رواية بين قلبها وعينيها كبرياء للكاتبة شمس العراقية الفصل التاسع والسبعون
أسيل تخربطت وأخذوها ولحكتهم يردون يشدون الها كانونه ما تخليهم الا ازهار صاحت بيها وكامت تحجي عليها.
أزهار أسيا گافي عاد خل يشوفون شغلهم تردون تموتين تعترضين على أمر الله شطالع بيدج وبيدنا غير ندعيلهم ليش اني أخويه رخيص عليه بس لازم تصبرين وتدعيله يطلع بالسلامه گافي رحمه لأهلج گافي جهالج يتصارخون عليج ما گافي أبوهم أنوب أنتِ رحمي حالج وحالهم خطيه.
أسيا أني اني اني كله مني أني الله يأخذني كله مني ينكص لساني ينكص لساني ولج دعيت عليه دعيت عليه الله يصخم وجهي الله ياخذني ولج ازهار اذا صارله شيء والله اموت والله ما أعيش والله مو قصدي من دعيت عليه جعل لساني الكص جعلني بالشل والله مو قصدي جنت عصبيه ومتعاركين ومقهوره منه ومرام خبلتني واني الثوله والغبيه صدكتها سوده بوجهي سوده بوجهي.
أسيل ازهار حضنتها وتسكت وهي تبجي وصوتها مطبك دموعي تجري عليهم وعلى عزيز گلبي لحد الأن ما شايفته تلوعت وروحي فرفحت عليه وعندي وجع لويات ومغص يجي ويروح بطني تعصر بيه بس كاتمه الوجع لان مو دائمي يروح ويجي.
شدوا ألها المغذي وهي بس تبجي وأزهار كاعده يمها يمكن أنطوها منوم لأن نامت وازهار گامت ها تروحين فدوه أخذيني? مروان دخت وما اندل گلشي وگلبي مثل النار أريد أشوفه.
أزهار هسه خل أسأل وأشوف أبقي يمها هسه أجي
أسيل لاتتأخرين فدوه
أزهار لا عيني هسه ارجعلج كعدي أرتاحي أنتِ هم تعبتي من الوكفه.
أسيل راحت وكعدت وتذكرته وتذكرت شگله من نزلوا سوده بوجهي مسحت دموعي واسيا كعدت وفزت مخروعه أسيا عيني اسيا
أسيا عصام عصام عصام كعد مو كعد واني اهنا شسوي بالمغذي شسوي بي.
أسيل جرت الكانونه بكل قوتها وشمرتها خلت الدم ينزل منها ولبست شالها وطلعت اسيا ولج اسيا ايدج تذب دم رجعي فدوه اروحلج.
أسيا أسيل عوفيني رحمه لأهلج عسى ما دمي يصفر عوفوني عوفوني أروحله.
أسيل حاولت وياها ما يفيد والممرضات حاولن تالي عافنها لحگتها وعمار ركض عليها خله كلنكس على أيدها وقطع الدم كعدها بصف عمي كمال حجيتلهم ما ترضى حاولنا وياها ما يفيد.
كمال عوفوها لاتلحون عليها عمار أبني كول الهم يجون يشوفونها أهنا يله ابني.
أسيل راح عمار وجاب ممرضه خطيه شدتلها وراحت وأباو? كلهم متجمعين ننتظر عصام واني مشغول بالي وگلبي مثل النار بس أريد واحد يوديني عليه وكلشي ما أندل دايخه ومنا بطني شكبرها وعندي وجع واسحل بروحي وجابولي سيدرا تبجي سگتها ونامت بحضني وأحس تعبت شايلتها واكفه ماكو مكان اكعد وبهل الأثناء أجه رافع وكام يحجي سريع وبصغية أمر.
رافع يله يله الكل يله أمشن ولا وحده تضل أهنا ولا مره التفت وما الكه ولا وحده شعدجن باقيات وتارسات المستشفى أنتن وجهيلجن بس تلمطن على?اسنا خبصتنا يله امشن بس كم زلمه يبقون.
كمال رافع أبني عوفهن ما عليك بيهن.
رافع ما عليه بيهن ليش شگوو باقيات وبعدين ما عدنا نسوان بالمستشفيات يفترن مكانهن البيت خل يلمن جهالهن ويكعدن بالبيت وطفل وبالمستشفى شنو بقيته هالاطفال تلعلعوا وهوسه علينا وعلى الأطباء هذا مكان لمريض مو روضة أطفال.
وبعدين عصام بالعمليات ومروان جاي يسون اله فحوصات شيسون الهم اكو دكتاره يشوفون شغلهم واحنه زلم موجودين النسوان وهالجهال مالها داعي خل يمشن وجودهن ماله داعي بس يلطمن ويفاولن وينقطن بالموت.
وصال وانت محترك دمك أطبك على صفحه النسوان التحجي عنها نسوانهم يخافن على زلمهن وين ادزهن والوعهن وراهم وين ادزهن لا عاد ولا وحده تمشي كلهن يضلن يمي وگبال عيني محد اله شغل لاحد يتدخل ويصير حامي العرض ب?أسي خلونا بمصيبتنا.
رافع عمه صُدك تحجين شگو باقيات لخاطر الله وهالاطفال شگو شالعين گلبهم ومستشفى وأمراض وأشكال الدنيا بيها عمي ماكو هيج حجي بس يطلع من العمليه خل عمار يأخذهن للبيت ماله داعي باقيات فضحنا والله وهما لو يدرون يطلعوهن منا بجلاليق والدفرات عمي احجيلك حجايه شو ساكت
كمال عوفهن عمي مو وگته هسه ما تشوفهن وين أخذهن للبيت بهذا الحال.
رافع لا عاد تأخذون غصب عليهن ما عدنا نسوان يضلن بالمستشفيات شگوووو باقيات يله يله كلمن تاخذ جهالها وتمشي يله يله يله تحرگن ماكو واحد ب?اسه عقل وياخذهن لو مأخذين وضع الصفنه والله انت دواجن من ساعة شفتجن باب المستشفى ادزجن للبيت بالقندره واكفتلي ويتلاطم كدام خلك الله مو عدنا تصوير مسلسل فضحتنا والعباس مخازي وهما ضباط عيب نسوانهم يبقن يله عمار يله تحرگوا امشوا اكلعوهن بالبيت.
هشام العفو وأنت شعليك أهلهم مو غربه واكفين گلبهم محترك شكو هالحجي عليهن عيب عليك لو تحترم نفسك لو تحجي مثل الأوادم لا شفت نفسك ماكو احد يحاجيك ويردك أنهديت عليهن
رافع ليش يابه شعليه أنتَ شعليك لأن غريب وأني منهم وبيهم أنت شکو بالبنص حشرت نفسك وهذا عرضي ومحسوبات عليه وما اريد احد يجيب معدلنا بكلمه ياريت تطبك على صفحه لو تمشي منا محد رايد منك تتنظرهم مسويلي بيها محامي دفاع وعلى النسوان والله وگت.
