رواية ولد الباشا للكاتبة فاطمة الأحمد الفصل الحادي والعشرون
سيرا
البارحه بالليل و لوقت متأخر رجعو عزّهَ وعزام
والكل استغرب أريم ليش ما رجعت مو هي راحت
وياهم وينها، بعدها عزّه حجت المختصر و أنه أريم أصرت تكمل اليومين، ادري تحاول تغثني بس
I
don t care.
اليوم هم عطله بمناسبة أربعينة الإمام الحسين عليه السلام، لبست أسود ونزلت من الدرج ملتهيه
اگلب بالأنستگرام صادفت بوست من حسابه.
اصلا ما ضايفته بس طلعلي بالموجز شفت منزل ستوري كذلك ترددت ادخل للستوري، ودخلت على حسابه عود خل اشوف شگد الفولو عنده اذا چآن صاعد، حسابي يضيع بين المشاهدين وما يلگفني.
طلع عنده فوگ العشر تالاف.
سيرا: ادري شني العالم هاي إلى متابعتك على شني مايكل جاكسون فرع تركيا؟
دخلت للريلز ناشر فيديو مُدته خمس ثواني.
گاعد بمكان مجهول ومظلم مدنگ ولابس الشفقه عدل ومن يرفع راسه يخلص الفيديو
سيرا: انا كده استفدت ايه؟
عبرت للريلز الثاني مُدته فقط ثلاث ثواني، لازم بيها فرچة الألوان والون بني فاتح، و اللوحه وجهها ما مبين بس بعدما اعدت الفيديو مرتين تأكدت صورة بنيه واللون لون شعرها بني فاتح او بالعاميه لون التمري
سيرا: مني هاي البنيه ام الشعر التمري؟
دخلت للتعليقات تگول داخله على تركيا
كلهم أتراك وات هابن؟
سيرا: هذوله مصدگين هذا تركي وهذا اصلا عراقي لا دقيقه امه تُركيه نسيت بس عمو أيهم عراقي اها نايس.
نزلت من الدرج وآني احجي هيج، بدون لا انتبه
تصادمت ويا عمه سجى.
سيرا: يمه بسم الله آسفه ما جنت منتبه.
خوزرت بيّه وحجت.
سجى: بدل ما تقرين عن حياة الناس اقري دروسج بلكت تنجحين.
سيرا: اوو حبيبي والله اول مره تنصحيني لذالك I don t care.
سجى: وهذا شني؟
سيرا: يعني كُلش كُلش أهتم لنصيحتج.
سجى: اي زين، تعاي خل اشوف شني جنتي تقرين منو هذا الامه تُركيه؟
سيرا: ابن زوجج يا عمه، . انتي اين سليپينغ؟
اخذت الموبايل وهي تخوزر بيّه استغربت شلون تگلب بحسابه كأنهُ متعلمه وتعرف كلشي بالأنستا
دخلت على الستوري وچان مخلي ستوري بمنطقة
أثرية في البصره ومخلي موقعه ضلت تقرا الموقع
سيرا: عمةة لج ليش دخلتي للستوري؟
سجى: وهذا مُتابعه هماتين شكو بيها؟
سوتله فولو ولايك
سيرا: على حظي الله هداج هو أنتي اخته ما تجرعينه أنوب تجين على ابو شفقه، تتفاعلين بحسابه ومن حساابي؟
طلعت موبايلها وأخذت صوره لحسابه.
سجى: ابن زوجي واحبه مثل عزام أما هلال فأحبها بس مرات ما تدخل مزاجي.
اجت تمشي لغرفتها وآني بعدني بصدمه هاي ليش اخذت سكرين لحسابه رحت وراها وگفتها.
سيرا: دقيقه عمه دقيقه، ويت ويت.
أنتي ليش اخذتي سكرين شوت؟
سجى: شنهوا؟
سيرا: ليش اخذتي صوره لحسابه شلچ شغل بي؟
أنتي عندج انستا و هل عمي أيهم يدري؟
ما انطت رد فعل بس جاوبت عادي.
سجى: لا ما عندي بس عزام عنده حساب من يرجع المسا للبيت اخليه يتواصل ويا اخوه الزغير ونحجي وياه، حابه اتعرف عليه أكثر.
سيرا: No آي آي كآن بليت!
سجى: بليت بنتي بليت.
گالت هيج وراحت على غرفتها وآني فاتحه حلگي من الصدمه أنوب ردت عليَّه بالانگلش شني يعني تفهم انگلش لو ردت عالواهس وهي ليش فجأة غيرت لونها مدري جلدها يا ربي مجاي استوعب.
دخلت للمطبخ اشرب باي واهدئ من الصدمه مستحيل تكون هاي عمه سجى وراها إنَّ، اجت ماما وشافتني.
ندى: شبيج سيرا؟ خوما مريضه لا سمح الله.؟
سيرا: ليش هم بلش اعراض الصدمه عليّه مصفره سوده بوجهه؟
تلامست وجهي ما ارتاحيت فتحت الكاميرا
ونظرت لنفسي فعلا مصفره مثل العاده.
ندى: اذا تگولين بسبب خبر من أخبار الطوبه اضربچ راشدي يرشدج وعلي!
عفت الگلاص لمن طخت براسي الكونانيه البداخلي
سيرا: نداوي ابوس راسج حبيبتي انتي.
بست راسها وركض طلعت من المطبخ وآني صح متردده لأن عيب التجسس بس مستحيل اصدك
بيها، خطيت خطواتي ببطئ شفت باب غرفتها نُص مفتوح وهي تجي وتروح ما ادري شبيها.
سيرا: هسا اذا هُدهُده گالت سجى أريدج بشغله تگول عندي صوَفان ما اگدر امشي.
جنت احجي بعقلي طبعآ و اراقبها، خلت الموبايل على اذنها بعدما چانت تدور بين الأسماء.
لحظات والطرف الثاني جاوبها وهي تحجي.
من حجت وگفت الدم بعقلي حرفياً موسعه عيوني وحلگي مفتوح ما مستوعبه الكلام.
سجى: دزيتلك حسابه شوفه هذا إلى تدور عليه؟
، اي أسمه إيمار، لا بعيد كُل البعد عن عالم ابوه وأخوه أبيل. اي اخر منشور من منطقة - - - من الموقع خل يوصلون اله، سويت العليّه بقت يمك اتصرف!
گلبي گام يدگ بسرعه تراجعت بخطوات غير مُنتضمه شهل مُصيبه شتريد منه و منو هذا.
صعدت غُرفتي ومن الصدمه حيل ما ضل بيه متشبثه بالمحجر واصعد الپايات وصلت وسديت الباب اتصلت على أبو الوَتن هو وياه اكيد
سيرا: آ الو وَتان وتن وينك؟
ويا اخويا بشغله ضروريه.
سيرا: چا وإيمار! عمي مو گال تبقى وياه؟
سيرا شبيج عيني! إيمار مو طفل وشني اضل مرافقه ما عندي شغله غيره؟
سيرا: هو بمنطقة - - - بوحده!
اي اعرف شفت ستورياته وهسا گاعد بالمقهى القريب من المنطقه.
حرت احجيله او لا مستحيل يصدگ بيّه بس ااحاول.
سمعت صوت صراخ يمه وضرب
سيرا: ول منو لازمين وتضربونه؟
چم چلب من چلاب نَسل الفُجار، ديلا لا تتصلين ما فارغلج.
قفلها بوجهي
سيرا: خوو هساا ما ااادعي عليك الله يقفل أبواب الجنة بوجهك ياا. استغفر الله آنا اتصرف شني غير احنه بنات الأدهم باشا بعشر زلم فنهم يطخوني.
فتحت الكنتور، بدلت التنوره بجينز عريض ولبست صايه فوگاها، اخذت شال خليته على راسي والموبايل بإيدي، بدلت الكعب بشوز رياضي ونزلت بسرعه، هم زين امي بعدها بالمطبخ وعمه آمل وياها.
سيرا: مشوار صغير و راجعه.
ندى: اوگفي اوگفي وين تروحين؟
آمل: آني اتوقع وين تروح رايحه لبيت وَدق الحلوه مو؟ اذا رحتي عدهه جيبي رقم تلفون امها خوش؟
ندى: بعلي انتي كُل همج تدورين چنه لأحفاد الهمج ملاتچ.
سيرا: اي أي رايحه يمها يمه رايحه يم وَدق ف اذا تأخرت لا يضل بالكم.
ندى: سيرا تطلعين ويا السايق ولا تتأخرين ابوج راجع ويجي هنا قبل لا يرجع للنجف.
سيرا: و لا يهمج يمه راجعه عالوقت لخاطرج ما اتأخر.
عفتهن وركض طلعت وگفني السايق.
آنسه وين تروحين خل اوصلج عبن الباشا رافض
وحده من الخاتونات تصعد بالتكسي.
متأكده تعليمات عمو ايهم ابونا ضاربنا چلاق
ما يمشي على حرص عمي الأيهم.
سيرا: كلام الباشا يمشينا سيده اكيد.
سبقني للگراج طلع السيارة وفتح الباب
سيرا: بليز عمو مره ثانيه لا تفتح الباب وتخليني أخجل من نفسي چي انت بگد ابويا عيب عليّه
اخليك هيج تعاملني.
بنتي هذا شغلي.
صعدت وسد الباب انادر وصعد أشر للحارس يفتح الباب الخارجي.
سيرا: عمو استعجل اريدك تطير بينا الموضوع
كلش ضروري.
