رواية قوارع وادي الألغاز للكاتبة حوراء السعيدي الفصل الخامس والعشرون
زُها .
واگفة جافلة بمكاني متصنمة تصنم بالليَّ دا أشوفه گدامي؟ بنت يطلع عمرها بعمري تقريبًا مرمرية بالأرض داخل هالغرفة الليَّ ريحتها تگتل گتل و تخوف مُرعبة و حالتها مُزرية لدرجة، و الليَّ خلاني أنصدم أكثر هو حالتها چانت أيديها مربوطات بأكثر مِن رباط، و شعرها قسم مگصوص منه و قسم لا، وجها كله كدمات ضرب و الحال يعصر الگلب عصر.
بلعت ريگ مترددة أدخل جوا، بينما عيونها تتوسلي أدخل و أنقذها مِن هالمكان التعبان و القذر، بسرعة ألتفت مِن صارت هجمة خطوات الداخل المكان الواگفة بي اني و دخلوا الكل أول واحد دخل يركض هوَ حسن بوجوه مخطوف لونه و تابعه فضل
-حسن: زُهاااااااااا
دخلت عمتي نجود وراهم و بوجه و ملامح ما تتفسر، أتسعت عيونها أكثر و مبحلقتهن مِن شافتني گدام الباب و فاتحته، فضل واگف و ما فاهم شصاير.
-فضل: زُها انتِ صرختي؟
هزيت براسي و جسمي على طوله يتراعش و ألهث بأنفاسي.
-زُها: هاي ب...
قاطع كلامي صوت عمتي نجود مِن أجت متقربة مني و ما فهمت نظراتها هيَّ تخزرني لو تتوسلي أسكت لو شنو بالضبط! وگفت يمي لازمة معصم أيدي بقبضة بيها نوع مِن القساوة و القوة بحيث بقيت صافنة بتصرفها و ليش ما تريدني احچي شنو شفت.
-نجود: هاي حمامة هنا مو تدري عبوسي عنده كم طير مربيهن
-فضل: حمامة داخل البيت؟
-أييي أييي.
رفع حاجبه فضل ما مقتنع بكلامها و رجع باوع الحسن الواگف يباوعلها بنظرات شك، بسرعة هيَّ دارت وجها بأرتباك و ايديها عيوني مراقبتهن يتراجفن سدت الباب على البنيه الليَّ بداخلها شدا يصير؟ و منو هاي المحبوسة هنا؟
-زُها: لا تچذبين
دارت عليَّ متفاجئة مني.
-نجود: شنو هذا الكلام ماما!
-لأن دا تچذبين!
-حسن: مُمكن تفهمونا شصاير؟
-فضل: ليش صرختي زُها؟ شصار.
رجعت عيونها مبحلقة بأتجاهي بصدمة مِن كلامي، مُستحيل أسكت متأكدة هالبنيه شغلتها مو خالية مهما كانت مسوية مو مِن المنطق تكون بهذا الحال و لا منطق تعيش داخل هالغرفة بهاي الطريقة
ما أهتميت الكل النظرات الليَّ توجهت عليَّ و لا ال عمتي، دفعتها بخفة مِن گدام الباب ودخلت بخطوات سريعة أتجااه البنيه وهيَّ تصيح ورااايَّ.
-نجود: عوفيهاااااااااا ما تستااااهل عوفيهااااا زُهااا.
أسمع الأصوات الشباب و فضل يسأل بيها بصوت عالي و مسموع.
-فضل: عمه شكو بالغرفة؟
گعدت گدام البنيه وجها صاير خريطة هم متعذبة بالضرب و هم دموعها ما ناشفة، نفخت بغضب و صحت بصوت عالي.
-زُها: حسسن فضل تعالوووا أدخلوا
و ماچذبوا خبر أجوا دخلوا يتراكضون و أنفتحت عيونهم بصدمة ماتقل عن صدمتي، و الليَّ جَذب نظري ملامح فضل شلون تغيرت و حسيت صدمته تفوقت على صدمتي وصدمة حجي حسن.
-فضل: أيلاف؟
أيلاف؟ منو هاي؟ ما أهتميت بعد الشيء البنيه حتى حلگها سادس بشريط لاصق، مديت أيدي بهدوء شلعته شهگت بالنفس و تحسها چانت مختنگة، نزلت أيديَّ إفتح بالرباط الرابطينها بي مثل الحيوان و عمتي فوگ راسي تحچي وتذم بيها.
-نجود: هاي حتى حرررررام تعيشششش
-زُها: مو أنتو الليَّ تقررون الأنسان يعيش أو يموت، رب العالمين هوَ وحدة الليَّ وهب هالروح بأجسادنا و هوَ الوحيد الراح ياخذها.
گومت البنيه و فضل لا زال جامد بمكانه خلاني أستغرب مِن وضعيته و موقفه الليَّ حتى الحجي لاحظه يعني چان غريب بشكل يخليك تشك أكو شيء غريب!
سحبتها موگفتها و جسمها يتراجف مِن البرد و الرطوبة الليَّ بهاي الغرفة تصل صل، حضنتها أهدي بيها و عيونها كل الخوف محطوط ومقيم داخلهن، صارت گدامي عمتي مانعتنا نطلع.
-وينننن ماخذتها
-أطلعها مِن هالقذارة
-لا تسويلنا مشاكل
-عفوًا؟ مشاكل شنو؟
-ويَّ أخوها.
-و فد قندرة أخوهاا و منو هذا أخوهااا؟
-أبني عباس
رمشت بثگل بعيوني و أنظاري رجعت تباوع للبنيه يعني هاي البنيه الليَّ أسمها أيلاف تصير بنت عمتي؟
-قصدچ هاي البنت بنتج انتِ؟
-ياريتهاااا ميتة بطني و لا مخلفتهااااا
قشعر جسمي مِن دعوتها و هيَّ تدعي عليها مِن كُل گلبها وين! ذكرتني ب أمي و كلامها القاسي الچانت تشمره بوجهي بدون أي أهتمام.
-زُها: شنو هذا الحچي عمة؟ شلون تحچين هيچ على بنتچ وتدعين؟
ما جاوبتني و بقت عيونها تجدح بنار الغضب أتجاه بنتها، فقدت توازنها البنيه بين ايديَّ و هنا أضطريت أتواقح بتصرفي ويَّ عمتي لأن البنت راح تموت بين ايدينا و گدام عيونه، دفعت عمتي بخفة معتذرة منها و طلعتهاا مِن هالخرابة الحابسينها بي
ما گدرت بعد تمشي وگعت تون و منين ما ألزمها تشهگ مِن الوجع بقيت متعجبة، مددتها و هيَّ لازمة أيدي بقوة تتوسلي بنظراتها ما أتركها همستلها أطمنها.
-زُها: ما أعوفچ.
أرتفعت أنظار عيوني للواگفين لا عمتي الليَّ مفهمتنا شكو و لا اني و حسن و فضل فاهمين شيء، و هنا صفنت بعيون فضل الليَّ ما أنشالت عن أيلاف و شلون نگلّبت حمر دم، طلع صوته بهدوء سائل عمتي نجود.
-فضل: عمة!
-نجود: شترررريد فضلللل شتريدددد هااااي صخمت وجوووهنااا
-فهميني شصاير؟ ألف مرة سألت شكو وليش أيلاف هيچ حالتها؟
وبين هالهوسة كلها أباوع الحسن أنحنى المستوى الأرض ورفع حجابي الليَّ نزعته و عيوني تباوع بنظرات تريد تفهم الليَّ دا يصير، تقرب مني حاطة بحضني بدون ما يباوع علينا و رجع مركز ويَّ فضل و عمتي نجود
-فضل: غيرررر تحچي وحگ سبع الگنطرة راح توگفين گلبي
رفعت عيونها عمتي بأتجاه فضل و نظرات الخجل مستوطنة عيونها و حچت بخنگ نازلة دموعها و هيَّ تحچي بخذلان.
-نجود: عمة فضل أعذرنا بَس أيلاف ما تناسبك تستاهل الأحسن منها
بلع ريگه فضل متفاجئ مِن كلامها بَس ما أهتمله ورجع يسأل عن السبب الأساسي وره هاي حالتها المُزرية.
-فهميني شسوت؟
-شردت ويَّ أبن ناظم و لزمهم عباس و أبن عمه مِن أسبوع
ما أعرف شنو الليَّ أحچي عن ملامح فضل شلون صارت و لا ملامحي و لا ملامح حسن شنو الليَّ يخلّي بنيه مثلها تمشي بهذا الطريق بدون ما تخلّي أبالها للنتائج و هيَّ بمجتمع واضح شنو؟
شدّ فكه فضل و عيونه صارت تجدح جدح بالغضب ضميت أيلاف الحضني أكثر لو بيدي أضمها بنص گلبي مِن النظرات الليَّ صارت عليها، دارت عيونه ببطء و هيَّ بسرعة ضمت وجهه بصدري تتراجف وتناشغ بدموعها، ما رد و لا حچى شيء عافنا وطلع مِن كل البيت
هوَ طلع منا و هيَّ ركضت تريد تسحبها مني، البنت لازمة بملابسي بكل قوة و أمهااا تجرجر بيهااا.
-زُها: شسالفة عوفيهااااا.
-نجود: لا تدخلين زُها لا يجي إخوهااااااا ويذبحهاااااا زين منه و مبقيهااا عايشة لحد الآن
-حسن: صلِ على محمد و آل محمد
گعدت بالأرض تدگ و تلطم و هيَّ تعاتب بيهاا.
-نجود: شگتلج ولچ أيلاف اني شگتلچ؟ مو گتلللللچ الولد مو مِن أولامنا و لااااا يرهملچ ليشششش ما خذيتي حچااااية أمچ! حاااچيني ولچ حاااچيني شسويتي بينااااا خليتيني علچ بحلووووگ الوادم، بَس گليلي بشنووو قصرنا وياااچ هااا حاچينييييي.
-حسن: البنيه تعبانة لازم ناخذها للمستشفى أم عباس عيني
-نجود: لااااا لااااااا ما يقبل أخوهااا حلف لو رجليهااا طلعت الباب هذا يذبحهااا ويدخل سجن بيهاااا، دخيلك يمة أسترررر عليناااا
-بَس حالة بنتج تعبانة!
-ويطبهااااا مررررض محد گاللها تكسر حچايتنا وتشرد بنص الليالي
-زُها: بَس مو الهل درجة؟
-نجود: ولچ يمة أحنااا مو مثلكم هناااك، أحنا هنا بناتنا هنَّ اليرفعن روسنااا و هنَّ الليَّ ينزلنهن و بنتي سوت المكسورة و كسرت عيونااااا گدام عمامهااا ولچ اني نجود الچانن نسوان أحمويني يدورن الزلات عليَّ و مالگنهننن تجي أيلاف تقدمه الهن بدوووووون تعب كسرت عيونه ونزلت روسناااااا.