كمال رافع أحترم نفسك وثمن كلامك واحجي عدل التحاجي نسيبي وابني وحاله من حال ولدي ما أسمحلك تحاجي بكلمه ولا تتدخل بينا وبناتي يبقن يمي ما يروحن ومحد اله دخل اني أبو العائله والمسؤول عنهن واني أريدهن يبقن كدام عيني لما يطلعون ولدي وتصرفات الهمجيه مالي شغل بيها اطبك على صفحه وكثر الله خي?ك على خوفك وحرصك.
رافع ماشي عمي مثل ما تريد بس يطلع عصام من العمليات بالسلامه وگتها إلى كلام ثاني الا أجيب كيه واحملهن مثل البهايم ترضون ما ترضون.
أسيل عمار راد يهجم عليه بس عمي منعه
رافع مد ايدك يا ابن عمي مد أيدك بيك خير تأخذهن البيت مو مخليهن كدام الرايح والجاي بس يصي? خير هسه يطلع عصام ويجون القاده مالته جماعته بالسلك العسكري عليه إذا بقيت مره أهنا.
أسيل مشه يهف ومحد حجه وعمتي فريال وعمتي زينب راد يمشن عمي فاضل اجه ومنعهن.
فاضل وين كعدن هسه خل يطلع عصام بالسلامه
كمال أمي تگول بس مروان يأخذونه لغرفته خلي ولدك يحجز غرفه الهن ولجهالهن تبهذلهن خطيه
كمال مجد بابا امشي أحجز الهن غرفه خل يكعدن بيها هنا وجهالهن يله أبني.
أسيل مجد مشه واني واكفه أيدي تمخلت وهي نامت وازهار واكفه يم عمتي وصال وتبجي وياها باوعتلي وهشام شافني وأجه عليه.
هشام أنطينياها عنج وتعاي كعدي أرتاحي
أسيل رحمه الله والديك لا اروح أشوف مروان هز?أسه خطيه نقذني لان والله تعب فدمره أيديه تخلعن ورحت على عمار لكيته يخابر خلص أتصاله ندسته بإيده عمار
عمار ها أسيل شرايده
أسيل أگولك اشو نسيت مروان تعال وياي ادوره ضيعت الممرات تاهت عليه گلشي ما اندل
أمشي وياي جاي يسون اله فحوصات
أخذني اله اريد أشوفه.
وين أخذج عمي أمشي كعدي بدون شيء هذا رافع وياه اذا شافج يسولنا مشكله واني متحمل عليه كلبي واكف على شع?ه لان هواي زبل واحد همجي ومتخلف النسوان مكانهن البيت صاريلي زلمه على النسوان.
وأني شعليه بي شُنو مًا أشوف مروان من وره رافع وهو شعنده ويه مروان وواحد منكم يروح يم مروان.
اسيل فدون لعينج ترى مروان ما عايفينا بس أطمئينا على وضعه وعمي فاضل هم يمه ولد عمي كلهم ما عايفينه حارث هم موجود وياه بس احنه لان وضع عصام مخطر مكابلينا وكاعدين وهسه بس اشوف الوضع اني اجي أخذج اله والله أمشي روحي كعدي هسه.
هزيت?اسي ورجعت أخذت سيدرا من هشام كعدت لزمت شالي وسگتت وأباوع أسيا ما نشفت دمعتها وعمتي باوعتلها وكامت تبجي بالزايد ياربي طلعه بالسلامه وبهل الأثناء اجه رافع يمشي سريع والكل باوعوا عليه وحجه سريع وبعصبيه.
رافع عمي اللواء والقاده العسكرين وكل جماعته أجو يطمئنون على وضعه.
كمال خير أن شاءالله بس محد بلغني
أسيل عمي طلع مستعجل وعمار وياه ورافع مشه وراه ورجعلنا وهشام تأفف بقلة صبر.
رافع عمه أخذي جناينج وروحي منا يله لازم النسوان تمشي منا عيب أنفضحنا يله اني راح اخذجن يله امشن كدامي يله هسه يجون عليهم هسه وصلوا تردن تخرنا العالم تعلج بلحمنا
فضحتنا تحرگن يله.
أسيا وأنت شعليك كل شوي جايينا وتهوبز علينا ويجون يجون على عمي وطلع عليهم بعد شکو تركض ورانا امشن وامشن.
رافع شُنو شعليه احجي عدل لا أهفج بكف انومج بمكان عصام لا عبالج عصام بالعمليات ويطلع الج لسان عليه وهو شايفج بهل المنظر وبهذا لسانج يصعدج أعدام ستري روحج وتعاي حاجيني مو نسوان صراكيع غضب عليجن.
وصال لهنا وحدك لا عبالك زلمهن مو على روسهم تصير زلمه عليهن وبناتي مستورات مو أنت التحاجيني بالستر ستري روحج وستري روحج وهيج أنت حريص ومسويلي بيها حامي العرض ما تباو? على عرض ابن عمك وهي بمصيبتها وبهذا الحال اني أمه مخلت روحي مو عاد مرته واحنه عرضنا مو سكط نخلي فرجه للرايح والجاي بس گلوبهن محترگه وما احرمهن من شوفة زلمهن والله العالم تحجي حجي العالم ما يوكل خبز عندي.
والقاده العسكرين عمك خابرهم وبلغهم ما يجون وكثر الله خيرهم على جيتهم وعلى راسي مناك لهنا بس أنت إلى رحت جبتهم علمود تكلعنا منا بس ما تصير هسه اخذهن بغرفه وابقى حاطتهن وكاعده وما يطلعن من المستشفى الا زلمهن وياهن ترضى ما ترضى اكو مية حايط الطخ?اسك بي يله امشي منا ما ناقصتك تهوبز على?اسي.
أسيل ما حجه شيء مشه سريع وباوعلي بحقد ورجع باوع على سيدرا ويهز بإيده بإستهزاء عود. شايل هم الاطفال، واجانا عمار سريع
عمار يله امشن اجو ينتظرونه يطلع امشن بسرعه مجد حجزلكم غرفه يله هشام امشي وياي كرم حبيبي تعال يمه اكومج لو تكومين لوحدج.
وصال لاتخاف على أمك رأسي?اس سليمه گلشي ما بيه ليش ما أكوم لوحدي مكسره كايمه يمه كايمه عصام يمه راح أعوفك ينظر عيني بس راجعتلك يروح امك لاتكسر گلبي وتلوعني وراك يمه مو لخاطري لخاطر مريتك وجهالك لاتستسلم خليك قوي مثل ما أعرفك قوي مثل الجبل يله سبعي كلنا ننتظرك شد حيلك يمه وگوم.
