رواية وقار الغريب للكاتبة حوراء السعيدي الفصل الحادي والثلاثون
اسراء.
لزمتني وَهج تباوعلي بتسائل مسحت وجهي اغطي أرتباكي
وَهج: بيج شي؟
اسراء: هااا لا لا ماكو شي بس ممكن سؤال
وَهج: اسئلي
اسراء: هذا الرجال الچبير منو؟
رفعت راسها باوعت عليه ورجعت جاوبتني وصدمتني أكثر من گالت
وَهج: جدي عزام يعني جدنا كلنا
هزيت براسي وصارت تعرفني عليهم اجه الجد أتقدم الي
وگوا لازمه نفسي ما افضح روحي أبتسم بوچهي باس راسي
عزام: حياچ الله بين اهلچ جدي.
نزلت عيوني خجلانة تباوعله من فعلتي وياه لو يدري اني نفسي
إلي مرة سرقت منه فلوس بدون علمه نزلت دموعي متفشلة من أفعالي
عزام: لا إلا البچي اتعب ويا دموعچن يا جدي
نزلت دموعي أكثر أخذني بحضنه، وهوَ يحچي بكلام
يحاول يهدأ من وضعي، سلموا عليَّ الموجودين
ضليت صافنة زلم شگد هاي صدگ إذا أفكر اشرد منا يفصمون ظهري فصم
مثل ما گال ظافر نوب عيونهم شگد حلوة.
حچه ولد واگف يم الباب شكله مرح من خلال سوالفه وحركاته.
زيد: هسه البنيه عقلها ضل يفتر تگول شيحفظهم إلى عشيرة ذوله.
جاوبه ولد شكله هادئ وصوته بعد اهدأ
وارث: كلنا أهلها أن شاء الله.
گعدنا كلنا وجدي لازمني ماعافني خفت يعرفني اني نفسي ويكرهني
صفا: شوفي راح أعرفچ عليهم كلهم بس شنوو عقلچ
خلي يحفظهم وللعلم عندنه نقص بعد واحد.
باوعتلها من حچت اخر كلمات كأنما حچتهن بغصه رجعت
رسمت أبتسامتها الحلوة على ملامحها الناعمة.
صفا: هذا جدو عزام اكيد عرفتي، دارت بأتجاه الولد الگاعدين رجعت تعدد وتعرفني عليهم.
هذا ابو رحيق أكرم وزوجته زينب الصاكة بنت الصاكة وهاي النملة بنتهم رحيق.
باوعتلهم الولد أكرم گاعد وبصفه زوجته وبنته بحضنه
أكرم: حياچ الله خوية
رجعت تكمل صفا بتعدادهم وصدك دخت
صفا: وهذا وارث وعميد الدين تعرفينه وهذا زيد اخر العنقود
وهاي رونق التس اختهم بس حبابه لا تغرج بغرورها.
رونق: ادبسزز منو المغرورة.
صفا: دغلسي شبيچ عيب نتكافش گدام البنيه من أول يوم
خليها بالاول تتعود على الوضعية وأنشوفها علاقتنه الحقيقية.
ايوا يا صاحبة العيون الناعسة نكمل طولت عليج
اني عرفتيني و وَهج عرفتيها هسه أعرفج على صاحبة
الكلمة الشهيرة احترم نفسك ريم بنت عمتج أتصير
وهاي عمتي نجاة إلى بصفها باجي نادية وبعد عندنه باجي سلمى.
وَهج: چان لازم تبدين من الكبير للصغير
صفا: ويعععع شبيچن حفيدات عزام محد تعرف تسلك.
الوضع إلا تفشلنا هسه أخذته الواهس شكو بيها.
اكو ولد گاعد على جهه وبصفه مرة گاعدة هم
صفا: وأعرفج هنا بالاخ الجديد النا ومعاه امه لولو أقصد
علياء بس أدلعهاا من حُبي الهاا وأنتِ
ما محلفتني.
علياء: كلش حبينا بعض
صفا: طليقة أبي شلوووون مااا احبچ
وَهج: احم. صفا كافي تعاي اگعدي كفيتي
و وفيتي.
راحت گعدت بصفها و وَهج تعضلها شفه تسكت.
عزام: شوفي جدي لا تحسبين روحج غريبة كل إلى هنا أخوانج واخواتج.
وسلمى نجاة نادية مثل امچ اعتبريهن ادري بيچ صعب تتقبلين كلشي
بس احنا اهلچ لا أنتِ ولا غيرج يگدرون ينكرون هذا الشي وشبرچ بشبر باقي بناتي إلى هنا لا تحسبين بروحج غريبة.
زيد: اخذج للزيارة على حسابي.
باوعله جدي خزره
زيد: ترررررا زيارة زيارة موووو امك شلون سالفة هاااي يتورط واحد يگول زيارة.
عزام: شلمعنى بس گدامي تحچي هيچ.
وارث: جدي چاا امك اسمها زيارة الوادم من أتروح للزيارة شتگول غير هم زيارة شنو ذنبها تگول زيارة وتتحسس
عزام: سرسرية ما أتصيرلكم چارة
وَهج: اسراء ليش ساكتة
صفا: بعدها خجلانه وكذا.
بقيت على سكوتي إلى يشوفني هسه ما يگول اني نفسي
ضلوا يسولفون ويايَّ احنا اهلچ ولا تخجلين من شي واخذي راحتج والبيت بيتج ومن هذا الكلام
بس مشكلتي ما ادري شبيَّ الكلام ضاع مني وچانت اجابتي الهم هيَّ هزة راسي.
أخذني البنات وطلعنا من يمهم دخلنا بغرفة
ما أدري المن
صفا: راح تبقين يمي بالغرفة جهزتلج كلشي.
اجت وَهج حضنت وچهي
وَهج: يعجبج تبقين ويا صفا بالغرفة اممم لأن بصراحة
البيت صرنا بي اهوايَّ وماكو غرفة زايدة هنا يم صفا هم افضلج
اسراء: ماكو مشكلة.
ريم: يااااييي وأخيراً سمعت صوتج والله صارلي ساعة
اگول ليش مدا تحچي هل البنيه.
اسراء: مو ما أدري شنو احچي
وَهج: تتعودين عادي.
ريم: أي صح اني من اجيت هنا چنت فد هادئة شو بعدين أتخبلت
رونق: وضليتي تجفصين منا ومنا
ريم: احترررمي نفسج حضرة المحامية ترا ساكتتلج على مزاجي
رونق: أوي خفت
ضلن يضحكن الواضح يشاقن بينهن بقن شويَّ وطلعن بقن بس صفا و وَهج.
وَهج: اسراء
رفعت راسي الها
اسراء: هاا
وَهج: اريدچ تخلين شي أبالچ اني دائماً وياچ شتحتاجين تعاي الي
لا أتروحين الغيري اني اختج ومن واجبي كل هالشغلات
احبج واعزج مثل صفا راح اساعدج بكلشي ومتأكدة.
راح تتقبلينه مثل ما اتقبلناج بدون مانعاشرچ
اسراء: ما أدري شلون راح أعيش هنا شوفي اني مو مثلكم
شوفي انتن شلون تحچن كلامجن حلو وتحچن طبيعي
مو مثلي اني الساني ما اگدر اسيطر عليه واچفص
صفا: عادي منو بينا ما يچفص
اسراء: لا أفهميني يعني اني حتى أتجاوز بس مو بيدي
ما أريد هسه أتجاوز على أحد يمكن هم مو مثل ظافر يتحملوني.
