رواية بين قلبها وعينيها كبرياء للكاتبة شمس العراقية الفصل الثاني والعشرون
أسيا تذكرت المحادثات البيني وبينها من جنت يم أهلي ما حذفتها خرب بعقلي قريتها أكثر من مره وهو مراقبني منتظر مني ردة فعل وأني لو يذبحني قطره دم ما يلگي بجسمي لن دمي نشف من الخوف والنظرات والترقب والافكار الساكنه رأسه وجنت خايفه من هذا اليوم لن عصام ما تخفي عليه خافيه مثل الذيب.
اريد ابين اله الوضع طبيعي ابتسمت وسحبت التلفون منه يا شلقضيه عصام سوالف نسوان بيني وبين اختك.
عصام سوالف نسوان! ودام سوالف نسوان ليش تأكد عليج تمسحيهن وصور هم! وتخاف اني اشوفهن هااا ليشششش
شگوو ليش مو گتلك سوالف خاصه يعني عيب تنشاف
شبيج كمتي تبلعين بريگج ووجهج أصفر!
عصام شبيك گتلك سوالف نسوان اقصد شغلات نوصيها من البيجات بينا وداخليات وهل السوالف ونكعد نسولف ونحشش وشويه ندوس بالحجي يعني لهل السبب ما تريدك تشوفهن اختك وتستحي منك أي دتفهم يا عصام.
وتردين تقنعيني هل السوالف أني ما اعرفها شنهي ترى سوالفجن كلهن عندي بس السالفه أكبر فتحي خل اشوف
تقرب عليه وعينه على التلفون وجه كلامه بصيغة امر عصام لاتسويها سالفة عفيه لاتتدخل هاي خصوصيات بينا والله عيب وزايده منك تشوفهن شهل الملحه
أسيا اخر مره اكولج فتحي ودخلي على المحادثه أخر مره ترى جاي اتعامل وياج بالطيب يله فتحي كدامي.
ما افتح هواي زودتها سحبت تلفون ومشيت وما حسيت غير حضني من ظهري ويحاول يسحب التلفون عصام شجاك تخبلت يمعود عصام مو هيج عصام
جيبي التلفون
ما انطي الك تلفوني مو من حقك تفتشش وتشوف ما اسمحلك عيب عليك هالتصرف مو من حقك
ما تسمحيلي شنو ليش غريب اني جيبي داكولج احجييييي أجنبي أني اسسسسيا التلفون جيبي لا اكسرلج ايدج واخذه غصب عنج ما يجرالج خير والله.
گتلك ما انطي لاتسسسسويها شغلة عناد تلاوينا اني وياه وضاغطه عليه بكل قوتي وهو منين مل يجيني احاول اتخلص منا وكعت بالكاع ما انطي ألك عوفه خليته ورا ظهري ونام عليه ويفكك بيده يحاول يسحبه واني ادك بي بالكاع اريد اكسررره وهو كبل حسس
تردين تكسسرينه لا السالفه جبيره والله اليوم احرك ابهاتهجن وأكلب البيت على روسجن والله جيبييييي اسسسسييا ما تنطينه مووو.
ضربني راجدي قوي شاغت روحي ولزمني من شعري ورفعنني من الكاع ولوه ايدي واني ضاغطه عليه بقوه وابجي وانكزز لن برجليه ضاغط على رجليه عصام اساليب التعذيب عوفها لاهيج تسسسوي لاتصير حقير اجاني كف ثاني وعض جف ايدي بقوه صرخت بوجع وسحبه مني مسحه بفانيلته وفتحه ودخل على المحادثه اني شلون ما حذفتها عزا العزاج ازهار راح تروحين بيها اليوم يمووووتها واالله يمووووتها واني وياها شگووو مبقيني يقضي على حياتنا.
يقرأ بتركيز وطول وهو يباوع ورجع باوعلي بنظره سحب روحي من صدري گبل غمضت عيوني بكل قوتي
تقرب وخله المحادثه گبالي
عندج علم وساكته
ما جاوبته بس روحي ترتجف خوف ضعف انكسار.
الأمور متطوره هدايا وسوالف حب وأنتِ عندج علم بيها وتشجعينها على الغلط ومستمره بالغلط وبعد عندج علم وساكته أنتِ شنو من مره تكودين لاختي يا ادبسزززز تگودين الها شجاي يصير من ورا ظهري اسسسسسسسيا شنو هذا الشافته عيني شلون تستكتين على الغلط شلوووون.
قبل لا احجي ضربني راجدي ولزمني من شعري بقوه وسحب الحزام موتنيييي ضرب عوفنييييي عصام اصرخ والباب يندك بكل قوه واسمع صوت عمتي تصيح عليه وهو فقد تخبل على عمره موتنيييي من الضرب اول مره يمد ايده عليه اول مره يسويها ويقسي عليه لهل الدرجه
واثق ومأمن بيج تكسسسسريني ليشش أسسسسيا شلون تستكتين وتغطين عليها ومستمره بالغلط رغم معرفتج بيها يعني شافت نفسسسها صح وتجين أنتِ وتشجعينها على هالشيء شلون احجيلي شلون.
ما خفتي تغلط وتنكسر رگبتها ما گلتي هاي أخت زوجي وعمة جهالي ما خفتي الولد يطلع مسقط ويلعب عليها ما خفتي على شرفي وسمعتي وعرضي عوفج مني اني مطيح حظج العائله عاشرتيهم وعشتي وياهم ما يهمج شرفهم وسمعتهم اذا طاحت بالحضيض شيصير بيهم تدرين سمعتنا وصيتنا وين واااااااصل غلطه وحده تنزلنا لإسفل السافلين
عصام والله
ولج من الله أخذج هاي عود أنتِ الجبيره الفاهمه الواعيه بس نزلتي من عيني لا بارك الله بيج وبيها.
ابجي واحاول افهمه وهو قافل والله العظيم مو قصدي بس هي فقيره لاتصيرون ضدها ما الها ذنب والحب مو عيب ولا حرام اني وياك هم حبينا بعض واجهنا ظروف وتحديات يله تزوجنا.
