رواية بين قلبها وعينيها كبرياء للكاتبة شمس العراقية الفصل الثلاثون
أسيا ليش خوما حجه شيء
يعني تدرين بي يحجي
اي ادري هو حجه لو لا
اي لعد شجاي أحجي اني بس عاشت ايدج ياريت لو بس اليه بيها مجال وأسكتلج لا الافندي حجه كدام الكاعدين كلهم سيادته وعمي فاضل وعمي علوان وعمي داوود وولد عمي رافع وناجح وانوب اريده يسكت ما يسكت ويگتلك القهر يگولوله اي والله امك تسويها وابوك هو يسلمها رگبته
عزاااا عززااا والله هذا مروان هو علمه وگاله كول لابوك هيج، باوع الخبيث ما فوتها.
لا گال امي گالتلي أصلاً ما جاب طاري مروان هاي أنتِ معلمته مو؟
والله مو اني بشنو احلفلك مو أني هذا مروان
لاتتبلين على مروان هاي أنتِ لن حلفته واكدت عليه كال امي
مروان شنو متصدكني
هاا
والله حبيبي شنو أكذب عليك قابل
ليا ساقط لعد شمسويله وهيج مصمم على كلامه وأنتِ كايله اله
خوفه بالسلاح
لا ما يسويها بس مروان تاهيه
يله ما بيها شيء ليش مقهور هو ترجع لصدك اسويها واسوي الأكبر منها؟
ادري بيج ومكيفه حضرتج.
أي شگو بيها من زود حبك فوك ما أحبك
سگتي غير طلعتي معروفه بالعشيره مسيطره عليه
خرب حظي على هالسمعه.
علمود ما تخون وتباوع لغيري لما احبك شجابرني هيج اسوي
أدري بيج يله روحي عليهم عيب وسويتي مثلما گتلج الضيافه من الحلويات والعصائر وصلتكم دزيتهم بيد مروان
أنت دزيتهم أي حبيبي وصلن شلون لعد مروان كال اني
لا اني وماكو فرق اني او هو
لا اكو فرق وتجي حلوه كدام اختك اكولها هذن من اخوج عصام.
لاتسوين مشاكل اني او هو ماكو فرق كعدي عاقله
وهو هم ما مقصر وياجن سويتنا سايق يودي ويجيب وانوب صاير حارس وحمايه كرم يكول ليش ما تجي تحمي البنات وتشوف الحلوات بس تخاف من أمي تذبحك اعمل نفسك ميت خلاني بموقف خايسس
سوالف مروان والله
ادري بي من وصله طول الطريق يدرس بي يله نسابتنا اجو اليوم الكل داحو ويخابروني نسووانه راحن وضلينا لوحدنا كتلهم تعالوا بيت الجبير.
يله زين خوش جمعه
يله ادعبلي
ادعبل عليك غير.
شلون بيج هسه يله روحي
باي حبيبي قطعت الخط والله مروان شكد خبيث ما بيتها اليه ما يندك بي مصيبه، رجعت يمهن وفقرة الصور احلى الفقرات ومر الوقت واني افتر على الكل واشرف على العاملات ويوزعن ضيافه ونفس الوقت البوفي مفتوح لليحب.
أجت اسيل وياها وحده عمتي كالتلي عليها أختها تقدمت سلمت ورحبت بيهن بس انصدمت من كالت
أسيل اني اسيل هاي أختي هديل؟
أسيا هديل اتفضىلوا، نار أشتعلت بصدري لأول مره اشوفهه جانت متوسطه الطول جمالها عادي
أسيل احلى منها بهواي ما ادري لن جانت خطيبته ما اكدر اوصفها واتمعن بشكلها حتى لو حلوه تنكلب كدامي عتوي.
تقدمت تسلم وتبوس وحضنت ازهار اريد اهجم عليها ازهار مالتي وبس خفت شكلج شلون تتمضحك امسح بوجهي وارفع خصلات شعري احاول اكون طبيعيه بس مو بيدي ما استحملت من شفتها والافكار ترن براسي شلون جان يحبها قبلي باوعتلها كعدت تسولف هي وازهار ويضحكهن
أحترگت گبل اخذت تلفوني أتصلت رفضني وكتبلي
عصام ما أكدر اجاوبج كلهم كاعدين عيب بعد نص ساعه توصل الضيافه واروح استلمها واخابرج تمام
اسيا هديل شعدها جايه
يا هديل؟
يا سلام ما تعرف يا هديل ليش كم هديل عندك؟
شبيج لخاطر الله كبيتي هسه
ما احبها ما اطيقها وبس تتمضحك
ولا تحبينها طبها مرض بس المهم ما يضوج حبيبي
ضجت وخلص
اهاا راس الشهر اجه وهرموناتج تصعد وتنزل ولازم اني اتحمل كل هل تقلباتج المزاجيه لما تستقر
اي لعد منو يتحملني
اني اتحمل اني يا كواد يتحملج غيري غصباً على? راسي اتحملج شتردين بعد
ما اريد گلشي عصام
هاا يروحه المعلعتلها كولي
هيج بعدين عود.
ماشي يله روحي يم المعازيم أنتِ شيخه الشيخات والمعزبه لعد اني المن صارف كومة فلوس موصيلج من خارج القطر ارقى فستان المن يا گلبي
لخاطرك راح اعديها
يسلم خاطرج ولاتشوفينها كدامج أصلاً.
حبيبي
هاا
صدك هي حبك الأول يعني جنت تحبها هواي!
لا اله الأ الله أسيا وتالي وياج يعني اليوم نتعارك ما بيها مجال لن هديل خليتها براسج وكل الافكار اشتغلت عندج
گولي جنت تحبها.
اسيا روحي مو وكتج الزلم كلها تباوعلي خرب حظ الكواد صرت مزق من وراج.
تعال وين رحت فصل النت اتصلت مغلق؟ رجعت يمهن واهل العريس راحوا وصلناهم ورجعنا وفرغت قهري بالرقص بدعت وجنت متقصده اتمايل بجسمي كدامها وافر بشعري جان واصل خصري وصابغته نحاسي واهز بخصري واسوي حركات بدعت هي جانت تباوعلي من جوه ليجوه وبعدها صدمتني من دخلت كامت ترقص يابه احتركت.
كلما اشوفها تتقدم او تتقرب من ازهار الطش بالنص وانطيها ظهري وهي حست على نفسها وانسحبت بس وجهه دخن وهذا الاريده شعندج جايه لبيت خطيبج السابق قدري اني مرته واغار
خلصت الحفله وبس هي واختها ومرت اخوها ضلن وعصام خابر عمتي يسألها ومتت قهر لن ما خابرني جانت تحجي وهي تباوع هسه اكيد تكول ما مهتم الها اتصل على امه ما اتصل عليها بس سهله عصام تجي وين تروح مني.
بقيت واكفه ومترصده الها واجه بطوله السالب گلبي ودخل لابس قميص أبيض يمشي سريع وطرت من گال
عصام اسيا تعالي وراي.
اسيا اجييت حبيبي مشيت بتباهي عبالك الوزير صاحني لحكته ولكيته گالب الميز مالته وناثر ملفات على شنو ادور گلبي
عصام اوراق مهمه شوفيلي الكنتور اكو بي دوري بسرعه خوما معزله وذابه وراي.
