رواية مرواد الظلمة الجزء الثاني للكاتبة هيلانا الفصل التاسع
حرك السيارة والجَو مغيم مطر خفيف يوكع على الجامة والشارع تراب
شوية شوية صار أصفر من التراب أني وحدي بهاي السيارة رباب وأبنها صعدوهم بغير سيارة
والمبايل كل شوي يرن (قاطعة رنين) أتصير دائرية وبيه أرقام
بس هو ميرد ويغني ويطك أصبع يمسلت يعني
أخذنة بطريق كله حفر
جامدة أفكر برجال إلى مات تجيني ساعات اريد أذبح نفسي من الذنب.
وساعات ما أحس بشي أكول هذا يومة شعلية أني اما هذا المجرم بلا إحساس يباوع بالمراية علينا
نظرة باردة نظرة واحد يتهيأ يسوّي شي أكبر لف يمين بعدين يسار دخل طريق كل أشجار أثل وطعوس مكلوبة (أيشان)
رمل متراكم إشانات والجو صفَر وبي ما يصير أتراب اكثر الطريق من بعيد ما يبين كلش
وكف فجأة طفة السيارة ونزل الباب صَك صَكّة بكل قوتة رجفت روحي لف حول السيارة من جهتنة فتح بابنا صاح بحدّة
: نزلي زينب.
الدنيا تنگط والگاع طين سحلني من زندي أباوع وراي لرباب نزلوهة
أشر بإيده على صريفة (خيمة تشبه خيم البدو)
طين وگصب ملتم حواليها
دخلني بيه كعدني وربط أدية وجاب رباب هم ربطها يمي بس الطفل خلوا بالسيارة
الصريفة مو هواء بالجو تتحرك وطايرة أطروفهة من جوة والهوء بارد يگفخ بينه
واحنا جنه دافين بالسيارة فلجنة هنا أسنوني واحد يصك بالثاني من البرد والخوف
شوية وأجة خالد وهل مرة شد عيوني ظلام وبرودة نخلت أعظامي.
وغربة غزت أعماق روحي وضياع وفقدان أسمعة يحجي ويه رباب يكلها
: ليش شردتي وياها
وهي بس تبجي ماتجاوب أخذوهة وطلعوا ونگطع الصوت بقيت وحدي أحس ماكو أحد يمي
بس صوت الهوء والاشجار من يحرگه الهوء أطلع صوت غريب ويخوف
وساعات طويلة وموت على بطئي جنت أفگر شلون أطلع منا لان نحصرت أفگاري على شي واحد فقط.
وهو أطلع منا لو أموت وتنطوي صفحتي ويضيع أثري ومحد يلگالي أثر اموت غريبة وماعندي گبر وأحتمال الگل يحجي بيه وبشرفي ومحد يدري
بحالي تمالگت نفسي بصعوبة عاضة على شفتي تعبت من البجي من الصبح على ونه وحدي
أدية مقيدات ماكدر أتحسس شنو بصفي مديت رجلي توجعني من أثر الطيحة
وشوية شوية تمددت على ظهري أتنفس بشهگة
وخشمي يمكن أنگسر لان طحت طيحة قوية من السيارة جبح.
صنته واي حرگة بسرعة تنسمع بس أسمع صوت ويدهم برة والمطر بلش يصير قوي
وأطراف الصريفة ويه الهوء كامت تخفك حيل
واحس الماي والطين يطفر عليه
مرت ساعات بمگاني وخفت خفت حيل
گمت أبجي صحت بصوت عالي
: - تعاال طلعني منا فدووة لا تعوفني هنااا وحدي فكولي أعيوني
ماكو رد. بلعت ريگي وأني أعيد بذاگرتي أحداث قبل من جنت بغداد أسلي نفسي
لان يمكن راح أجن اذا ضليت هيج بقيت أفكر لحد ما غفيت.
فزيت وأتوقع دنيا الصبح وأصلا مادري دنيا الصبح بس سمعته هذا الحقير يسولف
ويمكن ويه أمه بس يسرة شجابها لهنا معقولة سمعته كالها
گالها بعصبية: كتلج اريدن الفلوس
ردت هي ومبينه متعصبة: مرت ااااخوك ولكك اخويلد اتسودنت شتحجي أعلينا الوادم يحب حرمة أخوو
: مااااايحجون شنهي بكيفهم يحجون وانااا تزوجها من حيث هي كحواستر عليها موش احسن ماتضل ويه الرعيان كل يوم حابلة وهي بتج الزفرة أخذيهه وياج.
