رواية وقار الغريب للكاتبة حوراء السعيدي الفصل الثاني والثلاثون
ريم.
شهگت بصدمة من وارث سحب قصي من قميصة
ما أهتم لأي أي أحد يصيحون يريدون يمعود ماكو فقد
صرخت بخوف من شفته ضربة ضربة بنص وچهه أبتعد قصي
لازم خشمه إلى صار ينزف عاط جدي بصوته
عزام: وووولك واررررث.
وارث: أشتعل ابوووو وارث.
رجع عليه لزمه من فكه و وارث راص على أسنانه وهذا
خشمه ينزف انطاه كله ما أستبعدها كسره
وارث: چنت شااااك بيك يااا نذل بنص بيتنه وتباووووع بأعراضنا حااط عينك على مررتي.
أتغيرت ملامح قصي من بعد كلام وارث الاخير طبك حواجبه
قصي: مرتك؟
وارث: ماالك علاقة اووول وتااالي تررجع مررتي
قصي: اوگف يمكن صار سوء فهم.
دار وجهه خطف نظرات من أمه بخزره ورجع يحاجي بوارث.
تگدر تفهمني شنو علاقتك ويا ريم؟
وليششش أفهمكككك منوووو حضررتك
حضرتي أبن خالها مثل ما أنتَ أبن خالها
صدگ؟ شوو ما أدري.
دخل عميد الدين بنصهم وجدي
عزام: أنتم شنييي ماتحترمووون
عميد الدين: أتخبلتووا، وارث شبيك؟
وارث: چاا شتريدوون أسكتله واني أشووفه يخطبهااا
رونق: شدهن بعد عمر اختك سودا بوجهي يخطبونها گدامك وافشلتاه.
قصي: أنتِ لووو أتسكتين أحسن
عميد الدين: خيررر سالمين؟
قصي: سكت أختك
عميد الدين: رونق محد يحچي وياها غيري أنتبه النفسك والكلامك.
أباوع ال رونق نفشت ريشاتها وغمزت ال قصي
رونق: هيَّ هاي الأخوان إلى ينشد بيها الظهرر
قصي: نفشيهن بعد نفشيهن
رونق: مجاي الحك أريد انفشهن أكثرر أويلي عليج يمه.
عزام: هسسسه أحنا بيا حال وانتم تتعاركون بينكم انفاكك اثنين
يتمالخون أثنين شمالكم خزيتووونه وارث قصي تعالووووا گدامي گعدووا.
لزمتني أمي تسئل بيَّ
نجاة: وجهج صار أصفر سودا بوچهي
ريم: يوووم شوفي الوضع والله بصعوبة واگفة على رجليَّ.
گعد الكل البنات ما أدخلن بقت ساكتات وأخذات وضعية المشاهد
وارث وقصي لو بيدهم واحد يگوم يشرب
من دم الثاني من المخازر مالتهم.
علياء گاعدة يم قصي وتمسح بالدم إلى ينزل من خشمه وجهه محتقنة مدخنه كلش
قصي: أكو شي اسمه تفاهم، ماجان إلا داعي تهجم هيج يا دارس يا مُثقف
وارث: الدراسة والثقافة احطهن جوا قندرتي من الموضوع يتعلق بيها.
باوعله جدي بطرف عينه
عزام: صايرر ماتحترم وارث
زيد: چاا شني اني لو يخطبون مرتي لو حبيبتي إلا اسويها حلبة مصارعة
عزام: راس البله لو تسكت أحسن عبن ماكو غيرك يزيد حطب للنار
زيد: اني شكوووو هاك بله أستلم.
قصي: هسه فهمونا شنو علاقة وارث ب ريم
عزام: ريم جانت مرت وارث وزواجهم إلا أسبابه
وبعدين صارت مشاكل اطلگوا
قصي: زين اني وين غلطي إذا هم زواجهم إلا اسبابه وانتهى
ماخاطبها وهيَّ مرته جدي
وارث: علموود أنحررررك.
عزام: ابووو كمزززة انطينه فنتك نتفاهم
وارث: اني ابو كمزة جدي؟
عميد الدين: يُبا انطوا مجال للتفاهم شبيكم تتعاركون علمود بنيه
وارث: يعني تقبل يخطبون منك ام سَند؟
عض شفته عميد الدين رفع حاجبه.
هسه شكو تدخلون هذا بهذا
گلي تقبل لووولا
خوية التهي بمشكلتك مالك علاقة بينه.
عزام: قصي أبني ريم أن شاء الله ترجع الوارث
بس تحتاج فترة تراجع نفسها لأن قبل صارت مشاكل وطلاگهم
چان الحل الوحيد تنتهي المشاكل كلها وإذا ماچنت تدري ف معذور.
قصي: ما چنت أدري، أعتذر.
گام وارث وطلع لگدام مشى عافنه وراح لزمت راسي
أنهبطت من عركتهم، ومن هذا الساعة قصي بعد ما باوعلي
ولا أتقرب الي، بس من خلال المشكلة إلى صارت.
لاحظت نظراته الأمه مختلفة تحتار شلون تفسرها.
قصي: ارجع أكرر اعتذاري جدي بس والله ماجنت
أدري بكل هذا هو لو منطي مجال للتفاهم چان أتفاهمنا
اسراء: نحتاج دورة تثقيف.
أفترت نظراته عليها أبتسم
قصي: نتعلمها منج
اسراء: ويني وين الثقافة تتعلمون الثقافة
من مجداية.
خفت أبتسامتة أتقدم قريب منها گعد لزم أيدها
هيَّ مثل إلى أتوترت ملامحها بهتت
ليش تحچين هيچ على نفسج
لأن هاي الحقيقة.
رفع أيده لخدها يتلمس بي بهدوء.
مو ذنبج حبيبتي، بعدج صغيرة والحياة گدامج
كل شخص بينا عنده جانب مظلم أسود بحياته.
هزت براسها متوترة منه وَهج صافنة بيهم كأنما جاي تدرس
كل حرف وحركة منه، نهض من مكانه أخذ بطل مي يغسل
عفت كلشي ودگني القهر عليهم تحسه يريد يتقبلنه بس مالاگي هذا الشي.
سحبت بطل مي شربت نصه ريگي جف باوعت بعيوني
وارث گاعد وحدة و عميد الدين گاعد گباله أيسولف وياه
اجت رونق گعدت بصفي مسحت على ظهري
رونق: بيج شي؟
ريم: اخوچ هبطني.
ديلا چاا بس أنتِ ترفعين ضغطه وتهبطينه
امداج
انجبي لِج لا امسح بيج الأرض هسه
خاااب ولي.
ضحكت وضلت عيونها تتنقل بين وَهج واخواتها و قصي
رونق: شو هذا خلاني بتناقض
ريم: قصي قصدج
أي، شيقصد كل شخص بينا عنده جانب مُظلم بحياته
ما أدري، بس ماتحسي مكسور من شي؟
الطامى الكبرى يطلع حاله حال أخوانه واخواته ويطلع ضحية لأشرف وأعماله.
هسه أنتم شبيكم كلكم ما بلعتوا من الاول.
التصرفات الغريبة تجلب الشك، مثلاً عندج سالفة الفوبيا مال الدم إلى جذبوا بيها
بس لحد الان ماشفت منه شي مو حلو تدرين دا أشوفه
يريد يتقرب الاخواته بس هنّ يصدنه.
بقت ساكتة تفر بشفايفها رفع راسه شافها تباوعله
أشرلها براسه بمعنى شكو، رفعت أيدها أشرت اله بمعنى بكيفي
هز بأيده ورجع گعد يم جدي كل شويَّ لازم خشمه بألم.
رونق: خطية كسروا خشمه
قصي: تتحرشين گوا؟
ديلا عاد شلون شخصية وأتحرش بيها.
ولا تگعد طولها شبر وخابصة الدنيا
وات؟ اني طولي شبر ركز زين طولي أكثر من 165
شگد يعني
ما يخصك
تمام.
رجعوا عميد الدين و وارث گعدوا والكل غلس عن إلى صار
ورجعوا يحاولون يغيرون جو جهزنا الاكل والبنات يفترن
بَس وَهج گاعدة بحضنها أبنها إلى مستحيل أيشوف أمه ويتركها.
گعدت احط الفواكة بالسلال وجان يحتاج الهن غسل
حطيتهن بسله كبيرة ورحت للشط إلى صاير مقابلينه
ردت أنزل سمعت صوته ورايَّ
وارث: تعاي بوية وين نازلة.
ريم: أغسل الفواكة.
انطيني اني اغسلهن.
اخذهن من أيدي ونزل يغسل بيهن باوعت ورايَّ الكل مشغول
مامنتبهين علينا نزلت جوا يمه گعدت بصفه
وارث: ليش نزلتي
ريم: أساعدك
شطابخ مفطح
ليش ضايج
وتسئلني ليش ضايج.
شبيك عيوني.
رفع راسه صارت شبه ابتسامة على ثغره
يهنيالي إذا صدك اني عيونج
أتحب عيوني؟
عيون الريم، أموت عليهن
كافي احترررم نفسك
هههههههههه.
صرت أخذ وياه واغسل طاحن تفاحتين بالشط
ريم: هذني شبيهن ما أيريدني
وارث: أني أريدج.
ريم: احترررم نفسك
لحي لحي بيهاا
شتقصد؟ أني ألح.
هذا قصي بعد لا تگعدين بالمكان إلى بي هوَ
الولد ماجان يعرف شي وهسه عرف
ريم لا أتعاندين
لا أتصير أور بغيرتك
الله الله شوف منو تحچي اذكرج بماضيج لولااا يا برنسس يا دكتورة ريم.
