رواية الرمق الأخير للكاتبة شمس العراقية الفصل التاسع والأربعون

رواية الرمق الأخير للكاتبة شمس العراقية الفصل التاسع والأربعون

ألطاف هذول علىك شُنو ناوين والله لو تموتون ما تأخذون زينه من حضني، شُنو كيفكم لو شفتوا ماكو احد بظهري وتسلطتوا عليه، اوفف شصير لو بظهري أهل بيهم حظ لو رجال يحطلهم حد يارب ما عندي غيرك بس حسين وهالرجال ما قصر وياي ما اريد ادخله بمشاكل ويتأذى بسببي ما يستاهل، رجعت أباوك ومتصل مرتين رجعت أقرا.

أنتِ وصلتينا لهل الطريق وطبعاً فيصل رافض بس اني مشيت بيها لن اخويه متعذب واريده ينجمع بنته وانتِ مانعته وكل هذا وهو ساكت وما يحجي شيء
منين جبت حسابي!
جبت مكانج الساكنه بي ما اجيب حسابج شوفي أني ما عندي عداوه وياج يشهد الله وأعرف المريتي بي صعب وما رضيت وحجيت على اخويه والله خليته يبجي دم لن بنات واعراض الناس مو لعبه عنده وهذا الطريق أعوج وغلط وخراب.

وكل اللي أريده ينجمع بنتهك أقل يكفر عن ذنوبه لن حيل تعبان ومتأذي ونعرف وضعها الصحي مو تمام ويريد يعالجها فہ لاتحرمين أب من بنته حتى لو جان مليان عيوب وأغلاط الكوكب كله.
يعني أنتوا ناوين تأذوني، شُنو ما تفكرون وراكم حساب وكتاب وعذاب ترى حوبتي ما تعداكم
لا والله شنأذيج خيتي، الله يوفقج بحياتج ما عدنا شيء وياج، نريد بنتنا وبس هذا المطلوب ماله داعي دعائج والمماطله ىالحديث ونجرجج بالمحاكم.

من الأخير وقد أعذر من أنذر واخر كلامي الك والاخوك العار والخسيس ما الكم بنت عندي تنسونها خلاص.
أخر كلامج.
أي اخر كلامي وما اعيده واذا فكرتوا تلعبون غير لعبه دفاتركم وخياس اخوك واهلك كلها أعرضها بالمحكمه وأشهركم شهيره كدام خلق الله.
يصير خيك يا أم زينه نتواجه.
والله فتحتوا أبواب جهنمم عليكم، طلعت من المحادثه كعدت أخذ نفس راح يجلطوني اجتني خاله اخذتني الغرفه سدي الباب وتعالي أججيلي لايسمعنا أبويه.

ذهب شصار حجوا وياج مو.
أخوه ما اعرف منين جايب حسابي اكيد من فيصل يبحوش وراي ما يخليني حياتي اعيش الا يموتني يلة يرتاح غضب يومه وساعة السوده الدخل حياتي
وهسه
حجيتلها وضلت صافنه بوجهي هسه أجه وكت الجد الا أطلع كل خياسه وأفضحه واخلي فرچه لأمة محمد
لا ألطااااااااف لا دربالچ تسوينها لاااااا
بصياح: ليش لا ليش.

تفضحين نفسج بالمحاكم وأهلچ ما يرضون وتالي گلشي ما تحصلين، أني وياج وما اعوفج بس سالفة تحجين وتفضحين نفسج لا مو وياج محد راح ينصفج
يعني عادي عدكم عايش حياته طبيعي، والله يدري ام ذاكر يجوز دمها برقبته يعني بنات الناس لعبه بين أيديه عادي الظالم يكمل حياته طبيعي بدون عقاب.
شعلينا بي وبأم ذاكر، حيري بنفسج وما الج شغل بغيرچ خيولي هو وسوالفه المكسره.
ماشي ما اريد احد يوكف وياي.

ألطاف امي عبالج السالفه سهله يردون دليل يردون شاهد منين تجيبين، أنتِ حتى تقارير ما عندج شكوى ضده ما عندج، اي دليل ماكو تحتاجين محاميه قويه توكف وياج وتريد فلوس وراتبج گله خليتي علاجات لبنتج والسالفه تريد إلها زلم وحدج ما تكدرين
ميخالف الزم محاميه شاطره وأجيب تقارير حتى لو ازور قابل مكذبه.
ما تحصلين شيء، شيلي الفكرة من رأسج وصيري عاقله خيولي عوفي.

اكلج اذا رفعوا دعوه يردون بنتهم يطالبون بيها مستحيل اخلي يلمس شعره منها.
خل اكول لأبوج ويشوف عمج شنو يقرر وأخابر طيبه قادر بلكي عنده معارف خل يسأل النا بلكي يعرف شيء ونخلص منه الله يكصف عمره إن شاء الله.
ماشي، طلعت وصفنت وقررت قرار نهائي لو اني لو هو لو اعرف نهايتي الموت خلاص صار وقت الجد كافي ظلم سكتت كل هالسنين وهسه صاير اب ويطالب بنته من عندي لا الظاهر يريد نتواجه وياه ماشي نتواجه لو أني لو أنت!

