رواية لبوة علي للكاتبة كفاية كاظم الفصل الثالث والأربعون والأخير
غزل: -
خلصت اصعب سنة مرت علية خلص دوري بيها قريت تعبت بذلت اقصى ماعندي من جهد والباقي على رب العالمين مستحيل اكول مامتوترة اشوف نتيجتي لو اعرف معدلي اتمنى امنية وحدة انقبل طبية طبعاً اني متاكده مية بالمية مااجيب صيدلة ولا اسنان تعبت من التفكير عفتها على الله.
جنة نتراسل اني وزهراء طاگة رواحنة گالتلي انزل تطبيق اقرا قصص نزلتة وانصدمت شيخلصلي البارت طويل حيل بس بعدين اندمجت ختمت قصة بيومين يفصلنك عن العالم...
خليت موبايلي على الشحن ونزلت لبوة تتمختر بمشيتها وحلگها شوية وينشگ سترك ياربي بس لامسوية مصيبة هاي البت طرگاعة محد يعرف شتفكر سوتلي بيدها هلو.
-هلو اكول شكو شبيج؟
-كل خير عيناي
ضربتني على خدي واني مفهية حجت وهي تهز بحواجبها: -اجوج خطابة يشگون شگ.
تنهدت ودرت وجهي امشي: -عبالي عندج شي براسة حظ
-ليش الزواج مابراسة حظ!
-لااا
-هسه انتي عرفتي منو خطبج حتى گلبتي وجهج
-مايهمني ولا اريد اعرف
-حتى لو جلال
حسيت دمي جمد فتحت عيوني مثل المصدومة اريد انطق مااگدر: -ءءءانتي شگاعد تحجين شبيج لبوة رجاال راح يتزوج عوفية بحالة
-اي صح راح يتزوجچ
سرت رجفة بجسمي ماعرف شگاعد يصير شبيها شگاعد تحجي ماعرف نزلت لزمت ايدي ودخلتني للمطبخ باوعت بعيونها بالمكان ورجعت تحجي.
-قبل شويه حيدر حجة وياي جلال خاطبج منه صح جلال جان خاطب بس فصخ الخطبة من زمان وهسه شگلتي ولج؟
-ماصدگ لبوة خاف جذب
-ولج حتى اني ماصدگت عطت عيطة ودخلت تحقيق کلت انلگفت من ورا جلولة هففف هسه اني شكو
-معقولة الازرک خاطبني لج هو حتى مايباوع بشكلي
-غير اخت صديقة ياعيني باجر ارجعلة خبر اكلة موافقة
-صدك تحجين!
-قابل مجذبة عليج ياامي لاتفضحين روحج سوي نفسج خطبة عادية تمام.
رحت اركض لغرفتي همزين ازل موبيها غفلتها علية وصرت ابچي مامصدگة حبيتة وصرت مدمنة بتفاصيلة وقررت اتعالج من حبي اله وفعلا التهيت بدراستي ونسيتة.
جلال شخص كولش عادي بس لان دائما يتردد النة بالبداية ماخذة موضوع اعلق على شكلة وملابسة شي عادي الا ان صار من اهتمامي...
مسحت دموعي ونزلت اشوف لبوة وين ولت احاول اسوي نفسي طبيعة بس الرجفة تفضحني ثاني يوم حجة وياي حيدر وكتلة بكيفك مادري هاي البكيفك وراها تحضيرات للخطبة البيت مخبوص خبص خو لبوة شادة ثوبها وذابة روحها على الشغل ماخلت هي وازل سون الصالة قاعة اليوم حفلة عقد القرآن
گعدت الصبح لکيت لبوة كالعادة بالمطبخ.
-صباح النور يعروسة اتفضلي نورتي يمدام
-اي راح اتفضل بس هدي شوية.
صبتلي جاي وخلت گدامي كيمر وجبن اكلت شوية رحت لموبايلي اشو هذا لاراسلني لادز مسج شبيه مجبور علية شمرت الموبايل ونزلت اجو اخوالي الله اليستر بس لا لبوة تتعارك وياهن اشوف لبوة صعدت جهالهة فوگ شوية ونزلت ماعاجبها الوضع هسه تبدي المشاحنات انوب روان جاية يبوو هسه هاي شجابها...
لبوة: -يلا غزولة روحي جهزي نفسج حتى تروحين للصالون
غزل: -ها خوش راح اروح
لبوة: -وانتي عيني زهورة ترحين وياها.
زهراء: -برسم الخدمة بس كون يمكيجني
لبوة: -ادللي يلا ازولة اصعدي لغرفتي ابقي يم الجهال
وانتي فطومة تعالي وياي.
اطشرن البنات بقت بس الغثة تباوع للبوة من فوگ ليجوة ولبوة متجاهلتها تماماً رحت بدلت ورحنة للصالون گلبي يرعد رعد امي ماجت وياي بس مرت خالتي احلام.
الصالون مليان عرايس والرگص رغم توتري بس بنفسي ارگص گرصتني زهراء من شافت العرايس يرگصن همستلي: -ترگصين؟
-گومي ارگصي وجريني وياج راح اسوي نفسي استحي.
فعلاً گامت ترکص وصارت تجر بية واني مسوية نفسي مستحية اخيرا احلام گالت كومي ارگصي جم مرة تتزوجين كمت اركص بالبداية على كيف وبعدين غمجت بالرکص ههههه اجة دوري مكيجتني مكياج هادء لبوة وصتني علية لبست بدلتي الفضية تجنن ملكية اخذنة صور شكدد خلصنة اجة حيدر رجعنة للبيت...
دخلت استقبلتني زينة وام علاء بالهلاهل والجكليت خليت ايدي على گلبي بس لا ام علاء تصيح کدامة لبس ام شعر الماكلة الجريذي الحلقة يبوو ياصخاام الصخمني والله اعوف الخطبة واشرد گعدتني لبوة لابسة فسان محتشم وبنفس الوقت فخم هي بدون شي تخبل...
