رواية بين سلاسل العادات للكاتبة كفاية كاظم الفصل الرابع
الساعة السبعة الصبح كاعدة اوكل بميمو قبل لا اروح للدوام، البيت مخبوص خبص بحيث صايرة بية ضجة واحد يروح منا واحد يرجع منا.
عبدالله: -موطنينننن موطنينننن الجمااال والجلال والهنااااء والربااااء في علاك في علاك
والحياة والبهاء والسناء والوفاء في هواااك في هوواك
يصيح بصوت عااالي ويرطن بروسنة بس شنسوي منگدر نحجي وياة بس امي تكدرلة وتسكتة، لزمت راسها وصاحت بضجر.
: -غير يسكت هسة شعدنة من صباحية الله.
عبدالله: -يا آمااه اليوم اطلع بالساحة اقرة النشيد اريد اتدرب علية
سجاد: -دگعد راحة لا يركعونك بچلاق يوصلونك لزحل، هناء وفاء وسناء جامع الحبيبات كلهن سوة
عبدالله: -شبيك غير هو هذا النشيد اني شدخلني هما يحبون النسوان
مهند: -اي والله النسوان ينحبن كلش كلش
سجاد: -يوووم شوفي ولدج فااسقين للنخاع
عبدالله: -اهوو غير تسكت سجاوي ام البلاوي هسة عندي رفعة العلم. يا آماه فضيها عااد راح اتخربط من الجوع.
: -دروح بو وغسل وجهج وتعال اكل
عبدالله: اهووو هسة انتي ادققين بادق التفاصيل يعني ماكو خصوصية بهالبيتتت
: دمشي جيبلي المشط امشط شعر اختك اتحررك
نو: -هسة كل يومية تمشطينة شبية مااا مااا عوفية راح البس كلاو
راح مهند يطگ بيض واجت تمشطلي كعدت انافخ من الصبح تمشط شعري شكدد اضووج ماعندي خلگ دخل حياوي بكامل اناقتة وكالعادة عطرة سابقة.
احمد: -صباح الخير
سجاد: صباح العطر الفواح شنو هاي سابح بية سبح.
احمد: -لعد تريدني اخيس مثلكم
عبدالله: -إشفتنة عيييني وينة خايسسين اشو نلمممع لمممع ترى مو بس انت نضيف
احمد: -اي واضح دغسل وجهك بالاول
عبدالله: -يووم صيحي بابنج المايع لان مناقصني
احمد: انچب المزنجر ابو الوصخ
-بدينة من الصبح وتالي وياااكم
گعد حياوي مقابيلي مسح لحيتة وحجة بهدوء
-نوايتي متلبسين حجاب بعد انتي كبرتي وحلاة البنية بحجابها
نو: -ماريد مو هسة.
احمد: -لعد يمتها؟ ترة انتي مكلفة من عمر التسع سنوات وانتي لاصلاة ولاحجاب لشوكت تبقين هيج
-ترة بعدني صغيره من اكبر شوية
احمد: - ترة هسة انتي جبيرة حلو من تغطين شعرج الحجاب يزيدج جمال وشعرج ميصير كل اليجي يشوفة المفروض تغطينة
دنكت راسي ساكتة العب بضافيري امي ملت مني من كد ما حجت واخواني مايدخلون بهيج موضوع عدا حياوي هو صح واجب الحجاب بس اذا لبستة لازم التزم وانطية حقة كلت بس تخلص السنة البس.
تريگنة وكل واحد راح لدوامة وصلني حياوي وراح خلصت يومي عادي كاعدة بالرحلة الاخيرة اول درسين انام درسين بس اباوع بعيوني والدرس الاخيرة العب بطرف شعري.
رجعت للبيت امشي على كيفي جني سلحفاة مبية حيل يعني ميصير ندرس بالبيت وبوقت الامتحانات نداوم اووف تعب وصلت للبيت بهتت ملامحي وحيلي راح، امي دگ وتلطم وجههة احمرر لزمت گلبي بدية ذبيت الچنطة وجمعت الحروف.
-ماماا شصاايرر منوو مات.
نهضت حضنتني تصرخ گلبي ناار صارو بالي اخواني بس لا بيهم شي. مابدر مني اي ردة فعل منظر امي خمش گلبي اكيد صاير شي چبير حتى الكلام ضا مني.
: هنودي شصاير منو مات
حالتة متقل من حالة امي ضام وجههة بيدة ويبچي رجفت خوف وعطت بية.
-للللك منووو مااات
مهند: -خالي حمزة.
بهتت ملامحي ونزلو دموعي مجاي اكدر اتخيل استوعبت الصار من وصلنة لبيتهم. صرريخ وبچي ارررتعبببت وصرخت اصررخ من الخووف والهلع اول مرة احضر هيج اجواء اي لاحد يستغرب ماحاضرة فاتحة ابد، چلبت بأمي ارجف و اصررخ حاضنتني وتبچي، ثواني مرت ودخلت الجنازة متت خوف ارتعبت حرفيا عفت امي وطلعت كلني اررجف.
الساحة متروسة زلم لابسة دشاديش سود ولافين چراوية وجوهم متبين بس عيونهم بلعت ريگ خايفة ادور بعيوني واحد من اخواني ركضت لحياوي حضنتة ارجف وابچي اما هو عكسي ولا كأنة خالي متوفي الكل يبجي سجاد ملخ نفسة وعبدالله ماعداة جان هادء كلش بس يمسح ضهري ويبوس براسي واني بحضنة ارتعش.
-لاتخافين حبيبتي لاتخافين.
طلعو الجنازة من الداخل خلوها بالساحة التمت عليها الزلم كلها تبچي وتلطم مطولت دقايق وطلعوهاوسط الصريخ والبچي والهوسة كلها اختفت بقة بس عبدالله وكم رجال دخلت يم النسوان إلى منظرهن يرررعب وجوهن كلها دم وشعرهن واگع نصة بالگاع قشعر بدني من المنظر، طلعت للساحة ادور عبدالله.