وخابرت ست أنوار شلونج ام أيهاب
أنوار هلأ بيج الحمدللة انتِ شلونج بنتج شلون صارت.
الحمدلله على الله بعدها بس اريد اسألج قبل فتره حجيتي عن محاميه تكون جيرانكم عندج رقمها ادزينه اليه فدوة.
اي موجود من عيوني بس خيك المن.
صديقه طلبت مني وأنت مدحتي بيها كدامي اذكرتها وهم افيدها.
اي تدللين هسه ادزه الج وادزلج عنوان المكتب مالتها.

تمام مشكوره مع السلامه، نهيت الأتصال ودزتلي رقمها أتصلت عليها حجيت الها رؤوس أقلام وكالت
ألطاف تعالي المكتب أحسن هيج ما راح أفهم التفاصيل زين تعالي ونحجي لوجه لوجه أفضل.
ماشي باجر من اطلع من الدوام امرلج.
اي تعالي واذا هايہ نطلع فد مكان ونحجي على راحتنا.
بس قبل گلشي حبابه ما اريد احد يعرف
لاتوصين حَبيبتي، تعالي وان شاء الله خيك.

ألطاف نهيت الأتصال وقررت العصر اروح الها ماشي يا فصيل تريد حرب حرب يصير خيك بعيني.!
طلعت لكيت أبويه يحجي ويه عمي وشكله مزعوج وعاف التلفون شگوو، افتح سماعه خل اسمع.
ناظم ألطاف من كُل عقلها تحجي، اني دائمًا وياها واعرف بيها انظلمت بس مال تجرجرنا بالمحاكم وتفضح روحها وتفضحنا وياها احنه ما صدكنا على الله سالفتها انسدت من سنين وكاعده والله ساتر عليها وكت دعوه وكت دفاتر عتك غير بطرانه بنتك خل تكعد وتسكت.

حاتم بس خويه فيصل يريد بنته
وخل يأخذها شگوو مجلبه بيها هي شافت من ابوها عاد بنتها على شنو موتها روحها ويوميه مستشفيات وابوها الله مكنه وعنده خل ياخذها ويعالجها، وأني أدخل بالسالفه وما اخلي يحرمها منها لن مو من حقه بس القانون والمحاكم لا ادخولنا بي ما ناقصين فضايح يرحم أمك السالفه مرت عليها سنين مو مال هسه تنفتح.
ألطاف أنقطع الأتصال، وأبوي انزعج وعاط بيه.

حاتم شگلت الج مو گتلج لاتخلين رأسج براسه شوفي هسه يجرجج بالمحاكم وياخذ بنتج منج ومحد يوكف وياج لن كلها تحك الرجال ولج بويه المره بوكتنا قله يوكفون وياها كلها تحك الرجال حتى لو جان على غلط بس شسوي لعنادج.
ألطاف عافني وراح كعدت مصدومه يعني شُنوْ يأخذون بنتي عادي وبكل بساطه ويعرفون هو شنو.

ويعرفون اني شُنوْ عانيت بسببه شُنوْ هالمجمتع المنافق وأهل ما برأسهم خير، مستحيل والله لو اعرف أموت اللي برأسه ما يسوي وزينه يحلم يلمس شعره منها اني الك.
صفنت عليها تلعب والله كبرت مو مال أسحل بيها
أباوك الها شعرها أصفر مثل الحرير وبياضها ساطع حلوة بشكل مريضة داون أجمل خلق الله، شافتني صافنه عليها كامت كعدت مقابلي ونامت على رجليه.

زينه عرفتي بسوالف أبوچ، هزت رأسها، طيب اذا كالوا الچ تردين أبوج لو أمج المن تختارين!؟
رفعت رأسها وخلت إيدها على صدري حضنتها قوي ما أعوفج أبداً، اعرف تعبتي وياي، هزت راسها لا
ابوس روحج الحنينه والفاهمه گلشي.
تميم ماما ليش تبجين.
الطاف مسحت دموعي لا حبيبي ما ابجي عيوني توجعني.
لا تبجين تردين بابا يعيش ويانا بالبيت اني كتله تعال عيش ويانا، هو كال الله كريم
بتفاجئ شگال إبوك عيد عيد.
گال الله كريم.

الله كريم، أبتسمت اي الله كريم بسته من خده.
فتحت التلفون شفته فاتح نت نشط الأن المن تحاجي يا ترى أكو وحده بحياتك الله يسعدك حتى لو أكو أنتَ تستاهل كل خيك بس ياريت ماكو لن نار تسعر بصدري وأموت والله اذا وحده أخذتك مني، ياريت أكدر احجيلك ضيمي ياريت بس خليك بعيد ما أريدك تتأذى.

الثاني يوم كعدت من الصبح لبست وكعدت تميم لبسته واجه الخط وراح المدرسته واجه الخط مالتي شلت جنطتي وعفتهم نايميين وطلعت اتمشى أجه الخط صباح الخير.
الكل صباح النور
كعدت وتمشي السياره وبالي يم المحاميه اليوم أفتح گلبي وأحجي گلشي اللي مثل أمثالك حرامات اضل ساكته الهم واخليهم يفلتون من العقاب.

