رواية وتيرة الأعرج للكاتبة حوراء السعيدي الفصل التاسع والثلاثون
غرام.
كملت رضاعة سراج عيوني أفترت على جهال أنسام گاعدين زينين هادئين
الي أكتشفته أغلبية الأطفال الوكحين بس من يشوفون اهلهم يتوكحون
بس بدونهم يگعدون هادئين و عاقلين سويتلهم صحن الفواكة حطيته
الهم ياكلون، بالي يم كُميل و أرسلان اتأخروا صاحت خالتي تريد علاجها
حطيت سراج بالكريكوت الارضي ابوه جابه اله دخلت للمطبخ اخذت العلاج انطيته الها.
مليكة: يمة غرام راح انامن من يجون گعديني راسي أحسنه مطرور.
غرام: صار.
عفتها تنام رجعت امشي منزلة راسي افكر بحياتنا قررت ارجع اتصل بي
اشوفهم وين وصلوا دخلت للصالة عيوني أترصدت الجهال واگفين على راس
سراج و يباوعوله ملامحهم كلها خوف طبكت حواجبي من وضعهم نزلت انظاري
علي ابني، اتجحظت عيوني مفتوحة بكل وسعهن و اني داشوفه يرفرف
مثل الطير المذبوح مختنگ ركضت عليه شلته اباوعله جسمي صار يرجف
الساني اربط گلبي راد يوگف بهل اللحظة.
غرام: شسويتوا خالة شسويتوا؟
حچى واحد منهم و هوَ يبچي.
وكلناه ويانا
شوووكلته؟
رمان حبة وحدة.
عفتهم و اني اشوف ابني دينازع بروحه عقلي وگف ركضت بي خارج
البيت روحي مفرفحة دموعي تنزل بغزارة وصلت للحديقة رجليَّ صارت
خيوط من شفته انتهى بين ايديَّ نزلت دموعي اكثر صرخت من عمق قلبي
متلوعة و مفرفحة انفتح باب الشارع دخل اول واحد ارسلان يركض وراه كُميل
ركضوا ناحيتي صارت ركضة كُميل أسرع كن ارسلان اخذ سراج مني يباوعله بصدمة.
غرام: ابنيييي مااتت ابنييي.
بدون ما ينطق حرف ركض بي للشارع اريد اگوم اريد اروح وياه ما اگدر
طلعت مليكة اثر صراخي تتسائل بخوف ارسلان گدامي و علامات الصدمة
معتلية ملامحه ما مستوعب إلى صار اريد اروح وره ابني مدا اگدر
أعين بروحي يريد يتقرب يساعدني بس ما يگدر اجت مليكة كومتني لازمتني.
مليكة: يمةةة يااا حبيبة ولجج شبيه ابنجج؟
غصيت بدموعي و شهگاتي مسموعة.
غرام: الجهال منطي حبة رمان.
لطمت على وجها حاچاها ارسلان إلى گوا يحجي صوته رايح و منتهي.
ارسلان: مليكة بس جيبي عبايتها خلي نلحگهم للمستشفى.
دخلت تجيب عبايتي شكل ابني و ملامحه إلى تبدلت نطبعت بعقلي
نزلت دموعي اكثر من إلى قبلها اجت جايبة العباية لبستها سريع دخل ارسلان
جاب مفاتيح سيارته لان هم رايحين للنجف بسيارة خالة صعدت وياه ماندري
بيا مستشفى اخذه كُميل، بچيت أكثر اللوم بنفسي حرگت گلبيي اذتني.
صوجي عفته اني شلون اعوفه وحده، اتصل ارسلان بخالة انطاه عنوان المستشفى.
ارسلان: ان شاء الله ماكو شي خطر ادعيله علوية.
غرام: اني اني الغلط مني عفته.
سكت و الخوف واضح بعيونه لعد شحال گلبي و اني امه طلعت روحي
بين ما وصلنا للمستشفى، دخلنا المستشفى كُميل واگف وجهه متغير لونه من خوفه وقلقه ركضت عليه.
غرام: ابنييي وين كُميللل.
لزمني يسيطر عليَّ احس بنفسي اتهسترت من مصيبتي.
كُميل: أهدي، دخلوا جوا الدكاترة يمة.
گعد گعدني بصفة دموعي ما بطلت بنزولها ابني اموت لو صارله شي ضميت وجهي بصدره أشهگ بدموعي بصوت مسموع.
كله بسببي
اش لا تحجين هيج.
بقينا الوقت منتظرين ما سكت لساني بتردد الدعاء كل ما اتذكر شكله اخر
مرة روحي تنسحب مني على البطيئ، ارسلان واگف على جهة و التعب مزروع
بي يمسح على وجهه و يهمس بكلام ما مسموع محد بينا اخذ نفس
براحة الا لمن طلع الدكتور وگفنا خايفين لازمين گلبنا اتقدم ارسلان اول واحد يسئله بخوف.
ارسلان: هااا دكتور شلووونه ابني؟
اثنينا صفنا على كلامه من گال ابني دارت عيونه علينا من شافنا نباوعله بلع ريگ و أردف.
أقصد أبنا دكتور.
رد عليه كُميل.
كُميل: ماكو فرق.
رجعنا تركيزنا ويا الدكتور.
الدكتور: لازم تنتبهون بالجايات لان الطفل بعده صغير ما ادري شلون اتحمل هالشي الحمدلله على سلامته الطفل احسن.
سحبنا نفس بأرتياح بعد القلق و التوتر إلى صار بينا نزلت دموعي بفرحتي.
و اني اسمع كلامه، للمرة الثانية ابني يطلع من الموت الاولى من وگعت
و صار عندي نزيف و هسه ربي ما قصر من فدوة لاسمك يا الله، بقينا بالمستشفى
الى ان أستقر وضعه بالكامل رجعنا للبيت وبايديَّ ابني عايش اتلگتنا مليكة.
مليكة: هااا ولكم.
ارسلان: عدت الحمدلله.
چانوا جهال أنسام واگفين و خطية يكسرون الخاطر خفت لا ارسلان
يتعصب عليهم هم اطفال شيفهمهم بالسووا، بس صار العكي اخذهم.
من ايديهم گعدهم بحضنه من الجهتين يسولف وياهم مليكة اخذت سراج مني روحه رايحة عليه.
ارسلان: خالو إلى سويتوا اليوم غلط ما يصير هوَ طفل بعده ما بگدر ياكل
مثلنا من يكبر يگدر ياكل و يلعب وياكم بس هسه ما ايصير بابا سراج صغير خلونا نتفق ما تتكرر؟
هزوا براسهم موافقين باسهم واخذهم الحضنه مغمض عيونه، اخذ كُميل
سراج ودخل للغرفة دخلت وراه تعبانة إلى صار اليوم اخذ كل حيلي.
لو صاير شي الابني اموت افقد عقلي ورسول الله، ابوه يباوعله باسه بحسره يشم بي.
كُميل: بوية روحي راحت عليك اليوم.
درت وجهي امسح بدموعي الماراضية تتوقف احس بنفسي اني السبب
لان عفته فزيت من افكاري من ايديه حاوطتني طبع قبلة بخدي.
كُميل: عيونج راحت عيناي
ما اگدر انسى إلى صار اليوم
قضاء و قدر لا تبقين تفكرين انتِ السبب و الزهرة ازعل منج
ما چان لازم أعوفه.
دارني عليه منزله راسي راسي صدع من البچي.
ولچ ام العيون التلمع لا تمردين گلبي بدموعج.
حضنته، سحب الحجاب يمسد على شعري يهدأ من حالتي، عيوني
علي ابني ما اگدر اتخيل فكرة ارجع اخسر احد من بعد امي ضمني الحضنه اكثر يريدني انام.
غمضي عيونج.
ادري بي انقهر بس ما يريد يحسسني بشي بادلته الحضن غمضت
عيوني كارهه هذا اليوم و حاولت ما اتذكره، الثاني يوم گعدت عيوني بسرعة
صارت على ابني كُميل شايلة بين ايديه و بناغيله يضحك، رجعت راسي.
علي المخدة تعبانة ابتسمت من سمعت كلامه عود يهمس بالكلام و ما منتبه عليَّ.
كُميل: أروح فدوة الهل العيون إلى تشبه عيون أمك.
نزل براسه باسه ورجع يحاجي.
أمك مخلصتها علينا بس تفتح بالبواري مالتها.
صفن الثواني بوجهه و ابتسم سرحان بتفكيره.
بس أحبها هاي ام العيون التلمع.
رجعت غمضت عيوني النعاس مسيطر عليَّ مر وقت نايمة گعدت من حسيت بشي يجك بوجهي يهمسلي بصوته.
كُميل: علويتي.
مارديت يقبل بوجهي بعشوائية بالاخير ختمها عضني بخدي فتحت عيوني منزعجة.
غرام: مو نايمة.