ردت احچي و أتعارك لأن البنيه متعرضة العنف مُبالغ، بَس حسن خزرني مأشرلي أسكتي الواضح فاهم عقلية الناس هنا، سحبت نفس اهدأ نفسي و أحاول أفهم قصة أيلاف.
-زُها: مُمكن تحچيلنا شنو قصة بنتچ؟ و الشخص الليَّ شردت وياه ليش ما أجه تقدملها بالأصول ليش لتجأ لهذا الطريق و ورطها وياه؟
مسحت دموعها عمتي و ما أعرف ألومها لو أوگف وياها الموقف صعب مو أي شخص يتقبله و خصوصًا هيچ سالفة حتى هناك بأمريكا عندنا لو البنيه سوتها و أهلها متطبعين بالعادات و التقاليد يجيبونها هنا للعراق و ينفذون بيها الحكم لو ما تقبلوا الليَّ سوته.
-نجود: الولد أهله خوش ناس و ينحلف براسهم بَس هوَ مر زين يا يمة شكو سالفة طايح حظها و زايعتها الگاع هوَ يسويها، لزمها أخوها مرة تحچي وياه بالتليفون و گطعها تگطع و گاللها لا تعيدينها و خلّي درس الچ يا أيلاف لااا تعيدينهاا ولو عدتيهاا أذبحج بأيدي، بَس ما تابت ورجعت تحاچي و كل ما يلزمها عباس أبني هل الوحيد عندي يگطعهااا تگطع
-حسن: چان گعد وأتفاهم وياها ليش يجيبها مِن طريق الضرب؟ هذا مو منطق و لا حل.
-نجود: وروح أخوي أركان العمت عيوني على مصابه حاول وياها شگددد بَس هيَّ التعاند و مِن أسبوع بوكي ذهبات خواتج و مرت أخوج و أشردي وياااه و هناك لازموهم عباس و أبن عمه بَس أبن الچلاب عافهاا وشرد بنص الطريق وخلاها تطيح بأيدين أخوها و أبن عمهااا
-زُها: يعني الولد شبيه بالضبط ورافضينه هيچ؟ أذا يشرب يجي يوم ويتعدل أذا هوَ يحبها صدگ.
-ياريته بَس يشرب بَس هوَ شكو سالفة جايفة مسويهاا و هاي بنتي الثوووولة معمية بي و هالطيحت روحها وضيعت مستقبلهااا حتى الجامعة بطلهاا أخوها منهاا
-وهسه وين أبنچ؟
-يطلع مِن الصبح لليل هوَ و أولاد عمامه يدورون على الولد و راحوا دگوا بيت أهله و هسه صايرة أمالخ بين بيت ناظم إهل الولد و بينه
-تمام هيَّ خطأت و خطئها مو بسيط بَس مو هيچ تسون وياها و بعدين شنو تقتلوها؟ أنتو مالگيتوهم بوضع حرج وتذبحوهاا.
-حسن: زُها!
-زُها: شنو حسن؟
-أفهمي الليَّ هنا مو مثل الليَّ هناك
-فاهمة بس.
سكتت مستسلمة النظرات حسن و كأنما دا يحاول يفهمني شگد ما راح تحچين ما يفيد، عيوني رجعت الأيلاف الليَّ مثل الجثة و ماعندها الجرأة تدافع حتى عن نفسها، جسمها نحلان، شفايفها بيض و مجرحة أثر الضرب، مديت أيدي لوجها و دگ گلبي بقوة متسارعة نبضاته مِن أيدي نچوت بحراتها.
-زُها: حسن حسن حرارتهاا مرتفعة و أذا تبقى هيچ تدخللل بنوبة صرع.
شهگت عمتي رافع أيده تهز بأشارة رفض.
-نجود: لااااا يمة لاااااات دخيلكم لاااا تطلعوهااا مناااا عباس يگتلهاا و يگتل شكو واحد هنا بالبيت
رفعت راسي متنرفزة مِن سبب رفضها الليَّ شيش أعصابي تشيش.
-زُها: شنو ماكو بگلوبكم رحمة؟ مدا تشوفين بنتچ شنو حالهاااا، ليش هيچ خايفة مِن أبنچ شنو الدنيااا ملكه ويتصرف بكيفه، ماكو شخص ما يخطأ و كل أنسان عواقبه شكلللل بَس يا بشرررر أفهموا هاي أنسانة مو حيوانة.
-حسن: ثواني مِن رخصتج زُها، الطير الأسود ما أعرف حمامه ما أنتبهت الطلع منا چان وياها؟
-نجود: أي
حچتها بصوت يتراجف و مبين أبنها مسيطر على العائلة لأن أتضحلي الكل يتراجف منه ويخاف.
-ليش؟ يعني ليش مخلينا وياها شنو الغاية مِن هيچ تصرف؟
-أخوها حطها و گللها باليوم الليَّ تموت بي هالحمامة انتِ تنذبحين و تندفنين انتِ وياها سوا.
معدتي قلّبت مِن القرف و العذاب الليَّ دا أسمعه، بقينا حايرين اني و الحجي أمها واگفتلنا مثل العظم ما تقبل نطلعها منا و لا شايفين أخوها و نگدر نتفاهم وياه، أندگ الباب و أنمدت مِن وراه أيد بناتيه بيها كيس أسود وهمست بصوت مختنگ.
-يمة ذني علاجات شوفيهن يمكن يفيدن أختي أيلاف.
بقت أمها گاعدة ولا تزحزت مِن مكانها و تباوع بعيون ذبلانة على بنتها، راحلها حسن بدون لا يرفع راسه و لا يحچي شيء أخذها منها و سدت الباب، گعد بصفي يبحوش بالعلاجات.
-حسن: أدري شنو ننطيها مِن كيفنا أحنا خلگ مهندسين شجابنا لهاي العلاجات يابه
-زُها: ماتعرف أحد هنا؟
-وين أعرف زُها حتى ماعندي أقارب هنا.
تأفأفت مِن الوضعية و لو بيدي هسه أشيلها و أطلعها منا بَس أخاف صدگ أخوها يسويها لأن متأكدة حاليًا نار الغضب و الأنتقام لاعبه بعقله، وگف حسن شامر الكيس مِن أيده.
-حسن: أني رايح أجيبلها العلاج
طلع مِن المكان بخطوات سريعة و البنيه بدأت تذبل أكثر و أكثر بين أيديَّ، مُجرد طلع حسن دخلن خواتها عيونهن حمر مبينات چانن يبچن، گعدن گدامنا و عيونهن ما أنشالت مِن أختهن و كل شويَّ دايرات على الباب بخوف.
-زُها: شبيچن بنات ليش هيچ خايفات؟
-رقية: لا يجي أخوية
-فاطمة: هوَ حلف أذا أيلاف تطلع مِن الغرفة الحبسها بيها يذبحهاا.
غصت بأخر كلمة طلعت منها ونزلت دموعهاا على أختها، حرت أنشغل بالبنت الوگعت عندي و بدأت تفقد وعيهاا لو ب عمتي الليَّ وجها صار شاحب و تعبان لو هالبنات المكابلاتنا و حالتنا تبچي الصخر، ردت بَس حسن يجي وجايب العلاج، مرت نص ساعة أحنا على هذا الوضع و بَس صوت المناشغ و الدموع واضح بنص هدوء المكان.
و ما أحس غير عمتي تخربطت ركضن عليها بناتها وحدة لزمتهاا مِن وره گعدت مسيطرة عليها و الثانية ركضت ما أعرف وين شويَّ و أجت جايبة جهاز السُكر بأيدها گعدت گدامها تريد تقيس سكر أمها بَس أيديها تتراجف خطية
-زُها: عندها سكر؟
-فاطمة: أييي.
مسحت دموعها و هيَّ تحاول تقيس سكر أمها، والله گلبي تگطع على حالهم و بهذلتهم غلطة وحدة كافلة تدمر عائلة بأكملها ، لگوا السكر عندها مرتفع وجوهن أصفرت و حارن شيسون، ركضت رقية جابت علاج و شربنهياه ونيمنها على جهة ترتاح، بقت رقية گاعدة يم راس أمها وفاطمة تفتر بين أمها و أختها أيلاف، وگفت گدامها ودموعها عشرة عشرة يوگعن و أردفت بنب عتاب الأختها.
-فاطمة: ما أريد أصير حقيرة بَس ليش دمرتينا؟ عجبج الليَّ سويتي دمرتي عائلتنا شوووفي أمي شصار بيها بسبب عملتج أيلاف وين چان عقلچ مِن سويتيهاا؟
حچت هالكلمات و طلعت مِن يمنا منهاارة بدموعها، أحس أختنگت مِن الوضعية، الثواني ودخل حسن بأيده كيس علاج و گعد گدامي يطلع بالعلاجات الليَّ جايبهن وياه، بَس أعتلت الصدمة مِن شاف عمتي.
-حسن: شبيها!
-زُها: سكر عندها
-لا اله إلا الله
-شلونها هسه؟ نأخذها للمستشفى؟
-أتوقع وضعها تحسن لأن نطوها البنات علاج
دار وجهه الرقية المنزلة عيونها و ماشالتهن حتى مِن حسن حاچاها، عجبني بنات ثگيلات، رزنات.
-حسن: عمو شلون صارت أمج؟
گوا طلعت الحچاية منها بصوت يتراجف.
-رقية: م. ما أدري
هز راسه بيأس و نهض مِن مكانه سحب جهاز السكر المحطوط على جهة و طلب منها تبتعد علمود يقيسه، گعد يم عمتي يقيس بسكرها و گلبي فرفح عليهن مِن القهرر.
-زُها: ها حسن؟
-حسن: لا الحمدُلله أحسن.
رجع يمي طلع العلاج يشرحلي عنه و طلب مِن رقية تجيب مي علمود العلاج الباقي، جايب مسكن ألآلآم و علاج للحرارة.
-زُها: شرحتله حالتها
-حسن: أكيد و حتى ما نطاني علاجات هوايَّ گال أكتفوا بذني و أذا ما تحسن وضعها نقلوها للمستشفى
حطيت أيدي جوا راسها علمود العلاج بَس منين ما الزمها تون ونين يگطع الگلب و تصير تبچي، متتت قهر على شعرها يخبل أول مرة أحب شعر طويل بَس لاعبين بي لعب.
-أيلاف: أاااخ.
شربتها العلاج و أجت رقية ساعدتني لازمينها و رجعت نامت، وگف حسن يريد يطلع و وگفته بسؤالي.
-زُها: لعد فضل وين راح؟
-حسن: ما أدري مالگيت أله أثر
-غريب!
-راح أنتظر برا
هزيت براسي وطلع بقى الهدوء مستحل المكان الدقائق كسره صوت رقية مِن جاوبت سؤالي الليَّ سألته الحسن.
-رقية: يمكن نقهر
-زُها: طبعًا ينقهر حبيبتي غير بنت عمته
-لا مو هيچ
-لعد!