غلست عنه هسه لو ملصومة مو أحسلي هذا ماناسي شي
وارث: شو خنستي
ريم: أي شبيكك وارث
جهازي تفتشينه بس تغارين تگعدين تنصبيلج فاتحة وتفتحين بواري عيونج.
تعيررررني وارث.
لا طبعاً، بس لا تحچين بالغيرة وأنتِ عايشتهاا
لا وين هسه أتغيرت عبالك شنو أغار مثل قبل؟ لا طبعاً
متأكدة
أكيد
خوش حجي.
كملنا غسل وطلعنا نمشي وأحنا نمشي گال
وارث: هاي أجن مطبقات للمدرسة وحدة منهن أشوفها أتريد تتقرب إلي
ريم: أكو معضل بالجامعة هم يريد يتقرب إلي
تموتينننن بالمعضل
أكيد
كاافي اسكتي ما أحب هيج شقه
ليش من گال دا اشاقة؟
ررريم سكرررري.
رمشتله بعيوني
لعد بعد لا أتسوي سوالف وتختبر غيررتي شوووف زين اگلك شي.
گولي
اني وحدة مخبله مال غيره يعني خاف قبل جنت راحمتك هسه لااا تمام استاذ وارث.
راحمتني؟ متأكدة
رفعت عيوني للسماء ورجعت نزلتهن
أي ما سويتلك شي
أمشي أمشي الناس راح تتغده وتعوفنا
شو دا أحسك تضحك عليَّ ما أتحبني وارث
سكررري بووية.
خزرته ورحت أمشي گدامه گعدت يم أمي وهو حط بسلال
وحطها بالنص بالسفرة، أباوع للي گاعدين شانه حرب المخازر
أتباوع ال وارث يخزر بقصي، تباوع ال رونق تباوع ال قصي بطرف عينها.
گاموا قبلنا من الاكل وَهج و عميد الدين گالوا
عميد الدين: انا و أم سَند راح نتمشى هنا.
طلعوا يمشون أباوع
وراهم عابت شگد حاملين ثكل ورزانه بشخصياتهم غصباً عليك تحبهم.
اسراء: اگلج لولو
علياء: گولي
اسراء: أنتِ ما عندج بنات
علياء: لا
شعجب المرحوم يگولون ياخذ نفس نمطه.
ضلت تباوعلها ما فاهمة كلامها
والولد يمسحون بوجوهم خافين ضحكتهم.
شنو نفس نمطه
هو يا اما يتزوج وحدة مطلقة أو أرملة وإذا ياخذها بالباكيت.
وره ما يعوفها تروح المحروسة تتزوج وراه
شنو هذا الأسلوب أنتِ وين متربية؟
متنقلة تربيتي
قصي: يمه؟
علياء: شوف كلامهاااا هذا كلام وحدة متربية
اسراء: شبيج اتحسستي هسه إذا أنتِ مو منهن شكو تضوجين
صفا: يجوز منهن هل أتحسست
عزام: بسجن بوية.
سكتن عنها من جدي طلب يسكتن، البنات حيل متحملات عليها
و مستحيل أتصير گعدة بيها علياء والبنات
و أتمر على خير.
اسراء: اخذوولي صور هاي الكشخة كلها وماتاخذولي صور.
زيد: وينها الكشخة لابسة مخبازه فوگ راسج
اسراء: تغار من كشختي معذور
زيد: أي من المخبازه أغار.
هسه شبيك أخذلي صور اني حابه كشختي هاي أقوا كشخة عندي
تعاي يله ما أخليها بنفسج.
طفرت من مكانها فرحانة راحوا وگفوا بجهه يصورون وصفا وياهم
فتحت جهازي مابي نت رجعت قفلته سحبت نفس بعمق
وارث گبالي ما شال عينه عني، خلاني أدخل بحالة توتر گدام الكل ما مهتم.
حد ما رجعوا عميد الدين و وَهج جدي گال نرجع للبيت.
لأن جايينه ناس، لمينا أغراضنا ورجعنا أتوزعنا بالسيارات
قصي: اني طالع للمستشفى الله يسلم الاخ وارث أيده كلش خفيفة
وارث: تستاهلهااا، علمود بعد ما أتخلي عينك على اشياء تخص غيرك.
هز بأيده قصي وصعد بسيارته، أمه اجت ويانه صعدت
ويا عميد الدين و وَهج الطريق كله اسراء ما سكتت
إلى أن چفصت چفصة بگد راسها خلت زيد لسانه يلعلع.
اسراء: والله أشتاقيت الظافر ولابو عضلات المفوخة.
زيد: ولچ ابن عمج گدامج طشرتي هيبة الاحترام
اسراء: درووووح شنو بس لا أتريدون ما أشتاقلهم
رونق: يُبا اخواني شدوهن النسوان خلتكم مكرنيين.
زيد: دسكتن اسكتن
اسراء: شو هم بعد ما أجوا أيشوفوني شنو نسوني؟
زيد: عرفه ولفه وياج علمود يجون أيشوفونج
اسراء: بس ظافر انطاني وعد يجون أيشوفوني.
نسوج بعد منو بحالج.
ضلت صافنة الثواني سكتت وعيونها لمعت بدموعها حچت بغصة
يمكن صدك نسوني.
لزمت أيدها رونق.
رونق: يشاقة وياج، بس ظافر مشغول بشغل بس يكمله يجي أيشوفج.
صفا: زززيد تررررا اني متحمله عليك لا عبالك ناسيتلك
من اخذت سَند وخليتنا ننهبط بيومها ف لا أتضوج اختي هسه
زيد: اختج حساسة، وأنتِ اسراء شبيج لِچ ترا نشاقة وياج.
مسحت دموعها وخلتني صافنة شگد متعلقة بيهم وهيج تبجي عليهم
اسراء: لاا تشاقون بعد هيج ويايَّ حبابين اني كلش أحبهم.
زيد: صار صار بس لا تبچين لا جدي ينعل والديه.
بس أيشوف وحدة منچن تبچي، ما يرضى عليجن يبيعني بچلاق ولا انتن
اسراء: يعني هو صدك هيچ يحبنه
هذا جدي عزام گلبه يحتوي الكل
رونق: أصلاً اني واخواني جدي ربانه رغم إلى اسمه ابونه عايش
لو ما جدي اليوم محد بينه وصل للي وصله هو چان الساندنه من بعد الله.
وصلنا للبيت بعد وقت مر، نزلنا دخلنا للبيت لليل رجع
قصي معالج خشمه مابي كسر بس شوي متضرر
اسراء: اگلج رونق
رونق: هاا
أنتِ شتسوين من اجيتي البيت ظافر هسه طخت بعقلي.
چنت ناسيه اسئلج، أكثر من مرة شفتج يمهم
شغل.
بعدها كلمن راح الغرفته ينام سبحت، مشطت شعري أتمددت بمكاني
أمي صايرة تنام يم جدي هالفترة اجت رسالة من وارث كاتب
وارث: گاعدة برنسس
ريم: أي
وارث: شتسوين
ريم: ناوية أنام، محتاج شي؟
أي
شنو
ترجعيلي.
بقيت صافنة بالرسالة اني أريد هذا الشي ويمكن أكثر منه
بَس خايفة لا يصير شي، رغم أشوف نفسي اهوايَّ تغيير صار.
بَس لا زال حُبه مثل ما هوَ وبكل يوم يزيد أكثر سحبت نفس من أعماق قلبي.
كتبتله وگلبي دگاته طبل مسموعة
موافقة
علي شنو؟
نرجع.
شو بس گتله هيچ اختفى شويَّ واتصل كمزت من فراشي
اكمز واضرب على خدودي، هذا ليش يتصل عززا يمه شلون احچي وياه
انطيته رفض رجع يكرر الأتصال وارفضه بالاخير دز
وارث: جاووبي لا انزلج للغرفة وحگ
علي ابن ابي طالب.
خفت لا أيسويها صدك عاد هوَ صاير فد مرة جاوبته
ريم: هسه مو دا انحجي شكو إلا تتصل.
وارث: أموت بالدا إلى تطلع منج.
أبتسمت الطريقة كلامه
احترم نفسك
محترمها والله.
بقيت ساكتة سويت فراشي خارطة العراق كل شوي قالبة بمكان بدون وعي
ريم
هاا وارث
متأكدة من قرارج يعني صدك قابلة نرجع
أي، بس وارث خلي أسولف وياك
سولفي.
شوف يعني تعرف اني مو بعمر يخليني اوعى الكلشي
بسبب الاشياء إلى مريت بيها صرت متطفلة ماعندي عقل
أفكر بي عدل، تسرعي أكثر شي دمرني التسرع
سويت اخطاء خلتني اكره حتى نفسي.
مسحت دموعي إلى نزلن وكل حرف جنت انطقه من كل گلبي وكل قناعة
ريم: امي زينة كلش زينة، بس وارث أمي ماعلمتني
اني احتاج شخص بحياتي يعلمني ما عليه بالناس إلى اتعلم نفسها
اني دا احجي عن نفسي، اريد شخص من اخطأ يحاسبني
يحاول يعلمني الصح من الخطأ ماريد أحد يخليني كل براحتي واني بهذا العمر.
سحب نفس مصاحبتة حسرة
وارث: چا شگد حاولت وياج بس چنتي ترفضين.
ريم: غرگت بالاخطاء، غيرتي عمتني نفسيتي المدمرة خلتني أتصرف بدون ما أحسب لافعالي والكلامي.
