رواية بين سلاسل العادات للكاتبة كفاية كاظم الفصل الثالث والثلاثون
الخير يخص والشر يعم مقولة بمحلها اليسوي شي مو زين وغلط مو وحدة يطيح يطيح عشيرة كاملة.
الصحبة بهلزمن ماتنراد ولا الميانة الزايدة بس الناس متجاهلة هلشي وماتدري من ورة سالفة لو حجاية تنكال بالغلط تروح نفس وتنهدم عوائل.
باحد المقاهي القديمة في محافظة الناصرية يجتمع الشباب ليقضوي وقت للتسلية والترفية ليدخلو في نقاشات خاصة بحق احدهم لتحدث جريمة قتل...
اخو مرت حمزة قتل صديقة لانة عيرة باختة وبلحظة غضب قتلة بطلق ناري و راحت نفس بسبب حجاية...
انهزم القاتل وهزم عائلتة بس اكيد اهل المقتول مايسكتون ومثل مانعرف كلنة يحركون بيت المجرم ويدگون بيوت اقاربة.
عادات انمدت من سنين ولا زالت مستمرة ليومنة هذا
الليل كلة الرمي فوك روسنا ميتين من الخوف اذاناتنة تطورشت بلة احنا مايصير علينة شي بس ولدنا خاف ينكتل واحد منهم وتصخم وجوهنا.
خفت كلش نخسر شخص من عائلتنة واكثر اشخاص مايتحملون اخبار صادمة هما الاكبار بالعمر حبوبتي الضغط مجلب وياها وحالها مايبشر بخير تلطم وتصيح على ولدها.
عمي فايز مانعرف عنة شي لحد الان مات عاش قلق ورعب وصريخ شني ذنبنة احنة النسوان شني ذنب الاكبار بالعمر والاطفال مرعوبين يبجون محد يفكر بذولة مالهم ذنب...
البنات حاضنات نوف الگلبها راح يوكف من البجي والرجيف يمكن احنا متعودين نسمع دكات بس هي لا.
كلش تخبلت بيدينة.
نحير وين نروح وجوهنا مصفرة قطرة دم ماضلت بينة لا اكل ولا شرب حالنة مايسر العدو محد جان من زلمنة موجود البيت بس النسوان والجهال بية.
خلص هاليوم الصنفناة من اكثر الايام الخفنة بية تدخلت ناس واخذو عطوة من اهل الولد وبعدها يصير الفصل مثل مامعروف.
رجعو عمي فايز مايكدر يمشي لازمينة منا ومنا حلكة انعوج وايدة هم بنسبة قليلة طبعاً هذا حالة من سمع الناس تعايرهم والمصيبة الصارت.
دخلوة لحجرتة ماطلع منها بعد علة العلاجات والمغذيات.
البيت استقر نوعا ما بس القلق والخوف بعدة مترسب بينة واكفة اسوي ريوك واجت نوف عيونها حمرر والشعر منفوش بعدني مامتحركة صوبها وصارت تصيح وتبجي.
-ررجعووني لبغداااد رراح اتخبببل من وررة مشاااااااكلكم...
راسا طاحت بالكاع مغمي عليها هلبت بس تخاف تفقد ندك على خدها ونرش على وجهها ماي وماصحت اجت عايشة شالتها لحجرتها ورحنة وراها.
فتحت عيونها ورجعت لفت روحها ونامت ضلن البنات يمها وانة نزلت اشوف المصيبة.
ناس رايحة ناس راجعة جاي ماي يبوو ساعة السودة هلكنة تعب وسن اخذت هدومها وراحت لاهلها كلنالها وين مولية صاحت بيهن بعصبية.
-ماااتخلص الطلابة هسة هم يرجعون ويدكوون البيتتت لا اادورة يحركونة علينة مثل ماصار وي بيت ابو فهد واروح انة بيها
راحت لاهلها درب السد مارد خفتن وراحة محد حاجاها ياهو بحالها رجلها حاير بالناس التجي خطية تبهذل.
مر اسبوعين على السالفة ولحد الان محد عرف شني الحل وشرايدين بالضبط ساعة يكولون نريد الولد(القاتل) نكتلة والمالكيناة نكتل اي واحد منكم بدالة محد رضت على هذا الحجي من الناس الاكبارية والشيوخ وكالو مالهم حگ ولد عمة شعليهم والدم بالدم ماتنحل.
ابوي شيخ معروف ويواصل وتشوفون صارت الديوانية مالها مجان ولدنا يضلون برا يسمعون...
ناس تاخذ حجي منا وتوصلة الهم وترجع تردلنة الخبر هيج مضت الايام.
كاعدين بالمطبخ هم نحضر الجاي للخطار وهم يسمعن الحجي حبوبتي تدك على صدرها وتحجي بحركة.
-يهل ناس شفتو بعينكم الصار هذا اليضلم بشر ويحجي زور هذا اليتهم حرمة محصنة الامام يكول استرو يو شفتو مو تتهمون هاي الحوبة.
هاي الحجاية ماتطيح من حلكها من يوم ماصارت السالفة شتقصد ما افتهم، ورة شوية راحت العالم والتموو كلهم يتناقشون.
واكفة منطية ضهري على الكاونتر اشوف ابوي منزل راسة يسبح بسبحتة وحبوبتي صايرة كبالة حجت موجهة الكلام الة...
-شفتو يمة شفتو حوبة المظلوم شتسوي روح وحده راحت بدم بارد من وراة شوف ربك شسوة بية.
