رواية وتيرة الأعرج للكاتبة حوراء السعيدي الفصل الرابع والثلاثون
غياهب.
بقيت بمكاني واگفة صامدة اباوعله بنظرات تبينله ماكو شي يگدر يكسر
غياهب و راح تعيش و تدوس على كلشي، رفع ايده مسح جبينه و هوَ يسئل.
ارسلان: وحدج؟
غياهب: أي وحدي
ابوج قابل؟
أي.
هز براسه و الواضح الموضوع ما عجبه و أزعجه ما أهتميت رجعت للعلوية قبل لا أطلع سئلتها.
غياهب: شنر راح تسمون الطفل
غرام: ما أدري بعدنا قبل لا تجين ردنا نختار
غياهب: اممم ليش لحد الان ممختارين اسم من زمان اتوقع گلتي عرفتوا ولد.
اني اريد اسمي ارسلان.
باوعتلها بطرف عيني ابتسمت بصمت.
لا كافي واحد عندكم غيروا شوية يمعودة.
اجاني صوته.
ارسلان: سمي انتِ معناها.
التفتت اله اباوع للكل.
غياهب: اني؟
اي مو اسمي ما يعجب
اني ما گلت أسمك ما يعجب.
كُميل: سمي انتِ خالي.
اردفت خجلانة من الموقف إلى حطوني بي لان گالوا سمي انتِ.
بس شنو أسمي مو أبالي أسم محدد
غرام: عندج وقت تفكرين بي اذا ما مستعجلة.
غياهب: نسمي سراج
كلش حلو
هايهية ام سراج صار اسمج بعد.
صارت فرحة بداخلي بهذا الفعل البسيط و ابنهم ما شاء الله و هنا جانت
ثمرة علاقة العلوية و الخال هوَ سراج إلى نور حياتهم طلعوا الكل حتى ام كُميل
بقينا اني وغرام رفعت راسي اباوعلها مبتسمة و عيونها الخضر يخبلن
ابتسامة فرح وسعادة على ملامحها نزلت دموعها.
غرام: هههههه صرت ماما ما مصدگة.
غياهب: تستاهلين كل الخير انتِ جزاة تعبج و معاناتج الب عشتيها الحمدلله
الحمدلله، اختي ما اجت لحد الان
هيَّ گالت تجي؟
اي بس مادري اذا منطينها خبر بس اكيد منطينها
يمكن عالگة بالازدحامات بعد بغدادنا معروفة بأزدحاماتها
اي صح. احم غياهب
عيوني
اني سويت شي و اتمنى ما تزعلين مني
ان شاء الله مابينا زعل بس شنو هالشي.
ملامحها جانت تدل محرجة مني.
اني انطيت رقمج الارسلان لان طلبه مني
جنت أدري راح يصير هيج شي و انجبرت اجذب عليج و اتوقع صار وگتها أعترفلج.
ما فهمت بشنو جذبتي؟
جذبت عليج و گتلج اني و ارسلان زواجنا تام و گتلج لازمة عده و هوَ أي عده ما إلى لان ما صار شي بينا و جبرتج تحلفيلي ما تحجين لأحد.
بقت صافنة بيَّ متفاجئة ضميري يأنبني من ذاك اليوم بي انجبرت.
بس ليش جذبتي عليَّ غياهب
علمود ما يصير لقاء بينا، غرام اني ادري بيج عاطفتج بالاكثر تتحكم
بيج و گتلج هيج علمود ما تطلبين لقاء مني لان بس التقي بيج ارسلان
راح يجي او يضحك على عقلج و يخليج ترتبين النا لقاء.
لعد همزين سويتي هالشي.
طبكت حواجبي بعدم فهم.
ما فهمت
لان ردتكم تلتقون و تتفاهمون ويكون اكو امل ترجعون
لعد زين مني جذبت هالجذبة
هوَ ما شايفج من يوم المحكمة مو
اي
تعبان ارسلان غياهب
و راح يتعب أكثر.
صدگ راح تسافرين لو حجيتي هيج تقهري
لا والله ما احب هيج شغلات فعلاً أسافر بعد زواج حنين
شلون تعيشين وحدج الوحدة صعبة.
ذبيت حسرة من عمق قلبي.
ليش علوية هوَ اكو شي سهل بالحياة بس مجبورين نتعايش ويا كلشي.
انفتح الباب دخلت بنيه ما أعرفها بس بعدين عرفتها اخت العلوية سوزان چانت
أحلى بعد منها سلمت علينا و ودعتهن طلعت هيه ارتاحيت من حچيتلها
جنت انام و اگعد تاكل بگلبي لان جذبت عليها شفتهم واگفين بس عمر و مليكة ماموجودين.
كُميل: ها خالي رايحة
غياهب: أي
شلونج ان شاء الله مرتاحة
الحمدلله.
يستاهل الحمد
ناز شلونه وضعها ماكو تحسن من زمان اني محاجية ويا الدكتورة.
لا والله نفس الشي بس انا اگلج بدات انسام تاخذها يمها تتعود عليها
حلو ان شاء الله مع الايام تتشافى و هيج خطوة تفيدها
اي الدكتورة هم گالت هيج والله كريم
أترخص منكم.
مشيت من يمه كفختني ريحة عطره كملت ما نطق الحرف ويايَّ بس يباوع طلعت من المستشفى خابرني ابوية.
غياهب: هلا بابا
سلطان: كملتي لو بعدج من الجماعة
اي هسه طلعت منهم
هاا و منو جان موجود
الكل بابا.
ارسلان موجود
اي
و ليششش بقيتي غياهب.
أشهر مرت و اني أتهرب منه كافي لهنا و طمن گلبك.
سديته منه صعدت سيارتي طلعت من مكان المستشفى امشي بالشارع
و نظراته طبعت بعقلي، طلاگنا صحيح بيوم المحكمة حاول يحجي ويايَّ بس ابوية
چان بطريقة مثل السيف الجارح ما سمحله يتقرب الي، كل هالاشهر
چنت أشوفه من يجي يراقب گدام بيتنا بدون لا أحد يلمحه سجنت نفسي هل الاشهر اعيد ترمبم نفسي و اتعايش ويا الوضع.
عشت ايام اگول عنها من أسوء الايام الب عشتها بكل ليلة قبل لا انام أعيش
بحالة تناقض مابين گلبي و عقلي تمرضت الايام بس چان وجع روحي اقوى
من وجع جسدي، بچيت بكثرة بس چنت ابچي على نفسي إلى ما شافت الراحة
بحياتها بچيت على گلبي إلى حب شخص اذاه شنسالك يا ارسلان اذا
اسامحك على غلطة وحدة الثانية ما اگدر، ايام و اني عشت
ال اه و الويل.
شهگاتي و دموعي إلى اكتمها بكل ليلة اخاف احد يسمعني انهار بكل ليلة.
و اگعد الصبح اضحك و اسولف ما احسس احد شنو إلى داعيشه
بيوم المحكمة من رجعت انهاريت الى ان ورمت عيوني نزلت دموعي بگلب محروگ.
مكسور، مهضوم من الدنيا و ناسها، بس شستفاديت كلشي ما استفاديت
و لا مرضي فادني بشي تمرضت و تعالجت وحدي مجبور تقوي نفسك
و تعيش الحياة تمشي و لا كلشي يستحق المسامحة، حسيت بدمعتي
الي نزلت بهدوء و اني استذكر ايامي ابتسمت مستهزئة احجي ويا نفسي.
غياهب: عليمن تنزلين كافي عاد.
