رواية أغلال زمن الغيهب للكاتبة مرمر الدليمي الفصل الثاني والعشرون
سفانه:
شمرت نفسها عليه منهاره بچي واني باقيه بس فاتحه عيوني اريد التفت لأمي اشوفها شنو وضعها اريد بس افهم السالفه من رُسل بس تبچي
سفانه: رُسل شبيچ عفييه باعييلي.
مترد بس حاضنتني وتبچي وخرتها
من حضني اباوع الوجها بعدت عينها
مني الأمي ألي واكعه على رجليها تقدمت
بتردد كعدت كدامها وحضنتها تبچي وتشهگ
رُسل: ماما.
ردت عليها أمي وجهة مخطوف
آيات: شجابج رسل.
قبل لاتجاوب على ماما غمضت عيونها وطاحت شهگت ماما تباوعلها واني رحت اركض
: رسسللل رسللل!
اضرب على خدها مترد ركضت للجهاز
أتصلت على غهيب وبس فتح خط كتله
سفانه: غهييب رسل بُنه أجتني اجتي علينه تبچي ووكعت غهييب مجايي تكعد الحگ عفييه الحگ.
سده مني بسرعه واني رحت يم ماما تحرك بيها ماترد لطمت على صدرها فاتحه عيونها
آيات: يمه بنيتي يمه ضناي.
مامرت عشر دقايق اندفع الباب وفات غهيب يركض بس شافها مشوره بلكاع فتح عيونه وشالها طلع يركض ركضت ماما وراه هُذال واكفه يم الباب كلشي مفاهمه واني ابچي مالحكت حته ابدل ملابسي شخط السياره وراح غهيب
هُذال: شبيچ تبچين سفانه عفيه منووو هايي.
سفانه: اختي هاي هُذال اختييي بُنه هايي.
فتحت عيونها مصدومه
: أجتي بيوم العقد مالتي!
شبيهااا؟
: ما أدري هُذال ما أدري اجتي منهاره ومافهمنه منها شي ووكعت.
مُهاف: رُسل أجت؟
التفتت فازه اشوف مُهاف ساند نفسه على العكازات ووجهة عركان مبين چان متألم
راحتله هُذال تركض سندته هزيت راسي أي عيني متروسه دموع وهوَ بينت على ملامح وجهة القلق بس عيونه تباوع إلى ساكت شلت جنطه رسل الصايره بوسط الطرمه
ومهاف رحت يمه من من الجهة الثانيه سندته ودخلنا الغرفه مالته وهوَ كل ملامح وجهة تغيرت من سمع بأسمها بقينه ساكتين عينه على صورته هوه ورسلان يحچي
مُهاف: شبيها.
سفانه: تبچي مافهمنه شي منها.
: متأكد هذا العار سوالها شي انيي متأكدد.
: كلشيي يسوي هذا الحقيير.
: كون ابو فاضل سبع الگنطره يطلع مسويلها شي أذا ماشگيته ثنين معتب.
سحب الجهاز ماله يتصل على غهيب ميرد عليه شمر الجهاز على الحايط متنرفز لايكدر يكوم من رجله ولا يكدر يسوق ولا يحرك ايده أني اعرفه مُهاف ميتحمل يبقى كاعد ابد.
وهاي اول مره أحمد ربي واشكره على شي مُبتلا منه احمده لأن مُهاف مكسر وميكدر يكوم لان لو هوَ چان موجود وشاف الوضع الچانت بي رسل اضمن دفنه محمد على ايده
مرت نص ساعه اتصل على غهيب ميجاوب
دكيت على ماما وردت عليه بصوتها المليان بچي
آيات: جايين سفانه جايين حضريلها غرفتج.
سديته منها مُهاف منتضرني احچي
سفانه: اجوي تكول حضري غرفتج الها.
مُهاف: لا خليها تجي بغرفتي.
: وين تكعد.
: تكدرين أنتِ ومهاف تجيبين الچربايه البغرفه امي؟
هُذال: الصغيره ام النفر؟
مُهاف: اي.
هُذال: امشي سفانه خل نجيبها.
طلعنه على السريع سحبناها الغرفه مُهاف وحطيناها على الجهة الثانيه من چربايه مُهاف
ركضت هُذال عدلتها وفرشت جرجف
عليها ومخاد وبطانيه سمعت صوت سياره غهيب طلعت اركض فتحت الباب
نزل غهيب وفتح الباب الها ساندها الكانونه بأيدها حالتها حاله وماما عيونها مورمه من البچي دخل يمشيها على كيفه.
سفانه: غهيب بغرفه مُهاف حولنه الچربايه.
هز راسه بدون مايحچي دخلها للغرفه مال مُهاف فز مُهاف عينه عليها ميكدر يتحرك
نامت على الچربايه وماما عدلت نومتها تبچي كاتمه صوتها من وضع بنتها
ورسل هادئه ألى درجه ولا چنها نفسها إلى اجت منهاره كلامها مخربط بسبب بچيها
بدون تفاهم جر الكرسي غَهيب وكعد كدامها مباشرتاً قريب عليها كلش شابك أديه ببعض
غهيب: احچي.
رفعت راسها رُسل وكعدت عدل راچيه ضهرها على الحايط عينها متحطها بعين غهيب
غهيب: محمد؟!
وكعن دموعها بهدوء هزت براسها
رُسل: متزوج وعنده ولد.
شهگت وبهت وجه ماما تباوع
عليها غهيب عافها وطلع مستعجل يركض
ركضت وراه أمي متسودنه وهذال كلشي مفاهمه بس صافنه.
مُهاف: ال ال كتلچ رسسللل ساااقطط ميفيدچ كتلچ رسسسللل لاااتقبلييين كتلچ يأذييييچ متتشوفيينننن راحه وياااه عاندددتيييييي عاااندتييييي أنعل ابو لابو منين ماطلع ال ابن ال
يصيح منفعل بصوت عالي ورسل مبنده بچي
وماما تبچي بكل قوتها تشهگ حاطه ايدها على كلبها
آيات: رااححح يكتلله راااحح يكتله غهيب راااح يكتله.