أشرح الدرس وكل تفكيري شوكت يخلص الدوام وأروح، درس ورى درس ورن الجرس علن أنتهاء الدوام شلت جنطتي، أنوار لاتتنظروني أني طالعه عندي شغل.
أنوار تمام على راحتج.
ألطاف طلعت من المدرسه وأخذت تكسي أنطيته عنوان المكتب أتصلت عليها، هيام أني بالطريق جايتج.
هيام روحي المكتب أني هسه راح أطلع
ألطاف وصلت المكتب وبقيت واكفه أنتظرها مرت حوالي نص ساعه وأجت.
هيام أعذريني تأخرت جان عندي شغل بالمحكمة
أتفضلي.

الطاف لا عادي، دخلت وياها وجابتلي كهوه.
أشربي علمود تهدئين وتحجيلي گلشي مبينه سالفتج معقده من كلتي زوجي وسوالفه واللي مثل امثاله هواي ومع الأسف دائمًا يفلتون من العقاب.
ليش
ما يخافون من أحد، لهذا احجيلي بلكي العندج جبان.
تمام، بديت أحجيلها من أول يوم زواجي وكل التفاصيل وهي ما مصدومه بس تسمعني.

ما مستغربه أبداً لن اشكال القضايا تجيني وأكو اتعس من حالتج وحالهم بالويل، اي هسه خلينا بموضوعنا الطاف عندج تقارير شاهد!
مال شُنوْ.
مال تعذيب من طلعتي من يم أم عبد أكيد دخلتي المُستشفى وحسب ما حجيتي گلتي جنت معنفه وجسمي كله كدمات وتعرضت ل الأغتصاب.
ما عندي والله جنت حامل وسقطت والرجال اللي ساعدني اللي هو ابو ابني حاليا، هو وكف وياي والاوراق جانت يمه حتى ما اذكر وين صارن والسالفه مر عليها سنين طويله.

تمام أبو أبنج (طليقچ) يكدر يشهد ويحجي ويكول اخذتها من فلان وفلان مكان! وجانت حامل بطفل غير شرعي وسقطت وطول فترة تواجدج بالمستشفى هو جان وياج ويذكر التفاصيل اللي هو شافها وشاهد عليها.
ما فهمت قصدج شلون فهميني لن هيج تفاصيل صعب تنذكر وحسين ما اتصور يوافق عليها صعبه عليَّ فدوة عقلي ضرب.

لن راح يطلبون منج دليل على صحة كلامج لن سالفتج مر عليها سنوات كثيره مو يوم يومين والربح بيها صعب يعني خسارتج أكيده من هسه أكولها ألچ ليش ما رفعتي عليه دعوه قضائيه وقدمتي شكوى بوكتها من جانت السالفتج حاره!
جان دخلتي السجن وأخذتي كل حقوقج وتعويض عن الاضرار اللي حصلت الج، وحتى بنتج بعد ما يكدر يطالب بيها حتى لو طلع من السجن محد ينطي وصاية زينه وبالأخص هي مريضه داون تحتاج رعايه وأهتمام.

ما تكدرين تساعديني بدون شاهد ودليل.
بهيج قضية صعب
َ هسه شلون
الطاف سالفتج صعبه كلش مشكله مر أكثر 1 سنوات على السالفه! شوفي راح احاول اقدم بلاغ بحق طليقج ابو بنتج وأنتِ حاولي تجبيين شاهد او تقارير طبيه!
تمام گلبي وأتمنى ما افشل بيها.
ما تفشلين بوصاية بنتج وهي وصلت السن اللي هي راح تختار لو ابوها لو أمها.

وبنتج محد يكدر ياخذها ومرضها راح يساعدنا بالقضيه وأنتِ عندج وظيفه يعني تكدرين على رعايتها واذا دخلتيها مؤسسه خاصه بهيج امراض تكونين ساعدتي بنتج تتجاوز الصدمه.
مؤسسه.
اي مؤسسه راح ادزلج عنوان وحده منهن خاصه بإمراض داون يهتمون بيهم، صدكيني راح تساهمين بمعالجه بنتج حتى نفسيتها تتحسن ويمكن ترجع تحجي لن الاختلاط الها دور كبير بنفسيتها.
ما أعرف شلون أشكرج.

لا شُكر على واجب وأن شاء الله أحنه رباحنين والخساره اله ول امثاله، هذا العنوان تواصلي وياهم بإسرع وقت ودخليها خلال هالفتره، علمود خاف القاضي يسألج تكونين مسويه اللي عليچ وزايد وموفره راحتها بكل الوسائل وكولي اله ما عدها احد بالبيت بس اخوها وصغير ودخلتها المؤسسه علمود ترجع تحجي لن بنتي مو خرسه بس بسبب الصدمه واريدها ترجع طبيعيه وصدكيني راح تربحين.
إن شاء الله، الاجور شگد.
بعدين نحجي بهل الموضوع.

تمام، أخذت العنوان وطلعت من يمها وبالي حسين
رجعت البيت تعبانه لكيت الجهال يلعبون بالحديقة
دخلت غرفتي واجت ذهب
ذهب شصار وياج أحجيلي.
الطاف گلشي صاك حجيت الها.
مو گتلج نفس گلامي ويا ترى حسين يشهد ويحجي الحق ويوكف وياچ ترة السالفه عويصه.
ما أعرف خل أرتاح واحجي وياه، عافتني وطلعت وشايله همي، نمت بملابسي والمغرب يلة كعدت رأسي يوجعني نوم العصر مزعجه كلش.

