رواية وتيرة الأعرج للكاتبة حوراء السعيدي الفصل الأربعون
كُميل.
أرسلان أصابته إلى صارت جانت أغتيال اله بسبب شغله و گتله اكثر من مرة يدير باله
علي الاقل يخلّي حماية بس راسه يااابس اخر شي توقعته يوصلون البيتنا و هسه
من طلعنا ارسلان طلع گدامنا بسيارته شفت لحگته سيارة و الواضح مراقبي
اتصلت بي و المصيبة جان وياه الاطفال يعني حتى لو يريد يدافع عن نفسه ما راح يگدر لان راح يتقيد بالاطفال جاوبي.
كُميل: لا تبين شي مراقب انتَ
ارسلان: أدري ولد الكلب شفتهم
ارجع للبيت.
راح يشكون شفتهم
لااااا تتخبل انتَ موووو وحدك
راح اوگفلك يم مكان وانتَ اخذ الاطفال.
عطت بي دمي فاير ما يفهم و لا مهتم الحياته.
ابن القنااااادر ليشششش تخليني اغلط جبرر جاااي اگلك مرررراقب هدفهم
انتَ خاااف ذيج المرة خلوا بيك نفس هالمرة ينهونك على الاخير.
خووووش راجع.
سده بوجهي اخخخ يا حسين و عفاف والزهرة أمانتكم صعبة، بقت عيوني وراه غير.
مسارة راجع مشيت وراه بدون ما اخلي شي واضح يبين الهم شفناهم لان ذوله اكيد
راح يفهمون اقل حركة منه و متأكد يسون شي ويأذونه، بقيت مستمر امشي
وراهم و هم يمشون وره ارسلان الى ان وصل للبيت هم طلعوا كبل النكرة ضاميها
اله بس الله العالم شضامين، ما دخلوا بشارعنا مال بيتنا يوگفون على الشارع
العام صفيت سيارتي سريع بصفه نزل الجهال كبل دخلهم للبيت دخلت وراهم اتلگتنا امي.
مليكة: اذا انجلطت و متت بيوم من وراكم انتم.
غرام: أشرلي كُميل اخذ الجهال جوا الواضح راح تكب بينه هوَ و ارسلان اخذتهم الغرفة مليكة.
أبقوا العبوا هنا لا تطلعون ماما.
هزوا براسهم گعدرا سديت الباب عليهم و ابني بغرفتي و مثل ما اتوقعت گبن بينهم و أعتلت اصواتهم.
كُميل: انااااا شگلللت الك ارسسلان؟
ارسلان: فارغين عليمن خايف.
ضرب كُميل كف بكف يحجي بعصبية.
ووولك يااااا فارغين ماااا تشوفهمم ضامينهاااا الك ما راح يعووووفونك مووووو گتلك حط حماااية.
أتقيد.
وطبك مررررض اتقيددد و لا يصير بيك شي.
كُميل يحجي بأعصاب و ارسلان يرد ببرود من يمي أتنرفزت من بروده لزمه سحله من ياخة قميصة شهگت من تصرفه و هوَ خازره.
لااااا تفوررر دمي أكثررر غصباً عليك اجيب الحماية و ما تطلععع الاااا و هم ويااااك
ارسلان: خلصت؟
ليش جااااي يراقبونك؟
يعني ليش
ارسسسلان جاوووووب.
عندي شغلات تخصهم ورايدين امحيهااا او تتسلم الهم
شغلات شنو؟
تخص شغلي خو ما تريد احچيلج شنووو شغلي اتوقع تعرررف خطورته عليمن اگعد أشرررحلك.
واحد بقى يخزر بالثاني رد عليه خاله.
اذا ما رايد روحك على الاقل ابقى عايش الخاطر اخوانك الماعندهم غيرك.
ابتعد
عنه منطي ظهره ضغط على جبينه ورجع باوعله محذره بكلامه.
كُميل: رجلك اذا خطت خطوة منا اكسرهااا و اذا ما وصلوا الحماية انا اعرف شغلي وياااك.
اجه الخبر إلى بشرنا و ما جنا متوقعي بحيث الفرح واضحة بصوت عمر و هوَ يگول.
عمر: وروح امي ناز استجابت للجلسة إلى فاتت.
ابتسم ارسلان فرحان اضعاف من فرحته.
ارسلان: صدگ عمر؟ وينهااا هسه.
اي خوية صدگ والله، نامت هسه بس تگعد اخابرك تحجي وياها لان باقية تسئل عنك.
بعد روح اخوها ديربالك عليها
ان شاء الله، انتَ شلون صرت؟
زين انا زين مابيَّ شي المهم ناز.
سده منه بعد ما كملوا حديثهم و الفرحة بوجوه الكل عيونه تحجي فرحته بهذا التطور
دعيت ربي تتشافى حرامات بنيه بعمرها و جمالها حياتها تدمر.
مارد ارسلان
علي خاله طلع من الصالة بقينا احنا واگفين ما ادري شنو وضع هالانسان هيج مستهزأ
بروحه و ما هامة شي، بقى الوضع بالبيت متوتر مليكة ماگدرت تروح الاختها و
كُميل ما يتحاجى اعصابة نار، لليل سويت عشه محد اكل بس الجهال
عشيتهم
و نومتهم دخل كُميل يدور بانحاء الغرفة كأنما يدور على شي.
كُميل: چا وين ارسلان؟
غرام: بغرفته غير؟ لان من رجع دخل الها ماطلع منها
ما موجود دخلت للغرفة مالگيته.
رمشت بعيوني من كلامه صافنة ضرب ايده بالحايط.
بروحك ارسلان.
طلعنا برا يتصل عليه ما يجاوبه.
بسيطة ارسلان.
رجع يكرر بالاتصال اكثر من مرة يمكن اكثر من عشريت مرة يتصل و ذاك ما يجاوب طلعت روحه يله جاوبه.
كُميل: وينننن انتَ؟
ما ادري شرد عليه لان ما اسمعه رجع گاله.
شتصخم هنااك، جااايك.
سده منه وذب حسرة.
غرام: هاا وينه كُميل
گاعد على الشط هوَ و هذا صديقة مُجاهد
راح تروحله
اي
فدوة ديروبالكم گلبي مامرتاح خايفة.
هدفهم ارسلان لا تخافين مل يصيرلي شي خلي اروح بلگي هذا صاحبه هم يقنعه.
مجرد طلع گعدت لازمة راسي دك جهازي شفتها سوزان اختي.
غرام: هلا سوزان
سوزان: هلا بيج شبيه صوتج؟
ماكو شي شلونج انتِ وسيوفي
الحمدلله باجر جاينج انشوفج مشتاقتلج
هلا بيج
ولج شبيه صوتج شو مارتاحيتله.
ارسلان و عناده.
ياا هذا الاعرج، اگلج هذا هم يضحك؟ شو من شفته احسه ما يضحك.
يضحك بالمناسبات
بس هوَ وهاي ام شعر لايگين البعض.