صيح مُهاف وجهة أحمرر من العصبيه
: خللل يكلللتتته اذااا ماكتللله انييي الاكتلله.
كعدت هُذال بصف رُسل وحضنتها
تمسح على شعرها تحچي وي مُهاف
هُذال: مهاف عفيه لتصيح شوف وضعها بعدين هذا الحچي عفيه.
حط ايده على الميز وكف على طوله لازم
العكازه وطلع من الغرفه باوعتلي هُذال واشرتلي تعالي
بلعت ريك وكعدتت يمها ذبت نفسها عليه تشهگ تعتب على نفسها
رُسل: ما اخدت بحچيكم عفتكم وانتو اهلي والله حبيته والله حبي اله عماني والله.
سفانه: اششش سوده عليه.
امسح على راسها وابچي وياها مو رسل.
حيييل متغيره حييل صار تقريب ال 3 سنوات ماشايفتها ولا لامحه طولها غير بلعقد
راحت هُذال للمطبخ جايبه الها كلاص مي شربتها وخلتها تمدد على الچربايه
هُذال: نامي حبيبتي ارتاحي.
باوعت على أمي إلى بس تبچي وتباوع
الرُسل راحت يمها
هُذال: خاله خليها ترتاح.
اخذت ايد هُذال وكامت تمشي ببطئ واني وراهم طلعت من الغرفه ماما تحچي بهدوء دموعها بعينها
آيات: دمرها دمر بنتي.
هُذال: مابيها شي أن شاء الله.
الله يساعدها هواي مبينه تحبه.
: تبرت منه واحنه اهلها علموده وخذلها چنت خايفه من هذا اليوم چنت متحمله غيابها ومتحمله ما اشوف بنتي سنوات بس علمود سعادتها حطمها راحت بنتي راحت.
سفانه: شبيها!
: صاير عدها انهيار عصبي.
شهگت اباوع الامي حطت شالها على عيونها وبچت حيل حضنتها هُذال مفاهمه تبچي ويانه
هُذال: خاله شنو السالفه كولي يا الله هسه يجي غهيب ونفهم منه يجوز فاهمه غلط البنيه.
سفانه: متجي إلى اذا متاكده هُذال اختي صار 3 سنوات مشايفتها غير بس بلعقد مالتچ تجي لان فاهمه السالفه غلط؟ عبالچ رسل بهلغباء.
هُذال كعدت امي على الكرويته وأشرتلي اسكتي جابت الها مي وشربتها طلعت المهاف واكف بنص الطرمه جهازه بأيده
سفانه: مُهاف.
دار جسمه عليه عيونه يريدهن مني وكفت.
كدامه وبس اجن عيونه الحمر بعيوني حضنته أشهگ وابچي بأيده السليمه حضني حيل ضام وجهة برگبتي أعرف كلبه شكد يحب رُسل وشكد عزيزه عليه وفوك قهرها ميكدر يسوي شي لأن رجله وايده مكسورات
يهمس واضحه الغصه بصوته
مُهاف: سوده بوجهي سوده بوجهي أختي ومابيدي اسويلها شي اختي.
سفانه: لاتكول هيچ مُهاف لاتكول.
ابتعد مني عيونه حمرر يمسح عليهم
مُهاف: دخلي يمها خاف تريد شي سفانه لاتعوفها.
رديت عليه بغصه، عدها نهيار عصبي مُهاف.
فتح عيونه يباوع الوجهي واني
ضميت وجهي بين أديه ابچي بصوت عالي
طلعت هُذال على صوتي وجرتني الحضنها
هُذال: اششش سفانه عفيه شبيكم هاي بدال متسكتون أختكم تبچون كلكم.
شهگت اضم وجهي بحضنها ومهاف يدوس بلجهاز ميدوس لان مساع ركعه باوع الهذال
مُهاف: هُذال اتصلي على غهيب هذاا القندرااا ميدوووسس.
هزت راسها هُذال وطبت جابت تليفونها وانطته المهاف
مُهاف: أنتِ دكي.
هُذال: الزم أنتَ اتصل مُهاف.
فتحته وحطته بأيده اتصل على غهيب ميرد رفعا راسي من دخل غهيب أيده متروسه دم شهگت هُذال تباوع الوضعه ادياته ثنينهن متروسات دم ومن يم حاجبه دم
ركضت اله لامه وجهة بين أديه فاتحه عيونها بعيونه
هذال: غَهيب!
ما رد عليها سحب السِلاح من وره ضهره
وشمره بلكاع تمشى المُهاف هادء وياخوفنه أذا صار غهيب هادء احنه خوفنه مو من رسل خوفنه من غَهيب وألي راح يصير بي
حط مُهاف عيونه بعيون غهيب
مُهاف: قتلته،؟
هز راسه لأ وحط راسه بين أديه
غهيب: خذت حگها.
مُهاف: شسويتله.
غهيب: صَوبته.
شهگتنه اني وهذال نباوع الغهيب ومهاف كمل كلامه
مُهاف: شكد؟
غَهيب: 3
مُهاف: ليش ماكتلته غهييب ليش!
غمض عيونه غهيب يضرب على راسه بكل قوته
غَهيب: مااكدررتت ماكدررتتتت أيتممم ابببنه ماكدرررتتت مااككدددرتتت.
ضرب أيده حيل بمرايه المغسله فلشها شهگت هُذال تريد تروحله لزمتها من أيدها اهز براسي لا گلبي يررجف ويدك حييل.
سفانه: ديربالچ هُذال ديري بالچ.
نترت ايدها مني وراحت اله تبچي تحچي وياه بهدوء
هذال: غهيب عليك النبي أهدء باو...
قبل لتكمل كلامها صرخ بوجها
غهيب: سككتتييييي سكتتتيييي لاتتتحچييننن لاتتتتحچيينن.