-امشي دششي جوة
التفتت الصوت رجعت ليورة ارجف رجال لابس دشداشة سودة بس عيونة طالعة بلعت ريگ وخليت ايدناتي وجهي اشهگ خايفة منه.
-اررريد عبووود ارريد اخوووي والله ممسووية شيييي لتأذيني حباااااب
حضني عبدالله جلبت بية خااايفة اخاف من اقل شي حتى من شخص يحجي بصوت عالي.
-خايفففة
عبدالله: خلص نو اسكتي كافي گلبج راح يوگف
: رجعني لبيتنه اخاااف ماريد ابقى هنااا
عبدالله: باجر العصر ارجعج بس اسكتي فدوة اروحلج لاتبچين
يسكت بية واني ارجف برد خوف الساحة رجعت انترست زلم اخاف ادخل جوة ضامة راسي بصدر عبدالله ومچلبة بية بقوة اجة صوت يكول.
-شني عبيد الله شمالك مادش اختك جوة ماتشوف الازلام رايحة طابة وانته حاضنهااا
-عبدالله: بيها خوفة شلون اعوفها خاف يصير بيها شي وتتخبل علينة
-خايب شني سالفتكم عيب وفشل اختك مرة طببها جوة
رفعت وجهي من حضن عبدالله وخرت شعري من وجهي الصاير نار وصحت بصوت عالي كلامة نرفزني.
-وااانت شدخلللك ااااني واخووية لتددخل يلا منااا
مهند: علكيفكم شصاير شكو نو.
رحت اركض حضنتة وابچي متت من القهر عبالي عافوني كلهم وراحو بقيت وحدي هنا.
-هءءءذا الرجال يحجي علية يريدني ادخل جووة بس اني اخااف والله العظيم النسوان يخوفن
مهند: انمار شنو سالفتك وي نوتنة
انمار-: شعدي وياها بس عيب منا زلام وگلت لخوك الفهيم يطببها لايخليها هنا
مهند: ترة نو تخاف من كلشي اول مرة بحياتها تحضر فاتحة وصريخ ماتشوفها شصاير بيها.
اخذني مهند وگعدنة ورة المبردة مالت الاستقبال صايرة ركن بقيت هادئة بحضنة رفعت راسي الة عيونة حمررر مسح وجهي ولم شعري.
-يعني خالو مات ميرجع بعد.
هز راسة اي وبقة يدگ ضهري مثل الاطفال هدأت بحضنة وغمضت عيوني اخذني النعاس للنوم فتحت عيوني بغرفة مليانة اطفال نايمة بنصهم الشمس طالعة من الشباك عزاا شكد مر وقت لعد درت وجهي صوت آنين، انتبهت يجي من بنية ضامة راسها بين رجليها وحاضنتهم رحت يمها خليت ايدي رجلها فزت مرعوبة فتحت عيوني وسعهن من منظرهاا المرعب.
-شررروق!
وجهها احمررر وخدودها مخرمشات رجعت راسها تبجي بالسكتة حضنتها صرت ابجي وياها مرت دقايق مددتها وغطيتها ببطانية عفتها وطلعت الجو هادىء نوعا ما ماكو صريخ الحمدلله صارن بوجهي الاخوات اسراء والتفات عيونهن مورمة وحالتهن حالة خزرني بحقد عفتهن وصرت اباوع بوجوة النسوان ادور امي ضربت بمرية.
-اسفة اعتذر والله موقصدي كلش اسفة
ابتسمت بتعب بوستني ورجعت كذلتي ليورة ردت امشي وحجت.
عائشة: -انتي نوة.
هزيت راسي اي ابتسمت ورجعت حضنتني لصدرها استغربت منين تعرفني اول مرة اشوفها باوعت لملامحها الهادئة وهمست.
-انتي تعرفيني؟
-چان شلون ماعرفنج اضكر من اچيتينة جنتي صغيره بس تبچين هسة ماشاء الله صايرة مرة وحليانة
-بس اني ماعرفج واول مرة اشوفج! انتي شتصيرين مني
-مرة عمج فايز يبعد حيلي
رفعت راسي افكر واركز بكلامها فايز خالي يصير مو عمي بس حقها دايخة من البچي والصريخ.
-قصدج مرت خالو فايزز مو.
هزت راسها عفتها ورحت اركض اشوف امي لگيتهة بالاستقبال هي وخالتي هديل وبعد كووومة نسوان ماعرفهن گعدت يمها حضنتني لصدرها تمسح بوجهي...
-روحي سلمي على حبوبتج وعماتج اتعرفي عليهن
باوعت بوجوة النسوان كلهن مااعرفهن بلعت ريگ وباوعت لامي خازرتني بمعنى سلمي ماناقشتها ورحت سلمت عليهن كلهن ردت اطلع وصاحتلي.
-تريگتي يبعد حيلي.
هزيت راسي اي صح اني ممتريكة بس خطية ماريد اتعبها وياي هم اخوها ميت وهم حايرة بية انطتني الف ورحت اشتري اخذت بنية صغيرة ومشيت للمحل من تعدينا مسافة حجت محذرتني.
-اكلج يبنية روحي ترة مايرضون اطلعين تشترين يكتلونج وعلي
- ما اريد اشتري منو هذا اليضربني!
مشيت مجلبة بيدها الجادر منصوب بالشارع والزلم تارسة الشارع تروش مهتميت ورحت اكمل طريقي اصلا اني شكو كل واحد بشغلة فزيت من صاح بية رجال جمدت بمكاني اجة تقدم صرت ارجف من منظرة ملثم بس عيونة طاگات بوجهي من شاف حالتي تدهورت نزع لثامة.
-ءانهاار شترر. يد
مسح وجهة يستغفر ويتلفتت ذب نفس عالي باوع ليوراة ورجع حجة بقلة صبر.