وينها ام شعر سافرت
جذذذب؟
ورسول الله
يا خية خطية، شبيه هسه
هوَ ضابط وشغله خطر و من فترة جاوا مراقبي و حاولوا يقتلوا و هسه هم رجعوا
يراقبوا و ما يقبل يخلي حماية وياه و كُميل طلب منه ما يطلع الحجي يطب منا يطلع منا
فلك طره شگد عنودي هذا مشتري الموت بروحه
اوف اسكتي سوزان خليها سكتة ابداً ما يهتم النفسه
خلي رجلج يربطه وبعد ما يطلع
انجبي قابل حيوان ويربطه.
خيه شو اهل زوجج ما ادري شلونهم غريبين الاطوار
عوفينا شكو ماكو.
ماكو شي اليوم اجاني ابوية.
گلبي عصرني قهر من ذكرته بلعت ريگ و طلعت كلمة من لساني.
شلونه؟
علي الله.
بسرعة غيرت الموضوع ادري بيها ما اتريد تحجي بشي يخصهم هوَ و عمامي لان هيَّ حاقدة على عمامي هم.
كُميل: وصلت للجسر شفته گاعد هوَ و مُجاهد اتلفت بالمكان ماكو ذولة إلى مراقبي بس اكو ناس تمشي وسيارات عبرت الهم.
مُجاهد: يا هلا بالخال.
مديت ايدي اسلم عليه.
كُميل: يا هلا بكاره النساء.
ضحك باوعت الارسلان صافن بالگدامه كتفت ايديَّ اباوعله.
كُميل: هاا خالي ويانا لا
ارسلان: وياكم
انا شگلت؟
شگلت؟
الحماية وين إلى گتلك عليهم؟
مُجاهد: ما يحتاج انعلسوا صاروا بخبر كان
شلون يعني
رتبنالهم ضيافة مرتبة انا و الاعرج
يدزون غيرهم عليمن فرحانين خالي
ارسلان: نرجع ننطيهم ضيافة جديدة شعندنا قابل
كُميل: استهزائك غيره
ما يحتاج الحماية لان راح ارجع الدوامي طالبيني.
گعدنا احنا الثلاثة نسولف.
مُجاهد: الگعدة ناقصها سبع الهورة.
ارسلان: اذا يجي ويشوفني يذبني من الجسر
چااا غير مصوبله مرته.
ياوعله ارسلان بتك عين.
گتلكم بالغلط من غضب الله عليكم هاي ام روح الحلوة
قصدك ست چفصة تچفص شكثر
انچب لا تحجي عليها.
كُميل: مرت درغام الله يحفظها رغم توأم هيَّ و غياهب بس ما بينهن اي تشابة
بالشخصية حتى إلى ما يعرفهن راح يفرق بينهن من شخصيتهن.
غمزلي مُجاهد و گال.
مُجاهد: خوش بنات الله يحفظهن بس عندك غياهب ترد الصاع صاعين.
ارسلان: كاااافي سد حلگك
هههههههههه اخواتي
انچب و لا تحجي عنها و منين اجت اختك؟
ديلا علساس هسه مگلبتك هيَّ شو ضربتك بوري وطفرت اللبنان.
صووووج ابووووها المراهق عافهاااا تروح.
لا لا خوية الا ابو السلاطين رجال معدل.
هذا حتى لو بنته رضت ترجعلي هوَ راح يرگفلي مثل العظم بالبلعوم.
والله يا خوية يا ارسلان يا الاعرج انتَ غلطت تتحمل.
لزم فكه ارسلان يحرب بي بتعب.
ارسلان: سمطني راشدي گلت فچي صار اعوج من قوته
ولك عمي هم لو ما الك حگ يمهم جان شوفوك نجوم الظهر ذولة عندهم بناتهم خط احمر
علساس هذا المراهق ما انتقم مني و اخذ بنته مني.
لو مخيرها بينك وبينه راح تختار ابوها لا تتأمل لان هاي تربية سلطان ما تكسر بابوها بيوم
ادري بيها. اگلك انتَ ليش ما تتزوج؟
انطيني اختك.
صفن ارسلان بي ما اشوف غير زرگه بضربة.
اكلللل نعل.
هسه شحاجي انا وين تلگى نسيب مثلي
غدي
بحياتي ما مسوي علاقات و لا متقرب من وحدة بعدني بالباكيت و اخو زينب
ووليي لااااا احط النعااال بحلگك، منيلي اخت انااا وحدة متزوجة و وحدة جاي اعالج بيها
نشاقة عمي شبيك شبعتنا نعولة من نعولة براسك
شقاااك خايس لا تعيده.
ضحك مُجاهد و هوَ يأشرله بعيونه ينرفز بي، گلت بگلبي لو ما ناز مابيها شي
ما اتردد انطيها اله، مُجاهد حاجيلي عنه ارسلان شگد ولد كفو بس ناز للاسف.
ما تناسبه مو يم الزواج و هيَّ بهيج وضع، بقينا گاعدين لوكت و كلمن گام طلع بسيارته
راجعين لبيوتنا و ما مرتاح من ناحية ارسلان العصابات اتسوي كلشي لو خلوا واحد
بعقلهم حتى لو گدر هسه يخلص نفسه من إلى مراقبي بالجايات منو يگول يگدر يتخلص منهم.
وصلنا للبيت و عيوني تتلفت بالشارع دخلنا لزمته بالحديقة حاچيهه دار وجهه.
ارسلان: ها خالي
كُميل: خايف عليك ارسلان.
خالي الروح اذا الله راد ياخذها لو يحاوطني سور هم ياخذها و انا عكب باجر ملتحق الدوامي.
راح يراقبونك دير بالك
هايهية.
مشينا كم خطوة نريد ندخل و اندگ باب البيت باوع ارسلان للساعة.
ارسلان: الوگت متأخر منو هذا
كُميل: خلي نفتح الباب و انشوف.
اثنينا مشينا نفتح الياب فتحته بقت عيونه تباوع بالگدامنا جانت بنيه شابة عيونها.
حمر ودموعها بعيونها وترجف لافة روحها بعباية بلحظتها ذكرت العلوية اول ما شفتها طبلعت من تفكيري من ارسلان اتقدم يسئلها.
ارسلان: منو انتِ؟
داخلة عليكم أحموني.
بقينا صافنين واحد يباوع بوجه الثاني طلع ارسلان يباوع بالشارع ورجع وجه كلامه الها.
و احنااا وين نعرررفج علمود ندخل النص بيتنا.
حچت صوتها يرجف.
والله ماعندي شي اني
اظافري ما اثق بيهن تريدين اثق بيج.
كُميل: تعاي ادخلي خالي.
خزرني ارسلان ما قابل ادخلها، اشرتله يصبر دخلتها بس للحديقة مو الداخل البيت بقينا واگفين نباوعلها ترجف خوف.
خالي انتِ شنو اسمج
اسم رؤيا.
حياج الله شنو موضوعج انتِ؟ و ليش بهذا الليل وحدج.
دنگت راسها ودموعها نزلت.
رؤيا: شردت من بيتنا.