وَهج: أنتِ خايفة بس من هذا الشي؟
أي.
لا تخافين لأن إلى هنا هم بأسلوبهم وكلامهم يجبرونج تحترمينهم
كلهم يحترمون وما يتجاوزن، زيد يشاقة بس ما يتجاوز على وحدة بينه
وعندج جدي هنا رجال حقاني ومايقبل بالغلط
نزلت عيوني بأحراج
شلون أغير نفسي، اني أريد اغير نفسي والله ماحابه هاي شخصيتي
سهلة مو صعبة ليش تستصعبين كلشي
شلون؟
بالبداية أتخلصي من كل نقاط ضعفج
و گولي راح أتغير للأحسن
واني قوية وگدها راح أتغلب على كلشي الشي إلى مايعجبني.
مامجبورة ابقى أتعايش وياه وهوَ شي مؤذي إلى أتخلص منه وأعوفه وره ظهري
من يگول اني قوية، اني بس السان والله
الدنيا ما أتحبج وأنتِ ضعيفة لأن راح أتكسرج
إذا ماچنتي تمتلكين قوة، عوفي السلبي وفكري دائماً بأيجابية
أنتِ حالياً ما أتحبين أسلوبج وشخصيتج بس ياترى فكرتي بيوم
شنو الأسباب إلى وصلتچ لهل مراحل اكيد كلشي بالحياة.
إلا أسبابه أحنا من ننخلق بالحياة ما ننخلق متعلمين كلشي ولا مثل الطفل من يبقى يتعلم خطوة خطوة بالمشي
أنتِ قادرة تغيرين من نفسج خطوة بخطوة الطفل اول ما يتعلم المشي يوگع أكثر من مرة بس بعدها ينجح الإنسان هم نفس الحالة.
اني ما اگدر اتحمل كلشي ولا اتقبل أي كلام
اتعايشي ويا الوضع ويا أي شخصية تواجه بالحياة
سواء مرت عليج بسلبية أو بأيجابية اكيد مو كل الناس.
تريديها أيجابية بحياتج ومثل ما تريدين أي مشكلة تواجهج
تگدرين بنفسج تتصرفين وتحلينها بدون أي تهجم وتسرع
صدگيني من راح تحبين نفسج راح أتشوفين الفرق بشخصيتج وبتغيرها.
صفا: ترا ماكو شخص بالحياة عايش مرتاح وما مر بظروف صعبة
منو بينا ما مر بشغلات دمرته وكسرته منو بينا ما عاش ويا حزنه؟
بس إلى يريد فعلاً يعيش بالحياة وبشخصية تعجبه يحاول يتخطى
أسمعي زين خلي شخصيتج قوية ماتنهز من أي كلمة وتتأثر هو منو يسوا.
أنتِ انسانة ما عشتي بنص عائلة علمتج شنو الغلط وشنو الصح مو أشكال
گدامج الحياة والوقت والايام أرتب نفسي وحياتي من جديد
وخصوصاً إلى مثل وضعج حقها تكون بهيچ شخصية
محد يگدر يلومچ والي يلومچ هذا فاشل بتفكيره منو تبقى
عنده اخلاق وهو عايش بنص الشوارع وبحياة سخيفة.
وَهج: اني وصفا وياج وراح انساعدچ تتغيرين.
غطيت وچهي من دموعي خانني ونزلن حسيت بأيدين حضنني
وَهج: إذا البچي يخليچ ترتاحين ابچي لا تكتمين.
اسراء: اني أحس بضياع والله
عميد الدين مرة گتله نفس الجملة وگالي المچ من الضياع
اليوم اني اگلج اني إلى ألمچ من الضياع ولا تخافين من شي.
صفا: عايشين مغامرات من ورانه
وَهج: انچبي
انچبينا لا يجيني الشبشب مالتچ طاير، يله اسراء گومي بدلي
علمود نتغدا سوا ويا العائلة بس يحتاجلنا سفن علمود اهضم لولو.
اسراء: منو لولو
علياء أم قصي.
هزيت براسي طلعن عافني وحدي طلعت إلى ملابس بدلت.
والشهگة بصدري، ودموعي تنزل أكثر كل ما أتذكر بيت ظافر وحجية امل
هسه هم يذكروني مثل ما أذكرهم لو راح ينسوني.
كملت دخلت صفا اخذتني وياها للحمام غسلت وچهي
ولازمتني من أيدي تسولف ويايَّ دخلنا للمطبخ زوجة أكرم
واگفة لازمه ظهرها، وريم و وَهج يطبخن وياهن المرة إلى أسمها نادية
وَهج: زينب لا تبقين هيچ خلي أكرم ياخذج لدكتورتچ
زينب: ظهري موتني حتى ماشايله شي.
نادية: عمه لا تهملين نفسچ وأنتِ بأول أشهر.
دخل زوجها ضل يباوعلها بأستغراب وگف يمها لزم أيدها ويسئل بيها
أكرم: شبيچ زينب
زينب: ما أدري ظهري من الصبح يأذيني
گومي ويايَّ
لزمها ساندها اخذها وطلعوا من المطبخ.
ريم: لازم أتروح للدكتور لأن هيَّ حملها بصعوبة يثبت إذا تذكرن من گالت
صفا: گالت بصعوبة أيصير حمل ويثبت هم
وَهج: هسه أكرم ما راح يخليها ماشفتنه من شافها شلون أتغير.
رجعن يكملن بالشغل اني گعدت أباوع عليهن وصفا بصفي.
أتسولف تحاول تغير جو، دخلت إلى أسمها علياء باوعتلي بطرف عينها
علياء: الله يكثرچن بنات أشرف
صفا: كلشي جائز يمكن بعد اسبوع واحد يدگ الباب
ويگول اني ابنه لو بنته بعد البركة بيجن نسوان أبوووووي.
أشرت عليَّ
علياء: أنتِ بنت منو منهن
اسراء: مها
علياء: گتيلي مهاا هيَّ مو نفسها إلى تشتغل ويا أشرف قبل.
عافت وَهج الطبخ واجت عليها
وَهج: وأنتِ منين تعرفينها؟
أدري بيهن وحدة وحدة
نايس.
عافتنه وطلعت ضلت وَهج تباوع وراها الدقائق
رجعت ساكتة تطبخ، كمل الغده وبدوا يصبون بي هم عندهم
صالة چبيرة كفت، الكل گعد يتغدا، لولو على گولت صفا
ما گعدت ويانه، تگول ما أعرف اگعد بالأرض واكل حطت
اكل وحدها وگعدت على القنفات تاكل بينما ابنها لا كلش طبيعي كلامه وتصرفاته.
ريم.
اشوف اسراء مامرتاحة يمكن لان بعدها مامتعودة علينا
رفعت راسي من حاچاني قصي
قصي: ريم
ريم: اتفضل
قصي: زاد فضلج، انطيني گلاص ماي.
من يمج بلا زحمه.
صبيتله بگلاص انطيته اله، رجعت اكل درت بعيوني شفت وارث
يباوعلي رافع حاجبه والوضع كله ماعاجبه
وارث: بعد كثرن ماااي هناااا
رجع ياكل وكل ما ارفع عيوني أشوفه عيونه علينه اني وقصي
كملنا غده نقلنا المواعين زينب وضعها ساء وبدأ القلق عليها
اخذها أكرم و أمي للدكتورة طلعوا بيها.
وگفت اجلف بالصحونه والبنات يفترن بالمطبخ هم يشتغلن
اني اجلف ورونق تغسل، حد ماكملنا گعدت فحطانه لأن اهوايَّ.