ساجت: -يمة شني سالفتج تشمتين بينة ترة احنة واحد والبنات بناتنة...
-خايب ييمة مو شماتة لجن هاي العدالة عدالة السمة يجي يوم وتكوم ام نمر راحت بسبتمن مو من وراة (القاتل) ورة اختة (مرت حمزة) سطرو تهايم عليها وهي اشرف من الشرف جان يدرون كلش زين راح تنكتل وتروح ملطخة بدمها برية لرب العباد وتشكيكم عدة واحد واحد...
ولكم لليوم ماتروح من بالي رضعت ابنها الصغير وراها بشوية انكتلت ويلاة ويلاة يمة ياعزيزة كلبي...
اهىء الحوبه تسحك وتلحك وتاخذ ثلثين من الحك تبطي بس ماتخطي.
راحت برية وراحت طيورها وراها وابنيها الجبير تخبل وهساع مشلوع كلبة محد يدري بية وين.
انة ما اتشمت لجن اذكركم بالصار حتى لاتفكرون تعيدون المضى ولاتصدكون اليحجي وحتى لو تشوفون بعيونكم الله يحاسب احسن هذا الانتقام الاكشر...
اختة انكتلت الله يرحمها بنفس الطريقه وهو هم مو هاي نهايتة وراة درب يمشية ويعثر...
كلها ساكتة تستمع الها بسكوت...
هذا الحجي وعاني وصحاني على زماني جنت احجي اي شي حتى لو ماشايفة بعيني على وحدة هسة اختلف كلشي ولازم منا وهيج ماحجي شلون ماجان...
رفعت ايدها اكومها رحت كومتها راحت لحجرتها وراها كل واحد طش لمجان...
اجتمعنة بحجرتنا خايفة يصير البالي ونتغيد بسلاسل عاداتهم الضالمة...
سجى: -شلون صرتي
نوف: -زبنة بس اريد اروح لعبت روحي منكم
سجى: -اصبري نوف محد يدري شني يصير واذا راح تعوفينة او لا...
نوف: -الى متى مو روحي طلعت حتى دراسة مانكدر نداوم
-ادرسي بالبيت وانتي بعد بكلوريا ماعليج اهم شي اخير السنة ونصف السنة بعدلها هواي بين ماتخلص السالفة لانة نداوم...
نوف: -الله كريم بس شوفن شروق وين
-مادري هسة اشووف
رحت ادور عليها نكت البيت نكت فص ملح وذاب وين طارت حتى البستان ماتروحلة لان زلمنة موجودين...
تعبت كلش شفتي يبست ومالكيتها اخر شي كلت يجوز بحجرة رحمن رحت اركض بدون سابق انذار جفتت الباب وطبيت تفشلت كلش ورجعت لكيتة يبدل.
- عبالي هنا اسفة
طلعت متفشلة والدمعة بعيني وين راحت الف فكرة اجت براسي كلت يجوز خطفوها اهل الطلابة شلون منين خطفوها مادري ادك على رجلي واعظ بصبعي حتى لا ابجي شكول والمن هسة يكولون شردت مثل اخواتها...
خفت تدري نوف ومن تسمع تسودن عليها صرت مثل بلاع الموس ماكدر احجي ولا اكدر اضل ساكتة.
التفتت امسح بعيوني علامات الاستفسار على وجهها
رحمن: -شمالج سجيوة صاير شي
-اي بس على كيفك مو تتخبل وتسويلنة سالفة مشية عليك الحمزة
-هسة غير تحجين خوفتيني
-شروق
-شمالها شروق.
-ماكو خميت البيت كلة مالكيتها
ملامحة بهتت صفن بوجهي حتى رمشة مايرمش اشرت بيدي جدام عينة.
-ولك رحمن مو وكتك احجي شي
-هاا
-روح دورها.
-وين اروح، اسكتي لاتحجين شي هسة
سكت يتصفن حتى ماتحرك من مجانة رمش بثكل وكال: -وين دورتيها
-بالبيت كلة
سكتنا من اجت رضية تكول: -يمة يصيحوك انزل جوة
رحمن: -هسة بس شوية
نزلت وضلينة حايرين كال راح اشوف السطح خاف فوك رحت وراة كلبي موجر دورنا مالكينة الها اثر...
مخلي ايدة على كصتة ملامح القلق واضحة على شكلة.
رحمن: -جندوب الزمن يلوعني عليها جندوب يضل يلوع بينة مو كافي بعاد وهبطات شوكت نرتاح.
-كول يا الله لاتخاف هسة نلكاها تطير خو ماتطير
نزل ورحت وراة الدنيا تفتر بية كلت هاهية راحت وين نلكاها بعدنا جاي ننزل ونسمع شهكة جاية من البيتونة التفتنة ثنينة راح يركض كبلي صعد للبيتونة
ضليت بمجاني متصنمة كلبي هاد من سمعتها تبجي
صعدت مهدود حيلي للبيتونة مالتنة حيل جبيرة ومخلين الغراض كلها بيها اثاري خاتلة ورة.
حاضنها لصدرة بكل قوتة وهي بس تشهك رفع راسها يمسح بوجهها ويبوس بعشوائية. كلة يرجف حتى صوتة من كال...
-الدنيا اسودت بعيني من سمعت بيج ماكو شروقي مو تعوفيني ديربالج والله اموت بفرگاج...
بس صوت شهگتها ينسمع رجع راسها لصدرة وكال بحسرة.
