رواية وتيرة الأعرج للكاتبة حوراء السعيدي الفصل السابع والعشرون
حنين.
محد يقبل يحجي شي و الغريب ابوية منع تواصلنا ويا غياهب حلفنا
مانتصل و لا نروح الها فرفحت على اختي ما متعودة ماحجي وياها كل هالفترة
ابوية ما يتحاچى بركان صاير من الاعصاب حتى خالتي إلى ما بيوم رفع صوته عليها رفعه
نزلت امشي و البجامة وحدة نازلة و وحدة مرفوعة عبالك جنت اتصارع
مو نايمة درغام التحق الدوامه من يروح مو هواية نحجي بس بالي مشتت من تصرفاتهم.
الي تغيرت بدون ما نعرف السبب حتى درغام حاولت وياه بس جوابه.
كان بكل مرة اسئل يگلي من يصير وقتها اريد ادخل للمطبخ مريت من يم الصالة
استوقفني صوت ابوية المفرفح وبهيج وقت متأخر ويامن يحجي؟
سلطان: شصار وياك؟
ما ادري الطرف الثاني شنو انطاه من جواب وصل ابوية المرحلة يعيط بي.
شنوووووو ويننننن اخذهااااا.
بقوا يحجون بس ما فاهمة منو هاي و عن منو يحجون الليل كله گاعدة أفكر.
بس ما وصلت لاي حل الثاني يوم طلعت الدوامي گعدت بعد ما تحمل
هوَ حلفنا ما نتصل بغياهب بس ماحلفنا نتصل باحد ثاني قررت اتصل بالعلوية.
حنين: هلو غرام شلونج
غرام: هلا بيج الحمدلله وانتِ
الحمدلله، اگلج شلونها غياهب.
اختفى صوتها الثواني رجعت أردفت بأستغراب.
غياهب؟
اي شبيج اختي مو چنتكم لو اني غلطانة
لا لا مو غلطانة زينة زينة.
سلميلي عليها ماعرف شنو صاير وياها وويا ابوية مانعنا نتواصل وياها ما تعرفين شي هوَ ما اجاكم؟
اي اجانا مرة بس شسمه ما ادري
اوف تمام عمري شلونه الحمل وياج
الحمدلله.
بقيت اسولف وياها و احسها متوترة بكلامها بدأت شكوكي اتجاهم
خلص دوامي رجعت للبيت وگفت گبال الباب هسه شكو داگته مو عندي مفاتيح
طلعتهن من جنطتي فتحت الباب ويا فتحة الباب اسمع صوت خالتي تحچي.
بنبرة استغراب و صدمة طبكت حواجبي شبيهم سديت الباب على كيفي
بدون ما يحسون ومشيت نيتي ادخل الهم بس استوقف خطواتي من گالتله.
وجدان: ارسلان نفسه إلى صوب حنين بذاك اليوم؟
سلطان: اي و نفسه إلى جبر غياهب على الزواج منه بس مادري بشنو هددها وخلاها تقبل بهذا الزواج.
غياهب ماحجتلك شي
ما سمعت منها كلشي بذاك اليوم فرفحتني
شلوووننن هيج سلطااان بنفسك تگووووول بنتك انجبرت جربت تسمعها؟ هذا انتَ العاقل.
اردف ابوية بنبرة مختنگ.
وجدان مديت ايدي عليها.
اتوسعت عيون خالتي.
ضربت غياهب؟
جانت تستاهلها علمود تصحيها تعرفينني بالخطأ ما اجامل حتى لو جانن بناتي
صدگ تحچي انتَ؟
رمشت بهدوء و اني بقمة صدمتي من إلى سمعته ارسلان؟ هوَ إلى ضربني برجلي، وجابرها على الزواج؟
رجعت تركيزي وياهم.
انتَ منو حجالك
عمر اخوه خابرني بس ماحچى كلشي انطاني الاساس جان خايف
علي غياهب لان ارسلان رايد ياخذ غياهب و يرجع بيها للعمارة.
وين غياهب هسه.
محد يدري ارسلان ماخذها و مختفي بيها.
گعدت خالتي دموعها تنزل ضربت على رجليها.
بنتي هااااي شدددددعي عليك يااا سالم و عمي كله بسببكم فدوة
سلطان الگاهااا لااا يسويلهااا شي هذا الانتقام عاامي عيونه.
طبكت حواجبي عمر؟
يعني نيروز جذبت عليَّ من سئلتها اذا نفسه اخو ارسلان او لا يعني نفسه إلى حبته واتقربلها بغاية انتقام.
رفعت ايدي على راسي و گلبي يأذيني شتحمل يا صدمة بالضبط نزلت دموعي.
بغصه محد يتخبل كبر حبي و احترامي الارسلان يمكن واصلة مرحلة اعزه بمعزة
اختي طلعت من بيتنا بدون ما اظهر اي صوت لازم اشوف نيروز اخر وحدة
اتوقعها تضم عني امشي بالشارع بضياع دموعي ما وگفت ليش جذبن عليَّ.! حتى اختي بس ليشش.
وصلت البيت خالي فتحلي الباب خالي.
عمران: هلا بحنينه.
ابتسمت ما ابين اله شي.
حنين: حَبيبي خالو شلونك
بنص الخير تفضلي.
دخلت جوا صارت بوجهي نيروز مبتسمة اختفت ابتسامتها من شافت نظراتي الها اجت خالة نادين سلمت عليها.
حنين: من رخصتكم بس محتاجة نيروز بشغلة.
طلعنا من يمهم اخذتني من ايدي و تباوعلي بأستغراب اول مادخلنا
ما گدرت اسيطر على دموعي سحبت ايدي منها بنتر.
ليش نيروزه ليشش جذبتي عليَّ.
نيروز: جذبت؟ بشنو
ليششش ماااا گلتي عمررر نفسه اخووو ارسلان.
اتجحظت عيونها ولون وجها تغير اردفت مستغربة.
انتِ منيلج هذا الكلام.
هه لا تحاولين بعد تخفين شي ترا كلشي انكشف ابوية خالتي درغام صار عندهم علم بكلشي.
شعرفوا بالضبط؟
عرفوا كل مخططات ارسلان، عرفوا ارسلان دخل بينا لاجل غاية وحدة هيَّ الانتقام
غياهب وين؟
محددد يدررري اخذهااا اخذ اختي ما ادري وين
اتمنى ابوج سمع سبب زواجها منه؟
بچيت اكثر گعدت بالگاع منهارة.
نيروز ابوية ماااد ايده على غياهب مااا سامع شي منهاا
ضربها؟
هزيت راسي ودموعي تنزل اكثر.