صفا: ريم أخذي الچاي حبابه هاي ليلى اختي جاي تتصل.
أخذته منها وطلعت أقدمه الهم بعدني هستوني دخلت
كمز وارث من مكانه أخذ الصينيه مني أشرلي بحواجبه
وارث: أطلعي ولا تدخلين هنا ريم
ريم: ليش؟
وارث: بعدين شنو ماعندج غير هل الملابس البسي شي عريض
ريم: ترا ملابسي عادية وكلشي ما واضح مني.
اخخ گلبي.
أبتسمت اله
سلامة گلبك أستاذ وارث
روحي زعلان منچ لا تقشمريني
الچاي برد.
قلب عيونه وأخذه يقدمه الهم طلعت من يمهم رجعت يم البنات.
صفا و وَهج يسولفن ويا اختهن ليلى فاتحات كاميرا
صار عندي فضول أشوف شكلها ما شايفتها صرت قريبة عليهن أباوعلها
تنطي شبه الصفا بس ليلى عيونها مثل وَهج صغار تسولف
وياهن بالإنكليزي لأن هيَّ عايشة بدولة أجنبية
كملن و سدن الاتصال
ريم: اگلچ وَهج شعجب اختج تحچي هيج
وَهج: ليلى أتزوجت من زمان هيَّ الچبيرة وحتى
بنتها الجبيرة عمرها 14 سنة وابنها 10 سنوات.
و أتعودت على لغة الدولة إلى عايشتها بس عادي هم تحچي عربي
ريم: هم ابوج زوجها غصب؟
وَهج: تقريباً أي بس الولد خوش ولد وحتى ماله علاقة بأهله
طلع بيها وحده ببيت و عاشوا بعيدين عن شغل أهاليتهم
ريم: الحمدلله ماشافت إلى شفتي.
دخل قصي للمطبخ جايب الصينية مال الچاي حطها على السنك
رونق: نادر نادر براوو
قصي: المحامية شادتها ويانه
رونق: ما جاي أقتنع أنتَ تربية أشرف
قصي: ليش؟
لأن تربيته معروفة.
رمقهه بنظرات ما عرفت أفسرها وطلع بدون ما يحچي شي.
مجرد طلع رونق ضربت أيد ب أيد
رونق: أكص أيدي إذا ما طلع وراه شي هذا شكله كلامه حركاته يا اخي ماتعجب.
بقينه ساكتين هوَ من اجه لحد الان ماشفنه شي منه مو زين
ويحاول يتقرب الاخواته بس هن ما متقبلاته مثل اسراء.
نهضت من مكاني
ريم: راح انام علمود اگعد ادرس
صفا: اليوم جمعة
ريم: اي قابل الدراسة سهلة والله صعبة.
دزتلي بوسه بالهوا.
صفا: نوم العافية يا بعد العافية وأهلها.
رجعتلها البوسة وطلعت أسمع جدي يحاچي عميد الدين
يگله خابر أكرم شوف شصار وياهم دخلت للغرفة ذبيت حجابي
ونمت بمكاني شوكت تخلص هالسنة وأرتاح
غفيت غاطه بالنوم
للعصر كلش گعدت، ماطلعت من الغرفة بسطت مثل العادة بملازمني وگعدت ادرس وكل شويَّ غافيه.
درست إلى اگدر عليه وطلعت اشوف البنات ويا طلعتي
نزل وارث من فوگ كاشخ يريد يطلع عبرني وبنص الطريق رجع يباوعلي
وارث: وين رايحة؟
ريم: اريد البنات
لا تدخلين للصالة ماموجودات
اوكي
يله اتحركي منا
شبيك عيوني؟
شبيَّ
ما أدري گول النفسك.
أنفتح باب الصالة طلع منها قصي يخابر باوعلنا وطلع
ريم: هسه عرفت ليش تگول لا تدخلين
وارث: ولد وحدة گاعد شعندچ داخله
تمام بس اني وين أعرف وحدة
هسه عرفتي.
سكتت أباوع بعيوني بهدوء
وارث: شو ماحچيتي وما اتعاركتي
ريم: اخذت نفسي عهد بعد ما اخطأ مثل قبل ولا أتسرع بالكلام
ومقتنعة
كلش مرتاحة
الله يهديچ.
أبتسمت، و رحت مكملة طريقي گلبي لليوم من أيشوفه نفس المشاعر.
ذني ما ادري وينهن دگيت باب غرفة صفا ماكو فتحت
الباب شفتها نايمة واسراء نايمة بصفها وسَند بنصهن
يمكن البيت كله نايم وصدك ماكو لا حس ولا نفس وين اروح هسه.
احسن شي ارجع الغرفتي بين مايگعدون ردت أرجع دخل قصي
قصي: همزين گعدتي
ريم: ليش
قصي: گاعد وحدي الكل نايم
ريم: أي بيت جدي بأكثر الأحيان ينامون الظهر لأن متعودين.
تجين نگعد بالحديقة
اني وأنتَ؟
ابتسم بخفه طابك حواجبه
أي ليش بيها شي.
بقيت ساكتة الثواني
أعتذر منك ما اگدر اريد اكمل دراستي.
إذا تحبين أساعدچ لان اني دكتور بس تركت مهنتي من زمان
ليش تركتها
ماكو مجال بين شغلي وعملي
أهاا.
وأحنا واگفين رجع وارث دخل عيونه أتثبتت علينا وانگلبت خلقته گلاب.
قصي: هاا وارث رجعت
وارث: نسيت جهازي
عبرنا وصعد بنص الدرج وگف ودار علينا گال
ريم تعاي أنطيج شغلاتچ إلى وصيتيني عليهن نسيت انطيهن الچ.
بقيت مستغربة أشرت على نفسي
ريم: منو اني؟ موصيتك.
خزرني وأردف
وارث: البارحة بوية شنو نسيتي.
من خزرته فهمت الموضوع
ريم: هااا، أي أي ذكرت اجيت.
صعدت وياه أمشي واره وصلنا يم باب غرفته وگفت بمكاني
وارث: ما تدخلين
ريم: لا والله خاف نسيت احنا أنفصلنا.
لا ما ناسي اكو واحد ينسى حرگان الگلب
هسه أنتَ شكو جبتني هنا
شيريد منچ قصي
عرض عليَّ نگعد بالحديقة
نعععمم؟
أي والله بس گتله عندي دراسة أتعذرت منه
سكري أرتفع من وراچ.
يا عيني والله حيرتني قبل سكرك يرتفع
من تطفلي
وهسه من صرت عاقلة هم يرتفع شسوي يعني أكثر.
أتقرب أكثر إلى بلعت ريگ بتوتر همس بصوت ناصي
أرجعي يجوز يستقر وبعد مايرتفع
ما فهمت
ما اچذب عليج ولا راح أدور كبرياء وكرامة يا ام الكرامة
أكتشفت بعدج عني أذيه أضعاف من أذيتج قبل لا نطلگ.
أريد معضل
راح أفلش وجهچ
احترررم نفسك
محترمهاا
اتأخرت على شغلك
أتريدين تذليني أكثر
لا والله حشاك اني ما أقصد هيچ بس أحتاج أراجع نفسي أكثر.
لا تنسى قبل شنو إلى صار ما عندي طاقة ترجع مشاكل بينه بسبب شكوكنا.
