رواية بين قلبها وعينيها كبرياء للكاتبة شمس العراقية الفصل التاسع والعشرون
سكوتي بأول الصَدمة
لأن تَعبان مو راضي
ينشدوني اليعرفونَي
شصاير بيك؟
متغير؟
وشو ضَعفان؟
ما رَديت
علي كل السأل ضَليت متغاضي
وحقي أسكت
صَعب تتخيل المَر بيك چَن ما صار
كل العِشته على الفاضي!
بعدها بفتره تستوعِب
الصاير مو حِلم، واقِع
جِزء من عندك يصدگ
جزء بالصار ما قانِع
وهيچ تكمل بجزئين
چَنك جامَه مَثلومه
جزء رايد ينام إسبوع
جزء مِستصعب النومَه
واحد ضَد الآخر صار
بَس واحد يگل للثاني ما ألومَه.
أسيل بقيت مصدومه برسالته وجرائته وصافنه على التلفون ومشيت اكو شباك مطل على البرى وكفت وسحبت البرده وشفته كاعد على الكرسي ومغمض عيونه نايم الأخ اخذني الواهس ضليت أباوعله وسارحه بوسامته شلون واحد مثلك يكون هلكد قاسي وما عنده رحمه مصدومه بيك انت نفسك مروان ابن عمي لو اللي صار بينا خلاك تتغير وتصير انسان ثاني وكام وصارت عينه ناحيتي كبل رديتها سريع وبخوف ورجعت سريع كعدت ودزلي رساله.
مروان شفتج وين تنهزمين مني وراج وراج الا الزمج!
أسيل ما جاوبته گبل حذفتها ورجعت تلفوني بالجنطه وأرتفعت اصوات الهلاهل وكلهن لبسن عبايات وشالات وتسترن واني ضليت يربي شلون سالفه عوجه شكول عليج يمه عمتي وصال شافتني واجتي عليه
وصال تعالي وياي
أسيل مشيت وياها ودخلتني غرفتها تخبل غرفة عروس مو مثلها فتحت الكنتور وطلعت عبايه خليجيه وشال تسلمين عمه
وصال أنتِ مثل بنيتي يله لبسيهن.
أسيل لبستهن وهي صافنه بوجهي وتسترت بيهن وطلعت وراها وشافتني اسماء غمزتلي ما يدرن شبعت قهر لن امي ما اهتمتلي ولا كالت بنتي ما مستره وعبايه ناسيتها حسيتها متقصده تعرضني لمروان احتقرت الموقف وگفت بصف البنات.
الكل يصفك وهلاهل شالت البيت شيل وبنات عمي فاضل شايلات سلات ورد جوري احمر واكفات ودخل العريس وتقدم على ازهار لابسه فستان يجنن مفصل على خصرها ناعم وتفاصيله راقيه وفخمه وفاتحه شعرها على طوله ولابسه عقد شذر حبيت تفاصيلها النازكه گلشي بالحفله واو ودرجه اولى.
وكفوا بصف بعض طلعوا يخبلون زوجها كلش حلو وشخصيه مبين عليه واحد بوجه الثاني ومبتسمين وناسين الكل باسها صديت وجهي عن هل اللقطات او بالاحرى اللي صارلي خلاني أكرهه كل العلاقات الحب بسببه كرهت حتى الزواج سوالي عقد نفسيه مو بس عقده منه.
أستمرت الحفله على اصولها والرقي والعرسان رايحين بعالم ثاني عيونهم تحاجي بعض ومن خلال الكلام البنات عرفت علاقة حب هي وياه دعيت ربي يسعدهم بهل الاثناءاسيا شمرت عليهم ورد وفزوا والكل يضحك واشتغلت الموسيقى اغاني حب.
صارت فقره الصور والمصوره تاخذلهم لقطات وكومه اخذوا صور وازهار ثلاث مرات غيرت فستانها كله فصوص ذهبي وهو بس صافن عليها رغم لايگين البعض بس ازهار غير جمالها فتنه طالعه واوا تحفه فنيه مصبوبه صب بكل تفاصيلها النازكه.
ولبسوا الحلقات ويضحكون وباسها من ايدها وكصتها وحضنها دمعت عيني على جمالهم.
واكلوا كيك وعصائر وصار وقت الاكل الكل راحوا على البوفي ياكلون بس اني بقيت بمكاني ولوحدي بعيايتي بقيت لابستها وشفت امي طلعت واشرتلي ولحكتها وجنطتي بيدي لكيتهم واكفين هديل موجوده هسه يله جايه ومروان واكف ويه حارث بعد مسافه واللي فهمته نسرين متخربطه لن حامل وحسن حاير بيها جنت واكفه بظهر امي وحيل ارتاحيت بالعبايه مستوره بلكي اخلص من لسانه
عاد امي كالت.
جنان اني اروح ويه اخوج حارث على مرت اخوج وأنتِ ضلي ويه اختج هديل وبالرجعه شوف شلون تصير.
أسيل مشت بعد مسافه مروان شوي بعيد وگتلها خل اجي وياج وعاطت بيه الا مروان التفت علينا
جنان وين موليه وياي ارضعج قابل بكد البغل كعدي وسكتي مو هاي اختج اجت امشي ولي يم البنات اني صوجي صحتلج.
أسيل حيل تفشلت والموقف جان صعب وكلامها قاسي والغصه ما تنبلع مشت صعدت ويه حارث وهديل تسولف ويه مروان واني بقيت انتظرها وعلاقتها هي وياه تمام التمام اجتي تضحك وكالتله
هديل بعرسك الا اذب اللحم تدلل
مروان لعد دحضري روحج
هديل هاا على الخير لكيتها
مروان نگول اي
اسيل منطيتهم ظهري وتالي مشيت وصاحتني
هديل اسسيل
وجع شكوو تصيحين
شبيج انتظريني اوفوت وياج
شوكت تجين حضرتج اذا لطشتي سوالف وضحك.
انجبي عابت ابن عمي قابل غريب
واذا ابن عمج أنتِ متزوجه
شبيج أنتِ بابا ابن عمي وهو حباب ومن دور علاقتي بعصام اني وياه صداقه ما تذكرين من جان يخبث عليه اني وعصام لو يطفي الرواتر لو يسولنا تاك بالتعليقات وينصب علينا
اي اذكر يله امشي
منو موجود
الكل عينج وما مدت كرايبنا كلهن
وشلون الكشخه.
