رواية ولد الباشا للكاتبة فاطمة الأحمد الفصل الحادي والخمسون
قَبل ساعات - وگاع -
بقيت گاعد بالسياره گدام المركز
الف تفكير برأسي اريد ألگى الحل أريد اربح قضية أبيل ويطلع بالبراءة! عبن مثل ما توقع أبويا!
جسار نصب مكيده وگعنا كلنا بيها حتى هاشم!
أول خطوة - انطى الخاله آيدا ل هاشم.
ثاني خطوة - اشترى بُشرى وخلاها تمرض المره بالأبر
ثالث خطوة - التُجار الچانو على اساس حاجزين الخالة!
جسار جابهم حتى يبعد الشكوك عن نفسه. و يورط أبيل بقضية جنائية!
بقيت سهران فكره تجيبني فكره توديني إلى أن
ما حسيت بروحي غافي لين ما اذن الفجر
فزيت من دگ على جامة السياره
علي سَند: گم خويا اذن گم وياي نروح نصلي.
وگاع: روح هسه جاي وراك.
ردت اغفى مره ثانيه هلگد تعبان من البارحه ما نايم
رجع دگ الجامه ما عافني گمت طلعت وكل جسمي متشنج
اخذت موبايلي وقفلت السيارة. مشينا للمسجد صلينا الفجر
و ردينا يم باب المركز ننتظر بالسيارة لحد الساعه ثمانيه الصبح.
گالو التحقيق ويا أبيل تأجل للساعة ثمانيه ونص
خابرت ابويا اسأله عن حال عمي ومرته. گال على الله
اما إيمار فبعده ما گعد. نظرلي على سَند و حچآ
علي سَند: قتل جسار صار حلال وحگ العباس
وگاع: چانت رحمة من الله ما طلع ابوها!
علي سَند: مثلا لو چآن ابوها تتقبلها؟
وگاع: ما بتراء بنته و روحك بيها. ياخي شهل سؤال
علي سَند: بتورة غير بتورة حُب طفولتي. بعدين انت گلت رحمة من الله ما طلع ابوها
وگاع: چآن صرت چتال ابو مرتي.
علي سَند: لا تتشاقه!
وگاع: وحق جدنا السابع.
علي سَند: تمام صدگتك بس لا تجيب طاري الهمج
هذا موبايلك يدگ جاوب
طلعته من جيب القمصلة چآن ابويا جاوبته
وگاع: آمر يابه. گدام المركز وعلى السَند وياي
اعتقد الضابط سرمد يحقق وياه عبن هو المسؤول بالمركز. صگر يساعدنا؟ شلون بلَّهَ؟ انوب جاي ويا ابن عمه! يا سلام بيت سُلالة الضُباط هاي احنه ليش ما نناسبهم احس نستفاد؟ ننطيهم سيرا مثلا.
علي سَند: أبو وگعه!
وگاع: تمام يابه انچبيت. نروح وياهم تأمر، و
ما لحگت احچي حچايتي قفلها بوجهي
وگاع: ابويا بس يخلص حچي ما يستمع للطرف الثاني إذا عنده نعل ياكله
علي سَند: هم زين ما اكلت زايد شني تنطيهم اختي!؟
وگاع: كفرنا مو جبنا طاريها منا أشتر گلي انچب ومنا
انت. شني ما نتشاقه؟
علي سَند: الوضع مال شقا؟
وگاع: تدري شني. انزل انزل صارت ثمانية ونص
شلت الملف ونزلنا. للمركز دخلنا وسلمنا على الملازم.
گلناله نحچي ويا الضابط سرمد. گال دخل لغرفة التحقيق
بألف يا على حتى گدرنا ندخل ونوگف بغرفة تسجيل التحقيق نعاين بيهم.
الضابط سرمد چآن يجي ويروح بالغرفه منتظر العسكر يجيب أبيل. من جابوه چآن مكلبچ ايده من گدام ونظراته
بارده ما بيها اي شي. فراغ مُربك. إيدنا على گلوبنا لا يشيل التُهمة بروحه!
سحبوله الكرسي گعد والضابط تدنى امام وجه، اردف
أبيل الأيهم الباشا...
أبيل: AAB اختصرها.
جيد معنوياتك عالية عكس البارحه شنو السبب؟
أبيل: عبن صليت الفجر؟
گالولي الشباب. گالو حيل لحيت تريد تُربة. مقبولة أن شاء الله. نبدي؟
أبيل: نبديها بياعلي، جاهز اجاوب
الملازم بلش يسجل التحقيق
شلون دخلتوا للبيت الصار بيها الجناية وچم شخص جنتوا؟
الضباط عنده المعلومات كاملة بس رايد يسمع الحقيقه من أبيل!
أبيل: دخلت. مو دخلوا چنت آنا أگول لأخواني لحگوني من الجهة الخلفية صعدت على بيت البصفه مناك چيتت عالسطح.
انت دخلت وانت صعدت وانت چيتت البقيه شنو چانو يسوولك أجواء تحفيزية ما عاونوك؟
أبيل: كلشي ما يفتهمون بالمداهمات اذا ما دليتهم.
اي مو خلية الصقور متدربة على إيدك.
أبيل: حُمات الوطن انتوا هذا واجبكم. احنه واجبنا حماية اعراضنا.
فلسفة جميلة. چنك نَجد. عزام الجسار
ابن الشخص اللي معاديكم مدري انتوا معاديه. شچان يسوي وياك؟
أبيل: تربية ابويا چآن لاحگ اخوه حسباله هيين ما اگدر للهم بوحدي.
آنا وعلى سَند واحد يعاين بالثاني هذا الضابط شلون متحمل أبيل واسلوب أبيل. الملازم اللي بصفنا حچآ
عنده صبر أيوب.
علي سَند: هم زين. رحمة من الله
رجعنا نركز على أسألة الضابط سرمد
عزام طلع بكفالة لأن ما عليه أي أدلة، أما أنتَ
عاين بي وساكت. بعد ثواني اردف
أنت و اخوك إيمار عليكم شُبهة جنائية.
إيمار لوما حالتة الصحية چآن المفروض يكون بالمركز وياك.
أبيل: ماله دخل. إيمار ماله دخل آنا رسمت الخطة ونفذتها دخلت البيت من باب السطح شفت امي بإيدهم
صوبت على الثلاثه.
لا تدافعله عزام صوب اثنين بس لأن خدش بسيط مو إصابة بالغة تم الإفراج.
أبيل: ياخي منو يگول هوَّ مصوبهم شني مركبين كاميرات وما ادري.؟
هذا السؤال نعرف اجابته من يجي المحقق الجنائي
أما انت الآن عليك تُهمة قتل
أبيل: هسه لو دايس نملة أگول خطية بس هذا مجرم راد يقتل امي!
تعترف بالذنب!؟
أبيل: ما اعترف بذنب ما ذنبي!
ما عندك خيار ثاني. في حال إثبات التُهمة. لازم تعترف.
أبيل: اعترف بالعدالة الراح يظهر الحق من الباطل
ما اعترف بشي ثاني
حبيبي انت لفيت وفريت بس ما گتلي منينلك هل خبرة؟
أبيل: آنا مغناطيس المصايب. يعني مُستهدف من الجميع فَ صرت خبير بالفطرة.
تَمعن ينظر بأبيل اللي فاجأنا حَسبالِي يضعف ما توقعت اجوبته. اردف الضابط واشر للملازم
بسام وگف التسجيل.
وگف التسجيل طلع سچينه من جيبه فتحها! واحنه متوترين
خلاهه بإيد أبيل المكلبچ
يُمناوي لو يُسراوي؟ ألزمها ابني ألزمها
كض السچينه باليمين الضابط گال. هد عليّه
أبيل عاين بينا وعاين بالسچينه
علي سَند: هذا ناوي يورط أبيل بمصيبه!
وگاع: بسام افتح الباب خل نطب!
بسام: يمعود بس يختبره.
أبيل شد إيده عالسچينه وهذا منتظر يهد عليه
لكن أبيل دچ السچينه بقفل الكلبچات. خربها وفتح إيده.
أبيل: لا تُخبرهم عن خطوتك القادمة، خليها سُبرايز
لا من صدگ عفيه عليك. بسام تعال
تقرب من الميز الخشبي كتب أحرف اسمه الثلاثي
أبيل: للذكرى. واحد بيكم يرجعني للشسمه. اذا خلص التحقيق!
بسام رجعه للزنزانة، وطلع الضابط لغرفتة
بعد ربع ساعة دخلنا گعدنا چآن يفر السچينه ويعاين بينا
علي سَند: سيدي نحچي. لو تحچي؟
سرمد: صگر مناسبكم وما ادري؟
وگاع: لا وحق جدنا السابع.
سرمد: مخابرني يگول لا تشد وياه. اشو اخوكم ما ينجرع؟
علي سَند: نرش ملح حتى نجرعه.
