رواية بين سلاسل العادات للكاتبة كفاية كاظم الفصل الرابع عشر
وصلني حياوي لبيتنة طبگ مسافة عن البيت ودعته بضحكة وتمشيت لبيتنة دكيت الباب انفتح رفعت راسي وانصدمت صدمة عمري شجاباهن يمنة وشيسون طلعن يضحكن وعادل وراهن خازرني عبرن مني التفت وراهن وصحت بصوت عالي.
-لحظة اووكفن.
التفتن علية يضحكن اشرلي بيدهن باي رحت وراهن وجلب بية عادل بقت ركبتي دايرتها عليهن خازرتهن طبگت سيارة عالية سودة صعدن بيها ورجعن سولن باي عقلي مدا يستوعب معقولة هنا ذني اخوات نوف لو غلطانة نترت ايدي من عادل.
-شعدهن يمنة ذني
-شعليج
-شنو شعلية بناااات ذنييي شعدهن ويااك
دار وجهة متجاهلني ولا كاني احجي وياه لزمت ايدة موكفتة دار وجهة خازرني بغضب عفتها وحجيت بهدوء.
-گولي شعدهن
-مايخصج.
دخلت للصالة روحي طالعة تخيلتهم عدهم علاقة انجن جنوني معقولة يطلعن هيج زين وهاي السيارة المن وين راحن لزمت راسي انسطرت هذا هم حض حياوي يبقن اخواته والناس تعايرة بيهن.
امي وابوي ماموجودين البيت فارغ بس هذا الغثة بية سمعتة يخابر وميت ضحك رحت اسمع شيحجي
ويامن.
- البطيءء باية باية خطوة خطوة وتنتهي اخر شي باااح طن طن طن مستشفى عقلي طن طن طن مريض نفسي هههههههههههه مو اني الاسكت ارجعها بالمثل اجربها الشعور والاحساس واللقب لاتنسى.
دير بالك على الحبايب يستاهلن شغلهن مضبوط
جربهن وشوف داريهن داريهن ترة فگرر للنخاع كل ماجان المبلغ جبير كل ما شغلهن مضبوط.
تحياتي سلملي على الباشا.
ضربت على خدي عزا العزاجن بس لايشتغلن بالدعارة الله يسود وجوهن بس مو اكيد دعارة اووف لعد عادل ويامن يحجي وبيمن يوصي استغفرالله شلون سالفة وصخة شوكت الله يفرجها واتزوج واخلص من عادل وشوفته.
صعدت لغرفتي واسمع صوت بجي طالع من غرفة نهى لزمت گلبي بخوف شبيها هاي الثانية الله اليستر من الجاي يصير فتح الباب لكيتها مفرفحة من البجي
ركضتلها حضنتها ارفع بوجهها.
-شبيج نهاوي عمري شكو خيرج.
تبجي وتشهك گلبي طاح بالكاع بس لاواحد مسويلها شي.
-نهى احد مسويلج شي نهى جاوبيني شبيج
رفعت راسها وجهها مطعون طعن ترقبتها بخوف
-شبية تريدين تعرفين؟
هزيت راسي ولزمت ايدها ترجف حجت كلام كطعت گلبي.
-كاعدة مكابلة الحيطان لا طلعة ولا طبة شنو فايدة عمري شبابي راح يخلص بين حيطان هالغرفة وياريت ولهنا وتنتهي مااعرف شنو وراي اخوج يمشينة بمزاجة محد يكلة على عينك حاجب قريت على مستقبلي السلام من بعد السمعتة.
-شنو سمعتي
-ماسمعت
-نهى لاتخافين كليلي شنو صار، ذني شعدهن يمنة
-نوف مسكينة راح تطيح بيها
دخل الرعب لداخلي شعدنة وي نوف هذا اخواي اعرفة مستحيل يعوفها بحالها بعدني ماحاجية ودخل للغرفة فززينا ثنينة وزع نظراتة علينة جلبت بيه نهى ترجف.
صار كدامها وثنة رجلة خلة ايدة على خدها رجعت ليورة خايفة عيوني تترقب بخوف حجة بهدوء تام.
-حبيبة اخوها الج عندي مفاجاة
بس صوت انفاسنا ينسمع رجع كال برائة.
-ماتريدين تعرفينها مو مسويها الج وازعل منج اذا محبيتي تعرفين
بلعت ريك وهزت راسها بدون لاتحجي
عادل: -راح ترجعين تكملين دراسة هالسنة
فتحنه عيونة ممصدگين لزمت ايدة وسالت بشك
-صدك تحجي لو تجذب!؟
-اني اجذب شكلولج عني
-يعني راح ترجع
كرص خدها وابتسم ابتسامة جانبية
-صيري عاقلة ويرجع مستقبلج راح ترجعين خامس مو رابع دبرتلج سنة حتى لاتكولين من ورة اخوي ضاعت مني سنة كاملة
ا.
ابتسمت بخوف وباوعت بعيوني ممصدكة الصراحه حتى اني هم مثلها متوقعت عادل تطلع منه هالطلعة
نهض من مكانة وكال.
-تعلمتي من الصار ما اريدة يتكرر بالج وفكرج وي دراستج، وين بالج؟
نهى: -وي دراستي
عادل: -السانج لايطلع زايد حتى لاتعمين على روحج تمام اختي الصغيرة. بالتوفيق
بقيت صافنة لمن طلع التفتت لنهى تبجي وتضحك حضنتها فرحانة واخيرا راح ترجع جنت افكر بيها وبمستقبلها.
-نهاوي معرفتي التفات واختها شعدهن جاياتنة.
كامت راحت يم الكنتور منطيتني ضهرها حجت بتوتر.
-لا اصلا هسة عرفت منج جايات
-يعني ماتدرين؟
-مانازلة جوة
-لعد شبيها نوف قبل شوية كلتي عليها
-مبيها شي بس اجت ابالي
معجبني وضعها متوترة وتطگط باصابعها متحط عينها بعيني گلبي ما ارتاح الها.
-بيج شي
-ها لا لا بس اريد اسبح لان جنت ابجي احس توصخت
عافتني وراحت شكيت بامرها اكيد تعرف عليمن اجن حتى ملابس ماخذت الها خوش سبحة هاي.
ثاني يوم التحق لدوامة واتصل بية حياوي كال بالباب.
رحت اركض شلحك ارتب رشيت عطر وخليت حمرة على السرعة وكلبت شعري واني ارركض فتحتة وصرت وراة سلم ودخل الاستقبال سديت الباب وحضنتة بادلني الحضن...
-صايرة وكحة
-ههههه بوجودك
تلمست لحيتة وبستة بخدة باوعت بعيونة وبستة بخدة الثاني صافن يرمش بعيونة لزمت وجها ابوس بية وصلت للشفة ابتعدت عنة رجعني مكمل مابديت بية بعد دقايق من سلام العشاق ابتعد وراد يطلع.
رجع ثاني مرة يبوس بوجهي ويشتم بية.
-ههههه اخذني وياك طول الطريق بوس بية شدكول
ابتسم مدنك راسة: -استري علينا
-اكيد اكيد
-طلع بيج كل البلة مبينة فقيرة
-بس وياك مو فقيرة والا بالحقيقة فعلا فقيرة
-اي صح مبين
-اي احمم l love you
-چا اني شدكولين عني
-شكول
-عاشگج وعاشگ لمعة عيونج مو بنية تنگطين ترافة وحنية
-العبببب شلون كلام يرد العافية
لزمني من خصري مقربني علية دك موبايلة ابتعد مني شوية سدة رجع ودعني.
