رواية ولد الباشا للكاتبة فاطمة الأحمد الفصل الخامس والأربعون
ال عزّهَ
دخلت على إيميلي الخاص
دزيت المعلومات كلها على إيميل عمي
الأشتر، بما فيهم عقد شركة الشحن اللي
صارت على أسم عزام
و عزام بدوره حوّلها على أسم عمو اشتر
هو يتصرف بالباقي يسجله على أسم هاشم
ما يسجله هو يعرف شلون يرتب الأمور
عفت الابتوب مثل ما هو ورحت للحمام
قبل لا اسد الباب حسيت عليها دخلت للغرفه
فورا طلعت، هي تصنمت بنص غرفتي ارتعبت، شفت ظِل جسار واگف بره الغرفه.
وفهمت السالفه فورا حچيت بطريقه أُثير غضبها
عزّهَ: مضيعة مزهريه وجايه تدورين عليها؟
سجى: احچي بشوية احترام ام زوجچ آني.
عزّهَ: والله يا عمة لايگلچ هل لقب
ام المزهريات
رحت عند اللابتوب مفتوح فورا طبگت
الشاشه بدون ما اخليها تنتبه
سجى: اجيت احچي ويا ابني. وينه؟
عزّهَ: إذا انتي امه ما تدرين آني شمدريني
وزعت نظراتها بالغرفة وركزت على ايدها بي
شي، معقوله جايبه كامرة مراقبة او مايك تَنصُت!
مشيت بإتجاها، عين عليها وعين على الباب
عزّهَ: شنو من مره أنتي شگد بيچ صلافة
مع احترامي ل عزام عبن امه
عاطت بوجهي وتريد تهد عليّه بس ما عدهه الجُرأة
سجى: صااايره ماااا تحترميييين من ضمنتي عزااام وتزوجتيييه.
عزّهَ: كلشي چآن مضمون و مقسومين
لبعض من يوم ما چنا نُطفة. وإذا تشوفين
أسلوبي عدم احترام آني اشوفه، جواب على
حچيچ الماله داعي واقل ما يُقال عنه سوقي
لزمتني من ذراعي واني كل تركيزي على إيدها.
الثانيه بيها شي
سجى: بنت نددى الچلبببة صااايره ترررد بوووجهيي
عزّهَ: خليني محترمه عُمرچ وهدي إيدي.
سجى: اااربيييچ ارربيچ يل ساااقطة بنت الساااقطة
من سبت امي ما گدرت اسكت بعد
لزمت إيدها البيها ذاك الشي و لويته ليوره
ظهرها احچي يم اذنها وهي تصيح من الألم
عزّهَ: وحگ العزة التمشي بعروگي انشف
دمچ اخلص عليچ وما يرفلي جفن إذا سمعتچ
مرة ثانية تحچين على أمي تفهمييين لو مااا تفهمييين
سجى: ووولچچچ إييييدي.
عزّهَ: احنه ضد العُنف إلا في الضرورة القصوى.
مردت إيدها وفتحت اصبع اصبع وأخذت
الچانت شايلته، دفعتها من ظهرها لِ بعيد
وضليت اتمعن بهذا الشي، حوّلت أنظاري ألها
عزّهَ: أيااا ختيارة الجن إي والله، جااايبه مااايك للتجسس؟
نزلت راسها للگاع وانتبهت جسار ما باقي يم
الباب اصلآ لو يحبها چآن دخل خلصها من إيدي، شمرت وَ مردته مرد بالكعب، انظرللها واحچي
عزّهَ: لشوگت اضل استحي بدال العالم؟
يعني ما تستحين من عمرچ ولچ عاجوزه عمرچ عابر 54 سنة شوگت تتوبين؟
سجى: سمعيني بنت ننندى سمعيني إذا ما
خليت ااابني يطلگچ ما اطلع سجى!
عزّهَ: چا شني تطلعين؟ دخيل اسمك يا علي
ما اريد اغلط، اطلعي اطلعي لا اهينچ وغلاة ابنچ اهينچ وانسى انچ أم عزام.
لزمت إيدها وجريتها جر شمرتها بره الغرفه
رگعت الباب بوجهها بقيت واگفه احس اعصابي تلفت منها
عزّهَ: وحگ العباااس طلعتني من طوري.
آني شوگت اسب هيچي، أيااا ختيارة الجن سيرا ما لقبتچ عبثث.
عاينت للمايك ورجعت كسرته تكسر
ومردته تحت الكعب
نظرت للساعه صارت 6 المُغرب عزام
بعده ما راجع، الله اعلم شصار وياه.
معقوله المعلومات تكون كاذبة بخصوص
مكان خالة آيدا
لزمت موبايلي وشفت وَتن دازلي صور!
دخلت عليهن وسعن عيوني! الأشتر شجاي
يسوي!
فورا اتصلت ب عزام لحظات و جاوب
اي عزّتي.
سمعت صوت شخص يصرخ يگول ما اعرف
عزّهَ: عزام وينك صوت منو هذا؟
يحچي ومترهي.
نلعب لعبة الصراحة او تحدي
رجع صوت الشخص وهو يگول صراحه صراحه
عزّهَ: عزام شهل أعصاب البارده عندك تحچي صدك!
تريدين الصراحه او تحدي؟
غمضت عيوني بنفاذ صبر بروده مُستفز
عزّهَ: هات الأثنين...
نچره حفيدة نچره حفيدة ناهد، يا ابني
اغسلو هذا العار خل يتنضف
راح صوته ثواني وصار هدوء حواليه اردف
ياسين مطلع ابنه بكفالة ومهدد جماعة الميناء.
عزّهَ: شغلك شغلك انت تنجاز، انطيني الصراحه.
كسرتي خاطري بس معليش. الصراحه.
أنه AXR راجع للعراق وعرف مكان آيدا.
عزّهَ: متأكد لو هذا الهكر ناصب عليكم؟
إذا ينصب علينا ننصب على خواته. بلة لا تخليني اسب هذا مو أخلاقي.
عزّهَ: عين الحاره بارده عليك. ما تسب
اگول شني رايچ تروحين تكسرين مزهريات
سجى وتلفزيونات جسار؟ احس هرموناتچ طاگة
عزّهَ: على طاريهم العمة سجى دخلت لغرفتنا ورادت تخلي مايك للتجسس
استخدمتي العُنف؟
عزّهَ: احنه ضد العُنف إلا في الضرورة
القصوى، يعني مردت ايدها بنية أخذ المايك.
تُعتبر عُنف؟
لا، تُعتبر مُصافحة.
ضحكني وكتمت الصوت من رجعت طبيعيه
فتحت الكتم
عزّهَ: اي احم راح ادزلك شي
دزيتله صورة عالواتساب
عزّهَ: شوف الصوره شوف عمنا الداهي
شمسوي.
واصلني فيديو مو بس صورة. هاي الرادها وهاي التمناها.
سمعت صوت جاي من تحت
عزّهَ: صوت جاي من تحت لازم أسد الخط
واطلع اشوف.
اقفلي باب الغرفة وشيلي المفتاح.
عزّهَ: هو هيچي أسوي، عزام لا تتأخر ارجع
بسرعه
راجع ما اتأخر عزّتي
عزّهَ: تمام احبك الله وياك.
قفلت قبل لا يجاوب خل اغثه شويه ومن يرجع نتحاسب عليها.
طلعت من الغرفه قفلتها ونزلت تحت واللي.
شفته!
رُقيه
شگد صايره دراما كوين، راحت لشباك
غرفتي وخرت شويه من البردة وحچت
وَدق: خمس سيارات جكسارة بالفرع
عزااا ولچ گومي شوووفي شوفي رتل ثاااني
دخلو للفرع
عفت الكُتب ورحت يمها وسعن عيوني
لمن شفت زلم معگلة واگفين بالحديقة
چانو ينتظرون الجاين وراهم بعد دقايق
خمس سيارات وگفت، گدام القصر
ثنين كاديلاك و ثلاثة روز رايز!
ثلاث سيارات نزلو منها النسوان والأثنين
الباقين كاديلاك نزلو ولد الأشتر كلمن من.
سيارته، بكامل اناقتهم، وَدق شهگت مصدومه وآني أيضا مصدومه بس ساكته
وَدق: ياااا يااابه هذوله ولد الأشترررر
رُقيه: اي شايفه شجابهم
وحده تنظر للثانيه ضربتني على كتفي
صارت تُگمز من الفرحه و تحچي
وَدق: ولچچ مس هااااتسووو مسيو ابو گاع
جايب مشية تسد عين الشمس وجااي يخطبچ يخطبببچ.
اجتني لحظة إدراك
رُقيه: ها!
وَدق: وهااا هااا هاي الرااادها وهاي التمنااها
رُقيه: صوووتچ
وَدق: خل يسمعونااا خل نااااجي جعموص.
يجي يشوف الزلم الحوگ الزلم المعدله تربات الزلم ترباات الأشتر
هاي راحت بغير عالم تحچي وتمدح بالأشتر
و بتربية الأشتر، اريد اعرف ليش الكل متفق
علي محتبه، بما فيهم آني
وَدق: شبيچ صاافنة گومي گومي بدلي
رُقيه: شسوي، دقيقه شسوي
وَدق: اسبحي والبسي ذاك الفستان الجوزي
اخ لو سيرو وياهم بس ما شفتها. اكيد بعدها
ماخذه موقف من عرفت احنه بنات هاشم
فجأة سوت مُداهمة على الغرفه استغربت شلون اندلت
تراااا، آنا جيييت.
رُقيه: سيرا...
وَدق: عزاا الطرگاعه اجتتت
سيرا: انچبي ما احاچيچ، احاچي عروسة ابو گاع.
فعلا ما حچت، اجت ترد عليها سيرا سبقتها
وحچت
سيرا: فوتي ليش واگفه وراي.
رُقيه: ويامن قصدچ
حوَّلت انظاري للباب دخلت بتراء
ما لحگت انطق اسمها سيرا حچت
سيرا: هاي براء مستحيه ما ادري شبيها
فوتي.
تگُللها براء. يعني ما تدري هاي بنت جسار
واختنا الروحي!، تقربت حظنتها بهدوء
للحظة چنت حچيت اسمها و الله اعلم شچان صار.
رُقيه: يا روحي اشتاقيتلچ.
تشم بيّه وتحچي احس صوتها تعبان
بتراء: آني أكثر الله شاهد دوم افكر بيچن.