أسيل أسيا تبجي وكاتمه صوتها لزمت باب العمليات وتشهك وازهار راحت سحبتها.
أسيا ما أروح وأعوفه خلوني يمه خلوني أنتظره فدوه رحتلكم خلوني يمه ليش تحرگون گلبي عليه خلوني يمه.
أزهار أمشي أسيا لخاطر الله أمشي ياعيني مو گيفنا اللواء والقاده مالته كلهم اجو خوما تبقين واكفه بنصهم عيب يا عيني وعصام لو شافج هيج مو يتخبل مو تدرين، يله عيني أنتِ يله امشي وياي هسه يجون ويضلون يعيطون علينا ما شفتي رافع شسوه ترى زلمنا ساكتين لخاطرنا بس من توصل الغرب يجون واحنه واكفين بنصهم يگبون بينا يله عيني يله.
أسيل مشينا وهشام كدامنا شايل جود ولازم ايد غزل وصلنا الغرفه لكينا عمتي فريال وزينب وجديتي جايات قبلنا كاعدات كعدنا وهشام جابلنا ماي محد شرب بس جديتي أخذت منه وتشكرته
الحجيه رحمه الله والديك وليدي اسيا اخذي بنتج ونوميها تملخت وكرم وينه خل يجي ينام وطعمن جهالهن شنو ذنبهم خطيه.
أسيل اخذت جود وعمار جاب كرم نومتهم وعمتي وصال كاعده بالكاع وتبجي اجه عمار رفعها يريد يكومها ما ترضى.
عمار كومي كعدي على القنفه ليش كاعده بالكاع
وصال عوفني عوفني ما أكوم ولا اتحرك من كعدتي الا اشوف ولدي واكفين على طولهم الا اخوانك يصيرون گبالي ما اكوم اضل كاعده بالكاع
عمار بس ما يصير يا عيني
وصال لا يصير، يمه أخوك مروان شلونه خنت حيلي ما شفته كالوا زين واطمئن گلبي عليه وضليت مكابله عصام وما سألت عليه.
عمار زين الحمدلله هم متأذي بس أهون هسه عفت القاده العسكرين والضباط جماعته يمه يعافون اله بالسلامه بس يكملون اله كل الفحوصات يجيبونه لغرفته وكلكم شوفوا بس هسه بعد انتظرن اهنا لاحد يطلع اني أبلغكم
أسيل طلعت عيني عليه وباوعلي وهزلي?اسه
يعني اصبري ضلينا كاعدين وشوي وأجه وكلنا فزينا بخوف ونباو? عمتي نهضت مخروعه
وصال ها يمه بشر أخوك طلع من العمليات شو طول.
عمار اي هسه طلعوا وطول لان حادث مو بالسوالف وجانت طابگه عليه السياره طبعاً يتأخر.
أسيا اني رايحه أشوفه
عمار وين وين وين رايحه ماكو طلعه منا الا أني أبلغكم وبعدين ما يخلون أحد يشوفه ويدخل عليه لحد الان ما صاحي أنتظروا وجده امشي دزوني عليج كالوا خل تجي تشوفه ما ادري عمي فاضل كال خل تجي علمود ترجعين البيت مجد يم الباب ينتظرج.
أسيل طلعت وعمتي تبجي تخبلت واسيا تلوب وتبجي تخبلت تريد تطلع من الغرفه لما عيب جان طلعت من الشباك فرفحت عليه وعمتي كامت تبجي وتحجي بعصبيه
وصال واني أمه ليش ما تخلوني أشوفه ليش تلوعون گلبي عليه أبوك وين ليش هيج تسون بينا
أسيا عمار الله يخليك خليني أطلع أروح أشوفه والله بس أشوفه وأرجع أباوعله من بعيد أحلفك بغلات كلمن عزيز عندك بس خليني أشوفه.
وصال وين موليه تردين تشوفينه بيا وجه تباوعين اله هيج صلافه ما شفت من الله أخذج وخلصني من لسانج الزفر ما ينقط بالموت موت الياخذج أن شاء الله كعدي بمكانج ولمي جهالج تشوفينه شافج عزرائيل.
ازهار يمه گافي يله عمار دبرها فدوه لعينك خطيه.
عمار يا عيني والله مو كيفنا المستشفى مگلوبه ترة مو بس احنه السياره اللي ضاربتهم هم عائله وابوهم مات بس انطونا مجال نشوف دربنا وبدون شيء محد يريد يخليجن اهنا تعاي شوفي عمامي شسوه بأبويه علمودجن شگو النسوان باقيات وشگو اكلوا رؤوسنا وشدوا وياجن والا هسه تمشن البيت.
وصال وهما شعليهم أني امشي بكيفكم أبني ما أعوفه الا رجلي على رجله.
عمار شعليهم ما شعليهم شنسويلهم نعاركهم ونفضح نفسنا كدام خلك الله هما هيج عقليتهم محصوره هي مو گوه كعدن وسگتن بس لما يخف الأزدحام اني اجي أخذجن وحده وحده بس صبرن عليه تالي لو ابتلي بيجن لو بعمامي من عمى العماهم اي والله.
أسيل طلع عصبي ومزعوج واجه عمي فاضل وعمتي فريال وزينب ودعنا وراحن للبيت.
فريال تضل يمكم العافيه وربي يكومهم بالسلامه شدي حيلج أم عصام أنتِ أنسانه مؤمنه وهذا أبتلاء ولا رداً لقضاء الله وحكمته.
وصال الله يسلمج عيني الحمدلله على كل حال الحمدلله الحمدلله.
أسيل كاعدين وعيني على الباب وأجه عمار باو? الهن
أسيا ها نروح نشوفه
عمار يله أمشن وأسيا جيبي كرم وياج ابويه يگول خل تجيبه هواي يحب أبوه بلكي يحس بوجوده ويصحى.
أسيل سوده عليه حبيبي لزم أيده امه يبجي هو ووياها وعمتي باوعتلها وكالت
وصال تبجين من سود الله وجهج يالمفنده ما الله أخذج حركتي گلبي من دعيتي عليه ولج تگه نعال ما تسوين من دونه وأبجي دم على كل دعوه دعيتي بيها عليه ضميرج شلونه هسه
أزهار يمه ما گافي عاد ترى طوختيها ساعة عصبيه وتدري بنفسها غلطان كافي بس كل شويه راجعه عليها تذكرينها ما تشوفين حالها يبجي الصخر.
عمار يمه لخاطر الله گافي هذا قدر الله المره شعليها قابل والده ودعوتها مستجابه.
