رواية بين سلاسل العادات للكاتبة كفاية كاظم الفصل الرابع والثلاثون
شروق
اكثر يوم افرح بية من ينزل رحمن للبيت احس روحي فراشة طايرة بالجو...
سبحت وتعطرت صبغت اضافري وخليت شوية حمرة من مكياج نوف ضليت احوس گلبي يدك يددك شوگ لشوفتة...
احس روحي بحلم معقولة صدك صرت حلالة الفف الحمدلله والشكر الف ركعة اسجد لربي وماتكفي
ع هاي النعمة...
رحت لحجرتة بعد ماودة الجهال علية ضحكتي شاكة حلكي تعبر عن فرحتي عاينت بالممر منا ومنا لحد يشوفني انة جنت كبل ماطب لحجرتة دوم بس هسة اختلف كلشي صار بينة عقد جانت نيتي بس اسلم علية ونسولف شوية...
طبيت لحجرتة ارركض سديت الباب وكفت ساندة ضهري على الباب اتنفس بسرعة ضحكت وخليت ايدي على حلكي...
-هلااااااا بنورهاا وسورهاا
-ههه حسك.
جان كاعد على الجرباية اجة باتجاهي فاتح ادية ويمشي يضحك وانة اضحك استحيت اروح لحضنة ضليت بمجاني سحبني من ايدي لحضنة حسيت ضلوعي وجعتني من حضنتة...
اضحك لضحكتة بعد شوية يتلمس بوجهي ويغمض عيونة ويضحك مامصدك عيونة مدمعة من الفرح سحب راسي لصدرة وكال...
-واخيرا صارتلي معشوكتي الميت على شوفة عيونها اشرقت حياتي من ذاك اليوم الكلتي نعم احببببج يبنيةةةة ههههههههه تدررين شكثررر احببج ولج
-ههههههه انة هم احبك.
-مو مثلي دووم دوووم ولج شرريقة اعشگجججج
اضمج بكلبي شسووي بيج
يفرك بوجهي لو يكرص بخدودي نار وشبت بية ضليت بس فاتحة حلكي اضحك وهو متسودن ساعة يحضني ساعة يبوسني لو يعض خدي خليتة على راحتة ماكدر امنعة لو امنع روحي الهاويتة...
بعدتة مني فحطانة وارجف خليت ايدي على كلبي اشم هوة سحبني وكعدني على الجرباية ضمني لحضنة بقووة وايدة تمر على خدي لرگبتي...
-رحمن: -تذكرين من جنا صغار نقرا شعر
-لا.
-صح ماتتذكرين انة جنت احفظ شعر علمودج
-سمعني...
-هههههههه شعر مال زعاطيط خيولي مدري منين نجيبة جنا
-لا سمعني
-يكول كون انكلب عصفور وادخل غرفتك والبد ورةة الكنتور واسمع ضحكتك
-ههههههه حتى كنتور ماعدي ههههه اتذكرر هالشعرر مال اتمنى انكلب طلقات واختل بصدرك واكتب على الشريان دمرني حبك ههههههه
-بكلببببي هالضحكة يرربي ديمهااا وكمللها مامصددك رحمتتك الجبيرررة شكدد فررحتني.
جسمي يقشر من لمساتة لزمت ايدة وضميت راسي بصدرة احس حنان وامان الدنيا موجود بية اول مرة احس بروحي مهمة واحد يحبني هالكثر...
همست بحس راخي...
-رحماني
-شمس الشتاء الاحبها
-دائما تكول شمس الشتاء شمعنى
-مرغوبة والكل ينتطرها تطلع تجي بساع وتغيب بساع مثل شوفتج هادئة ودافية مثلج
-احبك رحمن مامصدگة
-حتى انة تعاي نتاكد صدك انتي يمي لو خيال.
دارني علية يسوي سوالف سرسرية ثنينة فقدنا انفصلنا عن العالم الدنيا وردية بعيني حب وغرام وي حبيبي البجيت دم علية وتلوع كلبي الف لوعة من اتخيل يصير نسيبي بس القدر الة دور ولف ولف وجمعنا...
ماحسيت الا من رحمن طفر مني ويحجي وي سجى ميزت صوتها ردت اموت من الفشلة مددة على الجرباية وثوبي طافر بدون مادري عدلت روحي وضميت راسي بالمخدة اسمعهم وميتة...
رحمن: -سجيوة افتهمتي غلط مو البالج.
سجى: -صخام الصخمكم بلة حبلت الفرخة ولك انت شني من بشر مو بعد سنة وتعرس
-رحمن: وين رحتي بتفكيرج ترة ماسويت شي بس هيج
سجى: -هي شني الهيج شمخلي وتكلي هيج
رحمن: -استغفر الله ولج ماتقربت عليها بس بوس وسم
سجى: -بكلبك الوصخ انتم مو راحة ابد لاتستحوون ولا عدكم حية حضوري ملطلطين هسة تطلع حامل وساعتها يافشلة الفشلة وين ننطي وجوهننا.
اسمعلها وجهي مشتعل نار شلون اعاين بوجهها بعد شجابها هسة بعد شيخلصني من السانها...
سجى: -سرسرية ماتستحون الله غاسلكم
رحمن: -الساانج سجيوة لاتتجاوزون
سجى: انة غسلت ايدي منك من هاي شواربك المسويهن لو صلعتك شلون هاي الفرخة ماتخاف منك شلون بنات زايحات المستحة
اجت تجرجر بية وتغلط علية يبوو متت متتت اجة رحمن سحبني منها ورجعت صاحت بية بعصبية فززتنا ثنينا...
سجى: -بسسس كليي بعد سنة شلون تصبرون وانتو تكعدون سوة مو خلي احترام لقرار ابوك سنة سنة شهل تمسلت...
رحمن: -اهووو هسة انتي منين الله سلطج علية
سجى: -خزرتة بطرف عيني واخذت هاي المفلوكة ارزل بيها دخلتها الحجرة ورحت اغسل وجهي مشتعل نار انة من يمي استحيت ذولة شبيهم مايستحون...