كُميل: غير اگعدج برومانسية
هذا تعنيف وين الرومانسية بالموضوع.
تريدين رومانسية؟
كلشي ما اريد اريد بس انام
راح يصير الظهر اگعدي حبيبي ابنج جوعان.
بسرعة كمزت من مكاني اتلفت بالغرفة من ذكرت سراج.
اسم الله الزهرة شبيج
وين سراج؟
هذا بكاروكه.
نزلت من مكاني اخذته حاضنته الصدري.
غرام: يا روح أمك.
گعدت ارضعه و أتثاوب ما شبعانة نوم رغم نمت هواية بس ما ادري شبيه رفعت راسي اله.
شلونه ارسلان.
ما طلع من غرفته من البارحة دگيت الباب عليه ما رد عليَّ عفته براحته.
شصار من رحتوا للمگبرة.
الله لا يشوفج حاله نهاني
يمة
و الزهرة غرام أنتهى گوا شلعته من يمهم
الله يساعده و يصبره.
بدأ يسولفلي عن حال ارسلان وعتابه ويا أهله، دموعي بدون سابق
أنذار بدأت تنزل شبعت قهر عليه، أرسلان رغم شخصيته الصارمة بس.
حنون و كل شخص صارم وقاسي انشوف عنده هذا الجانب كملت من سراج
و من هذا الحادث صرت حذره بكلشي يخصه و مستحيل اتركه وحدة
باوعت للساعة بالعشرة ونص الصبح دخلت للحمام غسلت صارت خالتي بوجهي.
غرام: صباح الخير خالة
مليكة: صباح العافية يمة
اعذربني گعدت هسه بس من التعب و هبطة أمس
معذورة بعد عيني انا هم گعدت سويت ريوگ إلى و الرجلج و للجهال تريگنا سراج يمنا
الف عافية
يعافيج حبيبة.
رجعت كُميل بقى طول اليوم مكابل سراج حتى شغلة ماراح اله باوعت
الوجهي بالمراية باوعت العيوني صاير بيهن فص احمر من البچي بوست
سراج قبل لا اطلع رفعت راسي يباوعلي رافع حاجبه.
غرام: ها كمولة
كُميل: بوسيني هم.
ضحكت و عبرت عليه صرت قريبة عليه حاوطت رقبته.
تغار من أبنك
مو شرط.
قربني اله اكثر.
ما تحسين نفسج صايرة بعيدة عني.
وقتي كله متخربط من الولادة.
باس عيوني.
و انا مخربط بدونج
احبك.
اخذ شفايفي بقبلة دافية مثلة قبلة طويلة تعبر عن أشتياقه ولهفته وحبه ابتعد عني جبينه على جبينه همس بصوت ذايب.
شحلاة عشگج علويتي.
دگات گلبي زادات هل الانسان اماني كله بوجوده روحي ما ترتاح الا و هوَ ويايَّ سحبت نفسي منه خجلانة.
غرام: احم. راح اروح اشوف شسوي للغدة.
ضحك بصوت و هوَ يگول.
كُميل: بس ترا بعدني ما شبعان.
طلعت من الغرفة وجهي مبوخ مبتسمة اسمع الصوت ضحكته ورايَّ جهال انسام گاعدين رحت عليهم.
شلونهم الحلوين.
ردوا اثنينهم بصوت واحد.
ذينين
نتغده و نخابر ماما شتگولون.
اثنينهم طفروا من مكانهم يكمزون فرحانين مرات يذكروها و يبچون دخلت للمطبخ
طلعت سمج قررت اسوي شوي و وياه تمن أحمر صرت مُمتازة بالطبخ بفضل
مليكة، اخذت تمن من الكيس دخل ارسلان للمطبخ بقيت صافنة بعيونه
مورمة بشكل فضيع طابك حواجبه اخذ كلاص صب بي مي شربه و التفت إلى و ابتسامة خفيفة على ثغره.
ارسلان: شلونه اليوم سراج.
غرام: احسن الحمدلله اذا تحب اتشوفه خالك عنده.
هز براسه و طلع بدون ما يحجي الله يساعد گلبه اخوانه و الانسانة إلى يحبها
بالغربة و هوَ صفى وحدة، بقيت بالمطبخ أكمل شغلي و كل شوية طالعة أشوف
أبني صارتلي خوفة بگلبي و طول ما أتردد عليه ارسلان حاطه بحضنه
وجهال گاعدين بصفه، وره الغدة أتصل عمر سلمنا عليه وبدأ أرسلان يتفقد و يسئل عن حال ناز.
ارسلان: شلون چانت الجلسة الأولى؟
ذب حسرة عمر وباوع لفد مكان رجع يكمل وياه.
عمر: صعبة بس الدكتور گال تتعود ويا الايام
و هسه شلونها
لا يضل بالك ارسلان حتى لو تعبت شي عادي و متوارد بهيج حالات هذا العلاج بعد.
ديربالك عليها عمر عيونك لا تفارگها
ان شاء الله خوية.
انسام شلونها
هاك احجي وياها.
اجت انسام سلمت علينا حجت ويا جهاالها هم شافوا امهم لو اتخبلوا بالبچي گوا سكتناهم رجع عمر يحجي.
عمر: وين ابن خالي خلوني أشوفه مشتاقتله.
دار ارسلان الكاميرا عليه ابتسم عمر و هوَ يباوعله مكزكز.
أروح فدوة الهل الخلقة.
كُميل: ولك عمير فاتتك سالفة
شنو
أجن سما و نور
خالي من تجيب طاريهن گول تكرمون
عاد هنا مستلمهن أخوك لحد ما شردهن
چا هوَ بس ارسلان دواهن هل الحياية همزين ما جنت موجود يا اخي ما اتحمل شكولهن.
بقوا يسولفون عن ناز اكثر الحديث جان عنها ارسلان مهتم الموضوعها
اكثر من اي شي، بلكي ابو نيروز يقبل ويفرح گلبه ال عمر هوَ من ذاك اليوم.
الي التقى بيها هنا ببيتنا و انطاها وعد بسبب موقفها وياه بعد ما أتقرب الها.
و لا حاول يوصل الها يگول ما اتريدني و وجودي يضايقها كل ما اتشوفني
تتأذه أكثر، نهض ارسلان من مكانه عبالي راح ينطينياه بس فاجئني من گال و هوَ يستدار علينا.
ارسلان: راح اخذه يمي جوا بغرفتي.
رجعت بانطاري الكُميل وجاوبته.
غرام: براحتك.
ارسلان.
الغرفة من أدخللها أختنگ أكثر بكل زاوية أشوفها، حطيت سراج بصفي.
هل الطفل أحس بروحي صارت بي معزته بروحي سبحان الله يمكن
لان هيَّ سمته، اباوعله بوجهه كل البرائه عيونه عيون العلوية هوَ نسختها
يشبها بالاكثر، احنا من چنا أطفال هم عندنا هاي البرائة؟ لو بس انا فقدت برائتي بطفولتي وبعد ما لگيتها.
ولك معزتك صارت من معزتها.
رجعت ظهري ساحب بلوزتها إلى خذيتها من رحتلها أشمها بشوغة گلبي محترگ عليها.
عفتج ترتاحين ما عفتج للأبد.
طلعت جهازي و البلوزة على گلبي طلعت صورتها من چنا بذاك البيت
صورتها بدون ما تنتبه عليَّ چانت گاعدة مثل عادتها تلبس نظاراتها
و تلزم كتابها تندمج بي مركز بملامحها العصبية دائماً قليل اشوفها
تضحك ضحكتها بس ويا اهلها تنشاف حقيقية.
الروح أشتاگت الچ، بگد ما عندج حنية تغرگ الواحد بس عندج قساوة
أضعاف من حنيتج، الحرب إلى دخلتها وياج بيوم من الايام و اتحديتج بيها طلعتي انتِ الربحانة بيها.
رجعت السراج جانت كل همومي أشكيها لهذا الطفل يمكن لان ما يگدر
يلوموني و لا يأذيني ويجرحني بقصد او بدون قصد.
شايف هالفوصة شگد جاي تشلع گلبي، ام شعر السلابيح، عود عبالها
أعوفها و روح أعزازي ما أعوفها، سوتها صدگ وبچتني كل حچاية
حجتها نفذتها، خلتني أعض اصابعي ندم خلتني أكره روحي و كلشي سويته.
ذبيت حسرة من تذكرت اخر مرة شفتها بالمطار.
الصلفة سافرت وحدها ماكو هيج عرامة، من اگول فرصة تصيح لا تصيحلي.
فرصة المسودن بشرفة انا مسودن؟ وين أكو أعقل مني.
مسحت على خدة اخاف عليه من خشونة ايدي و هوَ ترف.
اممم صح مرات أصير مسودن بس الحجي بينا سراج انا وياك مرات اتقصد اصير مسودن علمود تتقرب الي.
