رواية أغلال زمن الغيهب للكاتبة مرمر الدليمي الفصل الثامن عشر
شهگت مامكمله كلامها ركضنه للسياره سلار يمشي سرريع مره يرفع عينه النه ومره للطريق خالتي ايات بس سامعه طايرين هيه وغهيب
لازمين كلوبنه بأدينه والطريق صار سنه علينه على ماوصلنه نزلنه نركض سلار كدامنه دخلنه ولا غَهيب ولا خالتي بلممرات اني وسفانه بس نبچي كلشي مافاهمين دخلنه كلنا وي سلار وكفت ساكته من شفت مُهاف كدامي ايده ورجله مجبرات والدم مقطر على اجزاء وجهة يابس عَليه.
خاله آيات كاعده يمه تبچي وغهيب واكف عيونه عليه تقربنه يمه غهيب وسلار يتسالمون.
سفانه:
مُهاف مو بس اخويه هوه صديقي وحبيبي واخوي شكد ماهوه يغثني ويشاقيني شكد ماهوه عزيز عليه هواااي دموعي تارسه وجهي من خوفي عليه گلبي الهسه يدك دمام مو نبض عقل ما ضل براسي وهسه أشوفه هاي حالته كدامي امي كدامي تبچي
حطيت ايدي على وجهة دموعي تطيح
سفانه: مُهاف.
كح بتعب رفع عينه ألي يسوي نفسه كلشي مابي غَهيب القلق والخوف مبين على وجهة ابد ماشال عينه منه يريد يحچي مابي حيل
امي حاضنه أيد مُهاف سمعت صوت سلار وراي
سلار: عدت سلامات ان شاء الله حبيبي.
دك على كتفه غَهيب
رد مُهاف تعبان، الله يسلمك.
وكفت هُذال ورايه عيونها كلها دموع واني اريد اسكت نفسي ماجاي اكدر غصباً ماعليه دموعي تطيح كدامه
هُذال: مُهاف.
دار عليها يضحك بتعب.
مُهاف: عفيه عفيه كون عشره عشره الدموع أله اجيبلچن علاكه حلويات.
ضحكت بنص دموعي راده عليه
سفانه، بس اصحه أنتَ.
مُهاف، مابيه شي بويه.
غَهيب، چنك تريد تكوم؟
آيات: تنچب وتسكت خطوه متتحرك وهذن يخلص موعدهن التجبيرات يلا تشيلهن فهمت لو لاا ادبسزز لو صاير بيك شي اني وين انطي وجهي شلووون اعيش شلون حاچينيي اموت والله لاتتعبوني.
أستاذن سلار وطلع مُهاف بقه ساكت يعقچ ملامح وجهة متوجع بس ميحچي اني وهذال ضهرنه على غَهيب مااحس أله على اذني ملويه غَهيب كاضنه اني وهذال من اذاناتنه
غَهيب: تعالن تعالن شلون تفزعن الزلمه وياچن هااا.
هُذال: ياا غَهيب شبيك احترم خصوصيه المريض بعدين سلار مو غريب.
بلعت ريك أني خايفه ورديت بقوه مثل هذال
سفانه: غَهيب احنه بيا حال وتحاسبنه شلون فزعنه الزلمه، يمه ماتحچين.
شالت شيلتها تمسح بدموعها تباوعلنه صفح.
آيات: انه شلي غرض يمه يردن يخربني وي ولدي.
هُذال: خوش خاله خوش.
سفانه: خوش يمه خوش.
هُذال: غَهيب مافزعنا هوه جابني وسمع منه واجع بعدين هوه اجه علمود مُهاف علاقتهم قويه يعني مو علمودنا.
مُهاف: صح.
غَهيب: أنتَ نچب لك رجلك وايدك مكسورات وتكلي لاتجي حادث بسيط خفيف انه احاسبك على هاي طايح الحظ.
آيات: طبعاً صاير مينكعد وياكم ابدد.
سفانه: فعلاً.
انلوت أذني حييل
سفانه: اااااي غهيبب.
هُذال: اني هم ارد احاسبك.
فتح عيونه مصدوم يباوعلها وامي فگت حلكها عليهم واني هم حته مُهاف فتح عيونه زين يباوعلهم
وهذال ردت عليه مامهتمه
هُذال: لاتخزر لعد شنو اخويه مسوي حادث ومتكلي؟ هاا؟
مُهاف: ياابعد اخوج اي والله.
