رواية وقار الغريب للكاتبة حوراء السعيدي الفصل السابع عشر
اسراء.
نهضت من مكاني على دفرة اجت بخاصرتي شاغت روحي الربها
وگفت لأزمة مكان الضربة مغمضة عيوني بألم أجاني صوتها
المقرف ونفس الكلام بكل مرة أسمعه بس اتأخر بالنوم
ميسون: خافنج عبالچ ببيت الخلفوووچ لو گاعدتلي بفندق
أنتِ هنا عبده يمنا، يله جهزي نفسچ السيارة تنتظر.
رگعت الباب وطلعت فتحت عيوني أسحب بالنفس گوا
دارت عيوني على أخواني الصغار الواگفين هم مبدلين نزلت دموعي.
ماتنزل دموع من عيوني ينزل دم وقهر واني أشوف
أخواني المايتجاوز عمرهم عشر سنوات
مشغلينهم نفس الشغل شغلنه نجدي بالشوارع.
وكل هذا سببه امي باعتنه الناس ماكو شي اسمه الرحمه بحياتهم
أباوعلهم الشمس حارگتهم حرك بشرتهم تعبانة
گعدت بمكاني
واعاتب امي إلى شمرتنا هالشمرة وبعد ماسئلت عنه
دائماً چنت أسمع من ابوي الأم حنونه الأم ماتعوف ضناها بَس كل هذا ما شفته عند امي
اجوني اثنينهم گعدوا بصفي من الجهتين يمسحون بدموعي.
أسامة: لا تبچين والله بس اصير چبير اله اخذچ ونطلع منا.
رد الثاني الساند راسه على كتفي
أصيل: اي اي اسراء حبابه لا تبچين
حضنتهم الصدري ابچي بصمت مختنكة ياحنيتكم خايفة لا بيوم يحرموني منكم.
اسراء: ختولي ولا توجعت ضربتها فاهية يله تعالوا نطلع
مسحت وچهي ولزمتهم من أيديهم وطلعت ينطونه ريوگ كل فجر
وياخذونه بسيارة احنا وويانه مجموعة نسوان وأطفال وزلم
اكو شباب واكو كبار بالعمر والبعض مثل حالنا اهلهم يبيعونهم.
ميسون واگفة يم الباب هذهِ المرأة إلى مسؤؤلة عنه
الله لا يوفقها مجرعة الناس المُر توصل وياها حتى تضرب
بينا وبالنهاية عصابة شينتظر الواحد منهم گعدت
أصيل وأسامة يم الاطفال الموجودين رحت غسلت ورجعت يمهم
دخل صاحب كل هالعصابة مأمون .
كل يوم يجي يفتر ويراقب أيشوف إذا أحد ناقص بينا
مأمون: حضروا نفسكم دقائق وياخذونكم أريد دخل أكثر من مال أمس خوووووش.
رفعت راسي أله.
اسراء: ومنين نجيبلك أكثر نجبر الناس تنطينه وانتم مسوينها وجبات النا
ميسون: السانچ طولان
اسراء: مو مثل السانچ بعد عمري.
مأمون يباوعلي صاحب ملامح قبيحة الدرجة كافلة تخلق الرعب بداخلك
مأمون: ميسون جيبيها الغرفتي
كض وطلع، بلعت ريگ بخوف أتقدمت ميسون سحبتني من نص اخواني وطلعت بيَّ.
عووفينييي ما اررريد اروووح
ميسون: چاا ما لزمتيي هاللسان إلى بطول النعال
السانچ إلى بطوول النعال موو اني
كفختني على راسي بقوا.
يجي يوم واگصه الچ
اعفطلج هسه لأن اني لا اخلاق ولا هم يحزنون دامني معاشرتكم.
ضحكت بخبث
أنشوف هسه هذا اللسان يم مأمون يبقى لايط لأذانج لولا
دفعتني الداخل غرفته اول مادخلت كفختني ريحة الجكاير تارستها ترس
چان گاعد بمكانه بكل جبروت صارلي سنة هنا والي تدخل بهذا المكان
أما تطلع وهيَّ مسلوب منها أعز شي عندها أما تطلع وهيَّ متعذبة
أنواع التعذيب الكل هنا وحوش مايرحمونك.
أتقدم إلى لزم فكي بقوا.
مأمون: سمعت عنچ السانچ طويل
اسراء: عاشت أيده إلى خلاك تسمع هالشي
مأمون: ثقتج بنفسج عالية بس انتبهي لا بيوم وليلة تتبخر.
فهمت شنو يقصد خفيت توتري وخوفي من كلامه
اسراء: ومرات اكو ثقة تمحي أشخاص هم أنبهك منها.
عصر فكي بقوا أكثر
طولة اللسان هاي بطليهاا لأن ما اتفيدج راح اتضرج وإذا اخليچ بعقلي
اندمج على اليوم إلى تجرأتي تحچين بي.
لازم اخاف هسه؟
غصباً عليچ.
دخلت ميسون گالت.
ميسون: مأمون اتأخرنا لازم نطلع عوفها يمي اني اربيها الك.
دفعني طحت على عكس أيدي صرخت بألم ماهتمتوا
سحبتني ميسون تسحل بيَّ ذبتني بالغرفة
ميسون: البسي بسرعة الچ خمس دقائق.
سدت الباب الوجع يدگ بروحي من جهة خاصرتي
الموتتني بالألم ومن جهة ايدي هسه، هم يجي يوم واخلص من كل هذا.
لبست النقاب على وجهي والعباية وطلعت الكل جاي يصعد مئات اثنين
الي بكل يوم ياخذنه ويرجعنه شفت أصيل رفع أيده.
يأشرلي أشوفهم علمود اروح أصعد بصفهم رحتلهم للسيارة
الي هم موجودين بيها صعدت بصفهم رفعت طبقة من النقاب مبتسمة
ميسون: شلون عرفتني وكلشي ماطالع مني
أصيل: اني اعرفچ لو تصيرين بين الف مرة.