كافي بوية لا تبچين هيج شنو ألي أتريدينه هسه أنتِ
صيرلي كلشي وعلمني
تدلل البرنسس إلى أتريدي أيصير
أني قابلة نرجع دام أنحل كلشي وفعلاً الطلاگ كان بي خير النا أحنا الإثنين وارث
واني ما أعترضت عليه لأن شفت تحتاجين وقت اتراجعين نفسج بي.
ضلينا أنسولف عن بعض الشغلات حد مانعست سديته.
و گلبي مرتاح أتفقنا باجر نرجع نعقد نمت والضحكة بوجهي.
للصبح گعدت، بس بقيت واگفة يم الباب مترددة أطلع
خاف وارث يحجي بالموضوع وأستحي گدامهم وادري كلش زين جدي راح يسئلني عن موافقتي.
وهم ماعندي دوام بقيت أفتر بالغرفة حد ما چيتت عليَّ رونق تتغامز
من غمزاتها فهمت الموضوع أنفتح
رونق: تعاي جدي يريدج
ريم: احم، ليش شيريد
رونق: عيارة لا تتعايرين علساس ماتدرين
شو أستحي
عود المستحى ضمي لبعدين هسه تعاي يله
منو موجود.
كلها طالعة الشغلها بس جدي و وارث وامي والباقين
لعد شبقيتي
عميد الدين وزيد طالعين وهذا قصي وأمه هم طلعوا ف ماكو أحد تستحين منه.
هزيت براسي وبطني خبطت أدري شبيَّ سحبت حجابي لبسته
وطلعت وياها، ضامه نفسي وره ظهرها دخلنا للصالة چان گاعد بصف جدي يسولف.
عزام: ريمه
ريم: هاا جدي
عزام: ما أطولها وياكم، أنتِ موافقة ترجعين ويا وارث
ريم: بكيفك
هههههههههه شني بكيفك جدي غير أنتِ أم الأنا.
ردت اغم نفسي من الفشلة الكل صار يضحك
رونق: خااب احچي عوفيلي المستحى هسه
ريم: أي موافقة.
أحس صخنت من الخجل گدام الكل، وارث بس سمع كلامي
گام من مكانه يريد يطلع صاح وراه جدي
عزام: ووين رايح بوية
وارث: اجيب السيد
عزام: عليمن مستعجل هيج
وارث: خليها سكتة جدي خليهاا سكتة مو أنتَ تدري بالحال.
ضحك جدي و وارث طلع يجيب السيد رجعت الغرفتي
طلعتلي فستان مرتب لبسته وجهزت نفسي بين ما يجون.
دخلن البنات كلهن عليَّ وأستلمني الحقيرات
صفا: طلگنييي طلگنييي ما أررريدك
رونق: ررريم ما اطلگ مااا اطلگ.
ضحكت وَهج على ذني السافلات شلون يقلدن علينا اني وارث
طلعنا مفضوحين احنا وعركاتنا
وَهج: عوفن البنيه
اسراء: هوَ انتم شكو أتزوجتوا وشكو راح ترجعون
وَهج: مو زواجهم جان بالاجبار
اسراء: هاا فهمت.
تقريباً ساعة و دخلت أمي گالت السيد وصل طلعت
بخطوات من غرفتي أدعي بي تكون بداية موفقة إلي.
دخلت يمهم السيد وجدي و وارث موجودين
و أكرم هم نزل من فوگ
امي بصفي گعدت وبدأ السيد يرجع يعقد النا وهذا التوتر
طاح حظه لعب لعب بيَّ، كمل عقدنه الحمدلله ورجعنا محللين على بعض.
طلع السيد و وارث أخذه يوصله الكل ضل يتبارك إلي
حضني جدي باس راسي
عزام: الحمدلله من رجعتوا العقلكم
أكرم: البرنسس أن شاء الله صارت عاقلة هههههههه.
ضحكت منزله راسي، الكل فرحان النا، دخلت للمطبخ.
اجهز الغده ويا البنات نروح منا ونجي منا سمعت صوته رجع
گلبي ضل يركص بنبضاته، للغده رجعوا الولد عميد الدين و زيد
صار عندهم خبر برجوعنا اتباركوا النا
زيد: وچان توم وجيري يتصالحون
ريم: شنو توم وجيري احترم نفسك عيني احنا مثل البلسم.
چذب وببلاش ما ألومج
ريم: احترررم نفسك شنو تقصد اني جذابة وارث شووف شيگول عليَّ
وارث: يشاقة وياج حبيبتي.
قاطع جدالنا ومزاحنا صوت شهگة كلنا التفتنا على مصدرها.
چانت صفا منتهية من البچي لزمتها وَهج بخوف تحاچي بيها
وَهج: شبيج امي ليش تبچين.
رفضت تحچي شي المشكلة هيَّ گاعدة بنصنا هيچ فجئة صار هذا وضعها.
لزمها جدي يحاجي بيها بس رافضة تنطق شي حاول وحاول
ماحصل نتيجة ضامه وجهه بحضن وَهج إلى اتأذه حالها على حال اختها
عميد الدين: ام سَند اخذيها الغرفتها ترتاح.
خذتها وَهج
الغرفتها الكل ضل باله دخلوا قصي وأمه شافوا الوضع سئلوا.
قصي: خير ان شاء الله
عزام: وين جنتوا؟
قصي: شغل جدي لأن تدري شغلي نقلته هنا
هز براسه جدي ضايج وروحه صايرة بخشمه
قصي: بيكم شي؟
زيد: ماكو شي بس صفا م.
ماخلاه يكمل قاطعة
شنوو شبيها صايرر. شي وياها.
الكل لاحظ ردت فعله الغريبة أو بالأحرى ما نگدر نگول غريبة لأن تبقى أخته
رونق: هو ما بيها شي، بس چنه گاعدين والبنيه
صارت تبچي من وحدها خذتها وَهج ترتاح.
هز براسه
وطلع من الصالة صاحت امه وراه مارد عليها.
عاطت علياء ب رونق خلتني صافنة ليش هيج ضاجت.
علياء: هاااي واحد من افلامجن أتريدنه يذل نفسسسه
رونق: يله عادي احنا للممثلين وأنتِ المخرج
لااا تتوقعين أسمح لابني يذل نفسه البنات مارادنه من الأول
شي بينه هوَ واخواته وماكو ذله بالخوة شنو هل العقلية إلى عندج.
عزام: علياء كلامج وازني من تحچين عن حفيداتي
بهذا كلامج تأكديلي ما أتريدين الگلوب تتصافى
علياء: تتصافى؟ شلون تتصافى وابني محد معبره هنا وهااي المجداية بس اجت الكل اتقبلهااا.
جانت تقصد اسراء إلى واگفة يم الباب و دموعها صارت تنزل باستمرار.
عميد الدين: زودتيهااااا كاافييييي ماتووقع ماعندج فكرررة عن إلى وصلهاا الهالمراحل
علياء: فد يوم إذا انباك شي منكم تلكونه عندهاا بعد تربية شارع.
ما أنشوف غير اسراء هجمت عليها طاحت دگ ضرب بيها
حطيت أيدي على حلگي مصدومة و اسراء تضرب من كل گلب
لزمنها باجي نادية ورونق سحبتها من فوگاها
اسراء: محملةةةة عليججج من زمان وچنت سااكتتلج بمززززاجي.
لاااا عبالك أخاف، ماااا اخاف بس من إلى خلقنييي.
علياء: قليلة ترررربية بنت شوارع
اسراء: بَس أشرف منج، ما أستصغرت أحد بيوووم ولا أستنقصت أحد
ولا شفت نفسي احسن من غيررري وعبالج ما ندررىي حتى لووو قصي يريد يتقرب النا أنتِ توزين بررراسه تزرعين الكره بگلبه علينا امددداج الف مرة من بين الأمهات.
ضلن وحدة ترجع للثانية بالكلام وصارت مشاحنات كلام قوية بينهن.
وجدي والولد يحتارون يسكتون منو بالضبط علياء غمت اسراء وطلعت
اسراء: أمشيي لج ام الماركات الخااايسةةة روحييي نظفيي خيسستج بالاول.
حچه زيد وهو متعجب عليهن لأن الكلام صار قوي بينهن
زيد: مو نسوان زلام الله وكيلكم.
رجع قصي عيونه حمر گعد يحاول يتصرف طبيعي
بَس ملامحه فاضحته كأنما اكو شي ضوجة
عزام: قصي
قصي: اتفضل جدي
عزام: تحاچي امك دامها گاعدة بهذا البيت تحترم الكل هنا من الچبير للصغير
قصي: حاضر.
ما سئل عن شي ولا أستفسر يجوز يدري بتصرفات أمه
مشى اليوم و وَهج يم صفا إلى محد يدري شبيها وماتقبل تحچي
للمغرب طلعت وَهج منها راحتلها اسراء تسئل بقلق عنها
اسراء: شلون صارت
وَهج: هدأت أحسن
اسراء: ما عرفتي شبيهاا.
مسحت وَهج وجها بتعب
غياب آدم مأذيهاا
رونق: جاي يتعالج ما رايح سفرة يتنزه بيها
لازم تصبر
وَهج: فهمتها هذا الشي، بس الواضح صبرها طك نفسيتها تعبانة وجاي تكتم.
ريم: موزين تبقى هيج خليها تطلع وأتصلي ترتاح.
لا تخلينها عازلة نفسها تزيد حالتها ماتنقص ترا
وَهج: ياريت تفهم بالكلام.
رفعت اسراء أيدها تكرط بأظافرها وبعيونها نظرات الحيرة
اسراء: اگدر ادخل الها؟
وَهج: عادي بس صفا عمودية راح أتعبج إذا الج نيه تحچين وياها.