تشجعينها على الغلط لا واكفه وياها وتدافعيلها تردين تموتيننن أنتِ ادبسزززز تكودين الها
عيب عليك هالحجي لاتكوم تجفص اكود الها شنو راحت حبت من ضيمكم من ضيم انت خنكتها بالحياة لو عمتي من ساعة رفضت شاهين سسسمتتها بعيشتها.
من ضيمنا ياااا ضيم تحجين عنا يا ضيم شو عايشه بدلال وظيفه وسياره شتريد بعد بس دواها عندي وانتي راجعلج ما خلص حسابي وياج اصبريلي
دفعني وعافني جنازه والحزام بيده ملتف على ذراعه ويگلب بالتلفون صاااار يشك بيه خرب بحياتج اسسسيا خرب بحظج اسسسيا.
كعد على حافة الجربايه نبش التلفون نبش وباوعلي بنظرات تخوف وطلع وركضت وراه وجلبت بي وين رايح عصام لاتتهورررر عصام استغفر ربك فدوه اروحلك بس اسمعنيييي ابوس من ايديه عصاااام دفعني ويكلب بالتلفون ويحجي ويه روحه تخبل عقله طار
جنت شاك بيها والله جنت شاك بس ردت دليل واجت على رجليها فضحت نفسها بنفسسها هشام مو اي هشام حبيب رشا السابق! والله محد يفگج مني والله.
فتح الباب وعمتي تباوعلنا مستغربه الوضع عافتني ولحكته لصاله تفهم منه وصااااح بيها
بنتج الادبسززز عاشگه عنددددددج علم بيهاااا لو لا تسرح وتمررررح بكيفها تريد تصخم وجوهنا تريد تسود وجهيييي بسس محد يفگهااا مني والعباسسس اليوم اقضي عليهاااا ابووووويه وين
وصال ابوك هسه عمك فاضل مر عليه وطلعواا وبعدين شتخربط بسوالفك لاتكوم تجفص وتتلبى على اختك وعيب عليك هالحجي.
عيب عليه مو العيب عليه عبالج ما ادري بيج عندج علم بكل سوالفها الادبسزز عبالج ما ادري ومن تشمرين عليها حجي وتبسمرين بيها هيج لله من دون سبب لاا ااا يمه اني مفتح ونظري سته على سته وهذن سوالفج روحي ضحكي بيهن على عقل سياده الوالد ومروان بس مو على عصام.
جان عندج علم وما حجيتي او حتّى ما نصحتيها عفتيها على حل شعرها شافت الوضع عادي كالت يمعود شو لا صداد لا رداد المن اهتم
عصاااام احجي عدل ويه امك.
بنتج اليوم اعيد امجادها وامجاد الخلفوها وانعل الكواد اليدافعلها اذا وكفتي كدامي ومنعتينيي ما تدرين شتصرررررف احركجن والله والحسسسيين الشهيد اخليجن بغرفه واطم عارهاااا وانتن وياها بس خل تشرف ست الحسسسسن والجمال بنت العز والدلال
أسيا يعد ويرعد وصوته شال البيت وعمتي ترجف والله خفت عليها تنجلط اجتني تركض تفهم مني ورجع صاح عليها رادت توكع من طولها من شدة قوة عياطه.
عصام ابوووووووويه وين راااااح شعنده طلع هسسسه هذا ما يعرف يكرص روحه ويكعد بالبيت
وصال شمدرينيييي وين راااااح اجه عمك واخذه
أسيا اجت يمي وكامت تلطم على وجهه
وصال ولج شبي شعرف ششاف احجيلي يا مصخمه
شحجيلج عمه شاف المحادثه بيني وبينها وعرف كلشي وگال هذا هشام حبيب رشا السابق الظاهر هي هم على الخط لن ما يحجي هيج اذا ما حاجيه وياه وملمحه اله عن علاقه ازهار ب هشام
ليش تعرفين بيها
اي اعرف بيها مثلما انتي تعرفين.
ليش مو عرفت وحجيت وياها وصخمت ولطمت الله ياخذها اشسوت بعمرها اليوم كتلها عمل شعبي وانوب وكعت بيد الميخاف الله ما يرحمها هذا عصام هذا عصام لا مروان ولا ابوها هذولاك بيهم هون الا هذا راضع ويه ابليس اليوم يسكطها ولج كومي خابريها قبل لاتوصل كوليلها لاتجي خل تولي لبيت جدها والبس عبايتي الحكها ونشوف شلون نحل هالطلابه انوب هذا سليمه ما يتفاهم يشتري المشاكل بدم گلبه مصيبه.
تلفوني اخذه مني عمه تلفونج وين.
اوكفي هسه اجيبه الج نسيته بالمطبخ
طلعت وراها كوه امشيي ولحكتها المطبخ ادور عليه وباوعتله فاتح الباب والحزام ملتف على ايده مثل الحيه
ومخليه ايده بجييوبه يا قساوة گلبك مجرم والله
ولج المهجوم ما?و وين اختفى
وين راااااح انخبصت وياها وادور عليه يارررربي وينه التفت علينا ورفع ايده وشايل تلفون عمتي ويفر بي عزا بعينك ما تفوتك عمه لاتعبين نفسسج التلفون عنده هذا شيطان حسبها وفكر بيها قبلي وقبلج.
ولج شسوووي شصخم وين اكدرله يموتهاا والله انوب عمج هسه يله تطلع اووووف على حظج يا وصال اووف
كعدت تبجييي وبنتي تصرررخ وعاط بيه
عصام شعندج طالعه من الغرفه رجعي على بنتج لا اجي اخلص على عمرج
رايحه ركضت خليت ممه بلحكها رضعي وسكتيييي وعيني على الساعه وصلت موعد جيتها طلعت وعثرت واسمع صوتها بالبيت اجت يممممه اجتت خرب بحظج اليوم تموتين
ازهار مرحبا شلونكم.
أسيا طلعت واكفه وعصام مخليه ايده ورا ظهره وصافن عليها مثل الاسد من يترقب الفريسه علمود يهجم عليها وهي مستغربه الوضع حست بالخوف ردات تصعد وصاح وراه وهو يلف بالحزام
عصام ليش تأخرتي
أزهار جان عدنا شغل بالدائره وتاخرت لهل السبب
جان عدكم شغل اي شغل والله من انعل اليوم ويوم التوظفتي بي يا ادبسززز.