غَهيب: هوه انه ادري ياغضب الله يكلي حادث خفيف لاتجي كلشي مابيه.
مُهاف: غَهيب لاتصيح على كيفك.
هُذال: هسه شنو گلبي ترا أذني راحت.
عاف أذاني واذان هُذال يباوعلها وهيه رفعت حواجبها ها؟ هز راسه يباوعلها.
سفانه: هسه شنو مُهاف عفيه شلونك اخاف توجعك.
مُهاف: لا.
آيات: يمه حبيبي رجلك توجعك أيد تأذيك؟ حته لو شويه كول.
غَهيب: راح اجيب العلاج.
مُهاف: اريد اكعد.
غَهيب: مهااف.
: تشنجت غهيب.
تقرب غهيب عدل كعدته وحط المخده وره ضهره وطلع يجيبله العلاج.
اشرتلنه ماما سكتن بچي سكتنه.
هُذال: شلون مُهاف الحادث؟!
مُهاف: جاي أمشي وردت السترين للجهة الثانيه مادار عود كلت اجرب ع الجهة الثانيه هم ماصار ضليت احاول الحد مااخر مره ماباوعت ع الطريق وفريته حيل مأيس منه وصار الحادث.
هُذال: غير تنتبه روحي راحت وراك.
سفانه: مُهاف بعد لتسوق حباب گلبي يوجعني عليك
باوعلي معاجبه ودار على امي
مُهاف: يمه نزعي شيلتچ خل انه البسها.
ايات: يااا والزلم الطابه والطالعه ماعدك غيره هينوب أنتَ يولد.
مُهاف: اشاقه يمه غير الفچ بلبرده ولا احد يشوفچ.
سفانه: تره هنه شعرات مشيبات.
هُذال: أي والله.
ايات: يااااا هُذال حته أنتي كلبتي عليه.
غمزت الها هُذال
: مثل ما مساع كلبتي علينه كدام زوجيي تكولين مالي دخل.
هُذال:
دخل غهيب شايل بيد العلاج وياه كرسي متحرك نزل مهاف بي ورحنه للسياره بطريق الرجعه طبك على ابو حلويات هواي جاب شغلات ورجعنا للبيت كعد مهاف بغرفته هي اساساً جوه
غهيب وكف كدامه يعددله.
غَهيب: طلعه ماكو تتحرك ماكو هاي امي وهذن خواتك الثنين شو تريد حشمهن اذا تريد شي طلعه ماكو فهمت؟
عكد حاجبه مُهاف ضايج
: اكلكم لاتعضومنها.
هُذال: اسكت مُهاف متشوف شصاير بيك.
مُهاف: شصاير اخبل.
سفانه: الله يحفضكم حشاش هوه غير چنك عمي جاسم.
دار عليها غهيب خازرها وهي سكتت خاله اول ما اجينا ركضت تسوي شوربه ومشويات.
عزلنه اني وسفانه البيت كله وغهيب طلع يسوك يريد يسوي عزيمه علمود سلامه مُهاف.
خاله ايات ويانه خلينه يرتاح وتليفونه بصفه بس يريد شي يتصل علينه ماكو هيج دلال حته صوته منريد نتعبه اتصل عليه سلار يطمن شلون صار كتله احسن وغلقته منه.
انطيت السفانه عصير برتقال
هُذال: هاچ انطي المهاف.
سفانه: اذا شربه.
طلعت تودي اله خالتي كاعده يمه دخل غَهيب شايل علاليك هواااي رحت اخذت منهن
هُذال: الله يساعدك.
هز راسه وعافهن بلكاع التفت بلمطبخ محد اكو جرني من ايدي للزاويه فتحت عيني اباوعله
هُذال: غهييب.
غهيب: مو مساع كلبچ؟
باوعت بعينه ابلع ريك
: شوكت.
حط ايده على أذني يحچي عينه بعيني
: من چنت لازم أذنچ.
رفعت حواجبي راده عليه
: وشنو يعني؟ واحد مايفلت السانه.
: لا مايفلت.
: اي يلا خوش وخر خل ارتب المسواك هسه واحد يدخل.
: شنو يعني أنه وزوجتي.
: زوجتك؟
: چا مو تكولين الأمي زوجي؟
هُذال: اهوو غَهيب واكفلي على الكلمه صدك تحچي.
