رواية أغلال زمن الغيهب للكاتبة مرمر الدليمي الفصل السابع
رديت عليها، هَلا
وهيَ بسرعه فتحت وردت عليه، هلاو عمري شنو منايمه نومه الخميس؟
- أبتسمت بستهزاء مقهوره هوَ أني اليل كوه انامه من التفكير أنام الضهر؟!
رديت، ما أحب النوم هواي، علاقتي مو قويه بي.
: هههه نفس خطيبج ماشاءالله همات هيچ.
سكتت حته ما أعرف شنو أريد وهيَ دزت
: عندج انستا؟
دزيت الها حسابي، شويه ودزتلي متابعه وأني اساساً حسابي عام مرت ربع ساعه وهيه نشرت صوره أني وياها يم الامام على شابكه أيدي بأيدها وأضافيري والحلقه طالعه وكاتبه يمها اماسيلي
وأني چنت حاطه صوره مثبته الجهاز كدامي وحاطه أديه بجيوب القمصله النسيتها ومدنكه نضري للحداء الصوره قريبه بس على حد القمصله حاطه ستيكر على خشمي ورموشي مبينات بطريقه كلش حلوه وكاتبه عليها.
أين ماذهبت ومَشيت، أجدُ نفسي عالق في ذلك اليوم ألذي يُعيد في ذاكرتي كُل يَوم ليَثبت لي أن لا شيء ويحَصل كما أُريد مُنذ حينها
- هُذال الأماسيل.
حولت التاك مال سفانه بحسابي وكعدت أكلب بلريلزات وشفت فيديو مكتوب بي عباره حول كُل تلك الافكار الى شغف ألذي سوف يعلن فوزك قريباً بأذن الله
حطيته ستوري يمي اسينات تباوع بجهازها ساكته
اسينات: أماسيل
باوعت عليها مختنگه: هاه.
: السويتي غلط.
نزلت نضري منها ألعب بصابع اديه، أعرف، بس لو ينعاد الموقف هم أعيده.
رفعت عيني الها خازرتني مقهوره حيل
اسينات: كل چاره متصيرلج.
كامت طلعت بره وأني هزيت أيدي تالي وكت سميحه تغلط على اهلي وأضل ساكته؟ شمالني
وخالي؟ يغلط على ابوي كدامي وهوه متوفي؟! ياربي خلصني بأي طريقه تريحني وتريح أخويه.
تمددت حاطه راسي يم راس رسلان لكيت سفانه دازتلي صوره محادثه وَي ولد كاتب الها على ستوريها الأني وياها بي.
- من خطيبج المعاون هيچ راح تصير اضافرج.
فهمته يقصد عود لان خطيبه غَهيب محد يحاجيني ميدري كل ميفتشون صف اسينات احنه وراهم لو اشرد للمغاسل لو ما اداوم
كاتبتلي سفانه جوه
- باعي مُهاف شيكول
- منو هذه؟
- حماچ.
- الله يحفضه، ما اعرفكم اني.
- لا هوه بعد محد اكو بس اختي ومزوجه اجتي بلعقد شفتيها بُنه
- اني بس رسلان عندي.
- فدوه، شكد عمره؟
- بعده مداخل 5
- الله يحفضه شفت منشوراتج كلهن عليه وعلى اهلج الله يرحمهم.
- شكرا يرحم امواتج.
طلعت من المحادثه مُهاف دازلي متابعه رديتها اله، رجعت على الفيديوهات الناشرتهم بحسابي قبل واموت من القهر، فيديو بابا يضفرلي بي شعري ماما مصورته النه من كتف بابا واني كاتبه يمها ضفيره شوك الك بلروح لاتنحل ولا تنفل كاتبه جوه بابا الفيديو صاعد وماما معلقه الله يحفضكم إلى حبايبي وبابا راد عليها بقلوب نزلن دموعي اتامل رسائلهم والبنات معلقات بكلام حلو.
كلبت الفيديو وطلعلي الثاني نلعب دومنه وبقالي اخر وحده وبابا فاز عليه كبل كتله بصوت زعلان باابااا هايي ليشش وهوه بسرعه سحب مالته وسحب وحده وكلي ماعدي العبي واني حطيت مالتي وضحكت فرحاانه.