ارسلان: شدددد شنوووو شاردة من بيتج واريدين احميج
بس افهم سالفتي فدوة
احچي
اني عايشة ويا امي وزوجها ويريدون يزوجوني الابن زوجها
اممم و ليش رافضته؟
مو زين و هوَ إلى گالهم يريدني.
باوعلها بشك رافع حاجبة
اممم ما أقتنعت.
ردت وهيَّ تشهگ بدموعها.
أنطيك العنوان و اتأكد والله مدا اجذب.
چااا ابوج وينه عنج؟
ما اعرفه من صغري شمرني على امي بس اعرف اسمه الكامل.
كُميل: خالي بس شلون احنا نخليج ببيتنا ماناقصنا مشاكل يجوز امج تعرف بيج هنا و تسويلنا مشكلة.
رؤيا: لا ترجعوني الهااا فدوة ابوس ايديكم لاااا ترجعوني اشتغل عندكم خدامة و لا ارجع الهم.
دخلنا بحيرة لا بيك إلى تخلي بنيه بعمرها بالشارع و لا بيك تثق وتخليها ببيتك.
ارسلان: عندج مستمسكات؟
رؤيا: اييي اييي ذني.
مدت ايدها لافتهن بعلاكة سودة انطتهم الارسلان ضل يقرأ بيهن.
راح يبقن يمي.
ادري بي ما وثق بيها، هزت براسها دخلنا جوا و هيَّ ويانا هسه امس تتخبل
علينا بس اتشوفها و ارسلان گوا عليه گعدت بالصالة رحت اگعد امي وغرام.
كُميل: يمة.
كررتها اكثر من مرة فزت فتحت عيونها.
كُميل: بسم الله شمالك يمة.
تعاي شوية رايدينج اعذريني گعدتج
احد بي شي
لا يمة بس تعاي بين ما اگعد غرام.
عفتها تلبس بشيلتها وطلعت الغرفتي گعدت غرام دخلن شافن البنيه اثنينهن ضلن صافنات بيها.
مليكة: يااااع هاي منين الفرخة.
كُميل: اگعدي يمة هسه اسولفلج كلشي.
گعدن و غرام بقت عيونها على البنيه متشكلة بدون ما تحجي.
احچي ولك يمن دهر دهرني.
بديت احجيلها كلشي وهن يباوعن للبنيه إلى مارفعت راسها.
مليكة: يدهرررررر شاردة من اهلج.
ارسلان: حتى المايدي راح يدري من صوتج شبيج مليكة؟
راجعيللييي نص الليل و وياكم بنيه ولكم راححح تجلطوني يمفلوووكين
علساس جنت بالملهى و جايبلج وحدة مناك.
غرام: عفتهم يحجون و يتناكرون بالحجي بعصبية اباوعلها ذكرت نفسي وذيج الايام
شگد صعبة و حاسةبشعور كل شخص يبقى بالشارع و يعيش ضيمه باوعت عليهم مقاطعتهم بسؤالي: غرام: شنو راح اتسون هسه؟
ارسلان: اتأكد من كلامها و أدور على ابوها عمامها اخذها الهم احنا ما مجبورين نتحمل مشاكل و هيَّ قافلة ما ترجع الامها.
رؤيا: اييي اييي اني اريد اروح الأبوية.
حچت هالكلام بلهفة و مبينة تريد هالشي من نظراتها بس هنا مليكة فتحت عيونه بقرارها خلتنا مصعوقين.
مليكة: البنيه اذا تبقى هنا ارسلان يعقد عليها شيخ بين ما تلگون اهلها.
كمز ارسلان من مكانه.
ارسلان: خاااااف مااا تقبلين شلوووونج زينة من كللل عقلج.
چا شتريد تبقى بنيه غريبة هنا بنفس البيت انتَ موجود بي.
شبيججج مليكة شووو حجيج مو منطقي انااا شكووو وشلي علاقة بيهااا.
ضربت عكازتها و هيَّ مصممة على كلامها.
البنيه ما تبقى هنا اذا مل تعقد عليها
لووووو تطلع نخلة براسكم ما اعقدددد عليهااا و اذا گاتلتج گعدتي بالبيت انااا اطلع من كل البيت بس إلى حجيتي اعذريني ما اسوي.
كُميل: ارسلان أدري صعبة بس ما ترهم.
فقد عقله بكلامهم.
لااااا تلغوووون گتلكم اطلع من البيت و خليهاااا تبقى بسسسس مال اعقددد عليها لوووو تمدوني جنازة هنااااا مااا اعقد.
دار على البنيه.
ارسلان: وانتِ بس الاگي اهلج تروحين منااااا ما مجبورر عليج وتصرفج من شردتي من اهلج من الاخطاء إلى مااا يغفرلها الاهل.
عافنا وطلع صاير بركان و قبل لا يطلع دفر الباب برجله و طلع أشرتلي مليكة اخذ البنيه.
الي دموعها تنزل بصمت، خذيتها للحمام تغسل اخذت عبايتها منها وگفت تغسل وتشهگ بدموعها رفعت راسها الي.
رؤيا: اسفة لان دا اسببلكم مشاكل
غرام: امج زينة وياج؟
ابتسمت بنص دموعها واردفت بنبرة استهزاء.
امي عندها زوجها و أوامره اهم من كلشي.
ان شاء الله يلكون اهلج، ابقي هنا اجيبلج ملابس تبدلين.
طلعت الغرفتي دخلت شفت كُميل شايل سراج گاعد اخذتلها ملابس ورجعت الها انطيتها.
سديت الباب تبدل براحها بقيت واگفة بباب الحمام انتظرت، كمزت بمكاني من اجه
صوت تكسير من غرفة ارسلان الواضح طبكن عنده كلش هاي طبيعته من عصبيته
تنتشر مايضل شي ما يكسره، انفتح الباب و البنيه عيونها تتلفت على الصوت.
رؤيا: منين هذا الصوت؟
غرام: لا تهتمين تعالي ويايَّ.
دخلتها الغرفة الضيوف و رجت جبت الها فراش اخذته مني تفرشه و الشهگة بصدرها
ما شفت شي يوحي تمثل او أجذب خصوصاً هالشهگة الطالعة من صدرها.
نامي و ارتاحي.
هزت براسها طلعت سديت الباب عليها ردت اروح اشوف ارسلان بس اتراجعت
لا يعيط بيَّ رحت الغرفتي كُميل نايم متمدد بملابس الطلعة رفع ايده من عيونه.
كُميل: نامت البنيه؟
غرام: گلتلها تنام و ترتاح
و هذا اجته الحالة گام يكسر
خلي يكسر و لا يسوي شي ثاني.
نزعت حجابي گعدت قريبة منه افكر بالبنيه.
من شفتها ذكرت نفسي
مثلج، من شفتها هم ذكرت اول ما شفتج استنجدتي بيَّ وهيَّ الخوف راكبها.
ان شاء الله ارسلان يگدر يلگى اهلها
بس ادعي يتقبلوها لاهم يگولون وين جانت كل هالسنين احس جبنا الروحنا سالفة بس زحمة تعوف البنيه مثلها بالشارع
ما اتحس أمك شوية بالغت من گالتله اعقد عليها.
