رواية أغلال زمن الغيهب للكاتبة مرمر الدليمي الفصل العشرون
أبتسمت اباوع الوجهة وخالتي آيات عافت سفانه وضلت تباوع الغهيب فرحااانه بي حييل وتعوف كلشي وتركز بكلامه من يحچي وياي عيونها تلمع من تباوعلي
منار:
وكفت ساكته من دخل سلار حط علاكه حلويات چبيره وصاح
سلار: منار هاي الچ أنتِ وسبأ.
هزيت راسي
: اي.
دار وجهة يريد يرجع واني صحت
منار: سلار.
رجع دار ضهره عليه عينه على الكنتور
سلار: ها.
تقربت وكفت يمه محضر روحه يريد يروح للخطوبه مال غفار وسفانه
فركت ايدي اباوع الوجهة.
: ضايچ هواي؟
بقه ساكت باوعت الركبته من بلع ريگ بينت
: سلار تحبها؟
رفع عينه الوجهي أول مره واني كدامه عيني بعينه يحچي بخفوت
سلار: منار اول مره گلبي وعقلي مختلفات گلبي يتعب لو ذكر هيه نفسها الطلبتها الصاحبي وعقلي يفرح لان عضيدي يستاهل تكمل فرحته وما اكسرها اني.
تجمعت الدموع بعيوني گلبي ينعصر من حچيه اول مره يفضفض ويحچي هيچ وياي حچيت راده عليه
منار: شلون حبيتها سلار شلون.
رد الغصه واضحه بصوته.
سلار: ما أدري أني الاستحي امسح على راس وحده منچن وانتن خواتي گلبي عتني الشوفه وجهها وهسه يتراولي وجهها حته بيكم وأنتو اهلي
نزلن دموعي حارات على خدي ربي ليش هيچ اخوي عاش مشلوع كلبك من ذاك يومه الحد هسه
منار: أشيل التعب من كلبك وأخلي بكلبي لو بيدي.
نزل عينه صافن وأبتسم بقهر يحچيلي
سلار: منار عشت وفهمت وصف مراجعيني من يكولون عيوني يغوشن واشوف بس سواد ساعه الكلي رايدها .
: سوده عليه.
: ياريت انسى، أنطبعت ملامحها بعيوني كبل گلبي.
: سلار اقرالك دعاء؟
رفع عينه ألي يسأل
: يبرد نار گلبي؟
تقربت حطيت أيدي على مكان كلبه وغمضت اردد بسوره الشرح وأدعيه ثانيه واني گلبي صاير دمام يدك وجع من شفت هيچ وضعه.
هُذال:
الناس كلها اجت ومن ضمنهم وسن وأمها وابوها جاسم ماهتميت الها ولا أختلطت وياها اساساً عفتهم كلهم وبقيت وي سفانه ألي عبالك حاكميها اعدام مو خطوبه ومن شخص تعرفه.
باوعت السفانه وركضت صعدت فوك الغرفتي جبت حمره حمره السفانه تطوخها قبل ليلبسون الحلقات رجعت صاحتني مره
ام غفار: حبيبتي بلا زحمه عليچ الجگليت حطته اسراء بنتي بلمطبخ جيبي.
هُذال: تمام گلبي ثواني.
طلعت اريد اروح للمطبخ بأيدي الحمره باوعت جوه من حسيت واحد مچلب بيه
- خاله خاله.
هُذال: ها حبيبي.
- عمو الولد يصيحچ.
- منوو؟
شال أيده ياشر على حاجبه
- منا عده حاجب مكطوم.
ضحكت حيل على المصطلح مالته
- غهيب.
- ما أدري كال صيح بنيه شعرها طويل لابسه اسود بلمطبخ.
كرصت خدوده وبستهم عفته ورحت للمطبخ طبيت المطبخ فارغ فزيت على طبكه الباب حطيت أيدي على گلبي بسرعه صديت وره ذبيت نفس مهبوطه
هُذال: غهيب صدك تحچي گلبي وكع.
هز راسه يباوع لباب المطبخ باله مو وياي
غهيب: هذا المطبخ يرادله مثل باب مكتبي.
رفعت حاجبي اباوعله
- علمود ينقفل ثلث قفلات.
صد عليه مبتسم
- تفتهمين.
باوعت أله مبدل لابس دشداشه بيضه ومحدد لحيته لازم سبحه جوزيه وشعره مرتب بطريقه حلوه
هُذال: شوكت لحكت؟
رفع أيده يباوع لمرايه المغسله ويعدل بشعره
غهيب: شنو مو حلو؟
سكتت اباوعله فر السبحه بأيده
غهيب: وين صفنت.
هُذال: صفنتي مو صفنت مو ولد اني.
: وأنه اشهد بأنوثتچ والبنات الكتلتيهن يشهدن.
: اكلك شو چنك محترك كلبك عليهن؟ كلساع وجبت طاريهن.
غهيب: شو چنك ضجت شكو.
يفر بسبحته كدامي عود يغثني ما أعرف شيريد حرت احجي لو اسكت درت وجهي منه ضايجه وأخذت الجگليت جر ايدي وكع الجكليت
: شبيچ؟
: لا تدافع للبناتت الضربتهم!
: عليمن ضايجه أنتِ.
: معليك.
: هاي شني؟
: يلا وخر خل افوت.
: هُذال.
: نععم.
: زعلتي؟
: أنتَ شتكولل؟!
وخرت ايدي منه شال الجگليت وحطه بأيدي وفتح ايده مسويلي طريق
غهيب: تمام فوتي.
رفعت حواجبي اباوعله كلت بنتر
- خوش.
شمرت شعري وفتت منه بنتر قبل لا اول الباب أندك بسرعه غَهيب كال
غهيب: منوو.
اجاني صوتها الأنعم منه ماكو فجأة تحول
وسن: أني غهيب.