ضحكت على سوالفي إلى جنت اسويهن وياها مرات اتقصد اخليها
تتنرفز دخل خالي بس ملامحه غير مثل المستغرب گلت رحت يا ارسلان سمعوك.
كُميل: گوم أرسلان
ارسلان: وين؟ لو لان شفتني خذيت أبنك صرت تحوص
لا تاكل تبن زايد.
چا شتريد.
هذا سلطان هنا
سلطان؟ تقصد ابو غياهب
اي
شيريد
شمدريني الرجال منتظرك
جاي وراك.
طلع خالي بقيت بمكاني متفاجئ من جيته هو لا يطيقني و لا يتحمل
شوفتني و لا يحب نگعد بمكان واحد من يوم إلى انعرف كلشي طلعت انطيت
سراج الامة گاعدة طلعت الهم دخلت عليهم گاعد هوَو خالي وگف من شافني
مديت ايدي اصافحة للسلام بس جانت ردت فعله غير.
سلطان: ايدي ما اتصافح أيدك الا الگى جواب السؤالي.
رجعت ايدي الجيبي اباوعله انا اگول المحامية منين ماخذه قوة شخصيتها الاب واضحة شخصيته.
ارسلان: حياك الله بس الشنو رايد جواب؟
الك علاقة بموت مجيد؟
بدون تفكير جاوبته.
لا.
نط خالي من مكانه.
كُميل: لاااا تصدگه ابو غياهب.
خزرته يسكت بس ما فاد انا ما رايد يفكرون سويت هالشي و استخدمه نقطة ارجع بي غياهب.
ارسلان: خااااالي.
سلطان: غياهب حجلتنا عن مجيد
حجتلكم؟
اي لو ما ظاغط عليها چا بقت كاتمة
المطلوب مني هسه شنو؟
سؤالي واضح
گتلك مو انا و حرگ المعمل مالي علاقة بي.
ضحك رافع حاجبه.
شلك بهل السوالف ارسلان انتَ غير ما بقيت شي على حال الوادم كلشي حولته رماد
حقي
شعجب ما تقربت المحلاتي
هسه انتَ شرايد
خالك گال لا تصدگه معنى كلامه أكو غير كلام
مالك علاقة بخالي.
كُميل: اشوفه ينكر إلى سوا ما اتحمل اشوفه عايش بهل العذاب و بكل يوم
يتعذب أكثر ادري بي راح يضوج من تصرفي بس اتمنى بعد هالتصرف.
سلطان يغير نظرته اتجاه ارسلان، طلعت جهازي بي الفيديو ناقلة يمي بدون
علمه نفسه الفيديو إلى ارسلان صور مجيد وحفظه حطيته گدام ابو غياهب اثنينهم يباوعون للجهاز.
جوابك تلگاه بهذا الجهاز.
مد أيده ارسلان بسرعة يريد ياخذه لزمت ايده مانعه باوعلي بغضب ماراضي بتصرفي.
ارسلان: شجاااييي اتسوووويي خااالي.
كُميل: أشوف كافي لهنا.
حطيت الجهاز بأيد سلطان.
اتفضل شوفه بالكامل و أحكم.
اخذه شغلته اله ملامح وجهه تغيرت خصوصاً بعد ما سمع مجيد شلون جان
يتحرش ببنته بينما ارسلان ما قابل على إلى سويته بس لشوگت يبقى
متكتم على هالشي اليوم لو باجز كلشي يطلع ماكو شي ينضم. بقت عيون
سلطان على الفيديو عادة أكثر من مرة، رفع راسه ال ارسلان راد يحجي وگفة رفعة ايد ارسلان.
ارسلان: ما اريد شي منك غير تتكتم على هذا الشي و ما يوصل الغياهب.
ما انتظره يردله الرجال جواب عافنا و طلع سلطان ما حچى شي غير طلب.
انقله هذا الفيديو سلم وطلع وصلته السيارته ورجعت للبيت شفته گاعد يهز برجله بعصبية بس شافني وگف.
ارسلان: خااااالي انتَ ليشششش هيج سووووويتتتت
كُميل: لشوگت تبقى تضمضم بهذا الموضوع؟
غرام: شبيهم تخبلوا؟ واحد يخزر الثاني ما فاهمة عن شنو ديحجون
صاحت بيهم مليكة بسبب اصواتهم العالية إلى صارت.
مليكة: ولكم شمالكم.
ما رد ارسلان طلع من البيت كله ردلها جواب كُميل.
كُميل: هيج يمة شغلة صارت.
هم عافنا وطلع اتقدمت انطيت سراج الخالتي بحضنها طلعت وراه ادور
عليه جان گاعد يدخن موتني بهذا التدخين رحت امشي گعدت بصفه.
غرام: شصاير بالجديد
كُميل: ابو غياهب هنا چان
اي شفته من دخل بي ليش أجه؟
يتأكد من شغلة سئل ارسلان بيها و ما جاوبه الصدگ عاد هنا انا انطيته الجواب وهذا ضاج.
ها لعد هوَ ليش ما يريد يجاوب الصدگ.
لان غبي عااااجبه يبقى يتعذب
دحجيلي تدري بيَّ ما أحب الألغاز.
تذكرين مرة من گتلج بس شي واحد يمكن يشفع الارسلان
اي؟
و اليوم هالشي أنكشف و ارسلان ما قابل بي.
شنو هالشي.
سكت الثواني عيونه بالجكارة و صعقني من گال.
ارسلان حرك معمل خوال غياهب و خالها مجيد بي هذا المات.
شهگت ايدي على فمي من إلى سمعته.
بسس ليش قتله؟
لان مجيد
اي شبيه؟
ذب نفس مصاحبته حسرة.
لان مجيد متحرش بغياهب بطفولتها و هذا الشي عانت منه و مو بس هيج
حتى بغيرها أكو إلى متحرش بيهن تحرش كامل مدمر مستقبل بنات.
الله يعلم شصار بحالهن هل اتقبلن واقعهن اليوم؟ لو لا زالن يعانن.
رمشت بثكل كلمة التحرش تعيدني الماضيَّ و إلى داسمعه شل عقلي تحرش وطفلة؟ اردفت من بين صدمتي.
خالهاا؟
اي و تدرين غياهب شتعني الارسلان، ماراد يسوي هذا الشي وراد بس ينطي درس بس ذاك اعترف بكل قذاراته.
نزلت دموعي موقفي مشابهه الموقفها اكثر وحدة راح أحس وأفهم قذارة الشعور إلى عاشته.
الله يكون بعونها بس اتمنى لو تعرف ارسلان شسوا علمودها.
المطي طلب من أبوها ما يخليها تعرف شي
ليش؟ شبيه ارسلان
شمدريني خلي تفيده يباسة راسه هوَ رب العالمين من انطاه غياهب
لان يدري نفس الصنف و الطيور على أشكالها تقع
سكتت راسي
صدع من امس لليوم ماكو راحة لعد غياهب شگد متعذبة بحياتها؟
بس ما زالت لليوم تقاوم، مر يوم كامل ارسلان ماراجع للبيت يتصل عليه خاله ما يجاوبه.
لليل كلش دخل علينا بس مو أي دخولية سجل خلانا صافنين بيها دخل.
و بايده طفل صغير لازمة بقينا نصفن من منظرهم راحتله مليكة تباوعله بشك.
مليكة: ياا يمة منين هالفرخ.
ارسلان: لا تگولين فرخ مليكة گولي طفل.
الدهر فرك ولك منينن هذا جايبة النااا.
نزل انظاره للطفل ابتسم بخفه ورجع بعيونه يباوعلنا نطق الجواب المستحيل اتوقعه منه.
أبني.
حنين.
واگفة داخل الحمام أنتظر النتيجة تطلع و گلبي دگاته مسموعة عاضة شفتي
زفرت نفس بعمق و انرسمت ابتسامة على وجهي من شفت النتيجة أيجابية.
طلعت من الحمام والفرحة غامرتني ما أسيطر على أبتسامتي بس للتأكيد
لازم أسوي تحليل يم مختبر دگ جهازي شفته ابو جلطة و حتى على
رقمه كاتبة ابو جلطة من گد ما قبل يتعاير بالجلطة فتحت خط عليه.
حنين: ابو جلطة.
درغام: روح روحه انتِ.
أبتسمت الرده گعدت گدام مرايتي أمشط شعري و أسولف وياه.
شلونك
مشتاقلج
شوگت تجي
ذني اليومين، اهلي شلونهم.
الحمدلله، خالة راحت يم اختها اليوم.
بسرعة اجاني صوته يلعلع.
وانتِ شنوووو وحدددج؟
لا خالو يمي شبيك بسرعة تكهربت
لا تبقين وحدج كلشي يصير.
هم اصلاً اهلك من احد يطلع الثاني يبقى يمي اذا اني موجودة حتى
من يريدون يطلعون اثنينهم لو من اني بالدوام لو عند أهلي.
