رواية مرواد الظلمة الجزء الثاني للكاتبة هيلانا الفصل الخامس والعشرون
جاننت الساعة قريبة على ال 12 داخل
مطار تورونتو بيرسون الدولي
المطار مليان ناس أصوات إعلانات الرحلات تتردد بكل مكان
وكف مصطفى وأني يمه بعد ما خلصنا إجراءات السفر. قبل شوية ودعنة أهله وبعد موافقتهم الا سافرنة
تنهد وهو يشوف لوحة الرحلات
گال بهدوء
: -يلا تحركي
هزيت راسي ومشيت ورا لباب الصعود وجانت رحلتنت متجهة لدبي
بعد إعلان الصعود صعدنة للطيارة واستقبلتتا المضيفة بابتسامة.
كعدنة بمكانة وبدت الطيارة تتحرك ببطء على المدرج
بعد لحظات ارتفعت الطيارة وصارت أضواء تورونتو تبعد وتبعد لحد ما اختفت بين الغيوم.
مرّت ساعات طويلة واغلب الركاب ناموا بس أني جنت أباوع من الشباك وهو كاعد يلعب بمبايلة
مصطفى: -ملاك
التفت عليه: -نعم
مصطفى: -شگد عمرج
ملاك: -وليش تسأل شعندك بعمري
مصطفى: -يجوز اريد أخطبج
ملاك: -ماتكدر
مصطفى: -السبب
ملاك: -اريد كيلو ذهب وبيت وحدي صعب عليك أدبرها.
كال بسخرية: -لا ما مبين عليج مادية
ملاك: -لا وداعت بابا جوي واجواي المادة أموت على المادة أصلا أني ماما رادت تسميني مادة لو بابا موصيها تسميني ملاك
مصطفى: -جا هيج ما تحصلين زلمة گلف اذا ادورين ماديات
ملاك: -والله ضلعي أخر همي الزلمة الگلف اريد أعيش وأصرف شسوي بالگلف شنو عندي عركة
ضحك ودار وجهه، البطران يكلي أهم شي زلمة يسولف عشرين بالشهر.
بدت الطيارة تنزل تدريجيًا ونزلنا بدبي وهاي أول مره أشوف دبي جانت الاضواء تجننن انبهرت
: -باع شكد الأضواء حلوة
ابتسم وباوع من الشباك
هبطت الطيارة بسلاسة وبعد ما نزلنا مشينة بصالة الترانزيت.
المطار جان ضخم وبي ناس من كل الجنسيات.
اشترة كهوة النا وكعدنة ننتظرون رحلتنا الثانية للعراق
صدك فترة قصيرة وتجهنة للطيارة وطول السفرة هو ساكت
جان الصبح بدا يبين من شباك الطيارة
هبطت الطيارة أخيرًا ب مطار بغداد الدولي.
نزلنا من الطيارة وأني حرفيًا رجلي ما شايلتني من التعب مشينا ويه الركاب لحد ما وصلنا لصالة الوصول.
التفت عليه وكلت وأني أفرك عيوني من النعاس
: -مصطفى خل نروح لأهلي نرتاح هناك وبعدين نشوف الموضوع
هز راسه: -لا اليوم نبقى ببغداد
رفعت حاجبي
: -ليش
گال بهدوء
: -تعبانين من السفر والطريق بعيد وباجر الصبح نطلع للناصرية ونرجع لنجف بحيلنا
نفخت بضوجة وهو مشى كدامي بيدة جنطتة.
طلعنا برا المطار، والجو جان دافي شوية رغم إنو الصبح بعده
وكف تاكسي وصعدنة گال للسايق
: -لأقرب فندق زين
ركبنا طول الطريق أني ساكتة شوي لأن التعب غلبني وهو هم ساكت يباوع من الشباك.
بعد حوالي نص ساعة تقريبا وكفنا كدام فندق ببغداد.
نزل مصطفى أول ودخلنا جوة راح للريسبشن وسولف ويا الموظف دقيقتين وأني بقيت منتظرتة وأفكر بعيوني
رجع لعندي وحجة
: -حجزت غرفتين.
رفعت راسي بسرعة
: -غرفتين
: -إي غرفة إلج وغرفة إلي.
كمل بخبث: -الا اذا تردين تبقين وياي بنفس الغرفة ما أكول لا
: -وشعندي باقية وياك
: -جا شكو تسألين
: -ها لا بس أستغربت شوي
: -لا تستغربين بعد
سكتت ومشينا ويا العامل للمصعد
أني طول الطريق دا أحچي وهو ساكت
: -تعرف أول مرة أنام بفندق ببغداد
: -ضلي وياي وكل يوم أنومج بفندق شكل
: -ما تقصر ابو الفنادق
لف عينه عليه وضحك بخفة
وصلنا للطابق ووكف العامل كدام غرفتين متقابلات.
فتح الباب الأول وسلمني المفتاح
: -هاي غرفتج ست.