وَدق حبيبتي تعاي...
اجت ودق هم بس احسها مقهوره من سيرا
ثنينا حظنا بتراء تحت أنظار سيرا
سيرا: تگول فعلا خوات وفترة طويله ما ملتقيات
بتراء: فراشاتي هذني
سيرا: ههه مرات أستغرب من كلماتچ التعبيريه
وَدق: گولي غيرانه لأن مرت اخوچ تحبنا.
سيرا: انتي انچبي ما احچي وياچ.
ابتعدنا عن بعض، وَدق سدت الباب
وراحت تشوف من الشباك.
وَدق: هاي سيارة على سَند اخر واحد وصل؟
بتراء: اي تأخرنا من النجف للبصره
رُقيه: سيرا شلون اجيتي مو عمامچ بينهم خلاف ويا ابوچ؟
باوعت على بتراء
سيرا: للصراحه بفضلها اجيت ويا المشيه
عبن عمامي ما يحچون ويا بابا ف اكيد ماكو تواصل ما يخليني، على سَندي جابني بعدما
براء قنعته.
وَدق: لعد أريم وينها؟
گلبت عيونها بإنزعاج شگد راسها يابس
بس يعني حقها تاخذ موقف جاوبت بدون لا تباوع ب وَدق
سيرا: رايحه على بيت خالتي ببغداد.
نظرت لبتراء حسيت الموضوع بيها شي
بس ما سألت
اندگ الباب ودخلت المساعده جابت بوكس
احمر ومغلف بفخامة ويا باقة ورد طبيعي
أحمر سيرا اخذت الباقه واجت
سيرا: أبو گاعچ جابهن وبيها كرت.
اخذتها من إيدها ميته من الخجل احس
فراشات بصدري، سواها صدگ وجاب مشية
شميت الباقة ريحة الورد الجوري الأحمر تفوح
اخذت الكرت وقريتها.
شكثرُهم أجو بالعَين
بَس ماحَبيت غير عَيونچ.
وَدق: عليچ ام الحسن خل اقرأ شنو كاتب.
ما خليتها تشوف.
رُقيه: معليچ بيها.
سيرا: حِشريه.
وَدق: افاا يا اختاه افاا يا بيستااه
راحت يم سيرا وتحاول تراضيها
وَدق: هاي شبييچ ماي بيست؟ معقوله
ماخذه موقف. اوك حقچ بس باوعي من
النافذه أشرقت الشمس واحنه صعدنا level صعببب جداا
سيرا: وخرني مني لا اطيح حظچ عقلچ الفارغ بشني چآن يفكر من چذبتي عليَّه صار سنين من ايام المتوسط!
وَدق: سيرا شبيچ حطي روحچ بمكاني!
وبعدها قرري.
وأخيرا نظرت ل وَدق وحچت.
سيرا: حطيت روحي بمكانچ ومن حطيت روحي بمكانچ طيحت حظ ولد الجربوع جابر
وطيحت حظ جيسو ودگيته بتسجيل صوتي
ك دليل وقدمت شكوى عليه وتحررت منه
نظرتلي وبعدها نظرت ل سيرا
وَدق: هددوچ بأختچ گالو اذا ما تسوين كذا نقتلها؟ هددوچ بحبوبتچ اللي مره چبيره بالعمر گالو نقتلها بدم بارد إذا فتحتي حلگچ؟
رُقيه: وَدق مو وگت هذا الحچي تصالحن
حبابات.
سيرا بقت ساكته ما حچت او ردت على وَدق
لكن وَدق عاف ايدي راحت وگفت گدام سيرا.
نظرتلي بعدها نظرت ل سيرا، بتراء حاوطتني
وَدق
وَدق: جاوبي حطيتي روحچ بمكاني؟
جربتي تتخيلين اختچ تنجر جر من زنودها
تدخل للبيت ونائل يكون مشبعني ضرب
يجرني جر ويشمرني تحت رجلينها وما الحگ احظنها يسحبونا بعيد.
بتراء دموعها ما وگف وَدق هم چانت تبچي
وتحچي ردت اتدخل ما خلتني
وَدق: لا رُقيه خل اكمل خل تفكر او على الاقل.
تتخيل العشته، ما چنت الحگ احظنها سحبونا كلمن بجهه يستجوبونا شمسوين خلال خروجنا من البيت. واللي ما تحچي.
والي ما تحچي جسار چآن يجرح كف إيدها بسچينة نائل سايكو. تخيلي اذا گدرتي تتخيلين.
بتراء راح حظنتها وتبچي ثنينهن اما سيرا
واگفه ومسح بعيونها، رحت يمها بس شافتني
ارتمت بحظني
سيرا: آسفه والله شمدريني بكل هاي الحقائق
رُقيه: اشش كافي تبچين.
سيرا: وَدق الحيواااانه هي السبب
ابتعدت عن بتراء وصارت تحچي بعصبيه.
وچنها طفله تبچي وتعارك
وَدق: بله ما تنچبييين سيراا خاااتون عايشه
ومرتاحه وآني بنص الظيم وكفخات نائل نعال
علي راسي وراس ااختي انتي مااا يحقلچ تاخذين موووقف وتزااعلييني انتي المفررروض
ترااضييني
ابتعدت عني وراحت تريد تحظني وَدق
وتبچي سيرا طرگاعه وتدعي على جسار
بأسلوبها
سيرا: عمممت عيين جسااار عليچن عمت عيين جيسو عليچ سوده بوجه جسار سوده بوجه ناجي سوده بوجه نائل نعاال تعاي حظنه مال خوات بيستات آني ال sorry.
حقچ على راسي وَد خاتون
وَدق: وخررري ما احچي وياچ وخررري
سيرا: ديلا شني كبينه شبيچ جايه اراضيچ
وَدق: ماا ريد مااريد
حظنت وَدق على اساس غصب بس وَدق
مبينه تكابر مثل سيرا اول ما اجت، ضرب سيرا على ظهرها وحچت
وَدق: مرره ثانيه لا تحچين وتاخذي مواقف
وانتي ما فاهمه شي، .
سيرا: توبة وغلاة اشتووور توووبة.
شبيهااا هاااي برااء ليش بعدچ تبچييين
بتراء: لا لا ماكو شي ما أبچي
وَدق: هرموناتها طاگه خاف حبله.
بتراء: شنو لااااء ماكو هيچ شي.
رُقيه: ما تگولين موتت روحها بالبچي من
وراچن.
سيرا: اختچ السبب هيّ حچت طيحان الحظ
من إيد نائل نعال حفيد الجربوع ولچ اني لو منچ دگ تفل وبنعال على راسه.
وَدق: اي بعدما فعلت هاي الوضعية
الأفندي طلع يسوي بينا تجربه اجتماعيه.
سيرا: ويت ما فهمت...
رُقيه: ما تقصد شيءء.
بتراء: بنات رقرق عروسه إذا ناسيات.
سيرا: يبوو احنه اجينا نجهز العروسه
رُقيه: طيحتو حظها احس راسي راح ينفجر.
من الصُداع كله منچن.
وَدق: ابلعي حبة بندول مابيچ شي.
عفتهن رحت فتحت البوكس
شفت جايبلي فستان اوف وايت محتشم
ويا البرقع.
ما لحگت اسألها دخلت حبوبه سُعاد
ويا الخاله أمل شگد استحيت اني بالتراك
سُعاد: لچ رقيييوه لچ بعددچ واگفه ليش ما بدلتي؟
انبلع لساني خالة امل ابتسمت وتقربت لزمت حنجي.
أمل: عين الحاره بارده عليچ بنتي.
وَدق: هاي لو تتكشخ لازم تعلگين عليها سبع عيون.
وسعت عيوني ل ودق، عود انچبي شجاي تحچين الخاله امل ضحكت
أمل: وعين الحاره بارده عليچ ألف آية فلق
عليچن.
سيرا: اشم ريحة تمهيد. اموله ترا اغار
أمل: ههه اطلعي وياي عندي كلمتين وياچ.
اخذت سيرا وطلعت بره، حبوبه تقربت تحچي همس
سُعاد: بدلي بسرعه شلون خزيتينا المره شافتچ بالترااك
رُقيه: اي شسووي طبو علينا چنهم مكافحة الإرهاب صدگ شسوي؟ شلبس البس هذا الجايبلي؟
بتراء: لا. ولچ هذا لعقد القران بعد باچر.
تلبسينه، البسي شي سمپل اليوم بس يطلبوچ ونقرا الفاتحه...
وَدق: اسم الله الزهره الفاتحه تجوز على الميت شبيهم يقروها بهيچ مناسبه
سُعاد: بنننت الجحش نصييي صوتچ المره واگفه بره. فاتحه خير خير
وَدق: دقيقه سؤال خارج الصندوق بتراء
سلمتي على حبوبه.
حاوطت حبوبه وباست راسها
بتراء: اي من استقرلتنا سلمت عليها وتحاظنا
هوايا لحدما امل وباقي النسوان استغربن
رُقيه: يااا راحت عليّه.
دفعت بظهري للحمام بعصبيه وتحچي همس.
سُعاد: ااامشي اسبحي لا تروح عليچ من صددگ
رُقيه: ييي شبيچ سووسه ما تروح عليّه ابو گاع واگع بيها ما يروح عليّه والله
سُعاد: بنت القندره نصييي صوووتچ امه برره
رُقيه: بس خل اخذ شي فستان مناسب
وَدق: امه صارت جواا يبوو. خاالة امل امالي
سيرا گالت عمو اشتر يصيحلچ آمالي.
راحت بإتجاهها وسيرا احس بحلگها حچي
سيرا: عوفچ من امالي اخذيني على غرفتچ
خل اشوفها.
حبوبه سُعاد اخذت خاله أمل وبتراء.
طلعن من الغرفه، آني هم احتاريت شلبس
اخر شي ثبتت على فستان لونه جوزي بُني نفس الشي
فستان يوصل حد الركب مال طلعات
حسيته مناسب، أما ودق فأخذت سيرا
وراحت لغرفتها
سديت الباب وراهن ودخلت اسبح
راسي موتني بس خل اطلع لازم اخذ حبة بندول
كملت سبح وبدلت، طلعت لگيت وَدق
هم مبدله
رُقيه: ملابسچ چانن حلوات ليش بدلتي؟
سيرا: هذا احلى.
وَدق: عود نفس لون ملابس سيرا
سيرا: ايي رُقيه عوفچ منا انتي تجهزي.