-راح اروح للناصرية ديري بالج على روحج وداومي مو تضلين منتظرتني
-الله وياك ترجع بالسلامة حبيبي
ودعتة وراح ضل كلبي وياة رجعت لغرفتي كل شوية لازمة خدي لو شفتي شلون شعور حلو وخاصة من يكون عن حب...
-رراح نتأخر يلة فضيهااا
رغد: -: بس شوية على كيفج بعد وكت شمالج سجيوة
سجى: -ماطول الولد موجودين نروح وياهم
عفتها مخبوصة تطلع وتذب ملابس فتت من نسوان عمي الغثة يگصن من الصبح مايخلن واحد مايحجن علية محد سالم من السنتهن طلعت برة الهوى يضرب بالزرع منظر كلش حلو وكفت اتامل المنظر.
-ولك بالمثل اخي ماقصرت جزاك الله خير. لا الحمدلله دبرت وضعي ولا منيتة الكشرة ابن النعالة ما اريد اغلط. ممنون ممنون ان شاءلله الله وياك
ابتسمت وانة اباوعلة من جوة ليفوك شهل جمال شهل الاناقة معقولة هذا الاملح لابس بنطرون اسود وسترة وقميص اسود فاتح اول تلث دكم.
سد موبايلة ورفع راسة يباوعلي حكيت طرف خشمي وكتفت ادية دايرة وجهي. صار على صفحة متجاهلني ماكدرت اسكت تحمحمت وحجيت.
-لبس جديد وكاشخ اممممم.
-ارفد: شني تعيرين بية
-عليش اعير بيك بس اكولن راح تعرس لابس هيج
-لا تخافين ما اعرس عندي شغل
-وانت ياهو اخاف عليك تعرس شعلية بيك
-اعتذر منج ست
-عود خوش بس ماكلت وين
-شني سيطرة تشتغلين وين ومنين
درت وجهي كالبة عيوني اعيب علية غثيث فلا ينطاق بس ضل كاتلني الفضول وين رايح بهذا البس طالع بالباكيت المفلوك.
-دعائج طلع مستجاب الصدك استغربت ماعبالي بسرعة الله يتقبل منج
عكدت حواجبي وتخوصرت.
-عيد عيد شكلت ماسمعت.
-كلت ادعيلي
-مو انة احمد الوائلي ادعيلك شني لهست كلساع ادعيلي
-اي والله لهست بعد خطوات واخلص
-هاا
ابتعد يتمشى مسافة انطاني كفاة باوعت للباب محد رحت وراة وسئلت لازم اروي فضولي.
-شوف ادعيلك بس عليش كول شصار وياك
رفع عيونة يحدق بالسما وجكارتة بحلگة مشتغلة
-بداية زينة.
ابدي ادفرة واكلبة على وجهة على البرود الشايلة ردت احجي وكال.
-امشي طبي جوة لاتضلين واكفة بضهري روحي.
-على اساس انت منو حتى اجلب بية شو كلك خلگ واحد املح اجلح طاگة الفگر مخلصها يدخن ويشمر گطوف حتى القرد احسن منك يگطف موز...
سديت حلگي بيدي شكد اجفص امداني رحت اركض للبيت عيونة يخوفن مو خزرة هاي عدلت عباتي ورحت اشوف هاي الثولة الا اسحلها طفح الكيل. لاگوني فارس وسفانة لازم ايدها وهاي الثولة سايحة حتى ماتعاين لوجهة.
فارس: -كملي شغلج ودشي لغرفتج
-خوش.
-لاتحجين وي امج ولاتقهرين روحج محد يستاهل اسمعي منا وطلعي منا.
درت وجهي من باسها بخدها خرب يومكم وكتكم هسة بعد بعد استغفرالله التفتت علية من كال.
-هاي سجيوة هنا
-اي هنا بس ماعبالي انتم هم هنا
ضحك وباوع لسفانة خدودها صارن حمر ضحت وياهم وهزيت ايدي.
فارس: ترة بوسة زعاطيط مابيها شي
سجى: -اي صح هسه انة كايلة شي
فارس: -لا عمي وين كايلة المعذرة ست سجى
سجى: -معذور استوواذ فارس المذيع.
ضحك وطلعو سوى والله كاشخ كشخة بس عطرة ترس الهول هاي شلون سفانة عدها عادي يسولف وي النسوان وهو هيج حلو وانيق يمة لو انة اطلعة عمالة وي خلفة كرشة نازل حتى محد يباوعلة، دكيت الباب
علي رغدة.
-ولج يلةةةة يلةةة يلةةة راح اعوفنج
-لا اوكفي كملت
فتحت الباب وفتحت عيوني على جمالها واناقتها لابسة سترة سودة مو كلش طويلة وسط وجواها قميص اسود مخليتة جوى التنورة وكعب عالي خليت اصابعي بحلكي وصوفرت بصوت ناصي.
-عاااععع شهل جماال
-شكرا
-طالعة تشوقين شق ولا جنج انتي رغيدة جنج ذني امهات الاعمال
-ذني مالات نوف فدوة اغديلها عافتهن الي
گلبت عيوني وعضيت شفتي هسة انت وكتك لا إله إلا الله رافع حواجبة ويخوزر بيها فصلاها تفصيل دارت وجهها وبهتت ملامحها باوعت بوجهي اشرتلها امشي مشينة خطوتين وصاح بينة خلسنة خلس.
جاسب: -ووويييين رراااييحة بهذذااا لبسسج
سجى: -شتشوفها شلابسة تعلاكة لو للركبة.
: -انتي انجبي محد حاجي وياج عليج بروحج
هزيت بيدي ودرت وجهي اشتغل لعبان الروح شيخلصنة بعد.
جاسب: -روحي بدلي بساع
رغد: -يااا ليش شبية لبسي
جاسب: -كلمة وحدة ماتحجين تبدلين تروحين ماتبدلين ضلن هاي ضلتجن
رغد: -غيرر اعرف ليش ابدلة
جاسب: -مفصل جسمج تفصل كل شي صايرة بصفحة تريدين الولد تعاين عليج كوة مو
-استغفر الله
-لو تعرفين الله بدلي وابعدي روحج من الذنوب.
عافنة وراح فاتت امها من يمنه جلبت رغد بيها تكللها على المجسب عبالنة يطلع بيها خير كالت ببرود.
-بكيف ابن عمج انة مالي شغل مو زين منه وخلاجن تكملن
اموت من هاي الحجاية كل ساعة وكالولنة مو زين من عدنا مخلينجن تكملن يكول مخلينه نكمل بالجامعة الامريكية هسة هم نعمة ماحاجين بس ماصار هيج كل شوية واحد عايرنة.
-ديلا روحي بدلي تاخر الوكت
-ماااا ماااا ليش هيييج خرربوو فرحتتتي.
-هسة دمشي فررحتج بتنورة وكعب خرب حضنه ثنينه
مابيدها حل راحت تبدل متت قهر عليها تمسح بدموعها ويرجعن ينزلن السالفة مو سالفة لبس كل ما بيها كسر خواطر لبسه فرحتها ورجعت نزلت دموعها رجعت لابسة فستان.