غَهيب: كولي هم فلت الساني.
: يعني اخوك مدد هنا وانتَ جايني شنو زوجي وشنو كتلك گلبي صدك چذب.
عصرر شفتي بأيده ووخرها
: أنتَ شايف من تكولهن.
هُذال: لا ماشايفه يلا وخر.
تقرب اكثر عاكد حاجبه
: شنو ماعاجبك يابه؟!
: لا ماعاجبني يلا وخرر غَهيب
والله هسه سفانه تدخل عييب شتكول بلا.
: تكول اخوي يريد يبوس مرته وتدير وجها وتروح تعرف الأصول تعرفها.
فتحت عيني اباوعله دفعته أريده يوخر علمود اروح نزل وجهة الخدي باسه حييل دفعته من صدره
هُذال: غهييب.
غَهيب: ملسونته.
أبتعد يباوع بوجهي مبتسم واني حصررتني البچيه مدري ليش مستحيه وبنفس الوقت مستغربه منه فتح أيده منطيني مجال
غهيب: يلا امشي؟ اكمل.
رفعت وجهي اله خازرته
هُذال: مصخن أنتَ مصخن.
نزل وجهة مقابيل وجهي قريب كلش عليه
غهيب: قيسي حرارتي دكتوره.
رفعت حواجبي اخفي ابتسامتي
هُذال: استغفر الله.
دار وجهة مبتسم وراح الغرفه مُهاف
ما اتوبن منك وسوي شتريد
من چنت جاهل ولا ينفع چوي
احترك بالنار ويچويني ابوي.
واذني كلساع من اعاند تنلوي
من چنت جاهل ضعيف ومالي حيل
تريد اعوف عنادي من اني قوي
خاب هستوني شفت وجه الله عود
وكمت ارتب روحي وانه الفوضوي
شفت نعمة ربي لمن يمي اجيت
صرت اسولف واطلع وما انطوي
بعيني صارت هسا وردية الحياة
وانه اليسموني ربعي السودوي
انته كل عقلك اعوف الشامة هاي
بيك يطمع بس ابو العقل السوي
خايب عيونك بحر مالح عجيب
المنها يشرب لا تصدك يرتوي
انته فرصة واستغلك واحتويك
جوهرة ووي النوادر تنزوي.
دربي واضح لا ترد بدربي فوت
لا يغرونك دربهم ملتوي
- ليث ماجد.
اجني خالتي ايات وسفانه وبلشنه نطبخ للعصر بدو الناس يلتمون والمطبخ صار هوسه
ايات: روحن بدلن ماما الباقي اني اكمله.
هُذال: خل يخلص يلا.
ايات: مابقه هوه شغلات خفيفه شعريه وغيرها اني اسويها يلا حبيبتي صعدي بدلي أنتِ وسفانه.
جرتني سفانه وصعدنه فوك دخلت بسرعه سبحت وطلعت لبست فستان اسود بي حزام على الخصر ومن الكتف سبعه مفتوحه بتول أسود شفاف.
رفعت شعري وخليته بدون ضفر رشيت عطر دكت الباب سفانه لابسه احمر
هُذال: فدوه لله.
سفانه: أنتِ الفدوه لله حييييل حلوه طالعه.
: بسرعه بسرعه خل ننزل جوه نساعد خاله.
نزلنه جوه حته نسوان جايين ركضت على نور واسينات حضنتهن
نور: لچ عزا هاي شطالعه.
هُذال: شكراً شكراً لا لا مااكدر اخذ صوره لا.
اسينات: هههههههههههههههههه.
اجتي سفانه سلمت عليهم فاتت سميحه بدون مااسلم عليها دخلت تسالمن وي خاله ايات يتحمدن السلامه مُهاف.
ركضنه للمطبخ اني وسفانه واسينات ونور
دخلت خاله غَهيب هستوها واصله وهنه يصيرن 3 ابواب للبيت واحد لستقبال الزلم وواحد مال مطبخ وااحد مال صاله دخلت خاله غَهيب من باب المطبخ دخل وراها حيذم جايبها.
نور:
دخلت اخت خاله ايات وحيذم وراها بسرعه اجت عينه عليه دك گلبي حيل ونزلت عيوني منه اوزع بلزلايط على الكاسات
حيذم: السلام عليكم.