-شتسوين طالعة بالشارع ماتشوفين الچادر والازلام.
-اشتري والله ممتريكة جعت كلش بس اشتري وارجع
شعلية بيهم
خليت ايدي بحلگي دمعتي بطرف عيني توقعتة يضربني لان شكلة عصبي مايتحاچة ابد نتر بية.
-تحركي بسساعچ انة اشتريلج
مديتلة الالف ياخذة مني يشتريلي رجع عاط بية
طفرني.
-اجتت زلاااام دشي جووة.
رحت ارركض للبيت ذبيت نفس وبقيت افتر بالساحة اتشمس شوية مر وقت طويل گعدت بالحديقة بيها حشيش شوية وشجرة نبگ اخذت عود العب بالطين، كل شوية تجي مجموعه نسوان تعيط بصوت عااالي ويخرعني بقيت گعدتي احس نفسي غرريبة ماعرف احد هنا ضربت رجلي بالكاع وعطت.
-جذاب كلهم هنا يجذبون وينة كال اشتريلج بس جذب علية
سكتت لا وحدة من النسوان تسمعني بقيت ارسم بالطين واسمع صوت رجال يصيح غلست اكيد يدزني اجيبلة سچينة لو جدر.
-خاااب هيووو انتي شسممممج طرررگاعة، هيووو شكررر خاااب هيووو
رفعت راسي شفتة بالباب واگف اشرلي بيدة وصاح.
انمار: -شكرررر ولج تعاي اشتريتلج
رحت اركض خلة العلاگة بيدي وطلع حتى ملحگت اگلة شكراً فتحت العلاگة بيها اشكال الحلويات گعدت اكل شبعت وبقت هواية حلويات رحت لشروق انطيها وياي دخلت للمطبخ متروس بنات يگطعن خضروات يسولفن ويشتغلن بقيت اباوع بلوجوة ادور شروق.
هدى: -تعاي يحليوة اكعدي ويانة.
-اريد شروق تعرفين وين راحت
رغد: -شريقة تلگينها بالغرفة
عفتهن ورحت ادور بالغرف فتحت عيوني وسعهن من شغت اسراء لازمة شروق من شعرها بقووة وخانگتها بالايد الثانية وتكلها.
اسراء: -حلگج اشگه اذا شفتج تباوعيلة ام الزلم الخطافة الچلبة والله اشهرج شهيرة واطلع عليج سمعة حتى بعد محد ياخذج تضلين بايرة خدامة لمرة نويصر (اخوها)
دفعت شروق ايد اسراء الخانگتها وتنفست بقوة لزمت رگبتها وعاطت بيها بصوت مبحوح.
شروق: -شبيج انتي والله ما عندي شي وياة منين تجيبين هذا الحجي حررام عليج تحجين بكيفج علية
عوفيني تعبت مليتتت
ضربتها راچدي و رگعت راسها بالحايط واگفة بمكاني وسمعت الضربة وصلتني شهگت وخليت ايدي على حلكي احس جسمي كزبر شبيهن ذني.
-اسراء: تجذبيني الخايسة ام الزلم الس
بعيني شفتكم تسوولفون ولازم ايدج.
رادت شروق تحجي بس مخلتها تفلت بوجهها وعافتها باوعتلي غمتني بثنين اديها ومشت بقيت مصدومة من تصرفاتها شلون هيج تعامل اختها وتحجي عليها، زين ليش تعاملني هيج شمسويتلها اني، ركضت لشروق ملخت روحة گوة سيطرت اديها.
-شبيج كاافي اهدأي
شروق: -والله اني مالي دخل والحسين اني معلية هو هو يجي يسولف وياي.
بقت تردد هاي الجملة انهارت تماماً حضنتها اهدي بيها شربتها مي وغسلت وجهها شاغت روحها ورجعت هادئة دموعها تنزل بهدوء.
-شروق شبيج؟ وهاي المسمومة شعدها وياج ليش تضربج و تسكتيلها ترة ميصير تتعامل وياح بهلطريقة
-يصير يصير يصير كلشي عدنا يصير
عقلي وگف من التفكير مستحيل اعرف السبب لو ابقة افسر اسبوع كامل بقيت يمها الا ان هدأت طلعت الحلويات حاولت وياها تاكل بس جانت رافضة.
-خلصص لاتاكلين مو صوچچ صووجي اااني اابقي لاتاكلين
زعلت لان رفضت تاخذ مني عفتها وردت امشي جلبت بية خايفة وتعبانة.
شروق: -حبابة لتروحين ابقي يمي
-اي بس تاكلين
هزت راسها بقيت كاعدة يمها اكلت شوية ورجعت لوضعها ماتحرك ساكن مر وقت طلعنا للمطبخ نشوف الوضع.
هدى: -لجج شريقة هاااي شصااير بيج
اسراء: -مررض مايصيبها شبيها الخاايسة.
محد حجة و شروق ماجادلت رادت تكعد الكرسي وسحبته منها اسراء خلتها توگع بالگاع دمي فاار شنو هاي الحقارة العدها گومنا شروق الهادئة تماماً ولاانطت ردة فعل اباوع لاسراء تبتسم بحقارة شكد كرهتها.
اسراء: -ردت اكعد علية كبلج هففف
مگدرت اسكت لازم اتدخل واحجي لو ابقى ساكتة اموت، حجيت بعصبية.
نو: -شهل حقاارة شبيييج انتي مريضة نفسية وگعتيهااا وعاادي عندج فوگاها تحجين عود هاي اختج.
طگگت عيونها بوجهي تقربت مني لزمتني من صدري كامشه بلوزتي بيدها كلها حقارة وسم يبث منها.
اسراء: -حضج اطيحة اذا تدخلتي بيناتنة
دفعتها من صدرها ورجعت ليورة فاير دمي من تعاملها وياي.
