رواية بين سلاسل العادات للكاتبة كفاية كاظم الفصل الثالث عشر

رواية بين سلاسل العادات للكاتبة كفاية كاظم الفصل الثالث عشر

بطني صارت تصوفر ردت انزل بس خفت اخير شي نزلت البيت اضلم سنوني تضارب من الخوف شنزلني لو باقية بجوعتي احسنلي واخيرا وصلت للمطبخ دورت بالثلاجة ماعجبني البيها طلعت بتيتة وكعدت اكشر واحجي وي نفسي حتى لا اخاف.
-شوصلني لهنا من بغداد للناصرية اوووفف بعيدة
هسة عود صدك الصار شنو هاي الخربطة انخطبت لعادل بعدين لانهار وتزوجت هففف هسة وين راح عايفني وحدي مو كتلة اخاف ابقى بغرفتك.

-هسة تلكينة من حضن الحضن حتى عندة خلفة زنا مثلة العاارر.
التفتت مرعوبة واكف بالباب على وجهة شبة ابتسامة مرسومة.
-ها عمو رايد شي
فايز: -وين رجلج؟
-ما اعرف
-عاار مايفيد وياة
-هاا
-وجعاا
بلعت ريك وسكتت مكدرت اجاوبة رجعت اثرم واحسة بمكانة واكف.
-شلونة وياج؟
-زين
-بعده مخبل
-هاا
-ههههههه بعدكم جديدين تطلع الاخبالات بعدين
ايدي صارت ترجف شبية هذا وليش هيج يحجي شيقصد.
-لاترجفين مو زين عليج.

ذبيت نفس براحة من طلع اختنگت بوجودة حميت الطاوة وغسلت البتيتة سمعت صوتة يحجي.
-صوجي انة لو شامرك مو احسن
-اي والله احسن
اختفة صوتهم خليت البتيتة بالطاوة ورحت اشوف شكو.
-انمار: عوفني بحالي
فايز: -ما اعوفك للموت
-جا انة راح اعوفكم
-بيك خير سويها ولاتنسى مرتك وياك
-لا حول ولاقوة الابالله
-لا شافك الله ابن، روح لمرتك لاتصير اغم عايف جمال وراك اشبع بيها
-لاااا تددددددخللللللل.

-بالحلال اتمتع لو مايعجبك الحلال الا حررام
الضوة خافت اشوف اجسادهم وحركاتهم واضحة لزم انمار شعرة بقوة وصار يصيح.
-كاااافييي كاااافيييي رردتتت اااانتتتحرررر منننن وررراك عوووفنييي بحااالي عوووفنييي طلعتتت روووحيي الفففف مرررة ملييييتتت تعببببتتتت
كاااافيييي
لزمت گلبي بخوف شبية هذا تخبل ردت اروح بس خفت من عمي شوية وراح ركضت لانمار واكع على رگبة لازم راسة ويتنفس بقوة لزمت ايدة وحجيت بخوف.
-شبيك انمار.

رفع راسة عيونة مدمعة وحمرر خلة ايدة بالكاع ونهض.
-شمنزلج تالي الليل
-اسوي اكل
-شسمعتي
-مسمعت
درت وجهي عنة خازرني
-ليش ما تعشيتي
-محد كعدني نمت من العصر وهسة يلة كعدت ميتة جوع
فتحت عيوني على وسعهن اتذكرت الكاوة رحت ااررركض للمطبخ لكيت البتيتة محتركة ولازگة بالطاوة طفيت الطباخ وكعدت ميتة حرگة خليت ايدي على وجهي وانفجرت بجي شلون نسيتهن ورحت شكد غبية.
-شمالج ابوي حجة وياج؟
-لا
-جا شمالج
-احترك الاكل هسة شاكل.

-استغفر الله على هاي تبجين هساع اسويلج بس اسكتي
مسحت دموعي ورفعت راسي اباوعلة طلع بتيتة وكشرها دقيقتين كمل ثرم سوة بغير طاوة وجاب رغيف خبز خلة بيه خيار شياف رحت اكلب بالطاوة طفر الزيت على ايدي درت وجهي وعضيت اصبعي ميتة حرگة اي شي اريد اسوية مايرهم امدة حضي.
نزل الطاوة وسوالي لفة جبيرة خلاها أبتسمت وباوعت بوجهة.
-شكرا بس جبيرة هاي
-حتى تشبعين
مشة كدامي رحت وراة.
-وين جنت
-بالمكبرة
-يااا رحت للنجف شبسررعة.

-مكبرة بس مو بالنجف الرحتلهاا
دورت عيوني ممصدكة حسيتة يضحك على عقلي
-ليش تجذب عود هاي انت تصلي
-ليش حتى اجذب
-الميت ياخذونة للنجف يدفنونة هسة بابا بالنجف وخالو حمزة هم اخذوة هناك بعد ليش دكول مو بالنجف
-صح صح
دخل نزع قميصة كعدت على السرير اكل واحجي
-ابوك شبيه هذا ماعرف شيحجي
خزرني وكلب ملابسة يختار منهن
-شحجة
-كال عليك تروح للنسوان من وحدة لوحدة وحتى عندك اطفال هم.

شفتة صار عصبي رفعت ايدي: -هو هيج كال مدخلني اصلا اني مقبلت وكتله اصلا انهار حباب مو هيج حتى يصلي ميسويها
-انتي هيج حجيتي
-اي اي شعبالك اصلا ما اقبل واحد يحجي عليك
-ليش
-غير شريك حياتي نفس البلمسلسلات مكابلتك وكاعدة تساعدني احتاجك بكلشي انت بدال حياوي هسة شلون ما ادافعلك
طلع ملابسة وراد يطلع
-وين؟
-اسبح
-اخذني وياك لتعوفني وحدي
-لا والله
-اكو جنانوة هنا
-صح كدامج اني
اكلت من اللفة ولزمتة من ايدة امشي بية.

-ديلا بسرعة خلص مو تطول
وخر ايدي منة: -مساع جنتي بالمطبخ وحيدج جنج طنطل ماتخافين بس من شفتيني خفتي
-هو شردت من الغرفة تخوف
هز بيدة ودخل الحمام ضليت واكفة بالباب اكمل اكل
شفت ولد طويل خطف عيوني راحت وراة دقايق وسمعت صوت بنية تحجي بهمس.
-شتريد شبيك عوفني
رحت امشي على اطراف اصابيعي اشوف منو وشكو اكو مثل الزاوية بغرفة البنات واكف ومنطيني ظهرة والبنية صايرة كدامة طامها طم مايبين منها شي.

