رواية بين سلاسل العادات للكاتبة كفاية كاظم الفصل الخامس
-لج رغيدة امشي ندش جوة اجن الملالي راح يلطمن
رغد: -دوگفي بس اعدل شالي ها من هسه اگول موش تفشلنة وتخلن جدة نوة تضحك علينة
هدى: -چا انة اضلن هنا تضل تخوز بية وانة استحي اخذن سفانة وياچن
سجى: -لا سفانة ماتعرف تلطم امشي انتي ويانة يلا لاتدگينها بينا
هدى: -ماء ماءء ماءء
رغد: -وسماء امشنة يلا
سفانة: -جا وانة
سجى: انتي ضلي وين نوة وشريقة خطية خافن تحتاج شي لاتعوفنها.
نو: -طلعن البنات للاستقبال يلطمن وي النسوان بقينة اني وسفانة بلمطبخ وحتى تباوع بالثانية
جانت هادئة كلش عجبني اتبادل وياها الحديث.
-اكول سفانة انتي ياصف
-مبطلة من ثمان (زمان)
-هاا. ليش تاركة حرامات
-احثن ماحبها اگعد بالبيت احثنلي (احسنلي)
-بالعكس لازم تحبينها لان بيها مستقبل هيج حياوي يگول هسة اني صح مو شاطرة ومرات اتذمر ماريد اداوم بس اخواني يسوولي واهس ويقروني الا انعدل
-انتي مو مثلي انة اختلف.
-ليش تختلفلين شناقصج
-مممم
سكتت منصية راسها ملاحظتها دائما ساكتة وابد متناقش حبيت افتح وياها حديث لان الجو كأبة كابة بية.
-اي سولفي جنتي بالمدرسة شاطرة كسولة
سفانة: -لا والله جنت حيل حيل شاطرة بث ثرت (صرت) ماحبها كرهتها حيل
-الله يعوضج بالاحسن
-ان شاءلله
عائشة: -يبنيات حضرن الجاي
سفانة: -ثار
-اكلج اني ماعرف اسوي انتي سوي
-ولا يهمج اني اثوية هثة
-زين اني اروح اشوف شروق خطية
-اي اي روحي.
الف فكرة براسي اليل كلة افكر معقولة رحمان حاجي باسراء للزواج وقارين الفاتحة شلون وهو عيونة ورة شروق.! متاكدة هما يحبون بعض من نظراتهم وحتى لو شروق متحبة، هو يحبها واكثر من الحب بداخلة تجاهاا.
ضربت راسي لو امي تقرا تفكيري يمكن تشوي اذاني بصل ويني وين هالسوالف اباوع بوجوة العشاق واقرا نظراتهم، اگدر الاحظ المرتبطين من نظراتهم بس فالحة بهاي الشغلة والا مطفية بكلشي.
دخلت للغرفة ضلمة هندس كلشي ميبين فتحت الضوة ودورت بعيوني عليها حاصرة نفسها بالزاوية مگرفصة من البرد رحت يمها صرت مقابيلها مسحت على ضهرها وهمست بصوت ناصي.
-بردانة. اجيبلج صوبة تدفين؟
هزت راسها لا وبقت على وضعها شگد انقهرت عليها احس بيها مظلومة عيونها تحجي قصة آليمة.
بعدت شعرها عن وجهها رفعت راسها عيوني دم صايرة.
-رجلج توجعج.؟ اخليهم ياخذونج لطبيب؟
-تؤ
-لعد؟
-مابية شي.
-لابيج شي ترة ميصير هيج تسوين بنفسج اترحمي لابوج خلص راح لدار حقة كلنة باجر نموت دشوفي اخواتج مسون مثلج هيجي بس انتي
ردت اواسيها واخفف عنها بهل كملتين گوة ملزكتهن تلزك بس للاسف زدت الطين بلة انفجرت بجي حرت بيها هسة اني الا احجي لو ساكتة مو احسن حضنتها وصرت ابجي وياها.
: -اسغفر الله كافي حبابة اسكتي
-نوو رااااح ابوي وما راااضي عننني رراح ومااا يحاچيني.
دخلت بنوبة بكاء طويلة حرت شسوي وشحجي وياها شهگاتها كسرن گلبي. ورة فترة من الوقت الا
هدأت مسحت وجهها وشديتها إلى ماعرف شنو السر العجيب الخلاني احبها لهلدرجة يمكن لان ماعندي اخوات.
- احجي، شعندج وشصاير وياج سولفيلي كلشي
-ماكو شي ينحجي. تعرفين كلشي بعدين مو هسة
رجعت مددت وتغطت جريت حسرة طويلة غطيتها عدل و رحت للمطبخ فارغ بس سفانة تسوي جاي.
-ها شنو لحد الان بعدج تسوين
-اي مو امي گالت ثوي بعد
-هاا.
صبيتلي جاي بگلاص اخذته وطلعت من باب المطبخ ااخذت منة رشفةو رفعت راسي صار بوجهي انمار خزرني وجر گلاص الجاي من ايدي فتحت حلگي ردت احجي ودخلو رحمان وبعد ولد شاب.
رحمان: -هاا نوة
-هاا
انمار: -لاتضلين تخوزرين بية صبيلج گلاص غيرة
عوع هسة هذا شبية منو المباوعلة. سكتت ورجعت يم سفانة تارسة صينيتين ستكاتيين بدون شكر اخذت الشكردانة و بقيت افرغ شكر بالاستكاين.
نزار: -ثبيلي جاي ثفانة.
التفتت فاتحة عيوني وسعهن اباوعلة كاتم ضحكتة ضربة انمار راسة وانفجر ضحك التفتت لسفانة وجهها صار احمرر اكيد صار عندها رد فعل من طريقة تنمرة المفاجأة بلعت ريگ واشرتلة بيدي.
-شتريد عفوا
-جاي بث مو انتي ثفانة تثبلي.
