رواية بين سلاسل العادات للكاتبة كفاية كاظم الفصل الخامس والثلاثون
اليل يخنگ، هدوئة مرعب للمجروحين احسة مابية نسمة هوة، طلعت للحوش اتمشة على اطراف اصابعي رجلية ماعانني طحت بالكاع اشهگ بصوت عالي مخنوگة متعوبة محترگ گلبي دموعي تنزل وحدة ورة الخ احس داخلي مشتعل نار ليش هيج يصير وياي...
تتأذة لاذية الشخص التحبة تتألم من تشوفة ضايج وشلون متغير عليك هذا اكبر عذاب يمر على الانسان...
لو ادري كلمة وحده تگلب حياتي ماكلتها ولا اعترفت الة بمشاعري عقلي وين جان من كتلة احبك وخليتة يدري بمشاعري المفروض حب البنية يضل سكتة حتى الماخذ كلبها مايدري عنة بس انة مافكرت كلت من اكلة احبك امنعة يروح لغيري بس صار العكس لا صار إلى ولا لغيري بس فضحت روحي جدامة...
نفسي يضيع وينگطع اموت وارجع اعيش من اتذكر ذيج الفترة شلون ضليت عايشة لهذا الوكت وي كل هذا القهر الدخل گلبي...
الدنيا غريبة محد يتوقع نهايتة ولا احد يعرف شني المنتظرة من حياة وردية ماكو لاهم ولا غم الى الم وفراگ...
مسحت وجهي من الدمع وايدي مخليتها على گلبي اوگفة عد حدة صفنت بالفارغ ورجعت لذيج الايام اسوء ايام مرت علية اخذن من حيلي وعافيتي مو بس عافيتة...
حادث عباس موتني واذاني جنة كاعدين على نار بس نريد نعرف شبية اجة نزار و فجر خبر جبير، محد رضة على تصرفة جان المفروض مايكول عيوني اشتعلن نار من كال...
-زينة صحت عباس بس كسور عدة و، بعد مايخلف
صدمة بانت بوجوة الكل خبر اشبة بالصاقعة غير حياتة وحياتي، من بعد الحادث عباس تغير كلش صار انسان ثاني جاد عصبي بارد استفزازي وبليلة ويوم من بعد ماصارت صحتة زينة دمر كلشي...
جنت كاعدة اقرا اجت وسن بالمطبخ بس تصفن وجهها احمر حسيت بيها شي جانت هادئة كلش ضليت على هدوئها لفترة من الوكت عيني عليها وعيني بالكتاب الفضول كتلني يربي اريد اعرف...
جانت ساعة وحدة فقط...
صاح علية ابوي للديوانية مشيت على وجهي ماعرف شيريد مني لاگتني وسن تمشي بسرعة وكفت اعاين وراها رمشت بعيوني ومشيت من صاح على طلع فارس اخذني من ايدي وضل واكف وياي برا سمعت صوتة واحس معدتي خبطت وكلبي اشتعل نار...
طلگني اي ضليت جامدة لا اخذ ولا انطي دخلت بحالة صدمة اخذوني يمشون بية ضليت فاتحة عيوني اشوف وسن طلعت بيدها جنط كبار دنكت على راس حبوبتي باستة وكالت موجهة حجيها للكل.
-ابرني الذمة على كلشي طلع مني حجاية فعل ابرني الذمة بنات
تصادفن عيونها بعيوني هزت راسها وكالت بحسرة
-ابريني الذمة اذيتج هواي
شالت غراضها ومشت لحد الان مامفتهمة شني السالفة اعاين بالوجوة مكتأبة بيها نوع من الحزن صوت بجي رضية ونعاوي حبوبتي ترسن البيت...
مو بس انة تطلگت وسن هم وراحت لاهلها تعيش حياتها تزوج وتخلف جهال مثل مارادت هي الطلبت الطلاگ لان بعد مايصير عدة جهال...
استوعبت الصار من مر علية وكت البيت احسة فرغ الحياة انعدمت بية لاضحكة ولا ابتسامة كلمن عدة حزن وهم يختلف عن الثاني...
طحت وصحتي دهورت عباس صار ماينزل للبيت صرت اتمنى اشوف عيونة الشوگ ياكل بروحي اكل لحد يلومني على شي مشاعري دمرتني علية ياحب هذا ياعشك حالة غريبة ونادرة اريد اصيح بعلو صوتي واريد اشرح مشاعري ما كدر ولا اعرف اجاوب اليسألني تعلقت بية من الصغر من ينزل احس ينزل المطر واروح اركضلة بلهفة هسة انة محتاجة المطر يبللني بهلوكت ليش كل هالجفاف روحي تفطرت...
سكتت اسمع صوت الاذان يصيح...
-الله اكبر الله اكبر.
ضليت استمعلة لبين ماخلص رحت توضيت وصليت ضليت اقرا قرآن بعد ماجاني نوم رحت اسوي ريوك هسة تكعد نوف وسجى عدهن دراسة خليت الطاوة على الطباخ وسمعتها تقرا ابتسمت والتفتت الها شعرها مكفش وبيدها الكتاب تقرا...
-من الصبح ماصارت قراية هاي اتريكي بالبداية
كعدت على الكرسي كملت التعريف وعاينتلي عدلت شعرها وكالت...
نوف: ما لحگ ولج السالفة صعبة كلش صعبة اخاف ماطلع معدل وارجع اعيد السادس اسم الله.
هدى: -كولي يا الله الكاتبة الج يصير
رجعت تقرا بصوت عالي كملت البيض ونصيت القوري اجت سجيوة عاكدة حاجبها جنها تريد تعارك
هالفترة صايرة ماتتحاجة...
هدى: -اكعدي تريكي
سجى: -ماررريد سم فااارس مااكعد
هدى: -لا بعدة على كيفج دنيا الصبح
سجى: -ررااح اروح وحديي شني ضاالة معلكة الا ويااهم ارروح مو عيييشة هاي
-ابوي مايرضة استجني لاتسويلنة سالفة.
كعدت تسب وتغلط بصوت ناصي صايرة نفسية كلش ماتتحمل شي خليت الريوك جدامهن واجت حبوبتي تتريك وي نوف...
جدة حكمة: -ماتاكلين شمالج معبسة
سجى: -بس عوفو سالفة الريوك اريد اولي الووكت طاار يلحمززة
جدة نوفة: -هاي سجيوة حسج يذع ذع (عالي ينطي صدى) من الصبح شمالج البارحة متهورشة يمگموعة
سجى: -يو متهورشة مو احسن من هاي السالفة الخايسة اضل اتاني فارس وغيرة يترحمون علية
فارس: -ها ولج شبية فارس طلع مو زين.
دخل فارس بيدة ابنة صاير يخبل يضحك وحدة
سجى: -صلاووات جكليت اطشلك بعد وكت لو مكمل نومتك مو احسن
فارس: -اي والله احسن اخ مو نومة تخبل
سحبت على منة تعاينلة بطرف عينها اخذتة تبوس بية وتصيح...
-روح روحي ضلع من ضلوعي انت اگلك فارس
فارس: -كولي سجيوة
-شوف انة ردت هذا الفرخ اسمية معتز ومارضيت طيحتها الك بس البنية تسمونها شام على طوق البنات وانتو الممنونين
فارس: -ليش ماتسمين بتج شام وتطينها لابني مو احسن.
