبنة وارياض معليه باهله وهوة يحبني كالي نعرس بعد الحرب عبن هوة هساع عسكري
حطيت ايدي على حلكي مصدومة: عسكري؟ ولج عسكري بلا استشهد اشلون شسوين
فزت من مكانها مفزوعة وتمسح بدموعها
: -كش برة وابعيد اسم الله عليه يومي كبل يومة اموت بلايا
: -عووفي هالسوالف فكري بنفسج بلا حبلتي
سكتت تبجي
: -كم مرة مقرب منج
: جثير ما ينعدن
: -يعني هو من زمان هيج بينكم هاي علاقة مال مزوجين
: اي
: وهنا دوم من تجين للحطب يلحكج.
: -لا مرات بالزرع من اروح احصد وهنانة مرات هوة وين مايدري بيه يسبكلي
: ما خفتي؟
هزت راسها بي خفت. عفتها ورجعت شلت الحطب وكع من يمي ودنكت شلتة وادية ترجف
هي تمشي وراي منكبة وتبجي كالت بتوسل
: موش تحجين لامي
ما جاوبتها
مو لأن ما أريد بس لأن ما أعرف شحچي
ما أعرف إذا هي غلطانة لو تقشمرت
بسوالف الحب لو شنو والله ماادري احسها طفلة
ما أعرف إذا لازم أصرخ عليها والومها لو اسكت.
بس الشي الوحيد اللي أعرفه إنو هذا السر وكع على راسي ليش اني شفت
ناقصني مشاكل وهم فوك همي يعني احجي لو ماااحجي خاف احجي واهلها يكتلونها
اني لاحظتهم ايدهم والكتل خاف ماااحجي
وهاي ما اتوب البنية
ظليت أمشي وهي وراي تبجي أسمع ونة نفسها كل خطوة بس ولا كلمة طلعت منّي
جبت الطريق روحي طايرة خفت والله المنظر مقزز وهم نصدمت منها
هاي رباب عود فقيرة انوب اخوانهن والله خطية
ما يدرون اختهم تلعب من وراهم.
شلون البنية تسوي هيج اسوالف بسم الحب
عمي الحب ارقى واصدق من هيح
مو بهيج اسوالف زين ليش ما يفكرن باهلهن
اخوتهن
رجعنا وشفت الناس واكفين بربضة كدام الديوان
مال عمي نصير
و صوت اصياح وحجي وعمّي عكاب طاب بالخير بينهم بس همة
وجوههم حمَر من الغيض، ونار الثار بعيونهم
كلهم مشغولين بحسن وبالدم اللي ما نشف
وآني داخلي دم من نوع ثاني دم أسرار
خوف ورعب وصدمة
دخلنا من ورة البيوت حتى الزلم ما تشوفنه.
خليت الحطب يم الصيرة مال الحطب
ورحت شربت ماي من الحب وهي وراي اجت
اباوعلها المشهد كله يرجع براسي
انوب حتى نظرتي اتغيرت الها جنت اشوفهه طفلة هسه دشوفها وحدة مقرفة
كل ما اذكر اشلون شفتها بحضن ذاك الولد تلعب نفسي
وكل ما اتذكر اشلون عافها وشرد اتاكد هو مابي خير
أشوف وجهها المرعوب بين الحب والخوف
بين غلطاهة وبين حبها لذاك الغبي هو لو يحبها صدك ما اخذ شرفها
بس هو ديلعب يربي وعلى متتت قهر وحيرة
دفكر اكول لرضية.
بس رضية مرت ابوها خاف انوب بدل ما اندور
حل تروح دكل لعمي ويكتلها
واذا كلت لايسرة هم تموتها يسرة احسها تموت
علي الطلايب والمشاكل
هي من غير شي ادور على ثار ابنها من بيت سالم رغم همة ما متاكدين منهم
اذا درت ارياض مسوي علاقة ويه بتها تنجلط
يربي حيرة جبيرة
ما أعرف شأسوي.
إذا أحچي يصير خراب مو خراب دكوم القيامة ادري واكيد أهلها يذبحوها ويكتلون الولد
وإذا أسكت، السر يبقى ينهش بروحي
وأظل خايفة كل يوم خاف يصير شي.