يحجي بصوت ناصي واني صايرة بصفة مباشرة لازكة روحي بالحايط بس يدير وجهة يشوفني
-عتيتي گلبي عتت
-رحمان كافي تدريني ما احب اللطلطة
ضميت حلكي بيدي هاي شروق ولكم هلا شكاعد يصير.
-حتى انة والعباس
-شبيك انت ماتفهم شكلتلك بعد احنا نسابة اتعود على هذا الوضع ترة مو احنا اول ناس هيج يصير وياهم انساني وباوع لاختي
-عمت عيوني لتباوع لعيون غير عيونج الشهل
-رحماااان
-روحة وكلبة وراحتة
-كافي لاتحجي خليني ارجع.

-ماسويلج شي حتى جيسة ما اجيسج بس اباوع بعيونج الشهل
-لوين تضل بهذا عقلك ترة باجر تزوج وانة هم
-اس اس ماكو لو نتزوج ثنينة لو نموت ننهززم اي خوش حل ننهززم
جنت اكل غصيت بالگمة من كال هيج كمتت حلكي راح اختنك ماردت يطلع صوتي حتى اكمل كلامهم
-شبيك تخبلت لو اموت ما اسويهاا لا رحمان لاتعيدها دووم
-جا شنسوي نتطشر وتطشر سوالفنة وحجينا
-خل كلشي يتطشر الا السمعة خط احمر.

-جا انة ناهبج لو غريب عنج غير ابن عمج ائذيج تتصوريني
-لا لا لا مايصير عوف السالفة كتلك انساني تنساني بس تعاشر غيري
ذب حسرة وحجة بصوت مبحوح
-صغار ونلعب عروس وعروسة افرج من ايدج وانتي تضحكين خجلانة جنا نلعب على فطرتنا وتالي كبرنا وكبر حبنا وعشگنا كلشي متوقع بس هاي الدكة الناقصة من اختج ماتوقعتها خربت سوالفنة المسطرينها
-حتى انة
-وين تريد توصل شتحس هسة عبالها احبها وانة ملك اختها شكد تلعب روحي منها.

-شوفلك حل بهلورطة
-ضاعت كل الحلول ضلت بس نشرد ونتزوج وبساعتها محد يحاجينة لان انتي عرضي مو غريبة
-لا لا ما اسويهاا
-ضل حل واحد عندي
-احجيلياة
-اسلمها بيد ابو فاضل يحلها إلى ابن البدوية مايرد واحد ينخاه
-اي ابو فاضل الكافل يحلها يحلها مايرد گاصدة عندة غيرة مشي علية اخيتة السبية يخلصنا ويشوفلنة جارة
-مايقصر باجر اتعنالة لا ليلي ليل ولا نهاري نهار كبلي شابة بية ناار.

جنت استمع الهم وعيوني مدمعة فزيت من شفت انمار جاي باتجاهي يشوفني بس مايكدر يشوفهم لان صايرين بالختلة مسافة امتاراذا عبرها يشوفهم طكيتها ركضة لزمتة من ايدة اجر بية للغرفة باوعلي مخنزر ويباوع بالممر.
-وين جنتي
دورت عيوني بالاتجاة اليباوع بية ماكو شي
-هنا
لزمني من فكي منزل راسة يباوعلي بشك
: مو تخافين شلون رايحة تفترين لو بس تشوفيني صرتي تخافين
-بزونة بزونة شفتها عبالي ميموو
-ميمو
-هاي بزونتي عبالي هي
-وتالي.

-شردت ردت الزمها بس مكدرت سريعة يكول طلقة هففف
جرني من ايدي كلبي وكف شكد يدقق ماشايفة هيج
قفل الباب كعدت اكمل لفتي الدم جامد بعروكي طفة الضوى ونام بمكانة كملت وضليت احوس.
-نامي
-هستوني كعدت ما انعس اريد اكعد على التلفزيون
-الطناطل راح تطلع هذا وكتها
-شبيييك
-نامي
-مااااا
-مابية حيل نامي اريدن انام
-لعد متنام كاضتك
-مااعرف انامن واحد فوك راسي نامي خليني ارتاح شوية.

حجاها بتوسل كسر خاطري مدري شبية تمددت بمكاني شبسرعة غفة ضليت احرك برجلية قربت الغطة لصدرة جان طالع ايدة مليانة اثار جروح كلة صغار كشيت وجهي بالم عود هاي صدك جروح لو شنو السالفة تلمستهن باصبعي فز من نومة خازرني بعصبية رجعت ليورة خايفة منة.
-شتسوين
-كلشي ماكو
دور عيونة بالغرفة ورجع باوعلي
-لاتدنين كربي نامي بصوبج.

لف نفسه بالغطة حتى راسة ضمة هزيت ايدي ورجعت تمددت ما اجاني نوم ابد اذن اذان الفجر رحت توضيت ورجعت رركض صليت ورجعت لمكاني اتكلب واحوس ماحسيت شوكت نمت لكيت امي تكعد بية...
-صباح الخير
باستني وحضنتني لصدرها
-صباح النور حبيبة شلونج
-زينة بس اشو لابسة وين
-راح ارجع لبغداد.

دمعت عيوني احس كلبي انعصر من حجتها كوة سيطرت على نفسي وبقيت اقنع بروحي هذا هو خلص عيب على لازم اتقبل الواقع خليها ترجع بدوني اصلا تعودو على غيابي بس اني شلون بية
-شبيج ماما مو احجي وياج
-وياج
-راح اروح
-الله وياج
-بعد حيلي صيري سباعية اعتمدي على روحج ما وصيج ديري بالج على رجلج
-اي
-عفية بنيتي سباعية ماينخاف عليج
-صح. بس مو تنسوني عليكم الله
كلت هاي الكلمة ودموعي نزلت مسحتهن وابتسمت.

-وصي اخوتي يمرون علية دوم مشتاقتلهم دزيهم اشوفهم ترة ماعندي غيرهم لايكطعون بية ابقى اختهم
-بس ارجع يجونج مايقصرون والدرب مو بعيد تجينة ونجيج
-اي
حضنتها بقوتي اشم بريحتها خل اترس ريتي حتى من اشتاق اتذكر عطرها اووف ياريحة امي الجنها مدري شلون. طلعت بدلت ملابسي ونزلت لاگتني شروق حضنتها بكل حيلي.
-راح اشتاقلج
شروق: -الله يصبرني على فراكج اخذتي فرحتي شلون عود كلت لكيت صديجة مونستني طرتي من ايدي.