وصال ليش منو گال الكم بس الوالده دعوتها ما مستجابه ليش الزوجه وبلحظة عصبيه دعوتها ما تستجاب وهي اكثر من مره أسمعها تدعي عليه اني ما خلفته ومخليه گلبي بين أيديه من يروح لما يرجع مية الف فكره تجيني نوم مثل الأمهات ما نايمه بس أفكر بيهم التحق نزل راح واجه وهي الخاتون بكل برود گلبها تدعي عليه كدامي وكدامه خلته يطلع من البيت مكسور ومقهور منها ومن قهرها كام ما يشوف دربه وگلب السياره كله من وراها الله يأخذها واذا صارله شيء قندره مكطعه ما تسوى من دونه.
عمار يله هسه مو وگته هالحجي أمشن أزهار ابقي يم الجهال هسه اوديهن وأرجعلج.
أزهار ماشي عيني أنتظركم علمود أروح أشوفهم وصدك هشام وين هم شفته
عمار يم أبويه الله يرضى عليه ما قصر.
أسيل راحوا وضليت كاعده عيني على الباب واجني وأسيا ما جايه وعمتي تحجي بعصبيه عليها.
وصال أمشوا اخذوها من گبالي خل تأخذ جهالها وتولي البيت.
أزهار لا اله الأ الله هسه شعليج بيها عوفيها بحالها لخاطر الله.
وصال لعد أخوج نايم هالنومه لأ أيد ولا رجل ولحد الأن ما صاحي وصارتلي الحنينه مكابلته وتبجي
أزهار شلون ما تبجي مو رجلها يمه رحمي نفسج ورحميها خفي عنها فدوه لعينج احنه بشده مو وكته هالحجي جاي تعترضين على أمر الله حرام عليج
أسيل عمتي كعدت بالكاع تشهك وتبجي بصوت وازهار كعدت وحضنتها وتبجي وياها يبجن الصخر واني مخليه سيدرا بحضني وأنتظر احد يأخذني اله واجه عمار هزلي?أسه ازهار باوعتلي خليها يمج.
ازهار ماشي عيني
أسيل خليت سيدرا بحضن ازهار وطلعت وراه ها عمار بشر اكدر أشوفه حباب الله يخليك والله گلبي مشتعل بنار على شوفته
عمار هسه رايح أشوفه بس يطلعون من يمه أجي اخذج كالوا يأخذونا قسم الأشعه وموزين عليج لان حامل خل يكمل فحوصات وعد أجي اخذج اله بس أصبري عليه
بجيت عمار هواي ممنونه منك
لا يابه شمسويلج أنتِ أختي الصغيرونه وأمانة مروان نخليج بعيوننه.
تسلم عيونك ما تقصر تمام أنتظرك تبلغني هز رأسه ومشيت وكال
أكولج تعاي صُدك ليش ما تخابرين? هناس تجي تأخذ سيدرا يمها أحسن ما تضل يمج واتعبج وأنت بطنج وصله خشمج وهم هي تبهذلت خطيه طفله
لا يابه لا ليش متعاجزه منها وأني امها والأم خل تسأل عليها بالأول بعدين أوديها و? أساس ما وصل ألها خبر ما عرفت بالحادث لو تريد جان هي أجتي أخذتها لا خليها يمي ما أنطيها وما متعبتني فقيره.
انهجم بيت حنيتج يله عمي محد يأخذها منج ابقي أهنا انتظري هسه اجي أخذج
ماشي راح واني بقيت يم الباب أنتظر وشفت رافع اجه بلعت ريك وصديت وجهي تقرب عليه
رافع شعندج صديتي وجهج عني شايفه عتوي كدامج وبعدين ليش لحد الأن ما وليتن للبيت
أسيل ما عرفت شجاوبه لان بس ينتر.
رافع ها أنتِ أدمي ما تتنرين زين محترمه نفسج أدعي ربج ما رفعتي صوتج بوجهي مثل هذيج القندره أم خشم جان لحگتج بمروان بس ميخالف اني الجن خل يكعد الغالي بالسلامه والي حساب وياجن اذا اخلي الج طير الطاير بكركوك.
أسيل مشه يهف هذا شاخط وربي خله?أسه برأسنا شبيك يحظي ملاحك النسوان هسه درينا ازهار ويانا بس مو هيج أثكل يحظي اثكل شويه واسمع صوت عمار.
عمار لج أسيل
أسيل أجيت مشيت سريع ها عمار
عمار تعاي وراي.
أسيل مشيت وراه وگلبي يدك سريع وأبجي مثل المخبله أختنكت واشهك وينه عمار وينه
اوكفي ننتظره اهنا هسه يطلع بالاشعه ومجبسين أيده ورجله عنده تمزق وكسور.
يمه سوده عليه يمه گلبي وكفت أنتظره وعيني
علي الطريق منتظره شوفته.
واكفين يم الخدج وطول وتالي كعدت عالكراسي تعبت أخذت نفس وبهل الأثناء أجه عالعربانه يمه عمري يدفعون بي وجهه مدمر كله خدوش وكدمات بس شفته روحي طارت عيوني كمت ما أشوف بيهن وكأنوا هالحسره الصابتني بس شفته وصل يمي وگبل كعدت بالكاع ولزمت أيده ابوس بيها وابجي انهاريت بشكل تخبلت فرفحت عليه.
مروان ردت أموت من دونك روحي طلعت من صدري موتني مروان بس لأ تعوفني فدوه اني اموت من دونك والله أموت أبجي وگلبي حترك كمت ما اشوف من الدموع حجه بصوت تعبان
مروان ما بيه شيء عيني أنتِ لأتخافين عمار اخذها وسيدرا وين.
عمار خطيه نايمه
مروان أسيل عيني كومي
خليني يمك خليني والله طگت روحي عليك
ميخالف عيني ميخالف كومي عيني عمار ساعدها.
كوه كمت سندني عمار بالكوه وكفت? طولي وصلوا الغرفه واني وراه وتمدد واني كعدت عالتخم ارتاح وطلعوا بقينا بس أني وياه تقربت عليه بسته من ايده فدوه أروحلك شلونك هسه
علي الله كافي تبجين.
شلون ما أبجي شلون شد على أيدي وأني أبوس بيها وأبجي وأشهك يروحي يعمري يگلبي دنيتي أنت روحي من الدنيا كلها أنتَ فدوه أروحلك من عمري لعمرك خله أيده على?اسي نفس حنيته وانفتح الباب أبتعدت ومسحت دموعي عمار جابلي سيدرا وعمتي وازهار وأسيا دخلوا وعمتي ركضت عليه حضنته وهو تألم وتبوس بيه من عيونه وايده تمسح على وجهه وتبجي وتقربت ازهار تبوس بكفوف ايده وهو متوجع سوده عليه.
وصال يمه سوده بوجه أمك موجو? وليدي شلونك هسه شلونك يبعد هلي كلهم
ازهار الف الحمدلله على سلامتك عيني أنت.
أسيا الف السلامه عيني
هشام الحمدلله على سلامتك عيني
مروان الله يسلمكم يمه كافي تبجين وعصام شلونه صحى مو سألت أبويه گالي زين صُدك لو تكذبون عليه.