-خالي وائل مِن فترة خطب أيلاف ال فضل لأن فضل يعني رايدها مِن زمان و يمكن هسه مِن عرف بالليَّ سوته زعل
-ليش وائل ما يعرف بالصار!
-لا محد يدري دا يسترون على الموضوع بين ما يلگون هذا الخيخة الضحك على عقل أختي
سكتت وعقلي ضرب مِن شغلتهم و ما أعرف شلون حَ أنقذ هالبنيه و شنو مصيرها، المشكلة عمامها عرفوا مُستحيل يسكتون حتى لو أخوها أقتنع ما يأذيها.
مرت الساعة و الساعتين يلا عمتي رجعت لوعيها و تحسها متهشة تهشم مِن داخلها، حيلها كله مهدود، أريد أطلع أشوف حسن بَس خايفة على أيلاف تبقى وحدها، طلعت جهازي دزيتله رسالة.
-زُها: وين انتَ حسوني!
مرت ثلاث دقائق وجاوبني.
-حسن: گاعد بصالة الضيوف
-خايفة على البنيه
-شلون صارت!
رفعت راسي مِن الجهاز أباوعلها نايمة و حالها يرثى له، رجعت منزله عيوني أكتب.
-نايمة
-وعمتج
-أحسن وضعها.
-راسلني ماهر يگول هوايَّ شهر تبقون أغلب الشغل راح يتعطل و هذا الشيء راح يأثر على شغل الشركة
-أرجع انتَ
-و انتِ
-أبقى بين ما تخلص فترة الشهر و أرجع
-مِن عقلج بنتي؟
-أي
-لا ما أعوفج أجيت وياچ و أرجع وياچ و طُز بالشغل و راح أحاول أستعجل بشغلتنا لأن الشهر هوايَّ و أملاكج أماكنها مرغوبة ما معقولة هالگد تطول
-بكيفج
-شبيچ؟
-ما أعرف حايرة شلون أساعد هالبنيه، نضحك على عقلها و وگعت بيها و أكبر خيبة تلقتها الليَّ حبته وضحت بنفسها علموده عافها بالخطر وشرد
-يبقى الخطأ خطأ الأثنين
-عفية أريد أساعدها حسن
-زُها يعني شنسوي مو مِن حقنا ندخل البنت عندها أهل ر عمام مِن ندخل أحنا راح يگولون على إي أساس بنتنا وبكيفنا
-يعني شنو نخليهم يقتلونها؟
-لا تدخلين زُها ما ناقصج مشاكل.
لأول مرة أضوج مِن كلامه رغم صح يعني مِن ندخل بصفتنا شنو؟ و البنيه مسوية هيچ خطأ فادح، جرت الساعات و أذن المغرب يلا رجعت البنت لوعيها بالكامل بَس ياريتها باقية نايمة و لا العذاب النفسي الليَّ شفته.
دموعها ماوگفت حاضنه نفسها بألم و وجع و عيونها على أمها الگاعدة و ما تباوع عليها.
-أيلاف: ي. يمه
-نجود: لا أني أمچ و لا انتِ بنتي، البنت الما تسمع حچاية أمها ما أريدهاااا.
عافتها وطلعت عمتي، غطت وجها تناشغ مناشغ بالدموع و مِن جهة زعل أهلها منها و مِن جهة خوفها منهم لا ينهون حياتها.
-زُها: كلشي ينحل
جاوبتني بدموع وصوت مخنوگ و منهارة على الأخير و كل ما أشوف شكل شعرها شمسوين بي أموت ألف موته.
-أيلاف: ما يتصلح شيء اني نهايتي الموت.
دخلت زوجة أبنهم هسه يلا شفتها ما أعرف وين چانت كل هذا الوقت، سلمت عليَّ و عيونها تبارع بقهر على أيلاف، گعدت يمنا و أبنها الليَّ شفناه الصبح بصفها گاعد يباوع علينا، نظراته تتنقل بيني وبين عمته، هوَ طفل أكيد ما فاهم الليَّ دا يصير
جابوا العشا محد اله نفس ياكل بَس جبرت نفسي لأن گلت عيب ناس طابخة وتعبانة و جبرت أيلاف تاكل علمود العلاج، و لازمات گلبهم لا يجي أخوها ويشوفها.
-نجود: أجيتي تشوفين عمتج تلكتج مصيبة گدامج
-زُها: مو مُهم، المُهم نحل الموضوع بدون أذية
-حلم
طبگت حواجبي مِن جوابها، رفعت حاجبي و اني ماعاجبني كلشي دا يصير.
-ليش حلم؟
-رقية: عمامي همج ومتشددين أصلًا بَس أحنا ندرس و گوا على خشومهم لأن أبوي ميت و ماعندنا غير أخوية عباس و هوَ ما مقصر ويانا
-فاطمة: طبعًا هم زلم بَس علينا لأن ماعندنا أب
حچت زوجة أخوهن وهيَّ توكل بأبنها.
-سجى: والله أخوجن يتفداجن بروحه.
باوعت فاطمة ال أيلاف منزلة راسها و دموعها نزلت مثل الشلال لاحظتها أكثر وحدة حنونة و حساسة مِن البنات ذكرتني بحساسيتي الزايدة.
-فاطمة: بَس رديناله دلاله بالأذية
-زُها: لا تخافون بنات أن شاء الله ينحل كلشي
-رقية: خوالي لو عرفوا هم راح يطبلون علينا تطبل.
طلعت عمتي مِن گعدتنا، بسرعة نهضت مِن مكاني متبعة خطواتها هيَّ أم ولابد ألها تأثير على أبنها، گعدت بساحة بيتها الصغيرة، أكو مثل الفراش گعدت عليه، گعدت بصفها ساكتة و الجو بالليل هنا يبرد ويصير يگص گص
-زُها: نگدر نحچي
-نجود: مابيدي شيء القرار قرار أبوها و عمامها
-بَس انتِ أمها
-أمري مو بيدي
-بَس بنتج شريفة؟ ما نمست شعرها منها
-شالفايدة؟ و صرنا علچ بحلوگ الوادم
-تگدرين تأثرين على أبنج.
-أبني متسودن ما باقي عقل براسه مِن سواية أخته المكسورة
-تقتلوها تتحملون ذنبها طول عمركم، أنتو مستعدين تتحاسبون أمام الله بذنبها؟
بقت ساكتة ما نطتني أي جواب و عيونها مغورگة بالدموع مكسورة كسر مِن فعلة أيلاف بَس مو حل تنقتل و تتعذب بهاي الطريقة.
و أحنا گاعدين أنفتح الباب الخارجي ودخل ولد طويل القامة أسمراني بوجه تعبان رفع راسه و أحتلت ملامح الأستغراب وجهه مِن شافني گدامه، أتقدم بأتجاه گعدتنا و وگفت عمتي صارت تنفض خوف منه عرفت هوَ هذا أبنه
أنفتح الباب مال صالة الضيوف طلع منها حسن بقوا واحد صافن بالثاني، حسن وصلتله الفكرة بَس الولد بقى مستغرب مِن وجودنا.
-عباس: منو أنتو؟
-نجود: هَلا يمه هَلا بيك ضيوف عندنا.
-حياهم اللهم بَس و لا صغرًا بيهم ما عرفتهم
رفعت أيدها وره ظهري تطبطب عليه و هيَّ تعرفه عليَّ.
-بنت خالك أركان زُها تذكّرها؟
بقى صافن بوجهي الثواني نزل عيونه و هوَ يجبر نفسه يرسم الأبتسامة بالأجبار على وجهه.
-عباس: أهلًا و سهلاً خوية
-زُها: أهلًا بيك
عافنه وراح بأتجاه حسن سلم عليه و مرحب بي ترحيب حار و هنا أدركت الولد طيب بَس الليَّ صار مو سهل عليه يتقبله.
-عباس: انتَ مراد أبن خليفة؟
-حسن: لا صديقهم و تگدر تگول مِن العائلة
-هااا عبالي مراد بيك لمحة منه حياك الله
-حي الله أصلك حَبيبي ممنون
هم دخلوا لصالة الضيوف و عمتي ركضت لجوا رحت وراها بخطوات سريعة و ما أشوفها غير سحبت أيلاف مِن أيدها.
-نجود: گووومي گووووومي
-زُها: وين ماخذتها؟
-أرجعها للغرفة لا أخوها يشوفها
-ويشوفها
-رقية: لا لا فدوة لا يشوفها حلف يذبحهااا
-زُها: ليش هيَّ حيوان؟
سكتن كلهن و البنيه صايرة مثل اللعبة منو يجي يسحل بيها و مِن گد ما وعت على خطئها وصدمتها و خيبتها بالليَّ حبته مو شيء سهل تتقبله بشيء أسمه عادي، سحبتها منها مرجعتها المكانها و عمتي تصلخ بخدودها مِن الخوف مبين ما تريده يقتلها بَس عندها عادي تبقى تتعذب داخل هالغرفة
-نجود: زُها لا تدخلين يمه
-زُها: اني صح مو مِن حقي أدخل و الليَّ سوته أيلاف غلط بَس المشكلة ما اگدر أسمح بذل أي بنيه بهاي الطريقة.
-حتى لو أخوها أقتنع عمامها ما راح يقتنعون
-هوَ رجال عائلته و هوَ الليَّ يفرض شخصيته گدام الكل
-يا يمه أحنا عشاير
-و أذا؟ على هذا التفكير لعد كم بنيه أنقتلت ظلم
محد جاوب لأن ببساطة العقلية الليَّ هم بيها غير عن عقليتي، مرت ساعة و كلنا گلوبنا دگ نبضها سريع مِن دخل أخوها و شافها گدامه گاعدة، بلعت ريگ مِن عيونه نطت و قبض أيده خازر أمه و خواته و مرته.
-عباس: شطلعهااااااااا
-زُها: اني طلعتها.
خزرني بخزرة محجر عيونه أجه يطگ و ينفجر بَس ما أهتميتله، ضرب الباب وطلع ما أتقرب منها وهنَّ بقن بقمة تعجبهن شلون ما تقرب الأيلاف و حتى عمتي أستغربت مِن ردت فعله.
أضطريت أبقى يمهم الليلة اني وحسن الليَّ رفض رفض قاطع يتركني وحدي هنا رغم گتله أرجع للفندق بَس ما قبل، و مر الليل وسواده بهاي الليلة و ناس نامت و ناس ماگدرت تنام والنوم طار مِن عيونها للأذان الكل صلى و الماگدر ينام و أخيرًا نام بعد ليلة مِن الأرهاق و التفكير.
يعني أذا أريد أحسب لليَّ نمته ما يطلع ساعة وفزيت على أثر صراخ رج البيت رج، طفرت مِن مكاني بالعة العافية و مهبوطة مِن الصوت المُخيف الليَّ صدر بأنحاء البيت وصوت عمتي شلون تصرخ مفرفحة مِن گلبها.