رفعت حاجبي وصديت على غهيب كانما اكله كل عقلك اعوفك واطلع وي هاي؟
اشرلب بأيده شكو؟ حطيت الجگليت على الكاونتر ركضت للمرايه أكول الغهيب أشرله يكلها ثواني.
اخذت الحمره الجبتها عود السفانه حطييت منها لون طوووخ حييل باوعت الغهيب ماهامني الاريد اسوي كد ما اغث وسن
وكفت يمه اهمس.
هذال: أريد اغثها.
ابتسم بمكر مفتهم الأريد اسوي
غهيب: شلون.
هُذال: ماعليك اني الأسوي غلس عليه.
وبسرعه رفعت روحي اله وبسته بخده حييل لف أيده على خصري رافعني اله بكل قوته ابتعدت وجهي يطلع نارر وهوة عيونه ذبلانه يحچي بذبول
غهيب: نعلعله صفحتچ.
دفعته بسرعه مبتعده عنه
هُذال: لاتمسحها.
أخذت أيده ومشيت للباب فتحته مبتسمه بوجهي صارت وسن بس شافتني موجوده راحت ابتسامتها تباوع الخد غَهيب وحمرتي الطابعه بخده.
هُذال: تفضلي حبيبتي.
أخذت الجگليت وغهيب يمشي وراي وكفني
غَهيب: طركاعتچ شلون تنمسح.
هُذال: اكو كلنس مرطب بخانتي الثانيه تلكاها.
: ما اندل تعاي أنتِ.
هزبت راسي ومسحت الحمره من حلكي وفتت انطيت الجگليت الأم غفار وطلعت اركض وطلع حساسي بمحله وسن واكفه يم غهيب زفرت نفس استغفر ربي
وكفت يمهم مبتسمه بوجها
هُذال: غَهيب.
شبك أصابيع ايده بأيدي
غَهيب: ها بابا حبيبي.
هذال: نروح؟
باوعت الوسن
: كولي أذا تردين شي.
وسن: لا بس ردت اسئل غهيب كم سؤال خاص بس مدا تصيرلي فرصه.
هذال: احچي هسه عادي.
وسن: لا على غير مره.
ابتسمت بوجها وسحبت غَهيب من ايده صعدنه فوك وبس طبينه الغرفه تخوصرت
هُذال: شكلتلك؟
ضم ابتسامته تفاحه أدم تصعد وتنزل بركبته
مايرد ساكت
: غهيب.
: ها.
: لاتغثني شكالتلك.
: ماحچت بعدها توها تريد تغرد وانتِ اجيتي.
: تغررد؟! شنو بلبل واني ما ادري لو عاجبك صوتها.
سكت ما رد مشيت بنتر افتح بلجرارات واركع بيهن طلعت الكلنس سحبت وحدت حيل
وكفت يمه قدمتها باتجاها احچي كالبه وجهي
: هااك.
رفع حاجب ونزل حاجب يباوعلي
غَهيب: أنتِ السويتيها أنتِ التمسحيها.
زفرت نفس محترك گلبي واريد احچي وارجع اسكت
مسحتها حييل من خده ودرت وجهي أمشي واحچي
هُذال: عوود هم خل الكاهاا خاتله وياكك.
ضحك حيل وسحبني من ايدي مرجعني عليه ميت ضحك يحچي
غهيب: ولچ تعبتيني شتردين.
هُذال: شمسويتلك متعبتك هاا؟ لو غثيتك لان قطعت حديثك أنتَ وهذيج الصفره.
غهيب: موو صفيت وياچ وكنالچ حبيبي وسمحنالچ تبوسينه بعد شتردين
: لااا خاف ازعجت حضرتكك وانتَ ماتقبل من مالكيتني لابسه حلقه ماسويت سوايه لذلك شسوي اسوي براحتي مالك علاقه.
: تصلي صلي رشاشتچ بلحسين.
: وانتَ خزراتك بس يمي مشتغله ماتكدر تكلها مزوج لاتضلين تركضين وراي هاي صعبه بس على وسنن لا يابه ياهذال يا بطيخ.
عض شفته يحچي عينه بعيني.
: أويلي علييك اويلي على دمك المحترك.
: ارد انزل شون هسه لازم ايدي تاخذ مرااد؟!
رفع ايدي لشفايفه بايسهم مغمض عيونه هوااي طول يلا بعدها من شفايفه باقي لازمها بين اديه
غهيب: هُذال.
هُذال: ها.
: وداعتچ ماشايفها بعيوني.
بقيت ساكته وهوَ كمل كلامه
: ولو ما كايله انتضرني أنه عايفها وماشي من أجت.
حضن وجهي بين أديه يباوع بعيوني منتضرني احچي هزيت راسي أي ابتسم حط شعري وره أذني يحچي بهدوء.
غهيب: وهذا شعرچ لمي لاينحسد وتبقه ريتي بعازه عطره ترى بديت اضوچ من اشوفج فاتحته يمهم.
هُذال: بعد قشمرني بعد.
: ما أچذب عليچ.
: ادري بيك ادري.
: عوفي القشمره بعدين نتفاهم على موضوع وسن شعرچ لمي.
: ماا.
بقت عيونه تتنقل بين ملامح وجهي ساكت واني انتضره يحچي يكلي غصبا ماعليچ علمود اعانده بس هوَ هز راسه ودار وجهة يريد يطلع
هُذال: يلا راح المه.
اخذت القراصه من الميز ولفيته نزلت جوه وهوَ راح للزلم واني طبيت يم النسوان
شفت اسينات ونور واكفات يم سفانه وهيه تفرك بأديها تباوع بلوجوه تريد تلمحني رحت يمها
هُذال: ها سفانه.
سفانه: هُذال بعد ما اريد خل ابطل.
نور: تريد تفشلنه.