رجعت هُذال ليورا فازه سحبها مُهاف بأيده السليمه وحطها وره ضهره
دخل غهيب للبيت مشيت وراه دخل الغرفه مُهاف عيونه عليها متركزه تمشى يمها وخر الغطه من وجها تبچي بدون صوت يحچي وياها بهدوء صوته يرجف خاايف عليها حيل.
غهيب: لاتبچين بُنه أخذت حگچ من عيونه لاتبچين.
كامت فازه معدله كعدتهة لازمه ايد غهيب تحچي بغصه
رُسل: كتلته؟ غهيب كتلته؟
مارد عليها وهيه نفجرت بچي باوع بوجهة نتر ايده منها حييل معصب خازرها وعافها وركع الباب ما ادري شلون لزم نفسه وماعاط بوجها فوك السواه بيها كله تبچي وتكله كتلته؟ من اجت شنو جانت متوقعه؟ غهيب يكتف أدينه ويباوعلها؟
سفانه: ما گتله نامي.
طفيت الضوه وطلعت منها طلع غهيب بدون ميحاچي امي الصار حلكها أبيض
ارتد جسمها ليورا مامسيطره ركضت الها لازمتها
سفانه: يمه.
آيات: كتله گتل محمد كتلله.
سفانه: لااا ماكتله والقران لاا.
لزمت گلبي بأيدي منا غهيب ألي مصوب محمد 3 طلقات ومنا مُهاف ألي روحه راح تطلع لان مجاي يسوي شي بسبب ايده ورجله رسل ألي وضعها ابد موزين وبس تبچي وهذال صافنه كلشي مامستوعبه مستغربه من غهيب حييل كعدت ماما وجبت الها مي شربت.
هُذال دخلت من بره عيونها متروسه دموع ميقبلن ينزلن عينها وره غهيب من طلع باوعت علينه كعدت يم أمي ولزمت ايدها
هُذال: كولي يا الله خاله أن شاء الله كلشي ينحل.
هزت راسها امي اخذناها الغرفتها مقبلت كالت اريد يم رسل ومهاف ضل بره حتى اني فرشت ونمت يم رسل بغرفه مُهاف
هُذال:.
بس صافنه وكلشي مامستوعبه وخاصتاً من غَهيب كال 3 طلقات صوبته وحالته الهستيريه البيت كله نكلب بمجرد اجت رُسل وكلشي ما مفتهمه من غير سلوب غهيب وعصبيته ألي يذبها بوجه أي احد يحاچي من شفت سفانه وخاله ايات نامن صعدت الغرفتي فتحت الشباك لكيت مُهاف بعده بره نزلت جوه
طلعت للحديقه اتمشى أله
هُذال: مُهاف.
دار وجهة مني عييونه حمر يدخن كاعد على المرجوحه وبصفه العگازات ملاته يحچي بغصه
مُهاف: نامت؟
هُذال: اي.
: روحي نامي لتضلين كاعده.
: غهيب ميجي؟
باوع للباب وهز راسه لأ رديت كتله
: لتبقى كاعد نام بغرفه خاله ايات محد بيها.
: ليش وين هيه؟
: بغرفتك نامن هيه وسفانه.
هز راسه اي انطيته العكازه مالته كام ساند جسمه عليها دخل للغرفه مالته وبسرعه اجت عينه على رسل تقدم ببطئ علمود ليطلع صوت للعكازه مالته دنك على راسها باسه وابتعد عيونه عليها.
نام على فراشه ضال نضره عليها طفيت الضوه وسديت الباب وطلعت صعدت الغرفتي جريت نفس بحسره شكد چانت بدايه اليوم حلو وشلون نكلب بنهايته طلعت كتبي قريت شويه ونمت
مر سبوع كامل غهيب ماكو رسل بس مكضيتها تبچي وتذكر ايامها وي محمد وتسولفلي شلون حارب الكل وذب نفط على نفسه كدام غهيب يكله لو تنطينياها لو احرك نفسي.
قشعر جسمي وهيه تسولف شكد يحبها وشكد ميخلي شي بنفسها ومدللها بدال ما اهون عليها كعدت ابجي وياها شلون الشخص يكدر يمثل شي وهوه بداخله شي ثاني
غهيب حتى داوم ميداوم واني ماكو شخص يوديني اخر شي خليت الخط مال اسينات يجيني ويوديني وياها حييل استفقده وكليوم أكول باچر يداوم واشوفه ابد ما أتصلت عليه اساساً كل جهازه غالقه ومن اسئل مُهاف يكول اني أعرف مكانه خلي يرتاح هناك.
مُهاف ااخخ مُهاف يباوع الحلك رسل يريدها بس تحجي وتطلب فد شي علمود يجيبها الها تضلم الدنيا بعينه من يشوفها تبچي
رُسل:
من دخل شفت مُهاف فتح عيونه بسرعه مسحت دموعي دكت الباب هُذال ودخلت بأيدها صينيه حطتها بلكاع
: تعالي اكلي حبيبي.
: ما اشتهي والله.
: عفيه بس شويونه.
كمت غسلت وكعدت اكل طلعت هُذال واني اللكمه كوه ابلعها صار سبوع اني الكلمه بحلكي واخاف اسئل
رسل: مُهاف.
مُهاف: ها.
رسل: محمد شصار بي شسواله غهيب.
باوعت المكانه من ماشفت منه
رد باوع للسكف وكال ببرود
مُهاف: ماكل 3 طلقات.
خنگتني العبره اباوع عليه دار عليه
يحجي بعدم اهتمام
مُهاف: شتردين منه اول وتالي راح تتطلكون عَسمى يموت.
بلعت الغصه ونزلت راسي اكمل اكل
رسل: اي.
حسيته بس يريد يشوف شنو ردي
كملت اكل بس بالي ابد مو وياه.