يگول تستاهل هالشي.
نزلت دموعها.
ليش هالقساوة؟ انتم ما تعرفون غياهب بشنو مرت و شنو إلى عاشته و تحملته.
وگفت لازمة ايدها اتوسللها تحجيلي اريد اعرف شنو إلى جبر اختي تدخل نفسها بهيج خطر.
فدوة نيروز فدووة احچيلي انتِ لا تبقووون تجذبووون عليَّ اختي هاااي جااابت عمرها تعب بتعب ما ارتاااحت.
بدأت تحجيلي عن كل فعل سواه ارسلان وياها گلبي انمرد مرد من عرفت
هوَ إلى قلع اظفرها عقلي كاد ينجن واني داسمع افعال هذا الشخص.
حنين: بس شنو التهديد إلى هددها بي وخلاها تقبل بهذا الزواج.
نيروز: انتم.
مسحت دموعي اباوعلها مفاهمة مقصد كلامها.
شنو انتم؟ منو تقصدين
انتِ و درغام خاطرت بنفسها علمودكم
احنا؟
اي
فهميني اكثر
ارسلان هدد غياهب اذا ماتوافق على هذا الزواج راح يأذي درغام و يخسره شغله و.
ايييي وبعد شنوووو احچي كملييي لاااا تسكتين
گالها اذا ما توافق راح يتزوجج الج شهگت فاتحة عيوني الانسان إلى فكرته ملاك يطلع بهيج صورة؟
شدتحجين.
والله هااااي الحقيقة اتمنى عموو سلطان يسمعهااا.
دك جهازي بهذا الوقت ما اهتميتله رجع اتكرر الاتصال فتحت الجنطة
وايديًَ يرجفن صفنت بالمتصل ارسلان؟ ليش متصل عليَّ
ماكو اي صوت
من فتحت الخط الثواني انطبك الخط بوجهي رجعت اتصل بي ما گدرت احصله باوعت النيروز الواگفة عيونها تتسائل.
نيروز: شصار؟
انسد الخط بوجهي هذا ارسلان بدون مايحجي شي
خاف غياهب هاي.
صفنت ابوية محلفني باوعت الها.
شوفي انتِ تگدرين تتصلين عليها حاولي.
اوگفي اجيب جهازي بالصالة.
طلعت تركض تجيبه بقيت واگفة أفرك بايديَّ بس على الاقل اطمن عليها هيَّ
بخير رجعت وگفت تتصل بيها و كلي امل تجاوب بس خاب املي من طلع مغلق
هم مغلق متأكدة صايرلها شي.
بقت تباوعلي نيروز كأنما تريد تحجي شي و مترددة
تعرفين شي و ضامته
لا والله كلشي ما اعرف بس داگول لو نتصل بعمر يمكن يعرف شي
هه عمر نفسه إلى طلع نفسه إلى حبيتي و ضميتي عني.
حنين والله ما اقصد اضم عنج وتعرفين انتِ و غياهب أقرب شي إلى واحجيلكم كلشي
بس الوضع اختلف و غياهب خافت عليج و يمكن الوضع يتعقد اكثر.
اتصلي اتصلي انشوف هذا عمر يگدر يساعدنا او لا.
اتصلت بي وتاكل باظافرها بتوتر رد عليها وكفت قريبة منها اسمع الكلامه.
عمر: هلا نيروزه
نيروز: شلونك عمر
الحمدلله وانتِ طمنيني عنج؟
لاحظت نبرة صوته مثل إلى الشخص ما مصدگ، ما اهتميت رجعت اركز إلى يهمني اختي.
بخير، عمر ليش غياهب جهازها مغلق؟
ارسلان اخذها ما ادري وين و اكيد الجهاز لو كسره لو غلقه
بروح اهلك ما تعرف عنهم شي ومداتضم الاخوك
وروح امي ما ادري بيهم و لا ادري وين خذاها لو ادري ما اتردد دقيقة
وحدة اخابر ابوها بس ما ادري شي حتى من ماخذها جنت بشغلي مو بالبيت.
سدته منه نيروز اخر امل جان عندي راح دك جهازي فزيت بسرعة باوعت عبالي ارسلان بس جان ابوية زفرت نفس بعمق جاوبته.
حنين: ها بابا.
سلطان: اتاخرتي اليوم بابا
يم نيروز شوية واجي
ها لا ابقي انا جايج لا تجين وحدج
براحتك.
سديته ماريد ابين اله اعرف شي خلي اشوف وين راح يوصلون بافعالهم راح يتندمون بكد شعر راسهم سواء اهلي او ارسلان
غياهب.
ارسلان: وبعدددديننن ليششش ماااا تگعدين راحة انتِ.
بقيت ملتزمة الصمت مغمضة عيوني رجع عاط بصوت اقوى.
مووووو احجي ويااااج غيااااهب.
فتحت عيوني اباوعله بنظرة تحدي.
غياهب: نعم؟
ليش اتصلتي على اهلج؟
وانتَ گلتهااا اهلي موووو احد غريب مثل ما انتَ تشتاق الاهلك وتحن الهم اني هم
لاااااا تجبرينييي امدددد ايدي عليج افهمينييي ماااررريدد. اكرررره هذا الشي اخذت عهددد ما تنمددد عليج لاااااا تستفزينييي.
و اذا مديتها وين التغيير بالموضوع مو مديتها قبل
ليشششش مااا تفهميني ليششش بسسس تعاااندين
أفهمك؟ ليش منو انتَ و أفهمك كلك على بعضك واحد يدوز انتقام و ثارات ويلخ الزين بالشين.
رجع ضرب الحايط ويصيح.
ولللججج لووووو اهلج هيجج يصيرررر بيهمك ماراح تسكتينن ورب العباااد مااا تسكتين.
ما اسكت بس ما ادخل نااااس مالهااا علاقة، ارسلان انتَ تعجبني بذكائك بس مرات اكتشف ذكائك هوَ غباء منك.
خزرني بعيونه إلى نطت من كلامي برز شريان إلى بجبينه.
تريد تعرف غبائك وين؟ مثلاً من كل عقلك سالم و عياش من احد بينا يتأذه
او يموت هم راح يهتمون.! لا طبعاً لان هم حياتهم الشي المهم بيها الفلووووس الطمععع.
ما يهمهم لااا اولادهم و لا احفااادهم تدري لوووو ماخذ ثارك منهم هم ما راح ازعل منك
و لا اضوج منك راح اگلك حقك لان هم خلوووك تعيش بتعاسة طول عمرك، بس ارسلان اني و اهلي شنو ذنبنا؟
انتَ ليش ما تفهم تعبنا و احنا نفهمك هل النقطة اني والله العظيم ما اگلك الي
عشته سهل لا لان إلى عشته صعب مو اي شخص يتحمله، انتَ شهدت جريمة
امك إلى تنذبح گدامك وانتَ طفل ورجعت شفت موت الناس إلى تبنوك.