اني ما أعرف أواسي بس أجرب حظي
أدخلي
فتحت الباب دخلت يمها جوا بغرفتها واحنا رجعنا كلمن
الشغلها باجي نادية كلامها قليل هاي طبيعتها والحزن غاطي ملامحها.
وگفت يم السنك وجها شاحب وتعبانة لزمتها.
ريم: حبيبتي باجي بيج شي
نادية: بس گلاص ماي ولو أتعبج بنتي.
رحت صبيتلها وشربتها گعدت لازمه راسها
ريم: ناخذج للمستشفى
نادية: لا ماما لا ماكو شي بس أرهاق لا يضل بالج ولا تحجين شي عن وضعي.
هزيت براسي مقهورة عليها هيَّ حتى عازلة نفسها هنا بالبيت
لو تگعد يم امي وخالة سلمى لو يم جدي دخلت وَهج
اتثبتت عيونها عليها لأن واضح كلش التعب عليها
راحت للثلاجة بدون ماتحچي بس عيونها عليها.
أجت عليها سحبت كرسي گعدت گبالها طابكه حواجبها
وَهج: بيج شي؟
نادية: لا ماما
وَهج: باجي اني أعرفج ولأن أعرفج اسئلج ليش وجهج تعبان
نادية: گتلج تعب بنيتي.
وگفت وَهج مامقتنعة بكلامها
تمام باجي، هو دام رجعنا غربة حتى كلامنا صار حالة حال الغريب.
عافتها وطلعت، حسيتها انقهرت من كلامها بس مثل كل مرة تفضل الصمت.
جهزت أغراضي انقلهن فوگ لأن وارث أصر اليوم
أرجع كلشي ساعدتني رونق وامي صعدت أغراضي فوگ.
دخلت للغرفة إلى طلعت منها من أشهر كلشي بيها مثل ما ماهوَ ما متغير شي بيها.
طلعن تركني وحدي بديت أرتب أغراضي باماكنها
أنفتح الباب دخل منه وارث، نزلت عيوني أكمل
عبالك اول مرة أشوفة ونتزوج شهل التوتر
وارث: يا هلا بالبرنسس
ريم: هلا بيك.
گعد على السرير ساكت واني اكمل باغراضي
شلون صارت صفا
تگول وَهج غياب آدم مأذيها
مو بس مأذيها، مأذينه كلنا.
عفت إلى بأيدي باوعت عليه واضح الموضوع هم قاهره
گعدت يمه لزمت أيده.
يتعالج ويكمل علاجه أن شاء الله يرجع
أن شاء الله ريم.
ضربته بخفه على رجله خارزرته
گول برنسس مو ريم.
سحبني من ايدي الحضنه جعصني جعص يبوس بخدي
أنتِ برنسس روحي.
أبتسمت ونهضت من مكاني اكمل، كملت كلشي
باوعت للساعة ب 11 بالليل خذت ملابس ورحت سبحت
رجعت نشفت شعري ومشطت أتمددت بصفه.
وارث: يله ننام باجر دوام عندنا اثنينه
ريم: أنتَ توصلني؟
وارث: أي بابا
ريم: سُرى قطعت حتى السلام بينه.
لأن رفضتي أتساعدينها، وهيَّ عقلها وين صح اخوها
وياها اني ماناكر هالشي، بس غلط مساعدة هيج انسان.
براحتها اني أصلاً ما أحب اصادق بعد ماعندي حظ بالصداقة.
أتقرب إلى يتلمس بأطراف أصابعه وجناتي
لا أتضوجين حبيبتي عندج البنات هنا أعتبريهن اخواتج وصديقاتج
أي هو هيچ.
غيرت مسار نظري متهربة من نظراته إلي
شبيج؟
أنعس
امممم تنعسين
أي وداعتك وارث.
اوكي تعاي نامي
وين
بحضني لو ما أتريدين؟
ها لا عادي.
نام بمكانه خافي ضحكته مادري عليمن مدلي أيده نمت عليها
سحبني من خصري اله ظهري على صدره صار
شدعوة هيج ناعمة عبالك بنتي مو مرتي
ترا انزل يم امي انام احترررم نفسك
چاا هسه شحاچي اني.
غمضت عيوني صدك أنعس رجع باس خدي ضحكت
أنتَ ليش دائماً أتبوس خدي
عبالك خد طفل، أريد اعضج عضه مال واحد گلبه محروگ بس اخاف عليج تتأذين.
درت عليه اضحك
ريم: لا لاتعض لان طبيعة بشرتي ما تتحمل يبقى أثر.
وارث: أداريج مداراة العيون يا بعد العيون
طبع قبلة طويلة بأحد ممتلكاته
ومنها بدأت ليلتنا وأنختم زواجنا بكل تفاصيله قلباً وقالباً.
وَهج.
مرت أيام علياء كل يوم أتحاول أتسوي مشاكل
ويا اسراء حقدها مو طبيعي عليها من جهة هيَّ
ومن جهه صفا إلى بدأت صحتها تتعب وتتراجع عزلت نفسها عن الكل
وَهج: صفا
فتحت عيونها بتعب
صفا: ها وَهج
گومي أمي نطلع للحديقة لا تبقين هيج
لا ما أريد أطلعي أنتِ.
عفتها براحتها ماضغطت عليها المشكلة خايفة لا تدري
حتى آدم صحته متراجعة ومدمر دمار هناك متأذي من العلاج رغم صارلة فترة
فتحت الباب أريد اطلع صاحت ورايَّ.
صفا: وَهج
وَهج: هاا امي
سدي الباب وتعاي
سديته رجعت الها
محتاجة شي
اكو شي راح من بالي اول مرة اكون هيج غبية ومهملة.
شصاير
بذاك اليوم سمعت عيسى وأمه يحجون
من اتمرضتي
شيحچون؟
ما أدري شلون اشرحلج بس عيسى جان عصبي من يحجي ويا أمه.
و، الخ، بعدها عفتهم ورجعت الداخل البيت.
بقيت صافنة بكلامها إلى يحيرك نهضت
من مكاني
تمام راح أوصل كلشي ال عميد الدين أنتِ
لا تحچين شي لأحد
من زمان عميد الدين ماحاجيلي شي عن آدم بي شي؟
لا امي قابل شبي ماشي بالعلاج وننتظر يتخلص من كلشي ادعيله
بس، ولا تبقين بهذا الوضع شوفي نفسج شلون ضعفتي بذني الايام.
ماردت عليَّ، اسراء تگول تگضي الليل كله لازمه جهازها
وتكتب ومرات أتشوفها مطلعة صورة آدم ماتوقعت بيوم.
اختي تحب الهلدرجة، بس طلع كلشي تكتمه بگلبها وتبين الك عكس الحقيقة.
طلعت من يمها أدور على عميد الدين شفته گاعد وسَند ورحيق يمه
يسولف وياهم، يتعامل ويا سَند كأنما رجال كبير ويسمع اله
حتى للطفل مخلي أحترام مو بس للكبير.
طلع من محفظته انطاهم فلوس گالهم
عميد الدين: روحوا اشتروا بس مو وحدكم خلي زيد ياخذكم
وإذا ما اخذكم تعالوا إلى اخذكم يله يا ابطال.
طلعوا يركضون فرحانين.
مسح وجهه بتعب ما منتبه على وجودي حط مقعد جوا راسه وأتمدد.
لازمه راسه، مشيت گعدت يم راسه مديت أيدي الراسه فز من مكانه
عميد الدين: هاي أنتِ من شوگت هنا
وَهج: من جنت أتسولف ويا سَند ورحيق
عميد الدين: حرام إذا انتبهت يمكن من صداع راسي
وَهج: أرجع نام.
ترهم أحط راسي على رجلج؟
هههههههه أي ترهم.
حط راسه على رجلي ضليت أسويله مساج الراسه وهوَ مغمض عيونه
شلون صارت صفا
نفس الوضع.
آدم هم وضعه تعبان وجاي أتصير عنده صخونه قوية يگلولي ينتهي بيها.
عميد الدين خايفة على اختي
ما چانت هيج ليش هسه اتخربط وضعها
ما أدري عجزت واني أحجي وأنصح بيها
خليها يجوز محتاجة هذا الشي.
باوعت للباب ماكو لاحد
عميد الدين
غاليته
اكو موضوع أريد احچي الك
سولفي
ممكن تگعد علمود تركز ويايَّ.
گعد بمكانه يباوعلي بأستغراب
عميد الدين: احچي وَهج
وَهج: صفا تگول من أتمرضتي سامعة قصي وأمه يتعاركون
أي شسامعة.
بديت احچيله كلشي حچته صفا وهو بس يهز براسه بدون ما يقاطعني حد ما كملت.
شفتي شكوكنه بمكانها، بس بشنو كاسره ظهره هااي علياء
ما أدري، هم رجوعهم هنا علمود يأذوني اني مو غيري
لأن أنتِ إلى لعبتي ويا أشرف مو بعيدة اكو حلقات مفقودة من إلى حچوا قبل.
يعني بذاك اليوم من تمرضت سحر؟
لا مو سحر بس صايرة عندج دوسة بسبب ذاك اليوم من أنرعبتي
السحر إذا يريدون أيسونه يعرفون شلون يستخدموا.
وانا لأن صارت عندي خبرة من المرحومة دُنيا عرفت شغلتج مو خالية.
البزونه إلى أذتك اني مو
أي
اسفة
لا تتأسفين لأن مو بوعيج
الحل شنو بخصوص قصي وأمه
أتوقع قصي مو سيئ بس دام گالها كاسرة ظهري
معناها أمه لازمه شي كاسر ظهره بي ولو وگلبي مامرتاحله بس حسب تحليلاتي هيج.