تنهدت بحسرة شنو ذنبكم اطفال لا دراسة لا عايشين
مثل الاطفال وانكتب الكم هذا القدر تنباعون الناس مسلوبه
الرحمه من قلوبهم ويخلونكم تحت رحمتهم تجدون بالشوارع
اتحركت بينا السيارة والأطفال الموجودين لو گلبك حجر يلين.
علي حالتهم أغلبهم الخوف مسيطر عليهم مرات يبقون يهددون بيهم
والي يحصل دخل (فلوس) قليل يتعاقب وينضرب.
صاروا يوزعونه بالشوارع كل واحد يذبونه بشارع أو منطقة
ومن يكمل الشغل ساعات محددة نكمل احنا تجي وجبة ثانية
ونفس الحالة تخلص ساعات شغلنه تجي الوجبة الثانية تبلش
منا لليل مرات ايصير بالعكس احنا نبقى لليل.
نزلوا اخواني بأحد شوارع البصرة قبل لا ينزلون لزمت أيديهم همست بصوت مختنك
اسراء: ديرو بالكم على نفسكم.
هزوا براسهم ونزلوا رجعت السيارة تمشي وتوزع بالباقين
حد ماوصل دوري نزلوني بمكاني وراحوا ومنو يتجرأ يحجي شي لو يشرد
ما يگدر مخلين من إلى يراقبنا اي خطوة غلط يروح بيها الشخص.
وبدأ شغلي الناس تصدق عليَّ بالربع بالخمسمية بالألف
مرات خمس الآلاف ذوله إلى حالتهم زينة ينطون هيچ مبلغ
گعدت جوا شجرة الشمس صگطعت راسي حطيت كارتونه
وگعدت عليها، كلشي ماطالع مني ايديَّ لابسه كفوف بقيت الساعات گاعدة.
والناس إلى اتفوت تنطيني إلى يطلع منها وتگدر عليَّ
عبالهم صدك محتاجة وسالكه هذا الطريق بغرض الاحتياج بينما اني مصيبتي مصيبة.
كفختني ريحة عطر رجالي چنت منزله عيوني رفعتهن
چان شخص لابس رسمي صاحب أكتاف عريضة
وگف گبالي طلع من محفظته خمسة حطها گدامي وكمل طريقة
بدون مايحچي شي رفعت الفلوس إلى انطانياها بعدها
جديدة كلش أطرافها تجرحك، عيوني رجعت تباوع وراه.
فتح باب سيارة من ذني الجدد الراقيات بتصاميمهن.
بقى واگف يخابر، يسولف ويمسد على لحيته سد الاتصال ورفع أيده
من بعيد يلوح الشخص، ما ادري ليش بقيت اباوع وهيچ اراقب
اجه شخص لابس زي عسكري سلم عليه وصعدوا بالسيارة انطلقوا.
نهضت من مكاني رحت اشتريت بطل ماي گتلني العطش
أستداريت نحو الحايط إلى گدامي رفعت النقاب قليل شربت وسديته
ما اريد شخص يعرف شكلي، رجعت المكاني
اكمل بالشغل حد ما انتهى
رحت للمكان إلى متفق عليه واگفيلي بي صعدت.
أخواني جانوا هم موجودين و على ملامحهم ملامح خوف.
اتقربت يمهم رفعت إلى على وجهي عيوني تتفحصهم
شبيكم ليش هيچ خايفين
أسامة: اليوم ماحصلنه مثل كل يوم اخاف ميسون ومأمون يگتلونه
شگد حصلتوا؟
اني 25 وأصيل 20
حچيت بگلبي وهل الوحوش شيقنعهم بهيچ مبلغ يريدون من كل واحد
اقل شي من الخمسين الف فما فوق تجارة ولازم يربحون بيها.
اسراء: لا تخافون
بقيت لازمه أيديهم وبگلبي خايفة لا يسولهم شي وماچان عندي.
غير حل واحد إلى هو اشيل من فلوسي احط فوگ فلوسهم المهم مايتعاقبون
وبدون ما يحسون ميسون ملتهيه تخابر شلت من فلوسي حطيت فوگ فلوسهم.
أسامة: راح يعاقبونچ
اسراء: مو مهم المهم انتم عندي اني اتحمل كلشي علمودكم
بعد ساعة وصلنا للمكان إلى عايشين بي نزلونه وصفونه بالسره
ميسون توگف تأخذ الفلوس من كل واحد وتحسبها إذا
قليل يتحاسب وينمنع من الاكل والشرب ويشتغل كل الشغل.
بالبيت ومرات ينضرب هم هذا عقابنا اذا ماجبنالهم إلى يريدوا.
وصلت إلى انطيتها إلى عندي اخذتهن
من ايدي باوعت عليهن ورفعت راسها
ميسون: شنو هذا؟
اسراء: فلوس غير
ميسون: ليش قليلات
اسراء: چاا منين اجيب هذا إلى حصلته
اوكفي على جهة راح تتعاقبين اليوم.
وگفت بجهة أشرت بعيوني الإخواني الواگفين يباعولي وبعيونهم ينقرأ الحزن يروحون.
كملت شغلها ميسون واخذتني اني وطفل صاحب بُنية ضعيفة.
الخوف راكبه ويرجف لزمته من أيده دارت علينه لزمته من أذنه تجر بيها وهو يبچي
ميسون: ليششش قليل هاااا
اسراء: ميسسسون عوووفي الطفل خطيةة
دفعتني وهيَّ ضخمه صح اني صاحبة جسم بس گدامها اطلع نمله من ضخامتها.
لا تدخلين جايج السررره
عوفي الطفل وعاقبيني بمكانه خطيةة فدوة ميسون شوفي حالة هو هذا هم ينضرب.