أخذت المفتاح وباوعتله بمكر
: -لا تنام بسرعة يمكن أحتاجك بشي
رد وهو يفتح باب غرفته
: -مستحيل
ضحكت ودخلت غرفتي
أول ما سديت الباب ذبيت الجنطة على الكاعية وشمرت نفسي علىى الجرباية
ميت من النعاس كبل غفيت ما فزيت غير على دكة الباب كمت كوة فاتحه تك عين
فتحت الباب على نص باوعت مركزة منو كدامي جان هو مرتكي على الباب يباوعلي مدري شلون
: -أحد كايلج من قبل حلوة و أنتِ كاعدة من النوم
: -لا
: -شعجب.
: -لان محد يكدر يكول أكسر اسنونة اليحجي وياي هيج
: -شدعوة
: -والله هاي الدعوة بعد
: -بس أنة كلت
: -هم أكسر أسنونك بس مو هسه لان مصلحتي يمك هسه
: -حلوة ام المصالح
: -هسه شكو جاي للغرفتي
: -أطمئن عليج خاف محتاجة شي
: -لا ما محتاجة يلا لا تزعجني خليني أنام
ضحك وحك شواربة
: -ما تجين نتعشى سوة
: -مو جوعانه
: -تمام براحتج انة نازل أتعشى
راح وقفلت الباب رجعت نمت لثاني يوم كعدنة من الصبح تريكنه وطلعنا لناصرية.
بس تفأجت عندة سيارة وكفت صافنه
: -شنو أجرتها
: -لا طلبتها كم يوم
: -منين
: -من عمي
: -صدك والله لعد عندك أعمام هنا
: -اييي عمي عزيز
ابتسمت واجيت صعدت بالصدر جانت جارجر وحلوة الصراحة ما صاعدتها من قبل حلوة كلش
راسلتني حور بالطريق كالتلي أجيتي كتلها لا بعدني بكندا أمي بس تدري بيه هنا تلحكني
وصلنا الناصرية من وكت لان ما شاءلله طايرة أطيور وهو يسوق سريع لاكف الشارع
كتلة بتسأل
: -وين رايحين بالضبط.
: -للبيت أبو عبد
: -منو هذا
: -الامانة عندة
: -قصدك الكتاب
: -تقريباً
: -شنو تقريباً وضحلي
: -أنتِ الج الصافي لا تلحين وتسألين هواي
: -من حقي أسال غير اعرف وين رايحين
: -هسه واذا عرفتي شراح يصير
: -مايصير المهم أعرف
دار وجهه ما راضي وصلنا هناك الظهرية ورحنا نسأل لحد ما وصلنا بيت أبو عبد
طبك السيارة ونزلنا هو كدامي واني ورا دك الباب
طلع علينا شاب متوسط بالعمر رحب بينه.
سالة مصطفى عن ابو عبد طلع أبو وطبعا مع المفاجى الحلوة طلع ابو عبد متوفي
فكيت حلكي ومصطفى كالة
: -النا أمانة يمه ما كالكم عليها
رد عليه بفتور: -والله يا خوية ما مخلي شي يمي بس يجوز يم واحد من أخوتي
: -ماتكدر تخابرهم النا
: -اي ميخالف تفضلوا جوة بين ما أخابرهم
صدك دخلنا جوة وخابر أخوتة كلهم لحد ما طلعت عند أخوهم الجبير
والجبير ساكن بكربلاء كتلة بحماس
: -يلا قريب على نجف مناك أنروح لبيتنا
: -اي أن شاءلله.
سلم على رجال وتشگرة وجان كلش طيب جلب بينه االا تتغدون يمنه فد معزب
بس مصطفى ما قبل وواحنا طالعين تمشينا للمكان إلى خلينا السيارة بي
بس لگينة السيارة ماكو وكفنه أثنينه أنباوع حجيت مستغربة
-مصطفى وين السيارة
باوع يتلفت يدور على سيارة ماكو
: -انة هنا خليتها
: -لعد وين راحت
: -شمدريني
مشى كدامي للمكان إلى جان مخليها بي يباوع ويتلفت واني ورا أمشي
والمنطقة هدوء هنا كلش منو أخذ سيارتنا.
وكف ايدة على خصر ولازم تليفون ماعرف
شيسوي
: -هسه اشلون
: -نتمشى للشارع جا شلون
مشة كدامي واني ويا وطول الطريق ما يسولف مبين ضايج وروحة بخشمة
والمنطقة بس صوت العصافير بيها وهو ساكت ولا يحجي واني كلش تعبت رجلية وكعن من المشي حجيت بضجر
: -اكلك اني تعبت
رد برود: -جا شسويلج
: -شنو شسوي نگضيها مشي
: -شتردين أشيلج؟
كالها والتفتلي متخوصر كشمت بوجهه هز ايدة ومشى انوب يمشي سريع مركضني ورا.
وهذا الشارع العام مدري وين صار عبالك نمشي بگطبة لهسه ما واصلي
مشينه مسافة ورجلي كلش شگلت صحت عليه التفتلي كعدت بالكاع
: -هاااي كعدتي خطوة بعد ماكدر أمشي
: -بس شوي أضغطي على نفسج راح نوصل
: -وين نوصل كل شوي دكلي راح نوصل وكش ماكو شوكت نوصل
: -يا كلبي هسه نوصل
: -لااا دكول كلبي منين اجيت كلبك
: -بابة عادي كلمة عادية
: -ولا دكول بابا هم انت ما توصل لبوي
غمض اعيونة بملل وجر نفس يباوعلي بنص عين.