اسيا لا والله غير تعدمني ما جاوبني بس جان عصبي ومخبوص وكلب ما خلاه واتصالات تركع عليه واخذ الظرف وطلع سريع وطلعت وراه وبعدها واكفه يم الباب اريد اهجم عليها واجتني عمتي سحبتني واني نار واشتعل ما راحت الا نزعت گلبي.
اباوعلها واكفه تحجي ويه مروان وعصام يفتر يخابر وعصبي مبين من حركات ايديه وهي صافنه عليه تباوعله بكل صلافه حقيره نذله ساقطه اطلع عيونج والله شكد تباوعيله وأنتِ متزوجه صعدت السياره وانكلعت وروحه بلا رده.
بقيت بالصاله انتظره يجي واجه وباوعلي وفحصني بنظراته من الكعب لشعري.
عصام شبيج
اسيا شبيه يعني واني اشوف هديل شلون تباوعلك
ولازمه الباب علمود تفوت من يمها گبل عاط بيه
عصام بصوت عالي عليج وعليها.
أسيا خله وطلع وعمتي وصال ضلت تباوعلي گبل رحت اخذت جودي وسحبت كرم من ايده ويبجي رحت الغرفه وقفلتها ودكت وحاولت ما فتحت نهائي
وصال أسيا بنيتي شو فتحيلي خل أشوفج ولج والله هو الج وهذيج تروحلج فدوة ولج اسيا
ما جاوبتها وقفلت تلفوني وغيرتلهم ملابسهم واني ابجي لملمت الهوسه والاوراق مالته كلها ورتبت الغرفه واني بفستاني اتعثر وابجي وياهو يدك الباب ما افتحه.
لليل جود بس تبجي شلعت گلبي كرم نام بغرفته من التعب واني شايلتها وافتر ولحد الان ما مغيره ملابسي وأنفتح الباب عرفته هو لن شيء اكيد عنده نسخه راح غرفة كرم واجه باوعلي انطيته ظهري ومخليه جود على كتفي حسيته قريب لن يحاجي بنته سحبها مني واخذها بحضنه وشويه ونامت هدأت الوكحه صارلي ساعه شلعتي گلبي وابوج بدقايق نمتي بحضنه.
فتحت الكنتور وجريت ملابسي ودخلت الحمام وركعت الباب بقوه وعاط.
عصام الباب لا يتكسر لا أكسرلج?اسج حيوانه
أسيا سبحت وطلعت متمدد على الجربايه ومرتجي على التاج باوعت عليه عاكد الحواجب ويباوع بالتلفون شمرت الفستان يم الباب وباوعلي مستغرب وشمر تلفونه على الجربايه بغضب واجه لزمني من ايدي بقوه وضغط عليها
عصام شنو هالاستفلات شو عينج طالعه تدللين عليه حضرة جنانج أستجلبتي من انطيتج وجه زايد
أسيا ما جاوبته
تدرين سعره بيش تدرين لو لا
ما حجيت.
اي حقج ما تدرين لن ما مقدره تعبي لو مقدره تعبي وحاسه بيه ليل وبنهار دك عمليات وشغل وبالساعات واكف ونوم ما نايم مثل البشريه ومن الفجريات اطلع ومحروم منج ومن أطفالي لو حاسه صدك جان ما شمرتي هالشمره كانما حفاظه من حفاظات جود بس أنتِ وحده ما تحمدين ربج على نعمتج.
نفض إيدي بقوه ورجع يتصفح بمبايله ورجعت شلت الفستان وعلكته بالكنتور وحسيت بحجم غلطتي اني لن شفته يگلب وتذكرت هديل شمرته بدون وعي مو القصد ما اقدر تعبه.
مشطت شعري وخليت كريمات عنايه ومعطرات جسم وهو يگلب بالتلفون ذبيت الروب ورحت عليه كعدت مقابيله اسفه حقك عليه اني مو ما مقدره تعبك الله ياخذني اذا تعبك ماله قيمه عندي اصلاً اني اللكمه اكلها اغص بيها وگلبي يوجعني عليك لن أعرفك شكثر تتعب بدوامك والتزاماتك بس السالفه وما بيها اني انسانه اغار وشفتها تشعوطت وراوتني افكار انت اعرف بيها، ضل ساكت وعينه ما رفعها أبداً ومستمر يتصفح ويباوع مقاطع بس بصوت ناصي.
كمت ونمت بمكاني بس ابتعدت على الحافه بقيت وابجي بسكوت اخر شي كمت اشهك احاول اكتمها ما اكدر حسيت بحركته وبثواني سحبني لحضنه ويبوس بيه بجنون ويمسح دموعي من دارني عليه انفجرت بالبجي
عصام خلص خلص كافي اسسيا كافي ابويه
أسيا والله لن احبك والله
ادري بيج والله العظيم ادري
والله مخليتك بمقام ابويه بمكانه انت ابويه وامي واخويه واختي واهلي كلهم ضل صافن بوجهي وكال
اني ابوج
هزيت?اسي
ياروحي الما بعدها روح.
أسفه خليتك تزعل مني بس ردت أحجيلك شعوري من شفتها وردتك تفهمني شنو أعاني من شفتها وحقي هالشيء وهي حبيبتك السابقه.
أنتِ گلتيلها حبيبتي السابقه وأنتِ الأولى والأخيره
حضنته وبعدها ما تعاتبنا ووصلنا لقرار موضوع هديل ينسد نهائي وعدته بس كون التزم بوعدي.
الصبح كاعدين نتريك وفتحوا موضوع الزواج ومروان وأسيل تفأجات ونفس الوقت تذكرتها يعني أختها وحسيت عصام عنده علم مسبقاً كرصته من جف ايده جنت تدري مو.
عصام لا.
أسيا لا تدري
گتلج ما أدري
ماشي كاموا هو ومروان وعمي وعمتي فرحانه لن هي أساساً جانت تريدها لمروان وجان اختيارها كمت لملمت المواعين وازهار اخذتهن مني ولج أنتِ عروسه وينج وين الشغل شو عوفيهن هسه تجي أم شامل تساعدنا بس كلت اغسلهن ما يكلفن خطيه
لا والله اني أغسل.
شو امشي منا وخليهن صدك تعالي شبسرعه مروان أقتنع ب أسيل هي بس البارحه أجتي وشافها حتّى فستانها محد شافه طول الحفله لابسه عبايه ولا طلعت ولا اختلطت.
أحتمال حب ثكلها وأحتشامها وأسيل ورده بس شو حسيت عصام ما أقتنع من امي كالتلهم عمرها 17 عبالك غير رأيه بس مروان مصمم ما شفتي شلون گاله العمر مو مقياس اني موافق حتّى لو صغيره؟ زين وحبك ل هناس وين راح وحجيكم ومراسلتكم والاشعار الكاتبها الها وصورها شنو موضوعهن؟
أحتمال عافها بس لحظه تذكرين من گال لعمتي من گالج عايفها؟
اي صدك شلون فاتتني شلون يعني عنده علاقه بهناس ويتزوج أسيل منو يراضاها على نفسه هذا شبي شيخربط بعمره.