-يلا ان شاءلله تجين يمي وغرفتج يم غرفتي تصير
دنكت راسها وجهها انصبغ احمرر
-بس حجينة والله
-اعرف بس حجيتو
-ترة بس حجي وانتي جنج طنطل تصنطين علينة
-هههههه لكفتكم خوش لكفة
-اووف
-ماكملت الصار شكالج بعدين وعلى شنو اتفقتو
-ما اتفقنة على شي عفناها على الله واهل البيا شلون ماتصفى خل تصفى
-ونعم بالله تنحل
-يا رب
رحنا يم البنات الغرفة مكلوبة كلاب الملابس مطشرة تارسة الكاع وصوتهن عالي عبالي يتعاركن.

سجى: -لااا تصييرينن عووبة اكوو واحد يبلسس احمرر تخبلتي شمالج تريدين تطلعين الشمرر لو. يزيد
هدى: -طمطح طح هذا يزيد يريد القتل القتل الشديد ههههههههه اشو الا تلبسين احمر لايگلج
رغد: -لاتضحكن علية شبيجن ترة والله ازعل
سجى: -اشك حلكة اليضحك عليج احووو تعالن يا بنات تفضلن ويانة حركن اديجن ناسقنة لبسة بيها حظ
شروق: غير لابسات اسود شلجن بالوان
نشقت سجى بصوت عالي ودكت على صدرها بقوة.

سجى: -شلون نسيت صخام بوجهي صارلي ساعة اطلع بالهدوم واخبط بالوان وتالي نطلع لابسين اسود
رغد: -ليش هو السادس الاغبر خلة عدنة عقل
سجى: -اشتعلت صفحة الخلفوة
نوف: يلة مصار شي اختارن اسود ورهمنا سوى
سجى: -خية ماعدنا اسود بس بنطرون وفانيلة تذكر جدتي نوفة اصلا مالت عرسها جاباها جدي نيشان وشال شلون نروح
نوف: -اني انطيجن عندي كومة ملابس سود سترة طويلة شوية وبنطرونات وفساتين ثنين وتنورات كلشي عندي.

سجى: -لكككككك هلااااااا بالكفوووو تعاي احبج امووووووووح
رغد: -شفطتيهاا شفطططط لارجلهاا يهدد علينا
سجى: شسويت هي حبة يلا امشنة نكشرها تكشر
اخذتهن لغرفتي طلعتلهن كل ملابسي السود سجى ضخمة ماكفالها غير السترة ماتدگم عليها بس رغد اجت الملابس فيت نسقتلها قميص قصير وتنورة عريضة وحذاء عالية طلعت تجنن جانت الملابس ضالمتها.
سجى: عاع عاع ولكم هاي رغيدة يو لميس
رغد: شكرا شكرا شكرا شلون تنسيق يخبل.

نوف: -بالعافية عمري
سجى: -جا انة البس ثوب جدتي واخليلة حزام يطلع فوووستان مو خوش فكرة وانسق جنطة وشال فضت وانتهت
هدى: -انتييي كاررثة افكارج روعة
سجى: -شعبالجن لعد انة سجيوة لساني لسان دلالات
الله يذكرك بالخير ياصاحب هذه المقولة الملحة مثل وجهك.
رغد: -معترفة بعد روحي. اكلجن وين سفانة ماشبعت
سفانة: -اباوع لوجهي بمراية الكنتور بدلت مجاني لغير صفحة مااريد اشوف روحي الورطتني بحب مابية نهاية ولا بية فرح.

دورت عيوني بالغرفه كرهت روحي حتى الهدوم الابستها كرهتها اكو دعوة يدعونها يكلة كون تكرة اهدومك اليوم عرفت معناها.
مدري ليش احس روحي رخيصة رغم ماذبيت روحي علية ورغم الحب الشايلتة الة مابينتلة حتى لاياخذ عني نضرة بس شلفايدة.
-ينساها ماينساها لا ينساها اي اي اخ اخخخ اخخ هسة انة شعليه بيهم شعلية النسى والما نسى ليش مدوخة روحي وياة.

ضربت على راسي وشغلت التلفزيون بكلت اشوفة طالع بالنشرة لكيت غيرة مذيع وياة مذيعة الترتيب والنزاكة يعني فارس يشتغل وي ذني ويجي بعد يباوعلي. كرصت روحي ورحت ارتب المكياج هو مرتب بس شسوي وين اروح كل ما اطلع امي تغثني وتعيرني.
-لو بيج خير ومثلج مثل النسوان اسبوع يكابلج ويكعد ولج يباوعون لحلوكتهن وانتي اهمددااج غمة حتى ما باوع بشكلج اضن شررد منج انتي وين ومرتة وين صدك لو كالو شجاب الثوم علة الحلقوم.

متتت واشتعلت الف مرة روحي احتركت وفحمت شبية انة شبية شكلي شسويلة كرهتني بروحي وبشكلي عدمت ثقتي بنفسي هي واختي يضحكن ويتهامسن علية ولاجني بتها واختها.
-يمة انة من عرست زلمتي ماطلع من البيت امة كل يوميه تتعارك وياة تكلة لزكت وهو يكلها عسل شجبتيلي ماينشبع منه افيشش والله ايام كوة راح للشغل بوكتها وهسة وبعد متخبل علية.

-جا انتي وهي انتي وين اكو منج بس السانج كافي صكد عسل انتي خليتي زلمتج مات عليج جا مثل هاي العوبة لاحجي تعرف تحجي ولاحركة فيكة كلشي مايطلع منها
-ترة حقة يمة بعدة ماطالعة مرتة من بالة رادلة وكت حتى ينساها وينسى شكلها اليرد الروح مو مرة فلك البيض والجسم شلون يتقبل غيرها.

كعدت بالكاع عيوني تصب دمع كلماتهن ماتروح من راسي حرگني حرک بحجيهن بجيت لمن حسيت گلبي ينغزني مسحت وجهي بيدي. تحسبت عليهن من كل كلبي حجيهن الماينلبس علية ثوب بس سلمتهن بيد الله.
من وراهن كلشي ما شفت من عمري خلصتها تنمر باهمال اخر شي كلها حجت بسمعتي ناس تكول اي امها اعرف وناس تكول لاتضلمون بختكم كلبي انعصر وانكسر واحترك بس ذني بية مو هواي.
نزلت بطانية ولفيت روحي بيها نمت واهيس الدخان بلعومي من الحركة.