باقل من ثانية سفانة اختفت، حصرو انمار ورحمان كفخوة تكفخ يستاهل متنمر درت وجهي صبيتلة جاي بينما هو غاص بالضحك قدمتة اله واستفزني كلامة الحقير خجل البنية الى متى نبقى بهلعقليات المريضة نتنمر على المقابل ونخجلة بطريقة سخيفة
راد يلزم گلاص الجاي فلتة من ايدي ووگع رجلية طفر من مكانة وصاح.
-شبييبج فااهية كسرر كوون بيييدج
خليت ايدي على حلگي مستنكرة...
-بالغلط اسفه اسفه اعتذر.
نزار: -ديلا ولي اني اصب سم مابيجن خير بنات بغداد بس عيارة وتنغوص
رفعت حاجبي ردت احجي وسكتت من خزرني انمار بمعنى لاتراددين عفتهم ورحت اهرول لگيت سفانة بالحمام غسلت وجهها وطلعت مصطنعة الابتسامة بادلتها الإبتسامة.
- عادي لتهتمين الة. كلامة مسموم مثلة.
سفانة: -ههه اي عادي متعودة علية انة (اختنگت ورحت للاستقبال بوجهي مريت من يمهم مامهتمة بس الواقع اموت من واحد يتنمر على نطقي حتى صرت بس للضرورة احجي وقبل لا احجي افكر بكلامي كون مابية حرف(الزاء، والصاد، السين).
عندي رتلة بيهن الفضهن ثاء بسبب هذا الشي تركت الدراسة وادمرت نفسيتي بسبب تنمر الطلاب من الابتدائية كبرت وصارت الطالبات تحشش وتضحك علية بوسط جمعاتهن كهرت المدرسة ودكيت رجل الا ابطل وبطلت. وحتى الزواج ارفض شكو واحد يدگ بابي اخاف باجر عگبة يكعد يقلدني ويضحك علية مثل مايسوون لو يعيب على شكلي دائماً يصيحولي المدگورة لان جسمي ماينمو ابوي ماخلة بصغري شكد راجعلي حتى اعالج نقص النمو بس مافاد بقيت ضعيفة ناعمة.
تعبت من التنمر على كلشي يتنمرون عمري 22 سنة ويصيحولي البايرة فاتج القطار، محد يگلبج، ضلي نامي على افاد اهلج. على گولة امي تگول يم حسين جنتي بوحدة صرتي بثنين اي لا تزوجت ولا كملت دراستي تعبت من تفكيرهم.
مسحت دموعي الرادن يهطلن ودخلت للاستقبال صرت الطم بحرگة ونسيت روحي انتبهت للنسوان يباوعن علية حسيت خربت الطم فعلا اني اطبطب (مااعرف الطم) طلعت من الاستقبال الدموع متجمعة بعيوني داخلي يغلي غليااان.
رحت كعدت بصف المبردة واطلقت سيل من الدموع المتجمع بعيوني. ابچي بحركة كل ما اتذكر كلامهم كلهم خدشو گلبي واولهم امي دومها وزمانها تحجي علية ولا مرة مدحتني عينك عينك تذم بية ترددت بالي كلمتها المعرفة وهي تنشغ وتدعي يمتها يجي اليوم الما اشوفن بية وجهج هيج ربي تفگني منها
رغم اني ما أذيت احد او سويت شي مو زين بالعكس خادمتهم ومطيعة لامرهم، مر علية اهانات ومواقف مجتمعة بداخلي.
استمع لصوت جدة حكمة تنعة وغصت وياها بعالم الحزن والفقدان، رفعت راسي مذهولة من الصوت القريب مني.
-شمالج سفانة ترى البچي مو زين على عويناتج خايبة علة كيفج
مسحت عيوني بردن دشداشتي وكمت صرت مقابيلة باوعت بوجهة ابتسم إلى حسيت الهم والغم انزاح من گلبي الشخص الوحيد اليهتم إلى ويحاول يسحب حزني هو...
بقيت اتأمل وجهة شواربة مقوسة ومبرومات من الاطراف عيونة العسلية يلصفن بالشمس انفة جاي صبة وحدة بشرتة البيضة لفت جراويتة حافضة تفاصيل ومعاني وجهها شلون بية. فزيت ومتت مستحة من صاح بية.
فارس: -خايبة شمالج وين صفنتي
شتت نضري بالمكان وصرت العب بردان الدشداشة من التوتر ليش اوصل روحي لهاي المواصيل لاخلقة بيها خير الناس تمدحني بيها عاد الاخلاق وبهاي تصرفاتي راح اخسر الشخص اليحترمني وياخذ عني نظرة موحلوة.
-ها لاجنت اسمع لصوت جدة حكمة ولينت گلبي
-فارس: ها جا خوش دشي جدامي شوفي خافن اكو نسوان جوة
-لا دش ماكو نسوان غريبة تدش جوة
دخل گدامي يعدل بچراويتة مشيت وراة كيف كيفي اشم واترس ريتي بعطرة اليمشي وراة دخلت وراة للمطبخ صبتلة نو جاي اخذة منها يشرب شوية واجتمعن نسوان عمي خلصت القراية النسوان الغربة بقت بالاستقبال ونسوانة تروش دخلت رضية باسها براسها وسلم على عائشة.
رضية: -اغديلك فدوة يمة مريتك والبنات شلونهن
-فارس: الحمدلله زينات كبل شوية خابرتهن
عائشة: -يمة فارس بنيتي زهرة شلونها ماحاچتك
فارس: -زينة مابيها شي حاچتني گالت خل يضلن براحتهن.
رضية: -شسالفتج خية مرتة يمها ماتقصر منها
عائشة: -والنعم منها بس گلب والدة اخافن عليها وانتي تعرفين حالتها
-جا شبيدنة ماتگليلي هذا القدر ولعباتة الغمة محد يگدر يوگف بويهاا (بوجهها).
كلمة مرتة رجعتني لزماني رحت للحمام راح انفجر بعد ماگدر اسيطر روحي سديت الباب وگعدت ابچي وانحب على حضي االاغبر.
