رواية قوارع وادي الألغاز للكاتبة حوراء السعيدي الفصل الثامن عشر
تبارك .
-اخخخخخخ
لزمت راسي بألم أمثل و عليت صوتي متقصدة علمود لُبيد ينتبه أحنا وين موقعنا بالضبط، وگفت حركة جَوهر و ما كمل أستدارة ببساطة بسرعة دار عليَّ بعيون متساءلة عن وضعيتي، أردف بخوف ونظرات أنملت بالقلق همداااااااني
-جَوهر: شبيچ تبارك
-تبارك: راسي أستاذ راسي اخخخخ.
أريد أطم نفسي على هذا اللعب الليَّ دا أسوي، مد إيده يريد يلزمني بَس رجع متردد بخطوة لوره، الله لاااا يوفقك يا خليفة عسااااااك بجهنم بصف أبو لهب تنحط لزززگ.
-شنو السالفة! هسه ما چان بيچ شيء.
رفعت أيدي الثانية و لزمت راسي بأثنين أيديَّ ساكتة و عيوني تباوع مِن جوا لجوا على مكان لُبيد الليَّ شفته بي، رفعت عيوني بهدوء بدون لا جَوهر ينتبه عليَّ و ركزت بمكانه أووف ماموجود أختفى أكيد فهم كلشي و تدارك الموقف وفهم الليَّ دا أسوي هوَ تمثيلية لا أكثررر
-تبارك: ما أعرف أستاد ما أعرف فجأة لزمني صداع عبالك طلقة وضربت نص راسي
-سلامتج
-يمكن لأن ماشاربة مي.
طبگ حواجبه مِن كمية التمسلت مالتي بَس هالمعلومة صحيحة مرة شفتها أذا تبقى لوقت طويل بدون مي يلازم الأنسان صداع.
-جَوهر: شعلية ال مي تبارك
-شلوون شعلية يا أستاذ عبالك كلامي خرافات أبحث بنفسك و شوف و اتأكد
-أخذج المستشفى؟
-لا لا هسه بَس أشرب مي و أتمدد أصير أحسن
-متأكدة؟
-أي
بقى صافن بوجهي و عيونه تگلي بنظراته ما أريد أروح بَس مبين خجلان يگولها بوجهي و ما اگدر أبقى أكثر هسه أبن الشيطان يصير يغرد عليَّ.
-تبارك
-ها أستاذ
-قبل شويَّ ليش أنخطف لون وجهج وصفنتي ورايَّ؟ أكو شيء
سئل و رافع حاجبه منتظر جواب مني نظراته مخترقتني بكل تركيز.
-مو هذا أستاذ أسمعني
-تفضلي
-شفت خيال و أنهبطت و گتلك اني أخاف مِن نصاص الليالي و الخيال ضخم لهيچ خفت
-هااا!
-أيييي
فكت عقدة حاجبه و مشط شعره بأيده هاز راسه.
-خوافة ههههههههه
-أخاف مِن الليل
-عكسج أحب الليل وهدوءه.
نزلت وحدة مِن أيديَّ وبقيت لازمة راسي بأيد وحدة و مستمرة أعقچ وجهي بألم شلون مِن يصيبنا الألم الحقيقي و أسولف وياه.
-تبارك: أحنا بكلشي عكس بعض أستاذ جَوهر
-أممم شلون!
-مثلًا اني أحب النهار أكره الليل و أذا أجه أحب بسرعة أنام و ما أبقى گاعدة بي
-وبعد!
-مثلًا انتَ قمة الهدوء و اني قمة الفوضى
-وبعد!
-انتَ تحسب للكلمة الليَّ تطلع منك ألف حساب قبل لا تنطقها اني اچفص هوايَّ و عندي الوضع طبيعي مو مثلك حذرة أمم أحسني شخصية فوضوية وهوسة و.
-و أحلى هوسة مرت عليَّ
دگ گلبي بقوة ويَّ همسة كلامه و هوَ يگول هالكلمات، و عيونه الصغار الليَّ تشبه النوافذ الضيقة ما واضحة وغامضة بنظراتها مبتسمة ويَّ محياه أتجاهي وهيَّ تباوعلي بتركيز، لا أراديًا أبتسمت.
-والله أستاذ؟
-شنو؟
-هوستي وفوضويتي حلوة و ما تزعجك عليك الله لا تجاملني
لم شفايفه للداخل و مال براسه و لا زالت نظراته مخترقتني وعيوني الصلفة باقية تباوعله و بكل هدوء بدون ما تنحرف لأي زاوية.
-ما أجامل لأن ما أعرف أمثل بهيچ سوالف
-أممم لعد ليش مبتسم هالگد؟ مُمكن أعرف
-لأن جاي توصفين نفسچ و عبالك انتِ كارثة و أعصار فوگ راسي ودخل حياتي.
دگ گلبي هالمرة بدگات زيادة ومضاعفة بسبب كلماته الليَّ ما فهمت شيقصد بيهن هل هنَّ بسمار الي.! لو شنو بالضبط، رفعت حاجبي بأستنكار.
-أعصار أستاذ!
-أممم
-ترا خطر
-أدري
-زين أستاذ أذا اني شبهتني بالأعصار انتَ شنو!
رفع عيونه للسماء مثل الليَّ يفكر الثواني زينت محياه أبتسامة ورجع نزلهن هامس بهدوء.
-اني المكان الليَّ الأعصار بكل مرة يرجع اله ويرتاح بوسطه
-واو واو
-شلون صار راسج.
-أحسن نسيت الألم واني أسولف وياك ههههههه
سكت الثواني نزلت أيدي الفخذ رجلي أگرص بنفسي ما اچفص كاافي الليلة چفصت بما فية الكفاية، وهذا گدامي كل ساعة صافن بخلقتي شككني وجهي بي شيء حتى أتذكر غسلته والله.
-احمم أستاذ وجهي بي شيء ليش دا تصفن بيَّ ترا والله غسلته قبل لا أطلعلك
-وجهج طبيعي بَس ملامحچ ما تتكرر بحياتي
بلعت ريگ بأرتباك بسبب كلامه.
-ما فهمت!
-يعني بكل مرة أشوفچ بيها أشوف بيچ أكثر مِن نسخة مرة امرأة قوية، مرة طفلة بريئة، مرة أعصار مثل ما وصفتج، ومرة امرأة عبارة عن كُتلة مِن الغموض و العصبية
-هههههههه أستاذ مبين تحب الفلسفة هوايَّ ههههههههههه
رفع حاجبه وزادت أبتسامته.
-طبيعي لأن الفوضى أحيانًا تدوخ لليَّ متعود على هدوء الليل
-ديربالك أستاذ الفوضى أذا دخلت الحياة الشخص تتلاعب بيَّ وتدمره و ما تتخلص منها بسهولة.
رفع أكتافه بعدم أهتمام و عدم مُبالاة.
-يمكن هذا الليَّ أريده
-أهوو أستاذ والله الفوضى تغرگ
-عادي نسبح بيها اني وياچ
-أستاذ انتَ ما عندك صديقات!
ما أعرف وين الربط بسؤالي بحديثنا بَس ردت أتخلص مِن غزله المُبطن.
-لا
-گول و الزهرة أم الحسن
-هههههههههههههههههه
-يااا أستاذ هههههه ليش تضحك!
-سوالفچ چنهن سوالف العجايز حلوة
-حتى اني أحبهن أحسهن منبع الحنية.
-صح بَس مو كلهن، اني عندي وحدة بالعراق كل سنة أروحلها هناك اموت على سوالفها وحنيتها
-منو!
-زوجة جدي الثانية
-جدك عايش!
-لا متوفي
-يا عيني الله يرحمه، بَس الساكنة وياكم هم جدتك
-قصدچ حليمة خاتون؟
نعالون أحسن حچيتها بگلبي الحقيرة لحد الآن موقف سمارا مِن وگعتها مِن الدرج ببالي، رفعت حاجبي بمكر أباوعله الواضح هوَ ما عنده علم بعملتها هاي احچيلها؟ لو أسكت! شعليچ تبارك يمكن سمارا مسولفتله و تحاسبت ختووولي معليچ
رجف گلبي واگع بمعدتي مِن شفت لُبيد واگف وره الشجرة و خازرني بعيون حادة لو بيده يلزمني اني و جَوهر يگطعنا تگطع، يأشرلي بأيده عود خلّي يروح و عيونه تريد تطلع مِن مكانهن.
قاطع حديثنا الليَّ عبارة عن ألغاز و واحد يبسمر بالثاني بطريقة غير مُباشرة رنة جهازه، فتحه و ما نطق غير كلمتين.
-جَوهر: تمام جاي
غلقه ورفع راسه محرك بفمه بطريقة ماعاجبه.
-لازم أروح مِس تبارك
-تبارك: براحتك
حط جهازه بجيب السترة مِن تحت الكوت الليَّ لابسة و رفع راسه سائلني.
-أهلج مو طولو!
-أييي
حچيتها بملل و برود.
-ما تخافين وحدچ!
-لا لأن وقتي بالأكثر طول النهار بالدوام و بالليل أحاول أتلافاه بكم شغلة و أنام.
-تمام أنتبهي النفسچ رايح اني
-روح
-رايح
-روح أستاذ
-راح أروح تبارك
-هههههههههه أي أستاذ روح منو لازمك
-بَس ترا راح أروح ههههههههه
-أستاااذ
-تمام تمام ههههههههههه أتمازح وياچ عيني
أشرتله بعيوني تمام رفع أيده ملوحلي بمعنى مع السلامة رفعت ايدي مثل حركته ولوحتله و غلقت الشباك أيدي على گلبي إشك راح يصير بيَّ مرض السُكر مِن الهبطات الليَّ دا أكلها لو فد يوم گلبي يوگف بنبضه مِن طياح الحظ هذااا.