ضحك ورجع ياكل ضلت تعض بشفتها وتهز راسها بحركة منظرها يضحك تفتر بعلي وتهز بية وتصيح
-دللول يالود يبني دللول دللول عدوك غريب وساكن الجول
فارس: -معدلة سجيوة تصيرين ام مثالية
سجى: -فاااارس احتررم احتررم مو ماريد احجي شي مو حلو
فارس: -خوش يابة خوش سكتت
دخلت سفانة انطتها ابنها وطلعت ضايجة، رحت وراها اشوف شبيها تفتر ماخذه الحوش رايحة راجعة...
-سجى
-ها
-شبيج
-مادري بس مو زينة
-شني مو زينة شني المكدرج احجي.
-ضغط ضغط ماكدر اريد انة اقرر مو الناس التقرر عني
-اذا على سالفة ارفد ارفضية وانهي السالفة
-يعني بعد هاهية كل واحد يروح بدربة مو
-اي
-حتى ماحجي وياة سوالف عادية
-مايصير تحجين وياة اي شي بعد
-بس كبل مو جنت احجي عادي شبيج اضحك علية هيج
-اسكتي ولج لايسمعوج ويسوولنة سالفة
-يلة سكت سكت، اكلج
-ها
-شوفي جدتي حجت وياي البارحه
-شكالت
-كالت خوش زلمة هو ماتلكين مثلة وماطول احنة نعرفة
-اي وانتي شكلتيلها.
-ماكلت شي بس شوفي ترة هو زين صح تذكرت البارحه طلع زين يعني زين صح املح شوية وغثيث بس زين
-اي صح زين
-بس خيولي مو مال زواج احسة
-صح خيولي
-لا ولج اشو حباب وحلو شوية الملاح لايگلة مطية نكهة خاصة
-اي صح
-اي مو انة هم اكول خطية ارفضة بعد اخاف يتاذة بسببي لان كلش يحبني مو هديوة شوفي اذا رفضتة يتاذة
-اي صح
-شفتي حتى الله يعابيني من وراة حوبتة تطلع بية
-اي والله صح.
-طاح حضة وولج هذا يغثثثث يحررك كلبي بسووالفة خاف يطلكني امدااة ماتزوجة لو يضل بس هو بالدنيا
-خوش
-اهمدااج خلصتيها اي صح وخوش نوف ام البزازين احسن منج تحجي
هسة انة شني ذنبي من الصبح حصلتلي غمة بس يلا ما الومها ماتعرف تصرف محتارة بين عقلها وكلبها تحبة بس تكابر على روحها وعلى مشاعرها عود كالو باجر ينهوها لان كلش طولت وهي قافلة على الا الله يقدم البي خير الها...
سجى: -روحي بخشمي طافرة مادري شريد شكل الهم اذا سالوني اخذت قرار من البداية ارفض بس اكو شي بداخلي منعني احس روحي مخربطة مو بس مشاعري اريدة وماريدة مدري شلون تصفة انوب الوكت خلص وحتى السنة الدراسية هم راح تخلص
وحايرة بزماني...
وصلت للجامعة كارهتها كلش ماطايقتها راح اتخرج وبعدني ماحب جوها كعدت على المسطبة باخر الحديقة اراجع للمد رن موبايلي بيدي ضحكت من قريت الاسم الاملح هاي من زمان كتبتة فتحت الخط وضليت ساكتة اسمع...
ارفد: -صباح الخير
-هلا
-صباح النور يلة مو مهم صح انتي وين
-بارض النفاق
-ادري بيا صفحة مو هي جبيرة ماشاء الله عليها
-يم قسم المابية طلاب مكبلين
-استغفرالله هسة غير تكلي وين
-مو كتلك يم قسم الطلابة حبابين.
-خاف قصدج بالمريخ لان ماكو قسم كامل طلابة حبابين
-جبتها بالمضبوط بالمريخ انتظرك هناك يلة good by
-خبالو احجي عدل شبيج وين انتي
What do you want
-
-عدي شغلة بس اطيها الج وراها ماتشوفين خلقتي خوش
-خوش
اطيته مكاني شوية واجة درت وجهي عنة كلبي يوجعني ماعرف شني احس مرت دقايق تنعلت من الشيطان والتفتت علية بيدة سلسلة مركز نظرة بيها...
-شني هاي
ابتسم ورفع عيونة بوجهي: -هذا اسوارج نسيتية بالقاعة مال الامتحان.
-اي صح ولك هذا الييييي والحمزة ضاع مني بس قديم مو هسة
-نهاية الكورس الثاني المرحلة الثانية
-وهسة احنة نهاية الكورس الثاني المرحلة الثالثة
-سنة
-اي صح صارلة سنة ليش ماطيتة الي
-نسيتة هسة اتذكرتة كلت فرد نوب حتى مايضل شي الها يمي
-ليش شني شبية جرب حتى ماتريد تعوفة يمك
-صار هواي ضامة جنت متوقع اطية الج بغير مجان وبغير مناسبة بس ماطول انتهت اخذية.
مديت ايدي ترجف وعيوني دمعت ماد ايدة ماكدرت المس ايدة فتحت ايدي الة عرف المقصد وخلاة بيدي ودار وجهاا نفسي ضاع حجيت بصوت يرجف...
-وين رايح
-رايدة شي
-باجر تجيب شيخ
-اي حتى يصير كلشي رسمي
-ليش
-هو شني اليش غير انتي ماتريدين نكمل
-اي صح
-جا لاتكولين ليش Good luck to you
-ها ولك اوكف ويييين ررراايح
-شبيج تجوعرين منا ناس
-ماكو صخام عدهم محاضرات محد موجود اوكف يلا
-وكفت شتريدين
-هاي عود صدك رايح ليش.
-استغفرالله شتريدين فضيني
-هسة انت من اجيت عليش
-اطيج اسوارج
-بس
-اي بس
-رررووح يللللة ررروووح باااجرر تعااال
گلبي تشعوط بنار من برودة نزلت دموعي غطيت وجهي ابجي بصوت واناشغ مادري شني السبب فاجاة انفجرت انة سجيوة ابجي عفية زمن اغبر
ارفد: -شبيج سجى كولي احد محاجيج
-روح منااا
-وين اولي كولي شبيج
-معليك
-هسة غير تفضها شلعتي كلبي شكول عليج
-راح تنهي كلشي انتَ ماتحبني ادري انة ما اناسبك وكحة و.
-منين تجيبين هذا الحجي بس كليلي لخاااطر الامة
-انت لو تحبني صدك حاولت وياي مو كبل عفتني
-مو انتي دكولين ماريدك اكرهك
-اجذب جا انة كلشي احجية انت تصدگة انة جذابة ليش تصدگني
-يعني تريديني
-لا شني اريدك شو انت ماتستحي
-جا شتريدين رحمة لجدج
-لاتفصخ العقد حرامات يكلك الملائكة تنعلنة وبعد مانتوفق بحياتنة
-جا خوش ما افصخ بس هاج اكلنس
-نعمة الله عليك
اخذتة من ايدة امسح بوجهي...
ارفد: -الجمعه نسوي خطبة.
-لا عيب استحي شني خطبة
-جا شنسوي مثل الهنود
-اي احسن
-كلبي انشلع وانسسحل وتملغط بالتراب
-اغسلة وانشفة وارجعة المجانة لا تخاف علية
اباوعلة غص من الضحك صرت اضحك مخلية ايدي على حلكي شبية انة مافكر شحجي كمت اعدل بعباتي عاينتلة رافع حاجبة مبتسم...