امي ما ترضى تبقى بنيه ويا ولد مايربطها شي وياه، چا اول ماحجيتلها عنج گالت تتزوجها و مل تبقى عندك بهيج حالة
مو ارسلان فقد عقله من گالتله ما شفته.
هم حقه بس انا هم ما ارضى يبقون بيت واحد خلي يطلع من البيت و هوَ راح يلتحق الدوامه هم
شصار من طلعت شو طلعت بعد ما رجعت
يگلي إلى مراقبيني علستهم و هوَ و مُجاهد شلون و وين ما ادري محد حچى بيهم
شوگت نرتاح من هالمشاكل
الله كريم راح انام راسي من وره ارسلان وقهره راح ينفجر نامي انتِو الصباح رباح.
حطيت راسي على المخدة و الافكار صارت تتضارب بعقلي حسيته تعب من ضغط التفكير.
اليوم شكل هالبنيه رجعني الكل ماضي عشته رغم تعالجت بس تبقى ذكريات زفرت نفس بحسرة غمضت عيوني احاول انام.
حنين.
طلعنا الاهلي احنا وحدنا عزمنا ارواحنا علمود ننطيهم خبر حملي حتى بيت خالي
ويانا و درغام ما حجيتله عن موضوع ارسلان ومجيد الافضل هم يحجوله، نزلت من السيارة شفنا نيروز و رماد.
نيروز: هاي انتم هم معزومين.
حنين: لا احنا عزمنا نفسنا وانتم عزمومكم لان احنا سوينا العزيمة
رماد: ام بطن ما تفوت شي.
كفخة درغام من وره على راسه و بيت خالي دخلوا گدامنا.
درغام: احجي باحترام ويا مرتي ولك.
و هسه شحچينااا يعني.
دخلوا گدامنا هوَ و درغام لزمت نيروز من ايدها نمشي.
حنين: شنو الاخبار.
غيم الحزن ملامحها.
نيروز: نفسها حتى امي وابوية اجوا هنا قبلنا ما ردت اجي بس مادري شعجب هم دخلتلي عبالي اجت علمود نحل إلى بينا بس طلعت داخلة علمود تگول ابوج ما يقبل تبقين وحدج.
يله ميخالف حبي اتحملي هم حجيتي ويا عمر؟
لا شحجي تريدين ابوية ينجلط من صدگ
لعد يمكن ما اله خبر بالصاير
ما ادري
ينطيج اله والله لا تخافين بس الشغلة يحتاجلها صبر و لازم الولد يواجه ابوج.
ليش ماتدرين ارسلان خطبني من ابوية بذاك اليوم و گاله اذا الك نيه تسامحه اتشرف اناسبك.
وگفت فاتحة عيوني مبتسمة مالي خبر ماحجت غياهب و لا اهلي.
اوووووييي نسيبي الكفو
منين نسيبج؟ غير اطلگوا هوَ و اختج.
يرجعون هم هم و گولوا حنين ما گالت و اذا ارسلان راد يخطفها مثل إلى بالافلام اني اساعده
حنين هواية دتخوطين بصف الاستكان ترا
خاب اشاقة شبيج غير ابوية و درغام يشگوني.
دخلنا جوا سلمنا ابوية و خوالي بالصالة صارت عيني عليه طگني بخزرة ابوية خلتني
بقمة أستغرابي شبيه؟ رحت يمهن للمطبخ واگفات خالاتي متجمعات بس نظرته من خدرني انطبعت بعقلي.
وجدان: هلا حنينة.
حضنتها بحب.
حنين: شلونج عمري وجدانو.
مشتاقتلج.
اني هم والله بس درغام البارحة اجه من دوامه وهم دوامي
يمة فدوة للبنات المتزوجات و النادرات.
ضحكت الكلامها اليخبل مثل روحها بقيت يمهن نجهز بالغدة الى ان كمل دگ جهازي
جنت مخليته بجنطتي يمي بالمطبخ شفتها غياهب وگفت على جهة يم الشباك
فتحت الاتصال مبتسمة لان جنت اسولف ويا خالاتي.
حنين: شلون جمعة فاتتج.
اختفت ابتسامتي و غابت بقيت صافنة من گالت.
غياهب: لشووگت يبقى هذا التطفل عندج؟
ما فهمت غياهب تطفل شنو؟
چانت تحچي بعصبية و جَدية بالكلام.
حنين بطلللي سوالفج لا تفكرين ترجعيني ويا ارسلان على حساااااب الجذب.
هييي شبيج شنو هالحجب وياااا جذب هذا دتحجين عنه بعقلج شي؟
روحي اتفاهمي وياااا ابوية افضل كلش ضايجة منج حنين ما توقعتج تسوين هالشي.
سدته بوجهي بدون ما افهم اي شي شديصير، باوعتلي نيروز اشرتلي بمعنى
شكو طلعت من المطبخ ضايجة من اسلوب غياهب دخلت للصالة صحت الابوية.
حنين: بابا.
جان يسولف ويا خالي جابر التفت الي.
سلطان: ها بابا
شديصير؟
بخصوص شنو
غياهب هسه خابرتني ترزل وتعيط بيَّ و تگلي جذب و ما ادري شنو و گالت افهمي من ابوية.
نهض درغام من مكانه مستغرب.
درغام: جذب شنو؟
وگف ابوية وخلاني جامدة بمكاني بسبب الموقف إلى حطني بي.
سلطان: نكرت كلشي وصلتي الغياهب.
نزلت دموعي من احراجي بسبب الموقف.
حنين: بس ليش من حقها تعرف
من حقها وياج بابا بس مو بهذا الوگت
بس انتَ طلعتني جذابة گدام اختي؟
لا حشاج.
صحت بصوت مقهورة منه ومن تصرفه و من اختي.
شنووووو حشااااني خابرتني تگلللي جذذاابة وكااافي تطفللل.
لزمني
درغام من ايدي خازرني لان علين صوتي على ابوية گدام خوالي بس مو بيدي اتاذيت من إلى سوا.
درغام: فهميني شصاير؟
ارسلان هوَ إلى حرگ المعمل إلى بي مجيد و حتى مسجل اعترافه بقذاراته.
يعني معنى هذا الكلام ارسلان هوَ متقصد
ايييي بس موووو علمود ثأره لااا علمووودي اختي اخذ حقهااا منه.
بقى صافن علامات الصدمة انزرعت بملامحه لزم راسه يستوعب إلى حجيته.
سلطان: اختج لازم تبقى بعيدة عن الكل و تگدر تاخذ الوقت إلى تعالج روحها بي.
حنين: بابا تصررفك غلط غياهب اذا عرفت ضمينا عنها راح تزعل منه صح لازم تبتعد وتاخذ الوقت ترتاح بي بس ما يصيرررر نضم عليهااا.
بالوقت الحالي كلشي يصير.
درغام: تررررا سفرها شغلة واگفة خلوهاا ترجع هنا الف دكتور تتعالج عنده.