اردد وي نفسي، نقهرتي عليه؟ متزوج وعنده ولد ويضحك عليج چان وتنقهرين عليه؟ يتصل عليه واني يمه واني كاعده وياه ويسولفلي شكد يحبني ومستعد كلشي يسوي علمودي ويتصل سمير يكولي ابو الشغل ومهم لازم ارد عليه ويعوفني ويروح الها كدااام عيني ويچذب عليه كدااام عيني تليفونه واني ما اتقرب اله ولا اشوفه لان ثاقه بي وثاقه بحبه إلى تالي ماتالي هيچ اتجازه؟ طبه وجع فوك وجع 3 سنين ماوكفن بعينه ماعرض موقف النه بعينه من هوه وي مرته ذيج وأبنه.
هيه شلون قبلت؟ شلوون قبلت اذا هوه حتى اهله ميدرون بيها شلون.
مسحت وجهي احچي وي نفسي
صيري قويه رسل طبه الف وجع حقج خذاه اخوچ شيلي من تفكيرج شيليي شلت الصينيه للمطبخ لكيت سفانه هناك
حطيتها على الكاونتر وبديت اعزل بيها حتى ما ألي عين احچي وي واحد منهم واحط عيني بعينه بعد إلى صار بيه وبعد كل النصائح مالتهم الي
ماحچت شي وياي واني غسلتهم وطلعت.
من المطبخ كعدت بلغرفه دك گلبي وي دكه جهازي من شفت الأسم ملجئي ابتسمت بقهر ورفضته امده گلبي إلى يرف الك يلمتعبه.
رجع اتصل مره ثانيه اخذت الجهاز
وطلعت للحديقه رديت عليه
رُسل: نعم؟
سمعت صوت النفس مالته يحچي تعبااان
محمد: نبض.
بقيت ساكته اروح وارجع وهوه رجع كال بغصه.
محمد: نبض بس خليني افهمچ كلشي والله مو كلشي مثل مارسمتي بعقلج بس خليني افهمج الله يخليج ادري غلطان والله غلطان وياج ومقصر بس مااكدر بدونچ وحگ الله ما اكدر افهميني تعبت والله تعبت.
رُسل: طبك مرض تستاهل التعب يانذل لك اني شلون حبيت واحد مثلك قذذرر وعفت اهلي ديرت المحنه بس اني امداني حذرني منك غهيب طلع يعرف بخياساتك يلخااايس اذا بعد اتصلت عليه خاف غهيب رحم بحالك وضربك 3 طلقات ومامتت اني اصوبك بنص كلبك يلعار ياناقص رجوله لك أنتَ هم محسوب على الزلم كدام عيني تخابر بيها ومسميها سمير حتى متستاهل واحد يعاتبك ويتعب نفسه الك عين يلصلف تدك عسه التعب لايروح من كلبك وتضل مشلوع كلبك ومن باچر اني رايحه ارفع ورقه طلاك تطلك ورجليك فوك راسك.
سديته بوجهة ايدي ترجف من العصبيه مستغربه حيل من نفسي وشلون هلكلام طلع مني جريت نفس احچي وي نفسي عفيه رسل خوش حجيتي عفيه.
درت وجهي شهگت فازه من شفت
غَهيب واكف ورايَ رجعت ليورا وهوَ
مد ايده بمعنى انطيني بدون أي كلمه مني حطيت بأيده الجهاز
سحب الدنبوس من ردن دشداشتي
وياه طلع الخط كسره وذبه ميباوع
الوجه ما نطانياه حطه على المرجوحه وراح.
مسحت دموعي افكر شلون يروح زعلهم مني بعد ماعفتهم كلهم وفضلت هذا القذر عليهم.
هُذال:
حاطه كتابي بحضني واقره والعب بشعري سمعت صوت خاله ايات جوه تحچي كلت هذولي خطار عفت الكتاب وفتحت باب الكنتور اطلع إلى ملابس علمود ابدل وانزل جوه
انفتح الباب واني عبالي سفانه دك.
گلبي حيل من شميت عطر غهيب حيل ماخذه موقف منه وشلون عاط بوجهي كدامهم كلهم هاي كل مره من يعصب يفقد اني شنو ذنبي؟ يضل كل ميعصب اني اطيح بيها؟ بلعت ريك حتى الملابس كلهم خربطتهم غمضت عيوني حييل مشتاقتله حيل بس احلف مل اباوع بوجهة ولا اشوفه سحبت ملابس ودرت وجهي اريد اطلع
حچه بخشونه صوته بهدوء تعباان
: نونو.
گلبي حسيته يريد يطلع كد ماقويه
دكاته عفته وطلعت لامه الملابس لكلبي
ديربالچ هُذال ديرري بالچ تضعفين.
بدلت ملابسي ونزلت جوه حتى ما أعرف
علي شنو بدلت عبالي خطار طلع غهيب
شفت رسل كاعده وتباوع عليهم كعدت
يمها كتابي بقه فوك شلوون؟ بقيت ساعه كاعده أكول هسه ينزل واروح ومانزل
صعدت فوك معليج بي اخذي كتابج وطلعي سمعتي هذال حته لو حجه عوفي وطلعي اقوي بنفسي واحجي وياها سحبت نفس وطبيت شفته كبالي حاط جنطه بوسط الچربايه مسفط ملابسه بيها واكف يم كنتوري بأيده تشيرتي.
دار عليه من دخلت واني بسرعه بعدت نضري منه اخذت كتابي وطلعت بقيت الباب بي فتحه وكفت يمها اباوعله شيسوي حته وجهة متغير
قرب تشريتي الوجهة سفطه وحطه وي غراضه اني كل إلى ببالي رجع هنا طلع ديريد ياخذ ملابسه ويرجع
گلبي يركض عليه من دخل بودي احضنه حييل واكله شكد مشتاقتله بنفس الوقت يعرض كدامي الموقف مالته من عاط عليه.
مسحت وجهي ورجعت نزلت جوه كعدت بلصاله كدام الدرج بلضبط علمود بس ينزل اشوفه سويت نفسي اقره الحد ماصدك نزل بأيده الجنطه سويت نفسي مامهتمه حتى ولا باوعت أله وهوه وكف يم خاله ايات باس راسها باوع عليه ساكت وطلع صاح سفانه وياه
طفرت ركض وراهم اسمع شيحچون
غهيب: كولي البُنه تحضر نفسها باجر.