رايحه لحمامچ اغسل إيدي كله بلاشر
رجعت بتراء للغرفه تحچي بأريحية وفجأة سيرا طلعت من الحمام
بتراء: شردت من حبوبه سُعاد تكول اگعدي
خل اشبع منچ گتلها اختتي عروسه شلون
اگعد، صدگ سيرا وينها؟
سيرا: هياتني وراچ
ثلاثتنا بلعنا العافيه هسه خاف سمعتها.
سيرا: كييف تقولين عن غيري كلمة اااوختي
ترا اااغااار.
زفرنا نفس بالراحه تعبنا من هل وضع.
بتراء: اها لا أحبچ أكثر شي. عوفچ من هذا الكلام تعاي خل نجهز العروسة.
سيرا: ينرادلچن وحده توثق انتن ساعدوها
وآني اصور سنابات.
وَدق: دزيهن بالحفظ.
سيرا: تدلللين يااابه ادزهن بالحفظ والصون
والآخر نووون.
بتراء: افتهمتو قصدها اني ما افتهمت!
رُقيه: عوفچ منها كملي كملي
وَدق: ايزي تمسلت.
سيرا: اءءء تمسلت نشووف.
بقت اخر اللمسات و بتراء كنبصت گدامي
شافت سيرا تسولف ويا وَدق استغلت الوضع
حچت
بتراء: وسن وينها ما شفتها طالعه من البيت؟
رُقيه: اي من الصبح راحت للشركة وبعدها ما راجعه.
بتراء: عندچ صورتها شي؟
رُقيه: صراحةً لا وسن شخصيتها غريبه ما اعرف شلون اشرحلچ.
بتراء: زين اتصلي بيها خاف صاير شي وياها
رُقيه: لا وحگ الله تلگيها ويا نائل گاعده
تسولف
بتراء: ويا نائل!
رُقيه: قصة طويلة بعدين احچيها الچ
بتراء: زين اتصلي بيها شبيچ اختچ خاف بيها
شي گلبي ما مرتاح.
شگد تلح شبيها صايره حساسه اخذت تلفوني
واتصلت عليها
رُقيه: هاچ يدگ وما ترد
بتراء: جربي مره ثانيه.
جربت مره ثانيه وهل مره جاوبت.
رُقيه: الو وسن وينچ قلقت عليچ.
آني بالنجف ويا نائل رقرق نائل تخربط
ونقلناه للمستشفى هسه توه گعد من تأثير الدوا
بتراء چانت مخليه اذنها يم التلفون
ابتعدت وعلامات الصدمه على وجهها
الو شبيچ ما تحچين؟ شهل هوسه وَدق ويامن تحچي
رُقيه: اي احم أگلچ توقعچ بمحله
أبن الأشتر چآن گد كلمته جاب المشية وجاي
يخطبني من هاشم، .
لا صدگ، دقيقه نائل هسه ارجع
سمعت صوت غلق الباب وبعدها حچت
يعني هسه المشية جايه، انتي شتسوين؟
بدلتي نزلتي شتسوين؟
رُقيه: جاهزه وهسه چنت راح انزل بس
بس آني گلت اتصل عليچ
حُبي انتظريني مسافه الطريق وجايه.
بتراء: والله يا حُبي مسافه الطريق اربع ساعات للفجر ما توصلين من النجف للبصره.
هاي صوت منو؟
سيرا: برااء تلفونچ يدگ.
براء منو والبنيه الحچت هسه منو، .
بتراء همست وگالت لا تذكريني
وحسيت عليها دخلت لغرفة نائل
اجاني صوتها تگعد نائل
اصحى گوم خلصني احتاجك بشغله گوم
رُقيه من شوگت جايين؟
رُقيه: نص ساعة تقريبا.
تمام جايه فورا. ولك گوووم نعلة على المگرررن گووم
دقيقه استوعب شلون ولد الباشا فزعولي
شبييچ گااايم يا بووومة
علگت بيناتهم وقفلت الخط شسويلهم
اخذت تلفوني وياي ونزلت ويا البنات.
دخلت للصالة اللي مخصصه للنسوان
چانت مليانه نساوين كلهن يباوعولي فوگ
تحت.
گعدت بين خالة امل وحبوبة سُعاد
من التوتر لزمني الخفقان، بالصالة الثانيه
اسمع صوت الزلم يحچون، همست لسُعاده
وسألتها
رُقيه: بس هاشم گاعد؟
سُعاد: لا انطى خبر لعمامه يجون.
رُقيه: شمعنى!
سُعاد: ابن الأشتر جايب عشاير الدليم وآلشمر علمودچ، هذا شي طبيعي صارت گعدة عشاير مو حيالله مشية.
رُقيه: سُعادد اذا عمام ابويه رفضوو
سُعاد: ديري وجهچ كافي تحچين
رُقيه: اچيت من الجسر الإيطالي والله إذا
هاشم ينطيني لولد عمامه.
سُعاد: اگوم احطچ واگتلچ گدامهن شجااي تحچيين. اسكتي!
سكتت بعد ما فتحت حلگي سُعاد تسويها وحگ العباس.
أريم
اخذت نفس عميق وشديت ايدي على الدرنافيس
أريم: لازم تنكسر وتبين حادثة اقتحام.
كسرت قفل الباب و انفتح، ركضت رجعت الدرنافيس
فوگ الثلاجه، ودخلت للغرفه كركبتها وكركبت الصاله
بطريقي
أريم: الجاي اسويه جنون بس لازم أعلمه درس
ما ينساه خل نشوف رد فعله، صدگ يحبني ويخاف
لو ياكل بعقلي حلاوه.
ما ادري ساعه اشگد بس الشمس غابت وأذن
المغرب، فتحت شعري وشديته بدون تَمشيط.
منين اجيب مشط، بهل مكان المهجوم، لبست قمصلتي ورفعت السحاب، رحت شلت الدرنافيس
مره ثانيه وياي للإحطيات
بقيت انتظر يرجع للبيت وكل شويه اطلع راسي
من الباب اشوفه دخل للمجمع لو بعده اخر مره
شفته يصعد الدرج وشايل علاليگ سوده.
احتاريت وين اختل اكيد اول ما يشوف الباب مكسور
يركض للغرفه فختلت ورا باب المطبخ
سمعت خطواته يم الباب طلع المفتاح و بس وگف
اكيد انصدم من القفل مكسور
أبيل: أريم. أرريم.
دخل مثل المتسودن سمعت شمر العلاليگ
ويحچي
شصاااير اااريم
سمعت صوت باب الغرفه فورا طلعت ركض للباب
طلعت من البيت بقيت واگفه بره اسمعه يصرخ
بأسمي ويدگ على باب الحمام چنت متقصده
اقفله
اااريم انتي جواا أريم جاااوبي اااكسر الباااب وعلى اااكسر الباب ااانتي جوا؟
ما ادري شنو احساسي بس عاجبني الوضع اشوفه
خايف عليّه، درت وجهي للدرج صعد رجال شكله ابد مو راحه، تلاشت ابتسامتي و فزيت من صوت باب.
الحمام اللي كسره چآن خشبي هسه اذا شافني بره
يتخبل عليّه وهذا الثاني صافن بوجهي انوب جاي بإتجاهي
مضيع الطريق يا حلو؟
أريم: طلبات. طلبات جبت طلبيه أكل
فوت على بيتك فوت واني هم رايحه على بيتي
خرب شسويت مجبوره انزل خاف يلحگني
نزلت الدرج وآني اسمع صراخ أبيل ينادي باسمي
طلعت من البنايه الوقت بعد المغرب والفرع مابي
ضوا، يبين مرعب للناس اللي قلبها ضعيف اما آني
اعشق الإثارة فطخت براسي هاي فرصة و اجتني.
خل استكشف البتَاوين شني بيها
أريم: الله بيوت عتيقه اعتق من تفكير سجى
هسه لو موبايلي وياي چآن صورت كل زاويه
بهل مكان الحلوو ودزيتهن ستريكات
نظرت وراي افتريت فره حول نفسي
أريم: دقيقه من يا مُجمع طلعت آني!
كلها مجمعات قديمه من ثلاث او طابقين
حتى ناسيه شگد مشيت بس شفت حاوية چبيره گدامي على بُعد أمتار، تذكرت كلام أبيل لمن گال
احرگه بالحاويه الموجودة براس الفرع!
أريم: يعني هذا راس الفرع اللي احنه بي.
دقيقه هذا أبيل ليش ما لحگني!؟
صدگ أبيل ليش ما لحگني! معقوله ما ضل باله
عليَّه، آني بوحدي بنص البتَاوين! مع
افتريت و رجعت بنفس الخط المشيت بي لكن
استوقفني ثلاث اشخاص طلعو من إحدى الدربونات
يجرون ببنيه مبين بعمر سيرا
سااااعدووني سااااعدووني يمااا لحگووني
وسعن عيوني من المنظر ما فكرت بالعواقب ولا خفت، كل تفكيري البنيه تحتاج مساعده او مَصيرها
يصير مَجهول!
طلعت الدرنافيس وركضت بإتجاههم اصرخ عليهم.
الثلاثه نظرولي مصدومين
أريم: عوفوووهااا يااا چلاااب
هاي من وين طلعتلناا روح جيبها صارن اثنين
أريم: تجيييب اااجلك انت بسس تعااال
ما ادري ليش صرت عِدائيه ولا خفت اول ما
راد يهد عليّه غرزت الدرنافيس بفخذه وصرخ صرخه
هزت بيوت البتاوين، من صدمة فعلتي عفته وركضت بإتجاه الثانين احچي بصوت عالي علمود الأول يسمعني
أريم: عزوزه تگووول احنه ضد العُنف
إلا في الضرورة القصوى تكبرر وتاااكل غيرهااا.
بجاااه على الضرغام على السَند على السور
علي النور.
واحد لازم البنيه والثاني اجا بإتجاهي ضربني راشدي
صدمني و إيدي على خدي نظرتله
أريم: مديت إيدك على أريم بنت الأدهم!
لزمني من شعري والثاني المنصاب من مكانه ينبح
جااايك لا تخليها تشررد اني اااربيها
الأول اخذ البنيه ودخل على وحده من البيوت
الموجوده وهذا لازمني من شعري احاول اطلع شعري من ايده ما اگدر، بس دفرته بالمكان الحساس
فورا عافني
أريم: ااابن القشمررر.