-خاب وعلى يخبل عليج هي كوة الحلو حلو لو يلبس كونية
مسحت دموعها لزمت ايدها عاصرة اصابعها
-خايبة كافي لاتشمتين العربان بينة فوكاها كلهم متجمعين بالمطبخ هسة تخلينهم كلهم يحجون وتفرحين المجسب اعدلي خلقتج.
دخلنة لازمين بيد بعض اشتغل حجي الحياية
-من شفتجن هيج اجت ببالي سالفة
سجى: -خليها الج حبيبتي انة ماتعجبني سوالفج والصراحة انتي هم ماتعجبيني
-سجيوة ليش ماتحترمين روحج لو اكوملج
-تعاي حبيبتي كومي ابوسج من خدج وارجعي عاقلة
-لسانج رادلة كص بالقندرة
سجى: -قندرة سجينة هاي مادرينه بيها.
شلون يطلعن الواحد من طورة طلعنة كالبين الخلق لكينا فارس وارفد واكفين يسولفون اشرلنا نصعد ضلت حسرة بكلبي وين رايح صعدنا ليورة وهما صعدو ليكدام.
رغد بهمس: هذا الزلمة منين
-هذا ارفد صاحب الولد
-جا شعدة ويانة
-ترة هي مو سيارتج هم نزل وهم يدبج على السطح مثل ما احنا صاعدين بلاش حسنة جارية هو مثلنة
-يمة منج اكلتيني بكشوري
-جا غير حجيج ماصخ
-احتركت يالمجسب
-مو وكتة هسة
-لا وكتة مشيني بكيفة كلة من وراج.
-جا انة شعلية
-انتي كتيلي بدلي وانة سمعت حجيج لو ضالة ورايحة بلبسي جا كسرتة لخشمة اليابس
-لاتحمين زيادة تكسر خشمة ام الكمل
كرصتني من فخذي صحت بصوت عالي التفتو علينة متت بدمي ضلينا وحدة تباوع بوجة الثانية.
فارس: -شمالجن
رغد: -مابينة شي
فارس: -جا المابية شي يصرخ
رغد: -ها هاي بگة گرصتها ومصت دمعها وصرخت من وراها.
غطيت بهدومي ندستها تسكت راح نتخزة طول الدرب ضليت متحلفتلها على هاي الفشلة لا والنوب بگة خرب عقلج رغيدة وصلونا واول ماطبكت السيارة نزلت مشغلة المحرك على سرعته ما انتبهت للوراي.
رغد: -يا ولج شمالج تانيني
-ما تانييييج
-شمالج سجيوة تسودنتي علية
-اي تسودنت عدج اعتراض
-لاععع.
حسيتها تركض وراي وما ملحگة خففت من سرعتي شبية صدك تسودنت عليها صرنا بنفس المستوى لزمت ايدها نمشي على كيف محاضراتنة تبدي بثمانية ونص بعد وكت الهن.
رغد: -شكد احب من نمشي سوى هيج حتى لو خايفة من تلزمين ايدي تروح الخوفة
-دوم الزمج بس لا تخافين
-اخاف من ابتعد عنج كون نفس القسم
-كل واحد اخذ اليستحقة انة الانكليزي كافي وزيادة علية.
رفعت عيوني وبلعت ريگي شلون حظ عدنا بس لايطلع يداوم هنا شيخلصنة يا امة الاسلام سرعت مشيتي حيل حتى لا يشوفنة ولا تشوفة هاي الفطير تنلاص علينة.
-رغد: خاب شمالج تركضيين على كيفج شني تركض ورانة حرامية
-لو عصابة طالعة بوجهي ولا هذا الوجة اليجيب الطلايب
-شفتيمن ولج
-ماشفت بس امشي
وكفت اتنفس يمة فحطت الله لاينطي الحض الاغبر اذا طلع البالي صدك
سجى: -يلا روحي لقسمج ولا تختلطين بفلان ولا بعلان
رغد: -اي.
سجى: -گائننن من كااان
رغد: ؛ ياا شبيج شلگيتيني اسولف وي الرايح والجاي
سجى: -اذكرج مابيها شي حتى نكمل الذبحنا رواحتنا علية
رغد: -ان شاءلله
ودعتني وراحت لقسمها ضل گلبي يلعب وكل شوية متخيلية موقف شكل وين وصلتها لبالي ساعة اكول شافنة وساعة لا بلكي الله واهل البيت يطلع ماشايفنة.
حضرت محاضراتي خلصت ورحت لقسمها دمي فارر من شفته يم قسمها عين لساعته وعين للقسم جنة متاني واحد شافني وابتسم كلبت عيوني والله بية غمة ترس وجهة.
-هلو سجى
-هلا حسن
-اي شلونجن
-وانتتت شعليييك
-شمالج تصيحين بوجهي
-اصييح وبكيفيي حسسن روح منا ورغدة عوفها بحالها جدامك هاي الجامعة شكبرها شعرضها متروسه بنات ياهي التعجبك روحلها بس عوف رغدة
-جا انة شمسويلها
رفعت اصبعي بوجهة: -عوفهااا لاتخلييهااا تشوف جهرتك خوش.
عفته شايطة حرگة بدت المصايب من شفتة الله يعديها على خير ما ادري ليش كلبي ما يرتاحلة صح هو حباب بس ما اطيقة احسة مغلف وراة شخصية هالولد خرب باحساسي مو احساس.
نكتت عباتي وكفت متانيتها طلعت مبتسمة اخذته من ايدها وطلعت كبل.
رغد: -اكلج مو ذاك حسن
-يا حسن
-حسن شبيج
-لا حبيبتي يتراوالج
-اي صدك ياهو الياخذنة
-رحمان.
مرينا بالكافتريا بالبداية عبالي حانوت بس فارس علمنا على اسمه رحت اشتري منة ولاول مرة اخذت جباسة وعصاير وبطل ماي رحت اتحاسب وفتحت حلكي من كال.
-يصيرن باربعة ونص
-شني شو ماسمعت عدل
رغد بهمس: -باربعة ونص لاتنطرشين منا الطلاب
سجى: -جا خالي بيش حسبت جيس الجبس هو الواحد بربع وعد ام جار الله ثنين بربع
-الواحد بالف اختي
-الووواحد بالففف هلووو شفتنا سود عبالك هنوود.
رغد تكرص بية تريد تسكتني: -عوفهن الك اروح لم جار الله
سحلت رغد طالعة روحي وهاي تحجي علية
-فشلتينة شبيج هسة يكولون مجدايات
سجى: خل يكولون مجدايات جا محد مجذب هاي الحقيقة نجدي الربع من امي لو من هديوة تسحبلي من عبيس جا هاي مو جداوة
رغد: اليسمعج يكول ابوج فكر
-ابوي ماينعرف شعندة ماعدة الله اليعلم على شكد نايم
-اول مرة اشوف وحدة تحجي على ابوها
-ابوي الغالي شال نعالي ورگعاني بية.
-ههههههههههههه اذكرر اذكرر لج شلون مااتذكر ههههههه
شيسكتها بعد فضحتنه بضحكتها شهيرة اخذتها دفع اشترت من برة واجة رحمان اخذنة. وصلنة البيت ماينكعد بية هوووسة هاي التسحل ببنها اليبجي وذني اليشتغلن ويگصن بالوادم.
جدة حكمة: -هلا بيجن حبوبة الله يگويجن
-الله يگوي حيلج جدة
شگد حلو من جاي تعبان واحد يسلم عليك ذني يخوزرن بينة بدلنا وطبت سفانة بصينية الاكل.
-لك عاش عاش اغديلج سبع فدوات بت عمنا الغالية.