أسيا هجم عليها وجرها من حجابها وضربها راجدي ويسحل بيها بكل قوته واني اجر بي عوفهااااا فدوه لخاطر جهااااالك عوفهاااا هاي عمتهم عصااااام عصاااام دفعني ورجع ضربها بالحزام ويصيحححح عليها ويه كل صيحه يضرب ضربه اقوه من القلبها وعمتي ترجف وحاضنه كرم
هاي شنو تكدرين تنكرين يا ادبسززز
اسيا قرب شاشه التلفون وخله محادثات كدامها والصور باوعتلي بحزن غمضت عيوني فشلانه منها رجع صاح بيها.
عصااام تحبين وتعشگين على حل شعرج هاي تاليها ازهار هاي تاليها وثقنا بيج وعززنناج ودلالناج هاي تاليها هيج تجازينه هيج تجازين ابوج واخوانج تحبين ابو الخط هشششام ولج هششششام والله جان گلبي ناكز منه وما مرتاحله من ساعة شفته كلت هذا يهجم بيتي ويصخم وجهي.
بس المن احجيييي اذا ابوج بيده وظفج وأمن وثق بيج بيده اختارلج ارقى واغلى سياره بالمعرض دخلج دوره تعليم سياقه فتحلج حساب بالبنك اكلج ولبسج كله من البيجات وشرط يكون ماركات عالميه ولج من السويد عمار يدزلج ارقى الملابس ارقى المجوهرات وانتِ بشنو تجازينه حضرتج تخونين الثقه وتروحين تعشگين السايق مالتج يا ساقطه يا ادبسزززز والله اليوم اعيد امجادج وامجاد الخلفوج على هالتربيه السگط.
عوفنييييي اصرخ وادفع بي وهو يضرب بدون رحمه كااااااافي كاااااافي شنوووو دليلك ضدي انت من يومك كلبك وسخ وشكاك طبعا اذا خاتم النسسسوان على ايدك طبعاً تشششك وتتبلى على اختك تطلع عقدك النفسسيه الشفتها وعانيتها من بنات الناس بيناااا واحد مريض
ولج منو المريض اني مريض اني والعباس ابو فاضل اليوم اموتتج جنيتي على نفسسسسج
عوفني كدرت بس عليه بس على أختك يا اخويه لو بيك خير جان گدرت لمرتك بس عليه تغلط وتضرب.
ولج هيج عرامه وصلافه ما شايف بكل سلالة النسوان ما شايف هيج وحده عينها صلفه أبداً ومرتي صبغتها صبغ من وراج لاااا گتلتج صارت حلال لا محال حلال
عوفنييييي ما عندك دليل ضدي گافي تضرب خاف الله انت هم عندك بنت وهم تكبر خاف الله بيه اني اختك.
لا وفواكاها تردين دليل أنتِ امثالج يسقطن ويكودن ويجن يكابلني على الاكل شنو من نفس عندج شنو من صلافه شايله عينج ما نكسرت ولج لاتباعيييييين لا قسم بالله العظيم اشلعلج عيونج الاثنين
أسيا ولج سگتيييي سگتييي ما سگتتت وترده وهو يتخبل بالزايد ضربها ضرب للكافر ما ينراد اجه يسحلها من شعرها عمتي ركضت واني جلبت بي وجلب بيه وضربني بالحزام صلخ ظهري لزمني من شعري.
روحي انكبري بغرفتج يم جهالج لا اخلص عليج وعليهم شغلي اني واختييييي ما الج شغل امشيييي
ما اعوفها الك تموتهااا
تحركيي اسيا لا اخلص على عمرج والله اموتج بمكانها
اجه سحبني ودفرني ودخل كرم وقفل علينا الباب عصام افتح الباب عوفها فدوه اروحلك بس اسمع صوت عمتي تصرخ وصوت ازهار اختفى بس لا موتها عزاااا.
أزهار سحلني من شعري وتملخ بيده وكعت بيد واحد ما عنده ذره رحمه بگلبه شبه فقدت الوعي واسمع صوت امي تتوسل وصوت بابا اي هذا ابويه وصياحهم وتلاغوا بينهم ومروان نزل شوكت اجه انرفعت من الكاع وفتحت عيوني مروان يرشش عليه ماي ويحاول يفتح عيوني ثاني ركبته بالكاع ويطبطب على خدي بضربات خفيفه
مروان عايشه ما ميته ازهار حاجينييي عيني أزهار تسمعيني.
ازهار فتحت عيوني بعيونه لابس ملابسه العسكريه اكيد عصام خابرهم يجوون كعدني على رجلين امي وبابا واكف كدامي ويفرك بوجهه ويفتر الظاهر عصام گاله ومروان عافنييي هجم على عصام ضربه بوكس وصرخ بوجهه
مروان انت زماااال حيوان مجرم شلون تضربها ضرب مال مووووت على? شنو ما تبطل هالشكوك الوسخه زارعها براسك شنو من طينه طينتك شنو من اخ متكوليلي يوميه مسويلنه سالفه شكبرها روحك من الدنيا المشاكل شبيك بابا صاحي انت.
عصام واصحى منكم كلكم هالخاتون كدامكم اكبر ساقطه وعرمه شافتها عيني انتوا عدكم علم بنتكم الخاتون على علاقه بالسايق مالتها ابو الخط هششام يوديها ويجييها هذا الوثقتوا بي هذا اللي امنت بي يابه هششام سويتوا ملاك الرحمه وخوش زلمه طلع العار يلعب بعرضنا وبينهم صور وهدايا وطلعات وتاخير عن الدوام بالساعات عبالج ما تنكشفين
مروان شتحجي انت شنو دليلك.
أزهار فتح التلفون وانطاه اله ومروان يقرأ بالمحادثة نهضت بخوف وصرت بظهر امي حضنتني بقوه وصاحت بيهم
وصال محد يمد ايده عليها عصام موتها ما خله على حالها حال راح تسكط كمال احجيلك كلمه لاتخليكم يسكطونها كااافي عوفوها حبت وغلطت وصلخت جلدها بالضرب عوفوها لخاطر حليبي
مروان وين تلفونها.