طحت بحب رجال متزوج وعدة مرة احلى من الگمر اخ اخ يالقهر شلون بية شلون من حض عندي وين وصلت ليش ماحسيت على روحي من عشگتة.
يمكن بسبب تعاملة المختلف وياي بكلمة وحدة منة يزيح ميت سنبلة نابتة بگلبي.
ضربت روحي راچدي ووعدت نفسي وعد بعد ما اعاين بوجهها ابد ولاافكر بية لهنا وحدي وين اوصل روحي بعد اكثر.
نو: -صار وقت الغدة والبنات بدن ينقلن بالاكل كعدت بالمطبخ يم الصوبة اتدفا. گلبي مقبوض كلش ماالي خلک واحد تعامل البنات اسراء واختها وياية ابد محلو ينترن بية نتر وماما من جهة احوالها مخربطة الضغط معلك عدها حالتها حالة.
مرت من يمي شروق زادت قهري لافة رجلها وتمشي عليها تشتغل واخواتها كل متفوت وحده منهن يكفخنها جنها خدامة كمت من مكاني واخذت الجلافة منها.
-اني اغسل روحي اكعدي.
-لا اني اغسلهن مايسون تزحمين روحج
باوعت للمواعين السنك متروس ولازم تغسلهن وهي واكفة ورجلها محترگة.
-اني اغسل لاتعاندين
-لا ان.
-خليهن تغسلهن نو هسة انتي بيا حال بيج حيل روحي اگعدي واسكتي
التفتنة ثنينة لمصدر الصوت. خلة رحمان نفاضة الجكاير السنك وعيونة عليها بنفس اللحظة دخلت اسراء خزرتها بعصبية مطگگة عيونها.
اسراء: -شبيييجن مفهياااات ماتشتغلن لووو هم اني اجي اغسل بمكاااانچن.
انخطف لون شروق واخذت مني الجلافة بقوة وصارت تغسل. طلعو ذولي الزوج بقينة بس اني وياها صرت اشطف الها وهي تغسل ودموعها تنزل
اجن البنات رادن يساعدنها مقبلت كعدن يتغدن وهي خلصت وراحت للغرفة عفتها ورحت اشوف اخواني.
سجى: -تعاي نوة تغدي ويانة
-ما اشتهي بالعافيه عليجن
طلعت بالساحة الجو بااارد يگص گص عكس داخلي مشتعل احس باحساس غريب اول مرة يزورني واول مرة احضر هيج مناسبة كئيبة.
بكل مكان نسوان وجهال هوووسة تسطر سطر اخذتني رجلية لباب الشارع جانو مخلين بردة فتحتها وطلعت محد بالشارع فارغ بقيت واگفة بمكاني وعيوني تفتر بالمكان لمحت عبدالله من بعيد اشرتلة بيدي اجة يركض حضنتة ودفنت راسي بصدرة ابچي واناشغ.
-ولج نووتنة شبيج احد محاجيج كولي
مسحت وجهي بطرف ردني ورجعت حضنتة ابجي.
-رجعوني لبيتنة حبابين ماريد ابقى هنا
-ليش احد اذاج سوالج شي. سمعج كلام محلو كوولي.
احس غصة بصدري لزمت ايدة وميلت رگبتي باوعتلة بعيون متوسلة وهمست. : -خل نرجع ماريد اخذ قهر وهم الناس الموجودين هنا اريد ارجع لبيتنة هنا ضوجة كلها ضايجة رجعوني فدوة
-يلة روحي بدلي وكلي لامي حتى اخذج
هزيت راسي ورحت لامي بلغتها رفضت وگالت لليل تختم الفاتحة ونرجع رجعت بين الناس غربة بالنسبة إلى حبيتهم صح بس ممتعودة على وجودي وحدي بوسط ناس.
سجى: -نوة من شفتج وشفتيني متسرسحة شمالج يحضي.
هدى: جنها منعسة تريد تنام دروحي نامي
نو: -بس اني ممنعسة
سفانة: -شكلها هيج
نو: -اي والله صح اتفق وياج شكلي هيج
سجى: -خية الصدگ انتي فاهية من گاعج مو تزعلين
رجعت كذلتي ورة اذني دنگت راسي وهزيتة.
-عادي مو جديد حتى المدرسات يگللي انتي فاهية.
نفضن الغدة وسون ختمة كل النسوان اجتمعن بالاستقبال قرو قرآن وادعية وبعدها بدت بيبي حكمة تنعى بصوتها الحنون خلصت الختمة تعشينة وحضرت نفسي راح نرجع للبيت واخيرا ودعت البنات وطلعنا.
بعد طريق طويل وصلنة لبيتنة دخلنة بيه يخوف كل روح مابية لان فارغ تلگاني ميمو شلتة حاضنتة وابوس بية مشتاقتلة اخذتة وصعدت لغرفتي شمرت روحي سريري تغطيت وغطيت ميمو وياي.
-ههههه لك مشتاقتلك ادبسزز هم شتاقيتلي لو عدك حبيبات اني بيش الكيلو هههه
اندگ الباب طفرت من مكاني وتربعت فوگ السرير سحبت ضفيرتي ليگدام وعطت...
-ادخل
دخل حياوي گعد طرف السرير يوزع نضراتة بوجهي. وجهة مغيم لزمت جتفة وحجيت بقلق.
-شبيك حياوي
رفع راسة يستطنع الابتسامة اخذ ايدي وباسها
صفنت بعيونة التعبانة صايرات دم مسح خدي وحجة بصوت هامس.
-شيصير لو يطلع كل الجاي نعيشة اني وياج جذب؟ شيصير لو نطلع من هذا البيت ونعيش بغير بيت؟! راح يرجعوني اتذكر الماضي المامفارگني.
راح تنفرض علينة عيشة غير عيشتنة هاي ونعوف كل احلامنا وامنياتنا القليلة نسويلها بيباي بيباي
سكت دقايق الغرفه صارت هدوء. ارمش بعيوني ممستوعبة كلامة حسيتة يقرا خواطر مو واقع حال.