طلعت أركض و بَس أريد أفهم شصاير و ليش كل هذا العياااط و الهوسة و هنا دب الرعب گلبي مِن أتعالت الأصوات طلعت مِن الباب و أذا أشوف مجموعة زلم واگفين و صايرين أمالخ وبأيديهم أسلحة، عمتي و رقية و فاطمة ضامات أيلاف وره ظهرهن و حسن و عباس صايرين گدامهم واحد يدفع بالثاني.
الأصوات بدأت تعلى و حسب ما فهمت مِن هوستهم يريدون ياخذون أيلاف ويصيحون يريدون يطمون عارهم و صار الليَّ وحد متوقعة بينما أخوها الليَّ چان حالف يذبحها بأيده ما حقق قسمه و هوَ بهاي اللحظة چان يدافع عنها
بَس الليَّ صار شيء ثاني، شيء محد متوقعة، واحد منهم طفر مِن گدامهم و بكل غضب و عيون تبث حقد وسمانية و بسرعة خاطفة محد لحگ على شيء و لا لحگوا يركضوله، سحب أقسام مِن السلاح الليَّ شايله بأيده.
و وجه أربع طلعات أذني لقطتهن وزرفن گلبي قبل لا يصيرن بنص صدر أيلاف الليَّ وگعت بالأرض ودمها صار بطفولها، أنفتحت عيوني بكل قوة مِن المنظر و جسمي كله أنشلللل ولساني أنبلع و أني أشوفها گدامي صارت ترافس و تشهگ أنفاسها الإخيرة حد ما أنگطع نفسها بكل سرة و ماتت بمكانها وهيَّ فاتحة عيونها.!
الكاتبة: - تم نقل قصة أيلاف القصيرة بكُل تفاصيلها الحقيقية لغرض العبرة منها لعل تكون أحد الأسباب لتوعية في موضوع العلاقات و بعض الأسباب، أتمنى تترحمولها لأن أشوفها رغم خطئها تبقى أنثى سحبتها العواطف وراء متاهات خاطئة بالحياة وخسرت نفسها ودنيتها، و مثل ما يگولون أهلنا دائمًا البنت بسُمعتها ترفع روس و بسُمعتها تنزل روس، ربي يحفظ كُل بناتنا و دائمًا فكروا بمنطقية و عقلانية و لا يسحبكم الحرام و العاطفة خصوصًا بالأختيار الخطأ .
تبارك .
أچذب و اگول ما خفت و لا توترت؟ مُستحيل شعوري يمر مرور الكرام، رفعت عيوني بهدوء و گلبي نبضاته وحدة تتسابق ويَّ الثانية، ما چان منتبه الوجودي و مُجرد أنتبه جمدت ملامحه و أبتسامته السافلة و الحقيرة مِن ملامحه أتلاشت بشكل صدمة ما مستوعبها بيوم مِن الأيام.
أحس بلساني أنعقد عن الكلام و گلبي خفقان صابه بهل اللحظات، بقت عيوني تباوعله بأبتسامة تحدي عكس مشاعري الداخلية، نفس الملامح القذرة ما متغير منه شيء، أحس بأنفاسي ثگلت مِن قوة الرهبة الليَّ صابتني واني گاعدة گدامه صارلي شگدد أتهرب منه و أتراجف خوف مِن شكله الشيطاني بَس لا اليوم ماكو مهرب كافي تبارك كافي تتهربين منه واجهي
ردوا عليه الكل بثگل و مبين محد يبلعه غير خاتون لأن واضح نفس الصنف هيَّ وياه.
-خاتون: مساء النور خليفة
غطى ملامح الصدمة بأبتسامته الحقيرة و حاول يبين نفسه طبيعي.
-خليفة: شلونكم حبايب مشتاقين
قلّبت سمارا عيونها و تباوعله منقرفه.
-سمارا: أهنا ما مشتاقين
-هههههههههههههه هههههههههههههههه هاي سمارا هنا
باوعتله بطرف عينها و هوَ رجع يباوعلي بملامح عدم تصديق ولا زالت الصدمة مخترقة وجهه الكلللب، سحب كرسي و گعد گدامي، مد أيده گرص سيلين مِن خدها بخفة و باس أصابعه.
-خليفة: شلونها چنتي.
-سيلين: بخير
حسيتها تقيدت مِن وجوده و مبين كرهانه شوفته بَس دا تحاول تمثل أنها سعيدة بلقاءه، و مالحگ يصير شيء و دخلوا شاهر و ماهر منضمين النا، و هستوهم يريدون يحچون و دخلت تُركان بكل أناقتها وجمالها ورشاقتها خررررررررررب شگددد حلووووة الله ياخذك خليفة.
وگف جَوهر راد يطفر بَس مالحگ وجمد بمكانه مِن شمرت روحها عليه گدااام الكل وحضنته مِن رقبته بحركة سريعة مقبلته بخده، فتحت حلگي و عيوني سوا مِن سخافة المشهد الليَّ گدامي و المنظر و عيون سيلين و زمن صارت تتوزع بيني و بينهم
-تُركان: چنت منتظرني مو!
دفعها عنه يمسح بخده بغضب و عيونه تباوعلي هذا بَس لا عباله أهتم و أغاررر؟ لك ياريت تاخذك تُركان و أخلص منك، عدل هندامه خازرها.
-جَوهر: شنو هالتصرفات تُركان؟
-شبيك حياتي جَوهر
-ماهر: أوووووي حياتها
-زمن: شبيچ حبي شنو هالتصرفات الرخيصة؟
-تُركان: اه زمزم! ما شفتج
تقربت تريد تسلم عليها بَس زمن دفعتها بخفة رافضة قربها منها، بحيث مِن يمي تفشللت مِن الموقف غير أتوب لا طبعًا رجعت حضنت أيد جَوهر و تباوعلي بطرف عينها رفعت أيدها تلوخ للسافل خليفة الگاعد و عيونه عليَّ.
-تُركان: هاااي عمو خليفة.
-ماهر: لك هاااااي عمو خليفة سلم عليهاا ياعمو مو راح تمووووت لك عمو خليفة مد أيدك
-خليفة: أهلًا حبيبتي عمو
كملت سلامها و رجع ماهر يشمر عليها بسامير بَس هيَّ صنم لا أحساس و لا خجل.
-ههههههههه شبيك ويايَّ ماهر لا تزعلني منك مو أحنا أصدقاء
-يا چذااابة خاب اني أصادقها كلها ألا انتِ شبيه مسودن.
ضحكت بغنج و تدلع بحركاتها و حروف كلامها، رفعت أيدها تلعب بالخصلة القصيرة الليَّ منزلتها مِن گدام شعرها ورافعة الباقي كباية، فستانها سمائي و الحقيرة طالعة تشگ شگ، همست سيلين بخفوت.
-سيلين: لعبت نفسي
-زمن: مو بَس انتِ أريد اتقيء وين الحمامات شهل الرخص هذا
-هنيالج متزوجة بغير ولاية و ماتشوفين كل يوم هاللعبان النفس
-أيععععع لِچ شوفي شلون لازگة جسمها بجسمه.
الليَّ ريحني و خلاني بنص وقمة توتري مِن وجود خليفة هوَ جَوهر مدا يستعيرلها أي أهتمام و باله مو يمها و أي وجه ما منطيهاا و كل ما تتقرب يدفعها بخفة عنه، تمنيت أحط بيها دفرة بنص ظهرها مووووووو غيره بَس لعبت نفسي مِن الأسترخاص الليَّ دا تسوي بحق نفسها
-شاهر: تُركان ما تتفضلين تگعدين أكيد تعبتي مِن الوگفة
حضنت أيد جَوهر و جَوهر كف ايده صعد الأيدها يبعدها عنه و يستغفر بصوت ناصي وينافخ منافخ بعصبية.
-تُركان: لا مرتاحة
-ماهر: طبعًا مرتاحة أذا واگفة هالوگفة شتسوين بالگعدة
غمزلها بتلاعب وهاي الغبية تضحك تضحك؟ رغم كلامه واضح دا يستهزأ مُستحيللللللللللل شگد قرررررف يا ربي، دار شاهر وگف بصف ماهر و هم أستلموها.
-شاهر: اگلك هاي مو نفسها الشمرت جَوهر بالسجن لو اني غلطان
-ماهر: لك أووي أسكوووووت حياتي البابا مالتها و البابا حامد حلوها بينهم
-احچي عدل طيح الله حظك
-أكثر مِن هيچ!
-اگلك هيَّ مو چانت مسافرة و مرتاحين منها شرجعها
-عشق السلاطين رجعها
-و لا أرتاحلها
-و أذا تتواجد بمكان ويانا أحس حتى اني كرامتي تنهان
-هوَ انتَ منيلك الكرامة أبو تنورة
-أنچب شويهررر
-صدگ شو بعد ما شفنه أم تنورة السورية
-أخخخ مشتاقلها باجر أروحلها
-وتضربك بوحدة لك يخرب بيتك شو غليظظظ
-أموت على كلامها
-ماتشتريك بنعال تدري بيك أبو نسوان
-هم حظي.
أبتسمت الكلامهم أتوقع يقصدون صديقة الآنسة زُها مينا شفتها بخطوبة براء، أيا خايس يا ماهر حاط عينك عليها، و اني اگول شبيه ويَّ التنورات القصيرة و يتلامزون بالخفايا هوَ و الأستاذ شاهر.
رفعت حاجبي الخليفة مِن عيونه تريد تنط وتاكلني، تقصدت أبتعد منا لأن أعرف بي حَ يحاول يوصلي، أترخصت مِن الموجودين وزمن تأشرلي على تُركان عود لاطشة ب جَوهر ضحكت ما مهتمة و رجعت يم البنات هيفاء و أميمة الليَّ چانن منتظرات مني تفسير لهاي التصرفات.
-أميمة: تبوكة شدا يصير؟
-هيفاء: أذا تحبين تسولفيلنا نسمع و أذا لا براحتج ما نضغط عليچ
-تبارك: لا مو هيچ بنات شسالفة أنتو صديقاتي و أني أحبكم
-أميمة: لعد نسمعج.
عضيت شفتي و ورجفة صابت عامودي الفقري شلون حَ أبرر هاي تصرفاتي.
-تبارك: أحم بنات سمعوني
-هيفاء: غير تحچي
-الأستاذ جَوهر عرض عليَّ الزواج
و أثنينهن خزني بصوتهن وهنَّ يصيحن بصوت ما مصدگات بحيث القريبين منا كلهم ألتفتوا علينا.
-أميمة، هيفاء: شنووووووووووووووووووو
-تبارك: أش أش ولچن صوتچن خريتني حسبي الله
-أميمة: لِچ تعاي زواج شنو و ليش ما نعرف
-هيفاء: حب؟ معقووووولة؟ لا لا أنتو صدگ مستحيلين.
ما أدري شلون طلعتلي هالچذبة و لزگتها گتلهن عود أحنا مُعجبين ببعض و الأستاذ أبو وجه البريء ميحب العلاقات و طلب الزواج مني و اني وافقت علساس عاجبني وكذا و ماعرفن الحقيقة المُرة الليَّ اني مريت بيها لأن بساطة مو كلشي نگدر نبوح بي.