سفانة: -ادللي جم ثجى عدنة
سجى: والله انتي الوحيدة البلبيت كلة كفو
رغد: -ميتين جوع اجيتي بوكتج
سفانة: -ادللن بنات بث تريدن شي كللي
سجى: -ماتقصرين ام. صدك شتسمون ابنكم
سكتت مدنكة راسها وجها صار احمر: -اهوو ترة ماگلنا شي لو انتي كل كلمة تذكرج بل احمم احمم
رغد: -عود شني الحمم احممم
سجى: -هي احمم احمم يعني واحد يتحمحم هيج.
طلعت مستحية مدري ضايجة هسة انة شكلت تغدينا شلون غدة بعد طبخ سفانة اخذت الصينية خليتها على السنك اغسل المواعين. واذني وياهم شيحجن
-فرخة بغداد بعد هاي
-اي خية مامتعلمة على هذا الجو تكول اشوفكم كائنات غريبة
سجى: -ياهي هاي التشوفنة كائنات غريبة
-فرخة بغداد شني ماتعرفينها
-لا حبيبتي اعرفها والبت الها اسم شني هاي مال فرخة بغداد تريدن تلزگنة بيها.
-جا شنسميها هم نوفة حتى الحجية تبتلي بينة عبالها عليها مو عوزنة نوفة
سكتت اغسل ورجعن يگصن.
-خية تالي الليل اسمع العياط يمكن ماتنطية حگة
-يااا بعدهم عرسان شمالها ماتنطية جا يو مو هسة ماتنطية يمتها
-ويو تسمعين صوطة (صوتة) شعلوة وكل ساعة كاسرلة شي ماتجي وياه اضنها
-بعد بت بغداد ويمج الحساب هذا هم حضة
-من عرست ولجاي ماطلعت منةحجرتها حابسة روحها وبس احجي شي گامن محاميات الدفاع علية
-ياكلنج بكشورج خليها وسكتي.
غسلت المواعين بسرعة راسي انسطر منهن شكد يسولفن عفتهن يحجن ويتوقعن شراح تسوي رحيل گلبن عليها لكيت رغدة نايمة تشوخر شبسرعة نامت اخذت ملازمي ورحت اسال امي على هديوة ماشفتها سالتها ردت علية من ورة خشمها.
-وين تولي تلكينها بغرفة عبيس
جريت نفس طويل ورحت فتحت الباب مالكيتها ردت اطلع ورجعت التفتت بخوف اسمع صوتها تبجي رجعت ادور عليها حلكي يبس.
-هديوة
خاتلة بسد الكنتور مخلية راسها بحضنها وتشهگ.
كعدت بصفها حضنتها لصدري گلبي يدگ بكل حيلة.
-شمالج تبجين
ماكدرت تحجي من ورة بجيها رفعت راسها امسح بوجهها بالف يا على الا سكت عيوني على حلكها تحجي شي كبل لا يصير بية شي من ورة الهبطة.
تشهك ماتكدر تطلع جملة: -اتنفسي على كيفج اخذي نفس واحد اثنين اي عفية عفية
تنفست وانة انكطع نفسي: -راح يعرس
غطت وجها تبجي رفعت راسها ياهو هذا اليعرس بس لاتحب واحد هيج فكرت: -ولج احجي ياهو اليعرس
-عباس رااااح يعرسسسس.
بهتت ملامحي تنفست براحة وحجيت برود
-جا ياهو الكاضاة مايعرس وحد عن الناس ترة هسة المفروض ولدة بگدج
تبجي وتحجي بحركة: -موو بكدددي والله موو بكددي ترررة انننة جبيررة لييش ليششش راااح يااخذ هااي البايررة ليشش
فرفحت روحها من البجي متت قهر عليها شلون خليناها تعلقت بية لهاي الدرجة محد جان محسب حساب لهاي السالفة الوالد ماعدة شي وياها شلون باختي.
-بسج هديوة شتريدين منه خلية يعرس لازم انتي اكثر واحد يفرحلة.
-ليش لازم افررحللة يتززوج غيييرري وافررحله
-لاتصيرين مخبلة وتشهرينة تصيرين علج بحلوك الوادم وكلها تحجي عليج بذاك الحجي عبن انتي تريدين زلمة مو بحلج وتبجين عليج وحتى لو بحلج هم ماتخلصين
لزمت ايدي تتوسل بية ودموعها تهطل هطل
-حبااابة كليله لايتزووج حباابة
-شمالج مايتزوج بعدها دورة السنة مادايرة
-هو هو كال لديرة السنةة
-بالعافية علية.
جلبت بشعرها تگطع بية اريد الزمها ما اكدر تسودنت بيدي روحي راحت وانة اهدي بية خليتها بحضني ادك على ضهرها. دموعها بللت ثوبي.
-بعد ما ادش لحجرتة
-خوش
-ولا يقريني. ولايحجي وياي بعد مايعاين بوجهي
-ترة عادي واذا اتزوج يبقى نفس ماهو يقريج ويهتم بيج وينطيج مصرف عباس مايعوفج
-لا لا ما اريد اشوفة يعرس ولابس قاط
-كااافي شبيييج بيشش طااالبة الولددد
- راح يروح مني واضل وحيدتي مثل زهاري
هيج اصير مثلها.
نامت بحضني دمعتها على خدها شلون بيها اذا صدك تزوج والله تسودن. من كد ما مهتم بيها حتى من يقرينه تغار وتجي تجرة صوجنا ماانتبهنا وصوجه هو خلاها تتعلق بيه لهاي الدرجة ويدري بروحة ما اله رغبة بيها كزوجة اله.
سحبت روحي كوة خطية حتى وهي نايمة تشهك خليت مخدة جوة راسها وغطيتها ضربت على رجلي بحركة شيخلصها اذا هي حتى غرفتة مستحلتها تاكل وتقرا وتنام ماطول هو بالواجب شكول وشحجي الله يهني.
اخذت ملازمي ورحت للبستان تنفست براحة الهدوء يسكن الروح غمضت عيوني اخذ نفس بهدوء ضغوطات الدوام والبيت اثرن علية.
-الله يبهذلك عاااصم مثثثل مابهذلتتتني الله ياخذذك ويخلصنني منننك هسة وين اوديهاا ماتكلييي. ماتقصر عمارر بس لوين اجندوب تضل يمك. ادري هي مثل امك بس انة كلبي يتعلعل.
تفرج ويذبة الزمن علية ورب العزة ما انساها للموت الله يفرجها بس رادلها وكت وصبر مشكور خويي.
سد موبايلة دار وجهة شافاني اعاينلة حجة بصوت ناصي ودار وجهة كعد ورة الشجرة منطيني كفاة بيناتنة مسافة مو كلش بعيدة غلست عنة ولزمت ملازمي اقرا معدتي خبطت من شفت الملازم ملضومة لضم انكليزي شعوف وشقرا صخام الصخمني شورطت روحي.
-اذ اس هولجب لا، هوليجب استغفرالله شني هاي خل اعوفها اروح لغيرها اي اي ذي بروبببب يمووووة
يموووة خل ارجع للقواعد بلكي اشوة.
رحت للقواعد افتهمت بنسبة خمسة بالمية مخلية الملزمة بوجهي واتهجة تهجي شجابني شورطني انوب انكليزي شهكت من انسحبت الملزمة مني.
جكارتة بحلگة ولازمها بيدة يعاين بيها وكفت وجريتها منه.