وصال يمه أخوك طلعوا من العمليات بعده ما صاحي نباو? عليه و? الله.
أسيل ضرب?أسه ويصيح بأسمه
مروان لك خويه خويه كسرت ظهري خويه.
أسيل عمتي حضنته من?أسه وتبوس بي وكلنا نبجي وياه وازهار هم حضنته وتبوس بي وعمار انطاني سيدرا تبجي گبل نامت? صدري وتعبت نفسي ضاك عليه وجع يروح ويجي حيل تضايقت وتمددت وهو باوعلي حس بيه تعبانه بس موجوع سوده عليه.
وراحو ضليت يمه اني وسيدرا ومروان أجوا أنطوا علاجات ومسكنات ونام وعمار خطيه جاب أغراض لسيدرا سويتلها ممه وبدلت حفاضتها ونامت ما سوت شيء وبطني موتتني اجت ازهار كالت.
أزهار هاي عيني أمي دزتني عليج كالت خاف تجيب
أسيل وج وجع يكتل ويني وين الجيابه بس عندي مغص ذبحني يروح ويجي
أزهار هاي من كثرة الحركه وسيدرا هم تعبتج هسه ابقي اهنا وتمددي وأخذي راحتج ماكو أحد
أسيل عصام شلون صار
أزهار بعده ما صاحي سوده عليه.
أسيل تحجي وتبجي ومروان يعن ظهره يوجعه ورجله متأذيه هواي كله جسمه متأذي نايم سوده عليه صفنت عليه وتقربت باسته من?اسه وطلعت تشهك وأني كمت قفلت الباب وتمددت عالقنفه اندك الباب كمت فتحته
مجد أبويه حجز غرفه خاصه كومي ارتاحي علمود تاخذين راحتج أنتِ وسيدرا وكال ديرو بالكم على أسيل
أسيل لا خليني هنا يم مروان
مجد كيفج عيني.
أسيل راح ورجعت نمت ساعه وفزيت على صوته يون متوجع كعدت لكيته مصخن نار خابرت مجد ساعه فدوه تعال مروان مصخن نار ما تجي تكول لدكتور شيء يشوفه
مجد تمام عيني هسه أشوف الخفر.
أسيل راح ودقايق وأجو دكاتره أثنين وسيدرا نايمه بمكانها انطوه علاج وأباو? الدكتادره صافنين على سيدرا شلون نايمه وأيدها جوه خدها رائعه مثل أبوها، أوف شلون قهر وين جان إله هالمصيبه أختنكت وطلعت خارج الغرفه ما أريد ابجي كدامه ما أتحمل أشوفه يتأذى هذا روحي كون يندار الوجع بيه ولا أشوفك موجو? بجيت والعبره ترس صدري شفتهم طلعوا مسحت دموعي ودخلت لكيت مجد يحجي وياه وهو يسأل عن عصام ويجاوبه ويبجي على أخوه وصوته يرجف.
مروان مجد الله عليك بس گولي شلون صار لأتحرگون گلبي عليه واحد منكم يطمني لاتبقوني? نار حاجوني گلولي عصام شلونه ليش ساكتين.
مجد والله بعده ما صاحي وره العمليه كالوا ينراد يومين يلا ونخلي تحت المراقبه وننتظر لان وضعه بعده مخطر مكابلينا وكاعدين وعينا بعين الله والله يلطف بحاله وحالنا.
أسيل يبجون سوى ومجد يهدي بي حضن أخوه واني دموعي عشره? عشره أنعصر گلبي وبجيت وعيوني تحرگني والمغص منا التمن عليه راح واني تقربت عليه لزمت ايده وأبوس بيها يهون عليك تعوفني.
مروان أبداً شلون أعوفج باقي نايم على گلبج أگولج اشو رحت للموت ورجعت وأنت ما جبتي شسالفه كلت هسه الكه حكم يلعب طوبه.
لا تضحكني روحي فايره من الداخل
شسوي أهون عليج شطالع بيدي عليج يا عيني
مروان لأ تعوفيني
ما أعوفج حتى بجهنم لاحگچ.
وأحلى جهنم بوجودك
لازم ضامنه روحج ما تدخلين الجنه
كلمن وأعماله وربنا غفور رحيم
ونعم بالله يله كومي نامي ارتاحي يابه
كمت تمددت عالقنفه شمرلي الغطا صح جو عادي لا حار ولا بارد بس بطني مكشفه وضاهره تجيب العين تغطيت وأبتسمت له وهو صافن علينا ونمت كعدت على وجع قوي التفت سيدر تلعب بطني منطقه الصره خررب سيدرا عوفي حكم براحته
تباوعلي وتضحك وحكم يدفر عبالك عنده عرگه.
كمت من مكاني باوعتله نايم فدوه لنومتك رحت غسلت وجهي وضبطت شالي ورحت غسلت الممه وسويت إلها حليب وفتحت جنطه بيها موز وكلتها واني اشو محد فكر بيه ميته جوع حتى أستحي أكول جوعانه اكلت موزايه متت من جوع اكلت بسكت هم موجود وسريلاك سويتلها بالقبغ وكعدت اكل فد طيب سديت جوعتي وترست بطني يله هم يغذي وطيب ومن قبل من جانت نسرين تجيب لجهالها اني اكله وما انطيهم.
همزين قبل بوقت جنت مجهزه ملتزماتها سبحان الله وصار الحادث غسلت ألها عفتها وخليت الجنطه كدامها تلعب بيها.
ومر الوقت وصار الصبح گمت رحت للمغاسل واشوف روحي قطرات دم تنزل يربي هاي شُنو! وين جانت لي أستغفرت ربي وأستخدمت كلنكس حمام وكملت شغلتي وطلعت لكيته كاعد والدكاتره يمه جاين وقت الدوام هو هزلي?أسه معناها طلعي طلعت شويه برى راحوا واني رجعت عليه لكيت منطينه أبر ومغذيات وعلاج وصافن? بنته شلون تلعب بالجنطه وتضحك.
واني أنهضمت على روحي كلمن ملتهي بروحه بطني موتتني وجع ذبحني حسيت رجليه تبللن يربي شُنو هاي عبالي ادررت رحت المغاسل گوه امشي ومستحيه من روحي والعبايه كامت تلزك برجليه يمكن من الهبطه والتعب وقلة النوم صارت عندي أفرازت والا شُنو لعد! أحجي بگلبي ودايخه وهو حس بيه ما مرتاحه
مروان شبيج يابه كوه تمشين شصار وياج.
جاوبته لأ تهتم مابيها شيء ضليت واكفه هو يباوع وما يحجي يهز براسه اكيد جسمه يوجعه سوده عليه سيدرا تحبي بالكاع شلتها خابرت مجد يجي ياخذها خطيه اخذها وأني رحت المغاسل لان الوضع صا? مزري وهو صاح وراي
أسيل عيني شبيج.
