رواية لبوة علي للكاتبة كفاية كاظم الفصل الثالث والعشرون

رواية لبوة علي للكاتبة كفاية كاظم الفصل الثالث والعشرون

لبوة...
في الامس كانت هذه الروح تريد أن تغادر البلد بسلام أما الآن فهي تود مغادرة العالم بأكمله...
اصعب واخطر مرحلة يوصل الها الإنسان أن يشفق على نفسه وينقهر عليها كانة يشاهد شخص غريب يتعذب كدام عيونة وما يكدر يساعدة...
سؤال مرافقني من صغري ولحد هذا الوقت شنو الذنب السويتة حتى احصل كل هالعواقب البشعة شكد بحثت عن جواب لهل سؤال بس للاسف ملگيت...

اسال نفسي جرحت أحد بكلامي أو حجيت على شخص ضلمت أخذت حق احد سويت شي
لااخلاقي جوابي لا...
زين ليش اني بالذات ليش اتعاقب واكون بمكان مايناسبني دائما...
شنو الجريمة المرتكبتها بحياتي مذيت انسان سألت نفسي يمكن اذيت حيوان أو اذيت الطبيعية وجاي اتحاسب علية...
اذيت حيوان هههه الحيوانات جنت اعتبرهن صديقات إلى جنت اسولف وياهن والعب واغير جو وياهن...

جنت بايام الصيف والجو اليسمط اروح الم كاسات صغار مال موطة لو روبة واترسهن مي واخلي بكل مكان حتى فوگ الشجر اصعد واخلي...
جان تفكيري الطفولي يفكر بالطيور وين تروح بالمطر القطط جنت اتمنى أخذ شكو حيوان وادخلة بيتنة بالمطر والبرد...
الدنيا ولا ناسها نصفتني ولا واحد حبني وقدملي اهتمامة جنت حتى لو ردت العب الشارع يفرغ كل واحد يدخل لبيتة بس يشوفوني...

اروح مكسورة خاطر للبستان كمت العب واحجي حتى وي العصافير والشجر ولهذا السبب من كبرت صرت مااحب اختلط بأحد أو احجي...
تعبت بصغري تعرضت للكافة التعذيب كبرت وصرت اتخيل نفسي انضرب اتخيل نفسي تتعذب واعيش الوجع مرتين...
ردت انسى واعوف ذكرياتي بمكانهن ماردت شي ولاطلبت شي من أحد بس ردت امشي بسلام...

جان عندي امل اسافر واعوف المكان الما شفت بيه راحة ابد جنت منتظرتة يوم يوم بس للاسف احنة مابيدنة شي كلة بكيف القدر...
المأساة هي ليست دخيلة لدي وانما هي من أهل الروح.
جسمي يون علية وراسي ينتگ من الوجع فتحت عيوني بثقل احس مضروبة براسي عيوني دور بالمكان اني وين...
المكان غريب گدامي براميل وريحة نفط قوية رجعت غمضت عيوني يمكن حلم اي اكيد حلم هسة اكعد اني دائما احلامي تخوف وباماكن غريبة...

دعيت من كل كلبي يطلع حلم وافتح عيوني بغير مكان رجعت فتحتهن ودموعي نزلن ادية مربطة...
حاولت اتحرك اريد افتح ادية ماگدرت صرت اشاهد دموعي تنزل على التراب وتخلي اثر...
حركت جسمي بتعب رفعت راسي المكان كولش جبير اشبة بالمخزن كلة براميل والنضافة معدومة بية اكو فتحة باخر الحايط يدخل منها ضوء الشمس...
شكاعد يصير وياي معقولة هاي حقيقيه اني جاي أمر بيها لا اكيد مو حقيقة ضحكت بستهريا واني اذكر مقطع من فلم...

البطلة شافت انواع المشاكل والعذاب واني مندمجة وياها ومتاثرة وبالاخير كعدت من النوم طلع كل المرت بية حلم اكيد اني مثلها يجي يوم
وأكعد من هذا الحلم واضحك من كل كلبي...
نزلن دموعي احتاج ايدي تمسحهن اليوم حتى دموعي مااكدر امسحهن صارن ينشفن من وحدهن وين يوصل بية الزمن بعد أكثر من هيج...
حسيت بخطوات قادمة باتجاهي ماكدر اشوف منو راسي بالارض مشمورة بعشوائية احسهم صارو وراي
انسحبت وصار ضهري ساندة الحايط...