وگاع: وآنا صدگت عندك صبر أيوب!
سرمد: ردود اخوكم يخلي ابليس يتمنى لو راكع لآدم
علي سَند: دربه درب جامع عنده خبرة بالإقناع
وگاع: زين يطلع ما يطلع بكفالة؟
سرمد: لازم بالأول نشوف تقرير التحقيقات الجنائية.
علي سَند: عدنة صلاحية نروح لمكان الجناية ويا المحقق؟
سرمد: عدكم صلاحية هو صگر يسهل عليكم كلشي.
طلعنا من غرفته وگدرنة نشوف أبيل ربع ساعة
أبيل: مو تچذب عليَّه احچيلي إيمار شبي!
علي سَند: گتلك ما بي شي بس انقهر عبن امك ما عرفته. بسبب فقدانها للذاكرة جزئياً
أبيل: اجيت اشبكها گالت وخر!
وگاع: ناسيه المره ناسيه بسبب الأبر!
أبيل: بس تتذكر ابويا!
علي سَند: اسمع شيحچي ما زين تتذكر ابوك وگت تغار هسه؟
وگاع: تدري شني! مال اطگك راشدي وابوسك
علي هذني الاجوبة ول جينوس وين چنت نايم؟
أبيل: عندي تصفية حسابات ما لازم انسجن!
علي سَند: اولهم ولد يوسف الطلعو نفسهم ولد بلقيس.
أبيل: لا يا على يا ضرغام، لا تگول ولد لالنجي طلعو من نسل الفجار!
وگاع: ميكس لالنجي وجيسو شيطلع.
علي سَند: يطلعلك خيسه مثل أصلان ويلماز
أبيل: عاينلي وگاع اذا لزم الأمر تبيع كليتك وتدفعلي الكفالة بعد دقيقه ما اگعد مسجون وهُمه دايحين بالبصرة!
علي سَند: احنه بشاربك ابو وگعه.
وگاع: اضرب مُزيل وحق جدنا السابع! عوفوني بضيمي هيّه مال اشگ بطني هو اني عايش بطرگ كليه وحده
علي سَند: راح من بالي.
أبيل: امدا حظي عبالي بس آنا فُگر تحچي صدگ بطرگ كليه؟
وگاع: وحق جدنا السابع بطرگ كليه.
أبيل: هسه شنسوي إذا جسار اثبت التُهمه عليّه؟
لازم ما انسجن!
وگاع: احنه بشاربك أبو حسين.
علي سَند: ملياانه حصى ما تجيب فلس مزنجر وحگ العباس
أبيل: مابيكم سَند كلكم حيطان مايله ولو من وجهي.
علي سَند: افااا
خلص وقتكم
وگاع: اصلآ چنا طالعين.
أبيل: خل واحد بيكم يجيب هدوم نظيفه لعبت نفسي من الوسخ!
علي سَند: بعدين اخابر أريم ترجع للبيت. و
أبيل: لا بطلت ماريد.
علي سَند: ديلا عود غيرتك عليها اكثر مني، آنا اجيبلك
أبيل: إذا هيچي قابل. بس لا تخليها تزورني.
علي سَند: اي مو گاتلة روحها عليك.
وگاع: بقيت ساكت احترم حديثكم المهم بلا زحمة ممكن نطلع؟ ورانة مصايب نحلها.
أبيل: ديلا ولو من وجهي
عفناه وطلعنا من المركز صگر بنفسه خابرني گال
نلتقي بمكان الجناية مع فريق التحقيق الجنائي لحدما.
اجو هُمه صار الظهر. چنت واگف يم سيارتي وعلى سَند بصفي. واحد نظر للثاني من وگف سيارة المحقق
علي سَند: صاعد ب روز رايز.
وگاع: كاديلاك عمه.
نزل من السياره رجعنا واحد يعاين بالثاني
علي سَند: محقق جنائي ستايله ستايل المافيا!
وگاع: تگول طالع من مسلسل بيكي بلايندرز!
وگف گدامنا والجگاره بحلگه چنه هدآم. مد إيده للسلام
علي سَند صافحه
الله حيو شباب.
علي سَند: العزيز الله محييك.
نظرلي ومد إيده
ابن الأشتر. شونك زين؟
وگاع: اسودن هلگد زين الله يسلمك
وصل صگر وگف سيارته بصف سيارة ابن عمه
عبر من يمه دگ على كتفه. اجا صافحني وسلم بالچتف
صگر: شونك؟
وگاع: مثل شوفة عيونك ما اتلاحگ مصيبة ورا مصيبه
صگر: تنحل سهله. دام أبهر استلمها
اردف الاسمه أبهر
طلع تقرير الطب العدلي؟
علي سَند: من البارحه لحد هسه ما طالع!
عادة يتأخر.
وصلت دورية ثانيه من الشرطة حاوطوا المنطقة
المحقق نزع جاكيته عافها على بنيد السيارة وگال نبدي.
هوَّ والفريق اللي وياه. بلشوا من الشارع لحد السطح، مواد غريبه استخدموا بالتحقيق. هلگد حرص على التحقيق بحيث شال خصل الشعر الواگع من سألته جاوب.
يمكن طرف مَجهول كان موجود بالخفاء.
بعدما أنهى التحقيق الجنائي. الشرطة هم أعلنت عن اعتقال المدعوة بُشرى اخذوها للمركز حققوا وياها
طلعت إيرانية عايشه من سنين بالمنطقة وگالت رجال هددها بجهالها. بس ما ذكرت اسم جسار
مع ذلك ما تم الإفراج عنها. للمُغرب بقينا بالمركز.
علي سَند راح جاب جنطة هدوم واغراض أبيل
سلمهم وطلع صعد بسيارتي. ما عدنه حل غير الإنتظار
شوية ودگ موبايلي چآن ابويا.
وگاع: خوما بيكم شي؟
جسار ناوي على واحد من الاثنين.
وگاع: ما افتهمت!
بعده ما كمل حچي شخط السيارة ومشينا
علي سَند جمع الشباب بإتصال واحد من دخلنا للمستشفى
اكل چآن ماخذ مكانه مشينا بهدوء ما بينا التوتر
وگاع: على سَند انت تروح يم غرفة الخالة آيدا
وآنا اصعد لغرفة إيمار.
راح هوَ وآنا دزيت رساله لفاضل وعاصم وعماد
ثنين يم باب المصعد وواحد ينتظر يم الدرج
اجو اخذوه امكانهم دخلت للمصعد و متوتر. ابويا گال
احتمال بعده ما داخل للمستشفى. وما ندري شلون شكله بس كل النعرفه راح يلبس مثل الدكاترة!
انفتح المصعد وطلعت مستعجل انظربت بدكتور چآن نازل ويا ممرضتين. من شفتهم ينادونه يگولون ارجع شوفه. انداريت وراي من وصلت يم المصعد انغلق الباب.
دزيت الرسالة. نازل بالمصعد و ركضت يم غرفة العنايه
هلال راح تموت من خوفها
وهدام ما يتركها او يتصرف على الاقل يطب للغرفة!
ما حچيت وياهم رأساً طبيت للعناية اول ما وصلت للمغذي سحبتها من إيده والدم يطشر من الكانيولا. أريم حاولت ما تخليه ينزف گمت جريتها بعيد صحت بيها
وگاع: عوووفيه خل ينزززف الدم كله دووااا مسمَم.
ابويا هم طلع يجيب الكادر الطبي. آنا و وَتن وحدنا ما ندري شنسوي. منا جهاز القلب يطلع إنذار ومنا أكسجين نازل لل50. أريم تبچي وتحچي عيونها على الدم المطشر
أريم: خ خلص خلص دمه خلص
سيرا ابعدت أريم واجت لزمت إيده تبچي وتحاول توگف
الدم ما ينزل من الكانيولا
سيرا: مو وگت تعوفنا إيمااار وَتان حاااچي صاحبك خل ما يعوفنا
وگاع: آنا شگلت سيراا
دخلوا هدآم هلال اول ما شافت الدم فقدت الوعي.
بسرعه شالها وركض بيها برا الغرفه بهل أثناء دخلوا الكادر الطبي كلمن اتوالى شي. الممرضه اجت شالت الكانيولا ووگفت النزف.
وما نسمع إلا جهاز القلب يطلع صوت واحد متواصل يليها
تخطيط نبضات القلب صار خط مُستقيم. أعلن عن انتهاء نبضه عاطت بكل صوتها وتريد تروحله
سيرا: إيماااار
جريتها من إيدها ليوره ابويا لزمها. أريم واگعة بجهه
وَتن يم راسه ما يوخر ولا ينطي مجال للدكاتره.
جريته بعيد اريد بس ينطي مجال ومنا حيل ما ظل بيّه بس لا إيمار يسويها ويموت! يسووله انعاش بالصدمات الكهربائيه ما فاد نبضه توقف!
ادرينالين بسرعة.