سحبت جهازي دزيت الابوية رسالة يجيبلي رقم جديد، وطلعت خطي
رقمي صار عنده ماريد شي يربطني بي وگفت السيارة كسرته شمرته
من الجامة أجرع المُر إلى جرعته و أجرع كل الوجع إلى عشته ارسلان فاروق .
رجعت للبيت حتى شغل السفر أجلته صعدت الغرفتي طلعت القراصة
الي تواسيني بكل ليلة هه لا واضح شگد متخطية و اني ما انام اذا ما اشوفها
تمددت بمكاني لازمتها بايدي اباوعلها خليت حنين تصلحها إلى ما جانت كلش خربانة و اگدر ألبسها.
ميخالف أنهار يمج و تواسيني.
حضنتها الگلبي غمضت عيوني و اني احجي وياها مثل كل يوم.
صاحبج اذاني ما اگدر أسامحه، صاحبج ترك بيَّ ندبة مالها علاج.
ماراح يشفعله شي يمي راح اخلي يصير ماضي غصباً عني حتى على
گلبي لو مو يموت بي أدوس على گلبي نزلت دموعي أستمرت حد ما راسي
صدع نهضت من مكاني وگفت گدام مرايتي اباوع النفسي تغيرت عن قبل اتلمست الاثار إلى بايدي.
كل اذية خلوها بگلبي أنطتني درس و قوة.
طلعت غسلت ورجعت رفعت شعري سحبت قلم حمرة و لا جني نفسي
الي ما جنت اتقرب لهيج اشياء و لا مهتمة رشيت عطر غيرت ملابسي
نزلت امشي بالبيت ماكو احد بي كلها بدواماتها أندگ الباب طلعت فتحته جان درغام.
غياهب: يا هلا بالنسيب
درغام: بعد روحي شلونج
الحمدلله اشوفك هنا ترا خطيبتك مادري مرتك بالدوام
ادري بيها، شني ماكو اتفضل
لا يا اتفضل يابه البيت بيتك.
ضحك دخل، دخلت للمطبخ جبتله مي قدمته اله گعدت بدأ يسئلني.
درغام: شصار على سفرج
غياهب: امشي بي على كيفي بين ما تزوجون ارتب كلشي
ولو تضوجين من كلامي بس سالفة السفر ما عجبتني.
مو بس انتَ حتى أبوية ما عاجبته و ساعة يگلي اي و ساعة لا من الرغم انطاني موافقته.
بكيفج بعد بس الغربة صعبة.
أتعايش وياها مثل ما اتعايشت ويا كلشي
شلونها اختج؟
ما تحجون؟
نحجي بس عبالك غربة و لا عبالك مخطوبين
اوف منج حنين ميخالف درغام اتحملها تدري بيها عقلها نص عقل.
لا و شتگلي البارحة تگلي انا ما مسامحه ارسلان و حاقدة عليه بس هم حقه و الطلاگ غلط خلتني اتشعوط.
اليوم تجي و اتفاهم وياها و ارسلان بعد انتهى حنين ما يحتاج تبقى تكرر بالموضوع كل شخص بينا راح بطريق.
نزل عيونه مثل إلى يفكر درغام شگد ما عصبي بس حنون و ما ينسى زينات احد وياه.
درغام: رغم كلشي سوا بس زيناته ما ناسيهن اله.
بقيت ساكتة شري مي ورجع يتسائل بموضوع ماعندي علم بي.
اگلج خالتي تگول شو بيت عمي عمران مارجعولهم خبر مغلسين
يا خالة و ليش خالتك شعندهم وياهم؟
خالتي ام رسول، غير خطبت نيروز الرسول
صدگ؟
ومحمد ليش محد گالج
لا و حتى هيَّ نيروز ماحجت بالموضوع
چا يجوز ما راضين هالمغلسبن بس رسول خوش ولد
امم رغم مو ذيج معرفتي بس خوش ولد.
بقينا ساكتين هوَ يتصفح بجهازه و اني ضربتلي صفنة بسالفة نيروز.
شو محد حچالي عنها حنين من تريدها تچفص ما تچفص بس من تكلها لا تچفصين تچفص چفصات تشگ الحلگ.
غياهب: اي درغام شوگت الزواج ما اتفقتوا على الموعد
درغام: اليوم يجون اهلي بالليل و نتفق.
شبيك خوية شو احسك ضايج
ما ادري غياهب اختج تعبتني
غير انتَ سميتها بلاء و هذا البلاء الصدگ هههههه
تضحكين على جروحي
لا والله مو اضحك لا تضوج اليوم اطيحلك حظها شنو تضوج نسيبي.
ابتسم و هوَ يحك وره شعره الخفيف.
بس على كيفج وياها.
حيررتني تررا
خاف تزعل و تدرين بيها من تطنكر.
علي روحها وگت الجد جد راح تتعايشون عمر قابل تبقون هيج
هايهية خوية انا اترخص بس اجيت اشوفج.
امم العلوية ولدت بالسلامة.
طبك حواجبة و خفت ابتسامته.
يا علوية
غرام زوجة الخال كُميل
هاا اي متباركين ان شاء الله
ورحت الها.
فتح عيونه على كلامي.
و لااا تگليلي رحتي؟ شفتي ارسلان؟
شبيك درغام انطينا مجال
احچي غياااهب تدرين ضد يشوفج ارسلان.
رحت للمستشفى مو البيتهم ما جنت اعرف بي هناك بس حنين گالت شافت عمر و كُميل و من سائله عرفت السبب
حچى وياج بشي؟
لا ما حچى و لا أتقرب الي
وبعد شصار؟
ياا شبيك
بعد شصار يعني متاكدة كلشي ما حچى وياج
لا بس من حجيت على سفري سئلني وجاوبته.
و انتِ شكووو حجيتي گدامه
علمود يعرف حياتي ماتوگف عليه.
باوعلي بنظرات شك وترتني عرفت نفسي چفصت.
و ليش يفكر حياتج توگف عليه قابل تحبينه انتِ؟
هاا؟ لا شنو هالحجي درغام شنو احبه بس حجيتلك إلى صار.
رفع حاجبه بأستنكار.
أتمنى كلامج صح.
طلع من البيت سديت الباب وراه معقولة شكلي فاضحني بس اني مو
من هالنوع إلى ينفضحون من شكلهم رجعت للداخل اشتغل بالبيت اشغل نفسي
و ماريد افكر بشي سويت حلويات خاف يجون خوالي وحنين مصختها
صارلها فترة بتصرفاتها، لليل الكل رجع بس ابوية رجع العصر ديتعب
و يفكر يستقيل من وظيفته دخلت الحنين واگفة تجهز بنفسها.
غياهب: ها عيني كملتي.
حنين: همزين اجيتي حبابة غياهب تعاي سويلي شعري شلع گلبي.
گعدت بمكانها وگفت ارتبلها بشعرها استغليت الفرصة احجي وياها.
شلونها علاقتج انتِ و درغام
متوترة
السبب
اني
ليش
ما ادري غياهب جنت مو هيج يعني ما جنت اتنرفز و اتعصب من كلشي
هسه صايرة بسرعة اتغصب و اتنرفز و من اهدأ أتذكر شجفصت ويا و اگعد اطحن بروحي قهرر.
حنين
هااا
موضوعي و موضوع ارسلان انسد أتوقع ف بعد ما يحتاج هل الشغلات.
علاقتج اهم تدرين درغام شگد تعبلج و شگد تحمل لا تخربين علاقتكم بتطفل منج.
أدري بكل هذا و اني مو بس موضوعج انتِو ارسلان بس غياهب ما ادري احس نفسي بضغط و كرهانة كلشي
نفسيتج تعبت حقج اخر اشهر محد ارتاح بينا يوميا مصيبة و منا دوامج بس درغام يستاهل كلشي حلو
ان شاء الله
انطيني وعد تتغيرين للأحسن و تسعدين هالشخص
وعد والله
اطيح حظج اذا اجه شكى منج
انجبي لِج ويايَّ لو وياه
ويا الحق.