زين يسون. غياهب سافرت
أي
أهاا خو ما سوا شي ذاك الواحد
اسمه ارسسسلان.
ما علينا، سوا شي او لا
كلشي ما سوا شبيك داده تفتر على الرجال مكرود
بچتله
احم. اي شوف درغام
ما شايف غيرج حبيبي
اووييي كزكزززت.
ضحك بصوت و هوَ يگول.
اخخ منج چفوصي.
تحبني دلغام.
لا بس اموت عليج
أهوووو هم كزكزت
ههههههه احچي يا روحي شنو رايدة.
باجر خطوبة أنوار.
ياهيَّ نفسها البنيه إلى حچيتلي عنها قبل
اي هيَّ
اي شبيها؟
شنووووو شبيهاا
غير انتِ گلتي خطوبتها يعني انا شسوي شمطلوب مني
مو اريد اروح.
روحي بلائي بس خلي ابوي ياخذج و لا تتأخرين بالرجعة و هوَ يرجعج لا ترجعين ويا اي بشر غيره.
عبالي ما راح تقبل عود جهزتلك طن حجي و نكد.
چا انا لان أدري بسوالفج أحترمت نفسي و كرامتي و بسرعة گتلج روحي.
اويي شگد احبك
طبعاً تحبيني لان عندج مصلحة يمي.
ضحكت على كلامه.
درغام: دام عندي وقت شوية سولفيلي شلون چاي تگضين وقتج دوامج شوضعه.
رحت السريري مددت رجليَّ حطيت بحضني جبس اكل و اسولفله شلون
داقضي يومي و هوَ يستمع بس من يريد يسئل او يعلق على فد نقطة يگول
من رخصتج ولو اقاطعج رغم الميانة إلى بينا بس احترامه إلى شي ثاني
بالاوقات الجَدية، طلب يحجي ويا ابوه بعد ما كملت ردت اطلع وقفني صوته.
بلائي
ها حبيبي.
قبل لا تطلعين شوفي لبسج ادري بيج بغرفتج تحبين تاخذين راحتج
بلبسج بس گدام ابوي خلي لبسج مثل ما متفقين
اكيد و احنا على كلامنا لابسة شي مستور
احبج
مو گدي سبع الهورة.
طلعت أدور على خالي جان گاعد بالصالة يشاهد بالاخبار.
حنين: خالوا هذا درغام يريدك.
انطيته الجهاز وعفتهم براحتهم يمكن يريدون يحجون شي خاص دخلت
سويت صحن فواكة غياهب من وصلت دزتلي رسالة طمنتني بيها گالت اني.
اتصل عليج بس ارتب وضعي، بقيت بالمطبخ بين ما سمعت صوت خالي يصيح
باسمي اخذت الصحن وطلعت اله دخلت مكمل كلامه قدمتله الصحن.
اتفضل حبيبي سويته الك
جابر: رحم الله والديج.
انطاني جهازي درغام ساد الخط اكيد اجاه شغل، گعدت وياه.
جابر: درغام وصاني باجر أوصلج الصديقتج.
حنين: اي خطوبتها و عزمتني و هم عندي عطلة.
تدللين بابا
بس لازم اشتريلها هدية عيب اروح وايدي فارغة.
چا گومي هسه نروح دام بعد وگت.
بس شلون ما نطيت خبر الدرغام
خابري.
هزيت براسي رجعت الغرفتي اتصلت بي مهما بلغت قوة علاقتنا لازم
يكون اله خبر بكلشي اتصلت انطاه رفض بنفس الدقيقة دز رسالة كاتب.
درغام: يمي جماعتي
حنين: تمام بس ردت اگلك عادي اروح ويا خالي اشتري هدية.
بقى الدقائق مرت يله رد.
روحي و اخذي فلوس من إلى يمج
لا ما يحتاج عندي.
مارد عليَّ اكيد مشغول جهزت نفسي بلغت خالي طلعنا اني وياه بس ما ادري.
شنو اشتريلها انوار كلش حبابة و صديقتي الوحيدة بالدوام، دخلنا للمول
شغلاتهم حلوة أفتر و أفتر شنو اخذلها حايرة و خالي ويايَّ خجلانة
لان الرجال يفتر وساكت اخذتلها هدية مرتبة و رجعنا للبيت، لليل سويت تنظيف البشرتي.
عميق اتصلت بنيروز الوضع يمها مو مثل قبل خالي بعده ما يحجي وياها
و امها مثكلة عليها تريد تموت بقهرها ماجان عندي حل غير اصبر عليها.
و هيَّ الأمور تمشي، الثاني يوم رجعت خالتي جوهرة گتلها تروح ويايَّ ما قبلت تعبانة
جهزت نفسي لبست فستان مرتب عاد لعبتي هالشغلات و مكياج يناسبه.
طلعت اكسسوارات ما أحب البس الذهب و لا غياهب تحبه، لبست قلادة بيها
شغل لان فستاني من فوگ سادة لازم يبرز بشي و أسوار و حلقتيّ
بأصبعي باوعت النفسي كلش كافي كل ما قللت بالاشياء والتجأت للبساطة
راح تنطيك جمالية وترتيب خاص يلوك الك، شعري رفعته لو بيدي اگصه.
بس حكم القوي على الضعيف، طلعنا اني و خالي متوجهين البيت انوار
وحرگتني بالرسائل عبالها ما اجي وصلنا البيتهم بلغت خالي بس تكمل الحفلة أخابرك
دخلت جوا ما أعرف أحد بس انوار رحبت بيَّ مرة بوجه بشوش عرفتها
عن نفسي طلعت هيَّ امها سبحان الله عبالك انوار من ناحية الفرفشة
دخلتني الغرفة جانن بيها انوار و بنات يجهزون بيها ما ادري شعجب
مارايحة صالون بس ما سئلت خفت احرجها او يمكن اكو من يعرف.
بهيج شغل و ما احتاجت تروح الصالون، بس شافتني عافتهن اجتني حضنتني.
انوار: عبالي ماراح تجين
حنين: شلون ما اجي غير اختي انتِ.
ابتسمت عيونها تلمع بفرحتها گعدت بمكانها البنات يكملون تجهيزها.
محد اجت من البنات ما أدري ليش اقصدلج إلى بدوامنا عبالي حتى انتِ ما راح تجين
دخيولن شكو مهتمتلهن ذني يدورن تفخفخ
عذراء تگلي بيتكم وين يكفي
مو گتلج لا تهتمين حياتي.
بقيت ساكتة و مبين حازه بخاطرها من الزميلات إلى بالدوام من دخلت للبيت
اخذت نظرة سريعة عليه صح ناس على گد حالهم بس البيت مابي عيب نظافة
تلمع لمع الترتيب يخبل من ناحية اغراضة مو هوسة ورغم بنائه القديم
الا مرتب و كل انسان على گد حاله و للاسف البعض صار يدور طبقات
من ناحية الصداقة و المواصلات و هذا الشي غلط اهتم النظافة قلب وروح الانسان.
ما يخلون ابالهم الفقير و الغني اثنينهم راح ينامون بنفس اللحد القبر ، كملت طلعت شحلاتها اجتني همستلي.
انوار: لبست قفطان شوفي حلو عليَّ.
ابتسمت و اني اباوعلها والله ماناقصها شي.
تخبلين
عليج الله؟ يعني مكياجي و تسريحتي حلوات انتِ تعرفين بهيج شغلات نطيني رأيج
كلشي مثالي.
طلعن البنات بقينا اني وياها لاحظتها مو على بعضها وگفت گدام مرايتها صافنة.
حنين: انوار بيج شي؟
انوار: خايفة حنين خايفة ارجع أنكسر مثل قبل.
ذاك مو رجال لان مشى بحجي النسوان و دكتور حسنين انسان راقي بمعنى الكلمة راح يعوضج عن كلشي ان شاء الله
ان شاء الله أدعيلي.
انوار خطبها دكتور عندنا بالمستشفى من الدكاترة المحترمين والراقين
خصوصاً تواضعه الدرجة من يسولف ويا وحدة من البنات ما يحط عيونه بعيونها
جداً محترم و اتمنى يكون عوض الها بعد كسرتها من خطيبها السابق.
الي عجبني بي كان صريح وياها و گالها بدون اي أي علاقة اجي اخطبج من اهلج و هالشي عجبني بي.
طلعنا مسويلها كوشة مرتبة ما مقصرين متت بالترتيبات أجوا أهل الدكتور
حسنين و نفس اخلاقه وتواضعه اخواته و امه گعدت بجهة مر وقت و صار
العقد بينهم درت وجهي على صوت مرة جبيرة بالعمر گاعدة.
شتصيرين من العروس.
ابتسمت بوجهه.
حنين: صديقتها خالة
شحلاة مبسمج.
حبيبتي فدوة الوجهج
انتِ حامل ليش لابسة هل الچعب.