باوعت بوجوهم أشخاص يطلع عمرهم بنهاية التلاثين ويمكن اصغر سمران شعرهم خشن
لابسين اسود وياهم شخص منقب والباقي لا وجوهم طالعة...
احس نفسي بفلم هندي ضحكت بسهتريا احس الاوتار الصوتية كامت توجعني سكتت ودموعي تنزل مسحت راسي بكتفي حجة واحد بيهم...
-شبيج انتي خبلة.
رديت عليه برود: -من زمانننن
دقيقه صمت احتلت المكان حجيت برود: -شتريدون من عندي اعرفكم شي ماذية واحد بيكم شكو جايبيني لهذا المكان...

راد واحد بيهم يحجي وهو يعض بشفتة لزمة الملثم من ايدة ورد عليه...
-احنه ماعدنه شي وياج مشكلتنة وي حبيبج...
من كال حبيبي لزمتني متلازمة ضحك نفسي نگطع من كدم ما ضحكت رفعت راسي الهم و حجيت مبتسمة...
حبيب هههههه منو هذا سعيد الحظ الصار حبيبي
رد عليه واحد سمين...
-هيييي كافي ضحك وخلينة نفهم شتعرفين عن حبيبج الضابط وشيسولفلج عن شغلة اكيد بوسة
وحدة تخلينة ينسى دربة ويجاوبج...

سرعان ما تغيرت ملامحي وحجيت بصوت مبحوح.
انجب واحجي عدل يا صخام هذا التحجي عنة الضاهر انتم مشتبهين بالعنوان بس ترة عادي صايرة
هواي وهسه احجو عدل وفتحوا ادية بسرعة...
-لا تراوغين وتسوين روحج الملاك المنزل من السماء حيدر حبيبج عداوتنه وياه وانتي الراح تاكلينها نيابة عنة أو هي مو نيابة عنة وانما نحرگ گلبة بيج...
فتحت عيوني بصدمه وصوتي كوه يطلع.
انت شتحجي حيدر حبيبي منين صار حبيبي.

-من زمان حبيبج طبات وطلعات بس والله متونس ونسة مثل حضنة ماكو بس الزرگ والمفحمات بس هو وين ضابط والفلوس تلعب بجيبة لعب...
حجيت كازة على سنوني...
حيدر مو حبيبي ولا اعرفة ولاتحجي بطريقة وصخة لا اخليك تنعل الساعه الشفت وجهي بيها...
طكوها بضحكة سوة دنگ واحد بيهم لمستواي وحجة بقذارة...
-ترة حيدر مايفيدج يضحك عليج بس يتونس بيج ويشبع منج لاكثر...

احسن ماتموتين وهذا الجمال يطمة التراب مستعد ازوجج وأكمل وياج مو بس للونسة اخذج لان الصراحة انتي كلش عجبتيني...
كميت القذارة بصوتة وشكلة والكلام الحجاة متنوصف صحت بصوت عالي...
لللللك حيووووان وخر من عندديي قذرررر
حك طرف راسي بالمسدس وكال...
-الضاهر انتي بايعة بس لحيدر موقع علية ابن الذين
حجيت واني افح من العصبية.
شتريدون من عندي؟
-الضاهر تحبين التكرار هواي قبل شويه كنالج.

سحب كرسي وكعد مقابيلي حجيت موجهة كلامي اله: -مااعرف حيدر ولا عندي علاقة بيه افتهمتوووو
اذا عدكم مشكلة وياي كولو
ضحك ودخن جكارة سحب منها نفس وزفراة.
-والبيت الرحتي انتي وياه آلة الضاهر يأخذ ذوقج يريد يرتبة لعيونج بس تدرين عيونج يدوخن.
حجة الكلام وعض شفتة وشكلة كلش قذر ردت اتقيء روحي لعبت رديت كاتمة غضبي...

انتم لو بيكم خير رحتو واجهتو وصرتو زلم مو جايين تأخذون ثاركم مدري تكفون لنتقامكم من بت ماتقربلة شي بس مااعتب عليكم لأن انتو جريذية
شاردة من عندة اكيد...
كلامي استفزة كام من الكرسي ولزم المسدس بالعكس وتقرب علية رفع أيده راد يضربني بيه غمضت عيوني ورة شوية شفتة واحد يدفع بية
وطلعاة سحل والكل طلع...
تنفست بصعوبة وجسمي كلة ينتگ مابية حيل اكوم
احس نفسي مخدرة هلن دموعي كمت احس حرارتهن بكلبي...

