رواية وقار الغريب للكاتبة حوراء السعيدي الفصل الحادي والعشرون
وَهج.
الصدمات إلى اتعرضتلها ولا زلت اتعرضلها خلت عقلي
يوگف جريمة أخرى ومن نفس الأشخاص أصعب ما تسمعه
اهلك هُم مجرمين قاتلين أنفس أوصى الله بها
گعدت لازمه راسي، رفعته اباوعله طابك الحاجب ويباوع عليَّ.
وَهج: منو صديق طفولتك؟ شنو علاقته
ب أبوي؟
عميد الدين: عندج گلب قوي يسمع؟
وَهج: شنو رأيك؟
انخفض بجسمه لمستواي حاني لزم حنگي بأطراف اصابيعه
عميد الدين: إلى راح أتسمعي أصعب مو موتت اخوچ.
بلعت ريگ بقلق من كلامه.
أسمعك
أبتعد عني مشى بأتجاه خزانته فتحها ما ادري شيطلع منها
الدقائق واگف حد مارجع بأيده ألبوم صور سحب الطبله الموجودة
گعد عليها وحطه بالنص بينه بقى يقلب بي سحب صورة حطها گدامي.
ولد شاب لابس زي تخرج و واگف وياه
عميد الدين
سحب صورة ثانية بملابس عادية و وياه هم عميد الدين
واگفين يم شط يضحكون وماخذين الصورة
عميد الدين: صديق الطفولة يحيى
يحيى؟ ماسامعة شي عنه.
يحيى أعرفه من احنا صغار درسنا سوا اتشاركنا كلشي.
حتى الزاد بينه چان ولا هوَ خان هالزاد ولا انا
امه وأبوه منفصلين
عاش يم أمه وباقي اخوانه وإخواته ويا ابوهم
وكل فترة يجون الامهم ايشوفونها لأن هم
من غير محافظة.
شجابه على أبوي؟
قبل ابوچ چان يجي للعراق علمود شغلة ويجب هنا
علمود أيشوف جدي، وبوحدة من جياته اجه هنا وچان عندي
يحيى، احچيلچ هالكلام من سنين وقبل موت رائد مو بالجديد
من عرف مهندس وصار نقاش بينهم عرض عليه يشتغل وياه.
سحب نفس بحسرة نابعه من القلب ورجع يكمل
أشتغل وياه ومشت الأمور طيبة اول أشهر وكلشي طبيعي
بَس إلى صار هنا يحيى عرف ب أبوچ وبشغله يا ماغصبوا ناس
تطلع من بيوتها لأن اتطل على موقع تجاري والناس چانت تتهدد
الباشا وأشرف اثنينهم نفس الشغل لا تتوقعين علاقتهم
جديدة لا ذوله علاقتهم من سنين طويلة.
يعني چانوا يهددون الناس تطلع من بيوتها علمود يقيمون شغلهم عليها؟
بالضبط، لأن اغلب البيوت مواقعها كارثية بالبناء أو الي.
أتصير قريبة من المناطق التجارية وهذا الشي يفيدهم.
من صارت هالشغلات توصل ال يحيى صارت مشاكل بينه
هوَ وأشرف واشتغلت التهديدات بينهم، أله بيوم صار شي لا يم الخاطر ولا يم الحسبان.
زادت دگات گلبي من الجواب إلى راح أسمعه
شصار؟
انطاني يحيى ملفات تخص شغلهم نفسها الملفات
الي هسه جاي يستخدمج ويگلج أتقربي مني علمود يأخذها
بيها أدله قوية؟
أبتسم بخفه وهوَ يباوع الصورة صديقة.
من الصبح اگدر اخلي أشرف وجماعته تحت قبضة القانون
بَس انا هدفي غير، هدفي يخسر كلشي كل فلس حصله على حساب دم غيره.
لحد الان مافهمت صديقك شلون مات
تتحملين اتشوفين؟ خايف عليچ
اتحمل اتحمل عميد الدين بس احچيلي وشتشوفني؟
سحب صورة مغلفه وحدها وأيده ترجف وهوَ يفتح بيها
رفعها گدام عيوني البقت ماترمش ومتوسعة بكل ما عندها قوا
صورة ما خوذه لجثة مقطعة والراس مشمور بجهة بسرعة.
درت وجهي أرجف جسمي صار يرجف مثل السعفه عقلي وگف.
قبضت أيدي بأيده، انفاسي أتسارعت، لزمني عميد الدين
يضرب بخدي بخفه، من صدمتي الساني انربط
عميد الدين: وَهج أتسمعيني، باوعيلي يُبا خررب انا ليش شوووفتچ.
طلعت كلمات مُبعثرة مني
وَهج: هاي ج جثة؟
بدون ما ايجاوبني أخذني الحضنه حاضني فتح حجابي
شمره على صفحة يرجع بشعري وره أذني.
وَهج اهدأي
عميد الدين احچيلي شنووو هالصورة شنو ربطهاا بصديقك.
سكت الثواني وأردف.
رمو يحيى طلقتين، وگطعوا جسمه الأجزاء وشمرروا باب أهله.
نزلت دموعي ب تَوجس، أرتعاب، صابني ذعر واني أسمع
هالجريمة البشعة، مديت أيدي الترجف سحبت الصورة
أباوع بيها بكل تركيز، كأنما ذبيحة حيوان ومقطعيهاا
ذبيتها من أيدي بخوف رجعت ضامه نفسي بحضنه أول مرة شي يرعبني بهالطريقة.
بقيت على هالحالة الوقت دموعي مستمرة تنزل
كل ما أتذكر شكل الجثة وشمسوين بيها همس بصوته وهوَ يمسد بشعري.
عميد الدين: هسه فهمتي ليش أصريت بالزواج منچ
چنت أگدر اتعاون وياچ بخصوص ثأر رائد واحنا مامتزوجين
بَس انا يا ام سَند مصايب ابوچ وخوفي عليچ وحدچ خلاني أخذ هالقرار الصعب.
أردفت بتلعثم
اني ما چنت أتصور الهلدرجة هو مجرم
ليش إلى يگتل يرضى بموت ابنه مايرضى بتعذيب الغريب.
رفعت راسي اله عيوني بعيونه
خايفة
يمچ انا
أخاف يأذوني ب أبني
أبنچ أبني، والي يتگرب اله ويحاول يأخذه منچ يخط نهايته.
راح تبقى ويايَّ دائماً
بدون شك.
وإذا عفتني، اخاف يجي يوم وتعوفني.
رفع أيده يبعد بشعري عن عيوني
ما أعوفچ يُبا، وشيلة الغالية ورباها وتعبها.
الأشخاص إلى جاي يساعدونك منو؟
أخوانه
تگدر تحچيلي أكثر عنهم
بقى بَس هذا الموضوع يتوضح الچ بالايام الجايه
وبعدها عميد الدين ماعنده شي يخفي عنچ غير موضوع اختي.
باوعت الوضعنه گاعدين بالأرض وحاطني بين أحضانه
واني بدون حجاب، انحرجت من الموقف ما ادري عقلي شصارله
تحمحت وأبتعدت هوَ هم حس على نفسه ضل منزل عيونه.
مغلس ماحچه شي، نهضت لبست حجابي امسح بوچهي.
اني هم عندي موضوع واحد ماحچيتلك عنه
شنو؟
من چنت خارج العراق اكو شخص چان يشتغل ويا
أبوي يساعدني، وهم صديق الرائد چان ساعدني اهوايَّ
أكثر من مرة خربنا شغل أبوي، چنت أخذ ملفات فلاشات
تخص شغلهم وانطيهن اله وهوَ يشتغل كلشي إلى أن يخسرهم أسمه ظافر .
