رواية الرمق الأخير للكاتبة شمس العراقية الفصل الخمسون
الطاف نطيت الكروه ونزلت وصلت العنده جلال! خيك شعندك جاي لبيتي، نزل من السياره ونزل مناظره وباوع ل زينه تقرب باسها وكرصها من خدها احجي شعندك جاي ما نخلص منك ومن أخوك.
جلال ليش تخلصين بنتنا عندج، وأحنه اهلها
ألطاف حجينا بهل الموضوع ما عدكم بنت عندي مشيت أريد افتح الباب وصاح بيه
أعصابج يمعوده ترى ما نريد نعارك، أجيت احجي وياج بخصوص زينه، أمي طالبه تشوفها واجيت أخذها.
شُنوْ أنوب أمك عليه ما أخلص من أخوك تطلعلي أمك ومن شوكت صارت حنينه بعد عيني واداعي بنت أبنها هاي الكلاوت على منو تعبروهن من يمتى صرتوا أهل بيكم خيك واطالبون بنتكم، لو هايہ حقاره وسم تردون تسممون عيشتي، تموتون اذا الطاف ترتاح بحياتها.
صدگيني ما عدنا مشكله وياج ليش ظالمتنا.
بسبب أفعالكم هيج اتبلى عليكم من دون سبب شو تغشم بنفسك، طلع من جيبه ظرف وخله بيد زينه جريته شُنوْ هذا باوعت فلوس! فلوس حرام.
شمرتهن بوجهه ما أصرف على بنتي دينار منكم الله يدري منين جايبهن ومن تالي صاك اب ويريد يصرف على بنته واحد نذل وخسيس.
لا اله الا الله اللهم صبرج يا روح، بابا هاي نفقه بنتنا ونريد نصرف عليها المانع والغاثج شنو
ما اريد لا نفقه ولا اي شيء منكم غير تفكون ياخه عني يا أخي اريد اعيش تعبت منكم الى متى، قاطعني اجاه أتصال وفتح سماعه وباوعلي.
فيصل وين مكبور.
جلال وين يعني يم الطاف.
شمأخذك ألها أني شُنوْ حجيت وياك ليش رحت
جبت الها فلوس بنتك تحتاج مصرف.
ما تأخذ وإمها متقصر وياها لو اعرف بيها تأخذ من زمان ادزلها، جلال لاتخليني ابتلي بعمرك ساعه السوده رجعت بيها من الخارج، عوفها وتعال لاتسبب الها مشاكل ابتعد محد رايد منك.
شُنوْ تنازلت عن بنتك مو ذبحتني بنتي وبنتي ظلمتها ومن هالحجي وجنت تريد تشوفها وتاخذه يمك.
ميخصك شيء خاص بيه، طلع خشمك من حياتي وعوف ألطاف بحالها ورجليك أكسرهن اذا طلعت بوجهه لو توصل بيتها أخر مره أعيد كلامي والا والله اني وياك نتخارب
ماشي مثل ما تريد خويه هذا هو صار بس اني علمودك والله.
تسلم رحمه الله والديك متقصر، يلة تعال ذاكر يريد واحد ياخذه السوك واني عندي شغل بالمعمل.
جاي مسافة الطريق.
ألطاف إنتهى الأتصال، أخوك صاير أدامي زين صاير عنده احساس وأبتعد لو هذا الأتصال اتفاق ووتمثيله بينكم والله كلش صرت اتوقع منكم.
لا والله لا تمثيله ولا شيء وغلات زينه وفيصل من زمان ادامي ورجال شهم وصاحب مواقف حلوه بس الوكت من يشد وياك يخليك تصير نذل غصب عنك
ضحكت صاحب مواقف حلوه! غصب عنك حلوة هاي.
حقج ما تعرفين شُنو عاش ومن شُنوْ عانى لوحده بس أكتفي بكلمه وحدج أنتِ هسه عايشه بفضله لما هو جان من زمان نقرالچ الفاتحه.! فيصل نقذج من الموت ما جان عنده خيار وحل ثاني ولو هو محلفني ما احجي بس ما كدرت أصبر أكثر لن موقفه جان صعب
يلة زينه عمو اني رايح دربالج على نفسج وأنتِ بخير دام عندج ام لبوه ما ينخاف عليج وخليها أبالج هواي نحبج وبالاخص أبوج.