كلهن فول الفول بس اسسيا طغت عليهن كلهن عرفت من البنات يسولفن بينهم عصام موصيلها من الخارج لو تشوفي يجنن ولج ياخذ العقل وازهار ثلاق مرات غيرت فستانها واحد احلى من الثاني
يله امشي خل نشوف حمستيني أشوفهن
يله مشينا ودخلنا اني وياها وتقدمت اسسيا تهلي ما تعرفها هي هديل
هديل هاي الصاروخ مني
اسيل هاي اسيا زوجة عصام تغيرت ملامحها واسيا تقدمت سلمت عليها وتهلي وترحب بيها عاد كالت
اسيا هلا عيني تفضلي اسيل مو.
اسيل اني اسيل وهاي اختي هديل
أسيا هديل أهلاً اتفضلي.
اسيل بهتت ملامحها وحاولت تبين طبيعيه بس تغيرت 180 درجه وهديل تقدمت تبارك ل ازهار وبوس ومحاضن وعمتي وصال واسيا صدت وجهه حسيتها صارت نار وتشتعل حتّى وجهه صار لهيب.
وكفت بعد مسافه مو هلكد عندي علاقه بالبنات بس بالمناسبات نلتقي عاد مر وقت وأهل العريس ترخصوا ولازم يرحون واللي حبيته ازهار عمتي جابت الها عبايه عريضه لبستها وشال تسترت بشكل وطلعت وياهم لسيارات هي وعمتي واسيا وهديل طلعت وجرتني وراها وكفنا وتعلق على العريس وتحجي
هديل مو من مستوى بيت عمي ما اعرف حسيتهم ما لايكين البعض.
أسيل ليش شبيهم يخبلون باعيهم شكد لايكين لبعض باوعتلهم وصفنت عليهم وكفوا بعد مسافه وهي حاضنته من ايده وتضحك وضحكتها تجنن ويسولفون وهديل ما عجبني كلامها
هديل اروح اشوف جهالي
أسيل ماشي راحت سمعت تلفوني يرن فتحته مروان يتصل رفعت راسي وشفته كاعد بالسياره وعينه متصوبه ناحيتي وكفت بصف الحايط وجاوبته هاا
مروان وجعا التوجعج وين صافنه ادبسزز
أسيل أستغفر الله شهل الحجي هسه.
دخلي جوه ونتحاسب بعدين على هاي نظراتج اصبريلي.
يا نظرات شبيك أنت
يا نظرات مو والله أنتِ اعرف خبره بالنظرات وباقي السوالف هم لن ما شاءلله خاتمتهن على ايدج.
دتطير بابا قطعت الخط بوجهه وذب كلامه مثل السم واهل العريس راحوا وأزهار وعمتي واسيا اجو واني دخلت جوه وبقيت كاعده واسيا وازهار بس دخلن من الباب وكامن يهزن تكابلن اثنيهن وركصهن يخبل والتمت كل البنات حول ازهار واسيا وبدأت الحفله على أصولها ماكو وحده كاعده كلهن ذبن عبايات ويركصن حتّى اسماء وهديل بس اني الوحيده ما تحركت من مكاني وعمتي طلبت مني تعذرت منها
وصال ليش يا امي كلهن يركصن بس أنتِ كاعده.
اسيل ما اعرف
تتعلمين كومي يله
لا فدوه عمه خليني باستني وراحت وين اركص اني طلعت وكلب الدنيا على راسي وراي حساب عظيم
الله يدري شبدع بيه دمرت نفسي بإيديه.
صافنه عليهن ازهار ركصها يجنن ذبن لحم بالساعتين يركصن واني ضاله بس أباوعلهن كعدن اخذت استراحه وازهار تسولف ويه هديل واسسيا معصبه ومشت مزعوجه لغرفتها حسيتها تحسست.
، مر وقت والكل راحوا ضلينا بس اني وهديل وبنات عمي فاضل وامهم وعمتي زينب واسماء راحت تخابر حارث واني كاعده ورهف بحضني نايمه ودخل عبر من يمي وخزرني بغضب ضليت أباوعله بنص عينه لن بس أرضخه ينجلب عليه صعد فوك ومن يمشي نظراته ناحيتي فتح الباب غرفته ودخل وشوي ودزلي
مروان بصلافتج وعيونج ما شايف
أسيل ما جاوبته تجاهلته وصارت دنيا الليل واخواني ما اجو ودخل عصام بدون سلام مدنك راسه بس باوع على اسيا وكال.
عصام أسسيا تعالي
أسيا اجيت حبيبي.
أسيل اشويه وطلع بيده ظرف ويمشي سريع عبر من يم هديل وهي هم بسلامتها وكفتها غلط واسيا تريد تاكلها عاد عمتي وصال تقربت سحبت أسيا على صفحه غمزت لهديل واجتي كعدت يمي
هديل شگو شبيج
أسيل ليش واكفه يم الباب
شعليج أنتِ قابل ممنوع وبعدين أنتظر حارث اريد اروح تأخرت ليش شگو
هيج ماكو شيء
اذا علمود عصام ترى ماله داعي هالحجي بعد اني العفته لا تسمعيني كلام يغث وتسمميني بهل الجيه.
لا شعليه
اي عبالي مثل اسماء بس دخل وكالتلي شوفي حبيبج اجه شكد طايحة حظ حتّى هو سمعها فشلتني منه لو ادري فلا جايه فد خلتني بموقف سخيف انوب مرته انكلبت عتوي عليه.
اي تغار هواي وحقها زوجها
واني شكو تغار مني ترة تزوجت وعفته الها وعيب هالتصرفات اكوم اشوف حارث واولي اشرفلي.
كامت مزعوجه ونزل مروان وسأل على هديل وباوعلي وكال
مروان اختج وين
أسيل طلعت تخابر حارث يجي
مروان هو خابرني اني اوصلكم يله امشوا.
