رواية مرواد الظلمة الجزء الثاني للكاتبة هيلانا الفصل السابع
رحتلهم بعد ما رباب دلتني بيتهم أخذتهه مشي حتى تعبت أنوب بعيدين
وخليت الفاسة مالتي يم البحيرة وصلت قريب عليهم شفت بيتهم من أبعيد
واكو حجية بالحوش تخبز بالتنور الطين. الحوش مالتهم طين بس ناصي تشوف الداخل
من شافتني عافت الخبز وأجتني. ركزت بيها
هاي نفسها إلى من غركت بالبحيرة طلعتني
سلمت عليها ورحبت بيه بكل حب دخلتني كعدت جوة شوي بناهم مرتب وحلو
هو هم طين بس شنو غرفتين وصالة ومطبخ.
واثاث بيتهم هم حلو ونازك
مو مثلنا عبالك بدو كل غرفة دايرة وجهه عن الثانية ما يجمعنا بس الحوش
كالتلي بستفهام: -عليمن جاية يمه
: -صراحه خالة جاية عليج
: -ياية أعلية يمة
: -ااايي خالة والموضوع حياة او موت وحل الموضوع يمج
: - مااأقصر اذا شي أكدر أعليه
كعدت وبديت أسولف السالفة كله الها المرة نصدمت كالت بتكذيب.
: -شمالج خالة تهذرين شني أبني المسجين ما تتطلع منه العيبة ذني محيلات أيسرة عبن تريد تذب بتها علينا يدورون ابو الولد منهو جااا يذبن أنغولتهن علينا
: -خالة حرام هالحجي والله واذا ما تصدكين أسالي أبنج وأتاكدي يعني هاي اذا ما نكر
: -أغديلچ فدوة يمة سدي السويلفة وروحي لاهيلتج ويسرة الموديتج علينا تروح أدور العب على بتها يااهوو لا تذب تهايم على بيتنا ترة كفيلج اخو زينب أخزيهن خوش وصليلهن هاذة الحجي.
: -خالة محد دازني اصلا ولا أحد يدري ومادام مصرة على كلامج فأني من هسه دكلج خطية البنية وابنها بركبتكم اذا ما تلحكتوا السالفة قبل لا يدورون اهلها
عفتها وطلعت ادردم وأحجي عليهم وأني طالعة لاكاني بالحوش وجه بوجه ابنهم الجبير أجياد
بس شنو هذا أجياد شكلة عصبي ولا مرة شفتة وجه مبتسم كل ما أصادفة وجه معبس
باوعلي مستغرب وخر على جهه حتى أطلع بس أني أجة أبالي أكلة بلكي يطلع بي خير
أحسن من أمة أتحمحت وحجيت.
: أريد أكلك شي اذا ممكن تسمعني
: -الي أنا
: اي هو يخصكم
هز راسة بمعنى أسمع فركت ادية مرتبكة حسيته مركز وياي وعيونة عليه
: -باع مااعرف أشلون أبدي ولا منين بس بت نصير إلى هي أتصير بت ابن عم أبوكم والي تعتبر هي هم عرضكم على علاقة ويه اخوك هذا ارياض مدري شنو هو المهم والبنية طلعت حامل هسه
من كلت هيج فك عيونة جان مخلي ادي بجيبة طلعها وفرك وجهه مثل المتفاجئ.
: - وأجيت وكلت لامك لان البنية بطنها جاي تكبر بس امك ما قبلت وكالت مو أبنة و بعد تعرف أمك اكيد، قاطعني بشك
: - منهو يكول من أخوي
: -لان اني شفتهم بعيني اخوك والبنية لو ما شايفة بعيني هم ما ااحجي والبنية تحلف من اخوك هم وعلى اساس هو واعدهة بالزواج وياريت تشوفون حل لان البنية اذا عرفوا اهلها ما أتوقع بس هي يكتلونها اكيد يكتلون اخوك وياها ال.
حجة بحدة متعصب: -غير أخو خيتة اليدنة من ارياض.
: -ياريت تعوفون المراجل على صفحة وتفكرون بحل
تدنة مني وحجة بجمود: -ياهو كالها تنطي نفسهااا اذا هي كراج احنا شني مالتنة
چنت بعدني واكفة وهو واكف أكبالي بينه مسافة وهو مخلي هالمسافة ميقرب متجمدة أباوعلة
: -عيب عليك هالكلام والطفل الكم
مضيق عيونة يباوعلي بشك مممقتنع بكلامي مبين
هز راسه بخفّة وكال ببرود
: -شمدريچ أنتِ
گلتله بإنفعال: - يعني شلون شمدريني دكلك شفتهم بعيني شنو دا أفتري على اخوك مثلا لو شنو.