الطفل فرفح
جوا أيدها وهيَّ ولا مهتمة اله راحت لزمت خاشوكة وشغلت.
الجداحة حمتها كلش كلشش وهوَ ضام روحه بزاوية الغرفة عيونه مليانه دموع وخوف.
راحت عليه ركضت گدامها وگفت گبالها مانعتها
ميسسون طفل ولچ طفل هذا
شوفي تراني مالي خلك وروحي بخشمي وخري عني
ميخالف ميخالف هالمرة سامحي مو كتلج عاقبيني بمكانه
چا ياهو گالج ماراح تتعاقبين
اي اتحمل اني بس هذا طفل عووووفيييي ولچ ماكوووو رحمه بگلبچ
باوعتلي بنظرات تتفحصني من راسي الجدمي.
أبتعدت راحت گعدت بمكانها
ميسون: خلي يطلع.
بسرعة فتحتله الباب طلعته زفرت نفس براحة لازمه بالباب الله لا يوفقكم
انداريت الها ذبيت العباية والنقاب خنگني
اسراء: شنو عقابي؟
ميسون: تگضين ليلة ويا مأمون
تاكلين نعال خووووش، النعال احطه بحلكچ وافررررگه فررررررك.
اتوسعت عيونها على كلامي
ميسون: هذا الكلام عليَّ يا
اسراء: ليش اكو غيرنه هنا
ميسون: اصبريلي يا اسراء
گامت من مكانها أتريد تطلع صحت وراها واني واثقة بالراح احچي.
اسراء: إذا اتسوين شي للطفل لو إلى اروح لمأمون واحجيله كلشي
عنج وعن تحسين شلون تبوكون من الفلوس إلى تاخذينها منه.
استدارت عليَّ جاحظه عيونها بسرعة تغيرت ملامحها صارت تضحك بخبث
ميسون: وتتخيلين مأمون يصدك وحدة مثلچ
لا ماراح يصدك بس راح يشهدون عليچ أكثر من شخص
وتكريم ب مأمون من ينزرع الشك براسه شنو يستخدم العذاب
بالعذاب يخليكم تعترفون على نفسكم و على أهلكم.
اجت جرتني من شعري طاح حجابي بالأرض.
ويننن شفتينههه ياا بنت ال
شعرررررييييي يااا بوووواكه والله إذا ماتعوفينييي
هسسسه اصرخ بعلوو صوتي واخلي المايدرييي يدرريييي عوووفينييييي حيوانه.
عافتني بنتررر وتباوعلي بحقد لزمت شعري الگطعتة
ضحكت بنص وجعي على شكلها غبية حتى مانكرت بسرعة اعترفت
أتوقع اخذت عقابي راح اطلع من الباب إذا تروحين للطفل وتأذي اتشوفين شيصير
عدلت شعري ولبست حجابي طلعت من يمها شفت أصيل وأسامة.
واگفين ينتظروني اجوني يركضون ووياهم الطفل گلبي تگطع عليه ضعيف حال.
أسامة: ميسون سوتلج شي اسراء
رفعت حواجبي اثنينهن ارگص بيهن اضحك
اسراء: شحدها
أصيل: بس سمعناچ صرختي
بس لزمتني من شعري
گطعت شعرج
هو شباقي بي تعالوا يله
أخذتهم وأخذت الطفل وياهم انطونه وجبة الغده مالتنه گعدنا
ناكل وبكل مرة اگعد بهذا المكان تجي أبالي اهوايَّ أسئلة
عن اهلنه شلون طاوعتهم گلوبهم هيج يبيعونه مثل السلعة.
ويقبضون بينه سعر ياخذونه و بعد يختفون من حياتنه.
بأثناء ماجاي اكل اول لكمه أنفتح الباب وأتبسمرت بمكاني
حتى رمشي اتوقف عن الرمش من شفته.
ريم.
طلعت الدوامي البارحة خابرت سُرى الخطبة اتأجلت للخميس الجاي
بسبب اسباب شخصية بالولد شفتها گاعدة وحدها مو من عادتها رحت يمها گعدت
ريم: اليوم مو على بعضج حتى بالمحاظرة لاحظتج
سُرى: ولج مصخنه اجيت گوا عليَّ
ريم: سلامتج عيوني لعد ليش اجيتي إذا هيچ تعبانة.
سُرى: علمود الحظور تدرين بالدكاترة بعد.
اي صح من اخوچ وشيل ايدك
ههههه بعدكم واحد مايطيق الثاني
اريد افهم انتم شلون عايشين ببيت واحد يمهه ماينبلععع ماينطاااققق
والله حباب انجبي
بعد اخوچ طبعا هيچ تگولين عنه
لا والله أصلاً تعاركت وياه من رجعنه من البيت ليوم ماطردچ وماقبل تدخلين
لااا تذكرينيي أحقد عليه أكثر وأكثر.
هددته بعد إذا يطردچ اله افضحه هنا واگول اني اخت دكتور مناف
دقيقتين يطردنيي ليش اوف مدا اتخطى.
يله اغلب الطلاب هيچ
أجت طالبة من قسمنا گالت
الطالبة: دكتور مناف طالبچ ريم
ريم: طالبني اني؟
اي.
راحت البنيه باوعت ال سُرى ما انطت أهمية للموضوع عادي عندها
ريم: ما اروح
سُرى: تعاي نروح اني و وياچ
اذا هيچ تعاي يله
اثنينا طلعنا اله وبداخلي اتسائل شيريد مني وطالبني
دگينا الباب اجانه صوته يسمحلنا بالدخول چان يكتب
رفع راسه شافنه اثنينه رجع يكتب ويحجي.
مناف: طلبت فقط ريم تگدرين تروحين سُرى.