جريت تلفوني من جنطتي وطلعت رقمه وأتصلت عليه رن مرتين ورد بفرح.
حسين هلأ والله.
ألطاف هلأ بيك شلونك.
بخير، وأنتِ شلونج شخبارج.
مو زينه.
أسم الله شبيچ منو وياچ.
أذا أحجيلك ما تعصب
أحجيلي عيني شبيچ.
أمانه أوعدني.
گتلچ أحجي.
بديت أسولف اله وهو ساكت وختمتها من جنت يم المحاميه وسولفت اله كل كلام المحاميه وختمتها المحاميه تكول لازم شاهد وتقارير طبيه.
ما أشهد ولا أعرفچ ولا تعرفيني طلعيني منها.
ليش حسين.

بدون ليش وبعدين مو بعد وگت لو منتظره تميم يروح السادس أبتدائي فد مره، وين جنتي نايمه عيني! هسه كعدتي من السبات!
شمذكرچ بصخمان وسالفتج الگشره ليش ترجعين للماضي گوه گوه بصياح ليشششششش نايمه بالماضي واللي راح ما يرجععععع بس فهمينيي ليشششش!
تحبينه مو اي أكيد بعدج تحبينه وتردين تتنقمين منه بلكي تكدرين تنسين مو هاي غايتج مو مووو.

يا حب تحجي عنه أكرهه كره الدم وما اطيقه بعيشة الله أني ووووووين وأنت وووووووين.

لعد عوفي خيولي جلب وينبح وبس الطاف طلعي نفسج من المعمعه خليج بعيده عن هالنماذج ما صدگتي ربج طلعج منها ترجعين بيدج ورجليج ليش عبالج اذا رفعتي دعوه لو قدمتي شگوى راح يسكتلج اللي شمر زوجته أم بيته ام بنته ما يسوي الأكبر منها هيج نماذج مسقطين الأول والتالي لا صلاة ولا صوم ولا ديانه ولا مذهب الميخاف من ربه ميخاف من العبد من الاخير اكولها الج رجعتي لنار برجليج، لن قبل ما مشيتي واشتكيتي عليه وتقاريرج جانت موجوده ما قبلتي من جانت سالفه حاره وبعدها أولها ما حجيتي بس هسه صحيتي على وكتج من شفتي وحن گلبج ابن صطعش كلب.

حسين
حسين طايح حظه ويحجي وياچ تعبتيني الطاف
والله علمود بنتي.
يأكل نعل مكطعه على حلگه الخايس العار خل يتقرب صوب البيت اذا ما نخلته نخل وسويته لحم مثروم وزعته لحمه لجلاب الجوعانه اني مو حسين.
بابا شتحجين أنتِ بكيفه يأخذها شُنوْ الدنيا سايبه وَك كيفه لو كلمن اله ياهو طب غرف واخذ اللي اله.

ليش ماكو قانون بعدين هو مسقط أنتِ شبيچ مو مثل الورده، بس يعرف بيج جبانه وبسرعه تنهزين هددج بالمحكمة وشافچ لوحدج وماكو احد بظهرج وبالاخص أهلچ ضدج مو وياج واحلف عليه رجله ما وصلت محامي ولا يندل درب المحاكم وين، هيج نماذج يخافون من القانون ولا يتقربون.
وهدفه مو زينه هدفه أنتِ! هو مو راجع علمود زينه.

هو راجع علمودج يريدچ تسامحينه بلكي يلين كلبچ ويحاول يدخلچ من غير درب ويرجعچ ذمته لمره الثانيه لن عرف ماكو أحد بحياتچ وعايشه لوحدچ نغل وفكر بيها وأتخذ زينه حجه وسبب!
مستحيل مستحيل والله ما اسامحه للموت
هيج نماذچ ما يفكرون الا بنفسهم وهو الظاهر بعده يريدج.
رادته الكبور واخذته هسه شسويي فدوة ما عندي غيرك حسين ساعدني
ألطاف سحبي نفسچ من المعمه وطلعي منها لاتدخلين النار برجليج.

يعني أبلغ المحاميه تلغي الدعوه.
بهدوء بلغيها والغيها وانسيها وبعد ما تححين لأحد عن ماضيج.
واذا رفع دعوه.
ما يرفع
- تمام
وأذا شفتج واكفه وياه يا ألطاف ما تعرفين شراح أسسوي ما يخطر على بالج والله.
تمام.
يلا ولي.
حسين، قطع الأتصال بوجهي، يمه أكلني وشربني
ليش انطاني مجال احجي يرعدد رعد، خليت تلفوني عالشاحن وطلعت ولكيت مازن موجود وهو شافني گال
مازن شرفت الخاتون هلا ست.
الطاف شعندك جاي بيتي خيكك.

والله اللي رفع السموات بدون عمد اذا فتحتي دفاتر قديمه وسالفتج رجعت انفتحت ويحجون بيها هالمره اذبحج خلاص ما ناقصين فضايح انجبي وكعدي بيتج ولمي جهالج وسگتييي ويامن مندگه تخلين راسج براس واحد شمرچ بمزبله، يعني بايع ومخلص ما عنده لا غيره ولا شرف ولا عرض ولا ناموس مسقط من كلهن.
بس
ألطاف لا بس ولا هم يحزنون القضيه ترجع تنسد وتنطوي ترجع على الركن ويغطيها التراب لما تاكلها الارضى وتنثر هباءاً منثوراً.