أسيل هزيت راسي واسماء شالت رهف ورحت سلمت على عمتي عمه العبايه باجر ادزها الج عادي
وصال عادي يروح عمتج اخذيها مني الج أصلاً طالعه من كلبج فدوة لهل الوجه تعالي انطيني بوسه
اسيل تقدمت تبوس بيه ومروان صاح
مروان ديله عاد وگت بوس هسه.
وصال شعليك أنت وليش وين ما يرحون يضلن على العشه
مروان حارث ما يقبل وجهاله تعبوا مرته تريد تروح حجيت وياه ما اقتنع
أسيل حسيته يجذب لن يريدني اروح علمود يرزلني.
ودعتهن وطلعت وراه اني واسماء وهديل مزعوجه وشفنا عصام يخابر بعيد ويفتر وهديل باوعتله نظره خطف ما ادري ليش حسيت أختي كلما تشوفه تتخربط كل احوالها يمكن لن أول حب وحبهم جان حلو وخطوبه وعاشوا هواي تفاصيل بينهم وهدايا وطلعات وهذن ضالات ابالها ف من تشوفه يضلن ينغزن بگلبها والله اعلم مافي القلوب.
هديل صعدت ليكدام وليش ما اسماء تصعد ورا هديل واني خلني وراه ساعة السوده على هالسالفه المصخمه مثل وجهي صعدت ومن الخوف انضربت بالحافه براسي وهديل ففزت عليه
هديل ولج خوما تأذيتي شجاج غير تنتبهين
اسيل لا عادي ما بيه شيء كتمت الوجع يا ما بيه شيء راسي انفشك بالنص شغل وطلعنا هديل كالته
هديل وصلني لبيتي
مروان ليش مو بيت أهلج
هديل لا ما اكدر لازم ارجع بيتي عمتي مريضه
مروان ماشي.
اسماء واني هم عفيه مروان جهالي ناموا كلهم
مروان ان شاءالله
اسيل باوعلي بالمرايا بنظرات متحلفلي نزلت راسي خوما يوصلهن واضل وياه لوحدي يمه صخام والله افتح الباب واشمر روحي من السياره.
وصل هديل لبيتها وشغل وصل اسماء وردت انزل وصاح عليه
مروان رجعي وين موليه
اسيل انزل اضل يمها بينما يجي حارث ويرجعني
مروان لا ماكو تبقين يمي رجعي يله
اسيل بسس شغل السياره ورجلي بالكاع
اسحكها واسكطج والله اسويها.
صعدت لن خفت منه يسويها لن كلامه بثقه وعصبيه عارمه واسماء اجتي وكالت
اسماء وصلها للبيت عمي علوان موجود ينتظرها
مروان ماشي.
اسيل اسماء غمزتلي استغفرالله عاد ما اخلص منها شدتلي شلون موقف والله يسلطها عليه شغل واثنينا بمكان لوحدنا وهدوء بس دگات گلبي تبض بكل سرعتها شبيه اني وليش اخاف هو هم مشترك بالغلط ليش بس اني محملني الذنب.
مروان رفعي راسج شكو محدبه عود تستحين وكاتلج الخجل انهجم بيت الباميه شكد تغث وتنفخ
اسيل باوعت على الشارع وگال
راح اجي اخطبج وتوافقين ورجلج فوك راسج وأنتِ الممنونه تصيرين من نسواني
ما حجيت
ما تحجين عيني سمعينا صوتج الانثوي الرقه والاحساس لو بس شاطره على التلفون تبدعين
وصىلني وخلصني ماله داعي كلامك.
اي تامرين تدللين أنتِ، اكول ليش ما تأكلين شايفه اذا الزمج شسوي بيج اخ لو توكعين بيدي ساعه وحده شبدع بيچ، بس هانت ما ضل شيء تجين يمي واني اعلمج
مروان گافي
على أسمي
نزلت دمعتي مسحتها عالسريع وگال
بظرف شهر اخلص گلشي وگتها يصير خير
ما جاوبته وكفت السياره ونزلت وگال.
حتّى امي عرفتج ما مستوره وسترتج من الخارج بس ما تدري بداخلج شمسويه وشعامله بروحج ترخصين بروحج خلف الكيبورد وبالواقع نفس الشي هيج رخص ما شايف بحياتي ويگتلني القهر مني وبيه
نزلي نزل عليج ملك الموت وقبض روحج.
باوعتله ودمعتي على خدي الله يسمع من حلگك وانت هم وياي على الواهس شگو ضال لوحدك ركعت الباب ومشيت سريع وتلفوني بيدي واتعثر وهو واكف فتحت الباب من السيم ودخلت وركعته بكل قوتي نزعت الكعب وركضت صعدت فوك ذبيت روحي على السرير وبجيت متت من البجي طلعت روحي لميت نفسي وحضنتها وكلامه يرن بمسامعي هيج رخص ما شايف امي عرفتج ما مستوره وسترتج اخ يمه اخ جنت متوقعه اسمع منه هالكلام.
مضى وقت كمت سبحت وصفنت على وجهي بالمرايا صاير كركم خلف الله على المكياج جان ساتر عليه وفزيت على صوت أمي تصيحيني.
جنان أسيل اجيتي
اسيل اي اجيت
منو جابج
مروان وصلنا
هاا
نسرين شلون صارت
زينه اخذتها يم اهلها تضل ترتاح يله نزلي تعشي حارث جاب عشه اله والنا مشويات
ما اريد ما جوعانه ويني وين مشويات مو بهريز
شمدريني نسيت كيفج لعد اروح اعشي ابوج خطيه
ماشي رجعت غرفتي وفتحت تلفوني لكيته دازلي واتساب.
مروان شلون تمشين بعدني ما مكمل كلامي يعني حتّى أحترامات ما عندج مصفره من كلهن.
اسيل هواي جفص بطني وسكتتله الى متى اضل تحت سلطته ولسانه الوسخ انقهرت حيل وكتبت اله على السريع
مروات مو عبالك هواي شفت روحك عليه كأنما أنتَ المسؤول عني ولي أمري وتحاسبني وتتحكم بيه
هو اني المسؤول عنج وولي امرج لعد منو.