الممرضه حظرت إبرة ادرينالين اول ما أخذها الدكتور من إيدها دچها بنص گلبه. لِ ثواني. ثواني قليله فجأة فتح عيونه ونبضه رجع بس صاعد لل 110. ويتنفس بسرعه يتنفس چنه غرگان!
الكادر الطبي بقوا يسووله الازم وآنا اناظر لأحبابه.
سيرا مغطيه وجهها وتبچي. أريم بألف يا على واگفه على رجليها
من صعوبة الموقف والعجز الچنا بي
وَتن ظل ساجد لله. مسحت وجهي عيوني ما اشوف بيها
سندت ظهري عالحايط ايدي على گلبي
وگاع: دخيلك يابو فاضل
عاينت بأخويه وَتن كنبصت بصفه مسحت على ظهره
وگاع: رجع نبضه وَتن اخونا ما فارگنا.
رفع راسه شافني وحظني، اول مره وتن يبچي بهل عُمر! ابونا هم كنبص يمنا لونه مخطوف ما ظل بي حيل
لكن المظهر ثابت رآصن كالعادة.
الأشتر: رد من الموت رد من الموت.
إيمار.
التفتنا على صوت عمي الأيهم واگف بالباب وخالة آيدا
بصفه. ابويا راحله يحاول ما يخليه يخاف
الأشتر: خويا إيمار ما بي شي.
الباشا: شني مابي شي شني ماشوووف!
عُبره أجا تقدم انصدم الدم مالي المكان الدكتور ديشكل بطل دم. الممرضة تحاول تساعده يرجع يتنفس طبيعي.
بس هو عيونه واسعهن يريد يرفع إيده يأشر. عمي لزم إيده وباس جبينه. إيمار عيونه تدمع ومثل اليريد يغرگ يتنفس سريع ويعاين بالباب
كلنا نظرنا للباب امه واگفه تعاينله وتبچي ما فاهمه شي
بس خايفه من المشهد، عمي ايهم مسح على رأس إيمار
وظل يحچي وياه يگول شد حيلك يابه شد حيلك. إيمار ما ينظرله عيونه عالباب. عافه وراح حاوط أمه وخلاهه تدخل للعناية
آيدا: ايهم شوف الدم. شوف
الباشا: لا تخافين ماكو شي.
جابها گدام إيمار وضعه شوية استقر عاينت بجهاز القلب گلبه يدگ 90. وبعده التنفس صعب
لازم ننقله على غرفة ثانيه يرتاح بيها.
الأشتر: خل أمه تشوفه واخذوه.
آيدا: ايهم ابنك يباوعلي.
واحد نظر للثاني! عبالها ابن ايهم من مرته سجى
عمي لزم إيدها خلاها على رأس إيمار اللي بس دموعه
تنزل. اردف عمي بصوت محتقن
الباشا: ما تغنيله؟ روحم عُمرم جانم إيماري؟
گامت تبچي وتعاين بي. ما فاهمه شي من حچي عمي او ما متذكرة. رأساً نظرت لأبويا گالت
آيدا: اشتر لگيت بنتي؟ بنتي؟
عاين بعمي ويهز راسه للخالة
الأشتر: لا ما لگيتها بس اكيد ألگاها.
آيدا: هي زغيّره شعرها طويل وعيونها مثل ايهم أمانه دور عليها.
الباشا: يدور عليها لا تبچين
آيدا: انت بنتك معك بس انا بنتي اخذوها مني
أشتر الگالي بنتي.
الأشتر: تمام خويا بس اهدي. اريم تعاي!
آيدا: الگالي بنتي اشتر الگالي بنتي.
الباشا: كافي تبچين. آيدام كافي تبچين!
الأشتر: تمام خويا انتي بس أهدي وارجعي على غرفتچ. أريم ليش واگفه امشي ويا عمچ رجعوها على غرفتها
آيدا: هي زغيّره شعرها طويل وعيونها مثل ايهم.
عمي راد يمشيها الخاله وگفت. كلنا نظرنا ل إيمار
بألف يا على لازم طرف من شالها، اندارتله تبچي
وتگول. ما يتركني. كأنها تخاف وعدهه مخاوف
من أبسط تصرف. عمي لزم إيد إيمار وسحب شالها من بين أصابع إيده.
الباشا: ما يأذيچ يحبچ مثل أمه.
ترك إيد إيمار ورجع حاوطها مشت وياه للباب وهي تگول وين امه؟ وهو يسكت ما يجاوبها. أريم وعمي طلعوا من العنايه نظرتله وتقربت منه عيونه محمره والدموع تنزل يريد يحچي ما يگدر بسبب صعوبة تنفُسه. گالو ينقلوه على غرفه ثانيه
لو سمحتوا انطونا مجال
دخل هدآم وگفهم تدنا يم راسه باس جبينه
هَدآم: وگعت گلب اختك عليك ارحم بحالها دمع ما ظل بعينها هلگد بچت عليك.
لو سمحت انطي مجال حالته حرجة لحد هاي اللحظه.
هَدآم: تمام اخذوه.
گامت سيرا رادت تشوفه قبل لا يطلعوا هدآم جر إيدها
حظنها وباس شعرها
هَدآم: طرگاعه اخوها عليمن تبچي اطيح حظچ ترا!
اخذو إيمار على غرفة ثانيه و سيرا حاظنته وتحچي بقهر
سيرا: أي ااي حايط نصيص ياهو اليجي يطگني عبن احترمكم
وَتان: ابويا ياخذ حقچ وحق جدنا السابع ما اعديها سلامات
هَدآم: كض اخوك لا اشگ حلگه، اختي وطگيتها
وَتان: آنا لو عندي اخت من دمي ولحمي چآن انطيتك درس بالاخوة.
هَدآم: الصبر منك يا لله. ول كض اخوك لا اهد عليه.
ابتعدت تمسح وجهها هدآم رغم صعوبة طبعه إلى أنه حنون ما يبقي الزعلان منه يظل زعلان يراضيه بطريقته الماادري شلونها!
سيرا: وَتن چآ احنه دم يفزع للدم لو ناسي!
وَتان: لا وحق جدنا السابع ما ناسي چنت اقصد مثلا مثلاً
تعاي طرگاعه
الهمج تأثر وراد يحظنها هدآم سحبها ليوره ظهره عاط بي
هَدآم: گُمتتتت تتهور همممچ تُحرررم عليييك.
وَتان: أخوية والله أخوية النيه محسووبه.
هَدآم: خربنييتك كض اخوك لا انعل شكله.
وَتان: هدي شويه هدي، على الأقل نتصافح هذا هم حرام؟
وگاع: انطم وَتن انطم.
هَدآم: الصبر يا الله. شلون ابتليت. امشي وياي
اخذ اخته وراحوا على غرفة هِلال گال انطوها منوم انهارت اعصابها. احنه هم طلعنا من العنايه على غرفة إيمار بالباب ما گدرنا نفوت. الممرضين گالو انطوه أدوية ولازم يرتاح. بقينا بالباب وابويا صعد يمنا
خطيه لو نازل يم عمي ايهم لو صاعد يم إيمار وهلال.
وَتان: ابويا اجا. شايف شگد تعب وهذاك گاعد ببيته
ما گال اخويا شصار عليه! ابن اخويا مات عاش!
وگاع: نصي صوتك. ها يابه تريد شي
عاين بينا اشر على وتن
الأشتر: تستلم ولد ياسين منا لباچر اريدك تلعب جوله بيهم. ولا تگلي شمسوين. وأنت الثاني
وگاع: آمر بويا
نظرلي وتقرب حچآ
الأشتر: تاخذ سيرا بدون علم هدآم اذا گال وين تگول للبيت تبقى يم هدهده.
وگاع: يابه! لا تگولها
الأشتر: هاي هي لگفتها
وَتان: اشم ريحة عركة اجي للفزعه؟
الأشتر: لا انت تبتلي بولد ياسين خاصة هذا الارعن الأصغر
وگاع: يابه البنيه صارت مسترجلة شحده اليفك حگله من وراك
الأشتر: چآ شني متوقع غير تربيتي.
وَتان: خايف من اتزوج مرتي تتأثر بيك وما اگدرللها بالعركات
الأشتر: خاف على روحك اذا منا لثلاث ثواني ما انصرفت
وَتان: وصيتي اذا متت لا تدفني يم جدنا السابع وداعة ابو وگعه اهج من ذاك الگبر
وگاع: گبرر لفك إي والله امشي لا يبتلي بيك
سلم وراح نظرت لأبويه بعدم حيلة.
وگاع: ماكو اوبشن 2 منا منا
خوزرني وخلى ايده بيجوبه. گتله هذا هوَ ما يصير الا اليرضيك. رحت يم غرفة هلال دگيت الباب ودخلت
سيرا گاعده يم الشباك وصافنه على الأجواء بره. وهدام
مگابل هلال وگاعد. هلال نايمه وهذا يعاين بيها لو يبوس إيدها. وگفت يمهم
وگاع: شلون صارت؟
هَدآم: نصي صوتك ما تشوف نايمه؟
وگاع: دخيلك يابو فاضل. أگول سيرا. سيرا.