اخدها ترفع دعوه طلاق و هُذال حچيت وي ابو الخط مال اسينات هوه يوديها اي شي تحتاجونه كولي الهذال تطلع الكم فلوس يمها هيه تندلهن وشكد متريد خلتاخذ اذا ردتن شي خابري على رامي لو همام يجي يوديچن.
ردت عليه سفانه تبچي
سفانه: شوكت تجي غهيب.
مسح على راسها
غهيب: شوكت ما اشوف نفسي بردت ناري أجي سفانه أنه خايف من روحي عليكم خايف من ناري تحرگگم.
عافها وطلع مسحت دموعي ورجعت صعدت فوك اكمل قرايتي وكلساع اصفن وافكر بكلامه يعني هم راح؟ وما اشوفه ولا اشم عطره ولا امسح على لحيته ولا اكعد الصبح اشوف وجهة كدامي ولا يقريني ولا من يشوفني اكل يجي يقريني ولا احس بي بليل حاضني ويشم بشعري حيل مسحت وجهي اركز بقرايتي
ثاني يوم اجه اخذ رسل واني اباوعله من الشباك من اجه ومن راح.
مرت 3 ايام ثانيات اني اروح بلخط وارجع رسل صارت زينه ومن تشوفني اسوي اكل لو كاعد اقره تجيبلي اكل مثل غهيب بس وين رسل ووين غهيب
سفانه تداوم وكليوم جايبه وياها بوكيه
ورد غفار جايبه الها نترست ترس غرفتها
مُهاف روحه بخشمه صايره اخر شي اتصل على غهيب خذاه ذب التجبيرات ورجع رغم بعد اربع ايام لو ثلاثه على موعدهن.
خاله آيات من تنام رسل كلساع تدخل تشوفها بس من تكعد متحچي وياها اول ايام كلساع تحچي وياها بس من صارت زينه صارت متحجي وياها
سفانه:
طلعت لمهاف اليوم هوه يوديني وصلني للجامعه وراح شفت من بعيد غفار لابس قاط رصاصي طالع يموت سويت نفسي ثكيله وهوه اجه عليه
غفار: صباح الخير.
سفانه: صباح النور.
: اليوم جبت ورد اصفر.
: هههه غفار ونبي غرفتي انترست.
: ما ادري احس بس الورد يعبر على حبي الچ.
سحبني من ايدي للغرفه مال مكتب مالته صارت كدامي البوكيه مال ورد ابتسمت من شفته اصفر من صدك وكلش چبيره
لزم ايدي مبتسم اندك الباب ودخل سلار بسرعه اجت عينه على ايدي وأيد غفار
تحمحم داير عينه منه
سلار: السلام عليكم.
وغفار رد عليه
غفار: كل الهلا.
سفانه: وعليكم السلام.
سلار: غفار اني اجي غير مره.
غفار: لا تعاال اكعد.
سفانه: اني حروح للمحاضره.
هز راسه غفار وعبر ايده على كتفي يحچي وي سلار.
غفار: هاي شنو سلار متبارك المرتي؟
سلار: مبروك شايفين الخير ان شاء الله.
ابتسمت بوجهة
سفانه: الله يبارك بيك يوم الألك ان شاء الله.
هز راسه واني عفتهم وطلعت اخذت محاضرتين اجاني غفار
غفار: سفانه راح اطلع اني والدي متخربط وضعه خلي مُهاف يجيج.
سفانه: تمام سلامه ان شاء الله طمني عود.
: صار.
راح واني محاضره وحده وتعبت الشمس تضرب براسي اتصلت على مُهاف علمود يجي اطلع بعد مابيه حيل اكمل حتى.
سفانه: مُهاف تكدر تجيني هسه لو اجي بتكسي.
مُهاف: رايح اوصل نور و هُذال للسوك.
سفانه: ليش متداوم هُذال؟
مُهاف: لا اليوم مداومت.
غلقته منه وتمشيت اريد اطلع من الكليه وكفت يم الشارع منتضره تكسي طبكت سياره سلار كدامي نزل يباوع للشارع يباوعلي
سلار: ليش واكفه هنا.
سفانه: منتضره تكسي.
: صعدي اني اوصلج.
: لا هسه راح اأجر.
: اني موجود صعدي.
صعد كدامي واني ماصدكت كبل صعدت وياه منا تعبانه مالي خلك انتضر صعدت وره وهوه ماحچه شي حته ستحيت من نفسي
تحرك ساكت واني عيني ع الطريف اجت عيوني بلغلط على ايده إلى على الستيرن ترجف عكدت حاجبي مستغربه
سفانه: سلار ايدك ترجف، بردان؟
صار نضره على ايده ابتسم بخفه
هز راسه لا
: لا، مو بردان.
: لعد ليش ترجف؟
جر حسره عينه على الطريق
سلار: من القهر.
: أنتَ هماتين عندك قهر.
: محد ماعنده قهر.
سفانه: شنو نوع القهر مالتك.
وكفنه بلأزدحام وهوَ باصبعه صار ينقر على الستيرن وحچه بهدوء
سلار: مو كُل ألي نحبهم ينكتب الهم نصيب ويانه واني قبلت بهلشي.
سكتت اباوعله من المرايه وهوه ابد ميرفع عينه ورجعت رديت بهدوء
سفانه: صعبه.
هز راسه اي واني كلش نقهرت عليه على بالي يحب وحده ومصار الهم نصيب سوه طول الطريق افكر بي حيل نقهرت عليه وافكر شنو شعور الشخص اذا يشوف الشخص اليحبه ماله نصيب وياه شلون راح يكدر يتقبل غيره بحياته.
