رواية عروس الهور الجزء الأول للكاتبة هيلانا الفصل الحادي والأربعون
گمت قفلت الشبابيك وباب المطبخ ورجعت على باب الرئيسي هم تاگدت منه مقفول
اليوم الجوء بارد ويمطر والشارع فارغ
صعدت فوك مريت على عمة نايمة
رجعت على أجوانا ومصطفى نايمين بنفس
الغرفة وشجن هم نايمة وحدهة بغرفتها
بعدني أفتر فوك والباب أندك وگفت بمكاني باوعت جوة منو جاينة بهل وقت
أحنا حتى أقارب ماعدنة هنا هو بس صديق على ومن يريد يجي لو يجي بنهار لو ينطي خبر قبل لا يجي
صار ست أشهر هو هيج نمطة
أحس كلبي رجف خفت.
نزلت جوة مشيت للمطبخ طلعت سجينة
ومشيت للباب أكو شباك بصف الباب صاير
وخرت البردة شوية دا أباوع ما شفت أحد
الشارع فارغ ومن جهه الباب مگدريت أشوف
أتاكدت من الباب مقفول وسحبت ميز الاحذية خليتة ورة الباب وحجيت بصوت عالي شوي
: -م. منوو
رد عليه وصوتة مالوفة بس ناصي شوي كال
: -أنة
: -العفوو منو أنتِ؟
: -يول أنة على أفتحي
صفنت أستوعب معقولة على ماعرف شجنت أفكر
بس خايفة من تعيش بغربة وحدك.
بدون رجال وبدولة ما تعرفها لازم
تكون حذر قدر الأمكان
الباب بي سلسلة يعني حتى من تفتح القغل
ينفتح على النص عود من تتاكد منو الطارق
تفتحة بعد، فاني فتحتة ومديت راسي
أباوع شفتة گدامي لابس قمصلة جلد سودة
ومنگع ماي وشعرة مبللة وجهه متغير
ومبتسم الضحگة شگت حلكي
من الفرحة گمت ماعرف أشلون أفتح الباب
اريد أحط يا مفتاح يفتح القغل ماكوو
اخر شي فتحتة وحضنتة
: -ياااالله عليييي أجيييت
: -جااااا أشلون ما أجي.
دخلنا جوة وأني كل شوي أحضنه وصوت ضحگتي
يدلي التايه بس جنت طايرة من الفرحة بي
صعدنة للغرفة وهو نزع القمصلة
وأني واگفة ينزع بملاسة وأخذهن منه
: -راح أغلسهن وأنشفهن
: -عوفيهن مو هسه. سويلي عشة ما ماكل شي
: -من عيوني تتدلل ابو مصطفى
نزلت خليتهن جوة وسويتلة عشة وهيج الفرحة
ما أطيهة للاحد
صعدت بيدي العشة لگيتة يخابر معرف منو بس كالة: - هاا اي اي ان شاءلله هذا الاسبوع الله كريم وقفل الخط.
ماسألتة حطيتلة العشة وهو كعد أكبالي ياكل وأني
مبتسمة كال
: -شلونكم أمي البنات صوفي زلمتي أشلونة
تنهدت: -زينين كلنا بس قلقنة عليك كلبي جان عندك خفت صار عليك شي والله
: -لا يول ماكو شي بس مالگيت فرصة أفلت بيه
: -يعني ماكدرت تتطلع ورانة
: -من سفرتكم صارت ندسة على ربعي عصام وعزيز
وهشام أنحال على تحقيق عليهم ندسة قوية علسوهم
فكيت حلگي بصدمة: -ياااا خطية وتالي شصار بيهم
: -فصلوووه عصام نهائي.
: -ياااااا شلون صار هيج؟ مااايستاهل خطية
: -اي والله هتلية حاگوهة عليهم وبعد ما عفتهم كلت أشوف شني تاليها خوما أعوف أربيعتي
: -وشصار بعدين
: -هو بعد التحقيق طگوا بالدهن وأنفصل وهشام أنسجن شهرين ونزلوا رتبة
: -ااوف ضوجتني عليهم والله. زين على منو الة أيدة تتوقع
: -من فوك الأوامر
: -شلون يعني من فوك.
: -يعني ماكو شي اسمه فصل وتحقيق هيج بدون سابق أنذار إلا إذا جانت أوامر أمنية عليا أو حالات استثنائية خاصة وهي نادرة جدًا وغالبًا تكون لأسباب سياسية أو أمنية حساسة والجماعة ايدهم طويلة الظاهر
جان يحجيلي وأني صفنت عليه جنت ملهوفة الة الحمدلله التم شملنة ورجعنة سوة
گمت لميت الصينية وهو دخل يغسل رجعت شفتة فاتح الشباك ويدخن التفتلي وابتسم من شافني دخلت فتحلي أدي حضنته جان ضامني لصدرة بلهفة.
باسني حيل بخدي وشفايفي وشعري جان ملهوف ومشتاك أكثر مني وأني أضحك وكل شوي
أگرصة من جتفة أتاكد جاي أمسلت وأحلم
اخر شي زمخ بيه: -كااافي يووول لا اگضج وأعلمج على التگرص
: -علمني موافقة
: -أويلي هو هيج الفراك يخليج أدبسززز
طگيته ضحكة ورجع حضني وأنوب دخلنا نمنة وفتحلي أيدة نمت بحضنه
جانت احلى نومة اول مره انام بدون قلق خوف
ولاتفكير من ست أشهر ما حسيت
بهل راحة كلش فرحانة
ثاني يوم الصبح جان بعدة محد كاعد.
واليوم عطلة أدري ما راح يگعدن البنات
جنة بس أحنا بالمطبخ أني أسوي ريوك وهو يفتر وراي وكل شوي يگرصني من خصري
كتلة بملل: -علي
: -روحة لعلي
ضحكت بتساع: -ذكرتني بيام قبل من دكلي روحة
أبتسم شوية. رجعت عبست بوجهه
: -ما مليت تتحرش من الصبح ترة خاصرتي نمردت شبيك
: -مشتاگلچ ام أبني
: -ههههههه أبنك مووو؟
: -جااا أشلون
: -أبنك فوك نايم روح شوفة
: -زلمتي شفتة الصبح.
ضحكت حيل وخليت الاكل على ميز وهو جاب الجاي: -بعدة طفل وأنت مستلمة زلمتي وزلمتي من دكول هيج أحسه مشورب
: - جااا هي الزلم موش بشوارب يبوي بفعالها
: -اوووي حبيبي صدك والله وجهالك زلم خشنه
: -يبااا كولي زلمك شني جهالك ولدي خشنين عليه
: -طبعاً غير أبوهم يلااا ناقصنه بنية اريدها تشبهني
بس على سوالفك هاي هم تتطلع زلمة مثلكم
: -لا تشبهچ اريدها
صفنت بوجهه وكتلة: -أحبك أني علي.
تقرب ولف ادي على وسطي همس وعيونة بعيوني
: -أتمنى أخليج بكلبي وأقفل عليج جنت أهم بيج كلها بصفحة و أنتِ بصفحة يول چافتة چفت على كلبي
: -ااااوي أموت عليك بس أستحي
: -وداعت أمي أنتِ بجهه والمستحة بجهه صايرة مستهترة
: -ترة مو هواي شوية
: -هسه جم يوم أضبطلچ الاعدادت ونرجعچ كتكوتة
: -ايب بلااا أشلون
: -أشوفچ
هزيت راسي مبتسمة وهو تقرب بأسني بادلتة
وأني طايرة بس ما مرت ثواني وعمة.