أني أكولها الج لا دارس لا موظف لا عمه بعيني خيتي تخسرين وبس تفضحين نفسج وتفضحينا وياج السالفه مرت عليها سنوات أبنج راح يروح الثالث أبتدائي من كل عقلج هسه متذكره هسه.

هسه متذكره لن ماكو احد بظهري ما عندي أهل ينشد بيهم الظهر محد وكف وياي وكالي اخذلج حقج وأنت مظلومه، كلكم صدكتوا كلامه عود اني منهزمه ويه عيشقي صدكتوا ونسيتوا اني تربيتكم وما عندي هيج سوالف شلون صدكتوا وكذبتوني وحكمتوا عليه، انتوا جبرتوني اسكت وما اخذ حقي انتوووا السببب.

بصياح شتردين نفضح نفسنا اكثر ما احنا مفضوحين مو سالفتج صارت على كل للسان كل اثنين يحجون بينا اسكت واحد اثنين بسببج بنات عمج محد يدك بابهم جيره ولزكتي بكصاصنا لولد الولد، محد ينسى الزمن يمشي بس محد ينسى، لهذا تسحبين نفسج وبسسس وسالفتج ما تنفتح مره ثانيه واذا انفتحت والله ثم والله هالمره موتچ مأكد خلاص.
موتونييي وخلصوني واذا اخذ زينه من عندي والله تموت.
ويأخذها بالطمرى هي وأهلها.

ما جاوبته رجع التفت على أبويه وگال
يلة حجي أمشينا.
وين تاخذه.
مازن يرجع بيته ويسكن يمي.!
ألطاف شُنوْ يمك من يمتى هالحجي، أبويه يبقى يمي وهذا الشيء من زمان حجينا بي شغيرك هسه
مازن وضعه تعبان مو مال اعوفه يمج أنتن نسوان وحدجن العالم شتگول عليه وما ارضاها ابويه تعبان وبعيد عني
لا والله شو هسه متذكر أبوك، وين جنت من جان بالمستشفيات وحده واني وذهب وحدنا وياه هسه صار عيب من العالم ابويه بعيد عنك.

لو تريد تلوي أيدي من تاخذ ابويه يمك ما يضل رجال بالبيت وتكول وكتها هي بنفسها ترجع البيت.
يابه تطيري حاير بيج لو حاير بإبويه، أنتِ متخلص مشاكلج عوذه مثل الارضه يوميه سالفه.
واني عبالي تغيرت وصرت حنين عليه واجيت توكف وياي اثاري أنت أنت ما تتغير وقذر عمرك ما تتطهر ضربني كف وابويه صاح بي.
حاتم لاتضرب أختك ولك لا اكسرلك أيدك.

مازن ما تسمعها شتحجي، يعني عاجبك وضعك كاعد يمها ومحد يكدر يجي زياره عليك حتى عمامي ترى ما يصير هيج.
ألطاف خلص أخذه يمك ما اريد احد يمي، عفتهم ودخلت الغرفه مقهوره على الوكت لا أهل بيهم خيك لا اخ ينشد بي الظهر ولا رجال ومن كلهن حظي معثر، بس تميم بلكي الله يعوضني بي واسند ظهري عليه وصلني مسج منه
حسين بلغتي المحاميه لو بعدج
ألطاف هسه أبلغها
لحد الان ادري شمنتظره
ما جاوبته رحت بلغتها وما رضت.

هيام ليش موقفج ضعيف ما توقعتج تنهزين بهالسهوله من أجيتي موقفج جان قوي شصارلج وقررتي تنسحبين
ألطاف ما عندي أحد بظهري هيام حسين ما يشهد ما عندي اي شيء أهلي ضدي عمي ما يقبل ابويه كام يحجي اخويه تعارك وياي مو گيفي اني الدنيا ما نصفتني ما عندي سند
الله يكون بعونج جنت أتمنى أخذلج حقج من هالنذل.

الله كريم نهيت الكلام وياها وصفنت ودمعت عيني بقهر وكسر بقيت بغرفتي لليل يله طلعت لكيت أبويه موجود ما رايح الحمدلله ارتاحيت من شفته موجود والجهال يمه سانده گلبي بي رغم مريض سوده عليه رجال جبير وصحته مو تمام مرات يتخربط بالليل وأضل اني وذهب مناوبه نوب هي تضل يم جهال انوب اني وَك هالمنوال، المهم يصير زين مرت يومين خابرتني المحاميه صدمتني أكثر من گالت.
هيام الطاف لازم نحضر الجلسه.

ألطاف ماشي، نهيت الأتصال المن اروح، بلغت ذهب وگالت.
ذهب شتسوين روحي لوحدج وحليها وياه بوديه ما عندج حل ثاني شوفي القاضي شُنوْ يقرر.
الطاف تمام، سگتت وضل گلشي مخزن بگلبي حتى أبويه ما بلغته ومر هاليوم عليه بتعب وهم شگبره.
كعدت الصبح غيرتلها ملابسها كشختها وهي مبتسمه وكمت لبست رسمي وشلت جنطتي ابويه جان نايم بعده، ادعيلي.
ذهب بكل وقت أدعيلج، الطاف اذا أضطر الامر سامحي وكوليله ما اريد منك شيء بس هالبنت.