سيرا مو ويانه وتمسح بعيونها رحت يمها خليت إيدي على راسها فزت وگعدت عدل عالتُخم تمسح بعيونها
سيرا: ها ناديتني.؟
وگاع: اي گومي خل اخذچ للبيت بدلي ونامي الوقت متأخر، هدآم خويا قبل لا تسأل ماخذها للبيت خوش.
هَدآم: تاخذها يم هدهده مو لبيت المزرعه مفهوم.
وگاع: تأمر أنت.
سيرا: لا ما اروح ابقى هنا.
وگاع: سيرا!
اشرتلها بعيوني گومي وياي وهي ذكيه بسرعه لگفته
سيرا: تمام راجعه.
هَدآم: توچ گلتي ما تروحين! ابو وگعه اذا اعرف وراها سالفة انعل جدك!
وگاع: تنعل جدنا جمعاً، لا يضل بالك أخذها للبيت ترتاح شويه وهم احچي السالفه لأمي من البارحه سودنتني بالمكالمات
بألف يا على طلعنا من الغرفه. شلون تحقيق وتدقيق
هذا غير سالفة ال GPS. مراقب أجهزة خواته للأمان
علي گولته في حال تعرضن لأي استهداف. مشيت للمصعد وسيرا بصفي.
وگاع: موبايلچ يمچ؟
سيرا: اي هياته. هاك. فهمني اكثر وين نروح بالضبط؟
دخلنا للمصعد بقيت ساكت ما جاوبتها من طلعنا تلگاني عماد انطيته الموبايل
وگاع: تاخذ الموبايل للبيت تنطيها لأمي
بهل اثناء نزل ابويا بإيده چيس أسود وشفقة شايلها بإيده انطاه لعماد
الأشتر: تاخذ هدوم إيمار للبيت خل يغسلوها
اندار ل سيرا حاوطها بحنان الأبو كالعاده. ابتعد وخلى الشفقه مال إيمار على راسها
الأشتر: يلوگلچ طرگاعة الأشتر.
سيرا: اشتور حالف تبچيني على هل حنييّه؟
حظنته وهو محتويها. ابتعدو عن بعض وهي تعدل الشفقة
سيرا: حلوة ما؟
وگاع: تشُگ جسار مو بس حلوة.
الأشتر: كافي تلهي روحك الساعه 9!
عفناه وطلعنا عماد راح للبيت واحنه رحنا بطريقنا.
بالسياره حچيتلها كلشي من وصلنا چآن على سَند واگف
يم سيارته گدام المستودع مشينا بإتجاهه وگف فرد ذراعه ل سيرا وحظنت اخوها
علي سَند: چان حليناها بلايه ما تتعنين.
سيرا: اجيت أفهمه اليندگ بينا نحرگ شيب أبوه.
وگاع: مو خاتونة طرگاعه ول خااالي.
فتح باب المستودع طبينا وقفلناها ورانه انداريناله
چآن مربوط بالكرسي عاصم وفاضل واگفين من الجهتين
وثنينهم شايلين مضارب البيسبول. اجا فاضل انطاها
اللي بإيده. أشر گدامه
فاضل: افتتاحيه موفقة.
سيرا: ثانكس برو.
النغل ما عجبه الكلمه الاخيره وعرفني انتبهت على رد فعله. حاول يبين روحه نورمال. سيرا تقدمت وهي.
تشد على لزمة المضرب اول ما وصلت يمه ضربته بكل قوتها وگعته من الكرسي وهو يصيّح.
مدري اعاين بسيرا لو بأخويه طلعلنا من جهة الباب الخلفي للمستودع يهوس ل سيرا
وَتان: ادگ طبول للعركة واهز حيل هذوله ويامن اندگوه!
سيرا خاتون عجبها الهوسه هدت تضربه تريد تبرد گلبها بي. على سَند مصدوم مثلي ابويه لو يدري المستودن ويانه ما رايح على شغله!
علي سَند: اخوك مو راح يبتلي بالأرررعن؟
وگاع: خويا مو رحت تبتلي بالأرررعن؟!
وَتان: گلت اسويلكم أجواء، ذوله ويامن اندگو
سيرا: مَخابيل.
وَتان: ذووله ويامن اندگو.
سيرا: مَخااابيل. كسررر بإيدك تريدددد تقتله
وگاع: هَدآم لو يمسعها چآن گرونه بطول الجسر الإيطالي.
علي سَند: دسكت لخاطر جدك السابع هم زين ماكو
سيرا و وَتن ملتيهن يضربون الشخص الراد يقتل إيمار
واحنه نعاين بيهم انتبهت باب المستودع انفتح وريحة الجگاير سبقته آنا وعلى سَند واحد نظر للثاني واندارينا.
نشوفه واگف الجگاره بحلگه ورافع ردن القميص يخوزر بينا ويحچي كلمات الأغنية.
هَدآم: اي ما ننجرع من نختار كل الدنيا تعرفنا.
وَتن وسيرا وگفوه من سمعوا صوته وهذا طلع الجگاره من حلگه اشرللهم
هَدآم: كملوا لا اكمل عليكم. كملوا خل يفهم ويامن اندگ
واحد ينظر للثاني ابتسموا ورجعو يضربو اشو هذا رجع عاط بيهم وتقدم
هَدآم: دِخبزه بالگاع شني هل نعومه. دِوخر
اخذ المضرب من إيد وَتن رجع الجگاره لحلگه وهد عليه.
هو يضرب وسيرا تدفر
هَدآم: مره ثانيه تقرأ سورة الناس قبل لا تندگ بينا
سيرا: على گولة أووختي عزوزه، احنه ضد العُنف إلا في الضرورة القصوى.
هَدآم: إذا إيمار نزف گلاص دم انت اخليك تنزف بطل كامل.
سيرا سحبت الكرسي وگعدت
سيرا: تعبت. وَتن هيلپ تعال مكاني ادفره
علي سَند: وگفوه. هيچي كافي لا يروح بيها ونبتلي بالخايس.
وگاع: نسلمه للشرطه ونفضها.
هَدآم: ما غير يحچي العينتين.
كنبص گدامه طلع الجگاره شوفه.
هَدآم: احچي منو دزك تغتال إيمار؟
أو اطفيها بوجهك الخايس.
م ماا ادري ااالله شاهد ما ااادري واحد اجا عرض مبلغ گال تسوي كذا وكذا. لا أعرف اسمه ولا اعرف من وين اجاني.
هَدآم: ما اقتنعت. انتوا شتگولون؟
وَتان: اگول خل نلعن صلعته هذا مو مال عيني وأغاتي
يااا عيني واااغااتي عظم ما ضل صااحي الله ياخذذكم
علي سَند: ياخذنا للجنة آمين.
وگاع: تذكرت سؤال من زمان ببالي بس الوضع ما يساعد. بعدين
دخيييل الله تركوني.
سيرا: دخيل ابو فاضل اذا ما تنچب اگوملك مره ثانيه
وَتان: مال اسجل هاتريك جزائي بيك بس عندي الأرعن هم لازم ابتلي بي. اودعناكم وها اليحچي لأبويا اشگ حلگه سمعتواااا.
طلع من الباب الرئيسي للمستودع وهدام صاح وراه
هَدآم: تششگ حلگ منو يا ااادبسز
فاضل عاصم الحچي الكم.
وگاع: عاينت! ما يقصدك.
هَدآم: انت لا تحاچيني! عينك بعيني تچذب تگول ماخذ سيرا للبيت.
وگاع: أبويا گال لا تحچوله. ما تگلي شلون لحگتنا!
هَدآم: إيزي يا اذكياء من سياراتكم. گلت ماخذها للبيت وجبتها تاخذ ثأر إيمار؟
وگاع: عبن طبعك صعب.
هَدآم: طبعي صعب گتلي!
وگاع: و تشد گرون.
هَدآم: اخبزك بالگاع اذا تحچي كلمه ثانيه.
وگاع: وحق جدنا السابع.
علي سَند: انلاصت!
هَدآم: سيراا امشي گدامي. لا ابتلي بيچ وبيهم
سيرا گامت مرت بصف هذاك دفرته لآخر مره وراحت ويا اخوها بهدوء. بقينا احنه ويا فاضل وعاصم. عاينت بفاضل اللي چنه بومة دار راسه 180 درجه ورا سيرا.
وگاع: عاصم انت وفاضل تاخذوه للمركز فاضل، فاااضل
فاضل: أمر معلم.
عاصم التهى يشد إيد الشخص وفاضل وگف گدامي وعلى سَند چآن يحچي اتصال. لزمت زنده أخذته على صفحه
وگاع: شني فلمك!
فاضل: ما افتهم عليك معلم.
وگاع: هسه افهمك.
