رواية أغلال زمن الغيهب للكاتبة مرمر الدليمي الفصل الأول
أحس بضربات خَفيفه على خدي، بَعدت أيده وضميت راسي جوه اللحاف.
: والله العَضيم راح اكوم أكتلك روح كُلها متكعد.
سمعت صوت خطواته راح غَمضت عيوني أكمل نومتي، ما أدري غفيت لو لأ حَسيت مي باارد ينزل عَليه نكعني وصوت ضحكات طفوليه
شهگت فازه من بروده المي وخرت اللحاف شفت بابا واكف بلباب مكتف أديه يضحك ورسلان أخويه الصغير حاط أيده ع حلكه مبتسم ويضحك بطفوليه
شمرت اللحاف الدمعه صارت بطرف عيني.
: بابااا، هاييي ليش والله منايمه.
ضحك أبويه واجه يمي يوخر شعري المبلل من وجهي
: مو نريد نطلع ياعيوني ومجاي تكعدين.
كلبت عيوني بملل شال رُسلان يشاقي واني خزرته
: أنتَ شلون تذب ميي عليه؟
ضحك وضم راسه بركبه بابا ورجع ألتفت عليه بأدياته الصغار وخر شعره من عيونه
رُسلان: أشاقه وياچ عبيبتي.
ضحك بابا بصوت عالي وأني عود خازرته من كال عبيبتي ماتحملت وضحكت وياهم
كرصه بابا من خشمه وكاله
ستار: وأني عبيبك؟
هز راسه أيَ يضحك، وجه نضره بابا ألي وأردف
: وانتِ حبيبتي بابا كومي بدلي نريد نروح البيت خالچ حامد.
: تمام، هسه بس أبدل
أخذ رسلان وياه وطلع، كمت غسلت وجهي الساعه ب 8 ونص بليل، هاي عود نمت ب 12 الضهر.
طلعت قميص وبنطرون أخذتهم اريد ابدل ماما بلمطبخ تسوي أكل مدت راسها شافتني شايله الچمچه بأيدها، شالت ايدها حطتها فوك شفتها العُليه وحركت السانها فوك وجوه
جُنان: كلللووش كعدتي، عبالنه ميته.
أبتسمت وبسرعه وخرت ابتسامتي معبسه
: أي، كعدت هلهلي كدامج وحده من أهل الكهف.
فتحت أيدها وحچت مستهزئه
: لا وين، شجابج عليهم نايمه أكثر منهم أنتِ.
كلبت عيوني بملل أشاقه وياها وهيه ضحكت واشرتلي على الحمام عود روحي بدلي مشيت للحمام بدلت وطلعت، ماما تصب بلعشاء وبابا ورسلان كاعدين بلصاله لفيت شعري شلون ما چان وتربعت من ماما حطت الصينيه كدامي.
كعد بابا ورسلان، وماما راحت تصلي انتضرناها تخلص هاي كل مره تصب العشه وتكوم تصلي باوعت البابا وحچيت وياه
: طبعاً هاي كل مره مرتك تصب الأكل وتفلت هسه شون ناكل وهيه ماكو.
دخلت ماما وأبويه ابتسم، ورفع أيده الها
ستار: هلا بنور عيني هلا تقبل الله حبيبتي.
أبتسمت ماما ونزلت راسها خجلانه، شكد احبهم وأحب كلام بابا الماما هاي صار أكثر من 18 سنه وحبهم نفسه باقي، صَح بابا واجه هواي مشاكل علمود ياخذها والحد هسه مو على صُلح تام وي عمامي بس هذه كُله ميهمه
أهم شي عنده ماما
رفعت الهم حواجبي: أحم نحن هُنا.
ضحك بابا وماما كعدت ويانه ع الصينيه وبلشنه ناكل، بابا يشاقي ب أمي ورُسلان ياكل اللكمه ويفتر علينه.
ستار: أكول بابه بعد شكد لدوام؟
رفعت أكتافي، ما أدري وحطيت اللكمه بحلكي
وردت ماما
جنان: مابقى شي شهر أو اقل، علمود نروح نشتري ملابس الچ.
هزيت راسي وكملت أكل ردت أغسل مواعين ماما كالت روحي تحضري أني اغسلهم مشيت لغرفتي، رفعت شعري بدون لا أضفره صار جوه خصري بشبر، وهوَ مرفوع ماشاءالله هواي ماما تسويله خلطات لذلك دائماً ذخين ويلمع
حطيت مسكاره وحمره، طلعت حذاء كعب أسود ولبسته اخذت جنطه صغيره وجهازي طلعت مكملين ينتضروني.