-شوكت ينرحم بحالي وتصيرين حلالي تدرين بذاك الوكت اصير اسعد واحد بالدنيا بس كون تنفرج.
انكسر خاطري علية هسة شطالب الولد عقد سيد بالحلال اووف اووف نزلت جوة يصيحن باسمي لا انوب يلتمن ويشوفن المصيبة...
نوف: -وين شروق
-هسة تجي جاي تشر هدوم
نزلت اسوي جاي بنص الهوسة نزار يحشش ويكول
-اكلكم انا احللكم الطلابة
جاسب: -اهوووو بس لاتحمة خايب ناس معكلة وماانحل منها شي
-تنحل يابة شني هسة المعكلة احس مني انا نزار سجيوة شسمة هذا التكولينة رباني مدري شني
-قباني.
-ولج سجيوة عرفتة عبالي كبل بكال بس طلع شاعر ويحب النسوان
سجى: -وين دريت بية يحب النسوان
-بحثت علية باليوتيوب شني ماعرف انا ديلا ماعلينة من هذا الخرط كتلكم احلها اطي جدتي حكمة ونوفة فصليات للعالم وتنحل وحب عمك حب عمك
جدة نوفة: -غسل يهل مغسول ويني وين الفصلية دولاب الدولبك شيبتي وانا اروح فصلية.
نزار: علكيفج نووفة مسينة العنب الاسود طحتيلي بذيج الدعاوي جا احسن نتكتل عاد اطيج الهم هو انتي جم سنة بعد وتودعين
-انتة كلتها بعد جم سنة واودع شيسوون بية
-يبوعون اعضائج اكلهم الكبد مالتج بمليار والكلية بلميار والكلب هم غالي والعظام والحواصل حتى عيونج اكلهم فصخوها تصيرون تجار من وراها ها. شلون تفكير حتى الجماعة يقنعون وينسون ابنهم
-خايب كون اكضك ادوس بفادك على هذا حجيك الماصخ.
-ديلا عود زعلتي جا خوش ننطي سجيوة فصلية الهم ويسكتون
سجى: -شهكت شهكة طلعت من نص كلبي درت وجهي فاتحة عيوني ع وسعهن.
-خفة حلگك ان شاءلله بيش طالبني انوب فصلية
نزار: -شلون نسيت الزلمة مايروح فصلية اطمني محد يطيج عبنج زلمة رادلة بس عكال
-زلمة عاد احسن منك
-احسن مني ام الوصخ يلة صبي الجاي
-مو اشتغل عد الخلفوك لاتتأمر
-ديلة ست اعصابج لاتزعلين علينة.
صبيت الجاي اخوزر بية اخذ الجاي وراح كعدت كلبي يلعب انوب صارت السالفة بلساني يمة بس لاصدك يطوني فصلية.
بعدني على كعدتي وطبو الولد صايرين نار كبريت يغلطون ويسبون سكتهم عباس وطلع موبايلة خابر واحد كالة تعال بسرعة مولاي سدة وصاح بية كمزني
-ااامشن روحن بدددلن بسساااع
الرجفة سرت بعضامي شني السالفة وين نروح راحو جاسب ورحمن جوة البيت يركضون وانة جمدت من سمعت الحجي.
جدة نوفة: -شصار ماتكلي.
عباس: -يريدون فوك الفصل نسووان ثنين ماخذين نسوانهم وهسة هما بالشمال مدري بغداد وبناتنة تروح فصلية الهم والله لو اعررف الدنيااا تنكلبببب ما اطي وحدة بيهن
الخفت منة صار الفصلية الا تسد الحلوك مو جديدة السالفة معروفنة عدنة.
جمدت لا اخذ ولا انطي ارمش بعيوني اشوف هدوة وشروق ورغد مرعوباات يعاينلي يريدني احجي بعدهن مامستوعبات الصدمة ولا انا شهكت رغد بصوت عالي من كال عباس.
-جاسب اعقد على رغد.
نظرات جاسب تريد تحرگها خلت ايدها على حلكها ودموعها نزلت دقايق بس وطلعت يسحل بيها ماكدرت اتحرك دخيلك ربي رجلية ماعانني بعد شلون يعيشون سوة وهما واحد ماطايق الثاني رجعت منهارة بكل معنى الكلمة وتصيح بحركة ودموع...
-عقدولي تززوجتتت ولج سجى عااايني تززوجتة
ماكدرت ارد عليها ولا احرك ايدي طلع رحمن لازم شروق من ايدها دقايق ورجعت مبتسمة تحاول تخفي ابتسامتها...
القدر هذا هو لو غيرة رحمة الله هاي لو شني معقولة الله استجاب لدعوة رحمن بهلسهولة.
مو كل البيت يدري بالصار لان كلمن بحجرتها درت ام رحمن لو صارت ماتشوف دربها تصيح وتفشر حارت شتسوي بهلاثناء اجة عمي سحلها يكفخ بيها حصلت المقسوم بعد حتى صوتها اختفى...
عيوني تفتر بين رغد الحالها انكلب وبين شروق الصافنة مامصدكة القدر جمعها بحبيب طفولتها مثل ماتكول...
علامات الحيرة بعيوني من اشوف هدوة ودمعتها طب نزار وعمي صاحو بهدوة ضلت بمجانها اجة سحبها من ايدها هنا تحركت وصرخت من حركة كلبي...