-طيحي حضج يامرررريضة
اسراء: -لج هاااي يااااهي المررريضة
هجمت علية وشروق صارت بنصنة لزمتها گطعتها تگطع البنات يريدن يطلعنها مگدرن تفاككن من ادخلت التفات بينهن تصيح بيهن بصوت عالي.
: خزيتنة كداام العاالم الله يطيح حضجن تفوو عليچن.
اسراء: -هاي الجلبة كله من وراها الس
اخذت التفات شروق تدفع بيها وترزل ولا حجت وي اسراء البقت خازرتني كتفت ادية وكفت مقابيلها اخزر بيها يگول بس هي عدها عيون وتعرف تخوزر اجت التفات رفعت اصبعها السبابة محذرتني.
-انتي لاتدخلين ثاني عليج بنفسج شيصير ضلي برة السالفة احنة اخوات و بينة انتي شكو.
ضحكت وهزيت ايدي باستهزاء عفتها ومشيت بس احجي شي تسحلني وين اكدرلها، رحت ورة شروق قافلة الباب عليها دگيتة كذا مرة ماكو رد حجيت بخوف.
-شروق انتي زينة افتحي الباب
اسمع بس صوت شهكاتها متت قهر عليهة يكول مو اختهن شبيهن ذني شنو سالفتهن وياهة مبين علاقتهن كلش زينة وي بعض اما شروق ميطيقنها.
شروق: -روحي نو راح انام اني زينة
عفتها وطلعت للمطبخ بية ذني الزوج يريدن يعاركن تنهدت وكعدت بالساحة اتأفاف.
-اووف وين اروح شهل لعبان النفس
اباوع بصفي الجهال تلعب صايرة هوسة، منظر شروق ميروح من بالي حيل انقهرت عليها منا وفاة ابوها ومنا معاملة اخواتها السززز رفعت راسي
ولد شاب واگف گدامي.
رحمن: -شلونج اخيتي
باوعتلة من فوك ليجوة جان لابس دشداشة سودة وجراوية شامرها جتفة بعشوائية احسة عندة شي يريد يحجي بية رديت عليه طالعة روحي.
-هلا
-احم اكلج تعرفين شروق؟
وكفت حيلي عاگدة حواجبي تخوصرت وحجيت
-وشتريد منها؟ وانت منو؟
التفت يباوع بالمكان رجع باوعلي بعيون متوسلة.
-عليج القرآن روحي شوفيهة شلونها
-شنو شلونها انت شتصير منها غير اعرف؟
-ابن عمها ابن عمها حبابة دروحي شوفيها
جان شكلة قلق ومتوتر كلش خلصها بس يتلفت للباب منتظر مني كلام.
-هستوني جنت يمها. نامت
حگ رگبتة ورجع للمرة المدري شگد يلتفت للباب عصر ايدة بقوة ورجع حجة.
-خو اسراء ماتحاجيها هي واختها الثانية
-حاچنها بس اني مستغربة كلش ليش هي مو اختهن ليش هي يحجن وياها.
حجيت الكلمة والتفتت للصوت الوراة اتوتر مسح گصتة وسلم مرت خالي حمزة شوية وطلعت اسراء من شافتة ابتسمت وخزرتني.
رحمان: -البقية بحياتج
اسراء: -حياتك الباقيه شلونك
رحمان: -الحمدلله.
تغيرت ملامحها للعصبية خزرتها امها وعافتها رحمان سحب نفسة بسرعة واسراء دخلت جوة فاير دمها رحت اشوف شروق بقيت ادك بالباب الا ان فتحته اسراء تلهث وجهها احمرر فحطانة دفعتني وطلعت دخلت لشروق منتهية بمكانها شعرها منتف وجهها مشخط حالتها رجف جسمي واشتعلت بنار من الصار.
-اسراء ضربتج
حتى مابيها حيل تبچي زحفت للزاوية گنبصت روحها بيها.
-عوفيني نو حبابة مشي عليج النبي عوفيني واليسألج عني كليلهم نايمة هابط ضغطها.
احترمت كلامها وطلعت رحت للمطبخ.
هدى: خاب انتي شسمج
-ها اني. نو
شكولهن تضحك بالكتمة عگدت حاجبي وحجيت.
-ليش تضحكن لان اسم بيبي نوة ترى عادي
رغد: -احجيلج الصدك الصدك
-اي
اشرتلي اگعد يمها تربعت صرنا مجموعة
رغد: جدج إلى هو جدي متزوج ثنين نسوان
وحدها من نسوانة اسمها حكمة خلفتها حمزة وفايز و قحطان وهند وهديل خوش.
-خوش.
رغد: -احم خل اكمل والثانية جدتي نوة هاي الگاع ماشايلتها محد يسلم منها الطاب والطالع صايحة علية بس حبابة ترى هههههه
سجى: -اي حبابة كلش اخ يابوية
رغد: -هس جدة حكمة حبابة كلش تنحط بالگلب وردة مالت الله عكس جدة نوة تغث هي شني خلفتها محيسن وساچت وفلاح وتلث بنات فخرية وسعدية ونصرة.
اباوع عليها ساكتة ومركزة بكلامها تعد بصابعها وتطبگ كل اثنين سوى.
سجى: -خاب رغيدة راح تحجيلها تراث العشيرة ترة الفرخة كالتلج ليش تضحكين على اسمها اختصري داخت
رغد: -خايبة شبيج دخل احجي عن العشيرة واعرفها عن جدة نوة حبيبة الجماهير
اخذت على جو البنات وتفاعلت وياهن.
نو: -زين اكول انتن هواي ماشاء الله يعني اخوات بنات عم عرفني عليجن حتى نصير صديقات هيج
رغد: -نتشرف بيج حبيبة انتي هم اختنة بس انتي چي ماتچين النة ماتعرفينة اتذكر جنتي صغيره من اچيتي وحياوي حاير بيج.