أبتسم بابا من طلعت وماما شايله رسلان، مبدله اله
ستار: فدوه الهلطول فدوه الهل شعر.
ضربته ماما على كتفه مقابله يتغزل بي ضحكت وهوَ باسني من خدي حييل دارت وجهها ماما زعلانه
جنان: أيَ الله يخثن اللبن، يلا ماضل وكت.
ضحك بابا حيل وماما من صدك تغار عليه مني راح الها حضنها وباس راسها وطلعنه، أحنه بيتنه ع الشارع يصير ف بابا يطبك السياره داخل البيت لان ماكو مجال يطبكها بلباب وهوَ شارع عام.
صعدنه، وبابا فتح الباب وأجه رجع السياره وره نزل سد الباب مال شارع وصعد، أخذنه البيت خالو حامد، نزل بلطريق أخذ عصاير وحلويات دار عليه انطاني ياهم
ستار: هاچ بابه ذني أنطيهم للبنات.
هزيت راسي واخذتهم منه، نزلنه دكينه الباب طلع خالو حامد سلمنه عليه كُلنه ودخل هوَ وبابا للستقبال وأحنه دخلنه جوه
شفت أسينات واكفه اول وحده ضحكت متحمسه وأجتني تركض حضنتني.
اسينات: صار ساعه أنتضر بيج
جنان: يلا ماخلصتن نريد نسلم.
ضحكت اسينات وحضنت ماما وباوستها وأجتي مرت خالي سَميحه
سميحه: هلا بيكم تفضلو نور البيت
جنان: هلاو بيج حبيبتي منور بأهله.
باوست ماما وسلمت عليه مبتسمه
سميحه: هاي شنو كل ما تكبر تحله ماشاءالله.
أبتسمت بوجها سلمت على نور بنتها الچبيره ودخلنه جوه كعدنه يمهم شويه واخذتني اسينات وصعدنه فوك
اسينات: أشتريتي ملابس مدرسه؟
: لأا بعدني بلكت باچر اروح اشتري ماضل وكت.
أبتسمت وحچت تهز براسها: لچ لو تدرين ذاك اليوم منو أجانه وسأل عليچ.
رفعت راسي الها كلبت عيوني بملل: ميثاق؟
هزت راسها أي تضحك، مره چنه يمهم واجو بيت خالتها وأبنها وياهم ضل طول ما أحنه كاعدين يباوع عليه
أني چنت ما ادري بي الحد ما أسينات كالتلي يلا أنتبهت، هوَ يطلع عمره ب 24 سنه هيچ، مره حچه وياي من فتت منه همس يم أذني مَلاك مو بشر.
وهاي صار أكثر من 3 مرات نتصداف وهوَ يضل منتبه عليه، بلبدايه أني أضحك ع اسينات لان تشبكني بي دائماً من ينجاب طاريه تشبك أسمي وي اسمه، چنت اضوج بس هسه لا، أكثر من مره طلب رقمي وأني ما انطيته اله
مو سالفه ما اريده بس ثقت أهلي عندي أهم من كُلشي، وهاي دائماً يسأل اسينات عليه.
حسيت نفسي دا تصير عندي مشاعر أتجاهة بس متجاهلتهم لأن بعمري مراح أخون هلثقه المنطيتي أياها أهلي مره أخذ حسابي من نور أخت اسينات، أعترفلي بمشاعره اتجاهي وأني چان ردي عَليه
-: أهلاً بيك ميثاق أقدر هاي المشاعر مالتك بَس لا تنتضر يوم يجي وأني أحچي وياك طبيعي وأحنه مبيناتنه شي، يجوز يجي يوم وأحس بشي أتجاهك بس مراح اجي ولا اكلك أنتَ أذا صدك تريدني انتضرني أخلص سادس، ومنا الذاك الوكت الله كريم.
وهوَ رد عليه برساله
- شوفي هُذال أني من صدك أحبچ ورايدچ، وماعندي مانع انتضرج الحد متخلصين سادس بَس ماكو مانع أذا حچينه سوه؟ اول وتالي أحنه حنزوج ولا تضنين بيوم أعوفچ.