-أميمة: اوووويييييي فدوة يفهم والله شتسون بالعلاقات
-هيفاء: و أهلج تبارك قابلين؟
صفنت بسؤالها! ياريت لو مِن زمان حاچية و گايلتلهن عذر مثل العذر الليَّ طلعه جَوهر الخاتون و لا أنحط بهذا الموقف المحرج وياهن، و ما گدرت أرجع أبرر هذا الشي و أكتفيت بكلمة.
-تبارك: موافقين
حضنني يتباركلي و بگلبي غصة لأن چذبت عليهن و أحس هسه حتى لو حچيتلهن الثقة الليَّ بينا راح تتغير و مِن يسألني ليش چذبتي بهيچ موضوع ماعندي جواب مُقنع ألهن.
-أميمة: خاااب هاي تُركان شگت گلبي
-هيفاء: حموضة أيع لعبت نفسي.
-أميمة: لِچ تبارك شبيچ فاااهية شوفي شدا أتسوي ويَّ الأستاذ جَوهر
خطفت نظرة منهم وهيَّ بعدها بنفس وگفتها ويَّ جَوهر الليَّ عيونه ما أنشالت عني، أبتسمت بعدم أهتمام لأن مِن صدگ ما يهمني كل هذا اني حايرة حاليًا بخليفة العار.
رفعت أنظاري عليه السافل چان لا زال گاعد و بكل فرصة يرفع عيونه عليَّ يراقبني، الثواني وبدأت فعاليات الحفل و الكل أجتمع و ألقوا كلمة بمناسبة مرور كم سنة على إفتتاح الشركة هوَ و حامد و طبعًا مو سنوات قليلة.
وحسب ما فهمت و عرفت انُ هم مِن چانوا بالعراق حالتهم المادية صاعدة و أصحاب أموال و عقارات فَ أفتتاح الشركة هنا ما چان بذاك الصعوبة القوية و المستحيلة خصوصًا عندهم صديق ساعدهم بكلشي و ماعندهم موظف غبي أو مهندس مو شاطر مِن غير أولادهم الليَّ عقولهم تفر فر مِن أبتكار التصاميم و قوتهااا.
و غير يخلصون حچي! خرب بأرواحهم شگد يحچون ويتفيكون يحسسوني هذا تعبهم مو تعب أولادهم وهم يجيهم كلشي جاهز، و بعد مُعاناة مِن التمسلت كملوا و رجعت أجواء الحفل، البنات هيفاء و أميمة شافوا شخص يعرفوا راحوا يسلمون عليه.
واني بقيت واگفة بمكاني متأكدة خليفة راح يجي مقترب مني علمود يحاول يحچي ويايَّ، أبتسمت بأنتصار مِن شفته سحب نفس مِن مجموعة رجال الأعمال الواگف وياهم و أجه يمشي باتجاهي، دارت عيوني على مكان جَوهر واگف يحچي ويَّ شخص هم مبين مِن أمثاله
وگف بنفس الطاولة العار و يحاول ما يلفت الأنتباه بالجو.
-خليفة: شتسوين جاية هنا؟
-تبارك: أخذ روحك
قبض أيده الحاطها على الطاولة و عيونه تجدح جدح.
-جاوبيني مثل البشر تبارك!
-عفوًا؟ شگلت؟ بشر؟ أين البشر لا أراهم دا أشوفك حيوان گدامي لا أكثر
-نفس اللسان
-طبعًا
-و يحتاجله گص عمو
لزمت الكاس الليَّ بي عصير أشرب بي و عيوني تراقب جَوهر لا يلمحنا بَس اني أريده يلمحنا علمود تنطفي شكوكه ضدي سابقًا شافني و اني أخفي نفسي منه و متأكدة أنخلقت شكوك داخله أتجاهي، أبتسمتله باستفزاز الخليفة.
-تبارك: شلونه أبوية بعده يتواصل وياك
-خليفة: منو سمحلچ تدخلين هنا؟
-خليفة ليش تغير منطق السؤال! وترد بنفس الصيغة يا عيني
-بعدج بوقاحتج بنتي
-شنسوي أتقناها منك
ضرب الميز بخفة وعصبية ورجعت عيوني مخترقتني.
-خليفة: شتسووووين هنا أخر مرة اسئل
-تبارك: موظفة بالشركة
بهتت ملامحه و طبگ حواجبه بأستغراب مِن جوابي.
-موظفة؟ وبشركتي
-أي حلوة المفاجئة مو!
أردفت مِن بينّ أسنانه بسمانية ودمار جبينه برز مِن نص وجهه.
-منوووو دخلچ؟
-أني
-مُستحيل انتِ ماتگدرين لهيچ لعبة.
-هههههههههههههه بعدك ما تعرف بنت قيصر شتسوي
-ههههههههههههههه اگلچ شيء
-گول وفضها
-تدرين بأبوج اتبرأ منچ بالمقابل سلامة أختج جُمانة! و اگدر أسوي كلشي أريده وياچ وبيچ
عضيت شفتي مِن الداخل أسيطر على نفسي مِن الأنهيار، رغم لُبيد مِن زمان بلغني بَس بعدها ناري مِن هذا الموضوع ما طفت و لليوم كاسرني شيء بداخلي منهدم، بلعت ريگ أخفي رجفة أنكساراتي و رفعت عيوني أباوعله ببرود.
-تبارك: لا تجيب أسم أختي على لسانك النكسسس
-وينها!
-سؤالك ماله أي جواب
أقترب مني أكثر وهوَ يهمس بسؤاله.
-شلون طلعتن مِن ذاك المكان؟
-بالحيلة
قذفتها بوجهه بأبتسامه شرانية على ثغري، بينما هوَ وجهه صار ما يگصه السيف و الواضح مدا يگدر ياخذ راحته بالكلام يخاف لا أحد ينتبه عليه و يجلب الشكوك اله، رفع أيده طبطب على كتفي بهدوء.
-خليفة: دخلتي الشركتي تنتقمين!
-تبارك: لازم ماعندك خبر عمو خليفة
-خبر شنو؟
-قريبًا راح أصير چنتكم
أنطعن و أحتقن و انگلب وجهه فاتح عيونه بصدمة بكلامي، هه أني أعلمك، اني تقصدت بكلشي اني الردت هذا اللقاء يصير بأقرب وقت رغم چنت مترددة منه بَس أخفائي عنه ما راح يجيب نتيجة لأن ورايَّ زواج و أكيد حَ يحظر العرس فَ ماكو مهرب بالحالتين اني مكشوفة مكشوفة گدامه.
-خليفة: ما فهمت تتزوجين منو؟
رفعت راسي و صدري أتعالى بأنفاسي المكتومة، أني چذابة اني دا أتراجف مِن وگفتي هاي مِن خليفة الطاغي هذا الأنسان مو شخص عادي هذا الأنسان نفسه الراد يسلب مني شرفي وشرف أختي ويصورنا ويدزنه الأبوية
رفعت أيدي أتجاه جَوهر و همستله بأبتسامة.
-تبارك: شايف ذاك الحِلو؟
-منو قصدچ؟
-ركز زين خليفة بالواگف گدامنا.
صفن الدقيقة يمكن و أحتل الجمود ملامحه مِن الجديد و النرفزة أشتعلت بملامحه وبكل جسمه و هو يتساءل بنبرة ما مصدگة شيء.
-جَوهر؟
-أيييييييييييي جَوهررررري
أبتعد و ضحك بضحكته المقرفة و إيديه بجيوبه.
-خليفة: يعرف حقيقة القناع الليَّ متلبسته لو لا عمو؟
-تبارك: هههههههههههه يموت عليَّ ما يشوف غيري
-يعرفج انتِ منو؟
-أمممم لنفترض ما يعرف أو يعرف بالحالتين حَ تسد بوزك و ما تحچي شيء لأن بساطة مُجرد تفتح بوزك اني أفضحك گدامهم
-ههههههههههههههاااااااااي حِلو حِلو هههههههههههههه ومتخيلة يصدگونج؟
-ههههههههههههههه فدوة الگلبك لعد تخيل يصدگون شخص مثلك وانتَ و لا واحد بيهم يبلعك و يطيقك
خفت ضحكته بعد كلامي القذفته بوجهه الحقير، هز راسه بتوعد و رفع أصبعه يهدد.
-خليفة: ما راح أعوفج تبارك قيصر
-تبارك: أنتظرك.
-ذني عيونج الحلوة أذا ما طلعتهن مِن مكانهن ما أطلع اني خليفة
-أنقلع منا
-راح تندمين
-ماعندي شيء أندم عليه
-وگعتي نفسچ بخطر
-ماشفت الأمان بحياتي علمود أتفاجئ مِن الخطر
أبتعد عني و عيونه تتوعدلي بشر مو خير، شربت العصير كله صكه وحدة بسبب ريگي الليَّ نشف و يبس مِن مواجهتي ويَّ خليفة بَس أعتبرها مواجهة ضعيفة لأن كلامه چان كله مُبطن بالخوف خوفًا لا أحد يلاحظه هنا و متأكدة بالأيام الجاية ما حَ يعديها على خير.
نزلت عيوني و الأفكار صارت تتضارب بعقلي، اني كُل عقلي بسؤالي الأول أختي وين بالضبط؟، أما الثاني لُييد وين أختفى؟ بهذا الشكل! و شلون ماحسب حساب جَوهر مُمكن يكشفني أذا حسب كلام ماهر لُبيد عنده علم بالكاميرات فَ هنا راح أكون أنخدعت و أنطعنت منه لأن وگعني بتهلكة ويَّ جَوهر
فزيت مِن أفكاري على لمسة أيد لامست عامودي الفقري، عبالي وحدة مِن البنات بَس طلع جَوهر كفختني ريحة عطره وهوَ يوگف بصفي.
-جَوهر: وين صافنة!
-تبارك: ما صافنة
-أممم شو وحدج وين البنات
-شافوا شخص يعرفونا وراحوا يسلمون عليه
-أممم نايس
-كلش نايس أستاذ
-تبارك
-نعم
قدم أيده قريب مني و ثبتها رفعها مغطي فمه بيها و يحچي بهمس وهدوء.
-شنو رأيج نطلع منا بدون لا أحد يشوفنا
-لابله
-أي بله
-مو حفل خاص بيكم أستاذ شلون تطلع وتعوفه وانتَ مِن المدراء المُهمين بالشركة
-مليتتت
-صدگ ما تحب هاي الحفلات؟
-أموت منها أحضرها أجباري علمود سُمعة الشركة و شغلنا الخاص
-وياك اني مُملة جدددًا
-بما انُ انتِ هم ملانة منها خلّي أخطفج منا
-شسالفة لو مسميني المخطوفة مو تبارك بگد ما نخطفتتت
-منو خاطفج؟
حچاها بشك و أدركت نفسي نعم يا سادة چفصت و عيب تمرّ لقاءاتنا بدون تچفيص وتلعوس، رفعت حاجبي ما أبين لحظة الأدراك الصارت عندي.