هُذال: شبيچ سفانه صدك تحچين ترا مو عرس خطووبه خطووبه.
سفانه: ترا گلبي وكع خل يطب يصخم الخلقه يحطها بسرعه راح اتخربط.
سفانه:
أني كلت هيچ وهيه صوت الهلاهل عُلى.
بلعت ريك من ماما همست يمي
آيات: راح تعقدون سيد شيكولچ السيد ردي وراه.
هزيت راسي بدون ما احچي كعدت على الكرسي الصاير يم الباب حطت هذال القران بحضني والهيلات وأم غفار كدامي مبتسمه
بده السيد يحچي
- ترضى ب سفانه ذو الفقار على كتاب الله وسنه نبيه وعلى المهر المُسمى 25 حاضر
و 30 غائب أذا قبلت قول نعم قبلت الزواج.
غفار: نَعم قَبلتُ الزواج.
- زوجتك موكلتي سفانه بنت عقيل هل تقبلين الزواج على الصادق المذكور غفار أبن احمد زوجاً لكِ أذا قبلتي فقولي نعم وانتَ وكيلي.
سفانه: نعم وأنتَ وَكيلي.
رجعت كعدت على الكوشه گلبي رجف من سمعت صوت الهلاهل عِلى رفعت راسي غفار صار كدامي لابس قاط رصاصي عطره وصلني قبله وكف يمي عيونه تلمع و همس
غفار: مَعشوگتي.
نزلت عيني مرتبكه نور كدامي تصور هلهلت أمه مقدمه الحلقات سحب الحلقه من العلبه وقبل لايحطها بأصبعي رفع أديه لازمهم بين رفعها لشفايفه بايسهم عمى عيوني فلاش نور كد الصور لبسني الحلقه ورجع عاد نفس الحركه وباس أيدي يهمس
غفار: أدياتچ بدونها ينباسن و ويه الحلقه ينباسن لأن تثبت أنتِ بأسم غفار.
يرجف جسمي من شواربه تصير على ايدي ومن يهمس قريب على اذني سحبت الحلقه من العلبه ولزمت أيده لبستها اله.
شبك أصابيعه بأصابيعي لازم ايدي يمسح عليها بأبهامه هُذال تباوعلي عيونها تلمع وماما كلساع تدير وجهها مني تمسح بعيونها أم غفار كلساع تدنك تبوسني مكيفه بيه باوعت على الباب شفت بنيه شابه حيل حلوه
تباوع النه واكفه يمها اسراء اخت غفار وبيها شبه الها اعتقد اخته الچبيره بس ابد ما اجت يمي ولا حتى سلمت عليه.
علي ماخلصت نور تصوير طلع غفار انطتني جهازي هُذال فتحته اريد اصور بي أتصل حيذم أنطيت رفض هوسه والديجي مشتغل
دزيتله
سفانه. هاا حيذم؟
حيذم. سفانه راح أتصل انطي الجهاز النور
. نور بنت خال هُذال؟!
. اي
. شنو شتريد منها
. بعدين اكلچ انطي الجهاز الها من اتصل
. مامرتاحتلكم
شافها ومارد خمس دقايق وأتصل باوعت النور وللجهاز
سفانه: نوور.
نور: هاا سفانه.
: هذا حيذم يريدچ.
فتحت عيونها على تدير بوجها للغرفه
: وينه؟
: هناا هنا بلجهاز جاي يدك!
باوعت عليه متربكه وسحبت الجهاز من ايدي وطلعت هزيت ايدي اباوعلها وكفت يم هُذال مدري شحاچتها وراحت كعدت يمي هُذال تباوع صفح لوسن
كعدت بصفي تهمس
هُذال: هيه هاي منو عزمها منو.
سفانه: شبيها.
: ولچ اختنگتتت من اباوع الوجها.
: ختولي عوفيها.
: شكلچ مساع غفار.
باوعتلها بطرف عيني
: وانت شعليچ عينيي.
: والعباس اطيح حضچ سفااانه.
: حبيبتي هسه أنتِ كلتي من غهيب حچه وياچ.
حچت عاوجه حلكها.
: يا كال هوه غير حته حلقات مالبسنه كل واحد لبس مالته وحده.
: صح نسيت.
: شحچه وياااچ.
: كالي مَعشوگتي.
حطيت أيدي على وجهي اغطي خجلانه وهذال تعب حلكها كد ما جرت ال أوي.
هُذال: اوووووييييي ياروحييييي.
راحت ضحكتها من باوعت الوسن طلعت
هُذال: راح الغهيب ميه بلميه.
سفانه: مترحين وراها؟
: دخل تولي اذا غهيب ينطيها مجال اصلاً.
: والله اني لو منچ اكضها واكتلها شنوو تركض وره رجلي خير ان شاء الله.
رفعت تك حاجب تباوعلي متفاجاة
: حبيبتي هسه هم وحده تلحكچ على رجلج وعود كضيها وكتليها.
نور:
فتحت خط وصعدت الغرفه هُذال كالتلي صعدي محد بيها سديت الباب ساكته اجاني صوته
حيذم: غزاله.
نور: ها.
: ارد اشوفچ.
: حيذم.
بقى ساكت مارد وكفت كدام مرايه هُذال وهوه راح صوت الهوسه من يمه ورد
: فدوه رحت الأسمي بصوتچ.
سكتت أستمعله وهوَ هم ساكت رجعت كتله
نور: اليوم عندك خفاره ليش أجيت.
: خاطر اشوفچ.
: ما أجي.
: تعلعلت مرتين قبل لا الكاچ ووره ما لكيتچ.
نور: لا تنتضر حيذم ما اجي.
حيذم: لاتجين تعبيني كد مابيچ.
: راح اروح انزل.
: روحي.