بدت الناس تلتم وبدت مراسيم العقد لبوة مجهزتلي قران ومعجانة بية مي وورد خليت رجلية بيهة وفتحت القرآن على سورة الفتح خليت ادية وخلت بين اصابعي هيل...
كملنة العقد ورجعني للكوشة دخل المزيون وعيوني تزرزر علية ماگدر اذا مااباوعلة طالع شگاگي بس شني صاير ازرگ بالزايد بس حليو اجة گعد بصفي والهلاهل ترست المنطقة لبسنة الحلقات وباسني بگصتي گصصنة الكيك واحد وكل الخ بس خلصت المراسيم اجة حيدر باركلي وسحلة وياة...
جلال: شبيك بعدني مامخلص
حيدر: -كافي خلصت كيك واكلت عصير وشربت تريد تتعشة يمنة من هسه اكلك مرتي ماخليها تطبخ يلا
جلال: -شني شبيك بس شوية واطلع.
حيدر: -ماكو ولاشوية
جلال: -بسيطة اکضك لو مااكضك الا.
حيدر: -انجب وامشي
خطية طلعاه حيدر سحل وكل شوية داير وجهة علية
الا ان انشمر برة الصالة ولا يگول عريس ذولة شلون يصيرون نسابة عجيب بالعجبة.
لبوة: -اليوم طلعت روحي جنت ولازلت اكرة هيج اجواء واكو بعض الافاعي السامة بالمكان جهالي ماخليت وحده تلمحهم طلعت وخليت ازل يمهم كلشي يصير ماكو ثقة بالهلبشر اجت زنو العشق سلمت عليها مو سلام ضيم وضلايم على گولة حيدر طبعاً من تزوجت صرت اقلد كلامة بدون ماحس بعد من عاشر القوم صار منهم.
زينة: -هلا بالعشق
-هلا بصديقه سنين العمر
-مشتاقلج كوميات ولج صايرة تخبلين شوف الخدود ها عيني الضاهر حويدر مامقصر.
-الله يحفضة دادة ريتال وين
-عفتها بالبيت عد وسن
-حرامات عود اريد اشوفها
-غير مرة نسابتي وين؟
-كولي نسيب مو نسابتي ثنين هي بت وحده
-لا ولج حامل بس مو تگولين وجنها بنية بيه
-لابربج بنتج بعدها صغيرة هسه لو مكبرتها بيهة مجال
-بعد مادري هي صارت
اخذتها لغرفتي لكيت علاوي صاعد فوگ ازل ويضرب بيها وهاي مستسلمة على الاخير بس ادم يجر باخوة عنها رحت اركض شلت على عنها شعرها بقة مجلب بيدة.
-لك ماما ميصير هاي عمة عيب.
ترسني تفال عود يحجي ذذذذذذذذ انطيته لزينة طاحتلة تبوس وتگرص بخدودة وهم جلب بشالها
زينه: -هذا شبية ابنج وحشي عنيف من هسه ماريدة لبنتي اريد ادوم يصير نسيبي
-لا عيني ادم فقير وبنتج وگحة مايگدرلها هذا حتى يسطر على بنتج ام السان، دشوف هاي الفاهية شبيج امي طفل ماتگدريلة شكبرج تصيرين.
ازل: -اخ موتاني عود العب بيهم مو صوجهم
-صوچج انتي الچلبة هاي مقولة فد وحده تسوي الخير للناس ومايفيد ههههه.
زينه: -عرفتها هاي الوحدة
-الف مبروك عليج ربحتي جائزة طالبة جامعية مرحلة ثانية تفضلي عزيزتي
ازل: -بس لاعلية هذا الحجي
-ابدددن مو عليج
ازل: -عبالي
كعدت زينة على الچرباية وعلى بيدها: -اكول لبوة شعجب ساكتة عن الشكول الجوة!
شلت ادوم وبستة: -افيش مو ريحة هاا تقصدين الافاعي مو؟
-اي اكو غيرهن
-والله يا دادة ماوقت المشاكل لا وبخطبة غزولة ماترهم بس ثقي كلمة وحدة اجرها للمطبخ واسويها تشريب باچة.
-هههههههه والله عندج سوالف فلا تتغيرين ابددن
ازل: -اجتي غزل
لبوة: -انزلن اني ابقى يم كتاكيتي
زينة: -غير تستقر الدجاجة
طلعن البنات سويت شوربة وكلتهم ونيمتهم هما متعودين الضهر ينامون قيلولة مثل ميسمونها نزلت جوة صرت بطرف الصالة بعيدا عن الهوسة اباوع للمراسيم ماحس الا اندفعت شوية بعد واگع درت وجهي شفتها روان اجت يمي مخلية ايدها على حلکها: -اسفة كولش اعتوذر بس اندفعت وضربت بيج سوري.
طگيت رگبتي انگلبت ابو دحام حجيت مقلدتها: -ماصار شي بيب
مشت ورحت وراها صارت قريب على المطبخ جريتها وفوتتها للمطبخ: -اوي شبيج
-وشبت بيج
لويت ايدها بقوة اباوع لوجهة اصفرر حجيت كازة على سنوني: -شوفي لج حضج اطيحة لاتشوفيني ساكتتلج ترة مو خوف لامنج ولامن الاكبر منج قسما برب العزة اذا الزمج انتفج تعرفيني كولش زين لعبتي بذيلج هواي واجة الوقت حتى ينگص هالذيل
بقت تدفع بية تريد تسحب ايدها ماكو: -شبيج!
-انتي شبيج شعندج وياي وي رجلي نعال احترمي نفسج وچفيني شرج افتهمتي لا وحق الحق اطلعج تفكري الشيطاني واندمج على ساعة السودة الفكرتي تحطين راسج براسي
-انتي الحطيتي راسج براسي واخذتي حبيب طفولتي مني سنين واني منتظرتة نتزوج وتالي اخذتية.