وربوك بسسسسس اني شنوووووو ذنبي تعبتنييييي دمررررتني.
شهگت بدموعي اباوعله لزم جهة گلبه و يعصر بعيونه رجع مرتد لوره لزم بالحايط
يحاول يسيطر على نفسه وضعه دم الرعب بداخلي تقدمتله بخطوات كلها خوف.
غياهب: ارسلان شبيك؟
أشرلي بأيده اطلع برا بس ما هتميت مديت ايدي لزمته من كتفه.
شنو إلى يأذيك؟ أشرلي بدون لا تحجي اني افهمك.
گعد بالگاع متجي ظهره على الحايط شعره ينگط مي لان جان بالحمام صك.
علي اسنانه بقوا يرجف سحبت المنشفة من رگبته گعدت گباله دموعي
نزلت حسيت بتأنيب الضمير لان ذكرته بماضيه يمكن اتاذه بسبب هذا الشي.
لزمت المنشفة ابلع بغصتي انشف بشعره عيوني تراقب ملامحه يطبك بحواجبه ويرجعن طبيعي مثل إلى يتألم.
هييي لا تموت منو يرجعني الاهلي و حتى جهاااز ما عندي كسرت اجهزتنا الاثوووول الغبي.
ما انطاني اي ردت فعل خفت اكثر.
اذا تموت املخك بايديَّ و النبي عود رجعني الاهلي وبعدين موت اخلص منك و من شرك
شوف دانشف بشعرك ايع انشف شعر مجرمين اوگف بله اشوف شعرك غاسله زين.
من كل عقلي اتقربت اكثر اله اتفحص شعره اذا غاسله زين اولا رجعت المكاني احجي بصوتي إلى يرجف.
اي عفية شطور خوش غاسل شعرك هوَ انتَ نظيف بس شكلياً وجسدياً
اما گلبك ايععع اسود مثل عيوني و ماترتب غراضك كله تشمر بيهم شكبررررك بعد تصير.
رجعت دموعي متسللة خدي خايفة لا صايرلة شي عشت بتناقض ماحاسة على نفسي شداحجي.
ولك ارررسلان احچي ويايَّ شنو متت؟ على الاقل گلي احنا بيا منطقة
و شنو هالمكان بس لا جايبني بمنطقة ذني إلى يهزن خصر بالليل ابوووو النسوان حاجيني.
فتح عيونه ببطئ ابتسمت فرحانة جر الكلمة جر بسبب وضعه.
ارسلان: شگد تحچين
غياهب: اتادب عبالي متت گلت لعد بقيتي يا غياهب هنا لمن تفطسين.
ابتعدت عنه تاركته من كل الغرفة جانت الدنيا ليل هذا البيت متكون من غرفة وصالة
صغيرة و حمام و مطبخ هم صغير تعبان و حتى رطوبة بي ابن الاستغفرالله
شكو مكان زبالة مثله جايبني اله، شلون راح اطلع منا هذا مسودن ما ادري
اذا إلى سواه عمر صح او لا بس جانت ضربة مؤذية الارسلان من اخوه باعتبار
غدره بس ما گدر ارسلان يأذي عنده اخوانه خط احمر يحبهم اكثر من روحه.
مرت الساعات و اني گاعدة بمكاني أتحارب ويا افكاري و هوَ حتى صوت
ما طلع اله بعد، وگفت گدام الباب متعصبة دفرت الباب برجلي
و دخلت اريد
اعيط بس انبلع الساني بالمنظر إلى گدامي جان نايم اخذ وضعية الجنين يرجف
وجيف يخوف مو طبيعي ركضت عليه احاول اگعده بس ثكيل ما اگدرله.
ارسلان تسمعني ارسلان.
يرجف كله جسمه و شفايفه حاضن نفسه بردان مديت ايدي على جبينه جان.
مشتعل نار بقيت احارب و احارب الى ان گدرت اسحبه و احطه بمكانه حطيت جوا راسه مخدة وگفت لازمة ظهري.
خرب بعشيرتك كسرت ظهري شثكلك.
بنفس اللحظة ذكرت مرة سولفوا گدامي عمر و ارسلان رغم مو اخوان بالدم
بس عندهم صفة مشتركة من ينقهرون حرارتهم ترتفع و ينتهون، باوعتله اعترف
وضعه خوفني طلعت ادور على شي شفت ثلاجة صغيرة الواضح المكان مجهزة
او احد بي جان لان مجرد فتحتها لگيت بيها قواطي ثلج و اكو كهرباء حطيتها.
بجدر موجود ورجعت اله سحبت مي حطيته صار بارد كلش رجعت اله للغرفة اخذت
المنشفة مالته اسويله كمادات ذكرت نفسي من تمرضت شلون اعتنى
بيَّ عصرت المنشفة حطيتها على جبينه كبل دفع ايدي رجعتها.
ميخالف عيوني هسه تتحسن.
لازم اسوي كمادات الجسمه يعني ايديه و رجليه هوَ لابس قميص حكيت
طرف انفي منحرجة شداتسوي اني اتقربت اله اكثر همست بكلامي.
ارسلان السخيف راح انزعك القميص بس علمود الكمادات خليك عاقل تمام بيبي.
هم بصعوبة كدرت انزعه القميص رجال ثكيل بس القميص لا يگول انتهتكت شرفي
هذا واحد مسربت على گولت مليكة بديت اسويله بالكمادات على ايده و رگبته.
صفنت برگبته مقوسه شفايفي عنده ثلاث شامات بيها وحدة جوا الثانية جايات
ايععع شبيج غياهب، كملت بس مالبسته بعد طلعت رجعت الغراض المكانهن
غسلت المنشفة وشريتها على الباب باوعت نايم بهدوء اخذت مخدة نمت كباله ايدي جوا راسي وصافنة بي.
حتى لو تحبني اني ماعندي نفس المشاعر الك، مشاعري اتجاهك فقط كره
ما اگدر أنسالك شي كل شعور حسيته بسببك جان اصعب من إلى قبله غمضت عيوني غفيت.
الثاني يوم الصبح احس بشي يتحرك يم راسي طفرت من مكاني رجعت انسحبت
مرجعني منومني اتجحظت عيوني من شفته نايم بصفي على نفس المخدة.