سديته منه ونزلت جوه حطيت الجهاز بايد سفانه وكعدت ساكته افكر بي وبكلامه جرتني اسينات وهذال وكفنه يم شباك المطبخ من بدو يطلعون الزلم
اسينات: فدوه باع بابا.
نور: هسه ابوچ ما شايفته باعي على غير شي.
هُذال: شكد متستحين نور.
: ههههههههههه.
باوعت على حيذم ساند مُهاف يمشي على كيفه وغفار يصافح بغهيب
اسينات: هُذال.
هذال: هاا.
: ليش مخليه استاذ غَهيب يلبس دشداشه بيضه هسه ينحسد.
: شيبني شيلبس يلوك مو زين ما لبس رسمي وقفل عليهم.
نور: غيير تكعد الماخذه توم كروز.
اسينات: احلا منه.
هُذال: ولا تستحين صايره اسينات.
اسينات: دعوفي المستحه باعي مُهاف حته وهوه مكسر حلو.
آيات: أخذچ اله؟
كمزت اسينات تباوع وراها واكفه خاله ايات ضحكت هُذال بكل صوتها من وجه اسينات كام ينطي الوان واني تفشلت ببدالها فرگت ايدها اسينات فشلاانه
اسينات: خاله...
آيات: اشاقه وياچ حبيبه عليمن صار وجهج احمر.
هُذال: حييل اسينات.
دارت عليها خاله ايات متخوصره
ايات: وانتِ شكو واكفه تباعين مو مره مزوجه بلا هنه عزبات ويتخيرن بكيفهن أنتِ شكو.
عوجت حلكها هذال ترد عليها
هُذال: وانتِ شكو جيتي لعد هم تريدن تختارين.
آيات: شعليچ بيه أنتِ اني مره مكبره خلفتي واريد منا وهيج اشوفلي رجل واخد.
حنان: ياا ايات شمالچ صدك تريدن رجل؟
دارت ايات على اختها فازه
ايات: شنوو تحاسبيني.
هُذال: وصاااارت عركه مصراوييه بين الديچ والواويه.
دارن عليها جنان وايات متخوصرات
: ياهيي الواويه؟!
سكتت هُذال تباوعلهن
هُذال: اشاقه.
ضحكن بصوت عالي من شافن ارتباك هُذال هيچ بدون اتفاق يكلبن عليك ثنينهن وعبالك صدك ضاجن منك وهنه يتشاقن ماتكدر تفرق بين شقاهم وصدكهم.
دارت ام حيذم عليه تحچي بلطف
حنان: وانتِ يلغزاله شعدچ واكفه وياهن.
راحت ابتسامتي من كالت غزاله وبسرعه اجه ببالي حيذم حاچيلها؟
نور: واكفه وياهن عل واهس.
ابتسمت بوجهي وراحت
هُذال:.
فضت هوسه الناس وكلمن رجع البيته بقت بس ام حيذم وبيت جاسم خالو راح هوَ والبنات وسميحه سبحت سفانه وبدلت ونزلت يمنه لملمت البيت شلون ماچان وصعدت فوك الغرفتي اقره اكثر من 3 ساعات ونص نزلت
ام حيذم وخاله آيات لامات البيت كلة
بيت عمهم جاسم يتعشون ويرحون بس ام حيذم تبات هنا
ساعدتهم بلعشه غَهيب ابد ماشفته بس من جاب مسواك حطهم بلمطبخ انطيته مي شرب وطلع ضل كاعد يم الزلم.
غربت الدنيا حضرت المصلايات الهم و وسن ابد ما حچيت وياها ولا تجادلت وياها اساساً مامخليه الها اهتمام من سولفلي غهيب
صلو وخلصو فرشنه السفره دخل عم غهيب سلم عليه ودخل جوه
اجت ويانه وسن تنقل الاكل ساكته وامها حييل هادئه ابد ماحچت.
كعدنه كلنه على السفره حته مُهاف ويانه ورجله المجبره مادها
اني كاعده بصف غهيب من جهة وسفانه من الجهة الثانيه كاعد بصفها عمها جاسم.
غهيب و عمه يحچون على المحلات لأن هنه 4 محلات واحد بيهم ماركت مشترك بين غَهيب وعمه غَهيب يحط كبالي اكل رفعت راسي الوسن تباوع النه رجعت نزلت راسي اكل مامهتمه
جاسم: أنتِ شلونها دراستچ عمي.
ابتسمت بوجهة
هُذال: خير من الله عمو.
جاسم: الله يوفقج ياعمي.
هُذال: للجميع أن شاء الله.
وسن: ياصف أنتِ هُذال؟
: سادس.
وسن: مرحله مصيريه لازم تسوين اضراب على الكل وتكعدين وحدچ تقرين.
هُذال: بفتره المراجعه طبعاً.
: صعب.
: عادي اقراه.
سفانه: مو صعب بس يرادله تركيز وانتِ وسن مطلعه معدل 52 لو 51 ما أعرف المهم تحسي صعب.
وسن: ما احسچ تطلعين معدل.
ام وسن: حساس بنتي دائماً غلط أطمي حبيبتي.
هُذال: هوه كلشي بيد رب العالمين اذا حست او لا.
حيذم: هُذال أكو مدرسين زينين ذكريني ادزلج اسمائهم.
هُذال: ان شاء الله.
باوعت المهاف كاش وجهة يباوع الوسن كرصته من ايده اخاف واحه يباوعله هز راسه ونزل راسه مكمل اكل.
اني افلس الحلم واحطه على لكمه مُهاف وغهيب يفلس لحم ويحط على لكمتي
اباوع الخالتي ايات تضحك من جوه الجوه مدري على شنو ندست غَهيب بعكس ايدي
هُذال: عليمن تضحك خاله ايات.
رفع راسه الها ورجع نزله الي
غَهيب: احد كلج اني عالم الغيب.
