رواية ولد الباشا للكاتبة فاطمة الأحمد الفصل الحادي والستون والأخير
قبل ليلة نهاية السنة 2023- بأسبوع
وَسن
حچيت وآني اصك على سنوني اريد اتمالك نفسي ما اتخبل عليه وهذا گاعد يتريگ واعصابه ابرد من القُطب الجنوبي
وَسن: بسس فهمنيي شجااابك شجااابك؟
جابني الشوگ، شجابني چا غير هاشم جابني.
وَسن: بااوعلي حُبي خل احچي، مو وگت تتزقنب بااوعلي
اسمع بأذني مو بعيوني
وَسن: اي شي. اااي شي هاشم يطلبه ما تسويه!
مو مثل يوم المحاكمة من گلك تعال أشهد بمكان نائل
وانت اجيت شهدت!
يگلي إمشي أمشي يگلي اوگف أوگف
چا شسوي اسمع كلامه ابويه الغالي.
وَسن: خاب ما تنچب كلنا نعرف انت شگد تسمع كلامه
والله لو يدري بيك شمسوي وشلون تالي الليل تطلع!
عاف فنجان الچاي وخوزرني
وحضرتچ تراقبيني؟
وَسن: واحد واحد اراقبكم اعرف وين تروحون وين ترجعون. خاصة أنت! هذني النظرات البريئة بطلهن عيونك الخُضر الحلوات اليقشمرن هاشم ما يقشمرنّي!
اووه يا إلهي شهل تغزل من صباحية الله.
تلاشت ابتسامة الإستهزاء على وجهه وعيونه صارن حاده نظرلي ب تَمعُن اردف.
لا توگفين بطريقي ترا آنا من ابتلي بيچ انهيچ.
وَسن: ما واگفه بطريقك بس انت جاي تساعد هاشم!
ما يخصچ.
وَسن: مااا يخصني شنووو؟
يعني ما يخصچ الجميع يُدرك ما يفعل.
رجع يتريگ، هل إنسان اعصابه أبرد من الثلج
إجيت احچي دخل هاشم لغرفة الطعام مبتسم مر بصف كرسي AXR خلى ايده على كتفه. گله بالعافيه! والعينتين، ابتسمله وگال
الله يعافيك.
بس چنه جفص لأن هاشم گعد ونظرله
هاشم: عيد شگلت؟
الله يعافيك؟
هاشم: ذكرت اسم الله!
چا منو يعافيك ويمرضك؟ اها علمود ذاك لا تخاف ما اتسودن عليك هو مو وياي هسه
هاشم: آنا مو گتلك انتبه على حچيك؟
گتلي. و آنا گتلك هوَ مو وياي
هاشم سكت لأن AXR فضيع بالأجوبة ومن يحچي
يخلي علامة التركيز على كلامه وعينه بعين هاشم ما يخاف. انوب ردت اگوم هاشم ما خلاني
هاشم: اگعدي خل احچي وياچ عبالچ تمشي عليّه!
تمشي بصفك.
هاشم: أنتَ انچب.
سوا حركة بإيده بمعنى خلص انچبيت. واني نظرت لهاشم
وَسن: من الاخر؟
هاشم: باچر نزور جاسر.
وَسن: وليش تزوره! أوراق الطلاق وكلهن وقعتهن!
هاشم: أنتِ وقعتي بس جاسر بعده!
انطوني الأوراق آنا اجيبن توقيعه.
هاشم: لا تحط خشمك بشغلي
احط رجلي بي.
هاشم: گووم من وجهي لا ااانعل أبوك.
ابو يلعن نفسه جديده هاي. ديلا طالع وتلگوني افتر بالبصرة للمسا ما ارد للبيت لحد يخابر.
هاشم: البس مثل الأوادم هاي مو أوربا.
اصلا ما جاوبه وطلع وهو بطرگ فانيله رياضية بس هنا بالعراق يگلوله تعلاگه. هاشم نظرلي
وَسن: محد گال عوفه يصعد على متونك. انت تنجاز
عفته وگمت اطلع صاح وراي
هاشم: لا تنسين باچر!
سكتت وما جاوبت فورا طلعت من البيت بوجهي على بيت نائل دگيت الباب وفتحلي شافني آني ما گال شي دار وجه ومشى اني دخلت وراه سديت الباب
وَسن: بيك شي؟
انتبهت لحالة البيت لمن الگزاز انكسر تحت الكعب.
اباوع حوالية كله رُكام البيت متدمر نظرت لطوله مبدل ملابسه وسابح. مشيت وراه وعرفت اكيد البارحه متخربط!
وَسن: چآن خابرني شلون هيچ متخربط. نائل اندارلي احاچيك.
اندارلي شويه وبعدها دخل للصالة وخر بقاية گزاز المزهرية على التُخم وگعد مريح ظهره نظرلي وگال
نَائل: شجابچ؟
رحت گعدت بصفه سحبت إيده عليهن آثار جروح
مسحت عليهن
وَسن: آسفة البارحه ما چنت وياك من صار بيك هيچ.
نَائل: عليش تعتذرين ماكو داعي.
وَسن: نئووول!
حاوطني وگال
تمام ما بيّه شي أنتِ شجابچ؟
مصيبة جديده
شنهي؟
هاشم گال نروح للسجن ويريد جاسر يوقع على أوراق الطلاق.
علي شني ناوي ابوچ المگرن؟
يدمرنه نهائياً.
شوكت تروحون؟
باچر
آنا بعد باچر زيارتي ل ناجي.
خليها على باچر واريدك تساعدني
نظرلي كأن افتهم قصدي
مستحيل يتدخل.
صدگ چذب؟
اي صدگ.
نظرتله ذيچ النظرة المشكوكة
نَائل: هو تحت امر هاشم صعب وإذا گلت ساعدني يروح لهاشم يگله.
وَسن: شنو يروح يگله بكييفه؟
نَائل: لاحگ صديقه. جانونة AXR.
وَسن: ما تضحك.
نَائل: وراس بنتچ.
وَسن: نااائل لا تحلف براس بنتيي!
گام وهو يضحك ويمشي بالصالة اللي عبارة عن رُكام
انوب طلع وآني لحگته شفته صعد للطابق الثاني رحت وراه. هو مستمر يمشي بالممر بإتجاه نفس الغرفة
اندار شافني لحگته ما گال شي دار وجهه فتح الباب وطب للغرفة عافلي الباب مفتوح يعني اگدر اطب وراه لمن لحگته للغرفة وگفت بالباب بلعت ريگ من منظر الغرفة.
بُقع الدم ناشفة عالگاعية وعلى الحيطان صور صفاء كلها كلهاا دم وملامحها الچانت مرسومة بالابيض والاسود متلونه بالدم! وصايرة احمر
نظرت ل نائل اللي يخطي خطواته بإتجاه أكبر لوحات صورها اللي واگعه عالارض وملطخة بالدم. اردف
معقولة ماكو طريق يجمعني بذيچ التشبهها.؟
وَسن: نائل دَ افكر بالسالفة واحلها صدگني.
مشيت بإتجاهه بهدوء اتجنب ادوس على الگزاز واللوحات اللي كلهن صور صفاء! اما صور امه ما بيهن شي نظيفات وبمكانهن اما صور صفاء مطشرة بكل ارجاء الغرفة وكلهن ملطخات بالدم!
شتحلين؟ هاي البارحه اجيت بس اشوف صورها
شوفي شمسوي بيها شايفه الدم المالي صورها لو ما شايفه؟
ليش بس صورها؟ يعني هذا إشارة واضحة هذا الملعون يريد يگتلها ويطفي اخر شمعة بدربي!
كنبصت شلت صورتها ملامحها وعيونها الحادة الما تخاف.
كلهن مثل عيون ذيچ البنيه التشبهها سبحان الله!
اخذ الصوره من إيدي وبلش يلملم باقي صورها
نَائل: اعرفيلي اذا صفاء عدهه اهل بالعراق اريد ادور وراها
وَسن: أي صفاء هم عدهه بيت عمامها بكربلاء.
رفع راسه نظرلي گام والصور بحظنه راح خلانهن عالميز واجا وگف گدامي
البنيه التشبهها هم بيت عمامها بكربلاء!
اي لاحظت هاي الصدفة!
عوفچ من البنيه اللي تشبهها وگُليلي!
نائل!
تندلين بيت عمامها او بيتهم هي وأهلها؟
شتسوي شتگول!
ما ادري شراح أگول بس اريد اشوف شلون چانت عايشه صفاء قبل لا تهاجر من العراق!
شراح تستفاد.؟
لزم ايدي وگال
استفاد أنتِ ما عليچ. امشي وياي للآخر
يمعود شلون معليه. ناائل
امشي خل نروح لكربلاء. وخابري الدايح المصلخ اخوچ خل يلحگنا
يجرني جر وياه طلعنا من الغرفة البيها وقفلها اخذني للغرفته عيونه تلمع متلهف يعرف شلون چانت عايشه صفاء! راح للكنتور وآني واگفه اشاهده ديريد يختار لبسه
نَائل: هذا لو هذا؟
وَسن: الأسود.
تمام قميص اسود والبنطلون هم أسود لو هذا؟
البيج الرملي.
اختاريلي ساعة تلوگ وياهن لبين ما ابدل.
دخل للحمام يبدل تحت نظراتي المستغربة حچيت وآني اختارله ساعة
وَسن: راايح تخطب خوما رايح تخطب.
بدل وطلع، يگول
رايح اتعرف على عمامها خوما اطلع مبهذل
مرات استغرب من شخصيته رغم كلشي
يعيشه من انهيارات داخلية إلى أنه مهتم بأناقته وما يطلع اذا ما يتأنق على اخر حبة
انطيته الساعة ولبسها بإيده. عدلت ياخة القميص.
بعدها تچتفت اباوعله وهو مخبوص
ومستعجل يريد يكمل ونطلع
نَائل: زين بيت خوالها وين؟ خالها هذاك شچان اسمه؟
وَسن: عماد ابو كرار. بيت خوالها من بغداد وخالها عماد بعده بالخارج ويا عائلته.
نَائل: تمام اشوف سالفته لمن نسافر. كملت امشي.
شال موبايله عبرني وطلع. انداريتله وگلت
وَسن: شراح نگللهم إذا رحنه لبيتهم؟ نگللهم بنتكم ماتت على إيد كيان ملعون متجسد بهذا الواگف گدامكم؟
اندارلي ملامحه بهتت والموبايل بإيده يشد عليها
عيونه ما ترمش وبيهن الف سؤال بلع ريگ وگال بحيرة
إذا رادو ياخذون بثارها آنا بين إيديهم، حقهم.
نَائل.
تقدمت وگفت گدامه لزمت ايده
ما حچيت هيچ حته انت تنقهر آني حچيت هيچ حته تكون جاهز لكل السيناريوهات. بس مال تسلم رُگبتك ألهم لو اموت على إيدهم ما اخليهم يأذوك!
سحب إيده كأن حاس بالخذلان. گال
أنتِ گلتي اذا رحنه شنگللهم وأنتِ تردين تمنعيني بهل كلام!
نائل لاا تفسر كلامي بكيفك اني جاي احچي وما اريد تتأذى شعدنه ويا بيت عمامها عوفك منهم!
حطيتها براسي اروحن يعني اروحن. تجين وياي لو لا؟
بلة شلون تلگى بيتهم؟
أنتِ دليني!
ما اندل. كل الأعرفه هُمه بكربلاء!
بدون چذب!
ما اچذب! وعلى فكره ما تگدر تطلب مساعدة لوسي بمأنه يموت من طاريها ويريد يقتلها!
بقى ساكت. وآني حچيت حچي ما لازم احچي وما يعبر عليه خاصة لمن لگفها ونظرلي نظرة شك.
نَائل: صفاء ماتت، و هذوله بيت عمامها لوسيفر ليش حته يأذيها اذا صفاء ماتت من الأساس؟
وَسن: أعني بكلامي أنه يأذي عمامها.
نَائل: دقيقة أكو شي غلط، هو ماله شغل بعمامها خلص عليها وانتهت السالفه فليش حته اليوم تگولين يريد يقتلها لو تقصدين الشبيهة لو عمامها؟
من التوتر ما ادري احچي اسكت
نَائل: هسه غير تحچيين؟
وَسن: شجاب عمام الشبيهة على عمام صفاء امشي جايه وياك. امشي.
لزمت زنده وأمشيه حته ننزل وانهي سلسلة ربط الأمور عنده. وهذا يريد يفهم!
نَائل: شگره ترا نتخاارب اذا ضامة عليَّه شي!
وَسن: شنو اضم عليك، لا تأخرنا مو تريد تروح لعمام المرحومه يلا امشي.
طلعنا من البيت عالگراج صعدنا بسيارته وهو بس يتوعدلي اذا چنت اضم شي او چذبت عليه. شخط السيارة
وآني طلعت موبايلي نظرتله چآن يسوق وعيونه الطريق
فتحت الموبايل دخلت للمحادثات بيني وبين المصلخ على گولة نائل. كتبتله. -(ويينك؟ ).
لحدما جاوب مر أكثر من عشر دقايق دخلت بمحادثة وياه
وَسن: ويينك؟
اتمشى بالبصرة القديمه جميلة جداً مال سياحة.
تسيح بجهنم وتديح بيها ديااحة. تلاحگني احنه بمصيبة
أنتِ بوحدچ لو تحديد الكل؟
آني، أنتَ، انتوا، كلنا، ولك نائل بصفي واحنه رايحين لكربلاء
وين صايرة هاي؟ خل اجي اسيح بيها.
ما تعرف كربلاء وييين لعد شلون تگول هي من كربلاء شلووون؟
ناسي وحگ ابن عم الرسول
انت مو گلت هي من كربلاء!؟
اي گلت، يعني كربلاء، بالعراق العظيم؟
حُبي لا تلعب بأعصابي!
شني متفرغلچ وألعب.؟
نظرلي نائل وآني بس اكل بشفايفي من العصبية
نَائل: ياهو تراسلين؟ شبيچ؟
وَسن: هذا هذا الدايح المصلخ AXR ديگول جاي ورانا
نَائل: اي تمام گليله لا يتأخر
وليش معصبة؟
وَسن: أوك. ما معصبة آني بقمة هدوئي بس دا افكر بسالفة ثانيه، دير بالك عالطريق.
دار وجهه يركز بالطريق ويقود بسرعة اما آني ف رجعت للمحادثة واقرأ داز رسالة ورا رسالة راح انجلط شكاتب!
جاي لكربلاء.
وگت يطلعلنا بالطلايب؟
بس تدرين تاليته يعرف!
ترا خوش فكرة خل يعرف ونعرس سوا؟!
كتبتله وامد بالكلمات واريد اطلعله من الشاشة على هل ردود المستفزة
وَسن: إذا بسببك نتخارب اني ونااائل ازفففك بالكفن على وادي السلااام.
من اسمه حسيت راح أرقُد بسلام.
دزلي إيموجي الجمجمة وكتب بالفُصحى.
لا تقلقي لن يكون هناك أي فوضى سَ أحلُها.
قفلت شاشة الموبايل ونظرت لنائل ابتسمت من بين نظرات التوتر والصمت سيّد المشهد. لحدما وصلنا لكربلاء اخذ اااكثر من ثلاث ساعات رغم يقود بسرعة
وگف السيارة بجانب الطريق بنص المدينة، نظرلي وگال
نَائل: دليني بيتهم.
وَسن: بيتهم. گتلك ما اندل!
اي بيتهم چا بيت مَن. أعرف أنتِ تندلين
دليني خل اكمل ونوصل
ما ادري.
شني ما تدرين تقشمريني لو شني.؟
أعصابك دَ اقصد اني ما اعرف انطيك العنوان يعني ما اعرف الا لمن يجي AXR هو ينطيك العنوان بالتفصيل!
شني انتظر ابن المگرن؟ وأنتِ؟
آني الأعرفه. الأعرفه هو بيتهم بكربلاء بس وين بالضبط هذا AXR يعرف.
اباوعله وهو يباوعلي. ما واثق
نَائل: شگره اذا طلعتوا تچذبون عليَّه بفد سالفة انعل أبوكم.
وَسن: أوك.
درت وجهي اتجاهل النظر أله، ولا اگدر اخاطر بحياة البنية. نائل و لوسيفر اذا عرفوا حقيقتها يعني الخبر راح يوصل لهاشم وهاشم ما يبقيها قربية من نائل. يخلص عليها!
بعد ساعة كاملة من الإنتظار.
اندگ هورن سيارة وگف ورا سيارة نائل
نظرت من الجامة، السايق نزل وچان AXR مبدل.