كمية القهر البداخلي ماتنوصف صرت انقهر على نفسي شكد تاذت شنو ذنبها لأنها بجسدي زين شوكت ترتاح...
ترتاح فقط إذا انفصلت عن الجسد وتحررت منه بذيج الساعة ترتاح لعل تتحقق امنيتي وانجمع بعائلتي يمكن استجابة الدعوات الميتين انقلبت...
غمضت عيوني ورحت بغير عالم مااعرف شكاعد يصير وياي وماادري شكد مر وقت واني على وضعي عيوني تراقب بهدوء من خلال الفتحة الشمس اختفت صار الجو اضلم...

الجو هادء بحيث صوت نفسي اسمعة احتاجيت بهالوقت اسمع صوت باسم الكربلائي خصوصاً بمثل هذا الهدوء اركز بكلماتة والحانة...
مر بذاكرتي مقطع حافضتة آلة يكول بية...
انتهينة وتركتلك ذكرياتي.
وبصوركم تلگة دمعة امنياتي
تلگة حسرة من دعائي في صلاتي
بحياتي أنته غايب وبمماتي...
حسيت هذا المقطع يلامس روحي فعلا هو غايب بحياتي وحتى بمماتي مراح يحضر اتذكرت قبورهم.

تفطر گلبي شگد حجيت وصوتي طبگ ردت اسمع كلمة بس وين اكو موتى ترد...
بهل الأثناء دخل شخص رجعت نفسي على الحايط جان شايل بيدة ماعون بية اكل خلاة مقابيلي وابتعد شويه يباوع بحقارة ويفر بشواربة...
باوعت اكو مسدس بخصرة سمعت صوت عالي برة وسيارات انطلقن حجيت بابتسامة جانبية على وجهي...
عاشت ايدك نعمة الله من ذكرتي ماانسالك هذا الموقف ابد
رد عليه بحقارة ونضرات قذرة: -ادللي.

ابتسمت وقدمت ادية كدامي حجيت واني اباوع عليهن: -شلون اكل.
دنگ يفگ بيدي بحيث صار كولش قريب وسلاحة صار بوجهي فل ايدي وذب الحبل بقى على وضعة
وهو يعض بشفتة ابتسمت بوجهة وحركت ادية صفن
بوجهي حركت ركبتي وهو مثل السكران...
بلعت ريگ وبحركة سريعة سحبت السلاح ودفرتة بمنطقتة بقى يتلوى لزمت المسدس بالعكس وضربتة اسفل راسة اغمى علية رجعت ضربتة بجبهتة كلت لا يكوم...

ضحكت بانتصار وتفلت بوجهة فريت جسمي بالمكان جان مثل المخزن وبية براميل بحيث اليدخل يشوف
بس براميل ميخليني وراهن...
درت وجهي شفتة على وضعه مشيت بخطوات حذرة بين الحيطان للباب جانت طلاقة مفتوحة قليل ترددت اطلع خفت واحد بيهم يلاگيني جريت نفس وفتحت الباب على كيفي...
طلعت راسي شفت المكان فارغ تنفست براحة طلعت خارج المخزن واني افكر منين افوت ماحسيت غير ضربة قوية على راسي خلتني أفقد الوعي...

زينة...
مر يوم كامل على خطف لبوة واي خبر ماكو احساس غريب وعقلي يصدع بالافكار اكيد قتلوها اكيد هسة فارقت الحياة وصارت يم أهلها يمكن هسة هي فرحانة لأن محد الها بهاي الدنيا...
لزمت راسي اريد اوكف الأفكار تعبت كافي روحي جاي تنسلب مني غسلت ونزلت جوة لكيت عمتي كاعدة تقرا قران بخشوع وصوتها واضح...
كعدت وراها وخليت ادية على وجهي وصرت ابجي بصوت عالي صدقت واجت حضنتني وهي تهدي بيه...