والله ما ادري بعد أخوج
احجي ويه أمي بالأول
خاف تتدخلين وتطلعين موخوش أدامي ويضل يرعد عليج وتصيرلج سالفه
أكولج اذا يحب هناس وكلنا ندري بهل الشي شلون هسه يتزوج اسيل باجر يمل منها ويرجع يخونها ويه هناس منو يراضاها على نفسه وأسيل شنو ذنبها؟
عافتني وراحت واني ما دخلت نفسي بعد ومر يومين جنت اكوي ملابسه ودخل علينا جان بيت جده تأخرت من الصبح طالع وهسه الظهر؟
مبين ضايج حبيبي
أي شنو شايفين منك بعد كم يوم تلتحق وتخلينا
حضري نفسج والجهال نروح نخطب لمروان؟
هاا بيها الخير منو يروح؟
مشية زلم ونسوان.
منو ومنو يروح.
عمي داوود ولده رافع وناجح رسول ومظفر وخالد وازواج بنات عمي فاضل زياد وفاروق ليث وعبدالله وعمي فاضل وسيادته واني ومروان ومجد وانتن وأمي وعماتي فريال وزينب وجديتي.
خوش مشيه يستاهل مروان اكو واحد شعجب ما عزمتوا؟
منو؟
نسيبكم هشام
ما تسكتين.
ليش شگو بيها عمك فاضل مو أخذ رجال بناته زياد وفاروق وليث وعبدالله بكل مشيه مقدرهم ومحترمهم وداز عليهم يحضرون مو لخاطر احد لخاطر بناته وانتوا هم لخاطر بنتكم ازهار بس بلغوا احتمال ما يحضر السالفه مسأله تقدير لأ اكثر
شو تعرفين وتحرفين
لخاطر أختك
ما عليج بإختي وخاطرها ولا تتدخلين
ليش
گتلج لاتتدخلين وهاي هي.
ماشي مثل ما تريد عافني راح واجه وبيده علبة لونها احمر فتحتها تخم ذهب المن هاي.
أخذيها وياج هديه من عدنا اني وياج بمناسبة خطوبة مروان وأسيل من يدزون عليج أنطيها
ل سيادته.
ماشي حبيبي عاشت ايدك
وايدج حبيبتي
اخذتها خليتها بالجنطه وهو راح على الكنتور حضر قاط يلبسه ساعدته وكويتله القميص وحضرت فستاني وملابس لجهالي كرم ابوه استلمه ولابسه قاط هو وابوه نسقوا سوا واني لبست فستان لون جويتي وجودي هم كملنا وهما لابسوا قميص ابيض وستر اسود طلعوا عرسان ما شاءالله.
طلعنا بالصاله وازهار نزلت قنبله لابسه فستان أخضر فاتح والكعب وكلشي مليان جمال اجت بصفي وعصام باوعلها وگال.
عصام شعجب ما لبستي مثلها جان طلعتن
اقلام جاف؟
أسيا يعني هيج صارت والله فلا اروح مشيت ولزمني من ايدي يضحك عوفني ما اروح بطلت
عصام اتشاقه شبيج ما تتحملين والله ناصب عليج اسيا حبيبي يمعوده.
أسيا گلبت وجهي عليه وازهار تضحك لاتضحكين گافي عليه أخوج.
عصام شمسويلج ياعيني يله ميخالف اني ورقه بيضه وأنتِ قلم جاف خوش
عصام
سگتنا عمي سگتنا يله مروان يمعود مجد ما تصعد تشوفه وين صار
مجد من شوكت صعد يلبس اول واحد ولحد الان ما نازل ادري شتلبس لخاطر الله
أسيا صعدله مجد وطلع عمي يعدل ب ياخة القميص وعصام تقدم يساعده وعدلها اله وكاله
عصام سيادتك طالع عريس
وصال لا تگوله عريس شعنده يوميه معرس
كمال أسكت ولك الحكومه ما تقبل.
عصام فديت الحكومه ليش يگدر يعرس غير اعرس عليه وبعدين وين يلگه مثلج مره معدله من كلهن وحلوه شيريد بعد
وصال هاا عبالي اي عفيه جبيري لاتنطي مجال
عصام وياج وبظهرج أطمئني ولاتخافين
كمال عمي اني حاجي فاتح حلگي فتحت عليه باب
أسيا ضحكنا وعمتي طالعه هيبه وعصام يبوس بيها بزعها وتنفض بي احب علاقته بإمه وهي هواي تحبه
ونزل مجد يهز بإيده
عصام هاا بشر
مجد جاي يخابر وعصبي بس يغلط ما فهمت عليمن.
عصام هسه وكته ولك مروان يمعود يله فضنا
وصال مجد ماما الضيافه الكيك والبيبسي وين خليتهن
مجد بسيارة مروان كلهن
كمال المهر خوما نسيتي
وصال لا ما نسيته اسيا خوما نسينا شيء بعد
أسيا لا عمه هذا هو واكفين ومروان نزل والوجه مگلوب ويمشي سريع سوه الدرج طفرتين وطلع أولنا وعصام لزم ايد كرم وطلعنا ازهار تجين ويانا جانت تكتب سريع هاا شبيج
ازهار هشام زعل ويعتب ليش أهلج ما عزموني شگوله هسسه.
أسيا والله عرفت راح يزعل يله امشي ويانا بعدين نحجي عصام وصل السياره هسه يعيط
ازهار امشي لا اروح ويه ماما وبابا انتوا عائله لوحدكم شعندي نابصه بينكم يله امشي.
أسيا طلعنا من البيت وعمي قفل الابواب واجه بهيبة المعتاده وراه عمتي وصال طالعه شيخه صعدت سيارتنا ومروان شغل سيارته لوحده وتلفونه على اذنه شغال ويحجي بصوت ناصي بس عصبي ومخبوص واول واحد شغل وطلع بكل سرعته وبعده سيارتنا وبعدنا سيارة عمي وعمتي ومجد وأزهار.
عصام شغل أغنيه وكرم متفاعل ويهز ويصفك حتى جودي كعدت وصافنه شنو هاي وين اني شصاير
عصام عيني بابا صح النوم ست كعدي لج اليوم خطوبة عمج مروان.
أسيا عمي عبرنا هو هم مشغل اغنيه وعمتي بالصدر وازهار عينها بالتلفونها ومجد طالع من السياره ويصور ومروان طاير اول واحد بينا مألف بيها.
وصلنا وطبگنا ونزلوا الزلم وشويه واجت سيارة عمهم فاضل الحجيه وعمتي فريال وزينب سلمنا من بعييد ومروان واكف ويفتر ونزلت الحجيه عليه وما اعرف شتحجي وياه رادته بس يضحك هو گالب خلقته ومزعوج.
وبهل الاثناء سمعنا صوت الاغاني اغنيه سوريه اظن محمد الشيخ صوتها شالنا شيل ثلاث سيارات سود عاليات عمهم داوود وزوجته وولده خمستهم رافع وناجح ورسول وخالد ومظفر ونزلوا كلهم لابسين رسمي بس رافع لابس عسكري وتسلاموا بينهم وكفوا ينتظرون نسابة عمهم فاضل وعصام يخابر بيهم دقايق وطبكوا اربعتهم كلمن وسيارته وكفوا كلهم بصف السيارات ومجد المصور اخذلهم صور وكرم نبص الا يروح فتحت الباب عصام اجه علينا يريد ياخذ وياكم.
عصام اي حقه تعال بابا
أسيا اخذوا مجموعة صور وتوجهوا لسيارتهم وعصام اجه وكف يگلب بتلفونه تاخر يله شغل السياره وازهار ادزلي برسائل شبعت قهر عليها
ازهار حتّى من المنشور مقهور يگول أخوج هسه نشر كلهم حاضرين لا عبالج ما اعرفهم وسوه اشاره الكل واني ما شملني وهما وافقواعلى الطلب الصداقه قبل فتره
اسسيا اني موقفي صعب عليج الله مو حقه شفتي نسابة عمي فاضل اربعتهم اجو بسيارتهم شكو بيها لو كايلين اله.