سحب نفس عميق وگال
: هوه چذب لو هيه چذب لو اثنينهم چذّابة والله مادري شني اليثبت حجيج
: -لك يا عيني البنية حامل بعد كم شهر من تكبر بنطها تنفضح وعوفك من حجي البنيةنكول أتجذب أني شلي وياكم وأجذب دكلك شفته بعيني وياها شنو تفسّرلي هالشي
شتتت نظرة عني وبعيونة نظرة مال واحد محتار أفتر خطوات ليكدام وأندار ورجعلي
هو هم حقة أني ما الومة يجيني فجاة شخص ويكلي هذا الطفل الكم هم شي ما يستوعبة.
العقل بسهولة وبنفس الوقت لازم يتحملون نتيجة أفعالهم لعد بس يحبون
: - إشلون چانت ويا أخويه؟
: چانت تحبه والظاهر هو خادعهه بهواي وعود
رد بسخرية مثل إلى يستهزاء: -اي المخدوعات هواية
تقدّمت خطوة بعصبية
: - يعني دتكول هيه كذّابة؟
: ياااابة جااا ياهوو يكول الولد النا تفاهميني اخوي أبو الولد
: -اييي طبعا
: -حجيج قوي بس ما يتصدك
: -لعد شتريد لا دكلي أثبات وهالسوالف يعني شلون نثبت مثلااا.
سكتتت ما رد بس يباوعلي تنهدت بيأس فد الحجي وياهم صعب وراسهم يابس ما يقتنعون
كال بجمود: -اذا الولد النا نتحمل المسوولية بس
: -بس شنو
حجة بنبرة كله تهديد وهو رافع أصبعة بوجهي: -قسم بذات الله اذا طلع قير هالكلام
سكت غمض عيونه لحظة فتحهن لم أصبعة وأبتعد عن طريقي
: -روحي لاهلج
: -والبنية
: - أنا ما أصدّگ إلا من اخويه.
: -ايي أسالوا شنو منتظرين
: -بالدوام من يرجع الله كريم
أجيت أمشي وأستوقفني صوتة بهدوء.
: - أنتِ ليش أدافعين عنها؟
: - لأن أكو ظلم كاعد أيصير
: -و أنتِ شلج غرض كمل بتحذير أني لو منج ما أچيت بالنار
: -حتى لو على حق
: - أنتِ شنو علاقتچ بالحق؟
: -الساكت عن الحق شيطان أخرس و أني ما أحب أشوف ظلم وأسكت
ضحك بسخرية وكال
: -هوة الظلم شي أساسي بالحياة شنسوي نلغي الدنيا؟
-: لا بس انتو لازم تتحملون نتيجة أغلاطكم ونزواتكم
: -ليش لأن أنتِ گلتِي
: -لأن أخوك سوّى مصيبة اكبر من راسة
: أخوي يدبر نفسه.
: - وبنت العالم
: - هيه هم أدبر نفسها جااا شني انا أطمطم نگر وراهم؟
ما فهمت معنى كلامة رجعت كتلة بلوم
: -قصدك هيه الغلطانة
: - جا شني
: - حتى لو وعدها بزواج أخوك
: من يعاود يحجي
: - يعني هيه دتكذب؟
رفع ايده مسح على لحيتة وگال
: أنا ما أعرفها ولا أعرفج بس أعرف شغلة وحدة التنطي نفسها كوكتلها حلال.
: -شكد عقليتكم همجية وتعبانة وتحملوا المسولية على البنية دائما ولا كنما اخوك الة ايدك خوش يكتلونهم سوة مادام هيج اتفكر
رد عليه بشر: -أشعل أبهاتكم وعلي
: -لعد بنات الناس حلال اتموت واخوك لا
: -طبهاا مرض هيه لو عده أخطوط حمر محد أدنة صوبههه هيه بوكلة مباح
: -غلطت سبحان الما يغلط
تقرب مني هيج مسافة قليلة وكال بنبرة قاسية
: -زينب لا تجرين نفسج بشي أكبر منج
استغربت منين يعرف أسمي رديت عليه بهدوء.