ولابس اسود بأسود. الربطة اللي متعود يتلثم بيها شادها على معصم إيده، اجا وگف گدام باب السيارة دگ على الجامة وآني نزلتها، نظرلي بعيونه الخضر نظرات اشبه بالخزره ونظر ل نائل. اردف
تريد تروح لعمامها؟
نَائل: اي بيتهم وين!
في دَرك الجحيم.
احچي وين بيتهم وبعدها ولي ارجع للبصرة.
اگعد واستر على روحك الخايسه شني تريد يذبحونك؟
روحي الخايسة آنا حُر بيها أنتَ شعليك؟!
غير احبنك واخافن تروح من عندي.
اصعد ودليني بيتهم.
جاي بسيارتي ما اصعد وياكم. أللحگني ودير بالك أكو ازدحام
شافني ساكتة واستمع لكلامهم. ابتسم بهدوء
ومد إيده گرص خدي بقوة بحيث خوزرته وتألمت
شدعوة مصفرة، ريلاكس.
وَسن: شييل إيدك.
مسحت خدي وهو راح صعد بسيارته، انتبهت نائل ينظرلي بنظرة واضح عنده حچي
وَسن: شكو.
نَائل: ماكو شي.
سيارة AXR عبرتنا ونائل شخط سيارته يلحگه.
من منطقة لمنطقة يمشي ورا سيارته إلى أن وصلنا للمنطقة البيها بيت عمامها وبيت ابوها. لكن AXR افتر على غير منطقة. نائل لحگه وآني الف علامة استفهام على وجهي.
AXR شجاي يسوي معقوله يلعب بينا؟
لو هو اتلاحگ وحلها بطريقته! دخل للمنطقة الغريبة! وبعيده عن منطقة بيت عمامها. وگف سيارته واحنه هم بصف سيارته، نائل نزل الجامه يحاچيه
نَائل: بهاي المنطقة؟
عيونه عليّه وعلى نائل. جاوبه
اي بهاي بس انزلوا خل نحچي ونتفاهم.
نزلنا وAXR مبين مرتب السالفة. گال
ما تفُك حلگك بحچاية.
نَائل: وبعد.
ولا تجيب طاري المرحومه صفاء
نَائل: كملل.
انروحن گدام بيتهم ندگ الباب نگللهم
نَائل: احچي أسرع ذليتني ذل نجدي الحچي مننك. مجداية احنه!؟
لا احنه ما نجدي احنه ننطي.
وَسن: اي احم شنگللهم؟
نگللهم جمعية خيرية نشوف شلون حالة البيت وننطي مبلغ مالي على هذا الأساس. وهيج نطرح الأسئله اللي نريدها ونسأل عن أبوها الأسمه المهدي
نَائل: خوش سيناريو.
ونروح مشي نعوف السيارات بمكانها.
تمام. امشوا
اخذو السويچ وقفلو السيارتين
نائل مشى گدام، أما آني ويا AXR بالخلف نحچي همس ونلحگه
وَسن: شسوويت!
ذوله مو عمامها ذولة ناس حالتهم الماديه صعبه و من تأخرت ساعة عليكم چنت افهمهم شلون يحچون ويتصرفون، وگلتلهم
وَسن: شگلتلهم!
وگف نظرلي عيونه تتحرك يمين يسار وشبه مبتسم على دهاءه
وگلتلهم راح يجوكم شخصين بالأمم المتحدة.
بنيه شگره وعدهم جمعية خيرية. العليكم تگولون شراح احچيه ألكم.
نائل انتبه احنه واگفين، صاح علينا وگال امشوا لا تأخروني، گلنا جاين. كملنا مشي وراه، نظرتله وهمست
وَسن: أنت في قمة الحئارة بس گود مان، براو.
چآ شسوي تهديدچ خوفني، فكرة الموت مُخيفة وآنا لم أُسلِم بعد.
ما جاوبته. ولحگنا نائل وAXR صار يمشي وياه
ويدليه على وحده من البيوت القديمة وصلنا امام باب البيت
هذا البيت بيت عمها الچبير. شچان اسمه!
موزهر هزمر زمهر هيچ آسم
وَسن: اسمه مزهر.
نائل مطنشنا وتقدم دگ على الباب بقى يباوع بالمنطقة الشعبيه والقديمه، اندار علينا وگال
نَائل: اشو ما يفتحون الباب متأكد هذا البيت؟
اي متأكد دگ بعد دگ
رجع دگ الباب شوية وهل مره سمعنا صوت طفل يگول منو! AXR نظر لنائل وگله بضحكة
الكلمات السحرية مال العراقين گول آنا خل يفتحولنا.
نَائل: على شني تضحك. بطران.
طبيت بينهم ورحت گدام الباب دگيت وحچيت
وَسن: حُبي افتحلنا الباب.
فتحلنا الباب چآن طفل مبين بعمر الابتدائيه باوع بينا واحنه نباوعله، AXR گال.
ها ولك قشمر سمعت صوت لييدي فتحت بساع!
نظرلي ونظر ل AXR وگال
عمو أنت ياهو من وين جاي!
من أزقة الموت. من دَرَك الجحيم.
خطيه الطفل اخذله صفنه. AXR ابتعد انطى مجال ونائل عيونه علينا واحد واحد. گال
نَائل: شسمك؟
مُجتبى. انتوا منو؟
رجع AXR تقدم كنبص گدامه هل مره وگال.
وين ابوك خل نحاچيه. احنه من منظمة الأمم المتحدة.
نظر وراه لمن طلع رجال شايب ويا مره چبيره عدلت العباية على راسها وگالت
منو انتوا؟
الشايب اجا والطفل طب جوا. نظر ل AXR بعدها لِ نائل
آخر شي باوعلي فوگ تحت وگال.
خير ابني انتوا منو شتردون؟
ما قلقني غير نظرات نائل ناحيتي وترتني اول مره الحچي ما يطلع وياي گمت اخبط ماي ودهن احتاريت احچي انگلش لو عربي ويا الشايب
وَسن: احنه From بصرة، اقصد From the United Nations جمعية خيرية.
الشايب عيونه علينا ونائل عيونه عليَّه.
AXR سحبني على جهة. واجا وگف گبال الرجال
ويحچي بعدما گال احم. افتهمت معنى الأحم راح يبلش يسفط حچي والمفروض المسرحية تمشي على نائل.
احم حجي احنه. اقصد Me. قبل فترة مريت سياحة بهل فرع وشفت حالة المنطقه وظلت الصورة لا تُفارق ذهني
نَائل: البرو أمامك سياحي جداً اكمل.
احچو بالعاميه خل افهم.
حجي! هاي الشگره من منظمة الأمم المتحدة وهذا الأشگراني ابو عيون ملونه كذلك وياها حابين نشوف حالتكم المادية وانتوا چم نفر. شسمك شسم اخوانك وين بيتهم.؟
الشايب گال تفضلوا طبينا للحوش ونائل عيونه يراقبنا ويراقب البيت بكل دقة. گال
نَائل: حجي شكم اخو عندك؟
ادري الرجال المفروض يحچي العليه بس اشو هذا اتقمص الدور. وبلش يستفسر
انتوا اجيتوا لبيتي شعليكم بأخواني؟
نَائل: غير نعرف.
دقيقه نائل. حجي! من الطبيعي جدا هذا السؤال حته نساعدكم. اذا حاب تحچي وتستفاد احچي واذا لا خل نطلع الفرع كلها گدامنا لازم نروحلهم!
لا راح احچي دامكم ناس تحبون فعل الخير.
آنا اسمي حجي مزهر واخواني أربعة مستشهدين باقيلي اخ زغيير بيته بآخر الفرع.
نَائل: دقيقه شبيك مستعجل. شسمه؟
اسمه عباس.
نائل نظرلي وهو منتظر يسمع اسم المهدي!
نَائل: عباس؟
اي عباس.
نَائل: المستشهدين؟
المهدي و حيدر وحسين و رضوان.
وَسن: حيدر وحسين و رضوان. والمهدي
نَائل: المهدي شلون استشهد؟
الرجال باوع ب AXR ونائل منتظر الجواب. گال
استشهد لمن هاجر هجرة غير شرعية بالبحر ويا عائلته وعائلة الحجي عماد ابو كرار يصير اخو مرته المرحومة.
الرجال حچآ الحقيقه لكن مثل ما احنه ردناها تنسرد لِ نائل. وحسيته نائل مو على بعضه عيونه وتعابير وجه يتغير، بس لا يتخربط لأن ايده على جبينه ويحچي.
نَائل: وامها هم ميتة!
هي هم استشهدت ويا اخويه الله يرحمه.
نائل تراجع چم خطوة وعيونه موسعهن لمن سمع
اسم الله گلبي رجف بس لا يكون رجعله!
وَسن: نَائل.
بيك شي؟
نَائل: اانت لا تحچي.
بويا هذا مو صاحي انتوا شبيكم؟
لزمت نائل لان عصب ويصيح
وَسن: نائل اهدى نائل!
نَائل: مااا اسووويله شي بس خل ينچب ما يحچي اسمه
الرجال تراجع چم خطوة راح يم مرته سمعته يگول اخابر الشرطة هذوله مخابيل. نظرت ل AXR گتله تصرف وهو راحله سحب الموبايل من الشايب وصار يحچي وياه ويقنعه.
أما اني ف لزمت زند نائل بكل قوتي واسحبه وياي نمشي بالفرع وهو يريد يندار للبيت ويحچي كل اسلوبه تغير!
نَائل: أكو شخص باقي حي؟
وَسن: لا ماتو كلهم.
وگف بمكانه اريد اسحبه ونكمل طريقنا للسيارة
لكن جبل ما يهزه ريح. نظرلي بميلة راس ومن كلامه تأكدت مو نائل. حاچاني بغموض وبعُمق خلاني ابلع بريگي
لأن الضوء موجود، إذًا الظل يتبعه.
حرك عيونه اتجاه البيت بعدها نظرلي وكرر كلامه بالإنگليزي.
مرة أُخرى. Because light exists، so the shadow follows it. هل وصلت الرسالة؟
حركت راسي حركات مُتتالية اي اي بهل اثناء
صار اللي يخاف منه! اذن العصر بكل ارجاء مدينة
كربلاء المقدسة. صوت رفع الاذان قوي وقريب. أما
نائل ويا كلمة الله أكبر عاف إيدي يبتعد ويسد اذانه يصرررخ يصرررخ بكل صوته وآني اريد اروحله يبتعد ويصرخ يگول
خل يسسسكت خل يسسسكتتتت.
اريد اتقرب يبتعد وبس يگول خللل يسسسكت ومنا AXR رجع ويركض ركض بإتجاهي هو وضعه جداً مختلف عن نائل جدا! الناس ألتمت ومحد يتجرأ يتقرب من نائل وكلمن يگول شكل
متلبسه جني يشهد الحسين عنده جني
والعباس خطيه
ذاك يمكن اخوه جاي يركض هسه يتلاحگه
وصل يمنا ولزم إيد نائل و صدمني لمن گال!
اسمع ااااسمممعه زيييين ولا تسدد اااذاااانك.
وَسن: ولللك شتسوووووووي تررريده يموووت.
مااا يموووت يعيييش خل يسمع الأذان.
أما نائل مغمض عيونه ويصرخ يگول.
اموووتك لا توگف گدامي اموووتك بس اشوفنك گدامي
ما خاف منه بالعكس لزم وجهه بكل قوته يثبت راسه وگال
خوويه الله واكبر لا تسد اذانك
خووويه االله ااكبر.
فتح عيونه وكأن فتح ابوب الجحيم علىAXR لزمه.
من رقبته يخنگه بإيد والإيد الثانية يضربه بوكس ورا بوكس، آني اتخبلت أبچي وما ادري شلون انقذ اخواني من هل شيطان. نائل وگع AXR عالارض وگعد فوگاه يضرب بدون رحمة يضرب بكل قوته وAXR ما يمنعه بالعكس يصرخ ويگول خويه الله اكبر وهذا يتخبل بالزاايد
الناس كثرتهم حوالينا بلا فايده وآني ما ادري شلون اوخر نائل ومنا AXR يأشرلي ويگول لا تتدخلي
وَسن: ناااائل ن ناائل كافي كااافي ناائل اخونا راح يموووت.
لا تتدخلين. هسه يجي دوووورچ تچذبييييين على ناائل؟
انخطف لوني لمن نظرلي وحچا هيچ بصوت متغير الناس انخبصت بين بعضها ونائل كأن يريد يجيني ويريد يضرب بيّ لكن AXR رجع صاح الله واكبر بحيث نائل تخبل رجع يضربه ويگله اموتك. لزم راسه ورگعها بالگاع بكل قوته مره مرتين.
لحدما AXR وسعن عيونه المدمعة غارگ بدمه بلع ريگه ونزل ايديه الچان لازم وجه نائل نزل ايديه مثل الجثه. ويا وگعة ايده وگعت من طولي لا حول ولا قوة. اريد انطق اسمه وعيوني جاحضه عليهم وعلى منظرهم
وَسن: ن نائل. أ
أنتهى الأذان وانتهى حيل نائل
أنتهى ووگع على ظهره بصفAXR اللي عبارة
عن جُثة هامدة، عم الهدوء الكل لزم الصمت حته الناس الملتمه بحالة صدمة، ونائل عيونه عالسما ويردد
لأن الضوء موجود، إذًا الظل يتبعه.
العالم شويه شويه بلشوا يتقربون بحذر ألتموا حوالينا وكلمن يحچي من عنده
قتل اخوه.
قتل اخوه، مات الولد.
خابرت الشرطة هسه يجون.
خابرو الإسعاف خاف بعده عايش.
اجت مره كنبصت گدامي تريد تگومني أشرت على AXR وابچي.
وَسن: مات.؟ مات اخويه؟
أما نائل اللي بغير عالم عيونه متحجرة عالسما ويردد
لأن الضوء موجود، إذًا الظل يتبعه، اجا شاب گالو هذا طالب طب. تقرب وهو خايف لكن يردد
يا حُسين يا مضلوم يا حُسين يا مضلوم.
كنبص يجس نبضه ثواني واندار صاح
عااايش بعده عااايش خابرتوا الإسعاااف؟
اي خابرناه
ما تردد ينزع قميصه ويشگگه سواها وصلة
رفع راس AXR وشد راسه يحاول يوگف النزيف ويردد
يا حُسين يا مضلوم يا حُسين يا مضلوم.
أبچي وصوته يتردد بأذني گال ل نائل اخافن تروح من عندي تالي نائل وصله للموت أبچي وما بيه اروحلهم احس رجليّه مكسورات. لحظات وانسمع صوت سيارة الشرطة جاية ويَ سيارة الأسعاف.
الناس أشرو على نائل والشرطة أجو اعتقلواه
اخذوه وياهم. أما الشاب اللي الكل ينادونه بأسم حمزة. ساعد المسعفين اخذو AXR للإسعاف
والاسعاف مشى من الفرع. حمزة رجع يمي
كنبص وگال
خيتي گومي اوصلچ للمستشفى اخوچ عايش
خيتي گومي!
المره ساعدتني وگمت على حيلي الشاب شال السويچ الوگع من AXR وگال
ما عندي سيارة بس راح اوصلچ بسيارتكم.
هزيت راسي اي مشيت وياه وصلنا يم سياراتنا.
سيارة نائل بمكانه وصعدنا بسيارة AXR. شخطها بسرعه فورا على المستشفى طول الطريق افرك بإيدي اريد اتمالك نفسي اريد اكون قويه لكن منظرهم يمرد گلبي
صوت AXR ما يروح من بالي گال
فكرة الموت مُخيفة وآنا لم أُسلِم بعد
لو گال ل نائل احبنك واخافن تروح من عندي.
امسح عيوني واشهگ گلبي خلصان وماكو غير صورتهم بعيوني
هاشم دمرنا دمرنا! دمرني ودمر نائل
دمر ناجي، دمر جاسر وهسه AXR! دمرنا.
كل واحد بطريقة مُختلفة! وصلني للمستشفى ونزل وياي
رحنه للطوارئ گالو اخذوه للعمليات بقيت واگفه بالممر
اجي واروح. ما ادري المن اروح نائل! لو ابقى هنا!
اجت الممرضة وبيدها أغراض AXR وگفت گدامي
أنتِ جاية ويَ المريض؟
وَسن: اي اخته آني اخته شلون وضعه يطلع منها؟
انطتني أغراضه وگالت ما تدري هو توه دخل للعمليات
راحت هي وآني لازمة أغراضه، محفظته والربطة الچان شادها على معصم إيده. وي موبايله.