كبست علينا بالمطبخ من الصدمة عفتهم وطفرت للغرفة وبقى بس هو وي أمة
وهي هم ما ركزت هواي جانت
مكيفة بي ومتفاجئة گضتها بجي
أخذتلي شوي عزلت غرفتي ورتبت نفسي
ونزلت فتتت للمطبخ رفع راسة شافني
ابتسم شوية ونصة يصب جاي بالاستكان
لعمة
گمت أجيت كعدت بصفهم نتريك وأني ابد ما شلت راسي بس هي تسأل بي
كملت ريوك وگمت وحسيت راسي فتل
وعيوني غوشن لزمت الميز
ردت الزم نفسي بس وگعت من طولي
جنت مفتحة عيوني بس مغوشات.
عيوني على على شالني بحضنه وخلاني
علي قنفة وخالة يمي تذب ماي على وجهي
لزمني من أيدي ركزت أباوع بي
عيوني غوشن گمت ما أشوفة
عمة واگفة وهو كعد بصفي على الطرف
ايدة فوك مسند الكرويتة وثانية يتلمس بوجهي
ويحجي وياي: -شبيج شمس شتهيسين
: -ماعرف دخت راسي أحس ما أشوف غوشن أعيوني
عمة كالت: -خاف ضغطج هابط
علي: -ما أتوقع خاف عدج فقر دم وجهج أصفر
ردتت عليه عمة وهي ماشية بتجاه المطبخ.
: -راح أجيبلج لبن وخليلج ملح عليه متاكدة ضغطج
هي مشت وعلى مد أيدة جوة التشيرت حسيت بحرورتة أيدة
وفزيت فاتحه عيوني ضربتة وخر
أيدة يضحك كال
: -خاف حامل
باوعتلة بنص عين: -ترة ما صارلك البارحه أجيت
غمزلي وكمل بخبث: -حقج أنة مقصر وياج شرايج نگوم للغرفة نسوي أخو لمطصفى
: -هسه مصطفى عاتب عليك كايل سويلي أخو
: -جااا الا يكول يابة اريد أگثر زلمي.
جان مخلي ايدة على بطني بس شنو فوك التشيرت ومدنك عليه يسولف وياي همست بضحكة
: -ابو مصطفى خو ماعدك مشروع عرگات هنا وتريد تهد بيهم
: -لا يبااا اريدهم سند الج
: -ما اريد سندك غيرك أني
: -وأنة دوم يمچ
: -دير بالك تعوفني
: -أكو واحد يعوف روحة
: -هو بكل الاحوال متگدر تعوفني بعد أنت شايب منو تاخذك أني زين وراضية بيك
: -رحمة والديچ مطري شيباتي بيج
: -شنسوي النة بيها يم الله حسنة
ضحك بصوت عالي حطيت ايدي على حلگة.
: - يمعود عمة بالمطبخ
: -جااا گومي للغرفة نكثر النسل
: -دايخة أني شتكثر أوگع
: -اييي دوخي بحضني
: -درووح
گام بضحكة وعمة جابت كلاص لبن وراها
مر يومين وجانن من أحلى الايام بوجود علي
شگد ارتاحيت من أجة جنت أحس بالمسوؤلية
والمسؤلية جدا متعبة وبالليل أبقى اخر وحدة
الا انام وأتاكد كلشي مقفول
والبنات ومصطفى وعمة كلهم
عليه ولازم اهتم وأحتار بيهم
فد شي متعب ومحد راح يحس بيهة الا يجربها.
كل هذا ونجي نگول هو رجال شنو فايدتة وشمسوي
هو أني بوجود ابو مصطفى احس نفسي أميرة
اكعد بالمطبخ أسوي الاكلات للي أحبها
أتمكيج البس أطلع أتونس ما أفكر لا بلي
راح ولا بلي أجة هو موجود هاهيه ينحل كلشي.
: -شجن
طلعت أتمشى بالشارع وحدي وأبتسم
أفكر بعصام شوكت يجي
علي أجة وهو بعدة اريد أسال على عنه بس مستحية يجوز أخلي شمس تسألة الي
: -شلونة الصاك
وگفت متجمدة الصوت وراي أنداريت ملتفتة شفتة وأگف وأيدة بجيبة
أنوب لابس جاكيت جوزي وهو أشگر طالع يموت
من الفرحة رحتلة ركض
حضني وأني أضحك
: -عاااااا عصام هسه جنت أفكر بيك
رد بلهفة وشوگ: - أنة من أشوفچ كلبي يرگص بين أضلوعي خاب فدوة رحتلچ.
أخذني من أيدي كعدنة على جهه شوي هو متغير
وگضاهة يتغزل بيه غيرت الموضوع وسالتة
: -شوكت أجيت
: -وي علاوي السبت
: -ياااااخبيث صارلك يومين وهسه الا أجيتني
: -بعد روحي لا تعنفصين أسمعيني بالاول
هزيت راسي عود أحجي. كال
: -أجرت شقة هنا وجبت الحجي والحجية حتى أخطبج أسويلج عرس هنا وبعدين نرجع للعراق وهناك هم أسويلج أحلى عرس
ضحكت بفرحة: -شنووو هاااي مخطط كلشي وأني ماادري.
: -جااا شسوي بالعباس شاك مسويتلي سحر دايخ بيچ وبس أريد أخذج وأحطج بيتي
حجيت مستمعة: -لا والله أصلا أني وين أعرف بسحر
كرص خشمي الصاير أحمر من البرد مبتسم
: -بعرضي أحبچ أدري بيچ شني أحب هدوئج نزاگتچ ربي يخليني أفرحج وأسعدج وماخلي الهوة يمر عليج
: -ماكو شي يمر عليه بوجودك
التفتلي التقت عيوني بعيونة همس بهدوء
: -گوليها
خجلت ودنكت راسي أفرك بدية مد أيدة رفع راسي
: -گوليها يااعيني شو سمعيني صوتج
: -أنتِ بالاول.
: -خاب خالو من يوم من شفتج وأنة أگلج أحبج لا تصيرين ثولة يبعد روحي
: -اهوو دكول بالاول وعود أني اكلك
: -بالقران أحبج
ضحكت وهزيت راسي: -وأني هم
: -شنو أنتِ
: -هم مثلك
: -شنو مثلي
: -شبيك عصام
: -أحجي
: -أحبك
رد بمراوغة ولهفة يحجي بستعجال
: -أعرف ولد هنا يعقد ما تخليني أعقد عليج وأنروح للبيتنا
: -يااا مگطوعة من شجرة شنو سويلي عرس وتعال اخطبني وبعدين عود سهله واحتمال ولي أمري نسيبي ما يوافق.
هز أيدة ما راضي: -حتى أحط جيلة براسة شني ما يوافق بلكي صدك وعلى نتخارب
: -هههههه شبيك اعصابك
گام يضحك من مكانة وأني رفعت عيوني أباوعلة
غمزلي وحجة: -ما أريد أتهور تعاي أوصلج
وصلني ومشة فتت للبيت أضحك وشمس لاگتني أدردم متعاركة هي وعمتها شافتني حجت بشك
: -خير عيني الضحكة طابة قبلج
: -اي مو شنو الاجواء برة حلو تونست وضحكت
: -بس هيج
: -اي طبعا لعد شگو
: -ممم لعد الله يديم هاالاجواء.
مشيت بتجاه الدرج شاردة من عيونها اريد أصعد صاحت وراي: -حضري نفسج راح يجون خطابة عليج ليلة
حجيت بغباء: -ايييي تمام رايحة
: -شو ما سألتيني منو جاي
: -هااا نسيت اي صددك منو جاي
: -جاي حبيبج عيني وبعد لتجذبين ترا اعرفج
ضحكت وصعدت وهي هزت ايدهة بضحكة
جنت طايرة من الفرحة
وكعدت ادور بملابسي على فستان مرتب البسة وطشرت الغرفة كله
گعدت وسط الغرفة بعد هوسه عارمة هدومي مطشّرة بكل مكان
أدور على فستان يشبه فرحتي اليوم.