: -هسه شتردين نبقى هنا؟
: -لا بس اني تعبت
اكو سياج مال بستان هو احنا كعدة بسدة بس هو مرتكي على سياج ماكعد
بقيت كاعدة بسدة السياج أتنفس وهو بعده واكف يباوع حوالينه فجأة گال
: - لحظة لا تتحركين.
: - وين رايح
: - دقيقة وأرجع.
وعافني كاعدة ودخل للبستان بقيت أباوع وراه مستغربة
: - مصطفى وين رايح
ما رد اختفى بين الشجر دقايق وبعدها أسمعت صوت حركة
طلع مصطفى من البستان ويجر وراه مطي مربوط بحبل وكف كدامي بكل ثقة.
: - لكيتلج خوش سيارة كاديلاك
ظلّيت ساكتة ثواني أستوعب المنظر.
: - مصطفى شنو هذا
شد الحبل وگرب المطي
: - سيارتج الجديدة.
: - شنو سيارتي الجديدة أشبيك
: - كاديلاك موديل البستان تلوك بفخامتج
غمضت عيوني بملل وباوعتله
: - انت طبيعي
: - جداً.
: - زين وين جايبه هسه راعيه يطلع علينا.
لوّح بإيده بلا مبالاة
: - معليج
: - شلون معليج
: - أخذت صورة للمكان بالمبايل وخليتله فلوس يم المطي
: - مصطفى أنت مخبل اكيد.
: - لا بس دافعلة الإيجار شكو بعد
: - إيجار شنو
: - إيجار السيارة.
: - هاي مو سيارة هذا مطي ومال ناس عيب شلون ماخذة
هز جتفه بدون أهتمام
: - أهم شي يمشي واذا مطي جا السيارة بيش أحسن منه
ظلّيت أباوع للمطي وهو يباوعلي ومصطفى والله أحسه ناصب عليه گتله ببرود
: - زين وشنو الخطة هسه
: - نركب ونمشي للشارع جا شني
: -نركب؟
: - اي.
: - مصطفى اني ما أركب مطي.
باوعلي بنص عين.
: - قبل شوي گتلج أشيلج ورفضتي هسه المطي يشيلج وهم قابلة جا شتردين
: - لاااا ماااركب مطي معلية
شد الحبل وقرب المطي أكثر
: - يلا اصعدي.
: - لا
: - ليش
: -بلا واحد شافني شيكول
: - أركبي
: -مااااااا
وكف يفكر شوي وبعدين حجة
: - زين حل ثاني.
: - شنو
: - أنتِ اركبي وانة أسوق
: -لاااا شنو هالكلام
: ميخالف أنة اركب و أنتِ سوقي
: -هم لا شنو خطية المطي مايتحمل ثكل شخصين
: -جااا شلون أنشيل المطي احنا
المطي فجأة نهك بصوت عالي.
التفتتله بسرعة
: - شفت حتى هو معترض
: - لا هذا يگول استعجلوا
باوعتله بملل: - مصطفى والله تعبت.
قرب المطي شوي
: - زين خلينا نتفق
: - شنو
: - نص الطريق تركبين ونص الطريق تمشين.
: - ليش
: - حتى ما يزعل المطي ويكول استغلينا ومشاعرج المرهفة ما تنجرح على المطي
والله العظيم ديضحك عليه عديم الانسانية يريد أثنينة نركب هذا المسكين خطية
بعدين أني شبيه مخبلة اركب ويا هو ما ادري شلونة
صح مبين خوش ولد بس هم أحسه هتلي.
: - تدري شنو لو تمشيني عشر ساعات بعد أهون من أركب هذا المسكين
: -يعني تمشين؟
: - طبعاً
: - زين
عاف الحبل فجأة
: - ها
: -أخلي يرجع للبيتة
جان المطي تحرك يريد يرجع للبستان واني بسرعة لزمته صراحة ما توقعت يسويها عود عبالي يكلي لا ومن هالسوالف باوعلي بسخرية
: -هدي المطي بابا ورا أهل
: -لا لا بطلت خلي اركب عليه مااكدر أمشي والله
يباوعلي وعيونه كلها سخرية.
: - جا صارلج ساعة تتنغوصين عليه وصايرتلي من منظمة حقوق الحيوان و هسه تريدين تركبين
شدّيت الحبل حتى لا يرجع للبستان وگتله بسرعة
: - اي اريد اركب رجلي انكسرت من المشي.
رفع حاجبه
: - لا لا المطي خطية
: - مصطفى فدوة خلينا نوصل للشارع وبعدين سوّيلي محاضرة عن حقوق المطي يلاااا
: - لا المسكين مايكدر
: - والله المسكين الوحيد هنا أني
قرب خطوة وباوع للمطي
: - ها حبيبي شتكول تقبل توصلنا لو بعدك زعلان منها.
شو المطي حرك راسه شوي دايرة عنه
: - شفت وافق
: -لا ما سمعت صوتة ما موافق
: - لا لا موافق يلا خليني اركب
وكف قدامي وحط ايده على خصره
: - زين شلون راح تركبين
: - شلون الناس تركب
: - انتي راكبة مطي من قبل
: - لا
: - واضح
حاولت اصعد رجلي علگت شوي وكفت اتوازن.