وهم الفيديو صاعد، دموعي تنزل على مخدتي بدون صوت وكلبي كل ما أله دكاته تزيد كلبت الفيديو اني واكفه مسافه وماما وبابا بلمرجوحه حاضن ماما وهيه مميله راسها على كتفه ورسلان كاعد بحضن بابا يضحكون مغوشه وجه ماما وحاطه عليهم أغنيه حُبك خله العالم وردي.
حطيت أيدي على حلكي ليفز رسلان من صوت شهكاتي والبچي مالتي، مثبته ذني الفيديوهات بحسابي قديمات حيل وفيديو جديد ناشرته قبل شهر فيديو البيتنه فارغ وفيدوهات من چانو اهلي موجودين لو مصوره الحديقه فارغه وفيديو چنه كاعدين بيها وصدى صوت ألاغنيه يتكرر وي الفيديو جيت أسالج يادار عن قره العين يادار كوليلي وين أرحلو وين.
حطيت أديه على عيوني شمرت الجهاز ابچي بكل قوتي روحي صعدت السابع سمه من القهر چلبت الشهكه ببلعومي حوه أنصي بصوت بچي، فزيت على صوت رسلان ورايَ
رسلان: ماما
مسحت دموعي ودرت وجهي عليه احچي طبيعي بس مبين بصوتي
: ها حَبيبي؟
رسلان: تعالي نامي يمي.
مسحت وجهي وتمددت بصفه ساكته حط راسه على كتفي فتحت أديه نام عليها جريته لامته الحضني أشم بشعره وابوس بي اريد أضمه بكلبي خاطر لا يجيسه أذه
رسلان: ماما
: ها يعيوني.
: غنيلي مثل قبل.
: مو هسه صوتي مطبك.
: مااا
بديت أغنيله بصوت هادء وتعبان عبالي يطلع مو حلو بس العكس، امسح على راسه بحنيه ضام وجهة بحضني
هُذال الاماسيل:
لما سار المركب نساني
ساروا والدمع ما جفاني
أخذو قلبي مع جنانِ
ياطيبه ياتيمه الولهانه.
ضليت أكرر بيها الحد ما غُفه وأني حضنته حيل ونمت، ما أعرف شكد مر وقت كعدت تعبانه جسمي مكسر ومابيه حيل باوعت للساعه ب 11 بليل حييل هاي شكد ناينه ورسلان مكانه فارغ كمت أيدي على كلبي خايفه أخلف طلع بره وندعم صارت بيه خوفه طلعت اركض كلبي يدك صادفني على الدرج لازم أيد اسينات ويضحك زفرت نفس مهبوطه ايدي على كلبي اجر نفس فتحتله أيدي وهوه عاف اسينات واجاني يركض حضنته الكلبي
هُذال: شوكت كعد.
اسينات: من ال 4 العصر وهسه صعدته ينام.
هزيت راسي وكرصت أرنبه خشمه مبتسمه
: اكلت حَبيبي؟
هز راسه أي اخذت ايده وصعدنه للغرفه بس حط راسه نام، درت وجهي الاسينات أحاچيها
هُذال: اسينات لاتضوجين مني بس أنتِ هذه تصرفج أكبر عبره مو مترضين على امج؟ اني هم ما ارضه، أعرف تصرفي غلط بس مچان كدامي غير هذه التصرف، بعدين أنتِ تعرفين من اعصب ما اشوف كدامي
اسينات: ماعندي شي وياچ بلعكس احبچ اني.
اجت حضنتني وأبتعدت بسرعه.
اسينات: ولج عزه صدك شصاير؟! شنو ضاربه سمر وصايره مشكله؟
هُذال: أيَ ضربت راسها بلرحله.
: صخام وعزه لييش
- حچيت الها السالفه كلها صفكت بأديها متحمسه
: لك فدوه فدوه يسويها عشارياََ شكدد فدوه للزلم.
هزيت أيدي كمزتني
: كببتيني كبرج إلى يلفچ.
دارت وجها مني تريد تنمطل وتنام واني بسرعه صحت
: هااا هااا تعاي سوي وياي اكل جوعاانه
: عدنه وصينه من برا وبقينالچ، بس مشتهيه كيكه تسويلنه؟!