وشكوكي أذيت نفسي بيها ما أذيتچ بيها
واني شكوكي أذيتنا اثنينه وخلتني اسوي شغلات عبارة عن غلط
نعالج الأخطاء
أنتَ مو كرهتني، وگلتلي بعد مالي علاقة بيچ وسحبت ايدك من كلشي
حچي السان مو كلشي يحچي اللسان نصدگه.
أنتَ گلت مالي علاقة
شلون ما إلى علاقة واني بكل مرة زيد ياخذج للدوام اجي
وراكم وما اروح الدوامي الا وأشوفج داخله الجامعتج.
أنتِ ما متاذيه بس وحدچ من هالبعد اني اضعافچ بس عايفچ براحتج
غلطتج اخر مرة اذيتيني بيها ريم
اسفة
وين أحطها هاي ال أسفة.
نزلت دموعي
ريم: وارث والله متندمة على اخر مرة
وارث: تريديني مثل ما أريدچ برنسس؟
رفعت عيوني أباوع بعيونه ينتظر جواب مني بفارغ الصبر
وعشت بهاللحظة بتناقض بين الرفض وبين القبول
سحبت نفس من عمق قلبي وأردفت.
ريم: أي، بس ما اگدر هسه أرجع انطيني مجال اتخلص من كلشي.
زفر نفس بحسرة
وارث: ريم
ها وارث.
نتساعد مابيها شي
لا الله يخليك اخاف أيصير شي وترجع الاغلاط نفسها انطيني مجال
براحتج بوية.
عفته ورجعت نزلت دخلت للغرفة قفلتها گعدت وره الباب
ابچي بصمت هو ما يدري اني روحي تتعافى بمجرد
أتشوفه وتتعذب بالبعد الصاير بينه، للمغرب طلعت الكل گاعد
وزينب هم راجعه ولا حسيت بيها.
ريم: شگالتلج الدكتورة
جاوبتني وهيَّ مختنگة بعبرتها
زينب: تگلي طفلج مهدد بالاسقاط لازم أنتبه انطتني مثبتتات.
لازم ابقى نايمة على ظهري أقل حركة ممكن لاسامح الله أتسببلي إسقاط.
ريم: أن شاء الله ماكو شي عيوني أنتِ أنتبهي النفسج واحنا يمج.
وگفت اسراء تهفي على وجها مثل المختنگة راحتلها وَهج لزمتها بخوف
وَهج: شبيج امي اسم الله
اسراء: شنووو هاي شلون تحچون هيج بهدوء راح اموت
ولكم من اجيت لحد الآن احجي بهدوء اختتگتتت ما اتحمل.
عضيت شفتي اخفي ضحكتي
وَهج: هههههههه عادي احچي بصوت عالي
صدك؟
والله هو غير زيد وصفا خابصينه بالبيت
يمه شنوو هاي يا هدوء هذا عمي اسكتوا إذا ماصوتي يلعلع ما أرتاح
ريم: ههههههههههه والله سوالفج مثل سوالف صفا
اسراء: اگلج أنتِ مثقفة لا تتقربيلي والارعن والمثقف ما يتوالمون
ريم: ليش ليش والله اني حبيتج
اسراء: وحگ الله حتى اني حبيتج شكلج جنه ذني اللعابات امهات الربع.
مجرد گالت هيچ البنات فطسن ضحك على سوالفها
وهيَّ تحسها چانت متقيدة بس من گنالها طبيعي اخذت راحتها.
وهم الولد ماكو طالعين بس جدي وبالديوان اجاه رجال.
اسراء: والله خطية لو اتشوفن شنو سويت بظافر وأخوه
وَهج: وصلتلي أخبارج
اسراء: بس هذا أيده عبالك چيس طحين من يكفخني عيوني تنحول.
علياء: إلى محترم نفسه محد يتقربله
اسراء: أنتِ مثقفة والموووووثقفين مايدخلووون نفسهم بشي ما يخصهم لولو.
هزت بأيدها أم قصي
وطلعت بس طلعت صفا صفگت ايديها الاثنين وغمتها من وره
صفا: عساها روحه بلا رجعه.
نادية: عيب ماما.
صفا: ماتشوفينها شلون تبث بسمها، باجي عود صدك ماچنتي تعرفيها
نادية: لا والله ما أعرفها بنيتي.
رجعن يسولفن ويا اسراء تموت ضحك بسوالفها
عبالك صفا وتحچي بس هيَّ صوتها أعلى
من صوت صفا
والبنات يحاولن ما يحسسنها بغربة بس هيَّ ساعة تحسها
اندمجت وساعة تعزل نفسها وتبقى تصفن.
زينب صعدوها الغرفتها وگالولها بعد ماتنزل كلشي يوصل الها الغرفتها
دگ جهازي شفتها سُرى طلعت برا أجاوبها لأن جوا صوت البنات وهوسة.
ريم: هلا سُرى.
سُرى: هلا ريمه شلونج
الحمدلله وأنتِ
ماشي الحال، ريم ولو لحيت وياچ شصار على موضوع مناف
جدي لحد لأن مامرجعلي خبر
فدوة الله يخليچ ارجعي حاچي، اني مامرتاحة يم عمامي
والله نسوانهم لاعبات بيَّ لعب مخلياتني خدامة بعد ماچنت المدلله.
شهگت بدموعها مردت گلبي مرد
احاچي أن شاء الله، بس مو ابن عمچ چان رايدج
هو گاعدة يمهم اني بس والله لو اموت ماراح اقبل بي
ليش؟
يمشي بكلام امه
يجي جدي وأرجع احاچي.
لليل رجع جدي ومن فتحت الموضوع بس فاجئني بقراره
عزام: لا جدي مناف يبقى بالسجن مايطلع خطر علينا
والي سوا مو شي سهل، دخلت رونق گعدت تسمع للكلام
رونق: ترا هذا الجحش قضيتين خطف واعتداء يا غبي يطلعه.
بقت رونق تشرح عن الموضوع وهو مو مجنون ويتحول
علي المستشفى ويتعالج خابرت سُرى جدي حاچاها وفهمها كلشي
والموضوع بعد بيد القانون لأن هو خاطف وحاول يعتدي.
عليَّ جنسياً مو بسهولة يطلع منها بس ضل بالي شلون راح تعيش يم عمامها.
اجه يوم الاحد داومت شفتها هناك شصاير بحالها
بس اتفاجأت أكثر من تعاملها حيل تغيرت بعد رفض المساعدة
حتى السلام صارت ماتسلم عفتها براحتها هو اني بعد
نوال مستحيل اتصير عندي صديقة حقيقية
رجعت للبيت بكل مرة أشوف اسراء اخواتها يمها مايتركنها
واسمع وَهج تعلم بيها وتنصحها هيَّ من أتشوف الولد تسكت ماتحچي.
من يطلعون ترجع الطبيعتها، گعدنا مثل أي عائلة بالليل ننجمع
شفت وارث وجهه مثل إلى صار شاحب لزم راسه
يحاول يركز فقد هذا الشي وجهه أتعرق كامله عميد الدين لزمه.
عميد الدين: جهاز السكر بسرعة
صعدت الغرفته اتعثر بخطواتي من خوفي شفته على الميز
أخذته ونزلت اركض انطيته ال عميد الدين وگفت بصفهم قاس سكره لكاه هابط.
ريم: لازم ياكل شي حلو
ركضت للغرفة طلعت جكليته انطتنياها اليوم طالبة وكلوه منها.
عميد الدين: خوية چا أنتَ ماتدري لازم ابو السكر لا يبقى جوعان ولا شبعان
ريم: هو ما أتعشى، راح أحضرله الاكل.