عندي أهل بابا وماما موجودين وأخواني حارث وحسن هما الوحيديهن المسؤولين عني، انت منو؟ حتى تتحكم بيه وتحاسبني وكل هذا وأني ساكته الك لن ابن عمي ومحترمتك بس لهنا وكافي الزمك حدودك وراجع نفسك وحاسبها قبل لاتجي عليه.
كلامج مال وحده ما خايفه من احد صفله مو بيدج وبعدين أهلج كومه ما كدروا الج بلكي اني أكدرلج واكسر راسج وحدودي اعرفها كلش زين ولازمها ومحترم نفسي من يوم يومي ما متجاوز على احد واعرف بنفسي يمتى اغلط ويمتى أحترم ولاتنسين أنتِ اجيتني برجليج وسحلتي نفسسج بالقندره اجيتني مرخصه روحج وبايعتها من زمان وكل الخيارات مباحه عندج شتردين مني اسويلج
أني من اجيتك جنت احبك من زمان وساعة السوده الحبيتك بيها.
تحبيني على عيني و?اسي بس برايج هذا حب شريف اليحب يحترم ويستر روحه هواي اكو طرق تعبرين بيها عن حبج اليه غير اللي اجيتني بيهن؟
أنتَ لحيت عليه
لحيت عليج بشنو؟ أنتِ من الاول أنطيتني مجال وفاتحتلي الباب لو تحبيني مثلما تكولين حضرتج
لو بوسط جيوش من الزلم تبقين صاينه نفسج بعز وشرف لن أنتِ شريفه وحبج الشريف واخلاصج اليه ولحبي ما يسمحلج ترخصين روحج بهل الشكل بس هذا مو حب ولا يم الحب أصلاً متوهمه.
الحب شيء مقدس لاتشوهينه بنظريتج وقذارتج وأفكارج المنحرفه منفصله وأهلي ما عندي بس أخويه وعمري ثلاثين سنه وأنتِ عمرج ما يتجاوز 17 سنه اذن أنتِ خبره بهيج مواضيع وتعرفين العمر الثلاثين مرغوب واذا كانت منفصله الوضع يصير اسهل وتمهدين الطريق شوهتي سمعة المنفصله بنظريتج الخايسه والمنفصله تاج رأسج يا ادبسزز.
هواي أمور عندج ما جاي اهضمها وداخله بمستنقع قذر ولمن ردتي تطلعين وكعتي بيدي وتردين مني اسكتلج وما احاسبج والله صلافه
مروان خل احجيلك
لاتحجين ولا حرف وترى ادري انت اللي حبيبتي تعاركت وياج وصارت بينا مشكله ومرتين دخلتي عليه من الحسابات مجهوله.
لا مو أني
لا أنتِ كذب لاتكذبين سحلتي روحج من اولها ونزعتي من اخرها من كمتي ادزيلي صور مغريه مفتنه وتعال مروان احترم نفسك ولا تغلط
بس أنتَ طلبت تشوفني.
طلبت اشوفج صح ما ناكر هالشيء بس ما گتلج دزيلي صورج بهل الشكل؟ أذن هذا اختصاصج قبلي يعني جنتي ادزين صورج لغيري بهل الطريقه
لا والله بس أنتَ
بس أني لا واضح هواي من شفايفج المخططتهن وراسمتهن ومبدعه بيهن بالحمره لون احمر لون الاغراء وشعرج مسشورته وناثرته وركبتج مطلعتها وفتحه صدرج ظاهره بشكل مفتن هذن شنو وشيسموهن؟
ما جاي تفهمني ولا تنطيني مجال أحجيلك؟
شفهم ما بيج شيء ما مفهوم أنتِ مصيبه بكل سلاستنا واذا تضلين هيج اطمسين رؤسنا بالوحل عذرج اقبح من فعلج صلافتج وكواة عينج فضيعه
أي عذر ما عندج الشريفه والمربايه تربيه صحيحه ما تحب هيج ولاتنزل لهل المستوى من الانحطاط والرذيله اللي سويتي ما ينغفر سالفتج جبيره تدرين.
وجايه تكوليلي ليش تتحكم بيه وتحاسبني يعني أنتِ غلطتي وغلطج جبير شتردين أسويلج اعوفج براحتج لو اكمل وياج على نفس المنوال واكود على عرضي وشرفي هاا شتردين؟
ما أريد گلشي بس عوفني بحالي والله اعرف بنفسي غلطت وغلطي جبير وانت هم مشترك بهل الغلط.
كوليلي شتردين علمود اعرف علتج تردين رجال بحياتج اذا تردين ليش ما وافقتي وتزوجتي المحامي التقدملج اسم وجمال ومكانه وجاه وماده ووظيفه ما بي عيب يخليج ترفضينه سويتي سالفه وفشلتينا كدام الاوادم احجيلي علمود اوكع على اليوجعج شنو؟
ما جاوبته
ما عندج عذر والزواج يتم رضيتي او رفضتي؟
ما اتزوجك لو تمرغل روحك كدامي مستحيل يصير هالشيء بإحلامك.
مو على كيفج هي بعدين مو جنتي تركضين وراي تعال نتزوج واوعدني وعليك الله اكلتي راسي بالزواج
شعجب هسه تغير رأيج لوما ريحتج ومو نفس طلبج
أستغفر الله شهل الحجي شكد منحرف
الله بري منج ومن أفعالج ورأسج اذا ما يتكسر ما تصيىرين أدامي وزواجي منج مو لسواد عيونج بس اريد أربيج لن اذا تبقين وراج مصايب
ليش ما تحاسب نفسك بالاول يالشريف؟
جلدج يحكچ أنتِ بس سهله والخلقج ماكو أسهل منها حرامات بيت عمي علوان الطيب السمتعه مثل المسك أنتِ السكط بنته حرامات أنتِ أخت حارث.
ما جاوبته بس ابجي وهو راح بعد ما دزلي وبقيت أقرا بكل كلامه ماكو كلمه تنسي والله لو تمر أعوام كلامك يا مروان ما أنساه محفور بگلبي اليحبك...
أزهار فرحة العمر الما تنسي بيوم كل التفاصيل الاحبها موجوده بحفلتي ماما وأسيا ما قصروا گلشي على أتم وجه والحمدلله أخواني ما عارضوا ولا تدخلوا بعد بس اليقهرني انسحاب عصام وسگوته وانعزاله عن الكل حتّى عن عائلته مبتعد بشكل.