سكتت مخلصه اكل ندسني مُهاف بأيده السليمه
مُهاف: عليمن تضحك خالتي حنان؟
رفعت راسي الها ورجعت باوعت المهاف
هذال: احد كلك عالم الغيب اني.
: لان تباعين عليهن عبالي تعرفين.
: لا ما ادري حته امك تضحك وياها.
: سألي سفانه بلا.
درت راسي الغهيب
هُذال: غَهيب اسأل سفانه عليمن يضحكن امك وخالتك.
غهيب: شنو امك شنو خالتك كولي عمتي وام حيذم.
هُذال: اساسا اسمي امك خالتي يعني ما أكول هسه دسئل سفانه.
حچه وي سفانه وهيه نزلت راسها تضحك وياهن وحچت الغهيب همستله خزرها غَهيب ماراضي وهيه نزلت راسها مخلصه ضحك.
دغيته بكتفه اريده يحچيلي خلص اكل بدون مايحچي
هُذال: هاا شكلتلك.
غهيب: تكول امي عمي جاسم يفلس الحم ويعوفه ويكرط بلعضم.
دنيت راسي المهاف احاچي
هُذال: تكول امك عمك جاسم يفلس اللحمايه ويعوف الحم ويكرط بل...
دنكت راسي اضحك واباوع الام غَهيب وام حيذم ماتن ضحك وسفانه وياهن واني وياهن بس غَهيب وحيذم مايضحكون ويانه
اريد احچي واكمل السالفه المهاف مااكدر ميته ضحك
باوعت السفانه ونزلت راسي ضحكات مني فلتن خزرني غَهيب انتبهت النه وسن
وسن: عليمن تضحكن بنات ضحكنه وياچن.
بسرعه باوعت الأم غَهيب وام حيذم سكتن سون روحهن اصلاً ميدرن بلسالفه ولا ضاحكات وسفانه مدنكه راسها تاكل وتضحك حرت على شنو أكول والنوب كلها انتبهت وياي ضغطت على ايد غهيب اريده يحچي ببدالي ويطلعلي حجه
وأبد ما حچه باوعت أله ضام ابتسامته يضحك عليه نقذني مُهاف من كال
مُهاف: سالفه اني وياها.
ذبيت نفس براحه مكمله اكل كله من وره خاله ايات ضحكتنه وطاحت براسنه.
شكد احبهن هيه واختها من ينجمعن عبالك يرجعن زغار وحده تضحك على الثانيه
نحسبو واحد وره الثاني من السفره لميناها اني وسفانه صبينه چاي بس شربو وشويه وراحو
ام حيذم كنست الصاله ونامت وكفت خاله ايات تعبانه تغسل مواعين اخذت الجلافه منها
هُذال: روحي خاله اني اغسلهن.
آيات: روحي اقري حبيبتي اني اغسلهن.
: معليچ بقرايتي روحي ارتاحي وسولفي وي اختچ.
ابتسمت وراحت اجتي سفانه بأيدها الملزمه حطتها على الكاونتر وتمسح وتقره خلصت وطلعت تفتر يمي وتقره
واني اغسل بلمواعين وكلساع اصفن شلون راح الحك اقره للأمتحان لو اليوميات بلعت الغصه وكملت أغسل مواعين دخل غَهيب وكف يمي
شرب مي واكف يم الثلاجه
غهيب: روحي اقري هُذال.
هُذال: هسه بس اخلص.
وكف بصفي واخذ الجلافه من أيدي
غهيب: روحي اني اغسلهن.
: ياا شسالفه روح اكعد يم حيذم اني اكملهن.
: طلع حيذم يدور صيدات روحي أنتِ انه اغسلهن.
: غهيب.
: روحي بابا عيني خلصي اقرايتچ.
ابتسمت بوجهة وكلت بدون انتباه
هُذال: فدوه ل لله وللأنكليزي شكد حباب.
ضحك وهز راسه مأيس مني اكوم انتبه الحچي
واني طفرت لفوك اقره بدلت ملابسي ولفيت البطانيه عليه وحطيت كتابي بنص الچربايه اقره واهز بنفسي
هُذال: تمام هُذال اذا جابولج ما موقع النسيج المرستيمي القمي
شتكولين هُذال؟ في قمم الجذور والسيقان.
وضليت اكرر واشرح النفسي قريت التراكمات وبديت اقره التحاضير يوم الأحد
خلصت الاحياء كمت سبحت ورجعت اكمل قرايه توني اريد امشي وبطلت كلت من يجي غهيب يمشطلي مو هوه الماخلاني اكصه هوه خل يتحمل ضيمه
رجعت دثرت نفسي بلبطانيه واكمل قرايه لل 1: 20 سديت الكتب دخل غهيب
غهيب: ها خلصتي؟
هُذال: اي تعال مشطلي وارجع افرش يم حيذم ونام يمه.
: شنو تطرديني؟
: لا بس عيب وحده ينام.
: طردته الغرفه مُهاف لاتخافين مو وحده.
بقيت ملفلفه نفسي بلبطانيه بس طلعت شعري فردته على طوله اشرتله بحواجبي
: المشط جيبه وتعال مشطلي.
رفع حواجبه يباوعلي ويأشر على نفسه
غَهيب: اني؟
هُذال: أنتَ لو غيرك الماقبل اكصه.
: عود تحمل ضيمه؟
: بلضبط.
: أحلا ضيم.
: تعال مشطه وخل توكع أيدك وعود كول احلا ضيم.
جاب المشط وكعد وراي يمشط بي ويحچي
غَهيب: هوه ناعم ليش تتعايرين.
هُذال: خلصه حبيبي خلصه وعود احچي لاتحچي هسه.
غهيب: ياهو حبيبچ كايمه تتخيلين وسن موجوده وتحچين.
هُذال: والله اني يفلت الساني حبيبي گلبي ايشي احچي أنتَ اسمع وغلس طالبه سادس مو بعقلها.