بقيت جامدة من كلامهم يا يمة شلون بيه شوية وحسيت بخطوات قريبة مني شال الوصلة عن عيوني
گوة فتحت عيوني يوجعني أجت عيني عليه مثني رگبته ومگرفص يمي
جايب جاي وخبز أشعير وخر الحبل من ادية وكومني أستعدلت بگعدتي ذابة ثگلي
علي االبسط وراي مسفطاتت رفع أيدة وخر شعري على جهه شمزيت منه حرگت راسي بنزعاج مدلي
الجاي والخبزة يابسة
: -أگلي ورانة درب طويل
: -وين ماخذني
: -اشش حسج لا تحجين هواي زنوبتي.
حجيت ويا بسياسة: زين ليش ما ترجعني لبغداد وأني والله ما أحجي عنك حتى ما أشتگي عليك
: -أريدج
فكت عيوني مصدومة هز راسة ياكد كلامة
: بسسس ااااني مررت اااخوك
: حسن ماااات ولة أنكبرررر
صفنت بوجه شوية حجاهة بثقة، أشمزيت منه
لميت حلگي وتفلت بوجهه رصيت سنوني بگره
: - خنزيز ااااانت شنو لك أني مرررت أخووك ياااحقير اشمزيييت منك مااااقبل بيك لو تبقى اخر بشر بالگون ما أباوعلك ولا أشوفك.
همهم مسح وجهه وضحك بطريقة تخليك تبلع العافية قرب مني همس بجمود
: -راحن تحبيني
شافني ما شربت أخذ الجاي والخبزة ياگل ويحجي بستمتاع
: -نعيش بغداد وغاد نعرس ونجيب طفل يشبهج. طك أطبعه وحجة: -يو بنية شتردين أنتِ
جاهلته لزم وجهي ثبته راص على فگي فاك عيونه حيل بيهن بياض على حمرار
شلون واحد باجي لو كاعد من نوم هز راسي قوي
ضربته على صدرة بلكي يوخر
: -تردين ولد يو بنية
: -هههههههه الله يشافيك مو صاحي خطية انت.
: -تحبين البنات بنية حلوة عده عيون تشبه عيونج
أنتِ عيونج حلوات حيل حلوات
: -حلگي مورم جان عفطتلك
: -أربيج كح. ها صدك نسيت شلون تغدريني عبالج ناسيها لا بس أحسابج بعدين هساع موش فارغلج
گبر يلفك. ضل يهدد وهو يتريك عود جابة إلى أنوب أتزقنب بي سم بگلبك
من بعده قيدني راح وبقيت وحدي لعصر رجع خلة سلاحة بخصرة وأخذني صعدني بالسيارة
شفت السلاح محطوط بالجيب إلى يصير بظهر الكشن وهو بعدة بالصريفة ما اعرف شيجيب.
مديت ايدي أخذتة وكوة لزمته لان ادية
مربطة بعدة بيدي والرمي أشتغل
الطلقات فلشن الجامة الكدامية بقيت متمددة على الكشن جامدة حتى صوت ما طلعت
وعاصرة على المسدس بيدي أسمع بس صوت الصايح واحد يكلهم
: گضة لا يشرد
لحظات وحسيت بصوت قريب حسيت بشخص قريب يم الباب حرك اليدة يريد يفتحة
وجهة المسدس بتجاه الباب وخليت الصبعي على العگرب أول ما أنفتح الباب طكيتة طلقة
صارت عيوني عليه محمد ابن عمي يالله طاح.
أجت أبطنه كلش ومن مسافة قريبة حيل
أتمنيتة خالد وجاية بي هالعار بس ما أتوقعت محمد
زحفت من الكشن وذبيت نفسي للكاع
طحت يم جثة محمد ماعرف اذا ميت لو عدل
بس هو خلص غمض عيونة
يمكن مات؟ الله يرحمة لعد شسوي
أخذتها زحفف بتجاه النهر الجان قريب من السيارة
بدون ما أباوع وراي ولا أشوف شكوو
أستغليت السد مال السيارة وزحفت لنهر وصلتة
جان نهر أصغير يجري.
كمت على حيلي وطگيته ركضة بكل قوتي وأسمع صوت وراي يكلهم البنية شردت الحگوهة
اركض واركض بدون ما أوگف وكلبي يركض قبلي
ويدك بكل قوتة والمسدس بعدة بيدي
وصلت لايشان جان عالي مثل التل عالي بس رمل
رجليك تغطس بي كوة تتحرك
كل خطوة أصعدهة بالف يا على وصلت كلش فوكة والتفتت وراي شفتة
هذا. هذا شسمه ابن عمهم هذا اجياددد
التفتت كبل على جهه الثانية من شفتة أجاني ركض
نزلت ومن فوك بسرعة النزلة صارت سهله عليه.