-ولج يمزيونة دبسج عاد مايصلح تبچين على البت ادعي الله يخلصها وأن شاء الله بحيل الله ترجع.
نذر علية إذا رجعت اخطبها لحويدر.
زينة -مسحت وجهي ورفعت راسي من حضنها حجيت بصوت مبحوح...
بس هي ماتريد تزوج وهذا نذرج يضل برگبتج شوفيلج غير نذر.
-خاب جا شني درينة عيونها خضر جا هو حويدر عايز اشو يخبل احلى من عليوي الاملح طول بجمال بهيبة بعد شتريد هاي الفرخة...

زينة: -ابتسمت وبرطمت شفتي: -لاتحجين على علاء ترة هو حنطاوي مو املح، وشدعوة ترى حيدر مو ابنج...
-خايبة شني عود هم ماترضين احجي علية والله حض عده بعد شيريد وهذا حويدر عادتة مثل ابني
وكلت اعرسلهم سوى بس بعد عليوي لگاج وهو ضل.
ويجي ذاك اليوم وشوف صاحبتج كلت هاي لو لحويدر لو ماكو ماكو عبن الصدگ هذا ابني يضل يفيگ علية اني مرتي دكتورة وانته لا...
زينة: -يعني بخطبتي من كتيلها اخطبج لحيدر جان قصدج.

-جا المن لابو علاء بس هي وين كبل كاللت لا خالة ماازوج خاب دشوفي الا ادبج بعرسها واكول كوله محد كايلها...
زينة: -بقت تصفگ بديها وتكول...
-وعلى عناد العاندوني وكلاص شربت شربوني
عود ذكريني وخل اذكرها مااريد ازوج نشوف ياهي الماتزوج.
زينة: -عندج ثقة كولش عالية هي راح تزوج حيدر.
-جنچ ما متابعة الافلام الهندية من البطلة تسرسح وتخطفها العصابة ويجي البطل فحطان من الركض.

ويطيحلهم دگ وشمر واحد وتطيح عشرة وينهيهم نهي وبعدين ينقذ البطلة وبالنهاية يزوجون...
زينة: -شنو عمة تابعين افلام هنديه الضاهر حيل متأثرة بيهم
-جا واحد وين يروح تابعت يمن مليت بس شني يخلون عندك واهس للتدفر كله بوكسيات وجلاليق
بس لو اكض المخرج اطيحلة بالشحاطة على راسة
زينة: -هههه والله عندج سوالف، أن شاء الله يتحقق الكلتية كولة ويصير حيدر نسيبي شريد بعد...

-يتحقق لاتخافين وهسة امشينة نسوي رويگ عبن معدتي كامت تحرگني وراي دوة...
زينة: -كلام عمتي طمني ورجعلي الواهس رحت اسوي ريوك مقبلت كالت مابيج حيل وبعدج عروس
صدوك احس رجلية مايشيلني كعدت على الكرسي
وهي طگ بالبيض...
دخلت حماتي تفرگ بعيونها: -صباح الخير
زينة: -صباح النور
-هلا بوسونة
وسن-ختمت لصديقتج لبوة ختمة بنية الفرج وأخذت خيرة بالقران الها زينة بيها خير أن شاء الله تطلع بخير.

زينة: -من هذا الموقف كولش كبرو بعيني وبين معدنهم من البداية رغم هما مايعرفون لبوة بس بالخطبة والعرس تعرفوا عليها يمكن تأثروا مثل مااني متأثرة عليها وأكثر...
عمتي وحماتي ومرت حماي سون ختمة وكل شويه وحده داخلة علية يطمنن بية ابد مخلني وحدي
وهاي تجيب الاكل ويحاولن يوكلني...
الصراحة اني كولش محضوظة بهيج عائلة لازم أحافظ عليهم...

بدينا يوم جديد واحداث مجهولة اتصل موبايلي احس كلبي وكع لزمت وأيدي ترجف وكع من ايدي
وكلني اخض احس هذا الخبر الصارم...
شالت عمتي الموبايل وفتحت سبيكر اجاني صوت علاء من سمعت صوتة دموعي وحدهن نزلن...
علاء: -ها زنو شلونج.
-ها يمة عللي كول لكيتوها يو بعدكم شني الاخبار
علاء: -ها يمة لا تخافن حددنة المكان وهسة طالعين ماضل شي ساعتين بالاكثر ونرجعها...