شلون كلبه بمكان وهوه بمكان ثاني
زفرت نفس طبك كبال بيتنه نزلت وحچيت وياه من الجامه ماله سيارته
سفانه: سلار، تهون أن شاء الله رب العالمين
أعرف وأحكم مني ومنك لا بُد هلشي لمصلحتك والله ضاملك الاحسن.
هز راسه اي مدنك راسه وهمس
سلار: ونعمه ب لله.
عفته ودخلت جوه.
اسولفله إعلى ولفي وهوه ولفي!
هُذال:
اليوم خمييس ماداومت ضربتها غياب وأتفقنه اني ونور نروح للسوك صار هواي مرايحين
مُهاف راح يوصلني البيت خالو ناخذ نور.
ونروح بلطريق محد يحچي لا اني ولا مُهاف
قبل لنوصل بيت خالو كتله
هُذال: غهيب شوكت يجي؟
ذب نفس وهز راسه بمعنى ما أدري
درت عيني منه للطريق بيت خالو صاير بينه وبينهم شارع عام وسيطره لذلك مرات يصير أزدحام لو يوكفون السيارات أما مشي اكدر اعبر بسرعه
عبرنه الشارع وصارت كدامنه اسينات بملابس المدرسه وجهها احمرر وتبچي عگدت حاجبي
احاچي مُهاف
: اوكف مُهاف هاي اسيناات.
وكف السياره قريب عليها واني نزلت الها ركض.
هُذال: اسيناات شبيچ؟
تبچي وفحطانه كبل اجه براسي خالو
هُذال: خالوو بييي شييي؟!
مُهاف: بس اوكفي خل تهدء.
اسينات: عندي امتحان والخط ما اجاني وبابا مو هنا يوديني وراح يبدي الدوام.
رجعت تبچي واني حطيت ايدي على گلبي بودي هسه اصلخها راجدي اوكع سنونها بحلكها مُهاف كال الها
مُهاف: امشي اني اوصلچ.
اسينات: م، ماا يدخلوني.
مُهاف: لاتبچين شبيچ بكيفهم ميدخلوچ.
رغم بيت خالو بعد عليه خطوتين من السياره بس رحت وياهم و الحمد الله بسرعه عبرنه الشارع واسينات الشهگه مچلبه ببلعومها
اتصلت نور واني رديت عليها
هُذال: بس نوصل اسينات ونجي.
غلقته منها طبك مُهاف سيارته كدام المدرسه وباوع عليه
مُهاف: تنزلين اخذلج اجازه احسن؟
هزيت راسي ونزلت وياهم طبينه للأداره.
صارت كدامنه ست نجلاء سلمنه عليها ودخل مُهاف للمديره يحچي وياها واني بقيت واكفه بلباب أنفتح باب غرفه غهيب وطلع منها بأيده الستره مالته
بسرعه اجت عيني بعينه درت وجهي گلبي يدك مداوم الييوم؟! صار سبوعين ماكو هسه يلا داوم؟ سويت نفسي حتى ما اعرفه وهوَ استغرب من لبسي عفته ودخلت الغرفه المديره
حچه وياها على اسينات دخل استاذ مرتضى بأيده اوراق ومن شاف اسينات تبچي سألها
مرتضى: هاي ليش تبچين أسينات؟
أسينات: استاذ الخط ما اجاني.
باوع على ساعته ورد عليها
مرتضى: يلا مصار ربع ساعه من بده الدرس لاتبچين.
مُهاف يباوع عليه ويرجع يباوع على اسينات حچه وي المديره وخلاها تدخل واني اخذلي اجازه طلعت من غرفه المديره اني ومهاف لكينه غهيب واكف بلباب يدخن بس شافنه اجه بأتجاهنه بسرعه كلت ال مُهاف
هُذال: اني راح اروح للسياره كدامك.
عفته ومشيت من فتت من غهيب لزم أيدي خازرني مُهاف حط ايده على ايد غهيب يحچي وياه.
مُهاف: أحنه بلمدرسه غهيب! عندك حچي وياها تكدر تجي البيتك وتتفاهمون.
همس غهيب قريب عليه بحده
: لميي شعررچ.
باوع بعيونه مرجعتله الخزره
: تعال أنتَ لمه أذاا تكدرر.
عفته ومشيت للسياره ايدي على گلبي وجهة تعبااان حيل تعباان وعيونه الشرايين البيهن متشخطات حمر مبين مانايم جوه عيونه سواد بس رغم كلشي كاشخ وجاي عابتله عرفته ضل يسأل مُهاف على رسل
مسحت وجهي حيل اهز برجلي تأخر مُهاف.
يلا اجه للسياره دخل يباوع عليه حرك السياره وحچه يذب بسامير
مُهاف: مساع شوكت يجي وهسه من
شافته سوت روحها متعرفه.
باوعت أله رافعه حاجبي
هُذال: هايَ عليه؟
مُهاف: لا يابه.
: اي خوش بس ترى محد اكو بس اني.
: محد كالچ عليه مسودن؟ احچي وحدي هواي.
: حشاك.
سكت شويه ورجع كال
: هُذال.
: ها.
: منو هذا المدرس الضل يحچي وي اسينات؟
: استاذ مرتضى ابو السلاميه شبي؟
: هيچ اسئل حباب وياكم كلكم مو.
: اي.
طبك سيارته كدام بيت خالو دكيت على نور طلعت لان لعبانه نفسي ما اريد اشوف سميحه
وحتى خالو مو هنا علمود اسلم عليه
نور: هلاو.
هُذال: هلا تأخرنه بس عادي من ورا اختچ.
نور: شلعت گلبي بس تبچي يمعوده عادي تعيده الچ مدري منين نزلت عليها الشطاره.
هُذال: هههههه لچ شفتها فحطاانه كلت هذا خالو بي شي اسم الله تكلي ابو الخط حرت شسوي اكتلها بنص الشارع اموتها هم ميبرد گلبي.
: عبالچ هسه راح تجاوب؟ لا
: شعدها هيه.
: انكليزي.
: يمه.