سلطان: مو شغلة دكاترة هيَّ لو بس على شغلة الدكاترة چا الشغلة صارت سهلة بس
غياهب لازم تبتعد شنر الفائدة نفترض عالجت نفسها و كل يوم مشكلة وين الاستفادة هنا؟
جابر: انا ويا سلطان خلوها بعيدة هالفترة و أرسلان طالب من ابوج ما يوصللها خبر.
واخيراً اجه صوت الشخص إلى اخذ وضعية المشاهد المستمع هز بايده ببرود.
عمران: رغم اخوي ابن امي وابوي إلى مات بس ما نقهرت غير على إلى سواه و ما مقهور غير هوَ اخوي سالم ومجيد اقذر خلق الله.
جابر: خلونا انسد الموضوع، وانتَ عمران شفكرت بذاك الموضوع حجتلي وجدان.
الافضل ما نفتح الموضوع
درغام: يااا موضوع؟ شصاير من وره ظهري
جابر: بعدين درغام.
باوعت الابوية دموعي بعيوني مقهورة منه طلعني جذابة گدامها عفتهم طلعت من الصالة.
ابچي گعدت بالحديقة حاضنة نفسي شفت رجلين صارت گدامي رفعت راسي شفت ابوية.
سلطان: گومي بابا.
نهضت من مكاني امسح بدموعي درغام واگف يم بابا المطبخ يدخن و يباوعلنا انمدت ايده يمسح بدموعي و يحچي.
نظر عيني دموعج ما تهون عليَّ بس أفهميني
حنين: فاهمتك
اختج اذا ترجع لهنا راح يزيد عذابها
اصلاً لو تدري إلى حجيته صدگ راح ترجع للعراق
و انا لهذا السبب ما اريدها تفهم كلشي
براحتك
اذا رجعت حجت وياج احجي طبيعي وياها بابا.
ختولي رزلتني
تبقى اختج.
هزيت براسي دموعي مُستمرة مهضومة منها حضني يمسد على شعري بحنية اجه درغام من بعيد يمشي وجكارته بشفته.
درغام: هااااا
سلطان: و وجعاااا شرايددد
شو حااضن مررتي
بنتي قبل لا اتصير مرتك.
باوعله درغام بنظرات خبيثة الابوية.
ضاملك خبر
خبر شنو؟
شوية بعد وتعرف.
ما اهتمله ابوية اخذني حاضني و دخل بيَّ للبيت هسه درغام اعرف سوالفه يخبله من يگله عن حملي، اتلگتنا خالتي.
وجدان: ها حنونة شلون صرتي؟
حنين: احسن
لا تضوجين خالاتي احنا اهلها و لازم نساعدها
ان شاء الله خالة.
صبوا العدة گعدنا ناكل على سفرة وحدة و كل ما اتذكر كلام غياهب ويايَّ أختنگ أكثر
، مرات من نسمع كلام من بشر عابر ما نهتم بس حچاية العزيز تأذي و ننهضم منها و نتحسس من هالشي.
درغام: عمي ابوووووو مرررررتي.
باوعله ابوية.
سلطان: شرايد و بطل كلمة مرتي و تضل ترررص بيهااا.
چا غيررررررر مرررررتي اروحلها فدوة.
الكل كاتم ضحكته عنهم.
درغام: عمي سلطاااان
اسمعك.
چان ابوية دياكل حط الاكل بحلگه ودرغام فجرها.
بنتك حاااااامل مني.
غص ابوية بالاكل راحله خالي انطاه مي يضحك ويضرب على ظهره شربه و باوع الدرغام.
منو حامل؟
بنتك مني
وجدان گومي جيبي الصخرية عودة حديدية اكسره بيهاا.
وجدان: هههههههه اوگف خلي نفهم.
باوعت علينا تتسائل.
صدگ حامل حنونة.
ابتسمت خجلانة منهم.
حنين: أي.
خالتي جوهرة صارت تهلهل بقيت صافنة عود ليش يهلهلون؟ من وحدة تطلع.
حامل الكل بارك النا وصل اليه ابوية مبتسم بفرح حضني مقبل راسي.
سلطان: مُبارك يا نظر عيني.
نظر عيني هالكلمة ابوية مختصر بيها كل حنيته.
حنين: يبارك بيك ياروحي.
درغام: واناااا ما تباركلي لا تنسى هيَّ حاااامل مني.
سلطان: الله انطاك إلى بلاء انتَ مو نسيب.
شبيه مثل العسل.
باوع ابوية و أشر الخالي جابر.
أخذ أبنك يرحم أمك
جابر: عوفه قابل بس انتَ تسولف ويا اختنا گدامنا و احنا ما نحجي.
صاح ابوية بعصبية و هم ميتين ضحك.
سلطان: طررررگاعة فوگ روووسكم ما امسوووي مثله انا
درغام: اگلك عمي سلطان انتَ ليش ضايج و ما تتقبل الواقع.
اخذني ابوية من ايدي حاضني و يحجي.
بعد ما الك مرة يمي ارجع ويا اهلك بنتي تبقى عندي.
مو بكيفككك سلطاااان
طبعاً بكيفي، حنين بابا تختاريني لو تختارين زوجج
حنين: هاااااا شنوووو شووووو ما سمعت
انا لو درغام؟
أثنينكم
لا واحد منكم أختاري
انتَ بابا انتَ درغام شنو
درغام: بسيطة حنين.
باوعله ابوية بشماته.
سلطان: يلا يلا هسه روايني عرض أچتافك.
گعدني بصفه و درغام گدامنا هو مسحولة مسحولة مابيها مجال باوعتله ببرائة ضامة ضحكتي صاح والكل انتبه عليه يباوعولنا.
درغام: لاااااا تباوعين هيج ماااا اساااامحج حنيننن غدرررتي بيَّ.
حنين: لااا تصير ما ادري شلونك اصلاً حتى لو صارت صدگ مااا اختار غير ابوية.
خلي ابوج يفيدج
اكيد بدون شك يفيدني.
باوعلي و هز راسه بتوعد ضحكت اغور بي، بس بداخلي مختنگة من إلى صار بيني.
و بين غياهب بس دام هالشي المصلحتها مجبورة اتحمل كلشي، الكل گاعد و فرحان
بخبر حملي اتشنج جسمي من صار عندي الم ببطني لزمت بطني عاضة شفتي كاتمة
صوتي صارت عيون درغام عليَّ مجرد لمح شكلي إلى تغير اجاني يركض.
درغام: شبيج حنيني
حنين: بطني.
انجمع اكل حولي.
جوهرة: شبيج ماما شنو يأذيج.
اجت خالتي وجدان.
وجدان: نامي حنين تمددي.
رفعني درغام من مكاني تمددت على القنفة اباوعله عيونه انترست خوف.
يمكن مغص.
نزلت المستواية خالتي همستلي بيني وبينها.
وجدان: انقهرتي مو؟
هزيت براسي ب أي باوعتلي تهز براسها بيأس.
لا تخافون عيوني مابيها شي مغص هذا هسه تصير زينة
درغام: ناخذها للمستشفى عمه
لا گتلك ما يحتاج والله بس خلوها ترتاح.