: يلا أمشي.
نزلنه جوه جايبين مشويات اكلت واسينات تحضر بلمواد حضرتهم على الميز وصورتهم
: راح انشرها واسويلج تاك.
: صعدي جيبي جهازي من فوك.
صعدت تجيبه وأني اخلط بلمواد دهب خالو واني درت وجهي أسوي نفسي ما اشوفه شايله بخاطري منه وهوه تقدم خطوتين عليه ورجع دخل جوه كلها نايمه، جابته اسينات وكعدنه نسوي بيها حطيتها بلفرن وكعدت فتحت تليفوني اتصفح بي دخلت ع الواتس نفس الصوره الناشرتها بلانستا حاطتها حاله راده عليه ام غَهيب
چنتي الجميله
وحاطه يمها قلوب حمر ومال حسد ضحكت يربي شكد حبابه وتفتح مواضيع رديت عليها
حبيبتي خاله أنتِ الجميله.
شوفت المحادثه الاسينات، دخلت على الانستا حطيت الستوري مال اسينات وهيه كاتبه ع الصوره أشتهيت كيكه بنص اليل بس تذكرت عدنه مُنقذه تسويلنه واني راده عليها بلستوري لو ما مسويه عشه الرسلاني فلا أسوي طبيت للمتابعات غَهيب دازلي متابعه وحاط لايك على صورتي مدت راسها اسينات
اسينات: هسه يدزلج مرتي الجميله ههههههههههههههههههههه
ضحكت على ضحكتها من صدك ماتت ضحك وتقلد على شكل غَهيب ومشيته وكلساع تسوي.
اسينات: والقران هيج يمشي واني من يفوت من يمي تصير براسي اغنيه وزك زك زك زك
من صدك السالفه تافهة بس متنه ضحك حته بچي بجينه ما ادري على شنو
فتحت الفرن اشوف الكيكه بعدها
غَهيب راد ع الستوري مالتي
القمصله بس للتصوير.
دخلت على حسابه بي متابعين هواي ينشر صوره وكلهن صاعدات عليهم عبارات ونص أشعار، ناشر صورتين بيوم العقد مالتنه واكف يم بابنه وبأيده جگارته و ايد بجيبه عاكد حاجبه ويباوع بتجاه الكامره ياربي شكد حلوه طبره حاجبه و الشيوخ وراه واكفين يدخلون للبيت
حاط عليها عباره
أعَتدل في كُل شَيء إلا عزة نفسك، إطغي.
التعليقات نص يباركوله وهوَ يود عليهم لو قلب لو حبيبي فلان وابو فلان ونص البَنات كاتبات
ياعزه بنات خطب.
ووحده راده عليها أيَ والله حرامات
خذته الماسهرت على صوره
خذته الماجانت تنتضر الاوتفت مالته كليوم
لعبت نفسي وطلعت منه وهو ولا وحده راد عليها غير سفانه معلقتله دخلت للستوري مالته هسه صوره بنيه يطلع عمرها 4 لو 3 سنوات كاعده بحضنه يمها فراوله ونوتيلا وحلويات وهوَ يضحك منزل راسه الخدها يريد يبوسها وماخذيله الصوره كاتب يمها ألورتي.
هيه هاي ام النوتيلا والفراوله؟ أيَ لان هو كال اليوم اجيج، طلعت منه ورديت على رسالته
: أخد قمصلتك واخليك تبرد ليش؟ لان ماعندي اخلاق.
من يوم إلى كالي ماعندج اخلاق أني من صدك كشت نفسي منه واي شي اسوي اذكره اني ماعندي اخلاق، مُهاف اخو راد ع الستوري مالتي
ها يعني منا وهيچ امورنه طيبه كيك وكذا
ابتسمت على كلامه كل اهل غَهيب حبابين وكيوت اله هوَ شايل خشمه مدري على شنو درت المحادثه على اسينات
هُذال: شرد عليه؟
اسينات: منو هذه؟
: اخو غَهيب.
: اوي فدوه.
: هسه شرد؟
: كليله لا ميحتاج لان استاذ غَهيب عدكم كيك.