تقصد الكعب بقيت صافنة بكلامها شعرفها و بعدني مامتاكدة من حملي مضبوط.
بس اني بعدني ما متاكدة اذا حامل او لا.
ضربتني بخفة على كتفي تضحك ضحكت وياها.
مبين من ويهج حامل.
هههههههه الله يسمع منج.
سمعنا صوت الهلاهل أعتلى تم العقد الحمدلله رجعت انوار و ابتسامتها
ما غابت ردت اگوم اتباركلها سحبتني الحجية.
يمن دهر وين رايحة
ابارك الصديقتي
ماتشوفين الهوسة لا يطگنج وانتِ حبلة.
شنو هايشة و تگليلي حبلة خالة هههههههههههه.
بقت تضحك ويايَّ روحها حلوة.
جيلنا مو مثل جيلكم يمة
يخبل جيلكم ياريت لو صايرة بي الجيل القديم منبع الحنية الحقيقية و الناس على فطرتها.
هزا براسها مأيدة كلامي و هيَّ تگول.
كلشي راح ويا أهله.
ما سمحتلي اتحرك حتى ممتأكدة من نفسي گالوا راح يدخل العريس
باوعت الانوار غمزتلها اضحك نزلت عيونها خجلانة، دخل و أعتلت الهلاهل
للمرة الثانية و الاغاني و الهوسات صارت خبط ماتعرف وين تركز، منصي.
راسه حد ما وصل الها و بدأت فقراتهم الحلوة لبسها الذهب و ممنوع
احد يصور غير المصورة إلى جايبينها محد رفعت جهازها و صورت
كملوا ما طول لان الزلم تنتظره رحت عليها و اخيراً الحجية عتقتني حضنتها اباركلها.
حنين: مبروووووك
انوار: الله يبارك بيج يوم إلى الج
يااااا
خاب اسكتي صرت أعلس من التوتر أقصد يوم إلى انشوف بحضنج بيبي
لووو يسمعج درغام الا يلعب جولة يگلج لعد اني مو بعينج
ولچ نسيت والله هههههههههه.
رگصت شوية وياها لازم ارجع اتأخرت خابرت خالي يجي ياخذني بقيت گاعدة
اباوعلها اهلها ممقصرين بشي نص ساعة و خالي اجه سلمت عليها
و على امها طلعت شفته بسيارته صعدت وياه.
حنين: السلام عليكم.
جابر: عليكم السلام.
أباوعله مو على بعضه بقيت ساكتة الطريق كله يذب حسرات قلقني.
خالي بيك شي؟
والله ما أدري شگلج
خوفتني والله
خلي نوصل للبيت واحجيلج.
بقيت طول الطريق أفكر و ألف سيناريو و دراما و افلام لان حياتنا ماشاء الله.
صايرة، حتى اذا سولفت عنها منو يصدگ بس البيوت أسرار وصلنا للبيت
دخلت جانت خالتي گاعدة درت وجهي الخالي وخايفة لا مصيبة جديدة مانلحك نرتاح من مصيبة تطگنا الثانية صفح.
احچيلي والله گلبي راح يوگف
سلامة گلبج بنتي
صاير شي الاهلي او الدرغام؟
لا لا بابا ما بيهم شي.
لعد شكو؟
باوع الخالتي ورجع باوعلي.
ارسلان هوَ إلى حرگ المعمل إلى بي مجيد.
بقيت صافنة صافنة جانت عندي شكوك بس ماشاركتها غير مرة ويا غياهب من أطلگت.
يعني شنو قتله عمداً لو مايدري بي؟
ابوج خابرني رحت اله وشوفني فيديو بي اعتراف ال مجيد و هوَ يعترف بكل أعماله ويا غياهب و ويا غيرها.
لزم راسه ملامحه تنزف قهر حكيت طرف انفي يعني خالي فهم كلشي وفهم وساخة مجيد.
اي و شصار
سمعت إلى ما أتمنى أسمعه بحياتي
للأسف احنا عرفنا متأخرين هم.
ولكممم صرررررت استحي اگوووول مجيدددد اخوووووي و ساااالم أبوووووي حطوووا روسنااا بالگاااع.
صار يرجف من عصبيته.
خالي راسكم مرفوع هم إلى سمعتهم تأذت.
گعد لازم راسه گعدت بصفه خالتي تهدأ بي حقه ينقهر ابوه قاتل و اخوه بهل الدنائة و القذارة يطلع، لليل اتصلت غياهب.
غياهب: شلونه الوضع.
حنين: ملخبط
ليش شكو؟
ارسلان إلى طلع حارگ معمل خوالي و إلى بي النعال مجيد و مسجل اعترافه بكلشي سواا وياج و مو بس هيج ويا غيرج هم عسا جهنم تحرگه و لو ارسلان ما قصر بي.
اختفى صوت غياهب اصيح الو الو ماتحجي.
وووينج ويايَّ؟
هاا اي وياج إلى حجيتي صدگ لو تشاقين
لا والله صدگ و اذا تريدين خابري بابا اتأكدي منه
ماشي حنين بعدين نحجي.
سديته منها و بنفس اللحظة اجتني رسالة من ابوية كاتبلي بيها.
سلطان: بابا حنين اذا خالج حچى بالموضوع گدامج و صار عندج علم لا تحجين شي گدام اختج بحال صار بينجن تواصل.
لطمت على خدي لعد اني قبل شوية سردت كلشي الها كتبتله.
اسفة بابا بس اني حجيت الغياهب كلشي ما عبالي ما تريدون تعرف.
شافها و ما جاوب بشي بعد، صفنت هوَ ليش مايريدها تعرف بالسوا ارسلان؟
يستاهل النعال مجيد لفيت راسي و نمت و جانب مني حق اختي انوخذ.
گعدت الصبح بدلت سريع لان گاعدة متأخرة والله اني بالضيم من ابو جلطة يروح
الدوامه من هوَ هنا يگعدني و يوقتلي الساعة، وصلت للمستشفى صارت بوجهي انوار.
انوار: ها حنينة متأخرة ولج
حنين: اسكتي نمت و بعد ما گعدت
يله مو هواية تأخرتي.
اي همزين اگلج اريد اسوي تحليل
تحليل شنو؟
حمل.
فتحت عيونها والضحكة شگت حلگها.
لا تگليلي حامل
هوَ يعني ما أدري بس يمكن اني سويت الاختبار المنزلي و طلع ايجابي بس اريد اتأكد اسوي تحليل خاص
خوش خلي نكمل كم شغلة وانسوي
لا ما اريد هنا اريد اروح الدكتورة خارج المستشفى
خوش نخلي حسنين ياخذنا.
دنجبي نوب تريديني اصعد وياه حتى درغام يشگني
ليش ما يقبل؟
اي والله خية ما يقبل
لعد نروح اني و وياج اعرف خوش دكتورة
اتفقنا.
بلشنا شغل و انوار تسولفلي عن الهدايا إلى جايبيها دنمشي صار گدامنا و الاخت تفعت عندها خاصية الخجل.
حسنين: السلام عليكم
حنين: عليكم السلام دكتور.
عفتهم ورحت امشي شعندي باقية بنصهم و هم خاطبين بالجديد بس والله
الا اسئل انوار ابوها هم مثل ابوية، درغام باجر يجي مرت الساعات
بالدوام الى ان خلص طلبت من الخط يروح طلعنا اني و انوار للدكتورة
بس ما عندي اعراض الحمل الكلش قوية، دخلنا للدكتورة شرحتلها.
و سئلت عن كم شغلة نسائية حولتني للتحليل سويته بقينا گاعدين ننتظر.
انوار: چلبة شلون تعرفيني و اتروحين
حنين: حتى اذا ابوج مثل ابوية انصحج تستغلين اوقاتج بالمستشفى
وياه لا يصير مثل رجلي سودة عليَّ گضاها عليه ابوية نص ساعة بنص ساعة
لا ابوية زين
لعد بوسي ايدج.
بقينا نسولف الى ان طلع التحليل دخلنا للدكتورة سلمتها النتيجة و أحس بروحي
أرجف من الحماس و التوتر ضحكت عيوني و بسمي من بشرتني بخبر حملي.
و الفرحة إلى انرزقت بيها طلعنا منها و انوار عبالك هيَّ الحامل مو اني.
انوار: الله الله حنينة راح يجينا كتكوت صغير
حنين: اگلج شو من هسه أحتاريت.
شنو اقصد بشنو احتاريتي.
چنا واگفين بالشارع و من كل عقلي احچي.
هسه انب اربي روحي لو اربي الطفل من يجي شو الشغلة الاصت
هههههههههه والله عليج سوالف
داحجي صدگ ترا هوَ اني لليوم كل چفصة اذبها اكبر من راسي وراسج.
خاب تتعودين و تتعلمين قابل الصارن امهات كلشي يعرفن.