غياهب: انتَ شتسوووووي هنااا
ارسلان: اش نامي
لا بله
وداعت عبدلله
هاااا صحيت
لا بعدني ارجعي اهتمي بيَّ حبيت اهتمامج.
الله وكيلك لااا اهتمام و لا بطيخ خفت على نفسي تموت وافطس هناك و ما يلگوني.
أهتز جسمه يضحك بس بتعب.
مو عيب تفطسين وانا موجود
راح افطسسسسس من راك اخخخخ گلبي
ابوسه
اتادب
خوش ارجعي نامي بعد وگت
ليش بيش الساعة
بالستة
قحطططط مخاد نايم على مخدتي
مخدتي مو مريحة.
دجذب عدل لو مجذب على وحدة قشمر مو عليَّ.
دمشي لِج قشمر
ما غيرك القشمر
اخخخ گلبي
جذااااب
عيب عليج تجذبيني و انا مريض
العيب بالجيب
فوصة مو بيدج.
اكو واحد يگول المرته فوصة المسووودن
چا اكو وحدة تگول الرجلها المسودن.
لان انتَ صدك مسودن
امممم
ارسلان
حيلي
ارسسسسلان
عزيزة عيوني
استغفرلله
اتفضلي مسلتي
احترم نفسك.
ارسلان: شتررريدين
غياهب: البارحة ليش تمرضت
استبردت
لا تجذب الجو حار
براحتج لا اتصدگين مامجبوز ابررلج
طبك عرج
وانا الاعرج شدددد
هاي عود مريض
چا اتذكري روحج شسويتي من انتِ مريضة حتى عض ردتي تعضين.
ديلااا ديلااا.
اگلج
نعم
ليش منزعتني.
توسعت عيوني كمزت من مكاني.
شنووووو منرعتك؟
يعني اقصد منزعتني القميص ليش نيتج شطحت.
قلبت عيوني بملل.
نيتي بمكانها انتَ طريقة كلامك مو راحة سخوفية مثلك
اي ما گتيلي ليش
غير سويتلك كمادات
اها وبعد؟
اغتصبتك.
حط ايده على عيونه صار يكح مختنگ بالضحك إلى ضحكه غميت نفسي
سحبت مخدتي من جوا راسه ارگع بالگاع رحت نمت بغير جهة مطنكرة.
ارسلان: اخخخ راح شرفي
غياهب: ترررا اگوم اچفص ببطنك
اسف حضرة المحامية
اسكت خلي انام
نامي يحيلي جعل محد غيرج ينام.
صحت بانزعاج.
اخخخخ گلبي ورم منك.
اخخخخ غياااهب اخخخ
اخخخ ارسلان اخخخ.
سكت غمضت عيوني مرت دقائق اجه صوته بهدوء.
غياهب
اممم
اسئلج سؤال بس اريد اجابة صريحة
شنو.
فتحت عيوني ارمش بهدوء بقت نظراته ثابتة اتجاهي بلع ريگ منزل عيونه.
ليش تلعب نفسج مني من المسج؟
من ايدك انتَ.
امم ممكن تفهميني.
عدلت نومتي نمت على ظهري و صفنت بالسقف التعبان گدام عيوني.
انتَ ما خليت اي مجال بينا اخطائك محت كل الفرص بينا. درت جهة وجهي ناحيته.
تعبتني انتَ أذيتني گلبي مدا يگدر يتقبلك و لا يتقبل شي منك كلشي من ايدك.
بس انتم كلكم ضدي مابيكم إلى وگف ويايَّ
لان ماشي على خطأ بعمرك ماراح تلاگي احد يشجعك ويوگف وياك
محد بيكم فهمني و لا فهم وجع گلبي.
حچى هالكلمات بأنكسار.
حاولت أفهمك بس انتَ ماتنطي مجال للمقابل يفهمك بكل مرة تصدمني بشي اقوى و ابشع من إلى قبله
بس انا.
ما كمل كلامه بقى ساكت يذب حسرات.
انتَ شنو؟
رفع نظراته تلاگت ويا بعض.
أفهمج من نظرات عيونج، أفهمج من نبرة صوتج.
ابتسمت مستهزئه بكلامه كل إلى بالي ديجاملني ويدني استعطفه.
لا تبالغ.
رجع راسه لوره مبتسم و لا زالت عيونه بعيوني.
من رحنا للعمارة و دخلتلج للغرفة گتلج نطلع رغم حاولتي تخفين دموعج بس
نبرة صوتج إلى ما يفهمها اي احد انا فهمتها، عيونج جانت تلمع بدموعها گدرت اشوفهن.
واو شگد مركز بيَّ.
اممم حتى رسمة شفايفج من تغيريها بالمكياج الاحظها
قوي التركيز و التدقيق بس أكررررهك
نامي
نزلت حرارتك يعني؟
صرت زين
حرامات.
نهض من مكانه وكف لبس قميصه طابك حواجبه من شفته وشافني طابك هالحواجب ذكرت اغراضي البقن بالعمارة.
غياهب: اگلك يا ولد
ارسلان: گولي يا بنيه
اريد غراضي إلى بقن بذاك البيت مال العمارة
عود بعدين
معليةةة اررريدهن
انا اجيبلج مثلهن
لاااا اريدهن هنَّ.
الله سبحانه و تعالى عرف شلون ينتقم مني من غربلني بيج
لووووو تموت مااا أتوسل بيك و غراضي تجيبهن غصباً عليك موووو يوميا ماخذني المكان
غير أغيرلج اجواء مع الاسف.
قلبت عيوني درت وجهي عنه رجعت نمت النعاس بعده بعيوني نمت الساعات
گعدت باوعت للساعة إلى گدامي معلكة تشتغل ماباقي شي و يأذن الظهر
نهضت من مكاني افرك بعيوني لميت شعري طلعت اباوع بالبيت ماموجود وينه هذا؟
وين اروح هسه اني مهووسة نظافة و هذا البيت ماعاجبني غسلت وجهي شفت
علاكة محطوطة فتحتها جايب اكل طلعته اكلت شوية ورجعته للمطبخ اكو
مراية گدامي باوعت النفسي ضعفي صاير يخوف ملامحي مخربها التعب
و اني اساسي ضعيفة بس جنت زينة مثا مانگول بيَّ لحمة هسه باقية عظم وجلد.
للعصر كلش دخل عليَّ وبايده اغراضي رحت عليه ما عبالي راح يسويها
ويجيبهن ويروح المحافظة ثانية بس علمود كم كتاب و كوب وهيج شغلات انطاني جنطتي.
ارسلان: اتفضلي حضرة المحامية
غياهب: صدگ عود رجت جبتهن
اممم
شكراً
عفواً.