وتطلعين ويااا؟
بس كم مرة التقينا بمكان علمود الشغل تواصلي وياه
كله رسائل او اتصالات بَس چنت احذف كلشي اخاف جهازي يتفتش.
وينه هسه.
رجفت شفايفي ودموعي رجعت نزلت اني ظافر
أعتبره اخ بمعزة رائد عندي، هوَ سبب كلشي بي اني اليوم
سبب تغير شخصيتي الضعيفة وتغير كلشي
ما ادري، أنسحب بدون ما ينطيني علم بس اخر شي
قبل لا نرجع لهنا للعراق چنا متفقين على شغل وكمله بس بقت الأمانة .
أمانة شنو
الأمانة عبارة عن ملف إذا يوصل للقانون يسحق أشرف سحق
ملفات، صور، فيديوهات، تسجيلات
وينها هسه.
هنا المشكلة ما ادري وينها بس گالي راح يأمنها عند شخص وهوَ يسلمها ألي
وما أستلمتيهاا؟ يعني ماعرفتي الشخص
لا، اليوم انتظر توصلي ومتأكدة هوَ مايغدرني لو الكل يغدرني.
ليش هيچ واثقة بي
لأنه نفسه الشخص الساعدني وخلاني بهل القوة والشراسة
امممم، مبينه تعزينه
كلش عميد الدين، معزته بمعزة رائد عندي
فعلاً اخ ونعم الاخ چان
أحتمال يرجع، أو اكو شي أباله.
هوَ دزلي رسالة گال أنتِ راح تأخذين حقج بنفسچ وأنتِ گدهاااا بَس ما گال يرجع أولا.
اي
التفتت اله
شنو اي؟
اييي يُبا أن شاء الله يرجع ونفهم منه هالظافرر
أن شاء الله، دائماً بصلاتي ادعي يرجع
چاا يرجع وين يولي
ياااا
وداعت الياااا.
اني راح أنزل هسه سَند يگعد ومايلگاني
وَهج تريدين عرس؟
لا وحتى اذا فتحوا الموضوع كلهم أنتَ انُ سوينه حفلة مال الخطوبة مايحتاج للعرس
انا هم هيچ فكرت، بس ردت أشوفج
متفقين.
احنا دائماً أن شاء الله متفقين.
ماراح اسئلك عن شعورك، وأنتَ فاقد صديق طفولتك بهذا الشكل
خلي ناري بگلبي يا أم سَند النار صارت نارين من راح رائد واختي تدمرت
شوگت أشوفها
من هيَّ تقرر
ليش هيَّ صار عندها علم عني
اكيد
عادي اسئل سؤال عميد الدين
اسئلي غاليتي.
حكيت أنفي مبتسمة أحب هالجملة من يگولها غاليتي .
اختك مريضة؟
لا
شلونها شخصيتها
وَهج الثانية
والله؟
هز براسه مبتسم، أحس اتفاجأت من جوابه.
وَهج: هيَّ بالعراق.
عميد الدين: لا
وَهج: معنى كلامك هذا أنتَ چنت اتسافر الها
عميد الدين: اكيد اختي الوحيدة هاي كل فترة اروح الها
بَس هسه بحكم أوضاعي وكلشي جاي اشتغله گاطع عنها وهيَّ فاهمة الوضع.
كلي فضول التقي بيها.
سحب جهازه وأشرلي انتظر بقيت بمكاني ما ادري
عليمن يتصل باوعت للشاشة مكتوب اسم رونق
شكل السماعات حط وحدة بأذني وحدة بأذنه شويَّ
وأنفتح الخط اجه منه صوت انثى ناعم بَس بي بحه حلوة.
عميد الدين: شلونها حلوة الحلوات.
رونق: مشتاقتلك يُبا
شلونه الوضع يمج
تمام وخالة ماتاركتني
انتبهي النفسچ
تدلل يُبا، شلونهم الجماعة
يسئلون عنچ.
بقت ساكتة الثواني ومبين جاي تمشي تتحرك رجع صوتها
النا لقاء، راح اغلقه لأن طالعة
لا تنسين علاجج
مشتاقة للولد
هم مشتاقيلچ هم بنيتي
عميد الدين آدم ما اتعالج
لا رافض الفكرة.
تغير صوتها من الهدوء للعصبية
ويننن هااي بنت أشررررف وينهااا ماتحررك روحهاا.
باوعلي عميد ابتسم خفيف والحزن غاطي ملامحه
شتگولين تگدرله.
هاي اخت رائد شلون ماتگدرله.
ضلوا يسولفون بخصوص موضوع آدم وبعدها سدته
گلبي رأف اتجاه هالبنيه، مبينة شنو من شخصية
كأنما عميد الدين أخذه منبع الشجاعة منه بالكلام
عميد الدين من سئلتك مريضة گتلي لا بَس هسه گتلها لا تنسين علاجج
رونق عندها ربو من الطفولة
أنتَ ليش باعدهاا
قبل چان وضعها صعب، مثل ماتعبو عليچ وصلوچ لهل المرحلة
انا هم تعبت على اختي، و الحقد أتجاه عيسى وأشرف.
بداخلها كل يوم يزيد، إذا ارجعهاا خايف ترجع مثل قبل.
عندي احساس رونق عندها شي
ما أدري شلون أشرحلچ وَهج بس رونق رائد چان يحچيلها
قذارة شغلهم واكو سر يم رونق حتى إلى ماحاجيته
وهالسر محد يعرفه غير هيَّ ورائد تگول من ارجع للعراق احچي.
بقيت ساكتة وأفكر شنو ممكن يكون هالسر إلى محد يعرفه
غير رائد وهيَّ، باوعت للساعة راح تضرب الثلاثة
اترخصت منه وطلعت، بكل مرة ادخل غرفته اكتشف شي.
شمضموم بعد، قابليتي استنزفتها بالصدمات جيتي هنا للعراق
خلتني اكتشف اهوايَّ شغلات جنت غافلة عنها دخلت للغرفه صفا وسَند نايمين.
وگفت يم الشباك، الجريمة مال يحيى ابشع جريمة
أشوفها بحياتي، جسمي لحد هالحضة يرجف مجرد أتذكر الصورة
شلون أخوانه وعميد الدين گدروا يتحملون هيچ شي.
باسل ما حسسته أعرف شي طول هالفترة اتعامل
ويا بالشغل طبيعي وما أستبعد عميد الدين حاچيله.
للصبح گعدت صادف يوم جمعة بهذا اليوم ما اداوم.
جدي ماراجع بعده باجي نادية واگفة يم زينب تحضر بالريوك
وياها، صبحت عليهن، دخل آدم بس هالمرة طبيعي مو مثل شكله كل يوم
آدم: صباح الخير
ردينه عليه گعد يمي دخل سَند أخذه گعده على رجله يبوس بي.
آدم: اويلي عليج يمه همزين جابتك وَهج هنا چان طلعتلي خيخه مثل الخالو
وَهج: أمه وَهج تتوقع يطلع هيچ طلعات
آدم: كل شخص ينشأ حسب المستنقع إلى يعيش بي
اي آدم شنو الاخبار.
رفع راسه مقلص عيونه يباوعلي
اخباريش؟
باوعت لباجي وزينب مشغولات مو ويانه
مثل إلى ابالك
العمدة صاير مثل ام زكي الواضح.