عفته ولحگت الأول للبيت واسمع صوت البنيه
تصارخ وتگول لا تسويلي شي شلت عودة المساحه
من الحوش ودخلت على البيت كله قذارة تكرمون
وسخ وسخ إلى أبعد درجه
شفته ماخذها للصاله والبنيه بالزاوية ضامه روحها
تبچي وتگول لا تسويلي شي وهذا مثل الچلب
يحاول يتقرب منها كسرت العودة على ظهره
بعدما ضربته مرتين ورا بعض وبسرعه
أريم: حيوااااان گتلك تجيييب اااجلك اااجلك
هااي شتسوي شتسوووي ااموووتكم اخلص عليييكم.
اللي غرزت الدرنافيس بفخذه
لزمني من ورا، خلى الدرنافيس بعُنقي يشد عليها
يريد يغرزها، استهترت من حچآ يم اذني
يحاول يتمادى ويشم بيّه
شلون صييدة شلوون.
لحگه الثالث لزمني من ذراعي الثانيه
يضحك بحقارة ويغني
لك من وين صااايد هل غزاال
أريم: اااطلع لسااانك ااگطعه بالقندررره اابن القشمررر
هسع اشوفچ القشمر شيسوي بيچ.
واحد لازمني والثاني يريد يفتح سحاب القمصلة
شماسويت هل مره ما اگدرللهم والبنيه الثانيه.
بس تتوسل بذاك ما يقترب منها صرخت بكل
صوتي
أريم: ووووولك ااااابيل ألحگنييييي
خاااف يشد فيشة ويااانههههههه
فتحت عيوني على وسعهن لمن اللي حچآ
ذراعه صار ينزف دم الطلقة اجت على إيده بس صوت ماكو، ابتعد يصرخ من الألم واللي مثبتني
انفجع يحچي بصراخ
شبييك من وين اااجت الطلقة قُصييي شبييك ولك حييدر قُصي تصاوب
عاف البنيه ما اعتدى عليها، طلع مسدسه من ظهره
و ركض كنبص يم المتصاوب وآني بين ايدين هذا الثاني.
قُصيييّْ ولك قُصيييّْ
غاب عن الوعي نزف هوايا من إصابته
بهل اثناء سمعت صوته وظِله سبقه بالدخول
خلو اللي يغير مننا ييجي ويعمل زينا.
من الفرحه گمت أبچي لمن شفته دخل لابس كبوس
اسود وكمامه سوده ويا كفوفه الجلد. رافع المسدس عليهم و مركب كاتم! نظرلي نظرة عتب وغضب بعدها بدون تردد صوب على كتف اللي لازمني إلا شوية چآن يطيّر راسي!
أريم: ولك راااااسي شبيييك.
أبيل: لا تسمعيني صوتچ.
صوب على الثاني قبل لا يرفع مُسدسه.
ثلاثتهم صوبهم بذراعهم، دفعت الثاني وگع
علي الأرض، وأبيل شال مسدس هذاك الحيوان
آني ركضت لا إراديا حظنته هو هم حظني بإيد
وحده همس بأذني
أبيل: حاب أگلچ ثلاث كلمات أريمي.
أريم: اعررف والله اعرف صدگت أنت تحبني هوايا أنت تحبني هوايا
أبيل: اي هاي منتهين منها بس حاب أگُلچ
غيرها.
أريم: أبيل والله آسفه خوش وهسه احچي كُلي آذان صاغيه.
إيده تسللت لشعري بهدوء، رفع وجهي لوجه.
دگ براس المسدس على خدي، اردف بعصبيه مكتومه اشبه بالصراخ
أبيل: انتي دماااغ سززز.
عزا بعينك يعني هذا الكلمات الثلاث!
ابعدني عنه ونزع قمصلته شمرهه بوجهي
أبيل: هاااج لبسي البنيه واخذيها للسيارة بره
و تگعدين بالسياره ومااا اسمع منچ حرف!
أريم: تمااام احچي بشوية رُقيّ خل اتقبل اسلوبك.
أبيل: أريم اطلعي لا احرگچ بغضبي اااطلعي.
أريم: تمام ريلاكس، تعاي اختاه خوما بيچ شي؟
ترجف رجف الحيوان مشگگ بلوزتها، طمنتني انه.
ما سوالها شي قبل لا البسها القمصله وگفت
غافلت أبيل وشميت القمصلة عطره ترس ريتي
إلا شويه و افقد
أريم: عزا بعينك أبيل.
نزعت قمصلتي ولبستها وآني لبست قمصلة أبيل
اخذتها وشفت أبيل يحچي اتصال ويقدم بلاغ.
باسم مجهول، گال لگيت ثلاثة متصاوبين!
بفلان منطقة من البتاوين، نظرلي فوگ تحت
وابتسم بطرف شفه لمن شافني لابسه قمصلته
اخذت البنيه للسيارة وگعدت گدام انتظر أبيل
دقايق ورجع فورا صعد حرك السياره وطلع.
من الفرع، نظرتله بعده ما نازع الكمامه والكبوس
أريم: أبيلو، أبيل اقصد ثانكيو جانم.
فعلَّ وضعية الصمت العقابي ما يجاوبني
نظر للبنيه من المرايا، اردف
أبيل: بيتكم وين وليش اجيتي لهاي المنطقة؟
بيتي بالشعب بس اجيت.
أبيل: احچي لا تخافين
اللي صوبت عليهم هددوني بصوري
هكرو تلفوني وگالو نفبرك صورچ وننشرهن
اذا ما ادفع مبلغ - - الهم.
لف واندار يرجع للفرع.
أريم: أبيل. أبيل شتسوي ليش ترجع هسه الشرطه توصل وين تنطي وجهك أبيل!
ما يجاوبني، سرعة السيارة صارت مثل الطلقه
بظرف دقيقتين ونص رجعنا گدام البيت نزل ركض وبهل اثناء سمعت صوت سيارات الإسعاف والشرطه قريبه من المنطقه
أبيل بعده ما طلع ماكو حل ثاني نزلت ركض وصعدت بمأن القيادة حركت السياره والبنيه
تنادي
الأخ شرااح يصير بيي؟
أريم: يدبر روحه يدبر روحه هو متعود مغناطيس المصايب فديته ابو الريلاكس ابو البيرفكتت.
واااااا ابو بيتي قريبا
ابتسمت ألها ما بقى شي نطلع من الفرع
شفت أبيل بالمرايا يركض وشايل جنطه بإيده
أريم: ها أها مو گتلچ هذااك هو يركض ورانا
طلعت من الفرع و أبيل يركض ورا السياره إلى أن
اختفى اكيد دخل بإحدى الأفرُع، عبن البتاوين
شارع بگلب شارع تاهت عليّه اطلع من فرع افوت
بالثاني إلى أن دست بريك قوي وهذا المُختل
گمز فوگ بونيد السيارة
أريم: وووولك عزاااا بعينك ااانتحاااري شبيييك؟
اشرلي بمعنى انزلي.
أريم: تمااام افتهمت باالع لسااانك تحاچيني بالإشاره
فتحت الحزام ونزلت رگعت الباب بقوة مشيت
للجهة الثانيه حتى اصعد وهو نزل عبرت بصفه
ضربته بوكس على خصره
أريم: اعلمك الصمت العقابي شلون بس خل يجي دوري...
دفع بظهري بمعنى اصعدي خلصيني
أريم: اااييي شبييك ماااظل عندددك قطرررة رُقي
صعدنا وحرك السياره، شمر الجنطه للبنيه، اردف
أبيل: هذا چآن موجود بالبيت بيها لابتوب وايباد
ويا موبايلات الچلاب الثلاثه.
صدگ! ما اعرف شلون اشكركم والله ممنونه منكم
شسوي حتى اجازيكم؟
أبيل: بس ادعيلي ألگى أمي ما اريد شي ثاني.
گالها بصوت مقهور والبنيه محجبه چانت
ضلت تدعيله وحچت
ما اعرف شلون اجازيك بس بمأنه حچيت عن امك
قررت اختم القرآن بأسمها ثلاث مرات، انت انقذتني
من مصيبه وكارثه چبيره. بلا زحمه ممكن تنطيني اسمها؟
هز راسها بهدوك استغربت لمن ذكر اسمها
الثُلاثي
أبيل: اسمها آيدا أيهم الباشا.
آيدا أيهم الباشا ان شاء الله تلگاها وتنجمع وياها
أريم: آمين.
أبيل: آمين.
وصلنا على منطقة الشعب استغربت
أبيل بظرف يومين حافظ الطُرقات!
أبيل: بيا فرع بيتكم؟
بذاك الفرع بس اخذني على الفرع الثاني
لأن گلت لأمي رايحه يم صديقتي ادرس
أبيل: تمام.
بس هذا شسوي بي شلون اتخلص منه!
واحد نظر للثاني وأبيل شاف برميل براس الفرع
أبيل: انطيني الجنطه هسه ادير عليها لتر بانزين
ونخلص. انتي لا تنزلين.
انطته وهو نزل اخذ لتر بانزين من صندوق السيارة
شلون ماخذ احطياته الحاروگه.
اختي انتوا متزوجين؟
أريم: ظلمه ما سمعت
ههه حلوه مخطوبين لعد!
أريم: قبل لا اجاوبچ ليش مبين علينا متزوجين؟
ما ادري والله بس تصرفاتكم ويا بعض
مثلا من انطاچ قمصلته تلبسيني انتي غرتي وشميتي ريحته بي...
أريم: شسمج انتي؟
بسايم.
أريم: بسايم خوش اسم بسايم
اها تمام اسفه على التدخل مجرد فضوليه، بس
والله حلوين الله يجمع بينكم على خير.
أريم: لا عادي اتس نورمال حاروگه ما يعنيلي شيء
قصدچ يعنيليچ أشياء وليس شيء
أريم: چنچ سيرا طرگاعه ديري وجهچ شوفي
شراح يسوي.
حبيتها لهل بنيه بس شويه تلح مثل سيرا
شاهدنا أبيل شلون شمرها بالبرميل اليحرگون بيها
النفايات مدري شنو المهم رش عليها لتر بانزين
وأشعل النار بيها، بقى أكثر من خمس دقايق
يحرگها حرگ ويرش بانزين
من تأكد احترگ رجع للسيارة ريحة الدخان
خنگني
أريم: ها خلص اتحرگ.؟
ما جاوبني يطبك طوك ليش احاچيك اصلا!