: -كاعد تهددني لو تحذرني
: -موش أنا الهدد مرة بس واجب أحذرج لان ما أضنج تعرفين عن الديرة وعن الوادم هنانة
: -شنو يعني هالحجي
: -لا أدشين بحجي موش يمچ
: -ماا أدخل بس خلوا عدكم ضمير شوي وصيروا زلم
: اللهم طولج يا روح
احس ما أدري أشلون بس من أول ما أجيت هنا وأني بس أمسلت مسويتلي شغلة بيه خير
ولا رجعت لبغداد، عفتهم ورجعت للبحيرة أخذت الفاسة مالتي ورجعت
خاف تلاكيني رضية ودكلي وين الحطب شكلها
يلا أكلها مالكيت.
هاي هنا ريف يعني الكتل عدهم عادي والمشكلة قبل جان إلى يكتل غسل عار
ينسجن ست أشهر ويطلع برائة ماكو عقاب او شي
والبنية إلى تخطأ
لازم أبوها او اخوها يكتلها كدام الناس اعمامها وكل اقاربهم وبعدين يخابرون الشرطة تجي تاخذة
وينسجن ست أشهر ويطلع لهذا السبب هيج قضايا مثل الماي القتل بيها
رجعت للبيت أسولف وحدي شنو هاااي بشنو ورطت روحي ما أعرف.
حطّيت الفاسة بالزاوية يم الحب مال الماي و چنت راح أكعد ارتاح شوي وأجت رضية كالتلي
: -الله يساعدج يمة أيتي
: -اي عمة
باوعت على الفاسة واتلفتت
: - وين العروك
گلتلها وأني أكوم: -هاا مالكيت حطب عمة
: -يععع جا وين رحتي من الصبح لهيسة توج ياية
: -غير دورت على حطب يم نهر ابو المعاطي وبعدين رجعت على البحيرة ومالكيت فرجعت واصلا تعبت اريد انام شوية
: -نامي بحجرتي حجرة الولد بيه صحبانهم يمهم.
غسلت وجهي ورحت عود ردت انام
لان صدك تعبانة رغم راح يمر سنتين بس والله ماكاعد أتعود على حياتهم وحيل جاي أتعب
غطيت راسي دنام ورائد فتح الباب ودخل كالي بعجلة
: -كووومي أزنيبة سويلنا شلگينة وجاي يمنه كاظم ابو شنون
يربي الصبر وخرت البطانية وكمت رحت خليت حطب بالموكد وشعلتهم
ورجعت شنگت العجينة حتى أسويلهم شلكينه
هو عبارة عن عجين نخبزة بالدهن بالطاوة.
وهذا كاظم ابو شنون واحد مخبل عود صاحب رائد ياخذة ويرحون يطربكون بالمكينة
ويجي الظهر تعاي سويلنا شلكينه مرات يحطون شكر على الشلكينة وياكلون ومرات لا وياها جاي
وهذا الضيم عليه لازم كل ما يجون أسوي عذراء ما تلحك وحدهة ورباب مخلوسة
وأني أصلا حايرة شلون أكولها أهل رياض محد مصدك وشبه الامل مگطوع من هالموضوع.
العصر أجتني عذراء كالت
: -تعاي أنروح للبيت عمي أعگاب
: -شكو
: أمي ودتني على غرض النا يمهم وتيين وياي عليش ضالة وحدج هنانة
: -يلا ليش لا
رحت لبست عباتي وطلعت شافنه سائد جان ياكل نفض أيدة وكام
: -ووووين
: -للبيت عمي أعكاب
: -أنا اوديجن أنطرن
صدك أنتظرنة راح غسل وأجة لابس دشداشتة وكاشخ اجيت بصفة كرصته من ايدي ضحك
: -شنو سر الكشخة هاي والنظافة
: خايبة شني السالفة جا كل يوم أنا وصخ.
ضحكت بمرح وهو هم يضحك وياي وعذراء تمشي كدامنه
: -لاااا بس أستغربت أصلا شعندك رايح ويانا ممرتاحتلك
: -شلج غرض
: -تمام بعد ما أحجي ضل
وصلنا هناك بيتهم جان مسافة قريبة علينا، دخلنا سلمنه عليه وهو كلش حباب
ومرتة هم لطيفة وعندة بس أبنية وحدة بس شنو كلش حلوة ومرتبة
أني وسائد كاعدين صفة وعذراء كاعدة أكبالنة بصف بت عمها اسمها سلوى وتسولف وياها.