-ها خيرر
-الجمعه نسوي خطبة
-ياجمعة هاي وامتحاناتيييي
-ها خوش بس تخلصين جا ماضل شي وتخلص
-اي بس مانتزوج هسة
-جا ليمتها ست.
-من اكمل دراسة هذا شرطي عجبك اهلا وسهلا ماعجبك هم اهلا وسهلا
-سنة مو هواي
-وين سنة هنا ست اشهر وحتى مو كاملات سويتها سنة بعد
-خوش جا اتفقنا
-خطة العباس حاطتلك كون غيرت رايك تعثر
هز راسة يضحك ويمسح على لحيتة توترت وانة اعاينلة نظرتي اختلفت كبل اشوفة عادي هسة لا اركز بتفاصيلة رفع عيونة بعيوني ردت انجبح على وجهي اخذت كتبي ورحت اركض يمة يمة كلبي مطلط يدك وماكو شبيك ولك تسودنت...
يامن يوصلني قسمي ارجف صرت، مشاعري متناقضة مادري القرار الاتخذتة صح لو غلط عليك ياربي بيدك...
خلصت اليوم بالي مو يمي للعصر كلهم كاعدين يشربون جاي وكعك مسوين اخذت وحدة اكرط بيها اجة فارس وجهة مبتسم يخزر بية وانة اخزر بية.
فارس: -مبروك ست سجى ماضل شي لخطبتج خوش قرار عجبتيني.
وجهي اشتعل نار كلها باركتلي الضاهر يدرون بالخبر يمتها مخابرهم وكايل يبووو على راسي استحي طلعت مع الاسف سحبت روحي وطلعت لاكني البنات زهيران تصفگ بالسكتة ورغد تهلهل بصوت ناصي...
سجى: -اهووو استغفرالله لاتخلني ابطل
رغد: -والله وصار عدي نسيب كفو
سجى: -اي بس اسكتي عني
زهراء: -ولج سجيوة راح احفظ گولات لخطبتج يمة فداوي شطلعون.
سجى: -سيت كلاصات بس اسكتن عني عليجن الله انسن السالفه وراي امتحانات بس اكملهن انوب ارجعن صنفن
نسيت السالفة بكبرها وطلعتها من بالي ماريد افكر بشي واثر على امتحاناتي ماضل شي واخلص...
كل ما اتعب من القراية وامل نوف تسويلي واهس عجيبة هالبنية ماتتعب ولا تمل من تكعد لحد ماتنام هي بس تقرا ناسينها وناسية روحها بالدراسة احسها تنسة العالم والمر عليها من تقرا...
-اووف لا الة الا الله هسة شبيج تبجين.
مخلية راسها بحضنها تبجي بحركة طبت نوف تفاجات وكفت بصفي صافنة نزلت عليها امسح على راسها واسحبها علية...
-بسج كافي هدوة لخاطر الله ماتشبعين من البجي مامليتي لشوكت تضلين هيج
-مو بيدي والله ليش هيج يعاملني شمسويتلة مو كبل جنت اخابرة من يلتحق واضل اسولف وياة هسة هسة، مايريد يسمع صوتي
-خيولي عوفية حاير بضيمة التهي بروحج
-گلبي يوجعني علية والله گلبي يوجعني.
-اسم الله سلامة گلبج دخيلج يم البنين كافي هدوة گلبي راح يوكف
-گااال بعد ماينززل لييش لييش مو حررام علية والله حررام
حرت شلون اسكتها روحها جاي تفرفح بيدي ومابيدي شي بس اعاين ه عليها شني سر هالتعلق وين واصلة ليامرحلة ليش مافكرنة من زمان بهيج سالفة جنة مكيفين عليها وعلى اهتمامة الها
دموعي تنزل وي كل شهكة تشكها يتكطع كلبي عليها.
انة مو خوش اخت التهيت بروحي ماطيتها الحنان والامان راحت لكتة بغير شخص وتعلقت بية لحد الجنون ماصايرة هاي شكد تبجي وتصيح باسمة حتى وهي نايمة من اغرب العلاقات الشفتهن والسمعت بيهن هي علاقة هدوة وعباس احسة جمع كلة الشخصيات بشخصة ومن راح جان نقص جبير محد كدر يسدة بحياتها...
-تعبان هو
هه
-لا مابية شي
-لا تعبان وملجوم ومريض ومحتاج واحد يسندة اخاف يطيح وحدة
-لا تحجين هيج ماكو شي.
-لا انتي ماتعرفين شي عنة انة احس بية محترك كلبة والله تخيلي جانت راح تصير عدة عايلة وبليلة ويوم ضل وحدة فريد وحيد...
-ارحمي بحالج اروحلج فدوة لاتفكرين هيج
-ماكدر والله ماكدر يطلع كبال وجهي كل ساع
مخليتها بحضني ادك عليها غفت مثل الطفل الصغير بحضني مسحت دموعها وكمت على كيف غطيتها وطلعت ذبيت حسرة ورحت اسكت نوف التبجي وجهها دم كوة تتنفس، صرت ادك على ضهرها ورفعت راسها...
-نسكت وحدة تطلع الثانية شني غيرة وحدة تشوف الثانية
-حاسة بيها والله گلبي محترگ مثلها محد يحس بالمرينا بية صعب تفهموة هدوة تمثلني اني مثلها تعذبت على فراگهم...
شهگت بالبجي تخبلت عليها ادك على ضهرها وغسلت وجهها بماي: -اتنفسي من خشمج سدي حلگج
نوف: -هو هم جان يكلي هيج سوي.
سجى: -لا الة الا الله وتالي وياهم علقوجن بيهم واختفو.
سكتتها بطلاع الروح روحي طلعت مادري شسوي وين الگة الحل اخذت موبايلي اتصلت بعباس وين الة جاوبتي مبين على صوتة جان نايم...
-الو
-الو يابة نام واشبع نوم وخلي غيرك يتفركع عليك مثل السمجة من يشمرونها من الماي هيج سويت باختي ليش ماتحجي وياها وتتصرف مثل كبل انت مو علمتها عليك وعلى اسلوبك الحلو الرقيق اذن ترجع تعاملها بنفس الاسلوب...
-كولي يا الله شصاير.
-انت كلي شصاير شبية البيت ماتطبة مخلينة متفركعين عليك ماتفكر لا باهل ولا بهاي المسكينة بس بروحك تفكر تعال ارجع مو ماتت البت من وراك والله موتتها كلبها على ساعة يوكف عبالك هينة من تبجي بحركة عليك وتفكر بيك والله العظيم مو هينة
-يصير خير ان شاءلله
كال هالجملة وسد الاتصال بوجهي ردت اركع الموبايل بالحايط صارلي شكد الغي وهو ولا يمة شلون احجي هسة...
نوف: -وقتي مخلصتة اقرا بغرف انمار ماريد اسميها غرفتي لان ماطول بيها ايامي معدودة كلش بيها حدي وياها على كد القراية لان البيت هوسة مابيه هدوء...
رفعت راسي اباوع بالساعة شهكت بصوت تلث ساعات على جرة وحدة اقرا حتى ركبتي انشنطت بهذلني السادس انسة روحي كلش ما انتبة للوقت حياتي صارت عبارة عن حفظ ومسائل شمرت الكتاب من ايدي ورحت طلعتلي ملابس سبحت ورجعت...