ضربتها على راسها وهيَ ضحكت: شبيچ اشاقه كليله انتو الكيك أنتَ وامك واختك.
تلفتت اريد شي اضربها بي وهيه ماتت ضحك اخر شي عاطت
: أيَ يعني ما ادري حطيله لايك ونچبيي.
: خاف يكول شايله خشمها؟
: حطيله القرد المغمض عيونه بأيده.
: شوو نچبي راح اخليله لايك.
انطيته لايك على رسالته دخلت ناشر ستوري بلكوفي وعليها مسيقى تركيه حطيت لايك عفت الجهاز وطلعت الكيكيه قطعتها.
حطيت عليها ككو، كعدنه ناكل لل2 حطيت الباقي بلفرن وصعدت فوك اسينات تغطت ونامت اني منعسانه ضليت اكلب بلجهاز لل 5 ونص حطيت ستوري بنيه صغيره كاعده بين قبرين ويمها عباره، نشرتها كلبي يأذيني ما أعرف ليش واني مغلسه عليه
5 دقايق وأجتني رساله من غَهيب
- ليش كاعده.
شفتها من فوك ساكته دخلت للمحادثه ودزيتله
- مراح أرد على سؤالك، ليش؟
لأن ماعندي اخلاق.
شافها ومارد، شويه ودزلي صوره الربطه شعري وكاتب جواها
- موبس ماعندچ اخلاق، غير نبهة هم.
- أتمنى تركز على اخلاقك ولباقتك بلكلام وتعوف أخلاقي.
شويه ودز، أنتَ چبير مو مال اعلمك هلنقاط.
بقيت ساكته وأتذكر من اول مشكله صارت هيج كتله انت چبير مو مال اعلمك هلنقاط، وراها رساله كاتب
- أذا ميعجبج كلامي، خربي كُلشي.
ما أعرف ليش بس حسيته جاي يسوي أي شي علمود بس يكرهني بي والغي كلشي
رديت، ما اتراجع على قرار اخذته، معاجبتك؟ اخلاقي ارفض كُلشي واني الممنونه.
- منين ما أبدي اكمل مدام بديت وياج، متصير كلمتي ثنين، أفضل اكمل على الانسحاب.
- لاتحلق بسمه أفكارك، هيچ الوكعه راح تصير قويه.
- صح، يجوز بيوم راح اوكع بس مو على الكاع، سماء ثانيه
- هواي طاير يا أستاذ.
- أعرف السمه الاستحقها، والقدر الأحلق بي.
-الله كريم، الزمن قادر يثبت كلشي.
- احفضي يمچ هلكلام راح تحتاجي بيوم.
- طبعاً، وأكلك هذه كلامك، وهاي الكاع الوكعت عليها.
- مثل ما كلتي الزمن قادر يثبت كلشي.
- تصبح على خير.
- أكيد، مراح اصبح بوجهج.
- ههههه، عديم الأخلاق يعلم الأخلاق.
رد، منو عديم الاخلاق؟
شفتها ومارديت عليه تغطيت وتدنيت على رسلان لميته الصدري ونمت.
كعدت ب 9 الصبح على صوت بچي خالو يحضن وجهي بأديه ويبوس بيه فتحت عيوني مامستوعبه وهوَ بس فتحت بچه اكثر، اكيد ماكو غير رسلان بي شي صاير
حته الحچايه كوه طلعت من حلكي: شبي رسلان، شبي خالو عفيه شبي
هز رراسه لا وجرني الحضنه بچه بصوت عالي يحچي بلوعه: اخخ ياخاليي تنكسرر أيدي النمدت عليچ جناان اجتنب بلحلم تعابت بيه يمن سوده بوجههي.
أبتعدت عنه وهوَ حط أديه على عيونه مثل الطفل يبچي من كل كلبه، سكتت ماعندي رده فعل وهوَ كالي
حامد: اعذريني بويه
درت وجهي الغير جهة الحسره مبينه بصوتي: معذور خالو.
بسرعه مسح عيونه وأجه باسني من راسي مدلي أيده: خل ننزل نتريك.
هزيت راسي باوعت الأيده والوجهة: بس أغسل وابدل وانزل.