وگفت تعيب بلسانها وگفت تكمل بعد ما كملت شعرها گعدت على جهة وهيَّ بعدها مستمرة تجهز بنفسها.
اگول حنين شو ما گتيلي نيروز خاطبها رسول ابن خالة درغام.
والله بطرانة انتِ شكو حاجية وهيَّ نيروز ما موافقة
لعد ميرجعون خبر للناس
شمدريني قابل اني ارجع غير اهلها
هيَّ نيروز شنو وضعها
مثلج داخلات بمود الارامل و المطلقات
طاحظج.
هسه ارسلان و غسلنا ايدنا منه لان غلطة جبير، عمر شبيه؟ طبعاً الحجي بينا ذولة بيت الاعرج احسهم شايلين خرز
خرز شنو
يا اخي ينحبون والله شعلية يمكن عندهم خرز محبة
دخل يسمعج درغام يشگ حلگج
هذا اذا يسمعني احجي هسه تكب الغيرة عنده.
انجبي لا تحجين عليه، رحتي الغرام.
ايييييي لِچ ابنهاااا يمووووت يگطععع اجيت اعضه من گد ما كزكزت.
اي والله صدگ حلو يخلي الواحد يكزكز عليه
گالولي سميتي سراج خوش اسم همزين مافشلتينا.
هيوووو شبيج ويايَّ انتِ؟
قلبت عيونها.
اووي شبيج تتقشمر وياج ما تتحملين.
همست بصوت خافت.
نتقشمر؟
عضيت شفتي ذكرت ارسلان من گالي قشمر ومرات يگول اتقشمر وگفت بصفها امشط شعري اطرد بالذكريات إلى ملازمتني.
غير تسكت غير تسد حلگها.
حنين: والله عمي خوش مخلية الرجال حالة يبجي
غياهب: كافي لا تلحين.
دارت وجها تلبس بأسوارها بأيدها.
ترا الواضح تحبي مثل ما يحبج بس طبعاً كرامتج ما تسمحلج تتنازلين.
لغيتي هواية.
يزعجكم كلام الحقيقة.
خلي ننزل خوالي على جية و حاولي السانج تضبي شوية لا تچفصين و تفشلينا.
اريدد عرررررسسس فخم وحق الله
تدللين بس فضيها.
نزلنا جوا و طيور الحب گاعدين ابوية و خالتي واحد بصف الثاني يسولفون
ابتسمت من شفت ابوية لازم ايدها و يحجي اكثر من مرة لاحظته من يسولف
وياها يلزم بايدها راحت ست چفصة گعدت بنصهم خربت اجوائهم باوعلها ابوية يضحك.
سلطان: شنو هذا الجمال.
قلبت عيونها بغرور وثقة.
حنين: ابوية سلطان طبعاً أطلع أشگ شگ.
غياهب: اتمنى تلزمين السانج و سالفة الشگ ما تحجيها لان مشهودلج بيها.
وجدان: چا غير من فترة سمعتها تحجي ويا درغام تگله أشگك و أشگ أبوك.
ضحك ابوية بصوت ضحكت على ضحكته.
سلطان: حاير بيها شلون راح تعيش وياه ذاك مسودن و هيَّ مسودنة.
حنين: طنجرة ولئت غطاها.
انگلبتي سورية
كلشي نرهم.
أندگ الباب اكيد خوالي راح ابوية يفتحه، و اني و خالتي نوصي حنين بالثكل.
و هالله هالله بالثكل بس شيفيد دخلوا خوالي رحبنا بيهم گعدنا كلنا بالصالة
و خالتي جوهرة اسم على مُسمى احب هل الانسانة و احترمها اختي محظوظة
بيها و خالي ما يقل عنها جابت حنين الضيافة عبالي راح تجي يمي شو
هاي لزگت روحها بصف درغام ضربت خدي بخفة وين الحجي إلى حجيناه
تدري بابوية يتخبل اذا يشوفهم لازگين ببعض.
ضحك درغام من شافها گعدت بصفه و لا يزعل منها بسرعة يرضى.
اختي مايتحملها غير هالشخص مرات اشوفه ما عنده صبر اتجاه اشياء
بس من يوصل الموضوع يم اختي يتغير كلشي، لزم ايدها مادري شيهمسلها
وهيَّ تضحك عيون ابوية عليهم تحمحم و هم لا عبالك كتمت ضحكتي شلون بينا بسلطان غيرة العشاق على بناته.
سلطان: احمم.
رفعت حنين راسها تباوعله.
حنين: ها بابا تريد شي
سلامتج بابا سلامتج
درغام: صعدت الحرارة عند ابوج.
عاط بي ابوية من باب الميانة إلى بينهم.
سلطان: عوووزك بعد بس تگعدهااا بحضنك.
شكو بيها مرتي
بعدها ما صايرة
شمسوي والله خلاك تصير عمي
گووووول انااا شمسووروي والله انطااني نسابة طايحين الحظطظ.
أكيد ما تقارني بذاك الواحد
ذاك الواحد على الاقل ما يسوي شي گدامي.
سويت نفسي ما منتبها الهم و اني كل تركيزي وياهم عود يحجون مشفر
بس هم ماعندهم علم ذاك الواحد اذا يحجي حجاية ارجعها اله عشرة و شبع مني تكفخ و دفرات.
جابر: يابه حنين و درغام انتم شتريدون من عرس.
حنين: والله خالي بصراحة اني من حقي اريد عرس فخم و افرح بي حالي حال البنات.
وجدان: حقج ماما. جابر موتانا راحوا الرحمة الله و الحزن ما يرجع الميت
لو يرجعه حزنا طول عمرنا و هم صارلهم فترة اشهر طويلة خلي الشباب
يتونسون هواية تأجل عرسهم خطية و الحجي مالنا علاقة بي سمعنا اشكال الحجي من الناس بقت على هاي.
رد عليها خالي مأيد كلامها.
جابر: صح كلامج وجدان هايهية. حنونه خالو انتِ شگد تحتاجين تجهزين نفسج.
صفنت حنين بوجهم تلاحگت السالفة لا تلوصها ادري بيها.
غياهب: اسبوعين كلش كافيات خالي يعني حددو العرس راس الشهر
درغام: الحمدلله ماخليتيها هيَّ تحدد جان بقينا اشهر
حنين: شتقصددد؟
ههههههه مو عليج بلائي هههههه اقصد على عمتي شبيج اي عمتي وجدان.
خزرته ودارت وجها تدري بنفسها المقصودة تحدد موعد زواجهم و بدينا
نجهز العرسهم حنين شلتنا والله شلتنا وطيحة حظنا و هم طاح حظها.
منا دوامها و منا تجهيزات العرس و مرات يروحن ويانا يا خالتي وجدان يا جوهرة.
حنين: وعع شنو ذني شو ما يعجبني.
باوعتلهن جانن ملابس نوم.
غياهب: لعد شتريدين كله فضايح
اي طبعاً لعد شلون أدلل زوجي
ايععععع.
ضحكت خالتي جوهرة فوگاها تأيدها طبعاً غير ابنها ما ادخلت بهل الفقرة
لان لا احبها و لا اعرف بيها مو ذوقي و ذوقها عن ذوقي يختلف اختي
تريد كله على الموديلات اخذت كم قطعة و طلعنا من المحل ايدينا متروسة غراض.
حنين: شوفي خالة راح أدلل ابنج أخلي أمير زمانه دخل يفكر يخوني اخخ بوووية شسوي بي.