مصطفى واكف يباوع عليه شكد خبيث
: - زين ساعدني بدل هل وكفة
قرب وحاول يثبت المطي وحطلي ادي
: - يلا حطي رجلج هنا وأصعدي
حطيت رجلي وبصعوبة صعدت.
كعدت فوكه متشبثة بالحبل
: -يلا أني هسه أروح انت تعال وراي
أبتسم ولزم الحبل ومشينا شوي هو يجر بي وأني لازمة الحبل إلى يصير على ركبته خاف أطيح
المطي جان يتحرك ببطء بس والله طلعت حلوة
مسافة والمطي وكف تنحر ما يمشي شد مصطفى الحبل وكالة
: - يلا حبيبي امشِي
عبالك يحجي ويه حبيبتة بس هو نهك بصوت عالي
باوعت لمصطفى بخوف
: - ها
ما رد عليه جرة قوي حتى يمشي وضربة صحت عليه
: خطية لا تضربة
حسيت خلكة ضيك كالي بضجر.
: -أسكتي لا أضربج بمكانة
كمزت بوجهه: -شنو تضربني تايهتلك انيي نسيت شلون ضربتك بوكسيات بكندا
جر نفس وحجة بجمود
: -شبيج خالي جااا مو القصد أضربج أضربج مثل ما فهمتي
: -لعد شنو قصدك بلااا
: -يعني الضرب أنواع حسب المناطق
حسيته ما ادري شلون يحجي ابتسم ورجع جر المطي حجيت
: -شنو بلا فسرلي
: -هسه انت شتردين تنضربين؟
: -شحدك اكسر ايدك قبل لا تمدها
طگهة ضحكة وكال
: -أحتمال يعجبج
: -شنووو يعجبني شبيك انت خبل.
: -استغفرالله والله غبية أنتِ ومحجرة
: -سدددد حلكك ولااااا تجاوز عليه ترى بعدك ما تتعرفني
جان عاف المطي وحط ايدة على خصر وكالي بملل
: -ايييي بلااااا شسوين كليلي
: -تعرف كلش زين شسوي والله أنزل هسه ألزككك بالكاع بوكس على جلاغ
: - ليش لا
: -ما تستحي اذا مرة تضربك
غمزلي وعض شفته بطريقة ادبسززية
: -اذا مثلج لا قبلان
: -خطية يحاول يصير كيوت بس اننت جيب وراح تبقى جيب
: -شنو جيب مال قميص.
: -شگد صارلك بالخارج وبعدك بهل عقل والتصرفات البيئة
: -بوية هسه شتردين
الهتلي يحجي برود ويستهزا سكتت ورجع هو جر المطي قوي فمشى
مشينة مسافة وهم وكف ما ادري ليش احس المطي ما عاجبة يوصلنا للشارع كتلة
: - احسه معترض ما يريد يوصلنا
كال بجدية: - لا هذا كاعد يسأل وين رايحين
والله جان ناصب عليه ويتبسم فكلت خلي أصير مثل على شنو حاركة دمي
: - كله للشارع يوصلنا
: -كتلة كال صار
: - يفهم عربي لو شلون
: -كلشي يفهم.
: -لعد بس عليه ما يفهمه
باوعلي بمقت ما حاول يضمة هالمرة
: -أحجي بالمفيد وعوفي التفلسف
: -عود شكو دزك ابوك اني وحدي لو مطيني العنوان اجيبها
: -ما دبرينها
: -لا ادبرها ونص وتكدر ترجع وتنطيني باقي التفاصيل اكمل وحدي ترى اني اجيت لكندا وحدي شنو تصعب عليه المحافظات مثلا
همهم ودار وجهه عبالك ما مهتم
: -يلا خير ان شاءلله.
حور:
كلش أنزعجت من تصرف ملاك هي هم أمي وكلنا خايفين عليها بس مو هيج
دهيرة شلون راحت لكندا وحدها وخلتنة هيج ميتين خوف عليها يربي بگد الفصمة وماتكعد
أمشي وأحجي ويه نفسي بشارع اريد اخذ تكسي ولاگني جيرانة أبو بتول كاعد كدام دكانته
فد واحد مخرفن ويصجم كل إلى يشوفها بحيت بنات المناطق مستحيل وحدة فالته من السانة
كلهن مسمعهن كلام حتى ماما هم بس محد يحاجي لان يدرون بي مخبل وبي حالة نفسية.
والله لعلم احسه صاحي مو مخبل شكله مهندم وكاشخ على اخر حبة ويتلامع
شفت عينه عليه من بعيد شمزيت منه شگد مسخ
ومادام تصبحت بخلقته يومي مايمر على خير
: -حور وين رايحة من صباح الله
حجيت بعصبية: -شعليك عمو
: - ها لا تعصبين بس سألت من الصبح ماشية وحدچ
: - وإذا ماشية وحدي شنو الشارع ملكك حتى تسوي تحقيق ويّ الرايح والجاي شعليك انت
: -يا ستار شمالج عمي هو سؤال بس ردت أعرف وين رايحة.