عكس الصعدة وبوجهي للغابة جانت هاي المنطقة رملية موجودة بين النجف والكوت
ومن كثر الرمل الكاعد يزحف على الشارع زرعها صدام احسين اشجار حتى تسد الرمل عن الشارع
بحيث صارت عبارة عن اشجار وانواع الاشجار بيه وحدة بصف الثانية صارت مظلمة وتخوف
ومابيه ناس تسكن بس عزبيات تجي هنا
هذا الجنت اسمع بي منهم من جانوا
يعزبون بيها علمود حلالهم بس هسه شفتها بعيني
وبيها ايشانات مكلوبة وكل ايشان.
الارتفاع مالتة يعادل بيت طابقين وعبارة عن رمل
كاعهه هي حلوة بالنهار بس تخوف بالليل
نزلت ركض بدون ما أحدد وين رايحة بس اركض
اريد أضيعة وما يلزمني أباوع وراي ماكو أحد
جنت متاكدة هو ضيعني جريت نفس وكمت أمشي
علي كيفي لان كلبي راح يوكف من كثر الركض
بعدني أمشي وأتلفتت وراي ما أشوف غير سيارة لاكتني وجهه بوجهه رجعت ليورة متفاجئة
وهو نزل من سيارتة كالي بهدوء
: -أوچفي.
رجعت ركض شنو اوكف زوج إلى يوكف بس إلى صار لاكوني جماعتة من الجهه الثانية
المسدس بيدي جنت اكدر أكتل بيهم بعد وهو لو ميته لو لا وهمة هم جانوا حذرين
ويحجون بسياسة وياي بس اني بداخلي جنت مرعوبة وفكري مشتت هستوني كاتلة واحد
ارجع أكتل بعد حاولت أهددهم بلكي يعوفوني
زينب: باع عوفني اروح ترا بيدي أسلاح وأكتلكم
اجياد: -وين ترحين
زينب: -ميخصكم
باوع على ساعته وكال بعد ما باوع لاجو.
: -بعد شوي يجلجل الظلام وهنانة ضواري تاگلج من تضلين وحدج ترا المنطقة خطرة والوادم تييي تتملكطط هنا ذهب وبيه تييي للصيد اذا گضوج و أنتِ أبنية شيسون بيج
بداخلي خفت بس حاولت ما أبين ايدي ترجف وحتى الاعمى يعرف شگد أني خايفة ومنهارة
وهمة ملاحظين هالشي أباوعلهم جماعتة اربعة واحد كاعد بالصدر وأثنين مرتگين على بنيد سيارتهم
واحد كاعد بالبدي وهو أجياد واكف بمسافة قريبة
ويسولف وياي بهدوء وسلوب مقنع
: شتريد مني.
: -أنتِ توج كاتلة محمد نصير من يدري يذبج بالتوقيف ورهة أعدام تعاي وياي احسن ما تردين الهم
: منو كالك ارجع الهم
: -وين ترحين بهاي الهيمة ترا همة ولد الديرة ويندلونها شبر شبر ويگضونج أنتِ هنانة ما تندلين
: و أنتَ ليش تريد أساعدني شنو غايتك
رد واحد من جماعتة أسمه على كال بضحكة
: -لوجه الله
رجعت أعيوني لاجياد حجة بعد ما جر نفس بملل
: أبن أخوي صار عندي اريدنج أديرين بالج عليه وانااا احميج بالمقابل.
: الله خوش اخيرااا اعترفتوا ب أبن أخوكم اصلا لو صاير بيك حظ وماخذة من البداية ما صار إلى صار
: -هساع شني
: مااااجي معليك بيه
: -هذا أخر حجي
: أييي
اني جنت أحجي ويه أجياد وكل شوي التفت على جماعته وراي خاف واحد منهم يقرب
بس ما أدري أشلون لهيت عنهم وما أحس غير
هذا واحد منهم ضربني على ايدي وكع المسدس
من ايدي وضربتة قوية الحقير
دنك أخذة بلعت العافيه واجياد شتمة
وكال: -شبيك وياها هوة هيجي ال، وفشر عليه.