اذب ماي على وجهي وبعدني محترة شلون منظر خادش للحياء هسة انة شني ذنبي اشوف هيج مناظر شكد مايستحون لعبت روحي من صدك كل ماذكر شلون يبوسها...
ادك على راسي اريد المنظر يطلع ماكو لازك براسي كلبي انخمش يجوز داخلين بالعميق رحت للحجرة لكيتها لافة روحها حتى وجهها ضامتة حگها انة لو منها ارش روحي بتيزاب يعععع...
ندستها ماتحركت رفعت الغطا كوة عنها مغمضة عيونها بس مانايمة اكيد همست بصوت ناصي...
-شريقة احجي الصدك ماسويتو شي جبير كليلي حتى اخلية بهذا الاسبوع يعرس عليج
خلت ايدها على وجهها وكالت بصوت يرجف...
-والله ماسوينة مثل البالج بيش تريدين احلف
-ديلا عود صدكت ولو شكلكم يكول غير شي بس صدكي اذا ضميتي الحقيقة انتي تطيحين بيها حتى لو جان خطيبج بس هاي دنيا يجوز يصير شي علية اسم الله لو يعوفج مو بلة محد يتوقع شيصير فماكو غيرج يطيح بيها...
بس تهز براسها مثل الصخل عفتها ورحت انطمر الليل كلة معدتي تكلب من وراهم يبوو علية هسة لو داكة الباب امداني كعدت عيوني تحركني من النعاس وجهي كالبتة صليت وبدلت طلعت اسوي ريوك لكيت عبير كاعدة تسوي...
هزيت بيدي هسة هاي شعدها كاعدة من الصبح تروح منا وترجع منا والابتسامة شاركة الحلك شكو يمگموعة اشو جهالج بصفحة وانتي بصفحة عفية ام.
عشتو هم محسوبة ولامرة بالجذب كالت اريد اشوف جهالي عجيبة هالدنيا شكد بيها اشكال وقصص...
عبير: -ها راح ترحين للدوام
-اي جا المن كاعدة من الصبح حتى اتريك مثلا
-الله يساعدج حبيبتي هسة اسويلج احلى ريوك
ضليت متصنمة عود هاي صدك تحجي لو شني السالفة هاي البت انة مامرتاحتلها ساعات تضحك ومن تحجي ويانة حبيبتي وحياتي ومرات لا والله ترجع ذيج الخبيثة حتى بنظراتها...
عفتها ورحت اشوف فارس ياخذني لا لكيت رحمن يلعب بعلي بالهول صاحلي اجي اخذة رحت اخذة منة حتى مااعاينلة روحي بعد لعبت روحي منة...
رحمن: -دهاج عود افضحيني بعد
-لاتخاف مو انة الاحجي
-هي بس نظراتج فضحتني
اخذت على ابوس بية واشم بوووية ريحتة تجننن كيكة مو طفل احسة بكلبي متعلك يضحك ويناغيلي وانة اكزكز علية بدي اكلة كعدت مخليتة بحضني والاعبة...
-علاوي حبيبي اكلك يبووو شسوووي ولكم هااي كيكة تنووكل.
رفعت راسي من كال...
رحمن: -هسة شلون انتي تحسين على كيكة وبدج تاكلينة انة هم احس شروق كيكة...
-ويع ويع ويع وانة شكو تحجيلي صدك انت ماتستحي
-نسيت سجيوة والنبي مدري شلون حجيت
-ديلا ماصار شي بس ولي من خلقتي
وجهها صار احمر يمكن صدك ماحاس على روحة من كال هذا الحب مثولهم كلش كوة ضامة ضحكتي على شكلة يروح يم الحجرة ويرجع جنة. مسودن اخر شي نزل...
اجت سفانة تضحك وتصبح علي...
سجى: -هلا بام على شهل جمال خدودج موردة.
-ههههههه شكرا
-العفو يابة صدك فارس وين ياخذني يو لا
-هثة يجي بس يبدل
-خوش
رجعت ابوس بعلي لمن طلع فارس اطيتة الها اشوفها تعاينلة والفرحة بعيونها وهو مبادلها الابتسامة...
طبعاً فارس اكثر واحد انيق بالعشيرة كلها ماشفت ولا راح اشوف بهيج نضافة يلمع لمع مو لان شغلة يتطلب حتى بالبيت هو هيج يناغي ابنة ويضحك وياة نزلت من صار يكرص بخدها لاتصير فاجعة ماتحمل بعد...
لكيت حبوبتي تتريك وعمي فايز كوة ياكل عايشة وياة وياة شوي تحسن بس اكيد مو مثل كبل المرض تعبة وباين على شكلة...
اخذت لفة وطلعت اكلها برة شفت جاسب بالحوش يگلب بموبايلة صارت بعيني رغد ورحت احجي وياة
سلمت علية وكتلة...
-اكلك جاسب عود صدك تزوج رغد
رفع حاجبة خازرني عيونة يجدحن حتى خفت من نظراتة...
-صدك بعد سنة تعرس وي رحمن
جاسب: -انتي شدكولين
-يعني اي
-اممم
-خاب ليش تدمر مستقبلكم شو لا انت تحبها ولا هي هم.
-خل يفيدها الحب هسة اتزوجها مو
-هاا
-مو شرط نحب بعض ولا شرط نتفاهم بس اريد اختم على عمرها بالجحيم الابدي واطلع كل جلمة كالتها لابن الحرام من عينها الا اخليها تبجي دم وحتى عاطفة ماتضل عدها تحترك مشاعرها حتى روحها تكرهها
ضليت فاتحة عيوني بصدمة وكلبي يدك بقوة من حجية عافني وراح طلع هاي تاليتج يرغد صرتي مثل اليكولون لاحضت برجيلها ولاخذت سيد علي.