باوعت على سائد عيونة عليها يباوعلها من أدير وجه علينا يدير وجهه ومن تلتهي تسولف يركز عليها
كتلة بهمس
: -وين وصلت سائد
رد بحب: -تبرج برج
: -حلوة
التفتت عليه وضحك: -اشش ازنيبة
: -والله أنتَ مفضوج يا أششش
خلة وطلع واحنا بقينه وعذراء أخذت من البنية فص زبد ملفوف بقطعة أقماش سودة
وكمنه ومرت عمو اعكاب كالت لعذراء وهي توصي بيه: -كلي لامج أدير بالها أحد يضوگة بس ذيج الشغلة تسونهه بي وتذبنه بالبحيرة.
عذراء: -اييي عمة صار
أخذتني وطلعنا جبنه الطريق أنسولف سلتها بفضول
: -شنو هذا
ردت بدون اهتمام: -سحر
لحظة وكفت وهي التفت عليه حسبالي تشاقة
ضحكت وحجيت ممصدكة
: - شنو سحر؟ تشاقين
: -لا لا شني أشاقة والله سحر
: -عززا بعينجن المن هذا
: -شمدريني أمي تريدة
: خفت يربي انوب سحارين
: -هيهييي على بختج شنهي سحارين امي عده اشغيلة بي تگضيهااا بس لا تحجين
: -شعلية أحجي بس ترا السحر حرام
حركت امتونها بعدم اهتمام رجعت سالتها.
: -زين هاي مرت عمج تسوي سحر
: لا عمي أعكاب
: -رجال وسحار
: -هووة موش سحار بس يقرا الفال ومن كون وحدة عاجر يقرا عليها وتحبل واذا وحدة تحبلها اوحيد هم يمشيلها قسمتها ويعزم على الوحد اذا مسودن الزلمة ناذر ايدة للخير
: -يااخير هذا عليمن تضحكين
رجعنه واني والله خفت كلش اخاف من هالسوالف
هسه بيت عمي فواك كل مصايبهم طلعوا سحارة
لعد شلون الله يوفقهم اذا هيج
رجعنه سوينه عشة وهي ودت الفص لايسرة.
تعشينة وكملنا وبالنومة أجيت أنام ورضية أجت جايبة دهن ودبس كعدتنه اني ورباب ناكل وياها
اني جنت شبعانة بس على واهس اكلت كم لكمة
بس هن لا أكلن
بالليل كلش الليل نامن رضية ورباب وأني هم دريد انام بس حسيت نفسي ممرتاحة ظليتِ تكلب يمنة ويسرة
غمضت عيونس بالقوة اريد بس انام لان أدري يكعدوني من وكت وأبقى أنعس النهار كله
بس ما مرت ساعة إلا وجسمي برد برد مو طبيعي
عبالك واحد صخن گمت أرجف.
يمكن صخنت صدك لفّيت اللحاف عليه أتوقعت أدفى بس لا بردت أكثر
كمت أخذت بطانيتين من بوفية رضية تغطيت بيهم وكوة دفيت نفسي
الصبح كعدت مصخنة وراسي ثكيل أباوع على رضية هم مصخنة ورباب مابيه شي كالتلي رضية هاي نشلة اكيد
مرت الايام وصرت زينة بس أكو شي غريب كمت أحس بهوسة دوم يمي
لعلم انام بس اني ورضية ورباب محد يمنه
بس مااادري شكوو
واحس صار عندي نوع من العدوانية للعلم اني ابد مو عدوانية ولا قاسية.
أتذكر قبل كم يوم رحت أحطب ولكيت أطيور عصافير أصغار توهة صايرة
جانن بالعش من كسرت الغصن طاح العش وبدون تردد جبت الفاسة وكتلتهن بالفاسة
جنت مستغربة تصرفي بس من داخلي اكو فد شعور براحة غريب
كلشي جان ديجي فجاة من دون أستذان
وبيوم جنت بالمحصار مالت الصخول عود أنطيهم علف فوحدة منهن عثرت
والتفت الحبل مالتها على ركبتها وكعت بالكاع وضلت تتمرغل مختنكة.
جنت أباوعلها محركت نفسي حتى اوخر الحبل عن ركبتها لا بقيت صافنه عليها
بقت ترفس برجليها لحد ما ماتت، جريت نفس وتقربت منها وخرت الحبل بس هي ماتت
رحت لسائد كتلة تفاجى واجة طلعها من المحصار
ذبهه بالبحيرة
أحس أكو سفاح بداخلي يدفعني لاشياء
غريبة دستلذ باالموت
وبي شي يموت كدامي كاعد أستلذ بي
حسيت نفسي مو على بعضي
رحت أتوضيت وكعدت أصلي، كملت وبقيت أدعي بمكاني شعور متجوع بداخلي
احس نفسي متعطشة لاشياء غريبة.