اخذتها فرحانة گعدت اطلع باغراضي طلعت كتبي و الكوب الس اشرب بي
اباوعلهن و مبتسمة اني من النوع احب احتفظ بالأشياء طلعت الصندوق الي
بي القراصة فتحته طلعتها منه اباوعلها و افكر بالشخص نفسه صاحب
هل القراصة وينك انتَ؟ گلبي بكل مرة ينبض مجرد يشوفها يمكن لان...
ارسلان: الصدف تلعب دورها.
رفعت راسي ما مفتهمة كلامه جانت مرسومة شبه ابتسامة على ثغره.
غياهب: يا صدف؟
الي بالحياة
انتَ تؤمن بالصدف إلى تصيرلك بالحياة
قبل لا، بس صار شي خلاني أصير مؤمن بيها
شنو؟
ما يخصج
خوش
انتِ مو مستعزة بهل القراصة ليش ما تلبسيها
ما يخصك.
بس بهاي شاطرة تردين الشي بالشي
وحدة بوحدة.
وگف لازم فكة يحرك بي.
ابوج ايده شگد ثكيلة سمطني بيها
تستاهل و احمد ربك طلع بس هالشي منه ضملك الاكبر
شيضملي ىثلاً.
سويتله حركة بشفايفي بمعنى ما ادري.
ارسلان: هسه أكيد وصله خبر لان ابوج صاير ذكي و مخلي احد يراقبني.
لعد شلون گدرت توصل هنا و هم مراقبيك
شبيج حبي؟ انا الاعرج يلعبون ويايَّ العب وياهم بالاخطر
اذا انتَ تشوف نفسك مو سهل ابوية هم ما يقل عنك
ارسلان: جيد
غياهب: واحد متناقض
صح.
ما رديت عليه حطيت اغراضي بمكان و هيج مشت الايام يطلع الصبح ما يرجع.
الا بالليل و إلى عرفته منه ديداوم بس بوقت النوم يجي هنا معقولة احنا قريبين
من دوامه بيوم من الايام گاعدة بالليل اتأخر بلعت ريگ من سمعت صوت ماكو
احد بالبيت غيري اختفى الصوت مرت ثواني رجع تكرر، فتحت البال بهدوء
ونبضي ببلعومي صار شنو الممكن يكون هذا الصوت حتى صخمان ماموجود
هنا و اليوم اتأخر مو من عوايده صرخت بصوت مرعوب
و عيوني متجحظة من شفت واحد دخل لابس كله اسود باسود و مغطي حتى.
وجهه بقى يتقدم ناحيتي احس بگلبي راح يوگف ركزت بعيونه و هيئته هذا ارسلان بس ليش هيج لابس.
غياهب: ارسلان؟
نزع اللثام إلى على وجهه مسح جبينه بايده.
ارسلان: لا خياله
ليش لابس هيج
ما يخصج
الصوت إلى جان يطلع منك؟
اممم.
عطت بي صدددددگ تحچي؟
مشاقي وياج مثلاً.
نرفزني ببروده وردوده الجافة اعصابي انتهت حط سلاحه على جهة وگف ينزع.
بساعته إلى لابسها ساكت مشيتله بخطوات و الرجفة بيَّ بحركة سريعة مغافلته سحبت سلاحه باوعلي ببرود.
تريدين تموتيني مو.
بس هنا تغيرت ملامحه و تبدلت من شاف المسدس موجهته اتجاه نفسي اتقدم بملامح قلقة صرخت بوجهه.
لاااااا تتقرب وداعت ابوية بس تتقرب امووووتك و امووووت نفسي.
غياهب عوفي لااااا تصيرين غبية.
نزلت دموعي.
رجعني البيت ابوية
ما اگدر
لاااا تگدرررر الكلشي انتَ تگدرررر
أنطيني السلاح و خلينا نحجي.
ماااا اريد احجي ويااااك الحجي ضاااايع.
نظرلي بنظرات خوف يتنفس سريع رجع نظراته ناحية المسدس إلى بايدي.
انطينياه.
قوست شفايفي يرجفن.
لا تخاف اعرف استخدم السلاح.
بدون سابق انذار ضربت الحايط اتوسعت عيونه من فعلتي يباوعلي بتعجب دار عيونه للحايط ورجع يباوعلي.
شسويتي؟
رجعني للبيت
من كل عقلج.
اتقربت بخطوات مبعثرة غرست فوهة السلاح بقوة بصدره اباوع بعيونه إلى ما اگدر افسر نظراتها.
كرررهي الك ما يتقارن ب أي شي بالعالم.
أدري.
رجعت غرسته اكثر و احجي من بين أسناني ما استبعد اذيته.
لااااا تحچي ببرود.
بقى ساكت يفرك بعيونه مد ايده.
تمام بس انطيني هذا إلى بايدج
ماااا انطي.
ضرب صدره بحيث صدى صوت قوي كمزني من مكاني.
يلاااااااا ارررررمي يلاااااا هااااي فرررصتج و اتخلصي مني غياااهب سلطااان.
بدون تردد حطيت السلاح بنص جبينه عيوني جمرت ملاگيتني عيونه المغضبة و صوت انفاسنا المسموعة ضغطت بخفة.
اني مو مجرمة بس اذا اهلي يتأذون او صار شي الهم شعره وحدة بس
منهم لو اتأذت بذيج الساعة ماراح اتردد و لا ثانية افرغ شاجور برررراسك.
شمرت إلى بايدي بالگاع منهارة دخلت للحمام گعدت وره الباب ايدي على
فمي امنع صوت بُكائي ينسمع مدا ارتاح حتى من ابجي شهگت بنص
دموعي و اني بقلة حيلة من وضعي مسحت صدري شوگت ارتاح من هذا التعب.
حنين.
ما طول ابوية اجاني طلعت وياه راد خالي نبقى بس ابوية گاله وجدان.
وحدها و مبين گوا متحمل الوضع نمشي بالشارع اثنينا ساكتين الى ان كسر حاجز الصمت بينا بسؤاله.
سلطان: شلون جان دوامج
حنين: مثل كل يوم
مو على بعضج بابا
لا ليش بالعكس.
هز براسه وگفت بنص الطريق اباوعله.
بابا ليش مانعنا نتواصل ويا غياهب.
سكت الثواني گال.
بعدين تعرفين
خير ان شاء الله.
دخلنا للبيت صعدت كبل الغرفتي مالي خلگ احجي ويا احد، اخذت ملابس.