أزهار رغم الوجع والضرب الشفته منه بس گال تلفونها ركضت من حضن امي على جنطتي اخذتها ردت انهزم بيها ما ادري وين انطي وجهي واني بين اهلي من كل صوب التفت موجودين بابا اخ بابا وأخواني رجع عصام گال الهم
عصام وتكوليلي أنتَ ظالم أختك باعوا الظلم بس گال تلفونها طفرت عليه لما عدها شيء ما تركض تاخذ جنطتها بس خايفه نشوف شمصخمه بعمرها الادبسزز.
أزهار اجه ويحاول ياخذه مني وبابا صافن على الوضع وساكت مصدوم ومخذول من بنته وحبيبة گلبه
عصام جيبي تلفونج ادبسززز خايفه نشوف شمسويه خايفه جبيبي لا ارجع اعيد الضرب الضربته الج اسكطج والله اخليج مكرمه بفراشج
ازهار بصياح ما انطيييي ما انطيييي ادفع واصرخ عليه وهو يضرب بيه واجه مروان وياه واني عاصرته بيدي كله قوتي تقرب مروان وسحبني من عصام.
مروان جيبي التلفوووون ولاتخافين انطيناها وما عليج من عصام وثقي بي وانطيناه يله
جذابين والله حباب مروان فدوه ساعدني
جيبي التلفون يله
باوعت بعيونه وخفت شديت علىالتلفون بقوه ما انطييييي والله انطييييي تردون موتونييي موتونيييي ما انطييييي
مروان جاااااي اتعامل وياج بالطيب جيبي وفضيني.
ازهار تقرب عصام دفع مروان وجر ايدي وعضني بكل قوته خلاني اعيط وانكز وكع التلفون بالكاع وسبحه ورجع لزمني من شعري والدم ينزل على وجهييي
عصام فتحيلي الرمز يله
ازهار والله لو تموت ما افتحه
فتحي
ما افتحه
اذا ما فتحتي اخابر رشا تجيبلي كل اوراقج وفضايحج
رشششششا! ليااااا نكسسسسس جنت تدري كل هالمده وساكت مصدومه بيك جنت تدري وساكت انت انكسسس واحد شفته بحياتي انت ورشا نكسسسين
مروان لا بالله هاي تريد تموت.
عصام اني نكسسس انتي تحاجييين منو شو جاي تلعبين بعداد موتتج ولج اني اشتري المشاكل بدم گلبي ومشكلتج اني حلالها اذا ما سودت عيشتج اني ساقط وكل شرف ما عندي هو انتي خليتي علينا شرف ليش خفتي كلتي ابويه وعمي واخواني عسكرين والهم اسمهم ومكانتهم لا يبوي المثلج ماتخاف المثلج تسقط بالشوارع
كمال عصااااااام كااااااافي عوفوها ولحد يتقرب الها وصااااال كومي اخذيها وممنوع تطلع من الغرفه اكسر رجليها اذا لمحت طولها.
ازهار سكتوا ومروان كعد لزم رأسه ويفرك بوجهه مشيت وتقربت على عصام جنت على علاقه برشا مو وتوصلك كل اخباري وساكت ومسويلي روحك شريف تفل بوجهي وسبحني من شعري لغرفة امي دخلني وقفل الباب عليه.
وكعت بالكا? تعبانه ومنتهيه على الاخير هذه نهايتج أزهار أجه هذا اليوم الجنتي تخافين منه وخسرتي گلشي حبج وهشام وأبوج وأمج واخوانج وثقتهم ونزلتي من عيون الكل غلطتي وتجاوزتي حدودج إشسووويت بعمري.
أشسوووويت اضرب على وجهي والطم واصرخ ملخت روحي من القهررر وخايفه ميته خوف يفتحون التلفون ويشوف الرسائل سوده بوجهج أزهار
.
أسيل
تمر الأيام وكل يوم يزداد الحب والتعلق صارت روحي بي وما يكمل يومي اذا ما احجي وياه مراسله أو اسمع صوته وهو كذلك وين ما يروح يتواصل وياي ويبلغني صرت جزء من حياته بس اعرف شنو أسم هذا الجزء مثل حلقه مفقوده من النص.
كاعده أباوع لصوره دزهن اليه بالجم وكل صوره أحلى من الثانيه أنوب تخبلت بالزايد أخذ روحي بجماله وشخصيته ممزوجه برجوله وبزرانه بثكل بشقاوه هيج جان تحليلي من خلال معرفتي وتطور علاقتي بي لن هو بالعاده معروف عن الاهل والمجمتع مالتنا مروان ابن كمال شخص أنعزالي وثكيل عكس اخوه عصام شخص أنفعالي ومتهور وعصبي.
مروان هبه نشرت صوره لاتعلقين عليها
أسيل ليش ما تحبني أعلق ألك مستكثر عليه تعليق مروان شدعوه عليك.
أنتِ شيء ثمين مستعزز بيج مثل ما يگول ضامج من عيونهم فهمتي شلون.
تسلم ياغالي
ولو تدللي يا عزيزه أي اخبارج شنو أنتِ ما تطلعين أبداً كلما اراسلج بغرفتج وطول الوقت فاتحه أنترنت ومتواجده!
ما أحب الطلعات ولا الاختلاط أنعزاليه وافضل اجواء البيت واحب غرفتي وأحب اتصفح بالمواقع أشوف اخبار وصفحات وأحب أسولف وياك
هاا بس أني تحبين تسولفين وياي
ما فهمت شتقصد.
يعني بنت مثلج حتّى لو منفصله ما يمنع تكون في علاقه حب معقوله ما عندج حبيب يشاركج حياتج وتفاصيل يومج
أكو بس علاقه معقده
احجيلي
حب من طرف واحد هو ما يدري أني احبه
اهاا شغلتج صعبه يمعوده على شنو مضيعه عمرج ووقتج ويه هيج علاقه ما معروفه نهايتها شلون احتمال ما ترضيج يعني ضامنه يحبج
ما اعرف قدر يجوز يحبني
تستاهلين كل الخير بالتوفيق يارب.
