رواية لبوة علي للكاتبة كفاية كاظم الفصل الثاني والأربعون
البيت فارغ بس اني وبطني واصلة لخشمي اباوع لرجلية مي ينزل صرت ارجف خفت لايصير عندي ولادة ومحد موجود ومنا خالتي واگعة من طولها
دخيلك ياعلي رحت گعدت يمها قست نبضها اكيد سالفة الضغط صرت ادور على الجهاز مالگيتة
رجعت الها وصرت اضغط براحة ايدها بقوة اباوعلها عفست وجهة يالله صرت اكرر الحركة بيدها الثانية الا فتحت عيونها.
تنفست براحة رحت للثلاجة خبطت الها لبن وخليت علية ملح شربتها وبقيت كاعدة يمها گلبي احسة يرعد مرت ربع ساعة صارت زينه شربتها علاجها وگعدت بالطارمة ماگدرت اصبر اكثر من هيج بيت مابي رجال لو صار بيها شي بيمن اتصل واني ماگدر
تمنيت بهاي اللحظة ينفصل حيدر من شغلة لو يسوي شي ويبطلونة اي شي يشتغل بس كون نشوفة مسحت دموعي ورحت لبست شالي وصاية.
اخذتها للمضمد بلگوة من شافتني غافلة الا راحت اجرت تكتك الدنيا سودة بوجهي احس باي لحظة راح اموت مو اجيب شدلها المضمد مغذي وبدل العلاج انطاها اقوة رجعنا للبيت لگيت غزل خطية واگفة بالباب وجهة اصفرر.
-وين جنتن شبيج لبوة جبتيي؟
-وين ماتشوفين بطني
-شصارر عليج الله؟
-ماصار شي بس امج هبط ضغطها.
دخلت خالتي لغرفتها وغزل راحت تسوي الغدة بعد ماگدر اتحرك خطوة كعدت على الكرسي وصفنت بالفضاء روحي راح تطلع كل ذرة بجسمي ملچومة
غزل: -الوو وين صافنة؟
-ها لا ماكو شي
-اتصلتي بازل؟
-لأ والله روحي اتصلي بيهة شوفيها وين صارت
-خوش
راحت غزل واندگ الباب اجت ازل تضحك ملامحها تبشر بخير.
غزل: -ها يمة شصار.؟
نزعت شالها وصفگت اديها وهي تضحك: -انقبلت هندسة الطب الحيااااتي
غزل: -الف مبروك شايفة الخيرر
-مبروك تستاهلين عمري.
ازل: -شكرا حبيباتي، شبيج لبوة وجهج اصفرر؟
-عوفني بضيمي ولچن رااح اموت
عفتهن على وضعهن وطلعت صحت عليهن واني مكملة طريقي: -خل خالتي تتغدة وتشرب علاجها موتنسن
صعدت لغرفتي سديت الباب كعدت بالگاع لزمت راسي بديني ودموعي تجري خلص لهنا وكافي هنا نهاية المطاف ملك الموت احسها مگابلني اخذت الموبايل اتصلت بحيدر شگد ماجاوب متت قهر
جاي احس روحي تحتضر اريد احجي وياة اخر مرة واسمع صوتة صرت ادز بصمات صوت...
-حيدر رااح اموت وعلى ابريني الذمة ولاتنساني ابدد اتذكرني بكل يوم بس لاتبچي علية خليني ذكرة حلوة بحياتك واذا متت والاطفال عاشو كبرهم بيدك لاتخليهم يعيشون العشتة ولاتصير مثل على من حزنة على امي لحگها وعافاني وحيدة بهاي الدنيا
الحي ابقى من الميت لاتنساني وعيش جهالنة ولاتجيبلهم زوجة اب مشية عليك اسد الزهرة
صيرلهم ام واب بس لاتعوفهم واحجيلهم عني دائما وكللهم صارت بالسمة حتى من يشتاقولي يشوفوني.
كللهم امكم تحبكم هواي وتعتذر على كولشي صار وهما بطني حيدر احبك والله هواي احبك لاتنساني وعيش حياتك عادي اتزوج بس كبر الجهال عيشهم طفولتهم لاتهملهم ابدد اذا سمعت هاي الرسالة ادعيلي.
ارجع واگولك انت اول شخص دخل گلبي وبدل نضام حياتي التعيس انت انقذتني من الوحده الرادت تخبلني هي وكلامهم اشكرك على كل يوم عشتة وياك و آسفة لان اذيتك هواي.
يبرالك حامي الحمة.
طلعت من صفحتة واتصلت بخالتي فتحت الخط و/+حجيت ودموعي شلال: -خاااالة الحگيلللي راااح اموووت.
وگع الموبايل من ايدي حتى ماسمعت صوتها صرت اتگلب بمكاني مثل السمچة المطلعينها من الشط ايدي راحت من العض اريد اكتم.
وجعي طيف امي مافارگني ابدد احسها يمي موجوده كلما اريد اصيح احس شي يمعني اصيح يمة يمكن لان مامتعودة اگول هاي الكلمة صحت بصوت ناصي.
-يمممة وينننج عنني راااح اموت ودااعت الزهرة.
رحت طلعت ملابس حيدر خليتها على وجهي احس گلبي راح يوگف درت وجهي شفت غزل واگفةوراي ومصدومة.
-غزززل راااح اااجيب طلللعي غراضي
مرت دقايق ودخلت خالتي حضنتها وادية ترجف مسحت وجهي حجت مطمنتني وجهة مخطوف لونة.
-تحملي لبوة ماضل شي تهون
-خالة ابريني الذمة تعبتج وياي يمكن ضوجتج بكلامي يوم من الأيام
-شتحجين ياماما اسكتي
انتبهت لشجن موجوده هي وهمس سلمت عليهن يمكن هذا سلام الوداع
-بنات ابرني الذمة ومو تنسني.
ندى: -اسكتي ماما يلله وحده تنزلها وياي وحدة تحضر غراضها.
نزلت ولاگيت خالتي بسمة جوة تبچي حضنتها وصرنة ثنينة نبچي اخذتني خالتي لدكتورتي حولتني للمستشفى گالت يسولج عملية اتصلت بالدكتورات وصتهم علية اخذتني خالتي للمستشفى ودموعي يصبن.