هزيت براسي اقنع نفسي، رجعنا كلمن البيتها بايدي ورقة التحليل
ضميتها بجنطتي اريده هوَ اول شخص يعرف و اشوف ردت فعله.
جوهرة: اتأخرتي حنونة خالج خابر سايقج گاله هيَّ طلبت مني اروح
حنين: اي خالة جانت عندي شغلة ويا صديقتي
ها خوش اصبلج اكل
لا لا اني اصب بس أبدل.
دخلت الغرفتي شنو المرة تشتغل خدامة عندي مو كافي الطبخ عليها
و اني عليه الخفايف اسوي زلاطة احضر فواكة و هالشغلات بس التنظيف.
لا ماخليها تلزم شي لان ادري بروحي مابيَّ خير بالطبخ، اكلت و گضيت
اليوم كله اتبسم وفرحانة شعور حلو من تحس بداخلك كائن يجي ينورك
حياتك و مو اي نعمة هذا اجمل ما يجي من رب العالمين خصوصاً من يجي ويصير ثمرة حب بينك وبين إلى تحبه.
و صار عندي أقتناع ماكو شخص يتحملني من بعد ابوية غير درغام صبور
ويايَّ رغم عصبيته مرات اكو شغلات اجهل معرفتها يگعد يعلمني عليها بدون.
ما يحسسني بشي، اجه اليوم إلى نزل بي دخل علينا سلم على خالي
و خالتي سلمت عليه قبل راسي يباوع بعيوني بكل أشتياق.
درغام: شلونها بلائي.
حنين: صرت احسن بشوفتك.
اخذت جنطته و دخلت للغرفة حطيتها بمكانها رجعت يمهم و خالتي كل شوية
و حاضنته و تبوس بي هاي مال أغار من أمه مستحيل شگد ما أحبه و أغار
عليه بس الوحيدة امه ما اغار عليها و لا اريد أصير أور بهيج شغلة تبقى امه و الاولى بكلشي.
جوهرة: بعد أمك والله من تروح گلبي يضل يمك.
لزم ايدها باسها.
درغام: مو جديدة عليج.
خالي جان ماله خلگ مو مثل كل مرة من يجي درغام و اكيد السبب
موضوع مجيد بعده ضايج منه بس لاحظه درغام وعيونه بقت تتسائل.
درغام: ها يابه شو ضايج خيرك
جابر: تعبان شوية وليدي ماكو شي.
رجع يذب حسرات باوعلي درغام بتسائل، نهض من مكانه مترخص
منهم أشرتلي خالتي اروح وراه و لاتگعد راحة دخلت جان دينزع بقميصه.
رفع راسه فتحلي ايديه حضنته بكل قوتي بگد ما مشتاقتله عصرني اكثر الحضنه.
درغام: طگ گلبي الشوفتج
حنين: حتى اني والله.
باس الشامة مكانه المفضل و ابتعد اخذ ملابسة يسبح قبل لا يطلع صحت وراه.
احطلك عشه
لا تعشيت بالطريق.
طلع بقيت بمكاني متشوقة الردت فعله فتحت المجر إلى بي النتيجة ساعة ضربت ال 11
بالليل ركضت عدلت نفسي و تجيهزات هوَ هم اتأخر بالحمام بين مارجع فتح.
الباب دخل ينشف بشعره اباوعله من المراية اسوي بشعري ارتبه وگف ورايَّ سحب عطره الخاص.
درغام: تريدين اثبتين لقب ابو جلطة و تجلطيني.
باوعتله بثقة.
حنين: جلطة و مني يا محلاها.
انعللل ابوج سطرتيني بهل العيون.
گرصته ببطنه يضحك.
مو گايلتلك لا تسب أبوية.
انتِ تجيبيها الروحج.
ابتسمت اتقربت اله ايدي على جهة گلبه أحس بنبضه إلى ينبضلي.
مجهزتلك مفاجئة.
أويلي على گلبي
اوگف هنا لا تتحرك.
درت وجهي سحبتها رجعت اله حطيتها بايده طبك حواجبه مبتسم.
شنو هاي
شوفه.
فتح الورقة صفن بيها رفع عيونه ناحيتي.
كلشي ما فهمت فهميني.
اني حامل.
بقى صافن بوجهي الثواني هم ليش الزلم يصفنون بعضهم من مرته تطلع حامل.
عليج علي؟
و الامام علي
اوگفي شو انسطرت يعني هسه اني راح اصير اب.
هزيت براسي اضحك رفع ايده يهدد.
شوفي اذا تطلع وحدة من سوالفج اموتج
يااا شبيك مو گدامك ورقة التحليل
هممم صدگ.
عض شفته مبتسم فرحته تنقرأ بعيونه سحبني اله يبوس و اني اضحك.
جعصتني يمعوود
حلال عليج كل سنة انتظرتج بيها حلال عليج كل التعب إلى تعبته الج.
هاي كله لان راح اصير اب
ولِچ فررحان حتى تعبي نسيته بهذا الخبر
ديربالك لا تنساني بسببه
أكو واحد ينسى بلائه.
نمنا و الليل كله ميتة ضحك عليه حط ايده على بطني و گوا كاتمة ضحكتي.
يعني هسه طفلها هنا
لا براسي
انجبي حنين
هااا؟ شو گلت حنين.
أقصد حنيني.
اي عفية خليك دائماً تگول حنيني و بلائي الجميل احس بحبك من تگولهن بس من تگول حنين احس بشعور خايس
ههههههههههه خبلة، منو يعرف غيري؟
بس أنوار
باجر نحجي الأهلنا.
ان شاء الله.
حضنته ما مصدگة گدامي بس بنفس الوقت اتضايقت من عطره بقيت
ساكتة بس لا نساوتي تخليني انفر منه الا يدگ على راسه ضمني الحضنه يتغزل بيَّ الى ان نمنا.
غياهب.
بقى يباوعلي بأستغراب.
راهب: انتِ؟
غياهب: شتسوي هنا
مسافر.
درت وجهب عنه لا السالفة طلعت من ماعونها وين ما اروح الگاه گدامي معقولة صدف؟
لو اكو شي ثاني؟ شنو الوضع شديصير، لبست سماعاتي و بعد ما التفتت اله.
ان وصلنا و هوَ عيونه عليَّ متجاهلة نظراته كلها اني وين وانتَ وين
بدوا ينزلون
الركاب المسافرين و اني من ضمنهم اخذت جنطتي و امشي بنص المطار أدور
بالوجوه على عمو كريم بابا گال راح تلگينه منتظرج شفته من بعيد واگف وياه.
بنيه مجرد لمحني لوحلي من بعيد رافع ايده مبتسم مشيت باتجاهه مبتسمة سلمت عليه.
غياهب: شلونك عمو ان شاء الله بخير
كريم: الله يسلمج بنتي الحمدلله والله فرحني الوالد من گال جاية
الله يخليك شكراً، ردت اگعد بفندق امم بس بابا ما قبل و الا والله جداً خجلانة منك
لا بابا شنو هالكلام لا تزعليني منج.
صارت عيوني على البنيه الواگفة بصفه شكلها ناعم بشرتها بيضة محجبة تباوعلنا مبتسمة.
كريم: بنتي اية.
مديت ايدي اصافحها سلمت عليها.
غياهب: اهلاً و سهلاً
اية: هلا بيج عمري نورتينا والله.
ابتسمت بوجهه احس منحرجة لان راح اروح وياهم بس ادري ابوية من يگول
الكلمة بعد خلاص انتهت استغربت بعدهم واگفين و يباوعون ورايَّ.
منتظرين احد.
اية: اي ابن عمتي هم اجه اليوم من العراق
ها تمام.
شهل المسلتة ياربي نوب ابن عمتها اكيد ما راح ابقى ببيت بي ولد ما اعرفه
سحبت اية على صفحة من ايدها بقت البنيه تباوعلي مستغربة من تصرفي.
عفواً على سؤالي بس ابن عمتج شنو راح يگعد يمكم؟
لا لا عنده شقة يبقى بيها بس بابا گاله اليوم يمنا تبقى وباجر روح.
هزيت براسي مضايقة مو مناسب ابداً بقيت واگفة انتظر هذا يجي
وين صار رفعت حاجبي من شفت هذا المحامي ديمشي باتجاهنا كل الي
ابالي يريد يجي يحاجيني بس أتبسمرت بمكاني من شفته حضن عمو كريم شديصير؟ باوعت الاية.
غياهب: لا تگليلي هذا ابن عمتج
اية: اي اسمه راهب و محامي مثلج لان بابا گال انتِ هم محامية.
نفسيتي
هنا م صدك تعكرت شجابة عليَّ هذا استغفرلله بقى يباوع عليه رد عليه عمو كريم.
كريم: غياهب بنت صديقي جاية هنا هم فترة مثلك.
ابتسم و ملامحه متفاجئة من وجودي و بنفس المكان.
راهب: اممم غياهب اهلاً و سهلاً اسمج مُميز
غياهب: شكراً.