فستان يعكس ضحكتي اللي ما فارگت وجهي من شفته لحد هسه
معقولة الحب هيج يفرفش الواحد ويخلي يضحك للهواء يعني هسه بس هيج وطايرة
اذا أزوجنا وعشنه سوا أشلون يمكن
كل شوي أشوفة وأطكة هلهولة
چنت دا أحچي ويا المراية وأضحك
خليت الفستان على صدري وأتخيل شكلي
من يشوفني
فجأة سمعت طگة الباب الخفيفة وبدون ما أنتبه انفتح الباب شوي ودخلت أجوانا
جانت لابسة بيجامة فاتحة ويه شعرها المربوط ونظرتها مو طبيعية ومو مريحة أبد.
كالت وهي تمشي بخطوات هادية
: -شنو هالهدوم الطايحة سمعت بالخطبة و گلت خلي أجي أساعدچ
ابتسمت بخجل ورحت ألمّ هدومي بسرعه
: -ههههه ماعرفت شلبس گلبت الدنيا
رفعت أجوانا فستان كحلي من بين الهووسه وضغطت حواجبهه بنص جبهة شمرته على السرير وسألت
: - عصام مو؟
: -ايي هو
: -أشوفج فرحانة
أستغربت النبرة مالتها كلت بستفهام: -ليش ما أفرح ما فهمت عليج
: -لا يعني أقصد فرحانة مثل للي تعرفي مو خطبة مفاجئة.
هزيت راسي ودنكت الم بملابسي ما رديت
مدت إيدها ترتب هدومي بس حركتها سريعة متوترة تحاول تبين طبيعيه بس عيونها تحچي قبل حچيهه
خوش حظچ حلو والله عصام خوش ولد ومرتب وأهله طيبين خوش قسمة
: -الحمدلله إن شاء الله خير
سكتت ثواني وبعدها كعدت عالسرير وحطت رجل ع رجل وحجت
: -حلوة حظوظ اكو بشر يتعب وميحصل واكو على الحاضر يجيي
انچمدت هاي شبيها شلون تحچي هيج
شنو قصدهة حجيت ببتسامة
: - ماكو شي اسمه حظ كلشي قسمه ونصيب.
: -أكيد أكيد
خلت وطلعت من الغرفة أستغربت من تصرفها
كلش غريبة هالبنية والله
گمت رحت للغرفة شمس أختارتلي فستان وسوتلي مكياج خفيف حلو وسولفت الها عن أجوانا
تنهدت وكالت: -معجبة بعصام
فكيت حلگي مصدومة: -صدك تحجين
: -اي والله
: -من شوكت
: -من زمان هي كالتلي من عشت يمهم أني بوقتها ما جنت أعرف أنتِ بعلاقة وي عصام وهسه تباوعلي وأدير وجهه ماعرف يمكن حسبالها جنت أعرف وضامه عليها
: -احس ضجت عليها.
: -لتضوجين أفرحي وعيشي السعادة بكل تفاصليها هواي تعذبنا من حقنه نفرح وهي طفلة بعد العمر گدامها تلگة بعد أحسن من عصام وتزوج قابل شگو هاي مشاعر مراهقة بعدهة
: -والله مادري
: -بعدين عصام ما يحبها قابل تجبرة هو الحب ما يجي كوة هو يحبج
هزيت راسي وهي كملت مكياجي وعلى راح جاب حلويات وعصاير وخالة ام على هي وصوفي
زينوو البيت صار يجننن والاجواء جانت
حلوة مثلجة والثلج مغطي الشوارع
بس أني وعصام خطبتنة بالثلج.
خوش ذگرى هههههه
بهل أثناء أجوا عصام وأهله وأني من دخلت
بقيت بالغرفة لحد ما خالة صاحت عليه
وأجت شمس نزلتني وياها جنت خجلانة ومستحية كلش سلمت عليهم وكعدت بصف أختي
صايرة بسدهة متحاشية نظرات عصام الجرئية
الي. خجلني گدامهم
حجوا شوية وعلى خطية جان فعلا أخو وأب إلى ما حسيت أني يتيمة او محتاجة أحد
رغم عصام صديقة بس والله جان حاد وياهم
وخلة شروط تعجيزية
وعصام كل شوي وكالة: -علگيفك يمعود أنة أصويحبك.
وهو يضحك ويزيد عليه نهب الرجال
بالمختصر
بس طبعاً حبيبي جان موافق هو وأهله
ما عدا أمة حسيتها جاية گوة وما راضية
حتى السلام جان من ورة خشمها
وما حجت وياي أبد طول الگعدة تحجي وي اجوانا وخالة وتحمد هواي بجوانا هي تعرفهم الظاهر
وكل شوي دكلها: -فدوة رحت لهجهامة يخالة صايرة
مرة ولج اخر مره شفتج طفلة
ردت عليها بضحكة: -فدوة لكلبج خالة عيونج الحلوات ذني.
هواي وحدة تلبخ بثانية صراحة أني مو نحسة بس ضجت ولا عبرتني خليت وصعدت فوك
غسلت وجهي ضايجة ونزعت الفستان
لحد ما مشوا أجت شمس
حجيت بقهر: -شفتي امة ولا عبرتني ولا جنه تشوفني عود هااي أول مره تشوفني گضتها وي اجوانا ولا عبالك أني جنتها
حجت بعدم أهتمام وهي تشيل فستاني المشمور بالگاع: -ختولي طز بيها
: -ضجت كلش منها شمس احسها جاية كوة خاف ما تريدني
: -هو يريدج أمة مو ذات أهمية.
: -بس شلون نعيش هيج خاف تسويلنا مشاكل
: -ما تسوي ولا تخافين تحبج بعدهة ما تعرفج هسه
: -واذا بقت هيج مبوزة عليه
: -خاب اكثر من ام على جانت تموت مني بس بالاول والاخير نجبرت ترضى بالواقع شتسوي أنت المهم عصام يحبچ البقية مو مهمين بس انت صيري وكحة لا تزعلين وتتحسسين فعلي مود الطز وهاهيه
ابتسمت على كلامها وهزيت راسي
: -مااااشي متفقين
حضنتني وضحكتنة مالية الغرفة
وراها بدينة نحضر لسوالف الخطبة الرسمية.
وبنفس هذا الاسبوع كثرت طلعات اجوانا
بحجة رايحة عندي درس للغة وغيرة
بعد أسبوع
جان مصادف الخميس بالليل
ماعرف منو خابر على بس على صوتة العصبي
طلعت خالة نزلت جوة تحجي ويا وهو متعصب ميريد على عمة يحجي على تليفون ويسب
ويغلط على عصام
نقبض كلبي من عصبيتة وكلامة جنت واگفة
فوك أباوع واجوانا بصفي
قفل الخط وشمر المبايل على الطاولة الخشبية
بالصالة بحيث المبايل نفتح نصين
وخالة وشمس يحجن ويا يردن يفهمن شكوو
هو نار صاير.
كالتلة خالة بقلق: -شكووو ولك يمة اااحجي
مسح على شوربة ونفخ بضوجة
: -عصام الكواد بطل من الخطبة
: -يااااا شمالة ولك
: -شمدريني يگلي ما أريدها أكلة شكوو أحجي
يكول ما اريدهااا كوة هي شني ابن الطرگة لعب هي شننهيي تييهه بالقران الا اترس حلگة نعل
أنصدمت صدمة عمري أدية گامت ترجف لفيت أعيوني على أجوانا جانت مصدومة هم ومخلية أيدهة على حلگها
رجعت بسرعة للغرفة ممصدكة أحوس وأهز براسي
لا لا أكيد اكو غلط او سوء فهم.