كاعده وأنتظره يجي خابرني گال بالطريق دقايق ونوصل كلش متحمسه وطايره من الفرح البنات يركصون والاغاني مولعه الجو والاناره عالم جنوني.
فز گلبي على أصوات السيارات ودقايق قليله دخل علينا بهيئته المعتاده والجماله السلب گلبي ونهبه من أول لقاء النا جان شاحن بالعصبيه والنظرات إلى جانت نهايتها خاتم بس من بعد مشاكل وأذيه وزعل
ماكو شي يجي بالساهل لازم ندفع ثمنه مقدما او مسبقاً الحياة ما تنطينها شيء بدون مقابل بنفس الوقت نكسب منها دروس ونتعلم.
. دخل علينا أنشرح صدري بشوفته نسيت الناس كلهم بس هو موجود تقدم واني مبتسمه ضل صافن واني صافنه وكسر الصمت من گال
هشام تأخذين العقل يالمأخذتني گلني
أزهار باسني من گصتي وخله راسه على?اسي عيونه بنص عيوني بنظرات مليانه حب وهيام وعشق جنوني وأستشعرت برجولته وهي تلمس أنحاء خصري من حاوطني بإيديه الاثنين
أعشقج زهرتي
أموت على الخلقك هشامي.
فزينا على صوت وخباثة أسيا وضحكنا اثنينا وكعدنا وايديه ملتفه على خصري صايره بحضني احجي ويه اسيا وهو رايح بعالم ثاني صافن عليه وين رحت
وين اروح ليش اني بعد اتحرك منا باقي يمكم حضريلي فراش اكابل هالحلو المغرور بس الفراغ البين عيونج والكبرياء المتشيخ بالساحه گافية عليه
اتشيخ عليك عادي
عادي يابه عادي وتشيخي على? عشيرتي كلهم من يرحولج فدوه.
خجلني أبتسمت ونظراته تموت وتنعش الروح.
أسيا عيني گافي حب لا تخلصونه كله بالخطوبه وراكم مشوار طويل بعدكم وينكم يله كومي سلمي على أهله عيب شفتي ابنهم ونسيتهم.
ازهار يااا هشام فشله
هشام عادي حبيبي كومي هسه.
ازهار كمت سلمت على الحجيه امه واخواته ثلاثتهن افراح وصبا وسجى وايمان كلش حبيتها حضتني وتبوس بي وتصلي على النبي
أيمان والله اخاف عليج تنحسدين ما شاءالله عليج.
ازهار حبيبتي مو بجمالج اتفضلوا كعدن والحجيه اخذتها كعدتها يمنا بصف هشام هاا خاله مرتاحه
الحجيه اني راحتي من راحة وليدي من اخذج فدوه لوجهج ربي يسعدكم ويحفظكم ويفرحني بيكم
ازهار ويخليج النا هشام مبتسم والفرح تارس صدره ومن ورا امه يباوعلي
هشام مكانج ليش تنطينا صرتي كريمه برأسي
ازهار عيب صير عاقل ضحك
هشام اتشاقه ولج معدله وبنت اوصول نيالي عليج.
ازهار حبيبي اجتي ايمان اخذتها يمها وصرت بصفه واجت فقرة العادات رجليه بنص الماي والورد والقران الكريم بيدي ولابسه البركع الابيض واسيا والمصوره يرتبن وهو بس يباوع ويحركن بي جيب ايدك ودي ايدك اسيا خبلته هي والمصوره.
ولازم نلبس الخواتم واسيا قبل بوقت انطت العلبه لاخته ايمان وتقدمت انطتها لهشام والمصوره اقترحت يحضني من ظهري ويلبسني ياها وحضني ولبسني الحلقه واني كذلك.
لبسني وكعدت واجت فقرة الصور وكومه اخذنا صور واحلى شيء اللقطات المقربه وجه لوجه وانفاسنا تختلط مع بعض روحي تصير بنص روحه وصور ايدينا بيد بعض وصور عائليه كذلك.
خلصت الحفله بين جميع تفاصيلها الجميله والمحببه لقلبي وصاروا لازم يرحون تقربن ودعني وكرايبهم كذلك باركوا النا وهو يعرفني عليهم.
طلعت وياه للسيارات وحاضني من خصري وهايم
بجمالي وتفاصيلي
هشام شلون أفاركج هسه والله صعبه على گلبي
ازهار لا مو صعبه.
لوتيه يله حبيبي اني هم وراي كومة شغل
تمام گلبي مشه وكوه يمشي يروح ويرجع اخر شي التفت وتقدم باسني من خدي يا هشام مروان بالسياره كبالنا
شسويله قابل بايك حلالي ما بسته وهو شعنده باقي بالبيت لو ابو بنات
لا ما ارضاها على مروان عفيه
يدلل حبيبي عمي نسحب كلامنا لازم عزيز عليج وتحبينه وهيج انفعلتي عليه
اي هو فدوه لعمره ولن بس لن ماكو احد لازم يضل واحد منهم
هاا فهمت يله حبيبي هسه اكدر اروح انتعشت.
ضحكت وسحب ايده وراح بس عيونه ونظراته تلاحقني ودعتهم وراح الله وياه ورجعنا وابتدت الحفله على أصولها واني واسيا بدعنا تبدع بالرقص وبنات عمامي ما قصرن جانت حفله تجنن بكلشي
وانتهت بوقت ما حسينا بي.
واكفه كدام المرايا واجت اسيا تساعدني تنزعلي الماشات بس وجهه ما عجبني شبيج
اسيا تعاركنا اني واخوج
ازهار يااا ليش يمعوده
من ورا هديل.
تستاهلين والله يعني أنتِ كوه ادورين مشاكل من جوه الكاع شيء من الماضي شعليج أنتِ ما الج حق والله أصلاً تصرفج اوفر تتعاركين من وراها
اوفر
اي ولاتزعلين
هي شعدها جايه.