-وووين ماخذذين اااختي
-يعقد عليها نزار احسن ماترروح فصلييية
عقلي انشخط شني بهلسرعة تحدد مصير كل وحده بينة مجلبة بيها وثنينة نبجي ونصرخ طلع عباس عيونة يجدحن نار سحبها من ايد عمي خلها ورة ضهرة وكال بعصبية...
-ووين زهرررة خل نزار يعقد عليها واخلص منها.
نزار بس يرمش بعيونة بعدة مامستوعب الوضع ولا احنة صاحو بية اجيبها رحت اركض ماعرف شلون تحركن رجلية بس فرحت لان نزار مايعقد عليها
فتح حجرة انمار نايمات هنا ونوف بفرد غطة شلون اكعدهن دخيلك ربي وخرت الغطة من راسها وجهها حار وخدودها حمر نزلت دموعي على خدها وادك علية...
-زهرة زهرة كومي
-هممم
-زهرة يصيحوج اكعدي
-ولي كليلهم نايمة.
ما انطاني كلبي اكثر من هذا نزلت الخوف مسيطر علية شافوني وحدي ركض عباس الها شوية واجت تفرك بعيونها وتحجي...
-شبيك عبسي عوفني نايمة
-بس اعقدلج ورجعي نامي
-اهووو ولا تكولون واحد نايم وتعبان
اخذها غسل وجهها من حنفية السنك واخذها يلقنها
-كولي نعم قبلت وانت وكيلي
كلمات ماعرفت شني معناهن ولا عرفت اهميتهن وشني الجاي يصير عقدولها ورجعت صعدت وتصيح
-بعد لحد يجي يكعدني خووش انعس ماتعرفون واحد ينعس.
ماعرف انة جاي اعاين مسرحية فلم مسلسل لو جاي اعيش واقع ثنين ضلينة مصيرنة مامعروف انة واختي وحدة تعاين بوجهة الثانية دموعنا تحجي عن الجاي نعيشة...
انسحبت من ايدها وهالمرة عباس صاحت وراة امي ماراضية رد عليها ابوي ينتر بيها...
-خلصتت زلمنة ماضل بس عباس
جنت مطمنة لان عباس مو غيرة حسيت على روحي من كالت امي...
-عباس متزوج مابينة حيل مشااكل وي مررتة
-فترة يبت الناس مو طول العمر.
اخذها عقدلها راحت تركض جوة بعدة الفلم ماكمل بعد هاي الاحداث كلها ماتوقعت بحياتي راح يصير الراح يصير...
واكفة كوة على طولي وداخلي يرجف عاينلي ابوي وكال: -خل اي واحد من الولد يجي يعقد عليها
ضليت لا اخذ ولا انطي حتى الهوة كطعتة ردت اموت بهاي اللحضات يقررون ويحددون مصيرنا بكيفهم ولا يكول بشر والة قرارة...
عباس: -محد موجود بس فارس وبالدوام
ساجت: -شلون مصيبة هاي راح يجون الوداية خلصني لاانكسر بيها...
عباس: ششوف محد موجود اصبرلي لحضة اشوف ياهو ضال
عيوني غوشت كمت بعد ما اشوف شي جدامي هاي تاليتي يجي ياهو الجان يعقد علية ويضيع عمري يكولون موقت بس ماصدك لا رغد يعوفها جاسب ولازهرة يطلكونها من نزار ولا حتى هدوة يعوفها عباس مصيري مثل مصيرهن هم يجي واحد ويختم على اسمي...
بعدني حتى ما مستوعبة زين المصيبة اجة رحمن يصيح بية...
-يلة سجيوة كومي والعباس راح ترحين فصلية
-وخر مني لا احرك روحي عووفني.
-شني سجى صدك تحجين ماضل وكت راح يجي شيخنا
-شعلية بيكمممم وبطلايبكم شني فصلية انة شكووو بيكم امشي مني لا اااادج ررروحي
فقدت من الخبر السمعتة صرت املخ بشعري وخدودي مستقبلي يروح بلحظة اجة ابوي ولاول مرة حضني لصدرة ويحجي بحركة...
-وروح ابوي اطلگج بس عقد سيد حتى محد يدري بس فضينة لاتكسريني بيج.
-دراستي ومستقبلي ليش هيج تكسرني.
-مايتغير شي كلشي يضل على حطتة بيدي اخذنج لدوامج واطلكج بس كومي واعقدي بيمن تريدين احلفلج ماجبرج على شي...
نبرة صوتة حسستني بالامان وفعلا ماكو حل عدلت شالي ودموعي تجري حتى ماعرف ياهو اليعقد علية
رحت ورة الباب اعقد وانصدددمت...
صوت ارفد لا اي لا لالا مستحيل هو يكون العقد علية كلبي صار بلعومي ضليت جامدة بمجاني اجة نزار يسحل بية ويكول...
-صخام الصخمج يسجيوة لا موش صخام عليمن اشو استاذ جامعي العقد عليج جا نفس حظ اختج اخذها فوك مرتة
درت وجهي علية فاتحة عيوني على وسعهن الدم يغلي براسي مادري شني صار بالضبط يمكن حلم...
-صدك شصار منو التزوج
-اهوووو ديلا ولي بيج بخت الزلمة كال انة اعقد عليها جا هسة انتي فصلية...
عفتة ومشيت احس روحي بدوامة ماصدك الصار صعدت لحجرتنا فتحت الباب على حيلة كلهن يعاينن بوجهي رغد وجهها دم وتناشغ وشروق بس تصفن وذني الزوج مفهيات مايدرن شي رادت تحجي رغد وسديت الباب وطلعت اريد استوعب...