اتحرك بهدوء تام سحبت المشط امشط بشعري ودموعي تنزل ايام من اتذكرها يحترك كلبي اخ يا نمر بداية العلاقة تركتني ماسالت وين تضل وشلون تعيش شنو من النوع البرود البصدرك هيج اني ما اهمك تمام حتى انت ما تهمني والايام تثبت اني شنو وشلون اتخطاك بس صبر يحتاج ماضل شي واعوف هالمهجورة على كولتك اعوف كلشي بيها كل رجفة كل شهگة كل صرخة خاتلة بحيطان هالغرفة...
كملت شعري ورشيت، عطر خليت شوية حمرة بس لون ماكدر اذا ماخلي مسحت شفتي باصبعي ورجعت كعدت على السرير طلعت من الجرار البصفي دفتر مسوية بية جدول اشخط على الايام ماضل شي على الامتحانات يارب مثل ماردت حققلي مطلبي...
اخذت الموبايل اتصلت بامي ضلينة نسولف بالربع ساعة وسديتة ضليت فاتحة بالواتساب اراسل بنية وياي بالمدرسة انتبهت للوقت مرت ساعة سديتة ورجعتة للميز بعدة بيدي ورن رفعتة وفتحت خط الرقم غير معرف...
ماكو صوت: -الو الو منو وياي
-استغفرالله شنو تضحكون على شكد مزعطة لعد
امداكم
سديت الخط بوجهة اكيد ذولة الهتلية اليصجمون بالبنات شكد عيعع رجع اتصل ثاني مرة كلبت عيوني وفتحتة...
-اووف وتالي تفضل اخي محتاج شي مساعدة واذا جنتي بنية كولي اساعدج اذا محتاجة مساعدة.
ما اجاني صوت سديت الاتصال وشمرت الموبايل بالجرار نسيتة وماكلت لاحد مر اليوم وثاني يوم جان اجتماع كالعادة دائماً يكعدون يتناقشون ويسولفون عن امور عامة وخاصة...
كعدت على الدرج اقرا واسمع الهم...
فارس: -بوية انة لكيت بيت واشتريتة من زمان...
قحطان: -بالخير بوية شايف كل الخير شناقصك انة اكملة الك
فارس: -كامل هو بس شوية على ما علاوي يكبر واطلع.
كلها باركتلة وفرحتلة يستاهل كل خير فارس هو سفانة رحت باركت لسفانة تضحك وخدودها حمر اخذت على منها العب بشعرة وابوس بادية مجلب بية من ثوبي يعرفني تلعقت بية كلش بس هلمرة اني الاعوفة وابتعد...
-علي علاوي حبيبي انت بعد ما اشوفك بااح من تكبر تعالي اشوفك
سفانة: -وين رايحين احنة يمكم مو بعيدين بنفس المنطقة
نوف: -حجي يفيدج مو بنفس المنطقة ولا نفس المحافظة، الزمي ابنج اروح اكمل قرايتي.
طلعت بالحوش اقرا وارجع ليورة رفعت عيني اشوف عمي فايز عيونة علية توترت ورجعت اكمل قرايتي احسة يمشي باتجاهي بس غلست عنة رفعت راسي واكف مقابيلي...
-شلونج بوية
-زينة الحمدلله
-اشلونها الدراسة وياج
-ماشي حالها
-شاطرة مبين عليج اقري بوية محد يفيدج غيرها.
ما استغربت من اسلوبة ابد طريقة معاملتة إلى تغيرت كلش يسلم ويسال علية حتى يدزلي مصرف بيد عايشة حلو من الانسان يغير اسلوبة وتعاملة السيء بس كون مو بالوقت الضايع...
كمت اجيب اوراق اخذتهن وسمعت موبايلي يرن رفعتة هم نفس الرقم البارحة اتصل شمرتة مامهتمة ونزلت جوة اريد اطلع برا وي حبوبتي...
ترحيبات وسلام حار وكفت اباوع عليهم يسلمون على مرة وحبوبتي تبوس بيها كلش مبينة تحبها وعدها علاقة قوية وياها قلصت عيوني اباوع بشكل المرة احسة مالوف مدري وين شايفتة يربي...
باوعت باتجاهي ونطقت اسمي صوتها هو الذكرني بيها صار تلث سنوات من يوم الالتقينة بية حرارة صارت بجسمي وين رجعتني شوفتها رجفت ايدي وصوتي رجعن جني ذيج نوف المريضة...
-شلونج يحبوبة تعاي لية ينوفة.
واكفة مصدومة من لقائها بهذا الوقت شجابها النة وين يعرفونها فتحت حلكي اباوع للولد دخل يسلم على الولد وين يعرفونهم ذولة مو خاصة انمار هاي الحجية وهذا الولد ناسة ذولة...
صاحتلي حبوبتي اسلم عليها رحت امشي وارمش بعيوني سلمت عليها وحضنتني لحد هسة اتذكر حضنها الدافي وذاك الشعور من دخلت البيتها...
جدة حكمة: -هاي يحبوبة اخيتي ومرت اخوي وهاذا الوليد حفيدها يصير.
هزيت راسي ممستوعبة ذولة يصيرون كرايبهم بس ليش مكلي بوقتها هي اقاربة...
دخلت جوة كعدت وماقبلت الا اكعد بصفها كعدت صافنة بالي بغير دنيا تجاوبني واسألها رفعت حاجبي باستغراب من كالت...
-يحبوبة ماتجبين لية موبايلج اخلي بية رقمي عود بلكي نصير مثل الناس نتخابر انة واخيتي
جدةحكمة: -علواة يخية هم اعرف اخبارج واسال عنج كومي ولج نوفة جيبي موبايلج
رحت جبتها واجيت: -انطيني الرقم اخلية.
-يحبوبة ماتعرفين لهذا صرصور خلي وليدي يخلية الج
اخذت موبايلي مني ضل بيدها منا لمن كامت انطتة للولد الوياها يلعب بية ماعتقد يخلي الرقم...
-شنو جاي تسوي
-اكتب الرقم
-ميحتاج كل هذا الوقت
-لا يحتاج لان انة ماعرف للدلكسي
كلبي ما ارتاح الة يسجل ويلعب بكيفة اريد اصيح بية بس استحي من الموجودين بطلاع الروح يلة انطانياة اخذتة وخزرتة بطرف عيني دنك راسة وطلع...
اخذت العب بالموبايل مابية شي وما لاحضت علية شي بالليل كلش كبل لا انام اخذته العب بية لكيت هواي مكالمات من رقم غريب دست علية بالغلط وسديتة شوية ورجع اتصل كلبي صار بين ادية من الخوف فتحتة اريد اعرف منو بلكت هالمرة يرجع يحجي...
-الو ومرض بس تتصل جاوب وخلصني مو طلعتها لروحي راح اسدة والله
-الو شكر
كلمة وحده خلتني انكلب راساً على عقب رجفة سرت بجسمي صرت ارجف انفاسة العالية باذني غمضت عيوني اتذكرة...
-وياي مو شلونج؟
-م، ميخصك
-وكت ماعدي شوفي ذاك رقمج بدلتة هذا جديد
-شنو شكاعد تحجي
-اليوم الولد وديتة علمود يبدل الرقم لان صارت الشغلة خطرة
-لحضة شنو فهمني شي
-ماگدر روحي نامي ادري بيج تنامين من وكت
-اووكف عليك الله بس جاوبني وريح كلبي احجيلي ليش هيج تسوي بية طلكني انهار طلكني تسمع ادري بيك عايش حياتك ومرتاح خليني اني هم ارتاح اعتقني وحررني من سجنك.