-انكليزززي انكليزززي مو ياهوو الجاان شنيي شمضيع بملزمتي
عتها مني وصار يقرا بصوت واضح فتحت حلكي فهيت علية شلون هذا يقرا هيج قرة الكليشة الفوك ونزل يشرحلي القواعد.
-الوو وياي
-ها شني ياهو.
اخذتني الصفنة نعلت الله عليك يالشيطان تفصلنة مسافة قليلة رجعت ليورة.
-شني شو طلعت تعرف انكليزي وكلشي
-جا شكالولج علية جاهل
-لاعع بس ما عبالي هيج
رجع يكمل شرح الموضوع ضليت اعاين وياه بالملزمة وهو يشرح
-افتهمتي
رفعت راسي عاينت بعيونة شهل خرب روحي صفنت بعيونة دنك راسة حسيت على روحي واخذت الملزمة.
-اي افتهمت رحمة الله والديك
: -والديج
ردت امشي ورجعت تحمحمت: -شمخلص
-قهر وعرك
-ياااء
-وعلاءء
-التعلك عللل.
-معلول لاتخافين دومني وزماني معلول
عصرت اصابعي محترك گلبي هذا هم اسلوب الى متى اضلن هيج هسة ادعي على الولد ليش.
-وعلي ماجنت متگصدة الله ياخذني اذا منتبها لروحي من حجيتها ان شاءلله الله ما يعلك بس لاتاخذ بخاطرك علية
طلع جكارة ثانية ورثها ومشة مبتعد يدخن
-ولا يهمج ما ضالة بس عليج
ابتعد بخطواتة الا ان اختفى اعتقد راح لغير لصفحة لان بستانة جبير كعدت مقهورة افكر بحجية.
-عود هو ليش يجي هنا دوم. جا انة ليش هم اجي هنا دوم نشرد من الوادم ونشتم هوى نضيف يطيب الرية
رجعت اكمل قرايتي على حسب الفهمتة منه يبووو. النوب صار عندي فضول زايد شخل عقلي منين يعرف يقرا هيج انكليزي.
صار العصر رجعت كبل لايرجعون الولد وعمامي هم احصلي حجاية منهم وانة ما ناقصني لكيت رضية وعايشة يحجن بصوت ناصي وعايشة مقهورة وتحجي بحركة.
-خية حررت شسوي وياها ماتفعل لاتطلع وحتى اكل ماتاكل.
رضية: -طلعيها من الغرفة تريدينها تسودن مثل ابنج هو كوة صار زين
-متت موتااانيي هنووب مررتة اجيبها منا واردها منا ما تطاوعني وكل ما حاجيها تكلي ودوني لاهلي
-بعدها طفلة وبزر دلال هند مامخلية ببالها شي مداريتها مثل الماي البلصينية حگها تريدهم وين تلكة احسن منهم
-ماتلكة خية ماتلكة
جرت كرسي تكعد علية كملت بحركة وهي تضرب ايد بايد.
-صايرة هلكدوتها بس لاتنعاد ايام انمار وياها.
-كولي يا الله خية جا الصار وي انمار هين ذيج وين هاي وين الصار وين انمار ماينحجي
لمحتني سكت التفتت عايشة إلى ابتسمتلي بتعب رديتلها الابتسامة.
-اكول منين هذا العطر اثاري الورد متجمع هنا
عائشة: -تعاي يسجوة لية
-ها عمة كولي عد عيناج
عائشة: -ادري عدجن دراسة وما جاعدات هم وياجن شوفن البت احجن وياها طلعنها من الغرفة خلنها تتعودد عليجن.
-ليش احنا مقصرين مو كل يومية نروح يمها نكعد نسولف نضحك بيها نريدها ماكو مو ويانة يكول بغير عالم ومرة صاحت بينة وطردتنة حتى تفشلنة
رضية: ميخالف بعدها طفلة تحملنها بلكت انتن بعمرها تميل الجن
سجى: -اشو جانت تخبل تضحك وتسولف خو بفاتحة ابوها ماتت علينة تسولف ويانة بس هسة مدري شمالها
عائشة: يمة الصار وياها مو شوية تبهذلت بساع بساع عرسولها ماافتهمت شي.
رضية: -خية هم وصي ابنج وياج يدير باله علية ويخفف خل يخليها بالاسبوع مرة خاف البت متاذية من هاي السالفة وتستحي تحجي
عائشة: -جا هو مايعرف شمالة غصب هي الشغلة وهم كتلة خاف تاذيها لو متعبها يكول لا
رضية: -بعدها خية مامتعودة على الوضع الجديد اطيها فترة تتعود وبلكي من ترجع لمدرستها تفرح
عائشة: -ان شاء الله والله شايلتلها هم.
عفتهن ورحت لغرفتها دكيت الباب اكثر من مرة ماردت فتحت الباب على كيفي الغرفة ضلمة هندس فتحت الضوة ودورت بعيوني عليها طاحت عيني عليها مگرفصة روحها بالزاوية وغافية.
تمشيت على كيفي رحت يمها نايمة على الكاع الباردة لا مخدة ولا غطة شلت مخدة ورفعت راسها خليتها علية بهدوء وغطيتها. سادة ايدها بقوة بيها زنجيل طالع نصة ضامتة لصدرها تنهدت بقهر حالتة حالة شعرها مغطي وجها وخرته عن وجهها جان خانگها فزت تتلفت بالغرفة.
-اسم الله حبيبتي شبيج
-وينة؟
-ياهو؟
التفتت للمكان التباوع بية
-انهار وينة وين رايح؟
-هسة يجي بالشغل.
بلعت ريك تباوع بالغرفة دنكت عيونها لايدها ابتسمت وباست ايدها رجعت لوضعها جرت الغطة وغمضت عيونها بقوة.
-طفي الضوة وياج
-كافي ماشبعتي نوم
هزت راسها لا: -اطلعي اتحركي لازكة بهلغرفة
-اممم
-تؤ مو وضعية هاي كومي يمنه بغرفتنة
-ما اريد
-زين نجي يمج احنة
-تؤ
-ليش
-راسي يضل يوجعني من الحجي
-زين روحي يم سفانة انتي مو تحبينها
-اي بس ما اريد اطلع
-تطلعين للبستان
-ما احب
-لا حول ولاقوة الابالله.
الحجي وياها مايفيد اجيبها منا وترجع منا طلعت منها واجو الولد كلهم بس انمار ماكو اعاين لعايشة تلوب ماخذة الدرب راجعة منا لمن رجع انمار حضنتة بلهفة باس راسها وضلو يحجون صبيت غدة للولد ورحت نمت طفيت.
طاقة سلبية بكل ركن من اركان الغرفة روحي متروسة خوف قلق توتر رعب احاسيسي غريبة صعبة اميزها ماعرف شكاعد يصير وياي كلشي بروحي جاي ينقتل مابية حيل اسوي اي شي حتى حجي ما يعجبني احجي ممددة بزاوية الغرفة ملفلفة نفسي وصافنة بالفراغ جسمي منمل ودكات گلبي مخربطة احس اكو خلل بجسمي بس مدا اكدر اعرفة شنو.
الغرفة ضلمة روحي صايرة تحب الضلام إلى جانت تنرعب من تتخيل تطفة الكهرباء واخوانها يعوفونها حياتي صارت ضلمة مابيها طعم.