اهتضمت حيل شلون اوضحلك واكولك اللي احبه هو أنت شلون والله احسس الوضع زاد عن حده مو كادره اتحمل بعدك ونار حبك تغلي بگلبي هالكثر مو كادره
وين رحتي شفتي رسالتي وسگتي ليكون ضايقتج
لا بالعكس كلامك مثل العسل على گلبي
أنتِ عسل ولو ما شايفج
شسوي بيه تشوفني
ليش أنتِ مو شفتيني وبينا ثقه وأمان وعلاقتنا علاقة صداقه قويه ونسولف وتشاركنا الهموم سوه
مروان أنتَ رجال تختلف عني عادي تنشر وادز صورك موو مثلي اني صعب.
تردين أخذ بخاطري منج على هاي حجايتج ترى وشرفي وعرضي وستر أختي ما أذيج ولا يمي هاي السوالف أني ابن ناس معروفين والنا أسمنا ومكانتنا بالمجمتع
ما يحتاج عيني أنتِ قابل ما أعرف صارلنا شكثر نحجي وأنت من كلمه تنعرف شنو ومنو ما يوم تجاوزت حدودك وياي اخلاقك مشهودلها
َ تسلميلي دام هيج على راحتج
شكراً مروان
لاتحجين وياي برسميه
تمام عيني تامر بشيء ثاني
تامرين على گلبي ما يأمر عليج عدو.
يمه گلمته جعل محد يأمرني الا أنت لك أفداك أفداك وأفدا خطاك وممشاك رجعت كتبت له اي شوكت ترجع البيت
فد ساعه انوب حسب المزاج أنتظر صاحبي نتعشى بفد مطعم وارجع كبل أنام
ليش ما تكعد ويه اهلك تجتمعون مثلاً دائماً من احجي وياك منعزل عنهم وما تجيب موضوعهم.
لا عادي نجمتع بس اني ما أحب كعدة البيت حتّى أمي تگولي الله يساعد التأخذها احب اطلع واگثر شيء اروح بيت جدي احب عمي والكعده ويه جديتي وعمتي عادي حسب المزاج مرات مالي خلگ لاي بشر
أي صحيح كلامك
بس شايف راحتي يمج لو أجي تعبان وطالعه الدنيا من عيني بس اسولف وياج تلقائياً ارتاح يم?ن لن أنتِ تفهميني بسرعه حنيتج مفرطه عليه مرات أحسسج أمي
دمعت عيوني بكلامه ما اعرف شگولك خجلتني.
فديت اليخجل مني يله اجه صاحبي بعدين احاجيج
تمام اخذ راحتك عافيات مقدماً
يعافيج الله
انتهت المراسله وراح الله وياه بس روحي وياه بكل وقت حبه صار مثل الهوس بگلبي بعقلي بكل خلايا
جنان أسيل لحد الان مخموده ما تشبعين من هالنوم نزلي ولج يمه ساعديني بالعشه تلحكين على النوم هذا الليل شطوله شيخلصه اسييييل وطررررش.
أسيل أجيييت يمه اجيييت ضحكت شيخلصه الليل يخلص بلمح البصر دام مروان موجود بحياتي كل ايامي حلوه، خليته على الشاحن ونزلت لكيتها تريد تلف گبه اعرفج ما تكملينها الا أسيل على أيدج
جنان تطلع من أيدج قالب تعالي ساعديني بيها يله ماضل وگت ابوج يرجع جوعان
أسيل غسلت ورفعت رداناتي وكابلتها وبلشنا اني اسرع منها وهي عود إمي بالكوه تلفها معتمده عليه شو هيج عوجه عبالك مجلوطه حلكها معوج.
بس تصنفيين شمدريني ناسيه والله يا أسيل اذا اجتج قسمه وتزوجتي اني يا ويل حالي اديح وراج ايدي ورجلي أنتِ صدك لو كالوا محد يلم بيت الاهل غير البنيه
خدامتكم مو بنتكم گوليها ليش مستحيه.
أنجبي لاتكومين تجفصين بسوالفج خدامه شنو هذا بيت ابوج يله لفي لفي اكوم احمس طماطمه.
نفضت ايدها وكامت ورجعت اكمل الكبه كملتها واني صافنه وابتسم لوحدي وتذكرته واشتهيته اله كون يمك فلا اخليك تأكل بمطاعم اصيرلك الشيف منال العالم
كملنا العشه واجو بيت حارث وهم تعشوا ويانا واكفه اغسل المواعين واجت فتحت المجمده وشالت نص الكبه وييين ماخذتها
اسماء شنو وين ماخذتها غير اخذها وياي.
أسيل وايدج مكسسره ما تسسوين وتجمدين شراد الها علم تعلوم حتى الكبه على الجاهز تاحذينها شطلعت هاي شگوو عازله بيت لوحدج وخابصه روحج ام بيت
شو ما تعرفين تحجين ومجلوبه ينراد الج صيانه من جديد واصبريلي عمه حارث تعالوا سمعوا اسيل تحجي عليه وسدت المجمده بوجهي لن ردت اخذ كم كبايه لجهال شصاار قابل اني لما امون ما افتحها واخذ
جنان اسسييل شنو هالحجي مو عيب.
حارث ليش الخاتون تعرف العيب شوفي لج حلكج اكسسره اذا تحجين حجايه زايده ناقصه بيت عمها بكيفها منو أنتِ تمننعينها شو دوخري
أسيل أكلوني حاصل فاصل وفات فتح المجمده وخله الكبه كلها بالجيس وشالها وكدام عينك يا تاجر ومشه ولحكته مرته الحياله والمكاره
حارث يمه اخذت الكبه لن كبتج طيبه تعرفيني احب طبخج
جنان اخذ يمه عليك بالف عافيه لعد اني المن مسويتها.
أسيل اريد ادج نفسي بالسجينه على هللقهر ظهري انكسسر يله خلصتها وبالاخير تروح لجايفات على الحاضر واني تعبي بالطكاك واني اكول المجمده ليش تفرغ خابصه نفسي واجمد الكم اكلات وامي توزع بيهن يمه فحم گلبي بنت كواد وساقطه اذا اضل بهالبيت بعد!