لا اليقهرني بسايم تتبسمله وتنظرلي
أبيل: گلتي بهذا الفرع بيت صديقتچ؟
اي خويا اشكرك
وگف السيارة وهي رادت تشلح القمصله
ما خليتها
أريم: وعلى ما اقبل ارجعي البسيها.
تدرين شنو انزلي خل احظنچ ما اعرف اعبر بالحچي.
ابتسمت ونزلت من السياره حظنتني بكل حنية والف مره تگول شكرا على شجاعتچ ما عفتيني بوحدي
أريم: يلا روحي لبيت صديقتچ، دقيقه بسايم شگد.
الساعه عبن هسه لو سألت الحاروگه ما يجاوبني
ساعة 7: 30
أريم: اي تمام، انتبهي على نفسچ وكوني حذره.
ظليت اشاهدها تعبر الشارع إلى أن فزيت
أبيل دگ هورن مرتين بمعنى اصعدي
صعدت وشديت الحزام بس ما حچيت ولا تجادلت.
بقيت ساكته اكيد ما نرجع للبيت هسه عبن الشرطه
بذيچ المنطقة، ولا يهمني اعرف وين ياخذني
فجأة مزاجي تغير 180 درجه.
رُقيه
دخلت للمطبخ عود اجهز الكهوة و بتراء اجت وياي
، الموبايل چآن بإيدي وتوصلني بصمات ابو گاع يسجل كلام الشيوخ ويدزها
خليت AirPods بأذني و انطيت اذن لبتراء
دز رساله كاتب
هذا شيخ الدليم صگر جابه وياه
علمود العينتين هاشم
سمعت الشيخ يحچي ويگول اجيت من الأنبار
للبصره عجل بويا ولد الباشا اسم وصيت عالي
وهذا ولد الأشتر الجنوب والغربيه يسولفون بيهم
تربات الزلم.
وهاشم يرد عليهم ولد الأشتر بعد.
قريت رساله ثانيه قبل لا يدز البصمه
چآن كاتب
عمام العينتين هاشم مال هسه أگوم
اكسر الطبله على راسهم هلگد جابو طاري ناجي النگس!
بتراء: يمههه افتحي البصمه خل نسمع
لا حول ولا قوة الا بالله العلي العظيم متسودن رسمي
فتحت البصمه وچانو يحچون بطريقة ما حلوه
يكولون مادام عدهه ولد عمام ما تروح للغريب!
وبعد ما دز بصمات
بتراء: على سَند يتصل گتله اذا اشتدت اتصل خل نسمع
رُقيه: اويلي عليييچ بتوووره جاوبي خل نسمع.
جاوبت وگالت الو. سُرعان ما طفت البلوتوث
من جهازي و ربطت AirPods على جهازها
واجاني صوت وگاع يحچي بعصبيه
محترم شيوخنا او چآن شوفتك حجمك!
تاج راسك ولد نصار تااج راسك وبناتنا ما يروحن للغريب.
سمعت عمو اشتر سأله عن قرابته بينا
وگال ابن عم هاشم. الأشتر گاله
چآ مالك دخل بيها حچينا ويا الزلم أنت اگعد
وگاع اضاف على كلام ابوه
اگعد اااگعددد بمكانك من الزلم تحچي.
واحد ثاني على صوته گال وينه ناجي او نائل.
خل ينهون عليها وينهم خل يجون و هنا صارت ضجه
علي سَند گال بهمس يشجعه
هاك الطبلة اكسرها على رأس ولد العار هااك
والثاني وگاع يحچي بعصبية بس ما يتجاوز
ومحترم الشيوخ الجايبهم علمودي
وحق لا إله إلا الله محمد رسول الله بس
الزلم المعگله الجبتهم مشية للأصيلة واگفين بعيني
تلزم لسانك لا اگصه والزلمه بيكم يعلّي صوته وينهي
عليها وحق محمد وآل بيته الطاهرين اسبح بدمكم
حسيت گلبي راح يطلع من صدري.
عيوني انترسن دموع من كلامه والثقة اللي بصوته
والعباس هذا تربات الزلم تربات الأشتر
الكل سكت و اردف بصوت شبه عالي
رااايدلي زلمه يعلّي صوووته وينهي عليها
عمو اشتر گال اگعد و اردف بأسلوب رزن
والكلام صدمني!
هسه خل نحچيها من الآخر مو طالبين رُقيه
بوحدها آنه اجيت اطلب اختها الصغيره كذلك
علي سُنة الله ورسوله.
وسعن عيوني دخلت وَدق ويا سيرا
وَدق: شصار على الگهوة؟
سيرا: على شني تتسمعون
من الصدمه حچيت تلقائيا.
رُقيه: ولچ وَدق عمو اشتر خطبچ ل أبنه وَتان
عالواهس.
وَدق: شگالت،؟
سيرا: ءءحم اي من الأول اشتور الورد جاي وحاسب حساب ضرب اثنين في اثنين
وَدق: شلووون
بتراء: نصيي صوتتتچ عمو اشتر ديحچيي
طفينا البلوتوث وفتحنا السبيكر
وهذا أبوهن راجعله القرار لحد يعلّي صوته ترا مالكم
حق. عقلية النهي بطلوها عاد سوو Update لدماغكم يا اخوان في الله.
سيرا: فديييته اشتور الورررد
ارتفعت أصواتهم واحد يگول هاشم بعد لا تحاچينا.
والثاني يگول بعدما أبقى بهل مجلس
وعلي سَند يهمس وراهم
منا الباب يا اخوان في الله.
وَدق انسطرت وسيرا تحظن بيها
سيرا: واااخيرا مدلل البيت خطبنااله ودوووقه مدلل البيت خطبنااله عروووسه.
وَدق: دقيقه دقيقه شجاي يصير مجاي استوعب
سيرا: آني وانتي بنفس البيييت متحممممسه.
وَدق: لشنووو، رُقيه اني انسطرت هذا فخ
آني شكووو ما اريد اتزوووج هسه، لعد ودراااستي؟
سيرا: شبيچ ثوله راح تتزوجين أبن الأشتر.
الزلمه الحوگ الزلمه الخشننننه الزلمه المعدل.
السترووونغ مان الزلمه اخو زلمه
وَدق: الزلمه اللي واحد من حواجبه مطبوره.
غمضت عيونها واضح جواب وَدق غثها غثث
سيرا: بليز ماي بيستي ترا ابن العم خط أحمر
ينتهي عنده ألف صديق. ما اسمحلچ تصنفين عليه
هوَ حُر بكيفه.
وَدق: دِسُكتي بله
بتراء: بناات صوتچن هاشم ديحچي
هم زين كاتمين الصوت على سَند ما يسمعنا
، اردف هاشم اللي المفروض أگول عليه بابا بس مجاي اتقبله!
وآني راضي تمام الرِضا افتح صفحة جديدة
ويا بيت آل الباشا وانطيهم بناتي على سُنة الله
ورسوله.
راحت للصاله صاحت بكل صوتها
سيرا: عمو هاااشم واافق ينطينا بنااته
لولد عمامي اااالف الصلاة والسلام على رسول الله محمد.
اعتلت أصوات الهلاهل بالبيت واسمع حبوبتها
ناهد تگول اقرن فاتحة الخير
ومنا إيمار چآن صوته قريب من على سَند
االف الصلاة والسلام على رسول الله محمد
والفاااتحه على روحهم اقصد خلونا نقرأ فاتحة الخير.
ان شاء الله
عم الهدوء والكل يقرأ سورة الفاتحة
حتى احنه قريناها سيرا رجعت للمطبخ
خلت وَدق تدرك الواقع وتقرأ مرتين مو مره وحده
وعلي سَند قفل الخط، بتراء حاوطتني واردفت
بتراء: يلا اجا وگت الگهوة
فعلا سوينا الگهوه اني ووَدق سويه
البنات خلّني احط بيها طن ملح ويا ملح ليمون
ليمون دوزي ضگت شويه بالخاشوكه گحيت
من الطعمة
سيرا: شلونها؟
رُقيه: إذا على اللون هي بُني جوزي نفس الشي.
المهم الطعم جهنمي احسه خطيه اني مو حقوده شدعوه هيچي
سيرا: ما گلنا عليچ حقوده بلاش دراما كوين
والعباس مو خطيه هيچ هي التقاليد.
وَدق: راح اخلي بهارات مشكلة بفنجان وَتن.
بتراء: تشريب لحم مو گهوة
رُقيه: والله خطيه.
سيرا: انتي عاطفيه زياده عن اللزوم وخري منا
جابت فناجين ثنين وصبتهن بي والباقي
صبت الگهوة العاديه، اجا واحد من الشباب
الي جاي ويا على سَند اسمه فاضل
رُقيه: يبو والله عيب هذا خطار شلون نشغله.
خل واحد من الشباب اللي يشتغلون بالبيت يجون يقدمو
سيرا: عادي هذا فاضل اذا گتله موت يگول
حاظر صح فاضل؟
فاضل: لا مو صح. اقصد صحين طرگاعه خاتون
سيرا شالت الصينيه وهذا اذا نباوعله
يوزع ابتسامات شگد سخي بهذا المجال.
سيرا: ركز فوفه ركز وياي
فاضل: شديلي فيونكه ورديه شرايچ خل ابين كيوت على هذا اللقب.
سيرا: بس لا معترض؟
فاضل: لا شحدي
سيرا: اي خوش، شوف هذني توزعهن وهذني الاثنين شوفهن ركز بيهن واحفظهن.
فاضل: اعرف مبينه ذني بيهن شكو توابل شفتوها
بالمطبخ وهذني مال البقيه من امدا حظه اليشربها.
سيرا: من امداا حظك لا تخليني اشربك ياها
فاضل: يومن ألنا.
گال هيچي وراح للديوان
وَدق: صچمچ امداچ.
سيرا: خل يولي هسه يرجع واطيح حظه.
مر رُبع ساعه چنت واگفه بصف وَدق
بنفس اللحظة اجتنا مقطع فيديو مدته 8 ثواني ويا
رسالة. سيرا تباوع من موبايل ودق. و بتراء تباوع من موبايلي
الأخين گاعدين بصف بعض يشربون الگهوه اللي.
سويناها جواها قريت الرساله بإعجاب.