غَهيب: يزمو.
شمرت شعري بغرور وهوَ صاير وراي صار على وجهة
هُذال: بس بشرفك شلون يزمو؟
ضحك يهز بأيده يردد
: ام الأنوثه.
: مليااانه انوثه وداعتك بس مابيه حيل هسه اتمضيك طالبه سادس.
: على مايخلص السادس وأحنه غادين تراب.
: الله غهيب.
: ها.
: عادي باچر توديني البيتنه القديم؟ اريد اشوفه.
: اذا لحكت اوديچ.
خلص ولف شعري واني درت عليه
هُذال: نروح وأنضفه ونبات ونرجع؟
ابتسم وغمض عيونه وهز راسه
غهيب: صار.
طفيت الضوه وتمددت ساكته عيني على السكف هواي مر وقت وغهيب كال
: هُذال
: ها
: وحدنه نروح؟
: اي.
كلب جسمه صاد عليه واني نفس نومتي اباوع فوك وهوه رجع كال بجديه يباوعلي
: ليش وحدنه شتردين تسويلي.
درت راسي عليه اباوع الوجهة صدك يحچي.
لكيته يباوعلي منتضر جوابي رجعت نضري للسكف
هُذال: يعني شسويلك غهيب.
غهيب: ما أدري اشو نوب تكولين مبيت نبات هناك.
ضحكت غصباً عليه مامتحمله وهوه كمل كلامه
غهيب: اكلج اني بديت اخاف شو تضحكين؟
هُذال: اي خاف مو شايفني زلمه خشن وأعنفك.
: كلشي تسوين.
: اربطك بلبيت وارجع للبيت حته لو تصيح هناك محد يجي يساعدك هم يكولون بيت متروك ومسكون.
: ومخططه ومخلصه؟
: كلشي اسوي.
: وبعد شيصير بيه.
كلبت جسمي على الجهة مالته صار وجهي مقابيل وجهة
: تموت.
باوع بعيوني يسأل
: وين ترحين.
كلت بعدم لا مبالاه
: ارجع البيت خالو.
: وما تذكريني ابد؟
: لا ليش اذبلي دمعتين كدام العالم على ابو زوجي مات وهم محد يعتب عليه لو ما بچيت يكولون بحاله صدمه خطيه البنيه.
: ومواقفنه ماتذكريهم؟
قوست شفايفي بمعنى ما ادري
: انسه عادي وازور قبرك من اروح الأهلي.
: تچذبين.
: لعد شكو تريدني املخ شعراتي هنه ماباقي بيهن.
كلب جسمه يباوع للسكف
غهيب: اي عادي شنو يعني وسن تشبع گبري مي ورد وتسويلي ثواباات وتبچي عليه.
هُذال: اي علمود افگس عيونها.
غَهيب: شلچ دخل أنتِ مو ماتحبيني؟
: لعد وذا ما احبك تبچي هاي الخايسه عليك وهم يكولون جانو واحد يحب الثاني ودخلت هُذال بيناتهم وخربت عليهم وهسه تبجي عليه.
: الكيلج غير عذر مايفيد هذا.
: طلعلي عذر.
: شعلي انه رجال ميت.
: هسه يجوز اني اموت قبلك عليمن هلحچي بعد.
: نموت سووه ما اتيهج ابد.
: يجوز اموت موت الله هيچ بدونك.
دار وجهة عليه يباوعلي واني هم باوعت أله
ابتسمت من شفت تعابير وجهة وبينت الضوجه عليه
: شكو ضجت أنتَ مو متحبني؟
: حته لو ماحابچ الچ بس افتقد مواقفي وجودج وياي.
: لعد هذا شيسمونه؟
: بابا كتلچ افتقدچ مو احبچ.
stubborn woman
أمرأة عنيده
: هسه بلا شلون ماننام؟ مين طلعت هلسوالف نوب نحول ع الأنكليزي.
: شَعليَ أني؟
: متموت گلبي عمرك طويل شيموتك يلا نام لان مباقي بس شويه وينكلب الشقه عركه.
شال ردن الفانيله مالتي مطلع شامتي قرب راسه يمي على مخدتي حاط خشمه عليها مغمض عيونه روحه رايحه ثبتت حنكي على راسه وغمضت عيوني
جسمي يرجف وبطني تلويني من تصير بروده شفايفه تمشي على زندي وتستقر على مكان شامتي ضل يعيد بحركته الحد ماغفيت.
سفانه:.
حطيت راسي على المخده اكلب بلصور الماخذتهم نور مبتسمه مامخليه شي ممصورته وهوااي صور أخذت الي
وصلتني رساله من رقم غريب مكتوب بيها
. مَعشوگتي
عرفته غفار ابتسمت داخله على رقمه ماجاوبته
وهو رجع دز
. أمنيتي هسه أشوف شكلچ وانتِ تبتسمين ساكته عينچ على الرساله.
ضميت راسي بللحاف مالتي فراشات بكلبي انفتح الباب مال غرفه ماتحركت سويت نفسي نايمه ومن عطره عرفته غهيب وخر اللحاف من وجهي وباس راسي ايده تمسح على خدي عدل الغطه على جسمي وطلع
فتحت الجهاز اباوع الرساله غفار
. سفانه
. ها
فتح بسرعه ورد عليه
. تداومين السبت مو؟
. اي
. شلون بيه شلون أني
. شلون؟ شكو
. وجهج يصير كبالي واكمل شرح المحاضره طبيعي شلون؟ تتبهذل احاولي والله.