ندى: -اصررخي عيطي لاتسكتين شلون متحمللة الوجع شلون صرررخي
-ماگدر متعودة على السكتة.
بين ماوصلت اصابعي ماكلتهن اكل جابولي كرسي متحرك بس ماقبلت اگعد واحد يدفعني مشيت مشي ضهري صار نصين كل هذا وگلبي بصفحة.
لاحضت اهتمام الممرضات والدكتورات بية سوولي تحليلات وفحوصات جان مستشفى اهلي علمود الاهتمام...
مر الوقت وعيوني على الناس هسة يجي حيدر مستحيل يعوفني بمثل هيج شدة مارايدة منه شي بس اريد ترتاح روحي بشوفتة غطيت وجهي بادية من بعد ماگطعت الامل.
-ليش هيج حيدر مو گلت اخذ اجازة وينك عني.
خلال ساعتين تجمع الكل خالتي بسمة خطيه تعبانة وجاية اخوها وياها ومرت اخوها محد يرد وحشتي غير ملاذي اخذني الممرضات لبست ملابس العملية ودموعي تصب مامهتمة للوجع اكثر مامهتممة لشوفت حيدرا مااجة وهذا الزاد من نوحي
قبل لاادخل للعملية اجت همس لزمت ايدها ودموعي تصب دمع.
-ذمة برگبتج تگلين لحيدر لبوة انتظرتك تجي وتشوفك ولاتنسى تهتم بالجهال وتبريني الذمة وگليلة لبوة تحبك هوااية...
جانت هاي اخر كلماتي مو كل شخص يدخل هاي الغرفة يطلع منها عايش خليت اصابعي على گلبي وغمضت عيوني همست بين نفسي: - ادعولي اشوف جهالي بخير وسلامة.
جنت ادخل لهاي الغرفة بس دخلتي جانت بكل شموخ مو مثل اليوم اليوم اني المريضة مو الدكتوره
شعور ابد محلو ندبت اهل البيت كلهم وبعدها بنجوني و بدة مفعول البنچ...
همس: -
قبل لايدخلون لبوة للعمليات طلبت الدكتورة من امي توقع حتى تسوي العملية اخذت الورقة اقرا بيها عکدت حاجبي وباوعت للدكتورة رفعت الورقة بيدي: -شنو هذا الخرط؟!
-عزيزتي هاي شروط العملية اذا ماوقعتو ماتم العملية
-وشروط العملية هيج؟ يعني تموت عادي!
-كولشي يصير امي اولا هذا الحمل الاول الها وثانيا حامل بطفلين واضافة الى قلبها كولش تعبان نأدي واجبنة واليصير احنة مامسؤلين عنة.
باوعت لامي وجهة اصفرر اخذت الورقة وقعت عليها ردت احجي جرتني امي وطلعتني.
-ماما شلون توقعين خل ناخذها لغير مستشفى بلة صار بيها شي اذا هما من هسة حجو
-اسكتي همسة اسكتي كل مستشفى يخلون
احتمالات وشروط لازم احد اقارب المريض يوقع عليهن.
عفت امي ومشيت لگيتها گاعدة بس دموعها تصب عجيب اباوع للنسوان الصريخ والصوت يشگ الاذن بس هي ابد حتى هنا هادئة وصتني دخلت للعمليات وبقينة كلنة منتظرين ندعليها مرت ساعتين والموبايلات احترگ على ام حيدر...
مشة الوقت ودكاترة تدخل وتطلع ورة ماعرف شگد طلعن الممرضات كل وحدة شايلة طفل بيدها كلنة گمنة نشوفهم لافاتهم بجرجف مايبين شي منهم صغار واحد يصرخ والثاني ساكت كلها كامت تبجي انترس المستشفى بالهلاهل اخذنهن للخدج وبقت لبوة جوة رن موبايل ام حيدر فتحتة واحسة طايرة من الفرح.
-الووو ووولك يمة صارر عندك ثنين وليداات صلواات على محمد. بعدهاا مامطلعينهاا
خوش يمة بعيووني.
طلعت ممرضة تركض شوية ورجعت هي وثنين دكاترة كبار واحنة مثل الاطرش بالزفة تقريباً بعد ساعة طلعو مجموعه مال دكاترة رحنة نسألهم على صحتها.
ندى: -شلونها مريضتنة؟
-زال الخطر عنها
ندى: -شوكت نگدر نشوفها
-بعد بعد ميصير هسه
مرت ساعة واجة حيدر بملابسة العكسرية وجهة دخااان گامت امة سلمت علية.
-لبووة شلونهااا زينة وين هسة هي؟
بسمة: -بالغرفة يوم
-اريد اشوفهاا.
راح راد يدخل والممرضة منعتة عاط بيها بصوت خلاها خلست: -مررررتي اررريد اشوووفهااا ماااتت
وووين راااحت
-بس ميصير والله مخليلها اجهزة گلبها تعبان هسه بس يفل البنج وادخل شوفها
-لا اله الا الله
بقت امة تمسد على ضهرة وهو من التوتر رجلية شالن الكاشي حتى اني توترت وياة حجةةوياة خالة
-چا ماتريد تشوف ولدك
طفر من مكانة مثل الناسي راح يشوفهم رجع عيونة حمررر شوية واجت الدكتورة دخلت وطلعت مبتسمة باوعت لحيدر واشرت.
-اكيد انت زوجها
هز براسة ضحكت وگالت: -تگدرون تشوفونها هسه مادام البنج فكها.
دخل هو وامي واني شصاير بحالها جهاز قلب مشكلينة الها گعد حيدر يمها و لزم ايدها يبوس بيها منطينة ضهرة ورة دقائق صارت تحجي بصوت مسموع بس اكيد مو بوعيها هاي فرصتي الزم عليها لزمة فتحت كامرة وصرت اصورها فيديو جانت مغمضة عيونها ودموعها تصب وتحجي.
-ااااه يا كسر الابو محد يجبره
گبره مو بلگاع كون بصدري احفره
فاگدينك.