-كومي سفانة
-بردانة عوفني انام
-مصخنة كومي اسبحي لاتنشمرين
يسحب بالبطانية مجلبة بيها بكل قوتي باااررردة سنوني تصاكك من البرد.
-كومي سفانة شمالج ولج
-عوفني شعليك بية شصير منك انة
- مرتي وصديجتي
-هههههههاااي ثديجة اي بث مو مرتك مرتك رحيل، الحلوى مو انة انة ثفانة الجنت ماترضة واحد يحجي علية حتى لا اضوج وتكثب اجر بية
-الصخونة سودنتج شمالج.

-ثودنتوني كلكم امي عثاها بحضها وبختها كل حركة احتركتها كل دمعة طاحت من عيني هي ثببها كل قهر حثيت بية وانة اباوع للبنات يدرثن، ويمدحن برواحتهن وانة العكث ضلت حثرة بكلبي المدرثة.
هههههههه جانت، تشتري لاختي هدوم وتمشط شعرها تطلع تخبل وانة حتى شعري ماتمشطة اروح بكوشتي والجهال تضحك عليه ومن اكلها تكلي اختج حلوة انتي جكمة شثويلج هههههه
ثگد مامجذبة.

(للمعلومة سفانة حلوة وشفتو شبيهتها لكن بسبب الكلام المستمر من امها واختها على انة هي مو حلوة صارت تشوف نفسها هيج)
فارس: -لاتهذرين زيادة انطيني من روحج شوية
-شوية. انطيتك روحي كلها بث محد يثتاهل حبي بعد منا ورايح اتبدل ولا عبالكم ثفانة الاولية
لفيت روحي عدل بالبطانية ميتة برد والساني مايسكت شمالة راح ينكتهن، اختفى صوتة من يمي راح خل يروح شلي غرض بية.

انسحب الغطة مني بقوة تكشفت حضنت روحي بردانة رفعني من فراشي ونزلني بالكاع تربعت اباوع لوجهة بيدة طاسة مي غسل وجهي وادية ورجلية بماي بااررد.
جانت خصلة من شعرة نازلة على خدة ميلتها بيدي رفع عيوني يباوعلي.
-شعرك حلو كلش
-كدامج
-شثوي بية
-العبي بية
مررت ايدي بشعرة شعور حلو غمضت عيوني وابتسمت.
-ههههه حلو
-اول مرة اسمعها معلومة جديدة.

وخرت ايدي من شعرة ونهضت جرني وكعت بحضنة شعور حلو بس ماكدرت اعيشة بسبب وهواسي. تلمس خدي باصعبة غمضت عيوني وهمست.
-وخر
-هسة
جمدت لا اخذ ولا انطي طبع قبلة على خدي غمضت عيوني بقوة وابتسمت لا ارادي كرر هاي الحركه بكل وجهي وصار يدغدغني.
-ههههههه كافي هههه لا لا كاافي هههههه مو هيج
-اي اضحكي من شفتج وشفتيني ضايجة هيج اريدج منا وغاد
-خوش
-يلا كومي عيدي السويتة الج.

وجهي صار نار باوعت بعيونة يتلامعن بلعت ريك وهزيت راسي لا ردت اكوم وكعدني.
-مثخنة اعديك
ضماني لحضنة ارجف برد حسيت روحي دفت اول مره واحد يحضني لا اب ولا ام مسويها ضميت راسي لصدرة استنشق عطرة الكاتلني كتل.
-طيب
رفع راسي ولزمة بيدة عيونة الحلوات متعلكة بعيوني الهايمة بيهن.

-سفانة بعد صرتي مرتي ما اريدج تقارنين روحج الذهب وي وحدة ضاهرها الماس وبالحقيقة هي نحاس مصبوغ هاي وحده. ثنين خلي ثقة بروحج ما اريدج ضعيفة تتاثرين بكل الينحجي كلشي بيج حبية وشبيها اذا كلتي فارث مو فارس جا غير تخبل بس انتي حبيها وامج ابتعدي عنها دوم لا تحجين وياها وانة كدامج شتريدين كولي ليش تفكرين وتحركين روحج
تلمس شفتي مطگگة شبسرعة صارت لطمة حمة
-روحج لاتأذينها ابد لا بحجاية ولا بفعل.

هزيت راسي احس ضميري انبني.
-الواحد بينة لزوم يشوف روحة وشكلة بطريقه حلوة حبي روحج اهتمي بيها ابتعدي عن اليزعلها وسوي اليفرحها الانسان هو اليحدد سعادته ونضرة الاخرين الها
-هههه حلو
-راح اگلبها نشرة اخبار من نضرة الاخرين وجري
-اعزائي المشاهدين نلتقيكم في حلقة جديدة في ااامااان الله هههه
-شني ولج حافضة كليشتي
-كلهن حافضتهن.
سكتت لا اتحمس زيادة واحجي الاول والتالي
ضمني لصدرة يلعب بشعري.
-يلا مو غلستي عني.

قرب وجهة منه قبلتة بخدة وو.
مجتمعات البنات بالمطبخ كالبات وجوهن خفت حسبالي صاير شي
-شمالجن ولجن
سجى: -خليني ساكتة
كلبي وكع بيدي سجيوة تسكت باوعت لرغد صافنة
-نوف شكو شصاير
نوف: -عمي ابو سجى كال ماكو جامعة يكعدن ويسكتن
شهكت بصوت عالي ليش هيج يكسرن باب الكلب تعبهن وقرايتهن وتالي يكعدونهن ويزوجونهن رغد خطية داخلة بصدمة هذا الجان تهم بية صارر.

-كولن يا الله فارث يحجي وياهم ورحمان هم مايرضة شمالجن بعد ترة بث حجاية مو اكيد
رغد: المجسب الوصخ كلة من وراة حجية هذا
دخلت التفات مبتسمة احسها تشمت.
التفات: هسة انتن علمود الدراسة خابصات رواحتجن طبعا لا تريدن تشوفن الولد زميلي وحبيبي خوش شغلة هاي ههههاااي راحت عليجن.

طفرت الها سجيوة شهكت بصوت عالي من سطرتها راجدي لزمت خدها ورادت تضربها بس سجيوة اقوة واضخم لزمت اديها وعصرتها من فكها دافعتها على الكاونتر.
-حض حضج اطيحة سا مو احنة مثلج كل تفكيرنة بالولد والعلاقات تشوفين روحج سگط وعار وتحجين هيج
التفات: -انجبي حقيرة شفتيني
سجى: -الواةةةة الواةةةة شفنة وعفنا لو تريدين اذكرج ليش تطلگتي تركضين ورة حماج العار سا.