انملت عيونة دموع حضني ودك على ضهري وطلع بقيت صافنة وعقلي فاصل ماگدر افكر بشي نمت عقلي مشوش گعدت متاخرة بدلت ملابسي بسررعة واخذت جنطتي ونزلت اهرول اخذت المصروف من امي ورحت اركض وصلت متاخرة گوة دخلوني بعد ما حصلتلي كم رزالة.
-البقية بحياتج
-حياتج الباقية جبيبتي
-باجر عدنة امتحان انكليزي
-هااا
-اي والله اقري المادة لاترسبين ترة هذا يحدد مصيرج
-تمام.
دنگت اشخبط بالقلم وبالي مو وي الدراسة ابد التفتت لصديقتي مزعوجة تنغرني بالقلم.
-شكووو شبيييج
-دگومي المدرسة تصيح باسمج امشي تحركي
نززتني المدرسة بصوتها العالي حتى كرهت الدراسة بسببهن بس يصيحن علية.
-ينرااادلج مشية الا تگومييين ستتت نو.
بلعت ريگي وكمت اباوع للصبورة بيها سؤال يبوو حضي طلاسم هذا مو سؤال اخذت القلم و نزلت السؤال نفسة ذبيت القلم الرحلة. اباوع للست متخوصرة وخازرتني بغيض بس لو اعرف شعدها وياية ارتاحيت زمجرت بوجهي بصوتها العالي.
-شنوووو هاااي شسوويتي
باوعت للصبورة ورجعت باوعتلها.
-جانت عدنة فاتحة وهذا الموضوع جديد مقاريتة اذا تريدين الجواب خل غيري يحلة.
-انتي لو مركزة وياي جا عرفتي الحل هذا اعادة الهم وانتي مصفطة يلة ارررجعي
رجعت لمكاني طالعة روحي من خشمي خلص الوقت اعصابي رجعت للبيت فاير دمي شمرت الجنطة ودخلت ادور امي گاعدة بغرفتها تبچي صوت القصايد طحت بيهن وطفيت التليفون حضنتها ومسحت دموعها.
-كافي ماما حبيبتي لتبچين خالو راح لدار حقة اترحميلة
-والله زين صايرة تعرفين تحجين
-هههه اي لعد شعبالج صايرة اواسي وكذا.
-اي بس ماتعرفين تسبحين لحد الان ماسابحة وشعرج ايدي امشي گدامي اسبحي
-اهوو يعني لازم كل يوميه اسبح شنو السالفة ترى الجو باااااررد ماريد اسبح
-تمشين تسبحين لو استعمل اسلوبي الخاص
-لا رايحة رايحة
طلعت من غرفتها احجي بصوت.
-يعني واحد جاي من الدوام تعبان جوعان كاتلة الضيم يروح يسسسبح بهذا الجو البارد شبية اني منين اجاني الوصخ اشو نضيفة اووف اووووف.
-اخذي ملابسج بدربج مو تطبين بالحمام وتضلين تصيحين جيبولي ملابسي
طلعتلي تراكات شتوية ودخلت اسبح كل مرة انسة اطلعلي ملابس بالحمام الا اتذكر. خلصت و رحت لغرفتي اخذت زيت شعر ومشط ونزلت جوة لگيت گدامي سرى وامها سلمت عليهن وكعدت گدام امي تمشطلي.
-وفاء(ام سرى: شلونج نو
-الحمدلله تمام
-ماشاء الله شعرج يخبل
هند: -لو يضل عليها هسة عدها شعرتين منتوفات منا ومنا بس اني وياها وياها امشط وادلك وازيت شالعة گلبي.
-لعد متخليها تعتمد على روحها ليش هيج معودتها عليج ترى نو مو صغيرة جماعتها تزوجن
-جماعتهة مو هاي الفطيرة والله اني اكيف من تغسل ملابسها وتمشط شعرها بس هي فاهية معتمدة علية بكلشي شسويلها حرت وياها
-منا ورايح اعتمدي عن نفسج كافي شكبرج بعد تصيرين
هنا يسولفن واني العب بأضافر رجلي شكد تفشلت اباوع لسرى مبتسمة خلصت شعري وطفرنا سوى رحنا للمطبخ.
-لج شتاقيتلج جلبة متسالين علية متت عشت.
نو: -حتى اني اشتاقيت والله بس بيش اسال عليج حتى موبايل معندي اساس متعرفين ست سراوي
-ولج صاير لسانج طويل ااادبسززز
-هههه لا بس يمج. صددددك سولفيلي شنو صار بينج وبين حياوي رجعتو سولفي سوولفي
اخذت حسرة وراحت تصب واني اكل بالزلاطة
سرى: -رجعت للدوام بعد عر وجر ونهى بطلاها
ماكو دوام
-عزاااا
-اي والله عزا صار
-زين وابوج قابل تترك الدراسة مو هو متخرج ويحب البنية التدرس شلون هيجي يبطلها.
-دادة ابوية ما الة دخل بهذا الكلام كل هذا الحجي بيد عادل وتعرفين ابوية شيگول وشسوي عادل ميحاجية مو زين ورجعني اداوم
-شنو صار بابن خالج رفضتوة مو
-اخ يمة گلبي لج نو اخوج سجاد نهى علية وهسه منتظرين بس تجي العطلة يفتحون الموضوع وسجاد يزوجنننني
فتحت عيوني وسعهن مصدومة من الكلام السمعتةسرى وسجاد شلون هيج مستحيل ابد ممتوقعة.
-وحياااوي!
ذبت حسرة عالية وسكتت منطقت بحرف رحتلها اهز بيها من جتفها.
-سرى وحياوي شنو مو انتو تحبون بعض مو لازم تتزوجون ليش سجاد لعد وحياااوي!