طلع من القصر مثل المُعتاد شغل كُل الكاميرات
الموجودة بالسيارة و نظام ال GPS
زاد من سُرعة السيارة ومن وصل للشارع سئلني
وين تريدين اوصلچ؟
سيرا: منطقة - - - عمو هي قريبه فدوى استعجل.
هز راسه واسرع واني دخلت حساب إيمار شفته
رادلي الفولو وداز الإيموجي إلى رافع عيونه لفوگ
دزيتله
سيرا: مو آني مو آني
شافها وكتب، شگد سريع!
أبويا مو انتي ابويا!
طبيت بالموضوع بدون لف ودوران
سيرا: إيمار وينك اذا بالمقهى خل اجيك واذا بغير منطقة هم اجيك ضروري نحجي!
عفوا بنتي أنتي غاسلة وجهج اليوم الصبح لأن مبين مو مصحصه! وطابه بالمحادثة الغلط!
سيرا: صير ذكي واقرا اسمك شگده شكُبره
احجي وينك؟
بالجهنم.
سيرا: اها جايتك.
دزلي الإيموجي التسليكي مال الان
شگد مغثه هيج شخص مُختصر النقاش.
دخلت للستوري الثالث قبل دقيقه
كاتب على صورة المقهى
العتيق المُمتلئ بالتفاصيل
سيرا: عمو على مقهى - - الموجود بالمنطقة - - - -.
هز براسه وغير الطريق ما أخذ خمس دقايق وصلنا.
فورا نزلت وحجيت وياه.
سيرا: عمو أنت انتظرني هنا اوك ولا تنزل تمام؟
عبن من اخلص بحثي ارجع وتاخذني بيت صديقتي
علي بيت صديقتج؟
سيرا: اي عمو ما عيب عليّه اجذب على نداوي.
عفته وهو خطيه ما فاهم اصلا چذبة شنو وبحث شنو، مشيت بخطوات سريعه واعدل الشال على راسي المقهى قديم وبس زلم كبار بالعمر گاعدين والبعض ناس غُربه بالعربي سُياح
دخلت ودورت عليه ماكو سألت ابو المقهى.
سيرا: خويا إلى چآن گاعد على هذيج الميزه وين راح؟ جان
چآن لابس براسه شفقه؟
سيرا: اعتقد جان لابس شفقه دقيقه اشوف الستوري.
دخلت للستوري شفت متصور سيلفي بنص وجه شوفته للرجال
سيرا: هذا نفسه؟
اي شفته شرب گهوه، دفع الحساب وطلع بس عاف باقي الفلوس ما أخذها.
شوفني الفلوس وچان عشر تالاف، مد ايده
ينطي الباقي
مادام انتي تسألين عنه، هذا معناه گرايبج
اخذي ورجعي فلوسه مبين جديد بالمدينه.
اخذت العشر تالاف وطلعت من المقهى
اعاين حواليه ما شفته وين راح وين طلع يا ربي!
فتحت موبايلي واتصلت مكالمة فيديو بالأنستا.
جاوب وفتح الكام يمشي و بس خطواته مبينه.
إيمار: خير يا طير شني سالفتج؟
سيرا: اگلب الكام على چهرتك خل اشوفك واحجي
حجا كلمه تركيه ما فهمته، بدل للكاميرا الأماميه
أول ما نظر بالكاميرا عدل الشفقه واردف.
إيمار: غردي!
أمشي والتفت حواليه اريد اللمح مكانه ما مبين
سيرا: إيمار مستحيل تصدگ كلامي بس ناس لاحگينك واحتمال يأذوك.
إيمار: ل جهنم، انتي شعليچ.
تعابير وجه لا مُباليه إلى أبعد حد، ثنينا ساكتين
وننظر لبعض. وصلت لأقرب فرع من المقهى
استمريت بالمشي وبعدنا فاتحين كاميره.
سيرا: إيمار اسمعني شراح احجي أول وتالي
ما يعنيلي لكن نضل من دم واحد ونفزع لبعضنا.
اها البنات بعائلة الباشا مسترجلات وبعشر زلم.
سيرا: عمة سجى هي إلى دخلت على حسابك وسوت فولو بعدها اخذت سكرين شوت وگالت اخلي عزام يراسل اخوه عبن اريد اتعرف عليه.
ما صدگتها عبن اعرف طينتها رحت وراها وشفت الشفته وسمعت السمعته هي دزت حسابك والموقع لشخص وگالت سوي العليك.
وگف بمكانه اللتفت حواليه يتفقد المنطقة.
بعدها اردف.
إيمار: اخذي نفس واحجي سجى مرت ابويا تقصدين؟
سيرا: لا مرت ابويا آنا.
إيمار: سجى ما شايفها ولا اعرفها معرفه عميقه مجرد سامع بيها وأنه هي أم عزام وزوجة ابويا.
سيرا خيالج واسع وتموتين على الأكشن لا تألفين
حجايه من وراها هي شعدهه ويايه؟
سيرا: انا هماره انا هماره عبن نبهتك.
قريت اسم ماركيت من وراه وعرفت هو بيا فرع غيرت طريقي هي ركضه وهي مشيه وهذا مستغرب.
إيمار: مخبله شبيج تركضين احد لاحگج؟
ما جاوبته كملت وصلت للفرع وهو بعيد گدامي يمشي ورافع الموبايل مشيت وراه وبينا حوالي عشرين متر، التفت حواليه الفرع هادئ مابي أحد عبن أربعين الإمام ومحد گاعد ببيته كلهم طالعين
زياره.
يبدو شافني بالكاميرا مبينه وراه التفت وشافني.
رجع ينظرلي بالكاميرا وبس يعدل بالشفقه، اردف
إيمار: شني سالفتج بنتي استوعبوا انتي وولد عمامج الهمجين مالي دخل بيكم مُستحيل امشي بطُرقاتكم القذره إلى كُلها دم.
سيرا: ليش تگلي بنتي، ما اسمحلك!
إيمار: دهاك استلم هو هذا إلى لفت انتباهچ!
اجيت اجاوب وگف بمكانه مثبته عيونه عليَّه، آنا هم وگفت.
سيرا: شبيك صافن بوجهي، على شنو تعاين؟
اول ما التفت شفتهم ثلاثة مقنعين واحد بيهم.
ضربني راشدي فر وجهي فر، إيمار بس عاط بيهم من بعيد قفل الخط ويركض بإتجاهنا، رفعت راسي اله مصدومه هذا شلون ضربني راشدي.
سيرا: ي يااا حيوااان ضربتني راشدي تعرررف
ويااامن تورطتتت؟
الثلاثه يعاينون ببعض وسيتهزؤن بيّه بس رديتله الراشدي وگع القناع من وجه مصدومين من جُرئتي، وآني موسعه عيوني من ملامح وجه.
عنده جرح فوگ حواجبه ونازل لأسفل عيونه
الضربته هد عليّه وخنگني الشال نزل من راسي و هذا يحجي بوجهي.
شلون مديتي ايدج شلوون تضربيني يل
منا إيمار هد على الاثنين ضربهم واجا لزم الحيوان إلى خانگني من الخلف، گلب الشفقه بالعكس، سحبه و ضربه كلّه على خشمه عافه اجا لزمني من متوني يطمئن عليّه.
إيمار: سيرا خوما اذاج؟
عيوني على إلى خلفه وبس صرخت
سيرا: ايمااار...
ضربه بالمسدس على رقبته وإيمار غمض عيونه يقاوم الألم يحرك راسه وبعده لازم متوني شويه شويه بدأ يكنبص وآني وياه گعد على ركبه وآني گدامه ارفع وجه وگوه احجي.
سيرا: إيما إيمار عاين بيّه إيمار گتلك راح يأذوك لا تغمض عيونك ايمااار.
واحد بيهم سحبني من إيدي وإيمار وگع ما تردد يسوي بيّه مثل ما سوا بإيمار لحظات وكلشي صار مُعتم هل هُنا النهايه ام البدايه!
ال بتراء
ما جاوب بدل الگير و داس بانزين عيوني على مقياس
السرعه من 80 عبر لل 190، وگف گلبي هذا ليش هيج يسوگ، قفل الأبواب بالقفل المركزي واخذ نفس عميق
بتراء: على على سَند شبيك صاير شي احد احد لاحگنا؟
انداريت اباوع ورانا ماكو اي سياره مثيره للشك
بتراء: على سَند احجي ويااك جااااوب شبيك من الصبح مو على بعضك.
عبر السيارات و كلها تدگ هورن وهذا مستمر بنفس السرعه يسابق الريح، لزمت كتفه اهز بي حتى ينتبه ويحجي، ماكو فايده فاقد وما ادري شبي.
عيوني جحضن مثبتتهن گدامي، كلشي صار فجأة
بتراء: على سَندددد اااانتبه.
هي لحظات والسياره تدور بينا على سَند
ثبتني بإيد عالكشن وبإيد لازم الستيرن والسياره
تحارب عدم الإنحدار وصل بينا على التُرابي والسياره الثانيه عبرت من يمنا.
چانت سيارة جاسر شفته وتأكدت، ما وگفت السياره الا لمن دعس بريك قوي والمكان بعيد عن الطريق الرئيسي السياره نزلت للأراضي الزراعيه.
ثنينا مصفرين وبعده ايده يم رقبتي مثبتني لا انظرب بالسياره رغم شاده الحزام، بلع ريگ ونظرلي آني هم نظرتله بس من كمية الرُعب إلى عشته لساني انربط.