خاف تحبل اني هالفكرة نامت براسي
والله خاف انوب يجي طفل
وهي هواي مسويه علاقة ويا لا مرة ولا مرتين
هاي اذا ما طلعت حامل شلون اتاكد هي نضيفة
الف فكرة تخوفني تهجم عليه مرة وحدة.
غمضت عيوني ساكته واسمعها تنحب يمي
اثنينه كاعدين يم الحب واني لازمة طاسة الماي بيدي روحي رايحة وجسمي يخفك
ماكو أحد يدري ولا أحد راح يدري
ما أعرف إذا هذا القرار زين أو مو زين.
بس الشي الوحيد اللي أعرفة إنو اني هسه واكفة بنص طريق كله ظلمة وحدي وماعرف شنو خطواتي
وشلازم أسوي بس اكيد لازم اساعدها يجوز غلطت والانسان ما معصوم من الخطأ
لو واحد ثاني بمكاني شنو لازم يسوي ما ادري بس إلى اعرفه اني راح اساعدها وما اعوفهه
رفعت راسي اباوعلها وهي تبجي
: -رباب
بقت جامدة تباوعلي
: -بااعي عدنة شغلتين لازم أنسويهن.
: اول شي لازم نتاكد أنتِ مو حامل والشغلة الثانية لازم نحجي وياهم نشوف امه او اخته حتى تجي تخطبج
: -بس اهليي ما يرضون
كلت الها بسخرية: -لااااا صدك مااادري، لعد ما فكرتي بيها قبل لا ترحين تحبين وتسوين هالسوالف
: كلبي موش بيدي
: -اسمحيلي اكلج امداج وامدة كلبج
سكتت، كمت من مكاني: ااكو هنا وحدة تفحص شي
: اي الداية ام كامل بيتها يم البحيرة
: -اي تمام لعد العصر انروح
: وامي خافن تدري بينه.
: -لا ماتدري انروح نغسل اماعين مثل كل يوم ما تشك لا تخافين. وهسه روحي غسلي وجهج لا يشوفونج باجية ويشكون
هي مشت وأني رحت للغرفة رضية جانت كاعدة تلكط بالاسبيناغ تنضف بي
كالتلي: -هلة يمة أيتن
: -اي عمة اجينه هسه تعبنة كلش
: -تدني يمي ضميتلج روبة بالجدر ابو الخبز
: -ما اريد ما اشتهي
اجيت تمددت بصفها وهي تلكط نمت على رجلها هي شوي زينة وياي الصراحة ما شفت منها
الشر دوم تتعارك ويه يسرة علمودي وادفعلي.
احسها حبابة وياي كالتلي
: -لشوي يروح الحلال خبزن البنات يو بعدهن
: -ماعرف اني ورباب جنه بالحطب وشوفت عينج هسه اجينه يجوز عذراء تخبز
بقيت يمها ولفيت راسي ونمت العصر وعيت على رباب تكعد بيه
كالت نمشي لكيتها لامة الماعين والجداري عود نغسلهن لبست عباتي عدل ورحنا
وصلنا يم البحيرة خلينا الماعين على الشريعة وبوجهنة للبيت الداية
جانت مرة جبيرة بالعمر وعايشة وحدهة ما شفت احد بالبيت غيرها واحنا هم مو مال نسأل.
كعدت ورباب تمددتتت غطتها باليزار ومدت ايدها تفحص بيها واني ادعي من الله كون ما تتطلع حامل
وعلي مصيبة اذا طلعت حامل اكيد اهلها يكتلونها لان سالفة ينطوهة مستحيلة فالكتل
احتمال اوراد كلش وحتى لو ما كتلوها منو كال
ذولاك يجون يخطبوهة والله هواي اسوالف
ادك براسي اني من يمي خايفة عبالك اني حامل
يمة اسم الله عليه اني بعدني أبنية
فززني من تفكيري شهكت رباب باوعت على الداية وهي تمسح بيدهة.
: -على الخير والبركة يمه عليها شهرين
فكيت حلكي: -ها. شهرين شنو
: حبلة خالة جا شني. المرة تباوعلنا رباب كامت تبجي بشكل هستيري واني فاكة حلكي
صافنه ماعرف شكول شسوي والله أتوقعت كلبي لعب من اول ما شفتها كالت الحجية بشك
: -عليش ما فرحتن
: لا بالعكس فرحنه خالة اصلا امة دتبجي من الفرحة
كالت وهي دكوم: -منين أنتن بنات منو خالة.