لزمني من ايدي وأخذني للسيارتة صعدني بالكشن ورة وفك الحبل من ادية بسجينة أصغيرة
باوعت بصفي مخلين الطفل هذا منين جابوا
شعجب خالد المسودن ما كتلة او سوالة شي
هو شاخط كلشي يطلع اذا هو اني مرت اخو وحاط عينه عليه ما أستبعد يكتل طفل شغل السيارة
ومشينة مسافة طويلة ماعرف وين رايحين بس اني تعبانة وضايجة شنو ضايجة اني الدنيا صغرانة بعيني ودموعي يابسة على خدي أباوع من الجامة.
وصارت دنيا الليل وظلمة لحد ما وصلنا منطقة هم اول مره أشوفها بس هي تقريبا نفس ذيج مدري نفس المنطقه بس دنيا ظلام ما أكدر أميز نزلنا
وهو نزل وراح للغرفة طين طلع منها كرك
ويا فاسة وراح للبدي السيارة
نزلت أشوفة شيسوي شفتة سحل جثة محمد
من البدي بقيت جامدة هذا محمد
كتلة برعب: هذا محمد
هز راسة ب اي بلعت ريكي والغصة خنگتني
: هو مات
: -أنتِ ششوفين جدامچ
: جثة
: عفية
بجيت وحجيت وأني أشهك: - أني كتلتة
: سباعية.
: -ليش جبتة هنا
: أدفنه هنانة محد يندلة غاد يلگونة وتنسجنين
: -محد يدري أني كاتلتة
: -محد شافج؟
: ما أدري
ما رد سحل الجثة وحفر حفرة جبيرة جنت كاعدة يمه على تربان وأباوعلة يحفر وأبجي
: احنا انروح للنار
كال بسخرية
: -للنار،؟ أناااأصلاً بجهنم من زمان
: - بس قتل وهاي جثة وما نبلغ الشرطة
رفع حاجبه بسخرية هادئة وكأنه يستمتع بخوفي
: -هاي مو أول حفرة أحفرها ولا أول جثة شني أبلغ شجاني
رجفت كلامة دك براسي
: - شتقصد؟
سكت رجعت كتلة
: -مااراح تحجي
: -شحجي
: -هسه شنو ما نبلغ الشرطة
: -لا
أباوع على أدية ترجف أني هسه مجرمة كتلت بشر
أنسان روح هاي بس والله جنت خايفة مو بوعيي
هو صار بنص الحفرة وبعدة يغمج بيها واني فوك كاعدة على طرف أباوعلة كتلة أبرر الجريمة لنفسي
حتى ما أحس بالذنب اريد أحد يكلي هذا مو ذنبج
حجيت مرتبكة
: جنت مجبورة أكتلة
رفع راسه عليّه عيونه بالظلمة تلمع باردة كأنو الموضوع جدا عادي.
: -لو ما كاتلتة الله أعلم شني راد يسوي
نزل بعيونه للحفرة ورجع يحفر بهدوء
: -س. بشر روحه راحت بسببي
: لا موش بسببج هوة أزمال ومات
فركت أدية وكتلة بتاكيد: -يعني أني معلية صح
حجة وهو مدنك يحفر: صح
: -وهذا مو ذنبي
: لا موش ذنبج
: -هو يعني تدري هذا يومة
: الله يرحمه جاا أنتِ شكوو بس سهلتي موتة
أعض شفايفي وأفرك بدية وعيوني عليه حجية يخفف عليه شوية مدري يحجي صدك مدري يضحك عليه ويسايرني
: -يعني آني مو مجرمة؟
وكف مسح التراب من إيده وطفر من الحفرة طلع وكف أكبالي يلهث تعبان ويباوع عليّه نظرة غريبة
: -لا
: رحمة والديك
: -أدللي
دنك سحل الجثة ذبها بالحفرة وكام يذب عليها أتراب بالكرك وأني هم ساعدتة دفعته بدية تراب
فوكه أذب وأستغفر يربي فدوة الك أغفرلي
ماااقصدي أني مو مجرمة بس أنجبرت
رجفت كلي ارجف باردة صوت أنفاسي يسمعه
كمل وذب الكرك اقترب منّي خطوة وأني كاعدة
تحسه بلا روح بلا عاطفة غريب هالرجال.
هادى مدري فاهي كأنه الموضوع عادي
ولا حسبالك دافنين رجال كال برود
: -أنتِ سويتي اللي أي واحد يسوي وما دام آنااا شاهد إنتِ بعيوني لا كاتلة ولا غيرة خوش
: شدكول أصليلة ركعتين حتى بلكي بثوابة ينغفر ذنبي
: -وياج صلاة الوحشة على روحة هم
: ها أنتَ هيج رايك
: -اي. اي
كالها وأبتسامة لاحت على وجهه رجعت سألتة
: زين أنتِ شتريد منّي شنو غايتك من مساعدتي
غير سالفة أبن أخوك.