طلعنا من المطار و اذا اگول كلشي ديصير عادي ف لا ابداً اجامل نفسي
لان الوضع صار لا يطاق و هذا شگد يلح اتخبل من شخص يلح صعدنا بالسيارة متوجهين للبيت.
كريم: والله العظيم فرحتي بيكم ما تنوصف
راهب: تسلم خالي الله يحفظك.
بقيت ساكتة و اية تسولف ويايَّ بين ما وصلنا البيتهم نزلمت درت وجهي انزل جنطتي اجه وگف بصفي.
راهب: انطينياها عنج
غياهب: شكراً ما يحتاج.
سحبها من ايدي خلاني فاتحة حلگي اخذها بدون ما يهتم نزلها ويا جنطته
مشى گدامي مال هسه الزگه بدفرة بنص ظهره و اخلي يمشي صفح
دخلنا للبيت رحبت بينا زوجة كريم اسمع صوته يسلم عليها.
ام اية: حبايبي اكيد تعبانين روحوا الغرفكم ارتاحوا بين ما يجهز الاكل.
اية: تعالي غياهب انتِ راح تبقين ويايَّ بالغرفة هوَ اكو غرفة ههههههه بس حبيت تبقين يمي اونسج و تونسيني.
ابتسمتلها.
ماكو مشكلة.
طلعنا من يمهم صعدنا للطابق الثاني دخلنا للغرفة غرفتها بناتيه مرتبة أفترت حول نفسها مبتسمة.
اية: حلوة غرفتي؟
ضحكت على سوالفها مثل سوالف حنين بس اتمنى ما تطلع تچفص مثلها.
غياهب: حلوة مثلج.
اخذت جنطتي تريد ترتب ملابسي رحت عليها.
لا عوفيهن اني اسويهن
انتِ روحي اسبحي شوفي خليتلج خزانة كاملة بس الج شوفيها تكفيج.
فتحتها شفتها كافي إلى والاغراضي.
كافية شكراً الج
الحمدلله لعد.
وگفنا اني و وياها نرتب بأغراضي و هيَّ منطلقة تسولف بس فاجئتني من گالت.
غياهب لا تتفاجئين من نظرات راهب الج يمكن تشوفيها زايدة و تصرف
مو حلو بس راهب والله كلش حباب بس اتوقع من شافج ذكر شخص.
ما فهمت منو الشخص.
اخته، نفس شعرج و نفس عيونج حتى احس نفس الشخصية
وينها لعد اخته؟
باوعتلي بنظرات حزينة.
جانت حامل و هيَّ مريضة قلب صارت عندها مضاعفات بالولادة و اتوفت
زوجها ترك ابنه و سافر و ماراد الطفل يگول هوَ السبب برفاة امه تعاركوا
هوَ وراهب و الطفل اخذه راهب ورباه هوَ وامه عمتي و هسه الولد عمره خمس سنوات.
بقيت صافنة اذا كلامها صح ف شي محزن و يقهر.
الله يرحمها ابوه تفكيره غلط الطفل شنو ذنبه ما اله أي ذنب.
شگد حچوا وياه قافل عوفينا منه بس حبيت اوضحلج هالشي ماريدج تفكرين بنية سيئة
اممم.
كملنا ترتيب اغراضي واخذت ملابس دخلت للحمام حمامهم داخل الغرفة
سبحت وطلعت اية ماموجودة تسشورت شعري رفعته لفوك خابرت ابوية طمنته
بوصولي بس ما گتله على هذا راهب دام بس اليوم يبقى هنا دزيت رسالة الحنين هم
طلعت من الغرفة دامشي على الدرج وصف يمي هم نازل.
راهب: هاا ست طلعتي محامية
غياهب: و شنو الغريب
و اسمج غياهب كلشي بيج مُميز.
وگفت رافعة حاجبي.
خليك بنفسك و لا تتقرب الي.
ضحك و اشرلي بايده بمعنى تمام نزل گدامي مجهزين السفرة گعدنا كلنا سوا باثناء مدا اكل وجه كلامه الي.
راهب: ست غياهب انتِ شتغلتي بالمحاماة لو بعدج
غياهب: بعدني فقط متخرجة
اها حلو، انتم سكنكم ببغداد ثابت
اي
زين عندي عرض الج.
باوعله عمو كريم.
راهب: شنو رأيج من ترجعين للعراق تشتغلين وبأيَّ.
بقيت صافنة بعرضه شبكت اصابيعي ببعض رفعت عيوني عليه.
غياهب: حلو عرضك بس حالياً ما مفكرة بهيج شي
العرض دايم الج فكري براحتج.
هزيت براسي تسليك يس اريده يسد الموضوع، الثاني يوم راح ر اتصلت
بحنين لان گتلها اني اتصل عليج بقينا نسولف بس انطتني خبر شلاني
من سمعته ارسلان سبب بموت مجيد و حرگ معمله بس ما عرفت هوَ سوا
هيج لان عنده ثأر وياهم لو لان عرف شسوا ويايَّ بالماضي
طلعت الخارج البيت بعد ما غلقته منها هذا همزين راح الشقته لو باقي.
جان عفت البيت وطلعت خابرت على ابوية أفهم منه.
سلطان: هلا نظر عيني
غياهب: شلونك بابا
نحمد الله انتِ شلونج
بخير مرتاحة، امم بابا ممكن اسئلك سؤال
گولي.
صحيح ارسلان وره موت مجيد؟
غرام.
بهتت وجوهنا من گال كلمة ابني وگفت گباله مليكة تباوع للطفل وترجع تباوع عليه المرة مصدومة.
مليكة: تحچي صدگ لو تشاقة ولك المسربت.
شال الطفل يطلع عمره بالاربع سنوات گعده بحضنه يبوس بي و الطفل.
يضحك ضام روحه بحضن ارسلان رفع ارسلان راسه يضحك.
ارسلان: شبيكم صفنتوا يابه
كُميل: شجاي تمسلت ارسلان؟ أبنك شنو
خالي تدري بيَّ نقطة ضعفي الاطفال و اي طفل أشوفه أعتبره مثل ابني
هذا الطفل ابني صديقي ما عنده احد و أهل مرته بغير محافظة مرته مسويلها عملية خو ما يخلي ابنه بالمستشفيات جبته يمي.
الله يطيح حظك
مو عيب اخون ام شعر السلابيح
عاد لو مگلبتك بيها مجال شردت منك.
باوع الخاله صفح.
لا تضل تعير بيَّ تاليتها ترجع.
چا ابو الولد شنو ما عنده أهل
امه و ابوه ميتين و عمامه مو كلش علاقتهم لان ماخذه وحدة من غير محافظة
و. ، باوعله سكت، هسه احنا شعلينااا بالوادم نخلي الطفل يمنا ذني اليومين و من يطلع مرته يجي ياخذه.
ارسلان أنصحك نصيحة تترك شغلك بالسلك العسكري و افتحلك حضانه.
و اگعد ألبس حفاظات و اشرب حليب خالي انجب اكرمنا بسكوتك يرحم والديك.
گعدت من الهبطة إلى هبطنياها استاذ ارسلان بقت مليكة تسئل عن الطفل و أهله و هوَ يجاوبها.
مليكة: دام هيج چا باجر تاخذني للبنيه اشوفنها خاف محتاجة شي.
ارسلان: اي والله مليكة شو شفت زوجها حاير بيها لان وحدة شوفيها للبنيه خاف محتاجة شي
كُميل: أويلي عليك گلبك حنيته تخرخر.
چا شعبالك اغرگك و أغرگ عشيرتك بيها.
نهض من مكانه شال الطفل سواله حركة بأنفه يضحك جر خده باسه.
دخل الغرفته يهمس وياه بكلمات التفتت علينا مليكة.
مليكة: هل المفلوك خليني ازوجه لا يسويلنا سالفة.
كُميل: ارسلان ما عنده سوالف مو زينة تدرين بي يمة و من كل عقلج ارسلان يتزوج و هوَ گلبه يم وحدة ماكو غيرها.
طلع ارسلان من غرفته باوعلي و طلب طلبه بأحترام.
ارسلان: و لو أتعبج بس سبحي نسيت الملابس إلى اشتريتهن اله بالسيارة هسه اجيبهن.
غرام: بعيني.
طلع الطفل وراه لزم باصابع ايده اخذته منه و الحلو ما عنده أستغراب.
هادئ دخلته للحمام خدوده مدنفشة و شعره محلقي اله بگصه حلوة شعره ثخين و ابيض يجنن.
شنو اسمك.
حط اصبعه بفمه مثل إلى يفكر نزل ايده.
أثمي عبوثي
ههههههههه فدوة العبوثي.
كملت سبحة ولفيته بالمنشفة طلعنا ارسلان گاعد ينتظرنا بصفه الملابس
بس شافة ركضله ذب نفسه بحضنه و ارسلان طاير بي اتخيل لو صار عنده طفل شنو من حنية راح يقدمها اله.