جندوب اكول الحب لعبة مؤقتة تستخدمها الشباب وخاصة طلاب الجامعات اشكال نشوف حبيبتي وحياتي وباليوم الماتجي يروح لبنات غير قسم يطلع وياهن لان مايعرفنة اشكال اشكال بالجامعة كلة ضحك على عقول البنات بس جيب الواعية التكشف جذبهم يصيرون بس انتي وبس...
فزيت من صفنتي فارس يصيح علي: -شني صارلي شكد اصيح
-ها ماسمعت
-اي شلونج بالجامعة من ناحية الطلاب والمواد.
-الطلاب ماعدي علاقة بيهم لابنات ولا ولد والمواد ساحلتني وجاي اركض فاتحة حلكي اقرا وماملحگة
-ههههههههه والله عدج سوالف صدك شكلتي لابوج البارحة
-عليمن
-على الخطبة
-كال بعد شهر ونفصخ مثل ماوىطني بالسالفة يطلعني
-انة اكول فكري عدل وبعد الج القرار
-الله كريم
ضليت اراجع بين ما وصلني وراح...
شهر ويخلص كلشي اخر كلمة الي، افتر بالجامعة ضايجة تعبانة نفسيتي التفت للصوت ابتسمت اي اتذكرتها هاي الابنية ابتسمتلي وكالت...
-هلو حبيبتي
-هلا بيج
-اني البنية الجانت تمشي وي حسن ابو النسوان عرفتيني
-اي يابة عرفتج شلون انساج
-اجيت اشكرج لان حذرتيني منة فعلا طلع جذاب تزوج من اقاربة وهسة زوجتة حامل.
-هذا الحب الكلامي باختصار يخلص وكت ويروح يكون عائلة خليها شغلة ببالج الحب افعال مو كلام وبس للزلم مو لياهو الجان
-فعلا كلامج صح الحمدلله اني عفتة من البداية جان انكسر كلبي
-سلامتج حبيبتي وابتعدي عن هاي السوالف احنة جايين ندرس
-ان شاءلله وشكرا الج
-العفو.
كعدت على المسطبة داخلي محترك راح اسس حياتة بعد مادمر حياتها لو سامعة النصيحة ماصار بيها هيج بس بعد شنكول رجعت لقسمي خلصت محاضرات وطلعت خارج الجامعة متجها للكراج عاينت بالساعة بثنعش ظبط بعد وكت ياهو اليجيني هسة...
ردت امشي اطلع نفرات وصار بوجهي نزلت عيوني بسرعة وميلت عنة...
ارفد: -اوكفي سجى اريد احجي وياج
-ماعدي شي ينحجي وياك
-هسة غيرررر توكف
وكفت مجتفة ادية عاينتلة بنظرة باردة وكتلة...
-لاتصيح ثاني مررة
-ولو انة مامصيح بس خوش ممكن نحجي
-لاععع
-موضوع مهم كلش سجى بدون عناد
-الك مهم مو إلى للاسف ماعدي وكت اريد ارجع للبيت
-انة اوصلج
-مايحتاج اندل
عفتة ومشيت حتى مالي خلك احجي وياة صاح وراي ماهتميت شهكت من سحبني من ايدي ودارني علية فتحت عيوني على وسعهن ونترت ايدي بقوة...
-شلووون تتجررأ وتمددد ايددك اكسررها ثاااني مرررة عييدهاا وشووف
-ااامشي جدامي احسلج.
-موو بكييفك شنييي تجبررني والحمززة الممم النااس عليك وخرر مني
-شبيج انتي متسودنة ماجنتي هيج هسة انة شكتلج وهيج عصبية
-اانة عررمة وخبلة وملطلطة بعد شتريد اعدلك اكثرر
عووفني بحااالي
رحت امشي بسررعة وكفت متانية سيارة تجي صفنت اشوف رجفت ايدي لا والله جسمي كلة يرجف احس روحي بيها نار تحرگني ليش احجي وياة بهلطريقة مادري عن نفسي شي يوم عن يوم اقسة...
ارتجيت على صبة اتنفس بهدوء اريد اهدء شوية درت عيوني الة وكف بصفي مخلي الجكارة بحلكة ومخلي ايدة سد من الهوى والثانية يجدح الجداحة
اشتعلت واخذ نفس وخرت عيوني منة اعاين على السيارات التمر بسرعة...
هوة يجي باتجاهي حسيت بالراحة والبرودة وجهي عركان وضربني الهوة الجو هادء حجة بصوت ناصي
مدري شحسيت من سمعت حجية...
-العمر يمشي بسرعة مثل هاي السيارات ماتوكف الا للمجان الرايدة توصلة كلهن يمشن بطريق عام انوب يفترقن تصير افرع وانوب درابين راح تحس بالوحدة من توصل للدربونة وحدك...
يمكن هسة نحس مانحتاج احد ونريد نكمل وحدنة لان بينة حيل بس البشر رادلة رفيج يكمل وياة الدرب ومن يميل يسندة...
سجى: حاشا ان نستند على كتف احد والله موجود
-ونعم بالله وقال تعالى (انا خلقناكم شعوبا وقبائل لتتعارفو ان اكرمكم عند الله اتقاكم)...
رب العالمين خلق انثى وذكر واحد مكمل للثاني مو حتى كل واحد يعيش وحدة...
-جا ياهو كاضك ماتروح تشوفلك اوونثى انة مابية انوثة...
ضحك بصوت وكال: -اكو دراسات تكول المرة المثل سجيوة بدرجة خبالها هاي كلها انوثة بس ماتبين
-هه هه هه هه خل اكلك شغلة جا الزلمة...
-ديررررربالج تكملين اشمرج جوة السيارات
درت وجهي اضحك بصوت وتالي وياي تمشيت ليكدام احسة يمشي وراي رجعت خزرتة وكتلة...
-شكو امي اريد ارجع متانية سيارة روحي عزيزي
-اي هيج ومن البداية كولي عزيزج ارجعي سجيوة الاعرفها
-تعرف ما اعني جلمة عزيزي...
-احاا اريد احجي وياج مو شلعتي كلبي
-بعد شهر بس نلتقي بيتنا وتجي تطلگ وتروح لاهلك وسلملي على عاصم الكلب
ضرب على رجلة وضحك بصوت.