أخذلة نظرة طويلة عليه بقيت أباوعلة ما دنكت كال بعد ما حك شواربة
: لأن أريدچ تديرين بالچ على ابن أخويه إحتاجچ بس هاي
: -أمك وين ليش ما تاخذة الها
: ماتريدة وهم هساع الدنيا خربت راح تصير مصاكك بعد سبع اليجيب حگة وعمج بالدولة
: -وأني شراح يصير بيه
أجاهل سوالي وكال
: -كومي خلصنا الجثة راحت ذنبچ دفنته يمها
مشة كدامي طلع الطفل من السيارة وأني أمشي وراه دخلنا الغرفة جانت طين.
وبيه رازونة وحدة (فتحه دائري على شكل شباك)
وبوفية عليها نضيدة مال غراض
واكو جولة مال نفط وبعد بيها اغراض السگفة مالتها بواري وگصب وحتى الفرشة جلافيص
مال كواني، جان هو نزل بطانيات فرشهن بالكاع وحط الطفل عليهن كالي
: ارتاحي لا تضلين هيجي واجفة
كعدت بصف الطفل لازكة نفسي يم البوفية وهو طلع برا شغل نار وأنوب جمرت
خلاها بالمنقلة وجابها خلاهة بالغرفة حتى تدفى
وكال بأسف
: -مسواك ماكو ليلة على باجر تعذريني يابة.
: لا عادي اصلا مو جوعانة
بقى شوي يناغي الطفل أني ردتة يكمل حتى يطلع وأنام وفعلا كام وراح للسيارتة
شغلها وجابها خلاهة كلش قريبة للباب وعاف باب الصدر مفتوح وكعد بيها
بس أخذلة بطانية ما نام يمنه وأني نمت جنت تعبانة وراسي يوجعني من كثر الكتل إلى أكلتة
راسي موتني وخشمي أمورم منتهي نمت وما فزيت لحد الصبح كعدت على صوت الطفل يبجي كمت من مكاني وخرت البطانية وطلعت برا شفتة
يلعب بي بس هو يبجي شافني أجاني بهمة.
كال: أخذي وانااا رايح لامي شوفلنة حليب
أخذتة منه وهو راح بس مو لاهلة لان السيارة عافهه هنا كال شوي وأجي والطفل يبجي مللني
انتظرتة رجع مدري وين جان هيج ساعة ورجع أنطيتة الطفل كتلة
: خاف ممتون
: -جا ما تمرغينة
: ماعرف بس راح أجرب أنتظر أجيب بطانية
دخلت للغرفة أباوع بيها البارحة ما شفتها زين الغرف بيها بوفية بيه بابين بي وجامتين والجامات مكسرات وحاطين دبة شكر بطن الجامة.
ومفتوحة والدود صاعد عليها مسويلة خط سريع من رازونة ولا هذا الدود ولا كنما شتاء وباردة ينكل من
البوفية بالشكر
والحياطين معلك عليهن صور ممثلات هنديات وحدة منهن جانت حلوة ما أعرف ليش معلگيهن شنو ياخذون مراد منهن لو شنو
مديت أيدي على البوفيه أخذت بطانية. وأني أمد ايدي وكع كتاب جان محطوط جوة البطاطين
وملفوف براية سودة، أخذتة بيدي وخرت الراية عنه جان قديم والأوراق مالته مجرجفة.
أشلون الورقة من يوكع عليها ماي وتخرب هو هم هيج جانت مكتوب عليه قاهر الارواح
ما أهتميت أفتحة رجعتة لمكانة وطلعت لكيت الطفل بيد هذا أجياد لازمة وهو يبجي كالي بضوجة
: -ماااتين تسكتينه دوخني
جنت صافنة على المكان أكو محصار بي صخلتين ومطية توهة جايبة واكو موكد مال نار وهاي الغرفة الطين شنو معقولة جانوا عايشين هنا لو شنو كتلة
: -ترا هو أبن أخوك أني شعلية سكته أنتَ.