ألطاف الله لا يسامحه ولا يغفرله، يلة ماما مشينا اني وياها وصلت الشارع أنتظر تكسي طلع عباس باوع النا صديت وجهي عنه وأجتني رساله
حسين وين.
ألطاف المحكمه.
خيك أن شاء الله
ألطاف رجعت التلفون باوعت عليه مخليك مخبر سري ما شاء الله، وكفت النا تكسي وصعدنا توجهنا المحكمة وصلنا ضليت صافنه أخذت نفس يالله نزلنا اني وياها ولكيت المحاميه موجوده جانوا ما موجودين كعدت انتظر وبنتي بصفي.
هيام زينه تختارين ماما لو بابا.

الطاف أشرت عليه.
هيام حَبيبتي.
ألطاف مر الوقت صاحوا أسماءنا بس هو ماكو وانلغت الجلسه لن هو ما حاضر ومر وقت هواي.
هيام بلكي يتراجع ويعوفلچ زينه
ألطاف بلكي، مشكوره، طلعت اني وزينه من المحكمة وصلنا الشارع وطبكت سياره كبالنا ونزل فيصل منها درت وجهي عنه وكف مقابيلي وكال
فيصل مستحيل أفكر أذيج.
ألطاف خطيه عليك.
لاتسامحيني الطاف بس لاتحرميني من بنتي.

عوفلي هالبنت گلشي ما اريد منك بس أعتقني لوجه الله تعالي بس اريد بنتي منك ترى ما ناقصه البيه يكفيني وما حاجه احجي أنت أعرف.
صديت وجهي منه وتقرب حضن بنته وبادلته الحضن أبتعد عنهم خليتهم لوحدهم، أباوك الهم ما اعرف شُنوْ خله بجنطتها وهي مبتسمه وباسته من خده وهو كام يبجي ويمسح بدموعه، أريد اتقدم واكوله شُنو خلاك هيج تسوي بيه بس ترددت باوعلي نزلت رأسي وتقدمت عليهم
يلة زينه ماما نمشي البيتنا.

فيصل بعد ما ادخلج المحاكم وعد وأعتذر منج بس طالب منج طلب صغير، تمسحيلي كل فتره اجي اشوفها.
لا ما مسموح وزينه تنساها وياريت ترجع تختفي لاتظهر بحياتي بعد وعمري ما راح أسامحك.
علي راحتج ومثل ما تردين يجرالچ هذا هو، مع السلامه زينه بابا أحبج.

حضنها وبوسها وشغل سيارته وراح وعيونه حمر ويباوع النا وضل السؤال يتردد برأسي ليش ما سألتي واذا سألت شراح يغير الافضل ما اعرف هو شخص غامض وعايش بقوقعه من الغموض حياته غريبه الى ابعد حد
وكفنا تكسي وطلعنا البيت، فتحت الجنطه وانطتني رساله أخذتها منها جان مكتوب بيها.

فيصل أعرف أذيتج وهواي أذيتج وأنتِ ما تستاهلين دفعتي ثمن اغلاطي وحقج عليه ياريت يرجع بيه الزمن أخذج وانهزم بيج بس ما يرجع، أحمد ربي واشكره أنتِ عايشه وتشوفج عيني أنتِ بخير، ولاتسامحيني أبداً
الله يسعدج بحياتج. فيصل
عقجتها بيدي قوي ذبيتها بالجنطه لو ضاربني طلقه بنص راسي ومطشر مخي ولا منطيني الهم حسبي الله ونعم الوكيل بيك والله ما أسامحك أبداً ما أسامحك.

وصلت البيت لكيت ذهب تخلي نفط لصوبه تميم اجه لو بعده.
ذهب اجه من المدرسه وعمه مر أخذه.
ألطاف ليش مو الجمعه والسبت يروح يمهم وأبوه دوام والعلويه اللي أعرفه ما موجوده بالبيت بيت أهلها منو يدير باله عليه وهو وكح وعنده املاء واجبات والجو بارد هالولد يشلع گلبي.
گتله امه ما موجوده من تجي تعالوا كال ميحتاج أني عمه مو غريب.
فهمت بيت عمه.
شصار وياج.
حجيت الها.
يعني هو متعمد ما اجه لجلسه وأنلغت
أي.

بعد ما نشوف وجهه النكس.
خاله زينه كاعده
ماشي سكتت يلة خلصنا والله هد حيلنا جنا خلصانين.
داخله أبشر ابويه خطيه اعرف باله يمي.
أبوج من رحتي الأن يرد من رأسه معدته تملخت يمكن هم هاج القالون، أنطيته علاج ونايم هسه
القالون حيل متعبه سوده عليه حتى ولا يكدر يأكل فايته أشوفه، دخلت لكيته نايم ويون هاا يابه شلونك.
حاتم الحمدلله على الله.
ألطاف أخذك الطبيب.
معدتي تعبتني.

بيه ولا بيك وجهك أصفر، كمت خاله لبسي نأخذه المُستشفى والعصر نودي العياده ل الدكتور مالته شنو يكولنا بوضعه الصحي.
ذهب هسه البس عبايتي وأجيج بس اغسل أيدي من النفط، شو جان ماكو برد من نصصنا بشهر ال 12 بلش البرد.
يمعوده خلينا هيج، يشلع گلبي البرد اضل رايحه جايه الأطباء لو تميم لو زينه لو ابويه بس اني وياج ما نتمرض.
أسم الله علينا، يلة هسه اجيج.