التفتت علية تمسح دمعة تنزل عشرة حجت والغصة خانگتها: -ميحبني حياوي اخوج ميحبني نو
هزيت راسي عدة مرات مستنكرة كلامها
-لا هو يحبج شبيج لتحجين هيجي اكيد يحبج بس اكو شي غلط
-لا نو بس اني احبة حبي اله طرف واحد ههه قصة حبي انتهت قبل لتبدي
ردت احجي ودخل سجاد من شاف سرى خلة ورجع بدون حتى ميسلم عليها بقيت يم سرى تصب.
وانقل منها الاكل اخلية بالصينية.
-روحي افرشي السفرة وتعالي انقلي الاكل
-هااا اي هسة
رحت سويت مثل مگلتلي نقلت كل الاكل وهي بقت بالمطبخ مطلعت ابد انطتني دولكة مي تنهدت مقهورة.
-امشي اتغدي ويانة
-وداعتج نفسيتي مسدودة تماماً ابد مبيها مجال
-لعد تبقين هنا
-لا راح اصعد لغرفتج بين متخلصين تلحگيني
-تمام.
عفتها ورحت اتغدة الكل مجتمع السفرة من كثر مجوعانة خلصت ماعوني قبلهم شلتة وكمت اترسة صار بوجهي عادل بقيت مفهية بوجهة.
-صبيلي وياج ماعون ميتتت جو
رحت للمطبخ صبيتلة ماعون نفسيتي انسدت من شفتة شلون جنت جوعانة خليت ماعونة گدامة وردت امشي.
-لعد وين ماعونج متجين تاكلين
درت وجهي علية رافعة حاجبي
-ما اشتهي اكلت قبلكم عوود من اجوع اكل
رحت گعدت بالمطبخ اعزل بية.
عبدالله: -ها ولج نووتنة اليوم سابحة الوصخة.
-انجب شنو وصخة انت الوصخ. عبيد والله اگل لحياوي عليك
-لعد ماتگليلة لازمج يگول مجذب عليج بالاسبوع مرة تسبحين خلفلة امي لو ماهي حتى شعرج گمل
تهي بهي
لزمته من رگبتة اخنك بية. جذاب اسبح بين يوم ويوم لان شتا باردة واني نضيفة لا اطبخ ولا اسوي شي بعد منين اتوصخ.
-عيييد هذا الكلام وشوف شسوي بيك حقيرر عگروگ جربوع
-خاب امشي الفاهية شتسوين مثلا تفترسينني لو ترفسين بمصاريني ههههه
-ارفس بمصارينك بعد شتررريد.
-روحي بابا روحي بوي ونامي يلا لغرفتج باي باي باي مع السلامة والامانة
نضراتة استفزتني كالعادة وصرنة مالخ دخل سجاد وسيط بيناتنة.
-سجااااوي عوووفني اااكتلة
عبدالله: -اي بلة سجاوي عوفها تگتلني
سجاد: -انجبو يلا اخوان حب الله والوطن يلا اتصالحو حرام وعيب عليكم يلا اعتذرو من بعض وصيرو حبابين
-ماا اعتذر منه لو يتگهرررب
عبدالله: -شعجب هي مو لو يموت اشو صارت لا يتگهرب
-بكيفي اسويها يموت يتگهرب ب بكيفي ديلا ولي.
عبدالله: -ولي بعينج الفاهية النايمة
-سجااااد جاي تسمعة موو يلا صيح بية بسسسرعة
سجاد: -هسة انت بيك مرض خباثة ليش تگلها الفاهية
عبدالله: -لعد مجذب عليها لحضه لحضه انتي مو تگولين اني مو فاهية.
-اي صح اني مو. فاهية
-خوش خوش عندي الج تحدي اذا سويتية بعد ماصيحلج فاهية ابد اببدددد
-شنو التحدي عيني
-تغسلين المواعين
-تمام موافقة بس بعد متصيحلي فاهية اتفقنة
-اتفقنة وسجاوي الشاهد
سجاد: ديلا عمي اشهد بس فضوها.
طلعو من المطبخ غسلت وجهي صاير نار دخل مهند شايل الصينية راسه خلاها السنك ورفع ادية.
-اليوم المواعين مو نوبتي عبيد ترة
-هيءءءءء الچلب الحقير العگروگ ضحك عليه ذبهن براسي وشرد
-ههههه سهلة والله لو ماعندي طلعة غسلتهن الج
-لا يابة روح هية اغسلهن قابل انمونة
رحت اعزل المواعين شويه وابجي هوااااية كلهن علية ترى مصارت هيجي.
سرى
گاعدة بغرفة حياوي انتظرة يجي واحجي وياة گلبي متروس حقد علية كل الحب البداخلي انزاح تجاهة بالخطوة السوواها ما حارب لاجلي ولاگال اني اريدها دز اخوة ينهى علية. ومن ناحية اهلي اكيد راح يرفضوة لو گايل.
انفتح الباب طفرت من مكاني من دخل سد الباب وراة ابد مباوع بوجهي راح للكنتور يطلع ملابس انطاني ضهرة ولا كأني موجوده.
حجيت بصوت واضح: -لاتفكر اجيت هنا حتى احجي بخصوصي.
دار وجهة إلى عيوني ذبلانات حزن وهم العالم كلة متجمع بيهن شمر التشيرت السرير وحجة برود تام.
-لعد شنو تريدين تحجين
- نو
-شبيها نو؟
-عرفت بعدها
-چو
رجع يرتب بملابسة منطيني ضهرة متت الف موتة بهل ثواني رغم فعلا اني مجيت احجي وياة بخصوصي بس هو حسسني اني رخيصة شامرة نفسي علية تعصبت كلش ونترت بية.
-مو داحجي وياك شهل قلة الذوق العندك
عاف البيدة وگف مقابيلي مكتف اديناتة
ارتبكت وحتى الموضوع طار من بالي.