احنه كلش فاگدينك.
من غبت ما گمنه نلتم!
واعتزلنه الگعده ذيچ
ومره اذكر.
بيك نحچي ومن وصلنه لحرف اسمك: هَب حنينك!
انتَ وينك؟
لا قريب ونعتنيلك.
لا تجي ونلمحها عينك. فاگدينك
مرت ايام وراحت واني منتظرة لفيياك
لااجيت وبردت گلبي بهواك
ولا گطعت الضن بجيتك
و روحي ضلت محتارة بچفاك
علي على أتدري من الي!
طاوقني الخطر من كل جانب فصحت باعلى صوتي
انة موجود لايتركني.
انت موجود
باعماق روحي
حيث هناك لايصيبك حزن او آلم لا يأتيك برد او حر.
كن هناك ولتستقر روحك بسلام يا والدي.
عجيب شلون تحجي يکول شخص گدامها تسولف وياة امي گلبتها مناحة وحتى اني دموعي صارن يتسابقن حتى بهذا وضعج مانسيتي ابوج شنو من علاقة شمسويلها حتى يبقى ببالها بكل الاوقات.
مرة لکيت موبايلها مفتوح صار عندي فضول اشوف شبية دخلت لگيتة تارستة كلة عبارات واشعار حزينه عن الاب رغم هذا ولا مرة شفتها نشرت شي يخصة او يعبر عن البداخلها من يومها تأكدت اقدس العلاقات علاقة الاب وبنتة.
طلعت يم شجن و لبوة على وضعها مجرد فتحت عيونها ضربوها ابرة نيمتها مرت ساعتين اجة ابوي اخذنة بقت امي يمها.
الم مخلوط بسعادة غزت روحي وگلبي الينغزني
رب العالمين كاتبلي عمر ورجعت من جديد للحياة
بعد ماشفت الموت الاحمر بعيوني...
فتحت عيوني شفت حيدر گبالي غمضتهن اكيد جاي يتهيئلي حسيت بدموع تنزل على ايدي تاكدت بية جاي بس ماگدر احجي احس آلم موتني.
احس بية يبوس بيدي شهل محنة الشايلها احسة مثل والدي بحنانة واهتمامة كسبني وخلاني اعشقة.
شما احجي مستحيل اوصف شعوري كل العبارت الردت اشكر بيها ربي ماتوفي بالغرض صارت عندي عائلة كاملة دموعي مختلطة بالم قوي عبرن عن شكري وامتناني لعطايا الرب...
انطوني ابر قوية خلتني انام گعدت على اثر الم خفيف ابتسمت من شفت حيدر گاعد يم راسي وتقرب علية قبلني براسي ونزل على خدودي قبلهن و مسح عليهن بيدة الدافية.
حيدر: -روحي وراحتي شلونج؟
-انت شلونك؟
-انة اصير بخير من اشوفج صرتي زينه على الابرة؟
-اي خدرتني ماحس بالالم
رفع ايدي وقبلها: - اسف لان ماجيت من وكت
-عادي اصلا لو جنت موجود جان شبعت حرگان گلب من كلامي
گرصني بفخذي: -اخخخ
- ردت اسوي حادث من وراج اكو وحده عاقلة تحجي هذا الحجي وين مودينج يحاربون بيج سودنتيني خليتيني مثل الثور يروح منا ومنا لو مامنطيني اجازة گلبتها فوگ راسهم
-ههه اسفة بس ردت اسمع صوتك مامصدگة عشت تدري اني متت ورجعت للحياة من جديد
-سودة بوجهي ردت اكلج بية ولا بيج بس اتذكرت.
-هههه لحگت على روحك
-ريحانتي مشتاگلچ بگد رحمة الله الجبيرة
-حتى اني وعلي
ضم راسي لصدرة نزلت دموعي ضربني على راسي بخفة: -الجو بارد لاتبلليني ترة انشل وعلي
مسحت وجهي جني طفل بس ابچي بعدت عنة باوعت بعيونة التعبانات: -وين على وآدم؟
-نايمين اروح اجيبهم الج
-ياريت اريد اشوفهم
-تسودنت من شفتهم يخبلون يشبهونج
لزمت خشمة ولويتة: - كون مثل خشمك
-بسسس
-ههههه لا اجذب كون يشبهونك كلك.
-لاعمي وين مايشبوهوني تدرين ينطون شبهة لجلال
-جلال!
-اي وماخذين ملامح ابو جدر وعگروگة هاي لان مگابلهم وانتي تخابريني ههه
-ياا امشي جيبهم راح يروح مفعول الابرة بعد حتى مااحجي
-تطرديني على مود ولدج افاا هيج صارت من هسة فضلتيهم علية
-انت الاصل حيدور رور رور
-انچبي
-لا والله
-وداعت عبدالله
-كوم جيبهن حباب بدون شقة والله المفعول راح ينتهي واحير بروحي
-گايم يروحي.
طلع حيدر يجيبهم متلهفة لشوفتهم اريد اشوف شكل الكائن الشاركني بهواي مواقف حزن فرح خبال يبوو هسة شيگولون عني ماخليت لروحي هيبة گدام جهالي هههه دخل حيدر مخليهم بعربانة صغار حيل ولافهم مايبين شي منهم ردت اگوم ولزمت بطني.
حيدر: -على كيفج هسة انطيهم الج لاتتحركين
مسحت دموعي انطاني حيدر طفل صغير مغمض عيونة سبحان الخالق يجنن صغير وهادء بس يتنفس.
اي صوت ماالة صرت اضحك وابجي بوستة برقة اخاف علية جان مگمط فتحت الگماط على كيفي وحيدر يضحك عليه: -شهل فهاوة للصبح الا تفتحين گماطة
-لا اخاف يصير بيه شي من افتحة
-ههههههههههههه بس ادري شلون تسبحينهم وتوكليهم
-حيدر اسكت حباب خل اشوف شغلي
طلعت ايدة دافية سادها بقوة خليتها بين ادية صغيرة شميتها ريحتها تجنن صرت امرر اصبعي على خدة الناعم انتبهت للثاني يصرخ بصوت عالي عكس هذا.