ترى حفلة بنات والكل يحضر ليش منبوذه علمود ما تحضر حالها من حالهن وهو ما جان موجود ومن اجه الا خابر على امي وتأكد من الكل راحن لن عنده شغل ضروري وملفات خابروا عليهن وامي كالتله تعال راحوا ومن اجه ودخل مستعجل ما باوع لاي احد حتى سلام ما سلم ليش تكبرين الموضوع وتظلمينه بشكوكج الما الها اي معنى
ماشي اني نازله اشوفه
روحي راضي وعوفيلي المعارك والزعل هسه كلش مو وكته خوش
تمام حبيبي.
نزلت والله اسيا ولا تجوزين من شگوكج الله يهديج كملت ودخلت الحمام اخذت شاور ونزلت اساعد ماما بالهوسه ولكيت عماتي ما مقصرات خطيه ونزل مروان اخذ بيت عمي ولاحظت اسيا ماكو طلعت اشوفها ما لكيتها ماما اسيا وين
وصال حصلت رزاله مرتبه وتستاهل
ازهار منين
من أخوج.
وينها هسه.
بغرفتها اخذت جهال وقفلت الباب حاولت وياها ما فتحته ولا انطتني صوت وبنت عمج هم ما اعرف شلونها شكوو واكفه يم الباب مثل الشرطي ومن دخل صارت بوجه واسيا شلون تفكيرها اسم الله الرحمن عليها.
يمه هديل ناسيته اني مو ادافع الها بس لو تريده جان ما هي اللي عافته وطلبت الانفصال بعد حب قوي وخطوبه وصلت الزواج وعلاقه متطوره يعني شجابرها تعوفه وهسه تحن وهي متزوجه لا ما اتصور والبنيه اجتي خطيه حالها من حال البنات بس اسيا هواي تبالغ بغيرتها وشگوكها وتشتري المشاكل مشترة مو هيج شحصلت هسه بس المغثه.
لا ادافعين لهديل لا اموتج اسيا خط احمر من اني احجي عليها بس ما ارضى احد يحجي عليها كلبي صار نار من اخوج عاط بيها روحي شوفيها بلكي تفتحلج سوده عليه وجهه انكلب
ماشي رايحه عليها رحتلها وصلت الباب ودگيته مقفول أسيا تسمعيني فتحيلي حبيبي اريد احجي وياج أسيا گلبي أسيا گولي يالله أسسيا ماكو صوت بهل الأثناء اجه عصام يمشي سريع وبيده أوراق وجه مزعوج
عصام شگوو
أزهار أسيا قافله الباب وأجيت عليها.
عصام عوفيها خل تضل لوحدها
أزهار بس
گتلج عوفيها شحجي اني
ماشي مشيت وهو هم عاف الباب وضلت اسيا ما شفتها بعد راسلتها فاصله النت وسألت أمي يمه هم عرفتي شيء عنها.
أخوج فتح الباب يمكن عنده نسخه بعد ما طلع بلكي تراضوا منين أجتنا هديل ما صدكت عليهم انصلحت اوضاعهم وصاروا تمام.
الله كريم يله تصبحين على خير.
وأنتي من اهله حبيبتي روحي أرتاحي اليوم تعبتي وراج تعب نروح نجهزلج يله نلحك لن عرسج عن قريب أخوانج ما يردون فترة الخطوبه تطول وهذا أقتراح مروان عصام ما مدخل نفسه من هذاك اليوم وهم ملتهي بدوامه وشغله أعلى من راسه.
ماشي ماما بستها وصعدت لغرفتي وراسلته ما موجود أتصلت عليه ما جاوبني شوي ودزلي رساله
هشام لاتنامين أنتظريني بس أكمل الغرفه.
تمام گلبي منتظرتك رحت شفت أسيا ما فاتحه نت وعصام نشط الان اذن كاعد وهي نايمه وزعلانه اكيد
الله يهديج يا اسيا شجاج تحسيتي وصارتلج مشكله
الصبح كعد ميته تعب جسمي كله يوجعني من الرقص تكسرت اجسامنا اتصلت عليه وجاوبني گبل صباح الخير حبيبي
هشام صباحج سعاده گلبي توج كاعده
اي نعم
هشامج من الاربعه كاعد
ليش گلبي
عندي گروه لغير محافظه
هم تطول لو تبات.
لا ارجع ل اليل هم عادي وين ابات ما عندي معارف بيها وفنادق مو كدها هسه ما علينا ابوج خابرني الموعد يتقدم بهذا الشهر نتزوج أخوانج ما يردون فترة الخطوبه تطول؟
اي گالتلي ماما مروان ما قابل
ماشي يجرالهم واليوم من اجي اروح اشوف قاعه للعرس.
والحنه هم
نسويها بقاعه قصدج
اي
تدللي أحجزلج احلى قاعه وبعد شتردين أمريني
ما اريد غير سلامتك شتسوي سوي على راحتك.
راحتي الكاها بس يمج والقاعات والله ما اعرف اشوفهن كلهن دايخ بيهن
ادزلك اني
دزيلي گلبي علواه
تمام گلبي يله لازم أنزل
راح أشتاقلج لاتطولين عليه
تمام اتريك وادزلك اسماء القاعات ولاتضايق نفسك
اذا الج ما اتضايق لعد المن، لا حبيبي شتردين اني حاضر وغصباً عليه هم
فدوه لگلبك انتهى الأتصال وغيرت ملابسي ونزلت ولكيتهم كلهم مجموعين على الريوك وأسيا تصبلهم الجاي لاحظت وجه يضحك الحمدلله متراضيين.
كعدت بصف مروان واسيا صبتلي جاي وغمزتلها وضحكت وبابا طبطب على ظهر مروان وضحك وگال
كمال مبروك أبني خابرت عمك علوان وگال خل يجي يگبعها ويأخذها اني وين الكه نسيب ورجال لبنتي مثله
وصال مبروك على شنو ليش راح يخطب اسيل
مروان لا أم اسيل؟
ازهار أسيل صدك تحجون لو تششاقون بس بعدها صغيره؟
كمال اي شبيكم مستغربين اسيل بنت عمكم علوان ونعم منهم ومنها بنت حليوه والظاهر أخوج شافها البارحه وعجبته وشاف أختيار امه هو الانسب
لا مو صغيره اني من تزوجت أمج جان عمرها 14
ازهار بابا هذا الشيء بوگتك مو هسه ما أعرف كيفكم بعد.