-نو شوكت تعرف يعني معقولة لحد الان محد گلها
من الموجودين
-ماعرف بس بالنهاية راح تعرف
-زين واذا عرفت شلون
-تتعايش وي الحقيقة
-بس راح تتأذى
-اني وياها مراح اعوفها. نتأذة سوى ونتخطى سوة
-زين ليش متحجيلها الحقيقة احسن من متسمع من الناس ويقفل عقلها ترى خطيه نو صغيره شلون تتعايش وي هيجي حقيقة مرة متناسبها
-لاتخافين تعيش مثل ماعشت
-عشت بدون مشاعر ماتحب وحاقد وعازل نفسك تريدها مثلك تصير؟
-تؤ تؤ مااخليها مثلي تصير نو فراشة تحب تطير وراح ابقى اراقبها واشرف على تحليقها بنفسي ما اخليها مثلي ابد
سكتنا ثنينة رجع يعزل ملابسة.
-وتبقون هنا عايشين
-نشوف وين تصفة الله يحلها
حسيت الكلام خلص لازم اطلع. رحت لغرفة نو جولت عيوني بغرفتها ودمعت عيوني شلون راح تعوف كل هذا العز والدلال نو عايشة بخيرر بوجود مرت عمو وولدها. حياة وردية عايشتها اكثر شي يضوجها كلمة فاهية شلون بيها وي المستقبل المجهول.
كلام عادل ابد مفكرت بية مستحيل استغل نو لمصلحتي واتزوج من الشخص الاحبة مستحيل احجيلها الكاله عادل واخليها تخرب حياتها لاجل مصلحتي. سلمت كلشي بيد الله هو اليدبر الامور وين تصفة خلي تصفة بعد ما اهتم.
نو
اكثر شي مزعج غسل المواعين ناس تاكل ومرتاحة واحد يغسل الهم هسة وين العدالة بالموضوع. اليسمعني يگول والله خطيه المواعين بكل وقت عليها اشو خلفلة اخواني يغسلون.
-شنو ماكو جاي
التفتت فازة من صوتة ذبيت الماعون من ايدي ارتبكت من وجودي وياة بنفس المكان.
-هااا شنو
-چاي چاي ماعدكم
-ها لاعدنة
درت وجهي اكمل غسلي اديناتي ترجف الزم الماعون يرجع يزلگ حسيتة وراي کْلش صدري صار يصعد وينزل من همس بذني.
عادل: -انمار هم حجة وياج شي
هزيت راسي لا وبقيت متجمدة بس صوت نفسي مسموع...
-اذا شفتية ثاني مرة اطلعي من المكان الهو بية ودير بالج تحجين وياة افتهمتي
-اي اي
-عفية هيج اريدج
-شلونج انتي
-زينة
-حتى اني من شفتج صرت ززين
حسيتة ابتعد مني لحضات ودخل سجاد.
-ها عدولة شتسوي بمطبخنا الجميل
-اجيت اشوف الجميل
گطعت النفس وصلت بية مرحلة يتغزل بية گدام اخواني وين يريد يوصل! نقذ موقفة الخايس من رجع حجة.
-اجيت اسوي جاي بس ماعرف مكان القوري ادري هو قوري وين تخلونة قابل
سجاد: چااااي تريد چااااي غير تحجي واني اسويلك واصبلك واشربك بيدي
عادل: -ماريدك تشربني بس سويلي
سجاد: -اشو ماسويلك
عادل: -خوش اني اسوي هسه قابل انمونة عود احنة نسابة حتى چاي متسويلي
رجعت اغسل من ابتعد حديثهم عني، خدر سجاد جاي عافة وطلعو من المطبخ كملت تنظيف ورحت لغرفتي.
-الوو يحلو وين صافن
-سرى: ها لا هنا
-اممم عبالي
سرى: -اي ست نو شكو ماكو.
-ماكو شي انتي شكو حجيتي وي الحب بعدج
ضاجت من كلمتي ودارت وجهها تمتمت بصوت ناصي استحيت من طريقة كلامي رجعت حجت بعد الهدوء الحصل وعيونها تلالي بالدمع.
-نو حبيبتي انتي انسي هذا الموضوع لان نهايتة معروفة اني غبية من اعترفت لاخوج وراح اصلح غلطي وبعد مراح احجي وياه بهلخصوص واعاملة بالمثل واحاول انساة لان هو ميبادلني.
حضي خلاني احبة واتعلق بية لدرجة حتى باحلامي يطلعلي بس بارادتي اتخطى وانساة واريد منج تنسي رجاءً وابد لتفكرين بحبي لاخوج
هزيت راسي واحس غصة بگلبي حالها وطريقة كلامها المليانة خذلان وحزن، ابتسمت بجذب واردفت
سرى: -اي يحليوة شنو صار وياج هناك
-تعرفت على بنات حبابات هواي
تربعت وخليت ضفيرتي ليگدام وانطلقت احجيلها بكل حماس كل الصار وياية وحتى شروق وسفانة سولفتلها.
-شوفي نو خل اگلج شغلة تعلمتها ومشيت عليها قاعدة الناس الها حياتها بيها فرح، حزن، هم، غل لاياخذج الفضول تكتشفينها لان لو اكتشفتي راح تتأثرين بمصايبهم وتاخذين من طاقتهم السلبية فخليج بعيدة عنهم وعن مشاكلهم
-هاا اي
-اريدج توعديني تصيري قوية واعتمدي على
نفسج منا ورايح
-اكيد اكيد بس حبابة اشرحيلي الصخاميات اليوم المدرسه رزلتني جلبة حقيرة عگروگة
-هههههه روحي جيبيلي كتبج خل اقريج.
كعدت سرى تشرحلي كل دروسي والمواضيع الفايتتني بقت يمنة للعصر وراحت شعبنا سوالف مخلينة موضوع محچينة بية احب حديثي وي سرى كلامها يوعيني.
مر اليوم عادي داومت ثاني يوم ماعرف شحجي وشكول على اسلوب وتعامل المدرسات وياية على الرغم اني ما احجي بدرسهن ابد خلني اكره شي اسمة دراسة.
رجعت للبيت الطريق كلة امسح بعيوني انقهرت حيل يرزلن بية گدام الطالبات عگروگات شمرت الجنطة بالحديقة ودخلت اعيط واضرب رجلي بالگاع.