طلعت مِن المطبخ و گعدت بالصالة أنتظر أبن الشيطان يجي مرت دقائق و أستغربت مِن تأخيره المفروض يكون دخل هسه بَس مرت عشر دقائق ضبط و هوَ ماكو، و رجعت مرة خمس دقائق أضافية يلا أنفتح الباب وطل علينا بطلته الخاايسة طابگ حواجبه بأستغراب
-تبارك: وين چنت!
رفع أيده مأشر بيها وراه بمعنى على الباب.
-لُبيد: جَوهر ما راح بسرعة بقى واگف گدام سيارته ويباوع للبيت
قلّبت عيوني هذا مِن كُل عقله عباله جَوهر سهل.
-أكيد ما يثق بسهولة و لا يصدگ كلشي احچي و عقله مو أقل مِن عقلك خليها أبالك يعني انتَ مو بطل الذكاء بهاي اللعبة
-القلم
-يا قلم!
-شبيچ القلم الليَّ نطيتي اله
-شبيه؟
-ما وصلي أي أشارة
صفنت و اني أحاول أتذكر هوَ أخر مرة مِن طلعنا چان بأيده لازمة و ما أتذكر أذا مِن ركض الأبنه وگع منه أو لا عصرت مخي عصر بَس ما وصلت النتيجة.
-يمكن وگع وهوَ يركض الأبنه
-خررررب.
ضرب الميز بنرفزة و هالمرة فضولي أتفوق حيللل عليَّ أريد أفهم شنو الليَّ بين جَوهر و لُبيد وشلون خااطب أخته و وهوَ دا يلعب مِن وراها ما يفكر أذا عرفت بيوم موقفه گدامها راح يكون صعب.
-لُبيد
-ها
-الأوراق الليَّ عند جَوهر شنو بيها! ليش هالگد مستقتل عليهن و ليش شامر نفسك بالنار علمودهن و انتَ خاطب أخته متأكدة أذا عرفت بيوم ما تمررها الك مرور الكرام.
أعرف ما ينطي جواب واضح بَس هالمرة أنطاني جواب اساسه كله ألغاز ما مفهومة.
-لُبيد: الأوراق الليَّ بيد جَوهر بيها خرابنا وبيها مستقبلنا، مُهمة الدرجة لو أعرف باجر أموت و اليوم أحصلهن مستعد أموت و أخذهن
-لهل الدرجة؟
-باليوم الليَّ راح تفتحين خزنة جَوهر بأيدج ما راح تشوفين بَس أوراق و ملفات رايدها لا بيها صور بيها تصوير بيها شريحة كلشي مخزون بيها، كلهن ذني راح تاخذيهن وتسلمينهن الي.
-هاي أذا ما أنكشفت و أروح بين الرجلين بسببك
-ما راح تنكشفين لأن جَوهر ما عنده أي دليل عليچ بَس لو تسيطرين على نفسج و ما تچفصين
-هاي الشغلات الليَّ بالخزنة يعني تخص شنو بالضبط
-ماضينا و مستقبلنا
طبگت حواجبي بعدم فهم ما فاهمة المغزى.
-شتقصد بكلامك بطريقة جماعية
-بعدين تفهمين تبارك، بَس خلّي أبالج باليوم الليَّ تسلميني هذا كله راح تسمعين شيء يخص جَوهر
بلعت ريگ ودگات گلبي صارت محسوبة.
-شتقصد بكلامك لُبيد؟
-جَوهر واحد ذكي بَس لاعب نظيف بوجه الناس وذيب وراهم
-بديت تخوفني منه!
-المفروض تخافين مِن الكل
-بَس اني مدا أشوفه أنسان سيء؟
-أحنا مِن نولدنا هم ما چنا سيئين أكبر همي چان أقنع أمي تسويلي مِن الكيكة الأحبها
-وهسه!
-أكبر همي و أحلامي مِن أنام أحط راسي على المخدة بدون ما كلشي يلتم عليَّ لمة وحدة و أنام مرتاح
-أحسك أنسان غامض وأكو أمور ضامها تعكس كل هاي شخصيتك.
رفع حواجبه و عيونه نگلبت دم الثواني دب الرعب بداخلي مِن شكلهن ونظراته شلون تغيرت.
-نامي
-ليش دائمًا تتهرب اذا اسئلك
-لأن ما عندي جواب الاسئلتج
-يمكن عندك جانب خير!
-لا اني شر
-والمدام سيلين!
-شرارة بگلبي
-ما تخاف بيوم تكتشف هذا اللعب كله
-راح تعوفني أدري بيها
-لعد شلون مكمل لُبيد
-أريد نتزوج و أشبع عيوني بيها بَس واضح گلبها حاسها راح يجي يوم و أهدمه لهيچ رافضة
-شلون ينطيك گلبك تجرح أنسانة مثل سيلين!
-مو بيدي.
-لعدد بيد منو!
-بيد الحياة الليَّ ولدتنا
-يعني تفضل تكسرها! ما توقعت منك هذا الشيء و انتَ مبين شگد تحبها
ضحك ضحكة بدون روح و وجهه صار يفوح بالقهر والغيمة السودة غيمت و أستقرت بنص ملامحه، گعد گدامي يضرب بأصابع أيده على رجله.
-مِن زمان نكسرت
-بَس سيلين ما تستاهل كل هذا!
-هههههه ترا محد يستاهل لا انتِ و لا هيَّ بَس مجبورين.
مسحت وجهي و أچذب أذا اگول بهاللحظة أحس نفسي دا أتحاور ويَّ شيطان مو أنسان سرت رجفة رعب بجسمي بَس جبرت نفسي أكمل ويااه.
-يمكن أكو حل يعني شيء يكسر كل هذا الشر
-لا تحاولين لأن الشر ما ينكسر ينقل لا أكثر
-و أذا رجع بيك الزمن!
غمض عيونه و هوَ يجاوبني.
-أرجع طفل همي الأكل و أتعارك ويَّ أخواني قتيبة وريسان على حضن أمي هاي الشغلات أدفع دم گلبي أذا ترجع.
تغيرت ملامحه راجعه الملامح شرانية وكلهاا غضب وشرار يرعبك وانتَ بمكانك رجع گال.
-لُبيد: بَس الزمن ما يرجع شيء
بقيت ساكتة و أحس بنبرة صوته أكر غصة دا يحاول يخفيها، رفع راسه يباوعلي بعيون مميتة.
-وانتِ شنو أمنيتج أذا رجع الزمن بيچ
-تبارك: أرجع أختي الأحضاني
-وطفولتج!
-سيئة
-لأي درجة!
-الدرجة ما أحب أتذكرها
-ليش تخافين مِن الليل؟
بللت شفايفي بلساني لأن يبست مِن سؤاله، زارتني نوبة رجيف خفيفة أستحلت جسمي، گعدت گدامه أسيطر على نفسي كرهانة شعور الطفولة و كلشي شفته بيهاا.
-انتَ ما تنام!
-جاوبيني ترا ما أعيرج بيوم لا تخافين
-ما أحب احچي بيها
-براحتج ما أضغط عليچ تبارك
چان يحچي بهدوء و ملامح طبيعية مو مثل كل مرة يحچي بتعصب وصيااح.
-لُبيد: جَوهر ليش أجه هنا!
-تبارك: يفضفض لأن سيلين زعلانة منه بسببك
-بسببي!
-أي أتوقع بسبب سوء معاملته وياك.
-هههههههههههههههههه
-ما أتوقع حچيت نكتة!
-لا بَس ترا ما أهتم الكلام جَوهر
رفعت حاجبي يحچي بضحكة چذابية و واضح دا يخفي جروحه بيهاا، نهضت مِن مكاني صدعت مِن القهرر على نفسي لو على هذا أبن الشيطان الليَّ واضح حياته مو بأيده و متلاعب بيهاا خليفة.
-لُبيد: وين!
-تبارك: أنام
-هاا
-أيي.
حك طرف خدة حسيته يريد يحچي شيء بَس ما يعرف شلون يبادر بي، تحمحم وبقى ساكت الواضح ما عنده الجرأة يعبر عنه، طلعت مِن عنده راجعة الغرفتي وعيوني تحرگني بَس عاندت عيوني ما ابچي
حطيت راسي على المخدة و عقلي صار بي أعصار مِن التفكير، صرت أتگلب و مرة أفكر ب جَوهر ولعبي وياه و مرة بعلاقة سيلين و لُبيد و مرة أرجع أعيد بذاكرتي بكلام لُبيد شيقصد مِن گال جَوهر لاعب نظيف گدام الناس و ذيب وراهم؟
الثاني يوم داومت و هيفاء گاعدة گدامي تتذمر مِن زيادة اللوزن الليَّ صاير عندها صرعتني و اني منا البارحة عقلي أنفر بكلام أبن خليفة و مدا الاگي تفسير الكلشي حچاه.
-هيفاء: هسسسسسه شنووووو بنات
-أميمة: حبي گتلچ ألتزمي بنظام و جم تنزلين وزن
-أكررره الألتزام بنات و أحب الأكل هفففففف
-لعد أبقي صيري دبة
-لا فدوة لاااا ما أريد
-لُبنى: والله حيرتينا هيفاء
-هيفاء: بنات شسوووي عليكم الله زين شوفوا عندي فكرة.
-تبارك: أطربينا هيفو
-هيفاء: خلّي نسجل كلنا جم على واهسي حبابات
-لُبنى: اني حامل و هاي الأيام عمليتي أعذريني
-أييييي أيييي معذورة، و أنتن أميمة وتبوكة
-تبارك: أكره سوالف الجم
-أميمة: تشاقين!