اروح منا وارجع منا اخر شي صفيت بحجرة انمار سحبت الجرجف ونمت بالكاع راسي صاير بية ازدحام من الافكار كلت حلم ومن اكعد ما الكة شي
بس للاسف الصار واقع...
مر شهرين كاملين على هذا العقد انحلت الطلابة بالفلوس والشيخ لاكي مجانهم ومطين بتهم فصلية
بيتنا استقر العدة دوام يداوم والعدة شغل يشتغل اما بالنسبة للصار الكل متجاهلينة ولا جن صاير شي
ام رحمن بعد الكتل الاكلتة سكتت وصارت مالها شغل بشريقة ولاحتى تبسمر بيها يمكن اتقبلت هذي الحقيقة والمكتوب مامنة مهروب...
داومنة كلنة ومخبوصين بالقراية يادوب نگضي التراكمات الصارت عدنة كاعدة اكتب تقارير واسمع صوت نوف هي ورغد تحجي عليها...
رغد: -كافي لاتتخبلين ماشبعتي من القراية شتحصلين كاتلة روحج ترة انتي بشر لاتطگين من كد ماتقرين
نوف: -ماعندي وقت والله امتحانات نصف السنة حتبدي لازم اقرا
حابسة روحها بحجرتها وتقرا حتى صرنة مانشوفها
اجن زهرة وشريقة الصايرة جنها وردة مفتحة وبس تضحك...
-ها ولجن شكو.
زهراء: -ماكو شي بس ناس عاشگة تفكر بالحب راح يجي
شروق: -صار رجلي ترة
زهراء: -جذابة
شروق: -وعلي رجلي
زهراء: -ادرري بيج جذااابة شو ماكو شي يمتها اتزوجتم جا انة وين جنت اهمداج جذابة
شروق: -يااااء والله رررحمن رررجلي عود صدك يمة صاار رجلي ليش ماتصدكيني
سجى: -ولج والله ندري بس لاتنجلطين ررجلي ما رجلي ليش مو ايدج احسن ههههههه
زهراء: -هههههههههههه جنت اضحك عليج العوبة.
شروق: -ماتستحن الله مايرضة تضحكن علية جي انا فقيرة ويتيمة
نزلت دموعها تمسح بيهن بيدها كمت حضنتها ادك على ضهرها...
-يبووو ولج مانضحك عليج نتشاقة
شروق: -بعد لاتتشاقن الله يشور بيجن
-اي هاهية بعد مانتشاقة اكلج صدك اليوم يجي رحمن مو
-يممممة هلاااا بنبض گلببببي
سجى: -هاي شني هاي شو مستهترة
-ها لا بس هيج
-عود من يجي مو تختلون وحدكم زهيران لاتعوفينها وحدها وياة
زهراء: -يعععع خاف يبوسها جدامي حتى ازوع عليهم.
صارن مالخ كوة فازعتهن نزلت ادور هدوة والنار تاكل بية شيصير لو درت وسن عاقد عليها عباس يمة غير تكتلها موت لحد الان ماتدري بيهم محد كالها عمامي وصو نسوانهم زين وصبرن اخاف انوب يكللها وتصير مصيبة جديدة...
طلعت برا الحوش ولكيتها مثل الفارة خاتلة بزاوية وبيدها دفتر صغير تقرا بية وتبجي استغربت ورحتلها فزت من شافتني ومسحت عيونها متوترة
-شمالج هدوة
-مابية شي.
كومتها من ايدها ومررت ايدي على ضهرها مديت ايدي للدفتر البيدها اخذتة منها اكلب بية.
هدى: -هذا حرز التاج نساة وراة
-عباس
-اي كل يومية يقرا كلت اقراة هسة بدالة
-عود صدك تحجين
صفنت بوجهي سحبتها من ايدها وطلعت بيها للبستان شفت مجان نضيف بسطت وكعدت سحبتها وياي صرنة وحدة مكابلة الثانية لزمت ايدها اضغط عليها...
سجى: -هدوة حددي رايج لاتمشين بهذا تفكيرج عوفي مشاعرج على صفحة لان موقتة صدكي انتي ماتحبين عباس تحبين اهتمامة اعيدها للمرة المليون تحبينة لان مختلف عنهم ويداريج ومهتم بيج من بين الكل بس صدكي فترة من عمرج وكلشي يتغير...
اليوم افتح الموضوع وي ابوي واخلية يطلگج لاتنسين عباس متزوج وعدة مرة بيتها ماضلة شي ويكمل لاتخربين عليها وعلى روحج...
حضنتها لصدري بس دموعها تنزل مثل كل مرة احجي وياها بهذا الموضوع ماكدر اخلي اختي بنار تحركها واضلن اعاين عليها الحب يحرك صاحبة وخاصة اذا جان من طرف واحد...
-لاتتأملين بشي تجاها ولاترجعين مشاعرج القديمة اعبرية وخلي حياتة جدام عينج هو زلمة متزوج ولو رضيتي راح تصيرين شريجة وهنا صدك تموتين هساع وسن ماتدري وشمسوية مو ادور تدري تكتل بيدها يو بسحورتها...