حيدر: -هذا وكح اسم الله شبيك يابوية
انطانياه حيدر يشبة اخوة بس هذا عصبي وادية يريد يطلعهن من الگماط لا ومفتح عيونة لزمت ايد حيدر واني طايرة من الفرح.
-حيدر حيدر شوف عيونة
-هههههه نفس لون عيونج
لونهن يجنن هيج اخضرر رغم بعدة صغير لكن واضحات مفتح عيونة على وسعهن سويتله مثل ماسويت لاخوة بس يصرخ والله حرت وياة صرت ارجف عبالي بية شي.
-حيدر كلي شسوي فدوة شبية يبجي.
-بس لو ادري المراهقات شلون يصيرن امهات هاي انتي وهيج
طلع من الجرار حليب وترمز مي مدري منو الجايبة بما انو اني نايمة مشتريلهم حليب سوة ممة وانطانياها ارضعة واني بس اضحك شلون يرضع بعصبية.
-اگولك هذا عصبي مبين
-طالع عليج
-لا وين هذا الثاني طالع علية هادء اكولك منو على ومنو آدم؟
-الوكح على والهادء ادم
-هههه هذا البيدي على يلا لاتفرق من هسه سوي بعد ممة ل آدم
-نسيت يدلل ادومي.
سواله حيدر ممة: -حيدر نطينياه ارضعة حباب
-مو عندج علي
-ثنينهم ارضعهم سوة حباب
-شتعل روح الحباب
خلاهم ثنينهم على صدري اباوع لتفاصيل آدم واضحك رضعتة ممة شوية فتح عيونة صحت بصوت عالي: -حيدرر تعال شوف عيونة
اجة حيدر ماد راسة ثنينه مترقبين يفتحن ماكو مو كلش فاتحهن: -فدوة حباب فتحهن اذا تحب مامي
-وبابي وياك
-اي عفية ثنينة
-اگلج شو هذا مايحبنة من هسه بانت حقيقتة
-لايحبنه هسه يفتحهن.
بقينة مترقبين يفتح عيونة فتحهن وجانت الصدمة وحده من عيونها لونها اصفر والثانية اخضر فتحت حلگي على عرضة وحيدر خنس.
حيدر: -عجيب شلون عيون يخبلن شهل تميزز ياربي
حتى نفرق بينهم لو شنو؟
-لا هذا خلل بس حلو
-يجنن ريحانتي يجنن
جعص وجهي بيدة وباسني صحت بية: -منا الاطفال عيب
-هسه اني شمسوي هي بوسة ام اللطگة
-من هسه حيدر حتى بوسة غير عادية لاتبوسني گدامهم من يكبرون يصيرون منحرفين.
-احترگت روح حيدر شهل جمال ولد الحبابة شوفو ابوكم شگد داراكم انگطعت عنة الكهرباء والماء وما حجة شي لخاطركم بعد شتريدون
- عود شنو تعيرهم لو مسوي فضل
-لاتدخلين اني ووليداتي
-ووليداتي هم
-على كيفج بوية اني راح اروح
-وين؟
-الم جوالاتي واشوفلي ديرة لو اتزوج بالمتعة على گولتج بعد محد يريدني صار عندج ولد واني الك الله يعبدالله صرت بالبباي
- وطني و ملاذي وبيتي ومسكني وروحي وراحتي ودنيتي وعافيتي و.
ماخلاني اكمل قاطعني بقبلة كلها شغف دفعتة شويه
وكرصتة من زندة صاح بصوت عالي: -اخخخخ
-هاا شبيك
-ياهو الگرصني جدي
-يمكن
-زيطة
-اهوو ترة راح ازعل اني والجهال
-دخيلك ياعلي بس لانتعارك وتاخذينهم وتسافرين بيهم صخااام الصخمني باااگت جهااالي لبووة شکول عليج
-شدگول؟
-اعشگنج
-شكراً شكراً عزيزي
-اشتعل عزيزج واشتعل گلبة
-ليش تسب روحك خو سب محمود
-ذكرتيني هم صدك ليش اسبب روحي اشتعل محمود الگو
-الجهال الجهال.
-منا ورايح داخلين بانذار مانبوس ولانگرص ولا نحجي وتالي وياكم
دخلت خالتي ندى و بسمة فرحتهن ماتنوصف بقينة يوم كامل وطلعونه اول مادخلنة للبيت حيدر ذبح ثنين ثيران هو وجماعتة طلعو يوزعونة وشعلو الجو بالرمي البيت كلة مزين بالون الازرگ گعدت بغرفة خالتي لان غرفتي فوگ ماگدر اصعد.
رغم العملية واذيتها لكن ماهمتني فرحتي بعوضي ماتنوصف ماگدر اعبر بكلام بس دموعي بحيث اذا ابقى وحدي اگلبها مناحة بالبچي دخل حيدر شافني منيمة الجهال بصفي وابچي شگ قميصة وضل يلطم على راسة.
-احااا حاا احاا حيل ابچي حيل بعد بيتي عيونج راح يصير بيهن جفاف من ورة البچي
-ماباچية شبيك وياي
-جا ذني شسمينهن
-مي غريب
-الله اكبرر حتى المي غريب بهاي الدنيا سودة بويهييي تعال بوية اني اصيرلك اب وي جهالي بس لاتضل غريب.
-على كيفك هشام الذهبي اكولك صدوك ليش مانسوي مثل هشام الذهبي ندور على الجهال المشمورين بالشارع ونجيبهم نربيهم وي جهالنة وانت مو تجيك شكاوي تعنيف لو اهل ميتين وباقية جهالهم جيبهم لبيتنة ونكبرهم ويصير عدنة بيت متروس جهال ااااالله خوش فكرة
-الخوش فكرة اجي.؟
بقة ياشر على حلگة بمعنى ابوسج بس مايگول گدام الجهال متت ضحك وعمليتي کامت علية صرت ابچي من الوجع.