يعني ما أدري أشلون أوصف الكاعد يصير
وياي بس احس متعطشة للموت احس بلذة من أشوف شي يعاني ويموت كدامي
وادية تثكل وجسمي كلة مااكدر أساعدة الموضوع
بدة يكبر بداخلي وياخذ حيز جبير
وبديت أحس بثكل وأشوف أحلام مو حلوة
بس من أتعوذ وأقرا ايات ما أشوف شي
مرت الايام وبيوم صادف بارد كلش وتمطر
وهيج أيام من تمطر وتبرد
الريحة مال الحلال تروح وي الهوة فتهجم الذيابة من الزورة تجي للبيوت للحلال.
ومن عصر سائد ورائد قفلوا بيبان المحصار زين
وخالد وصانة كال خاف تحسون بشي
او أسمعون صوت ذيب حتى لو جلاب تنبح
دكعدوني
بالليل قبل لا انام سمعت صوت حركة باوعت من الرازونة شفتة صاعد فوك السياج
يطلع أكبر من الجلب بقيت أباوعلة التفتت على رضية بس ما كعدتهه
بقيت كاعدة أسمع بس صوت الطليان تلعي
كلت هسه همه يكعدون
طبعا هاي الذيب يكون خبيث من يدخل للمحصار
ما ياخذ نعجة وحدة
لا يذبحلة كم وحدة يموتهن وياخذلة وحدة.
يخبث هيج معروف
عفته ونمت الصبح من كعدت لكيتهم ملتمين بالمحصار ومخبوصين
جان كاتل منهن هواي مذبوحات ذبح حسيت نفسي ضجت انكسر خاطري عليهن
بس مادري شجاني رجعت كعدت جوة أختنكت
كلش وروحي لعبت
اجت رباب مخنوكة هم وتبجي كالتلي
: -أهيس روحي مخنوكة
: والله حتى أني
بعدنة أنسولف ونسمع صوت صريخ گب طفرنة أثنينة وطلعنا برا
لكينا رضية ويسرة واكفت بربضة وصوت الصريخ يجي من أبعيد ورضية حسيتها ضايجة.
عكس يسرة ما مهتمة كالتلها رباب بخوف
: -شني الصريخ هذا يااهوو مات
يسرة بكل برود كالت
: -رائد كال رياض استشهد.
نصدمت ورباب شهكت كاتمة الغصة لوت شفتها وتنفست حيل ما تريد تبجي
إيديها ترجف مشت بسرعة للغرفة وأني لحكتها
كامت تبجي منهار وتفتر بالغرفة
: -زززينب زينب شنسوي ضعتتتت
الساني لزك بحلكي معرف شحجي همة قبل ما معترفين وما مصدكين أنوب الولد مات
بعد منو بحالها منو يصدك المصيبة هسه صارت أكبر.
: -ماادري شكول شراح أنگول شراح أنبرّر
كعدت بالزاوية تبجي منهارة وحاضنه بطنها
وتباوعلي بهلع عبالك تشوف الموت
كدامها وتريد اي شي تجلب بي وتنقذ نفسها
عفتها وطلعت برا اسمع بس صوت الصريخ
واحنا محد راح من يمنه الهم ورضية حسيتها ضايجة عليهم بس يسرة لا ابد ولا أهتززت
أني كلبي جان ديرجف كعدت برا اسمع الصوت وأبجي أتذكرت أخوية
هاي أخر ايام الحرب كالوا راح توكف بس هن ولا عبالك جاي يحصدن بالوادم حصد.
مرت الايام وجان كل يوم تكبر بطنها وهالسر يكبر ويانة والقلق والخوف اكثر
حسيت نفسي مشاركة بهاي السالفة لان شفت والمشكلة مااكدر أحجي أخاف يصير بيه
شي والذنب ياكلني وبنفس الوقت الخوف هسه هم ماكلني أكل
گامت تلبس دشاديش عريضة ونهار كلة لافة العباء ومتوزرة لحد النومة بالفراش الا أذب العباء
حتى محد يشوفه بطنها او يحس عليها. حياتننا هواي أتغيرت عمي صار بالاتحاد.