انفتح الباب عيوني ترمش على البطيء فتح الضوى صارت عيونة علية حفظ مكاني قبل يدور بالغرفة الا يشوفني غمض عيونة وذب نفس اجة باتجاهي غمضت عيوني منزعجة من الضوة اسمع خطواتة الثكيلة حسيتة كعد يم راسي رفع الغطا وتلمس خدي.
فتحت عيوني على كيف اباوع بملامحة المتروسة تعب وحيرة خلة ايدة على گصتي يقيس حرارتي
-انهار
-يمج
-ليش تعوفني هنا
-ماعايفج وحيدج البيت بية عشيرة ياهو اليعجبج احجي. وياه اطلعي للزرع للبستان ليش ضاالة هنا
-احسن
-مريضة
-تؤ
-بدلي بين ما اسبح
-وين تاخذني
-اشوف سالفتج
كام راح للكنتور طلع ملابس ودار وجهة علية
-كومي
-ما
-ليش
-تعبانة
-لا اله الا الله كومي لا تعبيني فوك تعبي يلا صيري سباعية.
نهضت جسمي مكسر ومنمل صرت افرك بية اريد الخدر يروح اجة يمي باوع بوجهي واخذ ايدي يفرك بيها.
-شبيها ايدج
-منملة
-هسة تصير زينة اذا النهار كلة نايمة شلون ما تنمل
بقة يفرك بيها مدنكة راسي ما اريد اباوع بوجهة نفسة بوجهي حسيتة ابتعد رفعت عيني طلع وسد الباب كوة كمت رحت للكنتور بغير نفس يوم عن يوم اصير اسوء شكاعد يصير وياي.
عيوني تفتر بين اشكال وارقى موديلات الملابس ميعجبني شي مالي نفس بيهن ماحركت ايدي وجربت شي بس اباوع بعيوني الذابلات.
تنفست بقهر ورحت للمراية عفت الكنتور مفتوح وجهي ذبلان هالات سودة جوة عيوني شفتي بيضة يكول طالعة من المستشفى لميت شعري المكوش استحيت من روحي شلون باقية بهيج شكل هاي لو امي هيج تشوفني شتسوي بية شنو هذا الاهمال.
رحت اسحل بروحي طلعت وقميص ابيض وبنطرون جينز اخذت وياهن منشفة ورحت للحمام وكفت بالباب منتظرتة يطلع طول هواي رجلية صارن يوجعني من الوكفة صارلي هواي ما واكفة هيج.
دكيت الباب مرة مرتين فتحة لابس بس الشورت درت وجهي مدنكة راسي العب برجلية بالكاشي وجهي اشتعل نار
انمار: -تعاي طبي
-تؤ كمل بسرعة.
انسحبت من ايدي للحمام سد الباب شهكت وفتحت عيوني بلعت ريك ورحت للباب افتح بية ايدي ترجف اخذ ملابسي من ايدي علاكاهن واني ضالة وي الباب.
-عوفية ماينفتح
وجهي يطلع حرارة ما اكدر اباوعلة وهو بهذا المنظر ضليت متجمدة استحي ارفع عيوني كطعت الهوى.
-اكعدي هنا
-اطلع لو تلبس ملابسك
-ثنينهن مايصيرن
جرني من متوني كعدني على الصبة رجفة تمشي بعضامي منعتني عن الكلام ردت اكوم رجلية ماتشيلني...
-اطلع حبااب عوفني شتريد
-اسبحج.
-اني اسبح اني
-خوط لوط شلون سبح
رفع ثوبي من جوة شهكت وجلبت بية اجة كعد يمي صرت اختض گلبي يرعد هز راسة وجر ايدي المجلبة بالثوب شكة من الطول للطول شهگت بصوت حتى مابية ارفع ايدي اخليها على حلكي طاقتي صفر ضليت بطرگ الاتك كوة حركت ادية لميتهن لصدري وخليت راسي بحضني.
وقف ليفة بالصابون وسحب ايدي يفرك بيها دموعي نزلت احس جسمي مخدر ايدي احسها صارت نار مشة بيها الدم كملها رجع يفرك بالثانية بعد ماطلع روحي كل هذا ومكدرت احجي احس ماعرف احجي.
-من العرس وليجاي مافاركة جسمج شجرالج ولج تسبحين بس بماي ماتحطين اليفة على جسمج.
نزلت دموعي ما اعرف شنو سر هاي الحالة الوصلتها مابيه اسوي كلشي اسبح بمي حتى شعري ابقية على لفتة ولا افرك جسمي اباوع ليدي صارت حمرة تلصف اخذ ايدي الثانية خليت النضفها على صدري.
-تشوفين الوصخ ليش هيج شكراية تلصفين جنتي تسودنتي كليلي شبيج احد غاثج مسويلج شي ترة مسؤؤليتج علية.
مسحت دموعي ورجع يفرك مدنكة عيوني ما اكدر ارفعهن استحي اباوع بوجهة لو احجي وياة ضميت رجلية سوة طابكتهن فركهن لحد العكس ورجع باوع لصدري ضميت روحي بثنين ادية.
-ركبتج وصدرج بعد.
بلع ريك هزيت راسي بدون كلام صار بوجهي لزمني من زندي اشتعلت روحي بقربة خجل توتر خوف ردت اموت بساعتها غمضت عيوني نفسة بوجهي يرجف احس اليفة تمشي على كيف بركبتي ميلت راسي للصفحة الثانية شوية صار يفرك اقوى بسرعة خلص وفتح شعري ايدة ترجف ونفسة عالي فتح الدوش وغسل شعري على السرعة عاف الدوش مشتغل ولف روحة بالمنشفة.
-كملي وتعاي وراي بساعج.
طلع وسد الباب دموعي ماسكتت غفلت الباب ماردت اطلع مستحقرة نفسي كلش اني تالي عمري انحط بهيج موقف ليش هيج يصير وياي حتى صلاتي تركتها شنو سبب حالتي احس اعصابي ميتة اضافة للشعور اليراودني.
خلصت سبح لبست ملابسي ولفيت شعري بالمنشفة دخلت مدنكة راسي رحت للميز طلعت مشط وزيت كعدت بالكاع وجهي دايرتة على الكنتور ودموعي تنزل بدون سبب، انسحبت المنشفة بهدوء من شعري اخذ بطل الزيت زيت شعري وصار يمشط بهدوء.
هادئة مايبدر مني صوت ولا عندي ردة فعل لشي كلبي اذاني ينغز بية.
-سواد اليل وشعرج ثنينهن يتعبن
ذب حسرة بصوت عالي لميت رجلية لصدري وضميت راسي بيها دموعي تنزل بهدوء وبدون صوت حسيت روحي بغير عالم فزيت من حركني فاتحة عيوني وفحطانة كلبي يدك بقوة وايدي ترجف باوعت بالغرفة جر وجهي بين ادية مسح دموعي بابهامة.
-اصبريلي بس اسبوع ما اخليج هنا
-اي اي طلعني منا ما احب هاي الغرفة
-حتى انة ما احبها خسرت كلشي بيها.
سحبني لصدرة جلبت بية بقوة
-لاتعوفني
-ابتليت بيج شجابج علية
-ليش
-زدتي الحمل تعلاوة احير بيج احير بروحي شلون بية وشلون تدبر
-الله كريم ادعي
-الله يخلصج مني بس هاي الاكولها
-بس تعوفني عادل ياخذني يضربني.
غصيت بالبحجي تلمست ركبتي ودموعي نزلت مر الكابوس البشع براسي فجاة حتى بالحلم لاحگني تخوفني ما اخلص منك.