وصلنه مُهاف للسوك شمر عليه محفضته
واني رفعت تك حاجب
هُذال: عندي عيني لعد الخزينه مال اخوك الفوك عبالك اعوفها وما اخد منها.
ضحك مكيف بيه
مُهاف: عفيه عفيه صرفيهن كلهن.
هُذال: اخذت 250 اريد اشوفه من يجي ويشوف الخزينه مصفره شيسوي.
مُهاف: بس ذني ماماخذه غيرهم.
هُذال: لاا ماخذه كليوم بليل ادز الجهال ال بلشارع يشترولي ب 25 الف واحسب على سبوعين.
مُهاف: ههههههه يرخصلچ يابا.
هُذال: طبعاً.
نزلنه اني ونور ومهاف ضل منتضرنه يم سيارته من 1: 30 لل 3: 30 احنه نفتر بلسوك ماخلينه شي يعتب علينه لا مكياج ولا ملابس ولا احذيه
نور: شو تاخذين من المكياج 3 قطع؟
هُذال: إلى والاسينات والسفانه.
هزت ايدها تباوع عليه
: هوه اني 150 ماكفني نوب 250 ثلاثتچن بيها.
: عادي حاطه احتياط بلجنطه بعد.
: هوه غهيب وين؟
: طالع بشغل وعايف المفتاح يمي.
: بعد ميطلع من هسه اكلج.
: احسن.
رجعنه كل وحده شايله سبع علاليك متروسات وكلساع ناخذ اسرتاحه ننزلهن بلكاع ونشوف شي ونروح نجيبه الحد ماوصلنه السياره مُهاف احنه دافعين فلوس كليه
خطيه مُهاف حتى ماحچه ويانه كاعد بسيارته وينتضرنه اني كلت هسه يرزلني بس كلشي ماحچه وصل نور البيتها شلت العلاكه مال دشداشه
هُذال: هاي الخالو وهاي مالات اسينات.
نور: واني؟
: امشي لچ.
ضحكت ونزلت من السياره
هُذال: مُهاف جبتلكك شغلله تموتت.
مُهاف: يا الله.
: هههههه اطلعها هسه؟
: لا من ننزل.
سكت شويه ورجع كال
مُهاف: وغهيب ماجبتيله شي؟
باوعت أله صفح
هُذال: شنو يمه مخلفته وناسيته هوه يجيبلي لو اني اجيبله والله يالله.
مُهاف: اي عفيه لاتنطينه وجه خل يتعلم بعد ميصيح.
سكتت اني نزلنه لكيت خاله آيات كاعده بلمرجوحه وبصفها رُسل رفعت راسها النه
آيات: تأخرتو يمه.
مُهاف: چنتچ مو اني.
هُذال: هواي چنت اريد شغلات.
مُهاف: يوم.
آيات: ها.
: اليوم غهيب مداوم.
فزت تباوعله عيونها تلمع بس نجاب طاريه هزت راسها اي ورجعت نزلته واني اشرت المهاف
: راح ابدل واجي عوف العلاكات هنا.
صعدت فوك بدلت ونزلت لكيت سفانه
كاعده وياهم
فرشت فراش بلحديقه كعد بصفي مهاف وبلمرجوحه كدامنه خاله آيات ورُسل وسفانه
طلعت اول شي سبحه جوزيه وقدمتها بأتجاه مُهاف
هُذال: اولل شيي مالت اخويه عود بعدين انتو.
ابتسم وسحبها من ايدي وحطها بوجه سفانه
مُهاف: بااعيي الذوووق.
سفانه: اييي بلعافيه يلاا وخر وانيي هُذال.
هذال: اوكفي بلسره.
طلعت البوكس مال مكياج سفانه
هُذال: هاچ هذا أنتِ.
سفانه: ااالله والله كفووو مناسيتني.
سحبت شال يجنن مطرز لون حليبي
هُذال: وانتِ خاله هذا الچ.
آيات: ياا حبيبتي فدوه.
رُسل ساكته تباوع النه مبتسمه
هُذال: رُسلل أنتِ ما أعرف شتحبين
جبتلچ ويانه مكياج و حذاء.
قدمتهن باتجاها
رُسل: شكرًا.
كامت خاله آيات فازه ومهاف بسرعه حچه
مُهاف: اااااحممم يمه كعدي كعدي.
عكدت حاجبها خاله آيات وكعدت
باوعت المهاف ألي غمز واشر السفانه وهيه بسرعه سحبت علاكه چنت عازلتها منهم وطفرت
هُذال: لاا هااايييي عوفيهاا سفااانه.
سفانه: شبيهااا جايببه النفسج اكثرر منيي.
هُذال: لااا والله مال غهييب هاايَ تعاااي.
غهيب: أنطيتي ياها مالتي.
شهگت فاتحه عيوني على وسعهم ودرت
وراه غهيب واكف يم المغسله أدينه بجيوبه
عضيت شفتي حيل وغمضت عيوني الله ياااخذج الله ياااااخذج ياهذال امداااج.
درت وجهي سويت نفسي مامهتمه وسفانه أنطته العلاكه وكعدت مبتسمه بصفي كرصتها حييل من أيدها بسرعه عاطت واني باوعتلها اسوي نفسي فازه
هُذال: هاا شبيچ؟
سفانه: هيچ.
طلعت ملاتي المكياج شوفتهن السفانه كامت رُسل باست غهيب وهوه دار وجهة منها يحچي كوه
غهيب: هلا بيچ.
كامت خاله ايات حضنته وهوه حضنها
حيل يبوس براسها
ضحكت سفانه وهم راحت حضنته
سفانه: صاير عليك ازدحام.
ابتسم بتعب واني ولا حچيت وياه ولا درت راسي اله شلت غراضي وصعدت فوك
هُذال: خاله راح أنام.
آيات: بيش الساعه اكعدچ.
هُذال: اني اوقت المُنبه بس اذا ماكعدت كعديني ب 8.