علي سَند: ألف الحمد لله عدت على خير.
بس اهز راسي ب اي اي وكلمة ما تطلع مني.
نزل من السياره اخذ الموبايل والمسدس والسياره جانت تطلع دخان فتحلي الباب والحزام علگ ما يفتح انتظرني افتحه ما يفتح، تقرب فتحهه إلى والمسدس بإيده
علي سَند: اطلعي بسرعه.
طلعت ولزم أيدي يركض ركض مو يمشي للشارع
الي جانت أكو سيارة ثانيه واگفه تنتظرنا يبدو سيارة أصدقائه وچانو لاحگينا من البدايه، نزل السايق وهو يطمئن علينا بس ما يرفع عيونه او ينظرلي نظره.
عدت على خير خويا انت ارجع بسيارتي وآني.
أصلح سيارتك وارجعها.
علي سَند: ارشد بس نرجع الك عندي سفرة سياحيه على حسابي، و ها السياره حاميه
وگامت تدخن ما بيها شي ثاني
رغم الموقف الصعب ثنينهم يضحكون ويحششون
هو احنا مال سفرات يمعود يوميه نسافر سفرة إلى الله ونرجع.
تحاظنو وسلمه السويچ فتح الباب واستغربت تغير وياي بس مبين أكو شي مخفي أكو موضوع شاغل باله، صعدت وشديت الحزام، وبگلبي بس اردد علي يا سَند. صار جاهز وخلى المسدس بالدُرج، شد الحزام وانطلق بسرعه عاليه مثل قبل نص ساعة.
بتراء: بس على كيفك ليش هيج مُسرع!
ينظرلي وما يجاوب.
بتراء: عليي سندد گلت على كيفك!
علي سَند: على كييفك على كييفك جنت على كيييفي والحيوااان لحگني وصاار الصااار شتردييين أنتي بس اسكتتتي!
بتراء: بااوع لك صح افضالك كثرن عليّه بس آني مو بلا كرامه واسكتلك، صوتك ما يعلى عليه، وما تگلي اسكتي لأن مااا اسكت آني احجي ومحد يسكتني محدد.
نظرلي بنظره عجزت افسرها وحجا.
علي سَند: والله وطلع عندج لسان شبر
مو وگت تتفحلين علينا مش نائصنا والله!
بتراء: ملاحظ روحك جاي تخطئ بحقي؟
علي سَند: كُل أخطائي صحيحه.
ما قلل السُرعه بل زاد عليها وآني من صدمة ردوده بعد ما ظل عندي خلگ اخذ وانطي وياه.
بعد ساعه كامله قريت اسم النجف الاشرف على جانب الطريق، يعني وصلنا للنجف، لعد غير طياره مو سياره، كل هذا والكاميرات المروريه تصور المخالفات.
بتراء: احلف بعلي اذا ما مسجلين مليونين عليك
بسبب المخالفات ما يطلع اسمي بتراء.
بنص الطريق دعس بريك والسيارات ورانا تدگ هورن وهذا مثبت عيونه گدام ووجهه تغير 180 درجه، بلعت ريگ، انتهيتي يا بتراء كلشي انتهى.
وعرف حقيقتج بس شلون اصحح زلة لساني!
نظرلي وبلعت العافيه من طريقة نظراته.
بتراء: ما يطلع اسمي براء. براء اقصد زلة لسان
مثل مثلك من ناديتني بتراء ظلت ظلت ببالي منو صاحبة هذا الأسم.؟
ما جاوب بس هز راسه وكمل الطريق.
رجعت راسي على الكشن ومن الرهبه گلبي يدگ بسرعه، اسلوبه وشخصيته اول مره تمر عليّه.
سكوته يخوفني ويوترني أكثر من كلامه وعصبيته.
اجته رساله وطلع موبايله من جيبه قرائها واتصل على شخص انتظره يجاوب وبدأ الصراخ والسب والشتم. أما آني مصدومه
علي سَند: شلون شلووون مو بروسيا يعني طلعووو؟ لاا يااا ااالله چآ الإمبراطورية إلى بنوها بروسيا هيج عاادي تركوها؟
معقوله يقصد نفس كلام جاسر عن منو يحجون منو
أصحاب الإمبراطوريه إلى بروسيا!
علي سَند: مو اعررف انتقلو لغيررر دوله مستحييل
يعوفون كُل هاي الفلوس والشركات وراهم!
، انت ارجع المسا ويا عمي للبصره احنا الليله نجتمع بقصر الباشا ونحجي بخصوص هذا الموضوع.
ضل يستمع للطرف الثاني وآني اسوي روحي ما مهتمه وهو آني كُلي اذان صاغيه، بس اريد اعرف
منو بروسيا وليش عافو البلد وطلعو لغير دوله!
علي سَند: عابد اسمعني هذوله ناس وراهم مُنظمه ف بكل سهولة ينتقلون من دوله إلى دوله چا شني من وين فجأة اجتهم هذا الثراء الفاحش؟ وهو جسار صح تاجر - - - - بس ما عدنه دليل عليه! ذ.
يعني صح اعتقادي هُمه تُجار - -، بس منظمة شنو انتبهت من اكمل كلامه
علي سَند: انتهت قصتهم بروسيا وابتدئت في دوله أُخرى، الايام جاية راح تكون صعبه علينا.
منا أبناء نَصار وجسار ومنا نَسل الفُجار الأساس!
وگف شعر راسي من گال نَسل الفُجار الأساس
آني وكل أعدائهم نعرفهم بلقب نَسل الفُجار بس منو هُمه الأساس! شنو يقصد بكلمة الأساس هذوله منو!؟
أنهى الاتصال ونظرلي، سويت روحي ما منتبهه.
دار وجه يكمل الطريق، بعد نُص ساعه دخل لمنطقه راقيه جدا وكلها يلات وگف يم وحده من البيوت باوع بنفسه وبوجه عدل الشماخ ونزل
بقيت بمكاني سارحه بأفكاري بالي يم إلى اسمهم
نَسل الفُجار الأساس
علي سَند: براء انزلي وصلنا، براء!
نظرتله وبعدها للمنطقه، رگع باب السايق بقوه
واجا فتحلي الباب وفتح الحزام بعدها أشر بإيده
علي سَند: تفضلي خاتون.
بتراء: thanks.
نزلت گالبه عيوني وجان شبه مستغرب اعرف احجي انگلش، مشيت وراه ودخلنا للبيت جان موجود حارس بالباب، حجا وياه وما سمعته شگال لأن جنت اباوع بتفاصيل البيت، إلى چآن يشبه ذاك البيت إلى موجود بروسيا تذكرت شلون شردت من ذاك القصر، معقوله هذا نفسه قصر جسار بس بالعراق، معقوله كُل هذا خُطه حتى يرجعني لجسار!
بسبب إلى عشته وبسبب انعدامية ثقتي بجنس البشر مستحيل اصدگ بأحد وأنه أكو شخص يساعد شخص ثاني بدون مقابل الموضوع مُثير للشك. تراجعت خطوه برا الباب الخارجي.
بتراء: لا مستحيل يكون بلا مقابل.
علي سَند: وين؟
وگف بوجهي وهو أطول مني نظرت لتفاصيل البيت وحجيت مره ثانيه.
بتراء: ليش كُل هذا؟ و البيت البيت لمنو هذا؟
علي سَند: البيت بيتي! وكل هذا لوجه الله.
بتراء: لا تخليني اندم وانصدم بيك!
علي سَند: بالحالتين تتعلمين درس.
دفع بظهري لكن بهدوء دخلت مره ثانيه وهل مره
أشر للحارس يسد الباب اباوع عليهم ما فاهمه شي
بس خطيت خطواتي نَحو المجهول و معقوله بالحالتين اتعلم درس ويصيرلي عِبره!
رُقيه
جنت بالباب واگفه ومحتاره اخطي هاي الخطوه الخطيره، ضليت أكرر قرائه الآيه إن مع العُسرِ يُسرا بگلبي، والحارس بالباب يكرر السؤال
مس اذا ما عندج شغل او موعد رجاءً وخري من يم الباب الموضفين بلشو يوصلون.
نظرتله ونظرت ورايه فعلآ الموضفين إلى يداومون بالشفت المسائي أي ما بعد الساعه 12 ظُهراً
بلشو يوصلون، هزيت راسي للحارس واول ما خطيت خطواتي ل بناية الشركه انبهرت بالديكور.
والتفاصيل الفخمه اللوحات الفنيه والتصاميم المعروضه اخطي خطواتي وعيوني على التصاميم اسمع أصوات الناس حواليه واسمع حديث الموضفين إلى يطلعون ويمرون بصفي، او إلى توهم يوصلون.
بهل اثناء طلعت آنسه متأنقه بالأسود ومبين مو موضفه عاديه يبدو مديرة قسم مُعين.
ما ادري دبرلي بطاقه راح احظر المُنتدى شلون ما چآن.
عبرت بصفي ونظرتلي ما وگفت فورا طلعت.
وآني اندار لصوت شخص ثاني يجي وراها ومستعجل عيونه عليها بس تصادم ويايه
عَزّآم: آسف أختي.
عبرني وآني بمكاني گلبي يرجف واشد على ملفي، من اسمع كلمة أختي والصوت تكرر بإذني الشخص شفته من قبل، هو كذالك وگف بمكانه رفع ايده ما اعرف مسح وجه او خلاه على گلبه
لأن بس ظهره مبين اندارلي
وآني بمكاني أحاول اتذكره. نزل ايده الچانت مثل ما توقعت على گلبه، وزع نظراته بالمكان بعدها اردف. ورجع نطق الاعتذار.