لزمت أيدها علمود ماتعوفني وحدي من شافنا بعدنه واگفين أثنينه رجع رفع راسه
محتاجة شي سُرى؟
احم لا دكتور بس اجيت ويا ريم صديقتي
شنو طفلة وجايه وياها.
أردفت بنبرة شبه عالية
ريم: دكتور اتفضل گالوا طالبني.
مناف: ومن طلبتچ المفروض تركزين بطلبي طلبت ريم مو ريم وصديقتها
سُرى: تمام ريم راح انتظرچ يم الباب
خزرتها تبقى مابقت طلعت، بقيت بمكاني واگفة وهوَ على نفس گعدته.
عاف كلشي ورجع ظهره على الكرسي أشرلي بحواجبه.
مناف: اتفضلي
ريم: مرتاحة هيچ
مناف: نفوت بالموضوع
ريم: موضوع شنو دكتور؟
صفن بوجهي الثواني صدمني بكلامه
إذا اتقدملچ توافقين؟
أحس أنبلع الساني وصدمتي لا يُعلى عليها شي دكتور مناف يخطبني؟
گام من مكلنه گعد على حافة الميز مالته
مناف: يمكن فاجئتچ
ريم: لا دكتور أنتَ مو فاجئتني أنتَ صدمتني
مناف: شگلتي بخصوص طلبي إذا موافقة
أن شاء الله هالايام يمكم اني والأهل.
ريم: دكتور العفو بس ليش اني؟ اهوايَّ طالبات هنا احلى مني واثقف مني يناسبنك أكثر.
كل انسان وذوقه وگلبه اني ذوقي وگلبي اختاروچ أنتِ من بين كل هالطالبات وسُرى حچتلي عنچ وعن اخلاقج
يعني عندك علم اني اعرف أنتَ اخوها
اختي مربيها على ايدي ماتضم عني
دكتور طلبك مرفوض اترخص منك.
طلعت من عنده وكلي توتر ما ادري شبيَّ شفت سُرى باوعتلها بعصبية
ريم: ليششش ماگلتي اخوج يريد يخطبني.
طبگت حواجبها تباوعلي كأنما الخبر هم صدمة الها أبتسمت بوجهي
سُرى: شنو؟ مناف خطبچ
علساس ماتدرين
لا والله وداعت امي ما ادري هسه عرفت منچ
اي بس رفضت
ليش ريم شبي اخوي
مابي شي بس اني ما مفكرة بالزواج هسه.
لو منطيه نفسج مجال تفكرين والله مناف ماكو منه لا تغرج شخصية هنا بالدوام
لا مالي علاقة بكلشي هنا بس اني ماريد اتزوج هسه اريد اكمل دراستي
هزت براسها ومبين ضاجت من رفضي الاخوها.
هيَّ لو تدري حياتي شلون صايرة ومتزوجة شتگول
كمل الدوام ودكتور مناف بعد ماشفته من طلعت من يمه مانتظرته حتى يجاوبني.
اجه آدم أخذني من الدوام بس سلمت طول الطريق ساكتة
آدم: اليوم ساكتة
ريم: ليش أحد گلك اني احچي اهوايَّ
آدم: لا بس تاكلينه اكل بلسانج
ريم: اهوو آدم اسكت عني.
لا صدك شبيچ
ياعيني غير دوام وتعب
تدرين اني جنت اضرب المحاضرات واغيب شگد
حد ما اجاني تحذير يله صرت اجر عدل
هههههههه.
والعباس وبيومها جدي هم من گتلهم كضاني بالعوچيه مالته خلاها تلعب على ظهري
تستاهل غير جاي تدرس مو تتونس وتسخت.
هز براسه يضحك
ايام الدراسة حلوة وخلصت أيامها.
التفتت اله اسئله
شو اني مداحسها هيچ حتى احس بالسادس رغم تعبه بس احلى
يجوز لان مامختلطه وهم البنيه مو مثل الولد
احنا الولد اذا ننطرد من المحاضرة اكثرنا مايهتم تلگين
قلة إلى يهتمون انتن البنات اكثرچن ينقهرن وبيجن لا والله
هم ضاربات الوضع چلاق عادي عندهن.
اني مرتين انطردت يمكن الاولى وياه حق الدكتور
لأن ماجنت منتبها اله، بس الثانية احسها ظلم لأن اتأخرت كم دقيقة
أخذي حذرج بالجايات لأن أكثرهم يضوجون من التأخير ويعاندون مايدخلون الطلاب
أن شاء الله.
وصلني للبيت ورجع الشغلة دخلت شفت صفا تفتر
ريم: هلو
صفا: هلو ريم
شبيچ؟
وَهج حرارتها مرتفعة وماتقبل ناخذها للدكتور
سلامتها بس ليش ماتقبل
مادري جوا يمها باجي نادية وعميد الدين
وأنتِ ليش طالعة من يمهم
جاي اغدي سَند.
دخلت لغرفتي ذبيت ملابسي وجنطتي والملازم بدلت
شفت امي نايمة، كملت وطلعت للمطبخ شفت سَند ياكل و وياه رحيق
ريم: شلونكم عيوني الحلوين
سَند: زينين خاله
ريم: فدوة
صبيت النفسي غده گعدت يمهم اكل وصفا واگفة يم الباب.
ريم: شنو حارس مرور واگفة
صفا: و وَهج من تصخن تنتهي ف خايفة عليها وجوا جاي يقنعون بيها
ريم: جيبولها علاج بالاول إذا مافادها نجبرها نأخذها للمستشفى
صفا: جابلها الصبح عميد الدين بس شو حرارتها نفس الشي.
اي انتظروا قابل العلاج من اول مرة ينطي مفعول جنكم امي أتريد من اول مرة يبين المفعول.