اتذكرت حياوي ابتسمت لا ارادي دنگت راسي العب بشعري.
-ولا زال حاير بية ههه
اسراء: -كبر حتى گبر شعدج تضحكين العووبة انتي وين جاية لعرس لو لفاتحة مصيبة شگي ثوبج والطمي مو تتمضحكين.
بلعت ريگ ادية ترجف من الحركة بحياتي محد غثني بكلمة وحدة لو شسوي محد يحجي هيج وياي تغرغرت عيوني بالدموع استهضمت بنص البنات ترزلني لزمت ايدي رغد وكالت.
-ختولي حبيبة لا تهتمين الها محروك گلبها وتريد تطلع حرگتها بيج.
سكتت اجن نسوان كبار للمطبخ گامن البنات دخلن للغرفة واني وياهن گمت.
سجى: يلة خل نتعرف عليج ونعرفج عنا
هزيت راسي موافقتهن اريد اتعرف عليهن ماعدنا هواي بنات باقاربنة والاعرفهن بس سرى ونهى...
رغد: -سجيووة اني جبيرتجن اني احجي انتن اسكتن
سجى: -اهووو حتى هنا جبيرتنا غبيرتنا احسن خاب انة اصغر منج بشهرين الفكررر.
رغد: -اسكتن عيببب عليجن احم نرجع اني رغد صف سادس اعدادي عدي تلث اخوان رحمان الجبير والباقي اصغر مني. انة اصير حفيدة نوة بت محيسن لهنا خوش
نو: -خوش
سجى: و انة سجى انة وهاي العوبة ندرس سوة. هديوة تصير اختي وعندي بعد تلث اخوات اصغر منا.
-اكلجن هسة انتو عايشين كل واحد ببيتة مو
غطن البنات وجوهن يضحكن بالسكتة تقربت رغد مني عاضة شفتها تريد الضحكة تروح.
رغد: -اي سوى عايشين وشحجي خية الله وكيلج صايرة طاخ طيخ تخيلي تلث اخوان كل واحد عندة فيلق و بيت واحد.
-زين يعني ليش ميطلعون كل واحد ببيت مجبورين
تبقون سوى
سجى: -چا غير جدتي نوة تگلب الدنيا فوك روسنة يماااة يمااة تشك ثوبها وتتملغط بالطين وعلى بس ولدها يطشون
هدى: -لاخية شوفي احنة عايشين حب الله والوطن كل واحد بغرفته هو ومرتة والبيت جبير وجدك الله يرحمة.
نو: هاا اي يعني بيتكم جبير عبالي نفس بيوتنا يمة والله تختنگون گلت
هدى: -خية احنة نختلف بيوتنة چولة (جبيرة) وكاعنة واسعة خير من الله
رغد: -ديلا خل اكمل سفانة بت عمي فلاح هسة كملنة نجي لجدة حكمة.
ولدها حمزة وقحطان وفايز (عندة چاسب وانمار وزهراء)و بالنسبة لقحطان عندة (عباس وفارس بس) وهسة افتهمتي.
هزيت راسي اي الصراحه مو كلش افتهمت هما هواي كلش واني بسرعة انسى لان مشايفتهم وكاعدة وياهم صاحن الهن راحن كلهن للمطبخ رحت وراهن دخل رحمان وبعد ولد شاب ينقلون بالاكل والبنات ينقلنة للاستقبال بقيت اشتغل وياهن انقل بالمواعين اخذ من انهار وانطي لسجى انطاني ماعون وطلعن البنات كالن خلصنة من الاستقبال.
اجة صار كدامي بيدة ماعون اكل اردف بهمس
رحمان: -نوة اخذية لشروق روحي وكليها.
نظراتة متوسلة اخذتة ورحت للغرفة لكيتها متغطية خليته يم راسها وكعدتها.
-كومي شروقة اكلي حبابة
-ماشتهي عوفيني انام اطلعي
-اهوو اني شعلية هذا رحمان دزة الج كال خليها تاكل وحلفني همين.
فزت من مكانها فاتحة عيونها كوة صايرات حمرر عفتها تاكل رادتني اكل وياها بس رفضت لان مااشتهي عفتها ورحت يم البنات اجتمعن ياكلن طلعت للساحة اريد واحد من اخواني شفتهم حاطين بردة للباب طلعت بالباب شهكت وانسحبت من ايدي فتحت عيوني بخوف واردفت بنتر...
-شبييييك
-انمار: حسج ماسمعة يلة دشي جوة شعندج هنا واكففة
خازرني بعصبية عيونة دم شرايينهن واضحة من كد التعب وقلة النوم.
-مو اريد اتغدة.
-چا ماتتغدين جوة لو تريدين تروحين للجادر تاكلين وي الزلام
قوست حلگي مزعوجة من طريقة كلامة حجيت بضجر: -اريد اكل وي اخواني انت شعلييييك احنة متعودين ناكل سوة
تقرب مني اكثر عيونة يريدن يطلعن من محجرهن بلعت ريگ ورجعت ليورة يتقدم حاد سنونة ماحس غير انگلبت ضهري وطابوگة صارت جوة ضهري روحي شاغت احسها ضربت العمود الفقري غمضت عيوني وخليت ايدي جوة ضهري متوجعة سحبني من ايدي گومني باوعتلة بحقد وعطت بوجهها.
-چلبببب حقييررر انكسررر ضهررري الله لا يوفقك ان شاءلله
عصر فك وجهها بقوة ونتر بوجهي.
-امشي ولي منا صوتج ماهيسة
خليت ايدي ورة ضهري والثانية تخوصرت بيها رفعت حاجبي وحجيت بتحدي: -مو هي كيفك ادخل جوة شو الا اطلع
طلعت من الباب وسحبني من ضفيرتي لزمتها متوجعة: -عووف شعرري چلببب
لفاها ايدة مقرب راسي الصدرة وهمس باذني.