عَزّآم: أسف أختاه، يبدو ملتقين من قبل شكلج مو غريب عليّه.
عيوني تنظرله وگلبي متلهف على كلمة اختي
تذكرته نفسه واحد من بين ولد الباشا اندار للباب وهو يشوف الآنسة صعدت سيارتها ومشت ما راح ولحگها وإنما خطى خطواته الثابته والرزنه بإتجاهي
وآني اتراجعت خطوه، صار گدامي رفعت أنظاري اله.
رُقيه: ما صار شي خويا معذور ما جنت منتبه.
ما علق على كلامي أصر على تساؤلاته وهو من يريد يحجي يوزع نضرات على المكان كله بعدها يخلي عينه بعيني ويحجي.
عَزّآم: وين شايفچ!
مركز الشرطه قبل ثلاث ايام
أدرت حدقة عيني للشخص إلى واگف وراه
ابتعد من گدامي ينظرله وياي چآن شخص طويل
ومتأنق بس جبينه ملفوف بشاش ملامحه مُميزه
ما عرفته بس هم صوته مر عليّه من الايام المضت. چآن مثبت عيونه عليّه كأنه يعرفني وحافظني
وآني اصلا اول مره اللتقي بي!
الأول سأله من سأله وگع گلبي بي رجليه معقوله!
عَزّآم: أبو وگعه تعرفها؟
ش شنوو ابو وگعه يعني هذا وگع! وگاع! شهل صدمه هااي يعني هذا نفسه إلى إلى انقذني ليلتها
نفسه إلى سوا حادث بسببي هسا لو لابس كمامته چآن تعرفت عليك والله!
اجا وگف گدامي واجت وياه ريحة الجگاير المختلطه ويا عطره، نظرلي فوگ وتحت واندار للثاني إلى توني عرفت أسمه
وگاع: عزام هاي رُقيه الجابر.
اخت البنيه إلى جانت بالمركز قبل أيام.
من احتجزو الشباب! صح مس رُقيه الجابر؟
كل هذا وعيوني مثبته على ملامحه
عَزّآم: جيد تذكرتج تكرر الموقف وتصادمت وياج
مثل هسا، شعندج بشركة ولد الباشا؟
من گال الجمله الأخيرا گالها بكل جديه وتعذير
نظراته تسبب قلق من ينظر لحدقة عيني كأنه
شخص يدور على اجوبته بالعيون قبل نطق اللسان.
وگاع: الانسه.
اشرله يسكت وهذا گلب عيونه وما تدخل
اجيت احجي اردف بهدوء حذر.
عَزّآم: ما نجدي الكلام منج تفضلي احجي أختاه.
الكلمه الوحيده اللي من اسمعها، عيوني تلمع بالدموع بلعت ريگ وعزام نظراته لعيوني تغيرت
بألف يا على لملمت مشاعري وافكاري. رجعت رُقيه
القويه الما يأثر بيها شي ونطقت.
رُقيه: مقابلة عمل.
وگاع: خلصن شركات العراق اجيتي على شركتنا!
رُقيه: ما اجدي الوضيفه منكم.
حرفياً قهرني بهذا الكلام متأكده شاك بيه، انداريت وخطيت خطواتي للباب صار عندي عُذر احجيه لجسار.
ارجعي لمكانج رُقيه الجابر.
صوت الاستاذ عزام وهو يحجي بهدوء حذر
انداريتله ومن رجعت، الثاني حجا.
وگاع: لا تستخدمين مُفرداتنا ضدنا، العواقب مراح تعجبج.
رُقيه: اعتذر مسيو انت جاي تحجي ويا انسانه متعلمه تعامل بالمثل احترم تُحترم
عَزّآم: وگاع روح للإدارة.
وگاع: أشوفج بالمقابله أم الميانات.
عيوني اندارت وياه وهو يمر بصفي ام الميانات
شنوو شجاي يقصد هذاا شنو يقصدد، نظرت للثاني آني شجابني على هذا الحجي شورطني!
عَزّآم: أول قاعده بالشركه يا آنسه رُقيه الجابر
احترمي مُدرائج، القاعده الثانيه تحترمين القاعده الأولى خارج البنايه انتي ولسانج أحرار
اما بهايه البنايه وبهايه الشركه لسانج تطبكينه
وتخلي بجيبج لا يطلع على مُدرائج بالإضافة على زُملائج كذالك!
اريد حجه حتى ابطل توضيف وهذا ينهي الحُجه
بهذا الأسلوب إلى غصبا ما على الموضف يتقبل كلامه، هزيت راسي اي هو كذالك ردها إلى وكأنه يگول عفيه. اي عفيه عليك انت.
عَزّآم: الله يعافيج، اصعدي للطابق الخامس المقابله هناك.
عافني بصدمتي وطلع، يعني رجعت فكرت بصوت عالي! وفشلني!، رحت للمصعد وآني اغم نفسي من أكثر عادة اكرهه ببعض المواقف افكر بصوت عالي واجاوب كذالك.
اختاريت الطابق الخامس ودخلوا عدة موضفين وموضفات ويايه يبدو كلهم نفس القسم، وحده بيهن حجت يبدو سوريه الجنسيه
انتي جديده هون؟
رُقيه: أي.
مبينه مُحاميه من كشختها.
نظرتله بطرف عين وهو واگف بالزاوية مجتف وينظرلي بطريقه غريبه و يوزع ابتسامة.
هه ما تهتمي لكلام هدا، هو هيك بِحب المزح ملح الدوام مو صح أنس؟
انتي گلتي مو صح.
الكل طگها بضحكه تافهه هذوله شبيهم جايين للدوام لو للسيرك انفتح المصعد و أنس عبرني وچان قريب عليه نظرلي ويحجي.
أنس: شوية احترام يا موضفه گدامج مُدير قسم.
شنهووواا هذا المهرررج مدير قسسم يا ربي بداعة وگاع أبو وگعه وگع المصعد بيّه خل اموت واخلص من هل حاله.
عبروني الموضفين والمدير بالمقدمة گدام المصعد واگف
أنس: مولاتي زُليخه الن تخرُجي؟!
المشكله كلهم يضحكون على طريقته بالكلام.
اجت المصعد تقفل وهذا مد ايده سحبني برا وصرت گدامه، اردف
أنس: گايز الموضفه الجديده مو مثل جوي ما اتوقع اوضفها.
مدير قسم لو چيس حب!
أنس: حب شمس لو حب شجر.
اصفن بالوجوه وهو يّضحك الموضفين عليّه بعدما
آني ضحكت عليه بعقلي وبصوت مسموع.
مشى گدامنا وهو صح متكشخ بس فد مغثه مدري آني جديد عليّه هيج نماذج تافهه، دخل لإحدى الغرف المكتوب عليها بالإنگليزي غرفة المقابلات، قسم القانون.
بالباب يوجد كراسي للإنتظار وعدة موضفين گاعدين أشر عليهم وگامو دخلت وياه والبقيه ورانا دخلو، أما الموضفين إلى جانو بالمصعد اختفوا كلمن على قسم.
من دخلت شفت مكتب جبيره وعريض والمدير گاعد ومنطي ظهره للباب مبين يدخن من الدخان إلى تارس الغرفه. ما گدرت اتحمل أكثر
شديت أيدي على ملفي و.
رُقيه: هاااااتسووو.
هي عطسه لو فضيحه أنس المهرج قهقه والبقيه وياه عالواهس يضحكون، سديت خشمي وحلگي عندي حساسيه من الدخان، اندار كُرسي المدير دفع الكُرسي شويه بعيد عن المكتب مالته ومد رجله عليها يدخن وينظرلي، استهزء و اردف
وگاع: وعليكم هااتسوو.
رجعت اعطس اقوه وانفلت لساني عليه.
رُقيه: هاااتسو طفيييي الزززفت ااالله يطفيييك.
نزل الجگاره من شفته وگام خطى خطواته بإتجاهي وگف گدامي مباشرةً ونفخ الدخان البحلگه كلهه على وجهي، متت اختنگت وعيوني بدت تحكني
وگاع: شگلج الاستاذ عزام؟ + باجر تتعودين معليش.
خله الجگاره بطرف شفته ورفع ايده يصفق بإستهزاء ويحجي موجه سؤاله للموضفين.
وگاع: يلا حبايب ئلبي اللقاء والحوار المُنتظر بين الموضفه والمدير انتهى. نبدي المقابله ولي مو عاجبه الوضع ينصرف ولا يضيع وقتنا.
بنفس الغرفه الچبيره يوجد بابين واحد للبرنده والثاني مكتوب المغسل و الWC
(Washbasin & WC)
مشيت بإتجاه الباب واني اعطس، ردت اغسل وجهي عيوني تحكني من الحساسيه واذا ما غسلت حتى وجهي يبدي يحكني هذا غير العطس، وگفني صوته وانداريت اله يأشر على باب الخروج.
وگاع: رُقيه خاتون مناك باب الخروج لا تأخرينا.
رُقيه: اعرف واندل الباب إلى فوت جمل قبلي. بس رايحه اغسل وجهي مكتوب. (Washbasin & WC) صح؟
ما انتظرته يجاوب عفته بصدمته ودخلت وآني اعطس عطسه ورا عطسه واحك رقبتي ويا خشمي اما عيوني موتتني اذا حكيتها تصير اسوء وتنتفخ.
رُقيه: أبو وگعه الله يوگع عليك مصيبه شگد حقير.