فتحت عيونها وهيَّ مستغربة خلتني حتى أني أستغرب مِن ردت فعلها.
-والله ليش!
-بابا هوَ انتِ غير شايلة رشاقة تمووووت عبالك وحدة ملتزمة و مهتمة بحسمها بالرياضية و الأكل
هزيت بأيدي مبتسمة.
-و أذا اگلچن بحياتي مداخلة جم.
-هيفاء: ما أصدگ لا تحاولين لأن رشاقتج مرسومة رسم
-صدگيني ما داخلة بَس اني على ماما هيَّ كلش حلوة وشايلة رشاقة جسم تموت
-أميمة: شوگت تعرفينا على أمج تحمسستت أشوفها تبو
تلاشت أبتسامتي الخفيفة مِن ملامحي، شلون أعرفهن واني أمي ميتة نزف گلبي دم مِن القهر بهاللحظة.
-تبارك: أن شاء الله بيوم مِن الأيام
-هيفاء: هسسسسسه شنو!
-أميمة: بالنسبة إلى موافقة أريد أسوي تضخيم أحس جسمي صاير ما أعرف شلونه
-وانتِ تبوكة.
-تبارك: أعفيني مِن الموضوع
-أييي ليش يا تبارك
-ما أحبه أفهميني
رادت تحچي و وگفنا كلنا مِن دخلت علينا الآنسة زُها بفخامة لبسها و شخصيتها مثل العادة، شگد شخصيتها خلابة و بديعة، و الكحُل راسمته بدقة بارز عيونها بكل جمالية.
-زُها: صباح الخير بنات
ردينا كلنا عليها رادت تحچي وعينها أستقرت نظراتها على لُبنى، تقدمت بخطوات رايحة الها وگفت بصفها رفعت أيدها البطنها مبتسمة بسعادة.
-زُها: اووووي حياتي شنو بيچ ولد لو بنت!
-لُبنى: بنت
-فدوة أموت بيهن ألا أخلف منهن فد درزن و أسويلهن تسريحات شعر تجنن و أشتريلهن صبغ أظافر نصبغ اني وياهن.
ضحكت لُبنى على حماسها بالكلام و أحنا مبتسمين عليهن مبينة زُها تعشق شيء أسمه أطفال، بقت تسأل لُبنى عن صحتها وعن صحة طفلتها، الليَّ يشوفها مِن بعيد يخاف منها گد ما تبين شخصيتها صارمة و قوية بَس مِن تندمج وياك بالكلام فد كيوووووت و تجننن بكلامهاا خصوصًا رسمة أبتسامتها وشعرها البوي النحاسي الليَّ أميزها
ودعتها و أجت وگفت بنصنا اني و البنات تتساءل.
-زُها: شفتولي الأستاذ ريسان! يعني اليوم داوم.
-هيفاء: أي آنسة اني شفته وصعد المكتبة
-هاا لعد ماشفته گلت اسئل مابيَّ حيل أروح المكتبة ترا أدري أدري اني وياه بنفس الطابق بَس مكتبة يبعد مسافة عليَّ
-تبارك: أذا تحبين أبلغه تدورين عليه
-زُها: فدوة شنو هاي العيون تموووت تشگ شگ دخيل الله لا وعندها تك غمازة و الجمال موضوع ثاني
وجهي بوخ بخجل مِن غزلها هاي روحها شگد حلوة واگفة و مبتسمة وتتغزل بكل أريحة.
-شكرًا الچ آنسة زُها انتِ بعد تخبلين.
-حبيبتي هاي منتهين منها اني أموت والله
ضحكنا كلنا وهيَّ ويانا بَس اني و البنات خجلانين منها لأن أول مرة توگف هيچ وتسولف ويانا وتضحك، چنا ماخذين نظرة عنها تخوف بسبب أسلوبها بالشغل، ضربتني على كتفب بخفة.
-زُها: شو أنتن لطيفات شنو هاي جنجن صديقتي مينا أوف خلّي أطلع لا أرتاحلجن زيادة و أخرط كلشي يمجن و تطير هيبة المديرة
-هيفاء: فدوووووة أنسة طلعتي تخبلين بروحج.
-أميمة: أي والله آنسة أعتراف صغير احنا كلش نخاف منچ
-زُها: فديتني
-تبارك: اني حتى الأستاذ جَوهر سولفتله عنچ
-زُها: تشتكن مِن ورايَّ، صدگ بنات أنتو معزومات يمي بالبيت بعد ثلاث أيام حفلة خطوبة بنت خالي و الحفلة صغيرة بينا حنسويها مثل ما تحب هيَّ و ضروري تجون أتفقنا!
-لُبنى: اني والله أحتمال عمليتي
-زُها: أعذرج حياتي بالسلامة
-أميمة: أن شاء الله نجي
-ليش شحدها الما تجي أفصلها مِن الشغل.
حچتها بضحك و دزتلنا بوسة بالهوا طالعة مِن مكتبنا و اني و البنات متفاجئين مِن شخصيتها هاي وصافنين وراها هاي نفسها اذا ما سوينه الشغل عدل تصير ترعد علينا! بَس لاحظت شغلة هنا الكل صارم بالشغل حتى سيلين صح هم زينين ويانا بَس عندهم ألتزام ونظام صارم بالشغل و هذا الشيء الليَّ مخليهم مسيطرين على الموظفين.
زُها .
صعدت المكتبة هذا الخوينس المفروض البارحة يجيني بَس أنتظرته للوحدة بالليل و هوَ ما أجه و فوگاها حتى لا أتصل و لا بلغ، ضميت نظاراتي بجنطتي الشايلتها بأيدي ودگيت الباب مال المكتب مالته.
فتحته بهدوء چان گاعد على الكرسي مالته و گدامه كوب گهوة مبين جديد بسبب البخار مالته و مرجع راسه لوره مغمض عيونه، سديت الباب ورايَّ و تقصدت أضرب كعبي بالأرضية صدى صوت، أستدار على مصدر الصوت وعيونه صارت على الكعب
-ريسان: لو أعرف منو صنع هذا الليَّ يسموه الكعب وخلاجن تلبسنا
بقيت صافنة بمعالم وجهه هذا شصاير بي؟ رفعت حاجبي مبينة ما مهتمة للموضوع و گعدت گدامه بدون ما اسئلة عن شيء.
-زُها: المفروض البارحة تجي!
-أعتذر
-ليش ما أجيت
-صار عندي ظرف و ما گدرت أجي
-تمام
هز براسه بدون ما يباوعلي ما أعرف شبيها تصرفاته اليوم غريبة عجيبة.! بقيت گاعدة و هوَ مانطق و لا حرف قلقني، دگيت على الميز بخفة.
-زُها: شبيك ريسان!
-ريسان: سلامتج آنسة زُها.
فريت بشفايفي ماعاجبتني الوضعية، بَس لازم أتحمل علمود براء، لبست موضوعه كله هذا أذا يعاملني بمزاجية فَ اني أذا دخلت مزاجيتي بينا أخلّي يكره حتى نفسه و الساعة الليَّ فكر بيها يتعامل ويايَّ بهاي الطريقة.
-المُهم أريد نتناقش بموضوع براء
-تفضلي
حتى ما سئلني شلون عرفتي! مُستحيلل أطباعه اليوم ما تنطاق و لا تنبلع، اني بعد غلست و فتحت الموضوع.
-خطوبتها راح تصير عندي بالبيت
-مُمتاز.
رفعت حاجبي أباوعله هسه مال اگوم أفلش راسه على هذا الأسلوب الجااااف.
-حبيت أبلغك و تفاهم ويَّ الولد
-تأمرين
نهضت مِن مكاني متنرفزة بَس ما خليت هذا الشيء يبين عليَّ ومثلت البرود وعدم الأهتمام أتجاهه، طلعت مِن المكتب أسب بخليفة حتى نقاشنا ماطول يمكن خمس دقائق بسبب أختصاره الأجوبته و أسلوبه الناشف.
دخلت المكتبي و شمرت جاكيتي الجلد على الكرسي و گعدت أسحب نفس أهدي زُها أهدي لا تچفصين بشيء تتندمين عليه طُز بكلشي المُهم لا تقهرين بنفسچ
أنفتح الباب بدون ما يندگ ضحكت بفرح مِن شفتها مينا، نهضت مِن مكاني رايحتلها أركض حضنتها بكل قوتي مشتااقة الها ومشتاقة المطعمي و الأيامي وروتيني بي
-زُها: مشتاقتلج مينا
-مينا: تؤبري قلبي انا كمان مشتاقتلك.
رجعت حضنتها و ما أعرف شبيه أحس بَس أريد حضن يلمني مِن كل هاي المتاعب بحيث حتى هيَّ لاحظت تصرفي، أبتعدت عني بَس بعدها لازمة أيديَّ تباوعلي بملامحها طغاها الأستغراب.
-مينا: شوفي زُها حدا زاعجك شيء!
-زُها: لا بَس مشتاقتلج.
گعدنا أثنينا و حاضنه أيديها بين أيديَّ صديقة روحي و العُمر كله هالأنسانة، صديقة المواقف والسنين، طلعت مِن الكيس الليَّ مِن دخلت وياها حافظة فتحتها چانت جايبة زنود الست ضحكت مدمعة أيع صايرة حساسة أكثر مِن اللازم بَس أموت بالأهتمام لأدق تفاصيلي مِن الشخص يهتم بيهن.
رفعتها گدامي ترقص بحواجبها.