رُقيه: يَستَحيلُ أن تَبقى القَهوَةُ مُرّة حينَ تُعِدُها
إِمرَأةٌ من سُكَر
وَدق: يَستَحيلُ أن تَبقى القَهوَةُ مُرّة حينَ تُعِدُها
إِمرَأةٌ من سُكَر
بتراء: اووووه سووو رومااانتك سوو
سيرا: اوي يا حتة سُكررة
وَدق: خاف فوفه ناصب علينا وما اناطهم؟
سيرا: لا شحده.
رُقيه: سووده عليّه شربها ويبتسم فوگاها
كلهن يباوعن بيّه.
سيرا: اگيين اگين خل اصورچ ستريك خل يشوف سحره عليچ ابو گاع احتلّچ لا مجال للتَفاوض
حظنتني بتراء وتباركلي فرحانه
بتراء: ألف مبروك يا گلبي و بعد باچر عقد القران
مالتكم بأشرف مكان بالنجف الاشرف ضريح الإمام على عليه السلام
سيرا: وراح يتم توثيق كل لحظه بهذا اليوم
واليوم الشباب هم صورو المشية بقت العقد
والزفه
احس فراشات بصدري حتى من گالن نعقد بالنجف عجزت اعبر عن مشاعري وبس اهفي على عيوني.
ما اريد أبچي صايره فد حساسه هاي الأيام
سيرا: ودووقه ترا جبنالچ نيشان مثل رُقيه
بس ما نزلناها عود گلنا آخر شي نفاجئچ بيها
رُقيه: وَدق ليش ساكته احچي لا تسكتين
إذا رافضه الزواج من وَتان محد يگدر يجبرچ!
وَدق: مو قصة رافضه للصراحه گلبي ما مرتاح
سيرا: ترا بينكم كيماء من اول لقاء. ههه ام لفه
وَدق: بله انچبي.
بتراء: ام لفه و ام الميانات شلون اللقاب.
رُقيه: و هو أبو گاع
وَدق: أبو حاجب مطبور.
سيرا: ولد اشتووور ممنوع تصنييف عليهم.
بعد دقايق رجع فاضل وجاب الفناجين سيرا استلمته
تحقيقات ما عافته إلا خلته يحلف بالله شربو الگهوة
رجعنا گعدنه بالصالة والنسوان يسولفن عن
التجهيزات علمود باچر.
أريم
نظرت بساعة موبايله العافهه بالسياره
صارت 8: 30، ضل واگف يعاين بنهر دجله
جابني على جسر الجادريه وطلع من السيارة بوحده
بعد تفكير طويل
قررت أنزل وراه اصحح غلطتي.
رحت وگفت بصفه بقيت ساكته، هو ما تحرك
كأني ما موجوده بصفه
ينظر بفراغ قهرني وخلاني أتراجع عن فكرة التبرير
فقررت ارجع اگعد بالسياره لكن استوقفني صوته
بهدوء مُعاتب.
أبيل: يؤذيك الذي تخافُ عليهِ منَ الأذى!
رجعت بصفه واحس فعلا اذيته احتاريت.
شحچي شگول، تصرفي چآن اله جانب سيء وجانب
جيد، الجيد انقذنا البنيه من المَصير المَجهول
والسيء، أبيل تأذى بسبب فعلتي.
اجيت احچي اندالي وخلة أصبعه على شفته
اردف
اشش ولا كلمة ماكو شي يبرر غبائج!
أريم: بس. بس البنيه انقذناها بسبب اللي سويته.
رحم الله والديچ رحم الله.
أريم: ووالديك بالرحمة.
نظرلي بطرف عين، چنت بعدني لابسه قمصلته
تقربت لزمت زنده وَ اندارلي منتظر احچي
اردفت بالتُركي
أريم: zür dilerim، سامحني.
ضل ساكت و دار وجه، رحت گدامه
أريم: zür dilerim، سامحني.
ما جاوب، صدگ عصبت ودفعته احچي بنتر
أريم: خلي يكون عندك شوييية رُقيّ بنيية تعتذر منك جااوبها ياااخي جااوبها.
خوزر بيّه و طلع ايده من جيوبه يحچي منفعل
أكثر مني الخلاني ابتسم بداخلي، تركيزه على كلمه وحده
أبيل: يااا ستي آنه موو اخووچ ولاعندي رُقي
تلامست ارنبة خشمي احاول اتمالك ابتسامتي
عزا بعينك كيوت والله.
أبيل: على شني تبتسمين!
أريم: لا ماكو شي.
وزع نظراته بالمكان ونظرلي، اردف ببرود
أبيل: امشي گدامي.
أريم: ما.
أبيل: امشي وراي خلصيني
أريم: ماا
لزم زندي بلطف اردف بهدوء
أبيل: چآ امشي بصفي.
مشيت وياه للسيارة فتحلي الباب بكُل رُقي
أريم: عفيه خليك راقي وياي.
أبيل: تددل أريم خاتون، اصعدي بلا امراً عليچ
صعدت شديت الحزام هو هم صعد
رگع الباب بقوة ونظرلي.
أريم: خير شكو.
طلع تلفوني من جيبه رفعها يشوّفني
أبيل: عايني بيها.
أريم: هذا تلفوني جيبه.
رجعه لجيبه وشد الحزام بدل الگير وحرك السياره
أبيل: ما تاخذينه بسهولة.
أريم: أبيل لا تصير غثيث انطيني التلفون.
ما جاوبني وگف السيارة يم محل ونزل
أريم: ويين ناازل
أبيل: إياچ تلحگيني.
أريم: حااظر
نزلت وراه لحگته دخلت قبله للمحل
چآن للديكورات واغراض منزليه.
أبيل: لا يا على يا ضرغام!
افتريت بأقسام المحل وهو راح على قسم
الأقفال جاب قفل للباب ويا درنافيس جديد
وآني شايله ثُريا انعجبت بيها چانت عالشحن.
أريم: حلوه اشتريلي ياها، اخليها بغرفتي.
أبيل: بس لا أبهر مشتريها لجمرة.
اصفريت من نظرلي خاف فاتح تلفوني
ويعرف اقرأ روايات! عفت الثُريا ومشيت من حلگ ساكت بس نرجع للبيت احچي وياه
دفع حق القفل والدرنافيس، صعدنا فورا انطلق
بالسيارة محتاره احچي لو انتظر نوصل للبيت
سكتت ما حچيت، إلى أن وصل لمنطقه قريبه
علي البتاوين، وگف السياره بقطعة أرض متروكة
اخذ المسدس خلاه بظهره وشال علاگة القفل اللي.
اشتراه نزلنا من السيارة قفلها و مد إيده
أبيل: جيبي ايدچ لازم نرجع مشي.
لزمت إيده الدافيه وگلبي يدگ دمام
مشيت وياه الطريق ظلام اغلب البيوت مابيها كهرباء
دخلنا بفرع وسخ كله نفايات تكرمون واسمع أصوات مخيفه شديت على لزمة إيده
أريم: شبيها البيوت هذني.
أبيل: ما بيها شي امشي.
بنفس الطريق مجموعة من السُكاره چانو واگفين عند برميل شاعلين نار يتدفون منه ويشربون
أبيل جرني على إيده اليسار حاوط كتافي.
لمن مرينا من يمهم واسمعهم يحچون
نتشااارك الوليمه نتشااارك هاا هاا نتشارك
أبيل وگف نظرلي
أريم: أبيل خل نرجع للبيت المكان يخوف عوفهم!
انطاني العلاگه و ترك إيدي ركض هد عليهم
چانو خمسه ثلاثه شردوه وثنين وگعو بإيده
ضربهم وشبعهم دفرات وشال بطل المشروب
كسرها على ظهره طلع جداحته وركضت وگفته
أريم: ولك لااااا لاااا تحرررگه عوووفه.
سحبت الجداحه منه ورجعت إيدي ورا ظهري
أبيل: احرگه ونخلص من أمثاله.
أريم: لاا ما تخلص ثلاثه شردوو
أبيل: الحگهم والله انطيني الجداحه
أريم: حاروگه خليك ريلاكس.
لزمت إيده وهو نظراته كلهن غضب دفره مرتين
فوگ الضرب اللي اكله آني هم دفرته عالواهس
أريم: شبعناهم دفرات خل نرجع كافي أكشن وإثارة
لزم زندي بعصبيه واخذني وياه نكمل طريقنا
وهو يغني بإستهزاء يقلدني!
أبيل: لا نكمل الإثارة ونغني خلو اللي يغير مننا ييجي ويعمل زينا.
أريم: لا وعلى الضرغام توبة بعدما اغنيها.
أبيل: بيرفكت صدگتچ.
رجعتله الجداحه وسحبت زندي من إيده
شبكت أصابع ايدي بچف إيده وما حچيت ضليت
ساكته الأمان اللي بچف إيده اول مره احس بي!
وصلنا للشقة بنفس المجمع التعبان
چآن طابگ الباب ورجال گاعد بره همس وگال
أبيل: دافعله فلوس يحرسلنا.
أريم: ادري بيت معتگ لو قاصة شاليمار؟
خوزر بيّه وراحله گال هذا هو تگدر ترجع لبيتك
الرجال دخل للبيت اللي بصفنا واني دخلت ويا أبيل
البيت على حاله مثل ما كركبته.
عاف القفل يم الباب وتقدم بنظرات غريبه
ناحيتي توترت صار قريب مني ومد إيده عبالي
يتمادى يلزمني من خصري ابتعدت خطوتين
وهو تقدم خطوتين خلى ايده بجيب القمصله
اخذ باكيته من القمصلة هسه انتبهت القمصله
بيها باكيت ما چنت مخليه إيدي بالجيوب
ورث جگاره اخذ نفس منها ونفخها، الجگاره
بين اصابعه، أشر عليَّه وعلى ارجاء البيت
أبيل: ما اريد اشوف شعرايه واگعه ترجعين
كل شغله لمكانها وتكنسين الصاله، المواعين حياتم.
المواعين كذلك تغسليها من حلگ ساكت.
انفعلت واحچي بصوت عالي
أريم: عشتووو شااايفني بنغلاديشييه
المواااعين تغسلهن بروحك.
طلع تلفوني من جيبه و شوّفني
أبيل: تحلمين تاخذينه إذا ما سويتي الگلت عليه.
عيني على التلفون شلون نُقطة ضُعف!
أريم: عاينلي أبيل التلفون ماله دخل انطيني ياها
أبيل: شلون ماله دخل غير هذا المفرمت دماغچ؟
حچيت بطريقه اتجاهل شجاي يقصد
أريم: أنت شني قصدك تگول؟
أبيل: جندل...
وتقدم خطوه.