: -اييي لا تسأااال شنو أبوي مسؤال عني شو ياهي تجي تسأل خاف ناس ما تحاجيك عود مريض ومن هل كلاوات وروح بابا انيملي طابوكة براسك اذا تسألني
جان رد للدكان مالتة وعيونة تترقبني بضجر عفته ومشيت عفية ناس فضولية
وأني ادردم عليه سمعت صوت سيارة وراي التفتلي جان عمو غيث أبتسمت
رجعت فتحت الباب صعدت بصفة
: -صباح الخير عمو
: يا هلة بهل صباح وين رايحة حبيبتي اليوم مو عطلة
: -رايحة أجيب علاج لماما ضغطه صاعد وحبها مخلص.
: -سلامتها ليش ما خابرتني اخذها لمستشفى
: -تعرف ماما ما تحب تثكل عليك
: -لا أبوية أهل احنا
هزيت راسي بمتنان وهو كالي
: -ملاك رجعت لو بعدها
: والله عمو اخر شي البارحة راسلتها بعدها كالت ماترجع هسه يجوز بعد كم يوم
: -زين والوادم الراحتلهم شنو شلونهم هم عرفتوا شي منها
: -اي طمنتنه كالت خوش ناس واصلا قابلين ينطوها الكتاب
: -ان شاءلله محلولة لا تفكرون واذا تحتاجون شي خابروني
: -تسلملي عمو ما تقصر.
كرص خدي ومد ايدة ينطيني أفلوس حجيت بسرعة
: -لا عموو ما محتاجة عندي
: -اخذيهم بدون حجي زايد
: -عموو ونبي عندة اني لو محتاجة أكلك
خزرني ما راضي مديت ايدي أخذتهم منه وتشكرتة
نزلت من السيارة وسديت الباب وراه
لوّحتله بيدي وهو مشى لفيت ظهري للصيدلية وبقيت واكفة ثواني أباوع على الشارع
الدنيا بعده صبح بس حارة شوي تنهدت ودخلت للصيدلية هاي الصيدلة دوم أخذ منها علاج لماما.
علي كد ما أجيهم صاروا يعرفوني تقريبا هي صيدلية الوحيدة القريبة على فرعنه
: - صباح الخير.
رفع راسه من الدفتر
: - صباح النور تفضلي.
طلعت الوصفة من الجنطة وحطيتها كدامه.
: - أريد هذا علاج الضغط لو سمحت.
كعد يدور بين الرفوف شوي بعدين رجع وهو شايل العلبة
: - هذا هو نفس إلى تاخذه والدتچ.
هزيت راسي
: - إي نفسه.
حاسبني دفعت الفلوس وحطيت العلاج بالجنطة قبل لا أطلع سألني
: - شلون صحتها هالأيام.
: - تعبانة شوي ضغطها ما مستقر
: - خليها تلتزم بالدواء وإن شاء الله تتحسن.
: - إن شاء الله تسلم.
طلعت من الصيدلية ومشيت على كيفي
عقلي بعده يم ملاك
كل ما أتذكر إنو هي بكندا وحدها كلبي ينقبض.
طلعت الموبايل من الجنطة وفتحت المحادثة
ويّاها، آخر رسالة منها جانت البارحة
كتبت بسرعة
وينج هسه طمنيني عليج
بقيت أباوع بالشاشة يمكن ترد بس ماكو شي
تنهدت وحطيت الموبايل بالجنطة مرة ثانية
فجأة سمعت صوت بسمي من وراي
: - حووور.
التفتت بسرعة جانت بنية من منطقتنه أعرفها تمشي بتجاهي وشعرها متلخبط قصير وكفت كدامي تلهث
: - وين مختفية من الصبح
استغربت: - ليش شصاير
باوعت حواليها وحجت بعجلة
: -ولج أمج راح تنجلط هذا أبو بتول قبل شوي جان أبابكم وكالها شفت حور ماخذة جنطة بيدها وطلعت ركض تتلفتت أضنهن مهزومة أنت صدك مهزومة.
كملت بهتمام: -وترى وأمج سوت بي فلك شلون هيج يحجي عنج وكالتلة رايحة أجيبين علاج بس هو يكلها تضحك عليج بابا بيدهة جنطة مال سفر وتعاركت ويا باالباب وبعدين تخربطت وطاحت ربج شفتج عبالي صدك مهزومة
حسيت الشياطين كله التمت أبراسي يربي هذا المخبل راح يجلط ماما أني أعلمه اليوم
الا أخلي راسة بالمنهولة وأشتكي عليه شنو مالة رداد بسيطة عفته ورحت ركض وبيدي العلاج وهي صاحت وراي
: -ولجج ااوكفي أنتظريني نرجع سوة.
بس طرت ركض هي ماما باقية نص عافية ومنا ملاك هبطتها وسافرت هسه تموت الله لا يوفقة
ركضت بالشارع ركض لا شايفة كدامي ولا سامعة شي غير دگات كلبي هي مريضة خاف تموت اسم الله عليها
الجنطة تضرب بظهري والعلبة مال العلاج بيدي وكل خطوة أركضها أحس روحي تطلع
وصلت للفرع مالتنه ولفيت بسرعة للبيت بابنا مفتوح واكو من جيرانا يمنه
كلبي طاح دخلت ركض وما انتبهت على أحد
: -مامااااا وينج.