التفتت لشهكة نوف مغطية حلكها بيدها محد يدري بهاي السالفة بس سجيوة لاگفتها مدري منين وگالتها النة، وخرت سجيوة وجها مطعون دم ضربتها التفات على ضهرها بعدها ماراكضة اجتها دفرة من سجيوة گلبتها على وجهاا راسة انركع بالكاع وسجيوة مبتسمة راحتلها نوف وشريقة كومنها حجت حجت وطلعت ماتكدر لبتنا.
هدى: -كفو منج جدتي نوة
سجى: -اغديلها سبع فدوات قدوتي هاي
رغد: -شلون قدوة
سجى: -تخببببل.

دخل حياوي مانشوف الا نوف مجيتة بحضنة مجلبة بية من ركبتة وتضحك حاضنها قوي يبوس براسها بعد دقايق نزلاها بالكاع مجلبة بيدة وتحجي بحرگة
-تجيييني موو
-اي ومحمد
-متتتعووفنيي
-ماعوفج للموت
-ترجع يم سجاد مو تعوفة وحدة
-صار
-عبيد مو تحاجوووونة
-ما نحاجية دوم
-هنودة خطية مو تخلون المواعين علية كل يومية
-نسويها نوبة كل يومية على واحد
-اي وبعد ميمو دوروة بلكي تلكونة وهاي البزونات صديقاتة يترسن الحديقة انطيهن اكل خطية.

-يدللن علية شيريدن اجيبلهن
-سوولي نقل اكمل دراسة
-بعيوني
-صديقتي خطية بقت وحدة روحلها كلها علية هسة عبالها متت
-اسم الله عليج
-حتبقى وحدها كاعدة بالاخير
تحجي والعبرة خانگتها حضنتة تبجي انكسر كلبي علية كوة كاض دموعه ماينزلن تبجي وتحجي.
-مو تعوفوني تعالو اشكووفكم كلكممم عليكم الله مو تنسووني ابدد ابددد ضلو اتذكروني دووم وسوولي اكل هسة هنا محدد يسولي اكل مو نفسكم.

-انمار يسويلج كلشي هو بعد بمكاني شتريدين كليلة مايقصر
-بس اني اريدكم
ماسكتت الا من كال بعد ما اروح ماقبلت علية يبقى لان عدة شغل ودراسة ودعت امها وشروق. عيونها راحت من البجي شالها انمار ودششاها لحجرتهم اختفى صوتها شوية وطلع انمار كال نامت.
كعدنا نسوي عشة انة ورضية وذني الزوج كالبات الخلق اكتملت من دخل جاسب خزرهن وراح يشرب ماي...
سجى: -كيفت موو
جاسب: شعندي معرس
سجى: -والله حتى من تعرس ماتفرح هيج.

جاسب: -عود خوش
سجى: -عساها بحضك وبختك حوبتنا ماتتعداك
جاسب: -سجيوة انجبي وكضبي السانج مو ساكتلج تدرين بية ادوس على راسج بالقندرة
سجى: اطلع منها جاااسب شعدك ويانة خلينة ندرس احنا بنات محد يفيدنا غير شهداتنا مو نفسكم ولد تعتمدون على رواحتكم
جاسب: -جا انة شكو ماتدرسن ياهو الكاضجن لازملي طبر عليجن.

رغد: -اي ندرس وانت موجود دگيت صدرررك ابطلللج ابطللج حجايتتك ماصاارررت ثنيين تعبنننة وعيونة الرررايحة كلهن صفننن بالشطط
جاسب: -انجبي ولا تحجين بكيفج
رضية: -يعني هسة انت ماگايل لساجت
جاسب: -لا والله ليش هو كايل ما اخليهن يكملن!
رضية: -اي والله يمة من الصبح تحضرن لباجر بس كالهن ماكو جامعة وهل تشوفهن يكسرن باب الگلب لگمة ما حاطات بحلوكهن.
طلع جاسب من المطبخ كالب خلقتة وذني يدعن ويتحسبن علية...

رضية: ولجن هو شعلية ماتشوفنة مايدري اذا سويجت بيدة الحل والربط الفرخ شعلية
سكتن وضل الحال على وضعة عمي ساجت رايح للعمارة واربع تيام ماكو والتقديم راح ينسد ضل بس يوم واحد يخابرونه يكلهم سدو السالفة ماكو جامعة وي الولد رغد انتهت بهاي الفترة فرد نوب لاتحرك ايد ولا رجل صخونة كتلتها كتل...

حرنة بيها لاتكوم تسبح ولا تشرب دوة مدثرة روحها دثر اجة جاسب بدون لا يحجي شي شالها شيل طفرنا وراة دخلهة للحمام خلاها على الصبة وشغل الدوش سبحاها فوك ملابسة شعرها لازگ على وجهها وتتراجف.
جاسب: -لبسنها وخلني اخذها للمضمد بساعجن مو تنامن
جبنالها هدوم دكت روحها بالكاع ماتروح وانوب وياة
سجى: -ولج كلساع تنشمرين تدرين بررروحج ررربي رااح امووت ولج موتينيييي بسج لخاطري روحي جا انة ياهو إلى لو صار بيج شي.

فزينا من صاح بينة بصوت عالي:
-خرررب يومجنن ااانةةة شكلتتتتتتتتت
لبست تتراجف منة اخذها ومشو بطو كلش ضلينة نتحرگن.
سجى: -زعم يكتلها لو يذبها من الجسر يمووووة
هدى: -وجعوة مجرم هو شمالة عقلج محجرر
صار الغروب الا رجعو دخلت رغيدة ولاجنها ذيج الراحت ميتة بيدها كوومة علاليگ خلتهن بالكاع وبسطت تطلع فساتين وشالات وقراصة وكب وحتى جواريب وحذاء جايبة.
سجى: هلو هلو هاي شني هاي رايحة للمضمد لو للمول.

رغد: -جبتلج وياي هاج گدرية (قيسية) باجر نروح للجامعة نسجل
سجى: ياهو الكالج
رغد: -المجسب هههه
سجى: -ابوي كالة؟
-لا كال اخذجن حرامات راح تفوتجن
هدى: -لا لا لا نفسة المجسب المسوياتة محتوى!
رغد: -اي والله نفسة حتى انة تعجبت
سجى: انة عقلي فصل بعد اسبوع يلة استوعب.