والطمع عما كام ياخذ بكيعان الوادم بحجة هو بالدولة وفنة اليحجي ويا
وكم مرة تعارك هو وبيت اعمامهم أجياد وأهلة
ومرت عمي مو بحال أحد كل مايجي عمي
تتعارك ويا لان اشترى بيت بالولاية وكام يجينة مرة بالاسبوع ومسوي علاقة وي السكرتيرة مالتة
وعندة نية يزوجها انوب البنية اجت كم مرة لينا هنا وشافتنا بقت تقلد علينا عود بت اولاية وكذا
وشرط على عمي تقبل بي الا بيت بالولاية
وعمي هم استخف ما شايف وشاف.
كبل وافق عاد يسرة من قهرهة تبقى اطلع حركته بينه كل يوم عركة لو من يجي تتعارك ويا
ومو بحال احد ولا منتبه لاحد بس رضية حسيتها شاكة بينه دوم تباوعلنا بنظرات غريبة
كم مرة حاولت تسحب مني كلام بس كلتلها ماكو شي احنا كمنه انام بغرفة رضية لان ذيج الغرفة
بيه الولد كلهم وحصرة علينا فبيوم من ذيج ليالي المشومة كعدتني بالليل رباب تبجي وتعصر بطنها
فزيت والنعاس بعيوني كلتلها: -اشبببيج شكوو.
: -ولج وجع موتني أضني ارد أجيب
: شنسوييي هسه
: -ماادري شوفيلي جارة
بقيت حايرة شيسوي وهي موتهه الوجع اني من يمي بطني موتنني من الخوف انمغصت
أخذتتههه ورحناا للمحصار مال الهوش لان خفنه رضية تفز على صوتنة وتحس بينه
حطيت الها بطانية بالمحصار مال الهوش
والدنيا تمطر وباردة تكص كص
واني واكفة يمها وهي تتطلك خفت جنت ادعي تجيب بسلامة وجهه صار أصفر خفت أتموت
ررجعت للغرفة امشي على اطراف أصابعي
خاف رضية تفز.
اخذت بطانيتين ومشيت للمحصار غطيت رباب بيهن
وهي ترجف رجيف مر وقت هواي
لحد ما جابت طبعا اكو يمنه جدة مال عرب تولد النسوان بس احنا وين نكدر أنروحلها
بس سبحان الله. سهل رب العالمين وجابت ولد أخذتة بسرعة وجنت معرف شسوي
وأشلون أصرف ويا ادية ترجف حتى لزمتي اله غلط لفيت لف بالحجاب وبقيت كاعدة يم
رباب إلى اول ما جابتة نامت مدري ماتت بس البنية غمضت اعيونها وغفت واني يمها.
باقية بس ادعي أخذتلي شوي ورجعت اضرب على خدهة بلكي توعة وفعلا كعدت
بس تبجي وما تقبل تاخذ الطفل من ايدي كلتلها بضوجة
: -رباب اشبيج
ردت وهي تباوع لطفل بيدي بحقد
: -بطني توجعني
: -ميخالف أخذي الطفل رضعي شي ديبجي
-: ما اريدنة
: -شنووو مااتريدي صدك تحجين ولج خطية يبجي
بس ارضعي هسه
كامت تبجي حيل حاضنه نفسها وتهز براسها
: - ماااريدنة والله ماااريدنة.
من شفتها منهارة تبجي وخايفة اتاكدت هي طفلة وهي فعلا طفلة وتقشمرت ماادري انكسر خاطري عليها
حاولت اسايسها: - باعي بس ارضعي هسه شوي وبعدين انفكر
: -شني انفكر بس يطر الصبح أهلي راحن يدرون هساع يسمعون حسة يبجي ويدرون بينه ويكتلوني
: -لا اسم الله مااادري اااوف ششنسوي هسه
: - خايفة
كوة قنعتها اخذت الطفل ترضعة وهو جان يبجي وسكت واحنا كاعدين بالمحصار وظلمة.
بس ضوء الفانوس وريحة الزربيج مال الحلال أطك براس والبقرات كل شوي وحدة اطك الثانية براسها
ويتعاركن اني اخاف لا يردن ينطحني براسهن
اخاف منهن
بقينه كاعدين لحد ما بلش الضوء يكشف
كالتلي برتباك
: خلة أنذبة
بلعت ريكي بصدمة
: -شنو أنذبة، أنذب شنووو
: -أنذب الفرخ ما أريدنة اناااا ماااريدنة أنذبة بالبحيرة
: -اااانتي اتخبلتي وج هاي روحة شلون تفكرين هيج ورب العالمين شيسوي بينا باجر عكبة من انموت.