عفت الجهاز احط ايديي على عيوني تحمحمت واخذت الجهاز ورديت
. عادي قبل مو هيچ؟
. قبل مو حلالي چنتي وكلساع اخطف منچ نضره شلون بيه وهسه صرتي حلالي ومالتي
. استاذ
. يا روحه
. لاتحچي هيچ عفيه ترى بعد ما اداوم وأرتبك
. امرلچ اني اخدچ
. لا بلسبت غهيب يوصلني
. حيل فرحت أمي بشوفه وجهج وبيچ
. ادري بيها حبابه حيل وتحبني
. اني حباب ترى وهم حابچ
. اي كلش حباب بحيث لو مابذاك اليوم سلار موجود چان تصفرت بلامتحان مالتك.
. هههههههه ماتنعاد بعد
. ما اغش اني اصلاً
. ادري بيچ شاطرتي
سبأ:
طلعت اذب الزباله ذبيتها ورجعت دخبت للبيت شهگت فازه من سمعت صوت وراي
نيار: سبأ
دك گلبي حيل من سمعت أسمي بصوته صار شكد ماسامعته التفتت اله خازرته
سبأ: هم اجيت!
اباوعله فوك حاجبه لاصق جروح وخده بي اثار ضرب نصها رايحها ونصها باقيه بلعت ريك اباوعله وتذكرت منار من كالت سلار مكسره
وهوه حچه بحسره
نيار: روحي راحت اريد بس اشوف جهرتج.
: وهسه شفتها يلا امشي ولي منا كله من وراك سلار زعل مني وماحاچاني.
: حقچ، جيت اكلج قدمت خارجي وبس اراضي سلار احاچي عليچ.
: اذا قبلت عود.
حچه بدفو صوته
: سبأ.
درت وجهي منه گلبي يدك وي أسمي بصوته من يكوله
: ها نيار هاا.
: فدوه يروحلچ نيار وعشيرته.
وجهي يطلع نار رغم الجو شويه بي بروده ونسمه هوى باوعت أله عيني بعيونه
: شتريد نيار روح منا.
: جيت اشوفچ.
: مو شفتني؟ يلا روح منا عفيه.
هز راسه يباوع بعيوني واني عفته ودخلت جوه صعدت فوك افرك بأيدي امي نايمه وابوي هم
دخلت لكيت منار واكفه يم
الشباك دارت عليه متحسره ساكته نزلت عيني
منها وحچيت
سبأ: كالي قدمت خارجي وراح.
منار: ماتكولين السلار؟
هزيت راسي ب لأ عيني مليانه دموع
: لأ هم يضربه يروح.
باوعت عليه عيونها تباوع الملامح وجهي تريد تتأكد من شي
منار: وأذا ضربه شلچ دخل؟
درت وجهي منها ساكته لفيت نفسي بفراشي ونمت سحبت الغطه من وجهي تباوعلي.
: سبأ احچي وياچ ليش متردين سلار يضربه.
: ما أدري منارر ما أدري خليني انام.
منار: تحبينه سبأ؟ حبيتي؟ هاا حبيتي؟
كلبت جسمي ضامه راسي بلمخده ما اجاوب عليها
رجعت الغطه عليه بچيت بدون
صوت ما أدري على شنو يمكن لأن حسيت نفسي حابته من كال اسمي ويمكن لان صار شي ومراح اكوله السلار
أسينات:
كاعده بغرفتي اني ونور وهيه تباوع
للسكف مبتسمه
اسينات: نورر
نور: هاا
: عليمن تضحكين.
كلبت جسمها على جهة جربايتي مبتسمه.
: اليوم ام حيذم كالتلي غزاله.
ضحكت اباوعلها
: وانتِ هستوچ تذكرين وتبتسمين
: صدك اشبه الغزاله؟
: بس عيونچ لان كلهم سود كبار البؤبؤ مالتهن يشبهن الغزاله.
طفرت شعلت الضوه تباوع الوجهة وعيونها بلمرايه فتحت شعرها تفتر كدام المرايه
: نور.
: هاا
: متأكده بس ام حيذم كالتلچ غزاله؟
: شنو يعني؟
: يعني اكوو واحد غيرهاا كايلج غزاله بحيث الهل درجه مكيفه صدك جذب كضه عمره بابا يكلچ غزاله شو ماسويتي هيچ.
: مو شبيچ يعني بابا ابوي طبعا يجاملني بس هاي مره غريبه وكالتها يعني صدك متجامل.
: وعلى فلا مرتاحتلچ.
: دنامي نامي ام العشيات.
: يا عشيات ولچ.
: العشه الوديتي المهاف احممم.
: وسم اليسمج شنو يعني انكلبتي وسن.
: ايع كشره بكصتها شكد مغثه اليوم تباوع الهذال من فوك ليجوا.
: ختولي عابتلها ام المستحه غووهيب يوختلف.
: هههههههههههههه لچ النوب هيه تصخم وامها تلطش بلسالفه.
: فقيره امها بس هيه حيه حييه.
: يلا نامي.
: دطفي الضوه شون انام يعني.
طفته ورجعت تمددت بفراشها كل ما افتح الكاها مبتسمه عفتها ونمت.
هُذال:
كعدت الصبح غَهيب مو بفراشه كتفي متشنج من راسه على كتفي فركت عليه الحد ماراح التشنج بدلت ونزلت جوه كلهم كاعدين يتريكون
هُذال: صباح الخير.
الكل: صباح النور.
غسلت وجهي وكعدت وياهم
هُذال: خاله ليش ماكعدتيني سويت وياچ الريوك.
آيات: عليمن حبيبتي هنه بيضات وجبنات.
هذال: سفانه ومهاف وين؟
حنان: بعدهم نايمين.
سميت بسم الله وبديت اكل همست يم اذم غَهيب
هُذال: اليوم نروح غهيب؟
غهيب: ان شاء الله.
تريكنه غسلت مواعين ورحت يمهم حيذم وخاله حنان يحضرون بغراضهم علمود يرجعون للبصره نزلت سفانه سلمت عليهم وكفت بيني وبين حيذم تهمسله
سفانه: مالحكت استفسر منك شعدك وي نور.