جوهرة: شيخون ولج هوَ شايف دربة من وراج سبيتي سبي.
حنين ما تقصد تسوي كلشي علمود ما يخون لان الرجال لو يريد يخون
لو يتزوج الثانية ما يوگف بوجهه شي لا دلال و لا هالسوالف بس النفسها
هيَّ تهتم وترتب و هم أحد حقوق الزوج تهتم النفسها واله و الاهمال مو بصالح وحدة.
غياهب: رجليَّ طاحت شوگت نرجع
حنين: شوگت لحگتي تتعبين بعدنا ترا.
گدامنا بعد ايام لا تستعجلين
لا خلي اكمل كلشي احسن لا تنسين دوامي
تسوين حنة؟
اييي راح اسوي كلشي بنفسي هيَّ مرة وحدة بالعمر
تفهمين
خلونا ندخل لمرطبات ريگي يبس من التعب.
مو علساس ما تعبتي.
دخلنا بأحد المرطبات گعدنا و اغراضنا شگد ما ادري شلون نشيلهن
جابولنا طلبنا من التعب مابيَّ احجي حرف و حنين تلغي تلغي عبالك مادري شماكله ثولتني ثول.
جوهرة: غياهب.
التفتت الها بعد ما جانت عيوني بالشارع الگدامب صافنة.
غياهب: ها خالة
چنج ناسية شي؟
بقيت صافنة بوجها شناسية عدلت گعدتي و اني ارد عليها.
شنو ناسين خالة بعدها احنا ماراجعين نشتري بطريقنا
لا ماما ما اقصد من هالناحية
لعد شنو؟
أنتم أطلگتوا و انتهيتوا
اي صح
چا ليش الحلقة بعدج لابستها.
مسحت وجهي ابلع بريگي ماعندي جواب الكلامها شلون مامنتبها النفسي
باقية لابسة الحلقة كل هالفترة رجعت خصلة من شعري منحرجة نزعتها
من ايدي الترجف يا خوفي من رحت للمستشفى يكون لاحظ.
م. ماننتبهاا ناسيتها.
جسمي اشتعلت بي النار الموقف جان محرج بالنسبة إلى و هاي الفترة
الي فاتت ما منتبهت بعدني لابستها لان من النوع دائماً البس بايدي خاتم فتحت جنطتي حطيتها داخلها.
جوهرة: عادي حبيبتي غياهب الانسان ينسى لا تفكرين بالموضوع.
والله جنت ناسيتها ما متقصدة ابقيها شكو مبقيتها شي و انتهى.
باوعتلي من شافت وضعي تغير و انزعاجي من الموضوع.
حنين: غياهب شبيج عمري مابيها شي و اذا نسيتي لا تبقين تفكرين.
هزيت براسي عاضة شفتي طلبت نرجع للبيت لان الاغراض جانت هواية اجه
درغام اخذنا طول الطريق ساكتة غاطة بهدومي من الفشلة والموقف شلون گدرت انسى هيج شي.
صرنا قريبين على البيت جانت اكو هوسة بالشارع سيارة سادة الطريق
تنزل اغراض وفرش بيت، للبيت إلى مقابيل بيتنا جايين ناس جدد يسكنون
بي اتوقع لان جان فارغ اتذكر بقى درغام يحجي لان ما يگدر يدخل السيارة
يم باب بيتنا بسببهم نزلنا نمشي و هوَ ويانا شايل نص من الاغراض.
درغام: صرتلج حتى حمال بعد بس احبل بمكانج.
حنين: ياريت
اتجحظت عيوني اباوعلهم و هيَّ تباوع طبيعي ضحكت ببرائة.
حنين: هههههه شبيكم اتشاقة.
درغام: هايهية ربحنا
اووي درغام شبيك صاير ما تتحمل شي
طيحتي حظي شتحملل أكثر.
دخلت گدمهم فتحت الباب اضحك على سوالفهم اختفت ضحكتي من شفت
كوب مكسور يم باب المطبخ واگع بالگاع و رجلين شخص أمدد طالعات
من داخل المطبخ باوعت بخوف وسرت رجفة بجسمي من المنظر أحس.
رجليَّ ماتت و صارت خيوط اسمع صوت درغام ورايَّ.
درغام: شبيج وكفتي.
رفعت ايدي ترجف أشرتله على باب المطبخ دخل گدامي مشيت وراه شهگت
ايدي على فمي من شفت الشخص هذا ابوية واگع ما يحرك لا أيد و لا رجل ركضنا عليه شمرت الاغراض من ايدي.
غياهب: بابا بابا تسمعني فدوة احجي.
رفعت راسي الدرغام الواگف مصدوم.
درغام فدوووة سوووييي شي.
نزل المستواه يريد يرفعه بي ما گدر وجدة ابوية صاحب بنية جسم ضخمة.
گابلناه اني و حنين نساعده رفعته أبوية و المصيبة السيارة بعيدة عن باب البيت
گعدنا ابوية بحضني حاضنته الصدري ارجف ابجي وارجف درغام ركض
يحاجي العمال إلى ينقلون الاغراض للبيت يبعدون سياراتهم و يخلوله مجال
يدخل، حچت حنين من بين دموعها ترجف مثل حالي وخالتي جوهرة واگفة تدعي مابي شي.
حنين: تركناه ما بي شي شصار بابا فدوة افتح عيونك.
طبكت سيارة.
درغام گدامنا اجوا العمال وياه ساعدوا من شافوا حالة ابوية رفعوا حطوا بالسيارة
كل حيل مابقى بينا من الهبطة صعدت حنين وياه بقيت بمكاني گاعدة مددة
رجليَّ حيلي باد مشت السيارة و عيوني وراهم لزمتني خالتي جوهرة گومتني من مكاني.
جوهرة: گومي و عيني روحج غياهب.
نزلت دموعي اكثر حاطه ايدي على وجهي و اهمس بكلامي.
وينه الحيل و أعين روحي.
غصبت نفسي مقويتها وگفت على رجليَّ كل ذرة بجسمي ترجف و نغزات.
الي بگلبي دمرتني رجعت للبيت سحبت مفاتيح سيارتي ما شوف شي گدامي
طلبت من خالتي تبقى ببيتنا و اني الحگهم هيَّ هم مريضة مو مال تروح
و تتعب اكثر صعدت بالسيارة مشيت طايرة طلعت من الفرع مال بيتنا
و عيوني مغوشة بدموعها امسح بيهن ويرجعن يغوشن سلطان من نقاط ضعف غياهب إلى تنكسر بيهن
ما أدري بيا مستشفى راحوا وگفت بجهة طلعت جهازي اتصل بحنين.
هذا الخط الجديد إلى جابه إلى ابوية جاوبتهي وصوتها رايح، ذبيت نفس اهدأ بنفسي و كلشي بيَّ يرجف.
غياهب: وين انتم بيا مستشفى رحتوا؟
حنين: بعدنا بالطريق رايحين للمستشفى إلى بيها خالتي.
سديته منها رجعت اسوق متوجهه للمستشفى إلى گالت عليها هه عود الدنيا
هم تخليج ترتاحين غياهب تحس بنقص اذا سمحتلج تعيشين يوم مرتاحة
وصلت للمستشفى جان درغام واگف يحجي ويا حنين مشيت بخطوات سريعة اسئل بلهفة.
غياهب: شصارر وين ابوية؟
درغام: دخلوا جوا بعد محد طالع.
لزمت بالحايط مثبتة ايديَّ لزمتني حنين من وره ظهري گعدتني جابوا
مي يغسلون بوجهي جسمس صار ما يتحمل شي بقينا گاعدين ننتظر طلعت
خالتي الوجها اصفر الدكتور إلى وياها مستلم حالة ابوية رحت عليها فرفحت بس اريد احد ينطيني كلمة وحدة تريح گلبي.