-بعددد مداووم لوو امووت والله العظيم راح اتررك الدرراسة تسمعوووني بعد ماداوم
طلعت امي مخروعة طاگة عيونها ووجهها ينطي الوان حجت بقلق وخوف.
-ولج شكو اجد محاچيچ شبييج
-شبيه صايرة حايط نصيص يا مدرسة تدخل ترزل بية طاح حضي اذا داومت بعد ماداااااوم رااح ابببطل
-شمسوية خاف تحجين
-والله العظيم مااحجي بدرسهن روحي اسألي صديقتي اذا تردين.
سكتت امي وبقيت وضعي للعصر حتى الولد مطلعو بقو گاعدين فوگ راسي لافة روحي بالبطانية وعبدالله يدغدغ بية.
-ولي ولي يلا اطلع من غرفتي يلا
يجر بالبطانية وارجع اجرها.
عبدالله: -هيا انهضي واستعدي للمبارزة ياا صخلة
-امشي ولي يامصاخمة الصخل العگروگ
-ماغيرج عگروگة هييا استعددي سووف اقررع طبول الحرب
سجاد: -اي اي يلا كومي طلعي حرگتج كومي لتصيرين فاهية.
طلعت راسي من البطانية خزرت حياوي اشرلي براسة گمت وصرنة من الشعر حقير يجرني من گذلتي بس اني هم ماقصرت نتفت شعرة تنتف.
فاككنة حياوي ودفر عبدالله وصلة للباب خلاة يتلوى
بمكانة
-حل حتى حل تستاهل هي هي انجعصت جعصت ال...
عبدالله: -امشي ولي الفاهية الوصخة خلفلة على امي تمشط شعرج وتكومج تسبحين.
غابت شمس واشرقت شمس ماتدفي صاحبها صادف خميس اخذوني حياوي وسجاد للمدرسة وحاجوة المديرة طول ماهمة يحجون اني مبتسمة احس عندي سند بهالدنيا اجن المدرسات واعتذرن مني وگالن بسبب المكان الگاعدة بية.
غيرن مكاني خلاني بالبداية طلعت روحي احس نفسي مكشوفة اترقب تصرفاتي احس الكل يباوعلي وين جنت خاتلة.
مرت خمس ايام على وفاة خالي حمزة واليوم السادس كاعدة العب وي هري ميمو سبحتة وجاي انشف بشعرة دخلت امي ضايجة من اشوف حالها اضوج من يمي ابتسمت منحرجة لان وعدتها ما ادخلة لغرفتي وخلفت بوعدي.
-جان وصخ وبردان.
سكتت منتظرتها ترزلني لو تطلع من الغرفة بس مسوت هيج اجت گعدت يمي وهو من وحده طلع بلعت ريگ واني اباوع بوجهها الصاير اصفر تلمست خدها وهمست.
-ماما انتي مريضة بيج شي.
اخذت ايدي وباست بطنها تحسرت وتجمعن الدموع بعيونها حاولت تحجي بس مگدرت الغصة خانگتها حضنتني تمسح على ضهري ابتعدت وفتحت شعري وراحت طلعتي ملابس.
-يلا كومي اسبحي
-ياطلابة السبح الماتخلص عوفيني دفيانة حبابة
-ماكو كومي حبيبتي يلة
ذبت ملابسي السرير وطلعت بدون متباوع لوجهي گلبت الملابس چان كوت طويل اسود وبلوزة سودة ام الرگبة وبنطرون بلونهن علگتهن بالحمام ونزلت اسئلها.
-ماما ذني ملابس طلعة وين حنروح؟
-لبيت خالج الله يرحمة
-مو باچر السبعة المن رايحين هسة شنو بس لانبات يمهم اليوم والله ولا اروح نبات بيتنة وباجر نروح
بقت منطيتني ضهرها ذبت البيدها ورة شوية تحمحمت وگالت.
-مانبات بس نروح نشوف اخوالج متجمعين هناك
-شكو شيرودون منه
-يشوفونج ناسين شكلج، ماتريدين تشوفينهم.؟
-اي اريد اشوفهم
-يلا حبيبتي روحي سبحي
-تمام
صعدت سبحت وبدلت نزلت ادورها تمشطلي طلع سجاد بوجهي.
-سجاوي مشط شعري حباب.
-تعالي بس كون مخليتله زيت ترة مايتمشط هيج
-مخليتله لتخاف
-نوتنه اتعلمي تمشطين لروحج شلون تضلين هيج طول عمرج
-الله كريم شبيج هسة انمونة
-اني ما متعايز منج بس احجي لمصلحتج غير تسمين كلامي
-حاضر
كعدت گباله يمشطلي دخل حياوي باسني ومسح خدي تبادل النضرات هو وسجاد تمنيت افهما لان جانت عيونهم تحجي هواية كمل شعري وطلع سجاد ضايج.
-شبية سجاوي
-مابية يلا امشي
-لعد وماما شنو بس احنا نروح!
-اي بس احنة امي راسها يوجعها ضغطها صعد شربت حباية ونامت.
-لعد احنة شكو رايحين بدون ماما اروح اشوفها
-نرروح وحدنة هسة امي گالت اخذ نو وامشو عيب من اخوالك عازمينة ميصير منروح يلا نوايتي البسي شال وتعالي بسرعه وأحقج تعبان مابية احجي واتناقش لاتشلعين گلبي وتزيدينها علية فوگ ماهي زايدة
سكتت وبلعت الغصة من شفت حالتة ماناقشتة صعدت لغرفتي سحبت شال شمرتة شعري رحت لغرفة سجاد رشيت من عطرة ومريت على امي نايمة.
طلعنا وحدنا مستغربة كلش طول الطريق گلبي يوجعني ابد ممرتاحة همست بصوت ناصي وعيوني انملت دموع فجأة.