عفتهم طلعت من المطبخ حضرتله اكل بصينيه وماصار اهواي
من مكملين العشاء الكل أتعشى ماعدا هوَ كملته
رجعت الهم عميد الدين يقنع بي يخصص
علاج اله
بس هوَ ما يقبل رافض يستخدم علاج انطيته ال عميد الدين
گعدت يم وَهج ومن بين الكل شفت جدي يباوعلي ومبتسم خجلت من نظراته واني
من خوفي عليه نسيت نفسي.
كمل اكل ورجعوا قاسوا الضغط ضل
عميد الدين
كل شويَّ أيشوفه حد ما اطمن عنه بالكامل
شفت
وَهج تأشر ال اسراء إلى وجها صار أصفر نهضت من مكانها
راحت قريبة من يم جدي ومبين عندها شي.
اسراء: اگدر احچي وياك بموضوع
عزام: اكيد
اسراء: بس وحدنا ممكن
عزام: تعاي حبيبتي
اخذها وطلعوا، رجعت جسمها وَهج بأرتياح.
شويَّ وطلعت وراهم.
وهذا قصي عيونه بجهازه بس يكتب
وعميد الدين عيونه عليه
نظرات شخص يگله اني كاشفك وممخليك تلعب بكيفك.
اجت رسالة على جهازي شفتها من رقم وارث رفعت راسي
شفته لازم جهازه بدون ما يباوعلي كاتب
وارث: شكراً برنسس
ريم: على شنو
وارث: جبتيلي جكليته وسويتيلي اكل
ريم: ولو تدلل عيوني.
رفعت راسي شفت صفا مقلصه عيونها تباوعلي وتباوع الوارث
طفرت من يمهم لا ننفضح اجت وراي تگرص بأيديَّ
صفا: هاا هاا من ورانه
ريم: شكوو هو من وراكم
مبين تحچون ويا بعض
اي أتشكرني
أويلي عليج يمه يتشكرهاا
والله والله.
بَس أوگفي انتم مو نفسكم إلى صرتوا أمالخ واطلگتوا
أي احنا
وهسه
طبيعيين
عزززا عززززا الطم عززا اركص عزززا
هااي شبيچ
سالفتكم مو خالية
شوفي هو صار شي من كم يوم
احچيلي احچيلي
ولي المفضوحة مارايده نفسي اسولفلج
وداعت المُتنمر الگلبي المتلوع بغيبته
ما احچي شي.
يله حلفتي بالغالي صدگتچ
سولفي.
بديت اسولفها كلشي من وارث طلب نرجع شرحت الها كل حرف مني ومنه
صفا: برأيي قرارج چان صح من أتشوفين نفسچ جاهزة ارجعي وياه.
هسه حاولي تحسين العلاقة بينكم من بعيد.
ريم: شنو اخبارچن ويا اختچن
صفا: أحسها غريبة ما ادري يعني ساعة أشوفها طبيعية ويانه
ساعة تحسها قلقة وخايفة وماتحچي
اني همات لاحظت بس بعدها زين منها هسه وهيچ تحچي وتخالط.
جاي تحاول وَهج وياها تغير منها للأحسن.
أن شاء الله.
دخل من الخارج قصي بأيده شغلات شوگت طلع هذا مامنتبهين عليه
صاح على سَند ورحيق انطاهم حلويات اجانه اني وصفا واگفين
قصي: حسبت حسابچن
صفا: شكراً.
قدم مجموعة مال حلويات بكيس انطاهم الصفا.
ورجع طلع كيس ثاني قدمة إلى ومبتسم بوچهي
قصي: وهذا الچ.
بقيت مترددة أخذه أو لا بالاخير قبلته وأخذته
ريم: شكراً الك تعبت نفسك
قصي: لا ولو تدللن.
راح دخل جوا باوعتلي صفا
صفا: انا مش مرتاحة للموضوع
ريم: أحسه خطية هم دا يحاول يتقرب الچن بس مدا أيشوف
قبول منچن مثل أهتمامچن ب اسراء.
طلع وارث نزلت عيونه على ايديَّ اتقدم النا وگف بصفنه
وارث: هذا من قصي
ريم: أي.
سحبه مني أنطاه الصفا وهوَ يگلها
وارث: اخته أولى منچ اكلي حلويات اخوج الف عافية، وأنتِ ماتاخذين شي من غيري.
صعد الغرفته عايفني بنص صدمتي من تصرفه
صفا: هذا شبيه
ريم: شمدريني
صفا: يله عادي اسوي بيهن سهرة ليش نتعافى عليهن.
خذتهن وراحت هزيت ب أيدي تريدلك واحد عاقل ماكو.
وَهج.
بعد ما صار حادث الدم والماي بليلتها ماگدرت انام
من التفكير والقلق إلى عشته بنفس الليلة عميد الدين التفكير اكل عقله.
عميد الدين: وَهج قابل اغبياء گدامهم وين اكو دكتور عنده فوبيا من الدم
وَهج: من الرعب إلى عشته ما اجه أبالي هيچ تفكير.
چاا شني عبالچ مشت عليَّ بس غلست وهمتهم مشت علينا
وضحلي أكثر
مبين هم وَهج ليش امه هيچ انفعلت الشخص الما غلطان
ما ينفعل هيچ انفعال، وفضحوا أنفسهم بأنفسهم من گالوا عنده فوبيا من الدم.
مغزى كلامك قصي ما راجع لأجلنا راجع بعقله شي
يُبا هذا راجع يدور تصفية حسابات ويانه لأن النا أيد.
بتدمير شغل أشرف، وصار مشرد ومات ليش يرجع هسه؟
كلشي مخطط اله، وحتى التانكي من فتحناه مالگينه شي بي
شلون جاب الدم هذا وصعده فوگ وانا وأنتِ گاعدين ماحسينه على شي
يجوز قبل لا ترجع أنتَ
كلشي جائز
عرفته من البداية ماراجع على خير
أي بابا بَس راح نتصنع بالغباء ونخلي يلعب بكيفه
هسه ماعنده أي دليل عنده لازم نتأكد أكثر.
الثاني يوم ظافر خابر وگال راح يجيب اسراء هنا ويا فرحتي بهذا الخبر.
بس خفت تتعامل ويانه مثل اول ماشفتهاا
عميد الدين
أجل الموضوع كم يوم بين أتحسن وضعي
لأن بقيت الايام تعبانة
بسبب إلى صار نزلت جوا شفته گاعد هوَ وأمه
من شافني اجاني
يتصنع ما أدري صدك بس إذا مثل ماگال عميد الدين فهذا تصنع.
قصي: شلون صرتي
وَهج: احسن
گعدت يمهم وأحس بجسمي بعده تعبان
ما أدري شبيه ألم ضارب راسي قوي
علياء: ماعرفتوا سبب إلى صار البارحة.
باوعتلها بطرف عيني
وَهج: لا.
علياء: الدم معناه تهديد مُبطن الكم.
هو بس الغبي ضل ايسوي هالشغلات صدك على طاري الدم
قصي أنتَ غير دكتور شلون عندك فوبيا مثل ما گالت امك.
ركزت أنظاري بحركاتهم طبيعية كانت حتى ما صار مثلاً توتر بملامحهم وتصرفاتهم.
قصي: صحيح عندي بس قبل من سنين قبل لا أصير دكتور
بَس أمي چانت ناسيه هذا الوضع لأن عندها علاج شوي يأثر عليها
واني صار سنتين من تركت وظيفتي لأن ماعندي وقت بين شغلي ومهنتي.