حاطة بحضنه ويفتر بي يناغي بس هو يبجي يلگع فد غثة هالطفل مدري يمكن لان تعلعل
: -خافنة جوعان
: -ما أدري
: -جااا شتدرين أنتِ
: -كش مااادري لا تسألني
: -ما ترضعينه
: يعني جايبة قبل طفل وادر عليه وارضعه اشبيك مصخن أنتَ
: -تعاي أنرضعه من المطية
ما أهتميت حسبالي يشاقة بس هو زمخ بيه
: -أحجي وياج
: -تحجي صدك؟
: -كومييي هساع الفرخ نط من البجي
: ونرضعه حليب مطاية
: -جااا شبي.
كمت ورحنه للمطية توهة جايبة وخرنة أبنها عنها ربطنه على جهه ورجعنه هو كمشها
وأني سحبت الثدي مالتها مسحته وأنوب عصرتة بدية حتى تذب حليب من بدت أدر
قربت الطفل منها كام يرضع وهي واكفة لازمه اجياد
لحد ما شبع وخرتة وجنت كل شوي اوخرة خاف يختنك
وخرته أمسح بحلكة وهو سنح ماادري شبيه باوعت لاجياد وضحكت كال بستفهام
: -شني؟
: -ابن اخوك رضع حليب مطاية.؟ مطاية ههههههه.
طكيتهه ضحكة وهو هز ايدة ما راضي واخذة بحضنه نومة يلولي عليه ويشعر جنه عجوز بدو لحد ما نام نومة.
مرت أيام وأيام لحد ما صار شهر خلال هالشهر جنت أروح أسبح بالساگية وأرجع
بس شنو أسبح بس بماي ما عدنة تايت ولا صابونة هو ما يجيب وكل شوي وكال باجر أنروح
بعد يومين بالهواي وأنروح ولحد هسه ما رايحين
باقين بهاي المنطقة اسمها قرية العراية
حسب ما سمعت منة كال جم يوم ونروح للبتيرة
جنت قبل أسمع بالبتيرة
منطقة مال سلابة وعصابات صدام بكل قوتة ماكدر يطبها ولا يسويلها شي دوم حتى كتل يصير بيه.
جنت خايفة ماعرف ليش أنروح هناك بس ما بيدي شي مااعرف وين اروح اني هسه مجرمة
بيتنا معزول على اطراف القرية يم الطعوس
اسمع بس صوت الجلاب بالليل ومرات
من أصعد فوك الطعوس أشوف أضوية البيوت
من بعيد وملل وحشة كلش وحشة خصوصا المغربية العبرة تتكسر بصدري والحسرات تخنگني
جنت كاعدة وشعري يحگني وصار فترة يحكني
جنت فالتة وأحك بي وبينما أكلب
طلع بيدي كملة أني شفتها لو فزيت من مكاني
مصدومة ممصدكة مديت أيدي وأطلع الثانية.
وأنوب عدلات يتمشن أحس روحي طارت يمه صار بيه كمل ما لزمت نفسي أنهديت بالببجي
وعلي ما دري شجاني بس الموضوع جان غريب ومفاجى واول مرة هيج يصير وياي
كمت أبجي بصوت عالي ورحت ركض للساگية طبيت بيه وذب على شعري ماي وأفرك بي
أنوب أغطى راسي بالماي بلكي الكملات يغرگن ويطوفن بالماي بس هن مجلبات
أفرك بي وأبجي وأنوب صوتي عالي يجيب التايهه
: -شكووو زينب أشبيج.
التفتت على صوتة جان أجياد واكفة يم الشريعة ويباوعلي بقلق كتلة وأني أبجي
: -بيه كمل
حسيت الضحكة لزمتة بس سيطر على نفسة وما ضحك كال بهدوء
: -أگضج أكصبچ هساع تبجين جي بيج كمل
: اييي اااني يصير بيه كمل يربي والله نقهرت على نفسي وعود دوم أغسلة
: -تعاي أطلعي سهله يروحن
: -ماايروح صار ساعه اغسل بي مااجاي يروح
: تعاي معليج يمي
دخل طلعني من الماي واخذني كايدني من ايدي واني شعري مفلول حاطة الحجاب جذب عليه.
وابجي وعلى جني وحدة مسودنة فرشلي ابساط يم باب الغرفة وكلي
: اكعدي هنانة رادلچ
كعدت وهو راح للسيارة واخذ الصوندة أباوعلة سحب منها بانزين وخلة منه بطاسة
وأجة ثنى ركبته متگرفص وكعد يمه يفلي براسي ويحطلة بانزين ويحجي وياي
: -للعصر يروح كله ينگفض
: هاا متاكد
هز راسة باوعتلة وهو ملتهي جكارتة بحلكة وادي كلهن بانزين ويفرك بشعري كلت راح نكب ونشتعل هسه على هالسالفة.