أسيا بس تشبعين قهر شسوين هاي هي نهيت المراسله وياها بقهر وطلعنا وراهم كلهم سيارات فخمه بس مروان طاير اولهم هذا شبي ما مصدك
مر وقت ووصلنا وطبگت السيارات يم الباب بس سيارة مروان بيها الضيافه دخلت البيت وسيارة رافع لن بيها رشاش هو هم عسكري مثل عصام ونزلوا الزلم أول شيء و.
طلعوا ابوه العروس وحارث وحسن وست زلم ما عرفتهم يمكن خوال العروس وعصام اجه واخذ جود مني ونزلت اخذتها ومشيت وراه وانجمعنا كلنا ودخلنا بعدما هما دخلوا عصام جان بعده ينزع حذاء كرم وهديل وامها ونسوان اخوانها طلعن استقبلنا سلام ومباوس عبرتها ما سلمت عليها ودخلنا الترتيب والنظافه والبخور شيء ثاني.
كعدنا واني حرت بجود تبجي اسويلها ممه وعمتي تسال على أسيل وازهار لحگتها كالن بغرفتها ما نازله مرت من يمنا راحت المطبخ لن دزوا عليها
كملت رضاعتها والحجيه اخذتها مني وتصلي على النبي ويتناقشن بينهن تشبه منو واني بالي يم المصكوعه بس تلوف من المطبخ للغرفه دكعدي عاد بهل الاثناء سمعت طاري الضيافه نزلتوها عمتي تحجي وتذكرت اي صدك بله اشوف منو نزلها سحبت نفسي من بين النسوان وشفتها تحجي ويه كرم.
هديل حبيبي شنو أسمك
كرم كرم عصام كمال
هديل فدوة لهل الحلك منو معلمك هيج ولك
بابا علمني
حبيبي تعالي انطيني بوسه
اسيا تقرب باسته واني اشتعلت ركضت عليها وسحبته من ايدها كرم تعال ماما ضلت تباوعلي اخذتها ورجعت تعال شعندك طالع من يم الزلم امشي ارجع يم ابوك
كرم طلعت ويه عمو مجد
اسيا ديله ارجع يم بابا بهل الاثناء شفت مجد تعال اجاني ركض وهي واكفه تغسل على السنك وزادني فخر من كال
مجد هاا مرت اخوي.
اسيا بصوت ناصي بعد طولي عفيه عفيه كثرلي منها بعد ارفع الموجه
مجد عمي أنتِ شيخه الشيخات
اسيا بعد عمري تعال منو نزل الضيافه
اني منو ينزلهن غيري
وعصام هم طلع
عمي زلمتج شيخ غير توسط المجلس هو شيخ ومرته شيخه الشيخات
هديل ما شاءالله الشيوخ مطشره ياهو واجه ونفش ريشه وصار شيخ على الاوادم اللي اعرفه الزلم تصير شيوخ منين طلعت النا هاي انوب النسوان يصيرن شيخات!
أسيا وأنتِ منو وياج شگو نطيتي من يمج.
هديل اخلاقج حبيبتي
مجد خل اطفر راح تصير بالنعل
أسيا ما انزل لمستوى اخلاقج وما اردج
لا رديني وأنتِ دايسه بصاط بيتي؟
مجد أسيا عوفيها ورجعي لاتسويلنا مشكله
أسيا هو رايحه لن الظاهر تريد تتعارك بس ما انزل لمستواها يله عيني روح يم الزلم ابتسم وراح وعفتها شكد حقيره طلعت مسمومه.
رجعت كعدت يم الحجيه وحست بيه انهانيت
الحجيه شبيج أسيا وجهج مدخن توج جنتي تلعبين الهوا وشحلاتج جنج گمر ومضوي.
اسيا ما بيه شي جده لايضل بالج سحبتني عليها وباستني من خدي ورجعت تغني وتلعب بجودي بعدها واسمع هديل تحجي ويه امها
هديل رايحه اسحلها من الله ياخذها ان شاءالله بكل خطوبه مفشلتنا شتريد لعد بنتج.
أسيا هاي شبيها اكو اخت تدعي على أختها بهيج يوم كبر حتّى كبر شهل النفسيه الخايسه راحت واني رضعت جود وتاخرت وعمتي حتمتت الا تصعدلها.
أسيل هالايام المرت صحتي تهورت بالزايد ومحد حاس بيه بس يگولولي تبهرزي تصيرين زينه اني جنت اسوي أكل لروحي امي جابتلي دبس وگالت كثري منه من كثرما اكلته هو والمربى لعبت روحي
ضليت عايشه على شوي بيتجانان والطماطه وشنو اكل معدتي تصير حصوه واضل مختنگه والقفص الصدري كله يوجعني عبالك مكسسره.
ما جاي يفيدني البهريز روحي جاي تذوب مثل الشمعه يوم عن يوم احس شيء يأكل بيه محد حاس بس اني حاسه بنفسي.
مروان من يوم بلغني ما راسلني بعد وجنت مرتاحه بهل البعد عكس هذيج الايام الجنت ملتهفه وطايره بالدنيا عبالي كلشي راح يصير مثل ما أريد واركض ركض علمود أخلص شغلي واروح احجي وياه جانت مجرد بدايات
لاحظت على أهلي صار عدهم علم لن وجوهم مستبشره بس ما بلغوني على الرغم أني ادري بس تمنيت أسمعها منهم.
امي فرحانه وتخابر بخالاتي مروان ابن كمال خطب اسيل خابرتهن وحده وحده بس تضحك وتبوس بيه وحارث طاير عبالك راح يناسب الوزير لن هو هواي يحبهم وجان رايد نسبهم من زمان ومن أنفصلت هديل هو حاربها وسسمها بعيشتها لما اجتها قسمه مهم تخلص وافقت بدون تفكير واحسسها متندمه بس ما تظهر هالشيء.
عفتهم وصعدت غرفتي ولگيته دازلي.
مروان اليوم خميس باجر الجمعه العصر اجي حضري روحج
أسيل شفتها ما جاوبته
ويامن أحجي اني
ما موافقه.
مو على گيفج ما توافقين
شتريد أنت شسوي بيه تتزوجني وأنت تعرف شصار بينا يعني أشوف الزواج مو ضروري زايده منك هالبطوله
مو ضروري يعني ما تريديني
لا
وعلى? أساس اني گاتل نفسي عليج شوفي لج الزواج يصير وافقتي او رضيتي بالطمرى التأخذج مو مهم عندي موافقتج واذا ما وافقتي ما يجرالج خير ويصير شيء لا يعجبج ولا يعجبني!
تهدد مروان
كيفج شنو تفهمينها افهميها هذا العندي يله سلام.
فصل النت وراح وصار عندي وجع بصدري ومعدتي حيل اتضايقت افتر وابجي ادري تتزوجني تعذبني فوك عذابي ما كافي من يوم العرفتني مسسمني بكلامك مسوي حياتي جحيم لو اموت اشرفلي ولا اصير على ذمته وتحت رحمته.