لزمت متونه ثبته گدامي حسيته توتر. اردفت
وگاع: مره ثانيه إذا شفتك تعاين بخواتنا اترس عيونك بارود.
فاضل: عساها بالعمى عيوني إذا ادحگ بيهن بنظرة وسخه، خواتك خواتي.
وگاع: گتلي خواتي خواتك!
فاضل: احلف بالعزيزة أمي وحليبها الطاهر!
حتى نظرتي ل سيرا نظرة اخويه الله شاهد.
وگاع: چآ تمام...
طبطبت على كتفه، اجا على سَند عاين بينا
علي سَند: بشني تحچون؟
وگاع: نرتب موضوع تسليم هذاك العار للشرطة.
علي سَند: فاضل يسلمه وعاصم وياه
وگاع: منا للصبح لازم يبقى بالمستودع.
علي سَند: ابن الحرام من شاف الفلوس ما تردد. فاضل ارجع حاول وياه بلكت يحچي
وگاع: لا ما يحچي عبن من صدگ ما يعرفهم!
السالفه ما بهل سهولة مَيجازفون هيچي مُجازفة
الشباب بقوا بالمستودع واحنه طلعنا كلمن بسيارته
للكورنيش نزل على سَند من سيارته واجاني
علي سَند: الله ما يقبلها باچر من الصبح اگابل مرتي واحنا عود أعداء واحد يكره الثاني!
وگاع: بشرفك مو تخزينا وكل ساعة تطب عليها بحجة الشغل. شويه اثگل
علي سَند: بشرفك انچب بحياتي ما ممثل شلون!
عاينت بي، وهو حك شحمة اذنه.
وگاع: چآ ياهو المثل عليها دور الرجُل النبيل المُحب للخير شهر كامل!
علي سَند: آنا.
وگاع: چا مثل دور العدو اللدود فتره وتعدي!
علي سَند: ادبرها ادبرها، انطيني إيميل نظام المراقبه و الكاميرات.
وگاع: ها كبينه!
علي سَند: للحالات الضروريه.
وگاع: خوش عود باچر جُمانة ترتب الموضوع وترسلها الك.
علي سَند: خياي يَحزام الظهر
وگاع: دِكافي لواكة مصلحچي.
علي سَند: تچايتي وضلعي الصدگ
وگاع: خوشش.
بقينا واگفين نسولف والساعه چانت 10 بعدها هو رجع للمستشفى و آنا رديت يم المركز انتظر الصُبح يطلع خل نشوف تاليها ويا هاي القضيه.
وَسن
بعدما نامن خواتي نزلت من غرفتي باوعت على باب غرفة سُعاد. ردت اتأكد اذا نايمه. فتحت الباب بهدوء
دخلت لگيتها هي هم نايمه تقربت بست إيدها تأملتها شويه
وطلعت سديت الباب بهدوء. مشيت ليم باب المكتب
خليت ايدي على گلبي اللي گام يدگ بسرعه من الفرحه
وَسن: وأخيرا بعد اسبوع اگدر احچي وياها.
اخذت نفس عميق ودگيت الباب احاول اكون حبابه وهاديه وياه. ما اريد اتخبل عليه ويغير رأيه. گال فوتي.
دخلت وسديت الباب وراي وگفت گدام المكتب مالته
وَسن: انت خليني احچي ويا بنتي واشوفها. بعدين آني
انفذ طلبك.
نظرلي مصغر عيونه كأن ما واثق بيّه
هاشم: منو يگول اصدگ تنفذين طلبي بعدما تحچين ويا بنتچ؟
بگلبي بس أگول ريلاكس لا تتخبلين عليه سايريه
حكيت طرف شفتي وطلعت الموبايل من جيب التنوره
فتحت على نظام كاميرات بيت جاسر، شوفته.
وَسن: ديحظر مفاجأة علمودي، كون متأكد اخليه على مايه ذ، مَراح اگُله عرفت حقيقة زواجنا والوهم اللي عشته بسببك وبسبب ابويا.
هاشم: تعوفين الموبايل بمكتبي.
عفت الموبايل عالمكتب گدامه
وَسن: مُشاهدة مُمتعة. هسه خل احچي ويا بنتي!
ورث جگارته وساكت يباوعلي يريد يختبر صبري
آني لا إرادياً صرت اطگ عالمكتب احاول ما اكسر عيني اللي بعينه. رمشه ما ارمش عيني بعينه. ابتسم وگال تعالي!
رحت وگفت بصفه رفع انظاره إليَّ بقى ينظرلي بصمت شويه ودار وجهه اللابتوب اتصل على المربيه الجابها جديده شويه وجاوبته. بنيه اجنبيه. گللها وين حفيدتي! دارت الكاميرا عليها چانت نايمه على بطنها وتلعب بألعابها.
من شفتها وسمعت صوتها تناغي وتگول بابا ماما
لا إرادياً احتقن صوتي لو انطق كلمه يبين العجز بصوتي.
تقربت أكثر من اللابتوب اباوع بيها ما ادري ابتسم ما ادري احاول اتمالك نفسي نظرت لهاشم بعيون تفيض منها الكره. كأن قرأ أفكاري فوراً گام
هاشم: رايح احچي مكالمه مهمه بره من ارجع ينتهي وقتچ.
بقيت ساكته ما جاوبته هزيت راسي اي طلع بره المكتب گمت وسديت الباب وراه. إيدي على گلبي اتنفس بصعوبه من القهر
وَسن: اتنفسي اتنفسي لا تضعفين وَسن لا تضعفين.
رجعت گدام اللابتوب گعدت بمكانه اتلامس شاشة اللابتوب وهي تتگلب على الچربايه بغرفة AXR
تناغي وتعضعض بألعابها فتحت المايك استجمع صوتي. ملامحي مره حزينه مره فرحانه عجزت اتحكم بنفسي
وَسن: ايمي. مام ايمي.
من سمعت صوتي نظرت للكاميرا تضحك وتگول مام
اباوع بيها كبرانه وطالع سنونها الأماميه التحت ثنين.
بعد يومين يصير عمرها سنه وشهرين.
خنگتني العبرة أشوفها شلون تلعب وتناغي.
وبس افرك رقبتي اريد صوتي يطلع اريد أبچي بس ما بيّه عاجزة.
لحظات ودخل AXR للغرفة بطرگ البنطلون يرج ممية الحليب ويحچي بلغة البلد
ايمي الحلوة راح تشرب الحليب من إيد خالو.
باوع بالمربيه وشافها تصور ايمي حاچاها گال
عليش تصوريها! المن تصوريها جيبي الموبايل
اخذ الموبايل من ايدها وشافني ابتسم سلم بإيده الشايل المميه
ها يل شگره شلونچ؟ اوكي إنتي بخير كالمعتاد
وَسن: لعد انچب تسأل وتجاوب من كيفك!
چآ مچذب غير انتي حچيچ نسخ لصق لا جديد يُذكر
وَسن: ابن البصره المُغترب يحچي بل چااا
چااا شلوون. صِدقاً جاي أتعلم عراقي.
وَسن: عوفج من هل حچي. دير الكاميره خل اشوف وجه بنتي وجه عافيه انت چنك المگرن.
چآ غير اطلع عليه ما طالع عالغريب
وَسن: AXR ما عندي وقت هوايا. هسه يرجع.
انطا الموبايل للمربيه گال خليچ واگفه مثل الستاند لا تتحركين. گعد عالچربايه شالها لحظنه وانطاها المميه. معلمها ويتفاخر!
دحگي دحگي علمتها تكضب الشسمه بنفسها
وَسن: الشسمه اسمه ممية.
تقصدين. رضَّاعة
بقينا ثنينا ساكتين اردف هو
شراح تسوين؟
وَسن: بخصوص منو؟
جونيور، هاشم.
وَسن: جونيور يدفع الثَمن ويشرب من نفس الكاس.
أما هاشم اضل وراه لحدما انعل شيطانه.
إذا ردتي مُساعده تلگيني حاظر.
وَسن: بلشت استلطفك غصب عني
شميت ريحة چذب. بس امشيها
وَسن: بحقك يا رجل.
لمحت ظله من تحت الباب، بسرعه كتمت الصوت
حچيت بالإشاره هاشم رجع. بنتي أمانه برگُبتك.
جاوبني بنفس الأسلوب بعيوني مَعليچ بيها. انتي اتفردي بالملعون أبوها.
عاف ايمي بإيد المربيه وطلع من الغرفه. بهل اثناء دخل هاشم وايمي تبچي وراه متعلمه عليه. عين عليها وعين على هاشم المستغرب
هاشم: خلص وقتچ. ايمي شبيها تبچي!
المربيه احتارت شلون تسكتها وايمي من تبچي تشد شعرها. عصبت وحچيت بنبرة عالية
وَسن: لا تسألني ااسأل روحك جايبلهااا فد فاشله ما تعرف تسكت طفلةةة!