ردت عليه بحقد: - هوووة مووش ابني ااانا ما اريدنة أشعليج أنتِ
: -طبج مرض ضلي
كمت أجيت أطلع وصلت لباب مال المحصار وصاحت عليه بدموع
: - لا تروحين زينب انااا وحدي اخاافن
التفت عليها
-: باعي اني عاذرتج وتفكيرنة ملخبط بس مايصير نسوي هيج حرام
: -بس هوة نغل
: - ولو هاي روح مايصير حرام
: -جا شني العمل
: - باعي أنگمط الطفل وأنذبة بالكاع مالتنة
مو العصر تجي المكينة تكرب نذبة بالكراب.
واني وعذراء مو انروح وياهم أنعبي وروحن أخذة وأكلهم لكيتة مشمور هنا خطية وأقنعهم أنجيبة
-: وبلكي دروة بينه
: -لا منين يدرون يشمون أديهم
: -وهساع وين أودي
: - أرضعي زين أشبعي وعوفي بالمحصار
: -والهوايش خافن يسحكن عليه ويموتنة
: -معلي شي كووومي نطلع لا رضية تكضنه
صدك لفينا زين بالبطانية وخلينا على جهه كلش بحيث الهوايش ما يوصلنا
وكومتههه كوة غلست الها ورجعنه للغرفة نمنه
جذب محد نام بس تغطينه وبقينا كاعدين.
وحدة تباوع بوجه الثانية استغفر الله هاي تالي الحب هو يشرد وهي توكع بيها
عمي لا أسلمين نفسج لاحد بحجة الحب تالي يموت لو يطفر وأضلين حايرة بنفسج
لحد الصبح أتحججتت ما رحت وياهم من وكت بقيت أخبز وكلتلهم الحكم للكاع
خليتهم مشوا ورحنه للمحصار هي رضعته مرة ثانية حتى يشبع وما يكوم يبجي واني أخذتة خليتها
تلهي مرت عمي ورضية واني طلعت اخذت الطريق اتلفتت وامشي سريع والولد بحضني
مرعوبة وخايفة بشنو ورطت نفسي.
هذا هم حظي
ورضية حسيتها شاكة بشي بريوك تباوع لرباب ورباب كوة تمشي كالتلها بطني توجعني
بس هي ما مقتنعة وشكلها شاكة بس غلسنة
اخذت الطريق كبل للكاع
وصلت قبل لا اروحلهم رحت لصوب الثاني من كاعنة ما مكروب بعدة أدري اليوم نكربة
لفيت الطفل زين وخليته بي وباوعت زين ماكو احد شافني ورجعت الهم
لكيت عذراء تعبي واني كعدت شوية عبيت وياها كم كونية ماكو ربع ساعة وكلت الها
تعاي وياي خليت خبز وتمر جايبتهم وياي هناك.
صدك جبتهاا واجيت
واشوفلك الطفل مشمور بالكاع واني سويت نفسي منصدمة كلتلها
: عزززا يمة هذا الطفل شنو
ركضنه اثنينة وهي متفاجى طلعنا شايلي بحضنه واني متفاجئة ومصدومة اكثر منها شنو هذا طفل
عذراء: يمه يسرة المن هذا الفرخ
: مااادري ولج تعااي ناخذة للولد
اخذنا ومشينه ورائد وخالد مصدومين ويتحسبون على امة وكل شوي ورائد كال
: ب يجبن ويذبن
شالوا بحضنهم يناغون بي وهو يبجي وررائد كال
: أنروح بي للبيتنا.
خالد: روح أنت والبنات أنا أضلن بالكاع
أخذنا ورجعنه واني شوي ارتاحيت من شفت رائد وعذراء فرحانين بي
كلت هاي إلى بيه يم الله حسنة احس أنقذت روحين وساعدتهم
اجينه نمشي وعذراء دكول انااا اربي ومكيفة بي
هسه اكيد رباب تفرح
تبقى بس سالفة هي مو أبنية أشلون أنسد هالسالفة مااادري بس اكيد الها حل
مثل مالكينه حل للطفل نلكة حل لهذا الموضوع هم
وصلنا مسافة عن ابيوتنا وأشوفلك
سيارات يمنه وهواي ناس كله معكلة وكع كلبي.