ضحكت بصوت عالي على التشبيه مالته بدوا يگعدون الباقين.
آدم: شنو اختج الكيوت ما گعدت
وَهج: صفا اجتها من الله تعشق شي اسمه نوم
خلي تگعد تاكل مو عندها علاج
سَند: اروح اني اگعدها عمو
يله
طلع سَند يركض دخلوا زيد وعميد الدين انضموا النا.
زيد: شوف الچناين مالتنه
آدم: وحدة تگول للثانية اني اكيت منچ
زيد: شوف النزاكة
آدم: شوف الرقة.
الله يرزقني هيچ مرة لو ابقى بدون زواج
إذا مو كيوت وعندها ضحكة حلوة ما اريدها علمود تستقبلني وتسحلني بضحكتها
عميد الدين: الله يطيح حظكم
زيد: اهوو نسيت هاي الگدامي زوجة العُمدة
آدم: خوو هاي خليها سكتة.
وَهج: شبيَّ
آدم: اسف ما اگدر اتغزل أكثر، زوجج موجود
زيد: يله من يطلع ناخذ راحتنه اليوم جمعة
عميد الدين: گاعدلكم اليوم هنا ماعندي شي
زيد: عميد الدين
گول
گول لو هدف، بروح اعزازكم اضحكوا لا تفشلوني.
آدم: الصبح محد يگدر يضحك خوية لازم الواحد يتريك
ويجدد نشاطه وبعدها يمارس يومه طبيعي
زيد: اله أنتَ نشاطاتك غير عن العالم.
حط أيده عميد الدين على وجهه مغطي يضحك عليهم.
آدم: تسكت لا أستلمك والعباس ابو فاضل
زيد: الحمدلله كلشي ماعندي لا اسرار ولا شي محد يلزم عليَّ شي
آدم: متأكد
زيد: مثل ماشايفك.
سحبه آدم من ياخته شاوره وزيد طكها بضحكه بعلو صوته
آدم: هاا وهسه
زيد: شي عادي عندي شاب ومن حقي
عميد الدين: شعندكم؟
رد عليه آدم يتغامز ال زيد
سلامتك ماكو شي
دخلت امهم الكل انجمع، دخلت صفا لازمه ظهرها تمشي على كيفها
وَهج: ليش اجيتي هنا
صفا: ضجت وحدي سوولي مكان اگعد.
گام آدم من مكانه وسحل زيد وياه يخربون ضحك
آدم: تعاي اگعدي هنا، وسَند عمو تعال أنتَ أگعد هنا بصفها.
گعدوا صفا وسَند، ما أشوف غير آدم گعد بصفي من جهة اليمين
وزيد گعد من جهة الثانية صرت بنصهم عميد الدين گاعد گبالنه يباوعلنه.
عميد الدين: عود حليتها هسه؟
آدم: متزوجة متزوجة احنا اخوانها
زيد: آدم طگنه وحدة بصوتك
آدم: اووويلييي عليج يمه.
ضحكت والله يونسون ويطلعونك من عز كأبتك حچت باجي سلمى.
سلمى: شنو اخبار اخوكم شو طلع بعد ما شفته
آدم: گاعد يم صديقة يمه ويداوم بس يحتاج فترة يرتاح بيها
وبنت عمته يخليها معلگه؟
راح يحچي وياها ما سمعت منه وصاروا امالخ هدني واهدك لا اگتل امك.
عميد چان يشرب چاي من حچه آدم هيچ ضل يباوعله رافع تك حاجب ماعاجبه.
عميد الدين: شعنده راح الها
آدم: راد يتفاهم وياها
عميد الدين: ومن كل عقله متخيل تسمعله
آدم: عادي كلنه بشر ونخطأ، هوَ غلط بس بنفس الوقت ماراد يأذيها.
عميد الدين: مايرجع هنا
آدم: ما ادري حاچي أنتَ وشوفه
هز براسه رجعوا يكملون ريوك، ماكاسرة خاطري غير باجي سلمى
متعلعله بولدها.
عميد الدين: ام رحيق أكرم نايم
زينب: اي والله نايم تعبان
زيد: صارلي اهوايَّ ما راجع لروتيني ويا رحيق
آدم: هو شنو روتينك تعلمها تهز وبَس.
زيد: صافيناز ماتلحگهاا
زينب: يووو زيد عوفها الناس تعلم أطفالها على اشياء بيها فائدة أنتَ تعلمها تركص.
يجوز ابوها يتزوج مرة ثانية، خليها تتعلم علمود تركص بعرسه
أكرم مايتزوج عليَّ اني ام بنته
هسه بدون ما تحسين تلكينه جايبها فوك راسچ
بعد اخوي دكتور، و وياه كله دكتورات هسه تأخذه دكتورة وأنتِ تصيرين قديمة.
زينب: موووت بحرگتك ما يبدلنيي
عميد الدين: كاافي ولك اليوم شبيك من الصبح تحرگ بالوادم.
زيد: اني صوچي اگعد وياكم، اروح الريم هناك أونسها زوجة أخي المتشردة
وَهج: ريم صايرة طگه ونص بس تضوجها تلزمك ماترحمك.
زيد: منيلها هالفاهية
آدم: خايب أنتَ الفاهي، غير من راحلها وارث فضحتنا
زيد: هيچ صايرة؟
آدم: چاا دگت اخوك الناقصة شتريدها أتسويها.
زينب: عميد الدين خوية خلونه اليوم نسوي سمج شوي وننجمع
من زمان مامنجمعين، وبلگي ريم هم تجي دام اليوم جمعة
عميد الدين: ما ادري والله إذا تجي اولا أشوفها ان شاء الله.
آدم: ما تجي أخذوها مني
زينب: چا وارث ماموجود ليش ماتجي.
عميد الدين: يله آدم أخذ زيد وروحوا اشتروا سمج وتعالوا.
باوعلي آدم بطرف عينه
آدم: ما اعرف اشتري
زيد: چذاااب
آدم: اي مالي خلك اروح
صفا: اني اريد مشتهيه اكل سمچ.
رفع راسه على مصدر صوت صفصف
آدم: اصلاً محد يعرف بگدي يشتري سمچ
زيد: بووووووووية
صفا: هههههههههههه فضيحة أنتَ.
طلعوا آدم وزيد للسوك صفا بقت گاعدة جبتلها علاجها.
بقيت افتر ويا زينب بالبيت اشتغل وياها وعميد الدين وأمه
راحوا الريم ايشوفونها وبلكي تقتنع تجي من طلعت من البيت لليوم رجلها مادخلت لهنا.
زينب: وَهج شنو نسيتوا نفسكم انتم ماتسون عرسكم
وَهج: لا ما أنسوي عرس سوينه حفلة بالخطوبة
زينب: خلي نفرح بيكم
وَهج: والله زينب مالي خلك للهوسة حتى عميد الدين رأيه من رأيي
براحتكم بعد
شو وجهج اصفر شبيچ
ما ادري والله وبس أنعس.
هو الجو بالشتاء برودة ودافية داخل البيت يخليك بس اتنعس
صفا: لا هاي حامل يمكن
باوعت الها اني و زينب
زينب: لا وين
وَهج: أنتِ تأخذين شي
زينب: لا، لأن اني بصعوبة ايصير عندي حمل گتلج رحيق سنين بقينه يله حملت بيها.
حللي وشوفي نفسچ
يمعودات مو حامل قابل ما أعرف نفسي.