صعدت لغرفتي بعد ما كملت شغلي وقفلت الباب شايطه ونار تغلي بگلبي شگد حقراء هو ومرته الادبسرز.
فتحت التلفون ما موجود من اخر مره حجه وياي كمت فتحت الكنتور لبست فستان اسود وسشورت شعري وكعدت اخلي مكياج وبعصبيه كملت وجريت التلفون اخذت صور بس شفايفي ورگبتي وشعري نازل صفح طلعت أشتعل حيل انغرمت بنفسسي ذبت بجمالي يمه فديتني وفديت هالرگبه والشفايف كرز امحح واكفه واتغزل بروحي وصلني مسج منه
مروان اشتاقينا
أسيل جاوبته بهلفه تارسه صدري مو بگدي
مشتاقتلي
كلش دزيتله سمايل يبجي
سلامتج شبيج تبجين
هيج مخنوگه.
ليش شصاير وياج
اني ومرت اخويه سوالف نسوان ختولي
يمعوده عبالي غير شي هاي سهله بالريش
اي تعودت صار الوضع عادي اي وين انت
رجعت للبيت حالياً بغرفتي متمدد وگلت خل اراسلج
هاا تمام مروان
ها هبه گولي محتاجه شيء أمانه
لا شسالفه ما محتاجه غير سلامتك
الله يسلمج
عندي الك مفاجأة
الله على? المفاجأت يالله شنو هي
غمض عيونك بالاول
راح أغمض بس شلون تعرفين بيه غمضت
دزهن بصوره
ششعندج سوالف اوكفي خل افتح الضوه واصورلج.
شويه ودزلي صورته مغض فاتح تك عين مروووان
تك عين ووجع
ما يصير ما هيج اتفقنا
شلون اشوف واصورلج
تشوف والله لاتصير خبيث
يله هسه ادزلج انوب
دزلي مغض طالع لسانه ضحكت عليه وعلى علاقتنا عبالك جهال راد ادزها
دلفري
مروان
وجع غيرر جعت
ترى ما ادز
دزي عمي دزي صدك شتدزين!؟
ضحكت ورحت اختاريت صوره حلوه بس شفايفي وركبتي مبينات وشعري صفح نازل وحافات الفستان اسود ويه البياض رسلتها گبل شافها وكتب
يابه الثكل وين راح
جعت وأكلته.
ههههه أكول هيج حلوه طلعتي عليمن ضامه روحج وتستحين
استحي منك
ما اتحمل ترى
عليك الله حلوه
ضامه نفسسج وتعززين علينا بهل الصوره ومفاجأه وغمض عيونك وكمت وتعبت نفسي وشغلت الضوه واصور وادز بالاخير صوره مكطومه منو عاسلج ولج رأسج كارطته الفاره لو شنو سالفته بالضبط
مروان شدعوه كمت تصنف وگته هسه
ليش دازه نص صوره هسه اني ششفت علمود اكولج حلوه ما شايف شفايف ما شايف شعر
صدك تحجي زعلتني والله
أنجبي
اي مو كلامك يقهر.
اي مو حقي شدازتلي أنتِ
بعد ما أدز
لو ادزين وجهج كامل لو لا ادزين احسسن
هاا
اي
كمت أخذت صوره لخصري بالفستان ودزيتها
گمر ويضوي بدون وجه
عابت
لجهرتج الزفره ووجهج وينه كاصينه لو ميساعد مروان يشوفه
ضامته الك
خل اشوفه هسه
ما
اني هم بعد ادزلج نص وجهي بس شورابي
عزاا ههههه
وجع بس انتِ لعد ادزيلي نص وجه لو عورا لو حوله لو مشوهه
ولا وحده والله الكمال لله اني كامله
هاا يعني هذا الخصر والرگبه والشفايف والشعر أنتِ
أي.
يعني مو من الأنترنت
لا والله وغلاتك
شنو اليضمن صدقج
كيفك لاتصدك
أتصل وأشوف بعيني
مروان
راح أتصل دوختيني لج الله ياخذج يله دجاوبي عوفيلي الثكل هسه
بس ما تطول
خل اشوفج واقرر اروح لو ابقى وياج للصبح
كمت شفت الوضع وأتصل فتحت كاميرا بس رگبتي وشفايفي وشعري نازل وهو مرتاج على حافة الجربايه ضل صافن شبيك
شو بله احجي
مروان شسالفه ترى اني مو لعابه والله حقيقية
شفايفج لاتحركيهن خررررب أنه اشتعلوووووا
شبيك مروان.
هسه اسمي ليش صار حلوووو
وأنت شبيك صرت عصبي
قربي الكاميرا
قربتها
بعد لج بعد
كافي مروان
لاعبه بهين لو طبيعيات
لا طبيعي
با? خلقة الله كامله مكمله بس لو اشوف عيونج وخشمج ادري تحركييين بيه ليششش شلقضيه هبه
يحجي وأنفعل بس اكثر شيء حركاته صافن ودايخ عدل كعدته وشمر المخده
احتريت حظ الكواد الغرفه صارت حمام عوزها بس أنتِ.
غلست على كلامه ورفعت خصلات شعري وهو عاكد الحواجب ومصغر عيونه ويباو? بكل تركيز كام يگلب بالمجر طلع جگاره وكام يدخن وينفخ على الشاشه حجه بصوت ناصي ومبحوح
هبه
هاا مروان
گومي شوفيني خصرج بداعتي
ما
لاتكولين ما حلكج لاتعوجينه لا اجي اني اعدله بطريقتي الخاصه اتفنن بي اخ اشتعلووووو نعله على الخلفوك مرووووان
صوتك عزااا
انوب عزاا اني بما انسطرت يله هبه
شنو
گومي شوفيني خصرج يله
ما اكدر
هيج صارت
يله لازم اروح.
سالمين يابه وين تروحين
مو كتلك ما تطول
گتلج اني أقرر
بس ما اكدر اكثر
هبه حجايتي ماتنكسسر فاهمه
مروان افهمنييي قابل بيدي
ديله روحي
ما تزعل
گتلج روحي لاتلحين
شگله عصب بس شنو داكها صفنه على? شگلي يله باي.
