رواية وقار الغريب للكاتبة حوراء السعيدي الفصل الثاني والعشرون
ريم.
مشيت بخطوات ورجليَّ ترجف صارت أيدي على الباب
فتحته طلعت أباوع، وارث واگع بين ايدين عميد الدين وآدم
مالحگت انطق الحرف طلعوا بي يركضون وأمي جرت
عبايتها وطلعت وراهم باوعت ال وَهج الواگفة ووجها أصفر.
ريم: وَهج شبييي وارث؟
وَهج: ما ادري گاعدين انسولف وياه بخصوص
موضوعكم و گام يشرب ماي بدون سابق أنذار اتخربط
ريم: خاف ضغط، اي اي اكيد ضغط.
وَهج: ما أتوقع حالته ماچانت تدل على ضغط.
لزمت جبيني دايخة أخذتني وَهج حاضنتني رفعت راسي الها
خاف بي شي وَهج
ننتظر يرجعون.
مرت الساعات واحنا ننتظر، اتصلت صفا على وَهج بَس ماحجت شي الها
اندك باب البيت طلعت أمشي سريع اكيد هم فتحت الباب
ب لهفة بس أنصدمت من إلى شفته گدامي
ريم: جدي عزام.
عزام: أي جدج عزام
دخل سد الباب مال الباب الخارجي حضنته نزلت دموعي
ريم: وينك أنتَ جدي
طبطب على ظهري بخفه
عزام: شبيها حبيبة جدها ليش هاي الدموع.
وارث.
شبيه ها الحيوووان سوووالچ شي
لا لا بَس أجه هنا واتخربط وأخذوا آدم وعميد الدين للمستشفى يمكن.
تغيرت نبرة صوته بعدني عنه لازمني بعده وملامحه تغيرت
اتخربط؟ ليش شبيه.
طلعت وَهج سلمت على جدي دخلنه جوا وهوَ يسئل بخوف عنه
مهما صار وغلطوا أحفاده يبقون أحفاد عزام إلى تعب عليهم حچتله وَهج كلشي صار.
عزام: وَهج ماخابرتي رجلج وين صاروو
وَهج: والله يا جدو ما اتصلت السبب انتم من ايصير شي.
ويتصل واحد عليكم، تطلعون روحه وانتم ماتجاوبونه
تخلونه يعشق بقلق نفسي، ننتظر يرجعون وانشوف الوضع أفضل.
ضل ساكت جدي ويذب ب الحسرات للمغرب دخلوا علينا
لازمينه والتعب كله مزروع اتلكاهم جدي حضن وارث
أبتسم وارث بادل جدي الحضن ويشم بي شم
وارث: ها حجي عزام مشتاقلي.
ضل جدي ساكت بس حاضنه ومغمض عيونه اجت أمي
وگفت يمي أشرلها بس اريدها تحجي شي ساكتة.
عزام: خلينه نرجع للبيت بوية
رفع راسه وارث يباوعلي نزلت عيوني كأنما.
ما مهتمة أسمع صوته حچه وياه
وارث: جدي اني باقي هنا
آدم: وارث شبيك خوية وضعك مو مال تبقى وحدك
رفعت عيوني ال آدم الحزن غاطي ملامحه عميد الدين
ساكت مانطق بحرف من أجو لحد الان.
عزام: وارث أنتَ ابني، بَس قرارك تبقى هنا مو مناسب وليدي
وارث: بالعكس يجوز أصح قرار أخذه بحياتي.
يحجي بتعب لزمه عميد أشرله بمعنى مابيه شي
عزام: عميد الدين شبيه اخووك؟
دك جهاز وارث گام من مكانه طلع أباوع الطوله.
يمشي مو بتوازن وذاك هو التعب واضح عليه بسرعة باوعت للولد اسئل جاوبني آدم
شبيه؟
مريض
بلعت ريگ وگلبي أحسه راح يوگف من سماع الجواب الكامل.
مريض؟
وچهه مطعون طعن أردف
صدگ لو گالو الوجع ما يحس بي غير راعيه.
وَهج: شنو السالفة ممكن تعوف الالغاز واتفهمونه
عميد الدين: وارث شكل عنده سكر مُزمن يعني صار عنده سكر.
أتشخصت عيوني على عميد الدين وكلامه سكر؟
عزام: شتحچي بوووية سكر شنو؟
عميد الدين: چا يُبا المر بي سهل؟ لو قهره إلى ضامه بگلبه خلينه ساكتين أحسن.
طلع عميد الدين من يمنه وآدم طلع وراه جدي هم لحگهم
بقيت واگفة من صدمتي ردت فعلي چانت جامدة حتى الكلام صرت أستصعب انطقه.
گعدت أمي مقهورة وأسمعها تحچي
نجاة: سوده بوجه العدو يا عمه بعدك بعمر الورد وينك وين السكر
وَهج: عمه متأكدين سكر؟
نجاة: أي والله يا أم سَند سواله الدكتور تحاليل
وسئل وارث عن ألاعراض واتأكد بعد ماطلعت التحاليل.
بقت أمي اتسولف ويا وَهج واني بعدني تحت تأثير صدمتي
شنو معقولة بسببي، لا اني شعليه هو قهره وصدمته من حبه الأول
بقيت ساكتة وأستمع لأصواتهم حد مادخل گال ال وَهج
وارث: ام سَند خوية جدي والولد راح يروحون تروحين وياهم لو تبقين
وَهج: لا أروح خوية ابني هناك وحدة.
ودعتنه وَهج وراحت، عفته هوَ وأمي ودخلت للمطبخ
صرت ششوف گدامي اغسله حتى لو نظيف أذن وخلص ومرت ساعة
واني بعدني بالمطبخ، دخلت أمي تباوعلي.
نجاة: شبيچ ريمه ليش گاعدة هنا
ريم: دا انظف
نجاة: وشعندنه تنظفين، گولي ما أريد أنجمع وياه بمكان واحد
ريم: لعد زين من تفهميني.
كتفت أيديها و وگفت گبالي
تبقين هيچ لا تتفاهمون ولا تنطون لرواحكم فرصة
فرصتيش يوووم لا تخليني أفقد عقلي فدوة
وارث راح يبقى هنا
وشسويله يعني، هوَ بغرفة واني بغرفة وعليكم السلام فضت وراحت.
باثناء ماجاي نحچي اندك الباب راحت طلعت امي أباوع.
من شباك المطبخ خالة سلمى وزيد وأكرم جايبين جنطه وياهم رحبت بيهم
بقيت هم معاندة أطلع، بقوا ساعة وراحوا دخلت امي
رزلتني ما بينت الها مهتمة الشي بس گلبي نار مشتعلة بي.
طلعت من المطبخ شفته واگف لازم الجنطه باوعتلها
مبين بيها أغراضه سواها صدگ يبقى هنا دخلت الغرفتي
سحبت ملازمي وكل شغلاتي إلى أدرس بيها گعدت مرجعه
ظهري على الحايط ومخليه مخده وراي بديت أدرس.
حد ماوصلت لفد مادة صعبة بشكل حاولت وحاولت.
ماگدرت أفهم شي منها، ودموعي جانت تريدلها عذر
نزلت دموعي، أندك باب غرفتي، حچيت
من بين دموعي
ريم: عوفوووني وحدي
راح الصوت وأنفتح الباب رفعت راسي شفته وارث باوعتله بحقد.
وارث: ليش تبچين؟
ريم: شعليك يا أخي لااا تدخل.
دخل سد الباب بقى واگف بمكانه و مُستمر يباوع نظراته متمركزة ناحيتي
گدامك مهرررجان ودا اتباوع
لا شي أفضل
ديلا خوش
ليش تبچين برنسس؟
مجرد گال هيچ أنفجرت ابچي افشل امدايه اجه يريد يلزمني دفعته.
لاااا تلزمنيييي
اوكي ما الزمچ، بَس فهميني ليش هذا البچي
مااالك علاقة بيَّ، أفتهمت لو لااا.
الثواني ذكرت مرضه، ومريض السكر لازم يكون دائماً
بعيد عن الشغلات إلى تولد عنده عصبية ومغثة سكتت
راسي بين رجليَّ واشهگ حاول وحاول بس يريد يعرف شبيَّ ماحچيت.
وبعدين ريمه ماتسولفيلي شبيچ
ليش أنتَ يهمك؟
أكيد لو ما يهمني ما اسئل
چذب وبلاش ليش اسئل أصلاً
رحم الله والديج.
عدلت گعدتي رجعت لزمت الملزمه كل ما أشوف المادة.
ترجع تنزل دموعي أكثر، أنسحبت الملزمه من أيدي رفعها
يقرأ بيها طابك حواجبه يقرأ وثانية يرفع حاجبه وثانية يطبكه نزلها بعد ما كمل گال
وارث: تبچين من هالمادة؟
ريم: أي، والله صعبة
وارث: مو گايلچ من تستصعبين شي تجين ألي
ريم: أرسب احسن ولا أطلب مساعدتك.