لكيتها ممددة على القنفة ويمها مرة جيرانة تبرد بوجهها وتذب ماي عليه
بس أني ما شفت ولا واحد منهم ركضت عليها ولزگت بيها
: - ماما شبيج احچيج حبيبتي
فتحت عيونها شوي بتعب
: -وين رحتي حوري
: غير كتلج رايحة أجيبلج الدوء صدك جذب
: -غير هذا المصخم سودني كلت خاف لحكت أختها
كملت بدموع: -تردن تموتني أنتن
: اهوو ماما يعني بعد ما نطلع شلون
: -اي اكعدن واسكتن اني أطلع بس أسترن عليه.
بعدنة دنحجي و رفعت عيني أنصدمت واكف يم الباب متربع مثل اغراب البين
أبو بتول وعيونه عليه هنا الشياطين كلها رجعت براسي فد مرة وكفت بسرعة
: -لكككك شللونن ااااجذب على مامااااا
كل الموجودين التفتوا عليه مشيت كم خطوة باتجاهه وأني منفجرة من الغيض
: - جاي لبيتنا تجذب على أمي هسه من أهينك احد يلومني اااستحي على نفسك عاد
هو رفع إيده يدافع عن نفسه
: - لا لا أني بس خفت عليج.
طبعاً واحد مخبل مو صاحي والله وماعرف شنو غايته دوم حاط روحة بيتنا
: - ومنو انت وتخاف عليه شعليك
صاحت عليه أمي بصوت تعبان
: -ولج ماما عيب عمج
كالها بتنأيب: -اي والله يا خوية زينب ولا تحترم بناتج مو عليج هاي واني خايف عليها
ثرت بوجهه: -منووو عاتب عليك تخاااف عليه شعليكك لا اااتصير حشري
: -جاا أديحين ومحد يصيح عليج غير جيران وأخاف عليج واريد مصلحتج.
عاد هنا صدكت تعصبت منه ومااشفت كدامي شفت علبة الدبس على الميز سحبتها بسرعة
اريد أضربة بيه وهو أنهزم وامي صاحب عليه هي وجيرانة الحجية الكاعدة يمها بس
ما سمعت ركضت ورا لباب الحوش وهو طالع دخل ولد ما أعرفه بس ما ركزت كبل هفيت العلبة
أجته ترس بوجه أنوب كزاز فشخته من يم كصته ودمة نبر جمدت مو بس دم لا دبس والدم ترس وجه
طاح بالكاع وايدة على وجهه مو طاح وانما كعد كعدة من قوة الطگة كعد على اركبة.
ما قربت منه بقيت بمكاني وما اشوفلك الا الحجية طلعت عود تلزمني أنوب شافته تسودنت من شافته صاحت
: -يمة ااابني برد سودة بوجهه العدوة يمه
راحت ركض فزعت أخوتة أخذوا بالسيارة وأني رجعت يم أمي سولفت السالفة الها ورزلتني
كالتلي هذا ابن ام منظر هي خابرتة حتى يجي ياخذني لطبيب شلون بيج وبستهتارج هاي أنت عود العاقلة
بس أني مو قصدي جنت اريد اكسرها براس ابو بتول ابو العلوم المديس خفة زولة.
رجعت كعدت يم أمي وأني بعدني مصدومة من اللي صار يدي ترجف وعيوني تروح وتجي على الباب
أمي كامت كوة بيها ما بيها طلعت وراهم
لحد ما راحت الهوسه أنوب رجعت تباوع على بنص عين
: - شلون بيج هاااا
: - ماما والله مو قصدي والله جنت أريد أرگعها براس أبو بتول
: - اي واضح أبو بتول طلع سالم والولد خطية أخذها براسه وبعدين أشبيج ويه رجال
: -غير واحد حشري وما يستحي يسمعني كلام مو حلو
: اي أجاهلي.
: -زين أجاهلة اوكي وجيته للبيت هسه أشلون هم نسكت
: -بس مو هيج يا أمي
لزمت راسها بتعب كمت وكفت يمها
: -ماما أجيبلج علاج
هزت راسها جبتلها ماي والعلاج أخذت منه وأشرتلي على العباء معلكة
: - ناوشيني عباتي لازم أروح أشوفه بالمستشفى مو معقولة أكاسرين راس الولد وكاعدين هنا رفعت راسي بسرعة
: - ماما أجي وياج
كالت بحزم
: - لا أنتِ تبقين بالبيت ام المصايب طلعتي أنكس من أختج كافي اليوم اللي سويتي
نزلت عيوني
: -ماما.
: - ولا حرف أسمع منج
لبست عبايتها وطلعت بقيت وحدي بالبيت والله عرفت اليوم أكشر من شفته الصبح
كعدت على القنفة وطلعت الموبايل مباشرة فتحت محادثة ملاك كتبت
: -وينج ليش ما تردين
ما طولت، ردت.
: -اسفة ما فاتحة النت هسه شفت رسالتج اي شلونكم ماما شلونها
: -ماما موزينه مخبوصة عليج وصحتها تعبانة شوكت ترجعين
: -كم يوم وأرجع ولا تخافون عليّه أني بخير
حجيت شوية وياها وسديت المبايل كمت
باوعت للبيت.