ما جاوبته دخلت الحمام وشفت نفسي واكع دم وكع ماي والوجع لويات قويه وتعصر بيه انلاصت عليه خل اغسل واخابر ازهار وعمتي يجن عليه أخاف حكم بي شيء يما أسم الله يمه وليدي توني جاي أغسل بماي دافي أندك الباب طلعت ها ازهار.
أزهار ها عيني أسيل مجد كال وجهه أصفر شبيج أمي سوت فنى بيه تعاي شبيج
وج وجع يذبح وملابسي تنكعت.
خاف عندج ولاده تعاي أخذج لصالة الولاده يفحصنج أمشي وياي.
أخذتني كوه أمشي ساندتني دخلنا لصالة وأستلمني الممرضات وازهار تلفونها اتصل جاوبته جان هشام
واللي فهمته من الأتصال غزل واكعه على حلكها وغركانه بدمها بالكرسي مشكوكه لثتها كالت
أزهار عيني اروح وشويه وارجعلج بس لما أشوفها هذا هشام يتصل وما تسگت هسه اجيج تمام
أسيل هزيت راسي وهي راحت وحده منهن كالت
ممرضه روحي صيحي الدكتوره
ًأسيل اجت الدكتوراه صغيره قزمه تخبل
ماما أنتِ شكد عليج.
جاوبتها اخر دكتوره رحتلها گالتلي بداية شهري وأول طفل والصراحه ماكو وحده بيها حظ وحسبتلي اني بيا شهر لان طفلي جبير ينطي اكبر من عمره لهذا ما عرفنا يا شهر بالمضبوط
لج ماما طاك مي الراس وأنتِ ما تدرين عززا بعينج عندج ولاده.
لأ تضحكين عليه خلي بطني هسه مرتاح هو وجع ويروح شويه ويجي ويروح بقي بطني على أقل لما يطلع أبوه من المستشفى.
شبيج بنتي عندج ولاده طفلج نازل بس ادفعي عندج طلوكه شنو ما تحسين بالوجع بجر وأول بطن المفروض هسه صريخج شايل الردهه
سوتلي سونار كلما تسوي سونار وتلح عبالك جانت متقصده وتضغط موتنني وزاد الوجع عندي فارت روحي اعيط وادفر ولج راح أموت عوفيني لزمتني ممرضه كالت
بس ادفعي طفلج نازل بالحوض دفعتين تجيبين بطنج نازله والله شدي حيلج أي أي أنوب أنوب.
وياي واني أصيح وج يما لحكيلي راح أموت يما ليش عفتيني يمما راح أموت گافي ما بيه ما راح أموت التمن عليه واني أصرخ وكاتمه صوتي وأعض بإيدي
لج ماما دفعي قوي دفعي ساعدينا وساعدي نفسج طفلج يله حبيبتي يا ماما أي أي يله عفيه بالسباعيه يارب سهل عليها يارب يا على يا على يا علي.
أصرخ وادفع وابجي دموعي عشره على عشره روحي طلعت وأنهضمت? نفسي لا ماما أخت لا داده وهنا يبحوشن ودفعه وصرخه والدفعه الأخي?ه حسيت عبالك روحي انسحبت مني وأعلن عن تكبيراته حكم أفندي صوته شكد عالي واقققق وييييق أخذت نفس أنطيني أبني أنطيناه
بس نفحصه.
صرخت بيها كتلچ أنطيناه شُنو ما تفهمين أنطيني أبني جيبي أنطته اليه وأخذته منها وحضنته فرحانه وابجي والدكتوره راحت وهاي الممرضه فوك?أسي تفتر تريد تأخذه.
الممرضه ولج بس نفحصه نودي دكتور الاطفال خاف بي شيء ما تشوفين شكبره
عوذه عينج تف بعينج دكي خشب عوفنه عبالكم ماعرف سوالفجن تبدلنه ببنيه مثل ما صار بدار ودور بقاسم ملاك خليتوا يسافر للناصريه المسكين
هاي شتحجين مبين متأثره بالمسلسلات كلش لج شبيج خبله أنتِ منو جاي وياج عاد بس نلفه غراضج وين بينما نكملج خياط وانظفج غراضج لازم جاهزه.
ما انطي كلت ما انطي اركعي راسج بإقرب حائط وهسه تجي عمته وتأخذه أنتن شكو بي والله أبني ما انطي الجن تردن تبدلنه وتحرمني منه واني متت يله شفته والله ما انطي
ستغفر الله على على عقل هالبنيه بابا منو بحال هاي السوالف الطب تتطور الناس صارت تسوي انانيب محد ضال يبدل أطفال هسه ما علينا ابنج من حقج تخافين عليه عاذرينج لان وحدج بس هاج بطانيه لفي خطيه لحمه برى جاب العين عليج رأسه.
مربع بس الفه يولي لا تتخبلين عليه
أنتِ?أسج مربع والله ابو عسكري يهجولكم يوديكم سبعه بإسود اذا صار بي شيء من عينج تف بعينج لاتحسدينه
أگولج واذا أبوه عسكري قابل وزير وشمسوين لابن العسكري
مشكلتج والله ما انطي بالضيم يلا حبلت اني وياه نحسب يوم يوم من تصير ساعه 12 اكول بقى شهر
أنتِ محرومه من الأطفال موو؟
ما عليج معليج لا تسألين ما أحب احجي وياج ما تنطاقين مكروه.
أكولج تحبين تكرهيني طبج م?ض اروح اشوف من جاي وياج واخلص منج واخذ اكراميتي احسن من ما كاعده الغي وياج شسمج أنتِ
أسيل مروان غمتني والممرضات يضحكن ويحجن بينهم عبالهن اني خبله لو عقلي طگه ونص ضلت تصيح اسيل مروان تلعلع بصوتها هسه لو ضاله الدكتوره القزمه اهون هاي ما حبيتها شكلها ما يريح گلبي لعب منها خفت تبوك أبني شويه واجت ازهار فتحت عينها متفاجئه.
أزهار ولج عزه بعيني شوكت ولدتي عفتج نص ساعه الكه حكم افندي بحظنج.
عيني تعاي گملي الأجراءات علمود تلقحون الطفل شمرتوها ومشيتوا وخليتوا تهلهل علينا بلسانها سوتنا حراميه.
اي عيني هسه اجي هاي شبيها شتحجي
سكتي واخليها هاج أخذي أبن أخوج رأسه مربع يبجي أخذته ازهار وتبجي وتبوس.
فدوه لحكم فدوه لحبيب عمته من هسه اكربس بنتي براسك فدوه لراسك فدوه لأبن الغالي لك حكم أدبسزز مستعجل على الطلعه لك مرحبا والف هلا بجيتك يروح عمتك
عاط بيها وأخذتها وراحت تكمل الأجراءات وين واجتني
البيان اخلي هشام يطلعه ياخذ جنسيه مروان وجنسيتج وأول طفل كركوكي هههههه.