سبحت وطلعت وينج يا غياهب صرت اطبق بس كلامج وانتِ ما موجودة. دائماً جانت تگلي من تحسين نفسج ثكيلة و مالج خلگ اخذي حمام
دافي راح يرخي كل اعصابج. طلعت صارت بوجهي خالتي.
وجدان: ها خالاتي ما تاكلين
حنين: لا ما اشتهي.
مدت ايدها لزمت وجهي.
شبيج ماما حتى ابوج ضل باله يگول مو على بعضها
لا يبقى يحس بس بيَّ خلي يحس بتوأمي هم.
عفتها نزلت سمعت جهازي يتصل اليوم جهازي ما سكت عفته نزلت شربت.
مي ورجعت صعدت شفته المتصل درغام انتَ هم مثلهم ضميت عني، شمرت الجهاز
تمددت بفراشي احس ماريد بشر و لا اشوف احد بيهم دائماً يضمون عني
و أصير اخر من يعلم هالشي يأذيني و يخليني افكر اني منبوذة بينهم غمضت
عيوني راسي يدگ عليَّ بالالم من كمية القهر إلى انقهرتها اليوم.
أسبوعين كاملات ماكو اي خبر عن غياهب نزل درغام و هناك بالدوام متعاركين
هوَ و ارسلان لو ما مُجاهد مدخل بينهم جان ماكلين بعض و طبعاً ارسلان.
ذكي لليوم ماخلاهم يوصلون ولا الخيط وصل يدل مكانهم فرهم بعقله، ابوية ما گاعد
بگاع الله بس يريد يوصل اله و طبعاً كل هذا اسمعه من خلال ما اتصنت عليهم مايحجون شي گدامي.
درغام: يعني اجيكم ما تطلعين اتصل ما تجاوبين شنووو وضعج؟
حنين: شبي وضعي مثلاً
حنين گاعدين بمستشفى لاا تخليني اعلي صوتي
و اني مداشوف نفسي حاجية غلط
چااا شيسمون هاااي التصرفات
درغام اني جبت عمري ما اضم عنك.
باوعلي بعدم فهم.
ادري بس ليش تحجين هيج.
دائماً تضم عني
ما ضام غير امور الشغل و ممنوع نشاركها ويا احد
بعيداً عن شغلك متأكد ما ضام شي؟
اذا قصدج موضوع غياهب ف ذاك ابوج و روحيله
ليش؟ مو علساس اختك شو هسه صارت روحي الابوج من سئلتك عنها
كافي ابوية.
عضيت شفتي امنع دموعي تنزل مو وگتها و اني بدوامي وگفت منطيته ظهري.
حنين: عندي شغل اترخص منك.
عفته گاعد ورجعت الشغلي مشيت بالممر ما طايقته اسمع صوته ورايَّ درت وجهي.
اله عيونه بكصته من العصبية اجه يمشي وگف يمي صار يباوع بالممر
ماكو احد بس ممرضة وراحت سحبني دخلني بوحدة من الغرف.
درغام: الج نية تحجين؟
حنين: ما عندي شي احجي
مووو تگولين ما اضم عنك شي
اي هاي قبل مو هسه اما هسه راح اعاملك بالمثل عامل كما تعامل
لزم ايدي نترتها من ايده ملامحه بينت استغرابه من تصرفي ردت اطلع سحبني من زندي.
شبيج بلائي ليش هالتصرفات؟
اسئل نفسك.
أبوية افهميني اذا شخص مأمنج على شي ماتحجينه تروحين تحجين بي؟ لا اكيد ابوج مأمن بيَّ شلون تريدين احجي.
رصيت على أسناني احجي بعصبية مبطنة.
بسسس هااااي اختي
ادري ومحمد ادري بس لا تخليني بموقف صعب ويا ابوج
ما يحتاج تحجي لان اعرف كلشي ديصير.
رفع حاجبه بتسائل.
منين تعرفين وشعرفتي؟
مو مهم
لاااا تفتين اعصابي.
ومعلومة بعد اعرف شي انتم بذاتكم ما تعرفوا و لو عرفتوا تعضون اصابيعكم.
ندم لان ظلمتوا اختي و اقسم بالله ما راح احجي الكم الا تلكون اختي
بيومها تعرفوا إلى ماخليتوها حتى تبرر وتدافع عن نفسها وتوضحلكم
بس انا ما حجيت شي وياها ابوج إلى حچى وياها.
ليششش ما حجيت هااا گلي ليشش هم ابوية منعك؟ لو كلكم هايهية خليتوا ابالكم فكرة اختي غلطت و تتعاقب.
حنين؟ ما افكر هيج انا تعرفين بمعزة غياهب عندي بس ابوج مادري شبيه.
نزلت دموعي سحب راسي حاضني.
حنين: اذا اختي صارلها شي ماراح اسامحكم لان عفتوها بايد ارسلان
نفسه ارسلان إلى مداتقبل حقيقته و بيوم مو الايام اعتبرته اخوية و عزيته.
ارسلان مو سهل گدر يخفي كلشي
اني خايفة عليها
قوية غياهب.
مووووو قوية اختي ضعيفة والله ضعيفة تتصنع القوة علمود ماتشوف احد
يستعطفها او يگول عليها خطية وينظرلها بشفقة انتم ماااا تعرفون غياهب شنو
الله كريم، شلون عرفتي
سمعت ابوية يحجي الخالتي و اتمنى ما تبلغه اعرف بشي.
ماشي كافي لا تبجين و تمردين گلبي اكثر
ليش تعاركتوا انتَ و ارسلان
لان ما يرضى يگول مكان غياهب بس گال مابيها شي و بخير
وانتَ صدگته؟
لا.
مسح دموعي و هوَ يگول.
بعد لا تتعاملين ويايَّ هيج
تستاهل علمود متضم شي.
شرحتلج موقفي
أنتم دائماً تضمون عني
مو انتِ رقيقة ما تتحملين هالمصايب
سحگت رجله بالكعب بكل حرگة گلب خليته يكمز.
حنين: جااااي احچي صدگ.
درغام: انعلللل ابوج ثاااني مرررة تسوينهااا هذيج المرة زرفتي رجلي بالكعب و هسسه سويتيهااا
علمود ما تستهزأ بيَّ
ومحمد التوبة استهزأ بس على كيفج حنين الشرسة.
يله روح عندي شغل شنو حلتلك الگعدة هنا
تطرديني؟
شتريد تعتبرها اعتبرها
احنا شوگت نتزوج؟ شنو هل الحظ الفكر كل مانريد نتزوج تطكنا سالفة صفح
ما اتزوج الا اختي ترجع
خليني لازم الساني و ما اسب ارسلان لان اهله ميتين.
مسحت وجهي دايخة.