كلنا تفاجئنا من تصرفة اخذهن الصبح للجامعة خبصنة خبص رغد لبست فستان عريض وسجيوة لبسوها عباية لان ضخمة مو مثل رغدة ناعمة رجعن الضهر وجوهن تضحك بعد اسبوع وتطلع القبولات.
سجى: -ما صدگ ولجن هاي السوالف تطلع من المجسب
رغد: -حتى انة وعلى مصدومة
سجى: -حقج خية محد مترجيها منه.
هدى: -يبناااات جدددة تصيحجنننن
سجى: -شتريد يبووو بس لاتغسلنا.

رحت وياهن على الواهس سلمنة وكعدنا بصفها جدة نوفة بدال امهاتنا توصي وتعلم بكلشي.
جدة نوفة: -ها ولجن مگصوعات شلونها الكلية
سجى: -تسلم عليج وكالت حبن جدتجن وسلمنة عليها هواي هواي
ضربتها بعوجيتها وضحكت.
-انتي اسكتي رغيدة سولفيلي
رغد: -جدة مو جامعة بوياااا جبيرة جنها منطقة مانعرف منين نطب ومنين نطلع تضيع وبيها شكدد بنات ولدد خير من الله.

-اهى بيها اشكال لا تختلطن لا وي البنوات ولا وي الوليدات روحن بدربجن ورجعن بدربجن لاتماشن ياهو الجان ترة هاي الكلية كلشي بيها مو كل اليضحكلجن تضحكلنة ترة الولد تضحك على البنات والبنات تضحك على البنات مو اليكلج انة احبنج صدگتن كله جذب مسطر اليحاجيجن كلنة انجب وانطيني گاف.
سجى: -يميييي اشگ حلگة اليندگ بينة الا اسحل بيه الجامعة سحل جاااااا وينة اليعادينة
-خايبة كون غسل وين مودينج للساتر.

سجى: -جا الدراسة هم جهاد
-گلتيها جهاد لاتضيعن جهادجن بغير سوالف امشن بصف الحايط
سجى: -ضايعلي ربع امشي بصف الحايط شيگولون عني الوادم
ضربتها على راسها بعوجيتها طفرت لازمة راسها ولاتجوز من سوالفها.
جدة نوفة: -انتي مومال واحد يحجي وياج مثل العالم
سجى: هسة شكلت اقبل يداكي يا جدتي العزيزة
اجت تبوس ايدها وجدتي تدفع بيها زعلانه
-ما اريدن حبتج
-لا مايصير كلشي ولا الحب يزعل مني
باستهن وكعدت عاقلة بمجانها.

جدة نوفة: -ترة عمامجن مارضو تطبن جامعة وهل شفتن ساجت سوة دهر خلفلة على جويسب تعارك وياه علمودجن
رغد: -شعجب جدة مو هو جان يهددني يبطلني شني انگلبت الاية
-يحبوبة جويسب فطير وكلبة طيب لچنة عصبي زيادة وبس حجي لسان جي عبنج تراددينة هل شفتية بعينج اخذج للسوك وللطبيب حنين عمت عيني يشبة جدة يهنيال التطيح بية
رغد: -يعععع شتطيح بية شلون مجسب
-ماتعرفين بعدج غبرة من تطلعين وتشوفين الوادم تعرفين شقصد.

سجى: -شتقصدين جدة
-حبوبة ولدنا ماكو منهم موش امدح بيهم بس جي راهمين عليهم تهيسن اكو احسن منهم بس الصدك ماكو هواي لاتلكين مثل غيرتهم ولا مثل رجولتهم كل واحد يوكف سلف يمة شحلات طولهم خايبات ماتلكن بحلاتهم ولا باخلاقهم هسة ماتنعرف الذكر من النثية.
سجى: -رحمة الله والديج جدة جانت محاضرة لطيفة ضريفة ممنونين منج وهسة خل نولي نشوف دروبنا
-ولي بس شوفن وياجن فرخة بغداد عبن مالها حس.

سفانة: -نايمة مثاع (مساع) شفتها
جدة نوفة: -جا طلع انمير خوش يشتغل
سجى: -شلون جدة
-خاب انجبي عگلج محجر
سجى: -هاااا افتهمت يلا اودعناج گلب
طلعنا نباوع لسجيوة تضحك وتعض بيدها
سفانة: -شمالج انجلبتي
سجى: -لاعع بس صكد شو ما تنامين بالنهار
طگتها ضحكة ضلينا مفهين عليها وهاي تضحك صار عدنة فضول نعرف شتقصد.
سجى: -ما احجي ولن عيب
رغد: -ماطول بيها عيب طاح حضج مقدما خل نروح نشوفلنا شغلة.

مر اسبوعين روتين البنات بدن دوام رغدة قبلوها تحليلات وسجيوة انكليزي مثل ماكالت و هديوة عدها مدرسة حابسة روحها تقرا بعد ثالث ونوف ماتطلع من غرفتها ومن نجتمع على الاكل ماتكعد الا انمار يطلعها.
مجتمعين على السفرة صرنا نجتمع بس بالعشة الغدة محد موجود دخل انمار نريد نخلص وجهها مگلوب كلاب فات الغرفتة وصاح وراه ابوة.
فايز: -ليش ماتشتغل شني فالتوة يوم تجي وعشرة لا
انمار: -عفت الشغل الكم راح اشوفلي غير شغل.

ضحك عمي بصوت ومرتة تعت بيدة تكلة اسكت
فايز: -خل اگلك بس تعوف الشغل تعوف البيت هاي جدام الكاعدين تشتغل ويانة تكعد بهلبيت ماتشتغل ما الك ضلة وانت بعد بكيفك
واحد يخزر بالثاني بصدمة شبية عمي تسودن يطرد ابنة من البيت انوب يحجي صدك مايتشاقة نعرفة لو حجة حجاية مايثنيها.
عباس: -شني عمي ترة البيت بيت جدة والة ورث بية حالة حال جاسب وفارس وانة
رادت يحجي وكطمت حجايتة عايشة.

عائشة: -اي يمة البيت بيتة مثلةماهو بيتكم بس عمكم جي مايريدة يعوف الشغل حجة هذا الحجي
فارس: -جا نمر ليش يريد يعوف الشغل
فايز: -ذاك هو واسئلوة
انمار: -اسئل روحك
عافهم وراح لحجرتة ليش يريد يعوف شغلة الصار سنين يشتغل بية، عمي فايز وقحطان عدهم محطة بانزين من ذاك الزمن يشتغلون بيها وهسة ضلت لانمار وجاسب ورحمان بس اكثرية الشغل على انمار هو المسؤول حتى مايتعطل يوم.