أتحدى البُعد يجبرني يوم انساك
وعمت عين الصدف غيرك تشوفني.
رغم بُعد المسافة وانتَ ترس العين
والناس الشفتهم ماجزو جفني
بخيالي شكد صور ماخذلك ولقطات
من اشتاگ كلش هوى يسَعفني
الكل: وعليكم السلام.
تقرب على خالته ام غَهيب
حيذم: شلونچ خاله الحَمد الله على سلامه مُهاف.
آيات: الله يسلمك حبيبي.
حنان: شلونه هسه مُهاف.
نزلت راسها آيات وبچت
آيات: حنان ايده ورجله مجبرات.
: عليمن تبچين ان شاء الله مابي شي كولي يا الله مو زين هيچ ولاغيرها.
: گلبي يوجعني لو شي اذه ولدي تدرين بمعزتهم عندي حنان.
هُذال: خاله مابيهم شي هسه كولي يا الله.
رفعت عيوني الحيذم بسرعه دار عينه مني تقربت اخذت الكاسات بصفه وهوَ همس
حيذم: شلونچ.
هزيت راسي
نور: زينه.
عيوني على البلمطبخ أخاف يباوعولنه رجعت المكاني اعبي بلكاسات طلع حيذم وسفانه صاحت
سفانه: خلصتي نور؟
: اييي هاچ.
هُذال:.
خلصنه تحضير دخلو ولد عم غهيب ووياهم غهيب وحيذم وسلار يشيلون والباقين ماعرفتهم بس سمعت اسم هُمام و رامي
من بينهم
دخل سلار باوع السفانه وبسرعه دار وجهة منها باوعت أله بتركيز ودرت وجهي السفانه مامهتمه تسوي بلبن.
خلص اكل الزلم صرنه ننقل أحنه الاكل للنسوان هووسه حييل اني وسفانه ونور واسينات وخالت غهيب وخاله ايات ويانه كامت ويانه بنيه اسمها وسن تساعدنه بنقل الاكل همَ من بنات عمهم جايه طلعنه احنه البنات كعدنه بلمطبخ ناكل الغرفه انملت وصارت هوسه تربعنه بلكاع وتكابلنه على الصينيه
سفانه: والله تفتحن الشهيه.
نور: هيه هيچ كعدات تصير صدك تفتح الشهيه.
اسينات: والله اني بهيج وبغيرها اكل خير من الله.
هُذال: لا هاي ولا هاي اكل خاله طيب.
نور: بهاي اتفق وياچ.
هُذال: سفانه هاي منو وسن.
سفانه: بنت عمي جاسم.
نور: تباوع صفح على هُذال.
اسينات: اي اني هم شفتها بس ستحيت أكول.
نور: شنو قصدچ اني ما استحي.
سفانه: ما ادري يعني زينه هيه مالها دخل بأحد بس هم شفتها تباوع هيچ الهذال ههههههههههههه.
هُذال: اني كل ماافوت من الصاله اودي صينيه اصفن على وجهي بلمرايه عبالي شو شبي وجهي.
كامت اسينات غسلت ووكفت تشرب ببسي واحنه بعدنه ناكل أتصل جهازي باوعت مُهاف رديت عليه وفتحت سبيكر
هُذال: ها مُهاف يوجعك شي؟
مُهاف: لا اريد كاسات مي.
: هسه ثواني.
سديته منه وردت اكوم كالت اسينات
اسينات: كعدي اني راح اوديله.
اخذت كاسات مي وطلعت توديله
سفانه: احمم طبعاً مساع شفت اكو نضرات.
هُذال: احممم اني همم شفتت.
نور: لعد شو اني ماشفت كلشي.
سفانه: هوه غير أنتِ يحضي الشفناچ.
هُذال: بسرعه نور اعترفي ترا هواي ركزت عليچ وعلى حيذم بسرعه كتيهن.
فتحت عيونها تباوعلنه
نور: اسم الله شوكت.
: شفنه شفنه.
نور: بناااااات سكتن.
سفانه: اول وتالي حاضرين الخطوبه.
هُذال: هم صح.
نزلت راسها مبتسمه تكمل اكل.
اسينات:
دكيت باب الغرفه
اسينات: ادخل؟
تحمحم ورد، تفضل.
دخلت اباوعله
: السلام عليكم.
: وعليكم السلام.