أهاا علاج شنو أمك تأخذ
ابتسم بوچهي.
علاج أحد الأمراض الخاصة بيها.
باوعتلهم وكل ضنهم صدگت من هذا الخريط كله هزيت براسي
ومثلت مصدگة الوضع كله، من گلبي مايرتاح للشخص يطلع وراه مصيبة.
حچيت العميد الدين وچان على نفس قراره وشكوكه
مشت الايام وبعد ماصار شي كلشي هادئ اجت اسراء هنا
وبقيت أتابعها خطوة بخطوة وحچينا اني وصفا وياها
بخصوص وضعها لأن هيَّ ضايجة منه حد ما صدمتني بأحد أسرارها.
اسراء: اريد احچيلچ شي.
فرحت من گالت هيچ اقلتاً ماتكتم وتحسسني غريبة عليها
وَهج: أي احجيلي اسمعچ محتاجة شي
اسراء: لا بس هو الشي غلط اني مسويته قبل وما أدري شلون أصححه.
أعتبريني مرايتچ وسولفيلي
قبل من چنت اجدي بالشوارع مرة من المرات ماحصلت
مثل ما أريد مأمون ف بوقتها دخلت لمحل چان موجود
أشتريت بطل ماي، چنت ألبس نقاب على وچهي علمود محد يعرفني.
أي
ف بيومها شفت جدي بالمحل چان يشتري أغراض.
مواد غذائية وراد كارتون زيت الرجال كله حجي برا تعال اشوفگياه
هو چان لازم فلوس بأيده الرجال طلع گدامه وجدي حط الفلوس
علي الميز وگاله ذني فلوسك، وطلع وراه چنت خايفة
أنضرب وأتعاقب لأن والله ماننضرب ضرب طبيعي
لا ميسون ماتعوفنه الا وهيَّ مزورگة أجسامنا.
لزمت أيدهاا اهدأ بيها صارت دموعها تنزل بغزارة والندم بنبرة صوتها
وَهج: على كيفچ أمي
اسراء: بس خلي أكمل راح اموت من الندم
تمام تمام بس على كيفچ ويا نفسچ.
اتجرأت ومديت ايدي اخذت نص من المبلغ وطلعت
ومن ذاك اليوم لهذا اليوم الندم ماكل گلبي ماتوقعت الرجال إلى بكته يطلع جدي.
أباوعلها ملخت روحها تملخ حسبي الله ونعم الوكيل شگد مدمرينها
ومخلينها أتسوي شغلات لا ارادياً ومجبورة عليهن
أنتِ غلطتي ومتندمة والي يتوب توبة نصوحة
ويطلب من الله السماح مايرده أن شاء الله ونگدر نحچي الجدو
كلشي وهوَ اكيد راح يتفهم موقفچ.
گامت من مكانها خايفة وترجف.
لا لا راح ياخذ نظرة عليَّ ويضوج مني
بالعكس جدو مو من هالنوع.
حاولت أقنعها راح يتفهمها من تحچيله وبعد عدة محاولات گدرت أقنعها.
طلبت منه تحچي وياه طلعوا، طلعت وراهم چانوا واگفين
برا تحچي وياه ودموعها عشرة عشرة تنزل بينما هو واگف يستمع الها
بدون ما يقاطعهاا، انتظرها تكمل
اسراء: أعتذر منك بَس والله ماچان بأيدي شي الخوف
سيطر عليَّ وخلاني أمد ايدي للحرام.
لزمت گلبي وياها خفت لا جدي يظهر منه غير تصرف.
بس كالعادة حنيته طغت على كلشي حضنها يهدأ بيها
عزام: جوا رجليج
اسراء: يعني مسامحني
مسامحچ وبوگتها انا گلت يمكن مرجع الفلوس الجيبي وما أدري.
ورب العالمين راح ايسامحني اني اهواي غلطت بحياتي
مديت أيدي للحرام، خدعت الناس اني مو مجدايه
وجنت اجدي وينطوني فلوس، ومرة من ماتوا اخواني حاولت أنتحر
أحس كلي ذنوب اكره نفسي ما أحبهاا.
نزلت دموعي على حالتها تحچي وترجف هيَّ وصوتها
رفع جدي راسه شافني واگفة صاح.
عزام: تعااي الاختچ جدي.
مسحت دموعي وأتقدمت اخذتها من جدي ترجف من السعفه قلقتني
گعدت بالأرض حاطتها بحضني بينما هيَّ دموعها تارسه وجها.
وَهج: اسراء
ضربت على وجها بشوغه
اسراء: ما أحب نفسي اكرررها ما أحبهاااا.
أريد أگومها ما اگدر هيَّ صاحبة جسم ضخم مو مثلنا
طلع عميد الدين وزيد على صوتها ضلوا متعجبين عليها.
عميد الدين: شبيهاا وَهج؟
وَهج: ما أدري شصارلهاا فدوة صيحولي صفا.
دخل زيد جوا صاحلها اجتني مخترعه من شافت حالتها
عزام: دخلنهااا جوا.
گوا گدرنا نرفعها وندخلهاا ماتعين وأتساعد نفسها.
ما اخذتها للغرفة دخلتها للحمام
وَهج: جيبيلي ملابس الها صفا
طلعت صفا سديت باب الحمام وهيَّ منتهيه
اسراء حبيبتي حرام أتسوين بنفسچ هيچ.
ضلت ساكتة بس دموعها إلى تنزل بهدوء على وجناتها
اجت صفا جايبه ملابس علكتهن وطلبت منها تطلع.
فتحت الدوش شهگت اريدها تصحى سبحتها و غيرت ملابسها.
اخذتها للغرفة چانت صفا وريم موجودات وبوجوهن القلق
گعدتها أنشف بشعرها جابت صفا الاشسوار كملت شعره
نومتها وبس ساكتة ماتحچي يمكن هسه لو ينداس عليها وتتگطع ماتنطق حرف.
ردت أطلع لزمت أيدي عيونها صايرات دم
من البچي إلى بچته
اسراء: لا تعوفيني وحدي
وَهج: ما أعوفچ
رجعت المكاني گعدت يم راسها ضمت راسها بحضني.
صفا: أحنا راح نطلع
طلعت هيَّ وريم طفت الاضوية بقى بس ضوء النوم
وَهج: اسراء تعرفين تقرين المعوذات.
اسراء: لا شلون
سهلات
علميني
هنَّ ثلاث سور تقرينهم، أول سورة الأخلاص الثانية سورة الفلق، الثالثة سورة الإخلاص.
راح أقراهن
أقريهن وأسمحي على صدرج بهدوء وغمضي عيونج نامي.
هزت براسها اباوعلها تحرك بشفايفها ودموعها تنزل خبلتني
ليش هل الدموع
ليش محد علمني ليش ماعندي ام تعلمني ناقصني اهواي شغلات بحياتي.
حضنتها أكثر الحضني طبعت بوسه بخدها
ولا يهمج اني أصير امج مثل ماصرت السَند وصفا أصير ام الج.
غفت ودموعها بعيونها طلعت من يمها راسي يريد ينفجر
من القهر عليها شلون چانت عايشة وبركبتها طفلين والدنيا تدولب بيها.
صفا: شلون صارت
وَهج: نامت، أدخلي جوا يمها لا تعوفينها وإذا صار شي اتصلي أو اصعديلي
تمام
وين سَند؟
أخذه عميد الدين وصعد بي فوگ
خلي الليلة يمي ينام.