حنين: لو انتَ بمكان ارسلان تسوي نفسه؟
صفن و طول بصفنته الا جاوبني.
أي انتقم بس ما ادري حنين انا عتبي وياه لان دخل غياهب بانتقامه
ما اخذه من اجدادنا بنفسهم و محمد اوگف وياه و لا اكله على عينك حاجب
هوَ غلط من دخل اختج و عمي سلطان من راح ياخذ غياهب بعد ارسلان يحلم ايشوفها.
داحس عنده جانب ثاني مخفي.
شخصيته تحير اذا يكرهنا هيج ليش بذاك اليوم خاطر بنفسه علمود ينقذني.
يمكن جان يموت ماراح انساله هذا الموقف بس هم اذانااا فقددت عقلي
من عرررفت نفسه إلى صوبج برجلج نوووب الكلب يگول ما جانت هيَّ الهدف
يمكن صدگ؟
چا شنو جان
ممكن هاي رسالة تبليغ.
بقى ساكت دك جهازه جاوب المتصل.
ها مُجاهد. لا يم حنين بالمستشفى. يله جايك.
سده منه سحب ايدي باس باطنها.
درغام: راح نلگاها و احاول اسوي كلشي بس علمود نوصل الها
حنين: اتمنى.
انا رايح المُجاهد انشوف على من زمان ما شايفينه.
بس على عنده اخت ما متزوجة
چا شعلية بيها؟
ما ادري بس ليش ما تلتقون بمكان عام.
ابتسم بوجهي.
هوَ راح نلتقي بمكان عام مو بيته.
ها خوش يعني اكيد زوجته وأخته يريدون ياخذون راحتهم.
باوعلي بطرف عينه طلع طلعت وراه وصلته الباب المستشفى ورجعت الشغلي
غرام.
رجعوا الولد بيوم ما ارسلان اخذ غياهب كبت عندنا ويتصلون بي ما يحصلونه
حنين من اتصلت ما گدرت احجيلها شي لان جان الواضح ماتعرف شي، گاعدين.
اني و ناز إلى ما گطعت سؤالها عن ارسلان تعلقها فضيع بي دخل عمر لازم راسه.
عمر: السلام عليكم
غرام: عليكم السلام شعجب راجع من وگت
اي والله راسي مصدع و ما اكدر اركز بالشغل
سلامتك انطيك علاج.
شربت نفسي الشي بس ولو اتعبج سويلي چاي شوية ثخين يعدل الراس يگولون.
من عيوني.
الله يحفظج.
ابتسمت دخلت للمطبخ اسويله إلى راده اسمعه يسولف ويا ناز بكل حنية
مرات من اشوف حنية ارسلان و عمر عليها اگول الحمدلله الله رزقها بهيج.
اخوان حتى انسام حنونة مثلهم بس مو دائماً تگدر تجي لان بيت وزوج و اطفال مسؤؤليات.
بس من تجي ما تقصر تدخلها للحمام وتسبحها و شكو شي يخصه تقوم
بواجبها رغم مامقصرين وياها احنا من ناحية الاهتمام وگفت بباب المطبخ
اباوعلهم مبتسمة الشكلهم حاضنها ويسولف وياها شگد فرق بشكلهم ناز
ماتشبهم و لا حتى بشوية نسخة امها عفاف الله يرحمها انقهر من اشوفها بهذا الجمال.
وبهيج وضع بس نگول الحمدلله على كلشي كملت الچاي صبيته طلعت الهم انطيته ال عمر.
عمر: رحم الله والديج
غرام: ووالديك.
گعدت گبالهم يشرب و يتلاطف وياها بالكلام هيَّ مو هواية تحجي اكثر
شي تبقى مبتسمة بقى عمر صافن بيها رفع راسه گال.
عمر: علوية تدرين المفروض احنا نتشكر غياهب
غرام: على شنو؟
لان ناز بفضل الله وفضلها اليوم گاعدة بينا بدون متأذي احد صح.
ما اتشافت بالكامل بس اعتبره انجاز شخص مثل حالة اختي يوصل لهيج نتيجة.
صح والله لو ما هيَّ تبقى مُصرة تعرضها للدكتورة ما تقدمت هيج بحالتها.
هز راسه بأسف.
بس لو ارسلان يفهم
فاهم كلشي ارسلان بس اكو شي عامي عيونه ومخلي يسيطر عليه
هسه بس لو يتصل على الاقل يطمنا خاف سوا شي للبنيه
ما ادري كُميل يتصل ما يحصله.
و اهل غياهب ما ساكتين يريدون بنتهم
خايفين عليها بعد إلى عرفوا.
طلعت مليكة شادة راسها گعدت باوعت ال عمر.
مليكة: عمير مت عرفتوا وين أخوك اخذ هل الفرخة ووله
عمر: لا والله هسه تلگينهم صايرين هدني و أهدك
و أبو الزايد كون تكسر راسه نل غياهب تعجبني كوية بعد روحي.
مليكة شبيه راسج ليش شادته
من فصولكم الناگصة يا منعولين الوالدين
شمسوي انا شو ماخذين خاوة عليَّ ياهو الاجه ذب حرگته بيَّ
گوووم منا من عسا مرض ما اله دوه
جذابة والله بس نتمرض تسوينها فاتحة علينا بس مليكة لا تدعين على اخوي هيج.
حطت شيلتها صفح ماردت عليه ناز تباوعلهم مبتسمة گرص عمر خذها و هوَ يگوم.
عمر: راح انام ساعتين و گعدوني إلى يگعدني الله ينطي قصر بالجنة.
شو هذا رجع گعد باوع علينا.
خلي اسولفلجن سالفة ذكرتها و انا راجع بالطريق.
غرام: اتفضل.
باوع المليكة كاتم ضحكته.
عمر: مليكة تذكرين اخوج جاسم المات.
مليكة: يمه اخوي عمت عيني عليك يا خوية.
هسه عليمن عمت عينج غير جان بطل الزيت يبقى ياكلون بي شهرين انا اشك طگه جفاف و ومات.
ضربته مليكة تحجي عليه.
عمت عينك اخوي هذا الناس كلهت تدري بكرمة
وحگ العباس ابو فاضل جذب حتى الخطار من يجي يحطلهم مركة عدس محمضة.
لميت شفتي لداخل فمي عيب من مليكة اضحك لان اخوها يصير، كفخته على راسه تصيح.
ووولكم مووو اولاد شياطين ولللج عفاااف شخلفتييي ورحتي.
بس ذكرت اسم عفاف اختفت ضحكة ناز وگفت ايديها على اذاناتها
تهز راسها برفض كلنا وكفنا اتقرب عمر يلزمها رفضت.