هاشم: . وقتچ خلص اطلعي برا.
ما گدرت اناقشه لأن هذا اتفاقنا!
طلعت واني گلبي ينمرد من صوتها تبچي وتگول ماما!
رگعت باب المكتب. ركضت على غرفتي طلعت الموبايل الإحطياتي دزيت رسالة ل AXR كتبتله
وَسن: موبايلي الأول بمكتب هاشم لا تراسلني منه
وانتبه على بنتي AXR انتبه على بنتي وارجع للغرفه بعدما المربيه تنهي الاتصال ايمي موتت روحها بالبچي
آني على اعصابي وهذا اكتفى بوضع لايك.
وَسن: مُنفصم الله شاهد ما بيكم واحد صاحي كلكم لو ملبوسين لو مُنفصمين.
دزيت إيميلي الخاص ل AXR. ويا رسالة
گتله اخترق موبايلي وادخل على نظام المراقبه ببيت جاسر اريدك تسوي مثل ذيچ المره. هاشم ما لازم يدري بالراح يصير.
ارسلت الرساله وهم خلى لايك. هو راح يتصرف ماكو داعي اقلق. رجعت الموبايل لمكانه ورحت بدلت.
لبست فستان سهره باللون الأسود ويا مكياج طوخ و روج أحمر. مع كعب عالي باللون الأحمر الغامق. بقى اخر لمسه رشيت من عُطري المُفضل Miss Dior Parfum. تأملت جمالي بكل ثقة
وَسن: كُلَ ساقٍ يُسقى بِما سَقَى.
لبست الخاتم بإصبعي وطلعت من الغرفه امشي بالممر ساعه 11 بالليل بس صوت الكعب يدوي بأذني وما احس بگلبي چنه ميت!
طلعت من البيت صعدت سيارتي متجهة لبيت جاسر الليبعد.
دقيقتين عن بيتنا. من وصلت چآن منتظرني فتحلي الباب نزلت ومد إيده يريدني ألزم إيده. ابتسمت ابتسامة مزيفه
خليت ايدي بإيده
جاسر: چنچ طلقة روسية.
سايرته ودخلت للبيت الأرضيه كلها ورد أحمر
مطفي الاضويه والشموع مالية الصاله والدرج
قربني منه باس رقبتي وهمس
جاسر: وَسن آنا غرگان بحبچ.
وَسن: انجا لا تموت.
نظرلي نظره ما فاهم قصدي حاوط خصري وگال
جاسر: هاايم بيچ كلما أگول نجيت ألگى روحي اغرگ أكثر وأكثر!
وَسن: لم تَعُد مُجبراً، أنت الآن مُخيّر.
ابتعد شويه مستغرب من اسلوبي
جاسر: صايرة تحچين مثل اخوچ الغثيث!
وَسن: no حُبي هذا جانبي المُظلم.
بقى ينظرلي بنظرات كلها تَعجُّب، ترك إيدي
اردف بنبره اشبه للمقهور!
جاسر: أكو شي متغير بيچ ناحيتي. انتي بعيده عني وبارده
وَسن: ههها طبيعي أصير بارده اليحترگ تاليته يبرد.
جاسر: والله ما اعرف شمسوي بس. راح اتركچ براحتچ
إذا هذا اللي تردينه!
لزمت إيده ما خليته يصعد للغرفه تقربت حاوطته
وَسن: لا حُبي دا اتشاقه وياك شبيك مو مال شقا!
جاسر: أنتي ما ادري شلون صايرة بس أحبچ بكل حالاتچ
باسني بلهفه شويه وابتعدت عنه چآن مستغرب!
عفته وسحبت الكرسي گعدت اشوفه مجهز طاولة فخمة ومجهز الواين فتحته تحت انظاره صبيت گلاص رفعته بوجه
وَسن: نَخب قُصة حُبنا الخيالية.
شربته دُفعة وحده. صبيت مره ثانيه ورجعت ظهري للكرسي احركه ليورا واشرب. اشوفه ينظرلي بعدم استيعاب. رفعت الگلاص مره ثانيه
وحچيت بنبرة عالية ومُستهزئه
وَسن: نَخب بطولاااتك المُزيييفة.
جاسر: وَسن شجاي تحچين!
وَسن: نَخب شنو بعد بعد. اي نَخب الحُب المُدبر
ههه هها شايفه زواج مُدبر بس حُب مُدبر هاي جديدا هاي.
شربت الباقي واحرك الكرسي لِيورا. كنبص گدامي
لزم إيدي. اجته لحظة إدراك.
جاسر: وَسن. خل احچيلچ كلشي ابوچ هددني گال اذا ما سويت هيچي ما تشوف أمك بحياتك وسن انتي كلش زين تُعرفين شگد تعذبت بفراگها گالولي امك ماتت وبعد أربعه وعشرين سنه اكتشف امي عايشه وهاشم ماخذها وياه. وَسن عاينيلي.
باوعتله وحچيت
وَسن: وانت هم كلش زين تعرف شجاي اسوي لخاطر
امك تگعد من الغيبوبه. امك بصفحة واللي سويته بصفحة
لا تحاول تبرر بحُجتها
جاسر: عاينيلي لا تديرين وجهچ عني عاينيلي وسن.
لزم وجهي بين إيده وحچى.
جاسر: حگچ شما تحچين حگچ. بس انطيني فرصه ابرر واحچيلچ.
ميلت راسي بين إيده نظرتله بنظرات راخيه، حچيت
وَسن: شفت مقطع لمغنية تگول. انت لو حبيت غيري شي عادي ما يهم الگلب بعدك او بعادي، نُقطة أنتهى.
ابتعدت عنه وگمت. گام هوَ أيضا لزم إيدي جرني عليه
عيونه وخزراته تسولف قبله
جاسر: ما أحب غيرچ مااا احبهاااا.
وَسن: تريد تقنعني ما تحب بتراء!
جاسر: مُجرد مشاعر مؤقتة چنت مقهور عليها بسبب ظلم جسار. وسن طلعتها من راسي ما احبها ما احبها!
وَسن: طلعتها من راسك؟ من عرفت هي حامل وتحب زوجها!
بقى صامت نترت ايده ورجعت شلت الگلاص شربت
أشرت فوگ وحچيت مثل ما حچا هذاك اليوم.
وَسن: أنظُر إلى تِلك النجوم. چذب ماكو نجوم چانت خطة، مهما تُغطيها الغيوم، دخان المستشفى اللي انت حرگته وحرگت روحي البريئه بيها. ستظل تلمع حُرتاً حُباً تَحوم. غلط. كُرهاً تحوم اشش هذا سرر ما لازم البومة الشگره تعررفه
راد يحاوطني واني ادفع ايده
جاسر: بس ابرر الحچيته. وسن احلفچ بأمي
احلف بيها. احلف براسها چنت لا حول ولا قوة. نفذت كلام هاشم حتى اشوف امي!
لزمني من كتافي ثبتني گدامه. حچيت بصوت محتقن.
وَسن: بالوقت اللي چان گلبك يدگ لغيري. آني حبيتك حب الطرفين من طرف واحد.
جاسر: وسن حچايتچ تلچم گلبي شلون تحبيني من طرف واحد أحبچ آنا بس تأخرت حتى أدركت.
صار يتقرب ويحاول يراضيني. يگول بس وياچ اعرف شنو الحب. وياچ عشت الحب والأمان
جاسر: أنتي المئاب لروحي احتويتيني رممتي سنيني.
وَسن: تالي جازيتني بالحقيقة الكاذبة. قصتنا من كتابة هاشم. وأنت مثلت ما كتب!
ابتعد عني يحچي بإنفعال.
جاسر: هاشم الكاتب بحياتنا مو بس بحياتي!
تريدين تگووولين ااانتي حُرة وما تمشين بكلامه؟
وَسن: لا منو گال آني حُرة. آني چنت عايشه بوهم النجمة الحُرة!
جاسر: كافي تحچين هيچي وسن صدگيني وحسي بيّه أحبچ.
وَسن: كلما افكر هذا الگلب داگ بأسم غيري اشمئز من كل مره چنت وياك. كل لحظه عشتها بحظن زوجي اليحب وحدة ثانيه.
تخببل دمر الطاولة ويحچي بصراخ.
بيييييمن اااحلف ما اااحبها بكل مره چنت وياااچ انساااهم كلهم ااانسى كلشي انام مرتاح انسى صرخاات ااامي اللي طول هل سنين راافقتني.
وَسن: ومن تگعد تگول هاي شسويت لو عادي تعتبرها ظمن حقوقك!
وگف وايده بشعره من القهر يشده ويحچي
جاسر: ااالله يلعن ااابو ااابوچ شجاااي تحچيييين وَسن لا تخليني اتسووودن. ااالله ومحمد وعلى شاهدين اااحبچ.
بقيت واگفه ببرود ملامح مابيها ذرة حزن عيون.