-تبارك: شنو حضرتك نسيت؟
-شنسيت؟
-مو خطفتني و بقيتني ليلة كاملة عندك و ثاني يوم عقدت عليَّ
-أهاا.
-أيي
-تبارك
-ها
-شوگت تعترفيلي بحقيقتج الكاملة
صرّت أبلعم و عيونه تراقب بحركاتي أعرفه ديحاول يشوف ويفسر حركة جسدي الشنو تدل.
-تبارك: شلونه علوشتي مشتاقتله حَبيبي
-تبارك: لا تغيرين الموضوع
-ماعندي جواب ألك
-شنو أسم أختج!
-شتسوي بس أستاذ؟
-مُجرد فضول
رفعت حواحبي بأستهزاء عليمن تريد تضحك أستاذ جَوهر، و أنقذوني البنات هنا مِن دخلوا منضمين النا مِن جديد مبتسمات و يتغامزلي لأن جَوهر واگف بصفي، سلمن عليه بحماس.
-أميمة: أستاذ شوگت تبلش فقرة رقص السلو
-جَوهر: فد شويَّ
-حَ ترقصون مو!
راد يجاوب و اني سبقتها بجواب مِن گلبي طالع.
-تبارك: طبعًا لاااااا
-هيفاء: ليش!
-ما أحب.
و أحنا نحچي بدأت هاي الفقرة و كل واحد لزمله وحدة و سحبها النص القاعة، أكو زوجاتهم و أكو صديقاتهم، بقينا واگفين نباوع عليهم و هذا الحقير الواگف بصفي كل شويَّ متحرش بيَّ يدفر برجلي مِن جوا الطاولة مايگدر يحچي گدام البنات و يأشرلي على الباب عود خلينا نطلع منا و اني مطنشة طلبه.
-أميمة: شو محد عرض عليَّ نرقص سلو شنو هااي
-هيفاء: اني ما أقبل أرقص
-هوَ منو ميت علينا دشوفي حتى محد طلب منه
-عود صدگ ليش شبينا؟
-خيولون شنو هل الخايسين
وحدة تكبس و وحدة ترفع وناسيات منو الواگف ويانا وجَوهر ضام أبتساماته بسبب كلامهن دطلعهن يا عيني شكو تضمضم بيهن متگلي أخ منك، و أحنا واگفين أجه ولد شاب مد أيده بأحترام طالب مني نرقص، هلووو هلووووو
-مُمكن؟
-تبارك: شكرًا بَس ما أحب
-ما نتأخر
-ما أحب السلو
-بالعكس يلوگ الجمالج.
هلو هلو لا هايهية، أبتسمتله مجاملة بَس أريده ينقلع مِن گدام طاولتنا و جَوهر رافع حاجبه مخلّي تركيزه بينا اني وياه، قلّب عيونه و مد أيده مِن گدامي دفع أيد الولد.
-جَوهر: گالتلك ما تحب لا تلح وياها أستاذ وتزعج المدام
-عفوًا منو حضرتك؟
-خطيبتي
-أها العفو ما عبالي تخصك، أعتذر.
أبتعد مِن يمنا و هيفاء و أميمة يتمضحكن مِن جوا لجوا، و هوَ صار ينافخ بعصبية و ملامحه حَ تنفجر ما أحس غير لزمني مِن معصم أيدي ساحبني وهوَ يبلغ البنات.
-جَوهر: أحنا طالعين أذا أحد سأل عنا گولوا طلعوا مِن الحفل تمام يا بنات
-أميمة: تدلل أستاذ
سحب كوتي و طلعنا مِن القاعة مال الحفل، أشر للبواب يجيب سيارته، سحبت أيدي منه بأنزعاج شبيه هذا؟
-تبارك: لا تتصرف هيچ أستاذ.
-جَوهر: لعد شتريدين اگله صدگ چذب أخذها ارگص وياها و أتلمس بخصرها براحتك
-شنو هالأنحطاط بكلماتك!
-كااااافي أسكتي
-أوييي عشتو شبلاك؟
-گلبت خليجي هاي أستلم
-أمبي شفيك؟
-والله راح تخبليني انتِ
-دا تبالغ
-أسكتييييي
-و أذا ما أسكت
-لا تستفزيني
-و أذا أستفزيتك شراح تسوي!
-لا تختبريني بهذا الشكل بعدين أزعلج مني
-و أذا و أذا
-إستغفرلله شبيچ تبارك؟
-شبيه؟
-انتِ تستمعين مِن تحرگين بدمي
-لا أستمتع أشوف وجهك الحقيقي
-حقيقي؟
-غيور
-هه ما تضحك
-حَ تموت أستاذ اهدأ ترا ما رقصت وياه
-وشحدچ!
-ترا أرجع أرقص وياه و گدام عيونك
-تعانديني؟
-مُمكن
-خررررب بروح أبوه الخلاج تجين الهذا الحفللللل
-و أذا أجيت
-بفستانج هذا الليَّ مخلي العيون كلهااا عليچ
-أوووي فدوة ما يتحملون جمالي
-زودتيها!
وگفوا سيارته جايبينها اله، و أشرلي أصعد بقيت واگفة بمكاني عنااااااد بي، راد يصعد عباله أجيت وراه و خنزر بغضب أكثر مِن شافني بعدني بمكاني.
-جَوهر: و تالي!
-تبارك: لا تتأمر أحنا مو داخل الشركة
رجعلي واگف گدامي و يحاول يسيطر على نفسه هذا طلب مني رقصة هيچ أنفعل لو واحد يسوي الأكثر شيسوي!
-تمام، مُمكن تصعدين
-خلّي أفكر
-أووووف ربي
-تتأفأف؟
-لا تفتين گلبي بروح أمج
لصمني مِن حلفني بروح أمي، مشيت گدامه صاعدة بالسيارة و هوَ صعد و أصلًا وين رايحين و لا عندي علم، حضنت نفسي بالكوت الليَّ لابسته لأن باردة.
-جَوهر: بردانة!
-تبارك: أممم
-هسه أشغلج التدفئة
-و أدفئ؟
-شغل السيارة و خيط أبتسامة زار شفايفه و هوَ يگول.
-حضني بالخدمة
-شبيها التدفئة مثلًا؟ بَس الليَّ ما يفهم يرفضها والله يا الله
-مو
-أييي ماگتلي أحنا وين رايحين
-نجيب على حيدر مِن بيت خالته
-وبعدين!
-يگولون خوش تطبخين وراح تسويلي عشا إلى اني و أبني
-هسه!
-أي
-أستاذ على حيدر هسه تلاگي تعشا
-أبو على حيدر جوعان ما تسويله عشا؟
-لابله؟
-يلا تمام ما أريد أنسي.
درت وجهي منه للجامة أكيد مو جوعان بَس يريد فرصة يدخل البيتي متأكدة يريد يبحوش داخله، سكوته وهدوئه هذا ضاملي شيء وراهن ماكو شخص يتقبل أنسانه مدخلينها جاسوسة النص شركته بهذا الشكل متأكدة أكو موال براسه دا يحضر اله.
-تبارك: أستاذ بعد أسبوع الراس السنة
-جَوهر: أمممم.
جاوبني بثگل، عوجت حلگي ورجعت ساكتة، عيوني صارت تقفل مِن النعاس و التعب طول هالفترة اني أركض مِن شغلة الشغلة، عدلت گعدتي و غمضت عيوني مستسلمة للنعاس و الأسترخاء الليَّ صاب جسمي بعد ما شغلي التدفئة
ما أعرف شگد نمت و شگد طولت بَس ما أنتبهت ألا على صوت همسات وضحكات طفولية داخل السيارة، مثلت نايمة و أسمع الهمساتهم.
-علي حيدر: بابا
-جَوهر: ها وليدي
-هلي نگعدها
-لا خطية المِس تعبانة
-أوه.
-أيييي و انتَ أكيد ما تقبل مو
-أيي أييي
أبتسمت بهدوء وخفيتها بسرعة مِن حسيت أيدين على حيدر أرتفعت الشعري و تمسد عليه بهدوء و جَوهر يتناقش وياه بصوت هامس يخافون اگعد.
-جَوهر: هسه تگعد علي
-علي حيدر: الله هلو شعرها بابا
-هيَّ كلها حلوة وليدي
-هلي ناخذها النا
-تحبها؟
-أيي أييي
-هايهية تدلل نجيبها الك
-و عمو ريسان
سكت جَوهر مختفي صوته و دام الصمت الثواني ورجع صوته متحسر.
-ماموجود
-ليش
-سافر
-اوه.
سكت بعد ما ناقشة و اني تكسرت مِن نومتي، رجعت لوعيي گاعدة بسرعة سحب أيده مِن شعري و اني لزمتها أضحك و صوت ضحكاته صارت تتعالى، سحبته مِن ورايَّ هوَ ناعم كلش و لا كأنما عمره هالگد بَس گالوا ماخذ نعومة أمه، گعدته بحضني أبوس بي يخبلل ياربي هيچ بشرته ترفه و عطره يموووت يخليك تكزكز.
-تبارك: مشتاقتلك هوايَّ
-علي حيدر: Me too
-جَوهر: مو هسه چنت تحچي عربي
-تبارك: عادي أستاذ.
-لا أريده يتقوا بعربيته لأن مُهمة هاللغة
-بَس صعبة
-لهيچ أريده مِن الطفولة يتقنها
بقى على حيدر يسولف ويايَّ ويرطن مرة عربي مرة أمريكي حد ما وصلني الباب بيتي ردت أنزل و ذكرت كلامه بخصوص العشا والله ضميري أنبني بَس ما اگدر أدخله للبيت ألا اتأكد ما باقي شيء يجلب الشكوك أتجاهي، گعدت أبنه بمكاني ونزلت
-تبارك: شكرًا بَس بعد لا تطلعني مِن الحفل بمزاجك
-جَوهر: هاي كله علمود رقصة السلو؟
-أووووييي أستاذ وين تفكيرك
-لعد شكو مزعوجة مو علساس ما تستلطفين هيچ حفلات
غمزتله مبتسمة.
-ديلا اهدأ لا تضربك سكتة قلبية عيني
سديت الباب وعفته صافن ورايَّ رفعت أيدي أغم بعيني گبر الصلفة شلون تغمزيله، فتحت الباب ودخلت و هوَ شطح مِن گدام البيت، شمرت الكعب الليَّ لابسته و أتمددت على القنفة، عيوني صافنة بالسقف.
هسه اني و خليفة صار ألنا لقاء لأن اني محتمية بنقطة الليَّ هيَّ مُستحيل يفضح نفسه بسهولة و حَ يبين ماعندي أي معرفة بي، بَس أكيد حَ يخطط الفد ملعوب يوگعني بي، فتحت جهازي بلگي الاگي بي رسالة مِن لُبيد بَس خابت أمالي و مالگيت أي شيء وين أختفى وينننن!