نظرت للشاشة إلى ضوت بإتصال من هاشم و مسجل رقمه بالإنگليزي بكلمة أبوية ما رديت، گعدت على كرسي الانتظار امسح دموعي وعيوني على أغراضه رجع هاشم دگ مره ثانيه، حمزة چان واگف بصفي يمكن لاحظ الاسم لأن گال
ابوچ يخابر ليش ما تجاوبيه.
نظرتله ورجعت نظرت للموبايل هسه لو احچيلهم
الجاي نعيشه كله من إيد ابونا ياهو يصدگ بينا!
دگ مره ثالثة وهل مره جاوبته بنفس واحد بدون لا انطي مجال.
وَسن: ضحييت بثنين وسجنت بثنين، يتمت بناتك وحرمتني آني من بنتي شتريد هسه تاخذ روحنا واحد واحد حته ترتااااح؟
وين اخوچ؟
وَسن: ديموت. اااخويه د يموووووت.
قفلت الخط بوجه وحمزة مصدوم بس ما حچا شي راح وگف بعيد بطرگ الفانيلة التعلاگة شويه واجو أصدقائه
واحد بيده علاگه طلع منهه تيشيرت وانطاه يلبسه والثاني اجاني گال
خيتي ترا آنا رحت للمركز انطيت افادتي وشهدت على كلشي صار.
گمت عين على جهة غرفة العمليات وعين عليه.
وَسن: شنو. شنو حادث حادث ما راد يقتله هو ما چآن بوعيه
كلنا شفناه وسمعناه يگول اموتك واخلص عليك!
والله مصدوم هذا شلون گدر يوصل اخوه للموت آنا اجيت لمن الشرطة وصلت ما افتهمت القصه!
الشرطة فتحت تحقيق رسمي بالقضية وآني شهدت ضده لأن شفت الولد وكل شي صار!
حمزة: اي وما چآن يضرب اخوه بالعكس چآن يحاوله يوعيه يگله الله اكبر واسمع الاذان.
عفتهم كلهم ومشيت اشو حمزة لحگني للباب وگال اختي اوگفي. انداريتله وصل يمي وانطاني السويچ
مال سيارة AXR.
حمزة: آنا هنا باقي يم اخوچ الثاني.
اخذتهه من إيده وما ادري شلون اتشكره على وگفته وياي
طلعت من المستشفى صعدت خليت أغراضه بالسيارة وموبايله قفلته.
بالطريق خابرت على الشخص اللي متأكده ما يردني هو عزام!، من ثاني دگة جاوبني واسمع صوت الجهال وصوت عزة واضح بالبيت اخذت نفس وحچيت.
وَسن: عزام ساعدني ماكو غيرك. نائل تخربط وجنز AXR وصله للموت للموت الله يشهد.
سكت كأن كتم الصوت شويه ورجع يحچي مبين طلع من الغرفة. نبرته تغيرت وگال
عايش؟
وَسن: اي. بعده من شويه اخذوه للعمليات. عزام عفية استعجل هو بالمستشفى محد وياه حته اني عفته رايحه للمركز محتجزين نائل بهل وضع هسه يموت روحه عزام اتلاحگني مالي غيرك.
بيا مستشفى؟
وَسن: احنه بكربلاء مو بالبصرة
وسن كافي تبچين خل افهم بيا مستشفى خل اجي!
وَسن: هسه ادزلك عنوان المستشفى برسالة عزام بغلاة فاضل استعجل.
جاي هسه جاي والعباس.
هو قفل الخط واني كتبت العنوان برسالة ودزيته.
گلبي نار عليهم لحدما وصلت للمركز خلص گلبي من الازدحامات نزلت وشفت الدورية جايبين سيارة نائل للمركز. رحت وبالباب وگفوني يحققون وياي
من حچيت عرفوني جاية بخصوص نائل
خاصة صوت نائل اللي رج المكان رج ويصييح
شلووون تچذب على نَاااائل شلووون
اجا الضابط گال خل تجي لمكتبي رحت على مكتبه.
بقيت واگفه وهو حچآ.
- اخوچ مخبل يريد يموت روحه! انجبرنا نقيده بزناجيل حته گدرناله!
وَسن: إبرة. إبرة عنده إبرة هو شخص مريض مريض ولازم ياخذ هاي الإبرة!
- يا مرض يجبر الأخو يقتل اخوه!
وَسن: نفسي وممسوس.
نظرلي بِتَمعن وسحب ورقة ما ادري شجاي يكتب عليها
- وينها الإبرة جبتيها وياچ؟
وَسن: اجينه للكربلة زيارة ما چنت اتوقع ينهار بهل وضع. لازم يطلع اني ادفع كفالته.
- حته لو مريض وما چآن بوعيه القضيه انفتحت ولحدما.
الضحية ما يصحى وينطي افادته اخوچ المريض ما يطلع من ايد القانون. وهسه راح ننقله للمستشفى الأمراض النفسية ويكون تحت حماية امنيه وطبية.
وسعن عيوني من كلامه نائل ينتهي يتدمر اذا يرجع يطب لمستشفى الأمراض النفسية ينتهي يموت روحه ولا يعيش نفس المصير مرتين. الضابط ختم الأمر وگال
- بمأنه اخوچ مريض لازم يكون تحت رعاية طبية!
والتحقيقات تستمر إلى حين الضحية ينطي إفادته!
گام طلع واني وراه.
وَسن: سيدي الضابط اخويه حالته خاصة ينتهي والله يتدمر اذا يدخل مستشفى الأمراض النفسية.
- شني ندخله نادي ليلي حته يتعافى؟
مصعب تعال
اجا عنصر الأمن وانطاه الأمر گال تنقلون المتهم لهاي المستشفى رحت وراهم دخلت على مكان احتجازه
امشي بإتجاهه واشوفه شلون مدمى باقي بطرگ البنطلون ومقيدين ايده لِ فوگ وبس يحاول يحرر نفسه. يتنفس سريع ورفع راسه لمن حس على وجودي. عيونه تخوف وتخوزر نظرلي وگال بميلة راس.
– تچذبين على نائل تگليله ما تدرين؟
وَسن: ن نائل. انت انت مو بوعيك.
– شراح تستفادين. اذا يموت نائل بسبب تهوراتكم؟
بعلت ريگ من كلامه. رفع راسه فوگ يهمس بكلام ما مفهوم إلى أن قطع الزنجيل فزيت مرتعبة تراجعت ورا لأن هجم يريد يعبر ايده ورا الحاجز ويخنگني ما گدر گام يحچي ويصرخ
– سسهل اااطلع منااا سسسهل بس مااا اسويييها واعوف نائل ما اسويها.
ميل راسه بإبتسامة تفزز و السجان بصفي موسع عيونه وما فاهم السالفة او مصدوم گال لازم تطلعين. ونائل رجع يحچي عيونه ما ترمش
– اذا دخل للمستشفى يموت يموت.
طلعت ويا الشرطي والضابط عرف بالصار اجا گال انطينا أسم الإبرة حته نجيبله. لان مايگدروله. انطيتهم اسمها
وراحوا يجيبونها لحدما رجعوا نائل تخببل وكلما اروح اشوفه يهدد يأذي روحه ويگول يموت يموت.
بعد نص ساعة جابو الإبرة وسيارة الإسعاف هم اجت وگفت بباب المركز. اخذت الإبرة منهم بنفسي جهزتها. اجا الضابط وگال
- متأكده أنتِ تنطيه؟
وَسن: إي.
صارت الإبرة جاهزه، قويت گلبي ورحتله مخلية ايدي ورا ظهري لكن بدون لا اخلي عيني بعينه وگفت گدامه آني برا وهو خلف القضبان. اجا بسرعة
ويگول!
- عاينيلي. وَسنن عاااينيلي
ما رفعت راسي لكن تقدمت خطوة حته يوصلني وويمد إيده يخنگني. هاي طريقته واعرفه راح يسوي هيج!
- وَسسسسن عاااينيلي!
لزمني من رقبتي وسحبني انضربت بالقضبان مرر إيده الثانيه صار خانگني بثنين إيده وآني عيوني تريد تطلع والدموع ماليها رفع راسي بوجه وبهل اثناء مديت ايدي البيها الإبرة غرزتها برقبته ونطيته الجرعة فورا عافني وابعد سحب الإبرة من رقبته لكن فات الأوان الدوا نسبة كبيرة منها دخلت بشريانه.
-شسووووييييتي
وگعت بمكاني امامه أبچي وعيوني عليه
اجا كنبص گداميلزم القضبان شبه دايخ يضرب راسه ويگول.
- غداارة وَسن الشگره غداارة.
لزمت وجه احاول امنعه يأذي روحه لكن نتر إيدي وگع على ظهره يباوع بالسقف ويأشر بإيده وگال بصوت عالي
- اذا عباالچ تحذفييين صورتها من ذاااكرتي بهل إبررر اااانتِ غلطاااانه. ما تروح ماا ترووح من بالي.
ارتطمت إيده بالگاع وجسمه استسلم عيونه شبه مغمضهن. اجا السجان فتح قفل الباب
دخلت أول وحده كنبصت بقربه لزمت وجه وانادي
صوتي گوة يطلع
وَسن: نائل، نائل.
من تأكدت صاير تحت تأثير الإبرة دخلوا المسعفين خلوه عالسدية وشدو جسمه بالأحزمة. طلعوه وآني وراهم اخذوه بالاسعاف ويَ دورية الشرطة اللي رافقتهم.
صعدت وشخطت السيارة الوقت صار ورا اذان المغرب. خابرت على عزام گال واصل وهسه
بالمستشفى سألته عن حالة اخوية گال طلع من
العمليات بس ما صاحي من البنج
اطمئن گلبي من هل ناحية اما نائل ف گلبي نار عليه خايفة من رد فعله لمن يصحى ويلگى روحه بمستشفى الأمراض النفسية!
وصلت المستشفى والكادر الطبي سوو إلى عليهم
وآني وياهم بكل خطوة احچيلهم عن حالة نائل. نقلوه على غرفة خاصة والممرضين لبسووه لبس خاص يتم تقيده بالكامل بهل لبس. بدلة خاصة بالمرضى نفسيين!
شگد حاولت ما يلبسوه هل لبسة لكن ما گدرت. عاركت وصرخت لكن ما نفع بحيث گلت تمام سوو التشوفوه مناسب.
رحت للحديقه وگفت اخابر عزام، واسأله عن AXR جاوبني ويگول
عرج ما يطگه والعباس.
وَسن: افتح كام خل اشوفه واحاچيه.
شني تحاچيه هذا ما يتحاچه توه يصحى من البنج. عايني وضعه
فتح الكاميرا الخلفية واشوف AXR، راسه ملفوف
ويحچي بلسان ثگيل وعزام يسلك بالأجوبة
خلصت ايااامنا بالعرااق يعني بعد ماااكو گييمر عررب
شنسوي الله كريم.
كررم كريم كريمةة ايي. ولكم شالو راااسي؟
اي خلولك راس المگرن.
يعني آنا صرت مگرن ابن مگرررن؟
بالضبط مگرن ابن مگرن.
ولكم راسي شالو راااسي؟!
لايگلك الگرون
انت انت شچان اسمك عزم عاازم عزوم عزمز؟
رجعليي رااسي
عزام.
برو عزام خل اااحچي شغلة!
احچي.
انت خوش زلمة مااا عفت اابن عمك الخااايس.
لخاطر دمعة أختك إجيت.
دمعتها لااا تُقدر بِثمممن. هي وينهاا الشگرره!
وَسن: هياتني يمك حُبي.
ولكم اسمع صوتهااا شمحلاة الحُبي منهااا
وَسن: فدوى لألله حُبي أنت ماي هارت.
عزام يضربه براشدي خفيف ويگول
گوم ابن المگرن صحصح شويه چنك ابو وگعة
نعمم وقعتتت وقعتتت في شيءٍ جمييل.
وَسن: هءحم عزام اضربه أقوى هذا گام يمسلت.
شگره. صووتچ ويين ولكم اختيي گااالت ازفنَّك للمگبررة.
آنا ازفنَّك اذا ما تنچب.
اااقبل بشررط اريدنك تهوسلي برونا خوش برو يستاااهل الهوسه.
الله كريم.
وَسن: عزام اشمر گلاص ماي عليه بلكت يگعد؟
شني اشمر گلاص ماي. طالما ما يفشر خل يحچي براحته.
وَسن: اخويه يري مُحترم اصلا ما يعرف يفشر
حده كلمة تباً.
لا صدگ ما يفشر ابد؟ يعني مؤدب؟
وَسن: ييييري مؤددب.
ولكمم أااكو واااحد گااال
شگال؟
گااال آنااا واخويه على ااابن عمي الخايس. وآنا وابن عمي الخاااايس على الغررريب.
اي هو هيچ. شايفه الخايس يگول خايس
بووويه براااسي. ولكمم ولكم ابويه وييينه.؟
أبوك المگرن ما اجاك لهسه.
تبااااً له كممم هووو گو
ما لحگ يكمل عزام سد حلگه
احييل مؤدب اخوچ
اانچب ابن الخايس ما گلت فشر. عيب اختك تسمعك.
ابووويه وابوووك خاايسسين. بروو.
دسكت رحمة لأمك، انطمر يلا شگعدك انطمر.
ماذا تعني انطمر. بعدني مااا خااتم اللهجة العظيييمة ماااذا تعنيي ااانطمررر
وَسن: يعني نام وأُرقد بسلام.
مااا ااارقد بوااادي السلااام أريد اصليي وامووووت مسلممم.
ان شاء الله تموت مسلم. بس كض لسانك لا تفشر يا مُسلم
ول عززم اااحلف بغلاة إيمي ما أگول عليك ابن العم الخايس بسس رجعليييي راااسي ما اريدن گرون مثل هاااشم.
تلوگلك خليها.
لااا عزمززز لااا اررييدن رااسي ولكمم رااسي رجعووو ما اااريدن گروون هاااشم.
وَسن: حُبي أنت هوت بكل حالاتك.
وراااس بنتچ وراااس بنتتچ. ااانا
وَسن: لاا تحلف برااس بنتي، عزام اضربه رااشدي خل يصح ديحلف برااس بنتي.
تحت تأثير البنج.
ماااي ماي فاذر It s not good. تباً له.
تباً لك و له. هسه هذا هم حچي.
وَسن: خل يبقى على هل حچي أحسنله.
خل يبقى.
عااازم الجسااااااار تباًااا لك وتباااً لمن ربااااك.
ضربه على حلگه و اول مره اسمع عزام يسب
حيواان ابن الگو احچي عدل
الرباني زلمة موش جسار.
أنوب گالها بصوت عالي بحيث AXR يفتح عيونه ويغلقهن بعدم وعي مصدوم من الضربة الاكلها على حلگه وعزام. گال
اخوچ متربي بشارع لو بغابة؟
واعذريني ما افشر بالعادة. بس اخوچ طوخها
وَسن: مو بوعيه اخويه محترم بس هسه خطية
ولكمم مرررت صاحبي ختيييه الگيرل تلاحگولهااا.
حته أبيل ومرته ما خلصوا من لسانك.
AXR ظل يشكي من الألم ونظر لعزام. گال
هي حياةُ واحدة. وجعلني اعيشها كما أراد.
في الأزقة في الغابات في المراسيم غريبة. جعلني اعيش حياة عشواائية. يااا عزززم.
يمكن عزام ما عرف اغلب مقصد الكلمات
لكن آني الأعراف شنو أزقة شنو غابات شنو مراسيم! بقى صامت شويه وگال
تمام أفتهمت أسبابك. واسمي عزام مو عزمز وعازم وعزم.
كُل الطُرررق تؤدييي إلى روماا.
لا حول ولا قوة الا بالله. انا طالع من الغرفة شوية وارجع.
بروو شعندك تطلع ظل يمي لا تعوفني!
فوگاها جبان وتخاف تظل وحدك؟
آناا ما اخافن اليخاف ما يگابل ذولاك يوميه.
عفيه بطل.
وين تروح. عززم عازمم ويين تروووح.
هسه ارجع.
عافه بحالته وطلع من الغرفة حول على الكاميرا الأماميه وآني حچيت قبله
وَسن: شكرآ على كلشي.
ابتسم بهدوء وگال
- ابقى الليلة والصبح ارجع للبصرة. وسالفة نائل ان شاء الله نحلها سويّه
وَسن: عزام ما انسالك هل وگفه.
- اخوچ آنا، موجود شوگت مَتحتاجين.
وَسن: ثانكيو ابو فاضل.
- حلوة ابو فاضل.
وَسن: يلوگلك.