دخل عميد الدين راحتله صفا تسئله
صفا: هاا أقتنعت
عميد الدين: لا ماترضه خليها خلي اشوف العلاج
إذا ماصارت زينة لباجر غصباً عليها اخذها للدكتور.
كملت اكل وطلعت وياها انشوفها دخلنه للغرفة يمها باجي نادية
ذكرت ذاك اليوم من سمعت وَهج وعميد شيحجون
لحد الان عقلي رافض يصدگ إلى سمعته.
گاعدة يم راسها و وَهج نايمة.
باجي نادية: ماقبلت تروح.
أشوف صفا مو مثل قبل اول ما اجت هنا كلامها وياها تحچي
بثكل وياها وهسه من حچت ماردت عليها اكتفت بالنظرات
ريم: أن شاء الله لباجر بلكي اتصير أحسن.
رجعت طلعت عفتهن يمها اجت خالة سلمى گالت
سلمى: ريم وارث يريدچ
ريم: هسه اجي خالة
راحت هيَّ واني رحت الابو شنوفه گاعد مدد لأن وضعه بعده مامتحسن كلش.
هاا وارث
وارث: شلونها دراستچ اليوم.
صفنت هسه هو جاييني بس علمود هالسؤال گعدت على طرف السرير وجاوبته.
ريم: زينة
وارث: والامتحان
هم چان زين
عفية
أنتَ ليش تضل تسئلني هالاسئلة
لأن أنتِ من مسؤؤليتي.
وارث
هاا ريمه
شنو رأيك نتطلگ واتزوج اني.
أبتسم بخفه
اي وتزوجين منو
شنو قحط زلم
لا مو قحط بَس نادراً تلگين إلى يستاهلچ ويصونچ.
اني ما أريدك
استغفرالله هم رجعنا، اني هم ما اريدچ ارتاحيتي
لعد خلي نتطلگ اني خطبني شخص اليوم.
اباوعله تغيرت ملامحه وطبگ حواجبه.
اي ومنو هذا دكتورة ريم
شخص
منو؟
بالجامعة
مو علساس ماعندچ علاقات بالجامعة بَس ويا صديقة وحدة، هذا كلامج؟
اي واني مدا أنكر هذا الشي
چا منين هذا الخطبچ؟
واحد هسه شعليك أنتَ
واتريدين اطلگج واتروحين تتزوجينه مو
اي
لووو تموتين
هسه أنتَ مو راح تتزوج شنو حرام عليَّ وحلال عليك
ررريم شجاب هاي على هااي، اگلچ اني مريض اطلعي عوفيني وحدي.
زين سؤال
إذا يضوج لا تسئلينه
لا يمكن مايضوج
اسئلي
بس اكمل دراسة تطلگني هيچ اتفقنا مو
اي.
عبالي غيرت رأيك چان هسه خنگتك
وبعدچ اتريدين عرس
اي
شنو الاستفادة من هالعرس ونهايتنا معروفة لو شغلة عناد وتحديات؟
شروطي ووافقت عليها بعد ما الك حق تسئل والرجال الكفو مايتراجع عن كلامه والامام على عليه السلام يگول
الرجل مرهون برجولته فمن تخلى عن وعد تخلى عن رجولته
متحدثة الله يحفظج.
انتظر منك بيوم توفي بوعدك الي
الله كريم
لعد بخيل
هههههههه وتالي وياچ؟
كلمة الله كريم استغفرالله ماحسها تريح گلبي.
چا شگول، احم. ماگتيلي هذا الرجال إلى خطبچ شگتيله
گتله اشوف نفسي احتاج افكر وبعدين ارجعلك جواب.
رفع أيده إلى ما بيها شي عض أصبعه ويحچي من بين أسنانه محترگ گلبه حررگ.
وارث: لو آدم هنا چان خليته أيشوف شغله
ريم: علمود جدي يلعب بيكم لعب منو يتجرأ يرفع أيده على حفيدات حجي عزام
وارث: مستقوية بهذا الشي.
رفعت أبهامي ورفعت خشمي بغرور
ريم: طبعاً يزيد من قوتي هذا الشي.
صدگ گتيله هيچ؟ لو اتريدين تغثيني واتروحين.
وشعندي وياك عيوني علمود اغثك
يعني صدگ
اي گتله افكر أن شاء الله وأشوف اهلي
گليله أهلي ماقبلوا
ليش الچذب
گولي اني أريده ليش خجلانه مني يعني
شسوي الخجل لاعب دوره ويايَّ.
حط أيده على عيونه وجسمه صار يهتز وجهه صار احمر خربان ضحك.
گومي اطلعي ريمه
شو تضحك وارث ليش حچيت شي يضحك
لا حشاچ بس عوفيني
لا خليني يمك ضوجة وين اروح
نامي ادرسي
ادرس بالليل، وما انعس
خوش ابقي گاعدة ونسيني.
أبتسمت
صدگ يعني اني أونسك
كلش.
لعد وحبيبة القلب الحساسة
هسه شذكرچ بيها
ضرررتي هااااي شلوووون انساهااا
الله يستر.
گعدت ماخذه راحتي بالكلام وياه بدون أي تقييد احچي وهو عايفني براحتي
وارث شو ماحبيتها الخطيبتك احسها تس
شني
هيَّ صح حلوة لا شنو حلوة تخبل بجمالها بس شو
ماحبيتها مارتاحيتلها تدري بالمستشفى من اجيتك شسوت ويايَّ.
رفع أيده من عيونه باوعلي بعلامة أستفهام
وارث: شسوت؟
رفعت رداني طلعتله أثر الگرصة باقي قليل منها
ريم: شوف شسوت
تعاي.
رحتله بلا وعي وعبالك طفلة تشكي الابوها وفعلاً چنت
مستفقدة هذا الشي وماواعية على تصرفي
گعدت بصفه.