رجعت شعري ورا اذني وعفت الملف على جها، وغسلت وجهي بالماي البارد و مستمره احك رقبتي الصارت مدبكه بعلامات حمره تحت الجلد وجهي وخشمي صارت محمره عيوني بس تدمع وتحرگني حرگ اذا حكيتها انعمي بالزايد اندگ الباب وحجا المهرج.
مس هاتسوو اطلعي اجا دور مقابلتج.
رُقيه: تمام ولي والي قبلي كملو اقصد هيج.
جان يتهاوش ويا شخص ثاني رد عليه بضحكه.
اي يا ولي بس أنتي بقيتي يا ولي.
ذلني ذل يعرف بيّه غلطت عليه غسلت وجهي وهم زين متعوده ما اخلي مكياج واغسل وجهي بدون تردد. كملت ونظرت لرقبتي احمر اخذت نفس عميق ورجعت شعري گدام حتى اخفيهن.
ما نشفت وجهي عفته بالماي حتى من يضرب الهوا يبرد بشرتي وتهدأ الحساسيه شويه، شلت الملف وطلعت چآن المدير يوقع على ملفهم ويحجي.
وگاع: سالم، بالتوفيق بغير شركه، وأنت شسمك
عبدالمرزوقي رازق
عبدالرازق المرزوقي.
وگاع: الله يرزقك بغير شركة نحتاج شهادات قوية أكثر، إلى بعده مس جمانه يا جمانه ال CV مالتج حافل بالإنجازات مقبوله. وتوقيع العقد يتم من من عند المسيو أنس، بس قبلها تعاي اوگفي بصفي، على هذا ايد اقصد لا تطخيني مش نائصني ذنوب.
لااا تتشاقه شهل انسااان شهل تناقض مره عصبي مره يحشش مره يصنف مره ساكت مره يحجي مره ملتزم مره منحرف مره حقير مره محترم
وگاع: مره وحده فكري بصوت ناصي.
گال هيج ونظرلي بنظره بيها الف معنى مُربك
مديت ايدي انطيته ملف ال CV وآني اسوي روحي
ما يهمني واذا سمع، رجع ظهره للكرسي وبلش يقراء بصمت أشر للباقين يطلعو بقينا آني وجمانه
ويا أنس المهرج، إلى مد راسه يقرا الملف وياه
هذا گال مدير قسم قصده قسم التحشيش والسيرك ما؟
أنس: اي مس هاتسوو اقصد رُقيه هههه ما اتخطى
تسجيل دخولج المهم ملفج يبرق برق
وگاع: بيها هوايا رتوش.
جمانه: مسيو الرتوش كلمه بناتيه.
ميل راسه ينظرللها بطريقه غريبه طلع جگاره واني بگلبي ادعي ما يورثها. أشر عليها وحجا
وگاع: والجاكيت إلى لابستيها ك زي رسمي رجالي.
جمانه: اسفه مسيو.
وگاع: عفيه احب الناس إلى إدراكها سريع.
أنس: برو، احس ملف مس رُقيه قوي جدآ
تنفعنا بالمرافعات، . خصوصاً هي رابحه قضية فساد كُلش مهمه قبل سنه!
نضرلي من فوگ وتحت، بس لا يحكم على ستايلي هو آني لابسه تنوره رسميه سوده وقميص اسود.
وگاع: احنا هنا بشركه مو بمهرجان المتگاله شني لابسه اسود بأسود چنچ غُرابه؟
رُقيه: شنو سالفتك عقلك وين البارحه شفتني بالزياره واليوم أربعين الإمام الحسين فأكيد لابسه اسود بأسود، إذا تلاحظ انت هم لابس اسود بأسود متأكده لنفس السبب!
أشرت على دماغي بمعنى عقلك وين
نظرتله من فوگ لتحت هو اصلا لابس اسود بأسود!
واكيد لنفس السبب بس ليش يحجي هيج.
لزم الجكاره إلى جان مجهزها ومخليها على الباكيت ينظرلي بكل حقاره متقصد يسوي هيج. مد ايده اخذ الجداحه من گدامه و ورثها اخذ نفس عميق وزفر الدخان ناحيتي. ابتعدت خطوات وسديت خشمي.
وگاع: ريلاكس مس هاتسوو شبيج انفتگتي عليّه
طخت ايده بطرف الطاوله وغمض عيونه بألم توني ألاحظ اصابع ايده كلها جروح او كدمات مثل إلى ضارب شخص بقوه!
رُقيه: هسا شنو مقبوله لو مرفوضه؟
يدخن وينظرلي واني بديت احك رقبتي وخشمي.
نزلت دمعه من عيوني مسحتهه بدون لا ينتبهو الموجودين جمانه و انس.
أما هو يدخن ويزفر الدخان ناحيتي.
وينظرلي بنظره كُلها شك هذا ذكي مستحيل
تعبر عليه. اكيد كاشفني!
وگاع: تعاي بصفي خل افهمج حجايه.
طبعاً ما رحت وهذا الزقنبوت بحلگه، كرر كلامه مره ثانيه وهل مره بنتر.
تعااي بصفي خل افهمج حجايه.
تقدمت خطوتين وآني اعطس بطريقه شبه مكتومه
دار وجه ل جُمانه واردف.
وگاع: اطلعي برا ويا الاستاذ أنس هو ينطيج العقد وقعي و يدليج على مكتبج.
أنس: بلا جمجمانه امشي ورايا.
بس الماعنده كرامه يقدم على وضيفه يمكم. نظرلي واردف بعدما الاثنين طلعو.
وگاع: وأنتي يبدو ماعندج كرامه ومقدمه يمنا؟
يا بنت الطبقه المخملية!
گال هيج وگام ثبت ايده عالطاوله وخله وجه بوجهي والجگاره بين أصابع ايده الثاني
احك بخشمي وعيوني متروسه دموع بسبب الحساسيه قرب وجه أكثر وينظر لحدقة عيني.
نزلت ايدي وآني انظرله بنفس الجرأة، اردفت
رُقيه: عندي كرامه تكفيك وتكفي موضفينك.
اذا حاب اوزع عليكم! أما سبب تقديمي للوضيفه
رُغم حياتي المخملية يرجعلي! آني هنا اريد اعتمد على نفسي ما اعتمد على ثروة عائلتي، و مثل ما گلت قبل شويات احترم تُحترم
ولا چن حاجيه وياه او اصلا ما اهتم لكلامي وهو مثبت نظرته على عيوني اردف ومُتسائل او متجاهل
ان السبب هو!
وگاع: ليش عيونج مدمعه وخشمج صاير گلوپ احمر؟
رُقيه: حبيت اخذ دور المهرج بالسيرك مالتكم انت والأستاذ أنس.
واو وناااسه.
اخذ نفس اخير من الجگاره وطفاها رغم الجگاره باقيلها ما خالصه، دار عيونه بأرجاء الغرفه والدخان بحلگه، متأكده راح يتحاقر وياي.
هئه.
گال هيج وحرك راسه بالنفي ورفع حاجبه بعدم الاتفاق على تفكيري إلى سمعه، ابتعد وراح للبرنده طلع الدخان من حلگه.
عفته و دخلت للمغسل اغسل وجهي سديت الباب ووگفت گدام المرايه انظر نفسي نزلت دموعي.
وعيوني صايره حمر من الحساسيه اخذت نفس عميق صدگ ما اريد أبچي على روحي.
رُقيه: يتحاقر وياج وتأدبي انتي گدهاا دخذي نفس
دخذي نفس واطلعي انتي قويه وگدها.
رجعت شعري لورا اذني ودنگت اغسل وجهي
ما تحملت فركت عيوني موتتني من الحكه اغسل وافرك ما يفيد من گد القهر صدگ گمت إلا شويه
وأبچي بس المثل وضعي راح يفهم شنو جاي احس بسببها.
رُقيه: الله لا يوفقك بجااه حب مولانه على لفاطمه
كون الله يطلع حوبتي بيك، يمه انعميت.
لازمه عيوني موتت روحي شويه رقبتي وشويه عيوني انوب حتى وجهي گام يحكني وبدت العطسه
موتت روحي بالعطس. بهل اثناء اندك الباب واجاني صوته.
آنسه رُقيه انتي بخير اطلبلج دكتور؟
رحت للباب من القهر اضرب وادفر بي وبس احجي بگلب محروگ.
رُقيه: و إلك عييين تسألني اااييي اييي بخيررر روح الله لااا يوفقك ولاااا يسااامحك يااا ضااالم يااا بلا انسانيه كون تنصاااب بهيج حساسيه بجااه حب على لفاطمه دخيل اسمك مولاي بغلاة فاطمه عندك تطلع حوبتي بهذا الگاع.
اندفع الباب بدون سابق إنذار ودخل صافن بوجهي
او ما مستوعب الصاير بيّه اجيت أهد عليه لزم ايديه ثنينهن ثبتني گدامه.
وگاع: تمام اسف والله شمدريني صدگ عبالي دراما كوين.
رُقيه: اانت انت بس شييل ااايدك يااا مااتخااف الله شييل ايدك.
شني يعني اخليج تمدين ايدج عليّه؟
رُقيه: هااا يعني خايف بنيه تضرربك اي حقققك.
مس هاتسو لا تطلعين لسانج عليَّه رد فعلي مراح يعجبج!