لازم كرامتچ ماتسمحلچ
طبعاً
تسمحيلي أساعدج؟
لا، وجيب ملزمتي اقرأ
شلون تقرين وأنتِ ما فاهمه بوية.
مديت أيدي اله أريده ينطينياها والشهگة بصدري بعدها
انطينياها.
أساعدج واني بعيد عنچ شتگولين؟
لااا
عوفي العناد هسه
گلت لااا
كارهتني لهلدرجة برنسس؟
اووو ماكو مقياس لهذا الشي
ماشي ريم.
حط الملزمه گدامي وطلع، هزيت بأيدي بنص دموعي
اماني إذا اسامحك بسهولة، إله اطلعلك گلب ثاني أردلك أذيتك وحدة بوحدة أصبرلي بَس.
رجعت اندمجت بقوقع دراستي والمافاهمته عصرت عقلي عصر
وكل شويَّ ضاربه راسي علمود يشتغل من كل عقلي
الي بچيت منه كلشي مافهمت منه لو هسه اضرب راسي بالحايط.
ما يفيد گلت أخلي سُرى باجر تفهمنياه لعد بس اني افهمها من ماتفهم.
تمددت بمكان نومتي مثل كل يوم غمضت عيوني
بسرعة غفيت من التعب بس قهري ما أنكره بداخلي
هوَ شنو السكر عبالك سرطان يبقى ياكل بالجسم اكل
اجذب والله اجذب إذا اگول ما متت بقهري من سمعتهم گالو مرضه هذا.
النص الليل گعدت شفت أمي نايمة بصفي اكيد
هوَ نام بغرفة الضيوف أو بالصالة، رجعت نمت للصبح
فزيت أمي ماموجودة، گعدت بدلت ملابسي رفعت شعري.
بعد مامشطته، طلعت وعيوني تدور عليهم شفتهم بالمطبخ گاعدين
رحت للحمام غسلت ورجعت دخلت يمهم
ريم: صباح الخير.
ردو عليه هوَ وأمي، هوَ مبدل لأن دوامه كله صباحي
وگفت يم أمي اساعدها، أمي گامت تخلي شكر بالكلاصات
ما ادري نست يمكن كثرت طلعت اتشوف الماطور
سحبت واحد من الكلاصات شلت منه الشكر بقيت قليل
طفيت الطباخ و صبيت الچاي حطيت گدامه نفس الكلاص
والامي وألي گعدت گباله اتريك ساكتة رجعت امي گعدت هم تتريك ويانه.
وارث: كملي ريوك علمود تجهزين نفسچ نطلع
ريم: نعم؟ وين نطلع
وارث: أتوقع انتِ طالبة جامعة وعندج دوام
ريم: اني آدم لو زيد ياخذوني
من اليوم اني إلى أخذج وأرجعج
ماله داعي
مرتي ومن واجبي.
قلبت عيوني بملل
صاحب واجب الله يحُفظك.
نجاة: يله حبيبتي اتريگي وبدلي لا تتأخرون
ريم: اوووففف
وارث: سلامتچ من الأووف
رفعت عيوني خزرته، أكلت وكمت دخلت بدلت
وطلعت واگف برا طلعت گدامه سيارته يم بابنه اخذها.
بالجديد قبل زواجه لأن هو سيارته ماتفيد
من صار الحادث.
صعدت وره ضل يباوعلي، رفعت حاجبي عناد بي
ماحچه شي وصعد بمكانه طلع من الفرع مالتنه
وارث: حفظتي المادة إلى البارحة تبچين منها
ريم: طبعاً قابل يصعب عليَّ شي
وارث: متأكدة حفظتيها
ريم: مثل ماشايفتك.
وأنتِ هم اتشوفيني؟
لا
مو اگول كل هذا الحقد واتشوفيني يرادلها بخت.
درت وجهي للجامه أباوع للناس الطريق كله ساكتين
حد ما وصلني للجامعة نزلت نزل گدامي
وين نازل؟
بيها اشكال؟
دا ارد عليه وفات دكتور مناف بقى يباوعلنه دخل الداخل الجامعة
وهوَ عيونه علينه يتلفت، أستداريت ال وارث
هايهيه وصلت وارث تگدر تروح الدوامك
انتبهي النفسچ
هزيت براسي بَس أريده يروح صعد بسيارته وراح
دخلت للجامعة وسُرى صارت دخلتها ويايَّ هم ضلت تباوع وره سيارة وارث.
سُرى: هذا زوجج مو
ريم: اي
سُرى: چنه مصنع چكليت
ريم: احترررمييي نفسسسچ
ههههههه تغار على زوجها
انجبي سُرى أمشي ندخل.
دخلنا سوا للقاعة مالتنه، بگد حبي للدوام والقسمي
هالفترة لو بيدي ما اداوم من الضغط إلى عليَّ
اگلج ريم
گولي
هو مو چانوا اخوانه يجيبونج
أي وهسه هوَ
هاا زين اگلج ما گلتيله علمود الجهاز
يمعودة شگد لحيتي بالموضوع ترا اني مو من النوع
الي 24 ساعة على الجهاز لو ابقى العمر كله بدونه عادي.
اني علمود نتواصل مرات نحتاج بعض شبيچ.
سكتت عنها صارلها فترة تلح بهذا الموضوع شرف اخوها.
أول محاضرة و وچهه مايگصه السيف بدأ يشرح وبنص المحاضرة
كمزنا من عاط بطالبة موجودة وماندري عليمن وليش عاط وطردها ماخلاها حتى تحچي
مناف: گوووومي أطلعيي براا.
طلعت الطالبة، والطلاب تحسهم حتى النفس حبسوا حبس
رجع يشرح وكل شوي مرزل واحد، باوعت
ال سُرى
مدنگه على ملازمها ومبينه ماقابلة على تصرفاته
طلعت ارواحنا بين ماكملت محاضرته وطلع.
ريم: هذا شبيه اخوچ الرايح ولجاي عايط بي هيچ راح ينكره.
سُرى: والله ما ادري ريم صاير أعصاب حتى بالبيت هيج من اتوفت امي لليوم.
ضلت اتسولف عنه شلون عصبي وصاير مايتحمل
حد ماصرنه نكمل بالمحاضرات دز عليه بدون ما اناقشها ولا اسئلها رحت اله.
دگيت الباب اجاني صوته يسمحلي بالدخول دخلت گاعد بمكانه
ريم: اتفضل دكتور
مناف: تعالي ريم أگعدي.
يمكن كسرة وارث ألي خلتني انسانة غير عن قبل حتى الخوف
والتوتر إلى چان يحاوطني من يدز عليَّ اتبخر گعدت مثل ماگال ساكتة.
ذب القلم إلى بأيده رفع عيونه يباوعلي
مناف: شلونچ
ريم: تمام دكتور
مناف: مرتاحة؟
ريم: من أي ناحية؟
زواجج
العفو دكتور بس اتوقع هذا شي خاص
جاوبيني ريم عدنان.
ليش هذا سؤالك دكتور
گولي مناف، ماكو أحد هنا
عفوًا؟
الي شفته الصبح وياچ زوجج؟
أي
تحبينه أنتِ.
نهضت من مكاني ضايجة من اسئلته مو من حقه يسئل
دكتور اترخص منك واتوقع اسئلتك كلها شخصية وغلط تنسئل
انطيته ظهري أريد اطلع أستوقفني كلامه
من گال.
مناف: إذا ماتحبينه وزواجج وراه شي وفترة وتطلگون مستعد انتظرج.
أنصدمت بكلامه، درت عليه
دكتور رجاءً انتبه الكلامك
اليوم من شفتج وياه ماحسيتج قابلة بالزواج هذا
لا تحكم من المظاهر وأنتَ ماتعرف عمق الداخل
يعني تحبينه؟
زوجي.
ريم
اتفضل.
عصر عيونه ونزل أيده يباوعلي
والله حبيتج ورايدج إلى ليش رحتي اتزوجتيي؟
اني ما اناسبك، والي اتزوجته ابن خالي هسه اترخص
منك واتمنى بعد ماتدز عليه وتحجي بهذا الموضوع.
اكيد سُرى وصلت الك الكلام الدا يطلع وما اتوقع إذا وصلت الزوجي يسكت عنه.
طلعت من عنده اسب بكلشي، رجعت للقسم بين ماكمل الدوام
طلعت بس اريد ارجع للبيت، شفت وارث هستوا واصل
صعدت بدون أي كلام رجعنه للبيت ساكتين نزلت عفت الباب ورايَّ مفتوح
دخلت للبيت امي بالمطبخ سلمت دخلت كبل للحمام قفلته
گعدت أنفجرت، تعبت، اختنگت من الوضع كله أريد احس بالراحة بيوم.
تعبت من كلشي أشهر وأشهر مرت واني نفس العذاب.
كابوس أحسه أريد اخلص منه شنو ذنبي وهيچ اتعاقب
فتحت ال مي اشهگ وابچي بگلب مفرفح تفرفح
اغسل ودموعي مستمرة تنزل رفعت راسي للمراية عيوني صايرات دم من البچي.