ارفد: -جا انة ليش كاتل روحي عليج غير من ورة سوالفج الترد الروح كل لحضة اسولف وياج تضل مطبوعة ببالي من اضوج ارجع اتذكرهن واضحك.
-اي مو انة مستررر بينننن لو مهرررج
رحت باتجاه الكية فتح الباب ودرت وجهي علية فاتحة حلكي كل لابو السيارة على غير منطقة كلة السايق ما اوصل وشغل وطلع...
فاتحة عيوني بعصبية كبل لا احجي طلع موبايلة يخابر شوية وسدة يعاينلي...
سجى: -من الاخييررررر شتررريد
-حسج نصية كتلج اارريد احجي ويااااج
-ماااكو بينة حجيييي واذااا ترريد هسسة احجي فضني ماكاعدتلك
-نمشي بمطعم نسولف شني هنا مشردين.
-لا والله شني شو انت تعلك بالحجي بكيفك انة شني مطعم وهاي الخرابيج
-خابرت فارس وكتلة ماكال شي الزلمة بعد ماعدج عذر بس نتفاهم
-على شني غير اعرف شني النتفاهم علية
-مصايب الدنيا هواي
رحت امشي وراة التفتلي وكال: -لو ادري شوكت الله يهديج وتصيرين حباب.
-شكلتتتت
-مو عليج امشي امشي
-شلون بحلكي حجي استغفر الله
-اي عفية استغفري.
هزيت ايدي ورحت وراة هو جان يريد يروح مطعم بس انة مالي خلك سوالف المثغفين ويطلبلي اكل وكذا شفت حديقة عامة راسا كتلة...
-ااامشنة هناااك نسولف
-وين ماخذتنا حتى ماي مابيها
-هسة دمشي فوكاها تتشرط مو زين مني وامشي وياك
خزرني يهز بيدة ماعاجبة رحت جدامة كعدت على مسطبة وخليت جنطتي بصفي وادية مددتهن رفعت راسي خازرني ورافع حاجبة...
-ها خير اشو رافع حاجبك جنك محد عاجبك.
-استغفر الله كلشي بالدنيا يعجبني بس ماكلتي لروحج وين اكعد
-وشكو كاعد احجي وانت واكف اريحلك
-لا والله
-اي يلا احجي
-شحجي
-انة ادري غير انت جايبني تحجي
-ها اي صح تذكرت بس تعاي نكعد على ذيج الصبة وحتى مساحتها واسعة من نكعد واحد بكركوك والثاني بالحلة.
ضحت ورحت وراة كعدت بالطرف بينة مسافة جبيرة احس ضايج كلش هسة انة شعلية بية...
-اي احجي
-يكولون ماتريديني
-yes of course
-why
-بكيفي
-نرجع نحجي انكليزي مو احسن.
-لا احسني احجي بالفصحة هذا مال ناس محترمين وحبابين مو النة
-ديلا بلا
-احممم كمل
-نسوي خطبة ونكمل
-لا
-زين ليش فهميني
-احس انة وياك مانرهم يعني هيج شلون جهال المنطقة بس يتعاركون عوزنا بس واحد يتفل على الثاني
-ههههههههههههههه كملي فلسفتج
-اي جا انة احجي الصدك احس هيج يعني مو مثل هاي الناس من يحجون تفضل واسفة وخومازعلت
وعيوني وگلبي
-سهلة ذني نسوي انقلاب وكلة بعد عيني وبعد عيني وحياتي وحبيبتي هي هاي سهلة.
-لا مو بس هيج يعني مادري شحس احنا مو مال زواج
-جا ماليش
-هيج جنا واحد يقصف ويضحك على الثاني
-افزعلي يالحمزة ابو حزامين محتاجك طحتت بشدة وناخيك
-كول انة موجوده وينها الشدة
-انحلتتت يابة كملي خل اسمع لاسبابج العظيمة
-ها اي شوف انت من البداية ماحجيت وياي عدل جنت شايف روحك وتنتر بية وبس دخن اخذت عليك نظرة مو حلوة وصرت احجي وياك معلگ
-كبل وحد وهسة وحد جانت عدي مشاكل وراسي مسطور وانتي تجين تزاكطين بمخي.
-جا شمدريني انت ماكتلي جان ساعدتك من البداية
-رحمة الله والديج ماتقصرين ادري بيج هسة ارجعي كملي اشوف الاسباب
-شوف من الاخير مابينة تجاذب واحد مايطيق الثاني ولاتكول لا
-اكيد لا يعني لو ماطايقج اجيبج احجي وياج جان خليت كرايبكم يعقد عليج وتنفض مو صح
-لا مو صح.
-شوفي الحب يجي بمرحلة متاخرة بس كبل هيج لازم يعرف الانسان ويامن يكمل والشخص اليناسبة والصدك مالكة غيرج مناسب لشخصيتي على فطرتج وتصرفاتج عليك يالله انة ماتعجبني ذني الينوصن تنوص
-اي تعجبك ام لسان دلالة صوتها يلعلع تلعلع
-لا تعجبني سجيوة وبس صعب يعجبني ياهو الجان
خدودي اشتعلت بنار يحجي ويعاين لعيوني بنظرات غرريبة يبوو يبوو هذا مو ذاك الاملح الاعرفة كمت من مجاني متوترة...
-انة راح امشي باي.
-وين مولية وبعدنا ماصافين على شي
-هو كتلك ما نصفة على شي
-بعد شهر نخطب
-لا
-ما اطلكج
-مو بكيفك ماريدك
-خوش صار نتطلك الله وياج
حجاها بخيبة امل اكو شي بداخلي مايرضة الا يخليني احجي بقساوة رحت منة وحسيت كلبي وجعني علية خطية صارلة شكد يقنع بس انة مثل الحمار مايفيد وياي شي...