اباوع لعايشة تحجي وي عمي بصوت ناصي وتتوسل من نظرات عيونها وعمي يهز براسة ماعاجبتة السالفة.
فايز: -يرجع للشغل والله كريم
طفرت عايشة صعدت ورة انمار وضلينة واحد يباوع للثاني.
نوف: -كاعدة افرك بجسمي احسة منمل فريت عيوني بالغرفة احسها سجن ما اكدر اطلع منها حبست روحي بيها اكل وانام والعب وحدي مكابلة الحيطان بس اطلع يسمعوني حجي يغث وانمار منعني منهم كلي اكعدي واسكتي.

مديت رجلي افرك بيها وانفتح الباب بقوة تعودت علية وعلى شمرتة سدة بقوة وضل يتنفس سريع بنهاية الغرفة واسمعة.
وجهة متررب من اشوفة بهذا الحال انقهر علية لحد هذا اليوم ماشفته مبتسم لو وجهة مرتاح
راح للميز طلع علب وكعد بالكاع فتح رجلية وخله العلب بالوسط.
رحت كعدت يمة اباوعلة شيسوي يطلع ورقع صغار ومثل الجاي يخلي بية ويلف.
-شدسوي
-جكاير
-ليش دوخ نفسك خو اشتري باكيت
-هيج احسن
-هه شلون.

-ذاك جاهز ماتحسين بطعمة مو مثل هذا بيدي اسوية استلذ بية
-ها
-اي
-مو جاي من الشغل المفروض تسبح تاكل مو جاي دخن ترة ميصير
-ترة اعرف
-لعد اذا تعرف عوفهن وكوم
شغل جكارة واندك الباب رحت افتحة وصاح بية
-عوفية
-ليش
سكت يدخن عين علية وعين على الباب
عائشة: -ولك يمة افتح شليت حالي
انمار: -مو هسة واليرحم والديج اجليها
عائشة: -شلعت گلبي ينمر ليش تعاند مو تدري بالعواقب
انمار: -كلشي اعرف
عائشة: -افتح اريدن اشوفنك.

انمار: -مااكدر عندي شغل افتهميها
عائشة: عايف المصايب فوك راسي ويشتغل من عشيات بعد وكت
ضحك وهز راسة اختفى صوتها رجعت كعدت يمة
صافنة على الجكارة وعيوني مدمعة.
-شمالج
-ما اعرف
-شلون اكو واحد مايعرف شبية
-اي اني
-تؤ مو خوش سالفة يوجعج شي خاف الحبابة زايرتج
-لا محد جاينة
ضحك بصوت انشحط وكام يكح
-شكول عليج عقلج مامطلع على غير شغلات
-ها اي
-صكد مريضة
-ماعرف بس جسمي يوجعني نحلانة هيج.

لزم ايدي يفرك بيها نزلن دموعي ما اعرف جاي شحس جسمي يخدر ساعة ينمل ماعرف شلون اوصف وجعي. لزم وجهي بثنين ادية والجكارة بحلكة مسح عيوني وضمني الصدرة زدت بجي واني اتذكر حياوي وسجاد من يحضنوني اخخخ شكد اشتاقيتلهم.
-لا تبجين
رفع راسي من حضنة خليت ايدي على وجهي ما احب واحد يشوفني من ابجي وخر ايدي ومسح وجهي.
-سولفيلي كلشي
-احس بحزن هاي الغرفة بيها كأبة ماعرف ليش خاصة من يصير الغروب تخنک.

-وانتي ليش حابسة رويحتج بيها اطلعي يم البنات العبي وي الجهال اذا تريدين اشتري مثل گبل
-تعبانة ماتعرف
-مسوية شي متعبج مشتغلة
-لا
-جا منين تعبانة
سكتت ماعرف شجاوب سكت يدخن وعيونة تفتر بالغرفة.
-لا تضلين هنا وحدج اطلعي
-ليش
-مو زين عليج تتأذين
باوعت للمكان اليباوعلة صافن ومدمع ندستة مايحس هزيتة من جتفة.
-انهار باوعلي انهار.

وجهة يصب عرگ وحرارتة عالية باوعلي عيونة حمرر ضرب على راسة وراح للكنتور يطلعلة ملابس راح يسبح گلبي ضل يلعب شبيها الغرفة رجع ينشف بشعرة لزم ضهرة وكعد على السرير.
-ضهرك يوجعك
-اي
-هاي اسوية الك
-تؤ ماتعرفين
-لا والله اعرررف جنت اسوي لامي
-تؤ
-حباب شبيك فوك ما اساعدك
عكد حواجبة وتمدد على ضهرة سرفنت ردني وبلشت ادلكلة من ركبتة لضهرة من اوصل للوسط يصيح بوجع.
-عوفيية
عفتة كلبي واجعني علية ضليت مكابلتة وكاعدة.

-راجع دكتور ميصير تبقى ساكت
-ليش الكو ينطيني مجال اشوف دربي يسگح على
راسي يكول مطي عندة
-منو هذا الكو
رفع راسة خازرني
-ترة سألتك
-لاتعيدين حجيي هاي كلمة جبيرة مايصير تنحجي
-لعد انت ليش تحجيها
-اخ اخخخخخخ اخخخ
لزمت ضهرة بخوف نتر ايدي منة كلبت وجهي ورجعت لمكاني اباوعلة بحقد دار راسة اشرلي اجي غلست عنة وصرت اعصر باصابع رجلي.
-كومي شني حتى اكل ماتاكلين شلون بيج.

سكتت منزلة عيوني ارسم دوائر بالكاع فزيت من جرني من مكاني لطخني بالحايط فتحت عيوني على وسعهن مرعوبة...
-شبيييج شبييييج شبييييج لاااا تضليييين هييييج تصييرررين مثلييي لا تصيررررين مثلييي ديررري بالججج تسووودنييين لاااااتصيررريننن مثليييي
خليت ادية على اذاناتي مغمضة عيوني بقوة يصبن.
دمع. متت خوف شبية هذا، مرت دقايق على وضعي جامدة بمكاني ما اشوفة بس نفسة الحار بوجهي.
-شتريدين اشتريلج
-ما اريد شي منك.

-اشتريلج شكر لمة
-لا
-اي تريدين تروحين وياي
باوعت بعيونة وهزيت راسي
-جا سوينة عشا ناكل ونروح
لبست شال وروب ردت اطلع ورجعت اسالة
: -شسويلك عشا
-بكيفج
رحت للمطبخ نضيف شبسرعة غسلتن المواعين دورت بالثلاجة شسوي هو اني شعرف طلعت طماطة اسهل شي كلت اسويها گلي هذا الاگدر علية.
واكفة اخوط بيها التفتت علية من دخل
-عبالي نمتي
-لا جاي اطبخ
-تطبخين
-اي مدا تشوف
اخذ مني الخاشوكة ضاك الطماطة وهز ايدة
-ذرة ملح مابيها.