رديت عليه أنو ما اكدر وخلص، حذفت المحادثه من يمي وكل فتره يجي يراسلني وأني ارده، اني ما أؤمن بسوالف الحب أبد
كالتلي اسينات: شبيچ ليش متنطين الولد فرصه؟ ترى والله يحبچ صدك!
عكدت حاجبي اباوع الها: شبيج أنتِ وين أكو واحد يحب بهلسرعه، وبعدين اذا يحبني صدك خل ينتضر الحد ما أخلص سادس.
اسينات: بس...
هُذال: عَفيه سدي الموضوع اسينات بديت اضوج!
هزت راسها وبعد أبد ما حچت تحچيلي على مدرستها النقلت بيها جديد شلون حلوه
شويه ونزلنه جوه كعدت نور ويانه عدها بيج تنشر بي، ادوات مطبخ تطرز عليهم كُلش حلوات
نور: أيَ شلونچ أماسيل شخبارچ.
هُذال الأماسيل: الحَمد الله زينه، دا اشوف منشوراتج شغلج صايرر يجننن من صدك.
نور: عمري أنتِ فدوه اروحلچ.
كاعده ع الطاوله تطرز وماما وخاله سميحه كعدن يم بابا وخالو
ضلينه نسولف أني وأسينات علاقتنه كُلش حلوه، أجه رسلان يمي اخذ تليفوني يلعب بي
اسينات: اماسيل متسويلنه كيكه؟ كيكج طيب.
هُذال الأماسيل: أيَ صار بس عدكم المواد؟
فتحت الثلاجه تشوف حچيت الها المكونات وهيه طلعتهم ع الميز، خلطنه الكيكه نصور ونضحك حيييل متونسين أجت مرت خالو سميحه
سميحه: شميت الريحه مناك كلت هاي هذال سوت ميه بلميه.
كعدت يمنه شويه، هم تسولف وياي وتسألني على مدرستي، أخذت چاي وراحت للستقبال وأحنه كعدنه بين متسوي الكيكه
نور: أكول أماسيل، يا مدرسه أنقلتي.
أفأفت بملل: ما أنقلت ما قبلوني، شسوي راح أبقه بمدرستي.
نور: يلا بس هاي السنه كملي الخامس، وبل سادس ترحين أهلي مو؟
هُذال: ما أعرف بعد الله كريم.
كمنه طلعنه الكيكه وقطعناها، ودينه الهم بلستقبال ضحكت ماما بس شافتهم وحچت وي سميحه
جنان: هاي بس يمكم تسوي هناك كُلشي ماكو.
برطمت عود مراضيه: مااامااا
ضحكو كلهم وبابا كال
: لا لا جنان لاتضلميها تسويلنه مرات.
ضليته نسولف واللمه تجنن، بقينه لل 11 ونص يمهم حيل تونسنه ورجعنه للبيت بلطريق نزلنه أشترينه حلويات وعصاير.
و كبل من رجعت نمت صايره هواااي انام ما أعرف ليش، كعدت ثاني يوم الصبح لكيت رسلان بوجهي
بسته من خدوده حيل
هُذال: لك أنتَ شنو حبيبي اكلك؟!
وخر شعره من عيونه يضحك وأني ادغدغ بي كمت غسلت وجهي بابا بلدوام
وماما كاعده تخابر بخالتي سُعاد، الساعه ب 10 ونص اخذت ملابسي ودخلت أسبح
طلعت لافه الخاولي على شعري أنشف بي حيل طويل تعبني، التفتت عليه ماما تاكل تمر
جنان: ها ماما، شتردين أسويلچ تاكلين؟
بعدت الخاولي من شعري ومسحت وجهي
هُذال: لا حبيبتي ما أريد، عل غده أكُل.
هزت راسها ورجعت تكمل سوالف وي خالتي سلمت عليه ورحت أمشط بشعري واسولف وي رسلان العب وياه، اخذت الجهاز أحچي وي اسينات لأن هيه اقرب وحده ألي
لكيت رساله من ميثاق زفرت نفس أهدي روحي، ياربي شكد ملحه وبهاي سوالفه دا يأكدلي هوَ يريد مجرد لعب لأن لو صدك حابني چان وكفت بعينه من اكله ما اريد اخسر ثقه أهلي
فتحت الرساله مسوي حساب جديد وداز.
: هلاو هُذالي شلونچ؟، هذه الحساب السابع أسوي ارحمي بحالي أنتِ ليش متصدكين اني حابچ من صدك ورايدچ؟ ليش هيج مُصره تلوعين كلبي أذا شفتي هاي الرساله ردي عليه.