ألطاف دخلت طلعت فلوس مجمعتهن، ولبست الكوت ولبست زينه زين، وست انوار اتصلت هلا گلبي.
أنوار هلا عيني زمان ما شفناج أجازتج كثرانه ولج ويأثر عليج.
أي والله ما دوامت وباجر ان شاء الله اجي عندي شغل خلصته وأبويه مريض.
خيك أن شاء الله ما بي غير العافيه.
الله يعافيج، نهيت الاتصال، منين تخلص المشاكل يوميه طالعتلي مشكله صفح، أمشي ماما، طلعنا ورحت جبت تكسي للباب وتوجهنا المُستشفى.

أخذوا من عدنا على مغذيات على تحاليل ونفس كل مره حتى شگولنا حفظوها، كعدت وزينه بصفي
للعصر أخذته العياده للدكتور مالته مر وقت واجانا الدور، دخلنا اني وياه وشافه وضعه وسؤال وجواب
الدكتور أبوج تعبان ألطاف اريدج تهتمين بأكلاته والسكر مرتفع هواي وضغط لازم يدخل المُستشفى.
والله دكتور ما مقصرين.
هو هذا القالون مرض مزعج، خاصه هو عنده أمراض مزمنه.

كتبت اله على علاجات ودخله المُستشفى علمود الأبر والمغذيات والدكتور يكون موجود يشرف على حالته.
طلعنا توجهنا المُستشفى، دخل الردهه وأستلموا الممرضين، كعدت صافنه عليه لاتهد حيلي بويه ما عندي غيرك.
ذهب كومي رجعي البيت تعبتي لمي جهالج وكعدي واني ابقى يمه الجو بارد بنتج خطيه شُنوْ ذنبها.
ألطاف خاف تحتاجين شيء شلعت گلبج ادري ما شفتي شيء من هالزواج بس التعب.

أني ما تزوجت أبوج علمود اريد الزواج، اني تزوجت علمود ما أعوفج لوحدج.
دمعت عيوني ياريت كل ناسي مثلج، وكفاتج لو أمي عايشه ما توكف وياي بكثرج عسى ما انحرم منج فتحت جنطتي خليت فلوس بيدها واي شيء يصير خابريني.
أن شاء الله روحي أرتاحي واكلي لكمه هالفتره المرت أخذت حيلج حيل ضعفتي عساها بعافيته ان شاء الله يارب يفگنا شره وبعد ما نشوف خلقته.

الطاف أمين، طلعت من يمها وأخذت تكسي للبيت بالطريق دزيت رساله اله تميم يمك لو بعده بيت عمه
ومُباشرةً رد عليه.
حسين هلا عيني، أي يمي جان بيت عباس رحت جبته ومصخن هسه رجعنا من الدكتور.
شُنوْ لاتكولها فدوة
أي والله مأخذ برد انطاه علاجات وهسه كاعد يشرب حليب يم أمي.
جيبه اليه فدوة گلبي نار عليه.
لا خلي بارده هسه، باجر الظهر من يرجع مدرسته أجيبه الج.
شيصبرني، ماشي على راحتكم.

شُنو أنتِ مو بالبيت لن الأضويه طافيه!
أي بالمستشفى بابا أتخربط دخلوا وهسه اني وزينه راجعين.
وحدكم.
أي.
ماشي ديري بالج على نفسچ.
أن شاء الله، طلعت من المحادثه، ووصلنا الاسواق مالتهم مفتوحه، نزلنا برأس الفرع أنطيته الكروه ونزلت وصلت الاسواق مالتهم لكيت العمال مرحباً
أهلاً ست أتفضلي.
شُكراً، أخذت أجبان وقشطه، وكعك ودبس وراشي وحلويات ل زينه خليتهن شوفلي الحساب شگد صاك.
واصل ست.
شُنوْ واصل ما اخذهن والله.

ما اخذ منج والله السيد حسين ما يقبل مانع نأخذ من حضرتج.
ما أخذهن لعد هذا رزقكم ما يصير.
توصيات بعد.
ألطاف شُكراً ما أكدر اخذهن، يلة ماما، مشينا
خطيه يحاول لا أتعب نفسك ما اخذهن.
طلعنا وتوجهنا البيت فتحت الباب ودخلت وقفلته وراي فتحت الاضويه شمرت الكوت، فتحت الثلاجه ما بيها شيء خابرت ذهب وحجيت الها.
ذهب هو من زمان ما يأخذ
صدك خاله وهسه يلة تحجين.

كم مره أخذت منهم ما أخذوا عباس يأخذ بس حسين والعمال ما يأخذون أني اروح من عباس موجود لن ما يرد وحقه هذا رزقه.
ماشي واني احجي وياها أندك الجرس، عفت التلفون وشلت المفاتيح صحت منوووو وطلعت ماكو احد بس الاجياس يم الباب شفتهن اللي اخذتهن نفسهن باوعت الاسواق عزلوا.

شلون وياكم وهذا رزقكم، دخلتهن وقفلت الباب فتحت الاجياس جهزت العشه دبس وراشي واجبان وكعك وروبه وخليت الجاي على الصوبه ورحت غيرت ملابسي وزينه كذلك وكعدنا اني وياها نتعشى.
نمت وقفلت كل الابواب وحتى باب غرفتي، زينه نامت بحضني تعبت سوده عليه، راسلته تميم شلونه
حسين زين تعشى وجاي يلعب هو والجهال، زهور يمنا اليوم ومتونس بيهم.
دزلي صورته وهو كاعد يلعب، انوب دزلي فيديو هو والعلويه ناصب عليها ويكول.