ابتسم وگال سلام. انهينا الإتصال بقيت شوية بالحديقة، افكر بالصار. هاشم شنو من گلب شايل لحد هسه ما جاي للمستشفى! واكيد عنده معلومات بكلشي صار مع ذلك مَجاي! شلون گادر يكون بهل ظلم والقساوة!
رجعت لبناية المستشفى وصلت يم غرفة نائل ثنين من عساكر الشرطة واگفين. اجيت ادخل گالو ممنوع.
وَسن: شنو ممنوع اطب اشوفه!
انداريت لصوت الدكتور وهو جاي.
- المريض لازمه راحة لذلك ممنوع تشوفيه.
وَسن: دكتور!، آني اعرفه واعرف حالته لمن يگعد شلون يصير!
- ما يگعد من تأثير الإبرة منا لخمس ساعات
وَسن: اعرف ولهذا اريد اكون وياه لمن يگعد
دكتور بليز!
- ممكن يكون رد فعله عِدائية وممكن تتعرضين للخطر!
وَسن: آني اخته واني اتحمل مسؤولية كلشي يصير!
نَائل مستحيل يأذيني.
-إذاً. تگدرين تفوتين عالغرفة بعدما توقعين على تعهُد خاص بالمستشفى تُقرين فيها مسؤوليتچ عن أي شي يصير وياچ، المستشفى ما تتحمل عواقب هذهِ المخاطرة.
وَسن: جاهزة أوقع.
نظرلي بإستغراب وگال تعاي وياي. رحت وياه دخلنا مكتبه. سحب كرسيه وگعد اخذ ورقة من الدُرج، مد إيده انطانياها
-تفضلي اگعدي اقريها. بعدها اكتبي اسمچ ويَ صلة القرابة. بعدها التوقيع والتاريخ.
وَسن: ماكو داعي أقرأها انطيني اوقعها من الأخير!
- تفضلي اقريها هيج هي القوانين المستشفى!
اخذتها من إيده گعدت اقراها بگلبي وبسرعة وچانت البنود كالتالي.
--أتعهد بتحمّل كامل المسؤولية عند مرافقة المريض
وذلك خلال فترة إقامته في المستشفى/الجناح النفسي، وأقر بما يلي:
1- أنني على علم ودراية بالحالة النفسية للمريض وما قد يصاحبها من تقلبات سلوكية أو نوبات.
2- أتحمّل كامل المسؤولية القانونية والطبية عن بقائي معه في الغرفة.
3- ألتزم بعدم التدخل في الخطة العلاجية أو قرارات الفريق الطبي المعالج.
4- أتعهد بإبلاغ الطاقم الطبي فوراً في حال حدوث أي طارئ أو تغير في حالة المريض.
5- أقر أن المستشفى غير مسؤول عن أي ضرر قد يلحق بي نتيجة بقائي مع المريض، وقد تم إبلاغي بجميع المخاطر المحتملة.
وَسن: تمام قريته.
اخذت القلم كتبت أسمي الثلاثي ويَ تسجيل رقمي
مع صلة القرابة اخت المريض. اجيت على مكان التوقيع وقعت وانطيته اشو رجعلي وگال.
-حته التاريخ اكتبيها بخط إيدچ.
سجلت التاريخ وانطيته، ختم عليها ووقع تحت الختم گام واشر للباب.
- تگدرين تجين وياي.
طلعنا سوا رحنا يم باب الغرفة الدكتور شوف التعهد للشرطي وگال
- تگدرون تخلوها تفوت.
الشرطي گال تمام، فتحولي الباب ودخلت، لمن دخلت انداريت وراي. لأن الباب انقفل!
درت وجهي بالغرفه اربع حيطان لونها ابيض بأبيض وكل الأثاث الموجود بالغرفه ابيض. بزاوية الغرفة باب للحمام.
اما سرير نائل ف من نوع خاص. نائل چآن نايم بس ملبسينه ذاك البدلة التقيده! وكلهه احزمة متقيد بيها من ورا ظهره.
مسحت عيوني واتقدم ناحيته وخرت الكرسي وگفت بصف السرير افرك إيدي ببعضهن وآني اشوفه بهل حالة شفايفي گامت ترجف من القهر والدموع مالية عيني قربت إيدي خليتها على شعره
گعدت مگابلته ومخليه راسي بصف راسه وابچي على حالنا. منا AXR منا نائل ومنا ناجي.
وجاسر، اما بنتي فمصيرها بإيد الله. و هاشم مستحيل يتساهل وياي اذا اعارضه!
شوكت نخلص. شوكت نرتاح منه!
شلون راح يكون نهايتنا بظل حُكم هاشم علينا!
بقيت گاعده وياه لحد الفجر رفعت راسي شفته بعده نايم! مر أكثر من سبع ساعات! گمت ادخل للحمام اغسل وجهي واطلع احچي ويَ الدكتور. طبيت للحمام غسلت وجهي مرة مرتين حته اصحصح.
لمن طلعت وگفت بمكاني، بلعت ريگ الحمام صاير بزاوية الغرفه ونائل ظهره لِ باب الحمام. شفته گاعد بس ساااكت هدووء تام رغم متقيد بهل بدلة. إلى أنُه ساكت وگاعد حرك راسه عاليمين ناحية باب الحمام شافني واگفه بمكاني.
ابتسم بطرف شفة ابتسامة الخذلان. طلع صوته هادئ نفس ذاك الصوت الاعرفه گال بنبرة مليانة قهر
- صفاء. يُسرا
وَسن: ن نَائل!
خطيت خطوة ونائل گال بنفس الهدوء الحذِر
- منو چآن الضحية هل مره؟
تقدمت وگلبي حاير شلون احتويه
وَسن: ن نَائل ه هسسه
اندار يحچي بصرخة طالعة من عُممق روحه
- منووووو صاااار الضحيييية جاااااوبي.
ركضت احتضتنه بكل قوتي أبچي واحچي اما هو فقط يصررخ بدون لا يأذيني او يتحرك!
وَسن: نااائل نائل بس اهدى راح اطلعك منااا ماا ابقيييك هنااا.
- اااانا وثقتتتت بييييچ لمن گلتيييي مررررة ثاانية ما تعيييش نفس المصيرررر. گلتييي خلصناااا وما ترجع لهذا المكاااااان.
وَسن: بسس اااهدددى لا تدخل بنوووبة اااهدددى.
- وَسنننن شلوووون تخليني بهل مكااان شلووون! بيمن اثق آناااا بيييمن؟
فتحت الاحزمه اللي بالبدلة صايرة على ظهره. فتحتهن كلهن وتفتحت الاحزمه اللي مقيده رجليه. كذالك فتحتهن كلهن. چنت بصفه وما يباوعلي گام وكل جسمه ينتفض من العصبيه يفتر بالغرفه يلزم راسه بضياع يحاول يتذكر شصار البارحة
نَائل: شني الصار شني الصاار شني الصاااااار تحچييييلي.
وَسن: م مثثل كل مره بس هل مره نقلوك للمستشفى.
-شلووون ينقلوووني لهذاااا المكااان وانتِ وياااي
شلووون تسووووين هييچ بيّه شلووون!
بلش يكسر اثاث الغرفة يشيل شكو شي يلزمها يكسرها ويصرخ بكل قوته
-ااااااحچي. ااااااحچي وسسن ااحچي ااانا شسوووويت ياااهو گااااتل هل مرررررة.
وَسن: ما گاتل ااحد اااهدى. نائل نائل اهدى
- وخري. وخري لا تلزمييييني وخرررري.
ما يخليني اتقرب منه يجي ويروح بنص الغرفة لازم راسه ويهمس حچي ما مفهوم
وَسن: ن نائل. ناائل اطلعك منا اطلعك هي بس هاي اليومين.
اندارلي اجاني بخطوات سريعة لزمني من رقبتي لزگني بالحايط خانگني خنننگ بإيد وحده عيونه فرااغ كأن ابتلع عُتمة العالم كله ماكو بياض ولا حدقة عين فقط اسود بأسود
انهااارت اعصابي صرت أبچي وَ مرعوبة.
اول مرة اشوفه بهل هيييئة. مخلي وجهه بوجهي احس روحي تنسحب مني خاصة لمن خلى عيونه بعيوني وگال بصوت مررعب.
- بعض الأرواح تَحيا في شخصٍ آخر.
ابچي واريد انطق ما اگدر عيوني تريد تطلع من الخنگه، لكن غمضتهن بقوووة
وَسن: ن ن نائل ن ن ناائل
- شبيهة صفاء. وين؟
وَسن: ن نَاااائل.
- شبيييييهة صفااااااء وييييين.
صار يضربني براشدي ورا راشدي ويصرخ
- وينهااااا وينهااااااا جااوووبي وينهااااا لا اااخلص علييييچ.
مغمضة عيوني وابچي بين إيده بهل اثناء انفتح باب الغرفة طبوا الكادر الطبي ثلاث زلم لزموا نائل سحبوه
وممرضة اجت لزمنتي تحاول تسندني لكن وگعت بمكاني حيلي أنتهى. - جاااوبي وينهااااا، وخرررووو
انطوا ابرة منوم وآني بمكاني نائل وگع على ركبه مثبت إيده عالارض يحاول يقاوم مفعول الإبرة الفورية، رفع راسه نظرلي بنفس الوقت باوعت بي
ونائل رجع طبيعي ويتوسل بيّه ما احچي
- بغلاة بنتچ لا تحچين حته گدامي لا تحچين.
ابچي وهزيت راسي اي تقربت رغم الممرضات والدكتور الواگف يگول ابتعدي عنه. تقربت من نائل حضنته بكل قوتي اني ابچي بنحيب وهو سكتة بس دموعه تنزل على رقبتي. إلى أن رخى إيده وچان راح يوگع لوما الممرضين لزموه وياي دخل بسُبات عميق.
الممرضين نقلوه عالسرير رادو يقيدونه بنفس البدلة لكن ما سمحتلهم هل مرة. خلوله مُغذي و موضف النضافة اجا نضف الغرفه طلع الاثاث المكسور. أما اني ف رحت للمحاسبة دفعت التعويضات وطلعت بوجهي على المستشفى الثانية البيها AXR.
لازم اطمئن عليه واذا چآن جاهز حته نبلش الإجراءات. من وصلت يم غرفته شفت هاشم توه يريد يطب
وَسن: ااووگف يا خووش اابو!
اندارلي وعاف يدة الباب ملامحه باردة ما بيها ذرة رحمة، رحتله وگفت گدامه.
وَسن: بيااا وجه جااي؟
هاشم: نصي صوتچ بابا.
يريد يعصبني واطلع من طوري، لكن تمالكت نفسي واحچي من بين سنوني!
وَسن: شتررررييد اانت شترريد ثنين بالسجن!
واحد بمستشفى المرض النفسي وهسسه AXR وصل لللمموووت بسبب شياااطييينك.
هاشم: كبر بسم الله وجاب أجله.
وَسن: مااا تخااف الله؟
هاشم: ما تخافين على اخوتج وبنتچ؟
تقدمت خطوة بوجهه بعلت غصة بلا حول ولا قوة حچيت
وَسن: حسبي الله عليك.
هاشم: هو أنتِ صلاة ما تصلين وينچ ووين الخوف منه.
وَسن: مخليييية خطط ررررجعة واااخااف من ااالله اخاااف من االله وما ااكفر بي. ويجييي يوم اصلي يجي يوم اصلي بي. بس أنت؟ مالك خط رجعة. ااانت حته على الصراط المستقيم ما تمشي، انت اان شاء الله گُبل لجهنم وبئس المصير!
هز راسه بإبتسامه مستهزئ بكلامي ودخل عالغرفة.
دخلت وراه. AXR چآن گاعد وينظر بفراغ كأن بعالمه الخاص. من حس علينا رفع عيونه نظرلي اني بوحدي وكأن هاشم ما موجود. رحت بخطوات سريعة عبرت
هاشم قبل لا يوصل ومنا AXR رفع إيده يريد ألزم إيده لزمت إيده وگعدت بصفه، نظرتله ملامحه تعبانة وكأن يقاوم گوة. ابتسمت وحچيت
وَسن: شلون صرت.
عايش.
لامست جانب راسه وهو ابتسم بهدوء تقدم هاشم وگف بالجهة الثانية
هاشم: هذا آخرة الغباء.
بداية الغباء چانت من عندك لمن سلمت أمانة اخوك
بإيد شلّة العجايز ذولاك.
هاشم: ههةههها من شوگت متعلم عراقي؟
من انت تنام وتصير ميت. آنا اگعد من الموت.
حل الصمت بالمكان مو مجرد كلام هذا سر كبير بيني وبين AXR واليوم لمح بيها. هاشم اخذله صفنة بعدها گال
هاشم: إحذر بيوم ألما تگعد بي.
بيومها أكون متمدد.
عضيت شفتي السفلية فدوى لألله، هذا اللي.
يحرگ بدم هاشم يستفزه بنص الحديث المصيري والجدي. بحيث هاشم سحب كرسي مغثوث وگال بنتر
هاشم: انچب.
نظرلي وشد إيده على لزمة إيدي گال
- نائل وينه.
وَسن: الشرطة اخذوه للسجن بعدها للمستشفى التخصصي بسبب حالته.
- شني. شلون تخليهم ياخذو!
وَسن: احسن من السجن على الاقل بالمستشفى يديرون بالهم عليه وانت شد حيلك حته تنطي إفادتك ويتقفل القضية
هاشم: احلها بإتصال واحد؟
- أنت لو بيك خير بگد ذبانة روح لشلّة العجايز مالتكم.
هاشم: ابني انت على هذا الأخلاق ويا ابوك تنعمى عيونك.
- اي تنعمى خل اخلص من شوفة وجهك.
وَسن: اسم الله على عيونك الحلوين حُبي.
رجع ظهره للكرسي يبتسم ببرود فرك إيده ببعضهن گال وهو مبتسم ببرود
هاشم: ولكم شلون الفَرزان والبيدق متحدين ضد الملك!
هاشم مخلي لقب لكل شخص بينا. فAXR لقبه
الفَرزان. وآني البيدق. نظرتله وسكتت لكن صراحة AXR صدمني هذا ما يعرف يسكت! رد عليه وگال
- نقشمرك نگول أعداء واحنه روح بروح.
هاشم: ماخذ طبع عمك جسار بالخداع.
- گوم اطلع مليت شوفتك.
وَسن: حُبي عوفك منه اعتبره ماكو.
- هو أصلا ماكو هذا اكيد المگرن ماخذ هيئته.
هاشم نظرله بنظرات شك اني بگلبي دعيت ما يكون شاك بي. اكيد هسه يسأله شلون ديحچي اذا هو هم مُسلط عليه!
هاشم: انت مو چنك ماخذ راحتك بالحچي؟
سكت ما انطى اي رد فعل. تقرب هاشم من السرير باوع بوجه وگال
هاشم: تجاوب لو لا؟
نظراتي بينهم ثنينهم خاصة AXR اللي غير تعابير وجه بالكامل من الهدوء إلى التوتر والعصبية. نظرلي بخزره نتر إيدي وصااااح بوجهي
- ااااابقي بعييييدا عنه.
حاچاني بالفصحى. وآني بين التصديق وعدم التصديق. لأن الاعرفه AXR حالته تختلف هو ديحاول يتحرر منه. صاح مره ثانيه وگال بالعراقي
- ااااطلعي برااا.
وَسن: شبيك حُبي رجعلك المگرن؟
- برااا
گمت من مكاني تحت أنظار هاشم المستهزئ ادري على شنو مكيف ومصدگ؟
وَسن: طاح حظك وحظ ابوك. يا خايس.
طلعت من الغرفة وسديت الباب وگفت بره شويه وسمعته يحچي بالفصحى ويگول وين چآن وشسوا وااا إلى آخره. بعدها گال بالفصحى انه مَجاي يگدر يكرّه AXR بينا. عود احنه اني ونائل
أولا اني ما واثقة إذا AXR من د يحچي چآن تحت تأثير الملعون. ثانياً معقولة AXR يعرف أمور. اني ما اعرفهن؟ مثلاً شنو الهدف من كره AXR ألنا، آني ونَائل؟ هذا الشي بشنو يخدم هاشم؟
قطع سلسلة أفكاري فتحة الباب لمن طلع هاشم وشافني واگفه شوية قريبة من الباب عبر من گدامي بدون لا يحچي فقط نظرلي بإستهزاء وراح بقيت واگفه لحدما دخل للمصعد وانسد الباب.
كلشي اتوقع منه ومن دهاءه گلت اتأكد إذا نازل تحت بعدها ارجع اطب للغرفة رحت بخطوات سريعة للمصعد شفته توه وصل للطابق الأول والمصعد اگدر استخدمه وراه. اطمئن گلبي يعني طلع من المستشفى!