-تؤ تؤ تؤ للتذكير حيدر دگ رجلة بالگاع وگال لوهي لو ماريد لاعرفة ولامفكرة بية بس انتي لو مخلية احترام لنفسج وكرامة جان فكر بيج ولو مجرد تفكير بس انتي بدون كرامة وهاي النتيجة
دفعتة من صدرها حيل رادت توگع وجلبت بالحايط عفتة وطلعت بوجهي صعدت لغرفتي بقيت مگابلة جهالي شوية ولحگتني زينة...
-هم تراسلين تبارك؟
-اي والله دائما خطية بقت وحدها شکد تلح علية ارجع
-لعد ليش ماترجعين؟
-ماگدر حامل وعندي طفلة ترة الدوام تعب دمرنة دمارر واحنة مامحتاجين شي عليوي مامقصر ويانة
-اخخخ الدوام يجنن اشتاقيت ارجع اداوم
-لعد ماترجعين؟
-قريب ان شاءلله بس يصير عمر الجهال سنة، بس حيدر شلون بية دائما يلمحلي اشيل الفكرة من راسي رغم مايسولف بيها
-شلون؟
-يگلي لو بيدي اخليج بقفص ماريد واحد يلمحج ويشوف عيونج اني من شفتج مارحتي من بالي لا ليل ولا نهار شلون بالدكاترة الوياج وخاصة جهاد يكرها لان يعرف بية يحبني بس اني وضحتله اختلفت نضرة الرجال مايعجبة كلامي راااح يخبلني
-لعد شسوين اكعدي واسكتي جهالج وبيتج شعندج مداومة بس دوخة الراس وانتي مو ماتحبين الاصوات العالية والضجة بعد شكو
گمت صايرة اعصاب من كلام زينة وحجي حيدر.
-اااني ماا دررست وتعبت حتى اگااابل الحيطااان من تزوجني اااني متوضفة ما لگاااني ربة بيت حتى يبطلني بكيفة مو هو يقرر هذا الشي
-على كيفج دادة تنحل إن شاءالله
-إن شاءالله نرجع اقوة للميدان
خصلت الحفلة وكلها طشت نزلت الحگ بام علاء قبل لاتطلع: -خالة خالة خالة
-ياععع هاي لبلابة هاي ولج فحطانة
-اي والله خالة اجيت اركض عليج عادي اطلب منج طلب
-صگد جذب اطلبي بعد چبدي.
-فدوة لكلبج خالة بس اريد من هذا الكحل التخلينة لعيونج وديرم شگد يصيرن؟
-مايصيرن انة اجيبلج من اجي ثاني مرة وهاي بتكم شني ماتاكل راح تنگطع اطوها اچل
-هههههه لاخالة تاكل بس لان جانت سادس تغيرت
-خوش كون السادس خلص خل تاكل الريال يريد لحم يكضكض بية.
بلعت ريگي حتى مارديت عليها هاي ماعدها فواصل ابدد وصلتهن للباب ورجعت لگيت ازل حاضنة غزل وگالباتهة مناحة انقهرت عليهن شلون راح يتفارگن خطية ازل راح تستوحش على اختها مسحت عيوني ودخلتلهن...
-هاا يااابة شبيچن عيني شعدجن تبجن يلا كل وحده تشوف شغلها بلا زحمه عليجن مو گاعدات واني مبتلية يلاااا گدااامي على الشغللل
ازل: -راح تصيرين مرت الاخو الخبيثة
-لا الشريرة يلا اطشرن ماناقصنة حرگان گلب.
سمعت على يبجي رحت اشوفه شلته وگمت افتر بية عقلي انشغل بالتفكير معقولة حيدر مايخليني ارجع لشغلي والله مااسكت واذا يبطلني ابطلة حتى تصير عدالة بالموضوع انفتح الباب دخل حيدر درت وجهي العب بادم اجة حضني وباسني...
-شلونج يولو شهل جمال شطالعة
-شكراً
-شبيج شو عايني علية
دارني علية مبين من ملامحي معصبة بس مابينت
-مابية شي يتهيئلك حبيبي.
رجع باسني واخذ على مني يبوس بية شلت ادم ونزلت جوة لگيت غزل لازمة الموبايل وتضحك اكيد تراسل جلال داخلة بالعالم الموازي رحت يمها وصحت بيها.
-لللج هاااي بيمن تراااسلين؟
طفرت من مكانها والموبايل وكع من ايدها اخترعت خطية: -ما راسل شبيج
-جلولة ابو اللبن مو شيحجي وياج؟
-ومحمد مو جلال
-لعد حمدية ام اللبن مو؟
-خاب لا جاي اقرا بقصة
-قصة!؟
-اي والله شبيج
-خل اشوف.
انطتني غزل تليفونها قريت شوية منها ورجعتلها الموبايل: -حلو جنت اقرا على الفيس يونسن
-يدخلنج بغير عالم
-تاكدت من حالتج هاي اشو هذا مو فيس!
-اي صح هذا تطبيق خاص بس للقصص
-هاا خوش
عفتها وصعدت ادم ابدلة دخلت لگيت حيدر وعلى يلعبون وعلى بس يحجي ادددد اباا اسازززاذذذ
يبو وحيدر من كل عقلة مستمعلة بدلت لادم واخذاه مني رحت بدلت وردت انزل طلع بوجهي حيدر رافع حاجبة: -شبيك؟
-انتي شبيج؟
-ماكو شي هااا بس كلت اذكرك بس يصير على وادم عمرهم سنة ارجع اداوم
دار وجهة بدون لايجاوب فار دمي اكيد يريدني اكعد بالبيت بس لو تنگلب الدنيا مااگعد عفتة يم الجهال ونزلت يتجاهلني بسيطة ذبيت حرگتي بالشغل اجو البنات يساعدني ماخلينة شي مانضفناه اخير شي مسحت الارضية بديتول اضيفلة معطرات ريحتهن قوية تمحي ريحتة المزرعجة لبعض الناس راحت غزل ترد على موبايلها هالمرة من صدك جلال...