اجه جدي يسئلني عنها
عزام: شلونها اختچ وَهج
وَهج: نامت بس تعبانة الماضي مدمرها
الله كريم
صعدت الغرفتي، راسي ياربي موتني من ذاك اليوم لليوم.
الم مو طبيعي دمرني ينزل على عيوني يخليني گوا مفتحتهن.
فتحت الباب ويا فتحة الباب كفختني مثل الريح بوچهي
الغرفة ظلام فتحت الاضوية عميد الدين وسَند نايمين حاطه بحضنه
نزعت حجابي غيرت ملابسي أتمددت بصفهم أبتسمت المنظرهم
سَند حاضن عميد الدين حضنه من هاي القوية ونايم.
حطيت أيدي على عيوني انام بلكي راسي أيصير أحسن
نمت ويا سماع أذان الفجر گعدنا اني وعميد الدين علمود الصلاة.
رجع متوضي مد سجادته و وگف يصلي طلعت للحمام
غسلت وأتوضيت رجعت للغرفة مديت سجادتي هم وگفت أصلي.
بأثناء ما جاي أصلي صارت مثل الاصوات بأذني
خطأت بالسور عدت صلاتي مرة ثانية رجع أتكرر الوضع
اربع مرات اني عايدة صلاتي ضل ألم راسي ينزل على أذاناتي
وعيوني كأنما شعلتها بنار طلعت روحي يله كملت صلاتي وهنّ بس رگعتين.
مجرد كملت وگفت أباوع للغرفة تفتر بي دخت
الغرفة صارت تدوررر وتدوررر عبالك أحد جاي يفرني.
ما أتحملت وگعت بالأرض فز عميد الدين من مكانه وهو الواضح چان يباوعلي لزمني.
عميد الدين: شبيچ وَهج.
لعبت نفسي أريد اذب من راسي دفعته بكل ماعندي قوة
وطلعت اركض للحمام فتحت المغسلة اگح اريد اتقيئ
ماكو بس معدتي وبطني انخبطن خبط غسلت بماي بارد وطلعت.
شفته واگف يم الباب ينتظر بقلق وخوف لزمني
مجرد لزمني گلبي أنقبض وأحس أختنگت أكثر
عميد الدين: شبيچ وَهج
وَهج: عميد الدين لا تلزمني.
دفعت أيده ومشيت للغرفة تاركته ورايَّ بنص أستغرابه من تصرفي.
حضنت سَند غمضت عيوني سمعت الباب
من أنفتح
مافتحتهن ولا هوَ حچه شي للصبح گعدت شفته گاعد
بمكتبته الموجودة بالغرفة وعيونه علينا اني وسَند
عميد الدين: صح النوم يحلوا
رديت عليه بعدم مبالاة وأهتمام
وَهج: صباح النور.
نهضت من مكاني جاي أمشي سحبني
من أيدي
قيدني بحضنه ونظراته كلها أستغراب
عميد الدين: بسم الله الرحمن الرحيم وَهج شبيهن عيونج.
وَهج: بس أبتعد خنگتني عميد الدين.
أبتعد عني وعيونه متشخصة ناحيتي هذا اخر شي اتذكره صار بحالتي.
صفا.
نزل عميد الدين يركض ويصيح بأسم جدي وأمه
طلعوله و وضعه كله مخربط
عزام: شبيك عميد الدين
عميد الدين: وَهج ما أدري شبيهااا
سلمى: شبيها يمه.
مسح وچهه
ما أدري
صعدوا وياه جدي وباجي سلمى صعدت وراهم واسراء ويايَّ
دخلنا للغرفة چانت گاعدى ولا زمه راسها وتون ونين منه
سَند گاعد على السرير وبعيونه نظرات الخوف
من أمه.
راحلها جدي يريد يلزمها عاطت بي بصوت عالي
وَهج: لااااااا تلزمنييي، اااخخخ راسسييي.
ضل الكل متعجب على وضعها
ركضت طلعت سَند من الغرفة نزلته جوا ورجعت صعدت
شبيها اختي محد يدري ولا عميد الدين فاهم شنو إلى بيها.
لزمها عميد الدين يريد يثبتها وهيَّ أتخبلت ملخت عميد الدين
تملخ نبتت أظافرها بوجهه خلت خده ينفط دم
وَهج: عوووووفنييييي
سلمى: ولك يمه خاف مرتك دايسه
عميد الدين: يمه شهل السوووالف وين طالعة هيَّ.
گوا گدر عليها ثبتهاا لازم أيديها ولا كأنما بنيه عبالك رجال.
وجاي يتصارع وياه الولد واگفين برا ماگدروا يدخلون
صاح بصوت عالي عميد الدين
صفااااا تعااااي ساعدينييي الكل يطلع
طلع الكل بقينه اني وياه
وجسمي يرجف من وضعها اول مرة أشوفها بهالحالة.
عميد الدين: خلي نغير ملابسها.
باد حيلها وبدأت تستسلم تغمض بعيونها وتفتحهن
أنشمرت أيدها بتعب حضنها الصدره عميد الدين إلى ما ادري
شحچي وشوصف وضعه طلعت ملابس الها بدلنالها
ونزل شايلهاا صاح على باجي نادية تروح وياه ما ادري وين.
طلعت وراه تركض، البيت كله انگلب من الصبح
والكل يتسائل عن وضع وَهج المفاجئ نزل قصي عيونه بگصته
قصي: وين راحوا؟
صفا: أنتَ شمعرفك بيهم ماچنت موجود
گالت اسراء وهيَّ واگفة لازمه سَند.
اسراء: لا چان موجود بس واگف برا يم الولد ما دخل ماشفتي يمكن.
بقيت ساكتة متأكدة اني ما شفته يم الولد
من چانوا واگفين شلون هيچ
جرت ساعة وره ساعة وهم ماراجعين اتصل بيهم محد يجاوب
وقصي يتصل بجهه تحسه خايف من شي وضعه كله مخربط.
علياء: شبيها البنيه البارحة ما بيها شي.
محد جاوبها لأن محد يدري شبيهاا ريم رادت ماتروح للدوام
بس جدي ماقبل اخذها وارث يوصلهاا
رونق: شو قبل مجان أيصير عندنه هيچ
من هالسوالف الموضوع واگف تررررا.
باوع قصي ال أمه الگاعدة وما مهتمة الشي بنظرات
ما گدرت أفسرها عافنه وطلع برا راحت وراه طلعت هيَّ هم
سحبت نفسي من يم الكل وطلعت وراهم اتختل وگفت بزاوية
ما يگدرون يشوفوني منها، أسمعه يحچي بعصبية ويحاول ينصي صوته.
قصي: إذا طلععععع مسوووووية إلى منعتچ منه راح أتشوووووفين شسووووي
علياء: ديربالك تهدد قصي لا تنسى اني منو اكسر ظهرك كسررر
ليشششش أنتِ ماكسررررتيييي
صوتك لا يطلع أحد ويسمععع وتفضح كلشي وأتصير غبي.
قصي: غبي؟ هههههههه ليش منو صار غبي وراح گال گدامهم
عندي فوبيا من الدم واني دكتور إذا مشت عليهم عميد الدين و وَهج
ماتمشي عليهم ذوله يفرررونچ بعقلهم.
رفع أصبعه يهدد بيها.
أسمعي زين إذا ما تلغين إلى جاي أتسوينه اني اعرف شغلي وياچ
قصيييي
ماكو قصي وماكو ابني تلغيننن كلشي جاي أتسوووينه
مامسووويةةة شي
شگلتتت انييي يمه
لازم الدم حن للدم.