وجدان: راح يسووله قسطرة عنده مشاكل
غياهب: قسطرة؟ خطرة؟ عليه
ان شاء الله يطلع سلامات ادعوله ماما.
عافتنا و راحت بقينا واگفين لازمين گلوبنا لان هوَ عنده سكر اجوا خوالي
ما ارتاحت گلوبنا الا لمن كملت عملية القسطرة و بشرونا بوضعه احسن
و لازم مايحجي بكثرة و لا تكون يمه هوسة هذا مريض القسطرة هيج لازم
بين ما يتحسن طلعنا من المستشفى بعد ما اتاكدنا من حالته مرت الايام
اني ابقى وياه صرت ما اعوفه من خوفي يصيرله شي حنين رجعت تجهز بنفسها
خالاتي ما عافنها دخلت اله جايبتله الاكل صار من اهتماماتي اليومية اكمله.
الاكل واخذه اله طلعت منه بعد ما كمل اكله اريد ادخل للمطبخ اندگ باب البيت.
طلع ابوية يمشي على كيفه ذني الايام وضعه احسن من قبل بقيت واگفة بايدي
الصينية فتح الباب باوعت من الباب رمشت بثكل جاحظة عيوني هذا ارسلان؟
كاشخ على اخر حباية بقيت واگفة اباوعلهم و استمع الحديثهم.
ارسلان: الحمدلله على سلامتك.
رد ابوية ببرود و عدم اهتمام.
سلطان: الله يسلمك
محتاج واير كهرباء و انتم أقرب شي البيتي.
خلاني صافنة بكلامه و ابوية صفن هم ما فاهم شيقصد رد عليه.
بيتك؟ شبيك ابني عقلك متيهه انتَ بيتك شجابه علينا.
ابتسم بابتسامته الخبيثة و المعروفة وراها شي.
ليش ما تدري صرت جاركم؟
جارنا؟
اي نعم البيت إلى گدامكم انا اشتريته وصار الي
يعني انتَ الجار الجديد؟
نعم.
قبض ابوية على ايده لازم نفسه.
سلطان: وين تريد توصل ارسلان.
فتح ايديه بمعنى ما ادري و گال.
ليش أكو مشكلة اذا شتريت البيت؟
و تقنعني البيت شتريته مو الغاية.
غمزله ارسلان مبتسم.
سلطان اموت على ربك من تفهمني.
عفتهم دخلت للمطبخ و عقلي انسطر هذا شديسوي ياربي خفت على ابوية
و هوَ يحجس وياه هذا يرفع الضغط باسلوبه و استفزازه صعدت الغرفتي
فتحت الجنطة طلعت الحلقة نزلت اركض على الدرج شفتهم لازالوا واگفين
يتشاحنون بالكلام مشيت باتجاهم وگفت بصف ابوية إلى متحمل الوضع على اعصابه.
غياهب: اهلاً بالجار الجديد.
ارسلان: اهلاً بيج حضرة المحامية.
همزين اجيت برجليك اكو امانة لازم ترجعلك.
طبك حواجبه بملامح تسائل.
امانة شنو؟
مديت ايدي من وره ظهري بيها الحلقة.
اتفضل جنت ناسية ارجعها الك.
عض شفته السفلية و عيونه بيها مد ايده حطيتها بنص كفه وانطيته
ظهري راجعة للبيت بدون ما احجي شي، راح ترجع المشاكل دام راح يگعد گبالنا.
و هوَ أكيد اكو شي اباله گعدته مو لله رجع ابوية صاير بركان خفت يرجع يتخربط.
سلطان: وتاااالي اشيلللل من بيتييي بسببه.
غياهب: لا تغث نفسك بابا ما علينا بي
غياااهب انا كلش زين فاهمة و شنوووو إلى اباله.
اي و اني فاهمته بس ما يتحقق إلى اباله ف أتمنى ما اتأذي صحتك حبيبي بعدة مريض و لازم ترتاح.
راح اخابر خاله
ما يگدرله بابا لا تتعب نفسك هالشخص إلى براسه يسوي
لوتي يريد واير كهرباء و هوَ واضح عنده هذا عذر منه اجه يگلي سلطاااان گعدددت گبالك شوووفني.
بقيت ساكتة شحجي و شگول رجعت حنين سولفتلها إلى صار بقت صافنة.
بتصرفه ونبهتها ماتحجي شي گدام درغام لان الوضعية تلاص گعدنا
نتعشى و ابوية كل شوية زافر نفس بعصبية بس ينافخ باوعتله خالتي.
وجدان: شنو سالفتكم اليوم
سلطان: هذا ارسلان يريد اكسر ظهره الا يتوب
هم ارسلان شبيه
مشتري البيت إلى گدامنا و گعد بي
يااا شماله هذا الولد
عباله ارجعله غياهب لوووو تطلع عيونه ماترجع اله
علي كيفك يا عيني هايهية مالنا علاقة بي لا تبقى تغث بروحك وانتَ ما صارلك هواية مسوي عملية.
بعد ما جانت ساكتة و ما معلقة شي هادئة أردفت بسؤالها.
حنين: بابا اگدر اسئلك سؤال
سلطان: اسئلي.
انتَ ليش حارگ دمك وانتَ واثق بغياهب ما راح تنطي مجال وهيَّ راح تسافر؟
ارسلان يعرف شلون يلعبها بصالحة مثل ما لعبها قبل وضحك علينا.
وانكشف كلشي بعد ما يگدر يضحك على أحد لان محد يثق بي.
أحس بديت أختنك من الموضوع و ذكره كل الاشهر إلى مرت محد ذكره
بي بس من يوم إلى شفته و ذكره صار يتكرر گدامي نهضت من مكاني.
طلعت للحديقة گعدت على المرجوحه تتحرك بيَّ وضايعة بأفكاري، وين يريد يوصل
بأفعاله ما مل؟ ما تعب؟ شيريد اكثر من إلى سوا الكل كرهه و ما طايقة
يمكن لو ما صار كل هذا اني و وياه اليوم ايد بايد ومتحدين بس بأغلاطه
نهى كلشي فزيت على صوت حنين و جهازي بايدها يدگ.
حنين: وين رحتي جهازج صرعنا بس يدگ.
غياهب: انطينياه.
حطته بايدي ورجعت دخلت جوا باوعت للشاشة رقم لان بعدني محافظة كل الارقام يمكن نيروز فتحت خط بتعب.
غياهب: ها عيني
ارسلان: والله ابوسها.
كمزت من مكاني فاتحة حلگي بصدمة.
انتَ؟
اي يحيلي.
وولك شتريددد راح تخبلني منيلك رقمي
هوَ شوفي انا قبل تركتج براحتج و ما بقيت ادرر وراج ورقمج إلى خذيته
من العلوية واضح كسرتي بس لا هسه وقتي كله الج غيري الف رقم ماراح تستفادين شي ابقى احصله.
زفرت بعصبية.
شتررريد ارسلان؟
گلبي يضل يرگص ويردح من يسمع اسمي بلسانج
شغلة ساجدة بطريقك.
سكت الثواني تغيرت نبرته لهدوء اكثر.
اممم شلونج.
مرتاحة بدونك نفسياً و جسدياً و عقلياً
جيد
ليش متصل يابه شوگت أخلص منك
ما تخلصين لانج انخلقتي الارسلان
لا صدگ هاي كل قوتك
لا عندي الاقوى تحبين تجربين
احتفظ بيها.
رجع سكت اسمع بس الصوت حسراته.