طلع حيدر وصاح علية اروح للجهال طلعتهم بالحديقة يلعبون الحديقه ماشاء الله صايرة تخبل من زرعناها شجر ورد وصبار فرشت فراش وخليت على وادم رحت اسويلهم شوربة فزيت على صريخ على رحت اركض لگيتة يلعب بالصبار ومفرفح من البجي سودة علية طلعت الشوكة من ايدة سكر بيدي طلعت خالتي والبنات يركضن...
صرت ابوس بية وابجي وياة شوية ودخل حيدر وجعة مايگصة السيف اخذه من ايدي ومشة اشرلي بيدة اجيب ادم اخذت ادم شايلتة ادم حنين بشكل بس يبوس بية ويلعب بخدودي دخل لغرفتهم خليت ادم يلعب بالعابة وعلى عد ابوة سكت مدري شخلة ليدة خلاة يلعب وي اخوة واجة علية هز راسة وغمض عيونة حجة بزعان: الحگيني.
طلع بقيت يم الجهال عفتهم يلعبون ولحگته لغرفتي دخلت وانصدمت لگيتة يدخن لا وبغرفتي حيدر ابد مايدخن يمي ابد واذا الگف بية ريحة دخان اتعارك وياة عيوني صارن بگصتي.
-لللليش تدددخن؟!
-حرررام التدددخين جرريمة شلللون نبطللل مااانشررب سم
عفتة ونزلت بدون ماارد علية اكيد راح نتعارك واني الساني شلونه طلع وراي وجرني من ايدي نترت ايدة وصحت بية: -شترررريددد عوووفني ورروح دددخن محددد لازززمك.
-شمرررتهااا السممم شمرررتهااا
رجعاني للغرفة طبگ الباب وراة رجعاني على الحايط وصار مقابيلي: -شتريد؟
-تريدين داومين وجهالج هسه انتي يمهم وهيج صار بيهم لو رحتي شيصيرررر بيهممم
-لاتصيححح بوووجهي مااا اشتغللل عندددك
صار يسب ماخلة واحد ما سباة كور ايدة ورگعها بالحايط سكت بقيت اترقبة بعيوني دار وجهة علية مطعون طعن.
-ااااني مقصررر وياااج بشييي رااايدة فلوووس ومانطيج گووولي مقصررر وياااج لاتسودنيني.
التزمت الصمت ماردت ازيد الطين بلة جانت اكو صلاحية متروسة مي ويمها گلاصها ترست الگلاص مي ورحت انطيتها اله هو مترقب مني انفعل ونصير راگع ومرگوع ابتسمت ابتسامة مصطنعة فتحت ايدة وخليت الگلاص بيدة.
-اشرب حبيبي العصبية موزينة.
بقة صافن بوجهي مستغرب من تصرفاتي الهادئة صح اني عصبية كلش بس هو يقابلني بهدوء واليوم هو عصبي لازم اسوي مثلة ميصير ثنينة گابين لزمت ايدة وصرت اضغط على شرايينة البارزة سكت بين قوسين هدأ رفع راسي بيدة تقابلت عيونة حجة برود
-خل تكمل السنة وافتحي الموضوع
-ادلل
داخلي يرگص فرح متأكدة راح يوافق من نضرتة هاي تلمست وجهة وبستة بخدة ساعة السودة مو بوسة طلعت علية...
مر يومين اليوم استلام النتائج رحت اسوي الغدة وعفت البنات مجتمعات يبحثن على النتيجة وخالتي تلعب بادم وعلى لحگني يمشي احسن من ادم مو هلگد مشيتة.
عفت البيدي وشلتة اكرص بخدودة ماقصر طاحلي راجديات ويضحك: -عيب امي عيب تضربني انت ماتستحي ببببزززذذ يلة روح يم بيبي العب وياها.
ههههه علية سوالف وحركات تعجب رغم طفل بس كولش فطن كملت الغدة ورحت للثلاجة عاجبني اسوي مقبلات سمعت العيطة گبت اكيد استلمت النتيجة عفت البيدي ورحت اركض.
-هاا ولجن بشرن غراب حمامة
ازل: -حمامة
-صدوك شكد المعدل
-95
-الفف مبرروك شايفة الخيرر عيناي
باركنة لغزل والبيت انخبص بيها باليل اجه جلولة يباركلها جايبلها ايون هدية.
-لك شوف جلولة شلون يعرف بالاصول
ازل: -ايون بعد شتريدين من جلجل
غزل: -هسة شبيجن وياي.
لبوة: -اكول الهدية بس ايون مو لو بعد اكو اضافات وي الموبايل هههههههههه
غزل: -هه هه هه ماكو شي يضحك وماكو اضافات تطمن
لبوة: -واضح شوف وجهج شصاير بية
غزل: -شصاير!
-احمر وردي اعتقد اثار تجعص وعض.
-عزااا مبين
-ههههههههههههه قبل شويه تگولين ماكو اضافات وهسه دکولين مبين طلعت جذبتج على العموم اني ماحب ادخل بس كلة من ازل اني ويني وين هاي السوالف عمري وحياتي ماسألت وحدة بس هاي ازل فضولية وتستحي تسأل.
ازل: -يا شبيج ذبيتيها براسي اني شعلية
-دمشي امشي عوفي البنية راح تموت
شوية واجة حيدر طلع من جيبة علاگة عکدت حواجبي اشوف شنو بيها انطانياها وگال هاي من ام علاء فتحتها لکيتها كحلة وديرم صرت عجوز هههه
حيدر: -ريحانتي
-عيونها
-مشتاقين لعيونج الحلوة
-هههههههه گدامك
-اخخ
-ها شبيك
-لاتخلين كحلة هسة تذكريني بايام الخطوبة
-هههههههه شلون خطوبة
-من وراج كلشي ماحصلت
-لاتنكر بالسيارة من اجينة من السوک.