رجعنه نكمل بالشغل رجعوا آدم وزيد مسوگين
آدم: ام خشه جبتلج سمچ وطرشي
صفا: شكراً يا مُتنمر
بخدمة الكيوتات
آدم
ضل يباوعلها منتظر كلامها.
صفا: تگدر تطلعني للحديقة اريدك بموضوع
آدم: لا خلي زيد يطلعچ
زيد: رايح اني انام أنتَ طلعها.
ويننن مووولييي غيرر نشووييي
اي بعد وگت بين مايكملن البنات
صفا: كافي اسكتوا بطلت ما اريد اطلع
آدم: ليش؟
أحسن غيرت رأيي.
رجعوا عميد الدين وباجي سلمى وريم ماقابلة تجي وعمتي نجاة
ماگدرت تجي بقت يمهاا، جهزنا كلشي گالوا نشوي برا بالحديقة
نقلنا الاغراض وكلشي حطيناهن عميد والولد استلموا الشوي.
واحنا علينه الباقي راح أكرم جاب خبز لأن ناسين ماجايبين
حبيت الأجواء ولا مرة عشت هيچ اجواء رائد بگد مايحبنه وحنون علينه
بس ماچان يتواجد بكثرة ويانه بس بالمناسبات انشوفه.
اجه عميد الدين يمي يفتر
كملتوا
عميد الدين: ماتشوفين هالعفطية يمي يتعاركون عبالك رويسيه
وَهج: هههههههه بَس حلوين
منو؟
اخوانك
اهاا، اي.
ضل يفتر بالمطبخ جهز الصوص كملت شغلي ورحت يمهم.
صفا گاعدة وزينب بصفها وأكرم يكفخ بزيد لأن مايخليهم يشتغلون عدل
نزل أبوي يمشي بكل جبروت والطغيان واضح بملامحه
اترأس المكان وگعد، واول مرة بحياته ياخذ سَند الحضنه
بقيت صافنه باوعت الصفا نفس الحالة گعده بحضنه ويسولف وياه.
أبني مستغرب ويضحك لأن اول مرة يقربه اله قبل مجرد
يتقرب اله سَند يبقى يصيح ويطرده من المكان
بقيت بمكاني أباوعلهم، ما ترتاحيت لهلخطوة منه رفع راسه باوعلي وباوع ال عميد الدين.
أشرف: ماقررتوا اتسون عرسكم.
جاوبه عميد وهوَ يشتغل
عميد الدين: لا ماراح أنسوي عرس
أشرف: براحتكم.
سلمى: وَهج يمه چا نقلي غراضج لغرفة زوجج إذا قراركم ماتسون عرس
وَهج: اي باجي أن شاء الله
كملوا وصلوا الغده گعدنه كلنه ناكل بس گعدتنه ناقصها جدي وريم وامها و وارث.
أشرف: البارحة گوا قنعنه بشار مايشتكي
عميد الدين: عليمن يشتكي على صخام وجهه غير هو جايني يهدد
أشرف: اني اگول لو وَهج تخلي أيشوفه مرة وحدة.
وَهج: أتوقع حچينه بهذا الموضوع.
سكت يباوعلي بنظرات غل ورجع ياكل جرت السوالف
والگعدة محلينها آدم وزيد بسوالفهم كملنه اكل
اجاني عميد الدين وگفلي يم باب المطبخ مبدل مبين يريد يطلع.
عميد الدين: ادخلي بدلي وتعاي
وَهج: وين؟
من تجين ويايَّ تعرفين
دخلت بدلت وگفت اعدل بحجابي وصفا تسئل
صفا: وين رايحين
ما ادري ماگال.
كملت وطلعت وياه صعدنه بسيارته وطلع بيَّ ما ادري وين
هسه احنا وين رايحين بهل الظهريه.
أريد اشوفچ منظر يعجبج.
مشت السيارة أكثر من ساعة دخلنا بأحد مناطق
البصرة الراقيات وگفنا قريب على بيت فخم وگدام الباب حراس، التفتت اله.
بيت منو هذا؟
ثواني بس والشارع انترس سيارات بقيت اباوعلهم
نزل من أحد السيارات ضابط و وياه جنوده
طوقوا البيت بأكمله
ودخلوا جوا بعد ما أخذوا الحراس الواگفين يم الباب.
وَهج: شنو هذا عميد الدين
عميد الدين: نفسه الشخص إلى چان ابوچ مستفاد براسه
ليش بعده ماقابضين عليه.
مو كلشي بسهولة لازم كلشي يتأكد يله يلقون القبض
رجعت أباوع الباب البيت، وأحس جناحات انخلقت
داخلي، هسه ابوي راح ينصدم من هل الخطوة
بعد مايگدر يستغله ويچذب عليه لأن كلشي بأيدنه.
صارت صوت طلقة انرعبت باوعت
ال عميد الدين بارد بردة فعله
عميد الدين: لا تخافين شويَّ دراما
طلعوا اثنين لازمينهم مكلبشين أيديهم بالاصفاد
دخلوهم بالسيارات، وأخذوا شكو واحد موجود وراحوا
ضحكت بفرح بدأت تنهدم أحد زوايا شغلك
يا أشرف.
درت بوجهي اله اضحك
عميد الدين ممكن طلب
اتفضلي يُبا
يصير احضنك؟
بهتت ملامحه وباوعلي بنظرات تفاجئ
من طلبي، هز براسه
حضنته واحنا داخل السيارة همست واني مغمضه عيوني
والإبتسامة بعدها مرسومة على ثغري.
وَهج: شكراً عميد الدين يمكن لو چنت وحدي ماراح اگدر الكل هذا
عميد الدين: يفداچ كلشي يُبا.
أبتعدت عنه، وأباوع للبيت اكو جنود باقين داخل وخارج البيت جاي ايشوفون شغلهم.
رجعنه نمشي بالطريق، وطول الوقت هوَ ساكت.
ما ادري من تصرفي ما ادري من غير شي عبالي راح نرجع
للبيت، بس غير مسار الطريق مال الرجعة
وَهج: وين رايحين
عميد الدين: اصبريلي
وگفنا گدام مجمع نزلنا مافاهمه شكو جايين هنا.
دخلنا اله استقبلنه ولد يجي بعمر عميد الدين والمجمع
ألبسه نسائيه، اكو بنات موجودات هم يشتغلن بي
عميد الدين: حَبيبي ممنون شوف شغلك احنا مانتأخر
حياك الله خوية كلشي تحت تصرفك
لزمني من أيدي يمشي بيَّ دخلنا بقسم الحجابات اكو موظفة تشتغل بي.
اتفضلوا أهلاً وسهلاً.
عميد الدين: ولو اتعبچ خوية بس رايد كبات مال حجابات
ذني إلى يغطن الشعر يلبسن جوا الحجاب.
راحت البنيه تجيبهن، باوعتله مامصدگة تصرفه
وَهج: يااا عميد الدين
شكوو ام سَند
جايبني هنا تشتريلي كبات
غير زوجتي
هههههههه مو عاقل والله.
اجت البنيه بأيدها مجموعة مال كبات نوعيات حطتهن گدامنا
لزمهن يقلب بيهن ويرفعهن گدامي
عميد الدين: تريدين ساده لو شنو
وَهج: ماكو فرق راح يصيرن جوا الحجاب هههههههههههه.
ليش تضحكين يا وگيحة
والله تصرفك ضحكني هلگد شعري مسويلك عقدة
يُبا خبلنيني بالشعرات إلى يطلعن.