حسين صايره فقمه دب قطبي باعي اللحم والشحم.
العلويه غير تبطل سوالفك.
ألطاف وجه التصوير عليه ضليت مركزه على تفاصيله وضحكته وهو يسولف وطوله الأحبه وجفوف إيديه وهو يعدل شعره وتنهيدة وهو يصفن بالفيديو وإنتهى الفيديو وجان الختام وجه الحلو.
عدت الفيديو مرتين وأني مبتسمه كتبت اله ربي يحفظكم سلملي عليها.
وصل وهي هم تسلم عليج هواي.
الله يسلمك ويسلمها، تصبح على خيك وتميم.

دير بالك عليها هو دائمًا من ينام حرارته ترتفع.
وأنتِ من أهل الخير، أن شاء الله.
طلعت من المحادثه، خليت التلفون على الشحن ونمت، بين نايمه وغافيه دزلي رساله
حسين بعدج كاعده
ألطاف جريت التلفون وجاوبته توني نمت وسمعت صوت أشعار ليش محتاج شيء
شصار وياچ
شيصير يعني نكول بعد ما نشوفه
ما فهمت شلون يعني
ما حضر ومن طلعنا هو اجه
اي وحجيتوا الطاف وكف وياااااااااج شحجيتي وياه احجييييييي الطااااااف.

ما حجيت وياه بس گالي بعد ما ادخلج محاكم وسحب نفسه
هاا شعجب
يمكن ضميره صحى
لا كلبه حن اسأليني أني، أخر مره توكفين وياه وهاي اخر مره احذرج بيها ابتعدي عنهم لاتعلين كلبي وياچ
أن شاء الله
رجعي نامي باي.

باي نمت وكعدت الصبح على صوت المنبه، كمت كالعاده نفس الروتين تجهزت وسويتلي لفه وزينه لبست ولبستها كلاو والكوت يلة ماما أخذج وياي ل الدوام هزت رأسها ومشينا واجه ابو الخط وتوجهنا المدرسه والمدرسات يحجون وياها حبوها هي محبوبه بس مع تحجي حسيتها تونست، وطول فترة الدوام هي وياي وبالدرس اخذها اكعدها اول رحله واني اشرح هي مبتسمه وتباوعلي بكل حب كإنما تكولي فخوره بيج ماما.

الطالبات حبوها هواي عدها شعبيه شكلها البريء عيني بنيتي، خلص الدوام وأتصل عليه جاوبته
هاا عيني كلتها بدون وعي
حسين هلا عيني، شسمه تميم ما راح اجيبه خلي يمي هالفتره اعرف ابوج مريض واذا اجيبه يشلع گلبج هو وكح بسلامته والجو بارد ومريض يصير زين واجيبه.
بس مشتاقتله
هو هم مشتاقلچ.
تمام على راحتك، اني هسه راح اطلع المُستشفى بس أتغدى من ارجع عود نتخابر، بلكي يطلعون بابا
ماشي نتواصل.
تمام، باي
الله وياج.

الطاف إنتهى الأتصال، سويت مقليات وتغدينا وطلعنا هالفتره حيل تعبت أنهد حيلي والله، وصلنا المُستشفى وتفأجئت بابا ما موجود سألت الممرضه
الممرضه اجه ولد كال اني ابنه وسواله خروج واخذه وياه.
شلون يطلع وهو تعبان ويحتاج رعايه
كال بالبيت يوفرله عنايه والدكتور سمح بالخروج.
تمام مشكوره، سويتها مازن وأخذته يمك وكسرتلي ظهري، خاله ذهب ليش ما بلغتني إبداً
أتصلت عليها وأجاني صوتها هاا عيني.

ذهب اعذريني ما بلغتج بس صارت عالسريع أخوج وعمامج اجو أخذوا، وأني ما ردت اروح والله بس أبوج كالي تعالي وياي
لا عادي المهم راحته، شلونه هسه.
لا الحمدلله زين هسه أحسن عمامج يمه والبيت مليان شوي تغيرت نفسيته.
الله يدمها.
خوما زعلتي او ضجتي.
لا عادي ليش اضوج من حقه يشوف أهله اني خنكته بالحياة او يمكن اني سبب مرضه.

لا هيج تحجين وتكطعين گلبي عليج، لو بيدي اعوفه واجي يمج بس تعرفين زوجته وامري مو بيدي وين اعوفه وهو مريض.
لا خليج يمه على أقل أطمئن عليه واعرف أخباره عن طريقج، ديري بالج عليه.
بعيوني، عيني أنتِ لا تزعلين بس يصير زين ارجع يمج ما اعوفج والله.
لا خاله ابقي يم رجلج مريض خليج مني الله ما يكطع بعبده الحمدلله على كل حال، مع السلامه.

رجعت البيت حيل مقهوره وبداخلي غصات مو غصه انوب أبويه وذهب راحوا من يمي شلون راح ادبرها لوحدي شلون ألطاف
رجعت البيت وسياره طابكه يم بابنا خيك منو انوب!