غسلت نشفت وچهي فتحت الباب وطلعت أمي بعدها بالمطبخ
وهوَ ما أله أي أثر، دخلت للغرفة أبدل نزعت الحجاب
فتحت دگم القميص الاولى رفعت راسي للمرايه شهگت
من شفته واگف ورايَّ، حطيت ايدي على مكان الدگم.
ريم: شتسووووي هناااا
وارث: كملي ليش وگفتي
ريم: ادبسزززز.
وارث: رحم الله والديج.
رجعت دكمت الدكم كعدت لفيت روحي بالغطى وگلبي يريد يوگف من الهبطه.
شبيهن عيونج
مابيهن شي
ريمه
شترررريد عووووفنيييي بشرررر يكرررهك عوووووفه بحاله.
گعد قريب عليَّ
شتريدين بالضبط
الطلاك
غير الطلاك لأن ما اگدرله
تگدر والله قبل جنت تخاف تطلگ وجدي مايخليك
تتزوج إلى تريدها هسه كلشي تغير تگدر.
نزل راسه يلعب بأصبعه بالخاتم إلى لابسه بأصبعه بالأيد الثانية.
هوَ ياريت بذاك اليوم سامع نصيحة جدي چان ماصار إلى صار
گالي راح تتندم بأختيارك وحچه اهوواي بَس ماچنت مدرك الكلامه
وصدك اجه اليوم إلى أتندمت بي گد شعر راسي لأن ما خذت بكلامه.
وارث
أمري برنسس
خلي نتطلگ، تعبت والله، تعبت من هذا وضعنا خلي كل شخص بينا أيشوف حياته
اتريدين الطلاگ؟
اي
من كل گلبچ
اي.
أتقرب أكثر بحذر مني حضن وجهي بكفوف أيده
تعبتج مو
اهوايَّ تعبتني وارث
واني تعبان
شسويلك يعني انتَ جبت التعب النفسك.
ليش ماتباوعين بعيوني
بكيفي وردة.
برنسس
اسمي ريم
امم شوگت تصيرين عاقلة ونتفاهم
مايحتاج
تريدين تعذبيني
تستاهل.
شوفي برنسس طلاگ ما اطلگ وإذا ابالچ تعذبيني ما أنعز عليچ
أريد اشوف حياتي
شوفيها منو لازمج.
رفعت عيوني، التقت نظراتي ويا نظرات عيونه
اريد أشوفها ويا شخص رايدني ويحارب علمودي.
أبتعد عني وگف سكت الثواني گال
أنتِ تحبين أحد؟
أي.
أباوعله اعتلت الصدمة ملامحه وعيونه أتشخصت عليَّ.
منو؟
شخص
ومنينننن عرررفتييييي.
ارض الله واسعة.
أباوع الأيده صارت ترجف وشفايفه انقلبن بيض كمزت من مكاني بخوف
ريم: وارث شبيك
عفته طلعت اركض ادور على جهاز السكر إلى جابوا البارحة وياهم شافتني امي ضلت تسئل
نجاة: شبيچ ريم
يووم وارث ما أدري شبيَّ
راحت أمي اله واني ادور على الجهاز حد مالگيته
رجعت اله وبعده نفس وضعه أيدي ترجف اتخردلت
من شفته بهل الحالة اخذت امي الجهاز مني تقيس سكره.
وگفت بمكاني اكل بأظافير ايدي مو بيدي والله مو بيدي.
اني هم انسانة ما اتحمل كلشي ما أگدر اتحكم بأعصابي بكل الاوقات
نجاة: سكره مرتفع خابري اخوانه ريم
ريم: ليش الدكتور ما واصفله علاج؟
نجاة: مارضى وارث كله اني ألتزم ما اريد العلاج.
ردت أطلع حچه بتعب
وارث: لااا تخابرين أحد
نجاة: ولك عمه ماتشوف حالتك لااا تمووت
مارد عليها
ريم: يوووم عوفي.
ضلت تباوعلي بتعجب، عافتنه وطلعت اتقربت اله
سندته تمدد على السرير غطيته بلكي من يرتاح ينزل
أبتعدت اريد اطلع لزمني من معصم أيدي.
وارث: وين رايحة
ريم: أشوف امي
وارث: أبقي
ريم: ارتاح وارث، هسه اجي اني.
طلعت اخذت جهاز امي خابرت عميد الدين سولفتله عن وضعه
عميد الدين: مايقبل يخصصوله علاج
ريم: لعد يبقئ هيچ مو زين ممكن لاسامح الله وضعه يتأزم أكثر
وينه هسه
عفته يرتاح
إذا ماصار زين منا لساعة خابريني اجي أخذه.
سديته منه گعدت لازمه راسي باوعت النفسي بعدني بملابس الدوام گعدت أمي يمي
نجاة: رجعتوا تعاركتوا
ريم: نقاش.
نجاة: ريمه انتبهي لا يروح بيها الرجال
ريم: وهم لازم اتحمل ليشش اني شعليههه
شبيچ يمه صايرة كلشش وين ريمه بنيتي إلى اعرفها
ماتت يووم ماتتت.
رجعت اله أشوفه التناقض إلى اني بيه بحياتي ماعاشته
شلون صرت؟
أحسن تقريباً
تمام
سحبت ملابس إلى رجع صاحني مشيتله لازمه نفسي ما اجفص
إذا هالمرة سكره ارتفع يمكن إذا احجي بعد يروح بيها.
ريم: هاا عيني
وارث: وين رايحة.
رفعت الملابس گدام عيونه
أبدل
بدلي وتعاي
ليش؟
تگدرين؟
لا ما اگدر.
هز براسه وغمض عيونه بدلت ملابسي بالحمام
گعدت بالصالة دايخة بزماني، اتمنى يوافق على
الطلاگ وكل شخص بينا يروح بحال سبيله
وَهج.
مرت فترة وجاب غرفة جديدة عميد الدين من تصميمه، وغرفته القديمة
أتبرع بيها لناس تستحق التبرع اهوايَّ شغلات انطاها
بس بقت أبالي اللوحة إلى بيها صورة دُنيا وينها
ماموجودة بكل الغرفة وأحس بأحراج اسئله نقلت أغراضي
للغرفة بس بجنطهم بعدني ماحاطتهن بأماكنهن.
دخل يخابر نزلت عيونه على أغراضي ورجع يكمل بمكالمته.
سده واندار ناحيتي
عميد الدين: ها يُبا كملتي
وَهج: لا بعد، ما أدري وين اخلي شغلاتي
عميد الدين: غرفة شكبرها گدامچ وحايرة
وَهج: نتفق؟
عليمن
أنتَ شگد تحتاج مساحة لاغراضك علمود اعرف اني هم.
أبتسم واجه يمشي لابس تيشيرت نص ردن أسود
والساعة مزينة أيده وگف گبالي
إذا تريدين أخذي الغرفة كلها
هههههههه لا هيچ اهوايَّ، بس صدگ گول شگد تحتاج.
صفن بالكنتور إلى گدامنا دغيته بأصبعي بكتفه
صفنت
أوگفي يُبا غير أفكر الها صح
حتى بهاي تفكر
عندي أقتراح الچ توافقين بي
أطربني
ملابس الطلعه نحطهن سوا، وملابس البيت كل واحد بكنتور شگلتي
والكنتور جبير سويته شگلتي أم سَند.
تعرف شي عميد الدين
شنو
أحسك تعشق شي اسمه تفاصيل.
ضحك ويهز براسه
كلش
حتى عندك تركيز ببعض الأمور إلى الشخص ولا يركز بيها
أو يهتم الها ويشوفها ماتحتاج كل هذا من التركيز.
هسه شگلتي أم سَند، خاف بيوم من الايام كلمن
يروح بطريقة عاد بينه ذكريات وتفاصيل حلوة
فكرة حلوة
طلعنا ملابسنا أستمتعت بالوقت وماحسيت بي وياه
بگد ما رزن وثكيل ويدقق بكلشي اله طبعه مرح وحَلو مو معقد.
باوعت الملابسه كلها مضروبه كوي شفت اكو دشاديش ضحكت
تلبس دشداشة واو
مو دائماً بالاكثر من اتصير مناسبات
اشوف مرات مقاطع لابسينها بيهم حلوة وبيهم لا
عندج آدم لو تموتينه مايلبسها يتخبل منها.
رفعت الملابس اعلكهم بالتعاليك إلى داخل الكنتور
ومندمجه وياه انسولف، توزعت نظراتي بارجاء الغرفة كلها
اللوحة ما الها أثر وين اخذها، رجعت اكمل بشغلي حد مارتبنه كلشي
ملابسنا مال الطلعة صارت بخانه وحدة تصير بالنص جبيرة
وباقي الملابس اتوزعت بباقي الخانات.