صعدتلي أمي واجت تبوس بيه دفعتها بقوه وصحت بيها واني ابجي كافي بس تبوسين هالبوسه هم ما اريدها هسه جايتني تبوسين بيه وانتِ كرهتيني بعيشتي عوفيني ما اريدج.
وكفت مستغربه وضلت صافنه عليه بدون اي ردة فعل ودخلت هديل طشت جگليت وتهلهل بعلوا صوتها على شنو تهلهلين؟
هديل على خطوبتج من مروان يالعوبه ولج وين يصحلج واحد مثل مروان رجال بي حظ محترم وعاقل ورزن نيال بختج عليه، يله يله كومي لبسي اخذج الصالون نحفلج ونرتبج باجر يعقدون الكم.
أسيل تدرين هسه يله عرفت يمه صارلج يومين تدرين وما اجيتي كلتي خل اشوف بنتي أحتمال ما توافق بالجذب ما بلغتوني وهسه جاياتني تاخذني تحفلي وترتبني بدون محد يأخذ رأيي ولا موافقتي
ليش اني بنت زنا لو يهوديه لو بنت شارع لو لكيتوني مشموره عند جامع لو يم بابكم حتّى لو جنت هيج رحمه ماكو بقلوبكم تكولون خل نسأل بنتنا؟
هديل دنجبي شهل الحجي ليش مروان ينرفض
أسيل لعد شعجب عصام أنرفض.
هديل انجبي عصام لوحد شجاب سيرته هسه يمه احجيلج كلمه ليش ساكته يمه يمه شبيج يمه ليش تبجين أسيل شحجيتي وياها.
أسيل حجيت اللي حجيته شدخلج گبل تقربت ضربتني كف قوي ولزمتني من شعري تنفض بيه وأمي متخشبه وهديل قست عليه دفعتها بقوه وصحت بيها گافي بزعتوني خليتوني أتمنى الموت أنتوا مو أهل حرام تكونون أهل أنتوا عذبتوني لا ام حبتني ولا أحتوتني ولا ضمتني لصدرها ولا طيبت خاطري بلكلمه ولا يوم اجتني وسألتني بنيتي شنو محتاجه.
هديل انجبي وسكتي شتحتاجين قابل شو مدلله وين اكو مثل لبسسج وغرفتج لوحدج شتردين اكثر من هيج بنات اخر وكت شهل الصلافه واكفه تحاسبين امج.
أسيل أنتِ أكرميني بسگوتج ولا تتدخلين اي احاسبها لن من حقي اطالب بأممومتي تجاها ما عطفتي عليه سويتني خدامه لجنانييج ومكفخه بيد ولدج ومربيه وخدامه لحارث ومرته كلما اغلط حارث يجرني من شعري ياخذني وياه أسبوع اضل اكرف. وسخهم هو مرته وجهاله ومن اروح المدرسه محد يروح وياي ينطي عذر اضل اتحجج بالف جذبه
لو كلامج تذبينه مثل السم ما تسميني غير سليمه.
وتدعين عليه وكلما تعبريني تكفخيني محد صار يحترمني وحقهم ما اجو اخذوا رأيي تدرين ليش لن أنتِ ما خليتي إلى اي قيمه بين عائلتج همج الوحيد ولدج وجناينج وهديل تضمضين من الراتب الها ومن اجمدتلج واترس المجمده تشيلين وادزين وتخليني حايره بالعشه اني ما متعاجزه ولا اطالب بتعبي لن غصباً على راسي اشتغل واتعب بس جنت اريد اسمع كلمه حلوه منكم.
هديل كافي تلوصين بكلامج يله فضينا عاد.
أسيل خليني محترمتج لا انزل عليج اغسلج غسل أنتِ اخر وحده ممكن تحجي ولاتخافين هسه أتحضر واروح وياجن للصالون لن ما راح ارفض الزواج من مروان هالمره اني موافقه بكامل إرادتي بلكي بيت عمو كمال يحنون عليه ويحبوني ويحترمني ويخلولي قيمه بينهم وعمو كمال يصيرلي أب ويعطف عليه ويحبني مثل ما يحب بنته ازهار بلكي عمتي وصال تصيرلي أم تعزني وتخاف عليه مثل بنتها بلكي ازهار تصيرلي أخت تسأل عني وافتحلها گلبي وتكون قريبه اليه بلكي عصام يصيرلي أخ يكون إلى سند اشد ظهري بي بلكي أسيا تكون احن عليه من جناينج وبلكي مروان يطلع ارحم منكم عليه.
هديل انجبي عاد هواي سگتنا الج واكلتي بسوالفج يله لبسي ونزلي ورانا يله يمه امشي ما عليج منها ختولي.
أسيل جرتها هديل من كدامي وهي صافنه بوجهي ودموعها على خدها نزلت وهي تباوعلي كعدت بجيت الا طگيت ليش قسيت عليها بالكلام ليش.
مر وقت وكمت لبست عباية عمتي وصال والشال ونزلت لكيت هديل كاشخه واطك بكعبها وامي كاعده ولابسه ومنزله رأسها وشافتني صفنت بوجهي.
ومشينا لصالون وصلنا بلشت بيه حف وصبغتلي شعري أسود وسوتلي اظافري وعنايه كامله وهديل هم رتبت نفسها على الاخير
ورجعنا البيت واني صعدت بعد ما نزلت بقيت بغرفتي اريد اتقبل اللي راح يصير شلون راح اعيش وياه يا ترى هو تقبل اللي صار علمود يريدني زوجه اله شنو برأسك مروان!
الثاني يوم كاعده بغرفتي ولابسه الفستان أبيض وشعري منثور على خصري على طوله بمكياج هادئ.
وصافنه على الارضيه وهما وصلوا من وقت ويردوني أنزل واني اجتني الجمده وكومة أفكار ترن براسي وهو يدزلي برسائل مالته واقراهن واني ساكته
مروان ما تنزلين عيني عروس ترى سألت عليج كالوا ما نازله لحد الان شعندج بالغرفه شتسوين؟ جاي تصورين بنفسج مو؟
ما جاوبته
تشوفين رسالتي وما تجاوبين يعني اني لحد الان جار وياج عدل ومطول خلگي وجاي اسويلج قدر وقيمه وأنتِ قندره ما تسوين.
لج نعال لاتجبريني اصير موخوش ادامي والزلم الجايبها وياي اخلي الما يشتهي يتفرج وأنزع ثوب المستحى واصير كح واصعدلج واسحلج واخذج وياي لا خطوبه ولا عقد ولا طركاعه برأسج واريد كواد يطلع وراج ويحاجيني افرغ قهر الله كله بيج وبي.
ما جاوبته
مو أصعدلج
تعال هلا بيك
اي هذا المطلوب اوكفيلي جايج.
ما جاوبته وفصلت النت ورجعت التلفون وصعدتلي هديل معصبه يمكن سوه هجوم عليها ادري علاقته قويه بيها ودزها عليه.
هديل ليش ما تنزلين تردين تفضحينا نزلي ترى مروان وصلت لخشمه لاتخبلينا وياج
أسيل ليش افضحكم شمسويه
هديل نعال على حلكج ادبسزز شو تحركي غصباً على رأسج توافقين مروان تاج راسج جابلج العشيره كلها اطلعي وشوفي أمة محمد كلها اجتي
نسوان وزلم لو الضيافه اللي نزلوها شتردين أكثر من هيج خطبه تعالي أكلي راسي تتبطرين على نعمتج ليش
أسيل من انفصلتي من عصام اني صرت ضدج لو وياج
مو وكته هالحجي
لا عليج الله
وياي.