خرمشت معصم ايده بأضافري وسحب ايده
بعدها دفعته وانظرب ظهره بالباب وآني گدامه احجي. طلعت كل قهري بي
رُقيه: انت اانت شااايف شگددد چنتوو سخيييفين ااانت وهذاك المهررج؟ خلييتهم يضحكون عليّه.
ويلقبووني هييج لقبببب وكله منننك منننك.
عيونه على وجهي وآني احجي واصرخ بوجه ومخليه مسافه بينا كل البدر منه تقرب فجأة لزم وجهي بين ايده.
رُقيه: ش شتسوي شتسوي بعلي اخلص عليك اذا
تغلط هيج هيج غلط وياي. خااف الله وابتعد ابتعد دأاااحجي وياك ي ياا حيييط.
شگد ما چنت احاول اسحب راسي ما اگدر، أيدي ثنينهن على ايده اگرص واخرمش بي ما ينفع، ابتعد عن الباب ودارني خلاني بمكانه سفطني ويا الباب صار أقرب.
اهدي.
شلون اهدى وهذا هيج يتمادا وياي، شلون ورطت روحي، من جحيم ناجي اجيت لحجيم ابن الأشتر.
صرت اعطس وهو وجه بوجهي حتى ما ابتعد عبالي
تلعب نفسه ويبتعد، بس ما ابتعد عطست مره ثانيه
وهل مره نزل ايد ولزم خشمي عند مجرى التنفس
همس بوجهي.
اخذي نفس من حلگچ يلا اخذي نفس من حلگچ.
سويت مثل ما گال وعيوني تحرگني والدموع بدت تنزل.
تبچين صدگ لو هذا ظمن اعراض الحساسيه؟
حجيت وصوتي تغير لأن لازم خشمي.
رُقيه: ظمن اعراض الحساسيه، شگد حقير لا تضحك!
تمام ما اضحك.
رُقيه: لااا تضحححككك
مد ايده للكلينس الموجود عالمغسل وهو مستمر يقهقه على وضعي جاب الكلينس وبإيد لازم خشمي والإيد الثانيه يمسح عيوني من الدموع
حساسيتج مُبالغ بيها.
مسح عيوني وشمر الكلينس، بعدها عاف خشمي وتقرب فتح عيوني بإيديه الاثنين بدأ ينفخ بي
ويبرد عيوني بهل طريقه دموعي ما وگفت بعدها تنزل وهو ينفخ بي، راح للعين الثانيه كذالك.
وآني صافنه بالوضع وشخصه هذا إلى صدمني وما فاهمه شي من شخصيته، ابتعد بعدما تعب او مل.
وهو يحاول يبرد عيوني بهل طريقه، سحبني من ذراعي فوگ القميص وخرني عن الباب طلع وهو يحجي ويدردم
اخاف الله بس هاي حالات خاصه وطارئه.
دروح ولي انت واسلوبك الخاص والطارئ.
رحت للمغسل اباوع بعيوني خف الإحمرار ما مرت دقيقه ورجع دخل وبإيده لتر ماي بارد.
رُقيه: مو عطشانه تگدر تطلع!
ما جاوب فتحها وتقدم صار بصفي لزم ذراعي ودارني للمغسل بعدها قبل لا اعترض لملم شعري وشمرها على جهه.
رُقيه: شهههل التمااادي ما اسمحللك.
دِسُكتي بله
نزل راسي غصب عني للمغسله وبعدها
لزم وجهي بلش يرش الماي البارد مثلج على عيوني ووجهي.
دِعايني وين شايفه ضالم يأنبه ضميره دِعايني شلون دا اصحح الفكره إلى ماخذته عني دِعايني شلون مداريچ، هاا صرتي احسن؟
خلص ورفع وجهي بوجه بثنين ايديه، حجيت وآني اگح من الماي إلى دخل حلگي.
رُقيه: وين يأنبك ضميرك ذليتني ذل عساني منعميه ولا هيچ مداريني.
وخرت ايده، عبرته وطلعت وهو طلع ورايه يدردم
انكونده مو حيالله بنيه صوچي مو صوچج.
مسحت وجهي بإيدي ورحت للطاوله اخذت ملف ال CV و فورا للباب يوضفني ما يوضفني ما يهمني.
لكن وگفت بمكاني لمن اردف.
رُقيه الجابر باجر اول يوم دوام من الساعه 1 الضهر لحد 6: م، الراتب الشهري - - - دولار.
الراتب ما يهمني إلى يهمني توضفت.
رُقيه: عود افكر اذا أقبل او لا.
لا رُقيه خاتون تجين توقعين العقد وانتي الممنونه.
انداريت اله لعبت نفسي من الوضع خل افض سالفته مو ضروري المُكابره والعناد، رجعت يمه
رُقيه: وين اشخبطلك؟
بس راشدي ما اخذتي، وقعي هنا.
طگطگ بأصبعه على مربع التوقيع نظرتله بنظره.
نفاذ صبر وأخذت قلم من الكاسه الموجودة.
وقعتله بدون ما اقرأ العقد عفت القلم وهو نظرلي
لزم القلم ووقع بصف توقيعي. قبل لا امشي قدم أوراق ثانيه. ، اردف
وقعي هذا هم.
أخذته وقريته مكتوب بالمقدمة قعد التوضيف
وقعت عليها وهو ما وقع هل مره.
رُقيه: اگدر امشي، خلصن اوراقك؟
انصرفي.
گالها بطريقه يطردني بيها عينك عينك.
خلا العقد الثاني بملفي وخلاهه بإيدي
رُقيه: والعقد الأول!
هاي تبقى يمي، تگدرين تمشين تنصرفين اي شي آنسه رُقيه الجابر
ما تهمني لا انت ولا عقدك عساها تعفن يمك
طلعت ورگعت الباب بقوه دقيقه وحده ما بقيت فورا للمصعد، طلع الاسمه أنس من قسم الإجراءات القانونية مخلي ايده بجيبه نظرلي وبعدها دخل للغرفه من بعدي.
دخلت للمصعد حتى انزل، بعد الله يعين الايام الجايه!
أريم
عمي أيهم وهلال ويا ابويا طلعو للمطار من نص ساعة، أما هدآم ف عمي رفض يرجع وياهم بنفس الرحله أصر يرجع ويانه باجر.
وحالياً ثلاثتنا گاعدين بالصاله واحد يصفن على الثاني، تگول گاعدين بعزاء، ضجت من الوضع و حجيت بمعنى اكسرو الملل طلعوني مشوار
أريم: الفااااتحه.
بكل عين صلفه اردف وهو يرفع ايده يقرا الفاتحه.
أبيل: الفاتحه على روح ذولاك.
أريم: الخرفان إلى تشويهم يوميه؟
أبيل: عفيييه بنت عمي النادر.
هَدآم: أبيل.
أبيل: نعم خويا؟
هَدآم: اللزم لسانك ولا تذب ميانه وياها.
أريم: اشلع عيونه اليذب ميانه ويايه، لا يضل بالك خويا.
أبيل: بيرفكت سمعت بأذنك يعني كلامك ماله داعي.
هَدآم: تدري شني!
أبيل: لا والله ما ادري هههه.
أريم: عركة ولد عمام مثقفين هه هه
گام هدآم وشمر گلاص الماي بوجه أبيل إلى عين صلفه ما يتأثر ابتسم ومسح وجه
أبيل: بيرفكت الاغتسال من الذنوب انصحك بيها.
ما جاوبه اخذ السويج وطلع.
أريم: شني هااااااي آنا ما ضليت حتى ابقى بالبيت!
أشر للباب إلى هدآم من ثواني طلع وعافه مفتوح
أبيل: تفضلي ديحي الباب يفوت جمل.
لزمت گلاص العصير شربت شويه منه حتى لا يشك
وفز من شمرت الباقي عليه.
أريم: الدياحه أخلاقك مو أخلاقي اعرف شلون تحجي وياي. هدااام انتظرني يا بعد اختك جاايه.
عفته وگمت ورا هدآم، طلعت للگراج توه يشغل السياره وگفت يم باب السايق وهو نزل الجامه.
هَدآم: مو أمان ابقي بالبيت.
أريم: بعدني ما حجيت كلمه وين تروح اخذني وياك مليت من البيت.
ما جاوب مبين ماله خلگ وگوه متحمل روحه مو انوب يتحملني، رفع الجامه واشرلي ابتعد
انطيته مجال وطلع ما بقى دقيقه وحده فورا اختفى من المنطقه بسُرعه عاليه ضليت افتر بالحديقة واشوف الزرعات أشكال وألوان وأنواع من الزهور مزروعه.
طلع من باب البيت مبدل ولابس ملابس كاجول
تيشيرت ابيض وقميص أسود عايفها مفتوحه، ولابس براسه شفقه، درت وجهي وهمست.
أريم: نعله على روحك.
عبر بصفي ينظرلي صفح راح للگراج طلع سيارته.
وآنا سويت روحي ما مهتمه. طلعها ووصل للباب الخارجي، شني يعني هذا هم يطلع وابقى بوحدي!
الباب إلكتروني يفتح بالريموت كنترول فتحها ونزل الجامه إلى بجهة كرسي السايق.
أبيل: تفضلي أريم خاتون انكسر خاطري عليج رغم وقاحتچ.
أريم: لا عيني تأدبت واستعدلت شوف شلون طالع وتريدني اطلع وياك چي آنا اعدل المايلات آنا.
أبيل: أنتي مو مال الرُقي.
عزاا بس لا يغير رأيه.
أريم: صح والله آنا مال رُقي وأدب من ناحيتك.
يلا لحظه اجيب موبايلي واجي.