هيَّ أمه تشتغل وياه بشغلة
شي عادي، هم گاعدين عاقلين هالفترة وكلشي هدوء
احتمال جاي يخططون الشي ويريدون يبعدون الشكوك منهم.
دخلت باجي سلمى يمنا، گعدت تسئل عن آدم وعميد الدين يگلها
زين علمود ما يضل بالها يدري بيها ولدها نقطة ضعفها.
گامت من مكانها أتريد تطلع وگع منها علبة صغيرة لونها أبيض
طبك حواجبه عميد الدين يباوعلها
عميد الدين: شنو هذا سمسم
سلمى: علاجي يمه
هز براسه خذته وطلعت للعصر كلش رجعوا قصي وأمه من شغلهم
يتغدون بالشغل، وقصي من النوع إلى يركز اهواي بشغلة
مرات أشوفه من يتناقش ويا أمه يدقق بكلشي.
اخذت العشه بالليل الزينب صعدت فوگ الها هم الحمل متعبها
دگيت الباب طلع أكرم مايعوفها حتى عيادته هاملها هالفترة
أكرم: تعبناج خوية
وَهج: بالعكس تستاهل زنايب
أخذه مني و رجعت نزلت ويا نزلتي شفت باجي سلمى
طالعة من يم صفا أبتسمت بوجهي.
سلمى: أخذت الاكل الصفا
وَهج: هيَّ كون تاكل بس نايمة
حاجيتها هسه بلكي تاكل
رجعنا للمطبخ وريم و وارث بابل الحُب الواضح
برجوعهم هذا بدوا يعيشون ايام السعادة الحقيقية.
ريم: خاب جعت ماكملتوا
وَهج: إذا من رجعتي من الدوام لحد الان بس تقرين طبعاً تجوعين
امتحانات
اسراء: عفيةة امتحانات ماتخلص
ريم: أوف لا تهيجن المواجع.
دخل وارث بس شافته ذبت الملزمة وراحتله حضنته
باسها بخدها وارث اكبر منها إلى ايشوفهم يگول بنته والله
رونق: چبح ولا تخجل هيوو مو گدامج أحنا
ريم: بكيفي وردة بكيفي اخواتي انتن.
ضحكت على سوالفها گعد وارث وريم گعدت گباله.
واكيد ما تخلى أيده بكل مرة يرجع بيها للبيت جايبلها حلويات والي أتريده
وهيَّ إذا ماتسولفله بالرجعة من يرجعها بالليل تگعد أتسولفله
شلون مشى يومها بالجامعة ويا منو حچت ويا منو ما حچت
وهو عود يمل؟ لا مستحيل يضل مبتسم السوالفها وحركاتها.
ريم: هسه اني كملت سوالفي دورك هسه أتسولفلي شسويت اليوم.
ضل يسولف الها شسوا وماسوا رونق كل شوي ذابه
الهم بسمار، واسراء حاطه أيدها جوا خدها تباوعلهم مكيفه بسوالفهم.
عفتهم بالمطبخ رحت أشوف صفا دخلت شفتها صافنة
بالسگف باوعت للصينية مال الاكل ماكله شي قليل
وَهج: راح أموت من قهري صفا تبقين هيج مو دمرتيني والله
صفا: شو هذا العلاج ما يخليني اكل.
عفت كلشي باوعتلها بعدم فهم
علاج؟ يا علاج.
لزمت راسها وگوا فاتحة عيونها دايخة تنعس
شبيج العلاج إلى تنطينياه باجي سلمى.
عبالك واحد وسطرني بكف من صدمتي
باجي سلمى تنطيج علاج؟
أي گالت فيتامين وهم يخليني اكل بس شو بس ينومني ويرخي جسمي.
وينه العلاج صفا عندج؟
لا هيَّ كل يوم تجي تنطيني وگالت وَهج تعرف
أها هيَّ گالت هيج
أي والله هيَّ گالت هيج.
هزيت براسي
بعد ممنوع تاخذين شي صفا
ليش؟
خلي اتأكد من إلى أبالي وارجعلج.
طلعت من يمهم دمي فاير فايررر المنو احچي اخاف احچي
ال عميد الدين وما يصدگني لأن أمه والي يعرف باجي سلمى
مستحيل ايشك بشي، ايشك بالكل إلا هيَّ.
رجعت للمطبخ البنات ينقلن بالاكل وهيَّ موجودة.
من ضمن الموجودين، عقلي تعب من التفكير ما أريد اظلمها
خاف صدك العلاج فيتامين أو شي يخلي صفا تاكل
بس ليش گالتلها وَهج تعرف واني ماعندي خبر عن أي شي.
أحتاريت بين إلى أسولف ال عميد الدين وبين الأسكت وأتابع
الموضوع وحدي بالاول لازم اتأكد علمود ما أظلمها
بقيت أتابع بالموضوع لأيام وبكل مرة تدخل ال صفا تنطيها حبايه
صفا ما تاخذها توهمها اخذتها، لازم احصل العلبة علمود أعرف محتوى ونوع العلاج.
شفتها طلعت من صفا تابعتها بخطوات مخفية حطت العلاج
بأحد المجرات إلى بغرفتها رجعت للصالة أنتظرتها تطلع
بدلت ولبست عبايتها گالت راح أتروح البيت أهلها اتشوف أمها
اخذها زيد وراحوا العصر، كلش ماحبيت تصرفي
هذا أدور بأغراض انسانة مثلها عكس من جنت ادور بأغراض عيسى وأبوي.
فتحت المجر طلعت العلاج وما أعرف مال شنو بالضبط
اخذته وصعدت ال أكرم چان هسه طالع من غرفته أشرتله.
بأيدي وأنفاسي سريعة فحطانه، اجه إلى عباله بيَّ شي
أكرم: خير خوية بيج شي
وَهج: ممكن احچي وياك بموضوع بس يبقى بينه؟
أكيد تعاي ندخل يم زينب
لا لا بس اني وأنتَ خلي الموضوع بينه
براحتج خوية اتفضلي.
مديت أيدي بيها العلبة اخذها مني يباوعلها بأستغراب.
أكرم: شنو هذا؟ منين جبتي
وَهج: مو إلى هذا، بس ممكن تفهمني مال شنو هذا
أكرم: هذا نوع من المهدئات بس كلش قوي منين حصلتي.
مو أي شخص يگدر يحصله لأن ممنوع عند بعض الصيدليات.
مهدئات؟
أي، وإذا الشخص يبقى ياخذ منهن ممكن يدمنهن ومايگدر بعد يتركهن.
بقيت واگفة بنص صدمتي مهدئات؟ باجي سلمى تنطي مهدئات الصفا
أكرم: وَهج ما گتيلي منيلج ذني مو بسهولة الشخص يحصلهن.
هاا مو ألي والله، بس لكيتهن بأغراض عيسى من زمان يمي
بس ناسيه أعرف مال شنو هذا بس ضامته يمي شكراً الك تعبتك
ديربالج أحد يستخدمه يدمره
لا هسه اذبه شكراً الك مرة ثانية.
اخذته منه ونزلت مختنگة اخر شخص أتوقعة ايسوي هيج
هو أنتِ يا باجي سلمى بشنو أذيناج أحنا وهيج جاي أتسوين
صفا تعتبرج مثل امها هيج تأذيها ليش اخذت علاكه سوده
لفيته بيها وطلعت برا للحاوية ذبيتها بي رجعت الداخل البيت.
شلون هسه احچي ل عميد الدين راح يتأذه إذا يدري أمه
هيج مسويةة گعدت على أول بايه من الدرج دموعي نزلت
اچذب إذا اگول ما أنقهرت متت بقهري
ب هالساعة
دخل عميد الدين مجرد شافني اجاني يركض.
عميد الدين: شبيج وَهج ليش تبجين منو وياج؟
وَهج: مو أحد بَس أختنگت.
گومني من مكاني صعد بيَّ الغرفتنا گعدني
احجيلي شنو إلى مضوجج
عضيت شفتي أحبس بدموعي بس مو بيدي ما گدرت اسيطر عليهن
تعبانة على تعب أخواتي
احساسي يكلي غير شي انا يُبا حافظج.
وگفت متهربة منه لا يكشفني ما أريده يتأذه وهو يعرف
بالجاي أتسوي أمه، خذت كلنكس مسحت دموعي أبتسمت
شنو عُمدة قصدك اني اچذب
محشومة بَس وضعج ماعجبني.
مثل ما گتلك تعبانة لأن أنقهر عليهن.
ضمني الحضنه يحچي بنبرة طاغيتها الحنيه
لا تبچين عميد الدين يتأذه ويا كل دمعة تنزل منج
مو بيدي
دائماً يمج انا شتحتاجين لا تترددين تفضفضين، تحتاجين شي، ابالج شي كلشي كلشي راح تلكيني اول شخص عد عيناج.
هههههههه مو گتلك لا تدللني
ليش ماتحبين تدللين
بعدين أطمع
أطمعي الدلال الج يلوك أنيسة روحي
أحب هالجملة
أنيسة الروح؟
اممم.
باس راسي أبتعد يگول
عميد الدين: خلينه نطلع
وَهج: وصفا؟
يمها رونق واسراء
خاف تحتاجني الي
هنّ هم أخواتها.
قنعني غسلت وبدلت نزلنا طلعنا مآذن أذان المغرب ومخلص صاحت رونق
رونق: وين رايحين
عميد الدين: رجال ومرته خاف جدي يسئل عنه بلغي
أويلي لو هيج الرجال ومرته لو مايرادون عمي شنو انتم تنگرطون فدوة لله.