لزم أيدي واتلمس بأصبعه الأثر
هاي نريمان سوت هيچ
اي هسه صارت زينة قبل چانت زرگة مادري بنفسجية
تأذيچ؟
لا طابت
اني اعتذر
ليش تعتذر وارث
لأن سوت هيچ وياچ.
هههههههه بس اني ماسكتت الها
شسويتي
فريت وجها براشدي يخبل.
فتح عيونه بعدم تصديق
صدگ تحچين؟ و بالمستشفى
اي لعد أتريد اسكت الها لا والف لا
محد حچتلي منچن.
رفعت أكتافي بمعنى ما ادري .
اگلك وارث
گولي برنسس
هسه أنتَ زعلت لأن ضربتها
لا بس احچيلي الصراحة منو چان الغلطان أنتِ لو هيَّ
هيَّ وروح ابوية ضلت تحچي كلام يضوج ومن گرصتني توجعت ف ضربتها
هايهيه ما زعلت.
وإذا زعلت عبالك راح اهتم
هاي شبيچ
إذا تزوج ونتعارك ويامن توگف وارث؟
ويا الحق
ليش التس عمرهم چان وياهم الحق
نريمان حبابه بس هيَّ تغار غيرتها تعميها
من جمالك لو حورك تغار عليك.
ههههه مو شرط تغار لأن حَلو، بيوم إذا حبيتي شخص راح تفهمين كلامي.
وشلون اجربه واحنا مامطلگين
عود من نطلگ
أن شاء الله أحب واحد اله اجيبه معضل
چا الرجال تحبينه چيف عنده عضلات
لا بس أريد عنده عضلات
گوومي گوومي منااا.
طفرت من يمه اضحك
ريم: والله اله أحب واحد احلى منك واحررگ گلبك
وارث: اطلعي برااا
ريم: قابل بس أنتَ تحب وحدة حلوة تگطع النعال من جمالها
اني أحب واحد يگطع الحذاء من جماله
ووووينك آدم.
هيهي ماموجود بالشغل.
ما أحس غير صوت آدم صاح
آدم: اجيتك خوووية اجيتك.
لطمت على خدي صخام بعينچ ريم هسه يلزمج يموتج
ركضت يم وارث وگفت من شفته دخل وبأيده الچفچير هذا النصب بي تمن
ريم: شعندك معركة.
آدم: هاا خوية وارث گول اني بالخدمة
وارث: ماتجي تبرد گلبي بيها شويَّ ولو اتعبك
ريم: عزا بعيني عزا شوفوا والله إذا تمدووون ايدكم عليَّ اله اعيط واصيح الجدي
آدم: خطية راحت عليچ جدج طالع بگعدة عشائرية.
ريم: هسه انتم شتريدون من عندي ترا چنت اشاقة
وارث: ها هسه صارت شقة
اي شبيك زوجي العزيز الحادث مخليك ماتتحمل شقة شدعوا اوييي عينييي
وجعووي ام المعضلين
لعد شبيهم المعضلين يخبلون يگطعون النعال مثل خطيبتك
آدم أستلمهاا.
لا لا اوگف نتفاهم أوف الساني صايرة ما
اسيطر عليه صوچ صفصف
آدم: شعليهااا
من عاشر القوم أربعين يوم صار مثلهم يعني اني عايشة بنصكم ووياها شتريدون اصير
مؤدبة لأن كلنه مؤدبين
شنو هالچذب هذا.
رفع الچفچير طفرت للجهة الثانية خربانة ضحك
وهم يحاربون بنفسهم يخفون بضحكتهم.
ريم: والله إلى يسويلي شي اشكي الجدي
آدم: تهددين بي
ريم: اروحله فدوة حَبيبي جدي هذا خيمتنا
آدم: اويلي يالواكه اويلي
اگلك ليش ماتحب ايفان ترا حبابة وحلوة
وارث: لزمتك بعد شيخلصك
شوف والله تحبك خطية
آدم: خطية بنت المطية
ياا تغلط على خالتي
عمتي اتصير
هسه أصيح امي عليك اكلها يغلط على اختج.
وارث: مايحبها شلون بله يجبر نفسه.
ريم: اني منك ما احجي المفروض إذا هيچ رأيك هم تطلگني
لأن لا أحبك ولا تحبني يعلم بالناس الصلاة وهو مايصلي هذا ابو المثل يگول.
وارث: هسه جنيتي على روحچ، آدم اني راح انام خوية شوف شغلك.
عبالي يشاقة نام وآدم ركض ورايَّ طگينها ركضه من الغرفة
للدرج اركض اضحك صعدت فوگ احتاريت وين اروح طلعت
علي البيتونه اركض فتحت الباب للسطح سديته قفلته من يمي.
آدم: افتحي الباب
ريم: شبيَّ ماعندي عقل.
آدم: گاعدلچ للصبح هنااا اليووووم
ريم: ما افتحه اله يجي جدي وايشووفكم شلوووون تعنفون بيَّ
تأخذين الواحد للشط ترجعي عطشان
حفيدة عزام والك الحساب.
بقيت افتر بالسطح نوب بدون نعال رجليَّ أنترست تراب
هو مكيشينه بس هم تراب گعدت على طابوكة موجودة
والدنيا بيها هوا الجو حَلو، لزمت مكان ايدي إلى وارث لزمني
بيها أبتسمت، ضربت راسي طاردة أفكاري إلى صايرتلي مثل الاحلام.
بقيت گاعدة وآدم المسودن گاعدلي يم الباب كل شوي يحاچيني مارد عليه.
ضليت أفتر الستارة مال السطح عالية جبت الطابوگات
الموجودات حطيتهن وصعدت عليهن أباوع للشارع
جهال المنطقة يلعبون طوبة والناس تروح وتجي شفت
عميد الدين طلع بسيارته رجعت المكاني مليت وحدي سمعت صوت جدي برا ركضت الباب.