وصال بس أني تراجعت عن أختياري أسيل ما توالمه؟
مروان ليش.
وصال بعدها طفله يله عمرها 17 سنه وفقيره وعلى نياتها وأنت صاير ما تنجرع وما ينعاش وياك متغير هواي جنت اريدها الك من جان مروان الحنين العاقل والهادئ والحكيم والعلقه رزن مو هسه صاير واحد ما اعرفه ولا جنك ابني؟
عصام يمه على گيفج وياه شو انهديتي بي وبعدين مروان هو هو ما متغير بس أنتوا ما جاي تفهمونه بس اذا على? العمر اني وياكم بعدها صغيره تدرون ما مخلي بالي يم عمرها.
مروان العمر مو مقياس اني موافق حتّى لو صغيره؟
كمال ما عليك منهم هذا هو أسيل الك ولاتزعل من أمك تدلل عليك والا هي تلكيها طايره من الفرح وتتعزز عليك
مروان ازعل من الدنيا كلها ومنها ما أزعل ست الكل عزيزه گلبي وحنيته.
ازهار گام باسها من?اسها وأيديها ونهضت حضنته وبجت وباسته من عيونه وشگبته لصدرها قوي وهو يبوس بيها وحاضنها بكل قوته وكلنا مبتسمين بحب.
وصال يا فرحتي بيك وأخيراً راح اشوفك عريس وتدخل البيت أنتَ وعروستك يمه فدوة رحتلكم سبع سعادات يروح أمك ميخالف حتى لو صغيره وأنتِ ربيها وعلمها على أيدك.
مروان يبارك بعمرج يالغاليه ويخليج النا ويدومج
ازهار كعد بصف أمي وصافنه عليه وهو يضحك وأهلي فرحوا هواي بقرار زواج مروان من أسيل حجيت البارحه شفتها كلش حلوه وشكد فقيره وعازله نفسها عاقله كلش حتّى رقص ما رقصت
ولا ذبت عبايتها.
عصام أسيل ورده وذهب صافي.
أزهار حجينا وهو منزل رأسه وقابض على أيده وتغيرت ملامحه وشال تلفونه وكام وصاح وراه بابا
كمال وين رايح
مروان اهنا ما طالع
كمال ماشي نبلغهم ونحدد يوم المشيه
مروان ماشي.
ازهار وصار بيتنا بدال الفرحه فرحتين اني وهشام ومروان وأسيل وربي يقدم البي خير النا كلنا...
أسيا
مرت أيام من بعدما عقدوا أزهار وهشام وهو نفس وضعه عازل روحه عن الكل كمت من يمهم ورحت عليه لكيته كاعد لوحده شافني مسح دموعه ونهض ومنعته وكفت كدامه وحضنته من صدره وتمسكت بي
ارتاح وفرغ حزنك واللي بگلبك يمي أني وياك مو ضدك لو العالم كلها تصير ضدك اني ما اعوفك
عصام ادري بس حاب ابقى لوحدي
شيء صار بعد لاتزعل روحك فدوه لعيونك والله ما يلوك ألك الزعل أصلاً البيت طافي من حسك وصوتك وعصبيتك وانفعالاتك.
بعدين
عافني وطلع وضل فتره انطوا على نفسه وجنت احس بي يبجي على أخته وگتها عرفت عصام شكثر يحب ازهار على الرغم قساوته عليها بس بينلي هو اكثر واحد متأثر حتّى عنا ابتعد وجهاله ماله خلكهم يلتحق وينزل ما يلتقي بيهم بالغرفه ياكل وينام ما يطلع أبداً.
الى ان حجيت وياه بموضوع الخطبه هو جان رافض رفض قطعي بس كدرت اقنعه وافق وفأجئني من طلع موصيلي على فستان من الخارج عاد اني كتله حبيبي دام وصيتلي وصي ل ازهار وعمتي وياي
عصام ماشي ادزلج الصور وخل يختارهن ودزيهن اليه اثبت الحجز سوه
أسيا تسلم حبيبي خوما أنزعجت او تضايقت لن طلبت اخاف كلفت عليك مصاريف هواي، سحبني بقوه لحضنه باسني من خشمي بحنيه.
لا بالعكس زاد اعجابي بيج وكل يوم يزيد أكثر أنتِ انخلقتي اليه على گلبي ومرامي وگلشي بيج راضي ومرضي بس لما الغيره العندج والشگوك الراكبتج
رفعت نفسي وبسته بهدوء من شفايفه وتغلغلت انفاسه بصدري غمضت عيوني واني متمسكه بي من رگبته بإيديه
همست بصوت ذايب ومتولع بنار الشوك عوفنا.
من الفساتين هسه ما يوگلني خبز وخلينا بالمهم اني مشتاقتلك واريدك صارلك كم يوم عازل نفسك وزعلان على الكل واني شلمتني وياهم كافي عليه من تلتحق اشبع قهر وراك.
مو بگدي رغم الكسره البگلبي والضربه اجتني على?اسي أنتِ بروحي شايفه من تمرين بطولج گدامي شيصير بيه شگو هم بگلبي ينزاح بس جنت ما جاهز لأعلان الشوك والمبادره بالهجوم مخزنلج شوگ يحرك أهلي كلهم اني شعندي بالدنيا غيرج أنتِ وحبج مشتاقلج يا حنيتي.
أكمل الكلام والمبادره بالشوك وأعلن الهجوم التهم شفايفي بحنيه مفرطه وبادلته بكل لهفه عارمه ورفعني من خصري لخصره وتمسكت بي بقوه من رقبته وكلما اريد انحني يثبتني على انحاء صدره وترك اثر الشوك والبعد المطول.
واكفه اعدل ياخة القميص وهو مثبت أيده على خصري وعيونه تناظرلي بكل حب طبع قبله جنونيه على شفايفي وگرصني من خشمي وحجه.
عصام من ارجع نتفاهم ما تخلصين مني أعوضج الغياب ما اخليج تعانين مني ولا تزعلين عليه وفستانج ما تنزعي الا اجي واشوفه عليج وحتى صوره لا ادزيلي اريد اشوفه بالواقع وأتفنن بجمال وتفاصيل اللي لابسته.