أبيل: قسام.
تقدم خطوه ثانيه
أبيل: جمرة ومغامراتها بالبتاوين.
أريم: ءءء خل اشرحلك.
تقدم بعد خطوه ثالثة عجزت افسر نظراته
أبيل: رواية في طيَّاتها.؟
منتظر اكمل وراه
أريم: خوف من المَجهول.
أبيل: وبعد؟
أريم: و قصة حب وخلاص.
أبيل: وبعد،؟
أريم: و خذلان. أبيل شلون تفتح تلفوني وتفتش
بي! انطيني ياها عيب عليك والله
صار قريب مني وزع نظراته على ملامحي
اردف بصوت هادئ.
أبيل: لا تتمنين تعيشي مَصير غيرچ.
لا تتمنين تعيشي حياة غيرچ، سواء ابطالچ
المفضلين او شيء آخر. احنه بواقع مو رواية.
أريم: بس الروايه حقيقيه...
أبيل: حتى إذا حقيقيه ليش متمنيه تعيشين مَصير جمرة؟ اعيشچ مصيرها امرضچ اخليچ تكرهيني؟
أريم: لا اريدك راقي وياي.
أبيل: چا انچبي وعيشي حياتچ مثل ما هيّ.
أريم: ليش تگُلي انچبي! صير راقي وياي.
تلامس خصلات شعري، رجعها ورا اذني
اردف بإبتسامه
أبيل: انچبي بصيغة، Seni seviyorum.
أريم: إذا صدگ هذا الحچي انطيني التلفون.
أبيل: بيرفكت بعدما تسوين الگلت عليه.
ما اريد اشوف شعرايه واگعه بالبيت وبعدها انطيچ
التلفون.
ابتعد و خلى التلفون بجيبه، گعد عالقنفه الموجوده
يدخن ويگول بلشي.
أريم: على فكره اكرهك.
أبيل: تشكُرلير. مُعرب، وآني أكثر
شگد مغثثة، نزعت القمصله مالته وشمرتها بوجه
رفعت ردن بلوزة الهودي، بلشت ارتب البيت كله
وشلت المسواگ الجابهن فواكه وخظراوات.
ويا شامبو وغسولات حتى فرچة ومجعون أسنان
جايب
أريم: هاا خوش جايبهن.
أبيل: أگوم اشمرهن وعلى إذا ما تبطلين سوالف الروايات هذني
أريم: لا اگعد بمكانك لا تگوم
رحت اخذتهن للحمام ورتبت الغرفه رجعت جبت
المكناسة التقاليدِيه بديت حاول اكنس شمدريني
ما اعرف شلون يكنسون وصلت يم رجله نظرتله بخزره
أريم: ارفع رجليك...
تربع عالقنفه وكنست الباقي، كملت ف دخلت
للمطبخ تگول يوم الحشر السنگ كله مواعين مال
البارحه ويا مواعين الصبح.
أريم: شدعي عليك عزا بعينك أبيل بحياتي ما غاسلة مواعين عزا اضافري اقرأ عليهن السلام.
فتحت الماي تجمدت بديت اغسل المواعين
شلون ما چآن، حسيت عليه دخل للمطبخ
اخذ شي من الثلاجه وگف بالباب ياكل تفاح
أريم: ولي اطلع بره واگف بلا فايده
أبيل: اجيت اسويلچ أجواء انتي كملي ما عليچ
بس حاب أگلچ بخصوص اضافيرچ. إلى الله سفره إلى الله.
نظرتله بصرخه لو اگطعه بسنوني ما يرتاح گلبي
من كمية المغثه.
أريم: ااابيل اااطلع برررره اااطلع، عزااااا بعييينك لا
تضححك
يضحك ويجي بإتجاهي عاف التفاحه عالكاونتر
وگف بصفي مد إيده
أبيل: انطيني.
خليت الجلافة بإيده، ردت اطلع لزم إيدي
أبيل: وعلى الضرغام ما اساعدچ ارجعي لمكانچ
آني اغسل بزاهي وانتي بماي.
رجعت عالساكت احسن ما اغسله بوحدي
راقبت ايده شلون يغسل كأنه متعلم!
أريم: لا بأس بك. تعرف تجلف!
أبيل: الوحدة تُرغمنا على الكثير من الأمور.
أريم: خوش. هم صح.
أبيل: لا تحچين ترا خلصت وما اساعدچ تغسليهن
من الزاهي.
أريم: الماي بارده تدگ بالعظم.
أبيل: شسويلچ همزين انقهرت عليچ وساعدتچ!
چنت الزم المواعين بأصبعين اتجنب ابلل ايدي كلها
اتجمد والله. وهذا يغثني بالكلام
أريم: غصبا ما عليك تساعدني كله منننك ليش جايبني على هذا البيت المعتگ؟
أبيل: عود أحقق احلامچ التافه يل دماغ سزز
أريم: ثااالث مره تگوول دمااغ سززز!
خلى وجه بوجهي بنظرات كلها حُب اكيد يتغزل بيّه ويعتذر مني.
أبيل: أنتي دماغ سز وعلى الضرغام
بقيت ساكته ثواني وضربته راشدي خفيف.
أريم: أنت جرب تغلط بالكلام وياي.
عصب وعاف اللي بإيده رد فعله چانت
بنفس اللحظة لزم خصري قربني منه وبإيده
اللي تسللت لشعري رفع وجهي لوجه
أبيل: هسه اذا اطيح حظچ واكسر هذا الإيد محد يگلي ليش!
أريم: شحددك تكسرر إيدي أبيل وخر لا تسوي هيچي وخررر.
يدگ جبينه بجبيني وغاضب شدعوه هي راشدي خفيف. ، خلى عيونه بعيوني يحچي.
أبيل: ابويه ما ماد إيده أنتي شلون تجرأتي!
أريم: اانت تماديت وصرت تغلط بالحچيي
أبيل: ماا غلطتت ااانتي فعلا دماغ سززز
بس.
أريم: بسسس كمل كمل اغلط اغلط خل اشوفك
ندى شمخلفة اانت بس اغلط.
فجأة حول نظراته لنظرات حُب و هُيام
قرب وجهه يهمس يم اذني رُغم عني!
أبيل: بس أريمي الدماغ سز احتلتني.
هلگد گلبي يدگ بسرعه صرت اسمع صوت
دگاته براسي حاولت اطلع من بين ايده شلون ما
چآن
أريم: وخر. أبيل لا تسوي هيچي وخرر.
دفعته بعيد وحچيت بعصبيه
أريم: شهل ميانه ماا تستحي ولا تخاف من الله!
مسح على وجه يحچي بتوتر
أبيل: ما ادري شيصير بيّ من اكون قريب منچ
ما اقصد شي ترا رجال صايم مصلي والله اخاف من الحرام!
أريم: ايي اييي وااضح.
أبيل: . أريم أريم
عفته وطلعت من المطبخ
چآن گايل بعدما تخلصين غسل المواعين
تجين تشدين قفل الباب بنفسچ
لحگني للصاله دورت على القفل الجديد
شلته وشمرته عليه بس لگفها
أريم: ااانت تشد القفل موو آني.
أبيل: تأمرين أمر وبعد.
أريم: وتنطيييني التلفوووون يلااا.
طلع التلفون من جيبه وانطاني.
أبيل: تأمرين أمر هاچ بس ترا
حاذف التطبيق البرتقالي اعذريني لحظة غضب
أريم: وحاااذف الوااااتبااااد جبببت ااااجلك ااابيل جببت ااااجلك
أبيل: ابقي بمكانچ ما اضمن روحي بقُربچ
تالي اطلع ادبسز ما استحي وما اخاف من الله
بقيت بمكاني ما هديت عليه اخذت التلفون
ومشيت بإتجاه الغرفه لكن رجعت بسرعه.
دفرته دفره على ركبه بس ما تحرك او حس بالأذى
أبيل: ان شاء الله برد گلبچ.
أريم: اكرررهك والله.
أبيل: بيرفكت وآني أحبچ.
عفته ودخلت للغرفه قفلتها من جوا وگعدت.
كل جسمي ينتفض من اسلوبه!
وَسن
طول الطريق و نائل خبلني يحچي بصراخ
نَائل: ولددد الأشتر ر اخلص عليهم!
وَسن: شعليك انت شعليك بيها؟
نَائل: شني شعلييية رُقييييه لازم تصير ل نااجي!
وَسن: ما تريده شني گوة هي؟
نَائل: ناجي يريدها.
وَسن: چذااب نائل لا تچذب ثنينا ندري ناجي
أكبر بلاير ما مُمكن يكون صادق!
نَائل: وسن! اعرف أكثر منچ وانتي فاهمه شقصد!
نظرتله وخلى عيونه بعيوني لوسيفر يتواصل مباشرة مع القرين كسرت عيني عنه وهو اردف.
نَائل: أنتي حاليا بصف خواتچ ضدي! وضد اخويه
ومن جهه تتوعدين ل جاسر الراح يرجع باچر!
وَسن: اكيد اصير ويا خواتي شنو اعوفهن واصير بصف اخوك البلاير اخو البلاير!
ضل ينظر للمدالية المعطره تجي وتروح ويا السياره
اللي اقودها بسرعة 200 بس اريد اوصل على البصره
بأسرع وقت.
ضل يركز بيها إلى أن فجأة لزمها وشمرها من السياره
يصرخ بغضب
نَائل: نعللللةةةةة بهل وضعععع نعلةةةةة
وَسن: الميدالية شعليها.
نَائل: لا تحاچيني لاااا تحاچيني.
ضلينا ساكتين باقي الطريق، صرت للبصره
ساعة 9: 30 لحدما وصلت على بيتنا صارت 10: 30
الفرع فاضي ما بيها ولا سيارة ركضنا للبيت
ونائل يدگ الباب بهمجيه اول ما فتحولنا دخل نائل يصرخ وينادي ابويا
نَائل: عمي هاااشم!
رحنا للصاله ومن دخلنا شفنا ودق ويا رُقيه گاعدات
و بابا يحچي وياهن اما سُعاد فساكته وتسمعه
هاشم: اعرف كلش زين اعرف بعدچن ما متقبلات.
حقيقة الرابط إلى يجمعنا، لكن انتن تبقن بناتي وآني
رجال اريد أءمن على بناتي يم الزلم الحوگ فماكو
احسن من ولد الأشتر.