گعد يمي
باس ايدي ما مهتم الوجود احد مر وقت الالم خف عن قبل غمضت عيوني نعسانة اسمع اصواتهم بس عقلي بقى يم اختي.
غياهب.
ابوية نكر كلام حنين و ما اله اي صحة ضجت من حنين ليش هيج تصرفت و خلتني.
بموقف ويا ابوية درت وجهي عيوني مجمرة من عصبيتي شفت هذا واگف وبايده
كتاب شكو رجع مو وله الشقته، مشيت متوجهة الداخل البيت استوقفني صوته.
راهب: بيج شي ست غياهب.
غمضت عيوني بنفاذ صبر درت وجهي.
غياهب: لا
يعني انتِ دائماً هيج عصبية
أتوقع شي ما يخصك؟
تمام.
عفته واگف دخلت جوا گعدت أهز برجلي من عصبيتي كاتمتها صعدت بدلت اريد اطلع أختنگت صارت اية گدامي.
اية: وين رايحة غياهب؟
غياهب: اريد اطلع هنا ما ابتعد اغير جو تجين ويايَّ؟
اي بس خلي ابدل.
نزلت جوا انتظرها ما طولت وهيَّ تنزل طلعنا اني وياها هم صار بخلقتي گدامي مبتسم اخخخخ بس.
راهب: وين رايحات.
مارديت اتجاهلته ردت عليه بنت خاله.
اية: طالعين نتمشى ضايجات
لعد اجي وياكم.
ما اتحملت اسكت لان لززززگة موتني.
غياهب: احنااا الضايجين مو انتَ ثانياً انتَ مو رحت الشقتك شرجعك؟
بيت خالي اتوقع نسيتي؟
قلبت عيوني بملل.
لا ما نسيت.
اية: احم هسه شبيكم تتعاركون جنكم ضراير خلونا نروح كلنا نتمشى ونتونس.
غياهب: روحي انتِ وياه اني اروح وحدي.
عفتهم واگفين طلعت امشي وحدي روحي طالعة وهذا يچفص بالبطن يزيدها عليَّ أستمريت
امشي بالشوارع بس باردة حيل عندهم حطيت ايديَّ بجيوب الكوت مالتي و امشي
أفكر بكلام ابوية و كلام حنين اخذت گهوة بطريقي و كملت مشي سمعت صوت ورايَّ چانوا اية وراهب وگفت بمكاني الى ان صاروا قريبين مني.
اية: صارلي ساعة اصيح وراج.
ما سمعت
تعاي نگعد اريد احجي وياج.
اخذتني من ايدي واگف خزرته و گعدنا اني وياها و هيَّ تباوعلي اجه گعد.
غياهب: شنو تريديم تحجين ويايَّ؟
اتصلوا عليه نهض من يمنا مبتعد يحجي اتصاله اية شمرت نفس براحة كأنما اجتها فرصة.
اية: ترا اني و وراهب مخطوبين.
غياهب: مخطوبين؟
اي والله شعجب ما شفتي الحلقات إلى لابسينها.
نزلت عيوني على ايدها لابسة حلقة بس ليش ما ادري ماركزت اذا هم هيج شكو كل شوية طالع بوجهي ابتسمت مجاملة الها.
لا ما ركزت، مُبارك الكم.
الله يبارك بيج و اعتذر عنه لان دتشوي گدامج.
ما يحتاج تعتذرين بس ياريت لا يضل كل شوية طالع بخلقتي ترا روحي گوا متحملتها.
ضحكت بس ضحكتها تحسها مو حقيقية بيها نقص وحزن.
هههههه لان تنطين شبه الاخته لا اكثر.
و مثلاً اخته الله يرحمها ماعنده صوره الها يباوعلها اية شنو هالافلام؟
عنده بس الصورة تختلف عن الواقع.
سكتت عنها و هوَ بعده واگف يخابر درت وجهي مَن سئلتني.
احم غياهب انتِ هم حابة بحياتج؟
اني؟
اي
اذا اسولفلج تدوخين بقصتي ف الافضل نعوفها
دسولفي صار عندي فضول.
مارديت بقيت ساكتة اجه راهب انضم الگعدتنا من جديد.
راهب: ها بنات تشربن شي؟
اية: بكيفك حبيبي.
باوعلي.
وانتِ ست؟
غياهب: شكراً ما اريد شربت گهوة.
هز براسه و طلب الهم شي يشربوا جهازه گدامي باوعت على الشاشة بيها صورة ولد صغير طبكت حواجبي بسبب تصرفه.
شنو هذا؟
هذا ابن اختي إلى اية حجتلج عنه.
الله يحفظه
حلو مو؟
هواية.
ابتسم و عيونه بالصورة حسيته متعلق بي.
اني ربيته اني و امي، حاولت اخلي ابوه يحن عليه بس ما گدرت.
بدأ يسولف
عنه و عن ابوه و شگد حاولوا وياه بس ما اتقبله و ام راهب ما قبلت احد ياخذه غيرها.
اتربى تحت وعايتها ورعايته و جان طبيعي يسولف واية موجودة و هيَّ متقبلة الوضع
الي عرفته راهب وحيد الامة وعنده اخت وحدة إلى هيَّ ام هالطفل و متوفية
رجعنا للبيت بعد ساعتين بس إلى لاحظته اية وراهب مو ذاك الانسجام إلى بينهم
وصلنا وهوَ ما ادرين وين راح صعدنا فوگ نسولف.
غياهب: امم اگدر اسئل سؤال و لو ما يخصني
اية: لا عادي حبيبتي غياهب اسئلي.
ما احس اكو انسجام بينج و بين راهب
لان احنا مخاطبين عن حب
مجبورين؟
لا محد بينا مجبور و صارلنا كم شهر من خاطبين و دنحاول نتعرف على بعض أكثر
فدتشوفين ماكو انسجام لان عمتي هيَّ إلى خطبتني من ابوية و هوَ من شاف امه رايدتني ما عارض.
اممم تحسين بشي اتجاهه الج مشاعر؟
يمكن ههههههه يعني بديت احس بهذا الشي من ناحية مشاعر اتجاهه بس هوَ لليوم ما حسيته عنده مشاعر اتجاهي لحد الان.
انصحج لا تدمرين مستقبلج و اذا شفتي ما بادلج هالمشاعر اسحبي نفسج لان.
ما راح تنجح علاقتج وياه اذا الحب فقط من طرف واحد، ممكن يقدملج اي شي تحتاجي
و الاحترام لان لاحظته يحترمج بس راح تبقين مستفقدة جزء بينكم إلى هوَالحب
من اتشوفينه بارد وياج راح اتعبين اكثر و الشي اذا من طرف واحد دمار للشخص.
صح كلامج، دنحاول و خطوبتنا مطولة اذا فشلنا بفهم بعض كل شخص بينا ايشوف طريقة.
بقيت مستغربة و متفاجئة شلون گدرت تدخل بهيج علاقة رسمية فوگاها الواضح.