-احترگت روحك محمود جنك اوباما بصغرة مايودون عليك الولايات وتخلصنة منك سبع بلوكات اشمر وراك بس جفيني شرك وشر الخلفوك
-ووولك كااافي لاتضحكني عمليتي
-هسة اني شگايل وتضحكين مو جاي اسب واحرگ بالگالعدنة وين الضحك بالسالفه
-اطلع بره
-هلو شني هاي تطردينني!
-اي نريد نعيش بسلام
-تريدين تعيشيننن وي سلاااام منينن هذا خفتان
گليلي ولج لااحرگ البيت وداعت حمدية ام اللبن
-سلام سلام يعني امان وهكذا
-اريد من الهكذا.
-نو نو لاتفكر
شوية ودخلت خالتي بيدها صينية اكل اشرت لحيدر بحواجبي عض شفتة وهز راسة بوعيد اخذ الصينية من امة واجة ياكل وياي خطيه بعد يومين يرجع يلتحق بيوم التحاقة الليل كله مانام يبوسني ويرجع يبوسهم وهكذا منا لمن صحت بية.
-كااافي امي
-مو كافي ماماتي الحاتة
-هاا هاا بديت تدخل اللفاظ سوقية للبيت
-كلني الفاظ سوقية بس اني مااحجي گدامج
-انتة بكيفك تحجي غير اعوفك واطفر تعرفني تلعب نفسي من هيج الفاظ.
-جا غشيم اني مسيطر على الساني گوة
-شاطر غير
-الشاطر ماالة بسبوسة
-هههه اله
التحق حيدر كوة مشة وعلى وادم زينين نوعا ما على كولش وكح مخبلني اليل والنهار يصرخ اخذتة
خالتي للدكتور كال مابية شي وكاحة بس ادم حبيبي ملك الهدوء ابد مامعذبني حتى لو يصرخ على كيف.
شالوني على كفوف الراحة الكل طاير من الفرح خو البنات ازل تجي من الجامعة كبل لغرفتي هي وغزل غزل تقرة يمهم تگول يسولي جو وخالتي النهار كله تناغيهم وتسولف وياهم شكد افرح من اشوف الكل فرحان بوجود هالجوهرتين.
بقينة اني وحيدر على اتصال عاقبوة لان عايف الواجب خطيه شصاير بية ومخلصها بس يشتم ويسب بيهم طلع اربعيني وهو بعدة ماجاي...
عمليتي صارت زينة گمت اشتغل طبيعي وعلى وادم نشنشو عندي ادم اسمن من على يمة يعلي شالع گلبي شلع ردت اسبحهم صح بالبداية ماعرف خالتي تسبحهم بس بعدين تعلمت جنت اخاف يوگع واحد منهم ويصير بي شي بس هسة لا ماخاف.
الجو جان بارد يگص گص فكرت بحيدر اتصلت بية ماكو دزيتلة رسالة يلبس قمصلة رحت جبت مي دافي وطشت گعدت اسبحهم بالغرفة سبحت ادم لان بسرعة ومايتعبني نشفتة وبودرتة لبستة ملابس شتوية وجواريب بوستة ورجعتة لفراشة اخذت علي
بعدني انزع بملابسة جلب بشعري ويجر بية احس شعري تگطع گوة فتحت ايدة عصبي وجهة احمر.
-بسيطة بس تكبر شوية الا املص اذاناتك فوگ مااسبحك ابو الوصخ اني مو امك ليش تضربني ماتستحي ماعندك حية حضوري اثاري طلعت انت المشبعني رفسات بسيطة ياعلي اني اعلمك الزم شعري وشوف حذرتك ضرب لاتضربني افتهمت.
التفتت لصوت الضحك وراي شفتة حيدر: -ترة بعدة صغير ليش هيج تحجين وياة
-يتعود يضربني من هسة
خليت على على فراشة ورحت لحيدر حضني وصدرة يهتز: -شبيك تضحك
-هسة تأكدت تحبيني اكثر من ولدج.
-كلكم احبكم بنفس الطريقة والله
-واضح
حجاها وعض شفتة استقبلني بطريقتة الخاصة
-كافي اريد اسبح على خطية بدون ملابس
-ههههههههههههه ولج عايفته مصلخ وملتهية وياي
-يعني شلون غير صارلي فترة كلش كلش طويلة مشايفتك ياعيني
-خوش چا اليوم اريد اكل دسم.
-ادلل بس اسبح على انزل اسويلك اطيب اكل
-تؤ تؤ موقصدي طبخ بنيتي
-بس لا تصير سرسري
-اشو تغلطين ولسانج طولان صاير اطول من قندرة اوباما
-ياا مو چانت قندرة بوش.
-راح زمن بوش اجة زمن اوباما يلا ولي خل اشوف جهالي نبض گلبي
-اتغزل بيهم واني لا ترة ازعل واغار يلا اني مزاعلتك راح اولي
-لبوتنة الحلوة الحبابة ترگصّ رگصّ آلَخِشُآبًةّ هز يالگمر شعر شعر يلا بنيتي ارگصي عجل عجل
-لا والله تريدني اصير فيفي عبدة عوزني
-بيها حجاية بس
-منا الجهال
-اخخخخ يلجهال.
ضحكت على كلامه ورحت اسبح على لفيتة بمنشفة ولبسته ملابسة اخذاه حيدر مني ويلعب بية وادم بحضنة يلعب بقميصة عفتهم يلعبون اخذت الهم صور بدون مايدرون رحت طلعت ملابس لحيدر خليتهن بالحمام.
-يلا عيني ابو الشباب روح اسبح
-عوفيني العب وياهم بعدين اسبح
-براحتك.
اخذت جنطتة وطلعت ملابسة غسلتهن ونزلت جوة البنات بالدوام بس خالتي راحت نامت طلعت لحم سلگته وصعدت فوک حيدر داخل يسبح ومخلي على وادم واحد بصف الثاني على صاعد فوگ ادم وطايحلة دگ رغم صغير كلش بس وكحح عكس ادم شوية سمين يبين عمرة اربع اشهر عطت بية وشلتة من فوگ اخوة صدوك يعصبني ضربتة بطرف ايدي على كيف: -ليشش تضرب اخوووك شمسويلك امي.