-هههههاييي شلون بوسة بس نگعتيني ماي والله انتي فلاتستحين ولاتخافين بين قوسين انتي بربوگة البرابيك
-تؤ تؤ اندمك على هذا كلامك
اجة علاوي لازم ايدي ادم ويمشون سوة ادم خطواتة بطيئة لان شوية ثکيل ضحكنة على منظرها وعلى بس يحجي.
حيدر: -اكلج هذا يحجي مشغل بيكيسي
-هههههه يمكن
صرت بمستواهم واستمعلهم: -هايمة شبيك معصب اه لا لا عود صدوك مع الاسف غير دکلي ياامي
-ها ولج شكو شيگولون
-شمعرفني بس خل انطيهم على مايهم.
-بابا هاي امكم تضحك عليكم ارجو منكم تساهمون في كتلتها اليوم
-يا حيدر شبيك ترة يفتهمون
-هو اني اريدهم يكتلونج وتجين تبجين يمي واسكتج واخذ المقسوم
-يلة يمة امشونة هذا ابوكم.
-كملي شبية ابوهم
-مو حباب ابدد
-خوش انتي كلتي مو حباب هاهية.
اخذت وليداتي سبحتهم بيها مي يكيفون باليوم اسبحهم تلث مرات هاي بالصيف اكيد لبستهم نفس البس على فد غيور لازم امشط شعرة بالبداية واعطرة الا ارجع لاخوة شغلتلهم توم وجيري ابد ماانطيهم موبايل يتعودون عليه معودتهم على افلام الكارتون وطيور الجنة ابد مايحبونها وخاصة على يبقى يبجي يحب يتابع افلام مثل ريمي وعهد الاصدقاء وعدنان من ذني الافلام يندمج وياهم.
اني متاكده على يطلع ذكي من تصرفاتة جاي الاحضة وادم ملك الحنية حنين بشكل يلعب بشعري وخدودي واذا شافة حيدر يتسودن يغار مدري شبية.
نزلت برنامج القصص وبديت اقرا بية من فترة بوقت فراغي العجيب البية مسوين الضباط من كفار قريش لا حتى كفار قريش احسن وارحم منهم ماكو هيج كلة شرب ونسوان وملاهي لا وضرب سااادي شگد قريت قصص كله هاي الصفات معقولة هما هيج اشو حيدر وعلاء وحتى جلال غزل تحجينة عنة ماعدهم هيج سوالف وحيدر من شفته يصلي صلاتة بوقتها اذا گاعد بين قوسين سمعتهم صارت بالبباي بس مامعقولة كلها تجذب بيهج صفات...
اجة حيدر طلعتلة ملابسة راح سبح طلع ينشف بشعرة طلعت العطر رشيتلة وحجيت متسائلة.
-اكو حبيبي
-گولي يروحي
-عود صدوك اغلب او اكثر الضباط يشربون وساكنين الملاهي ويضربون نسوانهم
-منين سمعتي؟
-بنية ناشرة هيج
-ختوالي هاي اكيد مفلفلة على واحد ومامعبرها
-يعني ماكو هيج
-اصابعج مو سوة اكو الزين واكو الشين يعني الملاهي فاتحينها للضباط
-لا.
-بعد شكو بين عشرة تلگين ثنين طايح حضهم وهذا مايقتصر على المهنة شرب ونسوان مختصرة علينة فقط ماكو هيج حجي عدنة ضباط ادخل عليهم يصلون والاذان هستوة يأذن انتي شتحجين لو بالمعارك عجيب لبوة عجيب الحرب مشتعلة وهما يروحون يصلون شكم ضابط استشهد ولگينة القران ناگع بدمة مشاهد ماتطلع من راسي ابد المخلي القران بيدة والدم تارسة والمخلية بجيبة ومستشهد
-الله يرحمهم اكيد هما هسة بالجنة.
-خل يكون بعلمج اكثرية ولد العراق بالجيش كل بيت لو تلگين بية لو ضابط لو جندي لو لواء الى اخره مامعقولة كل هذولة سمعتهم مو زينة
-ترة مو قصدي بس حبيت اعرف لان اغلب القصص لو ضابط مغت/صب لو يشرب لو يعذب مرتة والله وکف شعر راسي
-مو كل التقرينة تصدگينة ويمكن بالفترة الاخيرة طلعت علينة سمعة مو خوش بس اكيد تنتسب لصحابها.
-هاا خوش اسويلك عشة
-راح نام بين مايكمل اكعديني.
نزلت اسوي عشة وبداخلي اغم روحي على هذا السؤال بس للامانة ارتاح گلبي گلتةمعقولة حيدر مصادق هيج ناس اوفف حرت شسوي عشة گلت خل اسوي كباب عروك ونواشف طلعت المكونات وكعدت اثرم بالگاع دخلت غزل تضحك...
-ضحكيني وياج اذا ماتصير زحمة
-ماكو شي بس ختمت قصتي ونهايتها سعيده
-عبالي اكو شي
-اكول لبوة مانكتب قصتنة
-هة هة ياقصة منهن.
-شوفي اني وجلال من زمان اعرفة وصارت بينة مواقف محد يعرفها وراح خطب وبعدين فصخ وخطبني لان يحبني من البداية بس يستحي من حيدر وشافني صغيرة.
-اي وبعدين
-خاب وانتي وحويدر شلون تعرفتو ترة حياتج بيها هواي احداث مخدرات وسفر وعايشة وحدج والله تصير قصة
-خرب بيها من حياة عشتها قصة نعل كلها بجي وحزن طاح حض الزمن الاغبر النزل دمعتي اووووف
-شبيج وانتي ورجلج خوش عدكم وضايف
-حبيبتي القصة مو بالوضيفة.