هدى: -ماريدة والله وحتى مافرحت من عقد علية بالعكس ادري بية زلمة ماخذ وسالفتي وياه منتهية كبل لاتبدي كل هذا بصوب وحبي اله بصوب ثاني راح اضلن احبة حتى لو اتزوجت وصارت عدي جهال واضلن ادعيلة بكل صلاة...
-اي غير مثل اخوج الجبير مو؟
سكتت ماجاوبتني وانفجرت بجي بحضني...
هدى: -والله ماادري شريد ولا اعرف احساسي شني مرات اكولن اي احبة مثل اخوي بس الاخت مايحترك كلبها على اخوها من تشوفة وي مرتة انة اغااار واحبة مو بيدي...
-من يمته صار هذا الحجي مو تكولين ما اغار علية شو هسة اختلفتي.
-اجذب عليجن اكلجن لا بس انة بالصدك ميتة عووفيني سجى عوووفيني محد يفتهمني حتى انة مافاهمةة روحي عدل رروحي...
-على كيفج يهدوة شليتي گلبي شل اووف اوووف شبيدي عليج
-روحي اريدن اضل وحيدي افكر زين.
-اخاف عليج ماكدر
-والله محتاجة اكعد وي روحي
مسحت عيونها وبستها بكصتها وكمت مكسور خاطري على اختي وحيدتي...
-انة راح اروح مو تبطين
-خوش
-ديري بالج على روحج
رجعت للبيت ينضفن ويمسحن والمعطرات اليوم جيتهم اجيت اساعدهن بالمطبخ مسويات اكثر من اكلة هاي كل ماينزلون تصير اجواء خاصة البيت كلة يفرح بيهم...
عبير صايرة مؤدبة كلش مالها صوت الصراحة مستغربة منها اما وسن ماحجي وياها بس هي تجيني جاي اغسل بالمواعين وفزيت لازمة كلبي...
-وتااالي وياك نزار راح تموتني
-ماعليج العار مايموت وانتي عار
-دنجب شفتني عاار ماغيرك العاار
-امدااج اي والله هذا استقبالج إلى ولاتكولين هذا ابو الجمال الرباني وين اختفى كل هالمدة ماسالتي عني.
-اي عود صدك شو ماكو.
-من يوم العقدت على هاي الصفرة صار الشغل دك على حتى ماعدي مجال اشوف مسلسلاتي هسة حاير بزماني اخاف الدكتور طارق مات فكرر هاي الصخلة فكررتني بس تصييح علي...
زهراء: -ووولك ياهييي هاي الصخلةةة والصفرررة
كوة كتمت ضحكتي عليهم عاكدة الحاجب ومتخوصرة بثنين اديها وجهها احمرر حار نزار شيكول عاينلي واشر علي...
نزار: -هاي الصفررة سجيوة ماكو غيرهااا جنها صخل دشوفيهاا هاي هم خلقة الله خالقها.
سجى: -نفس ما الله خلقك خلقني خاب يجذب عليج صارلة شكد يحجي عليج وانا اكلة حرام تتنمر على البت...
هدت علية تريد تكتلة كاملها لزم اديها ثنينهن بيدة ضلت ترافس وتشيل بروحها وتركعها...
-ااانة اعلمك تغلط علييية بسييطة نزيررر يبوووو ولج يمااااااااة...
نزار: -خاب وسماه.
خل ايدة على حلگها ورجليها ترافس بيهن داس عليهن برجلة ثبتهن بالكاع صارت مثل الصنم بيدة من كل صوب مقيدها انة شفتهم هيج لو خربت ضحك طحت للكاع وهما ضالين وضعهم صارو مثل التماثيل لايحركون ايد ولا رجل...
غصيت بالضحك من اشوفة صافن يعاين بوجهها وهي صاار وجهها احمرر منا خانگها ومنا مقربها علية من الضحك ماكدرت احجي وياة هو نسة روحة ولاجن يسمعني ولا يشوفني...
اجة صوت عباس من الباب راستأ وخر منها ورجع ليجدام انوب من التوتر راح سحبها وخلاها ورة ضهرة...
عباس: -شجنتتت تسووي
نزار: -والعباس مامسوي شي عود هي مرتي وماشايفهاا وهاي سجيوة شاهدة مامسويلها شي وداعت ديالى وزيدان هي اجت تعارك جنها صخل تزاكط...
وخرت من ورة ضهرة وراحت لعباس لزمته من قميصة دكلة: -يسميييني صخللل وصفرررة ترراضااها ااانة صخل...
عباس: -اشك حلگة اذا يحجي تعال شعدك وي اختي.
سحبة من قميصة وزهراء بحضنة خاتلة فلت ايدة منة وراح كعد على الكرسي مخلي رجل على رجل رفع حواجبة وكال...
-بكيفي مرتي اسميها نبعة حمرة صفرة ااانة حررر
بعدة مامخلص واجتة رفسة على بطنة شمرتة بالكاع ضل يرافس بيدة ورجلة ويتكلب بالكاع مغمض عيونة بالم...
-اخ بوية راح اموت انشگ طحالي حتى ماترهم اخلي غيرة لين ماعدي فلوس اااخ ااااخ متتتت بوووية رراح اموووت مصاريني تكطعن معددتي انكلبت صفح كلللة من وررااج الصفررة اررتاحيتي عميتي علية حتى ماخذتتج وجههج فكررر راح تترملين بعزز شبابج...
نفسة قل وجهها كل شوية تتغير تجاعيدة حرك رجلية وادية غمض عيونة وكال بحس راخي...
-صخلتي بريني الذمة الى اللقاء في الجن...