-جبتلج شيء تحبي
-انتِ أحلى صديقة مينا
-اصلًا بدوني تموتين زُها
-ههههههه صح
حطتها بنصنا وگعدنا ناكل بيها ونسولف.
-زُها: شلونها خالة خديجة
-مينا: تسلم عليچ
-مرتاحات!
-أي لأن ذاك المغثة ما يجي النا أكيد ما يجي لأن حاليًا هوَ مو بحاجتنا بَس مِن تخلص مصاري بيشرف
صارت تخبط عراقي وسوري وشتت عقلي رغم متعودة عليها.
-طُز لا تهتمين المُهم أمچ
-أتركينا مِن هاد كلو، شو صار على سفرة العراق لساتك بدك تروحي
-أي بَس لازم أكمل كم شغلة منها خطوبة براء
-شوووووووو
عاطت برجهي مكمزتني بعيطتها ضربتها لازمة گلبي.
-شبيچ مينا هبطتيني.
-براء نفسها يعني بنت خالچ!
-أي
-لك كيفففف!
حچيتلها القصة كلهت و هيَّ بَس صافنة بوجهي و ملامها وتعابيرها تتغير ويَّ كل كلمة تطلع مني الى أن كملت.
-زُها: وهاي كل القصة
-مجنونة
-ليش!
-أمج أذا عرفت ما تسكت، ليش ماحاولوا يرجعون يطلبوها منها.
-حبيبتي مينا انتِ مو غريبة عنا أمي وتعرفينها تموووووت وتعشق وتبيعني وتبيع الدنيا كلهاااا علمود الفلوس، و مُستحيل أهل الولد يرجعون يدوسون بيتها بعد ما طردتهم وقللت منهم و أخذيها مني مِن سابع المستحيلات أمي توافق لأن عندها المادة مهمة
-أيمتى الخطوبة
-بعد ثلاث أيام
هزا براسها ساكتة و اني رجعت أكل مِن زنود الست وعيوني عليها بقت تصفن و كأنما تفكر بشيء دغيتها بكتفها ترجع للواقع.
-زُها: بَس تصفنين!
-مينا: زُها سؤال
-اسئلي ميمي
-هسه أنتو كلكم تكرهون خليفة ليش ما تحطون أيدكم أيد بإيد وتتخلصون منه
-هههههههههههههاااااااي
-شكو! أمداچ شحچيتلج نكتة وتضحكين
-أي والله نكتة مينا انتِ شگد بريئة و الواضح ماتعرفين منو خليفة وشنو خليفة
-أعرفه حقير
-بَس انتِ ما تعرفين شنو هوَ بالضبط.
بقت تباوعلي بعدم فهم لأن هيَّ معرفتها بسوالفه قلة ما تعرف عنه هوَ شنو بالضبط، سحبت كلنكس مسحت فمي بي وأصابع أيدي، رجعت ظهري على القنفة الگاعدين عليها.
-زُها: خليفة مو مثل ما مفكرة مينا، خليفة إحد الزعماء الخطرة بعالم المافيات ظهور يابو ظهور قوية ساندته ماشفتي شلون طلع منها بسهولة مِن حاول يقتل ريسان و وصله الموت! ما فهمتي شلون طلع منها بكل بساطة لأن عنده ناس ساندته
-مينا: لهل الدرجة مو جنج أورتي!
-ياريت أور بَس هاي الحقيقة و طبعًا ماكو شيء ببلاش و مجاني كلشي يندفع اله الثمن
-و القانون!
-حبيبتي مينا هيچ عصابات خطرة و تدير مجاميع وزعماء تفكرينهم أغبياء! لا طبعًا و خصوصًا هم لاعبينها صح عندهم شغل نظيف يختلف عن أشغالهم و أعمالهم القذرة وخافين أنفسهم بي وبدون ذرة دليل عليهم
-وهذا برج خليفة شوگت نخلص منه!
-صعب
-شلون!
-اله ظهر قوي سانده صعب نتخلص منه بسهولة، هذا خليفة مينا خليفة خطر مثل الموس على البشرة
-برأيج حامد هم اله أيد بشغل خليفة!
-الأثنين نفس الطينية
-لعد لُبيد شمدخله وياهم
سحبت حسرة طويلة مِن سؤالها الليَّ هالمرة ماعندي جواب اله.
-ما أعرف دوخني وحيرني لُبيد يكرهه بَس يشتغل ويااه و مرات يشتغل ضده وبنفس الوقت ينفذله كل شغله
-لعد ريسان شرجعه هوَ مو ما يحب يحط أيده بأيد خليفة.
-حسب توقعي و الليَّ فسرته لأن شغل الشركة كله نظامي و نظيف و هوَ بتعب الشباب دا ينجح يعني بالمختصر مابي دغش و لا تنسين الفلوس الليَّ نفتحت بيهن هاي الشركة هيَّ فلوس أم ريسان مو فلوس خليفة بَس الكلب خليفة مخلي كلشي بأسمه و أتوقع لأن بفلوس أمه أنبنت هالشركة هوَ رجع الها
-أوف حياتكم مُعقدة وتدوخ.
-لا تتوقعين ناسية اله شغلة المطعم وشلون حرگ گلبي بَس اني أريد أشتغله على البارد و أكسر راسه لأن هوَ مو سهل و هسه لو يموت ما يثق بيَّ بعد ماگدرت أخدعه و أخذ حق أبوية الليَّ أخذه مِن سنين
-الله ياخذوووووو لسه حرق المطعم بياكل ويشرب معي
-وداعتچ مينا حقي أخذه مِن نص عينه و شرط أخلّي خسارته أضعاااف خسارة مطعمي الليَّ خسرتها
-امين ياررررب بدي شوف فيك يوم يا خليفة.
سكتنا أثنينا مِن أنفتح باب مكتبي ودخل ريسان حرك شفايفه يريد يحچي بَس سكت مِن شاف مينا بالوجود أبتسم بوجهه بهدوء.
-ريسان: أهلًا مينا
-مينا: لك أهلين شو في هاد ليش هيك
أشرتله على وجهه ما أهتميتله ورجعت گدت گدام مكتبي ضاربته بعرض الحايط ما مهتمه لوجوده، سحبت الملفات الليَّ گدامي أشوفهن أذا يحتاجن شغل وتدقيق و إسمع الكلامهم.
-ماكو شيء حادث بسيط
-متخانق مبين
-أمممم
-بتاكل؟ جايبه زنود الست
-وحدة بَس.
نطيته مينا وحدة وگف ياكل بيها ويمدح بطعمها.
-ريسان: كلش طيبة عاشت أيدج
-تؤبرني
هاي شبيها راحت على الترابي زايد أذا ماطيحت حظج يا مينا منو لزمته ولزگته بتؤبرني و تؤبرني هالشبوبية، تحمحم يريدني أنتبه عليه بَس باقية ثابتة على موقفي و شخصيتي ومنطيته الأذن الطرشة
أجت مينا بوستني گالت لازم تروح وسلمت عليه وطلعت مِن يمنا بقينا بَس اني وياه، رفع الحافظة الليَّ بيها الحلا و هوَ يگول.
-ريسان: طيبة هاي زنود الست.
مارديت عليه، رافعة حاجبي و أشتغل مُستمرة، رجعها المكانها بعد ما يأس مِن المحاولات، شغلة مزاجيات هيَّ مثلًا حضرته شوگت ما يعجبه يسولف ويضحك ويايَّ وشوگت ما عجبه طنكر بخلقتي
-زُها
-زُها: أتفضل!
-مو احچي وياچ
رفعت راسي اله مبتسمة براحة وضربتها بوجهه هالمرة ما كتمتها.
-لا تخليني أكرهك ماشي!
بهتت ملامحه طابگ حواجبه و عيونه تتجول حول ملامحي.
-ليش!
-أسمعني ريسان خليفة، اني مو لعبة عندك اليوم أي تعاي يعجبني إضحك و أسولف وياچ ونعيش لحظات حلوة و يوم تنفرني وتصير تتعامل ويايَّ ك أنسانة غريبة عليك، على فكرة زودتها بتصرفاتك و قبلها غلست عنهاا و سامحتك بَس هالمرة أنسى شيء اسمه أمشي على مزاجك، اني زُها و تعرف زين اذا حطيت شيء براسي شنو اگدر أسوي خليك حذر، أذا ما تعجبك صداقتنا أنهيهاااا ومع الف سلامة اني حياتي ماتوگف لا عليك و لا على غيرك نفسي أولى مِن كلشي.
جربت نفس و الغصة صارت تتلاعب بلعومي و اني احچي هالكلمات جرة وحدة، بينما هوَ واگف ملامحه مصدومة مِن كلامي بَس يستاهل والله أعز نفسي وطُز بي لو مو أحبه و أموت عليه
-ريسان: فهمتيني خطأ
-زُها: لااا ما فهمت خطأ وين الخطأ! احچي وياك تجاوبني مِن وره خشمك منو انتَ مثلًا وهيچ خابص روحك!
-زُها؟
-ماكو زُها اني ما مجبورة أتحمل هيچ أسلوب جاف وناشف منك و نمشي حسب مزاجيتك
-مو مزاجيات فهمتي خطأ.
-لك ريسان الحامل ماعندها هرمونات أكثر مِن هرموناتك انتَ طلعت بيها دوسة ونص
-شجاي تحچين زُهاااا
-حقيقتك
هز براسه و أستدار بخطواته الجهتي وگف قريب مني حاني بجسمه المستواية، وجهه صار قريب مني وهمس بنبرة ندم و أعتذار.
-چنت ضايج مِن شغلة وصارت بوجهج اني أعتذر
-مو ذنبي، الشغل الليَّ تضوج منه طلع ضوجتك منه بالمكان الصح مو بالأشخاص الخطأ
-شسوي و ترضين.