رحت الميز المرايه اجه شاركني هم يرتب ويايَّ
عميد الدين: كلشي خلي مُشترك لا تعزلين شغلاتي عن شغلاتج
وَهج: يمكن تشتبه بعطورك ويا عطوري.
لا ما اشتبه سوي مثل ما گتلج علمود أحس اكو أحد مشاركني بالغرفة.
عيوني تراقبه يشتغل بكل حماس ويرتب بترتيب مدروس حد ماكملنه
تعبتك ويايَّ
تعبچ راحة يُبا
ألتفتنا اثنينا على مصدر صوت تكسير طلع عميد الدين يركض
جاي الصوت من جوا نزلت وراه، اتوسعت عيوني من إلى شفته.
الصالة مكسر شكو بيها وآدم أيده تجري دم جدي يصيح عليه
وصفا لازگه نفسها بزاوية ودموعها تنزل باجي نادية لازمه.
آدم الصاير بركان هيَّ وأمه راحت زينب اخذت صفا حاضنتها.
عميد الدين: شبيك آدم؟
آدم: فهمووووها ماااا اتعااالج لااااا تبقى تحچييي بالموووضوع.
أردفت صفا من بين دموعها وكأنما تگلك ما أستسلم لو هسه تمدني هنا جنازه
صفا: غصباً عليك تتعالج مووووو بكيفك.
آدم: خرررررب سكتوووووووها
نادية: كاافي صفا ماما.
تأشرلها على حالته وهو واگف يرعد علينه رعد بصوته
سحبه عميد الدين گعده صب ماي يغسل بوجهه.
وآدم عيونه بصفا يخزر بيها وتخزر بي.
صفا: لااا تخزرر لا عبالك اخاف ما اخاف بَس من إلى خلقنييي
آدم: عميد الدين سسسكتهاااا
عميد الدين: كافي يُبا فضحتونا.
گعد الكل وهنا جدي صدمنا بكلامه من گال
عزام: اكو ناس جايين يخطبون صفا مني.
فلت وجهه آدم، وعميد الدين ضل يباوع
ال جدي مستغرب
آدم: شنو خطابة؟
عزام: يگولون شايفينها بعرس وارث والمرة جايه حاجيه
ال امك يريدون يجون يتقدمون رسمياً الها.
وگفت صفا بكل ثقة تجاوب.
صفا: إذا الولد عجبني ليش لا خليهم يجون.
حجت هذا كلامها وطلعت وآدم كام يفور فور ساكت وجهه انقلب قلاب
وما يگدر يحچي شي لان مو الكل يعرف بمشاعره اتجاه صفا.
نهض من مكانه طلع طلعت وراه صعد بسيارته وطلع من البيت
دخلت الصفا رگعت الباب بقوا
وَهج: شنووو إلى براسج
صفا: لا تخافين كلشي خطة علمود نخلي يتعالج
وهاي خطتي وخطة جدي وباجي سلمى ويانه
وَهج: جدي يعرف ب آدم يحبج.
صفا: اني سولفتله كلشي ترا هذا آدم ما راح نگدرله غير بالحيل والخطط.
شراح ايصير يعني
انتظري
لا تلعبين بمشاعره صفا
وهو لأن ما اريد العب بمشاعره سويت هذا الشي
آدم صعب
تحملنا الاصعب وان شاء الله هذا الشي هم اتحمله وانجح بي.
چانت تحجي ومنطيتني ظهرها صوتها مختنگ
الواضح صرتي مثل ريم
ليش شبيها ريم
أتحب وارث وماتعترف بهذا الشي
هههههه مو الهلدرجة يمكن ريم و وارث بيهم مجال بس اني وآدم لا.
صفا
هاا.
إذا حبيتي ماراح اوگف بطريقج
أستداريت إلى وجها صاير احمر بگد ماخانگه عبرتها واعصابها.
مافهمت
لزمت ايديها.
أحفاد عزام مو مثل الباقين إلى يحبونها يفدونها
بعمرهم وروحهم إذا بيوم حبيتي آدم اتأكدي هوَ
راح يحارب علمودج بشرط أنتِ تحاربين وياه
شيحارب وهوَ كل ما افتح موضوع العلاج وياه يتخبل عليَّ
تحجين وياه بهدوء لو بعصبية
بهدوء والله واحاول أوصله الفكرة بس مايقبل
ابقي تحاولين واتشرحيله الموضوع ووصليله الفكرة.
أريد أتقرب وما أريد، وَهج اني خايفة من ابوي عوفيني اني هوَ خاف يأذي.
يعني بكلامج هذا جاي تفهميني اكو مشاعر
هاا ما ادري لا لا ماكو بس أحس بمشاعر متناقضة وياه
اخصمها الچ، اذا نيتج تعالجينه فقط، لا تأملينه بيج.
طلعت من يمها عفتها بأفكارها، يمكن ما أشوف احد مناسب
الها أكثر من آدم بس بنفس الوقت إذا مايتعالج اختي
مستحيل تتقبله اعرفها، صار بوجهي عميد الدين
عميد الدين: حچيتي وياها.
وَهج: اي، كلشي خطة متفقين عليها جدي وباجي سلمى وهيَّ.
والله شكيت بالموضوع بس گلت اتأكد
راح توگف وياهم؟
إذا اختج تگدر على اخوي وتخلي يقتنع يتعالج ليش لا
اني اخاف من عصبية آدم
مايأذيها، يأذي نفسه ومايأذي صفا.
نزلت عيوني أفكر بموضوعهم رفعت راسي من گال
وَهج
هاا عميد
شو صاحب للثام إلى چانت تحچي عنه شذى بعد ماسمعنه اله حس
هو جان يجي الشذى، وشذى طلعت منا بعد ليش يجي.
لا اني ولا اخواني انسوي هذا الشي منو تتوقعين يكون
يمعود شذى تهلوس تلگاها مو هذا احنا عايشين هنا ماشفنه شي لو صار بينا مثلها.
ههههههههههههههه
مد ايدي الاثنين يكرص بخددودي خلاني بنص تعجبي
اخخخ منج ومن تمثيلج تمشينه على الكل اله على عميد الدين.
يااا
وداعت اليااا
تمثيل شنو، شنو هل الاتهامات
ويلي واتهامات
هسه شبيك أنتَ سئلت وجاوبتك
خوش تعاي ويايَّ اريد اشوفج شي.
صعدت وياه الغرفتنه كتفيت ايديَّ وهو فتح جهازه حطه بوجهي
عضيت شفتي واخفي توتري، التصوير چان بي تصوير مصورني
واني اطلع من غرفة شذى وأبوي ملثمه وبنص الدرج نازعه للثام وهنا طالع وجهي كله.
وَهج: يااا اكيد فوتوشوب هذا
عميد الدين: طلعتي أنتِ الملثم إلى خالس المرة ليلة
وَهج: شبيك عميد الدين هذا فوتوشوب اني من انام بعد ما اگعد
عميد الدين: بس هذا انا بنفسي مصوره لو غيري
اگول بي شك بس انا عميد الدين صورته.
يله شكو بيها حبينا نلعب وياها هيَّ ما تتحمل
تعترفين أنتِ الملثم؟
أي اني
والله وطلعتي مو سهلة
اليوم راح يندز خبرين الأبوي
الخبر الاول هذا الشي چان مستفاد براسه الخبر الثاني شنو؟
شذى وعيسى بينهم علاقة.
طبك حواجبه
مو الهلدرجة
مامصدگني مو
رحت اخذت جهازي فتحته شوفته المقطع نصه
مو كله ضلت عيونه متوسعة مامصدگ
مرت الاب ويا الابن استغفرالله دخيلك ربي.
ردت استخدمه ضد عيسى بس أنتَ سبقتني بخطوة وأخذوا عيسى
نرجعه
شنوو؟
نرجعه واستفادي براسه بالي يعجبج هسه إذا تدزينه
الابوج ماراح تستفادين منه بشي هو شذى طلعها منا
وعيسى يمنه ماتستفادين بشي
هم صدك، معناها لازم استفاد منه
ب عيسى.
شنو إلى ابالج انا جاهز
أگدر أشوفه
ماكو مشكلة
اريد أشوفه
بالليل نطلع اله، بالنهار العيون مفتحه
اتفقنه.
مشى باتجاه مكتبته الخاصة گعد بيها گعدت بصفه
أباوع الشغلة ما يشتغل اي شي إله واني موجودة وياه وانطي رأيي.
هسه هذا التصوير مال كبش الفداء الچان مستفاد براسه راح يوصل اله
منو صورة احنا ماصورنه شي
اكو من يصور.
بقيت اباوعله رتب كلشي ودزه على جهازه سوا صفحة وهمية
ومن خلالها اندز الفيديو الحساب ابوي كتبله جوا الفيديو ايامك صارت معدودة ودزه.
وَهج: عميد الدين
هاا غاليتي
الشغل يطول
حتى لو طول اله نهاية
يعني هم يجي يوم وارتاح
أن شاء الله
هسه الفيديو وصل الأبوي مو
اي بس بعده ماشايفه، ننتظر أيشوفه.