سلبح ادية حتى الهوة كطعة كلبي كام يدك بسرعة زعم مات خلت زهيرة ايدهاا على كلبة وعاينت بوجهي فاتحة عيونها بخوف عباس عافنة وطب جوة ضالين بس احنة يم راسة كل هذا الوكت وهو مامتنفس صارت زهرة تدك على خدة وتبجي...
زهراء: يمة نزير اكعد من ورراي متت يبووو انة اعتذر منك يبووو بس لاتموت والله الله يذبني بالنارر من ورراك اكعدد وولك اكعدد لاتمووت بعددك صغيير حرراماات...
فطس ضحك كمت منة طيح كلبي عبالي صدك صار بية شي يضحك بصوت عالي ويتكلب...
-دهرر فررك كوون عبالي صااار بيك شي
زهراء: -حتى انا والله
ضربتة على صدرة وكامت زعلانة وهو يصيح ويضحك...
-لاتمووت بعدك صغير حرامات احااا احااا ولج صررخي يبووو
زهراء: امداااك
راح للصالة وهو كام يعدل بروحة راح لشباك المطبخ يمشط بشعرة بصابعة ويضحك...
سجى: -شني اكلك شو جنك صدك متت لاتتنفس ولاتضحك عجيببب.
-صرت ممثل من كثرر ما اتابع مسلسلات احااا فدوة لروحي شكد اخبل
رجع يعدل على جام الباب ويكول: -هسة اروح اقدم على التمثيل واصيرن مشهور والبنات تركض وراي على جمالي اليكتل
سجى: -ياهو الضحك عليك وكالك حلو
نزار: -جا انة من زمان حلو جا ماشفتي هاي الفرخة شلون ماعت بيدي من جمالي اكلج هاي طلعت حلوة صح بيها صفار بس حلوة عجبتني بعد ماطلگها
دخل عباس مبدل ينشف بشعرة يخوزر بنزار كعد على الكرسي وكلة.
-نزار حضر روحك بعد شوي تلطك اختي
نزار: -ااالله واااكبررر تحرررت فلسطين
-وسم مو جاي احجي وياك لاتضل تمسلت احنة من البداية كلنة موقت
-جا خوش طلك وراك انة اطلك
بهلحظة طبت هديوة شافت عباس ضلت جدامها ضلت جامدة كام من مجانة مطگگ عيونها لزمها من زندهاا عيونة تفتر بملامحهاا...
عباس: -شمالج وولج شصااير بيج تردين تمووتين.
ماحس الا انجرت منة من شعرها شفت وسن هاجمة عليها طبيت افارع واطلع اختي وعباس فوكي طلع هدوة بس الجلبة شلعت شعرها بيدها ضليت فاتحة عيوني رافعة ايدها كلها شعر راجدي واحد ركعها بالحايط بقيت مذهولة من الموقف جمدت بمجاني
لزمها من راسها وطاحلها بالحايط لو ما نزار موجود جا ماتت بيدة كوة سحلنها منة صايرة فلم ماتتميز ملامحها حتى صريخ ماتصرخ من الخوف...
درت وجهي لاختي لحظة ادراك هي وراي شفتها مفرفحة من البجي ردت الوحها واخذها عباس يمسح بوجهها وبشعرها حضنها ويتلمس بيها ويحجي فحطان...
-ماكو شي ماكو
عافها ورجع لوسن صارن نسوان عمامي جدامة كوة حمنها اجة عمي يلة طلعه مادري شني من حيل عدها
كامت لمت هدومها وراحت لاهلها...
بعد مارجع للبيت ومحد شاف طولة طلعت مو نزلة علية كلبي تلوع شلون إلى كلب اشوفها تبجي الا وانوب تصيح.
-كلة من وراي صار هيج.
سجى: -لا اله الا الله فوك السوتة بيج
-رجلها لاتنسين روحي كليلة خل يطلكني العركة وخلصتتتت
نزلت فاير دمي رحت للديوانية احاجي ابوي لهنا وخلص مثل ماورطونة يطلعونة دكيت الباب محد موجود بس هو طبيت سلمت علية وكعدت قريب منة...
فر سبحتة خازرني ابتسم وكال: -شلونج سجيوة
-مو زينة وين وعدك وجلمتك إلى مو كلت اطلكجن وكلة موقت الصار اليوم عاجبكم
-لاع مايعجبني وهسة من يجي اخلية يطلك بعد شتريدين.
-وانة والبنات شني سالفتنة
-الصدك انتي اجيتي برجلج عود ردت احجي وياج واكلج
-كول شني
-نبدي بالبنات رحمن عرسة بس يتخرج لان هسة ماكاعد وماضل شي على تخرجة ورغد ماتلكة مثل جاسب ووليد عمها نعرسلهم سوة ونزار بعد هذا الشي راجعلهم يطوة زهرة لا مادري هم سالفتهم محسومة...
-وانة
-الولد انتي تعرفينة واحنة نعرفة منا وبينا بيوم الردنا نعقدلج لواحد من ولدنا المتزوجين مارضى وطلبج مني بس احنة مو بحال نكلج.
-شني تكلة بكيفك تكلة راضية بية انتتت شكلتلييي مو اطيتنييي ووعد.
-عد وعدي انة والولد رجع فتح وياي الموضوع وكال شتريد انة حاظر بعد انتي بكيفج ما طول عاقدين وطالبج ارضي...