اختاريت كم واحد تقريباً أربعة بس هو ماقبل يگلي أخذي بعد
خاف يضيعن عندچ غيرهن وضل يتناكر ويايَّ حد ما خلاني
أخذ عشرة جهزتهن النا البنيه وسلم على الولد وطلعنا.
كل خطوة وفعل منه مليانات حنية وأهتمام مشينا لگدام
أخذ العاب السَند ورحيق هم ورجعنا السيارتنه
مرات اهتمامات.
تكون بسيطة، بَس يبقى أثرها جميل بداخلك لف السيارة ورجعنا للبيت.
اسراء.
انسحلت من عبايتي أتلفلفت بيها تلفلف أيد ساده حلگي
ظافر: ووين رايحة هااا؟
گلبي مو ينبض طبيعي لا صار بي سباق من الخوف
سحلني وطول الطريق لازمني يسحل بيَّ حد ماذبني داخل البيت.
أيدي على گلبي أتراجف
اسراء: أنتَ شتريد مني
ظافر: غبيةةةة غبيةةةة
ثنى رجله وگعد مگابلني
ظافر: الله انطاچ السان بسسس ما انطاچ عقل.
من قوة الرهبة إلى اني بيها الساني مايدري شنو يحچي
اسراء: تريد تستخدمي المصالحك
لا جبتج اتونس بيچ.
اتجحظت عيوني على كلامه نهضت من مكاني بسرعة هجمت عليه
أنتَ شنووووو عبااالك انييييي من ذنييي البايعاااات نفسسسهنننن.
قيد ايديَّ ودخلني النفس الغرفة إلى چنت بيها.
ظافر: انطمررري.
نزلت دموعي بضعف وقلة حيلة من أمري حچيت بغصه
اسراء: بس گلي شتريد مني، ليش خليتني أعوف اخواني هناك.
وتخلي گلبي هيچ مشتعل بناره شرايد مني أنتَ
ظافر: ماررايد شي بسسس اربززززي هين.
راد يطلع صحت وراه ودموعي تحرك بخدي
بداعت جدتك أنتَ مبين تحبها احچيلي شرايد مني.
أستدار إلى رجع متقدم ناحيتي، مد أيده كمزت بمكاني
اش ما أسوي شي
مد أيده للعباية عدلها
ليش أشتريتني
أحميچ.
منين تحميني
شهر انتظري واخوانچ يصيرون يمچ بَس بعد لا تكررين
الي سويتي هسه، لأن ماراح اسامحچ بالجايات
اني سمعتك تحچي ويا أخوك عني.
اختبار الج، وأنتِ صدگتي وصرتي ذكية وطلعتي منا
مافكرتي بهالليل ماخفتي على نفسچ طالعة وبهيچ مكان اخخ منچ بس لسانج بطولي.
شنو اختبار شبيككك أنتَ
نامي لا عيونچ النعسانة هاي تنعس أكثر
طلع سد الباب مافاهمه شي منه شنو هل الشخص
بقيت گاعدة حد ما أذن الفجر طلعت اريد اصلي
دخلت للحمام غسلت واتوضيت طلعت صار بوجهي.
ظافر: تصلين؟
اسراء: أحد گلك اني يهودية لو من بني قريظة
ظافر: بني قريظة هم نفسهم قبيلة يهودية.
اسراء: الواضح انتَ منهم شوف قوة المعلومات عندك عنهم.
هز بأيده
روحي صلي روحي
طلعت الحجيه صبحت عليها ورحت اصلي وأسمع صوت هذا حازم
صدك ماعنده شي اسمه يحچي بهدوء يصيح صياح الغسل حتى غسل.
باوعت النفسي متوجهه الرب العالمين وأخذ بغيبة الرجال استغفرالله
صليت وكملت لفيت نفسي بالغطى مرجعة راسي لوره
كل ما الوقت يستغفلني واخواني يروحون من بالي يرجعون
بنفس الثانية على بالي، شهر والله اهواي نزلت دموعي.
شلون اتحمل شهر بعيدة عنهم يا الله ساعدني وصبرني.
الثاني يوم گعدت على دگة الباب فرگت عيوني
ورحت أمشي بنعاس كوا فاتحة عيوني فتحته
ظافر: تعاي اكلي
اسراء: اريد انام
عفته واگف بالباب ورجعت دخلت نفسي جوا الغطه
وگف فوگ راسي يحچي.
ظافر: مانايمة
اسراء: نمت الفجر
يولي اشو اني انام ساعتين اشبع
ليش أنتَ هم بشر مثلنا
لا حيوان مثل شكولچ
الحمدلله أعترفت
جدتي تريدج
جذذاااب وستيننن جذاااب.
أكضبي السانج.
واني إذا اكضبك هسه اله اسووويك وصلتين
بس كلام ما بيج كل حظ
عود يريد يستفزني
گووومي
مااا.
طلع رگع الباب غميته من وره ورجعت نمت. أهرب والجأ
للنوم علمود ما افكر شي، التفكير موتني محد دخل عليه
للعصر كلش گعدت، طلعت أمشي بالبيت هدوء
حتى صوت انفاسك من تتنفسها مسموعه بس صوت
القران مشتغل، دخلت للصالة بس الحجية گاعدة
وحدها ماكو احد بعد احسن ولا ينجرعون احفادهت.
گعدت بهدوء شابعة نوم شافتني أبتسمت بوجهي.
امل: صح النوم حبوبه
اسراء: صح بدنج
امل: ظافر گال اخليچ نايمة هل ما گعدتچ
بقيت ساكتة ماجاوبتها، صايرلي صاحب ذوق گامت من مكانها.
وين رايحة
احطلچ أغدي تتغدين
لا اني اصب النفسي اگعدي أنتِ
رجعت گعدت بمكانها اتسبح بسبحتها دخلت للمطبخ
حررت الاكل صبيت قليل إلى بس اسكت معدتي
گعدت بالمطبخ اكل واصفن كملت غسلت الصحن ورجعته المكانه.
اجت دخلت باوعتلي
تغديتي
اي
چاا تعاي ويايَّ نخبز
نخبز؟ بَس اني ما أعرف اخبز جدة.
ضحكت شالت المعجانة مال العجين
انا أعلمنچ.
طلعت وياها أمشي رحنا وره البيت مثل البستان چبير
وبي تنور طين حطت المعجنة وراحت اتچيم تحط حطب
هيَّ صح جبيرة، بس من ذني النسوان الكبار إلى بعدهن بحيلهن
كملته واجت گعدت تسوي بالعجين اتگص بي تعلم بيَّ واني كلشي ماكو.
جدة صعبة شو شلون اتسوينه هيج شوفي شلون تلزك بأيدي
باوعيلي شلون أسوي
باوعت لها و على حركاتها صرت أطبق ضحكت من ضبطتها بس مو كلش حطيتها بالصينية بيها طحين.
سويت اثنين وياها وابتعدت لا اخربه كملت وراحت وگفت تخبز
وگفت بصفها أسولف وياها
اسراء: ليش تخبزين بالطين
امل: ياا چاا شني اكو احلى من خبزة التنور الطين
جابولي احفادي تنور الغاز ذاك هو يسمع حسج
من چنت ببيتنه انجيب كله من المخبز
ياااع شلون تاكلونه ولا بي لذه، شوفي شلون خبز ايدينه.
طلعت وحدة من التنور شحلاتها حطتها بالطبك مال الخبز ورجعت تخبز
حجية اشتاقيت الإخواني
ظافر انطاچ حچايه يجيبهم الچ.