-اذا ماطيحت حضج وربيتج من اول وجديدما اتسمة نمر، لامستحة ولاحشمة طايحة حض شعرج بطولج وتفترين بسسيطة انة الج.
دفعني وطلع رگع الباب وراة بقوة خفت من نبرة صوتة وطريقة كلامة بس مخليتها بالي بسرعه نسيت ورحت تغديت وي البنات خلصنة غدة والبنات تطشرن ينضفن ويعزلن البيت رحت ادور شروق لگيت الغرفة ضلمة لفيت راسي ونمت گعدت العصر والوضع نفسه ناس تدخل وناس تطلع احس روحي طلعت اريد اشوف حياوي رحت لامي حالها حال احس مو بس حزينة اخوها اكو موضوع مضوجها غيرة.
-نو: ماما اريد اخواني اريد ارجع للبيت شنسوي باقين هنا كافي ضجت.
-يمة عيب بعد انتي كبرتي عوفي اخوتج بحالهم وانتي التهي وي ذني البنيات بس تخلص الفاتحة نرجع
هزيت راسي ضااايجة الجو بااارد كئيب وهادء كعدت يم الصوبة النفطية ادفي بديناتي والبنات يروشن ابد ميگعدن.
سجى: خاب نوة كوومي ويانة شمالج كاعدة وحدج
رجعت كذلتي ورة اذني ماحب اطلع خارج البيت ابد ممتعودة ابقة هالكثر بعيدة عن بيتنة تنهدت وبقيت كاعدة بمكاني همست.
-بردانة
انمار: -تحركي وتدفين.
خزرتة ورجعت العب بالسيم مالت الصوبة باصابعي يطلع صوت حسيت اكو شخص قريب مني رفعت راسي شفتة بصفي كلش خلة ايدة يحميهن الصوبة همس بصوت ناصي مثبت عيونة علية.
-ضهرج يوجعج
هزيت راسي لا ودموعي راح ينزلن بعد ماگدر اسيطر عليهن.
-مريضة
رفعت راسي الة عيوني مدمعة حجيت بصوت مبحوح.
-اريد حياوي صيحة
التفت والتفتت وياة الواهس دخلت عائشة بانت ملامح الفرح على وجهها من شافتة بقت تحضن وتبوس بية وهو يسالها.
-شلونج غاليتي.
-زوينة يبعد حيلي بس ضال بالي يم البنات
-زينات لاتخافين مابيهن شي بس ديري بالج على روحج واخذي حب ضغطج
طلع من المطبخ واجت كعدت يمي مبتسمة.
-شبيها الحلوة ضايجة
-اريد ارجع للبيت
-بس تخلص الفاتحة ارجعي روحي هسه وي البنات اشتغلي تخلصين وكت هنا الوكت مايخلص
هزيت راسي وطلعت يم البنات بالساحة واكفات يسولفن مواضيعهن ماتخلص خليت ادية بجيوبي ودندگت راسي العب برجلية.
رغد-خاب خية انتي شمالج مكدرة.
رفعت راسي الها ماعارفة قصدها حركتلها براسي شنو ضربتها هدى ضهرها وگالت بضحكة.
-ضااايجة ضااايجة شبيج يعني
-تعبت اريد ارجع لبيتنة خطية بقة فارغ
تطشرن البنات كاتمات حلوگهن باديهن وجوهن حمرررر يضحكن بالسكتة ابتسمت وياهن وعدت الجملة بيني وبين نفسي اكثر من مرة يلة افتهمت عليمن يضحكن.
راحن يسون تمر وخضرة الكل اجتمع كبار وصغار سوون لفات صغار بيهن تمر وخضرة خلوهن بصياني صغار.
عائشة: -ياهو اليوزعهن بالشارع.
بعدها ممكملة كلامها طفرت من مكان احجي بحماس
-اني اني اوزعهن كلهن
: -ديلا بس البسي حجاب ترة ولدنة مايرضون هيج تطلعين
-اي بس انتي انطيني شال ماعندي
: -جا يمة ماتلبسين حجاب موش انتي جبيرة صرتي
-من اكبر بعد البس مو هسة
رغد: -احنة بناتنة من عمرهن تسعة يلبسن بدون محد يگلهن
التفات: - تسوي اليعجبها محد يگللها بعينج كحل عايشة براحتها ماكو على راسها رقيب.
اخذت شال من رضية شمرته شعري واخذت الصينية ورحت اركض حتى ماناقشتهن طلعت بالشارع رحت عكس مكان الجادر وزعت للجهال انطيهم ويردون بعد درت وجهي للشخص الوراي فتحت عيوني وحلگي سوة مصدوومة بهتت ملامحي من گال.
-شلونج نو
-عادل. هاي شجابك
-عادل: علمودج هههههه جذب نأدي الواجب ونروح.
عدلت شالي گلبي يخفق بجنون من شفتة سحبني من ايدي اني والصينية مقربني عليه احس راح يغمى علية من الخوف اخذ لفة وعتيت روحي منه ماكو مجلب بية والمكان صاير ورة البيت كلش محد موجود نظراتة نرفزتني حيل.
-شبيييك عووفني اررريد امشي لاااا تچلبببب
مجرد حجيت هالكلمة وجهها انگلب للاحمر القاتم لزمني من فكي بكل قوتة احس سنوني تكسرت نزلن دموعي صرت ارجف من منظرة حجة من بين سنونة.
-هاااي عليمن ترفعين صووتج خاف عبالج انتي بين اهلج مااگدر احاچيچ انتي غلطانة حضج اطيحة ت.
اجة صوت مقاطعة يكول: -حضمن تطيح؟
التفتت فازة صوت انمار الورانة عيونة صايرات بگصتة من العصبية كور مقبض ايدة بقووة اجة تقرب علينة ابتعدت ارجف والصينية بيدي ترجف ردت امشي لزمني من ايدي موگفني وخازرني.