رفعت أكتافي بمعنى ما أعرف، و أحنا نحچي ندگ الباب، أبتعد عني دخلت وحدة مِن الموظفات بأيدها بوكية الورد نفس الورد الليَّ أحبه ونوعي المُفضل، نسيت ابو الورد مِن يوم ما احترگ مطعمي بعد ما شفت منه أي ورد حطته گدامي و گالت وصلت الچ
لزمتها حاطتها گدامي مبتسمة عناد بالواگف بصفي، چان أكو كارت داخلها سحبته بهدوء فتحته اقرأ بالمكتوب چان كاتب رسالة أعتذار بَس هالمرة غريب مو باللغة العربية؟
-I m sorry butterfly I don t mean to be
late this time
نحرفت عيوني على ريسان يباوعلها بنظرة تفسير! رفع حواجبه بآن واحد و أتقرب منها يتلمس بالورود.
-ريسان: ورد جوري! نوعج المُفضل بالورود
-زُها: ذواق الليَّ دازها صدقة الربه شگد راقي
-تعرفي!
-أممم لا
حچى بنبرة تعصب خازرني.
-لعد شلون تقبليهاا؟
-أتوقع دازي إلى مو ألك!
-أفتهم بَس ليش تقبلينها أذا ما تعرفين صاحبها!
-يمكن مُعجب سُري
-هه
-ماتضحك!
-ابدًا سخيفة نكتج.
-أتفضل أطلع برا
-نعممممم!
-مثل ما سمعت
-تخبلتي زُها
-عندي شغل تطلع لو أبلغ الأمن يشوفون شغلهم وياك!
أحتل الصمت المكان الواگفين بي وهوَ ما مصدگ تصرفي و مستغرب و مصدوووم بنفس الوقت بكلامي الحاد وياه، بينما نظراته ما ضيعت أي لحظة وهيَّ تباوع بين وجهي وترجع تنزل على الورود الليَّ واگفة وأيدي تتلمس بيهن برقة.
-تمام زُها
رفعت راسي ببرود و أبتسامة خفيفة لعبت على شفايفي، أبتسامة تحدي چانت.
-تمام ريسان خليفة.
شدّ فكه قوة متشنج و أقترب مني بخطوة.
-تدرين شنو أكثر شيء يستفزني بيچ!
-أصدمني
-اني شگد بارد و الكل يشكي مِن برودي و هدوئي بَس انتِ الوحيدة الليَّ يستفزني هدوئها وبرودها ويايَّ
-هاي رب العالمين دا يعاقبك لعد خطية الناس شگد جالطها ببرودك گالك ألا أدزلك واحد ينافسك ببرودك
-منو أبو الورد!
-شدخلك أخي!
عقج وجهه بوجهي و كأنما كلمتي ماعجبته.
-أخي!
-خاب ريسان شفايتلك عندك أخت مثلي غير مِن تمشي بالشارع عبالك عندك جناحات وطاير مِن الفخر
-لا والله
-طبعًا
-جاوبي
-شدخلج
-أستغفرلله شبيچ زُهااااا شبيچ
قلبت عيوني أزيد مِن غضبه و أخلّي يغلي غلي و أندمه على اللحظة العاملني بيها ببرود.
-شدخلك بابا
كز على أسنانه يحچي مِن بينهن خازرني و وجهه دخن مِن العصبية الليَّ تصلبن بنص شرايينه.
-الي دخل و غصبًا عليچ شنو ورد! شنووو شخص مجهول ما تعرفي؟ شنوووو معجب سُري شبيچ بابا
دفعته مِن گدامي بأطراف أصابعي.
-تريد تفتش بالموضوع فتش ما يهمني و لا راح أهتمله بَس خلّي شغلة وحدة أبالك لا تفرض شخصيتك عليَّ لأن بأحلامك أمشي بمزاجك
جمد الدم بعروگي و گلبي نبض بعنف مِن أبتسم و إقترب مني لاطشني على المكتب نحصرت بي حصررر صرت أبلعم مِن القرب الليَّ صار بينا.
-زُها: شنو هاي ريساااان ايععع شهل لتصرفات الرخيصة
-ريسان: شمسوي!
-أبتعد
-أذا ضوجتج احچيلي بَس تتعاملين بالطرد هاي ما مقبولة منچ زُها حديد
-ديلا ماشي أتفضل أبتعد و أنطينا عرض أكتافك و أطلع.
دفعته بكل قوة مِن گدامي مبتعدة عن مكاني و أيدي على گلبي يدگ بدگات تخوف أول مرة هيچ يصير قرب بينا وهيچ تصرف مفاجئ يظهر مِن عنده، مسحت جبيني الليَّ تعرق مِن مشاعر التوتر و الأرتباك الصابتني بدون أي تمهيد، رفعت أيدي مأشرتله على الباب.
-زُها: أتفضل أطلع ريسان
طلع بدون ما يرد عليَّ، گعدت أسحب بأنفاسي السريعة الله يااخذ أبوك العار على هاي الخلفة السرسرية، ولك انتَ العاقل الوحيد بين أولاده شبيك تخبلت.
طلعت مِن المكتب جهازي بأيدي و ما أعرف شبيَّ شاردة نزلت جوا أخذت أسبريسو و گعدت أشرب بي صافنة، شبيه هيچ تغير! البارحة چان طبيعي ويايَّ يشاقة ويضحك، اتأفأفت ونهضت مِن مكاني راجعة للمكتب
أمشي بنص الشركة وعيوني على الموظفين أستوقف خطواتي دخول شخص شكله غريب غير مألوف بالنسبة إلى و كأنما عيونه تدور على شخص، أيديه ضامهن بجيوب الكوت و كأنما خافي شيء داخلهن.
فات مِن يمي بدون لا أخلي ينتبه بقيت أمشي بهدوء و أذني وعيني عليه، وگف واحد مِن الموظفين و طبگت حواجبي مِن سأله.
-وين أگدر الاگي مكتب الأستاذ جَوهر!
جاوبه الموظف برقم الطابق الموجود بي مكتب جَوهر ورجع مكرر سؤاله بصيغه مختلفة.
-الحين الاگي لو صعدت المكتبه!
-أي أكيد.
ماچانت لهجته عراقية أنما خليجية، هز براسه و گلبي لعب منه و مو لعب عادي هذا مبين وراه مصيبة، خففت أنفاسي بحذر أراقبه، خلّيت مسافة بيني وبينه علمود ما يشك بشيء
مشى بأتجاه المصعد و اني بهل اللحظة أفكر لازم يوصل خبر لل سيكيورتي برا، وصل للمصعد ضغط على الزر ودخل أسرعت بخطواتي وراه بسرعة دخلت وياه، ضغط على زر الطابق الموجود بي جَوهر.
فتحت جهازي بدون لا أشككه بشيء وگفت أريد أدز رسالة الحجي حسن بلكي بعده يم جَوهر لأن الصبح گال عنده شغل اليوم ويَّ جَوهر، بلعت ريگ جامدة بمكاني مِن لمحت بقطعة السلاح ويَّ ما حرك أيده
-حجي حسن اذا بعدك يم جَوهر لا تطلع مِن عنده أرجوك و بلغ الأسيكيورتي يصعدون للطابق الليَّ بي مكتبه.
دزيت الرسالة وبقيت واگفة عيوني مِن جوا لجوا تراقب بي منو هذا! وليش جاي خص نص ال جَوهر؟ أكو شيء خطر منو مُمكن يكون دازه معقولة تُركان! لو أبوها لأن مشتد الوضع بينه هوَ و حامد بخصوص القضية الليَّ نرفعت ضدها بسبب عملتها الأخيرة ويَّ جَوهر.
أنفتح المصعد و مشى گدامي هوَ مشى مِن جهة واني مِن الجهة الثانية، علامات قلقة واضحة بوجهه و واضح وراه شيء چبير، صار بوجهه ريسان الليَّ يمشي ويخابر ما منتبه عليه بَس الرجال فاجئني بأرتباكه بمجرد ما شافه، حسيت بهل اللحظة حتى رجليه راح تخونه مِن گد الأرتباك الليَّ أحتله بظهور ريسان گدامه.
بَس الليَّ صار هنا غريب! غريب الدرجة صفني، ما كمل طريقة! و لف راجع دخل للمصعد نازل جوا، بقيت صافنة هذا ليش غير رأيه؟ نزلت وراه أركض بَس الحقيرررر المصعد بعد ما فتح ضربت رجلي بغضب.
و رجال الأمن هستوهم يلا وصلوا النا وگفتهم شرحتلهم كلشي ونزلوا جوا يركضون علساس راح يلزموا هاي أذا ما هسه انشگت الأرض وبلعته، توجهت المكتب جَوهر دگيت الباب أجاني صوته بهدوء، دخلت چان گاعد وحدة وبكل أريحة گدامه مُجسم يشتغل بي لعد وين حجي حسن؟
-جَوهر: أهلًا زُها
بسرعة دخلت وسديت البال حسيته تفاجئ مِن حركتي بَس ضربت الوضعية تغليس و مشيت المكانه الگاعد بي.
-زُها: وين حجي حسن لعد!
-قبل شويَّ طلع ليش!
أثنينا ألتفتنا على فتحة الباب بقوة چان حسن و ملامحه مزروع بيهن القلق زرع، ذب نفس و عيونه سلمت بأمان.