صعدت كية خليت السماعة بذني وطلعت موسيقى دموعي صارت تنزل شوية شوية الوضع خرج عن السيطرة صرت اناشغ وابجي بصوت عالي حتى العبرية حسو علية على ماوصلت علية ذنب راسا بدلت ورحت نمت...
سرى
الوقت يمشي على اعصابي بين القلق والخوف والحزن عشت وعدت ايامي المأساوية وي شخص يقال عنة انسان شخص ذات تركيبة عجيبة كل ساعة الة شخصية وراي تعبتت واني احاول اتاقلم وياة...
قلت ماذا تريد؟
قال لي اقبل عيناك...
-حبيبي
-ها
-الانسان هو يصنع مصيرة لو المجتمع والضروف تصنعة
-اكيد هو يصنع مصيرة بنفسة وشخصيتة واكيد راح تاثر بية الضروف والمجتمع بصورة سلبية ممكن...
-ياريت نعود عشر سنوات ليورة.
-شنو تسوي بذني السنوات
-ممكن ما امشي بدرب عاثر او يمكن ما اقتلها
-مرتك الاولى اعتقد حالة خاصة هاي لان دائماً تتذكرها...
-جانت حبي الاول بس انقتلت بسببي وبسبب شغلي
ريتني سمعت كلامها...
طفر من حضني وطلع برا البيت طلعت اباوعلة من الباب يغني بصوت ناصي كسر كلبي لدقايق بس من تذكرت ذاك اليوم البشع ايقنت مايصير احس اتجاهة شي لان هو مجرم مو شخص عادي مايمتلك مشاعر، حقيقة...
جنا بيتنا الثاني بالمنطقة إلى باطراف بغداد جنت الف دولمة وافكر بذولة الشرطة وسالفتهم الغريبة عجيبة اليوم الرابع ممتصلين بية ذبيت نفس بصوت ورجعت اكمل الله هو المنقذ لا شرطة ولا غيرهم...
لحظات واجة يركض يصيح بصوت عالي خبصني وياة ركض للجنط سحبهن للسيارة ورجع على مسدسة بيدة وشكلة يخوف متت بساعتها...
-وين رايحين شكو.
سب على غلط مافتهمت منة شي ارعبني وترني بالزايد طلعت يجرجر بية ويعيط بصوت عالي بوجهي صعدت بسيارتة وانطلقنا باقصى سرررعة
صار يحجي وي شخص بالتليفون باوعتلة باستغراب يضحك ويشاقي شخصية ثانية لعد منو هذا القبل شوية حركنة سد الاتصال وجانت دقايق فقط تفصلنا عن الحدث...
جان ولد واكف كدام محل بمنطقة قديمة فتح الجامة سلم علية شهكت وصحت بصوت عالي كطع كلبي من السواة...
قتلة اي قتلة بدم بارد اربع رصاصات تلقاهن بجسمة عاف روحة تفرفح وطلع صدمة على رعب جمدت عقلي مايستوعب الصار ولا استوعبت الجريمة مر وقت السيارة تمشي واني فاصلة حتى فص عيني جمد مايتحرك...
وصلنة لهذا البيت الكاعدين بية حاليا نزلني بيدة نترت منة وصحت بصوت عالي وكعت بالكاع على اركبي...
-لييييششش قتتتلت نفسسسس بييياااااا ذنبببببب سفكتتتتتت دمممم انسااااان لللك انتتتت شنووو مجرررم سفااااح مووو بشررررر اااانت الله يااااخذك
سحلني ودفعني بالبيت وطلع قفل الباب وراة عافني منهارة داخلي متحطم البيت نفس ذاك القديم ونفس جو ذيج المنطقة، اسبوع كامل مامستوعبة الصار حجيت للضابط باهر الصار وجان ردة...
-ماضل شي سرى راح تخلصين اجاج الفرج.
ماكو فرج جذب ضاع املي بكلشي هنا مصيري مثلي مثل الماتن قبلي من نسوانة تعنيف ضرب غزل حب
شي مايشبة شي بقة خيط واحد واتخبل رسمي...
الصار كلة فسرة بجلمة باردة: -شغلنة هذا
انفر منة واتعذب باقسى الطرق تعبت من كلشي صرت حتى الضابط مارد علية كمت اتودد الة صار احسن صح مجبورة بس احسن من الضرب...
مرت ايام على هاي الحادثة رجعت احسن شوية الصلاة والدعاء انقذني بشكل رهيب اثرن علية
صرت وحده لاتبالي لشي...
طلعت من تفكيري ورحت اغسل الملابس نشفتهن وشريتهن على البوبان لان كراج ماعندة والسطح مقفول رحت طلعتلي ملابس وشفت الجهاز مشتغل يعني جاي يتصلون بية رفعت من دون نفس اجاني صوت الضابط باهر كالمعتاد...
-نعم تفضل
-سرى انتبهي وياي راح يجون جماعة للبيت ورة مايطلعون ترحين تشوفين القنفات.
-ليش.
-واحد من جماعتنة غاح يدخل ويخلي جهاز صغير كلش تاخذينة وتخلينة بسترة ادهم الراح يطلع بيها ضروررري ضروري بملابسة اليطلع بيها...
-شنو هاي تسوي
-ترفعنة للقمة بمجرد تنجح الخطة انتهى كلشي سيء
-تمام
-انتي منيحة
-مو شغلك
-اها احسك ضجتي علية لان راح ينلزم
-ههههههه مستحيل اضوج على هيج شخص
-ليكوني ماحبيتية هالفتغة كلها
-بالضبط
-اممم شعجب يولو انتي هيك مو من المعقول.
-لاني ماعندي مشاعر مشاعري ماتت من زمان اضافة لذالك توضيح مهم مو من المعقول وحدة تحب مجرم ولاتنسى المجرم يبقة مجرم ويمارس اجرامة وي كل الحولية مع السلامه
-الله يسلمج
سديت الجهاز ورحت اسبح كملت وطلعت دخل وصاح بية ادخل للغرفة مثل ماكال بالحرف اجوي للبيت مجموعة اشخاص اسمع بس اصواتهم بقو حوالي النص ساعة وطلعو فتحلي الباب وراح وراهم.