الدنيا مواقف وهذا موقفج ما انساه كثر الله خيرج ما قصرتي خيتي عبرتها ونزلت ولكيت عمتي وصال وازهار توهن يردن يصعدن سلمت عليهن وعمتي تبوس بيه وتصلي على النبي كعدت وجديتي باستني ولبستني عقد ذهب كلش حلو
ويحجن بينهن وفرحانات وبالي مو يمهن مثل الجثة تتنظر موعد جنازتها ويصلون عليها وبعدها يدفنوها هيج جان حالي ما حسيت بشعور راح اصير عروس ولا فرحت مثل البنات بإي احساس أنسانه طافيه وخاليه من اي مشاعر.
فزت روحي من گالوا
يله جيبنها اجه السيد
وصال يله اسيل حبيبتي
لبستني برگع لونه ابيض غطتني وازهار واسيا غطن شعري وسترني وامي واختي واكفات على صفحه ومشيت ولازمه ايدي وازدادت رجفتي جانت عمتي وصال وياي بدال ما تكون أمي بمكانها بإصعب لحظات عمري لا هي وكفت على صفحه هي
وهديل كانما يگوللي أنتِ تخليتي عنا باوعتلهن والدمعه بطارف عيني گبل نزلت?اسها يمكن حست بذنبها تجاهي.
أنفتح الباب ودخلت عادي لن ماكو غريب كلهم أهلي عمامي ولد عمامي وخوالي كعدت بصف بابا وعصام صار گبالي ابتسملي كانما يبث الطمأنينه لروحي.
أبتدئ الكلام وأني منزله?اسي وعمتي لازمه أيدي.
وطلبوا موافقتي بقيت هادئه واسترجعت ذاكرتي لأكبر اغلاطي وكلامه اليه اذا ما وافقتي ما يجرالج خير وهواي كلام گاله وگتها خوف الدنيا كله انزر? بروحي واني مغمضه وانفاسي تتسارع ويه طبول ودقات گلبي بلعت ريگي وگلت موافقه وهو كذلك وافق واتم العقد وصارت أسيل ل مروان.
أرتفعت اصوات المباركات وضحكة عصام ورافع نغماتها تردد بإذاني وسمعت صوته من گال.
مروان الله يبارك بعمركم مشكورين يابه ما قصرتوا نخدمكم بأفراحكم يارب ممنون منكم
أسيل باستني عمتي من عيوني وگالتلي
وصال مبروك حبيبتي شايفين كل الخير يله
سلمي على عمج كمال
أسيل رفعت البرنص من وجهي كل ولد عمامي موجودين گبل نزلت راسي بخوف ومشيت ناحيته وباسني ويضحك وباركلي ومروان بصفه باوعلي بنظرات أنتصار وغمزلي وضحك بخبث يعني
صرتي الي.
كمال الف مبروك والله يسعدكم ان شاءالله وصار عندي ثلاث بنات وغلاتج من غلات ازهار وأسيا.
أسيل تسلم عمو الله يبارك بيك وربي يخليك النا
عصام مبروك عيني واحلى من تكون جنتنا وبيناتنا
الف هلا بيج بعائلتنا والله يسعدكم أن شاءالله
اسيل تسلملي ربي يبارك بعمرك ويحفظك وولد عمامي يحجون على مروان ورافع أبن عمي داوود
گاله.
رافع لك مروان تقدم بوس خطيبتك وباركلها شبيك يحظي ادك ثكل برأسنا يله مروان يله انت ذيب عليها شوفنا بطولاتك.
ناجح هذا ما عنده بطولات يم النسوان يتراجف
مظفر گلبه رهيف
عصام دير بالك يهزنوك خليك جبل ما يهزك ريح
فاضل عوفوا ولكم يستحي
أسيل ضحكوا ونصبوا عليه واني مشيت وطلعنا ويه عمتي وهما ضلوا يسولفون واصوات ضحكهم واصل لعدنا
جديتي تقدمت باستني وباركتلي وكالت.
الحجيه نعيمه مبروك والله يسعدكم واريد منج تخلين مروان بعيونج واديرين بالج عليه هذا عزيز گلبي وههو حنين وگلبه طيب يا بختج بي تستاهلينه
أسيل الله يبارك بيج جده ان شاءالله، باركلي كلهم وازهار واسيا اخذن وياي صور والكل اخذن ما عدا امي وهديل حتّى نسوان اخواني الما ارضى عليهن الهن موقف حلو هاي اسماء شكد جانت حقيره تعدل بمكياجي وتقدم ضيافه وتهلهل واخذت
صور وتبوس وتباركلي يعني الها موقف حلو.
ارتفعت صوت الاهازيج والاغاني ترمز لعز والفخر واصواتها كلش عاليه وصار صوت رمي طلقات كلش عالي واسيا فزت وشهكت بخوف وضربت على صدرها وگالت
اسيا يمممممه هذا عصام.
اسيل اسيا ركضت برا بخوف والكل طلعن ورراها واني وراهن ولد عمامي كلهم وأخواني وياهم فاتحين السيارات ومشغلين أغاني وعصام ورافع ابن عمي داوود هم عسكري يضربون بالرشاش بالسما ويضحكون عصام ورافع شمروا الرشاش بالسياره وجديتي كامت تحجي عليهم وهما عادي عدهم ويضحكون
الحجيه نعيمه ليش ما تجوزن من هالسالفه شله داعي الرمي عمي والله درينا انتوا دوله بس لاتنجلبون هذا سلاح مو لعبه
رافع اليحاجيج عسكري جده.
الحجيه درينا والله درينا والله يضرب بعد ما يلوم الا نفسسه وعمامكم ليش ما طلعوا عليكم جايزين منكم كومه زلوم
رافع حصلنا موافقتهم والذيب قنعهم
الحجيه فلا ينگدرلك امشي مريتك فحطت من الخوف وجهه صوفر الله يعينها عليك وعلى سوالفك.
اسيل اسيا طلعت وكفت وعصام اشرلها ترجع وخطيه رجعت خايفه عليه توني ردت ارجع جنت بظهر ازهار أندار علينا وصارت عيونه مثل لليزر بعيني وابتسم ضل مركز نظراته ناحيتي والشمس ضاربه بوجهه تجاهلته هو ونظراته ورجعت وياهن
كعدت وياهن وطولوا الزلم حبوا الكعده لن صوتهم عالي وضحكهم واصل لعدنا أسيا گبالي تكتب سريع وازهار كذلك واجت هديل جابت جاي لن جديتي طلبت وقدمتلي أخذت منها وكالت.
هديل فضلتي الغريبه عليه تاخذين صور ويه أسسيا بس وياي ما تكلفين على نفسج تكولين تعالي ناخذ صوره مع الاسف عليج
أسيل ما جاوبتها ورجعت تضيف الكل واسيا كامت قبل لاتوصلها هديل ودخل عصام حجه ويه جديتي دازين عليها لزم ايديها ودخلت يمهم واسيا رجعت كعدت بصف ازهار ويباعن بالتلفون ويضحكن وهديل حسيتها تريد تنفجر راحت المطبخ ولحكتها شبيج تخبلتي
هديل شفتيها شسوت فدحقيره.