ضحك عميد الدين راح الها باسها ورجع صعدنه بسيارته وصيتها على سَند.
طلعنا من الفرع وشفنا سيارة زيد اجت وياه أمه وگفنا
نزل الجامه عميد الدين يحچي وياهم.
عميد الدين: هاا سمسم شلونها الحجيه
سلمى: والله يمه على الله
زيد: چاا عمرها طك 90 سنة طلابه خو ماطلابه شافت أحفاد أحفادها.
عميد الدين: يُبا الأعمار بيد الله جبير وصغير ربك كل واحد كاتبله يوم.
زيد: انتم وين رايحين
عميد الدين: مرتي ضايجة أريد أونسها
زيد: بعد الحية عرفت شلون تأخذك وتمشيك بكيفها.
أنجب لك ماعندنه زلم تمشي بشور النسوان هذا احترام الهن ومن حقهن
چاا اعتبروني نسوانكم واخذوني ونسوني لو بس الحيايه.
خوب هذا وارث من رجعتله الفاهية لليوم مگابلها وگاعد
عبالك الله من خلقها ما خلق غيرها.
ضحك بصوت عالي عميد الدين يهز براسه
سوالفك وحگ رب العرش تضحكني دوم.
سلم عليهم وكملنا طريقنا، عقلي تفكيره مشتت
أريد احچي وياها افهم أسبابها ليش هيچ سوت
عميد الدين: أي حَ. احم أقصد ست وَهج وين تحبين أنروح.
أبتسمت حاوطت أيده وهوَ يسوق ملت براسي على كتفه
وَهج: بكيفك
شنو هل الوكاحة يُبا
شمسويَّ اووويي هوَ حضنت أيدك.
شفته سكت الدقائق رفعت انظاري عليه عيونه بالطريق صافن
وَهج: عُمدة وين صافن
عميد الدين: ظافر البارحة خابرني وفتح موضوع ويايَّ
موضوع شنو
يريد يخطب اسراء.
رفعت راسي بسرعة گال
ابقي مثل ما أنتِ وسولفي
بس خلي أستوعب كلامك، ظافر خطب اسراء؟
أي وعيونج العمص
ولا يگعد ابو عيون الشهل، بس عقلي شلون يعني دخت.
يُبا هو حتى احسها زحمه احچيها هذا ظافر كلب أبن سطعش كلب
غير تفهمني
خلي نوصل للمطعم وهناك نكمل سوالف.
عن هذا ابن الكلب.
والله وصدك مسافة الطريق وصلنا لأحد المطاعم
الموجودة بالبصرة نزلنا بيها قبل لا ندخل گال
عميد الدين: شو أوگفي
وَهج: شنو
الحمدلله شعرج ما طالع انا كلش مُمتن للكب لأن ريح گلبي
والله من سوالفك صرت وين ما أروح البسه علمود ما تبقى تعلق على شعري.
أندار فدوة للي ياخذ الكلام
أويلي هههههههههه
ههههههههههه آدم راح بس عاف تأثيرة منو يجي صاح أويلي.
دخلنا للمطعم نضحك والله هل المُتنمر إلا وحشة بينه.
گعدنا على الطاولة طلبنا اكل
وَهج: يله كملي عن ظافر وموضوعه
عميد الدين: قصدج الكلب أبن سطعش كلب
عيب عميد الدين ليش تغلط هيج عليه
نمون على بعض، المهم هو هذا الكلب ابن سطعش كلب طلع
مخلي عينه عليها من زمان لأن ابوج جان قبل يخلي ظافر يراقبها
من يجي هنا، وشايف اختج إلى هيَّ طبعاً بنت عمي عرضي.
أي وبعدين
هو هسه مشغول بشغلة جاب اسراء هنا عندنه لأن
اكو جماعة يراقبون بيتهم أتوقع بسبب شغل حازم.
حتى جدتهم مودينها يم خواتهم بالانبار هالفترة
ظافر هسه جاي يشتغل بموضوع أم اسراء يدور عليها يريد يلگاها
لأن سبب موت اخوان اسراء من أيدها حسب ما أدعت
ميسون إلى جانت تشتغل ويا هذا مأمون إلى گتل الطفلين وگتل نفسه.
يدور عليها هنا بالبصرة؟
لا اكيد مستحيل تبقى هنا يجوز شاردة للشمال وهسه
هوَ بالشمال يدور عليها هناك يگول بس الگاها اجيبها تتواجه
ويا اسراء وتحجي كلشي، بعدها تتسلم للقانون.
لأن عندها شغلات هم غير قانونية وراها يخطب اسراء.
وَهج: ما الاگي احسن من ظافر الها بس خاف اسراء ما تقبل
عميد الدين: بعد شي راجع إلها
زين أنتَ ليش ضايج منه
مو كلب أبن سطعش كلب يحچي گدامي يگلي رايد بنت عمك
ههههههههههه تفوخ گلبك جملة كلب أبن سطعش كلب مو
كلش وعلي.
جابوا الاكل بدينا ناكل كل شويَّ صافنة من جهه موضوع
باجي سلمى إلى هسه أخذ حيز مني وهسه موضوع اسراء
اسراء تحتاج اتعب عليها هالفترة وأغيرها مو من لائق.
تبلش حياة جديدة بهاي التصرفات وحتى لو ما وافقت
علي ظافر النفسها لازم تتعلم مو كلشي بالصوت العالي
ولا كلشي بطول اللسان والتجاوز ولو هيَّ من اجت لحد الان ما شفتها أتجاوزت على أحد.
شهيتي مسدودة بس اكل علموده رجع ظهره على الكرسي
عميد الدين: بعدج على قرارج
وَهج: أي قرار؟
بس تأمنين مستقبل اخواتج ترجعين تسافرين.
جاوبته بدون ما أباوع بعيونه أتهرب من ضعفي
أكيد.
ليش تسافرين ابقي هنا يم اخواتج.
اخواتي كل وحدة أتصير عندها حياة وزوج خصوصاً
إذا جانوا ظافر وآدم، اسافر واني گلبي بارد ومطمن عليهن
وإذا جدي ما قبل بقرارج هذا؟
لا مو من حق أحد يمنعني
أهااا، ليش منزله عيونج من تحچين؟
جاي اكل واسولف وياك
الي يعجبج أم سَند براحتج.
عم الهدوء بينا بَس صوت الناس الموجودة بالمطعم واضح.
رفعت راسي چان صافن بيَّ، حتى بعد ما شفته بقى نفس وضعيته
ليش صافن عميد الدين
مشكلتنا مرات الماضي يخلي خوف عندنه نتقدم بنفس الخطوة.
ما فهمت؟
لا تفهمين أحسن
والله صح ما فهمت هالمرة معنى كلامك هذا.
أبتسم رفع ايديه يرفع بشعره لوره
نضرب الوضع تغليس أفضل.
كملنا اكل دفع الحساب وطلعنا نمشي بالشوارع ساكتين
وبس صوت الأغنية إلى مشغلها مسموع كلماتها تخليك تعيش شعور لا ارادياً
بين جرفين العيون
أغرگت والروجة رمش
تيهتني وردت اگلك
هاك أخذ گلبي و أمش
وانا اجيك بشوگ طافح
بين ألومك بين أسامح.
وَهج: مبين تحب التراث القديم.
عميد الدين: يعرفون شلون يختارون كلمات تطيح على الجرح
أحنا هسه وين رايحين
نخلق ذكريات بينه، خافنج تسافرين اقلتاً تذكريني بيهن.
ضل يفتر بي بهالليلة وگفنا گدام محل مال ورود
جابلي باقة اخذتها شميتها عطرها حَلو
بعدها أخذني
للمرطبات يسولف ويضحك بس تحس شي مخيبه
كل ما تصد انظاري اله الگاه صافن بي، اني فاهمة كلشي
أدري بي عنده مشاعر تجاهي بس لليوم ما معترف بشي
وأعترف نفسها المشاعر أنخلقت بداخلي.
بس إذا هو ما أتقدم بخطوة اني ما اگدر أتقدم بأي خطوة
مو موضوع كرامة وثكل، يمكن الوحيد هل الإنسان
ما دور كبرياء وياه، يستاهل كلشي حَلو هل الإنسان
أصعب أوصفه من بين الكل، أحتواني بالوقت إلى أبوي
چان يدمر بيَّ، إذا بيوم گلي لا أتسافرين وأريدج بحياتي
يا وَهج أعوف كلشي وابقى وياه ماراح الاگي احسن منه يكون إنسان رابح گلبي بعد كل هل المعارك إلى خضتها بحياتي.
رجعنا للبيت وهوَ خالق ذكريات حلوة بينه
من كلام وأفعال.
اول ما دخلت شفت باجي سلمى گدامي أبتسمت بوجها
بينما هيَّ على ملامحها مزروع القلق راح عميد الدين حضنها يسولف وياها
اجاه اتصال طلع برا يخابر بقينه اني وياها.
وَهج: شلونج باجي
سلمى: الحمدلله بنتي
نگدر نسولف اني وياج.
ضلت تباوعلي بنظرات وكأنما حاسها گلبها عندي علم بالجاي أتسوي.
تعاي
دخلت وياها الغرفتها سديت الباب سحبت نفس بقهر
وَهج: باجي اني ما أحب الف وأدور صدگيني هسه مقهورة.
حيل مقهورة، ليش باجي أحنا شمسوين الج
شتحچين أنتِ وَهج.