رحتي و سلبتي روحي وياج.
رجعت گعدت بمكاني گلبي ينزف قهر اسمع الكلامه ساكتك.
ارسلان
هاا يا حيلي
لا تتعب نفسك بالمحاولات، خليني اعيش ايامي يهدوء و مرتاحة من التعب
و انا؟ فكرج عايش مرتاح.
شيلني من بالك
ما اگدر.
تگدر الكلشي ارسلان تگدر
ما اگدر لو اگدر جان قويت روحي ورحت الاهلي الب ماواصل الهم
جرحك غميج و صعب علاجه
أداوي الج
أجيتك و كلي جروح بس انتَ شسويت؟ زدت هل الجروح بأيدك و أفعالك
أحرگيني أكثر بكلامج.
حرگت روحك بروحك
هم نرجع نلتم بيوم من الايام؟
شيلمنا بعد.
سحبت نفس اذه گلبي احسه.
غياهب: وجه گلبي يعادل وجع گلبك.
ذب حسره و هوَ يگول.
عسا وجه گلبج فوگ وجع گلبي
ورقتك أحترگت أنتهت بالنسبة إلى الله وياك.
سديته بوجهه تسللت دموعي الخدي غصتي اخترقت ببلعومي مختنگة
ذبيت الجهاز بالگاع حتى لو اكسر الرقم راح يرجع يحصله شلون ديحصله
خبلني بس دام شغله معروف ماكو شي يصعب عليه حسيت النوبة راح تجيني
مشيت الداخل البيت اسحل بنفسي صار بوجهي ابتسمت بتعب بوجهه.
غياهب: ها حبيبي.
بقى يباوع الحالتي والايدي الترجف برعب.
سلطان: انتِ زينة؟
اي اي زينة بس يمكن تحسيت من الاكل و.
لزمني من ايديَّ نار أشتعلت بگلبيي.
اسم الله بابا غياهب شبيج.
انبلع الساني ما گدرت احجي شي اجتني حالتي وگعت بين ايدين
ابوية أشهگ بالنفس رفست برجلي اريد اتنفس طبيعي التموا عليَّ أهلي يغسلون
بوجهي جسمي خدر رفعني ابوية دخلني للصالة گعد مكابلني يباوعلي بعيون ماليها الخوف و القلق.
حنين: بابا نأخذها للمستشفى
سلطان: ما يحتاج شيسولها مثل كل مرة ينطوها ابره مهدأ هاي النوبات تجيها الوقت وترجع طبيعية.
غمضت عيوني مستسلمة للظلام إلى حاوطني مرات تجيني الحالة اتمنى اغمضهن
ما ارجع افتحهن و لا ارجع اشوف شي تتمنى تبقى مغمض عيونك للأبد.
حنين.
ادري بيها صعب تتخطى شي بسهولة و دتضحك على نفسها و علينا
تتظاهر بالداتسوي غطيتها بعد ما نامت بقيت گاعدة يمها اباوعلها افكر شوگت
راح تگدر تتخطى كلشي عاشته شوگت أشوف ضحكتها نابعة من گلبها
دگ درغام جاوبته و عيوني تراقبها ابوية و خالتي راحوا ينامون بعد ما اطمئنوا على وضعها.
حنين: ها حبيبي
درغام: ياروح حبيبج تعاي اطلعيلي يم الباب جايبلج شغلة
تمام.
سحبت نفسي من يمها طلعت فتحت الباب دخل بايده علبة مدها الي.
هاج بلائيي
شنو هاي
افتحيها.
اخذتها من ايده فتحتها ابتسمت من شفتها دهينة بالجوز يعرف احبها خصوصاً من يتكثرلها جوز رفعت راسي اله.
شكراً دلغام
ليش ضايج الحلو.
تجي نگعد بالحديقة.
اوگفي بس أسد باب السيارة واجيج عفته مفتوح.
طلع سده بسرعة واجه مشينا للحديقة اباوعله اطول مني هوَ طولة بالتسعينات و اني ستينات گعدنا على الحشيش.
درغام: صاير شي
حنين: اي بس مو شي جديد
شنو
غياهب رجعت تخربطت
ليش؟ ترا هيَّ حالتها ماتجيها بس من تنقهر او تصير عصبية و تكتم عصبيتها
ما ادري اجاها اتصال جانت هنا بالحديقة انطيتها جهازها شو من رجعت كل وضعها تخربط
منو جان المتصل؟
ما ادري ما ركزت. اني خايفة على اختي لايوم من الايام يوگف گلبها.
نزلت دموعي متأذية على حالتها.
حتى العلاج ماجاي يفيدها قبل جربنا و نفس الشي.
سكتت و اني افكر احجيله ارسلان اشترى البيت گدامنا لو أسكت غياهب
طلبت ما احجيله خليني ساكتة احسن ما ناقصين مشاكل و هم واحد ما يطيق الثاني.
نهض من مكانه يرجع البيتهم قبل لا يطلع قبل الشامة إلى يحبها و طلع رجعت
دخلت بايدي العلبة مال الدهينة شفت غياهب هستوها گاعدة لازمة راسها.
غياهب: اوف راسي جيبيلي علاج حنين.
حطيت إلى بايدي على جهة رحت جبتلها حبة راس و مي انطيتهن الها شربتهن
بقت مغمضة عيونها نزلت دموعها بهدوء ويا هدوء شكلها بقيت واگفة بمكاني
شبيدي شنو إلى اگدر اسوي الها لفت روحها بالغطى گعدت يم راسها امسد على شعرها.
حنين: ما تگومين تنامين بغرفتج غياهب النومة هنا مو مريحة.
ردت بصوت مختنگ.
غياهب: نفس الشي
شوفي تاكلين ويايَّ؟
لا ما اريد.
عجزت شنو إلى احجي وياها و يقنعها.
باعي عندي شي انتِ تحبي.
رفعت الغطى من راسها شعرها نازل على وجها عيونها حمر روحي تتگطع على منظرها.
شنو؟
سحبت الدهينة حطيتها گدامها فتحتها بس شافتها انرسمت ابتسامة على وجها گعدت.
الله من زملن ما ماكلتها
سُر سعادتي جابها الي
اريد.
أي اوگفي لا تاكلين وحدج لا ابجي خلي اجيب خواشيك
شنو قيمة هيَّ وتاكليها بخواشيك
لعد بايدينا تنترس دهن.
طلعت للمطبخ جبتهن ورجعت الها گعدنا اثنينا بالگاع حطيتها بالنص ناكل.
حنين: طبعاً اني محظوظة.
رفعت عيونها و هيَّ تاكل.
بشنو؟
اذا اتزوج و أصير حامل و أتنسى شوگت ما أشتهي شي و بأي وقت
درغام يروح بدون ملا شوفي هسه نص الليل جايبلي الاحبه مو نوب ابنه ببطني.
ابتسمت جاوبتني وصوتها مختنگ.
درغام يسوي كلشي بس علمود راحتج ديربالج عليه
اني من هسه مقرره عشاي يوم عندكم و يوم بين زوجي
لعد شكو متزوجة خوب ابقي يمنا
نوب اني لا من إلى يطبخن لا من إلى يصخمن انطيني بس غسل.
مواعين و اكسر بيهن و تنظيف بيت هسه شلون بلگي الرجال راد يضوگ طبخي
هذا إلى ما يتعلم.
لا حياتي زوجي ما يهمه اطبخ
لا تتقربين للمطبخ ببيت خالي لا تحرگينهم.
ضحكنا اثنينا بقينا نسولف و كل نهاية كلام توصيني بدرغام غياهب تعزه
مثل ما تعزني، مشت الايام و احنا نجهز الزواجي اكثر وحدة يطيح حظها
هيَّ العروس غيرت لون شعري بعد توسلات بابوية لان ما يقبل لا انگص شعرنا.