باي قطعت الخط وحسيته زعل مني عفته على راحته على شنو يزعل طلباته تعجيزيه وما اعرف حسيته أستخف من شافني اني هم ما اعرف شصارلي تهورت ودزيتله صوري أكيد هسه ياخذ عني نظره مو حلوه وبالأخص من گالي والثگل وين راح أشسويت أني.
بقيت بقلق وحزن في أن واحد مقهوره لن ما نفذت طلبه وزعل حسيته انسان متملك شنو يريد لازم يتنفذ والا يزعل ويسحب روحه مُباشرةً وأكثر شيء اكرهه هو التحكم والتقيد بالعلاقه ليش هو اكو علاقه هذا وهم عايشه بي لوحدي هو معتبرني صديقه وبسس
وعافني وشي مأكد راح الها هي القانون الثابت بحياته هي الراحه العظيمه هي الحب الوحيد بحياته أني شنو.
ضليت أكل بروحي وأهمش بيها بكثرة الافكار ترطن برأسي وما حسيت بالأيام شلون مرت وصارله أسبو? ضبط ما راسل ولا مهتملي ولا گالي وينج شلونج أبتعد واني هم عندي عزة نفسس وما سألت عنه على الرغم أشتاقله هواي وگلبي مشتعل بنار على غيابه وفقدان صوته وتسلسل كلماته مثل الانغام تستقر بثنايا روحي
تجرأت ودزيتله شلونك مر وقت هواي وما يفتحها على الرغم متواجد وفاتح نت رجعت دزيتله شبيك زعلت على شيء تافهه فتحها وجاوب.
مروان منو زعلان عليج فد قندره أنتِ
أسيل أخلاقك هاي مشكور ما قصرت
وين موليه
شعندي باقيه
ليش صداقتنا مو مهمه عندچ
أنتَ گلتها صداقه يعني يجي يوم وتنتهي الصداقه ما الها دوام
غلطانه هذا الشي بقاموسج مو بقاموسي أني أقدس علاقات الصداقه
روح الله وياك وياريت تحذف صوري من جهازك اني بنت أخاف على نفسسي ولحظه تسر? ودزيتهن الك وتندمت اتمنى ما ترفضلي هالطلب
ما احذف ولا صوره
ليش محتفظ بيهن.
اي طبعاً
لا عفيه
ليش خايفه.
مروان امسسحهن فدوه
گتلج ما أمسح ولا صوره
ليش هيج تسسوي حرام عليك
تعالي لج اذا ما عندج ثقه بيه شگو دازتلي صورج
مو قصدي هيج بس.
لا قصدج وقصدج واضح جداً بس أنتِ ما عندج ثقه بنفسج مو بس بيه ومره ثانيه ما تثقين لا ادزين وبعدين تكومين تلطمين ترى سالفه خايسسسسه وتلعب ستين نفسس وما جنت متوقع منج تشگين بيه وعقلج الوسخ يكوم يفسرلج أفكارج الوسخه هاي عود وثقت وامنت بيج وحاسبج اعز من أخت وشاركت وياج كل تفاصيلي وكل ذره بحياتي وبالاخير تكوليلي أمسح صوري من جهازك.
مروان شافها وما رد عليه سحبت نفسسسي وحيل انقهرت حسيت روحي ظلمته وقسيت عليه بهل التصرف المفروض هو أكثر شخص اثق بي اني وياه دم واحد شبيه كمت اخربط امداني اي والله من اشتياقي اله كمت الهلوس بالكلام والوص طاح حظي گبر اسيل گبر.
أسيا
كاعده يم الباب لن كرم تعبني يريد يطلع وأسمع صوتهم بالصالة وعمتي تحجي على عصام
وصال كوم أفتح الباب لمرتك وجهالك كرم يريد يطلع كسر الباب خو أنت ما قصرت وياها.
أسيا كمت للغرفه لن سمعت صوت المفتاح وصوته بالصاله يحجي ويه كرم طلعت جود من السرير خليتها بحضني وهو دخل شمر الحزام على الجربايه بصفي ودخل غسل وطلع ينشف بوجهه.
عصام نومي بنتج وگومي صبيلنا الغده نتسممم سمممتنا الله يسمجن ولاتضلين مبوزه وگالبه خلقتج ترى أنتِ مذنبه
أسيا ما جاوبته شمر الخاولي على وجهي وركع الباب وراه بقوه رجعتها نايمه ولبست شالي ولحكته واكف هو ومروان يحجون بينهم واسمع مروان يگوله
مروان شعندك ويه رششا وصحيح كلام أزهار عندك علاقه بيها وتعرف من زمان وساگت.
عصام وأنت صدگتها شبيه تخبلت على عمري حجيت هيج ردت اخوفها واتأكد من البالي ورششا خابرتني بوكتها
منين جابت رقمك هالساقطه
ما اعرف منين محصله رقمي يمكن من ازهار ماخذته
وشحجت هالادبسزز
گالتلي أنه هشام حبيبها السابق وكعدت تحجيلي على أزهار وكالتلي ديروا بالكم منها وأنت بالاخص عينك عليها يعني لمحتلي بس للامانه ما حجتلي بالوضوح وحظرتها
اي.
أي اجذب عليك اذا گتلك ما شگيت لا شگيت وما اجه ابالي بس هشام لن رششا شجابرها تگولي هشام جان حبيبي السابق وكعدت تشگيلي من علاقتهم ومعاملته وياها شنو اللي خلاها تختارني وتكعد تسولف وياي
حيه من جوه تبن تسلع على الخفيف خلت الشگ برأسك وكالت الباقي هو يتصرف
أي واضحه النيه
يله امشيي نتغدا والله كريم ابويه وين راح
راحلها تتوقع يضربها
لا ابويه ما يضرب ولا عمره ضرب احد من عدنا بس يحجي كلام وتصرف لو يضرب اشرف.