لليل جهزنه نفسنا وطلعنا التقي ب عيسى سابقاً أستغلوني
واليوم اجه الوقت إلى العب بيهم وأستغلهم ابتعدنا كلش
عن المنطقة والمنطقة إلى دخلنالها شبه مهجورة تخوف
عبارة عن ظلام حتى اضويه ماكو على أضوية الجهاز نمشي.
دخلنا انصدمت ب آدم موجود نازع القميص وبأيده جكارة
يسحب نفس منها ويطفيها ب عيسى إلى صراخة راح المكان
ذب الجكارة آدم من شافنه وسحب قميصه يلبس بي
اكو ولد وياه من شافنه طلع بس آدم بقى
آدم: شتسون هنا.
عميد الدين: أرجع للبيت أنتَ امي بالها يمك
آدم: هو راجع خلصت شغلي هنا
عميد الدين: اتحكم بأعصابك
آدم: والله الكيوت كبرت وصار تدور رجل تدلل
عميد الدين: آدم؟
فهمناااا
طلع من المكان الموجودين بي، اباوع للي گدامي عيسى
متعذب عذاب الكافر فتح عيونه والدم ينزل من حاجبه وخشمه.
عيسى: كلكم اتفقتوا عليَّ وكلكم راح تدفعون ثمن هذا الاتفاق
عميد الدين: اسمع اختك عندها الك عرض توافق بي
تطلع منا ما اتوافق تبقى مثل الچلب هنا.
جاب كرسي عميد الدين گعدت عليه أباوعله رغم عذابه
اله حقارته بعدها مستمرة ونظراته نظرات حقد اتجاهي
عميد الدين: راح اوگف يم الباب من تحتاجيني بس صيحي صوت.
طلع عميد الدين بقت المواجهة بيني وبين اخوي ابن امي وأبوي.
وَهج: قبل چنت اگول هم يجي ويستعدل هذا الشخص
هم يجي يوم وراح اشوف حنية الاخ على أخته
وافتخر بي گدام الناس، بس للأسف كل هاي الاشياء
چانت أحلام يصعب تحقيقها، هذا چان أملي بيك.
بس تغير كلشي من عرفت الحقيقة الكاملة.
عيسى: حقيقة شنو؟
نزلت دموعي ب أستِحقار، وتعَسف
وَهج: نعوفها للزمن هل الحقيقة، أريد اشوفك فلم يعجبك.
نهضت من مكاني فتحت جهازي والفيديو كله خليته ايشوفه
گام يبلعم وفاتح عيونه بكل وسعهن.
عجبك؟ شنو رأيك هم انشوفه الابونه هذا الفلم أكيد راح يعجبه
منين جبتي هذا، شلون صوررتيييي بنت الكلب
عادي الكلب إلى تغلط عليه نفسه ابوك ما اهتم من تغلط
منينننن جبتييي هذا الفيديو.
بعد احنا بنات الخدامة، عندنه قوة ودهاء كافلات اندوسكم جوا قنادرنه.
شذى گطعت علاقتي بيهااا من زماااان.
أفتريت وره الكرسي الگاعد عليه هو مربط.
اممم واگول شعجب لحد الان ماتدري بموضوع
الفيديو لأن هيَّ عندها علم، اثاري طلعوا ناهين علاقتكم الحميمه
شرررايده.
اش صوتك لا تعلي عليه. لا أخلي العُمدة أيشوف شغله وياك ولو مامقصرين وياك هم
مقوية ظهرج بي
زوجي بعد ونعم الزوج شلون ما اقوي ظهري بي.
راح اكسر روسكم وهوَ بظهري وين الگه هيچ زوج.
هههههه ومصدگة بي بعد، اذا جاي يساعدج مو علمودج
عنده مصالح يريد يستفاد براسج
عادي استفاد براسه ويستفاد براسي متعادلين هنا
لا تحاول تشككني بي، لأن مستحيل تگدر تلعب بعقلي
وهسه تسمعني كلش زين وتركز بكل كلمة وحرف احچيهن.
رجعت گعدت گباله
تطلع منا بشرط، تشتغل الصالحنا
احلام العصر بطليهن يا مطلقة
صرت متزوجة الملطقة دا كان زمان.
تبقين المطلقة ليش ذبوها ذبة الچلب علينا ومحد بحالچ.
ضحكت بصوت عالي وعيوني يحرگني مدمعه
الي ذبوني چلاب أمثالكم شنو الجديد.
ضل ساكت وعيونه تريد تهجم عليه
وَهج: تشتغل الصالحنا تطلع منا ما تشتغل تبقى هنا حد ما تفطس واتموت
الك يومين تفكر بيهن، اذا خلصن اليومين ومارجعت خبر
بعد تحلم اتشوف الشمس بحياتك والمقطع يوصل لجناب سيد الوالد وهو أيشوف شغلة وياك.
سحبت جنطتي وطلعت، عميد الدين واگف ويا الولد.
يحجون، رجع الولد فات من يمي مدنك مارفع شوفه
دخل يم عيسى اجاني عميد
عميد الدين: بشري
وَهج: انطيته يومين يفكر بيهن ويرجعلي الخبر.
أتقرب إلى بخطوات لزمني من حنكي ورافع الضوء مال جهازه على وچهي
شبيچ؟
اريد ارجع للبيت اشتاقيت الأبني
بس هيج متأكدة؟ شو أحساسي يگلي اكو شي ثاني مضوجج
ممكن ترجعني للبيت
عفته واگف صعدت بالسيارة طفيت ضوء جهازي.
رجعنا والطريق كله مختنگة لو مهما اصير قوية.
واتغير، تبقى فعلتهم ويايَّ وشلون أستغلوني وعذبوني
محفورة بنص روحي، وصلنا البيت جدي نزلت اريد ابني
الوحيد من أشوفه كل تعبي يروح فتحت باب الغرفة صفا
گاعدة لازمه جهازها تكتب ما ادري ويامن تحچي وسَند نايم بصفها.
نزلت راسي سحبت نفس من شعره ودموعي اخذت مسارها
صفا: شبيچ وَهج
وَهج: اشتاقيتله
بالعشاء يمج چان
حتى لو هم اشتاقله سندي هذا روح امه هذا
واني شنو ماتحبيني ترا والله اغار مرات.
أبتسمت بنص دموعي.
أنتِ بنيتي هم شعندي غيركم اني
تعاي احضنج
رفعت نفسي من سَند رحتلها حضنتها اهفي على وچهي اختنگت.
وَهج: شصار وياكم
صفا: خيولي هذا الازرگ يهدد عبله اخاف
اندگ باب الغرفة لبست صفا حجاب على راسها
صفا: هاي دگة عميد الدين رزنه مثله فدوة لله
وَهج: اثكلي، اخوه يحبچ
خيوولي ما أريده المُتنمر الازرگ.
رحت فتحت الباب صدك جان عميد الدين
هاا عميد الدين
عميد الدين: ضل بالي عليج
صرت زينة من شفت ابني واختي
خوش يُبا انا صاعد گدامج.
سديت الباب رجعت يم صفا گعدت.
وَهج: عيسى بأيد عميد الدين و آدم.
عاطت بصوت
صفا: عزززززززا
الشبشب وووينه
بالحمام يمكن.
كفختها على راسها
بسس مرة صيري جديه من احچي
اوكفي عقلي ضرب أيرو، شنو عيسى يم آدم وعميد الدين.
اني حچيت ال عميد الدين عن عيسى وعذابه النا قبل
بيوم ما رجع آدم سكران وشفناه صارت حديث بينه
وگتله اختي ماراح تتقبل اخوك والسبب هذا هيَّ عانت من هذا الشي بالماضي
يعني هم أخذوا علمودنه.
يمكن، وهم رادوا يستغلون ابوي بي، بس هسه تغيرت الخطة
شلون وليش تغيرت
راح نخلي عيسى يشتغل الصالحنا هددته بالفيديو مالتج هو وشذى.
اووويلي عليچ يمه بصوت المُتنمر
اكو شغلات خاصة عند ابوي مو أي شخص يگدر يوصللها
عيسى راح يگدر يساعدنا بيهن
وافق؟
بعده
هذا الخايسسسس انتبهوا منه.
هسه انتظر يرد الجواب وانشوف الخطة شتگول
تدرين حتى هذا المهندس باسل طلع يشتغل ويا عميد الدين ضد أبوي.
بس على كيفچ ويا عقلي ترا بدأ مايستلم من الصدمات
چاا شتگولين على عقلي
بس عميد الدين شعنده ويا ابوي ثاره هذا كله بس علمود رائد
لا، اكو ثأر ثاني
مال شنو.
التزمت الصمت ما اريد اكلها شنو شفت بذاك اليوم أكتفيت بجواب مختصر
وَهج: ابوي قاتل صديق عميد الدين لأن چان يشتغل وياهم
وعرف كل قذارتهم انتقموا منه لأن راد يوگف ضدهم وايصير صديق طفولته.