غمضت عيوني ضايجه شوكت يجوز ما أدري
: ميثاق أترجاك كف ياخه عني كتلك قبل واكلك هسه، أذا تريدني انتضري ولا تضل كلساع تدز هيج رسائل ما أريد اذا احد شاف جهازي ياخذ نضره عليه وهلمره مو تحذير هلمره تهديد أبتعد عني ميثاق لأن اذا تضل هيچ حيصير غير حچي.
: زين أذا هيچ، دزيلي أيَ شي منچ يضل يمي وكت ما اشتاكلچ اشوفه، مثلاً صوره؟
صدك بطران حضرت حسابه ضايجه حيل وصورت المحادثه ودزيتها الأسينات
: شوفي ترا لعبت نفسي اني كلي الهاذه خل يجوز مني حچي غير هذه ما عندي انيي ليضل يلح.
ضلت تحچي سديت الجهاز ورحت كعدت يم ماما
نسولف سوه كالت بليل نطلع نشري ملابس مدرسه وهمات كم غرض الرسلان والها كتلها تمام.
صارت الساعه ب 12 صلينه ووكفنه بلباب اني ورسلان ننتضر بابا اول ما دخل وشافنه ضحك وأحنه رحناله نركض
رسلان: باابااا
ضحك بابا وكعد على ركبه وفتح أيده الرسلان راحله يركض حضنه يطيره فوك بلهوى
وأني أطك اصبع واغنيله: هلا بستوري هلا ههههه لا عبالك منتضرتك علمود الغده مرتك مسويه حصار لو استاذ ستار يجي لو ماكو غده.
ضحك حيل وأجه شايل رسلان على جهة وحط ايده على كتفي من الجهة الثانيه باس راسي واني وياه دخلنه نضحك ماما تكلب بلتمن باوعتله بطرف عينها لان حاضنه اني ورسلان
جنان: الله يساعدك
ضحك ونزل رسلان وتقدم باس رسها
: ويساعدج، شنو هل ريحه الطيبه.
هذال: يلا بسرعه بابا غسل نريد ناكل.
ضحكو هوه وماما واحنه صبينه غده غسل وبدل واجه كعد نسولف ونضحك، وكُلشي يمشي شلون منريد مالنه دخل بأحد وماعدنه مشاكل وي أي احد مكتفين بنفسنه عايشين بين دلال أمي وابويه ممقصرين ويانه بشي، والحمد الله
مرت الوقت وصار اليل بدلت فانيله سوده نص ردن وبنطرون عريض خليت شعري ما لفيته
ومكياج خفيف ورحنه نشتري ملابس، دخلنه.
للمول ناس هوايه وهمات كلها تشري للمدرسه هواي محلات فتنه ونصهم ما عجبني كعدو ماما وبابا واني أخذت رسلان ورحت أجيب عصير، ضليت فتره واكفه يمهم لأن هواي زبائن عليه أخذت إلى والرسلان، ومشيت أريد ارجع الامي وبابا دنكت راسي واني امشي أريد أخذ ايد رسلان
أنردمت بصدر واحد طوييل العصير نصه أنكلب عليه وعلى البدي مالتي، باوعت للبدي وحچيت بدون ما ارفع راسي
هُذال: ثول اليعميك مدا تشوف!
وخرت شعري من كتفي ورفعت راسي اله عاكد حاجبه وخازرني زفرت نفس ضايجه كلبت عيوني من عنده، وهوَ ما حچه بس خازرني
هذال: شلون بلعميان أني.
أني منا ضايجه ومنا صار ساعه منتضره السره مال عصير وماكو شي عجبني أجو بابا وماما وهوَ عافني وراح خازرني هزيت أيدي شلون ناس عابت أيَ والله
رحت غسلت البدي مالتي شويه متدمر والحمد الله راح الأثر، وكلمنه نشري أغراض اشتريت قرطاسيه وقمصان ثنين
هذال: ماما اريد قمصان سود مو بيض.
جنان: لچ ماما أسم الله شتسوين بيهم الله يچفينه لبسهن
هُذال: مو مااماا تلوك وي الصدريييه ابيض محلووو.
اخذت واحد اسود وواحد أبيض بابا اختاره ألي أخذت همات تنوره سوده منفوشه تجنن، وصدريه سوده
وماما طول الطريق ترزل بيه لان اخذت اسود واني ارد عليها
: احبه ماما شنو السالفه.