ام زينه أعذرينا على الازعاج وشُنوْ تحتاجين حسابي موجود يمج راسيلني واني بالخدمة وأنت أخت عزيزه ولو جنت موجود بهذاك الوكت جان ما وصلنا لهل النقطه بس نصيب والدنيا من تعكس وياك ادمرك، فرصه سعيده ومع الف سلامه.
ألطاف ما جاوبته شال الظرف باوعلي هزيت راسي
ب لا، شاله وشغل السياره ومشه، أمشي ماما تعالي.
دخلت البيت بعدني توني دخلت ما مأخذه نفس أندك الباب بقوه والجرس عالسريع يا ساتر يارب أي اي كسرتوا الباب منو.
حسين أنييييييي فتحي الباب لا اكسره على رأسج وراس الخلفوج.
ألطاف فتحت الباب بدون مقدمات، دخل وقفل الباب وجرني من ايدي لداخل البيت حسين على كيفك شبيك، دفعني داخل البيت وعاط بيه.
حسين شبيه، شبيه تردين تفهمين شبيه، بيه أنتِ خبلتيني وياچ، شعندج واكفه وياه رجال غريب بالساعه ودك سوالف والرايح والجاي يباوعلكم، ترى أهل المنطقة كلهااااا تعرفج أنتِ أبن ابنييي تردين تجلطينييييي.
وغلاتك ما عندي شيء وياه هذا عم زينه اجه جايب مصرف الها واني رفضت.
لا ويحلالج تأخذين منه فلوس كواويد فلوس
هم صخماننن هم رجع، حنيتييييي مو حنيتيييي لكواد مالتج حنيتييييييي طك گلبج عليه.
لا لا لا حسين بس خل أفهمك فدوة.
ما يحتاج أفهم گلشي واضح، شفهم الطاف شفهم أنتِ حتى عقل ما خليتي برأسي وكفت حياتي علمودج والله.
لاتظلمني حسين والله البيه يكفيني وزايد.
بعمري ما ظلمتج، بس دام هيج رجعييي اله على شنوووو باقيه لوحدج وابوج مريض وابو بنتج وملاحكج رجعي بلكي يرتاح گلبج لن البزون تحب خناگها.
صرخت ورفعت اصبعي لوجه حسسسسسسين ما أسمحلك لهنأ وبس مو أني ارجع لنذال وكواد أنتَ اكثر واحد تعرفني شُنوْ لهذا لاتجرحني بالكلام أكثر طلع بدون ما يرد عليه رحت ركعت الباب وراه وصحت بي كلكم مثل بعض كلكم جذابين ياهوا ياليني ما يقصر شلعتوا گلبي، وكعت بالكاع وبجيت وهو شغل سيارته ومشه.
بهذا اليوم بجيت الا طلعت روحي ما توقعت منه هالكلام بس عذرته اعرف بي يغار وهو حذرني، كمت لملمت البيت وقفلته ونمت.
مرت الأيام وأني لوحدي وتميم يم أبوه أتصل ما يرد عليه، عفته اكيد بعده مقهور مني، زينه اخذها وياي لدوام وذهب اجت بقت يمي كم يوم وبعدها راحت.
223 نهاية شهك ال 12
جنت راجعه من الدوام وكاعده يم الصوبه ويمي كوب القهوة ومشغله التلفزيون بس كاتمه الصوت وتلفوني يمي كلبت بالتيك توك ومليت منه كله يطلع لي ستوريات حزينه وفراق وحزن عبالك يقرأ بداخلي شُنوْ ويطلع ومشابه او مماثل للحالة الشخص.
زينه نايمه على بطنها وتباوع بالأيباد وناقصها أخوها اللي صار أيام ما شايفته ما أعرف ليش هيج يتصرف من يكون مزعوج مني يحرمني من تميم يعرف نقطة ضعفي ابني يوجع گلبي بي.
أباوك على اركان البيت وزواياه فارغه ما بيها صوت وغرفه بابا فارغه من دونه هو ذهب جنت سانده گلبي بيهم هم راحوا.
الظاهر مكتوب عليج تعيشين لوحدج بين أربع حياطين كلما أكول هانت واجاني الفرج ينفتحلي باب وبالگوه أسده والملم جروحي يا روحي.