-ما مأثر عليج يلا باي ماكدر احجي زيادة ديري بالج على روحج واهتمي زين بامتحاناتج
-اووكف اوكف بس احجي كلمة وحده عليك الله لاتسدة، اكرهك انهار مستحيل اكمل وياك طلكني انهار تسمع...
انسد الخط بوجهي وكع الموبايل من ايدي احس الدنيا تفتر بية بس اريد افهم ليش اتصل وسمعني صوتة وحتى مكال شي او برر لشي راح انجن من وراة ومن ورة تصرفاتة ليش بدل الرقم حتى مگلي ومنو الجان يتصل هم بقة مبهم بالنسبة إلى يمكن هو يعرفة منو...
امسح بدموعي التنزل واشهگ كافي ولج لاتبجين @ ورب العزة الا اخلية يحلم يشوف خيالي اني الك والزمن طويل ما انساها الك ولا راح اسامحك على تصرفاتك وياي للابد...
صعب الجاي امر بية اكثر من صعب عافني وراح حتى بدون مايكلي وين لو السبب الخلاة يبتعد من البداية هو بارد وياي زين ليش كلي احبج وخلاني اتعلق بية خو مابقة على جفائة...
من يوم الطلعت من بيتنة مافهمت شي من الكاعد يصير وياي خلصت هاي الليلة بالبجي والوعود لنفسي دور الدنيا وتصير سوالف الله كريم هو الينضم حياتي...
جان هذا اليوم مثل الحلم بسرعة نسيتة رجعت مركزة بدراستي ومن ناحية ملتهين بخطبة سجى.
خابصتنة خبص ماتخلي وحدة تكعد وترتاح الا توترنة وياها...
سجى: -ولجن بنااات والحمزة اددج روحي اذا صارت الخطبة مو حلوة يبووو علية انة اصنف على الناس تالي يجون يصنفون علية يا صخام الوجة ولجن رتبن وياااي شماالجن...
رغد: -يعني ماتشوفينة خلصنة كلشي بعد شكو
سجى: -ديلا خوش بس اريدن انسق وياة شدكولن
زهراء: -حتى تطلعون سيت كلاصات هههههه
سجى: -هم صكد فكرة خايسة بس صاحبتي كالتلي
رغد: -روحي ولي احنة نكمل الباقي.
سجى: -رايحة ولجن يمة يبووو شني كلها تلتم فوك راسي خاف تنلاص واسويها عركة
هدى: -وين ماترحين تفكرين بالطلايب خرب يومج ولج شعدج داخلة حرب
سجى: -لا مو شوفي خاف اخواتة يضوجني
رغد: -بس امشي البنات حبابات لاتحدين اسنونج عليهن من هسة
سجى: -اليوم خطبتي ياقوم مامصدكة وبنفس الوكت خايفة ومتوترة يععع لعبانة روحي مادري ليش رحت اشوف الهول وترتيباتة لاخر مرة كبل لا اطلع...
كلش عجبني ترتيب الكوشة والالوان منسقتة وي لون البدلة ميز وطالولة وحتى الكيكة هم بيها لون وردي صديقاتي البلجامعة علمني على ترتيبات وتعديلات ماجنت اعرفها...
رحت للصالون واجن ورانة اخواتة خوش بنات الصراحة بس وحدة بيهن نفسية مثلة المهم متزوجات مو يمي...
اجة دوري وكالت ام الصالون: -حبيبتي انتي بدلتج الوردية
-اي عيني هي
-شوفيلج غيرها لان تاجرت
-شني عيدي شكلتي بلا زحمه عليج
-تاجرت حبيبتي اختاري غيرها.
-وعلى اي اساس تأجرينها لغيري مو محجوزة باسمي
-بعد صارت حالة مستعجلة
-خل تفيدج الخالة المستعجلة
دكيت رجلي بالكاع الا اطلع من هذا الصالون واشوف غيرة كلها تقنع بية اشوف غير بدلة هي احلى وحدة بيهن ما اختار لو تنكلب...
-من الاخير يو نبدل الصالون ونروح ندور بدلة ثانية يو ماكو خطبة وانتن بعد بكيفجن انة ماعدي شي هسة ارجع.
شكد حجن بس ما تأثرت لو تضل بس هي بالعالم ما اخليها تمكيجني مكيفة مطية البدلة مالتي طلعت من الصالون روحي طافرة بخشمي ماتحملت الحاحن على اتصلت بية...
-شوف ارفد هذا الصالون ما اتمكيج بية شوفلي غير صالون لو ارجع للبيت
ارفد: -بس على كيفج روحن شوفن غيرة اكو بعد وكت بس اعصابج
-فدوة لكلبك يلا باي
سديتة منة ورحت الهن اضحك: -اكو صالون غريب هنا تعالن نشوفة.
رحنة لصالون ثاني مالكيت بدلات تعجبني والمشكلة لازم وردي اعصابي تلفت وهو كلساع يخابرني انوب اخواتة يمي ماكدر اصيح علية...
ارفد: -هسة يجيج فستان وردي بس اتمكيجي
-لعبت روحي
-اخذي علج
-هفففف ماا ماا هية شنية
-احترك عاصم الكلب سجيوة راح تطلعينها من خشمي
-خوش باي.
سديت الاتصال ورحت اتمكيج شسوي مو مال عناد كبل لاتبلش بية شرطت عليها شكد شروط مو شلون ماجان تمكيجني ماريد واحد يتنمر علية وانة ام التنمر لا والله طلعتني لعاااابة ولا عبالك هاي انة ضليت افكر خاف الغثيث مايعرفني انوب...
الضحگة شگت حلگي وصل الفستان بيد رحمن انة ردت بدلة بس يلة احسن من ماكو بدي اهلهل من الفرحة الفستان يجنننننن وردي واحلة من البدلة الحجزتها بالف مرة تصميمة يجنن...
مفتوحة شوية من صدرها ومن جوة كلوش بيه كسرات كبار مو كلش هواي وردنها جاي من الجتف مفتوح من النص احس ناسين الردن مامخيطينها بس بعد عود تصميم وفيكات لبستة طلعت اجنن
يبوو صدك حلوة مو جذب...
رجعنا للبيت اول ماوصلت بطني كامت توجعني يمكن هاي السالفه صايرة وي شكو وحدة تزوج لو تخطب...
هلاهل وجكليت بيتنة انترس صفكات كعدت على الكوشة وذبو الكبوس مني كعدت اخوزر بالعالم واحجي بداخلي ذني مدري وين ولن ولا وحدة موجودة...
رغد: -اركض منا ومنا نجيب ونخلي طحت صفح راح تجي سجيوة وانة مامبدلة رحت اركض اريد البسلي فستان براسة خير ماكو درت وجهي لنوف كالت...
-هاج هذا فستاني لبستة بخطبة عباس البسية
-بس خاف مو على كدي
-روحي جربية واذا مو علكدج اطلعلج غيرة
-خوش بس خل اتمكيج بالاول.
كعدت اتمكيج وياهن لطمن لطم بالمكياج بس نوف كلش قليل مكياجها...