أريد أخابرة اييي لازم أحجي ويااا
أنتظرت لحد ما شمس صعدت قبل لا تحجي
حجيت برتباك: -أنطيني جهازج اريد أخابرة
: -شكوو شجن
: -شمس مو وگتج سمعتكم شجنتوا تحجون
: -لحظه شجن أصبري على راح يروح يشوفة ونعرف شكوو
: -ااااطيييني مبايلج ااااريد أخابرررة
: -ماااعندي رقمة الجديد بس القديم من جنة بالعراق هسه مبدلة هنا
: -روحي جيبي من مبايل رجلج
بعد ما شافتني معصبة أستسلمت و راحت جابت الرقم وأجت سجلتة بمبايل شمس وادية ترجف.
وهي يمي تعض على شفتها بقهر وتباوعلي
مقهورة عليه دكيت مرة مرتين بثالثة رد
كتلة بسرعة وصوتي يرجف
: -هلووو عصام أني شجن
رد عليه برود: -شتردين شجن
بلعت ريكي وكلبي رجف: -س. معت يعني صدك للي كلتة لعلي
: -اي صدك
: -عصام شتحجي شكو هاا كلي
سكت ثواني أنوب كال بملل
: -ما أريدج بابة هي كوة شني ماعدج گرامة
همست بدموع متفاجى: - ع. عصام.
رد متعصب: -شبيج شتردين عصام وعصام كتلچ مااريدج وماعدي حجي بعد العندي حجيتي لعلي شلون لزگة
كلامة مثل سم صدمني صدمة بموت أهلي ما نصدمت هيج قفلت الخط وادية ترجف
رجلية بادن وگعت وشمس ركضتلي
لزمتني واخذت المبايل من ايدي
حجيت بصوت يرجف: -ميريدني كاال ما اريدج عصام ميريدني شمس أول مره يحجي وياي هيج بجفاء جان قاسي حيل.
سگتت متعرف شتسوي وأني نهديت أگطع بشعري بقهر وأنحب: -مييرررردني يكلي مااااريدج ياالله ليش هيج شسويتلة شلون هيج كالي
حجت محروك كلبها: -خلي يولي هو ونعال هسه شلونة عاد عصام
أنجنيت والله شما أحجي صعب أوصف حالة الصدمة المريت بيها بين يوم وليلة
ما صار كم يوم جان ميت علية وكاتل نفسه
كتل وهسه يكلي ما أريدج
شمس: -كلشي قسمه ونصيب لا تبجين.
شجن: -اني احبه حتى لو دكولين بدون گرامة بس والله أني أحبه ويا نسيت كل مصايبي كلت هو العوض رب العالمين عوضني بي تالي تالي هيح يطلع
شمس: -أهدي نشوف شكو وبعدين نتفاهم تمام يروحي
أنتظرنة على لحد ما أجة وللاسف كال نفس
الكلام وجان ضايج كلش ومصدوم
من تصرف عصام وأنوب شمس طلعت قهرهة بعلي وتعاركت ويااا وهو خطية شعلي
عفتهم يتعاركون بالصالة وسجنت نفسي بغرفتي مرت أيام لا ليلي ولا نهاري نهار.
بس أبجي وأكول ليش شنو السبب لو كايلي بيج شي لو حاطلي عذر قبل لا يكسرني هالكسرة.
: -شمس
المشكلة هو مو بس كسر كلب شجن لا وراها بشهر جنه حايرين بمعاملة على مال لجوء ولم الشمل
وهو عليه تهمة وهنا كلش يددققون فنرفض
الطلب وخايفين يترحل من كندا
وفوگها سالفة عصام وشجن ماكو شهر وأجتنة أم عصام تخطب أجوانا لعصام تفاجت شبسرعة
ام على هم أستغربت بس اجوانا جانت مكيفة
وفرحانة وكاعدة بصف المراة
عفتهم يسولفن ورحت أسوي جاي صراحة ما كاتلني
الجاي بس ردت أخليهن وحدهن.
حتى يحجن لان گدامي ما راح يحجن أكيد
خليت الجاي على الطباخ ورجعت وگفت يم الدرج
قريب للجهه الصالة أستمتع الهن
جانت ام عصام كل شوي تلتفت على اجوانا
: -اللهم صلي على محمد وآل محمد أني من الاول جنت رايدتج والحمدلله عصام عرف غلطة وصححة
ردت عليها ام على بلوم: -مايصير هالحجي خية زين اذا عدكم نية تاخذون أجوانا ليش خطبتوا اخت شمس خطية البنية مكسور خاطرها.
هي كالت بتقززز: -يااا وداعتج ام على هي شامرة نفسها على أبني و أنتِ متوقعه أني أخلي عصام رتبة ومعروف أبنة واحنا ناس النا سمعتنا ناخذ هاي خريجة السجون غير شعر راسي وگف من كالي اريد أخطبها والله بالاول عبالي بنية بت عائلة بس من دريت بيها شني سحبت أيدي منها وهمزين ابني سمع كلامي وصحة على نفسه قبل لا يتورط بيها
ام علي: -ما يصير هذا الحچي خيّة عيب وترى أخوها احتمال ما يقبل لا تتأمّلين عليّ يقبل.
صراحة أني ما تحمّلت، أخذت الجاي وفُتّت عليهن
توهه مدّت إيدها تاخذ الجاي
وصبّيته فوگها، فزّت من مكانها بعصبيّة
: -ششسشبيچ ما تتشوفين
: -لا أشوف بس دا أحسّسچ شوي بحرورة النار
هاي أضعف منها راح تلاگيها بجهنم من تطعنين بشرف بنية يتيمة وأبنچ محد ميت عليه هو جان ساحل نفسه على شجن وأصلاً ما تشرّفينه لا إنتِ ولا أبنچ وإن شاء الله حوبت شجن ما تتعداكم يااا رب.
عفتهم وصعدت أشوف أختي
الحقيرة عينك عينك تتطعن بيها.
علي أساس همّة شرفهم يتناگط
صعدت وأني مترردة أشلون أصارح
شجن بلي راح يصير
شگد صعبة من يجيك الخذلأن من شخص جنت تميزة وتستثني عن الكل هنا ما راح تفقد الثقة بس بي لا راح تفقدها بكل الناس
راح تعيش فراغ وما راح تسمح للاحد
يقترب منك بعد
راح تتبلد مشاعرك وتموت على بطئي
وهذا الكاعد يصير وي أختي بالضبط
ماادري شسويلها وأني أشوفها تذبل كدامي. باوعتلها جانت كاعدة يم الشباك وراگية راسها عليه.
عيونها مدمعة ولامة نفسها وتبجي وحدهة
اجيت كعدت بصفها باوعتلي ورجعت عيونها
تباوع لثلج برا حجيت بهدوء وياها
: -شجن حبيبتي باعيلي
التفت عليه ودموعها مالية وجها شهگت
حيل وهي لازمة أيدي: -ع. ع. افنني عصام عافني شلون أنطا كلبة هيج يسوي بيه والله كلبي ديوجعني احس نفسي مخنوكة اني كاعد أموت
حضنتها أمسح على شعرها: -خيولي يروحلج فدوة عصام وعشيرتة ميستاهلج على نوالة هسه هو وتبجين.