رفعت أيدها الحلگها متفاجئة
صفا: همممم قتل شنووووو من بشرررر الله خالقهممم.
ضربت على وجها تبچي لزمت ايديها
صفا أسمعيني
وَهج ش شلون هيج احنا عايشين بنص مجرمين وعصابات
حضنتني بخوف اتناشغ
صفا: فدوة عوفي الشغل صرت اخاف عليج منهم
وَهج: لا تخافين امي، وكلشي حجيته الج لازم تعرفينه.
بقت حاضنتني تبچي وخايفة حد ما نامت غطيتها
طفيت الاضوية وصعدت فوگ كملت الدرج وطلع عميد الدين
من الحمام ينشف بشعره بالمنشفه دخلت گدامه وهو دخل ورايَّ.
عميد الدين: وَهج
بدون ما أباوعله رديت
وَهج: اي عميد الدين.
هيج راح انام محتاجة شي
لا سلامتك.
الجو بارد بعد جو شتاء اخذتلي تراك شتائي
ورحت سبحت ورجعت
الي ايشوفنه هسه نيته تشطح گتلني البرد دخلت للغرفة
بسرعة طبگت الباب، فز من مكانه يباوعلي بنعاس
عميد الدين: شبيچ يُبا
وَهج: اسفة، بس باردة برا واجيت اركض لأن سبحت.
لا تنامين وشعرج مبلل
اي
يله گدامي نشفي
هههههه شبيك گتلك اي
ادري بيج تغلسين هسه ف سوي گدامي علمود ارجع انام.
هزيت براسي اضحك طلعت الاشسوار شسورت شعري.
ونشفته وهو يباوعلي وكل شوي مغمض عيونه
من النعاس ادري مجبور شبيك دنام، كملت واجيت
اتمددت بصفه كل واحد بينه بطانيته وحدة.
يله نام كملت هسه
شاطرة
رجع اتمدد مغمض عيونه، واني غطيت بالنوم النص ليل
أحس بلمسات بشعري فتحت عيوني وجهه بوجهي
عميد الدين
ردت اشوف شعرج خاف مبلل لا تتمرضين
أبتعد عني راجع المكانه
من النعاس إلى بيَّ رجعت نمت ما اهتميت للموضوع.
الثاني يوم اندك باب غرفتنا راح عميد يفتح الباب أسمع صوت ابوي يحچس وياه
أشرف: خلي وَهج تگعد
عميد الدين: بعد وگت للدوام
أشرف: اكو شغل مهم اليوم عندنه ابني خليها تگعد
اختفى صوته واسمع صوت الباب انسد رفعت الغطوة من راسي.
وَهج: اكيد شاف الفيديو
عميد الدين: مية بالمية ملامحه ماتتفسر.
رفعت ايديَّ اتمغطت اريد انام بعد نومة الشتاء ماتتعوض الصبح
عميد الدين: تنعسين يُبا
وَهج: أي والله.
نهضت من مكاني اتطوطح عبالك آدم من ياخذله بطل استغفرالله.
اجيت اوگع لزمني بأيده
الله الله يُبا
شو دايخة شبيَّ اليوم
تعبانة عوفي الشغل اليوم
لا، لازم اروح
ماتشوفين نفسج انعل ابو الشغل ماطاير.
هسه اكل واصير زينه
مو چنج ضعفانه
يبووو يبووو على تركيزك
ههههههههه مضايقج.
أبتسمت بوجهه وبعدهي أيده محاوطه كتفي
بالعكس حَلو.
حتى لو ضايقج ابقى مُستمر بي، يله بدلي وانزلي
تاكلين هسه أشرف الشريف محضرلج خطط علمود تمشين بيهن.
بدل ملابسه وطلع واني هم بدلت وطلعت كب من الكبات إلى جابهن
كل ماتذكرهن اضحك بفرح اهتمام بسيط بس عندي كبير
لبسته وعدلت حجابي نزلت جوا الهم آدم وزيد يتناكرون مثل عادتهم.
عزام: اليوم أسوي ثواب الجدتكم
زيد: قصدك زيارة
انچب ولك
جدي چا هيَّ امك شسمها غير زيارة
آدم: هسه عافوا الاسماء كلها سموها زيارة نوب جدي يتحسس حتى من نگول نريد نروح للزيارة.
حچه ابوي وهوَ التوتر مزروع بي
أشرف: وَهج اتريگي بسرعة لازم نطلع بابا.
هزيت براسي، باوعت ال عميد الدين غمزتله مبتسمة
نزل عيونه عاض شفته يمنع ابتسامته تطلع كملت وطلعت ويا أبوي
قبل لا أصعد بالسيارة اجتني رسالة باوعتلها من عنده كاتب بيها
بعد لا تعمزين يا وگيحة.
ابتسمت وصعدت ويا ابوي إلى كابه عنده اليوم أستمتع
بهذا الحال المبهذل، وصلنا للشركة بسرعة دخلني للمكتب مالته
أشرف: وينننن إلى گتلججج عليه
وَهج: أتوقع أنتَ مامزوجني الواحد فاهي هذا عميد الدين
ما اگدر أسحب منه كلشيي بسهولة.
حاوووولييي بكلشييي لازززم تحصليلييي الملفات إلى عنده
أن شاء الله.
ضرب الميز بقوا كمزني واني واگفة بمكاني
موووو بس كلام
شصاير ليش هيج اعصابك
مالججج شغل الحجج شغل بسس بالي احچيي هنااا.
باوعتله بطرف عيني، يخاف يگول إلى چنت مستفاد براسه
صار جوا الرجلين، دخل الباشا أشرلي ابوي اطلع
طلعت وقبل لا أسد الباب أسمعه يگله
الباشا: إذا اعترف علينااا ننتهييي أشررف
أشرف: ابنييي ماكوووو مختفيي اجتنيي رسالة تهديد.
ابنييي مخطووووف، إذا ما ادفع فديه يگتلووونه.
مشيت المكتبي، شو ماحچالي عميد الدين عن هاي الخطوة
اتصلت بسرعة عليه جاوبني
عميد الدين: هاا يُبا
وَهج: شووو ماگلتلي دازرين رساله الأبوي وگايليله عيسى مخطوف
البارحة دزيتهااا، وعيسى صح بعده ماموافق بس راح يوافق
ليش نأجل كلشي، نضرب الحار بالحار ونستمر.
شنو إلى يثبت عيسى ما يعترف بشي الأبوي
الفيديو إلى عندج، مايخلي يلعب بذيله وشغلة ثانية بعد
شنوو؟
راح يكون عنده علم مراقب بكلشي ما يگدر يخطي خطوة من كيفه اله بأمرنا.
أبوي طلب ملفات منك يگول لازم تجيبيهن وسمعت
الباشا يگله هسه يعترف علينا ونروح بيها
مايعترف ذاك لأن الباشا النكس مهدده بأهله
شنو رأيك بكلام ابوي
هسه اجه دور الباشا نلعب بيه ويلحك صاحبهم
مخلي أشرف بأسفل القائمة
لازم الإنسان بالاول يقضي على الاحجار إلى معرقلات طريقة
وبعدها يشتغل بالرئيسي ومنها وينتهي كلشي.
سكتت اباوع من الشباك الباسل واگف يحچي ويا موظفة
وَهج: باسل شنو شغله هنا بالعكس جاي أشوفه يساعدهم
عميد الدين: لازم يساعدهم يُبا وبعدين يتلاعب بالمشاريع مالتهم
هو يعرف عندي علم بكلشي
اي
بقيت اسمع اله وعن تخطيطاته إلى كلها مدروسة بكلشي
واحنا نحچي اجه اتصال اله گال هسه ارجع سده ورا دقائق اتصل.
مو گتلچ عيسى يوافق
وافق؟
اي هسه خابرني الولد إلى عنده گايله خابر عميد الدين وگله موافق بالعرض.
معناها شوف شغلك وياه وفهمه
رايحله هسه وخلي العب على أشرف الشريف شويَّ.
سده مني وبديت بالشغل اشتغل السعادة إلى بيها اني هسه
سنين أحارب الأجلها إذا الباشا ينمحي معناها أشرف يقرب سقوطه
دخل باسل جايب شغل وياه بديت أشتغل وياه ونخطط
الكلشي بس ولا مرة فتحت الموضوع وياه ولا هو فاتح الموضوع.
صفا.
الليل كله يدزولي رسائل يهدد بيها اشوفهن
ما اجاوبه
الكل طلع الشغله بس هوَ ماطالع اليوم وجاي الاحظه من كم يوم.
يرجع للبيت صاحي ما شارب.
اجت زينب يمي
زينب: اكلج صفا حبابه راح اروح ويا خالتي سلمى ونادية للدكتور
انتبهي الرحيق وياچ، لأن خالة نادية هم رجليها تريد تروح للدكتور
صفا: من عيوني
طلعن اخذهن أكرم وراحوا، طلعت أشوف سَند ورحيق بالساحة چانو يلعبون كرة قدم
اخذت الجهاز مالتي وگعدت يمهم بالحديقة أباوعلهم
واتصفح، ملل ماكو شي اسوي ظهري احسن من قبل على العلاج
جدي راح ال عمتي نجاة ايشوف ريم و وارث وين اتصافوا.