رن التلفون المتصل حسين! خير شعجب تتصل
جاوبته الو.
حسين الو شلونج
ألطاف بخيرررر
شبيچ عصبيه
ما بيه شيء
تمام راحتج الطاف أختي خابرتني وطلبت تروحين وياها السوك!
أي.
أي تروحين لو لا أذا عندج مجال لن أمي ما بيها وزوجة عباس جهالها مرضى.
اي ماشي اروح وياها عادي.
ماشي بعد نص نمرلچ لعد.
تمام.
باي.
ألطاف باي، شعجب أني يلة ميخالف اروح يستاهلون كمت فتحت الكنتور طلعت ملابس لبست ورتبت نفسي وزينه كذلك بدلتها اخذها وياي.
خلصنا وشلت كوب القهوة وطفيت الصوبه وأندك الجرس، رحت فتحته زهور هلا گلبي أتفضلي.
زهور لا عيوني مستعجلين ورانا سوك ياخذ منا وقت اذا خلصتي نمشي.
ما عندي شيء بس اجيب جنطتي، رحت قفلت البيت وجنطتي بيدي ولزمت أيد زينه دنكت باستها
زهور ليش أحبج اني ليش فدوة لجميل.
ألطاف يحبج ربج، جان عباس جايبها عبالي هو
صعدنا وطلعنا لسوك وصلنا وگال.
عباس اذا ما عندي شيء اني اجي اخذكم واذا هاي ادزلكم ابو تميم.
زهور ماشي نتخابر.
الطاف وصلنا السوك ودخلت محل المكياجات وأخذت وتجيب وتخلي وكل ماركات زهور شسماعنه
عدنا مناسبه وفرحة العمر واريد اخذ شيجيبني انوب.
مناسبة شُنوْ.
زواج.
هاا بالخير عليكم، ردت اسألها منو تالي سگتت گلبي كام يوجعني معقوله خطب وراح يتزوج لا ياربي لا فدوة.
يلة خلصنا ما عجبج شيء.
لا تسلمين، مشينا محل بدلات وملابس مناسبات دخلت تختار وكعت عيني على بدله لونها ذهبي شُكثر حلوة تصميمها هادئ مو نفخ بسيطة ضليت صافنه عليها وأجتي.
هاا عجبتج
تصميها هادك مو مبالغ بيها
اي صحيح، شوفي شنو اخذت حلو ومستور شرايج.
أي حلو ماشي بالعافيه عليج، خليتها تدفع الحساب اشترتها واني بالي شُنوْ هالمناسبه ومنو گلبي نار وشبت بي معقوله يريد يحرك گلبي لن حجيت ويه جلال والتقيت ويه فيصل وماتحمل وخلص قرر يشوف حياته
كملت كلشي وخابرت أخوانها وأجه عباس توقعت هو خاب ظني، وصلني البيت.
زهور مشكوره، تعبتج وياي بس ما عندي أحد وأنتِ مثل اختي تعرفين اني وحيده أهلي ما عندي اخت.
الطاف تدللين بأي وقت، راحوا ودخلت البيت تعبانه هواي أفترينا، اتعشينا اني وزينه ونمنا واني الليل كله افكر تخبلت عقل ما ضل برأسي فاتح نت طول الوقت اريد اراسله واتراجع معقوله سواها وراح يتزوج اني شبيه ليش ضليت ساكته وما سألت زهور زواج منو احتمال من أقربائهم اوففف يا قهر كلبي
الصبح يوم الأربعاء رحت الدوام كالعاده نفس الروتين وكلت من ارجع اخابره يجيبلي تميم اليوم گافي عاد طوخها شُنوْ ما يكول اني أم.
خلص الدوام ورجعنا اني وياها فدوه لعينها أبداً ما أتعبني هادئه وفقيره بشكل، غيرت ملابسي لبست تراك قديفه وشلت شعري لن طولان ومتعبني هالفتره يراد اله كصه وبالي اكصه قصير على شنو مربيه شعر واني روحي كوه شايلتها انوب عنايه ما بيه، تغدينا وأتصلت على ذهب اطمئن على صحة ابويه وبلكي تجيني تبقى يمي كم يوم طاكه روحي لوحدي اخ منك مازن شگول عليك، ما جاوبت اكيد ملتهيه ويه ابويه لو يمهم خطار.