عمر: ناز حبيبتي ماكو شي مليكة جاي تضحك.
اردفت من بين وضعها و الكلمة تطلع گوا.
ناز: م. ماتت مااااتت.
بصعوبة عمر سيطر عليها حضنها يهدي بيها ما استبعد ذكرت حادث امها
لان صار گدامها دخلها عمر الغرفتها وهوَ يحجي وياها گعدت مليكة تبجي وتلوم بروحها
گتلها موذنبج بس هيَّ لان وضعها هيج عمر بقى طول اليوم وياها حتى
خطية مانام لليل رجع كُميل شاف الوجوه مو على بعضها.
كُميل: خير شبيها وجوهكم عبالك گاعدين بفاتحة.
غرام: ماكو شي بس ناز وضعها تخربط
شبيها؟
حجيتله كلشي صار راح الها عمر ماطلع من يمها دخل الهم.
جهزت العشه شلت الصينية داطلع واجيت اعثر وگعت الصينية مني لزمت بالباب
بكل قوة شاهگة من الهبطة طلع كُميل و امه لزمني من ابدي يباوعلي بنظرات خوف.
كُميل: اتاذيتي علوية؟
سحبت نفس علمود اگدر احجي.
غرام: مابي شي بس عثرت اجيت اوگع لو ما لازمة بالباب.
صدگ جذب انتِ شنو سالفتج الله يخليج غرام انتبهي من تمشين.
مليكة: شلون صرتي يمه يوجعج شي اخذج للمستشفى.
لا لا ما يحتاج والله زينة بس خفت عبالي وگعت.
الحمدلله اخذ مرتك وروح
خالة بس حلي الملم الاكل إلى وگع
خايب شو اخذها لا انعنع ضلوعها انا المنه.
لا والله مايصير انتِ مريضة مو مال شغل هسه انظفه.
دخلت جبت المكناسة و المكرافة لميت الاكل و كُميل ويايَّ رفعت راسي يباوعولي ابتسمت.
غرام: هههههههه والله صرت زينة ماكو شي
مليكة: بعد روحي انتبهي بالجايات من تمشين
ان شاء الله خالة.
راحت اجه كُميل مد ايده وره ظهري لزمني من خصري مبتسم.
كُميل: ماتحسين نفسج هواية تتحركين
غرام: متعودة من جنت عند اهلي
ميخالف عيناي انتبهي و هم انتبهي على ابنا
شلون صارت ناز
يگول عمر گوا نومتها هسه هيَّ امي الله يصلحها الا تذكر اسم عفاف
يجوز نست ناز موجودة
ادري ما متقصدة.
شبيج محترة
يمكن لان جنت بالمطبخ يم الطباخ حميت الاكل الك نوب وگع
فدوة الج
اسويلك مو جوعان
بس شفتج شبعت
ههههههههه شنو اني اكل.
دنك عض خدي.
احلى اكل.
ما اتصل بيك ارسلان؟
اتصل قبل لا ادخل للبيت جهازه مكسور و اليوم مشتري غيره
ما سئلته على غياهب
سئلته بس هذا ما ينعرف صدگه من جذبه
ان شاء الله مابيها شي هيَّ خطية هاي النوبات إلى تجيها من تنقهر
هيَّ ليش تجيها هيج نوبات
ما ادري مرة سئلتها و ما جاوبتني يمكن شي خاص بيها.
اگلج علوية
ها.
باوعلي وباوع النفسه تحمحم.
شگد طولج
ليش؟
هسه گليلي
علمود تضحك عليَّ
لا انتِ علوية تشورين
طولي 150.
العببب
هاا.
حتى قنينة الغاز اطول منج.
برطمت بوجهه.
مو گلت ما أقلد عليج
ترا اعضهن
شنو
ذني.
اشر على شفايفي بسرعة صرت ادمية وعدلت حلگي ضحك و هوَ يعدل بحجابي مبتسم.
أحب أحتشامج من اول يوم شفتج بي عبايتج، حجابج إلى ماذبيتيهن گدامي
الا من صرتي حلالي احترامج النفسج گدام ولد اختي حيائج و احترام كلامج
من تحجين وياهم كل هذا يخلي احترامي يزيد الج و فخور انتِ زوجتي
لبسج ما مبين شي منج هواية احب احتشامج و الزهرة.
باس خدي و اني مبتسمة الكلامه ووصفه الدقيق الي.
متأكد من راح يصير عندنا اطفال تربيتهم راح تطلع حلوة و صحيحة شگد
ماراح نتعب عليهم تعبنا ماراح يضيع لان انتِ أمهم وراح تعرفين شلون تتعاملين وياهم.
ان شاء الله حبيبي وانتَ ويايَّ
ابوس هالحبيبي إلى منج.
ضحكت مبتعدة غيرت ملابسي ما قبل ياكل شي تمددت بحضنه.
كُميل: شو صرتي ماتروحين للدكتورة
غرام: مو هيَّ گالت وضعج افضل من قبل ف صارت مراجعتي كل شهر.
ها زين غرام صدگ جاي تشوفين تحسم بحالتج لو توهمين بنفسج احچيلي الصدگ.
لا ورسول الاه تحسنت عن قبل بس يحتاج بعد كم جلسة گالت
اوف اوف الحمدلله.
شدني الحضنه و اكيد ما نخلص من تحرشاته الثاني يوم گعدت بعده نايم
غيرت لبسي ولبست حجابي باوعت للساعة شعجب اليوم متأخرين محد گاعد
عادتهم يگعدون من وگت، أندگ الباب مال البيت طلعت باوعت اكو رجلين زلم وعباية مرة رجعت للبيت اگعد كُميل.
غرام: كُميل
كُميل: اممم.
اكو ناس بالباب.
فتح عيونه بنعاس
منو
ما ادري بس شفت رجليهم من جوا الباب
عمر گاعد؟
ما اتوقع لان محد گاعد.
هز براسه گعد انطيته ملابسه غسل وطلع الهم منو ذوله و جاين بهيج وقت؟
رجعت اسوي ريوگ طول مارجع طلعت من الباب ودخل وجهه ما يتفسر وكله حيرة رفع راسه يباوعلي.
غرام: خير ان شاء الله منو الناس.!؟ إلى جايين.
بقو ساكت اتقدمت اله كلي أستغراب.
ليش ساكت؟
كُميل: علوية الناس جايين علمودج
علمودي؟
اي.
بس منو هالناس إلى جاين علمودي بهذا الصباح؟
فتحلي جروحي و كل جرح بگلبي من گال.
اهلج
أهلي؟