أسيل أشسوت قابل هي وحماتها يشوفن الصور وشعليج بيها خليج بنفسج أنتِ هم مو قصره
شمسويتلها قابل وحده ما تحترم شيسموها اقدملها الجاي وتتكوم وتعوفني بس خل تصبرلي اذا ما كلت لرجلها على كل تصرفاتها خلي يعلمها اوادمها الخايسه.
لا بالله أنتِ ما ناويه على خير بابا عوفيها لاتخلين عقلج وياها رجلها ومن حقها تغار ليش تجيبين الحجايه لنفسسج گوه.
أكرمينا بسگوتج بعدج بيت اهلي وكمتي أدافعين الها لعد تسكنين يمهم شتصيرين يمكن بعد ما نشوفج تتبرين من عدنا.
ما أجاوبج احسن عفتها ورجعت واسيا تحجي بكل لطافه هي وعمامتي وجديتي وحسيت جديتي هواي تحبها وتعزها وعماتي يقدرنها ويحترمنها فارضه وجودها وشخصيتها طاغيه عدها لباقه بالكلام ونفس الوقت أجتماعيه بلطافه وبينلي علاقتها كلش قويه بعمتي وصال وازهار عبالك أختها موو حماتها.
شوي واجه مجد وگال.
مجد أسيا يمه دزوا عليجن علمود المهر
أسيل كامن عمتي واسيا واجه عمي حجه وياهن واسيا طلعت من جنطتها علبه لونها احمر وانطتها لعمي كمال وعمتي وصال جابت صندوق عرفت جايبين مهري اخذوا ودخلوا الاستقبال.
شوي وطلع حارث صاح لأمي انطاهن الها ورجع الهم ودزوا عليهن وصار الوقت يرحون كامن بوستهن وعمتي تبوس بيه وكالت
وصال وجهج ليش اصفر كركم
أسيل ردت احجي وهديل سبقتني وگالت
هديل من الخوف عمه تعرفين عروس ومرتبكه.
وصال هاا اذا هيج عبالي مريضه يله يمه مع السلامه عود نتخابر علمود حفلة الخطوبه
هديل ان شاءلله عمه انتوا فصلوا واحنه نلبس.
وصال احنه أهل وأسيل بنيتنا.
أسيل حسيت عمتي ما تريد قرب هديل طلعن واني ضليت بالصاله دايخه ونفسي مخنوگه.
راحوا ودخلوا ابويه واخواني تقدمت بابا باسني
علوان الله يسعدكم بنيتي وبيت عمج كمال صاروا حسبة أهلج صيري سباعيه ولاتقصرين وياهم.
أسيل ان شاءلله تقرب حارث باسني وكال.
حارث هسه أطمئنيت عليج الله يسعدج خيتي جان بنفسي اثنيجن جنايين بيت عمي الكمال بس بعد قسمه عالعموم اريدج ترفعين?اسي وراس اهلج كدامهم لاتفشليني يبعد أخوج
أسيل أشكرك أن شاءلله من حجه هديل نزلت راسها وباركولي كلهم ونسوان أخواني هم الا أمي وأختي كأنما غريبات عفتهن وصعدت لغرفتي وفتحت جهازي ودخلت هديل گبل غلقته وگالت.
هديل عود دزيت رقمج لمروان يتواصل وياج لازم تتعرفون على بعض قبل الزواج وشويه انطي من نفسج احجي سولفي بمواضيع لاتبقين كابته اعرفي منه شيحب شيكرهه مو تبقين مثل الصنم وبعدين تتندمين من تزوجين وتكومين تحاولين تعرفين منه
دزيتي رقمي؟
أي مو صار خطيبج
شدعوه هيج گاتله نفسج على مروان؟
لن أعرفه أنسان واعي ومتفهم وفاهم الحياة رجال عقله راكز ومن زمان جنت أتمناج اله بس ما أحجيلج وبالأخير اجت القسمه وصرتي اله وعرفت هما رايدنج اله من زمان وحاجيين بموضوعج وياج؟
رايديني اله منو گلج منين عرفتي؟
عمتي زينب گالتلي وعمتي وصال هي رايدتج أكثر شيء وفهمت عصام هم ومادح منج هواي
عصام ورده شگد صارت بينا خلافات وأنفصالج عنه هو ما تغير موقفه تجاهي حتى طلب الصداقه ما حذفه.
أي يله اذا يراسلج جاوبي واحجي وياه تمام
هزيت?اسي وما جاوبتها شجاوبها أبقى ساكته احسن وبالاخص ما أعرف شنو منتظرني!
وين صفنتي
يمج وين صفنت قابل أمي هم حجت وياج
أي گالت طلعنا ظالمينها ومحمله علينا ضيم وظلايم وطلعت اني الموخوش أم وكامت تبجي ليش هيج أسيل قسيتي عليها بكلامج مو أم وگلب والده ومن تنجرح الها حوبه.
شيءأكبر من طاقتي وما لكيت نفسسسي الا أنفجرت بيها، أنتِ ما تعرفيين من شنو عانيت.
ف لاتتدخلين وتنغثين خليج أخت وصاحبة موقف.
ماشي يله اني نازله الملم الهوسه صدك ما سالتي على مهرج
شبي
انطوه ل أهلي 20 وگالوا 5 تعب أمها و 15 الج وعصام جايبلج تخم ذهب كلش حلو بحفلة الخطوبه لبسي نازك مو هوسه تفاصيله ناعمه والمؤخر ما اعرف والله ما سألت يله شتردين بعد صرتي جنتهم تعيشين مدلله عدهم
اي هزت?اسها وراحت فتحت تلفوني ولكيته كومه متصل عليه أخر شيء دازلي
مروان وين موليه ليش غالقه المهجوم.
أسيل ما جاوبته وأتصل ضليت صافنه على الأتصال شحجي وياه يربي فتحت خط الو مروان
مبروك صرتي من نسواني
ما جاوبته
كلشي راح يصير على أتم وجه بدون اي قصور خطوبه وحنه وعرس وغصباً على?أسج تتصرفين طبيعية مثل اي عروس تتزوج وجهج اليلطم اشوهه الج اذا يضل هيج
ماشي
شنو أكول تكولين نعم حاضر وتأمر
ماشي
ديله ولي.
ما جاوبته وقطع الخط رجع نشر حالة على الواتساب كتابه انها اللعنه؟ تجاهلته لن هيج شخص التجاهل اله كلش كافي على حجمه.
لليل جنت نايمه ومالي خلك صعدتلي هديل صايره نار شبيج شگوو
هديل هاا زوجة عصام ما ناوية على خير أبداً
أسيل شبيها انطتني التلفون وشفت كلامها وياها وليش جاوبتيها وكبرتي الموضو? وبعدين كلامها صدك شگوو تعلقين على منشوره زايده منج.
دنجبي شنو زايده مني ترة أبن عمي وبعدين هو صديق وياي وناشر صور مالت خطوبة مروان ومسوي ل أخواني ولد عمامي كلهم أشاره بالمنشور وطلعلي وعلقت حالي من حال بناتننا وين الغلط؟
حتّى لو شگو تعلقين اله مو بس مرته لاحظت ترى هواي من أقاربننا راح يلاحظون وكلها تدري جان يحبج وخطيبته السابقه ف اشوفه أنتِ عايله وتتحرشين ب أسيا الافضل حذفي تعليقاتج والغي الطلب.