: اي انتضرج.
نزل جوه واسينات مطلعه عيونها من جوه اللحاف تباوع ساكته، كمت اغسل وأني تفكيري كله بلحلم مال أمي، تشوفني؟ تزعل اذا ضجت؟ أذا اسوي شي هيه جانت متقبل بي؟ مسحت عيوني حيل قريت الهم الفاتحه نضري على انعكاسي بلمرايه، لاتضعفين من كل موقف خليج قويه لاتضعفين هُذال.
غسلت وجهي ونزلت جوه اني واسينات خالو يلاعب برسلان بس شافني أجاني يركض
رسلان: مااامااا.
لميته الحضني أبوس بشعره: رسلان حَبيبي شوكت كعدت؟!
طلع أصابيعه يريد يعد وخالو رد
حامد: هستوه قبلج ب5 دقايق.
برطمت أباوع الوجهة احچي ورافعه أصبعي
: بعد من تكعد تكعدني وياك ماشي؟
بحركه عفويه منه دنك على اصبعي الشايلته أشر بي دنك باسه وشعره نزل وياه ورد بطفوليه.
رسلان: ماشيي ماما.
حضنته حيل الكلبي ابوس بشعره: الله لا يحرمني منك.
كمت لكيت اسينات تسوي بيض، سميحه نايمه كعدنا سوى نتريك بدون كلام
خالو راح للشغل نور كعدت واني اخذت رسلان وصعدت فوك انطيته جهازي.
فتحت كتبي اليوم اقرا اليوميات وباجر الامتحان قريتهم جره واحده دائما من اقرا المدرسات اكو بعض يكولون الدفاتر يفيدنكم شلون ما تفهمون كتبوا ما نفتشهن واكو لا مثل استاذ عماد بالرياضيات و غَهيب بالانكليزي
عربي عدنا حل وامتحان يومي اول شيء حليت وراها وخلصت نص اليوميات الساعه 12: 00 صليت.
صليت فوك ما نزلت جوه، دائماً رسلان يشوفني اسوي شيء يقلدني فرش مصلايه بصفي يسوي مثل حركاتي عليت صوته وهو يردد ورايا كملت ورفعت أيدي اريد ادعي ورسلان سبقني كال بصوت
رسلان: يا الله اني احبك سويني قوي على مود احمي ماما هو هُذال من الاشرار.
ما ادري اني صايره حساسه ما ادري كلامه صدك يبچي نزلن دموعي دافيه وهوَ باس التربه وجاء وكف كدامي ما اسويت شيء بس حضنته حييل وأدعي الله ما يشوفني شر بي كام مني وكعد بصفي يلعب بالتليفون حط التليفون بنص الغرفه
مد ايدي ياشر علي
: هلو هاي ماما هُذال صد على رافعه أيدي و من كل كلبي ادعي الله يفرج على وما يحملني اكثر من طاقتي
رسلان وكف كدامي باصبعه يمسح دموعي كال بنبره طفوليه
رسلان: ماما ليش تبچين.
جاوبته صوتي مبين عليه باچيه وبي بحه
: ما ابچي، عيوني بهم حساسيه.
: باعي بس واحد يضوجج اكتله.
هزيت راسي باسي عيوني واني لميت المصلايه مالتي ادور على التليفون وماكو اخر شي لكيته بعد فاتح تصوير.
سديته واخذته اشوفهم صور كلشي أبتسمت اروح فدوه الحنيتك أني.
غوشت وجهي بازار الصلاه حطيت موسيقى ناصيه ورا وصوتنا من نحجي كتبت علي
صح بكل شيء خسرت بس كان الربح انتَ.
حيل ترتب الفيديو طلع يجنن كميه الحنيه بي متنوصف نشرته وطلعت سديت الجهاز مالي خلك ارد على اي احد دخلت اسينات بايدها الصينيه الغده
هُذال: ليش جبتي ما اريد.
اسينات: معليچ، هذه اني سويته تعاي اكلي.