شتسوي؟ شنو نوع هذا الفن
رسم وتلوين حاب أرسم لوحه حب على جسمج واقدسها بتفاصيلج واتمرد عليها برجولتي وأطغى على? أنثوتج وأختم على گلبج حبي بكامل قواه العقليه.
الله على فنونك أنتَ كلما تطول غياب ترجع فنان.
بس يمج وبين إيديج الناعمات وبحضنج اصير فنان بالعشك اتفنن وابدع، أسيا اني بس يمج الصح ويم ناسي مليان أغلاط أنتِ راحتي.
باسني من ايدي وضمني لصدره قوي تمسكت بي أحبك بكلمه وحده منك ارضى وانسى مو بكلمات أنت كل كلمه تكولها تتمرد عليه بنص قلبي
أعشقج يله لازم اروح سيادته ينتظر وهسه يجن بنات عمامي وعيب وزحمه موجودين تمام وما اريد اي قصور تجاه الكل فهمتي عليه يا شيخه الشيخات.
فهمت يا زلمتي طلباتك أوامر باسني من?اسي وشال تلفونه وسلاحه واغراضه وطلع راح الله وياه
وبالصالون ما تحملت دزيتله صور لمكياجي وصور كرم وجودي وصورة عمتي وازهار بس شافهن ما رد
هاا حبيبي شلون طالعين شافها ما جاوبني انقهرت حيل وعماتي كامن يحجن عليه وعفت وسگتت
كلت ميخالف اكيد شاف صورة اخته وأنزعج.
وصلنا البيت بسيارة مروان عفيه شغل النا فد اغنيه حلوه على ذوقك
مروان شتردين بعد عيني ست.
أسيا سلامة عمرك عيني ضحك وهز?اسه
مروان الله يساعد هذاك الزلمه عليج اثاري تعرفين شلون تسحلينا وراج.
أنتَ هم تنسحل لاتخاف الزلم كلهم ينسحلون بس بيهم ما يحجون خاف تنجرح كرامتهم وان شاءالله تنزرق بوحده تسحلك بحبها سحله لطيفه ومرتبه
شو استوكحتي واخذتي وجه زايد
شحجيت قابل شبيك تحسست عمه حجيت شي؟
وصال لا والله كلامج درر علواه يتزوج ويخلصني
مروان اتزوج لاتخافين لاحكه على الشلعان الگلب.
أسيا ضحكنا وشغل النا أغنيه وصوتها كلش عالي هاا مروان طلعت ادك ثكل ب?اسنا شنو هالاغاني
مروان هو اكلنا وسگتنا ضلت على الأغاني ما تسكتين لخاطر ربج شكد تحجين واني اكول عصام ليش ما يخونج طلعت العنده تحجي هواي مكفيه وفيه عليه كل النسوان
غير خوش مره موت بقهرك يالنحس
خفت هالجهره الزفره تروحيلي فدوه.
ههههههه نزلنا وازهار نزلت مستحيه من مروان وهو ضل صافن عليها ولاحظت عليه دمعه بعينه هذا يبجي عينه عين الصخل، وكفت كدامه وساعدتها وخر عينك لاتحسد عروستنا.
هو اخاف عليها تنحسد من جماعة الفگر
ازهار باوعتله وسگتت ومشت سىريع وعمتي كامت تحجي عليه
وصال مو جنت ادامي شجاك كمت تزومل
مروان لعد شتردين هما شنو لعد
أسيا ما جاوبته مشينا وضل يدخن ويفتر ودخلنا البيت بالدخوليه سنادين گبار ورد طبيعي ملون.
دخلنا وشغلنا الاغاني وجود خليتها يم جديتهم كاعده بالأستقبال هي وزوجة عمهم داود ونسوان كبار بالعمر ما عرفتهن، وكرم كام يبجي يريد ابوه
مروان
مروان خير
أسيا تعال ودي كرم على أبوه
مو مروان يشتغل عندج
لعد منو يودي بس يبجي وكلشي ما يخليني افتهم من الحفله حباب شعدنا غيرك
بعد توسلي بيه
مروان شهل المذله
يله تعال ولك انت مكانك مو اهنا مكانك يم الزلم امشي اوديك يم بيت جدي كلهم اهناك.
كرم لعد انت ليش باقي.
اني زلمه باقي احمي النسوان شوف السلاح شايله لن ما ينعافن لوحدهن وهم اشوف الحلوات
بابا ليش ما يجي وياك يحميهن ويشوف وياك
ابوك خوش زلمه ما يشوف حلوات امك تذبحه وتعلكه بالباب
أسيا مروان شهل الحجي خبلت الولد بهذا كلامك
مروان باوع عمو عليه شو حبيبي امك صاكره ابوك وكوله بابا صدك امي تذبحك وتعلكلك بالباب اذا تباوع على حلوات شوفه شيكولك
أسيا كرم لاتسأله عيب ماما مروان كافي.
مروان والله بيكم محتوى امشي لك صير مثل عمك خوش
كرم لا اصير مثل بابا
مروان داكل لك وصير مثلي يله اصعد
أسيا خرب بيومك دزيته ورجعت وماطول واجه جان ولابس رسمي وكله اسود ويدخن سيكاره جاهزه شكله مثل المافيات ولا عبالك رجل دوله مجلوب علينا والله فلا جنا حاسين بي شكد عاقل ومحترم حتّى لسانه صاير زفر.
وكفنا اني وعمتي وأستقبلنا المعازيم واجو أهل العريس وما قصرنا بگلشي واشرفت على البوفي وصيت العاملات اذا صار نقص يضيفون من العلب اللي مروان جابهن.
الموسيقى والأغاني طاقم كامل وهي تحدد نوع الاغاني من دخل هشام شغلت اغنيه حب وبيها نوع من الرومانسيه وتذكرت عرسنا اني وعصام جان راقي وفخم بشكل ما اكدر اوصفه وتذكرته واتصلت
وجاوبني حبيبي اشتاقيتلك.
عصام مو وگتج هسه تعالي شنو هالحجي الخايس كرم يگوله كدام عمامي والكاعدين مو عيب خزيتيني.