حطيت كاسات المي يمه ووكفت كدامه
: هذا المي.
: احمم، شكراً تعبتچ.
اسينات: لا عادي، الحَمد الله على سلامتك نسيت.
مُهاف: الله يسلمچ.
درت وجهي اريد اطلع
مُهاف: اسينات.
درت راسي عَليه
اسينات: ها.
مُهاف: مااكدر افتحها.
: اها العفو.
تقربت يمه اخذته منه وفتحته قدمته بأتجاهة
: تفضل.
عدل كعدته عاقج وجهة متألم
: هسه اني اعدلها ثواني.
حطيت كاسه المي على الميز عدلت المخده وراة وجهة صار بشعري ابتعدت
اسينات: ها؟
مُهاف: هاهيه.
أخذت المي وانطيته أله
اسينات: يأذيك شي اصيح خاله آيات؟
هز راسه لا يباوع الوجهي
مُهاف: هُذال وين؟
اسينات: كاعدات يضربن ثريد هيَ وسفانه بفضلك.
أبتسم ورد عليه، وانتِ.
اسينات: اني اول وحده اكلت.
مُهاف: بلعافيه، وأنه صاحب العزيمه ما ماكل.
: ياا اجيبلك؟
: علواه.
: هسه.
مُهاف: اسينات.
اسينات: هاا.
: أنتِ جيبيهم عود.
عكدت حاجبي مستغربه وهزيت راسي.
طلعت للمطبخ بعدهن البنات كاعدات
اسينات: مُهاف جوعاان.
كامت هُذال غسلت وطلعت صينيه تصب بيها وكفت على صفحه.
اسينات: كال أنتِ جيبيهن.
سفانه: هاا؟
هُذال: احححححممم اشو غصيت.
سفانه: والله حته اني غصيت.
اسينات: هسه انطني الصينيه.
شالتها هُذال حطتها بأيدي تهز بأيدها
: هاچ عمي هاچ.
باوعتلها صفح وطلعت صارت بوجهي وسن عفتها ودخلت الغرفه مُهاف حطيت الصينيه على الميز هوه باوعلها
اسينات: الريحه طيبه مو حقك والله صدك مو بس الريحه حته الطعم يجنن.
مُهاف: صح طيبه الريحه.
: هنيالكم طبخ خاله ايات يموت.
هز أيده السليمه يحچي.
: هيه شوكت طابخه.
: ياا شنو متطبخ.
: تطبخ تطبخ لاتسمعنه هسه تجي تاخذ الصينيه وتروح.
: ههههههههههه اكل بلبدايه.
: اي.
: خل اصيح احد يجي يوكلك.
: لا بس حطي الصينيه بحضني أعرف اكل بهاي ايدي.
هزيت راسي حطيت الصينيه يمه والخاشوكه يم أيده
مُهاف: هسه هوه المريض يتدلل مو؟
اسينات: اي غير؟
: چا اريد كيك.
: هسه اسويلك.
: صيحي هُذال وياچ.
: تمام.
طلعت منه طبيت للمطبخ وسن وخاله ايات موجوده سمعت وسن تكول الهذال.
وسن: أنتِ اليتيمه مو؟ واخوج هم مات.
هُذال: أيَ.
وسن: يمه شلون عايشه بدون أهلچ اموت اني هسه رغم استحي بس اجيت وي ماما لان مااكدر افاركها.
دخلت اني وهذال بسرعه غيرت الموضوع.
هُذال: ها اسينات اكل؟
اسينات: اي ويصيحچ.
آيات: راد اكل مُهاف شنو؟
سفانه: ايي كايل الاسينات جيبيلي اكل.
وسن: أنتِ متستحين ترحين توديله اكل اني بنت عمه الحد هسه مامسلمه عليه استحي.
رفعت حواجبي اباوعلها هوَ صح روحتي غلط بس لو كايلتها بطريقه محترمه مچان رديت عليها.
اسينات: لا ما استحي وطبچ مرض تردين تسلمين تردين لا ماميت على سلامچ.
فتحت عيونها تباوعلي وسفانه بسرعه كلتلها
سفانه: وسن عدلي اسلوبچ.
هُذال: اسينات سكتي.
اسينات: متشوفينها متعرف تحچي شتردين هسه اصفكلچ الحوله.
وسن: انييي حوله؟!
اسينات: أي والله اشك عدچ حول كد متباعين صفح.