ما احذف هي شعليها والطلب طلع هو لاغي ما اعرف من شوگت مبين عليه يرجف من عدها صاگرته ومسيطره عليه
مرته أنتِ شگو بينهم
وأني شحجيت قابل
هاج تلفونج وصيري أدامي
دنجبي شهل الحجي ليش شعندي وياه قابل
نزلت مزعوجه والله ياهديل أنتِ غريبه عجيبه صرت ما أفهمج شتردين بالضبط الله يهديج.
فتحت تلفوني ودخلت قريت التعليقات وشفت مروان راد على هديل وكاتب الها.
مروان حذفي تعليقاتج لاتسويلنا مشكله تعالي خاص وباركيلي؟ وهديل ما حاذفه التعليق ثواني وتعليقها طار انحذف!
ورجعت اقرأ التعليقات اسيا معلقه اله كاتبتله مب?وك عيني تستاهل كل الخير بالرفاه والبنين راد عليها ام كرم العلم ربي يبارك بعمرج تسلمين غلا.
ازهار معلقه مبارك أخوي وحبيبي وسندي وروحي من الدنيا وربي يسعدكم تستاهلون كل الخير مروان راد عليها عيني وماي عيني حبيت الرد طلعت حنين! واني صافنه انطيت اعجاب لرد بدون ما أنتبه گبل لغيته وهو وگبل دزلي
مروان شعندج نايمه بالفيسبوك؟
أسيل شفت المنشور والتعليقات ليش حرام لو مننو?
وشعليج بالتعليقات
هيج والله
شوكت تنامين
هسه
ماشي يومين هيج اجي اخذج نعقد محكمه
ماشي
يله طفي الانترنت وعوفي التلفون
ما عندي شيء والله.
طفي وبلا لغوه زايده
ما جاوبته فصلت الانترنت وخليته على الشحن. وكمت غيرت ملابسي وگبل نمت حتّى ما تعشيت لن تعبانه نفسياً وجسسدياً حابة أرتاح واصفي?اسي.
أسيا رجعت البيت وطول الطريق ساكته حيل أنقهرت منها اريد احجيله شگالتلي دايسه بصاطي؟ بس اني وعدته ما اجيب طاريها وموضوعها ينقفل
عصام حبيبي وين صافن
أسيا هاا عيني
وينج
يمكم وين قابل
لا مو يمنا جنتي صافنه شبيج
ما بيه شي گلبي، لزمت أيده وأبتسملي ابتسامته هونت عليه گلشي وصلنا البيت هو شال كرم وأني جود دخلنا مملكتنا كعدت أغيرلها ملابس وهو استلم كرم غيرله ملابس وراحوا الاسواق يشترون.
غيرتلها ورضعتها وكعدت انوم بيها ودخل شايل كرم خلاه بغرفته ورجع غير ملابسه شنو تطلع گلبي
عصام اي والله رافع والولد يجون علينا خاف اتأخر نامي لاتتنظريني
اتعشيت
اي حبي وعشاج موجود ضميته الج على الكاونتر
فدوه لروحك
بوساتي يله فيمالاا.
راح الله وياه وكمت غيرت ملابسي وطفيت الاضويه وفتحت تلفوني ودخلت الفيسبوك عصام ناشر منشور وكاتب مباركه طويله عن خطوبة الاخ ومن العمام كل وكل والعشيره والخ.
ومسوي أشاره لكل عمامه ولد عمامه حتّى اخوان اسيل ضليت اباوع الصور الاخذوهن يم السيارات وبعدها بالمضيف ومن طلعوا وكلهن حلوات ومليانات جمال وفخامه.
دخلت أقرا التعليقات وعلقت ومروان رد عليه ودخلتله خاص صاير لطيف
مروان مو بلطافتج عيني.
اسيا الله يسعدك تستاهل
تسلميلي غلا.
أسيا رجعت اكمل قراءه التعليقات وانصدمت بوحده ركزت زين ودزيت حسابها ل ازهار منو هاي
ازهار ليش
اسيا منو هاي
يمعوده عوفيها
هديل مو.
أي هديل بس عوفيها
رجعت أقرأ بتعليقاتها مرتين معلقه
هديل ولد عمي العلم منورين عيني ربي يحفظكم
اسيا ايععع اللواكه ايععع انوب معلقه
هديل الف الف الف مبروك ياعيني تستاهل كل الخير شايف خير ومستاهلها يا ورده.
اسيا ايعع ايعع اوفر شگو تعلقين على منشوره هاي وين تريد توصل ما تحملت دخلت الها خاص
دزيت الها لايك ومرت نص ساعه وردت
هديل منو أنتِ
اسيا أنتِ صدك ما تستحين شگو تعلقين اله بإي حق من سمحلج.
هديل عفواً ومنو أنتِ بلا زحمه
تسوين روحج ما تعرفين اني زوجة الضابط عصام
أهاا وشتردين هسه
اظن حجيت الج شريد مسحي تعليقاتج يله وبلا مطرود ما اريد اخلي راسي براسج لن الداخليه مانعتني مو لن علمود مشاعر حضرتج لا بس علمود لا يزعلني
تدرين خوفتيني أنتِ والداخليه مالتج بابا شكد فارغه أنتِ واني ما فارغتلج
والله حقج متخافين اذا مره متزوجه وتعلق لهذا وهذاك
شبيج أنتِ ترة ولد عمي
وزوجي اوك.
وابن عمي قبل لا يصير زوجج حبابه
وين تردين توصلين أنتِ
ههههه وين اوصل قابل وبعدين هو مسوي اشاره ل اخواني وطلعلي وعلقت ليش لازم اخذ اذن منج لازم مخليج ضمن الحمايه مالته وتنبحين من يمج
انقهرت من كلمتها گبل بجيت مشكلتي ما اعرف ارد هيج نماذج تافهه كتبت الها لا حبيبي اني الملكه مالته اميرته وأنتِ وامثالج الحمايه مالتي خوش.
امثالنا كلتي عرفت شنو اليوجعج ترى حبيبتي جان حبيبي وخطيبي السابق خاف ما عندج علم واني عفته الج من زمان ولو اريده جان اخذته ما بقيته والانفصال صار من قراري واذا تردين ترضين فضولج سألي وهو يجاوبج الانفصال جان قراري لو قراره اصلا هو ما راد ينفصل بس اني العفته الج يا حضرة الملكه؟
صدك ما تستحين أنتِ وما تعرفين تحجين.
أنتِ تعلميني احجي بابا عقلج الوسخ نظفي وثقي بنفسج قبل لاتثقين برجلج اذا انت ثقتج بنفسج مهزوزه وكاعده بالتعليقات شسويلج اني
ما جاوبتها بس احتركت
وبعدين اني صديقه وياه وروحي تاكدي
جذب لاتجذبين
ههههه على شنو اجذب والله ما فارغه الج
رحت شفت ماكو صداقه ليش تكذبين انتي مو صديقته ماكو صداقه بينكم
احتمال لغه الطلب شدعوه هيج مخوفته عالعموم يله باي.
أسيا قريت كل كلامها واني ابجي وتلفوني بيدي واشهك ومروان گبل دخلي خاص
مروان شگوو شصاير أسيا احجيلي
أسيا ما صاير شيء
مروان اذا علمود تعليقات هسه احذفهن لحظه
أسيا ما فهمت عليه منين عرف بس توقعت هي حجتله بهل الاثناء اكتب وابجي ودخل عصام أستغرب شكلي
عصام ليش تبجين شگو منو وياج؟