-كفو منكم جا انتم الحررتم الموصل من حلگ البغدادي والانصاري تصعب عليكم هاي من فدوه اغديلكم جيبوها سالمة...
علاء: -ان شاء الله يمة ماكو شي عود مسوين رواحتهم اذكياء ويخابرون دولي بس وين ماتمشي
علينة لگفناهم وهسه طالعين...
-حيدر المفلوك شلونة خاب ضجت علية هسة صاير بحالة...
علاء: -كلشي يهون من ترجع سالمة الله يعينة حالتة حالة يمة صدك زينة وين خو ما صاير بيها شي.

-والله يا يمة بس تبجي موتتني ماتفعل تسكت من البارحة عيونها ورمن من كثر البجي...
علاء: -هسة هي يمج انطينياها.
زينة: -مسحت وجهي واخذت الموبايل حجيت بصوت مبحوح من البجي: -الوو
علاء: -ها زنزن حبيبي شبيج ما تكليلي رحمة للكائنات وعلى نجيبها سالمة لاتخافين جا اني شكتلج مو كتلج بس ادعيلها...
زينة: -هو ادعيلها فدوه علاء خبرني من يصير شي مو تخليني احترگ...

علاء: -ادللي شكم زنزن عندي تريكي مو تبقين بدون اكل علمود اخذج الها يلا باي اجانة الأمر...

لبوة...
وجع براسي مو طبيعي حتى عيوني ماگدرت افتحهن من الوجع اشم ريحة ترابةمخلوط وياة نحاس فتحت عيوني راسي على الأرض المليانة وصاخة وادية مشدودات بقوة...
وجع بجسمي مو طبيعي ومنا بدون اكل مااعرف شكد مر وقت ولا ادري بيش الساعة...
غمضت عيوني داعية تنتهي هالمهزلة ويتنهي عمري وياها منو يسأل علية لو منو يطلعني منا اب ام إخوة...
اجة بالي طيفة الغالي هسة لو هو موجود ماصار وياي شي مو زين...

شغلت نفسي باسترجاع الذكريات جانت عطلة نصف السنة جنت بالصف الثاني الدنيا الضهر طلعت العب بالبستان والگة گدامي مازن وصاحبة علول يم إيلام
حجاية من عندة وحجاية من عندي تكامشنة وبيومها انكتلت كتلة معدلة...
رجعت للبيت وجهي احمر وشعري منتف لكيت على بوجهي تفاجأ من حالتي من سألني كمت ابجي وحجيتلة الصار...
مسح دموعي بيدة وهمس بذني لبوة بنتي قوية ماتبجي...

اخذني لازمني من ايدي للمكان البية هما لزم مازن واشرلي براسة هجمت علية راچديات وخراميش ونتفت شعرة وعضيتة خليت يصرخ وجهة صار احمر...
شألني ورجعني للبيت واني خربانة ضحك على شكل مازن بوكتها حسيت فرحة بداخلي وحسيت إلى سند صار محد يفكر يحجي وياي كلمة يخافون من ابوي...
ذرفت دموعي بقهر واني اشهگ...
كوم و شوف لبوة الجنت تكول عليها قوية اليوم أضعف منها ماكو لبوة من رحت صارت تبجي على أقل شي...

كوم وشوف بعينك شوف لبوة انضربت كوم واخذ ثأريةمنهم اطلع وراي هداد من رحت ولهذا اليوم الكل استحقرني لأن محد يطلع وراي لأن يتيمة
مالي احد بهل دنيا...
نشف الهوى دموعي رفعت راسي بصعوبة باوعت على الفتحتة البل حايط صبح الصبح بدينا يوم جديد واني مشمورة محد بحالي...
صرت اشهگ بصوت عالي ومغمضة عيوني اليوم لازم اسافر هذا الموعد صار شكد انتضرة المفروض هسة اني بالمطار...
راح وتحطم حلمي للمرة الألف الوجع سرى بروحي.

صرت اصرخ احس الاوتار الصوتية تگطعت...
طلعووونيي اريددد اسافررر الطيارةةة راح تطيرر
احلامي طارتتتت شتريدون انطيكممم بس خلوني
اطلععع انتم بيكم خيرررر تعالو اقتلونيي الجبناء
انتم عاررر على إلزلممم...
نفسي انگطع ومحد اجة منهم عيوني كامن يحرگني من البچي وخصوصا من اتذكر اليوم بدايتي مثل هذا اليوم مودعة الكل مثل هذا اليوم مودعة ومقدمة شكري وامتناني لدكتور محمد...