و لا نغير لونه صبغته بلون فاتح يناسب بشرتي الحنطاوية علمود يجي راهم وياها.
رغم ما احب الشعر الطويل بس ما گصيت شي اخاف من ابوية حجزنا القاعة
باختيارنا اني و زوجي، طلعنا نشتري فساتين للحنة و غياهب لزگت الا تاخذ
اسود راح تموتني بلبسها كله اسود، و اني ماردت بدلة بالحنة ردت فستان
يكون خاص بهيج مناسبة وبعد تعب لگينه شي يعجبني حجزنا بالصالون
صح تعب بس هيج ايام من عمرك تستاهل تتعبلها بالليل سوينا تنظيف.
و مقشرات و سكرابات مت هالسوالف ونيروز ويانا، گعدتني الصبح غياهب تسحل بيَّ اليوم الحنة.
غياهب: لِچ حنين اگعدي يلااا
حنين: هيَّ حنة و بالليل شكووو رايحين الصبح
يااا صبح امي ساعة بالوحدة الظهر.
سحلتني سحل نزلت جوا بالجامة وحدة صاعدة و وحدة نازلة و كفشتي و اني لگيت رماد و نيروز عندنا شافني رماد هز بايده و اني طنكورة النوم بعدها بيَّ.
رماد: عروس چرچوبة
حنين: ما احجي ويا زعاطيط
نيروز: احسلك قصفتة ما ترتاح.
نمت على القنفة طول بطول.
ما اريد اعرس بطلت اريد انام.
نزلت غياهب تحچي عليَّ.
غياهب: مو هيَّ لعب نبطل يله غسلي و اكلي شي لا تعبيني حنين ترا الشغل فوگ راسي.
دزلها رماد بوسة بالهوا.
رماد: فديت اخت العروس.
ضحكت غياهب على سوالفه غميته ورحت اجهز نفسي لان الحنة هم بقاعة
سويناها وگفت افرش اسناني طلعت والفرشة باسناني ادور على غياهب
شفتها واگفة هيَّ ونيروز يحطن باغراضي و فستاني و الشغلات الخاصة.
حنين: اگلج غياهب عزمتي العلوية اني نسيت
غياهب: اي خابرتها من جهازج بس تعذرت ما تگدر تجي لان عمليتها و ابنها
حرامات اتمنيتها تجي
وضعها ما يسمحلها و لا تنسين هيَّ عملية
اي خطية.
رجعت أكمل و المعجون حرگني بدلنا احنا الثلاثة نيروز ويانا اجت للصالون
اجه اخذنا درغام و خالاتي بقن يجهزن بالتجهيزات الباقية.
درغام: ولكممم راح اعررررس طگت مرررارتي و اناا انتظرررر اشتعلتتت روحك ذاك الواحد.
نيروز: اني ويا درغام بما انُ هوَ ما عنده اخت اني اخته.
يرووحلج فدوة اخوج نيرووزه اريدج تذبيننن لحم بعرس اخوج.
مشغل الاغاني و ما مصدگ فرحته واضحة تزيد فرحتي اكثر و اني اشوف
حماسه غياهب ما تعلق على شي بس تبتسم على سوالفنا، وصلنا للصالون
دخلنا احنا حاجزين استلمنا اني شرطت اريد صاحبة المركز تشتغلي
اما غياهب و نيروز استلمنهن الموظفات، الاجواء تشهي العرس الماشتهي.
و كل ما ام الصالون تروح تجيب فد شي اگوم اخذلي هزة على الماشي
و غياهب تصيح، كملت شغلها لبست فستاني الاحمر و اني راضية عن كلشي رادت تخليلي كحل گالتلها نيروز.
نيروز: عيوني لا تكثريلها كحلة هيَّ عيونها مكحلة لا الرجال يتخبل عليها و هوَ كحل عيونها مخبله من زمان.
گرصتهاا غياهب.
غياهب: فضحتنا الله يفضحجن.
سوت مثل ما گالتلها بس حواجبي شوية غيرت بلونهن ويا لون شعري كملنا.
لبست اكسسواراتي بعد ما لبست الفستان غياهب جانت واگفتلي بكل خطوة.
اتصلت غياهب علمود احد يجي يأخذنا گالولها راح يجي خالي عمران ياخذنا
لان هم مسوين حنة الدرغام ما طول خالي و اجانا فستاني جان شريف
والله مو مشلتح صعدنا اني و غياهب وره ونيروز بالگدام يم ابوها.
عمران: هااا خالي شو خلي اشووفج.
رفعت راسي عود خجلانة اللهم صلي على محمد وآل محمد اني خجلانة
باوعتله ما اتحملت ضحكت هز براسه يعرف بسوالفي ضحك ويايَّ.
حنين: شلوني خالي بذمتك مو طالعة أشگ اأبن أخوك
تموتين بعد خالج تشگينه و تشگين عشيرته
زين منو طالع أحلى اني لو هوَ
خيولي شنو هل المزنجر يوصل الجمالج.
ضحكت خالي عمران شگد ما تشوف هيئته تخوف بس سبورتي
و صلنا.
للقاعة بدون ما ندخل بالتفاصيل المُملة بدأت اجواء الحفلة اصوات الاغاني
و الهلاهل إلى تارسة القاعة عمامي و خوالي الباقين محد اجه منهم لاهم
و لا نسوانهم بقوا يحجون علينا شلون نسوي عرس محد أهتم الهم الحزن لا يقدم
و لا يأخر و لو ندري بيوم من الايام قذارة مجيد جان محد أجل العرس و لا أعترف بيهم.
وگفت نيروز لابسة فستان لون وردي فاتح هيَّ بيضة و غياهب بصفي.
تعدل بيَّ وترتب خاف شي مخربط فستانها اسود سادة و شعرها فاتحته بطوله مكياج بارز ملامحها وروج احمر.
غياهب: اوف يا جمالج صغيرونتي.
حنين: اييييي فدووووة احچوووا هيج خلي اشوووف روحي.
اجن خالاتي ويصلن على النبي مر وگت و صار وگت يحنيني درغام
شو هنا مغصتني معدتي و لا عبالك نفسي جنت اكمز و فرحانة دخل درغام
مبتسم و اشتغلت اغنية الدخولية، التفتنا اثنينا اني وغياهب من شفنه خالتي.
وجدان هلهلت ابتسمت لانها أدت واجبها ك أم بهذا اليوم بقت الاغنية
مستمرة بين ما صعد إلى لزم ايديَّ بايديه الدافية بقى يباوعلي بعيونه.
درغام: اخاف أسب أبوج و تتعاركين ويايَّ بنص القاعة گدام خُلگ الله
حنين: شتسب ترا عرسان احنا
يله هسه خلينا رومانسيين بعدين نتعارك خاي نضمها البعدين حبيبي
عفية.
جابت غياهب الحنة علمته غياهب شيسوي لزم ايدي حناها وحط فلوس عليها.
من عادات اهلي بالحنة من العريس يحني يخلي فلوس فوگ الحنة هلهلت خالتي جوهرة الأبنها.
جوهرة: ذبو القوط يهل القوط درغامنا لبس قاطه.
بقت تهوسله وتهلهل بقت الحفلة مستمرة نزلنا نرگص اني وياه بنص القاعة
بس مارگصنا سلوا لا ردح هنا ما قصرنا اني وياه وخالتي وجدان تصيح الخفيفين بعد شيلزمهم.