- شجابج علية لو ماهذا المريض
-صح صح مريض ويخوف حتى بالحلم خنگني.
خليت ايدي على وجهي ابجي بصوت مسموع احس من ابجي ارتاح بس بالعكس اذا بجيت اتاذة بعد ما اسكت ضامني لصدرة بقوة يهدي بية مسح وجهي واخذني يغسل وجهي الدنيا غروب رعب بداخلي بهذا الوقت
انمار: -توضي
-ما اريد
ابتعدت عنة خزرني وهمس: -عليج الدورة
بلعت ريك وجهي اشتعل نار ما رديت علية رحت للغرفة كعدت على السرير افكر شوكت اخر مرة اجتني بطني خبطت من حسبت الها صارلها تلث اسابيع فايتتني.
دخل للغرفة ينشف وجهها بيدة سوالي بحواجبة شكو رحت يمة اطبگ واعصر باصابعي شلون احجي وياه بهيج موضوع بلعت ريك وعيوني منزلتهن بالكاع.
-احجي شمالج
-هاي. صارلها هواي ما جاية ليش يعني
-ياهية هاي الماجايتج
رفعت عيوني وجهي مشتعل نار اعتقد ماوصلتله الفكرة صافن بوجهي يفكر.
-هاي الشسمها مساع الكلت عليها
غمض عيونة وابتسم ابتسامة جانبية
-اي الحبابة شمسوية
-تاخرت صار هواي
-وانة شيعرفني كلي لامي تعرف
-استحي انت كلها.
-عود خوش
مشة يطلع مصلاية التفت باوع بوجهي صفن مثل اليتذكر شي وجهة انكلب احمر رجعلي لزمني من زندي وجهة بوجهي ويحجي.
-يمتها تدنيتلج
سكتت صافنة بوجهة ما اعرف جواب لسؤالة
-احجييي ولج يمتتتها شني ما ادررري بروحي اخذتج
-شنو شبيك
كلش خفت منه ضاغط على ايدي ابتعد لازم راسة ويفتر بالغرفة كعدت بطارف السرير وعيوني تفتر وراة دوخني ضرب على راسه بقوة وصار كدامي.
-ما ماخذج متاكد اي مستحيل. جا ليش؟ ها ليش؟
-شنو اليش شبيك انت
سحبني من ايدي لازگني بية فتحت عيوني بقوة ونفسي اعتلة يمشي ايدة على ركبتي كزبر جسمي صحت بالم من عضني بيها ارفع براسة اريدة يبتعد عني وضعي تخربط كوة واكفة على طولي اريد احجي صوتي اختفى.
-ءءءءء انهارر كاافي، لا لا توجعني لا كافي مو هيج اخخ اخخ شبيك مامااا.
دموعي نزلن بالم تمادة كلش احس جلدي انشلع ابتعد عني وجهة منگلب كلاب صدرة يصعد وينزل جسمي كلة يرجف رجلية ماعانني وكعت بالكاع ودموعي تنزل خليت ايدي على ركبتي صايرة نار تحرگني.
ثنة رجلة كبالي رفعت عيوني اباوعلة بحقد بعدة ما حاجي وضربتة راجدي على حلكة فتح عيونة بقوة ولزم ايدي لاوي اصابعي سديت عيوني من الوجع وصحت بالم.
-اخخخ ايدييي انعلللل ابووك عووف ايديي جلببب حقييررر.
عصر حلكي بيدة اباوع بوجهة ماجنة نفسة انمار الحباب حجة كاز على سنونة.
-تجاوز لا تجاوووزيين اوول وااخرر مررة تغلطين لو تمديننن اييدج
ابتعد مني ابجي وامسح بعيوني ردت اكوملة وانتفة مثل ما انتف عبدالله من جنت بس حيل مابية وين جنت وين صرت. لزمت اصابعي اعدل بيهن.
-تزوجتج حتى احمييج مو اذيج بس انتي تجاوزتي
-منو التجاوز اني! شبيييك ليييش تجذببب هااي فووكاهاا انتتت الشلعت جلدي هاي ركبتي.
لزمت ركبتي احسها تنتگ غمض عيونة وصار كبالي يحجي بصوت ناصي.
-من اكلج تدنيتلج لو سويتلج شي هذا قصدي مثل هيج سوالف يعني بركبتج اسوي هاي الحركة لو بغير جسمج من احجي ثاني مرة اعرفي شقصد يعني صارت لمسات وشغلات بجسمج
بلعت ريك وابتعدت منة سحلت روحي وكعدت بمكاني ماالي صوت بس بداخلي صريخ والم.
-الحمدلله عبالي حبلتي وساعتها احير بزماني.
جان يحجي وياي ماجاوبتة هز ايدة وراح يصلي علكت عيوني بالسگف ماعرف شكد مر وقت شهكت من سحبني صاير نااار.
-اذااا شفتتج كاعدةة هناااا احتااارر شسووي بيج اطلعلج وجهي الثاني اخليج حتى هاي الحجرة السودة ماتلفينهاااا اطلعيييييييي برررررررة
جفلت من الخوف فتح الباب ودفعني خليت اديناتي على اذاني طبگة بقوة اجت امة تركض تسالني على الصار حرف واحد ماكدرت انطق بس ارجف حضنتني تبوس براسي.
-سودة علية ولللللك نمررر لييش هييج وي البتتت
سودة بوجهي خالسج خلس
اسمع صوت طبة قوية بالغرفة عيني على الباب كلها ملتمة تباوع تمنيت الموت ولا هذا الموقف اجن البنات يتراكضن اخذني من حضن الحضن غسلن وجهي وشربني مي واني على شهگة وحدة...
سجى: -طگااااج گوولي طگاااج حتى اروح اررفسس بطنة مسويننن رواحتهممم زللم يطلعون رجولتهم بالضرررب العاارات
هدى: -فضحتينة ولج اسكتي غير نفتهم منها مطگوگة لا
نوف: -لا لا.
سجى: -همجي ملطلط خرب غيرتكم الزلم كل همهم يشبعون غريزتكهم ولا تكول طفلة رغيرة اهم شي هو وراحتة تفوووو عليهم واصيرر جلبة اذااا تززوجتت
سفانة: -ثووتج ولجج لايثمعون
-طبهم ستين مرض شوف شمسوي برگبتها
كلها تباوع كاشات وجوهن غطيت ركبتي ومسحت وجهي بيدي الترجف رفعت عيني بلعت ريك وجلبت بثوب سجى من سمعت صوتة. واكف بعتبة الباب سادة سد دشداشتة البيضة ياخذ بيها هوى المروحة صوت سبحتة بذني.
فايز: -هاي البداية يبت بغداد ضلت عليج السكايط لمثل انمار تحميج من سوء افعالج لو ميتة ولا مخليتة يعقدج عليج.
ضحك بصوت وهز راسة.
-عقدتي على خسارة شبابج
صارن البنات كدامي من جفت علينة يصيح بصوت عالي ارجف وابجي حسيت كلبي راح يوكف مجلبة بالبنات عبالي راح يكتلني جاي علية.
-لييييششش تدددخللللل بحييييااااتي عوووفننني عووووفنننني مررررتيييي لا تحجييييي ويااااهاااا
شييييي معليييييك بيهاااا.