-حسن: جهازي چان جوا ما أدري بي شصاير زُها؟ بسرعة بَس شفتها بلغت الأمن
بقى جَوهر واگف و نظراته توجهت علينا و توزعت بيني وبين حسن الليَّ خطية حسيت گلبه راد يوگف مِن الخوف، يموت بشيء اسمه جَوهر و ريسان يدفع عُمره كله الخاطرهم، أنطى حسن الجهاز ال جَوهر يقرأ بالرسالة، قراها ورفع راسه يسئل بيَّ.
-جَوهر: مُمكن تفهمينا آنسة زُها شنو معنى هاي الرسالة؟
-زُها: شبيكم أنطوا مجال خلّي أتنفس اوووي عابت شكول العدو
گعدت گدامهم هوَ اني منا الأستاذ ريسان لعب بحالي و منا هذا الشخص الغريب الليَّ دخل بسلاحه الداخل شركتنا بدون ما أحد يلاحظه أو ينتبه اله.
-حسن: احچي مو فتيتي گلبي يا عيوني
-زُها: اوگفوا شبيكم خلّي أخذ شهيق وزفير
-هسه هيَّ مال شهيق وزفير
-جَوهر: هههههههه حجي أنطيها مجال مبينة مهبوطة البنيه.
سكتوا أثنينهم لمن حسيت نفسي أعرف أجمع بالكلام وخف التوتر الصاب دمي يلا بديت احچيلهم كلشي.
-زُها: أتوقع أتوقع چانوا مستهدفينك جَوهر
تلاشت أبتسامته مِن وجهه و گالبه للجَدية، عقد حواجبه ما فاهم كلامي.
-جَوهر: أستهداف شنو!
-دازين شخص يغتالك و الشخص خليجي الجنسية أتوقع لأن سمعته يحچي ويَّ الموظف مِن سئل عنك
ضرب حسن الميز و هوَ يأشر بأيده ال جَوهر.
-حسن: چنت حااااس راح يسونهاا و ما يعوفووونك.
-جَوهر: لا تبالغ حجي شبيك!
-انتَ هدفهم جَوهر حتى حااااادثة أبنك و كنان هيَّ مخطط الهاااا
بقى جَوهر يباوعلي و كأنما مايريدني أسمع الليَّ دا يحچي بَس عباله أتركهم وحدة، رجعت ظهري بأريحة وطبگت رجل فوگ رجل مبتسمة برجهه.
-زُها: كملوا عيني ليش سكتوا خلونا نسمع الباقي الحكاية
-جَوهر: كملي بالأول انتِ باقي الحكاية نطيتينا مقتطفات وسكتي
-غير أنتو مدا تنطون مجال ما تحترموني أصبروا ألا أطردكم مِن الشركة.
-حسن: كملي زُها اذا مُمكن
-زُها: فشلتني حسن!
-شسويت!
-ماگتلي أحنا كلنا تحت أمرج زُها حديد
غمض عيونه بنفاذ صبر يريدوني أكمل، أستخطيتهم وبديت احچيلهم كلشي مِن أول ما شفت الرجال و شلون مِن شاف ريسان تغيرت كل معالمه و أحواله، بقوا أثنينهم صافنين مِن بلغتهم سبب رجوعه مُمكن ظهور ريسان گدامه لأن صار يتراجف بَس شافه.
-جَوهر: مُمكن يعرف ريسان!
-زُها: و أذا؟ ما فهمت شنو السبب القوي الليَّ يخلّي هيچ يرتبك منه.
-حسن: جائز مِن رجال خليفة
طبگت حواجبي لا هالمرة صدگ أحااا و أحووو ويباووووو، خليفة شكو ويَّ جَوهر! رفعت أيدي حكيت طرف زاوية فمي و اني أباوعلهم بنظرات أستفسار و أستغراب.
-زُها: جَوهر شنو الليَّ بينك انتَ وخليفة و يوصل مرحلة يغتالك بنص شركتك؟
بقوا صافنين أثنينهم و جَوهر يخزر ب حسن ما قابل و حسن ملامحه صارت ما تتفسر عبالك چفص بشيء لازم ما يچفص بي.
-جَوهر: فهمتي غلط يقصد تُركان أو أبوها.
-زُها: أمممم عليمن دا تلعبون أنتو!
-حسن: يا لعب؟
-اسئلوا أنفسكم، شوفوا اني ما أجبر أحد يحچيلي بَس مو غبية لهيچ هاي السوالف الروتينية المعروفة لا تمشوها براسي تمام شباب
-حسن: اني نازل أشوف شصار بالوضع أذا عرفوا شيء
-جَوهر: خلّي ننزل للكاميرات انشوف منو هذا الشخص يمكن نعرفه.
هز براسه حسن و طلعوا هم الأثنين وبقى عقلي يستفسر شنو بينهم خليفة وجَوهر! باع ذولي عبالهم أتركهم اليوم أذا ما طلعت روحكم فلا أطلع زُها حديد، نزلت وراهم الغرفة الكاميرات، دخلت شفتهم واگفين مركزين بأنظارهم بالكاميرات المتوزعة بالشركة.
-جَوهر: ما شايفة أول مرة أشوف هذا الشخص
-حسن: و لا اني
-زُها: شصار؟
-حسن: أختفى ما ملحگين عليه
-توقعت.
بقوا مركزين بالتصوير و نبهوا الأمن بحال رجع مرة ثانية يبلغون جَوهر، طلعنا نمشي و جَوهر وحسن ساكتين تحسهم ما يريدون يحچون شيء گدامي و اني مو فضول مني لاااااا بَس عناد بيهم شلون ديحاولون گدامي يضمون شيء بَس هنا نقذهم مني أتصال براء، عفتهم و أبتعدت
-زُها: هَلا هَلا بالعروس
ضحكت بخجل و هيَّ ترد عليَّ بصوتها الهادئ.
-براء: ههههه وين انتِ؟
-بالشركة ليش!
-أريد نروح نشتري الفُستان أكو محل مرة شفت عنده هيچ شغلات عاجبني أخذ منهم
-أضربلج الشغل وخليفة و أجيج ركض شعندي غيرك اني لك برو
-الله يحفظج يا عمري زُها وينطيج على گد نيتج دائمًا
أبتسمت الدعوتها النظيفة و النقية مثلها.
-جايتج انتِ وين
-بدوامي راح أنتظرج بالباب
-تمام قُبلاتي.
غلقته منها و صعدت المكتبي أخذت جنطتي وشفت زنود الست باقي منها هوايَّ والله حرامات تنذب أخذتها و نزلت المكتب البنات گاعدات نطيتها الهن.
-زُها: هاي صديقتي مسويتها مو تعيبين عليها أفتن عليچن
حچت هاي الحلوة أم عيون الشيرازية تخبل عيونها و ما گاتلتني غير بهاي الرشاقة الشايلتها أدري يمعودة شنو متاكلين انتِ.
-تبارك: شكرًا آنسة زُها مبينة طيبة مِن شكلها.
رفعت أيدي دازتلهم بوسة وطلعت نازلة مكملة طريقي اني أخاف هذا الطبع مال البوسات فد يوم ألطشه بوجه رجال أخلي ما يندل دربه و عباله اني وحدة خفيفة اووي اني الثگل ومنبع الثگيل، لبست نظاراتي وصعدت سيارتي و بطريق الشركة تقريبًا وصلت وشفت سيارة الشيطان خليفة متوجهة للشركة مبين.
وصلت يم المكان الليَّ تشتغل بي براء روضة أطفال شفتها واگفة يم الباب مِن الداخل طلعتلي، وجهه يشع شع، بياض صافي وخدود وردية تخبل مو مثالية بَس ماتحط مكياج رغم هيَّ ملامحها عادية و مو جمال بَس سبحان الزارع القبول بوجها و أبتسامتها مريحة للنفس، حچت بحماس.
-براء: يلاااا
-زُها: أمممم أمممممم
-أهو زُها لا تحچين هيچ و تتغامزين أخجل والله
-هههههههههههه أموت بالليَّ يخجل ولك.
ضربتني على كتفي تضحك و وجهه انگلب دم إحمر مِن الخجل.
-ترا بنت اني شنو تحاچيني بصيغة ولد
-كلشي يرهم الجمالك يا حِلو يا قشطة
ضحكنا اثنينا مِن گلبنا بسعادة و أنطلقنا للمكان الليَّ نفسها هاويته و الرايدته هيَّ، طول الطريق تسولفلي عن أم مصطفى مخابرتها گايلتلها أذا تحتاجين شيء أحنا بالخدمة و أعتبرينا أهلج.
-براء: بَس اني گتلها عندي أخ و أخت ما يقصروون ويايَّ
-زُها: فدوة أروحلج شعندنا غيرج أحنا.
-تدرين ريسان أجاني أنطاني مبلغ و اني ماقبلت بَس گال أزعل اذا ما تاخذينهن مِن أخوج، وحسيت نحرجت و أخذته منه
-هوَ أستلم مسؤليتج فَ لا ترفضين أي شيء يتقدم الچ منه و لا تنسين هوَ ما عنده أخوات
-أتمنى لُبيد هم يجي بعقد قراني
-هوَ وينه هذا مانعرف وين أراضية
-مسكين
ذبت حسرة ودارت وجهه للجامة مال السيارة وبنص الطريق گالت.
-براء: خلّي ناخذ عمة شروق ويانا
-ولو بعيدة بَس كلشي يرخص لعيونج.
غيرت مساري و أتوجهنا الشروق و أسرعت بالسياقة علمود نوصل مِن وقت، وبعد فترة زمنية وصلت الشقتها صعدت الها بَس اني وخبصتها خبص شبعتني دگ رزايل وغلط لأن خليتها تبدل بسرعة ونزلنا صاعدين بالسيارة
-شروق: أشتعلت أمج
-زُها: مو نتأخر يا شروق
دارت براء گعدت وره بصفها باوعتلهن مِن المراية مال السيارة رافعة حاجبي.