أتصلت على حسين وجاوب مرحبا.
حسين مراحب.
تميم شوكت ناوي تجيبه اليه مو عبالك طوختها.
ليش عندج مانع شُنوْ ناسيه اني ابوه.
لا ما ناسيه وَك رأسي، بس اني أم وصار ايام ما تفكر تجيبه.
العصر هو يمج، يلة باي.
باي، أنزعجت من تصرفه يذب حركته بهل الطفل عفت التلفون واذن عصر كمت صليت توني خلصت
وأندك الباب كمت بحجاب الصلاة توقعت هو طلعت طيبه وقادر هلا بيكم شجابكم شذكركم بيه.
قادر نعتبر هايہ طرده.
الطاف لا يمعود اتفضلوا، دخلوا وضيفتهم وكعدنا
طيبه أجيت على أبويه وتالي مازن بالطريق خابر طلع ماخذه يمه والله حجيت وما رضيت بس شسوي لمازن وعمامي.
قادر هما اهلج كلشي بيهم غلط بغلط ياهو بيكم الصح شلون ياخذه ويعوف مره لوحدها هي وبنتها.
طيبه لا حجيت وياهم وما ارجع الا ارجع ابويه يمج
خيولي يتصرف من دون عقل وتفكير، اي شلونج
ألطاف الحمدلله بخير، كاعدين بس حسيت عدهم شيء واحد يباوك الثاني ويتبسم شبيكم صاير شيء.
قادر لا خيتي سلامتج
الطاف أكوم اسويلكم كابتشينو، كمت المطبخ وأندك الباب ودخلت ذهب يروحي شجابج حضنتها ما تصورين شُكثر أشتاقيت الچ، باوعت وراها ابويه بابا، حضنته وبست إيديه شلون عافيتك.
حاتم أني كلش زين.
ألطاف دمعت عيوني وبسته من كصته الف الحمدلله من صرت زين وتوقعتك ما تعوفني، أبتسم وباسني ودخلوا وشفت عمي ناظم كتفت أيدي شعندك جاي بيتي ما استقبلك زعلانه منك.
ناظم عابت هالخشم فوك ما جبتلج أبوج ورجعته الج فوك هي ما عاجبها، سويلي جاي مهيل جوعان ما عندج كليجه كعك نمنيات.
ما عدنا مخلصين، تقرب نفشني من رأسي واخذني بحضنه بادلته الحضن مشتاقتلك ابو رأس ليش غبت ما تسال صاير بذات.
والله يبعد عمج على بالي وخاصه اخر فتره ضجت من تصرفج علمود سالفة فصيل وقضية ومدري شنو
سد الموضوع عمي.
يعني أنسده نهائي.
نهائي بعد ما ينذكر وله وعساه لا رد، اتفضل بين ما اجهزلك اللي تريده، دخل يمهم ورحت سويت الجاي وطيبه تمشي وترتب بالبيت وترش معطر جو ترة صلختي البيت شبيچ منو جاينا لما منا وبينا والبيت نظيف.
طيبه لا عيب من قادر وعمي ناظم شگوو بيها فوك ما ارتب الج والله يالله.
الطاف رتبي منو لازمج، صبيت الجاي وخليت الكعك وشلت الصينيه توني وصلت رن الجرس ونهض قادر مثل الحصان وك وجهه أبتسامه وعمي گال.
ناظم رجعي الصينيه اجانا خطار.
الطاف منو الخطار، ماشي اضيفكم وياهم، رجعت الصينيه المطبخ بعدني توني أخليها على السنك وسمعت صوت العلويه تسلم وتميم يغني فزت بيج فزت بيج.! بعدت البرده وحسين كفخه على رأسه ويسوله أشش.
شجابهم والعائلة كلها ضليت فاكه حلگي هو كاشخ لابس قاط واخوه عباس وزوج اخته وزلم اثنين معكلين وابوه لابس رسمي والعلويه تضحك وشفت زهور بيدها باقة ورد وأكياس ضليت فاتحه حلگي وفزيت على صوت طيبه.
طيبه طلعي أستقبلي عيالچ!