ردت اگلها البارحة سمعت يحچي غير حچي وسكتت شنو اختبار يگلي
درت وچهي عفتها تخبز اباوع للمكان إلى احنا بي بساتين
وكله خضار الأرض مزروعة هم، اني صرت وعشت
بالبصرة بس بحياتي ماجايه لهيچ مناطق.
كملت خبز أخذته منها لأن شفتها تعبت دخلت بي جوا
اخذت كرصة خبز شوي منها اكلتها والله الخبز الحار ماكو اطيب منه
مو مأمون الكلب چان يوكلنه خبز يابس وكاضيها علينه عدس وفاصوليا.
سمعت أصواتهم اهوو اجوا بقيت بالمطبخ حابسة روحي.
دخل هذا الاسمه حازم شافني ماحچه أخذ القوري مال الچاي
حط بي ماي وچاي وحطها على النار راح للثلاجة
طلع منها راشي ودبس حطهن بصحن وخلطهن
ضل واگف منطيني ظهره، خدر الچاي صب كلاصين حطهن بصينيه راد يطلع رجع الي.
حازم: تاكلين ويانه؟
اسراء: لا ماصارلي اهوايَّ من گعدت واكلت
حازم: تمبل نوم
اسراء: شعليك.
مارد عليَّ أخذ الصينية وطلع بقيت افتر بالمطبخ
هسه شكو حابسة نفسي دخلي اطلع طلعت شفت.
ظافر يشرب چاي گاعد على جهه وحازم ياكل ويسولف ويا حجية امل
اخذتلي مكان گعدت بي ساكتة، والله ذوله إذا يلزموني يگطعوني تگطع
خلي احترم نفسي واسكت لا انكتل كل واحد شضخمه چنهم ثيران.
ظافر: شنو جدة لازم مسويتلها أعادة ترتيب
اسراء: شتقصددد
ظافر: السانج مختفي ماله حَس.
عوجت حلگي واهز برجلي، ما اتحمل اگعد عاقلة لو احچي بهدوء اختنگ مو بيدي.
حازم: اگلج هاي عيونچ صدگ هيچ
اسراء: ليش شبيهن عيوني
حازم: مكبسلات.
ردت اغلط لزمت الساني
اسراء: مثل ذني عضلاتك إلى بس اجكهن بأبره يفشن نافخهن نفخ.
ضحك رجع ياكل درت بعيوني ظافر صافن بيَّ
من شافني أشرله بمعنى شكو انتبه النفسه ورجع عاگد حاجبه
قلبت عيوني والله يا الله شلون ناس وحازم يضحك من جوا لجوا.
اسراء: ليش ما اشتريت اخواني ويايَّ
ظافر: ماعندي بنك امچ اعذريني
اسراء: أنتَ منين تعرف امي
ظافر: اني وياها حبايب شلون ما أعرفها.
إذن المغرب عبالي مايصلون وهتليه طلعوا يصلون.
مرت الايام واني هنا گاضيتها ويا الحجية امل حبابه وطيبة
ظافر وأخوه يطلعون الصبح يرجعون بالليل أو العصر وهذا حازم
مرات مايرجع من اسئل الحجية تگول بحكم دوامه لأن هو ضابط.
اشتياقي فاق الإخواني ما يمر يوم إذا ما افكر بيهم
أكلوا؟ شربوا؟ من ينامون يتغطون عدل؟ ميسون خاف تضربهم
كل هل الأفكار طول اليوم براسي تعبت منها وتعبتني.
دخل مثل عادته يگعد گبالي وإذا حازم هنا يدخلون.
للغرفة مالته ويطولون الساعات يله يطلعون صابني فضول شكو بهل الغرفة
ظافر: شلونچ
اسراء: شعليكككك
ظافر: يولي أنتِ شنو هذا اسلوبج
اسراء: چاا شلون تريد أسلوبي واني عشت بنص انكس خلق الله.
تجين تمشي ويايَّ
وين؟
هنا بالبستان
اي اجي
طلعت وياه اثنينه نمشي ساكتين حد ماكسر حاجز الصمت هوَ.
اسراء
هاا اظافر
كفخني على راسي، رجعتله الكفخه بقى فاك عيونه عليه و على تصرفي
اسراء يثرب
والله إذا تكفخني بعد اكفخك مرتين
ههههههههههههه.
شنو معجزة هاي شفتك تضحك.
تعاي اگعدي هنا
گعدت وهو واگف يدخن يسحب يرفع رأسه لفوك ويسحب بالدخان
تدرين ب امچ موزينة
شلون يعني مو زينة
امج تجيب بنات فهمتيني
لا
رجع كفخني على راسي هم رجعتها اله ودموعي ملت عيوني
غبيةةةة
أنتَ الغبي والله ليش بس تكفخ بيَّ.
علمود تشغلين عقلج
هسه اشتغل يله ارجع كمل
يعني اله تنكفخين يله يشتغل
لا إله اكفخك يله يشتغل
بربوك مو بيدچ
مثلك بكبر الجامووسة.
أشر على نفسه بتعجب
اني اني بكبر الجامووسة؟
اي شوف راسك شكبره ابو راس
رجال ما انعاب
خاااب دررررروووووح.
اللهم صبرج يا روح، شوكت نتفاهم
من يطلع أعور الدجال
خلييي يطلععع خلييي ويخلصني منج
ديلا يلا لا تدوخني احچي إلى عندك
أنتِ الواضح ماجاي تفهمين كلامي ولا أخذته بكل جديه.
حط تصوير گدامي خلاني اكبر من العمر عمرين
امي بنص الاماكن الملاهي والمكان متروس زلم وبنات
يركصن وهيَّ واگفة بذاك اللبس اتسولف ويا واحد وتضحك.
ضاربه الدنيا وناسيه عندها ثلاثة دموعي تنزل بدون ما أحس على نفسي
ظافر: هاي مو هنا خارج البصرة، بس تجي هنا بين فترة وفترة
وبيتها فاتحتة للعبان النفس، ادري صعبة عليچ اتشوفين
هيچ شي بس لازم تعرفين حقيقة امچ اسراء
تشتغل ويا عصابات.
گعدت مهدود حيلي ضميت وچهي بين ايديَّ ابچي بصوت مسموع
ظافر: اسراء
نزلت ايديَّ من وچهي وشهگاتي اتربعت بصدري
ظافر: اني أعرفچ من زمان
نظراته بنظرة مافاهمة مغزى كلامه.
اسراء: تعرفني؟ منين تعرفني.
سحب نفس ويحچي بنبرة تغيرت غير عن نبرته المُعتادة
اعرفج من چنتي ترجعين من الدوام ودموعچ تمشي وياچ طول الطريق
منو أنتَ؟
ريم.
حچيت الأمي وارث اجه حچيتلها كلشي صار
نجاة: لو متفاهمين بهدوء مو احسللكم
ريم: اني گتله اريد اطلگ
نجاة: شنووووو
ريم: اي يوووم، علاقتنه من البداية غلط بغلط مني ووافقت
عليها وحتى الزواج وتسرعه چان اكبر غباء وغلط مني
اوافق وهوَ هستوا طالع من تجربة فاشلة ومصدوم.
نجاة: ما ادري ريم بكيفج بس اخافن عمامچ يدرون
ويجون ياخذونج وهالمرة ماعندنه اي عذر
ريم: قابل أجباري ياخذوني؟
نجاة: ليشش شتنتظررين من ناس سبب حادث ابوچ.