آدم اجه جدي
ماكو ما اله صوت، بس خفت افتح الباب خاف ناصبلي كمين
رجعت احجي ماكو ولا اي صوت فتحت الباب شويَّ وصدگ مالگيته.
نزلت جوا بسرعة شفته گاعد يم جدي عيبت عليه بلساني ورحت يم البنات سئلني وين چنتي سولفتلهن السالفة كلها.
وَهج.
من عطرها اعرفها هذهِ باجي نادية أسمع صوتها تحاچيني
بَس أستصعب الكلام وياها رغم كلشي سوا بشار
بنفس الوقت ما اگدر أنكر الحقيقة وشنو سوت وشلون
خذلتني وتعرفني اني انسانة حياتي عبارة عن خذلان، وأنكسارات.
باجي نادية: وَهج ماما اتسمعيني
بقيت ساكتة مغمضة عيوني، جسمي مكسر تكسر.
رجعت نمت، ما ادري شگد وگعدت بس إلى عرفته احنا هسه بنص الليل
أستداريت براسي شفت عميد الدين گاعد على الكرسي الموجود
وبأيده جهازة مدنگ عليه يكتب رفع عيونه مجرد شافني ترك الجهاز وأجاني.
عميد الدين: هاا يُبا شلون صرتي.
باوعت النفسي بدون حجاب والتراك إلى لابسته ربع ردن
يجي بسرعة لفيت نفسي بالغطوة وأردفت
وَهج: شتسوي هنا وين صفا وسَند
عميد الدين: نايمين بغير غرفة گليلي شلونچ.
رفعت عيوني للسگف واحرك بجسمي من جوا الغطا رجعت أباوعله
وَهج: احسن اي صرت زينة تگدر اتروح.
بالاول لازم تاكلين لأن ماقبلتي تاكلين بالعشه
شو ما ادري بنفسي
لأن حرارتج مرتفعة إذا قوية الإنسان مرات يضل مايدري بنفسه
تمام شكراً تگدر اتروح صرت زينة
تاكلين وتاخذين علاج واروح
لا اريد ارجع انام
كافي نوم هو إلى زودها عليچ.
منين مااجيبه يطلعلي صفح بقيت ساكتة وطلع يسويلي اكل.
بس طلع نهضت من مكاني والتعب بعده بيَّ نزعت التراك
ولبست شي أستر حتى لو زوجي يبقى زواجنه اتفاقية لا أكثر
بدلت ورجعت المكاني نمت لبست الحجاب هم
تقريباً ربع ساعة ورجع بأيده صينية حطها گدامي.
عميد الدين: عمتي نادية سوتلچ شوربة وامي هم عزلتلج من العشه يله گعدي بابا اكلي.
عدلت گعدتي وهوَ يدور ما ادري على شنو
وَهج: تدور على شي؟
عميد الدين: ما ادري وين عفت جهازي يمكن خليته بالمطبخ اكلي أنتِ هسه اجي.
طلع مديت ايدي للاكل وصدگ جوعانة أكلت باجي مسويتلي
الشوربه إلى احبها شوربة ماش احبها أكثر من مال العدس والخضروات
بقيت اكل وهوَ ماراجع، شكيت مارجع علمود اكل براحتي وما اتقيد بوجوده
كملت اكلي ردت اگوم ودخل بأيده العلاج أشرلي ابقى بمكاني.
أخذ الصينية مني حطها على جهه وبدأ ينطيني العلاج شربته
وَهج: شكراً عميد الدين
عميد الدين: ما سوينه غير الواجب
وَهج: والله ما ادري نمت مابيَّ شي گعدت ماگدر اشيل نفسي.
عميد الدين: ابقي مستمرة على العلاج.
ردت أجاوبه واثنينا رفعنا راسنا بأتجاه الشباك على صوت شخص
يجر بالكلمة جر، غمض عيونه عميد الدين متنرفز طبگت حواجبي مستغربة
وَهج: منو هذا؟
باوعلي بنظرات أحراج
عميد الدين: آدم.
اتجحظت عيوني بصدمة، عافني وطلع يركض نهضت
من مكاني أستوعب ليش هيچ يحچي شبي آدم
البيت هدوء اذا توگع الإبرة تنسمع والاضوية كلها مطفية
بس كم واحد مشتغلات خفيفات طلعت وراه بقيت صافنة.
بالمنظرالي گدامي معقولة هذا آدم وهالشي يطلع منه؟
چان شارب وفاقد عن الدنيا مايدري بالدنيا شنو لزمه عميد الدين
يحچي بعصبية بصوت ناصي
عميد الدين: لك ليششش ليششش شتفقنهه.
رد عليه آدم والكلمة يجررر بيها جررر
آدم: شتفقنه منو أنتَ؟
رفع راسه عميد الدين يباوعلي بأسف أيدي على حلگي بعدني بعز الصدمة
رفعه من الأرض دخله جوا عيوني تراقبهم دخلت وراهم
كلشي ولا صفا اتشوف هذا المنظر والله لتعيش الرعب.
العاشته قبل، صعدا الغرفته حاط أيده على حلگه علمود مايسمعه أحد وآدم منتهي.
رجعت الغرفتي معقولة يقصد برمضه مدمن شرب
بقيت أفتر بالغرفة مستحيل اختي تتقبل هذا الشخص إذا كان صحيح إلى شفته
مرت ساعتين اندك الباب بخفه عرفته هذا عميد الدين
فتحت الباب دخل وجهه محتقن گعد لازم راسه.
عميد الدين: لاتحكمين قبل ما اتفهمين السبب
وَهج: مرضه إلى حچه عنه هذا؟
رفع عيونه يباوعلي
عميد الدين: تسمعين مني؟ لو منه.