اشو هذا فحط من بچي بيدي طلع حيدر لاف المنشفة يركض عبالة بيهم شي، لکة على فحطان
حيدر: -شبية شسويتيلة
-مامسويتلة شي بس حجيت وياه
اخذاه مني وصار يهز بية شوية سكت باوعلي حيدر مخنزر: -ضربتية
-لا
-لاتجذبين كولي الصدك
-ماضربتة بس جان يضرب باخوة وسويتلة هيج بيدي على كيف
-لا على كيف ولا حيل بعد لاتضربينهم ااافتهمتي
-شلون اضربهم غير اطفالي گتلك جاي اتشاقة شگلولك علية لهل درجة ماعندي رحمة اضرب طفل.
عفتة ونزلت دمعتي بطرف عيني طلعت بالحديقة اكو زاوية ورة المرجوحة ختلت بيها كورت على روحي و دموعي تصب الجو بااارد وملابسي خفاف
ولاشال لابسة احس حرارة تطلع من وجهي انهضمت من كلامة معقولة يصدك اني اضرب ابني بس على هيج على اقل شي يبچي مرات من لاشي.
بقيت على گعدتي بالنص ساعة اذاني تجمدت بعد ماحس بشي اسمع صوتة يصيح بأسمي ماردت اشوفة ولااحجي وياة حيل حز بخاطري منه دموعي بللن ملابسي حسيت بية گدامي.
-شعندددج گاااعدة هنااا بهلللل برررد ااامشي ااادخلي جووة
-وانت شعليك بية ماادخل عاجبني ابقة هناا يلا رررروح
-گووومي لاتسودنيني رااح تتمرضينن گوومي ياضيم گلللبي
-مااا اكوووم يلا رررروح
بقيت على گعدتي ماحس بية الا شالني صرت اضرب، بية ينزلني: -نززززلني نززززلني
-شگيتي اااذني مانززلج
راد يصعدني لغرفتي صحت بية: -وووحق الحققق الجدررر احترررگ
-يااا صخم الصخمني
-خليت اللحم على الطباخ من زمان راح احترگ.
نزلني رحت للمطبخ امسح بوجهي جذب، الجدر تارستة مي بس اريدة يعوفني طلعت خاشوگة وصرت اخوط بالجدر سحب الخاشوگة من ايدي ودارني علية لزم وجهي وقرب وجهة علية انفاسنة اختلطت دنکت عيوني عنة.
-وجهج باارد شبيج تخبلتي گاعدة بالبرد صدك تحجين من كل عقلج شاردة بهل جو البارد
-اي
-ليش ماتباوعين بوجهي ريحانة شبيج زعلتي!
-حيللل
-چا اني شگلت وزعلتي؟
-لاماكلت شي اني اعتذر منك اذا تريد
-عليج القرآن زعلتي عليمن.
-اااني اضرررب ابني حيدررر ااابني هذا شلون اضربة وهو ياريت جبير طفللل جهال العالم احبهم واعطف عليهمم لعد اطفالي شلون! وانت جايني تزمخ بوجهي تحسسني فعلاً ضاربتة
-اعتذر مو قصدي البالج ابد شني اني ماعرفج هو اني زلمة شكبراتني جني بعير وتخافين علية غلطنة ومنج السماح بنيتي
-مامسامحتك يلا عوووفني
-اعوفج من ترضين.
راد يبوسني صرت ادفع بية ماكو قفل وتجي غزل من المدرسة هي شافتنة وطگتها ركضة مت بدمي هسه شلون احجي وياها اني من النوع كولش استحي من هيج سوالف حتى لو سمر وزينة يحجن بهيج مواضيع اني اطلع من المحادثه.
-ارررتاحيت فوگ حگة دگة زززعلانة منك ولاحگني تبووس بية انت ماتستحي ماعندك حية حضوري
-ابدد اذا تريديني انزع هدومي واطلع بالشارع
-يععع شسوي طالع بالشارع بهيج منظر
-حتى اجذب البنات بعضلاتي.
-طاح حض البنات التباوع لهيج شكولات
-وطاح حضج وياهن لان تباوعين علية
-اوفف يلا اطلع روح يم الجهال
-نطلع سوة لو تنطيني ست بوسات
-راح انطيك عشر، بوسات
سحبت الجفجير وطکيت رگبتي دليل على راح اعارك: -ستة لو عشرة؟
-الخير ومدت ايدة
ضربتة على كتفة بالجفجير صاح بية: -هاااي مو عداالة ااااوكفي
انخلست من صوتة عبالي راح يكتلني بس شحدة اشو هذا سحب الچمچة وفتح رجلية وحدة ليورة وحدة ليگدام ومقلص عيونة مثل ذولة اليدربون.
فكيت حلگي وهزيت بيدي: -هي بهي عبالي شسوي رجعت على الچمچة
-انتي الدگيتي طبول الحرب فالتبدأ المعركة اااالله اكبرررر
يمة شبية رجلي صارت طاح طيح هو يضرب، الجفجير مالتي بچمچتة واني هم ارجع اضربة
-اذا، طاح چفچيرج تخسرين خوش
-خوش خوش إن شاءلله النصر حليفي
-خاب گووومي ام حلگ النصر من جماعتي العزاز
-نشووف.
اليشوفنة خارج البيت ويشوفنة بالبيت يلطم على راسة حيدر الشخصيه بحيث كلة نضرات الضابط الهمام واني الدكتوره النبيلة ومن نجتمع تطلع سوادينة على کولتة متت ضحك انوب صار يضرب قوي الچفچير راح يكسرة.
-خاب على كيفك وياي
-هذا الحجي كولية بالغرفة
-يااا
-وجعااا بگلب دويعش
-هههههههههه كااافي يلا
-النصررر ام الشهااادة.
بس سكت وانكسرت الچمچة بيدة بقت بس اليدة مالتها سكتنة واحد يباوع بوجة الثاني طكيتها ضحكة متت ماتحملت المنظرر طحت بالگاع من الضحك وهو جاب الراسية يريد يلزگها احس گلبي راح يوگف من اشوف شكلة.