-مو بكيفكم ما ارضة ومحد الة حق يجبرني على شي
-ها هي بس اطيني مهلة ماكدر هسة اطلكج الج شهر ورجعيلي جواب نهائي
-جوابي واضح ماقبل بية لا اليوم ولا بعد شهر
-الله كريم خل يخلص الشهر وارجعلة خبر.
دك موبايلة يرد علية كمت من مجاني اعصابي ترجف من الخبر السمعتة شني طالبني بكيفهم يطوني الة وشني هو خاطبني محبة بية...
ماخذة الحوش رادتة من الحرگة وين الكاك واحاجيج بسيطة عبالة ماصدك ارضة بية الاملح الاعرم ردت ادك على بالموبايل وارزلة بس كلت عيب وخاصة صارلي شكد ماشايفتة كبل العقد بشكد...
يامن يخلص اليوم إلى رحت التهي بالقراية وصاحتلي رغد اخذلها خيط صحت بيها طالعة روحي...
-بحاالج هسة انة والله بطراانة ماتشوفين ضييم الدنيااا فووك راسييي
رجعت اكمل مامنتبها لطريقة كلامي وياها صايرة ناار نزلن البنات اجو رحمن وجاسب اعاين لشريقة تصبغ باضافرها وتضحك هزيت ايدي وكملت مارفعت راسي لليل بحركتي اقرا واتعارك وي روحي...
رغد: -صار الجنت متخوفة منة الكابوس صار واقع ماردت تطول السالفة اكثر كلت ماطولنة بالبداية ومحد ماخذ الموضوع صدك خل احاجية...
بعد ما راح لحجرتة كلت خل احاجية دكيت الباب وطبيت كارهة روحي شلون احجي وياة...
جان يدور بالجرارات مادري على شني كال وهو منطيني ضهرة: -احجي شتريدين
-شوف جاسب
-عود شفت انطقي الجوهرة
-الموضوع مهم ليش تستهزأ
-ااوووف اووووف احجي
انرعبت منة اخاف احجي ويلزكني بالحايط رافعلي تك حاجب صرت اطكطگ باصابعي جتف ادية وكال
-تريدين نتطلك مو وافك العقد
-اي
-هههههههههههه تحلمين.
-ليش احلم مو احنا نعرف بعض لا انت تهواني ولا انة اهواك شلك بعد بية
عيونة صارن بكصتة سحبني من ايدي وعصر فكي بيدة عيونة اليجون بعيوني الباردات رجفة سرت بجسمي من همس باذني...
-لاتحاولين صرتي إلى هههههههههه
-بس انت ماتحبني
-اخليج خدامة إلى ولجهالي شدكولين
فتحت عيوني على وسعهن جسمي كلة يرجف اريد انطق حتى الحجي تبخر من راسي ابتعد مني منطيني ضهرة ضليت واكفة بمجاني مثل الصنم عيوني ينسدن وينفتحن هاي نهايتي...
فزيت من شمر جنطتها جوة رجلية راد يطلع وكال
-اغسلي هدومي ورجعي غراضي لمجانهن
نزلن دموعي مستحسفة روحي كل الصار من ايدي لو بذاك الوكت يكدر يحجي وياي بس هسة ماكدر احجي شي لان غلطت مرة وتسجلت بدفتر مدى العمر يضل يذكرني بهلغلط...
اخذت ملابسه اغسلهن وابجي نار وشابة بروحي دمرت مستقبلي بيدي هسة انة مرحلة ثالثة اووف هذا الغلط الجاي ترتكبة هواي بنات يمشن على عمة عيونهن مثلي...
مسحت دموعي من اجت سجيوة عبالها من وراها ضلت تعتذر وترجع ليورة: -باجر احفلج وشواربي هنا الكفيل اعذريني والحمزة جنت دايخة...
رغد: -ماصار شي شبيج اصلا مو يمج السالفة صدك حجيتي وي ابوج ماكلتي شصار
سجى: -بعدين ولج اخاف احترك بالزايد صخام بوجهك يالبالي ولا انت ماتحتاج الله من فوك مصخمك يبووو على حضي
رغد: -شني حجيتي وياة شكال عفية نريد نفصخ شلون اكلج سجى يعني عود صدك انة...
سجى: -سكتت دنكت راسها تلعب بصابعها ودموعها نزلت
-اهووو ولج انة محتركة تحركيني بالززاايد لييش لكل حادث حديث اسكتي هسة
-ماحبة ولا يحبني شلون تررهم ولج امووت والله بس يزوجونة
-يابة بعد وكت مو هسة يزوجون من يتخرجون يعني بعد سنة هوواي مدرري اقل السنة
-ادعيلي يعوفني
-انجبي خوش شلون بنات تتعايرن شبية جاسب
-صح مابية شي بس مانرهم وخاصة من بعد مادرة بعلاقتي صار يكرهني بالزايد و...
-اووف اوووف هسة كون جنتو صحبان من الصغر جا صرتو مثل شريقة ورحمن
-الله يهنيهم
-اكلج وين شررريقة
طفرت من مچاني درت اعاين البنات نايمات من وكت بس هي ماكو اكيد هسة يم رحمن استغفرالله مايكعدون راحة هسة حتى عرس ماكو خرب غيرتك رحمن امشي واغلط عليهن رحت لحجرتة ودفعت الباب وطبيت...
جمدت بمجاني وانة اشوف منظرهم حتى حيلي باد كام رحمن راد يحجي وخليت ايدي اسكتة لساني انخرس من شفت...