هُذال: شعدك وي بنت خالي.
حيذم: احبها بويه احبها واريد اخطب.
صفنت على سفانه اباوع بوجها وهيه صفنت بوجهي هم
هُذال: من شوكت.
حيذم: من زمان.
سفانه: ياا ياا.
سلم على غَهيب حيذم واخد امه وراحو.
دخلنه جوه واني كلت الخاله ايات
هُذال: خاله.
آيات: ها يمه.
: اليوم نروح اني وغهيب نبات ببيت اهلي.
: الله وياكم حبيبتي.
أبتسمت اباوعلها يربي شكد حبابه ولطيفه
وسفانه كدامي تركص بحواجبها وتطك اصبع
سفانه: وضل البيت لمطيره وطارت بي فرد طيره شعدج ماخده اخوي وحدكم.
هزيت ايدي اباوعلها اضحك
: سبحان الله نفس سوالف اخوچ بلضبط.
آيات: يا سوالف.
: هم يكولي شتردين تسوين بيه ماخذتنه وحدنه.
سفانه: هههههههههههههه عليچ العباس هذا غَهيب؟!
هُذال: اي والله يكول بديت اخاف منچ شتردين مني.
آيات: هههههه غير عنده سوالف طايح حضهم عود هذا العاقل مالنه الثكيل.
سفانه: شكتيله هُذال.
: كتله أربطك هناك واعوفك واجي واذا تصيح محد يجيك على ابو البيت مهجور جان ومسكون وتطلع منه هاي الاصوات وتموت اسم الله.
ايات: يمه اسم الله.
هُذال: اني راح اصعد احضرلي غراض.
ايات: روحي داده.
قبل لا اصعد مريت على مُهاف تطمنت عليه وصعدت حضرتلي ملابس والغهيب هم حضرت ب 11 ونص اتصل عليه مخلص شغله كال اطلعيلي بره
طلعت صعدت وياه ورحنه البيتنه القديم
بس دخلت بفرعنه فتحت الجامه أشم هوى بعمق وچن بهذا الهوى ريحت اهلي جاي اشمها
طبكنه كبال بيتنه چبير وحيل
شكله حلو من بره باوعت الغهيب يباوع ع الباب شلون چبير بس هم اصغر من بيت غهيب واني كتله
هُذال: تذكر من كتلي وافقتي عليه علمود فلوسي؟
غهيب: لا ما اذكر هذا مو اني.
: لعلمك مو بس انتَ عندك فلوس وعدنه بيوت ثنين غير هذا ونفس الحجم تقريباً من غير راتب بابا وراتب ماما وانتَ تكلي وافقتي علمود فلوسي وسياراتي.
: هذا منو هذا الجاي تحچين عليه شكد ماعنده ذوق بلكلام.
: مو صح.
دفع غَهيب الباب وطبينه الحديقه والطرمه والمرجوحه وكل مكان بي ذكره من أهلي.
ماتحملت دموعي نزلت تمشيت على الحديقه وشلت طوبه رسلان على نفس حطتها من يوم حادث اهلي ومن اجيت وره موتتهم اخذت ملابسي وصورت الحيطان والمكان ورجعت
رجعتها المكانها امسح بدموعي خطواتي ترجف طلعت المفتاح من جيبي وفتحت الباب مال بيت صارت بوجهي الصاله مشيت رجليه ترجف ماخذتني الغرفه امي وابويه حتى غهيب نسيت وجوده.
فتحت باب الغرفه ايدي رجفتها قويه شهگت حيل ابچي متذكرتهم ومتذكره حنيتهم عليه متذكره دلال بابا إلى وحبه متذكره مناكرتي اني وماما على الحمره إلى نحبها ثنينه وعلى محابسها من اخد منهن وما انطيها من محابسي.
هاي المرايه الچنه ناخذ بيها صوره اربعتنه اني وبابا وماما ورسلان هسه بس اني موجوده وهمه ماكو وهذا الكنتور وهذا مكان بابا من يكعد الماما ينسق الها الوان وهيه تكله ستار أنتَ ماتعرف بسوالف النسوان ميلوك هذا واني اصف وي بابا على امي
تمشيت للمرايه حلقه ماما على الميز كدام المرايه لزمتها بأيدي حاضنتها الكلبي فتحت كنتور بابا أخذت منه قميص اشم بعطره كعدت بلكاع ابچي بكل صوتي حاضنتهم الكلبي.
مطلعه قهر كل ليله نمتها ماكدر ابچي بيها عليهم اخاف رسلان يفز على صوتي على كل ليله نمتها مهضومه من ذل سميحه على كل يوم يمر عليه ورسلان وامي وابويه جوه التراب واني عايشه ومابيه شي.
كعد غَهيب كدامي ثاني رگبته جرني الصدره يمسح على شعري وأني حاضنه قميص بابا وحلقه أمي وأتذكر حچايه وسن من كالتلي أنتِ اليتيمه ضميت غراضهم الكلبي اكثر أبچي واشهگ.
هُذال: يتموني غهيب يتموني عافوني وراحو ماخذوني وياهم حركو گلبي بروحتهم عيشوني بغربه.
غهيب: اشش اسم الله على كلبچ.
هُذال: مابقالي أحد من اهلي مابقالي اشم ريحتهم بس بملابسهم بس غهيب يتيمه اني يتيمه.
غهيب: اني موجود بابا اني موجود.
رجيت راسي على صدره الشهگه چلبت ببلعومي وهوه كلبه يدك سرريع مثل الواحد الراكض.
فتحت حلكي أشم نفس مختنگه سندت ايدي على الچربايه وكمت امشي الغرفتي وغرفه رسلان دخلتها وتعثرت بخطواتي واني اشوف صورنه سوه ماليه الحيطان.