رجعت طبيت للغرفة شفته گاعد بالسرير سديت الباب وراي ورحتله بخطوات سريعة اريد افهم معنى كلامه ويَ هاشم. لكن سبقني وگال
- آسف ترا فعلآ ما چنت بوعي.
وَسن: ناصب عليه تگول ما بيك شي وهسه تگول مو بوعيك!
- شني انصب عليچ؟ آنا فعلآ مرات ما بيّه شي.
وَسن: لعد شلون هيچ صار.؟
- ما ادري أصلا ملتزم بكل المعوذات بكل دقيقه اذكرهن بس من هاشم طب للغرفة تغير وضعي حته نفس ما گمت اعرف اتنفس لكن ما بينت ألكم!
وَسن: من گلت گوم اطلع؟
- اي چنت اريده يطلع حته اقراهن.
گعدت ع طرف السرير مگابيله وهو گاعد يمرر ابهامه عالوشوم وگال
- آنا اگدر احمي نفسي. بس نَائل!
لزمت إيده وحچيت
وَسن: مثل ما أنت تحاول تتحرر. نائل هم يريد
بس يمكن الطُرق مختلفة.
- وراس بنتچ ذيچ اللببالچ ما تنفعه.
وَسن: االف مره اگللكم لا تحلفووون براس بنتي!
ضحك وگال احضنيني. حضنته وهو متألم من جرح راسه گال.
- عمة بلقيس ترجع ويانة بمأنه تطلگت من يوسف العار.
وَسن: اريد افهم هاشم شراح يستفاد من زرع الفتنة بحياة اخته وخلاها تتطلگ؟ معقولة بسبب أملاكها؟
- براسه شي أكبر من الدافع المادي.
عم الصمت بينا إلى أن گلت
وَسن: زين هاشم ليش يريدك تكرهنا؟
- سؤال يعرفونه شلّة العجايز المنظم ألهم.
وَسن: هذوله التگول عليهم شلّة عجايز شعليهم!
- غير مشترينه بكومة فلوس.
وَسن: هسه لو واحد غيرنا يسمع هذا الحچي ما يصدگ.
بقيت وياه نسولف وبعدها خابرت المستشفى گالو نائل وضعه مستقر. عفته يوم كامل ما رحتله
ثاني يوم دخل الضابط اخذ إفادة AXR اللي تنازل عن القضيه وگال تجيه نوبات بس احنه نعرف شلون نتصرف وياه.
من بعدها طلعت ويَ الضابط عالمركز
هناك چآن عزام موجود، انحل القضية ونائل حُر من إيد الشرطة لكن! ما تحرر بالكامل لأن هو حالياً بالمستشفى التخصصي ويخضع لعلاج المرضى النفسيين. مرة ثانية بعد سنين!
بعد يومين خلصتهن بين المستشفيين أجا يوم خروج AXR هاشم ما موجود. آني وحدي البارحه عزام اجانا ساعتين وراح.
ساعدته حته يمشي للمصعد وهو مُصر إلا يشوف نائل
- اخذيني يم نائل ترا گلبي ما مرتاح.
وَسن: توترني من تحچي هيچ، نائل ما بي شي
قبل ساعة خابرت الدكتور گال نائل هسه نايم.
دخلنا المصعد ننتظر ينزل وبعدها طلعنا من هل المستشفى فوراً على الثاني. مسافة الطريق ربع ساعة بينهن. بهل اثناء دگ موبايلي شفته هاشم جاوبته وگلت
وَسن: شتريد؟
توقيع جاسر! صار اربع ايام
وَسن: أربع أيام على شنو؟
أربع أيام منطيچ وقت تحلين هل مهزلة وتردين للبصرة خل نفض سالفة طلاگچ من جاسر بعد يومين ثلاثة موعد السفر!
وَسن: أوك.
قفلته بوجه
-هذا شيريد؟
وَسن: توقيع جاسر.
- يتدلل. آنا احلها.
عندي ثقة بي ما دام گال احلها يحلها شلون ما چآن
وصلنا للمستشفى فوراً مشينا على غرفة نائل لزمت اليدة اريد اطب للغرفة لگيتها مقفولة
وَسن: مقفولة. قافلين الباب على نائل.
ناديت الكادر اجو بسرعه وكلهم مستغربين گالو
--: المريض چآن نايم واحنه ما قافلين الباب
وَسن: لعد شلون مقفول!
-لحظة وسن الباب مقفول من جوا.
--: الباب بس من بره ينقفل.
آني و AXR واحد يباوع بالثاني. رجع يم الباب ظل يحاول يفتحه لكن مقفول ما ينفتح. اجاني مشيت وياه بعيد عن الغرفة والكادر الطبي.
وَسن: شلون مقفل الباب؟
- قفلوها . أنتِ خليچ ويَ الكادر اوگفي بعيد.
رجعنا يم الغرفة وگلت للكادر خل احچي وياكم ابتعدنا عن الغرفة وAXR ظل يم الباب ما ادري شجاي يسوي لكن فجأة دفر الباب دفره وحده وكسر القفل
رحت وراه لمن دخل للغرفة لكن بقينا بالباب.
عيوننا جاحضه على منظر الغرفة والحيطان الأربعة
عليها كلماات كاتبها بالدم. والرسومات غريبة وثلاث رسمات لوجه البنيه!
أما هو واگف گبال أكبر رسمة راسمها وبعده مكمل يرسم بتفاصيلها وإيده كلها دم. گال بدون لا يندار
كلما تحاولون حته أنساها هيّ تجيني بالحلم. مبتسمة ألا اليوم چانت تبچي!
AXR عيونه يقراء الكلمات إلى نائل كاتبها على حيطان الغرفة وآني عيوني على رسمة وجهة البنية رسمة وجهه بالدم مرسومه. وبعده نائل يرسم بتفاصيلها.
أتقدمت بخطوات سريعة وگفت ورا لزمت زنده اندارلي وعيونه ذبلانة، مبين اجته النوبة وانتهت واحنه ما متلاحگين! الكادر رادو يطبون للغرفة
لكن AXR گال احنه وياه وطبگ الباب تحت انظارهم المصدومة. لان ما خلينا يشوفون منظر الغرفة!
نائل سحب إيده واندار للحايط يكمل رسمة وجهها احاول اتمالك نفسي لكن ما اگدر من اشوفه بهل حالة
ينمرد گلبي عليه.
وَسن: نائل اندارلي خل احاچيك.
– شجابكم هسه؟
وَسن: اجينا نطلعك.
–نزلي إيدچ.
وَسن: نَائل.
ما جاوبني وبقى يرسم تفاصيل عيونها الحادة وحواجبها. حولت نظراتي على الكتابات الكاتبهن كتابات غير عن كل مره كأنها كلمات شعر اول مره اقرأ هيج.
تحت رسمة البنية بملامح مبتسمه چآن كاتب.
–(بِروحي فتاة بِالعفاف تجملت)
الرسمة الثاني جانب من وجهها وكاتب تحته
–(وقد ضَاع عقلي وقد ضاع رشدي مذ أقبلت)
الرسمة الثالثة حالياً يرسم بيها من كمل نظر للرسمة يلامس ملامح وجهها وعيونها، مصدومه من حالة نائل! لهل درجة چآن متعلق بصفاء. لدرجة واگف گبال الرسمة وگال بنبرة مليانة حزن
–إِن روحي تُناجيها.
انوب هذا الثانيAXR أجا وگف بصفه يحچي مثله
-وعيني تَسير إِثر خُطاها.
نائل نظرله كأنهم فاهمين على بعض!
گعدو ثنينهم ساندين ظهرهم للحايط واحد نظر للثاني ونائل عيونه على باقي حيطان الغرفة وگال.
–حته لو تشبهها هم راضي المهم ما اظل ضايع بهل عُتمة.
بقيت واگفه گبالهم نائل عيونه على إيدها الكلها دم ويحچي ويَ AXR.
– ها يل عار ما متت؟
- غير آنا عار والعار ما يموت.
– حچيك صحيح.
- شهل حالة الخايسه الأنتَ بيها؟
– اسأل ابوك المگرن.
-على أساس ابوك شاد وصلة.
هسه يطلع گرونه بطول الگبر مالته.
ولك هرا ابن هرا اترحمله ابويه اشرف منك ومن أبوك.
بقيت واگفه بمكاني استمع ألهم والبچيه خانگتني لحدما طفح الكيل وصحت بيهم
وَسن: ترااا موجوده بالغرفة حسووو بيّه.
گام AXR ودفر نائل
- خاااايس كافي دراما كوين، گوم نراضيها.
گامو ثنينهم اجو وگفوا گدامي واحد يلزم إيدي والثاني يلزم وجهي
نَائل: عاينيلي ترا ما بيّه شي
-العار مايموت
نَائل: ثنينا عارات أنت مو احسن.
- طااح حظك يا خايس گامت تبچي.
نَائل: شگره صدگ چذب من شوگت تبچين عليَّه؟
احاول اتمالك نفسي وهذوله گدامي واحد يعارك الثاني AXR ضربه برجله وگال
- ولك قشمر ياهي تحبك بگدها
نَائل: بشرف خوات أصلان لا تحچي مثل أبيل.
-ترا هذا صديقي لا اسمحلك!
نَائل: تلعب النفس وانت تحچي نص عراقي نص فصحى.
- انت التلعب النفس شوف شمسوي بالغرفة.
نَائل: احچي عدل لا اعدل وجهك بكلة.
- مثل ام تفله
نَائل: كلب ابن كلب صوچي افضفضلللك.
- وحق ابن عم الرسول أنت اكبر بلاير.
وَسن: اااانچبوووو.
سكتوا ثنينهم واحد يباوع بالثاني و يباوعولي نائل راد يحضني AXR سحبني قبله حضني وگال لِ نائل
- أنت خايس روح اسبح وتعال.
نَائل: اذكرك ااذكرك بيومك.
وَسن: AXR لا تسوي هييچ
- خل يروح يسبح. ذاك هو الحمام
نَائل: مگرن ابن مگرن كلب ابن كلب
- أخلاقك حلوة.
نَائل: وعمتك حلوة.
- عمتي عمتك، تسبني تسب عمتي تسب أبويه تسب عمامك العدلين والميتين ترا المسبات راجعتلك عبن دمنا الخايس واحد.
وَسن: شبيييكم.
نَائل: أساالي المگررن ابن مگررن.
خوزرنا ثنيينا وراح للحمام رگع بابها وآني ابتعدت عن AXR. حچيت وياه
وَسن: انت ليش تحاچيه بهل طريقه؟
- ترا احنه هيچ نحاچي بعض ميانة بينا
ليش مستغربة.؟
وَسن: واحد يسب الثاني.؟
- آنا من اسب أگول تباً لك!
ونائل يسفط حديقة الحيوانات كلها.
وَسن: ااي انت مُثقف ما اريد اذكرك من چنت تحت تأثير البنج شگلت
- شگلت؟ وسن احچي شگلت حچيت شي ما لازم ينحچي؟ گلت اسمها؟
وَسن: لا ما جبت طاريها. انسى
- اي جيد جدا على كل حال هسه يجون الشباب
وَسن: شلون تلحگ؟
-أحلها.
لحدما نائل يكمل سبح بحمام غرفة المستشفى AXR چآن مرتب الأمور وراح فتح الباب لشخصين دخلو الغرفة شخصين يمسحون الحيطان. وكلشي عليها!
أما آني طلعت من الغرفة رحت على غرفة الأمن.
گلت احاول اشوف تسجيلات كاميرة مراقبة اللي بالغرفة. لكن AXR خابرني وگال ارجعي التسجيلات
ماكو الكاميرة ما صورت شي. يعني حلها!
رجعت للغرفة وتقريبا خلصوا بربع ساعة نظفوا نصها
طلع نائل من الحمام سابح ومبدل من شاف واحد من الشخصين ديمسح برسمة وجهه البنيه اتخبببل شمر الخاولي وAXR وگف بطريقه يمعنه
نَائل: شيييل ااايدك حيواااان لا تمسحح.
- كمممل وما عليك منه، نااائل متسووودن اانت هسه لو يجي وااحد يشوووف هل لوحاات الفنييية تدري شرااح يصير بيييك؟
نَائل: ولك كلب ااابن الكلب لا تمسسحح.
وَسسسن لا تخليه يمسسح وَسسن ااامووته اااموته خل لا يمسحها.
رحتله ويَ AXR احاول أقنعه ونهديه
وَسن: تگدر ترسمها. آني راح انطيك دفتر وترسمها مثل چم شهر تتذكر تتذكرر كلما تحلم بيها ترسمها.
نَائل: لاااا ما اتذكر مااا اااتذكرر ااانتِ دا تمحييين ذااكرتي بهاي الإبرررر. واليوم اجتني بالحلم وتريدين تمحيهااا مثل قبل؟
وَسن: امشي وياي امشي نائل أنت معصب وما تعرف شجاي تحچي.
آني وAXR أخذنا نائل برا الغرفة گدرنا نهديه وانه ضروري يكون هادئ. دخلنا لمكتب الدكتور ومدير المستشفى. گعدنه ونائل گوة متمالك اعصابه لأن گلت عليه كلمة مريض!
وَسن: دكتور احنه ك عائلة ال، المريض قررنا ناخذ اخونه خارج العراق حته يكمل علاجه.
المريض يتقبل الموضوع!
نظرنا ل نائل اللي لازم يگول اي! مثل ما فهمناه
واضح المريض مو بحالة جيدة.
گام نائل ثبت إيده ثنينهن على مكتب الدكتور يخوزره وگال
نَائل: لأني أُراقب، إذًا أفهم.
شنو تقصد!
نَائل: شخبطلي هنا خل اچفيكم شري.
دگ مرتين على ورقة خروجه والتقرير طبي بأنه يكمل علاجه خارج البلاد. الدكتور چآن مخلي عيونه بعيون نائل وهز راسه اخذ القلم وقع على الورقتين
ختم عليها وانطاها ل نائل.
نَائل: شسوي بيها، هاچ شگره انگعيها واشربي مايها
خلاهن بإيدي وطلع من الغرفة الدكتور گال وهو كلش مستغرب
شجاي يصير المريض شلون يشمر وثيقة رسمية بإكمال مراحل علاجه بالخارج!
وَسن: ما شمرها هو يحب يمزح وياي اني المسؤولة عن مراحل علاجة لهذا انطاني الأوراق.
گام AXR وصافح الدكتور وگله
- اتشكرك دكتور.
تفضلوا برا.
طلعنه من مكتب الدكتور انداريت لAXR بالممر
خليت الورقة بإيده وگلت.
وَسن: انگعها واشرب مايها.
- مو عطشان ورااس بنتچ.
خوزرته ولحگت نائل برا المستشفى اني ونائل چنا يم السيارة منتظرينه يجي لمن طلع من المستشفى اجا بإتجاهنا ويحچي
- وات هابن گايز؟
نَائل: اكل هرا ولا تحچي.
- آي كين برو آي كين. شسوي يعني
نَائل: تگوول ما تگدر!
وَسن: نائل هسه أنت شبيك ويانه.
نَائل: مريض آنا مرريض لا تگربون صوبي.
- لو بيك جرب هم اگرب صوبك
شايف شگد احبك. دِتعال حضنة.
نَائل: اكل هرا چذااب. وظل بعيد
- اعلم أنني جذاب.
نَائل: ولك اخلص علييك شلون تمسح رسمة وجههاا!؟
وَسن: هو هذا اللي مخبلك اني مو گلت ترجع ترسمها؟
نَائل: لا تچذبيين. وانت الثاني جاوب شلون تمسح رسمة وجهها!
- بوصلة مبللة ودبة صبغ ابيض.
نائل بطبيعة حالته بسرعة ينفعل راد يعاركAXR لكن وگفته ما خليته يعارك
وَسن: نااائل عوفه خل يولي.
نَائل: مگررن اابن مگرررن كلب ابن كلب.
- أخلاقك حلوة.
افتر حوال السيارة راد يصعد يقود.
وَسن: أنت الثاني وين تصعد؟
آني اقود السيارة أنت ما تگدر شوف وضعك
- چان گولي حُبي ما تگدر آنا أبدالك اقود
شهل ترزيلة. بس تدلل الشگره هسه اصعد گدام.
نائل سبقه وصعد گدام وهذا صاح عليه
- على فكرة انت ما تحترم أخوك الچبير.
نَائل: أنت مو ناجي حته احترمك.