و عيونها نابع الحب منهن اتجاهه بس هوَ بارد وياها و اذا انتهت العلاقة محد راح يتأذه غيرها
مرت الايام صرت اشوفه قلة هنا و حتى من يجي ما انزل، ردت التجأ لدكتور نفسي
بس اعرف نفسي ماراح يفيدني سابقاً جربت وفشلت محتاجة ارتب افكاري الدكتور
راح يسمعلي وينصحني مثل قبل محتاجة الهدوء و الترتيب بحياتي.
اعرف قسيت ويا حنين بالكلام بس اني ادري بيها ماتجذب اختي صريحة الدرجة.
الي بگلبها على السانها بس ليش سوت هيج؟ بس القرار إلى اخذته ماله رجوع خلاص
انتهينا اني وياه، استغليت فترة وجودي هنا صرت اطلع اجرب شغلات جديدة و مغامرات
واية نفسي طلعت تحب هالشغلات بدأت تتحسن نفسيتي الا ذاك الشي ما اگدر أتخطاه، .
مر على وجودي هنا ثلاث أشهر اية بدوامها لان تداوم بوظيفة هنا، دخلت امها ابتسمت بوجها.
ام اية: حبيبتي انا و ابو اية راح نطلع للسوگ تجين ويانا؟
غياهب: لا خالة روحوا انتم.
براحتج.
طلعت بقيت گاعدة شفتهم من الشباك طلعوا حسيت بنفسي جوعانة نزلت و اية هم
ماباقي شي و ترجع من دوامها البنيه لطيفة و خلوقة كلش دخلت للمطبخ اسوي شي
اكله فتحت الثلاجة بيها خيرات رب العالمين بس اشتهيت فطائر بقيت افتر بالمطبخ ادور
علي المكونات لحد مالگيتهن وگفت اجهز بالعجينة مالتها، كمزت بمكاني فاتحة
عيوني من سمعت صوت راهب ورايَّ درت بجسمي عليه نبضي ببلعومي من الهبطة.
غياهب: شتسوي هنا؟
راهب: خالي هنا؟
طلعوا للسوگ
واية
هسه على جية
هاا وانتِ شتسوين
فطائر
اني هم جوعان
بعدني ما مكملة
تحبين اساعدج؟
لا.
درت وجهي كلش غلط يبقى ويايَّ بنفس المكان بنفس الاحظة اجه ابالي ارسلان
لو ايشوف هالمنظر شيسوي؟ حجيت واني منطيته ظهري.
غياهب: ياريت لو تطلع من المطبخ و تگعد برا لان اشوفها مو حلوة بحقي
و حقك
هذهِ جمعتنا و لا مناسبة تبقى هنا و خطيبتك على جية و واضح عندك مفاتيح البيت.
تدللين طالع.
اختفى صوته سمعت طبكة الباب ركضت قفلت الباب مستحيل اثق ببشر رجعت
اكمل باللي بديت بي طابكة حواجبي بضوجة، حنين مارجعت حاجيتها و لا تواصلت
وياها وتواصلي قليل حتى ويا ابوية بس ما جاوب على احد رغم اشوف رسائل
منهم بس وضعي محتاج الابتعاد، اندگ الباب باوعت من الشباك اية راجعة فتحت الباب باوعتلي مستغربة من تصرفي.
اية: ليش قافلة الباب؟
رجعت أمشي راجعة للمطبخ عفتها ورايَّ.
غياهب: ما راهمة يبقى خطيبج بالبيت واني وحدي بنية.
ليش وين اهلي؟
طلعوا للسوگ.
صعدت الغرفتها بدلت ونزلت يمي تفتر كملت الفطائر حطيت بصحن طلبت منها
تدزه گتلها طلب لان جوعان أخذتهن وطلعت، وگفت يم الشباك اباوعلهم الصحن
بايدها واگفة تحجي بعصبية وياه بينما هوَ يرد الواضح ببرود وياها خلاها تفقد
عقلها من خلال حركاته وملامحه الا هيَّ تحجي بروح مفرفحة بس ما سمعت الكلام.
لان بعيدين عليَّ و الواضح گعدتي هنا راح تسبب هواية مشاكل وجروح لبعض
الاطراف اذا كنت اني السبب، صعدت فوگ سحبت جنطتي حطيت كل اغراضي بيها
من البداية جيتي لهذا البيت غلط ما جان لازم اگعد يم الناس متاكدة اية هسه عندها
شك مثل إلى ابالي بس مستحيل اخلي شي ينثبت عليَّ كملت جنطتي حطيتها على جهة دزيت رسالة الابوية انطي خبر.
غياهب: بابا اني راح ارجع.
بسرعة اجاني اتصال منه.
سلطان: ويننن راجعة غياااهب؟
بابا كافي صارلي ثلاث اشهر هنا اريد ارجع و افهمك كلشي
ممنوع تدخلين بغداد.
بقيت صافنة بكلامه شديحجي ابوية.
لعد وين اروح
اطلعي للشمال لا تدخلين بغداد بمعزتي عندج
شسوي بالشمال بابا شدتحجي شصاير؟
سد الخط بوجهي شبيه ابوية شنو هل التصرفات الصايرة عنده مدافهم لازم ذني الايام ارتب
وضعي و ارجع دخلت اية صارت عيونها على جنطتي مسحت دموعها وحجت بصوت مبحوح.
اية: ليش مطلعة جنطتج غياهب؟
غياهب: راجعة الاهلي.
اجت وگفت گدامي.
ليش قصرنا وياج بشي ضوجج شس.
لا بيبي بس وجودي هنا ماله داعي بعد و كافي بعيدة عن اهلي صارلي اشهر طگ گلبي عليهم.
متأكدة هذا السبب؟
امممم.
راحت گعدت على جربايتها ساكتة ما سئلتها ليش تبجين لان واضح الجواب و السبب
رجعوا اهلها فتحت الموضوع وياهم و اكيد جانت ردت فعلهم مثل اية بس وضحت الهم
بديت ارتب بوضع سفري علمود ارجع بس بقيت حايرة ارجع البغداد لو انفذ كلام ابوية.
ليش مايريدني ارجع والله اني گلبي طگ عليهم من گد الاشتياق رغم ما اجاوب احد بيهم بس ابوية.
خلاص ارجع البغداد و طُز بالوضعية كلهاااا و انعللل ابو الماضي إلى خلانا نتهرب
و نبتعد عن اهلنا مر كم يوم و اجه وقت ارجع وينتهي مشواري هنا ودعت خالة ام اية
وعمو كريم متشكرتهم الضيافتهم إلى راح يوصلني عمو للمطار راهب موجود استصعبت
كلامي وياه بس اية تستاهل رجعت خصلات من شعري وره اذني منحرجة رفعت راسي.
غياهب: اذا ممكن استاذ راهب اريد احجي وياك بموضوع.
راهب: اتفضلي.
ابتعدنا عن عمو كريم مشيت گدامه و هوَ ورايَّ وگفت ساكتة هيَّ نصيحة بس ما ادري
راح تتطبق و يفكر بيها يله مثل ما يگولون نصيحة و ببلاش انصح و خلي ضميرك مرتاح تبقى حسب الشخص يتقبلها او لا.