زهراء: -نوف امي تكول خل تخلي شال على راسها ترة النسوان تحسدها
نوف: -هي خطبة المن لابسة
زهراء: -تصيرين صلعة من عيونهن وانتي بعد بكيفج
نوف: -لايمة البس البس
زهراء: -اي عفية اسمي الكلام
رغد: -ونختم الاطلالة بالحمرة المخملية واووو ماهذا الجمال
زهراء: -اي بس على كيفج لاتحمين
رغد: -ولا تسون واهس للواحد اروح ابدل.
اخذت الفستان وطلعت بطرگة رحت لحجرة انمار مقفولة هاي عايشة بكل مناسبة تقفلها رحت لحجرة المجسب ماطول مو هنا خل ابدل طبيت ورحت ابدل ورة البردة لبست الفستان شوية ضيگ رحت جدام المراية حلو كلش مطلعني شكل ثاني بس شوية ضابني...
فتحت شعري نثرتة وصرت ادور بنفسي جدام المراية شعور حلو من واحد يشوف نفسة حلو كلش
شهكت بصوت من شفتة وراي حتى الهوة كطعتة.
رحت اركض اريد اطلع وسحبني من ايدي انطخيت بية صرت ارجف كلني اشتعلت نار من قربة...
-شبيك وخر اريد اطلع
مد ايدة سحبني من خصري ايدة منبتها بخاصرتي حالتي اتخربطت من الخوف والتوتر صرت ابجي اول مرة اكون هيج قريبة علية كلبي حسيته راح يوكف...
-ااه شبيج جاسب جاي توجعني
-احسن اريدج تتوجعين
غمضت عيوني بالم ودموعي نزلت نفسة بوجهي ما جنت ادري لمسة وحدة تشعل النار بجسمي اصبعة مر فوك خدودي وجلماتة حركن كلبي من كال...
- رخصتي روحج حيييل بسوايتج ماضنيت بيوم ترحين تتمعشگين
-كافي ليش تعيد السالفه كلساع غلطط غلطط وتندمت علية
-بعديش تندمتي ماريد احجي شي جبير، لاتبجين مكياجج خرب
دفعت ايدة من وجهي والثانية افتح بيها ماكدر افتحها حيل وجعني...
-بس وخرر فدووة وخرر
تقرب مني كلش وهمس ورة اذني وايدة تمشي بشعري...
-انتي مرتي اذكرج واجوز هسة يعجبني اكمل الزواج واكلهم محد الة شي يمي نختصر وكت وفلوس.
صرت اختض بيدة حتى حجي ماكدر احجي اخذني وشمرني على الجرباية صار فوكي بس اشهك واحرك بدية اريد بس صوتي يطلع ماكو اختفة...
همس بذني بحقارة: -مكيفة على الوضع عجبج مو
-ف، دوة لا لاتفشلني جدامهم
-كلت لابوي وابوج لاتخافين
فتحت عيوني على وسعهن كل قطرة دم ماضلت بية متت وانا اشوفة يجردني من ملابسي بكل قوتة.
انسحبت روحي بهذا اليوم المشئوم صرت مرتة رسمياً بس دموعي تنزل ضامة راسي بالجرجف واشهگ سحب راسي لصدرة وايدة تمشي على وجهي قوتي صفر ماكدر ارفع ايدي...
باسني براسي وكال...
-ردت اسويلج عرس بس انتي ماتستاهلين حالج حال البنات كسرتي گلبي ولو اكسر گلبج الف مرة ما ارتاح
كام مني واخذ ملابسة عافني وحدي وطلع احس الدنيا سودة بعيني والوجع اخذني لبست ملابسي القديمات شلون ماجان ورحت للحمام اسحل بروحي...
مدري احنه ندير دولاب الزمان
مدري دولاب الزمان يديرنه
سجى: -متوترة كلش البنات داير مدايري بس رغد ماكو...
-ولجن وين راحت الفرخة
زهراء: -فوك تبدل
-خايبات ماطلع تبديل خاف صار بيها شي امشن شوفنها...
-هسة تجي شبيج
نسيت السالفة من كالو راح يجي احنة عاقدين شيخ بس خطبة نسوي حتى تصير رسمية جدام الناس...
كمت وكفت اعاين لطولة دخيلك ربي شو بعدني اشوفة غثة وشايف روحة سلم على الكل واجة وكف بصفي ابتسم يعاين بوجهي كعدت وكعد عيونة علية همست بصوت ناصي...
-خير سالمين شو عينك صايرة فاسقة
-فاسقة بحلالها
-ترة هاي السوالف ماتمشي عدي استجن
-بس عوفي شخصية الشقاوجي بس اليوم عاد.
-شقصدك بسيطة انة اعلمك هذا كلة مو بعينك لا مكياج ولا فستان انوب لابسة وردي حسبي الله ونعم الوكيل عليك ليش هيج سويتني شقاوة وانة في قمة الانوثة...
-اي صح شكلج انوثي توب بس اسلوبج احممم صدك طالعة تخبلين
-جا شعبالك جانت العباية ضامة جمالي والا انة ملكة جمال
-بس على كيفج لاترحين زايد
-هاي الحقيقة عيني دشوف ايدي تلمع وايدك يكول داهنها بككو
-انة اعلمج اله اراويج الككو شلون شكلة.
-خاب شبيك اتشاقة وياك احسن مانضل ساكتين كلت الطف الجو
-احم اسكتي كلها كامت تعاين علينة هسة يكولون ذولة فاسقين
-فسوق بعينهم ان شاءلله
-وولج
-ها نسيت اسفة من حشة امك واخواتك واهلي هم
-جا شخليتي
-يلة يلة خلص ماطلعت هاي
-على كيفج ليش هيج مستعجلة ما ورانة شي
-ترة اكوم اكص الكيكة واكل منها واعوفك وامشي.
ضحك بصوت كلها تخوز بينة فضحنااا يرربي فضحنااا جدتي تعض بشفتها الي، شغلن الاغاني واجن اخواتة يركصن اعاينلة اشو داير وجهة يلعب بجهال اختة...
-خاب اكلك عاينلي خل اسولف
-سولفي
-شوف ذيج احسها غ...
انتبهت لروحي ذيج اختة مو وكت جفصاتي ابتسمت بوجهة اضحك جذب...
-صدك طالع حليو
-من زمان انة حليو بس انتي ما منتبهة.
كلبت وجهي ودرت عيوني اعاين للنسوان خالتة وامة وبنات خالتة هم جايات يركصن واخواتة بحثن اخر ذني شبعن ركضن لمن ملن هسة اجة دور نكص الكيكة...
شكد اكرة هاي التفااصيل احسها ما لازم تصير جدام الناس المفروض بس وحدنا وكلني واوكلك همزين ماغصيت بالگمة شربت عصير وشربتة لازم ايدي الترجف كل هاي اللحضات وثقوهن بصور...
خلصت مراسيم الخطبة جانت مختلفة وحلوة لازم ايدي يطبع قبلات عليها انتفض جسمي وعكدت حواجبي...
-شبيج.
-شواربك خشنات
-جا شحال لو يجيسن الترفات
وجهي اشتعل نار شبية هذا مو جان حباب درت وجهي اسحب بيدي مجلب بيها يامن يخلصني راح اموووت كلها تعاين علينة وتضحك يربي شهل فشل هسة لو وحدنا جا عرفت شحجي...