: -اكلك أنتِ منين تدري بهاي السوالف صاير بيك كمل من قبل
رفع حاجبة ما راضي حسيته ما عجبة كلامي ابتسمت بتسليك
: اقصد يعني منين تعرف يروح بالبانزين يجوز ما راح
: -يروح
: أحسك خوش زلمة هو جاي تساعدني
: -و أنتِ خوش مرة وتستاهلين
: رحمة والديك ونعلعلا على والديك اذا غدرت بيه
حك لحيتة وعض على شفتة من شفت وجهه غيم حسيت أني جفصت كال وهو يكوم
: بيج بخت مرة
خلة ومشة بسياارتة ضليت جامدة بمكاني مد راسة من جامة وكال.
: رايح أيبلج صوغة من أمي
ابتسمت بوجهه تسليك وهو مشى
كمت كعدت بالغرفة أمشط بشعري وريحة البانزين تكتل وباب الغرفة أندك صحت منو أجاني صوتة
: خوية زينب أندهيلي أجياد
: -شرايد منه ومنو أنتَ
: خوية موش وكت الحجي أندهيلي أجياد بساع
: -غير أفتهم شتريد منه
: كليلة خالد وربعة ساطين على بيت محسن وخاطفين مرتة وصالبين الزلمة الزوم نلحگة
: اها بس خوية أجياد مو هنا
رد عليه متعصب: -جااا عليش ما تحجين وموجفتنة هنانة.
: مو أني ردت أعرف شكوو أعتذر منك
ما سمعت الة صوت يمكن مشة أني بس ردت أعرف شعدهم وهذا خالد خاطف مرت منو
معقولة نفس خالد ابن عمي والله اذا هو نفسه فد استهتروا وعوزهم واحد يطيح حظهم
للعصر كلش وأجياد ماكو لا هو ولا صاحبة مدري وينهم أنوب هنا كله أطعوس مكلوبة
وفوكةالطعوس أشجار عليه والمنطقة رملية
وتخوف العصر كلش ولا صوت هدوء وبس أني وحدي واكفة برة يم المطية
وبيدي طاسة أريد أحلب بيه حليبة للطفل.
بس أشلون أشربة باالطسة
بعدني أفكر ما أحس الا أيد أنحطت على حلكي والثانية التفت على بطني أنخضيت واتتحركت
أدفع عضيته من أيدة حتى يعوفني اريدة أشوفة
منو من عضيتي فلت ايدي كلي
: ومرررض بت السگط ااوووجفي
دفعته بكل قوتي وطكيته ركضة للغرفة أكو أسلاح جوة لاجياد وهو وراي يصيح ويفشر
عرفتة من صوتة خالد. أتاكدت همة مسوين خطة أكيد خلوا الساحة فرغت الهم هنا وأجوا.
ولهوا أجياد وربعة بغير شي. دخلت للغرفة مفرفحة وطايرة مثل الغزامة
لزمت تفكة أجياد وهو لزمني أتعاركنة والتفكة بينه
هو يجر وأني أجر
اليوم أعرف أموت وما أنطي التفكة الة
بس هو جان أقوى مني سحبها من أيدي
بسرعة وطكني بيها وكعت على وجهي ولزمني من شعري طلعني سحل للفرس مالته رابطه قريب
من بيتنا
أخذني سحل بالتربان وأني أصرخ عسى وأن واحد يسمع صوتي بس ماكو
عضيته من أيدة ورجع عليه لطمني راشدي
جنت أدافع عن نفسي بكل قوتي.
وصلنا الحصان يريد يصعدني فوكة بس ميعرف أشلون يعني هو من كل عقلة يردني أصعد
حط السلاح على وجهي صارت فوهه السلاح على كصتي كلش وعيونه تجدح كال
: أصعدي جدامي
: -بااع عوفني ماااارريد شتررردون منني أنتم
: الزوم أتموتين ضلتج خطر أعلينا
: -والله مااااحجي ونبي بشنو أحلفلك وروح أخوية مااااحجي بس عوفنيي مااااشفت
قبل لا يحجي وصوت الطلقة دوة احس كلبي طاح حسبالي طگني جمدت بس أني أتنفس عايشة.
عيوني صارت عليه طاح على وجهه أجياد واكف وراة وبيدة مسدس موجهه عليه
دمه ترس الكاع، بلعت ريكي واني بعدني متصنهمة وواكفة بإمكاني ورافعة أدية
وهو تقدم سحب الجثة وكال
: الحمدلله على السلامة
سلامة؟ الحمدلله. يا سلامة هاي أباوعلة سحل الجثة مشيت وراه بعد ما أستوعبت خالد أنكتل والي كتلة أجياد
أمشي بغير روح والله منتهية وضايعة شفته يحفر بكبر جديد بصف ذاك القديم
أباوعلة جامدة دفنة وسواة عليه التراب.