: -مااكدر شمس ماااكدر احبه والله احبه حبابة سوي
شي فدوة
: -قابل بيدي شي وما مسويتة
حضنت وجهه بين أدية احجي وياها بقناع: -شجون قوي نفسج لا تذلين نفسج الما يريدج لا تردينه
: -هذ. هذا ححجيي اااني مااكدر ماااشايفة شگاعد يصير كون الله ياخذ روحي ولا هالوجع للي دحس بي
جانت تشهك حيل وهي دكلي.
: -كلبي والله كلبي راح يطلع من صدري ماااتحمل اموت معقولة راح يزوجها ويكلها نفس الكلام الجان يكولة إلى هاااا وهم هم يعرض نفسة للخطر علمودة هااا شمس اااحجي راح تاااخذة راح تلبس بدلة بيضة الة عااافني واخذهاااا جننت خايفة من شفتهاااا واااخذتة مني اااكررههه الله ينتقم منهااا هي حقيرة وهو هم جلب
سحبت المخدة وخلت راسها عليها غطيتها وكعدت يمها امسح على شعرهاا وهي بس ادموعها.
همست بدموع وصوت خافت: -شمس احس كلبي راح يوكف من البجي
: -لا يعمري اسم الله عليج
نمت بصفها وقربتها خليت راسها بحضني فاقدة الوسيلة شسويها شسوي صارلها شگد ويا وتحبه متعلّقة بي هسه شلون تنسى
تف شگد الحب يوجع وموذي يربي
بقت تبجي بحضني لحد ما هدت ونامت وحدهة
گمت نزلت جوة للمطبخ أسوي عشة وأفكر بيها
قفلت الشباك الجوء بارد
جانت اكو عاصفة ثلجية ضارة الولاية بحيث مغطية الشوارع وبالي يم على بعدة ما رجع.
شفت اجوانا نزلت من فوك لابسة فروة حمرة ورافعة الشعر اجت كعدت يم عمة
ونامت على رجلها وعمة تمسح على رأسها
ومبينه الفرحة تشع من وجهه
ولا توقعتها هيج حقيرة للي يشوفها ابد ما يكول تتطلع منها كل هالسوالف
أني ما گاضني عنها غير على المشكلة هو اخوها
الوحيد وين تولي وهم عمة واگفة بعيني
والله بودي أگوم أمسح الصالة بيه هسه
خفة شگلها
ورها بأيام سولفت لشجن والغريب هي ما نصدمت أصلا ما حجت عافتني وراحت نامت.
وأهل عصام أجوا خطبوا اجوانا وعلى رفض كالهم ما عندي نسوان بس هاي ام عصام فد وحدة فوصة
عوزهة شوي وتبوس ايد على بس علمود يقتنع
ينطي اجوانا الهم شنو هاالصرار ما أعرف
وهم رفض، أنوب أجوانا سجنت نفسها بغرفتها وگطعت الأكل والشرب
وگالت لعلي
: -أنت تكرهني لأن أختك من أبوك لو أخوي من أمي وأبوي چان ما وكفت بوجهه سعادتي علمود أخت مرتك
يعني هي طفلة بس چانت تحچي سوالف أكبر من راسها.
المهم على لزمها وشبعها تگفخ ولو ما عمه چان گاتلها وراها تعاي وشگّي وريدج بالموس
وخلّت على مشرشط يركض بيها بالليل عالمستشفيات وآخر شي وافق على عرسهم
جان يوم أسود بالنسبة إلنا ومحد فرحان والبيت كئيب كلّش.
: -شجن
أعطيتكِ قلبي مفروشًا
بذكرياتي بطفولتي بضحكتي
خرجتِ منه تاركًة كل شيء محطم
وكتبتِ على الباب
لم يكن مناسبًا للسكن
چنت حايرة الذهن أصفن وأسأل نفسي هو صدگ چان يحبني لو چان ديگضي وقت وياي
مِتتت مِتّتت الوجع ما ينطاق والتفكير ياكل بيّه أكل وكل اللحظات اللي عشتها وياه تمر گدامي وتفزّز بروحي
ما يحبني استغلّني وبعدين عافني
رفعت عيوني للسماء الجو يمطر وأني أباوع من الشباك
حچيت بحركة ودموعي تهمّل.
: -الله لا يوفقكم وعساج ما تهنّتي بي يا أجوانا ومثل ما بَگتي فرحتي إن شاء الله تُنباگ فرحتچ وما تحسين براحة طول عمرچ
أول مرة أكون هيچ حاقدة إي أني حاقدة وكلش كارهتهم
چنت أفتر بالغرفة ونار بكلبي
أعض بديّه، وأكتم صوت صرخاتي
التفتت من إنفتح الباب ودخلت شمس حسّيتها متوترة ومرتبكة، گالت
: -شدكولين أنطلع نتمشى
: -جاي تمطر ومغيمة
: -اي الجوء يخبل اصلا يللا نلبسس ونطلع
ركضت أطلع فروة إلى حسيت أكو شي.
وهي اكيد دتحاول أضم عليه التفتلي
وبيدهة فروة بيضة وكبوس وياها قبل لا تحجي
كلت الها
: -ما أطلع لا تعبين نفسج روحي وحدج
: -علمودج أني
: -شكو شضامة عليه وماتردين أشوف
فركت اديها واجت يمي مبتسمة جذب
: -ماكو شي اريد أونسچ
: -عادي كليلي أتقبل الصدمات ماكو أكثر من هيج بعد
فركت وجهه وحجت بحزن وهي تباوعلي بترقب
: -عصام وأهله جاين يخطبون أجوانا اليوم
: -اي بالعافية عليهم وليش ترديني أطلع.
: -ما اريدج تتأذين خلي نطلع أكو كنائس هنا حلوة نشوفها ونتوس طز بيهم ليش نشوف المغثة
لزمت إيدها أطمنها أدري بيها ضايجة ومقهورة عليه بس ما بيدها شي تسويه حچيت بابتسامة جذابة
: -أني قوية لا تخافين عليه شفت بابا وماما ماتوا گدامي ضلّ على عصام عادي هم أعتبره مات.
راح أشوفه وأشيّعه وأدفن كل ذرّة حب ومشاعر إله أني أريد أشوفه أصلاً حتى أعاقب نفسي على اختياري حتى بعد أتوب وما أحب وأكعد وأسكت وأعرف الناس كلهم مشاريع خذلان
سكتت ودمعة بعينها حضنتها
مبتسمة وأنوب طلعت.
لبست ورتبت نفسي صح مبين عليه باجيّة عيوني مورمات بس يلا شسوي هذا حظي من الدنيا
مو جديدة ما إلى حظ بشي ما مكتوبة السعادة إلي
سمعت أصواتهم جوه أكيد أجوا.
طلعت وگفت يم السياج مال الدرج فوك أباوعلهم كاعدين بالصالة جوه
عصام وبصفة أمّه وأبوه هم جاي وامه بيدها بوكيه ورد أنطته لجوانا وباست أجوانا
عيوني راحت على على وشمس ابد ما جانت اكو اي تعابير للفرح على وجوهم حتى ام على جانت تتبسم مجاملة بس اجوانا تضحك ومكيفة
لابسة فستان أبيض وهي شعرها أشگر طالع شوي ومخلية أشال كلاوات على راسها
وام عصام مكيفة بيها دكلها أنتِ شگرة وعصام أشگر شتخلفون حلويات.
جنت مرتگية على الحايط وايدي على صدري كلبي يدك بسرعة وعيوني تهمل
جنت أبجي على نفسي والله مو على عصام
جنت أبجي من گد الوجع للي أحس بي
هذا الوجع اللي يصير بالكلب وماكو إلَه دوى
هذا الوجع لو إله علاج حتى الواحد يطيب
وما يظل يجرع المر، فزّيت من صفنتي
من اندك الباب.