صاحو علية يروح وهو لزك اريد احجي وياها وحدنا فارس ماخلاة اشوفة حاضنة من ضهرة يحجي ويضحك ضربة ارفد على ضهرة ورجع خزرني يهز براسة كالت امة...
-خليهم سوة يحجون عن الدنيا ومابيها.
فارس: -خالة وراهم سنة يلحگون يحجون على عالم البرزخ هم
والله فارس كفو من ماخلاة هسة هذا شيريد ماحاجي وياي على اساس حل دمر خطتة الفاسقة
راحت العالم وصعدت فوك ميتة تعب...
دخلت للحجرة وذني وراي يصورن...
-شو رغد ماكو ولجن كلبي راح يوكف امشن دورنها.
رغد: -طلعت من الحمام دموعي على خدي اخ ياحركة كلبي الماتنوصف ليش من دون البنات لا خطبة ولا حنة ولا عرس ابسط شي ماحصلت علية لاگتني عايشة تباركلي غطيت من المستحة لو ميتة ولا عشت هذا اليوم هسة شيكولون استعجلو لو ماتحملو اكيد راح يحجون علية...
رجعت لحجرتة ضميت روحي بالفراش لكيتة مبدلة دموعي يجون بخدي شلون إلى عين واطلع الهم.
متندمة ومستحقرة نفسي ومشاعري شلون السلمتهن لشخص تافهة ونذل كل الصار وياي بسبتة لا والنوب تزوج شدعي عليك ماكول بس غير حسبي الله ونعم الوكيل...
واكفة فوك راسي تحجي بصوت مكسور ينعصر كلبي من اسمعها تحجي...
سجى: -رغدة صكد تزوجتو شو هذا كلها باركتلة احجي صكد...
لارغد يجذب شني شبيج معقولة هيج لاخطبة ولا حنة وحتى عرس ماكو مستحيل شني ماتصير...
-يكول البدلة تلبسينها بغير وكت.
-هسة شبيج تبجين حاجيني شمسوي المفلوك ناخذج للدكتورة اذا بيج شي
-مابية شي سجى اطلعي استحي
-خوش طالعة
سمعت الباب ينطبگ كعدت على حيلي ابجي بحركة احس گلبي تگطع رجعت لفلفت روحي واندك الباب ضليت على وضعي ماتحركت انفتح وصاح...
-طبي ماكو شي
-ها عبالي جا شو نايمة
-رغد اكعدي امج تريد تباركلج وتحجي وياج.
غمضت عيوني بقوة ونهضت روحي باركتلي طبيعي وكعدت توصي بية روحي صعدت للسما من الحرگة ونزلت عدنا هواي ناس بالعشيرة تزوج بدون عرس ولا شي بس ليش هواي حجي براسي...
طلعت ورجعت غطيت راسي حسيتة كعد بصفي...
جاسب: -باجر الصبح تنزلين كاشخة خوش...
مو احجي وياج انخرستي...
رفع الغطا من راسي: -عوفني افتهمت
-اي خوش دريت بس مالة داعي تبجين ترة ما آذيتج هواي.
-بس سوايتك هاي دمرت نفسي مو بس آذتني سنة وحده او اقل ليش اخذتني هسة
-ماتستاهلين تسوين عرس كل ما اقرا رسايلكم بدي احرگج بتيزااااب
طلع من الحجرة وبعد مارجع بنص الليل يلة رجع لف راسة ونام ثاني يوم مشة الوضع حالي حال اي عروس كرهت روحي بهاي الفترة نفسيتي دمرت ماطيق حتى روحي وهو تعاملة وياي على حالة استفزازي ويشمر بالحجي لعبت روحي منة...
شروق: -من بعد الصار وي رغد خليت ايدي على گلبي زعم انة هم اتزوج بدون عرس بس اطمنت لان رحمن واعدني يسويلي زفة رنانة...
خطية صارلي شكد ماحاجية وياة لو كاعدين سوة من ذاك اليوم الزمتنة سجيوة صارتلنة جرة اذن وهو هم مايرضة اروح لحجرتة...
رحت حضرت جنطتة وسويتلة كليجة خليتلة علاگة ودعتة من بعيد راحو كلبي وياة رجعت اخذت ماعون كليجة لنوف خطية امتحاناتها قربت...
تاكل وتقرا بالها مو يمي مركزة بالمادة عفتها وطلعت يم سجيوة تاكل باضافرها...
-شبيج تخبلتي
-لج هاي رغد تغيرت مو نفس كبل حتى ماتحجي وياي
-اي غير لان تزوجت ويمكن تستحي
-ها هيج تكولين
-اي جا شبيها بس تستحي تسولف
-هم صحيح
نزلت جوة اعاون سفانة بالشغل، الوضع يمشي طبيعي ماكو شي جديد غير الصار بهلفترة سجى مونستنة بسوالفها وي ارفد مخلصينها عرك ومزامط ولا جنهم مخطوبين سدت الموبايل منة واحنة خربانين ضحك...
سجى: -خاب شمالجن تضحكن
هدى: -حرام عليج ولج ليش هيج تحجين وياة
سجى: -مو خاف تطلع عينة شبيجن مو هسة من نتزوج ابدل اسلوبي خو ماضل هيج بس هسة لان حجي وتعرفن انة بالحجي محد يلحگني...
هدى: -اي صح مو مال لمسات وهمسات تصيرين جنج
صخل منتول
سجى: -امشي ولي من وجهي عابتلج
هدى: -رحت العب على لكيتة يبجي نزلت بالمطبخ البيت هدوء نسوان عمامي مايكعدن لو يرحن لاهلهن لو يسيرن وياخذن جهالهن وياهن شوية نرتاح منهن.
انطيت على لحبوبتي نوفة ورحت افرك رجلين جدتي حكمة تون منهن...
-اي اييي جدة منا ااااه بعد بعد
التفتت بسرعة على صوت الترحيب...
جدة نوفة: -هلا هلا يبعد حيلي اندارلك فدوة طگت گلوبنا عليك.
اجة يسلم عليهن ضال وانة اعاين الة متغير كلش عيوني دمعن احس گلبي تجوة من جزاني وماسلم علية كلت يجوز ماشافني كمت على حيلي اعاينلة بلكت هسة يشوفني ويسلم حط عينة بعيني وما سلم علية طلعت من المجان بكبرة حسيت الهوة ضاع بريتي شمعنة ماسلم علية شمعنى تجاهلني...
جينة مشتاكَين وبلهفة
اوتسد بابك علينه.
تجاهلتة مثل مامتجاهلني بس انة امثل الة هو صدك مايريد يشوفني ويحجي وياي بس لو ادري شمسوية حفظت كرامتي وابتعدت عنة هي فترة ويرجع يلتحق مايطول...
نوف: -بدت امتحاناتي الكل ينطيني طاقة اهلي بصفحة البنات للامانة البيت كلة من اطلع يلزمني يوصني اقرا الفاتحة لام البنين (ع) واسبح تسبيح فاطمة الزهراء (ع) مستحيل انسة وكفتهم واهتمامهم كلشي يجيني للغرفة حتى ملابسي ما ادري عنهن ومن ارجع الكل يسألني جاوبت لا حتى الجهال تسالني حبيت هالشي وانزرع بداخلي حب الهم...