ما بيها دموع ابتسمت بهدوء تقدمت وگفت گدامه لزمت إيده
وَسن: لا تشد شعرك چنك ايمي.
رخت ملامحه وانرسمت ابتسامه حزينه على ثغرته.
جاسر: شفتيها شلون كبرانه؟
شبكت أصابع أيدي بين إيده
وَسن: شفتها شفتها وهاشم گال بالمقابل ما تگولين لجاسر
عرفت الحقيقه. حتى تظل تسمع كلامه.
جاسر: ومثل العادة سويتي البراسچ ومقررة تخليني اتسودن يابه والله ما احب غيرچ ما أحب غيرچ.
وَسن: ليش انت شوگت عاقل. وين أكو عاقل يجر بحديده متر ووزنها عشرة kg علمود عركة انحلت براشدي من إيدي!
حاوط خصري وتغير الجو 180 درجه
جاسر: هاي قبل لا نرجع للعراق. ما هو تحرش بيچ
شني يعني اسكتله!
جرني لحظنه يحظن بقوة يريد يدخلني لصدره
لو يشم شعري او يهمس كلمة أحبچ. ابتعد كنبص گدامي يريد ينزع الكعب
جاسر: رفعي رجليچ يلا.
اعرفه شيريد. نزع اول كعب بقيت واگفه على اطراف.
اصابيعي. ونزع الكعب الثاني شالني لحظنه واحس كل جسمي يتكهرب بين ايده مَجاي اتقبل قُربه مثل الأول
ابتسمت بوجه اسايره. وكلشي يگول ويسوي ابادره بگلب ميت.
رُقيه
گعدت من النوم كل شرايين راسي ينبض والألم فضيع
بقيت بفراشي اتگلب اريد ارجع انام بلكت يروح الألم
بس ماكو فايده گمت طلعت من غرفتي نزلت تحت
ماكو احد گاعد باوعت بالساعه الموجوده بالصاله
رُقيه: ساعه 9 ليش مَحد گاعد!
رحت للمطبخ وحده من المُسِاعدات ترتب المطبخ
طلبت ماي ومسكن ألم راحت جابتلي باوعت بالشريط
رُقيه: هذا مو نفس النوع اريد بندول هذا مفعوله مو قوي.
آنسه رُقيه البندول خلص من البارحه.
رُقيه: گولي لحسن خل يروح يجيب منها
راحت تگله. واني باقيه بالمطبخ لازمه راسي واحس الشرايين راح تنفجر هلگد تنبض من الألم ما استحملت
اخذت من المسكن العادي على الأقل يخفف شويه لبين ما الحارس يجيب البندول. طلعت من المطبخ شفت باب مكتب هاشم مفتوح.
باوعت البيت شبه فارغ رجعت البنيه من برا گالت حسن راح يشتريلچ. هزيت راسي اي وسألت
رُقيه: وَدق وحبوبه سُعاد بالبيت؟
نظرتلي مستغربه حچت وهي تتبسم
مو راحن للزياره.
رُقيه: زيارة اشوگت. لعد ليش ما اخذوني وياهن؟
ليش ما گلولي؟
قبل ساعه اجيت دگيت باب غرفتچ گلت
الحبوبه سُعاد والانسه وَدق رايحين للزيارة. گلتي ما اروح.
رُقيه: آني گلت ما اروح!
حتى الانسه وَدق دخلت للغرفه حاولت تقنعچ انتي چنتي شبه نايمه وگلتي روحي ما اجي وياكم راسي واجعني ما اجي!
رُقيه: روحي جيبي موبايلي بالغرفه.
راحت تجيب موبايلي، بقيت واگفه بمكاني
رُقيه: آني گلت ما اروح!
هسه اعرف تچذب هل بنيه شلون گلت ما اروح.
جابت موبايلي وگلتلها اوگفي لا تروحين، اتصلت على وَدق شويه وجاوبت
وَدق: ها تندمتي؟ ما نرجع وعلى ما نرجع الحگينا بتكسي.
رُقيه: على كيفچ آني شوگت گايله ما اجي ما حچيت هيچ شي!
وَدق: خاف لوسيفر متلبس بيچ. بعظمة لسانچ گلتي روحي ما اجي وياكم!
رُقيه: وَدق بالقرآن ما گايله شي من هذا الحچييي
ارجعوا يلا ارجعوا.
وَدق: لچ بابا انتي بلشتي تنسين روحي اكُلي لوز.
وما نرجع اذا حابه الحگينا احنه واصلين للناصريه شنو نرجع!
رُقيه: وَدق. الو وَدق حيوانه جاوبي عزا العزااج قفلت الخط. شكو تباوعين بيه على شنو تتبسميين؟
ماكو شي اعتذر.
رُقيه: تعاي لا تروحين سؤال اخير. هاشم بالبيت؟
السيد هاشم طلع للشركه ساعه 8 مثل كل يوم.
رُقيه: لعد المكتب ليش بابه مفتوح؟
البنيه اللي تنظف البيت اجت نظفت واحتمال ناسيه تسده. هسه اروح أسد الباب.
رُقيه: لا عوفيه آني اروح اسده هم ناسيه ساعتي هناك اروح أخذه. ارجعي على شغلچ.
راحت للمطبخ واني رحت للمكتب دخلت وسديت الباب وراي. شفت موبايل وسن عالمكتب. استغربت من وجوه بس طنشت. دورت بعيوني 180 درجه اخذت النظره الكامله عنها. ما لمحت اي كاميرة مراقبة.
بس شكيت بفد مجسم على شكل الدب الأشهب عيونه مو راحه محطوط بين رف الكُتب، خاف بيها كاميرا خفيّة سويت روحي ادور بين الكُتب وضربت بيها خليتها توگع بين الكتب وحچيت
رُقيه: يبو شيخلصني من هاشم ما اقصد اوگعك اجيت اخذ كتاب اقراه.
بديت ادور بالغرفه على خزنة هاشم اليحط بيها الاوراق المهمه، وكل شويه احچي چم كلمة واگول فلان كتاب وكذا، كنبصت گدام اخر رف شفت الخزنه ورا الكُتب
رُقيه: التوجه الذهني. امم كتاب حلو.
وخر الكُتب وظهرلي الخزنة بس عليها كلمة مرور
كتبت هاشم جابر آلمياحي وطلع غلط. حچيت بيني وبين نفسي يا غبي يكتب اسمه الثلاثي ككلمة مرور!
هم زين الجهاز مال القفل ما يطلع صوت أو چآن انكشفت
من اول محاولة. بقى عندي محاولتين.
حاولت اركز أكثر بس مو گادره. احس تركيزي على الأمور نازل إلى اقل مستوى. كتبت عشوائي وبگلبي ادعي
رُقيه: عليك حُب على لفاطمة افتح افتح مو تكفرني بصاحبك.
فتحت تك عين وهم طلع غلط. عشوائي قابل شراح يطلع اكيد غلط. انوسع عيوني لمن سمعت الباب انفتح بهدوء
عطرها وصوت الكعب سبقوها. والاغرب كلامها
وَسن: ها رقرق شتسوين تدورين على كتاب؟
گمت من ورا المكتب وهي واگفه عيونها على مكان التمثال. جاوبتها و ااشر على نفس مكان الدب الأشهب
رُقيه: اي چنت مالة واجيت اخذ كتاب. أنتي شتسوين؟
وَسن: البارحه نسيت موبايلي اجيت أخذه.
حچت بالإشارة بعدي من مكانچ ابتعدت وهي كنبصت.
گدام الخزنة. تقربت منها وهي تحك طرف شفتها تفكر بالرمز الظاهر تعرفه!
وَسن: هسه آني ادور على كتاب يجنن اقريه وين راح هذاك اليوم شفته هنا.
وهي اصلآ مكنبصه بدت تكتب الرمز حرف حرف
كملت كتابته وگالت
وَسن: حُبي شوفي هذا الكتاب.
نظرت للرمز چآن 2R0W0R5W يعني حرف امي واحرف اسماءنا احنه البنات ويا تاريخ 2005. ضغطت Enter. بقى ثواني حتى صار الضوء أخظر. وانفتح الخزنة
رُقيه: عاشت إيدچ راح اقراه.
لحظات تحاظنا وابتعدت. وسن همست وگالت خل احفظ أماكن الملفات حته نرتبهن مثل ما چانن. بقت تتمعن بيها
وبعد لحظات گالت يلا بدينا ندور بين الملفات وكل شويه
نگول فلان كتاب هيچ وفلان شغله هيچ
طلعت موبايلي كتمت الصوت وبديت اصور الملفات الموجودة اي ملف اشوفه اصوره. رجعت ملف چآن بإيدي وشفت وسن هم بإيدها محبس ذهب ويا شال!
اشرتلها گلت ألمن هل محبس والشال گالت لماما.