نَائل: لاااا صدگ عمي!؟
نظرله بس ما جاوبه ونائل ما يگدر يتقدم خطوة
امام ابويا! رحت گعدت بص رُقيه لزمت إيدها باركتلها بهمس وبابا اردف بعدما سمعني!
هاشم: باركي ل وَدق الأشتر طالبهن ثنينهن
اندهشت عجزت اعبر عن فرحتي بس
الوترني نائل لمن دفر الطبله وصاح اول مره يسوي هيچي گدام ابويه!
نَائل: شنييييي طااالبهاااا شنيي لاااا تخليييني اتسووودن عليييكم.
گالمه ابويا وهذا كل جسمه ينتفض ينظر ل وَدق
ويحچي
نَائل: مااا اسمح بهذااا الشيي إلا ولد الأشتررر
مستحيل تنطيييهم بناتك ل أبناء الأشتررر
هاشم: نصي صوتك. نصي صوتك نائل واطلع بره البيت ترجع لبيتك تاخذ الدوا وتروح تنام. وسن
طلعيه برا.
ما خبل نائل غير اسلوب ابويا البارد الإستفزازي.
بحيث راد يتقدم بسرعه ركضت وگفت بينهم ما اريد هاشم يأذي نائل مستحيل اسمح بهذا الشي
وَسن: نَائل حباب امشي وياي نَائل امشي نطلع
نَائل: وَسسن عووفييني كاافي تدافعيين خل اشوف شيسويلي اااكثر من هيييچ
وَسن: نائل بغلاة امك عندك. خل نطلع خل نطلع
نَائل: وسن وخرري عنيي ماا اسمحله يهددني
خل اشوف شيسوي يسلط شيطان ثاني عليَّه خل يسللللط اييدچ ووَسسسن.
لزمته من ذراعه وطلعته من الصاله فورا على بيته اللي بنفس الفرع رابع بيت
نَائل: ااارجع اررربيه واااعلمه عواااقب
الشيطان اللي سلّطه عليّه وحگ الرررحمن.
أخذته للبيت فورا على غرفته قفلت الباب من بره
ونزلت ركض للمطبخ جبت گلاص ماي وصعدت
فتحت القفل ودخلت الغرفه هدوء وظلمة فتحت الأضويه شفته گاعد عالأرض وساند ظهره للحايط
رايح بغير عالم يمكن داخل بنوبة هواجيسه
اخذت الدوا الخاص بوضعه وكنبصت گدامه.
عفتهن بصفه، قربت إيدي بهدوء رفعت شعره
من گدام عيونه، اردفت.
وَسن: نئول هسه تصير بخير بس تاخذ الدوا.
مسح عيونه وما جاوبني. اخذ الدوا طلع حبتين بالعادة لازم حبة وحده، انطيته الگلاص وبلعهن
شرب الماي وخلى راسه على رجلي لزم إيدي
وحظنها لصدره
نَائل: اريد اشوف وحده بيهن.
مسحت على شعره اردف.
وَسن: منو بيهن؟ خالة يُسرا لو.
نَائل: اريد اشوف التضوي ضوي اريدها تنصحني
وَسن: شبيهن نصايحي ترا بلشت اغار!
باس ايدي وصوته صار ناعس
نَائل: أحبچ أكثر شي من بعد يُسرا الف بنيه ما تاخذ مكانچ. اختي أنتي و هذيچ التضوي ضوي تكوون.
شگد احب هل إنسان اخويه الماجابته امي
قربت اذني من شفته وحجيت بصوت هامس
وَسن: ايي كممل وهذيچ تكوون؟
غمض وأعلن دخوله بسُبات عميق
وَسن: ها هيچ نمت وما جاوبتني!
طلعت موبايلي من جيب الجينز دزيت رساله
للحارس بعد دقايق صار بالغرفه، ساعدني ونيمنا
نائل بفراشه.
وَسن: دير بالك عليه ما تطلع من البيت.
هز راسه ب نَعم وعفتهم، رجعت لبيتنا دخلت
للصاله ماكو احد اكيد هاشم رايح ينام والبنات اكيد بغرفة سُعاد، دگيت الباب ودخلت، فعلا ملتمات
يشوفهن النيشان مالتهن
وَسن: هاااي شنووو منوو راح تصيررر عرووسه
ضحكن وگالن ثنينا حظنتهن وابارك ألهن
ابتعدت اشوف النيشان
وَسن: فخمم فخااامه النيشان خل اشوف هذا
فستان يجنن ومحتشم. عود ليش گال تحجبي؟
رغمچ على الحجاب؟
رُقيه: لااا ولچ عبن نروح للنجف نزور الإمام على عليه السلام والعقد يصير غادي.
وَسن: وانتي ودق؟
وَدق: آني كذلك وكلش فرحت هذا أعظم مكان
سُعاد: مرت الأشتر أمل خاتون فد انسانه نادره
و حبابة گالت بمأنه العقد بالنجف الأشرف يكفي
فماكو حفلة خطوبة بس عقد قران.
رُقيه: اصلا عادي اهم شي عقد القران بالضريح
بعدين عيب نطلب حفلة ومدري شنو همه عدهم
ضروف عائليه و بعدهم ما لگو مرت عمهم.
وَسن: اي مادام انتي وودق راضيات هذا اهم شي
بس انصدمت اشتر الداهي صدمني!
وَدق: سيرا گالت من الأول اشتور
حاسب حساب ضرب اثنين في اثنين.
وَسن: يعجبوني هيچي زلم حوگ.
سُعاد: نائل شصار عليه!
وَسن: تعب بس تلاحگت الوضع انطيته
الدوا ونام.
رُقيه: وين چنتي؟
نظرت لفراغ بعدها نظرتلها بكل صراحة
وَسن: چنت بالنجف آني و نَائل...
گعدت اسردلهن كلشي صار.
هِلال
چنت اتريگ و أشاهد فيديوها دزهن
ابو وگعه للمشية اللي اخذها على بيت هاشم
كلشي شفت وسمعت حتى كلامه لمن گالو
خل ولد عمهن ينهون عليهن.
نزل هدآم من الطابق الثاني فورا اعدت تشغيل
المقطع اللي ابو وگعه يحچي
اااريدلي زززلمه يعلّي صووووته وينهي عليهاااا
اااسبح بدمكم
صوفرت اصفگ واحچي بإعجاب
وهذا مغثوث
هِلال: برررااااووو ولد عمممي الحوگ ولد الحوگ.
الزلم المعدله الزلم الخشنه الما تخاااف الزلم تربااات الزلم تربااات الأشترر.
هدآم: خلصتي.
خليت زيتونه بحلگي نظرتله
هِلال: شتريد.
هدآم: طفي الزفت او نصي صوته
هِلال: ليش ليش معقولة مو فرحان علمود
عظمة السمچ الچان بحلگك؟
صفن وادرك لمن چآن يگول وگاع عظمة سمچ بحلگي مستحيل ينزل
هدآم: فرحان فرحان بس لا تحچين بي
هِلال: شني غاثك دا احچي عن اعز الناس على گلبي
ابو وگعه الحوگ الزلمه المعدل، وگف عشيرتها.
علي تك رجل واخذها.
هدآم: بس انطوه كلمه ما أخذها.
هِلال: باچر عقدهم و حجزت تذكرة عوده.
هدآم: شكلچ ناسيه انتي حاليا مخطوفه
واختي مخطوفه يم اخوچ الحاروگه رجعه ماكو
هِلال: ما طلبت رأيك دا احطك بالصورة.
هدآم: ماكو رجعة. لا يمكن نخاطر
هِلال: ما دام اشتور گال ارجعي محد يوگفني.
هدآم: اشتر ما حاچي لا تچذبين على لسانه.
فتحت المحادثه اللي بيني وبين اشتور، فتحت بصمة الصوت
هلاله تگدرين ترجعين ماكو اي تهديد.
الموضوع محلول والناس اللي تراقبكم هاشم تدبر
أمرهم.
هِلال: اشرب چايك اشرب چايك.
عفته وگمت على غرفتي اليوم ما انزل للشركة
ياسر يديرها تمام التمام بغيابنا وبغياب أبيل شريكه
لحگني يصعد الدرج ويحچي منفعل
هدآم: الصبرر الصبرر رااجع وياچ ماا ترجعين وحدچ
هِلال: معليه بيك تروح في ستين داهيه.
هدآم: هلالي!
ضل لاحگني بالممر و اني امشي بإتجاه غُرفتي
هدآم: زين مشتاقلچ.
هِلال: محد گال تشتاق. انت تنجاز
لزم زندي دارني عليه.
هدآم: بس احظنچ وأشم عُطرچ والله ما اسوي شي ثاني.
نظراته اشبه بالحزن واللهفه قرب وجه بلع ريگ اردف
چويتي گلبي كافي عاد ارحمي بحالي
هِلال: الله الغفور الرحيم.
هضيمَة زلم بالشُوگ تنهَان.؟
درت وجهي، ردت أكمل طريقي إلى غُرفتي
لكن ما خلاني امشي قربني منه اردف
لا تتمردين أكثر ما بيّه حيل كبرياءچ الطاغي!
خليت إيدي على گلبه بهدوء، بعدها دگيت مرتين
عليه اردفت بصوت قوي بدون رضوخ.
هِلال: أبقى بمكانك ما أوصيك يل مابيك حيل.
عفته و رحت على غرفتي سديت الباب وقفلته
اكيد يلحگني ويترجاني، فعلا اجا بس مو مثل كل مره
هل مره دفر الباب بغضب ويحچي
شتريييديين ااانتي شترررريدين، طلقة وخليها
برااااسي شمااالچ كررهتييييني بنفسي شمااالچ
شني اااول بشر غلطاااان شنييي من گلببب شااايله
ااانتي شنيي من گلب، هِلااااال افتحي الباب خل نحچيي هِلااااال
ضليت صامدة اقاوم دموعي بعدما أبچي.
عليه لو يصير جُثة گدامي من شوگه و حُبه!
رجع يدفر ويدگ الباب هل مره كلامه خلى گلبي ينغز.
هِلااال افتحي الباب لااا اااحلف برب العِزة برب السمواااات السبع، هِلااااال.
ما جاوبته ولا فتحت الباب مستحيل
اسامحه بسهولة اهم شي كرامتي وكبريائي!
تقربت من الباب وسمعته يشهگ
بعد دقايق سمعته يتنهد ويگول اوف يا ربي
سكت دقايق ثانيه بعدها اردف بنبرة مكسوره.