ماشي أكولج عفيه اشو نسيتني تعاي حيري بيه غرگانه اني وصخي يكتل ملابس گلشي ما عندي هذن كملن شغلهن ومشن.
أعذرينا فدوه لعينج عفناج بهيج يوم صعب أنتظريني اودي حكم يم أمي وامن عليه والحمدلله شافوا الدكتور الاطفال وفحصوا گلشي ما بي مثل الورد عيني هو نسيبي
لاتنسين الملابس فدوه
لا شلون هسه ارجعلج بس أمن عليه يم أمي سوده عليه لا ملابس لا شيء جسمه مكشف وهاي بطانيه لعبت نفسي منها هسه الفه بطانية سيدرا ونجيبلج ملابس تمام هسه ادزلج اسيا.
ماشي راحت واني لوحدي دقايق واجتني اسيا وجهه أصفر نوميه عيونها وجهه كله بنفسجي صاير خلقتها متشوهه من كثر ما لطمت وشفايفها مفطره كوه حاجتني صوتها ما يطلع مطبك
أسيا الحمدلله على سلامتج.
أسيل الله يسلمج عيني خطيه كومتني كوه وعندي وجع بالحوض أكولج اسيا شو بعد عندي وجع
هسه أخلي دكتوره تشوفج تكتب الج على علاج لان أول بطن الج واكيد شگنج وخيطنج.
ماشي عيني أخذتني الحمام شغلتلي ماي دافي وشطفتني وبس تبجي اسيا عوفي اني أكمل
لا عادي وينج وين تغسلين
خطيه كملت لي ونزعت عبايتها لابسه ثوب طويل مستور شكد حلو على خصرها لبستني عبايتها بس غطت جسمي لان ملابسي كلهن ما يرهمن
ازهار نمتي خوما نمتي
ليش وين راحت
مجد اخذها تجيب ملابس وشغلات الج ولحكم
طلعتني وعندي وجع ضليت كاعده وهي يمي لفت شعري واجتي أزهار
ازهار ها عيني جبت گلشي
أسيا جبتي عبايه اريد اروح على عصام.
ازهار اي هاج بس هاي على قياس أسيل يولي أنتِ جنج عامود
جيبيها مهم فوك ملابسي يله عيني اسيل تضل يمج العافيه اني أروح عايفه گلبي وروحي أهناك أعذريني ما اكدر كوه واكفه واحاجيج.
ماشي عيني روحي خطيه راحت وازهار ردت الباب ولبستني وسترتني ولبست عباية أسيل تسحل وراي
يله تمشاية حال لما الله يفرجها علينا.
لبستني بونت لفت شعري وشال ضبطته وجواريب لبستني بإيدها لبستهن انطتني كمامه.
هاج سدي حلكج تره نص سنونج يوكعن من تطلعين موتي روحج كدامهن هسه كلهن يتحاجن بينهن أول بطن وأبنها شكبره كبل كامت ولا عبالك جايبه العين ما ترحم عوذه من عينهن.
لبست كملت اني طلعت وما كلت باطل تلزمني منا اوكع منا وأمووت روحي وهنا اجا يتراكضن عليه
شبيها وشبيها
أزهار عيني راح ناخذها لغير مستشفى عدها نزيف.
لا يمعوده هسه نشوفها ما بيها شيء جانت مثل الورده واصلاً عدها توسيع ولادتها فد سهله ماكو هيج أبداً ما تعبتنا بس للامانه وكحه حيل وكحه
لا عيني وين عدها نزيف هسه خابرت أخويه راح نطلع بيها لمستشفى خاص نخاف عليها ونطمئن على وضعها.
ها عيني براحتكم ووالله أحنه ما قصرنا
اي عيني فدوه لگلبج قابل ما ندري عاشت ايدكم يله مع السلامه حبيبتي يله أسيل موتي نفسج.
خطيه كامن يخافن سحبن اروحهن واني جذبت الجذبه وصدكتها لزكت روحي بازهار
ولج بكد الثور صدكتي روحج شكيتي صفحتي دشويه ميلي خل امشي عدل
ضحكت على تصرفاتي كرصتها كرصه قويه بردت گلبي بيها عاطتت
وج ليش هاي هيج
حتى لأتفكرين تعوفيني بهيج موقف سخيف يإول بطن اليه وحدي لعبن جوله باحوالي مكشفه كدام المستشفى كلها فد انهضمت على روحي ماكو احد يمي وما جايبه أغراضي لا ملابس لا شيء يبوه ابجي
أقهرج اقهرج.
سوده عليه هو اني شابعه قهر والله من وره بنتي عفتج امي وابويه گلبوا الدنيا على?أسي والله غزل خيطوا حلكها وهشام حاير بنتج لازكه بحظنه وبنتي تغار منبطحه واكعه عل حافه الكرسي من الدود البيها تشبه فد وحده.
أي عيني هي خل تشبهني وين اكو أحلى من الغيره والتملك.
عيني الله يحفظكم اجتي امي
اجتي عمتي باستني وباركتلي خطيه تعبانه كوه تحجي عصام هاد حيلها انطتني حكم أبوس بي عيني هو أبني.
وصال بالخير عليكم يمه يتربى بعزكم
تسلمين عيني عمه ودخلنا لكيت العائله الكريمه مجتمعه يم مروان من عمو كمال مجد عمار عمو فاضل وهشام وعمه زينب فريال حارث أسماء وهديل هسه جايتني ومن بحاجتكم اريد جلب ماكو من اخلص الكاكم مسطرين سبحان الله الله يحبني ما خله احد يسوي فضل بشر عليه.
مروان باوعلي ومصدوم متفاجئ اعتقد محد كايله
مروان ادري شبساع توج جنتي هنا تفترين يمي.
أزهار والله سباعيه دخلتها تفحص طلعت بحظنها حكم.
وصال طيبه وعلى نيتها الله سهل الها.
أسيل واجت اسماء باوستني وهديل وعمه زينب وفريال عمو فاضل كلهم دك مباوس اني ويني وين البوس بس فكو ياخه مني كعدت عالتخم أرتاح جسمي كله يوجعني بس أريد أنام تعبانه وكل جسمي يصل عليه أحس عظامي مكسوره هيج تعب ما شايفه كلهم يباوعون عليهم نظرتهم عاديه الأ نظراته مليانه بهواي كلام وتشرح هواي معاني كأنما يحاجيني وحزين ومقهور عليه أبتسمت اله أحاول أبث الطمأنينة بس المهم ما أشوفه حزين وضايج وعمو كمال ما حجا شي وعلامات التعب والحزن مرافقتهم حتى فرحتهم ناقصه ودخلت علينا أسيا الوجه أصفر وحلكها يابس مفطر.