اركضييي أريم وحگ الله هذا راح يفرفرج بس اهم شي اربح النقاش. ، دخلت للصاله شلت تلفوني وركض طلعت، طبگت الباب ورايه، وچان منتظرني، لزمت يدة الباب ما يفتح.
أريم: افتح افتح، أبيل هذا ليش ما يفتح؟
نزل النظاره شويه ومع ابتسامه خبيثه منه بعدها
اردف.
أبيل: الفقل إلكتروني يفتح بجُملة وحده مُكررة!
أريم: احجيها وفضني خل يفتح.
أبيل: لا لازم بصوت بنيه ثلاث مرات تگولين
أنتي حربايه تغير لونها.
أريم: انتي حربايه يغير لونها انتي حربايه يغير لونها انتي حربايه تغير لونها
أبيل: لا ما يفتح إلا إذا قصدتي نفسج.
أريم: أبيل لا تصير خبيث وياي وافتح الباب من يمك.
أبيل: ما يفتح من يمي، هسا يطلب منج اربع مرات تگوليها!
أريم: يعني يزداد العدد اذا رفضت؟
أبيل: ايوا يا گميل يزداد العدد.
أريم: آني حربايه تغير لونها آني حربايه تغير لونها آني حربايه تغير لونها آني حربايه تغير لونها.
أبيل: بيرفكت جانم عفيه تربيتي، صوره للذكرى
بقيت بحالة صدمه اخذلي صوره من الجامه وفتح الباب من يمه، يعني السالفه تفاهه منه. صعدت ورگعت الباب بقوه وهو هنا شغل تسجيل خلاني فاكه حلگي. طلع مسجل صوتي من حجيت اني حربايه تغير لونها.
أريم: لااااا شهللل حقاااره.
أبيل: ريلاكس جانم ريلاكس، لكل فعل رد فعل.
شغل السياره وطلع من البيت وضغطة زر قفل الباب الخارجي ورانا، زاد سرعة السيارة شديت الحزام وآني اصرخ واحجي.
أريم: مُختتل والله واحد مو ابو طگه ونص ااانت حتى نص طگه ما عننددك اذا ما اشتكيت لعمي عليك ماا اطلع اااريم بنت الباشا.
أبيل: تطلعين أريم حربايه تغير لونها هههه.
كل هذا الوقت والتسجيل على الشاشه يتكرر ضربت الشاشه والأزرار احاول اوگف التسجيل.
أريم: وگفف ااابن القندره وگف ستااااب ستااااب.
بكل حقاره يضحك عليَّه طلع موبايله ووگف التسجيل من يمه، ينظرلي ومستمتع برد فعلي
أبيل: اي أريم خاتون وين أوليج؟
أريم: احجي بشوية رُقي وأدب وياي!
أبيل: اوديج اقصد.
أريم: عفيه هيج اتعدل، اريد اشوف البحر من اليخت إلى يفرفر السُياح هذوله إلى نشوفهم بالسوشال ميديا.
هز راسه بطريقه حلوه موافق على طلبي غير الطريق وما رحنا من طريق الغابات هل مره طلعنا من طريق مختلف.
أريم: ليش ما رحت من ذاك الطريق چآ شلون نروح للميناء مو هناك البحر صح!
أبيل: هذا مو مكان سياحي هذا مكان تجاري، والبحر مُحاط بإزمير مو إلا بالميناء.
دسكتي أريم هو انتي غريبه بالمدينه لا تسوين روحج غوغل ماب. ضليت ساكته خل اشوف وين يوديني.
سيرا
كلشي حواليه ظلام بظلام او بالأصح شادين عيوني
وايدي مشدود من ورا رجعت ظهري لورا ماكو شي وراي، زحفت و رجعت بعد أكثر، انظربت بشي مثل العامود يبدو شادين الحبل بيها، ادير راسي حوالين نفسي بلكت التقط صوت أو شي وچان اسمع صوته يون
سيرا: إيمار انت وين إيمار تسمعني جاوب إيمار شادين عيوني وينك احجي
اشتكى من ألم رقبته وراسه بعدها ناداني وهو كذالك يتسأل
إيمار: سيرا شادين عيوني، وينج خوما بيج شي.
سيرا: لا ما بيه شي بس گُلي على كرسي لو بالگاع مثلي؟
بنت المافياچيه شلون تعرف بكل سوالف الخطف، بالگاع ومرجع ظهري على عامود وراي.
سيرا: الله ومحمد وعلى شاهدين مالي دخل بيهم
بس الواحد لازم يكون ذكي بهيج مواقف مد رجليك وآني أمد رجليه الحبل طوله بيني وبين العامود حوالي ذراع واحد.
آني هم الحبل من ورا طوله اقل من طول الذراع. بعدين شني أمد رجليه ي بنيه؟
سيرا: لا تصير فاهي خاف قربين من بعض نتساعد شبييك.
مو فاهي وإنما مليش دخل السكه دي.
الافندي يحجي مصري أكثر من العراقي والله يا الله، مديت رجليه گدام وزحفت بنفس گعدتي ماكو شي گدام درت على يساري هم ماكو شي باليمين سمعته يصييح.
بنننت الجحححش رجليج ويين.
سيرا: م ماادري يمعوود انت عاليمين گوم اگعد
شني اگوم اگعد ما اگدر الحبل مشدود وماكو مجال.
سيرا: چا ازحف ليمي.
تحلمين ازحفلج.
سيرا: ياربي احس راح انجلط منك آنا ازحفلك
بس شكد ما تگدر اقترب.
اها دگولي اقترب شني هل مُصطلحات.
سيرا: حسناً من الآن فصاعدا اتحدث معك بالفصحى عبن انت مثقف ما تفهم لهجتك الأم
لهجتي الأم تُركيه.
سيرا: لهجتك الأب شگد تللححح.
حاولنا نوصل لبعض واحنا على ركبنه حسيت وجهي بوجه من انفاسه.
أگُلج سيرا.
توترت رغم ما شايفه شي ضلام وبس انفاسه تضرب بوجهي، جاوبته.
سيرا: ها اسمع.
اشش اثبتي.
حسيته صار أقرب من وجه لامس خدي بعدها حسيت بشفته على جانب عيوني عرفت يحاول ينزل الوصله من عيوني بهل طريقه، حجيت وآني توني احس بخطورة إلى احنا بي.
سيرا: إيمار اذا صار عليَّه شي من وراك ما ابريلك الذمه بسببك آني انخطفت وهسا امي گلبها نار عليَّه ما ابريلك الذمه اذا قتلوني.
جرب بالجهه الثانيه بس الوصله مشدوده بقوة.
وهو مستمر يحاول ويحجي بهمس.
اشش سيرا طرگاعه من شوگت هيج تخافين.
وروح أمي الماعندي أغلى منها، ترجعين لأمچ وأنتي سالمه.
وجه اليطخ وجهي وشفايفه إلى تلامس طرف عيني وهو يحاول ينزل الوصله من عيوني، لآخر مره شد أسنانه عليها ونزلها من عيوني، فتحت عيوني شويه شويه والصوره بدت تصير واضحه گدامي وجهه بوجهي وعيونه مشدوده بوصله سوده اردف بنفس القُرب.
لا تصفنين بوجهي وسوي مثل ما سويت.
سيرا: ها لا ما اصفن بس.
بدون بس بدون بطيخ.
سيرا: تمام لا تهوبز وتعال.
شني تهوبز سيرا گوه لازم روحي على اسلوبج شهل مُصطلحات!
ما جاوبته تقربت وآني محتاره هذا ما يستحي وعادي هيج تقرب، بالعربي اتراك ما عدهم عيب او حرام
سيرا: ربي إنها حالات خاصة وانك شاهد بما في نفسي.
ليش تحسسيني وكأنه گتلج بوسيني شيلي الوصله من عيوني ترا خلص صبري من الوضع.
سيرا: تمام أنچب شگد ما تستحي وتحجي بالقلم العريض، شويه نزل راسك هذا عُنق بشري لو عُنق زرافه.
حرك راسه على اليسار وعلى اليمين.
بعدها تدنى شويه
وروح أمي بس لو ما إيدي مشدوده.
ما جاوبته تقربت من جانب راسه غرزت اسناني بلوصله وهذا عاط.
شني تعضيييني مو وقت تاخذين حقچ الباطل
بهل حقاره، خل نطلع واوعدچ نتواجه.
سيرا: دروح ولي ما عضيتك اريد انزل الوصله مشدوده حيل شو دير چهرتك خل أجرب من الجانب الثاني.
ها يلا ليش صافنه هسا يجون ونروح بستين داهيه.
سيرا: عزاا بعينك إيمار لابس ترچيه!
سيراا مو مو شمسه مو ترچيه.
سيرا: وحده منهن واگعه ابو ترچيه.
هيي بسس وحددده سيرا شلعتي گلبي ليش هيج تسوين ساعدتج وساعديني شعليج بالباقي!
عدلت گعدتي واحس أيدي تورمت من الحبل
تقربت احاول اسحب الوصله وتقريبا صارت مرخيه
رحت للجهه الثانيه كذالك شديت عليها ونزلتها
فورا فتح عيونه وآني بوجه غمض متألم بعدها
رجع فتح عيونه وينظرلي
مابيج شي!
سيرا: ايدي احسها متورمه، ش شوف المكان شگد يخوف.
سيرا.
جنت اعاين بالمكان إلى اشبه بمصنع حديد بس قديم ومهجور نظرتله مثبت عيونه على ملامحي.