وسن: صدك متستحين مسويه نفسچ جبيره دكعدي وسكتي يم النسوان رايحه يم الولد تفترين حته الباب متدكي من تطبين.
اسينات: كملتي يلا امشي ولي منا، سفانه گلبي مُهاف يريد كيك خل نسوي.
دفعتني وسن من كتفي وطلعت هزيت أيدي عبالها فقيره باوعت الخاله آيات عاضه شيلتها وميته ضحك من طلعت وسن وخرت شيلتها وماتت ضحك
سفانه: يااا ماما شبيچ.
دارت وجها تضم بضحكتها
: مابيه شي.
نور: ياا خاله تضحكين بدال ماتسكتيهن.
آيات: هوه انه كدرت احچي من الضحك.
اسينات: هيه شبيها كبال سطرت الحچي كدامي متستحين ومتستحين.
آيات: هاي مثل امها هم هيچ چانت تذبلي حچي متشوفين ماحچيت خليها وابو زايد يمها أنتِ عايله بيها.
اسينات: عجبتيني خاله كلش.
سفانه: خل اطلع مواد الكيك.
هُذال: نور خل نحضر الستكاين مال چاي.
بدو يرجعون الأكل الولد
درت وجهي اعزل بلمواعين أنسحبت ايدي
غَهيب: أحمم، هُذال تعاي شوي.
درت عليه عاكده حاجبي مفاهمه وهوه يسحب بيه طلعنه من المطبخ الورا البيت
هُذال: ااااي غَهيب شبيك يااا.
طبكني على الحايط لازمني حييل من التور الشفاف البكتفي
: اااااي غهييييبب.
رفع راسه خازرني
: شلون لابسه هذاا أنتِ.
دفعته من صدره
: وخرر غهيبب وخرر كلساع مأذيني أدري شنوو ساعه تضحك وساعه تعضعض وساعه مدري شبيك وخر وخر خل افوت.
أدفع بي وهوه ولا يوخر واني من صدك نغثيت ما أعرف ليش.
لزمني من ايدي حيل يحچي بنتر.
: شنوو هذاا لبسچ؟
نترت ايدي حيل اباوع بوجهة مقهووره من حچي وسن روحي طالعه وكلهن حطيتهم بوجه غَهيب
هُذال: هذه لبسي اني من قبل لاتزوجني وهم هسه لابسه اسود لعلمك چنت البس برموده واطلع محد دك بابك وكلك تعال اخطبني تريد وحده مچودره چام اخذتها من قبل لاتجي عليه خوش لو لا وهاي بطلها مال على كلشي وأجيت حاسبتني هسه اني هم احاسبكك؟ لااا.
غَهيب: على شنووو تحاسبينيي؟ هاا؟
: من تجيي النص اليل واني ما احچي ولا اسئل لان مالي دخل بيك من تطلع ماا اسئلك وين رايح ووين جاي وليش سويت هيچ وليش كلت هيچ هسه من لبست هاي الدشداشه كتلك انيي البسها؟ لاا لبستها كبل سألتني أذا ارضه لو لااا؟ لااا لذلك لاتحچي ولاتحاسبني.
عِلا شاربه مبتسم يباوع بوجهي شال أيده حط شعري ورى أذني
غهيب: هسه أنتَ غاثتك الدشداشه بابا.
شلت ايده ونترتها من وجهي.
: ايييي غاثتني موو مثلكك اني على كلشي احچي واعلق وخرر مني غهيبب وخر كلش ضايجه اساساً.
عكد حاجبه يباوع الجسمي كله يرجف من العصبيه حيل منفعله درت وجهي ومشيت دموعي وكعن لزم أيدي مانعني بقيت دايره وجهي منه بأيده دار وجهي عليه يباوع الوجهي وكال بحنيه
غهيب: شبيچ بابا منو مزعلچ.
بچيت حيل حاضنته عبر أيده
يحضني يمسح على راسي
: اشش عيني منو مضوچچ هُذال.
: تذكرت أهلييي.
بچيت أشهگ وهوه ضمني.
الحضنه اكثر يمسح على راسي يحچي بهدوء
: اشش گلبي انه أوديچ الهم بس شويه مُهاف يصير زين تمام؟ ها هُذال تمام؟
ابتعدت منه وهزيت راسي مد أيده يمسح دموعي
غَهيب: كافي يلا دخلي يم البنات وسويلي مجال ادخل اشوف مُهاف.