بقيت أفتر بالبيت، ما ادري هالضياع شوگت ينتهي
بَس كافي ذله، انذليت اهوايَّ والسبب كله عمامي
دبروا الحادث ومات ابوي بي، لو هسه عايش يخلي أحد يذلني
لو ايصير ويايَّ إلى صار اتصلت سُرى على جهاز امي
لأن ماعندي جهاز، الجهاز إلى عافه وارث إلى ما أخذته.
سُرى: هلا ريمه
ريم: هلا بيچ
سُرى: اگلج ماعندج واتساب اي برنامج شلون نبقى هيچ
ريم: شنسوي بي.
مرات احتاج أسولف وياج، ليش ماعندج جهاز
مو كلش اهتم لهالشغلات
الله عليج اشتري خلي زوجج يشتريلج احسن ماباقين هيچ
زوجي
اي زوجج
الله كريم.
سديته منها، تگلي زوجي وهيَّ ماتدري زوجي ما أعرف وين صاير
واني ما احب البرامج والجهاز اتعودت من انولدت
انولدت بنص عائلة مو كلشي أتريده ايصير عندك
ياريت ياريت ادفع عمري كله وترجع ذيج ايامي
چنت اتعب من اشتغل بالخيانة وامي تخبز للناس
بس احسن من الحياة هسه وين چنت ووين صرت.
يمكن الشي الوحيد إلى ربحته بهل التعب
دراستي
رغم أوضاعنا شلون چانت، وشغل ابوي البسيط
الي يجمع الف فوگ الف علمود يشتريلي ملزمه
لو ملابس ألبسها، چنت افرح من يجيبلي ثوب جديد
لو يذكرني بشغلة بسيطة، حجاب، قطعة قماش، قراصة شعر، حلويات.
كلهن چانن يفرحني، اضوج من وضعنا بس سعيدة حياتي هادئة
اله هسه منين ما التفت القهر والغم تارس گلبي
أبسط أحلامي جانت، يصير عندنه بيت مُلك نعيش بي.
اني وامي وأبوي حتى لو صغير، أبسط أحلامي چانت
اطلع معدل بنص هالظروف القاسية وأكمل دراسة واتصير
عندي وظيفة وراتب علمود أعين امي وأبوي وما اخليهم بعد يشتغلون
بَس أيقنت مو كلشي نحلم بي يتحقق.
الأصرار اله تأثير على الإنسان من أتريد شي وتحققه
كلشي بأيدك تدرس تتعب تبذل جهدك تحقق إلى أتريده
يمكن اني چنت بكل خطوة أسويها أهلي گدام عيوني يصيرون
مرات تجيني فترات اتعب بيها مالي خلگ للدراسة.
بس من أشوف ابوي وشلون متأمل بي اصراري
يزيد واگوم وادرس واتعب بس علمود احصل إلى اريده.
ونجحت بهذا الشي بعد تعب سنوات بس فرحتي بي
بقت ناقصة حققت إلى يريده بس ماحضر فرحتي كاملة لا هوَ ولا نوال
الصديقة إلى عشرتها ماراح تنسى بيوم
من الايام
الماتت قهر وبگلبها غصه من حالة أهلها وتعامل أمها.
مسحت دمعتي إلى نزلت ونمت الثاني يوم داومت
أستوقفني صوت دكتور مناف ورايَّ
مناف: رريم.
أستداريت شفته يمشي بأتجاهي باوعت للطلاب شي تباوع وشي مامهتمة
ريم: اتفضل دكتور
شلونچ
بخير دكتور
نزلت أنظار عيونه تتفحص ايدي ضميتها وره الجنطه
مبروك على الزواج
تسلم دكتور يبارك بيك.
عافني وكمل طريقة شكو وگفني لعد، اكيد يتأكد
اتزوجت اولا واني حتى الحلقة مالابستها
دخلت للمحاضرة
سُرى گاعدة أتراجع، گعدت بصفها بمكاني
سُرى: اتأخرتي اليوم
ريم: گعدت متأخرة
اگلچ ماتفهميني هذا الموضوع شو ماجاي أفهمه.
أخذته منها بديت أشرحه الها قبل لا يدخل النا الدكتور كملت شرح الها
جرت خدي باستني ضحكت على تصرفها.
سُرى: احلى صديقة
دخل الدكتور وبدأ يشرح المادة مخلين تركيزنه وياه
لأن انريد ننجح، حد ماكمل وهم هذا الدكتور شرحه زين ويفهم
الباقين تطلع روحك يله تفهم منهم عبالك يشرحون النفسهم مو للطلاب.
طلعنا نمشي بنص الجامعة وقلقتني نظرات دكتور مناف
نظراته اتلاحگني مر وقت وصار دور محاضرته.
ماگدرت ارفع حتى راسي كل ما ارفعه أشوفه يشرح وعيونه عليه
طلعت روحي يله خلصت محاضرته وطلع بقيت بمكاني گاعدة.
اجت نفس البنيه إلى من فترة تگلي تحاولين تتقربين منه
گعد قريب علينه لأن سُرى هم بقت گاعدة صارت تشمر بالكلام
سُرى: هاي عليمن تقصد
ريم: ختولي لا تهتميلها
يا ما أهتملها ما اتشوفين شتحچي
ذاك اليوم همات اجت واني گاعدة تگلي تريدين تتقربين من دكتور مناف.
شنووو شكددد سافلة
غير اخوچ ماشفتي هسه بالمحاضرة.
شفته، بس والله اني گتله اتزوجتي
ياريت لو تحاجينه يبطل هل النظرات الطلاب بدأت تنتبه
سُرى اني متزوجة ومو حلوة بحقي يطلع عليَّ كلام بين الطلاب بالجامعة.
كمل الدوام وكلمن طلعت راجعه البيتها ضلت عيوني تدور
شو لا زيد لا آدم اليوم رجعت وگفت يم الباب بلكي أحد هسه يجي منهم
شوي و وگفت سيارة زيد زفرت نفس همزين اجه صعدت وياه سلمت.
زيد: هلا وكل الهلا بريم الفلا
ريم: هههههههه شلونك اخي.
زيد: اتقبلها منجن انتن المتزوجات لو مامتزوجات چان
عرفت شغلي لعنة الله على كل وحدة تگلي اخي عساها بصخونه مال حصونه.
شغل السيارة وطلعنا انسولف طول الطريق
هسه شبيها كلمة اخي
اتسويلي انسداد بالقلب
والله حلوة بس انتم الشباب تنگرصون منها
يعني إذا كل وحدة تجي وگالتلي اخي چا شلوون نتزوج ترتبط نترومس.
لعد ماتحب ماترتبط منو لازمك
وينهنن اگلها ياهي التجي گالتلي اخي وخوية من خاوو عظامج.
احسن شي صير مثل أكرم واتزوج من اختيار جدي
چنها تاليتي هيچ.
اي قابل أهل الحُب شحصلوا
وصل البسمار
مو مثل إلى ابالك
هو شنو الحب تاكل نعل اهواي واما هو يطيح حظ البنيه
أما هيَّ تطيح حضه ويبقون يوم حلو عشرة متعاركين
هو هذا الحب عليمن خابصينه بي، شوفي آدم هسه
حظ حظه طايح، لا يقبل يتقرب الها ولا يقبل تتقرب اله.
باوعتله بأستغراب
شنو آدم يحب؟
اي، ليش ماتدرين
لا منو
مرحة بيت عزام.
فتحت عيوني
صفااا.