غرام: خليني اني ابدله.
ارسلان: مشكورة انا ابدله تعبتج ام سراج.
تدللون.
گعدت بصف كُميل مندمج بالجهاز و اثنينهم ارسلان و الطفل يضحكون
اتقربت اله اباوع شديسوي شفت يحجي ويا حساب و الحساب واضح لبنيه
من الصورة إلى مخليتها ما گدرت الگف كل الكلام غير بالاخير كاتب
حياج الله عيناي، رفع راسه شافني قريبة عليه رفعت حاجبي مقلصة عيوني.
غرام: منو هاي
كُميل: مُعجبة.
هه هه
شو ما مصدگة
صدگ تحجي كُميل؟
اي.
دخنت درت وجهب عنه خازرته نهضت من مكاني فوگاها يحجي بكل صلافة.
گدامي دخلت للغرفة مطنكرة ادردم بگلبي عليه اصلاً شتوقع من واحد جانت
عنده علاقات قبل و يضحك عليَّ والله شنو صداقات عابرة و الله يا الله انفتح
الباب درت وجهي شفته هوَ، دخل سد الباب وگف گدام المرايا يمشط
بشعره اباوعله رش عطر اتخبلت دمي غلى غلي رحت عليه وگفت و دمي فاير.
غرام: هااااا رايحلهااا
ياهيَّ منهن؟
فتحت عيوني على وسعهن.
يا هيَّ منهن؟
شتحجين انتِ
احچي اجنبي داحچي عررررربي ترررررا.
رفع حاجبه يباوعلي بتك عين.
شو تصيحين غرام؟
لعددد شتررريد اگلك عفية وروووحلهااا.
مسح على لحيته بس اني ثولة فطيرة ما افهم كلشي بسرعة وينضحك عليَّ، ضام ضحكته بينما اني نار صرت.
شبيج راح تموتين
اذا ترووووحلهااا بعدد لاااا ترجععع خوووووش.
يعني ابقى يمها؟
أي أبقى اني الرجال إلى يفضل وحدة عليَّ مااا اريده.
هايهية متفقين.
درت وجهي أزفر بعصبية ورسول الله فكرة وحدة وياه من اتخيلها اتشعوط.
عقل ما بقى براسي ضربت رجلي بالگاع بعصبية گعدت على الچرباية اخزر بي.
غرام: انيييي اصلاً صوووچي مااا اتعلمت من غياهب.
كُميل: أهاا و شتتعلمين خالي؟
ارسلان حتى لو يتغزل بيهااا ماتنطي مجال
ذولة فايخين
علي الاقل ارسلان حتى من راحت بقى محافظ على ذكراها
بس ابقى انا أحسن منه وشرفي
اييييي اييييي كلشششش.
راح تطگها الجلطة
منووو هاي؟
هيج وحدة تحبني و تغار عليَّ راح تنجلط تغار عليَّ حتى منج.
اوگف شگلت؟ يعني تعرف انتَ متزووووج.
طبعاً.
ضربت على رجلي.
أنغشيتتتتت بيك
مع الأسف.
طفرت من مكاني مديت ايدي اله.
انطيني جهازك
شتسوين بي
اريده
ما انطي بي شغلات خاصة
بي نسوووووان قصدك
صايرة ذكية
ليش اني غبية؟
لا.
عفته واگف خنگتني عبرتي لبست حجابي دموعي اتجمعت بعيوني طلعت
ارسلان و الاطفال گاعدين مشغل حاسبته ما ادري على شنو يباوعون
وياه كلهم هادئين وصافنين بالحاسبة، گعدتهم كبالهم روحي مفرفحة.
رفع راسه ارسلان يباوعلي طابك حواجبه.
ارسلان: خيرج علوية بيج شي.
ما ادري شصارلي بس گال هيج غطيت وجهي بايديَّ انفجرت بالبجي اسمع صوته يحاچيني.
خوية شبيج؟
رديت من بين دموعي.
غرام: مابيَّ شي.
چا عليمن تبچين على يحظي الفكر.
اجه صوت كُميل.
كُميل: هاااي شكو شبيهاا.
ارسلان: جاي اسئلها ماتحجي تگلي ما بيَّ شي تعال شوفها.
بعدت
ايديَّ عن وجهي امسح بدموعي باوعتله مهضومة وبزعل.
غرام: فوگاهااا تسئل.
باوع ارسلان بيني وبينه.
ارسلان: شسوالج خالي المستهتر
يريد يروح الوحدة
يجذب عليج يمعودة
لا ورسول الله اني شفته بعيني يحجي ويا وحدة.
اجه كُميل گعد بصفي لزم ايدي سحبتها بنتر منه.
كُميل: گومي ندخل جوا نتفاهم
ارسلان: ليش جوا اتفاهموا گدامي
وانتَ شعليككك
غير العلوية اختي و حقي اعرف شيصير وياها ما يصير
خاااااااب كم
من أخلاقك خالي رحم الله والديك.
شهگت من شالني صخام الصخمني غطيت وجهي متفشلة من ارسلان صاح ورانا.
ارسلان: شوف شوف الاستهتار خلي خلي اغسل ايدي منك صاير دايح
كُميل: اكل تبن لا أجي أطيح حظككك.
دخل بيَّ مرجعني للغرفة نزلت ايدي اضرب بي.
غرام: نزززلنيي.
مارد عليَّ اتهسترت اول مرة اغار بهاي الطريقة حاوطني بحضنه.
عوووووفني
ولج شهلل الغيرررة
ياااااا غيرة هاااي
صوتج ابنج راح يگعد ما ادري شلون لحد الان ما گعد من صوتج الينوص.
ماااا اغار اني.
هز براسه.
أدري بيج حتى گلبج ما راد يوگف ادري ادري.
ردت احجب رفع اصبعه الشفتي مستوقفني.
صبري.
طلع جهازه فتحه حطه بوجهي باوعت للمحادثة نفسها اخذت منه خازرته
اقرأ بالمحادثة طلعت وحدة مشترية منه سيارة و دتسئله عن كم شغلة بيها
ركزت بصورتها شو هاي هم عيونها خضر؟
غرام: شووووو هم عيونهااا خضرررر.
رب العالمين يجيب ويذب عليَّ بالعيونهن خضر.
دوخررر عني وخرررر.
هسه مو شوفتج المحادثة شبيج ترعصين.
لعد شكو جذبت عليَّ و خليتني أتشعوط؟
حتى شفتج من گعدتي يمي و باوعتي للمحادثة متقصد اخليج تشوفين.
باوعتله بزعل.
ليش تسوي هيج؟
أحب أشوف غيرتج
هاااي يسموهاا تشعوووط مو غيره اجه يوگف گلبي من القهر
اسم الله على گلبج يا بعد گلبي وهله.
لا تسوي هيج بعد كُميل تعرفني ما عندي غيرك ما اتحمل فكرة احد يشاركني بيك أموت والله.
چا شو من ردت أتزوج جيلان لبستيني
لان بوگتها حجيت كلام يغث ويايَّ و المايريدني ما أريده هم و لا أنزل نفسي الك.
تأثيرات غياهب بيج واضحة.
ضحكت من بين دموعي.
ياريت اني بقوتها
هاي القوة إلى هيَّ بيها دافعة ثمنها سواء هيَّ او ارسلان دفعوا ثمن كلشي عاشوا
شوگت يرجعون
من يبيض الديج
مووو صوچك.
ضحك يحاوب يراضيني بس هالمرة ما اتنازلتله بسهولة شلعت گلبه ورمته تورم خليته يگول التوبة ارجع أسويها.
الثاني
يوم العصر بدلت وبدلت السراج لان عندي موعد يم دكتورة بدلت للجهال
هم ارسلان يطلعهم مليكة خابروها گالولها اختها كلش تعبانة علساس.
جانت متفقة تروح ويا ارسلان، ارسلان اخذ الجهال مشت سيارته گدامنا
صعد كُميل بس ملامحه توحي اكو شي دار وجهه يباوع وره سيارة ارسلان شكله قلقني.
دخل الداخل السيارة و أشر بايده بهدوء كأنما ديحاول ما يبين شي همس
بصوت إلى و الامة إلى علساس نوصلها الاختها.
كُميل: انزلن من السيارة ارجعن الداخل البيت و تقفلنا بسرعة.
شصاير خوفتني؟
عاط بصوت كمزني من مكاني.
عووووفي الاسئلة و اخذي امي گدامي للبيت ارجعنننن.
سويت مثل ما گال مجرد نزلنا صارت عيوني عليه طلع سلاح سحب
اقسام اتجحظت عيوني منيله هل السلاح ما شايفته شخط السيارة
يمشي بسرعة طلع وره ارسلان واضح بدون ما يحجي شي رجعنا الداخل
البيت و الخوف أخترق قلوبنا و أجسادنا.