نزلت دموعي لزمتها ايديها أباوعلها بنظرات مخذوله منها.
ليش تنطين صفا علاج مهدئات تدرين بي يدمرها.
انقلب وجها اصفر و أتوترت سحبت ايديها مني أنطتني ظهرها
شتحچين أنتِ.
اخر شخص أتوقعة يأذينا والله ماتدرين بوضعي
من عرفت لليوم، گلبج وضميرج ما أذنج ما خلنج تفكرين
بيوم إذا ابنج آدم يرجع وأيشوف محبوبته حالها تعبان
وهوَ مخليها أمانة يمنا بهذا الوضع شيصير بي؟
انچوى گلبي على ضناي
وتچوين گلبي ب اختي، لا لا اني هالبنات مو اخوات أعتبرهن بناتي حالهن من حال أبني
ابوچ دمر أبني
أبوي مو أحنا، شنووو ذنبنا نتعاقب بسبب أغلاطه
هو أحنا بنفسنا ما سلمنا منه أتريدين غيرنا يسلم.
ما أتوقعتها منج وتفكرين بهذا التفكير والله وداعت ابني
الماعندي أغلى منه أعتبرناج بمثابة أم النا چا انتم كلكم أتفقتوا تخذلون وَهج.
دارت وجها ودموعها بعيونها.
أنتِ أم واني أم هاي أشهر محرومة من أبني أدمرر بسبب السوا أبوج
مووو احنا إلى أذيناه ابوي فدوة أفهميني لا تخليني بهذا الموقف
أخاف عميد الدين يدري بالسويتي ويخشن گلبه عليج خفت من هالشي وسكتت.
گعدت تبچي بگلب محروگ، گعدت گبالها دموعي تحرگ بخدي
باجي منين جبتي هيج علاج
أبن اختي صيدلاني، والله مو سوالفي هاي انا ما اعرفن بيهن
اختي الگالتلي عليهن، وگالت بس يتعب فترة ما يأذي.
شلون ما يأذي ممكن اختي أتصير مُدمنة عليهن.
رفعت راسها تباوعلي بخوف
شنوو صفا راح تموووت.
وگفت وروحي طالعة من التصرف والمشكلة طلعت مدفوعة
لزمت جهة گلبي إلى صارت تأذيني قبل لا أطلع گتلها.
اني مستحيل أسولف شي ولا أوصله لأن ادري بمكانتج
عند عميد الدين وعند باقي ولدج أنتِ أتحملتي وضحيتي علمودهم
بس اتمنى منج اخواتي ابتعدي عنهم لا تأذيني بيهم ما نستاهل
نتعاقب على اغلاط غيرنا مو ذنبنا احنا حالنا من حالكم.
هم اتأذينا وأدمرنا وبالاخير صفينا أيتام مالنا غير بعض.
فتحت الباب وطلعت أحاول اكون طبيعية سمعت صوت ضحكات
جاي من الصالة الثانية، صوت ضحكة البنات
وصوت
عميد الدين يضحك وياهن، فتحت الباب قلصت عيوني أباوعلهم
والمفاجئة صفا هم طالعة وگاعدة بينهن أبتسمت بسعادة.
وَهج: عسا ما أنحرم من صوت هالضحكات
رونق: إذا ممكن توضحين منو بينا بالضبط احنا لو صوت زوجج
رونق: أنتِ انجبي.
أنضميت الهم بالگعدة الولد كلهم موجودين حتى قصي.
ماعدا أكرم من يجي يبقى يم مرته يهتم بيها أحنا مامقصرين
بس هوَ ما يرتاح إلا وهو يهتم بيها.
عميد الدين: عبالي صعدتي فوگ
وَهج: چنت يم أمك
هز براسه گد ما يثق ب أمه مستحيل أيشكك بشي لو يستغرب
لزمت ايدي صفا فرحانة عيونها تضحك
صفا: عميد الدين گال آدم جاي يتحسن.
حضنتها
باوعت ال عميد الدين ما أدري إذا صدك وضعه متحسن لو يريدها تتحسن.
وَهج: أن شاء الله يتحسن أكثر.
ضحكت على زيد واسراء متگابلين يلعبون حية ودرج هاي اللعبة
اسراء: كاافييي تغشششش
زيد: مااغااش أنتِ ما تعرفين تلعبين
اسراء: وحگ الله فددد لوتي أنتَ ابو شوارب المهلسة.
وارث جان يشرب ببسي غص بي وجهه صار احمر
قصي نزل راسه على اللابتوب إلى گدامه يضحك
زيد: منوووو شواربه مهلسه
اسراء: اشاقةة شبيك بس بيك خيط شكار وشواربك مو مثل الباقين كون مثل ذني مال العكيد ابو شهاب.
هو أنتِ لو بيج خير ماتلبسين مخبازة فوگ راسج.
دسكت اسكت شمفهمك بالكشخة أنتَ اقوى شي عندك تلبس قميص وبنطلون وتگول كاشخ.
ولا البس مخبازة على راسي.
ضلت أتسولف منطلقة حتى ويا وارث وهم من النوع
الي هم يحبون يضحكون وييشاقون سبورتية بس عندهم كلشي
بحدود ما يتجاوزون حدودهم بي.
صفا: وين جنتوا انتم
وَهج: أتعشينه برا وافترينه شويَّ ورجعنا.
نزلت عيونها على باقة الورد إلى بأيدي
اووووو شنو هل الباقة الحلوة
عميد الدين أشترها إلي.
بس يرجع المُتنمر غصباً عليه يشتريلي باقات مو باقة.
أن شاء الله
شصار بموضوع باجي سلمى
بعدين أسولفلج مو وكتها هسه.
بقيت يمهم گاعدة بالنص ساعة واسراء كل دقيقة
مكمزتني من صوتها ماعندها شي اسمه هدوء قبل جانت بس گدامنا هسه حتى گدام الولد.
أترخصنه منهم وحتى رونق گعدت تلعب وياهم
وكب العياط قبل لا نطلع گالهم عميد الدين
عميد الدين: صوتكم نصوا وادم نايمة يطلعلكم
جدي يكسر عوجيته على ظهركم بعلي.
صعدنا على الدرج نضحك بسبب سوالف اسراء
شلون أنطلقت بالكلام ويا الولد، الثواني غابت
ضحكتنا
من شفنا إلى گدامنا، معدتي قلبت من المنظر الموجود گدام الغرفة.
قاطع أكمالي بالطريق أيد عميد الدين مانعتني اكمل بطريقي
عميد الدين: أوگفي هنا وَهج
وَهج: شنو هذا عميد الدين.
مشى يتقدم بخطوات حذر ويباوع للمُمر مال غرفتنا
گدام بابنا مذبوب دم بقطع متفرقة و على الباب مخلين أثار دم هم.
دار يباوعلي مستغرب رجع يمي وعيونه رجعت تباوع ل مكان غرفتنا بتعجب
قصي موجود جوا، والدم مبين هسه محطوط
لأن مبين لو من زمان جان يابس.
الدم معناها اكو شخص جاي يدور ثأر ويايَّ اني
ويانه اثنينه مو وحدج، احنا السبب بخسائر أشرف وكلشي يخصه.
يعني؟
إذا قصي جوا، معناها أمه إلى جاي أتسوي كل هذا
هيَّ وأبوي مطلگين ليش تجي تدور ثارات لا لا اكو شي ثاني وره هل الأفعال.
ابقي هنا لا تتحركين، ممنوع تتقربين يم الغرفة أنتظريني هنا يُبا.
نزل جوا، رجعت أباوع المنظر يلعب النفس عبالك ذبيحة ذابح
زين معقولة محد شاف هذا الشي البيت متروس ناس
قاطع سلسلة أفكاري عميد الدين من رجع صعد بأيده الماسحة
و وصلة مسح راح للمكان وگف ينظف بالمكان وملامحه كاشه
نظف المكان كله ورش معطر أرضية نظف الباب هم.
عميد الدين: راح انظف هاي من الدم ادخلي للغرفة أنتِ هاج المفاتيح.
انطاني مفاتيح الغرفة و راح للحمام إلى موجود هنا فوگ
وسد الباب دخلت اني للغرفة نزعت حجابي، الغرفة مثل ما ماعفناها
عميد الدين صار حذر من اخر مرة أتمرضت بيها إذا نطلع
من الغرفة يقفلها يكون أحسن حتى لو يطلع للشغل واني موجودة
من اطلع منها اقفلهاا، والي هنا محد يدخل الغرفة نوم الثاني
خصوصاً الولد مايوصلون لغرفة نوم غرفتي وغرفة ريم.
رجع دخل لزم المنشفه ينشف بيها أيديه.
عميد الدين: هاي سوالف علياء اخذيها مني ولازمه شغلة
علي قصي كاسره ظهره بي ورجعتها بالذات هيَّ تنتقم
أما صدگ علمود أشرف أو اكو شي ثاني مجهول.
شي مثل شنو يعني
الله العالم، وحدة مثلها ليش گاعدة هنا ويا أهل أبنها
وليش صفا سمعتهم يتعاركون هيَّ وابنها إذا ماطلعوا يمثلون
ف هاي لازمه لزمه على أبنها وجاي تستغله بي
ما اتفاجئ، لأن عشت هذا الشي.
تقريباً أمور اهوايَّ متوضحة بس بنفس الوقت أكو أمور مترابطة غامضة.
رفعت حاجبي مقلصة عيوني أباوعله
أنتَ متأكد دارس هندسة؟ عقلك يقلقني
رجعت حليمة العادتها القديمة، بشنو أحلفلج ماعندي أي صلة بالقانون.