نهضت مِن مكاني داخلة الغرفته أفتش بيهاا، چانت فارغة مابيها أي شيء غير الأثاث الليَّ داخلها، سحبت نفس بحسرة ردت أطلع و جَذب نظري الشيء الواگع بالأرض.
چانت صورة مبينة و أكو كتابة بظهرها، نزلت المستواها سحبتها عاقدة حواجبي بتساءل المنو هاي الصورة؟، چان مكتوب بظهر الصورة شرارة گلبي ، قلّبت الصورة چانت للمدام سيلين وهيَّ تضحك ملتقطين ألها الصورة.
أبتسمت الأبتسامتها الناعمة مثل أفعالها، وگعدت أباوع بالصورة أتوقع واگعة مِن لُبيد بدون لا يعرف، هذا لأنسان شگد شخصيته غامضة و لا مفهوم بَس حُب هالأنسانة يشع شع بعيونه، خصوصًا مِن لسانه يحچي عنها تصير لمعة بنظراته
أخذتها وطلعت مِن الغرفة بعد ما تأكدت مابيها شيء و الحمدُلله عقلي براسي و ما سمحت ال جَوهر يدخل چان فعلًا أنفضحت بالكامل، دخلت الغرفتي ضميتها بين أغراضي بَس يرجع لُبيد أسلمها اله.
نزعت فستان الحفلة و لبست بجامة نوم غسلت و شمرت روحي بنص السرير أحس ظهري لو عنده لسااااان چان حاچاني و گال سگطتيني بالتعب
الثاني يوم چان المفروض أداوم بَس جَوهر خابرني گال اليوم لا تداومين أخته زمن عازمتني عندهم و يريدون يحددون موعد حفلة الخطبة مالتنا، أختنگ مِن يفتح هذا الموضوع و الدمعة تصير تلالي بطرف عيني بَس شبيدددي.
نزلت گدام باب بيتهم و الحماية مطوقين الباب شگد بطرانين بَس الليَّ مثلهم أكيد ما عندهم كلشي عادي، فتحلي الباب واحد منهم دخلت جوا، وگفت خطواتي مِن لمحت جَوهر غير عن المعتاد لابس تراك سبورت رياضي و أبنه نفس الدزاين ملبسه و يلعبون كرة قدم بالحديقة مامنتبهين الوجودي
-علي حيدر: I want to win
-جَوهر: يلاا يلااا وليدي أستعجل و كول على أبوك.
أبتسموا البعض بود و ركض على حيدر أخذ الكرة حاضنها الگلبه يموت ضحك و يريد بَس يسجل هدف على أبوه الليَّ يركض وراه بخفة ويريد أبنه الليَّ يفوز ويشجع بي، هدف على حيدر و صار يكمز بفرح يضحك، حضنه جَوهر يبوس بخدوده و يعدل بشعره الكيرلي.
-جَوهر: مو گتلك وليدي بطل الأبطال.
رفع راسه يضحك الحركات على حيدر و وگف شايله، دار وجهه مُجرد لمحني أتسعت أبتسامته أكثر لأن چنت لا زلت مبتسمة المنظرهم الليَّ يجنن و يخليك تبتسم لا أراديًا
تقدم ناحيتي و ما أعرف شنو همس الأبنه بحيث ضحك بصوت عالي.
-جَوهر: أهلًا وسهلًا مِس تبارك
-تبارك: أهلًا أستاذ
-تفضلي
-لو نگعد هنا مو أفضل شنو رأيك؟
-لعد خلّي أصيح للموجودين.
نزل على حيدر وگفه بصفي ودخل للبيت يصيح للبنات و للعجوز و الواضح لا سيلين و لا سمارا مداومات، رجعت للواقع بعد ما أخذتلي صفنة على لمسة أيد ناعمة لزمت أيدي.
-علي حيدر: ما بستيني.
ضحكت بصمت و نزلت المستوا بوسته بخدوده شفطت خدوده شفططط أريد أكله ولكم يخبللل يخبلللل خرب روحك خليفة العار، طلع جَوهر وو وياه البنات متأنقات و العجور الشمطاء وياهن اني اسفة على قلة الأدب هاي ونعتها بالشمطاء بَس هيَّ أنسانة حقارتها نابعة مِن ملامحها.
-زمن: مرحبا تبارك.
عبالي ماخذه أطباعنا هنا مِن نسلم مُجرد نتصافح ما نتباوس و هاي الشغلات و عندنا هنا الأمريكان يسلمون على بعض مِن خلال نظرات العيون او يحرك راسه، ماكو تعال أطالس ألا أذا أنسان كلش كلش مُقرب اله يلا يبوسه
-تبارك: هلو زمن شلونج
-مشتاقة الهاي العيون
أبتسمتلها بخجل هاي مثل أخوها نظراتها و كلامها الغزلي يخلّي خدودي تولع بالخجل، باستني بوسة وحدة بخدي و أبتعدت و سيلين نفسها، سمارا رفعت إيدها تلوحلي مبتسمة.
-سمارا: هاي
-خاتون: أهلًا
حچتها بجفاء و طبعًا كلشي دا يصير هوَ غصبًا عنها بَس والد جَوهر ما چان موجود، گعدنا كلنا بالحديقة مال بيتهم، طلعت المساعدة مِن داخل البيت بأيدها صينية الگهوة قدمتها ألنا و وياها وياها بسكوت مغمس بالكاكاو.
-زمن: أي شباب اني ما اگدر اتأخر هنا تعرفون أطفالي بقوا يم بيبيتهم أم أبوهم و زوجي ما باقي شيء ويرجع مِن السفر فَ گلولنا شوگت الخطبة و الزواج اني أريد احضرهن أثنينهن يلا أروح منا
إخذت فنجان الگهوة و كُلي فضول أعرف ليش ما جايبة أطفالها وياها و زوجها شنو عمله بَس خجلت اسئل سؤالي الثاني هسه تگول شعليها بزوجي و تسأل عنه.
-تبارك: ليش ما جبتي أطفالج.
-زمن: متعلقين بوالدة أبوهم بشكل مُبالغ حتى أكثر مني فَ مو دائمًا مِن أجي هنا يقبلون وهيَّ خطية تبقى وحدها
-هاا لعد زوجج وين!
-زوجي يشتغل مُترجم فَ مو دائمًا على تواجد
-الله يحفظهم
أبتسمتلي و رجعوا يتناقشون بموضوع الخطبة الليَّ إشوفها أصلًا مالها كل داعي بَس ما أعرف شكو جَوهر مُصر عليها رغم مقتنعة يجي يوم و كلمن يروح بطريق فَ هاي الرسميات كُلها مالها داعي بَس ما إعرف و لا فاهمة شنو غايته.
-جَوهر: شنو رأيج تبارك
فزيت مِن صفنتي و چنت فاصلة عنهم نهائيًا ما سمعت شيء منهم و لا بالي وياهم.
-تبارك: عفوًا سرحت شويَّ
-جاي نگول شنو رأيج نسوي الخطبة براس السنة
-قصدك بعد أسبوع ما أعرف ست أيام
-أي
-ماكو مشكلة أستاذ
ما أحس غير نضربت بفخذي بخفة مِن زمن الشقاوچية تضحك.
-زمن: گوليله الأخوية جَوهر شنو أستاذ قابل أنتوا بالعمل
رجعت شعري لوره و مِن التوتر جسمي كله شب نار.
-تبارك: متعودة.
-سيلين: تعودي گليله حياتي جَوهر
فتحت حلگي وعيوني سوا لا شدا أشوف هاي المدام سيلين؟ أخذت الفنجان ضامة أبتسامتها وأرتشفت مِن القهوة، چان زمن تضربها بخفة بكتفها وهيَّ تگلها.
-زمن: علساس لُبيد المسكين محصل منچ شيء
-سيلين: هسه شدخل لُبيد بالنص
-نسيبي أموت عليه
-سمارا: هبيبي الهلو فدوه كُلش I miss him.
رفعت عيونها سيلين خطفت نظرة مِن جَوهر و أتشوفه أنزعج مِن ذكرى أولا، جَوهر ما أدخل و ملامحه هالمرة عادية حتى مِن شافها تباوعله أبتسملها دازلها بوسة بالهوا غصب عنها أبتسمت بنص قلقها.
-خاتون: انتِ شنو ماعندج خوال عمام؟
-جَوهر: جاوبتج البارحة أتوقع خاتون
- گلتلي عن أمها و أبوها ما گتلي ماكو خوال و عمام
-ماعندها
-جَوهر!
-خاتون!
أنشحنت الأجواء بينهم و المشكلة الموضوع فعلًا يهضم داخلك و يضوجك ويخنگ مِن أحد يسأل وين إهلك! وين عمامك وين خوالك شنو مگطوعين مِن شجرة بَس اني أكثر أنسانة تتمنى عندها عائلة، چانت إختي كل عائلتي بَس حتى هذا الشيء حرموني منه
تحمحت لأن الغصة أخترقت بلعومي خانگتني، أبتسمت بوجه خاتون أغطي ملامح القهر.
-تبارك: ما عندي أحد أختي كل عائلتي و ما متواجدة حاليًا
-خاتون: ماتجي الخطبتج!
-لا.
-بَس ليش ماما؟ مو لازم تكون وياچ بأهم يوم بحياتج
زادت الغصة وزاد قهري أحس بعيوني جمرت مِن كلامها الحقيقي.
-عندها ظروف
-خاتون: ما أعرف ما أعرف أنتو دوختوني
-سيلين: عليمن تدوخين قابل تبارك أول أنسانة بهاي الوضعية؟ لا تزودينها خاتون الآلآف الناس هيچ حالتهم
-أدري منين نطلب البنيه فكرولها عاد
-جَوهر: ما يحتاج نطلبها
-خاتون: انتَ تريد تخبلني جَوهر لعد شلون تصير الخطبة ماما؟
مد أيده الأيدي أحتضنها بدفو أيده و هوَ يجاوبها بهدوء.
-اني و تبارك عقدنا و مُجرد حفلة راح تصير علمود الناس تعرف اني خطبت
هوَ گال هيچ لو نگلبت الدنيا وگفت بسرعة تتراجف مِن العصبية.
-شنووووووووووووو
-أي والله يا خاتون
-جَوهر؟
-عيني
-بديت تطلعها مِن ماعونها
-لا بعدها بالماعون
-شلووون تعقد على البنيه ولك؟
-عادي ليش مكبرتها مُجرد عقدنا بالشرع و عادي مو شرط العقد يصير ويَّ الحفلة.
سيلين چانت تعرف كلشي فَ ما تفاجئت بَس زمن و سمارا أستغربوا مِن كلامه.
-زمن: حَبيبي جَوهر هوَ أكيد عادي و ماكو فرق بَس فاجئتنا ما عبالنا عاقدين
-جَوهر: وهسه عرفتوا حبيبتي و ماكو مشكلة أن شاء الله و الليَّ ما عاجبه مشكلته هاي
-سمارا: اني يعجبني محه.