-ههههههههههههههه هذا دويعش عم عليك
-احترگوو بناررر ونفط انكسرت بيش نصب المرق ياعزيزتي
-ههههههههههههههه بالچفچيررر
-غير تسكت ام البلة كله من ورة راسچ المصفح
-هههههههههه احسن من راسك جاي بالطول.
-انچبي يلة خسرتي نفذي شرطج بوسسس
-ههههههه مو هي بكيفك سلاحك كسرته يعني خسرت يلة ولي روح شوف الجهال
-راح اروح بس اني اعلمج ورة الغدة
-ورة الغدة غسل مواعين اذا تحب تشاركني
- امشي زيطة
فحطت من الضحك على تصرفاتة الجنونية رحت اسوي الغدة شلت الچمچة المكسورة ضميتها طلعت خضرة گعدت الگط بيها دخلت غزل مبدلة ملابسها ابتسمت بوجهة: -الله يساعدج حبيبتي
-ويساعدج لبلب
-اي شلونج بمتحان الفيزياء العضيمة؟
-هاي المدرسة الجلبة جابتلنة اسئلة خارجية على شنو تتعلمون على النمط الوزاري طاح حضها
-لا دادة ميصير تغلطين على الاكبر منج تبقى مدرسة وانتي طالبة ولاتنسين لولا المعلم ماوصلنة ولا وصلت هاي الاجيال المعلم مربي الاجيال لاتحجين على الكادر التدريسي اني جنت اسبهن عينك عينك وهسه متندمة بگد شعر راسي
-عزااا تسبين المدرسة
-اي مسويتها هواي ومرة المديرة وفصلتني
-يمة ليش ولج ماتخافين.
-لا ابد بس جانن هنة يعيلن بية بحيث يجن الطالبات لو يتنمرن علية لو يشگگن دفاتري ومن اروح اشتكي عليهن محد يسويلهن شي ويرجعن من جديد فاني ابد مااسكت انتفهن تنتف خمسة مايگدرني يييي شذكرتيني.
-عليج الله شيصيير بعدين؟
-ياخذوني للادارة ترزلني المديرة اسكت بس اليعيرني باهلي ابد مااسكت اتسودن بس واحد يجيب طاريهم يمكن بالاربع مرات فصلوني هاي بس بالابتدائية بعدين يرجعوني بس مرة بالمتوسطة المديرة غلطت عليه واستهزئت بية ماتحملت غلطت عليها وفصلتني نهائي لو ما الشيخ حتى المدارس ماقبلتني
-يمة منج وگحة.
-ابد والله لا وگحة ولاهاي بحيث اهدء واشطر طالبة بالمدرسة مو الصف ابد مااحجي بس المدرسة تسألني اجاوب وارجع اسكت صوتي محد يسمعه
ولااختلط بالبنات تحسيني فاصلة عن العالم قمة بالهدوء وكل سنة اطلع الاولى بس اليدوس على طرفي انعل الساعه السودة الشافني بيها
-ههههه والله شخصية هسه ادم طالع عليج
-اي هيج جنت ابد ماحجي ولازلت بس الناس الاعرفهم اتبدل وياهم.
-اكول حيدر شوكت اجة؟
-قبل ثلت ساعات تقريباً ليش تسألين؟
-شفت جلال يم المدرسة
-يا مدرسة!
-شبيج مدرستنا واگف بسيارتة من مشيت الا راح
-ياا شعندة يم المدرسة!
-مادري بس يمكن خطيبتة ويانة بالمدرسة
-انتي گلتي من رحتي الا مشة ومحد جان وياة
-اي
-اوفف مادري يمكن عنده شغل
-حتى اني هيج گلت اكولج هاي ازل هيج تتاخر؟
-اي لان خط ومحاضرات الله يسهللهة
-إن شاءلله اساعدج بشي
-لايگلبي خلصت روحي ارتاحي بين مااصب الاكل.
نصيت التمن وصعدت فوک لگيت حيدر نايم ومخلي منا ادم ومنا على رحت بست ادم ورجعت بست على وبست حيدر طلع گاعد جرني علية: -الاكل استوة بعد روحي
-جوعانج
-الجهاااال بالنص
-خفة هالصوت مفضوحة دومج وزمانج حسرة علية البوسة هاي البوسة حررام شلون يحجون الواحد خدودها يريدن يطگن وشفايفها حمرر واليلزمها تنعل يوم يومة
-ديلا كوم خل اغدي الملائكة
-عود انتي عندج احساس؟
-لأ والله
-زين ومعترفة عبالي تگولين اني ملكة الاحساس.
-لاتخاف ماحب انسب صفة إلى بدون مااملكها
ضربني ونزل سويت ثنين ممات رضعتهم ونيمتهم الساني راح واني اگول: -دللول يمة يلولد دللول عدوك غريب وتارس الچول
جنت اسمع هاي العبارة من بيبي زمرد وفاطمة وسعاد يحجنها لاطفالهن اذا رادن ينومن جهالهن بس للاسف انحرمت منها نامو وليداتي ونزلت لگيت حيدر يصب غدة وكفت بباب المطبخ وكتفت ادية عيوني تتأملة...
-هاا ولج اشو تباوعيلي شعندج گولي من الاخير.
-زوجي وابو جهالي حرام اذا باوعتله
-اي حرام بعد لاتباوعين علية اتقي ربج شوية وعلى المؤمنات ان يغضن ابصارهن
اخذت الماعون من ايدة وقبلتة: -ادري انت ليش حباب هيج
-وانتي ليش هيج حاتة وتموعين بهلبرد
-كافي مو وقتها خل نصب المرق
-اي صبي عيني بيش تصبين اذا الچمچة كسرتيها يمممممة وووولج يممممة الحگي لمطبخججج يمممممة
-يااا شبيك تسودنت ليش تصيح لخالتي
دخلت خالتي تفرگ بعيونها جانت نايمة: -هاا ولك شبيك؟
-يمة هاي جنتج مهملة شوفي كسرت الچمچة بعد بيش نصب مرگ يمة اطرديها من المطبخ خسريها فلوس تعاي اكتليها تلعب بغراضج شناوات
بسمة: -فداها البيت گدامها علمود چمچة احاجي جنينتي خاب شمالك تسودنت وين نلگة مثل لبلابة شايلتنة شيل
-يمة هاي مسويتلج سحر ياباني اني اخذتها ورحنة لام حبذ سوينالج سحر
-من جذبك وين اكو سحر ياباني
-اكو كلشي اكو ها يمة هسة ماتحاجينها
-لا
-ولا حتى شوية
-ولا حتى شوية.