-ها اي اي من تستوي كلت اخلي
عرفني اجذب نسيت الملح طلع بيض من الثلاجة خلة ملح و طك البيض فوكهن خلة قبق فوك الطاوة ونصة الطباخ.
طلع زيتون فرغة بماعون حضر صينية خلة الطاوة بيها وشرلي اجي اشيلها.
-خو كمل شغلك وشيلها
مارد علية طلع كدامي اخذت الصينية ورحت وراة اكلنا بين ماشلت الصينية وغسلت المواعين لكيتة رايح بسابع نومة حقة اذا اكعد بالخمسة اصلي الكاه طالع ويرجع وي العشة شلون مايتعب...

كعدت الصبح على اثر حلم مررعب رحت لعمتي عايشة تسويلي ريوك راحت هداوي للمدرسة دمعت عيوني شوكت اداوم.
علساس حياوي كال باجر يجي كمل المعاملة.

سرى
ضربت المحاضرة وبقيت كاعدة يم باب القسم عسى ولعل يداوم طگ گلبي لشوفتة من بعد الصار احس علاقتنة بردت كلش.
شلت غراضي وطلعت اخذت تكسي ورحت لبيت عمتي سلمت عليها سلام حار خطيه شصار بيها كلش متغيرة لكيتها تريد تطلع اخذت عبدالله للمستوصف مريض وبقيت بس وحدي بالبيت.
اتصلت بية ميرد دزيتله مسج ورحت للمطبخ طلعت خضروات سويت تبسي هدرت التمن وصعدت لغرفتة.

كلشي بمكانة مابية شي مخربط رحت العب بغراضة واشم بعطرة يرد العافية.
مسحت الخشاب ورحت لغرفة نوف فتحت الباب تخيلتها تكمز وتجي تحضني كالعادة نزلن دموعي واني اتذكر شلون افاجئها شكد احب اسمي من تصيح بفرح.
-سرررراوووي
افتر بالغرفة مابيها روح وين جانت لمسات وضكات نوف البريئة بيها اخ وين صفة بيها الوكت شلون عايشة هسة الله يكون بعونها بلكي انمار يطلع احسن من اخوي الخبل ويدير باله عليها.

اي اخوي خبل اعترف بهلشي جنت اشوفة ميت بنوف وبنفس الوقت يخوفها وتالي عافها تعجبت شلون كدر لحد الان ممستوعبة الصار مخلص وقتة برة البيت صدفات نشوفة شيسوي الله اليعلم.
رحت للكنتور فتحتة وهب عطرها الطفولي ضحكت بحزن ومسحت عيوني وين جانت مضمومتلج تهجرتي هجرة بعدها ممتعودة على مكان انتقلت لغيرة اووف گلبي انترس قهر فوك قهري نزلت للمطبخ كعدت اسوي زلاطة وادندن لاغنية صلاح البحر ماعرف ليش خطرت بالي...

- مامرتاح گلبي الليلة اودعك حبيبي لخاطري ما اشوف دمعك انة مسافر الليلة لان مابيدي حيلة
انة مسافرالليلة لان مابيدي حيلة
زمن ضيعني ما اريدة يضيعك
-ضيعني وراح يضيعج وراي
رفعت راسي واكف بالباب ذبيت البيدي وطفرت حضنتة بادلني الحضن وشدد ادينة راسة برگبتي يتفس ماردت اعوفة ردت احطة بروحي حتى لايصيبة شي تمنيت نبقى عمر على هاي الوضعية.

دقايق مررت واحد حاضن الخ ابتعدت منه خلة گصتة على گصتي نفسنة صار واحد باوعت بعيونة التعبانة ومسحت على لحيتة.
-احبك ومشتاقتلك بكد السموات
-احبج ومشتاقلج بكد السموات والارض
-لا اني اكثر لتحاول
باسني بخدي وضم راسي لصدرة
-مشتاگلج شوكت تنفرج
-تنفرج سهلة لاتخاف
-الصراحة خايف من اخوج يخربها علينة
-اگلة ماخذني
كلت هاي الكلمة وعضيت الساني الجرئة الزايدة مامرغوبة ضحك وگرص خدي.
-حتى يباركلنة اول واحد.

-اااء نوف نوف شلونها
-زينة تسلم عليج
-وانت شلونك
-مو زين بوسيني
بستة وجلب بية مر وقت ابتعدت عنة فقدنا ثنينة رحت غسلت وجهي الصاير نار وكعدت على الطاولة ارجف.
-ماضل شي ونتزوج
-اي ان شاءلله
-احبج للموت
-بس عوف الموت حتى اني احبك وشكددددددد
-احتفضي بهذا الحب للابد مو تبدلينة
-هاا
-حافضي علية وسولفية للبنات غوريهم منج كليلهن عندي حبيب يعشق حروف اسمي غوريهن وكليلهن حب الطفولة صار باسمي ومايهوى غيري.

كليلهن عيونة السود نقشن اسمي بحبر ابيض
ابتسمت ورحت حضنتة ماكدرت ارد الفرحة غامرة روحي جنت اموت من القهر من اتخيل مايبادلني هذا الحب الجبير.
-اني ونوف نتشابة بشي واحد
-الي هو
-من نحب شخص ونبتعد عنة نتمنى ماينسانة واخر حجاية النة عليكم الله مو تنسوني نوصي بالسانة اليحبونة خاف بيوم نسو ذكرنا تخطر ببالهم هاي الجملة.
-محد ينسى اليحبة
-اكو هواي ينسون وبيهم يتناسون
-صح
-بس احنا مانريد واحد ينسانة.

-اصلا انتو ماتنسون
-كلبج وروحج المن؟
-الك بس
-اريدهن دوم إلى حتى لو ابعدت
اعبر كلمة يحجي الاضرب منها ماعرف ليش يحجي هذا الكلام هسة احسة ابد مو وقتة كضينة وقت كلش حلو لحضات سجلتهن اجمل اللحضات العشتهن...
اجت عمتي ووصلني حياوي لبيتنة طبگ مسافة عن البيت ودعته بضحكة وتمشيت لبيتنة دكيت الباب انفتح رفعت راسي وانصدمت صدمة عمري.

شجاباهن يمنة وشيسون طلعن يضحكن وعادل وراهن خازرني عبرن مني التفت وراهن وصحت بصوت عالي.