أسيا بس واحد منكم ينطيني ماي
مروان ماكو واحد بيكم شافها كال هاي ليش هيج صاير بحالها أنطوها ماي
أسيل شربت الماي وحجت بفرح
أسيا عصام صحى وطلب يشوفج عمه يصيح أمي أريد أمي.
وصال يمه فدوه تروحلك أمك هو طلبني
كمال الف الحمدلله والشكر ربي
أسيل طلعوا كلهم عليه فرحانين وأسيا كعدت حلكها يابس ومفطر بالكوه تأخذ النفس خلت?أسها على كتفي بتعب
أسيا بالي يمج والله بس شوفة عينج.
أسيل لا تشيلين همي خلصت الحمدالله والله يكومه بالسلامه ونفرح بطوله.
الله يسمع منج هذا حكم كصته خي? علينا عيني گصتك حكم حبيبي
اخذته تبوس بي وباوعتلي
أكولج جابولج أكل عصير شيء تغذين نفسج أنتِ والده جديد
لا والله
وجهج حيل أصفر وأيدج يرجفون شُنو ما مأكله
أي على سريلاك مالت سيدرا وموزايه
صدك تحجين ليش هيج ماكو واحد فكر بيج وأنتِ حامل وانوب ولدتي ازهار عمتي الولد شُنو شغلهم
مروان باوعلي وكام يحجي.
ليش ما حجيتي جان گلتهم يجيبلوج أكل الأ توكعين يله ما تگوليلي من البارحه لليوم بدون أكل وهسه ولدتي بله هسه تخربطتي عليه اسيا عيني دزي واحد منهم يجيبلها هاي حلك الفطيمه.
هسه أكول الهم من رخصتكم
طلعت وبهذا الأثناء دخل عمار.
عمار يله تحضروا
أسيل وين ودخل عمي وكلهم وراه عمتي وازهار وهشام ومجد
كمال يله بعد ما بيها مجال لازم تمشون البيت والأطفال تبهذلوا صار كافي عمار أخذهم للبيت بابا.
أسيل لا عمو ما أروح أبقى يم مروان
كمال لا بابا لازم تروحين وأني وافقت بالبدايه وصار هذا يوم الثاني وهسه صارلنا حفيد غلط تبقون هالأطفال شُنو ذنبها تبهذلوا عمار أخذهم للبيت ولا وحده تبقى كلام ونقاش ما أريد.
أسيل أختنگت ونزلت دموعي وهو يباوعلي وازهار أجتني تسگت بيه.
كمال يله وصال گومي أخذي جناينج ورحي البيت لأن أعرفهن ما يمشن من دونج.
وصال لا أني ما أروح وأعوف ولدي كمال خليني يمهم وعصام بعده ما مستقر وين ادزني تريدني أموت بالبيت.
مروان لا يابه أمي خليها هي بدون شيء گلبها محترك على عصام على أقل انتظر لما يستقر وضعها عگبها خل تروح البيت وهم ترتاح بس
هسه لأ
كمال يله هذا هو أسيل بابا حضري أغراضج وجهالج وروحي بنيتي أزهار بابا روحي وياها عمار يوصلكم وهشام أبني أحتاج تبقى ويانا
هشام أنتَ تأمرني عمي.
ازهار وأسيا أحد منكم يبلغها خل تتحضر.
كمال أسيا ما تروح تبقى أهنا بس الجهال يرحون وياكم ازهار ديري بالج على جهال أخوج يله بابا.
ازهار بعيوني بابا.
أسيل مسحت دموعي وهو صافن عليه وكمت شايله ابني وحيلي يرجف گوه أشوف طريقي ودخت حيل لزمتني أزهار ودخلت علينا أسيا بيدها الأكل
مروان خل تكعد تأكل وبعدين روحوا.
أسيل طلعوا ضلت بس أزهار يمي فتحت الأكل ميته جوع كعدت أكل وأوكل سيدرا وياي وأباوع عليهم مستحيه.
مروان أكلي لاتستحين عيني أگلي لو ادري ما مأكله الا أگلب المستشفى على رؤوسهم أزهار أنتِ شبيج ما لاحظتي سألتيها مأكله شاربه ليش هيج عايفتها
أزهار والله العظيم ملتهين وهاي الجهال شلعوا گلبي يله تروح البيت وما نقصر وياها وحقج علينا
أسيل لا يمعوده عادي ما صار شيء ودخل عمار
عمار ها أم بطن ما خلصتي
مروان شعندك وياها خلوها تأكل براحتها.
عمار يمعود أتشاقه وياها يله لعد أحنه منتظرينج برى أزهار هشام يصيح الج تعاي شوفي شيريد
أسيل طلعت ضلينا بس اني وياه وسيدرا وحكم بصفي عالقنفه نايم فدوه لعينه، خلصت الحمدلله
شبعتي أوصيهم يجيبولج بعد گولي عيني
لا والله شبعت الحمدلله
أسيل ديري بالج على نفسج عيني
أن شاءالله بس والله ما أريد أروح وأعوفك والبيت يخنك من دونك شلون انام بالغرفه وأنت مو بيها.
فتحلي حضنه ورحت عليه حضني يابه ميته على حضنه وريحته طاك گلبي
كلها كم يوم ويطلعوني وجايج ما أعوفج وما يحتاج أوصيج لأن أعرفج سباعيه ومعتمد عليج.
هزيت?أسي وباسني من كصتي ودعته وبگلبي نار شلت حكم وعمار اجه شال سيدرا انطاها لأبوها باسها وطلعنا ونظرتله نظره وداع وعفت يم گلبي ومشيت والوجع يأكل بيه ضيم موو وجع لو أدري هيج ضيم الولاده فلا أحبل روحي شاغت شوگت اوصل البيت وأنام بفراشي ظهري راح يطگ انقسم نصين وگفت ما بيه أمشي بعد أجتني ازهار كامت تحجي عليه.
أزهار شعدكم مستعجلين خلوني أجي وأني اشيل حكم توها والده بعدها بسم الله خطيه الا توكع يله وين أمي خل تمشي ويانا اني وحدي شدبر وجهال وأسيل والطفل امشي گولولها تجي ويانا شو جابت محد يمها تروح البيت محد يروح وياها ادري يهوديه خوما يهوديه.
عمار يله رايح أكول الها وارجعلكم
أسيل ازهار تعبت ما بيه امشي فدوه لعينج ظهري راح يطگ.
ازهار خرب بهل الشغل المخربط ادري بابا طاير ورانا شعندك خل تستقر حالتها لا اله الأ الله أمشي اخذج الطبيبه تفحصج امشي.
اسيل مشينا وهي بحضنها حكم ولازمه ايدي بس گلبي يوجعني اكبر من طلعت وعفته هو ونظراته أكلت گلبي اكل يارب شوكت تزول هالشدة وننجمع والله تبهذلنا.