مثل هذا الوقت اني افتر بجنطي بالمطار ومودعة العراق بنضرة حزينة واعوف حزني بية...
جنت مخططة ومفكرة منين ادخل ومنين افوت ومحضرة لبسة كاملة من قاط وساعة وحذاء وعطر
وجنطة منسقة وياهن...
جنت اتخيل أجواء البلد وشلون اتاقلم على الوضع
شقتي شلون ارتبها اتعرف على جيران اتمشي بين
ناس ماتعرف عن حزني شي...
كولشي اتخيلتة وخططتلة صار رماد وطار بالهوى
جان عندي واهس وامل نبض بداخلي من جديد.

واني افكر بالتغيير الجذري الراح يصير...
ليش مامكتوبلي الفرحة ويتحقق شي واحد رايدتة
يمكن تكون النتيجة النهائية مرضية وتسافر روحي
واصير بنص اهلي...
شكد حلو هذا الشي فعلا يمكن القدر ينصفني هالمرة
ويحققلي طلبي الاخير...
ليت كل هذا ينتهي ولا تبقى حتى الذكريات...
افتح شوية وافقد وعيي من الجوع ومن الالم
الضربة جانت قوية والتخدير قوي آذاني كولش...

سمعت صوت خطوات باتجاهي فتحت عيوني جفلت من الخوف من شفت نفس الشخص الضربتة راسة ملفوف واجة باتجاهي والشر يتطافر من عندة...
يمشي بضخامتة ويضحك غمضت عيوني ورجعت
فتحتهن صار مقابيلي كلبي حسيتة راح يوكف
حجة بصوت استفزازي...
-جنيتي على روحج اليوم تطلعين جثة...
شفتة اندفع ليورة شفتة نفس الشخص الملثم حجة وياة.
-انت ماعندك عقل تريد تذبنة بالتهلكة تعرف هاي منو
وحبيبت منو لو نسيت.

-اعرف ومثل ماهو متونس اني هم اريد اتونس واخذ بثاري بس تعرف تشگ راسي.
-تريد تتونس هسة اجيبلك مياردة ولليل تهزلك شتريد اجيبلك بس جفينة شرك...
-مااطلع منا ابد الا اضوكها دشوفها صغيرة وحلوة
تطلع الواحد من دينة.
-الحجي ما يفيد وياك إذا أنته ما رايد روحك احنة نريد رواحتنا حيدر ينبشنه نبش ويمثل بجثثنة
واحنة عايشين...
-شوف ترى اني مو طماع نتشارك المقسوم ومتع روحك وياي.

-الضاهر أنته ما ماكلها من عده ولك هذا مجرم إذا لزمك تصيح التوبة يا ونسة هاي عوف البنية بحالها ماتشوفها كوة تتنفس إذا ضلت على هل حال متضل عايشة.
-اريد ثأري اطلعة من عدها
-دمشي امشي ابو ثار لاتخليني اخابر ابو شداد
-وصلت لبو شداد شني جايبينها نباوع عليها شلون نايمة...
-انته عقلك ملحوس مايفيد
-لا لا راح اطلع عوف ابو الخبزة لاتحرگة علي.
روحي راحت على ما طلع صار التراب يدخل بخشمي.

رجعت غبت عن الوعي واني احاول اصحة...
ماعرف بيش الساعة هسة اللحظة صارت تعادل ساعات ومحد من عدهم اجة وحتى لو يجي اني مااحس...
صوت نفسي انخفض احس روحي انسحبت بهدوء
اختفى الالم البداخلي راس كمت ما احس بية...
الوجع كلة انسحب حسيت روحي بغير عالم صوت ضحكات الاطفال اجة بذني أكثر شي أحبة بهاي الحياة هما الاطفال احسهم انقياء ما ملوثين لا يحملون حقد ولاكرة...

جنت مفكرة اتبنى طفلتين واربيهم وخصوصا من اتخذت خطوة السفر هناك اعيش براحتي واسوي الشي اليعجبني اوف كلة تبخر...
الوقت يمشي والمهزلة مستمرة صعب من تلكة نفسك مرتين بمكانين بحياتك مامفكر بيهم مرة بمحكمة ومحسييني مجرمة والمرة الثانية بيد مجرمين مامعروفة نهايتي اغتصاب تعذيب قتل المجهول مخيف...
حسيت بنفسي انرفعت فتحت عيوني مااكدر امشي
ولا أكدر انطق بحرف واحد سحلني سحل يطببني بين البراميل ويطلعني...