گام على فتح وجان الشيخ جاي هو وصديق علي
عاد شمس راحت للمطبخ
هي وجوانا وبقت بس أم على كاعدة الخطبة والعقد جان عائلي ماكو أحد.
أما عصام فما جان نفسه حبيبي اللي جان يحبني
جان إنسان ثاني طاير من الفرحة بجوانا
وأول ما عقدلهم الشيخ گام حضنها وخلّى بوسة على راسها
استغربت شنو هالحب المفاجئ وشلون هيچ يتصرف گدام علي
وين راح احترامة ومستحاه
حتى لو صارت زوجته وخطيبته، ما أعرف
جنت كلش مصدومة من تصرفاته
رجعت للغرفة وأني أسمع صوت هلاهل أمّه
تغطّيت ضامّة نفسي جوّه اللحاف وإيدي على أذاني
ما أريد أسمع صوتهم كلبي متجوي ونار ما تطفي
ليش هيچ سوا بيه.
يموتني هالسؤال اللي ما لَگيت إلَه جواب.
أتمنى أكعد ويا وأعاتبة وأكلة ليش
هيج دمرتني ليش أخذتني من الناس كله
وعفتني وحدي هسه عايشة بقوقعة من الحزن واليأس
وراها مرت أيامي باهتة ماكو أي تغير بيها
جنت أطلع أروح للمدرسة أتعلم اللغة
شمس سجلتني وهم شافتلي شغل بمكتبة
مال كتب. جانت تحاول أتسوّى كلشي
المهم ما تخليلي فراغ حتى ما أفكر
بس للأسف حتى بنص الدرس أفكر.
أجي الطريق أسمع أغاني حزينة.
الطرق هنا حلوة والناس ما إله علاقة ببعض.
مرات ما أرجع للبيت أبقى أفتر بالشوارع إذا كضيت شغلي حتى أتعب وأجي كبل أنام.
جنت كاعدة وحدي بحديقة قريبة للبيت
أجيّت من وقت وما حبيت أدخل بقيت كاعدة
وأستمتع للأغنية القديمة بموبايل شمس
صار موبايلي هي أنطتّه إلى جانت دكول
لو غيمت دنيا
دنيا أنت أحس بيك
والله يا يمة
وبعيوني دمعة أتصير
وبروحي أباريك
والله يا بوية
تبعد وأگول الكاك
واصبر وأهم بيك يا ويلي
وذنوبك أنت هواي.
وذنوبك أنت هواي
من ياهو أباريك يا ويلي
ولو غيمت دنيا
دنيا أنت أحس بيك
والله يا بوية
تعيد وأبقى أستمتع إلها ودموعي
علي خدي جانت هالأغنية رفيقة لجروحي
جانت صديقتي المقربة أسمعها وأني طالعة الصبح ومن أرجع ومن أنام بالليل
أوسي روحي بالاغاني والبجي
حزينة على نفسي ما تهنيت بشي أبد
بس من أصفن على شمس وأشوف
نسيبي يحبها أكول هاهيه الحمدلله
علي أقل بينه وحدة مستقرة
يلا مو ضروري أثنينه نرتاح.
هي هاي الدنيا قاسية تتطحن العظم
ُّ كل واحد بينه عدة جرح
كل أحنا نحتاح واحد يعزينة
ٍ كل واحد بينه يعيش ضامة جرحة بكلبة
ُ
ويجي يوم رب العالمين ياخذ حقنة
وأني حاقدة عليهم كلش حاقدة
أول مره أكرهه بشر وأتمنى الموت
الهم من كل كلبي
صار الغروب وگمت فتت جوة لاگتني شمس طالعة من المطبخ كالت: - حبيبي أجيتي
هزيت راسي وأني أنزع جاكيتي حجت بحنان
: -أصعدي فوك ارتاحي هسه أحضرلج أحلى عشة.
: -لا ما أريد أكلت قبل لا أجي وأريد أكعد جوة لعبت نفسي من الغرفة
فتت لصالة كعدت لگيت أجوانا وخالة ام علي
كاعدات وهي شايلة البدلة تفتر بيها دكولها
: -ماما حلوة عليه
كعدت أكبالهن مخلية رجل على رجل ومرتگية على مسند الكرويته بعگسي أباوعلهن
حجت خالة ام علي
: -شجن يمة شرايج بالفستان حلو
ابتسمت مجاملة: -اي حلو بالعافية
أجوانا: -الله يعافيج يوم الج يارب
شجن: -شكرا
دورت عيوني على الاغراض جايبة هواي.
أغراض وملابس مال نوم. طلع
وبيدهة مجلة ماعرف دفتر تأشر بي
وتسال امها: -دا أفكر أقنع عصام أنگضي شهر عسل بالمانيا شدكولين ماما
: -بكيفكم المهم أنتِ سعيدة ومرتاحة
حسيت الدمعة صارت بطرف عيني گمت صعدت فوك
قفلت الباب وفتت للحمام كعدت بالكاع
أعضض بصابعي ماعرف شسوي
أطلع حرگة كلبي بنفسي وأبقى أجرح بدية
شغلت أغيتي وشمرت الجهاز على الجرباية يمي وتمددت على جرباية عيوني على كل زاوية
ليلة جانت طويلة مثلجة وممللة حزينة.
هي راح اتعديّ ماكو شي مايتخطى
بس هذا التخطي راح يكلفني
ثلاث أرباع كلبي راح يكلفني عيوني
الكاعد تهمل لليل ونهار
راح أكمل بغصة مستقرة بكلبي
طول عمري وراح أبقى أدري خيبتي وأنكساري
وبعد ما أعيد التجربة وماعندي ثقة
بالناس
عيوني على الذبانة تفتر بالغرفة
والشباك مقفول تريد تتطلع متگدر
وأدندن بصوت مزعج
بقت أتحوم على الضوء يم ميز المراية
گمت من مكاني وأخذ كتاب مال للغة
أنتظرتها توكف على المراية.
وفعلا وگفت وضربتها بالكتاب سككتتها نهائي
باوعتلهااا نجعصت ماتت
لزمتهة بيدي خليتهه بداخل الكتب
ورجعت للجرباية وهي گدامي
علي الكتاب هزيت راسي بأسف
: -أسفة موتج بس زعجتيني
بس هي ما جاوبتني يمكن صدك ماتت. شفت شمس دخلت بيدهة العشة طبگت الكتاب حتى ما تشوفهه
اجت كعدت يمي كالت بحب
: - جبتلج عشة
: -مو جوعانة
: -شجن اذا ما تاكلين والله ما أكل لا تشعلين كلبي.
هو منو يستاهل فدوة ترة ما يستاهلج خيولي زبالة ولگت حاوية هو وياها متناسبين ويروحلج فدوة يجيج الاحسن من عصام واغاتة كاافي ساجنه نفسج هيج
: -ما أريد أحد يجيني أگتفيت ولعبت نفسي من الحياة كلبي يوجعني وتعبانة
: -أصبري كلشي يحتاجلة وقت حتى الجرح بس وقت راح تنسين وتبدين حياة جديدة بعيدة عنهم.
بعدة جرحج أخضر صدگي تنسين وهاي تجربة قاسية راح تعلمج هواي الايام إلى تنامين بيها تبجين وحزينه باجر راح تكون اشياء تافه كلش واشياء عاديه بالنسبة الج وحوبتج وكسرتج اليوم راح تتطلع بجوانا صدگي أني كلش أكرهه بس متحملتها للخاطر على بالاخير هو اخوها وهي ماعدهة غير قابل يطردهة بس ان شاءلله حوبتج ما تتعداهة لا هي ولا ذاك العار
: -أخاف ما تتطلع بيهم
: - لا راح تتطلع الحوبة شي كلش جبير.