طلع من البيت وگف يلعب بالكرة ويا آدم شوي واجه گعد يمي
آدم: هااااا ياعروووووس
صفا: ليش تعيط اوويي شهل الصوت المزعج
آدم: صووووتي مزعج مووووو
صفا: اي.
انتِ مو علساس ماتتزوجين
غيرت رأيي
متقلبة الاراء
بالضبط
صفاااااا
اسمعك
ارفضي هذا الزواج
ليش ارفضه
علساس ماتدررين.
شتريد آدم؟
أريدچ
ضلت عيوني تدور حول الحديقة الگاعدين بيها أتهرب من نظراته
اني ما اگدر اعيش ويا مُدمن.
موبيدي أفهميني.
لااا كلشي بيدك آدم، احنا البشر بأيدنه نختار أما ندمر نفسنا أو ننقذها
الكلام سهل
تدري من جنت ادرس بنص مشاكلنه وتعذبينه ودمارنا بس بقيت مصرة ادرس وانجح
هذا اقرب مثال انطي الك، شوف وَهج رغم انكساراتها لازالت
تحارب وتحارب ابوها وأخوها إلى من دمها ولحمها
وأنتَ علاج ماتقبل تتعالج وجاي تدمررر بنفسك.
نهض من يمي ورجع دخل جوا بدون مايجاوبني
بقيت وحدي ضايجة منه مرت ساعة محد راجع اجوا سَند ورحيق يمي
سَند: خاله جوعان.
صفا: تعالوا انطيكم حلويات
أخذتهم من أيديهم لازمتهم دخلت جوا باوعت ماموجود اكيد سجن نفسه بغرفته
طلعت الهم الحلويات گعدوا ياكلون ويباوعون افلام كارتون بالتلفزيون.
نزل مبدل وبأيده ورقة وقلم حطهن گدامي باوعتلهن بعدم فهم
صفا: شنو هذا
آدم: شنو لازم أسوي اكتبيلي بهالورقة.
باوعتله بنظرات تأمل مبتسمة
يعني شنو أفهم من كلامك
الي فهمتي نفسه إلى ببالج
راح تتعالج؟
يمكن
اهووو آدم گول اي او لا
اي اي.
كمكمت فهمي اضحك بفرح وعيوني مدمعة وهو مبتسم الضحكتي
آدم: لو تبقين العمر كله هيچ تضحكين لو تگليلي موت أموت
صفا: آدم الله عليك أنتَ ماجاي تشاقة يعني صدك صدك راح تتعالج
مو أنتِ تريدين هذا الشي
ايييي كلششش ايييي أريده.
بشرط
شنو
توگفين ويايَّ وتتحمليني أنتِ گلتي قبل هذا كلامج
وبعدني على كلامي.
اتلاشت ابتسامته وخفت نزل راسه أردف بحزن
خايف افشل صفا
شوف باوعلي
لا ما اباوع
ليش؟
اسيح بالكيوتات ما اتحمل.
دباوع عيني باوع ابو الكيوتات.
ربع راسه يباوعلي تحسه خايف وبنفس الوقت يريد هذا الشي
باوعت، گولي
انصير اصدقاء
اي.
أمبييييي
شنييي
هاي كلمة خليجية معليك بيها، بس معقولة أنتَ آدم
صارلك فترة بس اجيب موضوع العلاج تتخبل عليَّ
هذاك مو اني وداعت أشرف الشريف شخصيتي الثانية چانت
صدگتك لانك حلفت بأشرف الشريف.
هو منيله الشرف جدي شگال الروحه من سماه أشرف
اني هم گلت مرة ال وَهج هذا السؤال وحتى هادي جدي شحس من سماه هادي.
يمكن جدي چان ماخذله بطل وسماهم هادي وأشرف
وعمي سعدون
لا بأس بي مقارنة بأشرف وهادي زين
شو هم مايجونكم
هم هيج عازلين نفسهم بس بالمناسبات يجون.
عووفنه عووفنه، انييي فررحانةةة
راح تتزوجين
اي
شنووووووو
امزح معاك شفيك
خاب احچي عراقي سودنتيني تسودن
اوكي اوكي، شوووگت تبلش بالعلاج
ما ادري خلي يجي عميد الدين واحچيله.
گأنو عميد الدين اقرب واحد الك من اخوانك
رويحتي هذا
الله يحفظكم.
أتقرب إلى صار قريب عليه همس بصوت ناصي.
ويحفظج إلى ويحفظلي هالضحكة.
صابني الثول من نبرة صوته بسرعة رحت گعدت يم سَند
راحت رحيق اله لزمت أيده شالها يبوس بيها ويباوعلي بخباثة
رحيق: عموو
آدم: هاا حبيبتي
رحيق: راح اگول الجدو عليك
آدم: ليش شمسوي
ليش اتسولف ويا خالة صفصف شفتك تريد اتبوسها.
اتجحظت عيوني على كلامها فلك اسود وهو نفس الحالة مصدوم بكلامها
ووولچ شنوو هذا الحچي عموو
اني شفتك والله اله اگول الجدو
خرررب، شوووگت ولچ
اشتريلي وما اگول.
تباوعله بنظرات خبيثة، والله طلعت مو سهلة خرب بحظج صفا
هسه لزماتكم صارت تلزمها الاطفال عليكم اخذها طلع بيها
ويحاول يفهمها ماكو هيج شي وچنه انسولف بس هيَّ قافلة
سَند يباوعلي مقلص عيونه سحبته من أيده گعدته بحضني.
صفا: شبيك حَبيبي
سَند: صدگ عمو يريد يبوسج.
لطمت على خدي وهم مو لطمه راشدي اجيت ابچي منه
ووولكم عيبببب خالة
هاي رحيق گالت
ختولي هاي ام السان تحچي وحدها لا تصدگها.
وعيب مايصير تحچون هيچ امك اذا تسمع تحچي هيچ تزعل منك
لا لا اني مالي علاقة هاي رحيق والله.
طرگاعة من كون مو طفلة شيطانة منين تطلبها
عمامها منو، رجع مشتريلها ومشتري ال آدم ويا دخولهم
دخلت زينب وباجي سلمى ونادية گعدن
زينب وجها يضحك فرحانة
صفا: شصار وياج زينب
حچت بخجل لأن آدم موجود گاعد
زينب: اني حامل
ضحكت گمتلها ابوس بيها واباركلها.
آدم: مبروك خوية
زينب: الله يبارك بيكم خوية يوم الالكم
صفا: شنووو.
وجها فلت بسرعة گالت
زينب: أقصد اكيد يجي يوم وكلمن يتزوج وان شاء الله هم يصير عندكم اطفال.
آدم: أويلي ويجوني بنات كيوتات وعندهن ضحكة حلوة
اعيش عيشة الملوك غيررر
صفا: ماااا گتلكم
زينب: شكوو.
باوعتله اتقصدت احچي واخلي الخبر يطش يم الكل علمود خاف اله نيه يتراجع.
صفا: آدم راح يتعالج
ضلن يباوعلي مامصدگات
سلمى: صدك يمه آدم راح تتعالج؟
آدم: اي يمه حبيبتي
گامتله حضنته تبچي، كزكزززت عليهم مال هسه اجعصهم بحضن.
بس حرام احضن المُتنمر لليل الكل رجع وامشي واذيع بالخبر
وكل شوي خازرني واني مامهتمة علمود مايتراجع ويصدمنا.
ماتوقعت موضوع الخطوبة الچذبية هيج يجيب نتيجة
بهل السرعة يا اخي أبوس عقلج صفصف حچه هو وعميد الدين
اتفقوا ايشوفون دكتور ولازم هم يحتاجله معالجة نفسيه
أمشي وادعي مايغير رأيه.
طلعت برا ناسيه سماعاتي بالمكان إلى گعدت بي اخذتهن ردت أرجع
وأستوقفني وجود آدم گدامي أبتسمت بوجهه
صفا: اجيت أخذ سماعاتي
آدم: صفا.
هلا
راح توافقين على عرض الزواج إلى جايج
لا
والله
والله.
حط ايدي وره ظهره ورفع عيونه يباوع اذا احد موجود اولا
مد راسه قريب مني يباوع بعيوني بكل حُب
آدم: تريديني مثل ما أريدچ؟ بعيداً عن كل العوائق
الي أبالي وبالچ أنتِ تريدين آدم يكون جزء من حياتج؟
رايد منچ كلمة علمود أعرف شتصرف ويا مشاعري شنو قرارج يا بعد الروح؟
اسراء.
مرات الحياة تصدمك بشغلات تحسها ماموجودة.