-حياوي ممرتاحة گلبي يوجعني
التفت علية وخلة ايدة گلبة
-سوي مثل حركتي وابقي استغفري
-شلون شكول؟
-استغفر الله العظيم من كل ذنب عظيم اللهم ابعد عني الهم والغم بحق اقرب الخلق اليك محمد وال بيتة الاطهار صلوات الله عليهم. ابقي صلي على النبي وابقي رددي سورة الكرسي هواي لحد مينگطع نفسج حتى لاتنشغلين باحساسج السلبي.
بقة يحجي واني ارد وراة لمن وصلنة تنفست براحة وابتسمت عدل شالي ولفة اليعدل ابتسمت وگرص خدي بخفة.
-وهسة شلونج
-زينه دعائك خوش دعاء ههههه
-استغفر الله ديلا انزلي.
دخلنة سوة لاگونة انمار ورحمان وبعد ولد سلم عليهم حياوي واشرلي ادخل جوة...
دخلت واستقبلني البنات سلمن علية بحرارة مرحبات بوجودي سلمت على الكل عدا مرت خالي حمزة وبناتها الزوج ماعبرني غلست عنهن وصاحتلي بيبي حكمة اگعد يمها.
-شلونج حبوبة
-زينه بخير
-ان شاء الله حبوبة يعلج بالخير دوم
-شكراً
-الحجاب حلو عليج اريدنج دوم تضلين لابستة
-ان شاءلله.
دخلو اخوالي سلمو علية باوعت للبنات انسحبن ردت انسحب وخالي صاح بية اجة يمة رحت كعدت بصفة سئلني كم سؤال عن عمري دراستي وو.
التمو الولد بالاستقبال وحياوي ضااااايج عيني علية منزلها مني ابد اشرلي اجي يمة بس خالي مقبل
-ترى انة عمها ضلي بوية نو
سكتت مدنگة راسي بالگاع بدت مرت خالي حمزة حديث وياهم وبنص الحديث گالت.
-مثل ماشفتو بعد والييي راح وضليت انة وي هذني البنيات ومسؤؤليتهن تكسر الضهر...
هسة شدگولون على اسراء تاخذونها بطلتو لو ازوحها لياهو اليدك بابها لان تدرون البنية مثل السچة تكثر المشاية الها وبعد هي يتيمة وانة مرة مابية مسؤلية بنات شدكولون
محيسن: -والله يم ناصر حچيچ ذهب والبنيات بنياتنة كلهن من التفات المحروسة لنوة، واسراء بنيتي وجنتي واحنة قارين الفاتحة عليها بس العرس بعد موش هسة ورة دورت سنة المرحوم نعرس عليها و انتي شدگولين.
-انتم تفصلون واحنة نلبس هاهية لدورت السنة بيها الخير ان شاء الله
طفر رحمان عابس وجهها وضايج.
ساچت: -هسة هاي السالفة انحلت السالفه الثانية الجايكم بيها هي بنيتنه نوة
التفتت علية فاتحة عيوني وكلني ارجف اطرافي ثلجت من جاب اسمي بالطاري باوعت لحياوي وجهة احمر دم. رجع كمل هو ياخذ ثلت خرزات من سبحتة الفضية.
-البت كبرت وعيب علينة عايفين بتنة عد الوادم الغربة صدگ هي عمتها بس زلمتها غريب ومايصير بت شابة گاعدة وي ولد عمتها تحلة بعيونهم وهي محرمة عليهم صح الوكت متاخر على هالحجي بس المرحوم جان لازمنة من ايدنة ومانرضة نتدخل حتى خرب ويانة وصارت مشاكل من ورة السالفة وهو وكال بعدهي صغيرة بس تكبر ارجعها بيتي.
عقلي فصل من كلامة الساني ثكل صعب علية انطق الحرف طفر حياوي من مكاني يعيط ويغلط بكلام مگدرت افهمة التمو علية لازمينة واني اخذتني الصدمة صرت اصارع حتى اشتم الهوى خفت خوفة بعمري كلة مخايفة هيج اخذني حياوي بحضنة حاضني الصدرة مسح دموعي وباس گصتي.
-لتبچين روحي ودنيتي دموعج غالية لتنزليهن هنا مو وكتج نوفايتي
جلبت بيدة گوة انطق الحرف باوعت بعيونة متوسلة يحجي شي يريح گلبي.
-حياوي هذا شيگول شنو انتو مو اخواني انت وسجاد وعبيد وهناوي شجاي يحجي شبية هذا ها كول شبية
راد ينطق حياوي واعتلى صوت خالي يحجي بشموخ وثبات صوتة ادخل الرعب الداخلي
-ساچت: بوية انتي كل هاي السنين ماتدرين بالحقيقة وانة من زمان اگل لابوج حمزة جيب بتك وابنك لبيتك وي فروخك ربيها حالها حال بنياتك وجم مرة متعارك وياه بس جان قافل الله يرحمه ومكيف على هذا الوضع ومايرضة نتدخل بس هسه مات والوضع اختلف...
احمد: -ااااني ماااعندي ابو وحمزززة موو ابوووي نووو ماخليهاااا هنااا لو تصيرررر بحررر من الدددم
فايز: -خاب شني بكيفك انت مكيف اختك وي الولد عايشة وعد ناس غربة مشيول منك الاحساس احنة مانرضة بتنة تكبر عد الناس الغربة.
احمد: الناس الغرب ابوووي التحجووون عنة شمررنة عدهممم والبت العايشةةةة وي الغربة هوو الشمررها عد الغرربة من عمررها شهررين شتحجوووون انتووو وييييين جنتووو عوووفوونة بحالنة وطزززز بعاداتكم وبتقاليييببدكم
صار صياح وعياط مفتهمت شي ولا استوعبت كلامهم ولا عركهم هذا عن شنو يحجون اكيد مو عني اي اكيد مو عني هذا الكلام بقيت اردد ذني الكلمتين وسادة اذني بقوة وبعدها محسيت شي بعدها...
ولا جنت من اكعد يتغير كلشي بحياتي.