-شنو عيني بَس لا گالولجن اني السائق مالتچن
-شروق: دسوقي لِچ.
ضحكت مشغلة السيارة ورجعنا متوجهين للمكان و الطريق كله سوالف وضحك ويَّ شروق خصوصًا مِن ترزلنا نفحطط ضحك عليهاا، وصلنا للمكان نازلين أحنا الثلاثة دخلناله چان مرتب و خاص بهيچ مناسبات، بقينا نفتر ونفتر هيَّ تريد شيء مُميز و هم هيَّ صاحبة جسم نحيل شويَّ
-براء: اني صوچي صوچي ما سمنت
-زُها: هسه أنفخج لا تزعلين
-هههههههههه مو شوفي كلهن يريدن جسم واني منيلي الجسم هالگدوتني
-تموتين والله هسه نلگى شيء يلوگلچ.
-شروق: معصعصات
-زُها: شروق عيب عليچ اني منيلي معصعصة! منيلي الضعف! اصلًا عظمي خشن حتى لو ضعفت ميبين كلش
-أي عفية لا تصيرلي معصعصات أكلن ماما أكلن لعد شلون تصير بيجن روح و تقون روحجن
-براء: ليش عمة وين ماخذينا الحلبة مصارعة بَس صدگ اني يرادلي أسمن شويَّ
-شروق: تعاي عيشي يمي ألا منا للعرس أنفخج نفخ و أسويچ تموتين
-زُها: بصراحة براء تريدين نصيحتي!
-براء: أي.
-لا تروحيلها توكلج غصب غصب عليچ حتى لو مالج خلگ وروحج بخشمج هم تخليچ تاكلين
ضربتني شروق طفرت مِن يمها أضحك.
-شروق: يا چلوبة
-أحبچ والله قُبلاتي لعيونج الزرگ
رجعنا ندور فستان البراء رادت بَس واحد و أخيرًا لگينالها لونه أوف وايت مو أبيض صافي، دخلت قاسته و چان الحمدُلله فيت ضبط عليها و هنا شروق دفعت الحساب مالته و گالتلها هدية مني، بالبداية ماقبلت براء بَس مِن شافت شروق زعلت يلا قبلت.
-زُها: دخلينا ناخذ واحد ثاني
-براء: لا والله ما يحتاج هيَّ حفلة عائلية بينا عليمن هاي التكلفة كلها
-برو ترا موجودة فلوس لا تشيلين هم الهن
حضنتني مبتسمة.
-مو قصة مبالغ بَس اني ما أحب اجواء الأغنياء أحب اجواء الناس البسيطة و هوَ فستان واحد مال محجبات أخذناه كلش كافي.
هزيت براسي موافقتها الرأي ما أريد أفرض عليها رأيَّ أو شيء هيَّ ما تريده لأن نفسها وهواها راغب شيء ثاني، ورجعنا طالعين شترينا باقي الشغلات الليَّ هيَّ محتاجتها، دخلتنا شروق المحل المجوهرات بقت براء تباوع بوجهي ما فاهمة، أما اني فهمت المقصد شنو، گعدنا جابولنا ضيافة و شروق تحچي ويَّ الصايغ.
-براء: ليش أجينا هنا!
مديت شفتي السفلية رافعة أكتافي بمعنى ما أدري، دارت وجها تباوع وره شروق الثواني أشرتلها شروق تجيها، راحتلها و اني گاعدة أباوعلهن و أشرب بعصيري الفريش
أجه الصايغ مسلم علبة باللون الأسود دائرية أنطاها الشروق فتحتها گدامها وبراء باقية مصفنة بيها، أسوار ذهب معروف بأسم المخرم منقوش بنقوشات تجنن و وياه خاتم بتصميم التاجي العريض يغطي جزء مِن الأصبع أذا تلبسه لايگ ويَّ ضخامة الأسوار
-شروق: عجبنج!
-براء: عمة شنو هذا؟
-و انتِ گلتيها عمة يعني عمتج اني و تتقبلين مني كلشي
-بَس هذا كلش غالي شوفي ثگله و ضخامته
-وشنو يعني! مثلًا يغلى عليچ لا وشريفة بنت الحسن قليل بحقج
نزلت دموع براء وعمة شروق مسحتهن الها بأيديها مبتسمة و هيَّ تگلها.
-شروق: انتِ و زُها صح مو مِن دمنا بَس يشهد الله معزتجن بمعزة الشباب ما أفرق بحبكم و معزتكم
-براء: الله يحفظج عمة شكرًا الچ.
لبستها الأسوار و المحبس بأيدها يخبلن عليها خصوصًا هيَّ صاحبة كف أنثوي و أصابعها رفيعات و قطعة مِن البياض قشطة قشطة، دفعت شروق الحساب و طلعنا مِن الصايغ أحس الفخر طالع مِن خشمي بمواقف ريسان وشروق ويَّ بنت خالي رغم هيَّ غريبة عليهم ما يربطهم أي رابط دم بَس ما أتذكر بيوم بينوا هذا الشيء
-شروق: أمشن ناكل اني جعت ولچن
-زُها: دومج تفكرين ببطنج.
ضحكت و طبعًا هذا شقانا اني وياها متعودين دخلنا المطعم نزلنا وجبة أكل گعدنا ناكل و شروق فتحت الموضوع لأن طلع الخوينس حاچيلها عن موضوع براء و اني اگول ليش ما تفاجئت مِن صعدتلها گتلها عن براء.
-شروق: أتمنى تجي فيحاء بالعقد اخخخ يا يابه أريد ألزمها أكلها لحم
-زُها: أوف شوشو عضلة
-هاي العارة أمج ماتعزمينها مشتاقتلها
-ههههههههههههااااي جدًا أشتياقج غرگ أميركا
-براء: عمة الخطوبة حنسويها ب بيت زُها تدرين مو.
-شروق: لا هسه عرفت و ماكو فرق اني ردت يمي بَ يمكن شقتي ماتكفي خليها ب بيت بنت العارة هاي
-زُها: شروق انتِ كلش سرسرية
-شروق: كون يجي صگارج انتِ هم ويگص هذا اللسان
-بعدّه خطية فارس أحلامي حصانة يمشي على البطيء.
كملنا غده و طلعنا سريع لأن لازم نبدي بتجهيز بيتي ماباقي غير ثلاث أيام، وصلتهن لبيوتهن ورجعت للبيت دخلت، بقت عيوني تفتر بالبيت و الخنگة عصرت گلبي الوحدة شگد تخنگ چنت مخلصتها مِن بيت شروق البيت مينا.
غيرت ملابسي و هذا ابن خليفة حرامات ما أستغليته يشتغلي أوف هسه أظافري تتكسر أشتعللللللللت روحك خليفة، سحبت نفس و البچية بعيني هسه شيشتغلي هذا الشغل كله، بديت بغرفتي رتبتها بالبداية بالملابس و بعدين باقي الشغلات يمكن ثلاث ساعات اني بَس أسوي بغرفة لعد باقي البيت منا الشهر يلا أكمله
رجعت أكمل شغلي و اندگ جرس البيت مشيت افتحه، فتحته و اتفاجئت مِن شفته ريسان گدامي.
-ريسان: مساء الخير
-زُها: مساء النور.
عفته ودخلت جوا مبقية الباب مفتوح ورايَّ، أييي لك أييي هَلا بيك الشغل منتظرك بيب، سويت نفسي أريد اشيل الكارتون الموجودة بي أغراض كتمت أبتسامتي مِن أجاني يمشي بخطوات سريعة لزمه مانعني لا ومصدگ اني أشيله.
-ريسان: نطينياه عنچ
-لا اني أشيله
-وين تگدريله شوفي شگد ثگيل زُها
-أگدرله.
خرب شگد أبيع ثگل وسوالفه أريد أموت ضحك على شكلنا شلون لازمينة اني أسحب بي وهوَ يسحب بي بالأخير خزرني عود عباله خوفني بَس اني دا العب بأعصابه، أخذه نزله للأرض و بديت أطلع بالأغراض الليَّ بداخله أرتب بيهن.
-ريسان: كملتوا تجهيز براء
-أي
-ما محتاجة شيء سئلتيها
-لا ما محتاجة
أجاوب بي وعيوني بالأغراض مو بي و هوَ گاعد گدامي يباوع الحركاتي.
-ماعندي فكرة عن الليَّ راح تسوينه للحفلة
-بعدني ما مخططة
-نخطط سوا
-لا.
-ليش!
-عاجبني أخطط وحدي
-شبيچ ويايَّ؟
-سلامتك
تأفأف بصوت مسموع و بقى ساكت شو گعد هذا؟ لعد منو يكملي باقي الشغل و لو أموت ما اگله سوي هيچ هسه يگول انتِ طلبتي مني، رحت للكارتون الثاني هم أجه ورايَّ لزم سحبه مِن أيدي و أشرلي وين أحطه أشرتله على المكان، حطاه و وگف متخوصر يباوعلي بطرف عينه.
-ريسان: تأخر الوقت ب12: 00 هسه كملي الشغل باجر
-زُها: تگدر تروح
-ما گتلچ أريد أروح
-تمام بيب.
گوا ضامة الضحكة شيسد حلگي و ما إضحك ياربي لا تخليني أتفشل گدامه و تطير هيبة الزعل، للوحدة وقفلت مِن التعب و النعاس طلعت مِن المطبخ عبالي راح بَس شو هذا نايم على القنفة و أيديه على بطنه، عباله عود شنو أخلّي ينام عندي؟ لااا والف لااا
وگفت گدامه دغيته بكتفه بسرعة فز لأن ببساطة نومة خفيف الباب لو طخيته يگعد، بقى يباوعلي بعيون منعسة
-ريسان: ها زُها
-زُها: گوم روح البيتك هسه شروق بالها يمك.