واقعياً ولا الها أثر أو يمكن موجودة بس تگول ما معقولة
اتصير ويايَّ اني، نسمعها مانصدگها اليوم اني من الناس
الي چنت ارفض تصديق الاشياء الغريبة إلى اسمعها
اليوم وحدة من هالشغلات دخلت بحياتي وغيرت مجراها.
اسراء: منو أنتَ؟
ظافر: ماتعرفيني، اني بَس إلى أعرفچ
توضيح؟
امچ تشتغل ويا واحد أسمه أشرف .
أشرف؟ منو هذا ماسامعه عنه
واحد من التجار الموجودين بهذا البلد يشتغل بشغل.
قانوني وغير قانوني، عصابات، مخدرات، سرقة أموال
كل شغلة وسخة هو داخل بيها، عنده ملهى كامل اله
وامج إلى اتاجرله بالبنات وتجيبهن يا ما بنات ضحكوا عليهن
بأسم الشغل وعبالهن الشغل شغل شريف وراحن بيهن.
أحس قبق راسي أنشال من كلامه
اسراء: امي تشتغل بكل هذا الشغل ي يعني تجيب بنات وتدمرر مستقبلهن
ظافر: وإبالها هسه تريد تجي تاخذج وتستخدمج ورقة رابحة تستفاد بيها.
دموعي اتجمدت بعيوني ماتنزل من هول الصدمة.
أنتَ منين تعرفني
اني واحد من رجال أشرف إلى چان يشتغل وياهم تگدرين
تگولين أيده اليمنى بكلشي، واعرف امج من زمان لأن هذا شغلها
مو جديد وياه، وچان ينطيني أمر من اجي للعراق اراقبها
السبب چان يشك بيها تلعب من وره ظهره بكل مرة اجي هنا يكلفني بهذا الشي.
أنتَ چنت خارج العراق؟
اي لأسباب جبرتني ادخل وياه بهذا الشغل
واني ماگتلي منين تعرفني
اووف اوووف ام عيون النعسانة اول مرة شفتج بيها.
عبالي تمشين وأنتِ نايمة بس طلعت طبيعة عيونچ هاي.
هسه ليش تجرى بالسالفة احچيلي
بس مع الاسف ما چنت ادري السانچ بطول النعال
يولي عبالي وحدة من البنوات الفقيرة طلعت اني الفقير
اخر مرة شفتج بيها چنتي ثانوية سادس وبيومها
رجعتي تبچين أتذكر چانت فترة امتحانات إذا ماتخوني ذاكرتي.
صفنت استرجع ذاكرتي بذاك اليوم أتذكر خلصتها بچي بالامتحانات.
لأن ماچانت تخليني ادرس امي واروح للامتحان كلشي مامجاوبه ارجع الطريق كله ابچي بيه بخذلان منها
صحيح لأن ماجانت تخليني ادرس
دخلتي جامعة؟
لا، نجحت وماخلتني اداوم بعد
برربوك علاجها يمي سهله.
أنتَ أشتريتني علمود تحميني منها
اي
شلون عرفت هيَّ كل هذا ابالها
معلومات خاصة هاي توصلي
شلون عرفتني وعرفت مكاني
اكو واحد مندس من جماعتي بنصهم ويعرف كلشي
واخواني
يجون يمج بَس أصبريلي ما اگدر كلكم اطلعكم مرة وحدة.
والله جاي اموت بدونهم شنو حالهم هسه.
بعد كم يوم راح ادز جماعة يشترونهم انطينه فنتك.
بس گال هيچ لزمته من أيده فرحانه ودموعي أخذه مسارها على خدي
صدك بداعت امك يعنيي اخواني راح تجيبهم يمي.
هز براسه رفعت ايدي امسح بدموعي ويرجعن ينزلن
مامصدگة راح يرجعون الحضني كلشي بيَّ مشتاقلهم
وأحسب يوم بعد يوم علمود يرجعولي واخليهم
يرجعون للمدارس ويعيشون حياتهم طبيعي مثل أي طفل يمارس حياته.
ظافر: يولي اتركي ايدي نترسنا ذنوب
بسرعة دفعتها
اسراء: نسيت، هسه شلون أيد هيَّ أكبر من راسي
يولي السانچ أكضبي
وإذا مااا كضبته على گولتك
أشلعه من مكانه
دروووووح
يواش يواش.
عفته بمكانه ورحت أمشي يصيح ورايَّ ما ارد عليه
أمشي ومبتسمة اخواني راح يرجعولي راح يكون گد كلمته
راح يرجعهم إلى صار بوچهي حازم.
حازم: ها ها شو تبتسمين تخبلتي
اسراء: أنتَ المخبل ابو عضلات المنفوخه
حازم: طرگاعة لفت راسج مو السان
اسراء: دروووووح.
خلت جوا للبيت حضنت جدة امل
راح يرجعولي اخواني
امل: چا انا شگلتلج حفيدي واعرفنه
ادعيلي فدوة ادعيلي يرجعون إلى بالسلامة
أتوسل بالله يرجعهم الچ سالمين غانمين
مرت الايام هنا انتظرهم بكل لهفه وأعد بالايام والساعات
واني عيوني على الباب اگول هسه يدخلون عليَّ اثنينهم
اضمهم بحضني والله بعد لو يموتوني ما انطيهم ولا اعوفهم
شفت الويل بفراگهم يا بعد عمري تعالو اختكم گلبها متلهف عليكم.
أجه اليوم إلى راح يجوني بي، من الصبح گعدت
اجهز الهم، الجدة امل انطتني وحدة من الغرف گالت جهزيها الهم
غسلتها ونظفتها وفرشتها وجابت بخور بخرتها ريحتها صارت ترد الروح.
امل: جدة ادخلي للمطبخ وكلشي يحبونه اطبخي الهم
اسراء: أنتِ كلش حنونه
أبتسمت بوجهي دخلت للمطبخ وهيَّ ويايَّ بذني الايام
ظافر وحازم يدخلون للغرفة مايطلعون بس بوقت الاكل
واجهزتهم ماسكتت مايفتحون الخط گدامي بس اليوم.
بصلاة الفجر سمعت حازم يحچي ويا ظافر يگله اليوم نهايتهم ومافهمت عن منو يحچون.
طبخت أكثر من اكله يحبونها شگد جان بنفسهم هناك اكلات
بَس ما اگدر اسويلهم شي كملت طبخ كلشي وگفت أفتر
بالصالة وعيوني تترقب الساعة.
اسراء: جدة شو اتأخروا
امل: هسه يجون يمه
اسراء: راح اقرأ قرآن بين مايجون لأن راح اموت من قلقي.
دخلت توضيت وطلعت اخذت القران الكريم گعدت اقرأ
صارلي كم يوم من بديت اقرأ، اول مرة افتح كتاب الله واقرأ.
من اجيت لهذا البيت صرت اقرأ كملت سورة البقرة كلهاا وبديت بالسورة إلى بعدها.
اندمچت وارتل بالايات كل آية اقراها احاول افهم معناها
حد ماكملت عشر صفحات رجعته المكانه وهم بعدهم ماراجعين
صاح الاذان ب الله أكبر .
اندگ باب البيت گلبي فز، رحت أمشي بخطوات
جسمي يرجف كله، للقاء إلى راح ايصير وجدة امل تمشي ويايَّ
وقبل لا نطلع أنفتح الباب بكبره كله وصوت الاذان العالي يكبر ب الله أكبر
رهبة الصوت تخلي جسمك كله يقشعر.
وگفت بمكاني كأنما نزل جمود جمد جسمي كله
دخلت السيارات وعيوني أتثبتت على إلى فوگ السيارات
نظراتي صارت تتنقل بضياع بينهم تابوتين على كل سيارة تابوت
ركضت بفزع أباوع مثل المخبله للتوابيت نزل من السيارة
ظافر عيونه دم دم ركضت عليه.
اسراء: شنو و وين اخواني مو گلتلي راح اجيبهم واجي
والله أنتَ وعدتني تذكر مو ظافرررر ماتحچييي ووووينهمممم.
درت وجهي بجهة الاذان إلى بعده أحسه هالمرة طول ليش طول كل مرة بسرعة يخلص بس ماچنت ادري اليوم.
ظافر: اسراء
اسراء: اي اي اسمعك فدوة وينهم لا تگلي ماجبتهم.
باوع الحازم الواگف بملابسه العسكرية
اسف
شنو اسف ليش اسف ليش تتأسف.
لزمني يريد يثبتني بمكاني.
بَس أسمعيني.
أبتعدت عنه اهز راسي برفض رفض المجنون بعدم تصديق
أنضربت رجلي بالتابوت وگفت
عيوني متجحظه، گلبي انخمش من المنظر رفعت أيدي ترجف رجيف أشرتله.
علي التوابيت المحطوطه واحد بصف الثاني لو گلبك حجر
يهزك المنظر غصيت بدموعي واني اسئله
اسراء: أخواني؟
عن لسان اسراء.
خَشِن رمِل المِگابُر عَلى التِرف خِدة.