المطبخ مكلوب صاير عندي تراكم بالصحون خلة أغسلهن حسيت نفسي خايسة
لفيت شال على راسي وبلشت أرتب
غسلت الصحون مسحت الأرضية
حتى سويت جاي وكل شوي أوكف وأفكر بالولد.
: - يربي شلون بس لا مات خاف أنوب يشتكي عليه
بعد ساعة تقريباً سمعت الباب أنفتح.
ركضت أشوف اكيد أمي
: -ماماااا
دخلت شكلها تعبان قربتلها وكبل سالتها
: - شلونه
فاتت جوة خلت عبايتها على الكرسي وحجت برود
: -جيبلي ماي.
رحت صبيت ماي وانطيتها شربت منه وأني واكفة على نار أعرف الولد شصار عليه
: -ها ماما بشري شلونة خوما مات
هزت ايدها ما راضية ممتعضة مني ردت بنبرة جافة
: - زين
تنفست بارتياح
: - الحمدلله.
بس فجأة التفتت عليه بحزم
: - بس هذا ما يمنع إنو سويتي مصيبة اكبر من راسج
حكيت خدي برتباك
: - ماما والله ال.
قاطعتني.
: - أربع خياطات براسه ولج صرت هالكتدوتني كدامهم شگد أستحيت عيب من اهله وأمه اجوا يركضون من سمعوا بيه متخربطة تجي بتي تفشخهم بلااااا مو عيب مو فشل شلون بيجن أنتن
سكتت مثل الطفلة لان أدري بنفسي مذنبة
بعدين حجت وهي تشير عليه بإصبعها
: -اسمعيني زين من اليوم ورايح ما تطلعين بس للجامعتج
: - صدك تحجين
: - ولا السوك ولا الشارع ولا أي مكان أني اروح بس أسترن عليه وكعدن عسى ما أموت معليجن اكعدن.
سكتت واضح هي بعدها تعبانة
كعدت يمها
: - ماما لا تضوجين هو الولد مابي شي وحادثة بسيطة و إن شاء الله يصير زين
: -حادثة بسيطة هسه الگة جيران كله تحجي عليجن بنات ام حور وكحات ويفارسن حتى ويه الزلم
نزلت عيوني بخجل هو كلامها صحيح بس شنسوي
قابل هو بيدنة.
أسينات:
أسينات: -والله الجو اليوم بارد حسيت إيدية تجمدت.
أيما: -إي والله بس حلو المطر هيك
فجأة مرت سيارة بسرعة رشّت الماي علينا وتبللنا والمي نزل حتى على وجهي
أيما: -ياااا حيوان ما بتشوف الطريق
ضحكت عليها شكلها جان يضحك وهي مبللة ومنزعجة باوعتلي بغيض
: -لا تضحكي والله لو مسكته لكسر راسو
أسينات: - يلا تكبرين وتنسين عادي أمشي.
بس هي وين تسكت لسانها طويل صاحت عليه
: - تعى لهون يا حمار سوق مثل العالم.
ما توقعت يوكف بس فجأة السيارة وكفت اندار السايق ورجع علينا بقينا واكفين مستغربات
نزل منها شاب وحجى بأسف
: - آسف والله ما انتبهت للمَي بالطريق
أني جنت ساكتة بس هي ما تلزم لسانها
: - آسف شو؟ غرقنا بسببك
: -والله حقكم عليه إذا تردن أوصلجن كتعويض.
أسينات: - لا لا عادي ما صار شي يلا خلينا نمشي.
سحبتها من إيدها ومشينا لأن حسيت نظراته غريبة شوي كلت نروح لمطعم بابا ومن مناك أرجع للبيت.
بعد مسافة وصلنا.
داخلنا المطعم شفت بابا من بعيد يسولف ويه الموظفين رحت من وراه.
أسينات: -هلو بابا.
التفت مبتسم: - هلا بابا تعالي. تعالي
أيما: - مرحبا عمو
علي: - أهلاً وسهلاً تفضلوا اكعدوا
كعدنا على الطاولة وهي دكت عليها بحماس
: - والله جوعانة بدي جرب أكل عراقي اليوم.
أسينات: - نطلب دولمة أجيبلج أحسن شي
بعدنا نسولف وطاحت عيني على نفس الولد دخل المطعم توترت وشرتلها تباوع وراها التفتت وشافته
: - لعمى شو لاحقنا هذا.
: - خاف صدفة
: - لك لا صدفة شو
جان يتلفت كأنه يدور على أحد بمجرد ما شافنا ابتسم وجا باتجاهنا بكل صلافة
جر الكرسي وكعد يمنا بدون استئذان
صار مقابلي وإحنا الاثنين صافنين بوجهه.
أيما: -مين سمحلك تكعد إنت شو جابك لهون
حجة بابتسامة مستفزة: -كلت أعوض عن الضرر اليوم الغدا على حسابي
أسينات: -أخذ حسابك وولي منا
أيما: - بليز روح بلا قلة ذوق عنجد أزعجتنا
: - اعتبروها اعتذار.
أيما: -لا حبيبي احتفظ باعتذارك.
الولد جان يباوع عليّه مباشرة وكال
: -الصراحة الاعتذار الحقيقي لهالحلوة
فتحت حلكي
: - شنو
: - يعني بصراحة طلع حظي حلو اليوم تعرفت على كمر مثلج
أيما: - يا سلام قليل أدب كمان
متجاهلها تماماً ومركز عليّه
: - شنو اسمج
أسينات: - شو ما تخجل كوم ولي منا
: -بس لا زعلانة ترى عيونج جابتني أعتذر.