نزلنه بابا يم محل لفات كعدنه ناكُل
اني ما اكلت وبابا هم ماما بسرعه حطت اللفه بحلكها ومن ما اكلنه حچت مستغربه
: ما تاكلون؟
ستار: أني منتضر هذال تصور
رد رسلان، أني هم
أبتسمت ماما ببراءه تباوعلي ضحك بابا وكلها حطيها حته لو اخذنه صور هواي كُلش احب الصور واحب اصور حته بابا تعود عليه هيچ
اكلنه ورجعنه للبيت، بين الأيام الحلو بين عائلتي بين الدلال وكلمه الصار على كُلشي أطلبه منهم مر سبوع كامل قربت المدرسه وبيوم كاعدين حاطه ماسك على وجهي وماما تفتر يمي
راحت شويه وأجت باوعتلي وحچت، اكلج يوم راح نروح نتعشه بلمطعم كومي تحضري.
باوعت على الساعه وعلى وجهة ماما، مو راح تنزل حلقه من مسلسلي روحو انتم أني ما اروح
كمت غسلت الماسك من وجهي ورجعت للغرفه ماما واكفه تختار ربطه وبابا واكف يمها يختار الها لون الربطه، وكفت أضحك من بابا كال الأمي
: جنان هاي متلوك وي لون الشحاطه مالتچ.
متت ضحك عليهم عود صاير ينسق بابا، ردت عليه ماما ضايجه ومحتاره
جنان: أهو ستار عليك الله عوفني أني أعرف شلبس.
هز أيده داير وجهة ضايج عود وامي دارت عليه ربطه بأيدها
: ها هذال هاي مو تلوك؟
هزيت راسي نافيه ووكفت بصف بابا
: لا الأختارها بابا احلى.
عيبت عليه بوجها وقلدت صوتي تقلد عليه، ضحك بابا حيل يشاقه وياها وأندار عليه
ستار: چا شو أنتِ ما مبدله بابا؟
وأني من شفتهم اليوم فارغين والنفسيات طيبه كتله
هُذال الأماسيل: لا أني مابيه حيل اروح انتم روحو وخلو رسلان يمي تونسو اليوم.
ردت ماما، لا شلون أعوفكم وحدكم.
: شبيچ ماما والله ما علينه شي حبابين هلمره خلو الطلعه بس انتم
دار بابا على امي مقتنع، شتكولين جنان؟
رفعت اكتافها ماما، يلا تمام
اجه رسلان شايل الأيباد عمره 4 سنوات ح يدخل ب 5
رسلان: جيبولي وياكم سبايدر مااان
شاله بابا يبوس بي ويخربط بشعره مكزكز عليه وماما أخدت ملابسها راحت تبدل والربطه الاختاريناها اني وبابا الها.
اجه وبابا ضل يتغزل بيها، وهيَ خجلانه وكلساع يكلها لان لبستي الربطه هاي صرتي حلوه يتناكرون بيناتهم حيييل احبهم واحب علاقتهم حلويين
قبل لا تروح وصتني، يوم كلبي ديري بالج على اخوج لا تخلينه يطلع وانتِ هم ديري بالج تمام أمي؟
باستني واخذت رسلان تبوس بي كعدته يمي فتح الأيباد يلعب بي وهمَ طلعو، كمت اخدت الأيباد مالتي اريد اطلع شي أباوع عليه.
هيه لحضات مرت وسمعت صرخه ماما دكت بكلبي قبل راسي، كلشي ما مفتهمه صرخه أمي تنعاد براسي أريد احرك رجلي ما اكدر بس اريد اخطي رجليه ماتن كمت ما أحس بيهم اريد اروح اشوف ليش عاطت وكعت للكاع رجليه ميعينني.
سحلت روحي للباب كلساع أعثر من وره رجليه وصلت للباب سندت نفسي عليه وكمت رجليه يرجفن خطواتي ما متوازنه ساعه اوكف وساعه أطيح مو دقايق مرت عليه چانت سنوات بلنسبه ألي، كطعت النفس مامستوعبه وأني اشوف امي وابويه ممدودين بلكاع والدم تارس الشارع
ركضت الهم ما مستوعبه أچذب عيوني حطيت راس امي بحضني ماكو حته النفس صعب اجره هوى ماكو أحس، ردت وجها بأيدي وهيه شمرت أديها منا ومنا.