-والله العظيم مدءءخلني ءءاجيت اوزع والقران الكريم ورح بابا مدخلني هو هو.
صرت ارجف وابچي ركز عيونة فگي وسوالي بيدة ادخل جوة رحت اركض للبيت الشال واگع وحالي تغير مية درجة.
هدى: -ها ولج شبيج شكو
عفت الصينية الكاونتر بعد بيها لفات ورحت للغرفة ختلت بزاوية ارجف ضميت راسي بين رجلية ابچي خايفة.
عائشة: -ولج يمة ياهو المحاچيچ گولي حتى اطيح حضة الج
بقيت كعدتي محجيت شي شوية واجت امي لحت الا تعرف شكو گلتلها رجال عاط علية بصوت عالي اقتنعت لان تعرف اخاف من احد يرفع صوتة بوجهي.
-بعد لاتطلعين اكعدي واسكتي احنة بيا حال وانتي تفترين برا
عافتني وطلعت بعدها الرجفة بيها مجلبة.
هدى: -شبيها عمة نوة
هند: -رجال صايح بيها وهي تتخبل بس واحد يحاجيها بصوت عالي لو يزمخ عليها
اسراء: -اممم هاي عبالنة شو شبيها
عائشة: -خية شني بزر نستلة
: -لا والله بيها خوفة من هي وصغيرة سودة علية من كلشي تخاف واحنة شايلينها بجفوف الراحة وشبيك لبيك محد يصيح عليها لو يضوجها حتى من البيت ماتطلع.
عائشة: -اي والله خو حياوي يموت علية ولدج حيل يحبونها ومدللينها الله يحفضهم
نو: -اجتني شروق حضنتني شكد حبيت هاي البنية حنينة بشكل مووطبيعي شكلها راحة نفسية لليباوع بية بقيت اباوع بوجهها اتأملها
شروق: -شبيج تباوعيلي هيج
-حبيتج هواية عليج الله مو تعوفيني نبقى صديقات طول العمر
-هههه اي اكيد نبقى صديقات دوم حتى اني حيل حبيتج.
شددت حضنتها إلى ردت اسألها تصرف اخواتها بس ماعندي هاي الجرئة الكافية دخلت بنية گالتلي يريدونجن بالمطبخ.
رحنة للمطبخ نساعدهم بنقل الاكل دخلو تلث ولد ماعرفهم منين بس رحمان إلى عيونة شروق إلى مدنگة بالگاع ابد مرفعت راسها. راد ينطيها الماعون واجت اسراء اخذته من ايدة.
اشرت لشروق تدخل جوة وفعلا دخلت كملت ورحت وراها لگيتها تخدر جاي والبنات التمن ياكلن گعدت يم سفانة هادئة من شفتها ولجاي حرف منطقت اجت بالي خرسة.
هدى: -خاب سجيوة مو زين عليج الاكل الدسم
سجى: -وليش عيني
هدى: -يسوي عندج كرش وبعد محد يباوع بيج
سجى: -دنچبي شني محد يباوع علي
اباوعلهن صافنة عليهن ياكلن بشهية وبسرعة راح يخلصن واني ممخلية لگمة بحلگي.
رغد: -جا ماتاكلين يحضي شمتانية.
استحيت اكول ماعرف اكل بيدي خفت يضحكن علية عود اني من بغداد حجت سفانة واخيرا
سفانة: -ثدگ خاف تريد خاشوكة
هدى: -صدگ حجيچ چا هسة منين نجيبلها خاشوكة ماكو طارن سمعت بالفاتحة
حجت اسراء ترتل بحرف السين مقلدة سفانة البنات بقن خازراتها سكتت وسفانة خجلت وطفرت عرفت ليش متحجي اعتقد ترتل او تلفظ الاحرف غلط.
اسراء والتفات يفترن على النسوان وشروق تصب جاي.
نو: -تعالي شروقة اكلي ويانة
شروق: ماريد اكلي انتي بالعافيه.
هدى: تعاي شريقة اكلي ويانة شبيج راح يهبط ضغطج ترى ماصارت هاي
شروق: -ماشتهي اكلن انتن بالعافية
عائشة: -هاي ياهي الماتاكل شو بلة يلة يمة اكعدي وي بنياتنة اكلي وجهج اصفر يبعد امج لاتطيحين ياهو اليحير بيج يلة يلة كدامي اگعدي
سويتلها مكان بصفي مجرد تخوط بالاكل صرت اسويلها لفات صغار وانطيها تاكل.
سجى: -لك ها ها دشوف تسوي لفات لشروق
هدى: -لعد تسويلج غير تسوي لاختها الحوك.
ابتسمت وشروق صفنت بوجهي تباوع اكلت شوية وطفرت لگيت امي بالاستقبال نفس النسوان يتعشن صاحتلي الحجية رحت يمهاصرت مقابيلها دگتلي بيدها گعدت بصفها المكان الاشرتلي علية.
اردفت بنبرة حادة وصوتها الخشن تغلغل باذني
-انتي نوة
-لا اسمي نو مو نوة
ابتسمت وجرت ضفيرتي تتلمس بيها وتكول: -جدة انتي ماتشبهينها بشي
-منية الما اشبهها؟
-چدتك نوة
-ها يعني انتي بيبي حكمة مو؟
-اي يبعد حبوبتج لاتكولين بيبي گولي حبوبة
-تمام.
بقيت اباوع بوجهها راسمة بحنچها دوائر صغار لونهن اخضر وفوگ حواجبها وحتى بيدها عيونها تتجول بملامحي وكانها تحفظني اردفت بسؤال.
-لو گالولج تضلين هنا تعيشين تضلين حبوبة؟
بدون تفكير ولا حسبت ولافكرت ليش هزيت راسي نافية: - اكيد لا شعندي باقية هذا مو بيتنة احنة عدنة بيت وعندي غرفة همانتين
مسحت خدي بهدوء نظراتها دافية مطمئنة ارتاحيت لحديثها والگعدتي وياها إلى جانت مشفرة تماما بالنسبة الي.