تاكدت منة طلع وابتعد رحت انبش بالقنفات ماتعبت هواي راسا لكيتة جوة صاير جهاز صغير كلش خوفي شلون اخلية بملابسة رحت مشطت شعري وانتظرتة بين مايجي بمثل هيج وقت يجي يسبح ويطلع مايرجع الا نص الليل...
اجة ينزع بقميصة ويكول...
-حبيبتي ملابس بسرعة خليلي
رحت بدون ما اناقشة خليت الة ملابس جاي اطلع وسحبني وياة...
-اوووف خليني اطلععع
-سبحيني
-استغفر الله وخر مني تعبانة ضهري راح ينقسم انت اسبح
-اشتهيت تسبحيني.
-كتتلك وخررر
دفعني من الحمام للصالة وكعت جبح على وجهي تكسرت تكسر رحت للمطبخ كاعدة اكل بروحي من القهر وضع كسيف شوكت اخلص ياربي ارحمني تعبت هي موتة وحدة ليش دا اتعذب كل يوم...
مد راسة شافني كاعدة وطلع بقيت وحدي مثل كل يوم يخلص لاتلفزيون ولا قران ولا صوت شخص اسمعة يحجي حرفيا انقطاع عن العالم بطريقة بشعة
رحت للغرفة مديتلي فراش بالكاع ونمت...
هناك اشخاص يعتقد الناس بانهم رحلو لكن...
لايعلمون انهم عاشو في ارواحنا...
النوم يساعدني بشكل رهيب نسبة الحياة البروحي عايشتة من ورة طيوفة لكن يبقى الحلم فترة ويروح اثرة فزيت على صوتة العالي طفرت مررعوبة للصالة
وكفت فاتحة عيوني النعاس بيهن مرحلة التحول هاي يغلط بصوت عالي ويضرب القنفة برجلة صاير كتلة من النار رجعت لمكاني لايشوفني ويذب حركتة بية...
لفيت روحي زين وافكر بالصار وياة معقولة الزمو لو صار شي جبير ينقلة من حال الى حال نمت بدون ماحصل الاجوبة الاسئلتي فزيت بية يكعدبية...
-كوم حبيبي
-وين
-حضري روحج الساعة بالعشرة نطلع
-اي بس وين نطلع وليش
-ولد لزمو جماعتي وهذا المكان مو امن
-زين شلون انلزمو
-ماعررف وكلنااا مانعررف بس يصير خيررر تدررين شسوي لليوصل عنة معلومات
-شنو
-افصللل رراسسة عن جسمة.
حجاها من بين سنونة وطلع الرعب دب بداخلي وصرت متوترة اكثر من قبل نهايتي بشعة احسها ماكو غير الرب ينقذني من شرة وشر الناس...
كمت غسلت وجهي وبدلت رحت اصلي بقيت فوك الساعة اررد ايات قرانية حافضتهن حتى يروح مني الخوف الساعة بالتسعة ضبط رحت اشوف الجهاز ينطي لون...
-الو سرى
-ها سيدي
-شكول وشحجي يوولو ماعغفف شلون اشكرك ولا ننسى الانجاز الحققناة بفضلج
-الحمدلله شصار يعني.
-انلزمو بالجرم المشهود بس بقة جزء قليل طفرو لاتنسين تاخذين الجهاز وياج حتى نكمل على الباقي
-سهلة هاي
-اي يول صدك انتي زينة
-ليش دائماً تسال هالسؤال الكلش اكرها
-يعني مالك زينة
-اي خايفة كلش خاف يكشفني مامرتاحة
-احنا معاكي لاتخافين خليك ريلكس وتخلص بحيل الله
-ان شاءلله.
سديت الجهاز والتفتت حسيت روحي نسحبت من شفتة وراي عيونة يتجادحن بشكل مخيييف احس الدم يبس بدمي واني اباوع لهيئتة هز راسة وتقدم باتجاهي وكال...
-واني اكول شلون طحت اثاري مديتيلي رجلج
كلني ارجف ماعرف شلون عشت من الخوف سحبني يركض بية دفعني بالسيارة وشغل رجع التفتلي وكال
بصوت خلاني اتمنة الموت...
-نجوم السما راح اشوفج بعدين تلحكين جماعتج يحلوة...
نوف
كاعدة ادرس بجد واجتهاد كاي طالب حريص شاطر هدفي من دراستي انتقل بحياتي من الى...
امال واحلام بنيتهن بدماغي والجسر هو الدراسة هالمرة عندي امل كلش جبير تتغير حياتي نحو الافضل...
بين وسط الهوسة مركزة اقرا مسائل فيزياء احل مسائل خارجية وبكل سهولة جاي انصدم من نفسي
وحتى من اسولف لاخواني ينصدمون اكثر مني...
لملمت الاوراق والاقلام رجعتهن لمكانهن وكمت اتمشة واقرا احسن واريح الي...
نزلت للمطبخ صاحتلي عايشة رحتلها جانت تكشر...
-ها عمة
-هاج يبعد عمتج
ماعون بية سلطة فواكة هاي كل يوم لو مكسىرات لو حلويات لو فواكة ولو تشوفني اقرا هواي تجي تاخذ الكتب وتتعارك وياي، اخذت الصحن وابتسمت...
-شكرا
-بالعافيه هني ومري
زهراء: -اي يابة بس نوف احنا ابد ولا تذكرينة انتي امي لو امها
عايشة: -ولج ليش تجذبين مو كل يوم اوديلج
زهراء: -اي بس مو نفس ماعونها
نوف: -اخذية هاج.
زهراء: -اجذببب ما اغار اصلا انة كبرت شني اغار من وحدة عكروكة
نوف: -تمام حبي
طلعت بالحوش اقرا واكل رفعت راسي اشوف عمي قحطان يسحل بعبير ويغلط عليها طرفت من مكاني بعد ماصارت الهوسة ماشفت شي ولا دخلت جوة خليت الانتفاضة تخلص ورحت اشوف فتحت عيوني على وسعهن على المنظر...