حوبة شخص حبك وكسرت كلبه وخذلتة
حوبة شخص وثق بيك وخنت ثقتة و أذيتة
كل هذا يم ربج ميضيع وإذا مطلعت بيهم هسة راح تطلع بيهم ورة كم شهر ويمكن سنة بس كوني على يقين راح تتطلع وأذگرج واجوانا بالذات الاذية راح ترجع الها أضعاف
جنت أهز براسي بيأس وهي حجت هواي شافتني ما جاوبتها خلت الاكل يمي ونزلت لان على صاح عليها
هي طلعت وأني طلعت ذبانة من الكتاب وگمت فتحت الشباك طلعتها وشمرتها.
قريتلها الفاتحه عليها خلي تنام بسلام
اصلا الحياة مو حلوة شكو عايشة
رجعت نمت وأني أسولف وي نفسي
ابد ما أسامحهم اذوني
رب العالمين يكول العفو عند المقدرة
واذا العفو فاق المقدرة
واذا هالناس اخذو منكم احلى
ايامكم وهدولكم حيلكم وغيروكم لشخص روحة تعبانه وملامحة باهتة وماكدرت ترجع مثل الأول هنا العفو فاق المقدرة لتسامحون ألي خلاكم تفقدون ثقتكم بالناس بسببه.
لتسامحون ألي ظلمكم أحبطكم أذاكم وخربلكم حياتكم لان محد كريم ويسامح غير رب العالمين.
الله لا يسامحك يا عصام لا أنتِ ولا أجوانا
لأن اذيتني وحسبي الله ونعم الوكيل
ثاني يوم الصبح طلعت والجوء ثلچ
والناس كاعدة ببيوتها وبس ثلج مغطي البيوت
بس اني كلبي نار وطالعة
روحي من البيت بقيت أتمشى.
: -شمس
مرت الايام وأزوجوا عصام وأجوانا جان زواج بارد مابي طعم لحد الان أذكر بيوم الزفة
شگد حاولت أقنع شجن حتى نطلع من البيت وما أتشوفهم وتنقهر وما قبلت
بقت تباوعلهم من فوك وهو دخل أخذها وهي بيومها بالليل بقت تفتر مثل وحدة متخبلة
خفت عليها تتخبل ومادري شسويلها أحجي وياها متحجي وياي بس تفتر يمي بالغرفة
اخر شي وگعت من طولها وشالنها المستشفى وأني أصرخ أنعادت عليه مسأت موت أهلي.
خفت أخسرهة هي هم من وصلنا هناك سولها فحص
وتحاليل كال الدكتور ضاربتهه ذبحة قلبية على الخفيف
بقينا يومين بالمستشفى وياها وأنوب طلعنا الدكتور
أخذنة العلاج واجينه بالطريق هي صافنه وحدهة
جبت الطريق أبجي اني ميته قهر على أختي
واني أشوفها تذبل گدامي
مرات ايام وايام لحد ما صار سنة تقريبااا
ورة هاي السنة توترت العلاقة بين عصام واجوانا
وصارت تجينا زعلانة هواي بذات همه بالبداية.
رجعوا للعراق أنوب اخذولهم كم شهر وأستقروا هنا
فمرة أجت زعلانة وبقت يومين أني وشجن ابد ما نحجي وياها بذات شجن
تروح للمكتبة ومن المكتبة مرات تروح وي أصدقائها صار عدهة أصدقاء سورين وعراقين بنات
من جانت تتدرس بالمدرسة تعرفت عليهم
فهيج مكضية وقتها
وما تحجي شي باعدة نفسها بس خلال هالسنة أتغيرت كلش ضعفت وشكلها تعب
أني ادري بيها تكتم بداخلها لو تحجي وتبجي احسن هي بدت تكتكم وكلش خايفة عليها.
سويت عشة وصعدت دا أصيحهم فأول شي كلت أروح للعمة لكيت الباب مفتوح
وأني أصلا ما دكيتة من سمعتها تسولف وي اجوانا ردت اعرف شكوو شنو سببب الخلافات بينهم
لان هي ابد ما تحجي بس لعمة تحجي
وعمة دكول مشاكل زوجية عادي أتصيرر
سمعت عمة تحجي وياها بزگر
: -جاا شعبالج هي هاي تاليت السحورة يا ما كتلج ماكو بيت ينبني بالسحر ولج يمة هيدي ما گعدتي هاي تاليتج شتسوين هسه هاااا شلون تحلينها.
ردت بدموع: -يتعارك وياي وما ينام يمي تعبت ماما الله عليج خلي أسويلة بعد شدكولين والله اخذلة سنه يموت عليه بس هسه أنكلب يتخبل مني وكل شوي يكول مبقيج علمود أبني خاف أنوب أجيب ويطلگني وماكو على لسانة غير أسمها حتى وهو نايم يحلم بيها ومن يتقرب مني يتخيلها ااخخ ماما فدوة شوفيلي حل.
ردت عليها بعصبية بصوت خافت: -يطبچ مرض البعيدة أتحملي أسوالفج تررردين تموتين الرجال دهر صابج بس مو صوجج صوج أمة البربوك اااوف أني لو أدري بهاي أسوالفج أخليكم تزوجون اااخ منج ااخخخ
تحجي وتعض بصبعها واجوانا كاعدة يم رجليها تبجي وتتوسل بيها
مستحيل صدمة ورة صدمة بعد شيطلع منها
واصل بيها تسويلة سحر كش بعدج بطول زري وهيج لو جبيرة شجان سويتي.
عفتهن ونزلت ما صحت الهن بقيت بالمطبخ صافنه وايدي على خدي أكول للشجن لو لا
بس شراح يصير واذا كلت هو بعد أزوج وهسه هي حامل لا خيولون خليهم أبعيدن عن أختي
جانت راح تموت من وراهم وان شاءلله من هاي
وأتعس وأنكس وحوبة شجن ما تخطاهم أبد
وراها على خلة عزيز يبيع كلشي بسمه بالعراق بسم عزيز ويحول الفلوس دفعات
وبيها الفترة قدم لجوء فردي وحدة وشرح الهم أسباب التهمة سواها تهمة سياسية بمساعدة.
القاضي اللي اسمه عدنان علاقة على بي قوية
هو رتبها الة من العراق
وشوفهم تقارير وتهديدات ومناك احنا هم شارحين وضعنا ومقدمين ملفات واحنا عائلة وحدة
حرفيا بطلاع الروح الا حصل لجوء وأستقرينا
بكندا وعلى فتح مطعم بس مو بأسمه خلا
باسم صديقة الان عندة جنسية أصلا وهو من زمان هنا وهم لان اكو هواي تعقيدات بسسبب وضعه
فهو كال احسن ما نصرف أفلوسنا هيج نفتح شغل يفيدنة من فتحة أول ايام.
جنت أني وهو وعمة وشجن كلنا نشتتغل بالمطعم
سوا لحد ما صار عدنة موظفين بعد تركنه
بس فرحتنا ناقصة رغم أستقرينا جان على يريد جهال ورغم صار هواي مزوجين
بس ما صار عندي طفل وبديت أراجع علمود الاطفال
طلع عندي تكيس وبقيت أشهر أتعالج
الا صار عندي أسينات وراها صار عدنة حيدر
همة أتلاثة مصطفى وحيدر وأسينات الحمدلله.
وأني أصلا ما أريد بعد جان بودي بس واحد على كولة ابوهم اخوان واحد يسند الثاني بس رزق أتلاثة صارو الحمدلله نعمة
مصطفى ربة عد شجن جانت تموت عليه تاخذة وياها للمكتبة ومن تزوجت اجوانا
صار كل وقته وي شجن وتاخذة يرحون سفرات
سوة وهي هم مكيفىة بي
طبعا شجن قررت ما أتزوج رغم صديق على خطبها
بس ما قبلت كالت بعد مالي نفس بي شي
هي الحياة مو دائما حلوة بس ما لازم توكف
بس بالنسبة للشجن وكفت للاسف.