رفع راسة عيونة ثابتة حتى ما يرمش
تقرب وكف يمي لازم الكرك بيدة وجهه عركان
رغم الجوء بارد وشتاء حجة بهدوء
: -بيج شي سوالج شي هالطنطل
هزيت راسي ب لا صافنة بوجهه وهو هم جان يباوعلي يمكن أنكسر خاطرة عليه
والله أني خطية شنو هالظيم وين وكعت وين جانت هاي المصايب إلى أنوب جرايم
وعلي ما نطلع منها لو نموت اذا لزمتنه الشرطة
اعدام خلاص هو القاتل واني هم و ندفن سوة
فززني صوتة من كال
: شبيج خايفة.
: -مو. مو. هذا الرجال صار جثتين
: -اي أثنين
حجاهه بمعنى اي اثنين شنو يعني. رمشت أستوعب رفعت أصابعي بوجهه
: ماتوا أثنين
: -ايابة شنييي الوراهة
: -ماتوا
: -استغفرالله جااا انا مااادري ماتوا
: ماتوا يعني ماتوا هاهيه موت هذا موت
هز راسه بخفة
كتلة: وبعدين؟
: -شني بعدين جاااشكو بعدين
: - صدك تحجي اثنين كتلت اثنين شلون تحجي برود هيج
: زين، شتحبين أسوي؟ أكعد أبچي عليهم.
يباوعلي بنظرات محسسني الموضوع عادي بس أني مكبرتة شنو يعني واحد مات عادي شنو يعني
الموضوع تافه ماكو شي يستدعي أخاف هذا تفسير نظرات هذا اليهودي الكدامي
: -بردانة؟
: -ها
: بعدج ترجّفين بردانة
: -لا
: تره بعد ماكو أحد، كلشي خلص.
: -ليش هيج تحجي ترا ماتوا أثنين البارحة دفنه واحد واليوم واحد
مال براسه وحجة بنبرة هادئة تخوّف
: -إنتِ شايفة الموت أكثر مني؟
بقيت صافنه بوجهه بتسم بطرف شفتة بسخرية وكمل: - أول مرة أدري بس هيجي الدنيا يا زينب شنسوي وخليها أبالج الصوج بالمكتول موش الكاتل عبن هوة لو أدمي محد كتلة
: -أني، أني خايفة البارحة دفنت واحد وياك واليوم شفتك كتلت كدامي مو طبيعية هاي السالفة شجابني بنص هالجرائم اااخاف تكتلني اني هم لان مبين الكتل عدكم عادي ومحد بعينكم لو اروح لسجن
مشة خطوة باتجاهي خطوة وكف كدامي كلش قريب حط عينه بعيني وحجة.
: لا تخافين لو أريد أسوي بيج شي چان ما لحكَتي تشوفين الضو، لا العصر ولا الليل ميتة من زمان
فتحت عيوني متوسعه معقولة ديهددني لو شنو
كمت رجعت للغرفة عيوني على الطفل نايم
شبع حليب مطاية ونام هم خلفللة على المطية
معيشتة بحليبها واني حايرة بزماني مااادري شسوي
سمعت صوت سيارة. كمت فتحت الباب على نص شفت واحد من جماعته أجة وهو كالة بضحكة
: بشر بلبل نگرتهم
: -أبو حسين نگرهم.
: بعد اسمه على على جده ما يتعامل بالخفيف يحب الثكيل
: -رباهم
: وانت شني شسويت
: -كتلت خالد العار
: لاااا العباس عليك
: -وعلي
: -عليش ولك أنطيي روحك فنتك شجاك تسودنت ردس
: - مالي خلك الزمهم بوكسات من الاخير أنگدة جيلة وأنعل والديه
رجعت كعدت بمكاني والله الدنيا طالعة من عيني أنوب شعري ما غسلتة بعدني
الفكرة الوحيدة إلى أستقرت براسي هو لو أموت لو أنسجن ما تقبل غلط غير الذنب إلى أحس بي.
حاولت ما أفكر بس ماكو، كمت للبوفية أخذت الكتاب أني اصلا جنت ادرس واعرف أقرا
كلت أقرأ بي شوية وأسلي نفسي لان راح أجن من التفكير الخوف القلق.