هزت راسها واني بس اريد اشرد بسرعه بدلت وطلعت الغراض اعزل بيهن دخل غهيب سويت نفسي ما اشوفه حتى وكف كدام المرايه ذب الساعه مالته علك الستره وره الباب قميصه هم ذبه واني اباوعله من جوه الجوه صار ورايه بسرعه وجهي احتر طخ صدره بضهري مد أيده سحب قميص بلعت ريگ
ابتعد مني واني سديت الكنتور تمددت وحطيت البطانيه فوك راسي سويت نفسي نايمه طفه الضوه عبالي طلع بس حسيت بي متمدد بصفي
احس دكات گلبي فاضحتني وحسيته.
حته هوه سامعهن قرب راسه وضمه برگبتي هادء ماتحركت مغمضه عيوني حچه بتعب
غهيب: نونو.
مارديت عليه ضم راسه إلى اكثر ياخذ
نفس بحسره
: تعبان وحگ عيونچ تعبان.
ماحچيت ولا رديت عليه گلبي متكطع بس لو أموت ما انزل نفسي واحچي وياه الحد مايعرف غلطه اني مو لعبه ساعه يعاملني بحنيه وساعه يصيح بدون ميدري بنفسه.
صح تعودت على وجوده ويومي ميكمل بدونه تعودت عليه من يقريني ومن يرزلني ومن يناكرني بس مو معناتها أضل اغفرله كلشي يسوي على ابو متعوده عليه وماكدر بدونه خاصتاً اني ابد ماغلطانه وحچيت وياه بكُل هدوء
وين يلا حسيت بي يمسح على شعري مغطي راسه بي شفته تمشي على كتفي
غهيب: الأدبسز حالته اليوم حالته تمشي ويمشي وراها.
غفيت وبعد ماحسيت عليه كعدت على ايد سفانه تهز بيه
سفانه: يمعوده يلا كعدي مو عندچ قرايه.
هزيت راسي اي غهيب ماموجود طلعت
مسحت وجهي بدلت ونزلت جوه هستوهم جايبين عشه من بره غسلت وجهي ووكفت بباب الصاله مكان بصف غهيب فارغ ولا رحت يمه سويت مجال بين سفانه و مُهاف وكعدت
مُهاف: هُذال.
هذال: ها.
: نروح باچر للنجف؟
بسرعه فزيت
هذال: اي نروح.
رُسل: اني هم اريد اروح البابا.
غهيب: أني اوديكم.
آيات: علواه والله.
سفانه: بيش الساعه؟
هُذال: خل نروح بليل؟ يعني نطلع مثلاً اليوم ب 11 بليل نوصل وقت الفجر ونتريك ونجي.
آيات: اي احسن.
هُذال: اتصل على بيت خالو يرحون ويانه؟
آيات: بعد احسن نروح بسياره غهيب و مُهاف.
هُذال: نكفي؟
سفانه: لعد شعدنه؟
هزيت راسي اتصلت على خالو وكتله ب 10 يجون علينه وب 11 نطلع
هز راسه غهيب واني دغيت مهاف بكتفه
هُذال: اني اروح وياك.
مُهاف: أي.
كملت أكل غسلت مواعين ورُسل سوت چاي
صعدت فوك حضرت إلى ملابس وسبحت وكعدت اقره بين ميصير الوقت دخل غهيب
غهيب: نونو وين ساعتي الفضيه؟
كمت بدون لا احچي طلعتها وحطيتها على الميز ورجعت اقره حسيته يتعمد بس علمود يحچي وياي وهوه يدري بمكانها وين
طلع الدشداشه السوده المساع جبتها اله والسبحه المائيه هم وياها جبتها سويت نفسي ولا اشوف عميه اني عميه وادعي بكلبي على سفانه
نزلت جوه الخاله آيات اريد عبايه منها
هُذال: خاله اريد عبايه عراقيه مالتي مدري وينها.
آيات: هذني ثلاثه يمه حضرتهن وحده الچ ووحده الرسل ووحده السفانه.
ابتسمت بوجهها اخذت العبايه وصعدت سمعت صوت بيت خالو جوه نزلت بسرعه سلمت عليهن و ب 10: 30 كمت بدلت لبست شال والعبايه حطيتها بعلاكه من نوصل البسها
غهيب كدامي الدشداشه ضابه على متونه ومنا لحياه طالعه شويه خفيفه يشيل ايده يعدل بشعره وعضلاته تبرز بلزايد
درت عيني منه اخذت الحلقه لبستها
سماعاتي اخذتهم وتليفوني وطلعت
لكيت رُسل حاضنه امها وتبچي بلمطبخ وسفانه واكفه على صفحه مبتسمه وخاله
آيات تبچي وياها.
نشگ حلكي من الضحكه اهمس السفانه
هُذال: تراضنن تراضنن؟!
سفانه: اييي.
وكفنه ثنينه مكيفات وسفانه حچت
سفانه: عيني خلصتن دراما؟
ضحكت متذكره خاله ايات كلما بچينه وكالت خلصتو دراما نزل غهيب ومهاف طلع بأيده السويچ طلعنه بره واكفين غهيب عباله اروح وياه بسيارته بس اني عفته ورحت السياره مُهاف وجريت نور واسينات وياي همس قريب عليه
غهيب: أني اعلمچ.
تمنيت شعري مفتوح علمود اشمره واعبره بس بعد لابسه حجاب خاله آيات كوه ضامه ضحكتها صعدت وي غهيب خالو بلصدر وسميحه وسفانه وخاله ايات وره وياهم رسل صعدت بلصدر واني واسينات ونور وره
وكف غهيب كدام الجامه مال مُهاف يحچي
وياه عينه عليه
: سوق على كيفك اني راح امشي كدامك.
: هاهيه.
شغل غهيب سيارته كدامنه يمشي كلساع يصير بمستوى سيارتنه يباوعلي من الجامه ضحك مُهاف بخفه يباوع عليه
مُهاف: راح يموت راح يموت.
باوعت أله صفح اسوي نفسي ما اسمع.