شصاير وصلنا وعذراء أنطتني الطفل
كالت: - شكوو أشبيهم أهلي
زينب: مااادري علمي علمج
وصلناهم جانوا كلهم بربضة عمي نصير وسائد ومحمد وعمي عكاب وبعد البقية كلهم
متروسة ترس الربضة عبالك منتظرينة وسائد بيدة تفتكه وعيونهم صار على الطفل البيدي
عذراء بدون سابق انذار حجت كبل
: بوية عاين لكينه فرخ اصغيرون بكاعنه
انصير: ابن منهوو هذا
رائد: ماندري حجي لكينا بالكاع.
جان باوعلي بلعت ريكي وعيوني راحت على يسرة واكفة بالباب ويمها رباب تبجي وتفرك بديهه
بعيونها نظرة خوف وذنب مثل إلى مسويلة سالفة ومتندم عليها
فكيت عيوني واني اسمع يسرة دكلهم
: ابنها تريد تبلينا بابن الحرام هذا
جمدت مصدومة عباالك ماي بارد وانرش على وجهي الطفل بحضني واكفة لا اخذ ولا انطي
ابني شنو أبني؟
تقدمت يسرة أخذتة من أيدي بنتر وخالد لزمني أباوع مشدوهة جامدة.
رباب طاحت على ركابها وجهها أصفر من الخوف تبچي وتفرك بديها
نصير: -أخذوهة اربطوهة بالمحصار ال فشر عليه كلام كلش مو حلو بحقي حسيت نفسي رخيصة
هو كال هيج وأني فرفحت
: - لا والله مو إلى والله مو إلى مووو أبني هذااااا
كلبي طلع من صدري والعيون كله عليه عرفت ناوين يكتلوني لعد على شنو مجموعين
شوكت وأشلون ومنو أنطة بيه ماكو غير رباب
ساعدتهه بحسن نية والحقيرة غدرتني.
كل العيون صارت عليه وعيوني تعلكت بسائد ورضية كل أملي بيهم بس محد أتقرب مني
سائد جان واكف جامد مثل المصدوم وما مصدك
ورضية بس تبجي واكفة يم باب غرفتهه
لساني نشف حركت شفايفي وما طلع صوت
خوف و ذنب وصوت كلبي يدك مثل أطبول الحرب
سحبني خالد وأني اتلوى وأدفع بي أخذني للمحصار ورائد لحكنة لزموني وجتفوني باالمحصار
أرجف وأشهك تيبست مثل الخشبة أدية ورة ظهري
وضابين عليهن حيل
حسيت الخيبة مثل السهم دخل بنص بصدري.
اقتحم كلبي شعور الخيانة والغدر
شگد هاي الناس وحوش وكلمن يكول يا روحي
ورطتني وطلعت نفسها منها
نزلت أدموعي على خدي بس ماگدرت أحچي
لأن كلشي صار أعظم مني ومن صوتي
أسمع صوت هوستهم برة بس ما أفرزن كلامهم
بدت تمطر من الصبح لحد ما صار المغرب
واني بالمحصار حتى محد أجاني بس
صوت البقرات يمي
صارت دنيا الليل ومحد سأل عني ولا جربوا يسمعوني او يسألوني هيج بسرعة صدكوا
سمعت صوت حركة قريبة بقت عيني للباب لحد ما دخلت رضية.
أجتني بسرعة حضنتني كمت أبجي بالزايد حجت بعتب
: -عليش هيجي سويتي
: ماااااسويت والله عمة أنتِ تعرفيني أني فقيرة
واااللله ههذاااا مو اابني ااابن رباب والله والحسين بشنوو اااااحللف
فكت حلكههه كالت برتباك: -رباب؟
هزيت راسي ودموعي تارسة وجهي كالت بخيبة
: -أعمامج أتفقوا باجر يكتلونج والطفل ينطونة للبيت أعكاب تربي مرت أعكاب مو ماعده ولد وسائد أعترض وكالهم أخذهة ونسد السالفة بس يسرة حشت برس عمج ومصر يكتلج.
رجعت كملت مصدومة: -وااانا أكولن يسرة كطعت نفسها العار والعار وأغسلوا عاركم وأغسلوا عاركم
أثاريهه تريد تسد سالفة بتهااا
: -يعني شنو مصيري هسه
هزت راسها بحيرة وأجانة صوت يسرة أتصيح عليها طلعت بسرعة كالت لا يحسون عليه
بقيت وحدي أبجي فد مصيبة كارثة
أشلون بيه
يعني شنو أبقى منتظرة مصيري
أدري باجر يكتلوني.