-اهوو شبيج لبوة انتي عشتي شكل وزينة تعرفت على علاء وتزوجو واني وجلولة والله ترهم انطيها لكاتبة مشهورة تصيرين ترند ومتابعات وكذا
-غزل عوفيني مالي خلك هاي السوالف منو اليصدك ااااني نفسي مامصدگة الصارر وياي لاتهيجين المواجع خليني ناسية طز بالشهرة ناقصني اني راح تجيني ايام مالحک احك راسي
-على كيفج هسة اني شكلت براحتج اجي اساعدج بشي
-لاگلبي ماعندي شي.
طلعت غزل ضايجة الصراحة مادري ليش عصبت عليها بس اني ماحب الكلام المامنطقي ولا اريد اتذكر ايامي...
صديقتي زينة عشرت عمر اني وياها دائما تسئلني شلون عمامج مخلينج وحدج ماكو سبب مقنع انطية الها اخخ شفت الويل منهم شخلو بيه عمامي ضربت على گصتي حيل مااريد اتذكر شي ولو يبقى اخر يوم بحياتي ماافكر اكتب الشي العشتة والمر علية زوجي مامسولفتلة على تعذيبهم النفسي والجسدي إلى وهو يبتعد عن هذا الموضوع مايريد يضوجني انتهت خلص صار ماضي ماريد ارجعلة...
كملت العشة واجتمعنة ناكل بقت هاي الفكرة براسي بس تعصبني فكره غزل...
مثل متعرفون جلال خاطب من قبل ومجهز كولشي فالعرس صار بسرعه بيوم الحنة مااشتريت ملابس عندي هواي وتصميمهن راقي اصلا ما لابستهن غير كم مرة كولشي جاهز وغزل اخذوها للصالون لگيت الثنائي واحد مجلب بشعر الخ عطت بيهم بسرعه بدلو الوضعية على يمسح بملابس ادم.
-عفية عليكم لاتتعاركون حبايب گلبي حرام الله يذبكم بالنار تصير بيكم احو.
علي انخلس وجهة لازم ادم ويأشر بيدة احوو: -اي امي احو يلا امشو اسبحكم راح على يركض قبلنة وهذا جنة بطريق يمشي صفح سبحتهم وبدلتلهم شغلتلهم البلازمة گعدو يتابعون ريمي شكد افرح من اشوفهم يتابعون افلام كارتون قديم كعدت وياهم اتابع ماحسيت بالوقت الا لمن اذن الاذان نزلت اسوي غدة لحيدر بين مااستوى هو اجة.
-شلونج ريحانتي.
-بشوفتك زينة.
اجة حضني لازم يأدي سلامة قبل الدوام وبعد الدوام صعد قبلي طفيت الطباخ وصعدت وراة طلعتله ملابس وهو مدد على ضهرة وذولة صاعدين فوگة.
-مايصير امي انزلو ادري صاعدين فوگة فراش هو شنو
-نعمه الله عليج اني فراش ابقو صاعدين
-وتالي ماتسبح
-نسبح طايرين خوما طايرين
-لا عيني مطاير بس ورانة حنة اريد اسبح يلة كمل حتى اخلص شغلي.
-يلة گايم.
راح يسبح ونزلت اركض صبيت الغدة الهم گعد ياكل ويوكلهم وياة طلعت فستان ينطي شبة للبدلة موقصير لان اني قصيرة فماترهم بس الردن نص
بف لونة عجبني وردي فاتح شسورت شعري وكعدت اخلي مكياج خليت خفيف بقى بس الايلاينر رحت لحيدر يسوية إلى بعد هو فنان.
-حيدر ارسملي الايلاينر
-شگالولج عليه اشتغل بلاش
-انطيك فلوس بس لاتمن عليه
-احنة مانتعامل بالفلوس بنيتي
-ديلا يا عيني درسم راح يجون والك التريدة.
ضحك بانتصار واخذ الايلاينر من ايدي غمضت عيوني يرسمني ماحسيت الا جار شفتي.
-استغفر الله هسة الجهال منا مايصير امي مايصيررر
يصيرون منحرفين شكم مرة كتلك
-هسة اني شمسوي هي بوسة يصيرون منحرفين من ورة بوسة خو گولي ماريدك تبوسني وفضيها.
-مو هي بكيفك تحجي تعرفني احب الخصوصية وذولي اطفال يتعلمون بسرعة وخاصة على يبقى بالة تدري ذيج المرة العب بيهم كرصني من شفتي فتحت عيوني كتلة هاي ليش گلي ابااا شافك ذيج المرة من لويت شفتي
-گو ماعبالي يفتهمون عود معتبرهم زعاطيط
-ماكو زعاطيط الهم غرفتهم والك غرفتك سوي التريدة تمام
-تمام يابة نعلة هسه هذا لبسج وبس نباوع ديلا روحي بدلي
-لا والله ليش عيني.
-هذا مفضوح شوفي ايديج طالعة وصدرج وشعرج شكو فالتة خو البسي سيت نوم واطلعي مو احسن.
-يا عود تحجي صدوك بالعكس كولش مستور موقصير ولافاضح ولاضيگ لادور حجج
-خاف يمگموعة تنحسدين وتبنچرين علية
-هههه لا تخاف ذكرتني اللبس سوار من العين بيوم الخطبة صرنة نارر
-والله لو تبدلين لبسج مو احسن
-عادي اروح ابدلة بس هذا كولش حبيتة من زمان مفكرة البسة
-تلعبين على الوتر الحساس يلة نزلي لاتحرگين گلبي الرهيف
-يعني ماابدل مو؟
-مومو انزلي لاابدل رايي واطرد الجهال
-لا لا راح انزل بس لاتخلي على وادم ينزلون بداعتي بس ينتهي الفلم نومهم وياك.