اني مو من حقي ادخل بينكم انتَو اية بس شفت نفسي حابة اقدملك هالنصيحة.
حط ايده بجيب البنطلون يباوعلي.
نصيحة شنو ست غياهب.
اني وحدة من الناس إلى خاطرت لأجل أهلي و مستعدة اسوي كلشي علمود اهلي
بس شغلة تتقبل انسانة گلبك ما هاويها و تتعامل ببرود وياها هذا الشي غلط حتى
لو امك رايده هذا الشي وانتَ دتضحي علمودها بالنهاية انتَ إلى راح تعيش وياها مو أمك مع احترامي الك و الوالدتك.
جاي احاول
للاسف ما شفت منك اي محاولة وياها رغم هيَّ اشوفها تحاول وتحاول تخلي تقارب.
و انسجام بينكم و تقوي العلاقة بس برودك يخليها تنفر اذا انتَ هيج مارايد هالعلاقة لا تظلمها وياك.
ما اكرها اني بالعكس اية درة بس.
افهمك تحتاج وقت بس اذا تبقى متحاول شلون تريد تصير تغيرات اني متأكدة بذاك اليوم اية ابالها عندك شي ويايَّ.
توسعت عيونه بسرعة أردف بجوابه.
لا لا والله گتلهااا مابينااا شي
حتى لو گتلها بصراحة شغلة اختك تشبهني مو مبرر يخليك تنظرلي بهيج نظرات.
يعني إلى ايشوفك يگول هذا حابها من نظراتك و اسلوبك.
ما عندي هيج شي
ما يهمني إلى يهمني تحاول لأجل خطيبتك و اذا اتشوف نفسك ما تگدر تحبها و تحتويها
هايهية انهوا كلشي والطرفين راضي و لا تخليها تتعلق بيك اكثر خصوصاً هيَّ
بدأت تنخلق مشاعر اتجاهك بگلبها و التعلق دماره اكثر من الحب.
ان شاء الله أحاول و أعتذر اذا بذر مني تصرف غلط.
أشوفة بخير استاذ راهب
ههههههه زين سؤال اخير قبل لا تروحين
اتفضل
ما فكرتي بالعرض مالتي.
اذا تحب تحافظ على وظيفتك ومكتبك لا تشغلني وياك
ليش؟
طليقي واحد مسودن
تحبينه انتِ؟
بلعت ريگ من سؤاله طلع عمو كريم بنفس اللحظة حسيته انقطني غلست عن الجواب
سلمت واتوجهنا للمطار اتمنى كلامي يغير شي بينهم اني اكثر بشر فاهم التعلق شنو بالضبط
بس ما نسيته و كل يوم قبل لا اغمض عيوني يجي ابالي واسرح بافكاري بذكرياتي وياه
وصلت للمطار دخلنا اخذت جنطتي حطيتها على جهة عمو كريك حسيته ضايج ابتسمت بوجهه.
غياهب: عمو راح تبقى ضايج.
كريم: لعد بابا راجعة ليش وابوج قبل لا تجين گال احتمال تبقى فترة طويلة.
عمو الغربة احسها صعبة مو اي شخص يتأقلم وياها و اني اهلي اختنگ بدونهم ما اگدر ابتعد اكثر رغم قبل ردت استقر هنا
براحتج عمو حبيبتي سلميلي على الاهل و ان شاء الله ما قصرنا بشي وياج
حشاكم من التقصير.
بقى ويايَّ الى ان صار وقت طائرتي وصارت المنادات سلمت عليه و اتشكرته اتوجهت للطائرة بعد.
الاجراءات صعدت بيها و گلبي متلهف لشوفة أهلي الى ان وصلت للعراق روحي ضحكت
قبل مبسمي طلعت من المطار داخلة بغداد سحبت نفس بعمق لا شمال و لا غير مكان اريد اهلي اريد اشوفهم
ادري ابوية هسه راح يصير بخاطره و ما يعجبه بس لازم يفهمني كافي بعد عنهم والله
ما حسيتهن اشهر حسيتهن سنين من عمري مشيت لگدام اخذت تكسي
صعدت بيها خلي اسويلهم سبرايز على گولت الاعرج بس ما جنت ادري اني إلى راح.
يصيرلي سبرايز اقوى من سبرايزي، الدنيا ظلمت صار المغرب اباوع من الجامة وشوارع
بغداد باضويتها وجمالها احنا نكول هناك بالخارج نظامهم وقوانينهم ونظافتهم افضل
من العراق ومحد اله علاقة بالثاني بس من ترجع للواقع عراقك ماكو احلا منه وبين
اهلك ولمة حبايبك وگفت السيارة گدام فرع بيتنه استغربت ليش السائق ماحطني يم الباب.
غياهب: عفواً ليش وگفت هنا.
السائق: والله خوية اعذريني بس ابني مريض واريد اخذه للمستشفى ماكدر اتاخر اكثر.
هاا مابي غير العافية يلا وصلت اني بعد بس بلا زحمة عليك بس نزلي جنطتي.
نزل گدامي واني طلعت أجرته خليتها اله بسيارته نزلت اخذت جنطتي ورحت
امشي بالفرع مالتنا بايدي جنطتي لمحت عيوني باب بيتنا ابتسمت مو اهوايَّ بعيدة
وصفت يمي سيارة نزلوا منها اثنين وثالثهم بالسيارة وگفوا اثنينهم محاوطيني.
من الجهتين بلعت ريگي بخوف منو ذوله وشرايدين حچى واحد منهم وهوَ موجه كلامه للي گاعد بالسيارة.
هيَّ هاي؟
رد عليه.
اي هيه بساع جيبوها
لحظات سريعة خاطفة للانفاس اريد ادافع عن نفسي وانحط شي على وجهي عيوني غوشت اسمع يحاجي بصوت هامس صعدهاا بسسرعه بسررعه فقدت توازني ومستسلمة للظلام.
فتحت عيوني وراسي مصدع باوعت للمكان إلى اني بيه مكان مثل تصميم المصانع.
بس مهجور وقديم ونص من بنائه مثل المحترك رجعت عيوني تباوع جانوا اثنين واگفين.
غياهب: منو انتم؟
بقوا ساكتين محد يجاوبني عطت بيهم.
كبر لفكم تستقون على النسوان
اباوع النفسي رابطيني عبالك حيوان ما اگدر اتحرك اختنگت انفتح الباب بعد
ماجنت منزلة راسي بقيت منزلة راسي بس اباوع من جوا دخل شخص حذائه يمكن
المع وانظف من حياتي رفعت راسي بهدوء طبكت حواجبي باستغراب جان شخص صاحب.
بنية جسم ضخمة اناقته شي اخر اتقدم وگف گدامي أشرلهم يطلعون، اتقدم قريب
عليَّ اكثر حط وجهه بوجهي اتحديته بنظراتي و هوَ نفس الحاله نضراته تتحداني.
هيووو منو انتَ
رد بنبرة مرعبة دبت الرعب والخوف بداخلي.
الموت.