خلصت امتحاناتي راضية عن نفسي بذلت اقصة جهد الباقي على الله ارتاحيت اسبوع وبعدها فتحت الموضوع الصارلة فترة طويلة بالي عايشة جانت اول وحده احجيلها ما عارضت بس بقة خوفي من عمي فايز او عمامي بصورة عامة...
انترس كلبي فرح ورجع الامل لحياتي وافقو على قراري وعمي فايز هو بنفسة قنع الماقانعين انطوني الضوء الاحمر ماصدك راح ابدي من جديد...
كلبي تجوة من زمان وتعلم على سالفة الفراك اخر يومين إلى وي ناس عشت وياهم اصعب ثلت سنوات بحياتي...
لا تندم على الماضي، تعلم منه فقط...
اجرام وانتقام...
موت على الابواب...
ارواح تغادر بألام فهل للقدر جواب...
سحلت روحي من الكاع الرطبة حالتي يرثى الها الدم ماخذني دايخة الدنيا تفتر بية رحت ادك على الباب بحيل مهدود سكتت ماكو جواب...
الموت ياربي الموت ماكدر اتحمل كل هذا العذاب طاقتي خلصت فتحت عيوني الذابلات اباوع لنفسي ادية زرگ من السلاسل جان رابطني بيهن رجلية طالعة كلهن كدم وراسي من الضرب موتني...
من يوم العرف بية اساعد الشرطة طلع روحي انواع التعذيب عذبني نفسي وجسدي تعبت هاي ايامي الاخيرة راح اموت بهاي الغرفة الاجرامية كم مرة متت ورجعت اعيش هالمرة ماعيش نهايتي...
وصلت لمرحلة حتى مادعي لروحي اخلص منة بلكي اموت جوة ايدة واخلص...
خليت راسي على الكاع المتربة ودموعي تنزل شريط حياتي يمر من كدام عيني من جنت طفلة ولهذا اليوم هاي الراحة طلعت من عيني صفح...
لتخاطب ملك الموت...
وتقول لة...
-هل تسمعني او تراني؟
ارجوكَ خذ روحي الى الجنانِ...
كل ما اتنفس اكول هذا اخر نفس بس يصير العكس ومو الاخير شكد بعدلي اتعذب غمضت عيوني اسمع صوتة يخابر ويضحك...
-ادري عرفتة وداعتك ضاملة ضمة تخبل تعرف بية احب افاجأ ومفاجأتي تخبل ههههههه ولا يهمك ضلع
استمر حديثة لوقت طويل شوية وانفتح الباب بقيت على نومتي شالي من الكاع وغسل وجهي بمي باارد همست بصوت ناصي تعبان...
-عوفني اموت ليش باخر نفس تنقذني.
-الموت راحة اريدج تتعذبين طول عمرج
-ههه حموت لا تخاف ما ابقى وياك طول العمر
-هسة اريدج تعيشين بعد وكت على موتج
-الله ينتقم منك اشد انتقام
-مامليتي شكد تدعين الله صدك لو يستجابلج جان من زمان نقذج او يمكن ما وصلج يمي...
-ماتدري شنو الحكمة من وجودي وياك الله وحدة العالم هههه يمكن تكون النتيجة لصالحي
-لا تتأملين زيادة قبل شوية تريدين تموتين.
نزعني ملابسي اشوف جسمي كلة ازرك وبنفسجي ماكو مكان بية بياض جسمي تشوة مستحيل هاي الاثار تروح يمكن يروح الزراگ بس الحرگ واثر اسنانة جنهن اسنان حيوان يبقة للابد...
لبست ملابسي ورجعت انشمرت بالكاع مرات يغمة علية من الالم والتعذيب اكعد مااعرف شكد نمت او شكد صارلي فاقدة سرداب عايشة بية مظلم مثل گلبة الاسود...
فتحت عيوني ماعرف بيش الساعه ولا اليوم ولا اعرف هسة صبح او ليل كلشي ماعرف...
الاكل يم راسي ماكدر احرك ايدي رجعت غفيت وفزيت بية يسحل بية طلعني من هالمكان غمضت عيوني اجة الضوة بيهن...
اخذني يركض بية ومسدسة بيدة احس بنفسي جثة مابيها روحي تنتقل من مكان المكان شمرني بالسيارة بقوة سمعت صوت عضامي بس ما تألمت كمت ماحس بجسمي...
بين الوعي والا وعي احس بالسيارة تمشي فجأة وكفت ورة دقايق حسيت بيدة تمشي على وجهي واني شبة فاقدة بس اسمعة من كال...
-خنتي ثقتي ردت اصير وياج بشر بس انتي اختاريتي اكون مجرم وياج
همست بكلام كوة جمعتة...
-هه خلي ابشرك بخبر اني ما اموت هسة بس قرب موتك ادرس على جثتك وامشي مثل مادست على روحي...
-تهلوسين ما الومج
رجع وشغل السيارة ماعرف شكد مر وقت وهي تمشي واخيرا طبگت نزلني لازم ايدي النحيلة ويسحل بية طحت بالكاع شالني وكعدني على صخرة اباوع بالمكان وادي صحراء جبال شنو من مكان وين احنة هسة...
عافني وراح مسافة اشوفة كدامي يخابر غمضت عيوني مابية حيل فتحت عيوني من سمعت سحبة سلاح شفت عادل من بعيد واكف وياة جان دلهار يفتر داير مدايرة وعيونة علية طكن عيوني من محجرهن رفع مسدسة دلهار وضرب عادل طلقة براسة كومة بالكاع...
حتى ماكدرت اصرخ من الصدمة ولا طاقتي كافية اشوف اخوي ابن امي بالكاع ودمة بطولة يرافس برجلية...
جنت جثة تشاهد فقط لحظات وصار الجو احمر من الرمي غمضت عيوني اردد الشهادة ماحسيت الا على شخص يكوم بية ويصيح...
باهر: -سرررى انتي ززينة
ماحركت اصبع بس عيوني فريتهن بالمكان مليان شرطة وسياراتهم كومني الضابط باهر يدك على خدي ويمشي بية جثة بدون روح...
تركت ايدة من شفت رجلية بالكاع اجتني قوة خلتني اروح لذاك الصوب شفتة ممدود دمة بطولة وعادل بصفة والشرطة ملتمة عليهم...
لزمني من ايدي يمشي بية خلاني على راحتي بالاول راحت يم عادل گلبي تگطع داخلي ينزف دم بس خارجي جاف مايبدر منة فعل حتى دموع ماكو بعيني غمضت عيونة بيدي وهزيت راسي باسف هي هاي الدنيا الكتلت نفسك علمودها شنو الاستفاديتة هسة شلون راح تواجة رب العالمين بيا عين...
عيوني تحفظ المشهد براسي اشاهدة للمرة الاخيرة اخوي الجابتة امي بهذل نفسة وبهذلني كتل نفسة بيدة وكتلني وياة ياحجي يوصف حالتي...
لازم بيدي الضابط يترقب تصرفاتي كمت لازمة بيدة ساندة روحي علية وصلت لجثة لدهار وابتسمت بروح ميتة دست برجلي على جثتة وملت على الضابط باهر الله ينتقم منك ماعندي شي وياك ومبري الذمة حتى لايجي يوم ونتلقي يوم الحساب.
حسيت حرارة اخترقتني طلقة اي هاي الطلقة قادرة على ان تلحقني بهم طحت بالكاع وصرنة تلاثة استمر الرمي ماعرف منو راح يلحكنا...
انتهى الكابوس وانتهيت وياة...