AXR نظرلي بذيچ النظره يعني لو شما يسوي لخاطره، نائل مستحيل يتقبل وجوده ولا يعتبره ك اخ . صعدنا احنه الثلاثة وبوجهنا عالبصرة مرت ساعة ونص محد حاچي ويَ الثاني.
وَسن: حُبي شبيكم
محد جاوبني لكن AXR تقرب من مقعد نائل
خلا إيده على كتفه وگال
- آنا اريدن تكون حُر!
نَائل: واصيرن حُر لمن تمسحون ملامحها من ذاكرتي؟
- چا غير أحميك من ألف سالفة وسالفة شچان صار لو كادر المستشفى شافوك وشافوا حالة الغرفة؟
وَسن: عفيه شلون لحگت!؟
- إيزي.
نَائل: شيل إيدك وارجع لمكانك.
- ترا آنا مالي غيرك اخو!
نَائل: أنت لو خوش اخو ما تسمح رسمة ملامحها!
- شني هسه الزعلة بسبب النسوان؟
نَائل: شيل إيدك وراجع لمكانك
- عيب عليك تخلي النسوان تخرب بخوتنا
نَائل: هرا بخوتنا.
- تباً لك.
وَسن: نئول حُبي تصالحوا ترا چنكم ضراير
- هسه آنا أحلها افتح.
الglove compartment glove box تلگى
دفتر ملاحظات وقلم. أخذهن ألك بمأنه بعدك متذكر ملامحها بالحلم ارسمها وخلي الدفتر وياك.
نائل ظل ساكت وآني نظرت لِ AXR من المرايا
هو كذالك رفعلي حواجبه بمنعى ما بيها شي
حولت نظراتي ل نائل اللي فتح دُرج السيارة طلع الدفتر بگد چف الإيد دفتر لون الكر مالته سلر.
اخذ القلم وسد الدُرج. AXR تقرب من ورا المقعد ويحچي
- ها متراضين؟
نَائل: نوعاً ما.
- متراضين لو لا؟
نَائل: متراضين بس وخر لزگة.
- تباً لك كم أحبك.
AXR رجع لمكانه ونائل نظرلي، ابتسمت وبداخلي متوترة من هل سالفة ما اگدر ابعده عنها. ننطي أدوية حته ينسى على الاقل هل فترة وتعدي بس خل نسافر! لكن تجيله بالحلم ويگعد الصبح جان جنونه عليها.
ظل الطريق كله مخلي عيونه بالدفتر يرسم بيها.
ورقة ورقتين وثلاث، لو من جانب وجهها لو بس عيونها لو ملامح الوجه بالكامل. إلى أن رجع راسه للكشن الدفتر بإيده ومخليها على گلبه، مغمض عيونه ويگول كلام لوسيفر هذاك اليوم لمن گال.
نَائل: بعض الأرواح تَحيا في شخصٍ آخر.
وَسن: شلون تحبها وانت تعرف هاي مو صفاء.
- گالها، بعض الأرواح تَحيا في شخصٍ آخر.
وَسن: اقنعوا روحكم. اقنعوا روحكم.
نَائل: وراس بنتچ ما أدور إقناعچ.
-أي وراس بنتچ ما ندور إقناعچ.
وَسن: انچبوو لا تحلفون براااس بنتييي.
ظلوا الطريق كله يعصبوني حته مكالمة وي عزام ما عرفت شلون حچيت.
لمن وصلنا مدينة البصرة چآن الوقت بعد أذان المغرب. وديت نائل على بيته واحنه رجعنا لبيتنا
وگفت السيارة قبل لا ننزل نظرتله چآن بالمقعد الخلفي مرجع ظهره للكشن ومسوي روحه غافي
وَسن: AXR، گوم حاچيني ادري بيك مو غافي.
فتح عيونه بثگل كأن فعلا چآن غافي. گعد وساكت تلامس راسه من مكان جرح راسه ونظر لإيده صار عليها دم. هو المفروض جرحه. بسرعة يطيب!
وَسن: شبي راسك ليش ينزف؟
- رُبما لأنني لم أعد خارق الطبيعة؟
وَسن: هسه شگلت وتضوج تعال لا تركض جوا
AXR شبييك.
نزلت ورگعت باب السيارة لحگته
- هذا سؤال غير مطيح حظي موتني، منا وجاي لازم اتحمل وجع جروحي فوگ وجع گلبي. بطرانة أنتِ
وَسن: هسه شگلناا. ولك تعال احاچيك.
طبينا للبيت وهاشم گاعد بالصالة المفتوحة على بوابة البيت، الجگاره بإيده ومنتظرنا، من شافنا گام
بملامح بارده. AXR ابتعد وخلا مسافة بينا وهاشم متبسم بإستهزاء.
هاشم: خلصت هل مهزلة؟ من شوكت توگع مريض اربع ايام من إصابة عادية بالنسبه لشخص بحالتك؟
- خالتك؟
هاشم: افتح اذانك گلت حالتك! ابن ال
وانا أگول AXR منو معلمه على هل اللفاض!
- ابو يسب روحه. نايسو.
هاشم: وين تولي ما جاوبت
عبره وصعد لغرفته بدون إكتراث.
هاشم: وأنتِ الثانية.
وَسن: سيطرة أمنية خوما سيطرة ما تمل أنت؟
آني هم طنشته وصعدت نص الدرج لكن صاح وراي خلاني اوگف من كلامه
هاشم: إذا جاسر يرجع ورانة بعدما ينهي فترة محكوميته. ما تلومين الا نفسچ.
معقولة عرف بالخطة أنه اساعده حته يرجع!
أنداريت ونزلت من الدرج اجيت وگفت گدامه
وَسن: واضح مخوفك رجوعه؟!
هاشم: انهيچ إذا يرجع!
وَسن: ههه خايف مبينة عليك، خاصةً امه بين ايدك عود انت مأشرف على علاجها. شراح يصير لو يدري انت الجاي تمرضها أكثر حته ما تگعد من الغيبوبة.؟
ابتسم بإستهزاء قرب وجهه من وجهي وگال
هاشم: شراح يصير إذا جونيور عرف نجمته ألها علم بحالة امه وعدهه علم ليش ما تگعد من الغيبوبة صار سنين.
بلعت ريگ حدقة عيوني تتحرك بإرتباك
أما هو فمبتسم بوجهي. گال
هاشم: إن يَقع الرّخ وَ ينهار، البيدق يُصبح في مأزق.
يقصد جاسر. الرّخ أو القلعة دار ظهره مشى للمكتب مالته وآني أللحگه حچيت
وَسن: لا تخطي خطوة تهورية!
هاشم: خطوة واحدة. وينتهي هذا في حال ما انتحر بالسجن من قهره.
وَسن: اانت شنوو من بشرر. شتريد منه ليش تدمررره خل ياخذ اامه! وينتهي هل عذااب كافي!
دخل مكتبه واني وراه گعد على كرسيه رجع ظهره
لِ ورا وگال.
هاشم: رُسل تبقى تحت ظلي.
بالگوة متمالكة اعصابي اجي واروح گدام مكتبه وما ادري شحچي.
وَسن: يا الله دخيييلك ولك اانت شتريد من ام جاسر شتررريد من العمة رُسل؟
هاشم: باچر ساعة تسعة نروح للسجن ننهي مهزلة عقود زواجكم على كل الجنسيات وَ نسافر بعدها.
وَسن: اگله شتررريد من عمة رُسل يگوول نسافررر...
ثبتت أيدي عالمكتبة گدامه وحچيت احاول اكون هادية
وَسن: جاوبني عمة رُسل شتعرف عنك حته كل هاي السنين مستمر تنطيها أدوية مضاده للشفاء؟
طلع موبايله من جيب الجاكيت شاشته چانت مضوية طفاها وگال.
هاشم: إذا دريت لاعبة بعقل AXR بچم كلمة حبي وحبي حته يساعدچ تزيفون توقيع جاسر. اعتبري كلشي منتهي. منا إيمي بنية أمها ومنا جاسر روح أمها حجرين بحركة وَحده يوگعون.
عم الصمت بالغرفة وعيوني ما ترمش من صدمه كلامه لكن ملامحي ثابتة، قوية مثل ما معتادة.
هاشم: على غرفتچ. والصبح قبل الساعة 9 نطلع
خليچ جاهزة عالوقت بابا.
طشرت شكوو شي عالمكتب مشيت برا وآني احچي بگلب محروگ
وَسن: ااالله يلعن شكو أبو مثلك.
هاشم: سدي الباب وراج بابا.
صعدت الطابق الثاني رحت دگيت باب غرفة AXR مو بس دگيت الباب كسرته تكسر لحدما گام وفتحلي. مخلي سماعات الرأس وعيونه محمرة
يفركهن وگال
-مات هاشم؟ شبيچ كسرتي الباب عليَّه
وَسن: بلة اسكت وسد الباب خل نحچي
اجي واروح بنص الغرفة وگلبي نار من القهر بس قوية من بره. عاف السماعات وگال
- كافي تجين وتروحين اگعدي واحچي.
وَسن: مو وگت أگعد إجيت اگُلك باچر لا تسوي شي يعني لا تحاول تزور توقيع جاسر.
- بشني هددچ!
وَسن: بثنيناتهم. AXR احلفك بكل المقدسات لا تسوي شي.
- ويطلگچ عادي تتقبلين!
وَسن: اول ما جاسر يطلع من السجن ويصير حُر
راح نجتمع واذا اجتمعنا اكيد راح نعقد مره ثانيه ما يفرقنا الا الموت.
- هو حالياً الموت على هيئة هاشم ملاحگكم.
وَسن: بلةة اسكتتت فد ااكره شوه كلمة بابا بعيني صرت اكره هل كلمة.
سحبني واحتضني بكل هدوء.
- أهدي. كلشي أله حل. آنا أحلها.
وَسن: لا تحلها خل الامور تمشي مثل ما هاشم يريد. رجاءًا
- مستوعبة شجاي تسوين!
وَسن: اي مستوعبة وآني ما اريدك تتدخل
خل إجراءات الطلاق تمشي مثل ما هاشم يريدها
والبقية آني ألها.
- مَراح يبقى شي اسمه البقية راح يتبخر كلشي.
وَسن: انت جاي تحطم معنوياتي مو ترفعها
عفته وطلعت وهو لحگني بالباب گال
-اوك لا تعصبين، تصبحين على خير.
وَسن: تلاگي الخير.
دخلت لغرفتي، اول شي راسلت نائل سألته عن حاله وگال بخير ارسلت رسالة ثانية لكن صار صح واحد. يعني مطفي النت
عفته على راحته
بدلت واجيت بألف يا ويل حته نمت
الصبح ساعة 8 گعدت اول شي فتحت موبايلي هم دخلت لدردشتي ويا نائل شفته قاري الرسالة وما مجاوب.
دگيت على رقمه مرتين دگ حته جاوب
وَسن: نائل شبيك أنت بخير؟
اي بخير.
وَسن: اريد أگول آني وهاشم رايحين للسجن علمود ذيج السالفه. انت تجي؟
اي هسه اللبس بس سيارتي ليش ما مرجعينها؟
وَسن: بعدها بمركز الشرطة بكربلاء عزام گال يحلها
عزام شدخله؟
وَسن: ساعدني ووگف وياي.
خوش. أنتِ روحي وانا اجي بسيارة AXR هو بالبيت مو؟
وَسن: اي خابره واتفق وياه.
گال أوك وقفل الخط بدون اي كلام ثاني شبي البارحه چآن طبيعي! عفت الموبايل و.
تجهزت ونزلت تحت هاشم چآن منتظرني طلعت وياه مباشرة على السجن المركزي. لمن وصلنا چانت أكو بعض الإجراءات القانونية المحامي كملها.
بهل اثناء وصل نائل شافنا بس ما اجا فورا راح
دخل غرفة الزيارات واحنه هم دخلنا الغرفة اللي بصفها ننتظر يجيبون جاسر. گلبي بلش يدگ بسرعة وافرك إيديَّ ثنينهن من التوتر، إشتياق، خوف، رهبة من المجهول، وهاشم گدامي يباوعلي بنظرة إستهزاء.
انسمع صوت الباب وآني گلبي فز وگمت
دخل السجان و جاسر. الواگف بصفه مقيدين إيده بالكلبچات. گال بهدوء - ما تفتحون هاي من إيدي؟
السجان گال -لا ما افتحها .
اشرله يمشي وگال روح اگعد قابلهم جاسر هنا
رفع عيونه نظرلي عيونه تحچي مشاعره. شكله متغير 180 درجة شعره طول أكثر من قبل ومربي لحية. ضعفان وعلامات التعب والقهر باينة أثرها على وجهه
تقدم ناحيتي. عيونه تلمع بالفرحه لكن ساكت ما عنده اي رد فعل واحس رجليّ مربوطة بالرغم گلبي موتني هلگد يدگ بسرعه اريد احضنه، اريد كلشي يطلع كابوس بشع لكن صوت الواقع أعلى.
الصدمه بنبرة صوته الحنونه كأن هذا مو هاشم النعرفه. ابتسم بهدوء وگال
هاشم: تحاضنو ليش تستحون مني. اعرف محد بيكم يكره الثاني. جاسر من صدگ اريدك تحضنها
هاي مرتك وانتوا تحبون بعض وآنا مالي حق افرقكم
نظرله جاسر وگال بهدوء
جاسر: عمي!
هاشم: بويه احضن مرتك شبيك مصدوم
احنه اجينا نزورك وننهي كلشي ونبدي بداية جديدة مثل السنة الجديدة الجاية
گلبي خايف مَجاي افهم كلام هاشم شگال بالبيت.
وشجاي يحچي هسه! لكن جاسر أبتسم وآني تقدمت ناحيته خطوات جاسر تقرب رفع ايده وعبرت فورا ضمني لصدره رغم ايديه ثنينهن مقيدة
كأن كلشي حلم لحظات و ثنينا استوعبنا آحنه
بواقع حضنا بعض بقوة ويشم بشعري واسمع دگات گلبه هلگد فرحان وما مصدگ هاشم انطانا هل فرصة. ابتعدت شوية ومحاوطني بثنين إيديه
طبگ جبينه على جبيني من لهفته عيونه دمعت
وگال بصوت هادي
نجمتي.
هاشم: احم كافي.
نظر لهاشم ومبتسم گال.
جاسر: عمي شبيك صار أشهر ما شايف مرتي!
هاشم: هههةهها يلا ابني كافي مو اخذت راحتك
نظراته بين هاشم وبيني. تقرب باس خدي بهدوء
وگال شبيچ ساكته وآني كأن انربط لساني مو مستوعبه شكو براس هاشم. طلعت من بين ايدين جاسر وابتعدت رجعت لمكاني سحبت الكرسي وگعدت جاسر وهاشم هم گعدو وجاسر يباوعلي بنظرات مستغرب
جاسر: وسن شبيچ ساكتة ما حچيتي شي؟
وَسن: حُبي ما بيّه شي.
هاشم: اي ابني جاسر شلونها الايام وياك؟
نظراته بيني وبين هاشم. گال بهدوء
جاسر: لا تسأل مسجون شلون أيامه.
هاشم ابتسم وگال صحيح شوية ودخل المحامي
بإيده الملف اجا سحب كرسي بيني وبين جاسر
گال المحامي بعدما باوعلنا
– نبدي؟
جاسر: بشني!؟
–بإجراءات الطلاق.
جاسر: طلاق شني. وَسن! عمي هاشم!
ثنينا ساكتين وهاشم ورث جگارته
جاسر: عمي هاشم شجاي يصير! قبل شوية تگول ابني احضن مرتك وهسه جايب محامي تريد نتطلگ شبييك متوااازي!؟
ضرب بثنين إيديه عالميز وبقوة
أما هاشم ابتسم ابتسامة المُستهزئ اشرله بالجگاره
هاشم: نصي صوتك أبني.
جاسر: واانتِ شبييچ ساكتة ااحچي
شني تقشمريني!
– سيد هاشم شتريد اسوي؟
جاسر: ماااا تسوي شي يا حضرة المحامي ماا تسوي شي طلاگ مااا اطلگ.
گام وراح للباب دگ وگال رجعوني للسجن وهاشم گامله
هاشم: اارجع اگعد بمكاانك ومثل العاقل تطلگ بنتي.
اندار وعيوني عليه بخيبة.
جاسر: اااالف مرة أگُلج لاا تخاافين من تهديداااته خل يقتلني خل يسوي بيّه شما يسوووي ليش تخضعيييله.
وَسن: ما خضعتله هل مره آني من صدگ اريد الطلاگ.
نظرتله وعيونه محمرة محتار شيسوي بسبب كلامي النزل مثل الصاعقة عليه.