اشرت لرباب ادكوم هاي الحجية راح تبقى تسأل اني لاحظت بناتنا محد يعرفهن هن ما يطلعن للغربة
ف محد شايفهن واني هم كلتلها: خالة احنا اتاخرنة نمشي وشكرااا يطيج العافية
اطيتها أفلوس واخذت رباب ورجعنه للشريعة
وهي تبجي وتفرك بديههه وتحجي
: -شسوي زينب فدوة شسووووي كليلي
التفتت عليها بضوجة: ماادري أصبري نرجع ونفكر
: -خايفة شعملت بروحي اانااا شعملت
: لو تخافين ما سويتيهه ماتكدرين تصبرين تزوجين يلة.
: -شنهي غصدچ انا موش خوش بنية
: يعني هسه شكلج؟
: -تراه هوة كالي راحن يتزوجني
: والله شكلة مو شكل رجال حوك ويسويهه خاف يطفر
سكتت، رجعت أمشي بصفها وهي شايلة الماعين واني الجداري انوب لازمتهن بيدي
ما اعرف اشيلهم على راسي كلتلها
: ام الولد اشلونها معدلة خوش مرة لو لا
: -هي تشبه امي
: -يا والحظ المگير اذا تشببه امج معناها اجاك الموت يا تارك الصلاة
رجعنة للبيت ويسرة تلكتنا بربضة كالت بعصبية
: -بطيتن وين چنتن.
: -غير نغسل اماعين يم البحيرة عمة
: جااا موش من عوايدتجن تبطن بالي يمجن
: -لا عادي نفس وقتنه
: روبة شمالج يمة وجهج مغيم
رباب: -مابيياش
خلت وفاتتت جوة واني يسرة لزمتني
: روحي أعلفي الدوابات ويه خالد
: -اهوو عمة ونبي تعبانة وذني شكثرهن شيعلفهن الي
ردت بتعصب: -عوينتج عنهن يالمسمومة راحن تحسديهن
: والله لو لباجر ااحجي ما احسدهن لاتخافين
: -شمالج السم والحسد متربع بكلبج
: -وأنت شدراج خالة كاعدة بكلبي.
: روحي علفي الدوابات لا أترة أخلي الولد يتناوشونج خلكي موش إلى هالايام
عود قصدهة يكتلونج، خليت الماعين يم الحب ورحت لكيت خالد يصيح على دوابات
: تحة، تحة
اجيت يمه لزمنه الكونية مال العلف أنفرغ بيه سوة
طشت جبير بالنص المحصار مخلي
فرغنه هواي انوب رجعت جبت الهن ماي
وربطناهن وطلعنا
رحت غسلت ورجعت للغرفة رضية لكيت بس رباب تبجي متكرفصة وكاعدة وحدهة
ما ادري بس ضجت عليها اجيت يمها.
: باعي لا تبجين أنتِ مو دكولين يحبج
هزت راسها ب اي: لعد ماشي مادام يحبج اكيد يزوجج وهسه اكو طفل وابنه
: اخافن ما ياخذني بعد
: -لا بكيفة شنو
: -حتى اذا هو اية ابوي ما يرضى
: يلكة حل اليحب ياخذ محبوبتة من حلك السبع
: - بس هساع هوة ما يدري انا حبلة
: همة وين صاير بيتهم
كالت بشك: -عليش
: -اروحلهم وكول لامة السالفة حتى يشوفلهم حل
: -لااا فدوة ازنيبة خافن تشهرني بالديرة.
: ماتتكدر ترة ابنها إلى مسوي العملة شلون ما اتريد ابنها ما تخاف ينكتل هي هالسوالف شوراهة غير لازم نفكر سوة ونلكة حل والحل يمهم اكيد لازم يلكون طريقة يصالحون وي عمي ويخطبوج كبل لا تكبر بطنج وتنعرف السالفة
هزت راسها مقتنعة بكلامي وكعدت ادليني على بيتهم بس شنو اني ثولة ما اندل بسرعة
لازم اشوفلي طريقة اروحلهم بيها بدون محد يشك
بيه.