-چدة اول وتالي انتي هنا تعيشين لانج كبرتي بعد محد يرضى تضلين وي ولد هنيدة
فريت كلامها بعقلي اكثر من مره بس مفهمت شي رديت بقلة وعي وسئلت: -ليش غير هما اخوتي
-لا يحبوبة موش اخوتج بس حياوي اخيج
عقلي انضرب من التفكير هاي الحجية شگاعد تحجي! معقولة مخرفة دخلت امي صاحتني طفرت من مكاني مصدومة عقلي واگف عن التفكير باي شي رحت حضنتها بقوة وراسي يوجعني من كلام الحجية.
-شبيج ماما حبيبتي.
نو: -ماما هاي الحجية مخرفة شي؟
باوعت بعيونها تشتت بنظراتها عني عيوني المنتظرة اجابتها مثل المي التطفي النار النشعلت بداخلي لزمتها من خدودها.
-ماما هاي الحجية مخرفة كولي ماما
-شگالتلج
-گالت راح تعيشين هنا وبس حياوي اخوية ههههه تخيلي سجاد ومهند وعبدالله مو اخواتي ههههههه مخرفة ها.
سدت حلگي وطلعتني بالساحة النسوان انتبهن إلى حضنتني ومسحت شعري شمته وگالت.
-مخرفة كلهن مخرفات سجاد ومهند وعبدالله وحياوي كلهم اخوتج وسندج واليحجي غير هذا الحجي جذاب.
اجن نسوان راحت تتلگاهن ارتاحيت من كلام ماما بس بقة شي بداخلي ابد ممرتاح شفت رحمان وبعد ولد وياة ماعرف شيسون رحت باتجاهة واردفت.
-اكلك رحمان
-ها خوية
-صيح لحياوي اي واحد من اخوتي تشوفة صيحة وياك
-ادللي.
طلع وبقيت افتر بالساحة يم الباب تحركت البردة عرفتة حياوي من طولة بقة واگف بمكانة رحت اركض ضميت راسي بحضنة ماحس الا دافعني شوية واوگع بالگاع فتحت عيوني عبالك انضربت راسي اني شسويييت، ماحجة شي عدلت وگفتي وبچيت بدون كلام مسبق.
-والله العظيم عبالي حياوي مجنت اعرف بيك انهارر
-انمار: ديلا ماصار شي محد شاف بيج مدري بية البخت بطلي ثول ثول بطلي خوش
سجاد: -خوش خوش.
التفتت لسجاد طفرت علية حضنتة مستحية من تصرفي الغبي حضني وضحك حجة موجة الكلام لانمار.
-شعندك وي نوتنة متگلي
-انمار: وشعندك حاضنها ترة حرام انت محرم عليها لا الة الا الله شجاي يصير شبيكم انتم
مركزت بكلامة بس اسمعلة مبتسمة لان لگيت اخوي
بوسط الناس الغربة رد سجاد بجدية.
-سجاد: اختنة شكم مرة اعيدها الك
-لا اختك ولابطيخ.
بعدني سجاد منة صاير اعصاب: -روحي دخلي جوة نو لتطلعين بعد.
عفتهم ثنينهم صايرين اعصاب ورحت للمطبخ لگيت شروق تصب جاي واسراء تفتر يمهة.
-اگول شروقة لعد وين البنات
-راحن يغسلن مواعين بالترك روحي شوفيهن لاتحترگين بالقوري.
طلعت منها مسافة وصلت الترك واسمع صريخها رج البيت رج رحنة كلنة نركض وانصقعنة بالمنظر القوري واگع بالگاع والبخار تارس المطبخ. اما هي تطفر وتصرخ بآلم مثل الطير المذبوح ثواني واجوي الولد كلهم اخذوها وطلعو گعدت ابچي ميتة خوف عليها وامي راحت وياها حضنتني رغد تهدي بية.
-كافي يعمري نوة كافي لاتبچين
-ر. رجلها احترر. گت بعد متگدر تمشي عليها
هدى: -لا شبيج بس حرك يلفونها ويخلولها عصارة وجدك الله يرحمة.
-لا لا بعد متگدر تمشي راحت رجل البنية
بقيت ابچي وارجف البنات حارن بية جنت مفكرة بعد رجلها ماعت بالچاي الحار اجة صوت خشن يكول: -شكو شنهي هذا الصريخ
سجى: -ها انمار هاي نوة تبچي شريقة خطية احترگت بالقوري.
جلبت برغد انمار يخوف او بالاحرى من يصير عصبي دخلو اخواني كلهم بقو يمي يسكتون بية منا لمن اجت امي وشروق لافين رجلها وجهها احمررر من البچي دخلوها جوة بقت وحدها بالغرفة اشرتلي اجيبلها مي رحت للمطبخ صار بوجهي رحمان وجهة عابس وايدة ترجف مجرد شافني انهد بالاسئلة.
-شروق شلونها؟ زينة تبجي متوجعة؟ خل تاخذ العلاج شوية تصير زينة اذا توجعها خل تلبس اخذنها لدكتور زين احسن من هذا.
-لا زينه بس رادت مي.
هز راسة وطلع جكارة ورثها يسحب منها نفس احسه متوجع اليكول هو المحترك اخذت مي ورحت يمها كعدت اشرتلي اسد الباب سديته ورجعت لمكاني.
-زينة رجلج
-اي زينة الادوية ماحس بيها
-الحمدلله شوفي هذا رحمان يسئل عليج
دنگت تلعب باصابيعها متوترة وجهها صار احمرر
-حبيبج رحمان؟
رفعت وجهها مصدومة من سؤالي هزت راسها عدت مرات بالنفي نزلن دموعها مسحتهن وحجت واضحة الغصة بصوتها.
-رحمان لاسراء مو الي.