هاشم: سمعت بأذنك؟
وَسن: اريد اتطلگ منك حته اعيش حياتي حُرة
من اسافر. اريد ابدي من جديد
جاسر: لا تچذبين هذا مو حچييچ قبل شوية چنتي بين إيدي ترجفين وگلبچ يدگ متلهف شجاي تحچيين!
هاشم: انقهرت عليك وگلت احضن مرتك. لكن المقصد لآخر مره. تعال اگعد خل ننهي هل مهززلة
جاسر: متوااازي ااانتَ متوااازي اامي بين إيدك شلون تنهي العلاقه بينا اامي شيصير عليها!
هاشم: امك اعتبرها أمانة أبوك وتظل تحت ظلي
لا تخاف آنا مشرف على كل علاجاتها.
جاسر: واانتِ ظلي ساااكته.
وَسن: گلت العندي. ممكن تجي تگعد توقع وتفضنا؟
اجا فعلا كنبص گدامي ولزم وجهي بين ايده.
جاسر: لا تخافين من تهديد هاشم اذا هددج بيّه لا تخافين خل ينفذ تهديده
وَسن: ما هددني بيك.
ابتعدت عنه وهو مصدوم
جاسر: چااا هددچ ببنتااا ولك ااانت مااا بيك رجوولة؟
هاشم: لا تحچي زايد واگعد
وَسن: ما هددني لا بيك ولا بإيمي آني اريد حُريتي
هاشم: بنتي ما تريدك استوعب عاد.
جاسر: ما اطلگ، ماا ااطلگ مستحيل اعوفن مرتي وبنتي و اامي بين ايدك!
هاشم: بنتي ما تريدك شني گوة هي؟
وبنتك شلك بيها؟ أما امك فهي تظل عندي من تخلص فترة محكوميتك تجي تزورها تشوفها ساعة وتمشي.
گوة متمالكة نفسي على كلام هاشم
وجاسر اتخبل من القهر والعصبية
جاسر: ولكم شنيي ساعة اشوفن امي
اامي هايه اامي شني سااعة اشوووفنها.
هاشم: چا ما تشوفها نهائياً.
راد يجي على هاشم والمحامي منعه
– لا تسوي شي يمدد فترة سجنك.
جاسر: انسجن مؤبدددد ولا اعوفن عائلتي بإيد نگسس مثثثلك.
هاشم: وقع أوراق الطلاق خل نمشي.
جاسر: ما أوووقع!
افرك أيدي ببعضهن وگلبي ينزف من القهر رفعت عيوني وحچيت حچي مستحيل اسامح نفسي عليها.
وَسن: شنووو اانت ما تفهممم ماا ارييددددك مليييت. مليييت من انتظااارك لشوووكت انتظررك
اريد اااعيش اريد اكمل حياتي ويا إنسان يكون وياي ماا اريد ابببقى على ذذذمة رجال محكوووم عليه. و مسجووون.
ردت يجاوب بلسانه لكن لمن اخذ نفس عميق وتنهد بصمت حچا الف حچاية عجز يحچيها. تقدم بهدوء.
گعد بمكانه معصم ايده انجرحت بسبب الكلبچات لكن ما مهتم نظر للمحامي وگال بهدوء
جاسر: جيب.
هاشم: من البداية هيج اتفاهم.
جاسر: ما اعوفلك أمي وبنتي. من ارجع أخذهن من عيونك.
هاشم: هاي اذا رجعت.
المحامي خلا الاربع أوراق كلهن گدامه أوراق الطلاق على الأربع جنسيات. انطاه القلم وگال وقع
جاسر نظرلي بخذلان. وآني بملامح قوية عكس گلبي الجاي ينزف من القهر.
نزل عيونه بلش بورقة طلاقنا عالجنسية العراقيه يوقع وبعدها الثانية والثالثة بكل ورقة يوقعها يضغط بالقلم بحيث الورقه الثالثة
انشگت والمحامي گال.
–مو مشكلة آنا احلها. انت وقع آخر ورقة.
چانت ورقة طلاقنا على الجنسية اللي من نفس الدولة الراح نسافرله خلاهه گدامه نظرلي وگال
جاسر: إذا عبالچ تحصلين الحُرية بهل توقيع
ف أنتِ غلطانة.
وقع بس توقيعه ما يشبه باقي التواقيع.
أكو اختلاف بينهن اني اعرفه اعرف جاسر يگدر يوقع بتوقيعين مختلفات. نظرت لهاشم اللي باين عليه ما مكترث او ما يدري او الله واعلم بشنو يفكر.
جاسر عاف القلم ورجع ظهره للكرسي ابتسم بخذلان و مقهور بس يمثل الإستهزاء. گال
جاسر: اخذي أوراق طلاقنا وسويهن جناحات بلكت تطيرين وتصيرين حُرة.
المحامي راجع التواقيع
بس ما گال هذا ليش مختلف عن البقية.
وهاشم گال
هاشم: وسن اطلعي وي المحامي
عندي حچايتين وي جاسر احچيهن.
رجع كرر كلامه
هاشم: وَسن!، اطلعي بابا.
طلعت وي المحامي وگفت بره الغرفه بالباب
نظرت للمحامي
وَسن: التوقيع على أخر ورقة ما يشبه البقية.
– أعرف.
انداريتله بكامل جسمي وحچيت همس.
وَسن: AXR گلك؟
– السيد AXR گال السيد جاسر لو تخلون طلقة براسه مراح يطلگها على وحده من الجنسيات. وحذرني ما اكشف فرق التواقيع. اذا صار هيچ
وَسن: يعني هو تدخل؟
اي نعم
وَسن: يعني طلاگنا على اخر ورقه باطل.
– بدون شك.
بهل اثناء صار صوت جاسر عالي مجاي افهم شيحچي نظرت للمحامي
وَسن: هاشم شراح يحچي ويا جاسر!
– والله ما اعرف!
دخل السجان للغرفة شويه وطلع هاشم
والسجان يسحب جاسر الروحه تريد تطلع من العصبية والقهر عيونه صاير احمر مثل الدم
شافني ونظراته تنگط كره عاط بوجهي
جاسر: شسووووويتي بيّه شهللللل حقددددد الشاااايلته بگلبببببچ لهل دررررجة تكررررهنييييني
تأذيييني بااأمي.
عيوني وسعن شبه اختل توازني.
هاشم شگاال. السجان يسحب جاسر وآني اريد اروح وراه هاشم لزم إيدي ما خلاني
وَسن: جاااسر لااا تصدددگه لاااا تصدددگه.
جاسر: لچچ ااااااللّه يااااخذ جاااسر لچ سممممعتچ بأذنييييي سممممعتچ شلووون
گدرررتي تأذيييني بأمي شلووون تأذيييني بروحي
وَسن: هاشم عووفني ااارووحله.
جاسر: اذيتي روحي اذيتي أمي
وآنا اخافن من لمسة إيدي عليچ؟
وَسن: جاااسر ورااس بنتنااا هاشم يريد يمووتك بالقهر جاااسر والله العظيم مااا ردت اااحچي هيييچ
جاسر: اذيني آنا گُليلي مااا احببك گُليلي اكرهك امل منك ما اريدك عادي اتحمل. بس ليش حته تروحين تأذين أمي بسبب حچايه گلتها؟
أبچي وما عندي جواب على كلامه
وَسن: جاسر الله يخلييك.
جاسر: ألمن يخليني؟ ما بقيتولي اهل كُلكم طلعتوا غُربة. ولك عمي هاشم الغريب مااا يسوي مثلك. الأشتر غررريب من رحتله بشغلة.
گال بويه جاسر انت حته من امي حرمتني مو بس من حچايه بويه!
هاشم: شيخلصني من أشتر النادر
اخذو للسجن ااخذووه
جاسر: وحق هو على ما اعفي عنكم.
اخذوه ومنا ناجي هم طلع ويا السجان هم رجعوا
للسجن نائل شافني وشاف هاشم لازم زندي
اجا وگال
نَائل: شكو! عوف إيدها
سحب ايدي من إيد هاشم ورجعني ورا ظهره
أبچي وروحي تريد تطلع
نَائل: شبييچ موتتي روحچ بالبچي هاشم شمسوووي
وَسن: گاال كلشي لجااسر خلاه يسمع تسجيل صوووتي هذااك.
هاشم: هاي عواقب التمرد. گتلچ لا تخلين AXR يتدخل. عبالچ ما ادري جاسر مبقيچ على ذمتة وعلى الجنسييية - - - - -؟
وَسن: مااا گلتله مااا قببببلت AXR يساااعدني
اجو حراس السجن گالو اطلعوا ومن طلعنا برا السجن يم السيارات هاشم نظر للمحامي وگال
هاشم: امشي بإجراءات الأوراق الثلاثة. وحسابك بعدين.
– سيدي انا ما عليه.
هاشم: لااا تچذذذب AXR حذرك ما تكشف فرق التواقيع.
نَائل: وخربت الدينا؟ شدعوة ترجف من جاسر.
هاشم: انت تنچب.
وَسن: نائل روح منا.
صعد بالسيارة وراح بقيت وي هاشم راسي راح ينفجر عيوني ما توگف بچي
اطرافي بلشت تبرد. ما لحگت افرح انه جاسر ما طلگني، د اجا هاشم خلاني بمصيبة أكبر من كلشي.
وَسن: ليش تسوي هيچ. ليش يعني ليش تسوي هيج تحرگ گلبي ليش تسوي هيييچ؟
هاشم: خليها ترچيه بأذنچ وفكري الف مره قبل لا تتمردين. گتلچ لا تدخلين AXR وخليتيه يتدخل بجميع الطرق.
وَسن: مااا گلتله مااا گلت البااارحه حچييت وياه گلت ما اريد تتتدخل ااانت شلون فورا تروح تشغل تسجييل صوووتي!
ما جاوبني صعد بالسيارة ومنتظرني بقيت واگفه وگال للسايق يدگ هورن. فتحت الباب وصعدت بصفه گال امشي. بطريق الرجعة الف تفكير براسي
وحالتي جاي تتدهور اطرافي بلشت تبرد و ما احس بيها
من وصلنا للبيت فورا نزلت ركض دخلت بوجهي للطابق الثاني على غرفة AXR چانت مفتوحة وهو يحچي مكالمه ويگول.
باچر المسا نسافر انتوا جاهزين؟
دخلت للغرفة وعيوني ما اشوف بيهن اندارلي مستغرب
أبيل بعدين أخابرك...
قفل الخط وآني رحتله انهارت اعصابي عليه
وَسن: گلتتتت لا تتتدخللل گلتتتت خل الأمور تمممشي مثل ما هاااشم يرييد.
وسن شبيچ اهدي. چننت متأكد جاسر ما يطلگچ
فقط گلت للمحامي ما يحچي
وَسن: هاااشم دمرررني دمرررني ونجججح
جاسر صااار يكرررهنييي.
حضني ويحاول يهديني.
وسن بس ااهدي خايف عليچ لا تمرضين اهدي احلها وراس بنتچ ااحلها ما اخلي جاسر يظل مهضوم منچ احلها.
وَسن: شتحللل شتحل وهو گال تأذيني بأمي
صار يكرهني صااار صار يكرهني.
وَسن. وَسنن
ثگل لساني واختل توازني، شالني واخذني لغرفتي خلاني عالچرباية وآني بس عيوني فاتحتهن صوت جاسر ما يروح من راسي.
وين ادويتچ. وسن.
بقى يدور بالغرفه لحدما لگاهن گعد بصفي يجهز الإبرة بعدها سحب إيدي مسح الوريد بالمعقم وضرب الإبرة بالوريد. وانطاني الحباية اخذتها وغطاني. طلع من الغرفه وبس سمعته صاح بصوت عالي وگال هاشم بعدها دخلت بسُبات عميق
ما ادري AXR شسوا!
ثاني يوم گعدت بالفراش احس راسي خفيف وشبه ناسيه البارحة شصار وياي فقط اتذكرت الصار بالسجن! لگيت موبايلي بصفي فتحت الشاشة الساعة 4 العصر تاريخ اليوم 31 /2023/12.
يعني أكثر من عشرين ساعة اني نايمه تحت تأثير الدوا! اندگ باب الغرفة ودخل AXR. مبتسم من شافني گاعده
شلون صارت الشگره.
وَسن: شصار البارحه تعاركت ويا هاشم؟
عوفچ من الصار وگومي بدلي اريد اخذچ لمكان.
وَسن: AXR آسفه.
ما صار شي. گومي بدلي.
وَسن: نروح احنه الثلاثة؟
اي نروح ثلاثتنا امشي بدلي اخرتينا العالم منتظره.
هو طلع من الغرفه وما ادري هذا منو يقصد
العالم منتظرة بدلت ونزلت تحت لگيته منتظرني.
هاشم طلع من مكتبه گال وين تروحون ما جاوبنا
فورا طلعنا طول الطريق حچالي وين نروح وكلامه فر عقلي
وَسن: شلون يعني شلون بناتهم بإيد هاشم؟
ليش مستغربة بالنهايه هذا هاشم.
وَسن: زين أنت شلون تخابر أبيل تگله اعرف مكان اختك! واذا طلع هل معلومة غلط؟
گتله هذا الإحتمال وگال نستمر ندور عليهن ثنينهن.
وَسن: انوب بنت الادهم فوگاها. يَقين تدري بهذا الحچي؟ انه أبيل وأريم مو بس على نازلي يدورون؟ وإنما على بنتها الصغيره كذلك؟
لا ما تدري. لحد هاي اللحظة ادهم ما كاشف هذا السر ألها. لو تدري ادهم بايع بنته دقيقه ما تبقى على ذمتة الخايسه.
وَسن: يستاهل. يستاهل يقين تعوفه
هيج واحد مثله ما يستحق احد يسامحه بس
عنده حظ اخوته الباشا والأشتر سامحوه
محد واثق بيه بس على گولتهم الدم ما يصير ماي.
وَسن: هسه استوعبني انت وأبيل من شوكت صرتوا صُحبة هيج؟
من ثلاث سنوات المهم شعليج بهل مواضيع
وَسن: اوك آني وياكم. بس نائل؟
نائل كذلك ويانه
وَسن: شلون قنعته! هذا يموت منهم انوب يگابل أبيل 24 ساعه؟
گتله اخطبلك ذيج الحلوة.
وَسن: چذااب؟
ضحك وكمل يشرحلي شلون نائل تقبل الفكرة
وصلنا للكورنيش سيارة نائل موجودة. ويا سيارتين
من بيت الباشا نزلنا كلمن من سيارته إيمار ومرته.
أبيل ومرته جايين. همست واحنه الثلاثة نمشي بإتجاههم
وَسن: نئووول لا تتجادل وياها.
نَائل: شعليّه بمرت العالم.
وصلنا گدام بعض AXRصافحهم ثنيهنم وخاصة أبيل تحاضنوا سويه منا إيمار ما عاجبه الوضع عادي منا نائل هم ما عاجبه
نَائل: بَسكم محاضن
إيمار: ابن عمك لزگة لازگ بأخوية
نَائل: مع الأسف الشديد أتفق وياك.
سيرا همست اللهم صل وسلم على محمد
وآني اخذتهن على جهة شوية بعيد عن الشباب.
وَسن: سيرا حُبي بغلاة اشتوركم لا تستفزين نائل ترا حالته خاصة.
أريم: لا تخافين عزوزة حچتلنا وسيرا مراح تستفزه صح؟
سيرا: إذا يكون محترم احترمه.
وَسن: واعرف طلب غريب بس لا تذكرين اسم الله گدامه يتخبل.
سيرا: لا تخليني هسه اروح گدامه اردد اذكار الصباح والمساء واسماء الله ال99 گدامه. وياهن اطگه بآية الكُرسي
أريم: ههها تتشاقة وياچ.
وَسن: ترا الموضوع مو مال شقا، اتمنى ما تحچين گدامه.
سيرا: حققت امنيتچ مراح افتح حلگي لا تخافين.
رجعنا يمهم نائل ساند ظهره عالمحجر الحديد
أما أبيل وإيمار وي AXR واگفين يحچون
رحت بصف نائل وسيرا گالتلي
سيرا: بعد شويه يجوا البقيه.
نائل باوعلها بإستهزاء
نَائل: ها يعني عشيرتكم كلها مدعوة؟
AXR أنت ناوي على فصل عشائري؟
وگت الفصل شعائري؟
أبيل: فصل عشائري.
سيرا: وسن لخاطرچ راح اسكت.