لا تخافين، صح آنا مسالم وما لازم مسدس بحياتي بس اوعدچ نطلع منا وتوصلين لأمچ بخير وسلامه.
سيرا: ما شوف الشجاعه بأنه الواحد يزلم مسدس
إيمار آني ضد أعمال ولد عمامنا ضد استخدام السلاح حتى رفضت اتدرب مثل أريم وعزه وهلال.
و.
ما لحگت اكمل كلامي، لأن صدى صوت الدراجه الناريه تدوي بالمكان، انفتح الباب چبير ودخل صاحب الدراجه من قوة الضوء برا ما مبين منو هذا
انغلق الباب.
و الدراجه وگفت أمامنا والصدمه صاحبها بنيه لابسه صايه سوده وكعب عالي والخوذه براسها
آني وإيمار ننظرللها اول ما خلت رجلها بالگاع
نزلت وگفت بشكل مثير واردفت
---: أصغر ثُنائي من بين بنات وأبناء بيت الباشا.
جميل جدا جدا لحظات رومانتيكيه صارت بينكم
واو حبيت، أبن الأيهم مع بنت الجوكر الأدهم
أبن أبوه ذكي جدا من فكر يفتح عيونج بهل طريقه، واو احب هاي السوالف.
سيرا: چي طايح حظها مثلج يا بنت الطايح حظه.
يااا نعاااله من وين طلعتيلنا شتريييدين مناا!
افترت حوالينا واحنه بنص المستودع وكل ما تكمل فره يتوضح، شخصها! وستايلها الحقيقي.
اجت وگفت گدامنا و نزعت الخوذه، طلعت بنيه
بملامح مُثيره وقويه اول مره اشوف هيج، شمرت الخوذه وهي تحجي.
وَسن: طلعتلكم من قعر الحجيم يا حلوين.
فتحت سحاب الصايه بالكامل الصدمه، لابسه تنورة جلد اسود وضيگ طوله فوگ الركبه بشبرين كلش گصير، نزعت الصايه وهي تشكي من الحر ضلت بالفانيله التعلاگه لونه اسود ومصلخه
بالكامل.
وَسن: ها يا حلو.
انداريت إيمار ينظرللها من فوگ لتحت.
أول ما شافني همس شي، چآ شگد سرسري، انتبهنا للحيه وهي ترجع شعرها السرح لورا ضهرها وتحجي.
وَسن: اي أبن الباشا فضفضلي.
إيمار: لا بيبي لازم شويه خصوصية ماكو غرفه منا منا؟
سيرا: شگددد سرسررري إيمااااار.
إيمار: شكو بيها شبيج.
خطت خطواتها بإتجاه كنبصت وهي مصللخه تصللخ بس لو إيدي توصللج!
نظرتله بطريقه وبنضرات وسخه، تلامست اذنه البيها ترچيه مدري شني هي.
وَسن: واو ستايلي.
گامت راحت لإحدى الخزانات النفطيه جانت محطوطه عليها اغراضنا موبايلاتنا والشال وشفقة إيمار، جابت الشفقه كنبصت وخلته على راسه بالطريقه الصحيحه وابتعدت تنظرله.
وَسن: اخوك شيگول؟ اهاا تذكرت بيرفكت بيرفكت.
سيرا: شتريدين منه والحيه سجى شترررييد.
وَسن: سجى؟
إيمار: عوفي البنيه اذا شغلج وياي.
سيرا: واذااا شغلها مو وياااك عااادي ما تعوفنييي؟
إيمار: لا هياتم ما گلت هيج.
وَسن: حبييت سبايسي. أدخل.
من گالت ادخل اختفى ملامح المزح و ظهر ملامح الجد رفعنا راسنا للباب إلى دخلو منها ثلاثه زلم نفسهم إلى خطفونا. ثلاثتهم مقنعين بأقنعة عليها جُمجمه، واحد منهم طويل والثاني لابس تيشيرت ابيض نص ردن ويده ملفوفه بشاش. تقدم الطويل
واردف.
ناجي: الحلوه قياساتي والشعر گصير نايس.
وَسن: اييع ذوقك رديء.
اجا الثانيه كنبص گدامي لزم وجهي
نَائل: اليوم نشوف اخوج يفديج بروحه ومستعد يسلم نفسه لو.
ناجي: نلعب شناوه بيها ههه.
هي صرخه او زلزال صوته هز المكان عاط بيهم
وگدر يگوم على حيله اول ما گام الحبل انگطع
إيمار: اااانت بس جرررب تطخ شعره منهاا
مرر ايديه الجانت مشدوده من ورا تحت رجليه!
وصارت گدام شلون سوا هاي الحركه ما افهم وگف عقلنا كلنا هد على إلى حجا هيج ضرب كلّه لكن الثاني لزمه. الثالث يضربون بي.
ناجي: ااابن الكلب طلعت مو سهل عبالي فقير ومالك دخل بهيج سوالف.
نَائل: أول وتالي ابن الأيهم.
سيرا: يااا حيواااان لا تضررربو إيمار گوووم گوووم لا
تستسلم.
وَسن: حرامات بطلچ مو مثل باقي ولد عمامج
هذا مو مال يحميج يلا شباب كملو.
إيمار ايده مشدوده وهذوله هدو عليه يضربو بدون رحمه اجا إلى لابس تيشيرت ابيض مقنع ما اگدر اتعرف عليه حتى صوته متغير بسبب القناع.
فتح إيدي وگومني الچلبه چانت شاده السلاح على فخذها طلعته من الحزام سحبت أقسام وشمرته عليه وهذا، خلاهه براسي يهمس يم اذني.
نَائل: ربما انتي ضحيتي القادمه؟
نظرت إيمار مدمى بين ايدين هذوله وهذا لازمني
ومقيد ايدي ويهدد. حجيت وآني مو خوف على نفسي خوف على إيمار
سيرا: إيمار گوم إيمار بداعة أمك المرحومه گوم.
صارو يضحكون بإستهزاء وإيمار لا حول ولا قوة
بس گدر يوگف على رجليه وإيده مشدوده.
ناجي: اويلي بنت الادهم تگول عنها مرحومه.
كلما گلت ضعيف وما يگدر، يفاجئي خاصة من
لزم واحد منهم ورگع راسه بالعامود فورا غرگ بدمه.
اما الثاني اندارله واجته كلّه بعدها مرر ايده وقيده.
رغم ايده المشدوده اردف بأذنه.
إيمار: لسانك الجاب طاريها اگصه وادوس عليه.
أمي خط أحمر، يم طاريها ينتهي حياة كل شخص يغلط عليها.
الچلبه گاعده على الدراجه مالتها وتشاهد وهذوله الاثنين يحجون
ناجي: شبيييج اتصرررفي!
نَائل: هي طلقتين واحد لأبن الأيهم والثاني لأبنة الادهم وبح the end. تصرررفي
وَسن: أعصابكم نونات زلم چيس حب بنيه و شاب ما تگدرولهم؟
اختنگت خنك من ايد هذا الحقير وإيمار محتجز الثاني سحبه لورا خطوتين واردف.
سلملي عليها.
سيرا: يمااا عفييييه.
ما ادري كسر رقبته او سواله شي بس وگع من طوله مغمه عليه، وهذا منا يسحبني لورا وإيمار يفتح حبال إيده بحلگه. عبر على واحد منهم اخذ السلاح.
نَائل: اخلص عليها لا تتغابى
إيمار: اخلص عليها لا تتغابى!
گال هيج و وجهه المسدس على البنيه إلى أصلا ضاربه الوضع بعُرض الحايط گاعده وتشاهد.
نَائل: تسوي فضل اذا تخلصني منها.
إيمار: ها يا حلوه چلابچ باعوج.
وَسن: افاا.
إيمار يتقدم بإتجاهي وهذا يسحبني وياه ويغني بكل حقاره
نَائل: قال أرنب لأمو تسمحيلي روح ألعب ماما
قالتلو لاء يا ماما يمكن يجييك الثعلب.
وَسن: ههههاااي. گايز هذا لونه المفضل هو الدم
واسلوبه التوهين!
سيرا: إيمااااار.
هي لحظات والي چآن غايب عن الوعي گام وخنگه من ورا سحب المسدس وضربه. لزم راسه إلى بلش ينزف ونزل على الأرض.
سيرا: إيمار إيمار شييل ااايدك شييل يااا ااانذااال
شتريدوون شتريدوون.
وَسن: يلا عوفها.
نَائل: لا تصيرين ثوله!
گامت وگفت وخطت خطوات سريعه بإتجاه
الي ضارب إيمار اخذت السلاح منه، وجهت على هذا
وَسن: استعدل عزيزي استعدل. وعوف البنيه تجي تشوفه.
رخى ايده، هذوله منو وليش واحد يهدد الثاني والكلمه كلمة البنيه عافني وركضتله تعثرت بالصايه إلى لابسته بس كملت وكنبصت گدامه رفعت وجهه بإيدي وانهاريت أبچي وهو شبه دايخ من الضربه والدم نازل بطوله.
سيرا: ش شووف شصار بيك گتلك أكو ناس ناس يأذوووك.
آسف سير ا آسف.
سيرا: إيمار إيمار عاينلي.
رفع راسه ينضرلي بعيونه العسلية بعدها خلى راسه على كتفي رفع إيده للباب إلى انفتح وهمس اخر كلماته. باللغتين.
أمي، Annem.
رفعت انضاري ويا ايده إلى مأشرها للباب، عيوني وسعن، الدم وگف براسي من الشفته.