فتحت عيوني على وسعهم وعطت بصوت أضرب على وجهة
: يمه، يمه حاچيني يمه عليچ القران حاچيني لا تسكتين
درت عيوني الأبويه بصفها بس عيونه مفتحه ميرمش حته، السيارات كلها وكفت والناس كلها التمت
أهز بجسم بابا حيل واصرخ وألطم على وجهي بكُل قوتي، بااباا وأدير وجهي ل أمي، ماكو جواب محد يجاوب
وأني بس أصرخ بأساميهم ما مستوعبه أريد افهم شلون هيچ صار قبل دقايق يحچون وياي ويضحكون وهسه ماكو أي جواب.
بسرعه شالوهم الناس يركضون وحطوهم بسياره حته ما أدري مال منو ركضت صعدت وياهم روسهم بحضني حته رسلان ما ادري بي ولا أدري بكلشي جاي يصير
أدك على صدري راس أمي بحضني من جهة الدم ترس ملابسي خرمشت خدودي حيل أصرخ اباوع الوجهة
: ولچ يمه حاچيني أني هذال ماما
وهيَ عصرت عيونها حيل متألمه بچيت ايدي على حلگي
: بسرعععهه امييي راح ترووح من اييييدي عفيه بسرررعععه.
مترد ولا حتى بابا يرد بسرعه نزلوهم الطم على وجهي بكُل قوتي حلگي يبس كلبي احسه يريد يطلع من كد الوجع الجاي أتوجعه الولد اليسوق حته ما ادري شنو يحچي ما أسمعه
بسرعه وصلنه وشالهم بسديه نزلت رجليه يرجفن كعدت بنص الممر ماكو دقيقتين مرت وطلع الدكتور من الغرفه الدخلوهم بيها
: البقاء بحياتكم الرجال متوفي والمريه هم.
فتحت عيوني على وسعهم أملخ بشعري وكُل كلمه أحچيها طالعه من نص كلبي.
: شنو ميتييييننن شنووو، طحت للكاع بنص العالم أيدي لامتها الكلبي ابچيي بصوت عالي وأصرخ بأساميهم
هُذال: ولك يااابه، يمه وينچ ابويه راح يمه ولچ يمه أبويه راح يمه تعاليلي يمه
العالم كلها التمت عليه تكوم بيه وتبچي وياي وأني عيوني يغوشن كوه اجر نفس
بس لمحت خالتي سعاد من وسطهم رجعت طحت للكاع أخرمش بوجهي وألطم عليه بكل ما عندي حيل أجتني تركض واكفه فتحت أديها وجهها أصفر
سعاد: ها يمه هذال وين أهلچ.
شهگت حيل أشلع بشعري: ولچ خاله عافوني عافوني يكلي ماتووو ثنينهم خاله ثنينهم عافووووونييي الحگيلي خاله الحگيليي
فتحت عيونها وصرخت تطك على عيونها: يمه جنان يمه سوده بوجهي
كعدت كدامي تبچي وتعيط، وأني حتى ما ادري بنفسي وين وشلون وشوكت لكيت روحي ببيتنه ولابسه اسود كاعده بين تابوتين بلصاله والنسوان والزلم كلها واكفه
صرخت كاعده بنصهم ثنينهم أمي وابوي مثل قبل بس هلمره جنايز.
حطيت راسي على تابوت أمي أبچي واحچي وياها أدك على تابوتها حيل: ولچ يمه، يابعد عيني يمه تعوفيني
طكيت على عيوني حيل أحاچيها: يمه ترحون وتعوفوني ثنينكم فد روحه يابعد روحي
صديت على تابوت بابا النسوان يصارخن وعمامي يبچون واكفين على صفحه
حچيت وياه صوتي راح من الصياح أدك على كبره بأيدي واحچي صوتي مبحوح: تعوفني بابا واني عزيزتك كومولي يعيوني كوموليي أخذوني وياكم ولا أعيش بدنيه ماكو بيها أنتو.
شهگت حيل الدم يتطافر من خدودي، تقربو الزلم شالو التوابيت فتحت عيني على حيلها مچلبه بيهم: ما تاخذوهم ما تاخذوهم
لزمني النسوان واني بس أريد افلت منهن
: يمه لاتعوفونييي لاااتاخذوهم يوم أسود يمه باباا لا تعوفنيييي بابااا
ما عتبو الباب وطحت بين النسوان ما أدري بنفسي.