عبير جانت منتفة تنتف وجهها ازرك على احمررر كوة تتنفس انررعبت من شكلها حالتها فد مرة...
بهذا اليوم انخبص البيت خبص وكل شوية عركة صايرة لعبت نفسي هذا مو جوي عشت ببيت اقوة شي نتعارك اني وعبدالله وامي ترزلنة والبيت جان عبارة عن هدوء اشتاقيت لايامي ان شاءلله ترجع ماريد شي غيرها...
بعد ماخلصت الهوسة كعدنا مسوين لمة زهراء جامعة حلويات ومخليتهن بصينة وتكرط وكل شوية صاحت اكلي اكلي...
اباوع لسجى الصايرة رماد مو هي الاعرفها النهار كلة صافنة ورغد طول الوقت عيونها مدمعة خو هدوة هاي حالة خاصة تلوم روحها على الصار بوسن ومتسودنة...
زهراء: -خاب هاي عبير طلعت ولا تستحي تصاحب ولد شوف انلزمت انوب
سجى: -الحرام مايطول الا ينكشف والله حسافات ضيعت بيتها وجهالها علمود ولد يضحك عليها يتزوجها مثلا، عار هاي وانانية عافت عايلة علمود شخص مؤقت استغفر الله واتوب الية...
هدى: -شتسوالها مثلا جدام الناس وابوها...
رجلها درة بيها وطلكها بدون مايكول السبب الرئيسي جا شكد محترم وخسرتة وخسرت جهالها
محد يفكر بالعقل...
سجى: -وهاي طلعت الحقيقة كلت لو ماكلت...
كتلجن عبير مو راحة وهي الودت نوف للبستان حتى تلزك التهمة براسها بس هسة كلشي وضح خلي الايام تعالج كلشي صار
عيوني انفتحت على الدنيا ومصايبها من دخلت هالبيت الجبير بكل مكان اكو تفاصيل قصة وبيها نتطرقلها واكو لا...
مر اسبوع البيت هدا لان جان اكو حل يرجعون عبير لعيالها والماقبل رجلها يزوجونها اي لحد يستغرب عبير صغيره وكلش حلوة فيزوجونها اذا مارجعها رجلها خطية بقت بالغرفة ماتطلع منها ينكسر خاطري عليها رغم السوتة غلط بس تبقى انسان والنبذ يموت
كاعد الكل على الاكل ولاول مرة ينفتح موضوعة والصدمني عمي فايز هو إلى كال...
-وين عباس
جاسب: -التحق عباس خطية حتى مارتاح
فايز: -اريدك تروحلي للحارث وتسال عن اخبار انمار.
جاسب: -شيوديني الهم وشلون اوصلهم
فايز: -تندل بس تسال علية وتكلة ابوك يريد يشوفك
جاسب: -هههه وتتوقع يجي ويعوف شغلة
فايز: -يجي بس كلة
جاسب: -مو اشوف لازم تعوفونة براحتة
فايز: -هو عوفة ماريد منة شي بس اشوفة
طفرت من السفرة الگمة نابتة بصدري نبرة صوتة وكمية التندم البية حركت گلبي ليش بعد فوات الاوان وبعد مانخسر الشخص نتندم ونعرف غلطنة ياترى معقولة انمار يرجع يشوفة لة يحجي وياة كاي ابن مستحيل اكدر اتخيل...
طلعت بالباب فتحتة وبقيت واكفة اباوع روحي منتظرة ناس ترجع اتمنى يندك الباب وتجي ناسي تشوفني مجرد وكفتي بالباب هيجت الحنين والمشاعر المكبوسة البصدري...
-مادري انت وين بس الك ياخذني الحنين
مادري انت زين بوجهك ضحكة لو انين
مادري انت مرتاح لو عندك ذكريات وي السنين
اخ يالرحيل ليش هلكد طويل...
صعب تمحي الذكريات وصعب تمحي المشاعر.
المشاعر ماتنحمي وحدها مثل ما اجت بالافعال تنتهي بالافعال واني لحد هذا الوقت مشاعري تخنگني وتأذيني...
عقلي الطفولي وحياتي الهادئة انكلبت خلال تلث سنين خلالهن عشت، خوف، رعب، الم، فراك، شوگ
كلشي مر علية مواقف وناس مستحيل تنمحي من ذاكرتي ويبقى السؤال الاخير والاهم هل ياترى راح ننسى؟
هل ياترى نتخطأ؟
هل ياترى نعيش حياة حلوة؟
شلون تنرسم طرقنا وشلون نسير بيها؟
اسئلة صعب نلكة جواب الهن الزمن وحدة يكدر يجاوب على كلشي...
فزيت من صفتني وابتسمت مجرد شفتة...
-هلو نزار
-هلا بفرخة انمير اكلج هذا راح تزوج اضن
-دنيا كلشي يصير بيها
-دهر فرة عايف بت بغداد التتلامع ورايح يدور زرگ غسل كون يو صدك خاب اذا صدك اطيني فلوس واعذبة الج
يمشي ويسولف كاشخ بلبسة حلوة مرتبة ملفتة للنظر اسود باسود وكف كدام باب الشباك يرفع بشعرة ويكول بحماس...
-خاب انة حلو مو اي ولج حلو ادري بس كون يرضة.
رحت وراة اضحك احب سوالفة يشبة سجى ثنينهم يطگون الحجاية بالوجة هستوهم شالو السفرة كعد بالصالة على الدرج سحب السبحة من بيبي...
جدة حكمة: -خاب شمالك تلاكف
-شمالج جدة اقرالج المستقبل
جدة حكمة: -هنوب ولك
نزار: -ياا جماعة ماكتلكم انة تعلمت من سيد اكشف بالمستقبل طبعاً السيد اطاني بركات
رحمن: -خاف عمار كوسافي اطاك بركات
نزار: -اسكتو خل اخذلكم وهم كولو جذب يلة نبدي بفرخة بغداد.