نَائل: لا احچي سمعيني صوتچ بغلاة أشتور
إيمار: أنت ما تعرف تنچب! تريدلك گتله؟
AXR وأبيل ثنينهم وگفوا بينهم ويگولون
خليكم ريلاكس احنه هسه نحتاج بعض ف لذلك لحد يتجاوز عالثاني
إيمار: چا كض هذاا النعال
نَائل: ودگ بالنعال على راسك شتگووول؟
أبيل: دِيلا انچب قشمر.
ول نائل لا تصير قشمرر آنا شگتلك؟
نَائل: بشرفك ما لگيت غيرر ولد الباشا تصاااحبهم
انوب تحچي مثلهم كُلكم قشامر وآنا ماشي.
سيرا رادت تتدخل بس إيمار لزمها
سيرا: ترووح فدوه ل ولد الباشا تااج رااسك.
رحت ورا نائل اللي رايح لسيارته.
وَسن: ناائل نئووول ولك طااح حظك ارجع
ويين تروووح
صعد سيارته وآني يم الباب نزل الجامه وحاچاني
نَائل: لي گدام أكو مطعم عنده سمچ مسگوف تجين؟
وَسن: زفرر هسه وگت تتسمم؟
نَائل: شنسوي هيچ اشتهينا.
اخذ موبايله يكتب شي ونظرلي ياشر اقريه.
ابتعدت عن سيارته فتحت المسج چآن من نائل وكاتب.
- الأحسن ما اكون وياكم وانجبر احچي معلومات ما لازم لوسي يعرفه. آنا مو وحدي. وما ردت اتعارك بس ما لگيت غير هاي الحجة حته اطلع من بينكم. سلمي على مرت العالم و. گليلها الشعر الطويل ما لايگ عليها خل تگصه.
فتحت تسجيل وحچيت
وَسن: اولا عفية ذكي ثانيا طااح حظك شنو اسلم عليها عيب عليك.
أرسلته وشافها انوب طلع يكتب تالي دزلي إيموجي السمچه.
وَسن: زفرر طاح حظك.
الجماعة نادوني ورحت يمهم لمن سألوني شوفت الرسالة ل AXR قراها بگلبه بس أريم فد فضولية وگالت.
أريم: اگُلك ابو ربطة علّي صوتك شكاتب هذا؟
أبيل: يا ستي أنتِ شعليج هذا شمسلت بالرسالة!
سيرا: بلة أقرأها هسه تبين أخلاقه الكيبوردية.
إيمار: لا الخوات متفقات علينا نشد گرون.
آنا انصحك بگرون هاشم.
إيمار: لازم مجربه.
سيرا: لازم مجربه.
وَسن: ههه واو حُبي بنفس الوقت وبنفس الكلمات.
أبيل: هسه غير تفضوهاا.
ختية الگيرل عدهن فضول اسمعن شكاتب الأحسن ما اكون وياكم وانجبر احچي معلومات ما لازم لوسيفر يعرفه. آنا مو وحدي. وما ردت اتعارك بس ما لگيت غير هاي الحجة حته اطلع من بينكم. سلمي على مرت العالم و...
سيرا: منو مرت العالم؟
أريم: چنك كلمة يُتبع بآخر البارت كمل ليش توگف هي مال إثارة وغموض هسه؟
سحبت الموبايل منه ابستمت بتسليك وكلهم باوعولي
وَسن: وشكرا على تفهمكم. كاتب و. شكرا على تفهمكم.
سيرا: منو مرت العالم هذا شبي؟
متوازي
وَسن: متوازي مثل ما گال AXR هسه عوفكم منه.
حچينا بالموضوع وانه على متن نفس الطيارة أبيل وأريم راح يسافرون ويانة. وهوايا تفاصيل ما اگدر بالوقت الحالي احچيها.
الرحلة راح تكون ساعة 8: 30 الليلة.
واعتقد الباقي يترتب لمن نوصل غاد.
وَسن: اهم شي نكون حذرين.
سيرا: هاي وصلوا
انداريت ورانا وگفت سيارات ولد الأشتر ثنينهم.
ونزلو وي َ خواتي ثنينهن اجو بإتجاهنا وبهل اثناء سيارة على سَند هم اجا وجايب بتراء الفرحة اكتملت بشوفتها. نظرت ل AXR وگلت
وَسن: أنت؟
لم أفعل شيء عزيزتي.
اجنّي ثلاثتهن وتحاضنا صار فترة ما ملتقيات
احتضنت ودق أكثر شي لأن هي الصغيرة و رُقيه عيونها على AXR الچان واگف ويا الشباب ويصافح ولد الأشتر وعلى السَند. سألنا عن أحوال بعض بعدها رُقيه گالت
رُقيه: وَسن هو شايل اسم عائلة جابر ابن منو؟
أريم: صدگ وسن ابو ربطة ليش شايل اسم عائلتكم، هذا خوج لو اخو جاسر لو نائل لو بتراء؟
عم الصمت بينا خواتي وبتراء عيونهن عليه
وأريم رجعت گالت
أريم: مجرد سؤال فضولي واعتذر اذا بسبب إزعاج؟
بتراء: لا عادي، وبعدين مو ياهو الشال هذا اللقب يطلع اخويا!
سيرا: ملامحه مو غريبة عليّه.
وَدق: ما ادري وين شايفه نفس العيون.
تقربت رُقيه مني لزمت إيدي وگالت.
رُقيه: عوفچ منهن وجاوبيني خل يرتاح گلبي عليچ الله هاشم شيگول هذا أخوية؟ من ام ثانيه؟
وَسن: حته آني ما عندي اي معلومة مؤكدة.
سيرا: وكل هل ميانة بينكم وما تعرفين اذا اخوچ؟
وَسن: شتقصدين! من أربع سنوات واني چنت وياه تحت نفس السگف يدير باله على اصغر تفاصيلي مخليني بعيونه وياخذ حقي من هاشم كلما يأذيني. أكثر من هيج شيسوي حته يصير اسمه أخوية؟ الدم؟ دمنا واحد. إلا من نفس البطن والظهر؟
سيرا: على كيفچ عيني من باب قطع الشك باليقين هيج حچيت. آنا رأي بهل موضوع واضح
ذاك همه ولد اشتور احبهم أكثر من اخواني مو شرط إلا من نفس الظهر والبطن.
بتراء: كلامچ صح.
رُقيه: ما جاوبتيني!
وَسن: ما عندي جواب يقطع الشك باليقين
رُقيه: اسلم عليه؟
وَسن: سلمي شكو بيها.
رُقيه: زين ناديه بحجة شي
خل يجي هنا ما اريد اسلم گدام البقية.
بتراء مبين متوترة اما ودق ف طبيعية.
أما الأخت الحنونة بينا رُقيه ما تگدر تظم مشاعرها. ومتحمسة تسلم عليه. اشرتله گلت تعال
عاف الشباب واجا وگف بصفي بيني وبين رقيه
باوع بيهن مبتسم گال
گولي شگره شتردين؟
وَسن: آني ما اريد شي. رُقيه تريد تگلك شي.
حياللة الخاتونات منو بيچن رقيبة؟
ودق: البصفك، واسمها رُقيه مو رقيبة
اندارللها بكامل جسمه ورجع نظرلي مستغرب من رد فعل رُقيه.
احچي خيتي. اسمعچ رقيبة. رقيه.
رُقيه تخربط أحوالها اخطلت مشاعرها لو تمسح طرف عينها لو تبتسم وتگول
رُقيه: خويه اسمي رُقيه مو رقيبة.
ههههه كُل الطُرق تؤدي إلى روما.
رُقيه: ردت اسلم عليك واگول شخبارك؟
الله يسلمچ عزيزتي هسه صرت زين.
بتراء: شلونك؟
بألف خير، تسلمين عزيزة.
ودق: تشبه هاشم بالحچي الحلو تالي بس لا تغدر.
تلاشت ابتسامته وتجاهل يجاوبها
راجع يم الشباب
اندار يريد يروح ودق حچت مره ثانيه
ودق: اذا طلعت ابن هاشم لا تصير مثله.
واذا ما طلعت ابن هاشم لا تشيل طبع دم هذا النسل الفاجر.
اندار والبقية كلهم انتبهولنا
ما اختاريت اكون من نسل فاجر.
وَدق: بس تگدر تختار تكون الشخص السيء أو الجيد.
أكو سيء واكو الاسوء. الجيد ما تلگينه بهل نسل.
رُقيه: بس انت مبين تخاف الله لا تصير مثلهم.
امشن يمنا لا توگفن هنا.
عافنا ورجع يم الشباب ورقيه تحاسب ودق تگول شبيچ وياه. گلتلهن نروح يمهم ورحنا. وAXR گام حچا وموجه كلامه ل أبناء بيت الباشا ونسوانهم. گال
لكم النهاية ولنا البداية.
شلون تقصد!
بشكل من الأشكال انتوا راح تتخلصون من هاشم
أما احنه أبناء بيت الجابر قصتنا تبلش وياه وبس الله اليعرف شلون ختامها.
وَسن: لهنا وقصتكم تنهتي بس احنه قصتنا تبلش لمن انسافر من العراق.
بتراء اجت حضنتني مره ثانيه وگالت.
بتراء: راح اشتاقلچ. ديري بالچ على روحچ وعلى أريم.
وَسن: حُبي مراح تنگطع اخبارنا كل يوم راح نتخابر.
اللتمينا احنه الخوات تحاضنا لآخر مرة بعدها كلمن صعد سيارته وراح بقينا آني و AXR والساعة 6 المسا.
وَسن: AXR لا تخلي كلام ودق ببالك.
لا عوفچ منها هي حقها. امشي نرجع هاشم صرعني عشرين مره يخابر.
صعدنا وشديت الحزام شخط السيارة
فورا عالبيت
وَسن: زين شلون رتبت موضوع السفر وبنفس الطيارة؟
رتبتها وهاشم مراح يحس على شي.
وَسن: وموضوع جاسر شلون اسافر وما احاجيه بعدما هاشم هيج سوا بينا!
تنحل وداعة بنتچ تنحل.
وصلنا للبيت ودخلنا كالعاده واگفلنا عالدرب نزل بالتحقيق
هاشم: وين چنتوا؟
يمكن اخذتها تشوف خواتها؟
هاشم: تشوف خواتها بالكورنيش لو اجتماع
ويَ بيت الباشا؟
وَسن: اجوا وجابو نسوانهم خواتي ف اكيد ما يدزوهن بوحدهن.؟
هاشم: هم صح ذولة ولد الباشا.
وَسن: زلم ولد زلم مو مثلك.
عفتهم وصعدت لغرفتي بديت اجهز جنطة السفر
لحدما اقترب موقد الرحلة وقبلها بساعة نزلت الجنطة ورحت على بيت نائل شفته توه طالع
ب جنطة وحده وديقفل الباب. كمل واندار چنت واگفة وراه
نَائل: ها شگره جاهزة.؟
وَسن: جاهزة وأنت؟
شوفة عيونچ جاهز حته ارجع النُقطة الصفر.
ويمكن نبدي من نُقطة الصفر وهل مره حياة تُرضينا؟
انداريت چآن AXR واگف ورايه
نَائل: اذكرك بهل حچي.
وَسن: هسه لا تتشأمو.
نَائل: امشو قبل لا المگرن يدز ذولاك يجيبوله اخبارنا.
خلا مفاتيح بيته بجيبه ومشينا ثلاثتنا نرد على بيت هاشم. نظرتلهم وحچيت
وَسن: تدرون حياتنا كوميديا سوداء؟
نَائل: علمود سوالف ذولاك وها لوسيفر حچآ على لساني وها AXR رجع تلبسوه؟
وَسن: يعنيي صراحة اي.
عن نفسي مقرر ما اموت إلا وآنا مُسلم
نَائل: چا وآنا اطبن لجهنم بوحدي؟
ياهو گال وحدك انت وهاشم سويه. وناجي يلحگك
نَائل: ابن المگرن لا تجيب طاري اخويه.
وگفت وثنينهم وگفوا
وَسن: تدرون ناجي الوگع بيها وما نَجا؟
نَائل: والسبب ابوچ امشي لا تخليني احچي كلام ما لازم ينحچي وينسمع.
هسه لا تنقهر شهرين ويطلع ما بقى شي.
سبقنا وطب للبيت اما AXR گال هسه وگت تذكريه
لحگت نائل وAXR بقى برا يجاوب على مكالمة أبيل
جابو السيارتين سيارة هاشم وAXR. خلو بيها جنط السفر ونائل صعد بسيارة AXR اما آني ويَ هاشم.
طول طريق المطار ذكرياتي بهل مدينة صارت تمر امام عيوني مثل شريط حياتي هل سنتين چانت مثل الجحيم. اليوم الرجعت للبصرة واليوم الجاي اطلع منها
وآني گلبي مليانة جروح
من خسارة امي وسُعاد الله يرحمهن إلى الخذلان
والقصة الكاذبة العشتها ويَ جاسر.
حته وإن احبني الف عام. مستحيل اتخطى شلون أتفقوا هو وهاشم عليّه. وهسه جاسر الصار يكرهني
شراح يصير؟ معقولة بعد كل هذا الحب نصير أعداء؟
ما ناوية تنزلين؟
رجعت لأرض الواقع. السيارة امام مطار بصرة الدولي وهاشم منتظرني انزل. اخذت نفس عميق ونزلت. السايق جاب الجنط ولحگنا للمطار
ومنا نائل وAXR هم وصلوا ورانا
لحدما كملنا الإجراءات صار موعد الرحلة والناس بلشت تصعد بالطيارة. وحسب الخطة، هاشم وAXR
ونائل يصعدون قبلي. گلت اروح للحمام وهمه طلعوا من البوابة اثناء النداء الثاني
رجعت لصالة الإنتظار أريم وأبيل جاهزين.
وهلال وي هدآم جايين يودعوهم. رحت يمهم وهلال حاضنه اخوها تبچي وتحلفه يدير باله
هِلال: أبيل دير بالك ديرر بالك و. خابرني يوميه يوميه خابرني ومن اخابرك تجاوبني بسرعة
وأبيل يحاچيها أريم راحت لأخوها ودعته وآني واگفه قريبة عليهم. المذيعة أعلنت عن النداء الأخير
وَسن: عفيه ترا تأخرنا!
اجت هلال لزمت أيدي وتحاول تتمالك نفسها
هِلال: وَسن اوعديني ما تغدرون بينا رجعولي اخويه وخواتي سالمين.
وَسن: وغلاة بنتي ما نغدر بيكم.
أريم: هلال لا تسوين هيچ كافي بچي.
هِلال: تمام ما أبچي ما أبچي بس ديرو بالكم على نفسكم.
رجعت تحضن باخويه وتگول شلون افارگ روحي.
هاي سالفتها طويله لو نبقى عليها.
وَسن: أبيل بليز امشوا.
فعلا هل مره مشينا عبرنا البوابة وأبيل ويَ أريم ثنينهم لبسوا الشفقات براسمهم ورفعوا الكمامة تلثموا بيها. احنه چنا اخر ثلاث اشخاص
أريم وأبيل صعدو بالطيارة گدامي وآني وراهم.
مقعدهم چآن ورانة بنفس الدرجة الأولى
واحنه گدام، هاشم عيونه چآن عليهم وهمه يمرون
رفعت ايدي وناديته گلت اني هنا حته يعوفهم ما يركز بيهم. رحت گعدت بصف هاشم وعاليمين نائل وAXR گاعدين بمقاعدهم.
شدينا احزمة الأمان واستعددنا لإقلاع الطائرة
لمن اعقلت الطائرة وصارت بالجو AXR فتح الحزام وگام وگف من مكانه گال. والهدف هاشم يسمع
ألنا البداية و النهاية.
هاشم: هذا معلوم. الشطرنج يشبه الحياة: تبدأ بجنودك، تخسر أعزاءك، وتبقى وحدك تصارع حتى النهاية.
حتى تنال منهم، عليك أن تُصبح منهم!
هاشم: هاي حقيقة الصداقة بينك وبين أبيل.
صحيح.
بگلبي اردد كمل يا بعد اختك كمل.
ما چآن سهل اصيرن صُحبة ويَ اعدائنا.
هاشم: بس انت تربيتي. لا يُصعب عليك
ابي الغالي ترباتك آنا. في الختام وقبل لا نطلع من أرض العراق العظيم حاب أگول.
ابتسم وعيونه يوزع نظرات على أبيل وأريم الگاعدين ورانة وعلى هاشم الگدام، مبتسم. وما يدري شمنتظره بذيچ المدينة. أما AXR گال
في رقعة الشطرنج، ليس الملك دائماً هو من يصنع النهاية.
هاشم ابتسم ببرود. وما جاوبه.