ضميت ضحكتي على حركاتها و على حيدر بحضنها لازم خصلات مِن شعرها يلعب بيهن، رجعت گعدت خاتون و طول الگعدة تذب بسامير، شلون جَوهر يريد يتزوج وحدة مثل وضعيتي و بالأخير غثتني بتصرفها الليَّ مابي ذرة ذوق و خجل.
-خاتون: أخذنها باجر أشترلها ملابس للحفلة و لا تمشن على ذوقها لأن مبينة ما تفهم بطبقتنا ما نريد نتفشل.
والله هالحچاية غثتني و تغث شكو بنيه تتعرض النفس موقفي و الحرگة تصير بالگلب تحرگ حرگ مِن سم كلامها، وگفت ناترة أيدي مِن أيد جَوهر و سحبت جنطتي و قبل لا أطلع منهم يمهم وگفت أتناكث غضب و هاجت عليَّ كل أعصابي لأن بكل لقاء تحاول تقلل مني مِن عرفت جَوهر يريد يتزوجني لليوم.
-تبارك: عفوًا منچ أتوقع ماخذه نظرة خطأ عليَّ
عوجت حلگها السماني و هيَّ تگول بثگل ومال وحدة مالها خلگ تحچي.
-نظرة شنو؟
-أذا أبالج اني بنت عائلة حالتها على گدها لا غلطانة، اني أنسانة عشت و تربيت بيت يعادل هذا بيتج الگاعدة بي، شايفة و عايفة، و ما أهتم لليَّ أبالج، لأن ببساطة طبقتي تنافش طبقتج الليَّ انتِ عايشة بيها
-خاتون: لعد شكو مشتغلة بالشركة بمنصب موظفة عادية
-وين المشكلة؟ و اني أساسًا گاعدة بيت وحدي و حياتي تغيرت عن السابق أوف اني شكو دا أبررلج مبين منو بالضبط عينه ضيقة و ما شايف.
-أحتررررررمي نفسچ يا بنت لاااا تنسين ويامن واگفة
-ههههههاااااااي منو مثلًا صارلي فترة متحملتج و دا تحاولين تصغرين مني و تستنقصين بَس عيني خاتون أنتبهي النفسج لأن اني أخر همي ثروتكم و كل أملامكم وشركتكم بكبرها ما تهمني.
عفتهم وطلعت مِن البيت أتراجف أچذب أذا اگول ما غثتني لا وحق الله شعلت بگلبي نار بتصرفها الرخيص هذا، أسمع الصوت البنات يصيحن ورايَّ ما أهتميت أذا أرجع ما أضمن نفسي ما ألزمها و أسحلها وهيَّ بهذا العمر، طيح الله حظ الطبقات و المادة الليَّ تنزل الأنسان لهذا المستوى
صار صوت سيارة يدگلي هورن ورايَّ عرفته هذا جَوهر بَس حتى هوَ ما طايقة أشوفه و لا إلى خلگه، صارت سيارته تمشي ويَّ مستوى خطواتي.
-جَوهر: تبارك أوگفي
رفعت أيدي مأشرتله بدون لا أباوعله و لا احچي لأن ما أضمن نفسي ما تنزل دموعي، أشرتله يرجع منين ما أجه.
-مو أحاجيج تبارك
نزلت دموعي همداني ما گدرت إسيطر على نفسي و إضمنهن، مسحت دموعي و الحقيرات يرجعن ينزلن، بقيت مُستمرة أمشي بخطوات سريعة و گلبي نغزات تخللت بي مِن القهر، اني شلون لحد الآن ما ميتة بسبب وجع كلشي دا أعيشه.
أنسحبت مِن أيدي مِن وره و بدون أي مقدمات ضمني الحضنه بكل قوة، أنفجرت بالبچي ما إعرف شصارلي يمكن چنت محتاجة هذا الشيء بَس أريد أشمر تعبي بحضن أحد ويضمني هالضمة القوية و الحنونة، بچيت بصوت مسموع و أحير شذكر وشعوف مِن حياتي
-جَوهر: أش تبارك بَس أهدي اني يمچ و وياچ لا تهتمين الكلامها
شدّني أكثر الحضنه و أحنا بوسط الشارع و كإنما يريد يضمني بوسط صدره، حچيت بخنگ مهضومة.
-تبارك: شبيهااا ويايَّ أستاذ اني شمسويتلهاااا
-ما مسويتلها شيء هيَّ ويَّ الكل هذا طبعها
-و اني شنوووو ذنبي أتحملللل كلامهاااا، بكل مرة تحاول تقلل مني، كل مرة تحسسني اني المستقتلة عليك
-يرادلها بخت
-شنو!
-تستقتلين عليَّ و أشوف حبچ و غيرتج عليَّ
رفعت راسي مِن حضنه أناشغ و البرد يضرب بخدودي، و أحس بأنفاسي ما منتظمة تتگطع بسبب بكائي.
-شنو شدا تحچي انتَ أستاذ أستحي مني هم حاضني بنص الشارع و هم تدور حب ويايَّ.
مد أيده و مسح دموعي بأبهام أصبعه مبتسم بأنتعاش.
-مِس تبارك
-ها
-شنو رأيج كل يوم تجينا للبيت و تتعاركين ويَّ خاتون و تطلعين هيچ طلعه
-تفرح بدموعي؟
-عمت عيني أذا أفرح بدموعج
-لعد؟
-علمود أحضنج هذا الحضن
بسرعة دفعته و أبتعدت راجعة لوره همدااااااااني شلووون ناسية نفسي و متسرسحة بين أيديه لا و بنص الشارع، رغم هنا عندهم عادي بَس اني و الأستاذ جَوهر لاااا ما أتقبل هيچ قرب.
-تبارك: والله بَس أجي البيتكم إلا أخلي هاي جدتك تمشي و تصيح أااخ يا راسي بسيطة
بقى واگف بمكانه مبتسم أبتسامة منتعشة و كأنما سوا شيء چان منتظرة مِن زمان.
-جَوهر: متشوق حطي أيدج بأيد أختي سمارا
-و أذا شكتلك ويامن توگف؟
-وياچن
-وعد!
-وعد بَس بشرط تكون هيَّ المتحرشة مو أنتن
-ما أضمنلك
-خاتون ما تمثلني
-ديلااا علساس أذا سوت شيء حَ توگف بوجهم علمودي
-أذا طلعتي تستاهلين راح أوگف بوجه العالم كله الخاطر عيونچ.
سكتت الثواني أمسح بوجهي ما عندي الجرأة إحط عيوني بعيونه، و دگات گلبي بعدها تدگ سريع، حچيت بتردد.
-تبارك: ما أريد أعيش ببيتك و كأنما داخلة ساحة قتال وحرب أتمنى تتفهمني و هذا الزواج كله لو يرجع ألي القرار مِن هالساعة ألغي كلشي يجمعني بيك
أختفت أبتسامته مِن ملامحه و بهتت ملامحه مِن كلامي.
-جَوهر: هيچ تشوفين يعني؟
-أي لأن اني دخلت الشركتك بأجبار و خداع مو محبتًا بشغل أو بيك، و لو يرجعولي أختي هسه ثق و أعتقد بكلشي خالقة رب العالمين أختفي مِن كُل حياتك وحياة أي شخص يعرفني هنا.
هز براسه ساكت يمكن قسيت بالكلام بَس هاي الحقيقة الليَّ مقتنعة بيها اني جَوهر ماعندي أي مشاعر أتجاهه بَس شيء بداخلي عازه لهذا الشخص رغم فعلته الرخيصة الليَّ سواها ويايَّ و أجباري بالزواج منه بَس جزء مني كارهه ومجروح منه و جزء مني مدا يتقبل الكره الليَّ دا يطلع مني أتجاهه.
عفته واگف و كملت طريقي، أمشي ودموعي تنزل بهدوء بَس أحس بثگلهن تعبني، و خلال هذا الأسبوع كله ماشفته و لا سمحلي أداوم لأن البنات كل يوم ياخذني نجهز شيء و أحاول أمثل اني سعيدة عكس مشاعري الداخلية محد فاهمني غير المدام سيلين
أختارينا فُستان الخطوبة چان عاجبني بشكلل و مِن گلبي حبيته بَس تمنيت قبولي بهذا الزواج و فرحتي گد أعجابي و فرحتي وقناعتي بهذا الفُستان.
چان لونه بيجي، عبارة عن گصة الحورية، وفتحت الصدر جاية محفورة بشكل قلب مغطاية بطبقة مِن التول الشفاف مُبطنة مِن الداخل، و الأكمام الردن طويلة مِن الكتف للأصابع و مِن فوگ لجوا مزين ومطرز بأفخر التطريزات الفخمة و الفاخرة، و المجوهرات كانت مِن أختيار جَوهر عبارة عن طقم مجوهرات كامل مرصع ب الألماس ما أنكر ما نال أعجابي لأن چان ذوقه راقي، فخم، نازك بشكل يجَذب برقاوته.
واگفات خواته و صديقاتي يجهزون بيَّ بَس الخنگة ذبحتني ذبح، أريد أصرخ و اگول ما أريد كل هذا، نزلت دمعة ضياع مِن عيوني مسحتها سيلين قبل لا أحد يلاحظني و يلاحظ حالتي المأساوية.
-سيلين: لا تسوين هيچ تبارك والله أخوية حباب
ماعندي أي جواب الها لأن مدا أفهم هذا الزواج شنو الداعي مالته لا هوَ مِن النوع الليَّ ماعنده كرامة و اگول مفلس الكرامة بَس هوَ أنسان اله عزة نفسه الخاصة و كرامته.
طلعوا البنات كلهم نازلين جوا طبعًا الخطبة سوها بيتهم لأن ما ماناقص مساحة و كل التجهيز مالتي صار بغرفة سيلين، وگفت گدام المراية أباوع النفسي و ماگدرت أكتم دموعي و لا مهتمة لأي شيء حاطته مِن مواد التجميل، نزل سيل الدموع متصبب بهدوء على خدودي.
يمكن لو أختي چانت ويايَّ چان كلش أهون و أسهل عليَّ حتى لو مجبورة بهذا الزواج، أقلتًا شوفتها و شوفة طولها وعيونها گدامي تهون كل تعب و مصيبة نزلن عليَّ، سحبت كلنكس لا أترزل مِن البنات وبالعة كل غصاتي بهذا اليوم الأسود.
وگفت أمسح بعيوني بعناية لا أخرب كُحل عيني و أنفتح الباب كل تفكيري عبالي وحدة مِن البنات، بَس أنشلت أطراف رجليَّ و گلبي خفق بخوف جنوني مِن عيوني لمحت خليفة دخل و سد الباب برجله و أيده صارت تقفل بالباب رويدًا رويدًا و أبتسامة الشر و المكر و الدنيئة مرسومة على ثغره النكسسسس حسيت بگلبي وگف بهل اللحظة و اني أشوف ماكو غيرنا داخل هالغرفة و الباب أنقفل علينا!