هزيت راسي ومشيت باوعت الوسن طالعه واكفه تباوع علينه عكدت حاجبي باوعت الغهيب رجعت اله لزمت أيده أستغرب يباوعلي وأني ماحچيت دخلت هيه وأني دخلت
هُذال: خاله سوي مجال غَهيب يريد يدخل المهاف.
طلعن نص البنات بقن نور واسينات ووسن
طب غَهيب سلم ودخل يم مُهاف بسرعه.
و وسن ضلت عيونها وراه ماهتميت الها وكملت بأيدي حصرتني الضحكه من اسبنات كالت الوسن
أسينات: ها خيه شو ما استحيتي من غَهيب وطبيتي يم امچ المتكدرين تفاركيها.
وسن: معليچ أنتِ غهيب يختلف.
سفانه: وسن لملمي بساميرچ روحي منا حبيبتي مامحتاجين مساعده.
أندك الباب فتحته سفانه
سفانه: هلا سلار تفضل.
سلار: احمم، الچاي بلازحمه.
: تفضل محد موجود خل اصب.
دخل سلار ميباوع ووسن طلعت من المطبخ
اسينات، نور: شلونك سلار.
سلار: هلا خويه شلونكم.
: الحَمد الله.
سفانه: سلار كم واحد.
سلار: 3 صياني كبار.
: ياا هوااي شكد عازم غهيب.
هُذال: سلار جيب منار و سبأ فد ساعه.
سلار: هسه أتصل عليهم واشوفهن.
وكفت يم سفانه اصب وسلار أتصل على منار
سلار: ها منار، فارغات أجيبجن يم هُذال، لازين الحَمد الله، اني احچي وياه، تمام فد نص ساعه وأمر الچن، كل الهلا.
سده منهن ودار عليه.
: شويه واجيبهن.
سفانه: ايي اني ماشايفتهم.
هز راسه بدون مايرد عليها أخذ الصينيه وطلع أندك الباب طلعت سفانه فتحته
رامي: هلاو سفانه، الصياني الباقيه وين؟
سفانه: هلا رامي، هسه اجيبهم هُمام هم خليجي لان ثنين.
دخلت كملنه ودخلو خذوهم صبينه چاي للنسوان همات دخلت الغرفه مُهاف اسينات وسفانه يخبطن بلكيك ونور تعزل بلمواعين علمود نغسلهن
لكيته كاعد يم مُهاف يضحكون
هُذال: احم الله يثخن اللبن.
مُهاف: هلا بسورها ونورها.
هُذال: وچفافيرها وجدورها
المهم شتريد كيكه ام الككو؟
مُهاف: ايشي.
هُذال: تمام، غَهيب حباب كوم جيبلنه حلويات بنات عمو راح يجن.
غَهيب: خوات سلار؟
: اييي، كون چبيييره چبيييره.
غهيب: صار، وبعد.
هُذال: وككو وياهن.
: وبعد.
: سلامتك عيوني.
مُهاف: شنووو هايي؟ بسس اوخرر ذنييي تزوجوني.
هُذال: اويلي كون تسمعك خاله ايات اله تجيك تركض.
مُهاف: خل تجي.
غهيب: شايفلك شوفه مُهاف؟
هُذال: احممم، يشووف ليش ميشووف.
رفع حواجبه غهيب يباوعلنه بتركيز عدلت وكفتي وتحمحمت
غَهيب: الجماعه راح يدخلون هُذال سوي مجال فد ربع ساعه.
هُذال: تمام.
طلعت منهم ووكفنه بلمطبخ غَهيب جابلي الحلويات والولد طلعوله بدو يطبون على مُهاف
بقو شويه وبدو يطلعون دخل همام ورامي للمطبخ غَهيب واكف يمهم يردون يكعدون يم مُهاف وسفانه تقطع بلكيك اندك باب المطبخ فتحته صارن بوجهي سبا ومنار ضحكت بسرعه
هُذال: هلاااووو دخلن.
دخلن حضنني فرحانات حيل باوعن اكو زلم بلمطبخ دنكن باوعت الهم رامي عاكد حاجبه يباوع المنار رفع عينه الها مركز بيها سفانه خذتهم الغرفتها القديمه الجوه مرتبيها
بقت عين رامي وراها.