اي وعرفت بي يشرب وصايرة بالنعل بينهم
سكتت بس والله اتفاجأت آدم وصفا ولا لاحظت هذا الشي عنده
هاي ايفان إذا تعرف صدگ تتخبل وهيَّ حتى أسم آدم واشمته بأيدها.
وصلني للبيت فتحت الباب انتظرني حد مادخلت وراح
وگفت يم باب المطبخ انزع بحذائي أستغربت امي مو من عادتها ما تتلگاني
رفعت راسي اريد أصيح الها جمدت بمكاني من شفت وارث گدامي.
ريم: أنتَ شتسوي هنا
وارث: ليش مايصير اجي.
ريم: طبعاً ما ايصر شكو جاي إذا مخربط بالعنوان
بس اطلع من الباب اكو باب گدام بابنا هذا بيتكم
رحم الله والديج لأن جنت مضيع
يله اتفضل روح
اطرديني؟
ضربت رجلي بالارض دخلت جوا وينن امي شلوون سمحتله يدخل هنا
شفتها طلعت من الغرفة رحت عليها
ريم: يوووم وارث شيسوي هنا
نجاة: يريد يسكن ويانه هنا
شنووووو خو ماكوووو شي.
سمعت صوته ورايَّ درت عليه
ريم شووووف خليها ابالك ما راااح اسامحك.
لووو تنصب خيمه گدام البيت العمر كله، گعدة هنااا ماتگعددد
وهسسسه راح اخابرر عميد الدين وجدي عليك يتصرفون وياك.
دخلت للغرفة ادور على جهاز امي حد مالكيته خابرت عميد الدين
ريم: الو عميد الدين فدوة تعال للبيت
عميد الدين: شبيچ بابا ليش صوتج يرجف هيچ
ريم: هذا وارث هنا ويريد يگعد ويانه شنوو هيَّ بكيف
مزاجه شوگت ما ايريد يجي وشوگت مايريد يروح
جايج بنيتي اهدأي.
سديته منه، طلعت ملابس إلى بدلت بقيت بالغرفة.
حد ما سمعت صوت عميد الدين، طلعت شفته گاعد
و وَهج وياه وامي و وارث هم موجودين
عميد الدين: يُبا شمالك أنتَ مو صارلك أسبوع طالع
وگلت ماترجع اله وأنتَ متخلص من حالتك
وارث: لا تدخلون شي بيني وبينها.
وَهج: البنيه ما أتريدك تگعد وياها بنفس المكان
هيَّ طلعت من بيت جدي علمود ما اتشوفك وترجع اله
وارث: ودام هيَّ ماتقبل نتفاهم راح ابقى وراها حد ما تفهم وتسمع مني.
عميد الدين: جدي اليوم راجع اذا دره اتصير موخوش وهوَ محمل عليك.
ريم: يوووم أنتِ ليششش ساكتة
نجاة: حچيت إلى عندي وياه وهو فهم كلامي بقت بينكم
ريم: اني اريد اطلگ
وارث: تحلمين.
ينرفزني بكلامه يحرك بدمييي حرررك ضحكت بنص قهري رفعت ايدي احچي.
اگلك أنتَ خاف مصدك نفسك زوجي هو علاقتنا كلها تخطيط
وهسه خلي ننهي هالتخطيط عليمن شاد حيلك هيچ
نزلت عيونه على ايدي نفس دكتور مناف
ليش مالابسة حلقتچ.
عميد الدين: هيَّ ووين تحچي وانتَ وين تحچي شبيككك آدم إلى يكبسل مووو أنتَ
وارث: عميد الدين أنتَ اخوي واحترمك هذا الموضوع
بيني وبينها اني أحله، غلط بذر مني اني اصححه عوفوني وحدي لا تدخلووون.
ريم: لااا يدخلوووون ويشووفولك حل انيي ما اررريدك
وارث: ميخالف
عميد الدين: گوم ويايَّ عوفها هالفترة تهدأ بعدها مابارد گلبها منك
وارث: اي عادي اني هم گلبي موجر تبرد گلوبنا سوا.
كلنا سكتنة من صوت واحد يقترب منه هذا صوت آدم
منين دخل هذا مووو زلم قرودة وحق الله
آدم: أدوس على المنية
واهز الغاظرية
أصيح بصوت أرجف الموت
أشده بچف أيدية.
عميد الدين: منين دخلت أنتَ.
آدم: طفرت من السياج چا دگيت الباب محد سمعني.
اجه گعد يم اخوانه، كلهم گاعدين إلا أني واگفة خاف صدگ يسويها ويعيش هنا
آدم: الله بالخير چاي كهوة شنو هل الاستقبال
وَهج: دسكت غير صايرة الحرب العالمية هنا
ام سَند العلم الحية.
انيي حية آدم
كبيرررة الحياية
خوش بعدين نتفاهم حالياً الوقت مو مناسب.
ريم: انييي راح ادخل جوا، اذا ماتاخذون اخوكم ارتكب بي جريمة
آدم: شدعوة عليچ كواكب
ريم: كواكب منووو
وحدة لا بكه
احترررررررم نفسسسسك
تم اسف.
دخلت للغرفة، دخلت و وَهج وگفت تتفاهم ويايَّ
وَهج: ما اگلج سامحي لا غلط وغلطته مو سهل الشخص
يسامحه، بَس اسمعي اتفاهمي وياه اتعاتبوا العصبية والعناد ماينفع
ريم: شنوو مبرره ونتفاهم راح يگول اي غلطت.
وطلعت وعفتچ علمود ما أذيج هذا كلامه.
تمام اسئلج سؤال، أنتِ يعجبج تعيشين ويا شخص بكل حركة منچ يشك بيچ
لا
اجت گومتني من مكاني اخذتني بحضنها
معناها افهمي امي، هو الرجال اتعرض الصدمة صعبة
شخص سنين أخذ عليه نظره وبعدين يطلع غير عن كل الأفكار
الي ابالك شتنتظرين منه ياخذ قرار صحيح وهو بنص هل الصدمة
چان يگدر يأجل هذا الزواج أو يلغي كله
ماياخذ قرار صح مستحيل وهو هيج حالته لا تنتظرين.
من شخص يتصرف طبيعي وياچ أو ياخذ قرارات صحيحة.
هوَ تزوجني علمود يبين الها ماتوگف حياته عليها
لا حتى عميد الدين أگدلي هذا الشي وارث مو نذل لهلدرجة
خيووولييي الحقيررر
لا عيب مو اخلاقج هاي ريمه
إذا يبقى هنا ما اضمن الكم ارتكب جريمة بي
عاقبي بالي يعجبج من حقج
هسه أنتِ ويايَّ لو وياه
وياكم اثنينكم، لأن اثنينكم من حقكم واثنينكم عندكم غلط بس هو غلطه أكبر.
باستني براسي وگرصت خدي وطلعت بقتني وحدي.
صوت آدم يلعلع فتحت الباب زمخت بي
ريم: آدم كبسوولة شبيك فضحتنا
آدم: هذا ياهووو آدم كبسولة ولچ
ريم: احتررررم نفسسسسك ولا تگول ولچ آدم كبسوولة
آدم: اني اعلمچ ترجعين شني ماترجعين.
طبگت الباب بقيت أفتر واصواتهم بعدها تمدد بمكاني أنعس
غمضت عيوني أفكر أنتَ جبتها النفسك يا وارث أتحمل
الثواني وكمزت من مكاني على صوت صرخة امي والهوسة إلى صارت بنص البيت.