-خالتي حبيبتي فلذة كبدي تحوبني
-شفتيها يمة شلون تتماوع بحجايتهة
-ياا شبيك وياي
بسمة: -ولك حويدر اكعد خل البت تصب نريد ناكل
رجعت اصب وهو عيونة علية يحجي بالنضرات امة تحجي وياة ولايمها كعدنة نتغدة واجت ازل من الجامعه سلمت على حيدر وكعدت تاكل.
-اي بوية ازل شلونج بالجامعة شلونها الجامعة وياج
كلنة ضحكنة خو اني بلکوة مسيطرة كل ماتذكر انكسرت الچمچة اغص ضحك.
حيدر: -هسه شبيك تضحكين مو نعمة گدامج يابوية.
-هههههه لاهيج اجت سااالفة بالي
-قديمه لو جديده؟
-كسر الفنين عيوني
-اكلي اكلي بنيتي وراج زعاطيط
كمت من مكاني ماگدر اتحمل اكثر من هيج طلعت برة شبعت ضحك صاح علية: -ومال الثووول بعددج تضحكيننن خااايبة گلللبج
من صدك فحطت صعدت لغرفتي بوست العصافير النايمة وبقيت اتاملهم وهما نايمين طيور مو اطفال.
نزلت سويت جاي صبيتلهم وغسلت المواعين صعدت لغرفتي لگيت حيدر متلفلف بالبطانية طلعتلي ملابس ورحت سبحت مشطت شعري بسرعه ولفيته لا انشل سحبت البطانية من حيدر مچلب بيه همست بصوت ناصي...
-شبيك اريد انام بردت.
سحبني علية وغطاني وياة خلة راسي على صدرة ماحسيت الا على صوت على يبچي گعدت لگيت حيدرا يلعب بادم وعلى بحضنة يصرخ نزلت اخذت على منه مايسكت اخذاة مني وانطاني ادم حمامة ادم لايبجي ولا يخبث بوستة يجنن خدودة حمر جنهن تفاحات وعيونه مخلياتة مميز...
ورة ولادتي اجوي بيت خالهم يباركولي من شافن ادم الحقيرة گالت بمياعة: -هذا ابنج عيونة تك وتك.
كلت بگلبي مو هو مثلج نعال حتى تك وتك والله لو مو الحجية جا سحلت بيها البيت سحل ادري اني باتمان ههه.
نزلت الجهال لخالتي تلعب عليهم رحت اسوي ل ازل تقارير وهي راحت تقرا كملتة ورحت اراويها
-ها شوفي شلونة
-لج شنو هذا يجنن شوف الخط والترتيب شكراً حبيبتي
-العفو يابة من ماعندج وقت تعالي اكتبلج.
صار الغروب والجو بية مطرة اليوم مغيم رحت اسوي عشة سويتلهم لفات وبيتزا اشياء خفيفة رجع حيدر عفتهم يتعشون مااشتهي صعدت بدلت لوليداتي وگمططتهم رضعتهم ونامو متعودين ينامون من وقت تعبت شكد الا نضمتلهم الوقت جان على يگعد بنص الليل والنهار نايم هسه مرتاحة.
فتحت الشباك الجو يکص گص والدنيا تمطر عفست وجهي وسديتة نزلت جوة رادت غزل تغسل المواعين ماقبلت خطية الدراسة صعبة اذا عدهن دوام اگضي كل الشغل بوحدي غسلتهن وطلعت بالطارمة.
اجواء شتوية بااااردة والمطر يطلع صوت من ينزل بقيت اراقب بعيوني نزول المطر رجعت للسنة الفاتت.
جنت اتكأب مو بس اخاف من هيج اجواء البيت يصير يخوف واني وحدي والكهرباء تطفة يبقى بس صوت الرعد يزرف اذني شلون ايام مسحت الدمعة النزلت من شفت حيدر اجة كومني وحضني
-شسوين هنا بهلبرد؟
-احبك
-هههه خوش حجي البرد اثر عليج
-شعلية البرد اني من زمان احبك
-خاب حتى اني وعلى من ززززمان احبنج واريدنج
-صرت شويب
-هسه اراويج الشويب شيسوي
-اشاقة اشاقة
-ماكو شقة.
مرت فترة وحيدر التحق ومن بعدها رجع لدوامة شفنة وجهة الله عصافيري كبرو شوية خلصت السنة الدراسية للبنات غزل خطيه منتظرين نتيجتها تطلع
اجة حيدر من الدوام طلعتلة ملابس ونزلت سويتلة غدة وصعدت لگيتة يلعب وي الجهال مجلبين بية وعلى يحجي بالسرياني وادم بس يباوع لابوة وحيدر يستمع الة واذا سكت يگلة اي كمل ابتسمت على منظرهم يرد الروح...
-يلا ابو ادم تعال تغدة
-روح ابو ادم جاي بس خل علاوي يكمل سالفتة.
-ههههه وين عندة سالفة هو شيعرف تعال اكل راح يبرد
-اي ولك بوية انت هواي تحجي طالع عليمن اشو امك بومه تحجيلها كلمتين وتسكت متگلي عليمن طالع.
ضرباة على على وجهة وهذا طفر: -شنهاي هذا طگني شني غير ابوة وين القيم وين الاخلاق لبوة علمي جهالج يحترموني ترة اكتلة اذا عادها
-هههه لعد لو تشوف شمسوي بية يشلع شعري اما الراچديات لاتعد ولاتحصى.
-چا هلبت گلتيلي اشو اني اضربج بالشقة تفضحيني حتى الجيران تسمع.
-خطية بعدة صغير قابل اضربة
كعد حيدر ياكل وگالي على خبر خلاني اطير من الفرح...
-يااا صدوك
-عود صدك شبيج
-هههههههههه لاهيج.