-ههههههه تخاف تطيح من عينها سودة بوجهة امك
من الخوف والصياح الصار بينهم غبت عن الوعي
كعدت جسمي تعبان عبالك كاعدة من غيبوبة مو نوم مطيت جسمي متكسر باوعتلة ابتسم بوجهي كعد بصفي وصار يمسح على خدي ولا جنة قبل ساعات بارود جان.
-شكرر
عيونة حمررر وشعرة مخربط شكلة يكسر الخاطر
بلعت ريك وعدلت كعدتي لزمني من ايدي.
-يلا كومي.
ماسالت مشيت وياة يحرك بية لبسني شالي وكعدني جاب حذاتي لبستها واخذني لازمني من ايدي فتنه من عدهم خاتلة بسدة.
-يمة ماتتعشون
-مشكورة برة ناكل
-بالعافية
-الله يعافيج
طلعنا برة الهوى ضرب خدي باااررد ريحة الزرع لطيفة غمضت عيوني اتنفس احس جنت بسجن
فتحت ايدي اضحك.
-مو اكلج اطلعي لاتحبسين روحج. تعاي وياي.
اخذني من ايدي يمشي بية الدنيا والكمر مضوي العتمة نمشي بين الزرع البارد وكفت اتنفس بصعوبة احس اختنكت رفع راسي اباوع بوجهة نفسي ضايع
-سدي حلگج اتنفسي من خشمممج لا لا سدي حلگج
سدية من خشمج اي اي
اسحب النفس بصعوبة مجلبة بيدة دقايق الا استقر
-باجر حضري روحج اخذج للدكتور وضعج ماعاجبني
هزيت راسي موافقة صحتي يوم عن يوم تتراجع راسي موتني من الوجع كلبي ينغزني تنفسي نحولة بجسمي اعصابي بايدة مابية اشيل طاسة المي.
طلعنة للشارع سيارة بيها بدي قديمة مطبوكة على التراب بقيت واكفة بمكاني.
-هاي الصفيت بيها من ورة الكو العندي ضيع تعب سنين صعدي اصعدي
صعدت بصفة بالصدر رغم هي قديمة بس بيها عطر طيب عبالي وصخة خليت راسي على الجامة والهوى يضرب بية. حسيت روحي بنص اخواني سجاد يريد يسوق وحياوي ميقبل مهند يخلونة وره هو وعبدالله وطول الطريق يحجي عليهم يريد يكعد بالصدر واني اضحك علية لان كاعدة بالصدر.
-اريد حياوي
-باجر يمج.
-كوول والله
-هه والله
طرت من الفرح صرت اضحك واغمض عيوني واخيرا راح يجي احس روحي صارلي سنة ماشايفتهم حتى معاني وجوهم نسيتها باوعت لانمار اودعة بنضراتي بس يجي حياوي اروح وياة بعد ما ابقى هنا لو شيصير اريد ارجع لحضن امي ولعركاتنة
-واخيييررا
-شمالج
-هيج.
سديت حلكي لا احجي وتخرب علية طبك السيارة الضوى صاير بوجهة نزل واشرلي انزل نزلت وراة يسلم على رجال صاحب كشن يشوي كباب بقى يسولفون اشرلي اكعد رحت كعدت ورة ضهرة.
-روحلهم خالي انت سالفتك بطية
-لا مامنها بعد ودو علية جنت اريد اروحلهم
-اخبارك واصلتلهم
-وصلت ينعل الحض المصخم
الرجال يشيش كباب وانمار ابتعد يدخن.
-لاتوضج وليدي تنحل
-ما ضل شي ان شاء الله.
خلص جكارتة واجة كعد كبالي الشارع فارغ اصلا الكشك مايمة محلات ماصاير بمكان عام بجول عيوني تفتر بالمكان.
-ماكو محلات هنا
-لعد شلون الناس تجي تشتري منة
-معروف عدة معاميل
اجتة اشعارات فتح تليفونة بقى يراسل كمت من مكاني اباوع للرجال شلون يشيش بالعشرين شيش كباب مسوي زين المن مسويهن اذا محد يمر بالمكان رحت افتر بالشارع طويل جاي عدل يخوف المكان
بنص زرع.
-شكرااااية تعاي هنااا لاتبتعددينن اكوو جلاااب.
رجعت خايفة كعدت يمة كام حضر الاكل وخلة كدامي كباب وتكة وزلاطة وطماطة وبصل شوي
رش سماك على الكباب منظرة يشهي.
اكلت شوية وكمت حسيت معدتي تريد تكلب
-ها شمالج
-شنو مابية شي
-لدالي روحي اصعدي بالسيارة لاتاخذين برد.
الجو برد رحت للسيارة كعدت بمكاني اباوعلة ياكل بشهية يكول ما ماكل اتذكرت مامتعشي خطية باوعت بالسياارة طاحت عيني على السويج بية مدالية بناتية اخذاها بيدي عطرها فواح يمكن هذا العطر التارس السيارة الها اي والله الها.
مداليا قديمة ماعرفت شنو تركيبتها تشبة لعابة عفتها عقلي يربط تصرفات انمار وكلامة وياي من يكلي لاتدنين صوبي .
-يحب اي عندة حبيبة واني خربتهم خربت علاقتهم يمكن.
عيوني دمعن تخيلت حبيبتة وشكد يحبها حتى ما يخليني اتقرب علية باجر لازم ارجع لبغداد مستحيل ابقى وياة شلون اكمل باقي عمري وياة اكعد الكاه ماكو ويرجع باليل ينام شفت منه هو هذا الزواج.
كاعدة مجتفة ادية وكالبة خلقتي اترقبة يخابر شوية وطبكت سيارتين عاليات سود خفت عبالي عصابة نزلو شباب شي لابس زي عربي وشي مدني تسالمو وياة سلام حار محاضن من واحد الواحد منين ذولة.
تفرقو على الطاولات ويسولفون ويضحكون نزل الرجال الهم اكل شبية هذا طالع وي اصدقائة لو مطلعني التفت علية سلم عليهم واجة علية فتح الباب وصعد.
-اخذني الوكت تروحين لمجان حلو
-لااااا
حجيتها من ورة خشمي بس اليوم اشوف وجهك بية
اخذ راحتك ماضل شي.
-اشو كلبتي خلقتج
-ميخصك
-لعد يخمن
ضحكت من كال لعد غريبة بلسانة ما لايگتلة
-الدرب شوية طويل بس المكان يستاهل.
سكت خليت راسي على الجامة نعست كلش ولو اني مخلصتها نوم نمت ماحسيت الا بفراشي الدافي رجعت سحبت الغطا على وجهي مديت ايدي كالعادة ماموجود اكيد يم حبيبتة.
غفيت وفزيت على صرخة عالية كعدت مخروعة صريخ بالبيت صرت ارجف رجلية كوة شالني فتحت الباب كلها تصارخ كلبي وكف النوم بعدة بعيوني عبالي جاي اتحلم كابوس لو حقيقة تمنيتة كابوس ولا هاي الحقيقة الدمرت حياتي.
اريد الزم واحد واستفسر منة ماكو كلها تتطافر حتى الجهال رحت للبنات يتصارخن.
-شكو شصاير
التفتت على صوت رجال يعيط طلعت روحي مسحوبة مني دخلو الولد يتصارخون مثل النسوان
متت بهاي الساعة عقلي طار واحد حاضن الثاني ويصرخ بس اني واكفة وحدي واكل باضافيري
شهكت من شفت انمار حضني وصاح بصوت عالي شگ گلبي وگلبة.