-خوش
نزلت جوة كلها ملتمة شوية اجت خالتي والبنات وراها زينة وعمتها اجتمعت المعازيم وراها جلال دخل غزل راحلها للصالون ياخذ صور ماشاء الله تخبل طالعة لابسة بدلة وردي وصخ هيج لون وشعرها طولان مومثل قبل گصتة حلوة مسويتلها تسريحة بسيطة.
الفرحة واضحة على وجهة تستاهل غزل شگد بجت من وراة وخصوصا من خطب دائما الاحضها سرحانة
بس بالنهاية الرب يقدر صبرنة وينطينة النتمناة واذا ماصار الشي النتمناة اكيد الافضل هو من نصيبنا.
شغلن الاغاني البنات وصارن يرکصن اخذتلي زاوية اباوعلهن اتذكرت ايام عرسي ابد مافرحت ايام مأساوية تفكيري بيها سلبي التناقض موتني بذيج الفترة سحبني البنات ارگص وياهن الكل يرگص وفرحان الحنة تجنن بس للبنات النسوان الكبار بالاستقبال.
شمرت غزل الوردة وكعت بيد شجن: -حضري نفسج اجاج عريس القفلة
-هسه هو وينة دخل يجي اسحلة من رجلية.
خلصت الحنة بين الضحك والرگص تونسنة بس ضايجة بنفس الوقت شلون راح نفارگها سبب الضحكة بالبيت هي طول الوقت تضحك وتحشش
خو اذا اجتمعن هي وخالتي اضل ابجي من الضحك
الليل كلة مانامنة ازل نايمة بحضنها جبت جهالي ونمنا بنصهن اريد اجرب شعور الاخوات شكد حبيتهن ابد مامحسساتني مرت اخوهن.
-شوية وخري سولنة مجال
-هسه اني واختي هاي الزعاطيط شكو
-احترمي نفسج منو الزعطوط على لو ادم.
علي لزم ازل شبعاها كتل وادم شاف غزل تضحك راح عليها يقلد اخوة المشكلة ماينفهم حجيهم
بس على شوية افتهم علية.
ازل: -الله اكبرر شبيهم جهالج موتونه عود احنة عماتهم
غزل: -تدرين على شيكول
ازل: -شيگول عليوان
-يكول هم الصفيرة وصار عدها السان گتله على اتأدب هاي عمتك
ازل: -ان شاءلله تريدون تجلبولي بالصفرة والله فلا اسكت الكم
لبوة: -لا جهالي مايگولون هيج مو مامي اهاا شوفي يگول اذذذذ يعني كذب.
حيدر: -هاي شني هاي يلة لبوة لغرفتج سالمين اليوم شعندج هنا
-اريد انام يم البنات اليوم
-وشني المناسبة عيني؟
-اليوم الاخير لغزل هنا
-جا ماتخلينها تنام باجر وراها حصاد اخخ هذا جلال فد واحد اخخ من امداني شلون انطيتة غزل تف علية ميت مرة، الگوسوالي سحر ايطالي وخلاني اسكت
-يبوو اسكت وامشي يلة بدون جدال عزيزي نريد نام
-دمشي اصعدي مامتعود انام وانتي مو وياي
-هو يوم واحد تعود ياعيني
-تصعدين لا اجي اشيلج
-ياا شبيك.
اشو هذا سواها صدك سحبني وشالني: -نزززلني والجهااال بعدني مامنيمتهم عود صدك تحجي
-جا مجذب عليج عوفيهم البنات ينومنهن
-ماينامون الا اقرالهم قصة
-اقريلي قصة خيولون جا كليومة قصة شني الله موصي بيهم واني لا
صعدني بدون نقااش وغفل الباب ولا يستحي دائما يحرجني گدام البنات ولاكانة بعد حويدر هذا.
ثاني اليوم الزفة من الصالون واخذوها للقاعة هناك سوو الحفلة ومنها للفندق مارحت بيومها على وادم مرتفعة حرارتهم تبهذلت كل شوية اسبحهم واسويلهم كمادات...
اجة حيدر اخذهم للمضمد ضاربهم ابر خطية نامو بدون اكل البيت صنطة كلها راحت للزفة وحيدر شويه وطلع گعدت بالحديقة احس گلبي نغزني
مااريد ارجع للماضي اخاف افكر بية اغلب البشر من يكعدون وحدهم يتذكرون الاشياء الصارت وياهم او الراح تصير...
خلال هالفترة كلش رتاحيت جهالي انطو نكهة لحياتي ويكملها حيدر صح مرات نتعارك بس مانزعل نتعارك ورة شوية نرجع ولاكانو ههههه شلون ثنائي...
حيدر كل شويه متصل بية قبل الاذان اجوي ضايجين البيت صار كأبة انطاني علاگة بيها اكل حتى واحد ماله نفس ياكل...
راح حيدر نام خطية ميت تعب من الدوام وراح وياهم يجهز الله يساعده شغلة ماالة وقت محدد بكل وقت يشتغل وخالاته حاسداتة يگللة تكرف بالفلوس كرف عينك عينك شنو من بشر هي الفلوس تجي بالراحة لو بنص الخطر ذاب روحة كلة عصابات وتهديدات اوفف شلون ناس تفكيرها خبيث.
غسلت الملابس العندي وصخة صعدت لگيتهم نايمين قست حرارة ادم وعلى خافة على الابرة غطيت حيدر نايم بعمق اخذت موبايلي ونزلت كعدت بالمرجوحة فليت شعري وراسلت دكتورة اسراء نفسيتي بسرعة انکلبت ثواني واتصلت بية بدات تسألني عن احوالي شسويت خلال هالفترة دائما اني وياها على تواصل ذبيت نفس ورجعت راسي ليورة.