فكه ينبض وعيونه شكلهن يخوف صار قبض أيده دمارات أيده نطت
أردف بنبرة مُستفزة خلتهاا تصير بركان
قصي: كلشي توقعي بالنهاية يبقن اخواتي.
ضحكت بسُخرية بكلامه وهيَّ تگله
علياء: ماما حَبيبي هنَّ حتى مامعترفات بيك وشفت تفرقتهن بينك وبين اختهن الجديدة.
عفتهم ورجعت مسطورة شنو معقولة هم وره إلى جاي أيصير
ويا وَهج معقولة أعمال شعوذه؟ لو شي ثااني.
قبل اذان الظهر دخل عميد الدين شايل وَهج الوجها شاحب
حطها بغرفة باجي نادية ردنا ندخل الها رفض أحد يدخل
بس باجي نادية دخلت جوا قفلت الباب.
صفا: عميد الدين اختي شبيهااا
عميد الدين: هسه عوفوها ترتاح تگعد
أن شاء الله ما بيها شي
عزام: ادرررري غيرررر تفهمناا شبيهاااا
السيد يگول معارضة قرأ عليها
معارضة؟ يعني شنو ما فهمت.
ضل يفهمني شنو المعنى الهذا الشي قشعر جسمي.
نجاة: يجوز من ذيج الليلة البنيه نرعبت وأتعارضت.
بقينه ننتظر وَهج تگعد حد ماگعدت عميد الدين خلاني ندخل الها
رفعت أيدها تعصر بعيونها گعد يمها
عميد الدين
طبگت حواجبها تباوعله
وَهج: شبيه وجهك عميد الدين
عميد الدين: انجرحت مو مهم، شلونچ أنتِ هسه.
أتقصد يلزم ايديها چانت ردت فعلها طبيعية
هو شصاير اني اخر مرة أتذكرة راسي وصارت أصوات بأذني
هايهيه خلصنا تحسين نفسچ أحسن؟
أي احسن.
هز براسه وگام من مكانه رحت يمها حضنتها بس التعب واضح بيها
صفا: خفت عليچ
الكل تحمدلها على السلامة وطلعوا رجع
عميد الدين
مغير ملابسه وآثار اظافر وَهج بخده.
عميد الدين: وَهج گومي أسبحي وتعاي صلي يله
اخذتها ساعدتها وقبل لا نصعد گال
لا تدخلن للغرفة
وَهج: ليش؟
السيد انطاني علاج اغسل بي الغرفة
صفا: شلون وملابسها
انطيها منچ.
هزيت براسي موافقته بالفكرة دخلت للحمام رحت جبتلها.
ملابس بقيت واگفة يم الباب بين ماكملت طلعت رجعت للغرفة
اخذها مني ينشف بشعرها رفعت راسها اله تضحك
وَهج: عُمدة ما تگلي شبي خدك هذا اوگف خاف خايني والبزونه الخايني وياها مشرمختك هيچ.
عميد الدين: اي خنتچ شتسوين؟
قلبت عيونها تضحك
وَهج: ماتخون أنيسة روحك
ضحك وياها بس تحسه قلق عليها من خلال تعامله وياها.
عميد الدين: وَهج دائماً ابقي اقري قرآن
وَهج: تمام
عفتهم وطلعت، وره شوي طلع هوَ هم طلع برا دقائق ورجع.
بأيده ماي ببطل أخذ سطل مال ماي وماسحه صعد فوگ.
رادت تصعد اسراء وراه سحبتها
صفا: وووين رايحة
اسراء: اريد اشوف شيريد أيسوي هذا ضام علينا شي
صفا: دتعاي لا يشوفنه عيب هسه يگول يراقبني
اسراء: خلي يگول.
سحبت أيدها مني وراحت صعدت، صعدت وراها شفناه جاي يطلع بالفراشات مال الغرفة
صفا: عزااا شجاي أيسوي
اسراء: اگلج خاف ذابيلهم سحر سحوري
منو يذب
لولو
لا ما أتوقع بس وَهج من فترة صار شي وياها ومن عنده بدأت تتعب
شنو؟
سولفتلها سالفة الدم ضلت صافنة
اسراء: وماعرفتوا منو وراها
صفا: لا لحد الان، بس عميد الدين ماينسى شي
رجعنه نباوع اله غسل الغرفة كلها وكملها فتح المروحة وطلع
من شفناه طلع نزلنا نركض فلك طرچ اسراء تاليتي أمشي وراچ.
والله مر أسبوع وَهج عميد الدين ماعافها ولا دقيقة
الشغل عاف زيد مستلمة، ودائماً يخليها تقرأ قرأن
و تسمع اله ويبقى يعلمها تقرأ أدعية مال محصنات تقريباً بدأت ترجع على طبيعتها.
گال جدي خلينه كلنا نطلع سفره وهم وَهج تغير من نفسيتها
محد أعترض بس باجي سلمى بقت ويا زينب لأن ماتكدر موزين عليها الحركة.
جهزنا كلشي والولد اتسوگوا كلشي نحتاجه طلعنا أتوزعنا
علي السيارات رادت ريم تصعد ويانه صاح قصي و هوَ بصف سيارته
قصي: ريم تعاي أصعدي ويانه اني وامي وحدنا
ضلت ريم محتارة وارث يباوعلها وذاك يباوعلها بالاخير من الحيره گالت.
ريم: هاا، لا اني راح اصعد ويا زيد.
عافت سيارتنه إلى بيها وارث وراحت صعدت ويا امها وزيد
انطلقنا لأحد البساتين الموجودة بالبصرة الطريق كله
تفكيري بحبيب روحي آدم شنو حاله هسه اني جاي يطمني
عنه عميد الدين كل فترة بس هيچ اخبار ماتبرد گلبي الا أشوفه گدام عيوني
كلشي ماله معنى بدونه بس أحارب لأجل يرجع ويلكاني منتظرته.
وصلنا بعد ساعات للبستان نزلنا أغراضنا فرشنا فراشنا
اجه عميد الدين يمي يساعدني يضحك على سوالف اسراء.
لابسه عبايه وفوكاها شفقه من ذني الكبار
زيد: هاي مخبازه مو شفقه
اسراء: والله حلوة شبيكم ديلا اخذولي صور اخليها ذكرى.
حط زيد أيده على صدره وهو عود صاير شاعر الخايسس
زيد: ذكرى والذكر ذكراكم فكيف القلب يناسكم
اسراء: يناسنه وينعل سلفه سلفانه
ولاحظت قصي أكثر من مرة يحاول يتقرب الريم أما هيَّ
تتهرب منه وأتصده أو وارث يدخل بالخط ويبعدها عنه بس أثاري المنعول چان أباله شي.
رحت يم و وَهج گاعدين تأخذ صور ويا ابنها وجدي
وقصي وأمه گاعدين هم لطشت روحي بالنص وصرت أخذ صور وياهم
قصي: جدي ممكن من وقتك.
نزلت وَهج جهازها واني وياها عرفت وراه شي
عزام: گول جدي
باوع ال أمه هاي ام المجوهرات عبالك ماشايفة
ماضال محبس واسوار وقلادة لابيتهن
علياء: حجي إذا ماعندك أعتراض رايدة ريم ال قصي
البنيه عاجبته وهم مو غريبة بنت عمته
توسعت عيوني.
علي طلبهم ما أنحس غير بنفس اللحظه قصي أنسحل من نصنه وصرخة علياء رجت المكان.