لزم المنيو وباوع بي
: -شتحبين تاكلين أعزمج على أطيب شي بالمطعم
فجأة جا صوت من ورا
: -تعزم منو؟
غمضت عيوني صوت بابا رفع عيونة شافه واكف وأني حطيت إيدي على وجهي بس هذا الفاهي بعده ما فهم وكال بثقة
: - يابة أريدك تنوعلي مشويات عراقية
وبعدين باوع عليّه وكمل
: - لعيون هاي الكمر نزّل من كلشي بالمطعم.
أيما كامت تمزمز وتضحك وأني حاطة إيدي على وجهي لأن أعرف شراح يصير
بابا قرب منه لزمة من ياخته وكع المنيو من إيده
حجة بعصبية
: -تغازل منو لك
ما لحك يجاوب أكل بوكس بنص وجهه
ضربة قوية وركّع راسه بالطاولة.
أني وأيما طفرنا من الطاولة والموظفين تجمعوا بسرعة وبصعوبة سحبوه من إيد بابا وهو أصلاً ما كدر يدافع عن نفسه متفائج
خَشمه صار ينزف ووكع على الكاع دايخ
صحت بخوف: - بابا فدوة لا تموتة خيولي أتركه
وهاي الفاهية تصفك وتضحك
: -يستاهل والله يستاهل عاشت إيدك عمو
الشاب طلعوه من المطعم وهو شبه دايخ وبابا قبل ما يحلكة التفت علينا بعصبية
: - منين هذا الك.
: - ما أعرفه بابا والله هو الصبح دمرنا مي بسيارته وانوب لحكنا لهنا
: - إي عمو عنجد قليل الذوق ربيته عشت
بابا هز راسه بوعيد ومشى وحجة بجمود قبل لا يروح
: -يلا كملن أكلجن
باسني براسي ومشى عبالك ما صاير شي
وأني باوعت على أيما وكتمت ضحكتي.
رجعت للبيت تعبانة من اللي صار بالمطعم.
ذبيت الجنطة على الكرسي وتمددت على السرير
يا ربي شنو هاليوم هم مطر وهم مشكلة بعد شنو باقي ما صاير وياي
غمضت عيوني شوي مرت ثواني وحسيت باب الغرفة أنفتح فتحت عيني ماكو احد مسدود الباب
رجعت غمضت رجعت سمعت صوت خطوات خفيف بالممر كعدت صحت: -خالة هاي أنتِ
لان هسه محد هنا غير خالة كمت طلعت ماكو احد نزلت جوة شفت خالة بالمطبخ كاعد أتسوي كبد دجاج ويه طماطة.
رجعت لغرفتي متجاهلة كل االاصوات طلعت القران كلت أقرا شوي وفعلا من أقرا حتى الصوت يختفي
كملت ونمت ما تغديت
ثاني يوم جنت بطريقي لدوام لان ست أيما أكلت راسي مري عليه نتمشى سوة على أجواء الصبح حلووة
والا جان رحت ويه بابا وصلني جنت أحجي عليها وأمشي وصوت الهورن فززني التفتت سيارة تمشي بصفي يربي هاي نفسها السيارة نزل الجامة
خشمة ملفوف صاير فلم حجة مبتسم
: - صباح الخير.
تأففت بعصبية: -هو اليشوف وجهك يشوف خير شكوو لاحكني
: -بس اليشوفج يشوف رب الخير
: -لازم بوكسي بابا مأثر بيك
ضحك وكال
: -أثر بس مو كافي
: - شوف لك لا تلزكلي ترى والله أكول لبابا عليك يسويلك خارطة بوجهك
حجة بتمسكن: -شمسوي بس أريد أعتذر
: -دولي هسه منو ميت على أعتذارك
نزل من سيارتة واجة وكف أكبالي واني اتلفتت خاف بابا يجي هذا نفس الطريق مالتنا
: -باع اعتذارك مقبول ويلا ولي كافي عاد شجاك.
: -أعزمج او اجيبلج هدية هيج الا أعرف أعتذاري مقبول
: -والله أنت جلدك يحكك يلا اذا مصر كلش فجيب هدية وتعال لبيتنا وأنطيني الهدية كدام بابا لان اكيد راح يفرح بتصرفك المحترم هذا
كال بغباء: -هااا صدك والله ولدج مبين رجال محترم بس ايدة ثكيلة شوي
: -لا لا بالعكس معليك تعال وراح تشوف شلون هو محترم أنت بذات راح يعاملك معاملة خاصة
ضحك ومرر أصبعة على خشمة الملفوف
: - هو أبوج يطگ شكو واحد يحجي وياج لو بس أني.
: -لا بس إنت مسويلك اشتراك خاص
درت وجهي دمشي صاح وراي
: -هسه شنو أجي
والله كتلة بكلبي أني أعلمك انداريتلة وحجيت
: -اي تعال هلة بيك
خليت ومشيت بس يجي بابا يدفنه والصراحة يستاهل لان مبين مدلل و لزكة وسرسري وما يستحي.