-ضايجة كولش
-شنو السبب؟
-ماعرف يمكن من سبب تافة ضجت
-احب اعرف تفاصيل اكثر؟
-حماتي تقرا قصص وحتى اني اقترحت اكتب قصتي كولش ضجت ماعرف ليش
-شنو السبب برايج الخلاج تنفعلين؟
-دكتورة اريد اخلص من التفكير بالماضي للابدد اريد انسى الضرب الجوع كلامهم المسموم ماريدة يرجع إلى بيوم ويخرب مستقبلي.
-اكتبي قصتج
-هههه شدخلها دكتورة اني مااريد الناس تحجي بية ولااريد واحد يشفق علية.
-عوفج من هذا كلامج جربي تتواصلين وي كاتبة وتكتبيلها شعورج واحساسج بذيج الفترة والمواقف المريتي بيها راح ينشال هذا الاحساس منج للابد
-ماعرف اني ماحب احجي
-راح تحبين هالشي لان ترتاحين هواي جربي وخبريني مو تنسين اعتبري هذا جزء من العلاج
-إن شاءلله.
ميلت راسي اباوع بارجاع الحديقة خل اجازف شيصير يعني اهم شي اني ارتاح جنت متابعه كاتبة كولش احب قصصها مخلية صفحة الفيس دخلت على حسابها وراسلتها بسرعه جاوبتني بديت اسردلها تفاصيل رئيسية ومن بعدها استدرجتني بالكلام وصرت احجي كولشي ماحسيت الا الاذان اذن عزاا هاي شكد مر وقت.
نزلت العب بين الاشجار والضحكة شاگة حلگي على شنو ماعرف كولش رتاحيت رغم شكد بجيت رحت صليت ورجعت نمت لكيت حيدر طالع للدوام والثنائي نازلين يم خالتي كملت شغلي ورحت للتليفون لگيت الدكتوره دازتلي مسج فتحتة اقراة.
-تحتل الكتابة جزءا مهما من مسارات العلاج المعرفي السلوكي، ويوصي العديد من خبراء الصحة النفسية بالقيام بمهمة الكتابة اليومية كنوع من العلاج للتخلص من الماضي وآثاره، أو حتى ترتيب الحاضر للتكيف والتعامل معه، ولا يعتمد العلاج بالكتابة على الأفكار الملهمة، ولا الترتيب المنمق للكلمات، ولا الحشو المبالغ فيه للتشبيهات، ويبدأ العلاج -على العكس تماما من كل هذا- بكتابة ما تشعر به فعليا، وليس ما يجب أن تشعر به.
ابتسمت وكعدت اخرط المضموم للكاتبة كتبتلها جريدة بقينة فترة نتراسل والبنات تواصلو وياها بقت بس هي تكتب ورة فترة راسلتني تعتذر مني لان عدها جهالها متعبينها وماتگدر تكتب كلتلها عادي حبيبتي اني هم ام واعرف بالمسؤلية نسيت الموضوع تماما ونفسيتي عالي العال ورة فترة وجيزة رجعت اداوم بعد شروط ودوخة راس...
جنت راجعة من الدوام اجوي على وادم يركضون
صحت بيهم: -لا امي لاتلزموني جراااثيم خل اسبح وارجعلكم.
ادم خلة ايدة بحلگة زعلان وعلى صار يحجي.
-ابوة اتي ماتهبينة (لبوة انتي ماتحبينة)
شهكت وضربت على راسي مستنكرة كلامة.
-اني مااحبكم اني اعشقكم اتنفسكم اكلكم شتحجون انتو
-امم (ادم) يلة امسينة نوح يم حجية
ضحكت على طريقة كلامة وادم ينقاد ورة على شيگلة ينفذ مستقوي علية رحت سبحت ونزلت اركض لكيت على صاعد فوگ ضهر خالتي وادم يدلك برجليها شلتة وبوستة لو بيدي اكلة مو طفل.
-انت كيك گاهي عمبر شنو انت.
جعصتة جعص وهو يضحك اجة على يضرب بية
-حديدة(حقيرة) ماهبچ
-يا اني حقيرة ليش هيج ماما عيب اني احبك موت موت
نزلت ادم وشلتة ابوس بية جلب بخدودي شلعهن
-اخ اخ ولك خدودي عوفهن
يضحك ولاكانة طفرت من صاح حيدر بية
-اذا شفتك لازم خدودها اعلگك بالبنكة افتهمت
-بس هي امي مو آمك
-هم صح اني امة انت هاي امك
-والله بيها حجاية بس لو منا زعاطيطج
راح ادم يركض لابوة وعلى بقة مجلب بية عمدة.
اخذتة ورحت اسوي الغدة تغدينة ورجعتهم لغرفتهم على روتينهم شغلتلهم بلازما وكعدو يباوعون افلام
كارتون نزلت اغسل مواعين ولگيت الكاتبة مراسلتني
كاتبتلي تقبلين اسلم قصتج للكاتبات الجديدات
كتلها بكيفج اليعجبج سوية...
حياتنة مستقرة وهادئة واخيرا صارت عندي عائلة
مابقيت وحيدة مر العشتة وتبخر تدرون دائما اگول لو اهلي عايشين ماتعذبت كل هذا العذاب ولاشفت الشفتة لهذا يومي مانسيت والدي ولاعفت الطقوس الاسويها اله...
الاهل وطن حافضو على اوطانكم من الضياع العمر خلصان والكلمة الزينة تلعب دور كولش جبيبر بحياة المقابل عيشو وي اهاليكم كانكم باجر راح تفارقوهم العمر ماباقي بية شي واتذكرو العز والخير إلى انتم بية سببة اهلكم حتى لو كنتم تحسون مايحبونكم وكذا وكذا بس يبقون بالاسم وهذا الاسم اله دور جبير بحياتكم.
شاركتكم اشياء استحي اشاركها وي نفسي بصوت مسموع عيشو بتفائل وابتعدو عن التفكير بالماضي.
ودائما فضفضو بالكتابة وي نفسكم وي صديق ابد لاتحاولو تحبسون بداخلكم...
تمت