من كد ما تعودت تكتم بداخلها وما تحجي
وكل ما يصير شي شگد ما صعب وموذي
دكول عادي ما صار شي گمت
كلش أنقهر وأضوج
أجيت يمها لگيتها ترسم
علي أوراق ومدمرة اديها صبغ
: -جبتلج كيكة حلوة مثلج
حجت وهي تاخذ قطعه: -عاشت ايدج شوشة
تنهدت وكعدت يمها ناكل سوا ونسولف حجيت
بهدوء: -شجون شلون صرتي حبيبي
: -ليش شگو يعني شبيه أني
: -يعني أقصد وضعج اذا تحبين تفضفضين ترى أني اختج بكل وقت أسمعج يروحي ليش أحسج تكتمين وما تحجين.
: -صراحة ماعرف شمس صرت أواجهه صعوبة بالفضفضة وما أعرف أحجي الحجي يوكف على طرف لساني وما أكدر أطلعه وأصيغه بالشكل اليلم بيه كل مشاعري مجرد جاي تخنكني
لزمت أيدي حجت ببتسامة: -لتفكرين بيه لا يضل بالج صدگي تعودت وأني نسيت ماعندي لا مشاعر كرهه ولا حب للاحد بس يمكن هالخنگة لأن تمرضت هسه من أخذ علاج أصير زينة
: -شدكولين نشوف دكتور نفسي هااا بلكي شوي تتحسن نفسيتج.
: -ما يحتاج يعمري شوشة أشبيج مهوسة معليج والله أني قوية
: -ان شاءلله وأني دوم وياج
: -لو ما أنتِ جان متت من زمان من القهر والصدمات
: -لا يبعد روحي اسم الله عليج شعندي غيرج
حجتت ببتسامة حزينة: -هو دائما جان يگلي
بعد روحي أخر شي خلاني بلا روح جسد هزيل وترس كلبي شوغات
: -تدرين شجن اكو شغلة اريد أكلج بيها بس متررددة
: -كولي شنو.
: -من اجتنا اخر مره أجوانا زعلانة سمعتها تشتگي لعمة ودكلها عصام ما يردني يمكن يمكن هي مسويتلة عمل هي وأم عصام
: -شبيج شمس عمل شنو هو وين اكو عمل بكندا
: -لعد وحد كندا شسالفه وهاي اكيد امة
: -ما ادري
: -تدرين أني أمن بهالسوالف لان شفت بعيني السحر شيسوي والا شنو شغيرة بسرعة بين يوم وليلة
: -سحر مو سحر اني طاب خاطري منه
وبعد شنو الفايدة هو هسه جاية طفل بالطريق ومستقرر
: -زين انت شوكت تستقرين.
: -شبيه غير هالمستقرة
: -شجن تعرفين قصدي
: -شمس لا تضغطين عليه مالي خلك بعد احب وأنحب اني ما عندي شي أنطي بعد والله فارغة من جوة لا مشاعر ولا حب ولا لهفة للي يحبني شطني أني أنطيت كلشي لعصام استهلگت ويا كل مشاعري
وهسه فارغة فبعد ما اريد شي خليني هيج احسن
: -أنطي نفسج فرصة ليش هو يعيش حياتة وانت لا
: -كاعد أنطي نفسي فرصة هالشتغل وحياتي حلوة ومتونسة شكووو قابل هي الحياة بس زواج
: -تمام براحتج.
مرت الايام وجهالي كبروا ومصطفى يموت على شجن واكثر مرة راح هو وياها للعراق ل أربيل
مرام عزمتها طبعاً مرام أزوجت واحد كردي
واستقرت هناك وبعد علاقتهن مستمرة
واني اعرف اخبارها من
شجن ماعندي علاقة
بيها
وحتى عزيز ورغد مستقرين هناك فقط عصام
واجوانا بقوا بالخارج واحنا
اهل عصام فقط على كد زواج عصام ورجعوا
مرات الايام ومصطفى بلش يلح
يريد نرجع للعراق وبالكوة على شال
الفكرة من راسة
بس بقى مستمر يروح لهناك يم اعمام ابو.
وأصدقائة ومرات ياخذ شجن ويا ومرات اسينات
وعلي مخليهم براحتهم طبعا ب 2011
توفت حبوبة علي
بيومها شگد بجيت عليها جانت كلش
حنينة وطيبة الله يرحمها
وراح على ل ربيل ومناك فات تهريب للعراق بس علمود يحضر دفنتها بس اني ما كدريت أروح ويا جنت بوقتها حامل بحيدر وأصلا ما أكدر أروح بكل الاحوال
طبعا عصام واجوانا صار عدهم أثنين ولد همة كلش حلوين بس واحد منهم مددد وعندة تشوهه خلقي
وشالع كلبهم والثاني لا زين.
توترت العلاقة بين عصام وعلى وخربت علاقتهم
بسبب مشاكلة هو واجوانا
وبقوا تقريبا شهرين ما يحجون سوا أنوب
تصالحوا ورجعت العلاقة قوة اكثر
من كبر مصطفى رجع قربهم جان يحب عصام
ودوم دايح يمهم صراحة مو بس هو همة
جهالي كلهم يرحون هناك يحبونة عمنة وعمنة
وهو شوي سبورتي يناسب أجوائهم
علي شوي حاد وياهم ويمنعهم من هواي شغلات
ف يطفرون للبيت عصام وعلى فرض بيت عمتهم هم
طبعا عمتي ام على توفت ب 2015.
الله يرحمها ووصت على هواي بجوانا
وبيت عموو ما سمعنا شي عنهم ما عدا أزاد
علي كال طالع من سجن
هو جان بغداد وأنوب محولي بالموصل ومن دخل داعش طلعوا كل السجناء
وهو من ضمن الطالعين بس محد يدري بي
اذا وي داعش لو شرد وطلع خارج العراق أصلا
وهيج مرت ايامنا اما اني وابو مصطفى عشنة احلى ايام سوا ماعندي وصف الة بس ددللني وحبني
لدرجة حسيتة ماخذ مكان بابا ولو يرجع بية الزمن ليورة هم أرجع وأختارة.
حتى شجن جان معتبرها اختة حالها حال اجوانا وابد ميرضى عليها ومهتم بيها
ولهنا...
وگفنا وياكم عند محطّة من محطات العمر
محطة كبروا بيها الجهال
وهدأ بيها الكلب وقبلت بيها الروح واقعها مثل ما هو بحلوه وبمرّه
ورغم كل التعب والفرگة وكل دمعة نزلت وكل خيبة عشنة بيها گدرنه نكمل الدرب
مو لأن الطريق سهل بس لأن عدنا ناس حبّونا وساندونا وعدنا وطن ثاني حضنّا من جديد
شجن رغم كسرة كلبها وسكوتها الطويل.
بقت واكفة وتحاول كل يوم تخيط جرحها القديم لأن الحياة ما خلّتها تكمل حبها بس علمتها شلون تحب نفسها
بالنهاية گدرنه نعيش
صح مو مثل ما حلمنا بس مثل ما الله كتب وبكلوب مليانة رضا
ويا كل حدث ويا كل كلمة چنة وياكم بهالرواية نكتب نحچي نبچي ونضحك سوا
وتذكروا الحياة مو مثالية بس دايمًا تخلينا نكدر نبدأ من جديد من لاشي
ولهنا، نكلكم بعد سلامة.