أوف منك يالعُمدة
ليش ليش
هيج هيج
تتمنين قصي يطلع زين؟
ما ادري لأن مرات اكو ناس بنظرنه هم ملاك بس يخربون هذا الشي بالاخير
منو تقصدين؟
جاي انطيك مثل يعني مو أقصد أحد.
عميد الدين: انا أتمنى يطلع ادمي وخوش انسان
لأن من نجي للواقع يا أم سَند لو الدنيا كلها تغرگچ بحنانها.
راح تبقين أنتِ واخواتج مستفقدات كل حنية الأب والام والاخ
مايعوضجن أحد بيها، وإذا قصي طلع زين هنا صدگ الله يعوضجن بحنان الاخ الفاقداته.
عميد الدين شگد تحب رونق
روحي من الدنيا هاي.
الله يحُفظها الكم ويحُفظكم الها
تعاااي
وين رايحين
أختلي بيج
ياااا
وداعت اليا إلى يحبها گلبي لأن منچ.
هههههه والله حچاياتك حلوة
گولي حلوا
لا ماتطلع مثل ما أنتِ تگولها
جربي.
قلبت عيوني اضحك بس بداخلي غصه ومختنگة من موضوع قصي.
من لاحظ سكوتي، حط أيده جوا فكه ويباوعلي بينما اني أباوعله بزعل وحزن
عميد الدين: ليش زعلانة يا أم عيون البُنيه
وَهج: ابو عيون الشهل لا تقلد على عيوني.
ما مقلد
بلى
وداعتها ما مقلد
منيه؟
وحدة
اگدر اعرفها.
وحدة عندها شعر كيرلي وعيون بُنيه صغار حلوات
عندها شامة جوا چفن عينها صغيرة زايدتها جمال بالنسبة الي.
هههههههه عرفتها هاي شنو كلش مامركز بيها
يعني أنگول بالصدف نركز
متأكد؟
يگولون هههههههههه
أوف منك يالعُمدة.
نحتاج ال أويلي عليج يمه
ههههههههههه تخص آدم ماتطلع حلوة بس منه
علي طاري آدم صفا گالت من چنا جوا آدم احسن صدك، لو أتريد تهدئها
لا تقريباً أحسن من الفترة إلى فاتت هو يريد يتعالج بس جاي يتأذه
والله گلبي ينمرد من أسمعك هيج تحچي عنه
آدم شُجاع وان شاء الله يتخطى كلشي.
رفعت أيدي لامست ثغره ولحيته إلى مرتبها بطريقة مرتبة
صاحب ال وَقار الغريب
طبك حواجبه
شنو يعني
أنتَ صاحب وَقار غريب.
قبل لا أعرفك أنتَ منو وبكل مرة نلتقي بيها أشوف بيك هذا الشي
رزانه، ثكل، قبول، مجرد النظر الك الشخص يرتاح
كلشي بيك أحسه غريب، چنت أنتَ الغريب إلى بكل مرة أتمد أيدك إلى وأتساعدني.
عميد الدين: چاا شگد حظي حَلو وحدة مثلج توصفني هيچ وصف.
أبتسمت مشيت بخطوات سحبني بخفة أيده مقيدني بين أحضانه
رفع أيده الجهة گلبي إلى نبضه فضحني بلعت ريگ بتوتر
عميد الدين: هذا ليش ينبض هيج؟
وَهج: يمكن من سحبتني هسه.
أبتعد عني، ذبيت نفس براحة مسحت وجهي
راح تموتين شبيج
لا لا ماكو شي بس حباب بعد لا تسحبني هيج خرعتني
أبتسم رافع حاجبه وگف يبدل نزع قميصه
باجر اكو شي مهم لازم تعرفينه
شنو لا دخيلك ماعندي الحيل أتحمل بعد صدمات
نگدر نگول صدمة حلوة يمكن هالمرة.
ماراح اسئل شنو لأن أدري بيك ماراح تحجي ف ما أتعب نفسي
أموت بربج إلى خالقج
ضحكت طلعت غيرت ملابسي ورجعت جان متمدد بس بعده گاعد.
شگد لوتي علمني أنام بحضنه واني هم صرت ما أعرف انام إلا بحضنه.
سحبت أيده حطيت راسي عليها، غمض تك عين وفتح تك عين
شنو هل الوكاحة يا وكيحة
مشكلتك گتلك لا تعلمني، لأن أتعود ماخذت بكلامي
يُبا أحلى تعلوم هذا.
نمنا الثاني يوم سولفت ال صفا عن باجي سلمى
أنصدمت حالها من حالي، وفهمتها ما لازم احد يعرف
علمود الولد خطية، نزلت دموعها
صفا: بس اني مامسويتلها شي.
وَهج: صفا تدرين بيها هيَّ مرة فقيرة وأندفعت خلينا نعذرها هالمرة.
لو ما كاشفتها أنتِ چان دمرتني
محروگ گلبها على أبنها.
بقت ساكتة ريم رجعت من الدوام عليها ضغط هالفترة
حتى ما جاي أنشوفها، اخذت اسراء أحاول أعلمها كم شغلة تغير من نفسها.
بقيت اشرح الها وهيَّ ساكتة تستمع الي
اسراء: يعني ما أيصير اعلي صوتي هيج
وَهج: هو يعني شويَّ صوتج مبالغ بي عالي كلش.
والبنيه حلاتها بهدوئها ورزانتها، اني ما اكلج لا أتسولفين ولا تضحكين
بالعكس طبعج يجنن مرحة واتأقلمتي ويا الكل بس اكو بعض التصرفات تكون عند الإنسان غلط نحاول نعالجها.
اسراء: تمام راح أسوي كلشي تكليلياه اني أحب اتعلم منج
لأن من تحجين ماتجرحين بأسلوبج وتراعين المقابل
بكلامج بدون ما تخلينه يتحسس منج أو يحس بشعور مو حلو.
دام هيج اول خطوة أنسويها نعالج الصوت العالي متفقين.
أي أتفقنا اني والله اريد أتغير واصير مثلي مثلكم ما احب هاي الشخصية إلى اني بيها.
وصيتلها على جهاز علمود أتشوف بي شغلات مفيدة
وصيت زيد يجيبه الها، للعصر خابرني عميد الدين
وَهج: أي عميد الدين وياك
عميد الدين: جاهزة يُبا اني بمسافة الطريق
ماعندي شي هسه أكمل
تمام أستعجلي.
سديته منه وبديت أجهز بنفسي حطيت شويَّ ميك اب بناتي
وسوالف البنات إلى كُلنا نستخدمها بالطلعات بس ما أحب اكثر شي خفيف أحط.
نزلت جوا شافني البنات صارن يتغامزن غلست عنهن.
وصل عميد الدين رمشلي طلعت اله مانازل باقي بالسيارة صعدت وياه
هاا هذا الترتيب يلوك بالصدمة
ويلي أذوب هيج مانتحمل هيج وحدة حلوا گدامنا
هههههههه أمشي يله لا تخجلني أكثر.
مشينا وما أدري وين رايحين ولا شنو إلى منتظرني
والي كان منتظرني مستحيل يخطر أبالي ولا حتى 1 من التفكير.
حد ما وگفنا گدام مكان خلاني أدخل بدوامة أستغراب وتفاجئ.
فتح الباب نزلت وبعدني مستغربة حديقة وتقريباً
المكان بي ناس قليلة، لزم أيدي وابتسامتة مُستمرة
مشينا بخطوات استقبلنا أحد النادلين الموجودين
قبل لا اگعد صفنت با الترتيبات الموجودة بشكل فخم ومرتب
سحب الكرسي أشرلي اگعد، گعدت شي بداخلي
فرح من إلى جاي أشوفه وشي مافاهم إلى جاي أيصير.
وَهج: شنو عميد الدين شنسوي هنا
عميد الدين: اصبري غاليتي.
كانت طاولتنا منعزلة عن الباقين واكو جام حاجز بينه وبينهم.
سحب أيديَّ الاثنين وزع قبل مُتفرقة عليهن.
ردت فعلي كانت مصدومة ما فاهمة شي بس اوزع ابتسامات
مُنبهرة من الأجواء، ضحكت ما أتحملت
تگدر أتفهمني شنسوي هنا.
أنتِ تدرين بكل الماضي وحجيتلج قصتي ويا دُنيا الله يرحمها
ويمكن جان غلط مني ما اتأكد من مشاعرها اتجاهي
وجان لازم أفهم هيَّ ممكن أنجبرت أو مادري الله العالم
إذا اكو أسباب ثانية گلت مستحيل أرجع اكرر خطأي هذا
واتقرب الوحدة مامتأكد منها تبادلني نفس مشاعري.
بَس مثل ما يگولون الحُب من يجي مو من كيفنا.
ثبت أنظارة الداخل انظاري، اني بس صافنة بكلامه مانزلت عيوني
هل المرة ولا أتهربت من شي احساس بداخلي يگلي كملي بالنظر اله
هن عيونج صدگ صغار بس خذن گليبي ودوهننه بلونهن
وين أتريد توصل عُمدة؟
ذب نفس بتوتر ونطق جملته إلى غيرت كلشي
رايدج أتصيرين من ضمن حلال العُمدة أم سَند توافقين
أتصيرين أنيسة الروح لآخر العمر وتعاهديني وأعاهدج أيدي ماتترك أيدج بيوم.
واكون سندج من بعد الله
تعوضيني السنين المُرة واعوضج كل دمعة طاحت من عيونج
مخذولة ومكسورة، أصيرلج الجبر الكسراتج وأتصيريلي الجبر والعوض الكسراتي؟