كلها التفتت علية حتى اني تفاجات واستحيت مخلي السبحة بيدة لازمها منا ومنا وياخذ خرز كل ثنين سوة باوعلي وكال...
-بت بغداد راح رجلج يتزوج عليج وكولي ما كال
شهكت مخلية ايدي على حلكي ماعرف ليش حسيت كلامة حقيقة نار واشتعلت بية من ورة هالكلمة ولايكول يتشاقة...
عائشة: -فال الله ولا فالك شمالك ولك دعوف الفرخة
ماناقصة
نزار: -ديلا خل اكمل جدة نوفة وينج شو عايني بوجهي
جدة نوفة: -شلون وجه لاحسة بدهن التاوة يمفلوك.
نزار: -لا حبوبة هذا فازلين لكفتة من جهال اخوي
اة خل اقرالج انتي بعد سنة يصير بيج سكر وضغط وانوبة تضلين تعالين بروحج العزيزة بس ماتموتين اكو حل اذا انة تزوجت مايصيبج شي ويو ماتزوجت يصيرن بيج كلهن وتطلبين الموت وماتلكينة...
جدة نوفة: -سودة بوجهك يمصخم بيش تفاولي دومك تفتر وراي بالمرض جنك صكر فويلح يجيب حياية ويشمر على اهلة
نزار: -كتلج يو تزوجت مايصير بيج شي وتضلين مثل التفگة عمر عايشة.
جدة حكمة: -من الاخير وطب بالسالفه وكول اريد اتزوج
نزار: -صكد من سموج حكمة عبن حكيمة تلكفينها وهي تررركض ترركض
رحمن: -تزوج وانة بعدني شني بكيفك لا والله
نزار: -وانا شعلية بيك دولي مني اة حكموة اريدن اتزوج طبعاً ولا واحد كال هذا الزلمة عليش كاشخ ومخلي دهن لوجهة يطي لصفة صاير ماتنتبهون
جدة حكمة: -ابشر جدة احجي
نزار: -اريد بتكم بعد انة كتلت عقدت عليها وخل نفضها واخذها
جاسب: -لو تموت ماطيها الك.
نزار: -جا انة شبية اشو خلقة واخلاق زلمة شاغول جيبي متروس فلوس وحصو وحلو وطويل وماعدي سوالف مو زينة اقوة شي فاشح اسوية اشوف الدكتور طارق يلزم ايد ديالى حتى وراها اروح استغفر...
جاسب: -مواصفاتك عالمية عشتو
عايشة: -والله ياعمة احنة مانلكة احسن منك بس بنيتي ماجبرها على شي بكيفها وهسة هي بعدها صغيره مو مال زواج
نزار: -هاهية نكبرها سهلة وعلى سالفة ترضة عوفيها علية.
جاسب: -يلا ولي لاهلك بيتنة تكعد بية اكثر منة
نزار: -غصبن عليكم هذا بيت جدنا واتزوح هنا واخلف بعد تردون شي اخلي جهالي تترس الصالة ويصيحون بوووية الحك طلعت لميس ويحيى
رحمن: -عفية مسلسل ماتمل منة مو حفظتة
نزار: -بية ذكريات، احم يلا انة اترخص منكم
وكف على الدرج صار شطولة رفع ايدة وكال...
-اقدم شكري الى الجميع عامة والى جدة حكمة خاصة وبعد هاهية الفرخة صارت إلى من تكبر اجي واخذهة يلا انة رايح في امان الله...
سوالفة وجودة ينطي نكهة بالبيت شكد نحبة ونحب سوالف مخلصها يصنف ويضحك لو يسوالف بالمسلسلات شلون ولد حباب ماعندة سوالف مكسرة
ربي يوفقة...
بين التقرا وبين الصافنة وبين التتأفأف هواي سوالف وهواي مواضيع مخفية بس محد يتجرا ويحجي...
صاحتلي هدوة اطلع وياها للبستان نقرا كمت اخذت كتابي وامشي وراهاا اقرا بصوت سمعنة صوت بالاستقبال ورحت ورة هدوة اسمع...
جان عمي قحطان يسولف وي ساجت ويكلة...
-والله تفشلت وي نسابتنة فوك مامتزوج عليها وموديها مدماية اله شلون سالفة هاي بزرة مايريدة الزلمة وجهي صار اسود من وراة.
ساجت: -خابرة خل يرجع واخذة وروح اعتذرو من الزلمة والبت وكبلها خل يطلك بتي ترة انة ماطيتها الة الله يشهد بس جي صارت عيلة (استعجال) رضيت وبعد ماكو غيرة...
قحطان(ابو عباس): ماكو ادك علية موبايلة مغلق
ساجت: -هاي اجازتة هسة يرجع خو مو صكد يرجع يلتحق
وخرنا من الباب ماحجينا شي لان السالفه منتهية هذا احسن شي يسوونة، رحنا نقرا اشوفها تمثل تقرا بس اني جنت عكسها مرت ساعة والجهال دوختنا تفتر فوك روسنا...
رجعنا للبيت الكل متجمع بالمطبخ وجوهم قلقة اكو شي صاير ومو زين هم كل واحد بيهم يتصل شكل شوية والكل طلع بقت بس النسوان ورضية تلوب احس الموضوع بية عباس بس المشكلة محد جاب طاري...
الخوف والتوتر لزمنا لحد التسعة باليل اجة الخبر المضبوط عباس مسوي حادث تخبلنا بس كلولنة سالم مابية شي رضية ماهدت وضلت تتصل بيهم، جاوبها عمي قحطان...
رضية: -كلي شمالة وليدي لاتحرك كلبي.
-يابة مابية شي هسة تجي الولد واستفري منهم هسة ماكدر احجي...
نطفة ونشتعل بجي وصريخ وناس تدعي يطلع سالم رضية تريد تروح بس محد موجود شوية واجة نزار جان بالمستشفى فرحنا من كال مابية شي بس...
جانت هاي البس القشة القسمت ضهر البعير...