علي اي لحضة أفقد ولو اني شبة صاحية غمضت عيوني وهو يقودني للمجهول لفحت خشمي ريحة ضريح الامام ومر الحلم الحلمتة بالامام على احس نفسي وكعت من صدوك...
ملامح الشخص مألوفة عندي بس ما ميزتة اندفعت بقوة على شخص حط مسدسة براسي وهو ياشرلي ولا كلمة...
ابتسمت بتعب وحجيت بصعوبة.
اذا انتم زلم اقتلوني مراح تخسرون شي بس طلقة وحدة وراح ابريكم الذمة بس خلصوني من هالعمر.

حجيت الكلام وهو يمشي بيه اسمع صوت شخط سيارة وراها دراجة فاجاة وكف تركني وكعت على اركبي ماعندي طاقة اوكف...
اجة بذني صوت الرمي بس بعيد شوية ورجعت انرفعت ويمشي بية بسرعة وكف وتنفست بصعوبة وتعب واني مغمضة عيوني ودموعي تنزل...
ترك ايدي ورجعت وكعت واسمع صوت مرادم صوت شخص ينضرب واني بين الوعي ولا وعي...
حسيت بانفاس قريبة علية سحبت نفسي ليورة احاول ابتعد بكل طافتؤ وعيوني تغفل من وحدهم.

طبطب بهدوء على خدي بديت افتح عيوني اريد اعرف منو...
طبع الحلم والشخص الملامحة غير متعارفة بالي
بديت اميز الشخص الكدامي نفس ملامح الشخص الشفتة بالحلم...
الروية عندي غوشت من كثر الدموع وادية مشبگة مسح عيوني بدية الخشنة اتضحت عندي الرؤية
لزم خدي بقلق وحجة وايدة ترجف...
انتي بخير أحد اذاج.
هزيت براسي حضن وجهي لصدرة صوت شهگاتي مسموعة بعد عني وفتح ادية لزم ايدي قوي وضغط عليهم حجيت بصوت مبحوح...

حيدر انت نفسك الطلعتني من الحفرة.
عقج حواجبة وحجة بصوت ناصي...
لبوة صيري قوية لاتنهارين اطلع حگج من عدهم واحد واحد وحگ اسد الزهرة بس ارجعي لبوة القوية لا تخوفيني عليج...
مسح دموعي ورفعني من الكاع آذاني صرت ما اسمع بيهم شي الا الأصوات العالية كولش...
حضني من كتفي ويمشي بية على كيف وراة ماادري اني وين صرت فتحت عيوني برعب من سمعت صوت طلق كولش غريب لزمت ايد حيدر وصوتي يرجف...
حيدر عوفني اموت روح وراك أهل.

خلاني وراة ويرمي وطلقة اجت بالبرميل خلتة طشار انترست الگاع نفط...
جلبت بية بقوتي من ورة خفت لا يصير بية شي صار رمي قوي حيدر يرمي على شخص والثاني يبادلة...
سكت الرمي ومشاني وراة فتحت عيوني بصدمه من شفت الشخص الملثم مطروح على الگاع يرفس روحة جاي تطلع تركت ايد حيدر ونزلت بالگاع يمة...
باوعلي بتعجب وهو يكول: -شسوين
مسحت وجهي واوضاعي مخربطة احس روحي بين الوعي ولا وعي وايدي ترجف حجيت واني اباوع بعيونة.

حيدر راح يموت جيب شي امنع النزيف...
جر ايدي ورفعني حجة بغضب...
طبة طوب خل يموت محد مودي علية وثانيا هو خطفج شلون تريدين تساعدينة...
لبوة: -مهنتي اساعد الكل حتى لو عدوي احنة اخذنة قسم أمام الله وهو بالذات ساعدني وما خلة واحد يتقربلي...
حيدر: -امشي خلي ملك الموت يشوف شغلة
لبوة: -باوعت علية بقهر ودموعي تنزل رفس برجلة وصار جثة هامدة لاحس ولا نفس...

المكان عبارة عن تراب ودخان من الرمي اذني ما احس بيها شي احس انطرشت...
امشي وراة ودموعي تنزل بغزارة شفت واحد منيشن المسدس على حيدر كلبي وكع ضغط على الزناد...
صحت بصوت عالي حيدر لااااااااا.