سكتت اني هم جوعانه كعدنا ناكل انا وياها ورسلان خلصت اخذت المواعين ونزلت سميحه مخموده غسلتهم بسرعه وصعدت فوك ضليت اقرا لل 4: 00 خلصت كلشي من اليوميات كلت اخذ استراحه شويه وابلش انكليزي لان مو زينه بيه هستوني لزمت التليفون واتصلت ام غَهيب عدلت كعدتي واشرت الأسينات
كمزت يمي تسمع وحچت ام غهيب
: هله عيوني شونچ؟
: هلاو بيج خاله، الحَمد الله أنتِ شونچ؟
- الحَمد الله حبيبه بخير.
- عساها دوم.
- أكُلچ حبيبتي وين انتي اليوم؟
- بلبيت.
- خوش يمه، عازمتج يمنه على العشى.
باوعت الاسينات تأشرلي بايدها اوكي اوكي وتأشر براسها
- ياحبيبتي خاله تعذريني والله عندي امتحان وأريد اقره.
- هيه ساعه زمان نتعرف عليج اكثر.
- والله خاله لو الحك بعيوني چان جيت.
- انه ما عليه حضرت العشه، شنو هوه امتحانج.
عضيت على شفتي ورديت: تسلمين يا روحي خاله، انكليزي.
: يااا انكليزي، جا متكولين جيبي كتبج وياج غَهيب يقريج.
: خاله بس...
: أشش والله ازعل عليج غَهيب خابر خالج هم كال تجيكم هيه وتعذر كال ادزلكم البنت واخوها، تحضري ب6 يجيج غَهيب.
: تمام.
سديته منها اوف هسه وقتها كمزت اسينات للكنتور تطلع بالقمصان
: هذا لو هذا؟
: شبيچ شبيچ
اسينات: أطلعلج لبسه كبر
هُذال: والله بطرانه.
كلمه سبحت بسرعه وطلعت تنوره سوده ساده منفوشه من جوه و قميص اسود لبست ساعه ذهبيه ومحبس ذهبي على شكل فراشه وشلت شعري وربطته.
لبست رسلان دشداشه رصاصيه تجنن عليه وشعره شسورته اله وهو منه شويه طويل حيل حلو طلع
اتصلت على خالو كتله كال ادري روحي
انتظرته غَهيب لحد ما شفت سيارته بلباب دزلي رساله، طلعي.
اخذت جنطتي ولزمت ايد رسلان حطتلي عطر اسينات والكتاب اخذته نزلت جوه واكفه سميحه بنص الصاله بس شافتني خزرتني
سميحه: خير وين؟
بدون لا احاچيها طلعت غهيب لابس دشداشه سوده ضابه على كتوفه لابس ساعه فضيه جكارته بايده عاكد حاجبه المطبور صراحه اول مره يلفتني لهالدرجه.
تقرب وقف قريب عليَ
غَهيب: السلام عليكم
هُذال: وعليكم السلام
دنك على رسلان شاله
: شلون البطل؟
أبتسم رسلان ورد عليه، زين
صد عليه رسلان
: هذا هم يضوجج ويبجيج مثلهم؟
فتحت عيوني على وسعهم صخام الصخمني
رديت بسرعه: لا حبيبي محد مضوجني.
عكد حاجبه غَهيب وكال الرسلان، منو يبچيها ويضوجها؟
كلت، محد ميعرف شيحچي.
رفع أيده رسلان وأشر على بيت خالو: الاشرار.
هُذال: أحمم، يلا ماضل وقت.
باس رسلان ونزله وأني اخذت أيده وهمست قريب عليه: رسلان كلشي لا تحچي.
هز راسه أيَ صعدت ليكدام ورسلان بحضني الدنيا غروب العطر مال غَهيب مالي المكان
رسلان: ماما.
هُذال: ها رسلان.
رفع أصبعه باتجاه غَهيب: هذه عمو حباب؟
صد غَهيب ألي رافع حاجبه وأني هزيت راسي أي وأبتسمت بستهزاء
هُذال: اي كلش.
حط عيونه بعيوني الثواني ودارهم للطريق، ساكتين ثنينه وفزيت على صوت رسلان
: اني زلمه، احمي ماما هُذال من الاشرار.
ضحك غَهيب بصوت عالي وإخذ كعده بحضنه
غَهيب: أيَ سبع أنتَ.