حضني گدام عيون الكل و احس بدگات گلبه لزم وجهي بايديه ابتسمت
بخجل لان گدام الناس باسني براسي و عيونه أكلتني بنظراتها.
احبج بلائيي الجميل.
حضنت وجهه بايديه مبتسمة.
مو گدي سبع الهورة.
حضني رجع ضميت وجهي بصدره خجلانة من عيون الكل بس فرحتي
و شعور يعجز لساني عن وضعهن، فرح، امان، حب، احتواء، سعادة لا تقدر بثمن.
غرام.
ما گدرت احظر لا حنة حنين و لا حتى عرسها انقهرت جان بنفسي اروح
سوزان بقت يمي اول ايام ولادتي وراحت لان زوجها وحدة حطيت ابني
بحضني عيونه مثل عيوني گوا شفناهن مليكة تگلي مبين نسختج ما مخلي.
شي منج گاعدة يمي ناز و فرحانة بي دخل عمر جنت گاعدة بالصالة شافنا ابتسم.
عمر: شلونج ام سراج.
أبتسمت و اني اعيش شعور الوحدة من ينادوها باسم ابنها.
غرام: الحمدلله.
دخل ارسلان بايده كومة غراض صارت عيونه على سراج هم ابتسم حط
الاغراض واجه اخذه مني شاله يبوس بي.
ارسلان: ولك شنو انتَ حلقوم
عمر: همزين خالي مو هنا چان صيح و گال عوفوا
خالك مثل الماشايف.
ضميت ضحكتي ارسلان مثل كُميل يذبون الحجاية تموت ضحك بس.
ما يضحكون گعد وابني بحضنه أشرلي على الاغراض.
ارسلان: ذني غراض جبناهن السراج انا و عمر
غرام: ليش زحمتوا نفسكم خوية صارت عنده هواية حتى احتار وين احطهن.
باسه بخده على كيفه و يحجي ويايَّ.
ارسلان: خلي يكبر بعد و نسويله غرفة وحدة و يصير زلمة حاله من حالنا
ان شاء الله يوم إلى انشوف ابنك بحضنك.
رفع راسه نظراته قهرتني من گال.
اذا مو من إلى يريدها گلبي ما اريد
ان شاء الله ماكو شي بعيد يم رب العالمين.
عفتهم يلعبون وياه هاب اذا ينجمعون كلهم ابني اصير ما ادري وينه
رغم صغير بس ارسلان يعرف شلون يتعامل وياه و يشيله مرات الگاه منومه
و عمر سوده عليَّ شابع تكفخ من ارسلان و كُميل بس يتقرب السراج ويلزمه كفخوا
حطيت الاغراض بالكنتور ورجعت يمهم ناز حاضنها عمر ويسولف وياها بس
هيَّ مبرطمة تباوع الارسلان ابتسمت من فهمتها غيرانه من حاط سراج بحضنه رحت اله اخذته منه لان خطية تنقهر.
غرام: ارسلان انطينياه خلي احطه بمكانه لان نام
ارسلان: لا عوفي بحضني خاف يگعد بس تاخذي.
استحيت منه شلون اوصله الفكرة علمود ناز أشرتله عليها.
احم. لا خلي أنومه شوف ناز.
دارت عيونه يباوعلها شافها مبرطمة و عمر يضحك.
هااا اييي هاج ابمج شنووو هاي يشلع الگلب دهااج هااج.
ضحكت اخذته منه و هوَ راح الها يراضيها عمر صاير حاروگة بس يحرك
بين الناس ما فكت النونة من ناز الا من راضاها نومت ابني بمكانه بالغرفة.
سمعت صوت كُميل طلعت مجرد لمحني اجه باتجاهي لزم ايدي باسها بوخ وجهي من الخجل اسحب بايدي مايقبل يعوفها.
غرام: عوفهااا عيب شوف الولد
كُميل: خيولون.
گعدنا كلنا و اجت مليكة گعدت ويانا الولد ارسلان و عمر طلعوا روحها هذا إلى يتحرش بيها و هذا إلى يعض بخدودها.
مليكة: يمن فلك طررركم و دهررر اليدهركم.
ارسلان: والله لگيتلج رجل يستر عليج
عمت عينك عفت شبابي واتزوج بكبرتي و شمالني ويستر عليَّ.
مليكة قلبي بعدج شباب چنج بنت السطعش مادري السبعطش تدگين الگاع برجلج تخسفيها
تغسل عبنك تضل مسربت وزايعتك الگاع.
حط راسه على رجلها مثل عادته.
مليكة اليوم شفتها طالعة من الصالون بنت االكلب تشگ شگ طالعة و الرايح و الجاي يباوع
ولك يمة عوف الفرحة ماتريدك چا هيَّ گوا
ماعوفهاااا نوب تريد تسافررر اخخخ.
رد عليه كُميل يحذر بي يحجي بجَدية.
كُميل: ارسلان عوف البنيه هيَّ لو الها نفس بيك وتريدك چا بقت وياك.
مااا اعوفهااا لو تنطبك السماء على الارض.
عمر: يا اخي كااافيك مشاكل ادري ما تعبت
ارسلان: لا هوَ انا اشتري المشاكل مشترى بروحي
ذاك اليوم شعندك ساحب مبلغ جبير شتسوي بي؟
غمض عيونه واردف ببرود.
شتريت بيت گبال بيتهم و سويتلهم سبرايز.
كلنا بقينا صافنين وگف كُميل دفره برجله.
كُميل: شكوووو رايح هنااك
ارسلان: اشتاق الطليقتي مو بيدي.
عمر: انتَ تاليتك مگتول لو جوا ايدها الطليقتك لو جوا ايدها ابوها ترا ابوهااا ما يبلعك
ما يهمني.
مليكة: انتَ تروح هناك تضل تچوي بروحك كل ماشفتها
هالمحامية چوت گلبي مليكة.
كُميل: لااا تخليني اتبرأ منك ارسسلان.
ارسلان: انا مامسوي شي لحد الان وعايفها براحتها بس جاي اراقبها مامسوي شي
كل هذا و ما مسوي؟
خالي خشمك لا تحشره بيَّ ماالك علاقة.
حچاها باستهزاء راد يروحله كُميل لزمته من ايده اتوسله بعيوني يعوفه.
لان ارسلان كلنا ندري بي إلى براسه يسوي و ما ياخذ بكلام احد
عشنا ايام
و بالنا يمه حتى جياته للبيت قلت تخبل الولد ساكن بذاك البيت ويراقب
بيها من ينزل مجاز من دوامه مرات يبقى عندنا اشوفه بالليل گاعد وحدة
ويطحن بهالجكاير، حنين اتصلت عليها وباركتلها.
غرام: كمولة وين صافن.
كُميل: اليوم سلطان خابرني وبقى يعاتب لان ارسلان مشتري البيت
الي گدامهم يگول مو كلشي انتهى عليمن هالسوالف الجاي يسويها
يريد يرجع غياهب.
ما ترجعله غرام و حتى لو رادت ترجع ابوها ما يرضى انتِ ما شايفة شلون ابوها يكرهه.
دارد عليه صارت عيني على الباب شفت ناز دخلت للمطبخ بقيت اباوع غريل هيَّ ما تدخل وحدها للمطبخ الا احد وياها نهضت من مكاني.
هسه أجيك
وين رايحة وانتِ عمليتج بعدها
هنا للمطبخ والله ما اتأخر.
طلعت من يمه و اتسائل شتسوي داخله هيَّ ماتدخل لأي مكان الا احد وياها
ما ادري ليش ما ارتاحيت، دخلت للمطبخ أفترت عيوني اتدور عليها وينها؟
صرخت شاهگة بألم وروحي فرفحت من أنغرس شي حاد بكتفي.