خل يشوف الدلال مالته وين وصلنا ليا نقطه
أسيا اجو كعدوا وصبيت التمن وخليته كدامهم واجه عمي مزعوج كعد ولازم رأسه وعمتي وراه كعدت واني كملت صب الغده والخضروات والماي كعدت بصفه وكرم بصفي أوكل بي وعمتي باوعتلي وكالت
وصال أسسيا شبيها ايدج
أسيا عصام عضني گلتها ومروان أختنك وعصام ضغط على رجلي بقوه عاد عمي حجه بعصبيه.
كمال مرتك شعليها ليش هيج مشوه وجهه أني كم مره منبه عليك ضرب ما تضرب الضرب لحيوانات متكوليلي أنتَ شنو من جنس مخلوق أختك قاضي على حياتها شبيك أنتَ متعرف تتعامل ويه المشگله بالكلام گلشي بالضرب والعياط وخبال الزايد اشسويت هسسه حليت المشكله لا لكيت الها حل هم لا احجي أشسويت
عصام ربيتها من جديد
كمال والتربيه بالضرب هاا باشا.
تدللت زايد وأستهترت وشافت نفسسها صح وشتريد اسويلها اصفكلها مثلاً لو اشجعها واني اشوفها ضاربه العرض والشرف والقيم العائليه والعادات والتقاليد عرض الحايط وما سأله عن أحد.
تعال عليه ونكعد ونحجي كلنا بس مو تضرب مرتك وانوب أختك وتعيط بوجه امك
هذا العندي.
وهذا هو وازهار محد عليه بيها تبقى بغرفتج وطولها ما اريد اشوفه كدامي وتنسد سالفتها وما تجيبون طاري لاي مخلوق حتى عمكم فاضل نهائيا وصال اسيا بابا ميحتاج اكد عليج لن واثق منج واعرفج شكثر تحبين بنتي
أسيا من عيوني الاثنين عمو
كمال سالمه عيونج عمي والله يرضى عليج
عصام ووظيفه وتلفون ماكو بعد بالحلم متشوفهن بعد كافي دللنها زايد عن حقها كافي عليها كعدة البيت لما يجي مكسور رگبه وأسترها.
أسيا سگتوا وسدوا الموضوع ورن تلفون عصام شاله وكام راح يحجي بعيد شوي واجه وگال لعمي
عصام حارث خابرني ويگول لازم تحضرون
كمال اي اعرف علوان خابرنا الصبح عود حضروا نفسكم نروحلهم وعمكم فاضل هم يروح ويانا
مروان على وين خير شعدهم
عصام جايين مشايه على أسيل وگال لازم تكونون موجودين عمام البنيه
وصال خطابه على أسيل كمال شنو هالحجي الاسمعه أسيل اني اريدها اني مو حجيت وياك عليها
كمال خل البنيه تمشي بقسمتها يا مره.
عصام ليش خير يمه شسوين بيها المن رايدتها.
وصال ردتها لأخوك مروان هاا مروان يمه شتگول والله دره تنحط بالگلب ذهب صافي
مروان شگول يعني تعرفين رأيي ليش تسألين وبعدين گايلكم زواج شلون ماجان ما اتزوج وبالاخص من الكرايب ف ما اكول غير الله يسعدها بقسمتها
ودام فتحتوا موضوع الزواج وتردين أتزوج اي ميخالف اني احب وحده ورايدها لزواج ولو الوقت مو مناسب بس اخليكم بالصوره.
كمال خير أن شاء الله مو گتلج ما يرضى بيها الافندي بابا هاي مو من نسوانه فقيره ما تعيش عنده نازوكي حضرة جنابه الموقر
مروان نازوكي شنو هاي أنوب ترئ واكفه بس مقبوله منك سيادتك
كمال هسه ما علينا منين هاي البنيه من يا عمام يا عشيره نمشيلك عليها
مروان تعرفها انت بنت المسؤول...
كمال كل عقلك
مروان اي ليش.
عصام بابا انت وين ماخذ عمرك عمي دترضي بقسمتك اسيل ورده مالت الله عليها لسان وملكى وخلقه علمود اذا تريدها ابن عمها وتنهي عليها ونزوجكم ونفرح بيكم
مروان والله هذا زواج مو لعب جهال اتزوجها ونضل يوميه مشاكل ما متفاهمين
عصام شقصدك
مروان ما قصدي شي ليش تحسست وبعدين هيج عاجبتك ما تاخذها انت لو ضاله بنفسك من ريحة الحبايب
عصام مروان احترم نفسسك ولاتغلط وتجاوز حدودك وياي.
كمال خلص فضونا مو وكت معارك بينكم ما نخلص احنه شو كعدوا يله
أسيا كعدوا بس على اعصابهم بالاخص عصام كوه كاعد وساكت ومتحمل ومروان زاد بالحجي وياه وحسيته ما احترمه ورجع عمي يحجي? عمتي
كمال كله منج مو گتلج ولدج مو مال هيج نسوان فقره ما ينعاش وياهم هذن ما يلگن خبزه عدهم ولدج مال نسوان وكحات وعرامات هيج يله يكدرن يعيشن وياهم.
وأنت سالفة البنيه تشيلها من رأسك واذا عندك خط تواصل وياها تكطعها وما تگرب صوبها احنه من طريق وهما من طريق
مروان ليش شبيها شو معرفه وتعرفهم بعد شگوو
كمال خلص گلت العندي زواج من هالبنيه ماكو لو تلطخ راسك بمية حايط وهذا العندي والما عاجبه كلامي طبه مرض لن الظاهر انتوا مو مال احترامات وتقدير كلمن يتصرف بحياته ويضرب من رأسه ولا كأن اني موجود
أسيا كام عمي مزعوج ورجع وجه الهم الكلام.
كمال حضروا نفسكم نروح لبيت عمكم وصال أنتِ هم تجين ويانا عصام الحكني عندي سالفه وياك.
اسيا راح عمي وعصام باوع على مروان ورجع باوعلي وشال تلفونه ومشه ولاحظت تلفون ازهار بجيبه موجود
لازم اخذه منه شعنده مبقي عنده زايده منه وعيب عليه اذا فتحه وشاف المحادثات كلها.
وصال واني شعندي رايحه وياكم
مروان سألي رجلج.!