رسلان: أنتَ مبين شررير، شسمك
: رحم الله والديك أختك هُذال، اسمي غَهيب.
هُذال: شبيها هُذال معاجبتك؟ ليش جيت عليها؟
درت عيوني للجامه متضايقه يحچي عليه عينك عينك ولا كأنما كاعده، ضل هوه ورسلان يحچون، طبك كبال بيتهم ماشاء الله حيل چبير شال رسلان يبوس بي واني نزلت فتح الباب ودخل تلكتنه أمه وسفانه يرحبن بيه عبالك يعرفني من زمااان وشخص عزيز عليهم.
ام غَهيب: تأخرتو حبيبه.
هُذال: أزدحام.
سفانه: تفضلو عمري.
دخلنه جوه وسلمت على مُهاف اخو غَهيب كت نه شويه وهمه مكيفين برسلان صاحله مهاف وطلع 25 من محفضته وحطهم بجيب الدشداشه مال رسلان
هُذال: لا عفيه شنو السالفه.
طلعهم رسلان من جيبه ورد على مهاف
رسلان: اني زلمه، مااخد فلوس من احد.
سفانه: يمه فدوه اروحلك يعمريي هذه شنوو فدووه.
مهاف: يلا اخذهم ومن تصير جبير رجعهم الي.
هز راسه رسلان لا، هُذال كالت لاتاخذ فلوس من شخص غريب.
هز راسه مهاف، ها هسه اني حسبتك اخويه وانت حاسبني غريب جيبهن روح بعد ما احجي وياك.
لزم وجه مهاف يحجي وياه، باوع زعلت؟
هز راسه مهاف أي.
رفع عيونه رسلان محتار يفكر ورجع دار عليه كال بحيره: هُذال بابا كال ميصير نزعل احدد.
ضليت ساكته اباوعله حيييل مستحيه أحچي، بس كلته، يلا لعد راضي.
هز راسه أيَ وراح المهاف وهوه داير وجهة عود زعلان وميحجي وياه رسلان يحجي وياه وهوه ميرد
ام غَهيب: رد عليه مو شلعت كلبه.
ومهاف ابد صاد على جهة ميحچي وياه اباوع ساكته وغهيب مركز وي رسلان وسفانه تحجي وي مهاف تكله رد عليه وكف رسلان محتار لزم وجه مهاف بأيده
: اخذهن وترضه؟
بسرعه صد عليه مهاف وهز راسه أيَ اخذهن من مهاف وهوه جره الحضنه يبوس بي دار عليه مهاف
مهاف: بعد ما ننطي هذه اماسيل.
أبتسمت على حچايته ورديت، ما اكدر هوه بس هذه بقالي.
سكتنه واني وسفانه كمنه نصلي صعدتني سفانه الغرفتنه شوفتني ياها حيل حلوه وهادءه الوانها مريحه للعين
سفانه: هاي كلشي هوه يرتبه ميقبل احد يرتبهن غيره ماعدى قمصانه اكويهن بس.
هُذال: تدري شنو؟ اخوج راح يخبلني وياه.
: ههههه ليش ونبي حباب.
اخذت منها عبايه صلاه ورحنه الغرفتها نصلي صلت هيه وخلصت قبلي بقت تنتضرني كاعده، خلصت
سفانه: تقبل الله.
هُذال: شكراً.
ذبيت العبايه، عفيه رسلان اريده وينه.
: لاتخافين عليه يم مهاف.
نزلنه جوه خاله هستوها ذبت عبايه الصلاه
: راح اصب
هُذال: خل اساعدكم.
سفانه: لا أنتِ كعدي عمري.
: لا عفيه خل اساعدكم.
ام غَهيب: يلا ميخالف تعالي
دخلت للطبخ ماشاءالله كومه أكل مسويه
هُذال: عليمن تعبتي نفسج خاله هواي مسويه.
سفانه: لاتخافين هسه مهاف ياكله كله.
حطيت الزلايط بكاسات زغار وهنه كلشي ماخلني اسوي، نقلت الاكل وياهم بلستقبال قبل لا اكعد كالت سفانه
: غَهيب سوي مجال يمك الهذال.