-أممم ليش هذا مو بيتي
-لا بيتي
-هيچ صارت يعني
-أيي يلا ريسان روح أريد أنام تعبانة
ضحك ما مصدگ عباله دا أشاقة وياه.
-صدگ تحچين زُها؟
-أي والله
نهض مِن مكانه و أستعطافي بدأ يتلاعب بَس لزگته خزرة لصمته لصم تعبير مجازي ، وگف سحب السترة مالته لبسها و وجهه صار مايگصه السيف، شمرت نفسي بمكانه نايمة و المكان دافي يخليك بسهولة تغفى.
-ريسان: أجيبلج غطى!
-زُها: بكيفك.
هز براسه وراح للغرفة جابلي غطى ورجع غطاني بي، الأستمتاااااااع الله لا يحرمني منه، رفع الغطى خنگني بي بخفة مبتسم.
-ريسان: عود زعلانة هيَّ
-زُها: سد الباب وراك
بعدت أيده و أستداريت منطيته ظهري.
-ماتنامين بغرفتج
-مابيَّ حيل أروح للغرفة
-تمام رايح
-الله وياك بيب.
أختفى صوته و سمعت صوت سدت الباب، نهضت مِن مكاني قفلته و رجعت نمت بمكانه حضنت المخدة الگلبي أشم ب بقايا عطره، غمضت عيوني نعسانة و تعبانة بسرعة غفيت بدون أي تفكير بهالليلة.
و مرت اليومين ما حاسة بيهن بسبب شغلي التجهيز حفلة براء و اني أخطط الكلشي وحدي و أجت مينا ويايَّ، ريسان بعد ما وصلي للبيت بَس خابر مرة أذا محتاجة شيء أو لا و گتله ما محتاجة شيء، و أجه يوم الخطبة و إيدي على گلبي لا أمي تعرف أو تحس بشيء وتخرب فرحة البنيه.
عزمت سيلين و سمارا هم و مينا و أمها، تبارك و البنات الباقيات و شروق و اني، بينما الشباب ريسان و جَوهر و حجي حسن و شاهر و ماهر و شروق و هيچ احنا عائلتها الليَّ كنا مِن طرفها و مستقبلين مصطفى و أهله
جهزت نفسي و كلشي رتبته مثل ما تحب براء، إجو الشباب كلهم كاشخين مثل العادة و البنات ما يقلون عنهم، براء جوا بغرفتي و مينا وياها، النص ساعة أجوا أهل الولد رحبنا بيهم و الحمدلله صالة بيتي چبيرة و كفت.
رتبت التوزيعات على جهة و الحلويات الليَّ جهزناها اني ومينا و شروق و كلشي حسب الأصول، و المشروبات العصائر على جهة، رحت أشوف براء اذا كملت إو بعدها دخللت بسرعة و سيلين ويايَّ.
-زُها: ها بنات شصار وياااكم
-مينا: خااااااااب هاي بنت خالج شلعته الگلبي
-شبيها!
-ماتقبل تخليني أحطلها مكياج براحتي
-براء: كافي كافي ما أريد الحفلة مختلطة مو وحدنا.
أشرت المينا تتركها على راحتها لأن هيَّ ما تحب هالأمور، وگفت گدامنا مثل الأميرة، لابسة فستان عقد طويل منسدل مِن أكتافها بنعومة الى أقدامها، و حجابها مزينها إكثر و زايد جمالها ما ناقصها، أظافرها طبيعية ما قبلت تصبغهن مُجرد رتبناهن الها، و أكسسوارات ويَّ الفستان ناعمة
طلعناها اني و البنات و جابوا أهل مصطفى شيخ وياهم.
گعدناها بالمكان الراح يعقدون بي، غطيناها بالوشاح الأبيض و سوينا باقي عادات الخطوبة، و أم مصطفى و أخواته أثنين ويانا و أخو وزوجته، و كلنا شهدنا حفل هذا العقد الليَّ مِن بساطته وهدوئه و جماله يفوز بإكثر عقد أحضره بحياتي، بدأ الشيخ يعقد الهم، ساد الهدوء المكان و بَس صوته الواضح للمسمع.
بِسْمِ اللهِ الرَّحْمنِ الرَّحِيم، اللَّهُمَّ صَلِّ عَلَى مُحَمَّدٍ وَآلِ مُحَمَّد.
الحمدُ للهِ الذي شرّف هذا المقام بذكره وأباح النكاح حصنًا للعفاف وحرّم ما سواه صيانةً للنفوس وجعل الزواج عهدًا موثوقًا وسكينةً تمتد بين قلبين
وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجًا لِتَسْكُنُوا إِلَيْهَا، وَجَعَلَ بَيْنَكُم مَّوَدَّةً وَرَحْمَةً.
و هنا بدأ يعقد بالعقد الشرعي بين الطرفين و يسأل بالاسئلة الشرعية و مقدار المهر مِن غايب وحاضر والمتفق عليه، حتى وصل لأخذ الموافقة مِن ألسنتهم، أخذ موافقة القبول على العقد مِن براء و مصطفى بدون أي ضغط، أنعقد العقد بسلام وشهدت عليه القلوب قبل الألسنة و أنختم كلام الشيخ.
-الشيخ: تم العقد على بركة الله ورسوله و أهل بيته و اسأل الله أن يجعل أيامكما طمأنينة و حياتكم في حفظ الرحمن.
تعالت الهلاهل مِن قبل أم مصطفى و شروق، و أحنا البنات واگفات متسطرات كلنا مبتسمين بسعادة و أبن جَوهر أبوه حاطه بحضنه ويوزع أبتسامات، الكل بدأ يتبارك للعرسان، وگفت على جهة أباوعلهم ما أعرف شكو دمعت و اني أشوفها و أخيرًا الحياة نصفتها بعد تعب سنوات وظلم و حرمان، لبسوا بعض الحلقات وهم بقمة سعادتهم و أيديهم ترتعش مِن التوتر ما مصدگين صاروا البعض.
لزم أيديها مصطفى مبتسم بكل سعادة و كأنما شالوا سعادة الدنيا كلها وحطوها بأيده، ضحكت بنص دموعي مِن شفت ريسان وگف قريب منهم وضربة على أيده مبتسم.
-ريسان: لا تاخذ راحتك زايد ترا أخوها واگف
حضنها مصطفى بنص حضن مبتسم و هيَّ حتارت وين تغطي وجهه مِن الخجل لأن الولد واگفين كلهم.
-مصطفى: سنة و شهرين اني أقنع بيها مابقت طريقة ما أجيتها بي يلا بالأخير رحمت بحال گلبي
-مُيارك الكم.
تبارك الهم ريسان و والولد هم وگفوا يتباركون الهم بدون ما يصافحون براء لأن يعرفون طبيعتها، تمنيت لُبيد يكون موجود بَس گال وجودي ما راح يكون مرغوب بي و يمكن چان يقصد جَوهر، رجعت الها حاضنتهاا أبوس بيها و إحضن بيهاا أستنشق بعطرها الليَّّ مثل المسك بكل قوتي.
-زُها: يارب حياة سعيدة و ماتشوفين بحياتج غير السعادة.
كلنا أرتفعت أنظارنا على صوت المولود الليَّ چان مِن أختيار سيلين و صدى الصوت بكل أجزاء البيت معلن الفرحة و كلمات النشيد چانت حماسية بحيث كلنا مبتسمين بسعادة
و أم مصطفى علگت الدنيا علگ بالهلاهل و منا المولد، خربت ضحك على سمارا گوا لازمينها تريد ترگص و جَوهر يخزر بيهاا و هيَّ تصفگ تضحك وتريد تهز وسيلين تگرص بيها تريدها تستقر
-سمارا: شبيك!
-سيلين: سمارا شبيچ أثگلي من
-خلوني ارقص شبيكم غير عرس ولا.
-زُها: سمارا ذوله مو مثل جوج أستري علينا لا تفضحينا
-تمام هبيبي تدلل انتَ
بقينا گاعدين كلنا فرحانين و قدمنا الضيافة و التوزيعات و شروق تفتر ورانا كلنا شغلتنا ماكو وحدة تگعد ممنوع الى أن خلصت أنشودة المولولد و أهل خطيب براء أترخصوا بعد ما قدموا الهداية الخاصة ب براء وودعونا، چانوا أهله قمة الرقي و التواضع.
رجعنا الداخل البيت بعد ما وصلناهم للباب و رجعنا للداخل البنات گاعدات يم براء الليَّ الابتسامة ما ضاعت مِن ملامحها، دخلت للمطبخ أخذ حلويات زيادة للبنات حطيتهن بصحن.
و طلعت مبتسمة ألهم و اني دا أخطي بخطواتي متوجهه المكان براء الگاعدة بي، دگ الجرس مال الباب، أشرلي ريسان هوَ يروح، حطيت الليَّ بإيدي على الطاولة و تقدمت بخطوات وراه أشوف منو هذا الليَّ جاي هسه! بَس الليَّ صار هنا نشلت ملامح ريسان و أنشلت رجليَّ وياهن و اني دا أشوف الأشخاص الليَّ دخلوا علينا و بهذا اليوم تحديدًا، وگع صحن منكسر ورايَّ أستداريت بسرعة شفتها مينا فاتحة عيونها بصدمة وهيَّ تشاهد الواگفين و الطامة الكبرى هيَّ الشخص الثاني الليَّ دخل وصدمتي بدخوله النص بيتي!..