وَهج: منك لأن هو راح يتهرب مني
صح شي خاص بي والموضوع حساس بالنسبة ال آدم بس راح احچيلج
أسمعك عميد الدين
آدم تعذب بطفولته من ابوي مو تعذيب عادي
إذا اتشوفين ظهره راح اتعرفين نوع العذاب إلى اتعذبه
يمكن اكثر واحد يكره ابوي بينه هوَ آدم بسبب طفولته.
ليش يعذبه؟
من اتزوج كوثر ابوي قسى كلششش قسى وياانه
عافنه واحنا اطفال ربانه جدي إذا بيوم يسئلوني
منو التعب بيكم جوابي الهم جدي ابوي كلشي ماشفنه منه.
آدم چان صغير بگد حيدر ابن كوثر طفل والطفل شيشوف ايريد
ابوي چان يشتري الجهال كوثر واحنا مايذكرنه ولا اله علاقة بشي
ناكل نشرب ميتين عدلين مايهتم عنده اهمشي جهال مرته
وبكل مرة آدم يبچي ويريد نفسهم ابوي يلزمه يگطعه تگطع بالكتل
ياخذه للمخزن ينهي نهي يطلعوا جنازه من جوا ايده.
آدم كبر و على نفس الشي يگله جدي انا اجيبلك كلشي
بس مايقتنع هو يريد اله من ابوي وهيچ صارت بكل مرة.
ينضرب ويتعذب لحد ماخلاه يتعقد ومايطلع حتى يلعب ويا الاطفال
وكوثر ماجانت تقصر انا اخجل احچيها بس ابوي للأسف كل خير مابي.
من صار بفترة مراهقة سلك الطريق الغلط ويا اصدقاء السوء
حاولنا ردنه جدي حتى حبس حبس وگعد يحچي بتفاهم وياه
بس للأسف ماكو أي نتيجة ويوم بعد يوم آدم هذا حالة
ومن اختفى بفترة حادث وارث رايح الغير محافظة
هناك يشرب ويكبسل يشرب حبوب انا احچيها الچ اخوي مدمن شرب وحبوب.
شگد حچيت وياه وحاولت أعالجه انا واخواني كلشي مفاد
هذا مرضه إلى جاي يعذبه ومايقبل يتعالج منه.
حچه بنبرة مختنك ومقهور على اخوه
عميد الدين: ومو بَس هو متعذب انا بنفسي اموت الف موته من أشوفه بهذا الوضع لو بهيچ حالة
وَهج اخوي داخل بهذا الحرام جاي يدمر نفسه ويدمر صحته
وقبل كلشي جاي يغضب ربه، شسويي انا شبيديي ماضل شي ماسويته وياه.
مسحت دموعي گعدت گباله لزمت أيده احچي بنبرة توسل.
وَهج: الله يخليك إذا تعزني لا تخلي اخوك يتقرب من صفا
وهوَ مامعالج نفسه اختي تدمر تنتهي والله وإذا أتقرب
اني الراح اوگف بوجهه إذا انتم ما وگفتوا بوجهه.
حضن ايدي بأيده
عميد الدين: ليش تحچين هيچ آدم يحبها وداعت غلاة امي
يحبها ميت عليها يبچي بچي عليها واول مرة أشوف اخوي دموعه
تنزل على بنيه، لا تكسرينه بوگفتچ ضده
وَهج: إذا مايتخلص من هذا مرضه اسفة عميد الدين.
ما اگدر اجازف بأختي وخصوصاً بهذا الموضوع اختي تموت تنتهي والله.
لا يُبا انا گايله بنفسي اوگف بوجهك إذا ماتتخلص من كل هذا
صفا عزيزة رائد شلون أخلي يأذي وحتى آدم يعز رائد مثل مايعز اخوانه
من سابع المستحيلات يفكر يأذي اختچ.
سحبت أيدي من أيده غطيت وچهي انفجرت ابچي
عيسى چان يسكر هم ويعذب بيها اختي تعذبت هم
ما چنت اگدرر احميهاا من أيد هالظالم عذبها عذاب الكافررر.
شنووو؟ عيسى يعذب صفا.
هزيت براسي اناشغ واني أتذكر ذيچ الايام السود
الي عشناها بسوادها وعذابها
عميد الدين: وَهج باوعيلي
هزيت راسي برفض گلبي لليوم متعذب بذكريات الماضي
يُبا أنتِ تضوجين إذا الزمج فلا تجربيني بس نزلي ايديچ خليني افتهم.
نزلت ايديَّ عيوني مغوشة بدموعي عيونه تناظرلي بقلق
عميد الدين: هم عذبج الچ؟
نزلت اخر دمعة مني وأردفت بغصه مدمرة أوتاري الصوتية
وَهج: للأسف.
غمض عيونه وصار بركان من الغضب عاصر عيونه عصر والشريان إلى بگصته برز.
نهضت من مكاني امسح بوجهي
وَهج: حرمني من واحد وعذب صفا گدام عيوني تتوقع گلبي يگدر يسامحه بيوم
شنو عذبها گدامچ؟
يصورها شلون يعذب بيها يضربها ضرب المجرمين
ويشوفني التصوير يقفل الباب عليها ومحد يگدر يوصل الها
حد مايطلع وإدخللها على اخر نفس لهيچ اگلك لا تخلي
آدم يتقرب ال صفا لأن راح تكرهه ويزيد عذابه اختي تحتاج.
شخص يحتويها ويخليها ترتاح مو يزيد تعبها وعذابها
تكره شكو شخص يشرب بسبب عيسى.
اختنگت من الغرفة لو وين ما تروح تبقى ذكريات ماضيك ملاحگتك
فتحت الباب اريد اطلع وبهت وچهي، گلبي نبضه صار براسي
من إلى گدامي اتجمدت بمكاني من الموقف بلعت ريگ بخوف وانداريت
ال عميد الدين إلى هم وجهه بهت من إلى واگف گدامنا.