اخذت الشال من إيدها بكل لهفة قربته من خشمي شميتها
ما گدرت عيوني انترسن دموع. ريحتها بعدهه بالشال
حظنت الشال لگلبي ووسن عيونها حزينه بس ابد ما اشوف الدمع بيهن. باست محبس امي ورجعته لمكانه
حچت همس گالت جيبيها. أخذته من إيدي بالگوه
ورجعته لمكانه، رتبت باقي الملفات وقفلت الخزنة
نظرتلي. وتقربت حظنتني. گمت وگفت وياها
هي شالت الموبايل مالتها واني اخذت چم كتب عشوائية
اول ما طلعت من المكتب سدت الباب گعدت بجهة.
شمرت الكتب وگعدت أبچي
رُقيه: دمرنا وحرمنا من حب العائلة وحب الأب والأم!
تالي ألگاه محتفظ بشال امي؟
وسن ملتهيه تريد تتصل بشخص ومتوتره راحت تحچي بالصالة. مسحت وجهي وگمت دخلت للصاله وگفت بالباب وهي منطية ظهرها للباب وتحچي ويا شخص اسمه AXR.
وَسن: AXR شايف تمثال الدب الأشهب اللي چآن بمكتب هاشم وبيها كاميرات! عنده من نفس التمثال هنا. رُقيه كشفته.
سكتت شوية ورجعت تحچي.
وَسن: تعرف شراح نسوي؟ راح ارجع للمكتب اربط كرت الذاكره باللابتوب. وانت عليك الباقي تهكره وتحذف التسجيلات!
رُقيه: وَسن؟
اندارتلي واجت سدت الباب. مستمره تحچي
وَسن: ادعي هاشم ما يكون مراجع تسجيلات البارحه!
بقت يمك رايحه هسه.
قفلت الخط و رادت تطلع وگفتها
رُقيه: البارحه شصار وتسجل عليچ؟
وَسن: رُقيه بعدين احچيلچ خل اروح هسه.
طلعت مستعجل شفتها رجعت للمكتب رحت وگفت يم الباب شالت المجسم وفككته كأنها مو اول مره تسويه!
وتحچي ويا نفسها
وَسن: آني ليش ما انتبهت لوجودچ ليش شفتچ البارحه!
رُقيه: إحتمال بعدما طلعتي هو مخليه؟
فكرت بيها وگالت هسه نشوف. فعلا طلع بيها كاميرا
اخذت كرت الذاكرة خلته بفلاشة. هنا تذكرت شغلة مر أشهر عليها! عفت وسن وصعدت على غرفتي
نشبتها ادور على كرت الذاكرة اللي بيها تسجيلات.
الليله اللي طلعت ادور ورا قصور جسار تالي التقيت بوگاع ما بقيت كتاب ما دورت بي.
رُقيه: آني وين خليتها؟ ويين
المشكله ذاكرتي صايره ضعيفه بألف يا علي
اتذكر. اخر مره اخذتها من حبوبه سعاد ورجعت خبيتها بغرفتي بس وين! بقيت ادور لحدما گدرت اتذكر
طلعت بوكس الكعب چنت مخلية كرت بكلينس ولازگته
جوا الكعب. طلعتها من الكلينس
رُقيه: ان شاء الله ما تكون خربت!
گمت بسرعه جبت لابتوبي تأكدت منها وطلع ما بيها شي.
حتى الفيديوهات اللي بيها كلها موجوده وبدقة HD.
ما تردد فورا اخذت الفلاشه خليتها بالجنطه ويا موبايلي ورحت بدلت ملابسي لبست عالسريع. مشطت شعري شديته بشكل مرتب. اخذت الجنطه وطلعت من البيت
وگفت تكسي گتله أخذني على المركز بالمنطقة الفلانية.
ربع ساعة ووصلنا شفت سيارته بباب المركز!
نزلت من التكسي رحت يم سيارته. ما بيها ومقفولة
اجيت أدخل للمركز شفته يطلع ويا الضابط صگر.
من شافني واگفه يم الباب عاف الملف بإيد صگر
واجا وگف گدامي مشغول باله. متوتر. معصب. رافض وجودي هنا!
وگاع: ليش ما تخابريني؟ ليش جايه للمركز؟
رُقيه: لو خابرتك ما چآن تخليني. لازم احچي بشي مهم وياك
صگر مر بصفنا وگال الباقي علينا لا يظل بالك
راح هو وهذا لزم إيدي أخذني للسياره فتح الباب
وگاع: مره ثانيه تخابريني مو تجين للمركز هذا مو حديقه عامه.
صعدت واني احچي بنفس النبرة المزعجه.
رُقيه: الف مره اجيت للمركز علمود موكليني. قابل اول مره.
صعد وشدلي الحزام
وگاع: غير تستقر المحامية الاستثنائية.
خوزرته وهو ساعه قريب مني بحجة الحزام اخر شي باس خدي وابتعد. مسحت مكان البوسه ونظرلي بخزره
رُقيه: مره ثانيه لا تبوسني بدون اذن
وگاع: نائص والله. نگطع بطاقه؟ لو شني
رُقيه: ديلا لا تعارك.
وگاع: آنا اعارك لو انتي! هاي وين صايره ودايرة تگول ما ابوسها اذا ما أخذ اذن. والله يا الله.
شخط السيارة مشى شويه نظرلي چنت ساكته احاول ارتب أفكاري. مَچان لازم اتصرف هيچ هو بيا حال واني احاسبه على بوسه. اجيت الزم إيده اللي عالگير
سبقني ولزم إيدي قربها من شفته باسها واردف
آنا الأسف وآنا الغلطان بس لا تزعلين.
رُقيه: باوع آني من اتوتر اگوم اجفص وانت چنت كلش قريب وهيج حچيت.
ابتسم بوجهي بعدها ضحك بهدوء
رُقيه: ههه ليش تضحك؟
تذكرت بالليلة اللي ثنينا چنا طالعين ندور ورا قصور جسار. وشفتچ للمره الثانيه بذيچ الليله شگد جفصتي
رُقيه: يااا ما چنت ادري وين انطي وجهي علمود هيج
من وراچ انشگ راسي شبر وهلال بانزين خانة انجبرت تتبرعلي.
رُقيه: هلال بانزين خانة؟
هيچي ملقبها عبن دمنا متطابق وبكل مره اتصاوب هي تتبرع.
بقيت انظرله هذا يتشاقه بالجبهة حتى كل أسبوع يتصاوب
نظرلي. اردف
جبهة أعداء عمامي. ما گلتي شني الموضوع المهم؟
العمى دوم يسمع أفكاري. گتله وگف السياره گدام الكورنيش. طلعت الفلاشة شوفته.
رُقيه: بذيچ الليله چنت شايلة كاميرا وياي بيها تسجيلات يمكن تفيدكم. وبيها غير تسجيلات بخصوص بعض صفقات جسار. چنت افتح تسجيل واعوف موبايلي بمكتبه ارجع بعدما يطلع اخذ الموبايل عليها تسجيلات صوته
وهو يحچي بمواضيع تشيب الراس.
بقى مصدوم طلع الايباد من الچكمچه خله كرت الذاكره بيها ودخل للملفات يشوف الفيديوهات ويستمع للتسحيلات.
اصدم ما عرف شيحچي.
رُقيه: ها تنفع بشي؟
هاي مو بس تنفع هاي توصله لجهنم.
تقرب لزم وجهي بثنين أيديه ويبوس خدودي بوسات حيل
ريحة الجگاير مخبوطة بعُطره
كلمة شكرا ما تكفي گلت اكافئچ بطريقتي
رُقيه: تماااام خنگتني مزقنب جگاره وخرر خنگتني.
ها صدگ والله ما ادري دقيقة ارش عطر ويروح
أنوب رش عطر ريحته أقوى اختنگت بالزايد نزلت من السيارة وآني اعطس واحچي وهذا يريد يرجع وجهي يطمئن عليّه.
رُقيه: مااا شااايف عطررر هااتسووو طيح الله حظك وحظ عطررك هااتسووو وخررر مني وخر
احتار شيسوي گام فتح زرار القميص والناس بالكورنيش يباوعون بينا هذا المخبل نزع القميص وشمره على بنيد السياره
تنحل تنحل الريحه بالقميص هياته شمرته تعاي خل اشوفچ سوده بوجه ابوچ وجسار
رُقيه: يبوو على حظي يبوو على قسمتي الناااس اتباوع
هااتسووو اتباوع بيناااا البس قميييصك لا اتخبل علييك هااتسووو لاا تجي يمي لااا تجي أحذرك.
رحت وگفت گدام المحجرالحديدي اذا ما اشم الريحه والدخان اصير احسن. اشو لحگني وچان يزرر قميصه الأسود بينا مترين
رُقيه: لا تجي يمي. شوية هدأت الحساسية لا تهيجها!
آنا الأسف وآنا الغلطان بس لا تنقهرين. هسه احلها
درت وجهي ما اباوعله اشو الشباب إلى بالكورنيش صاحو
راح ينتحر ينتحر. شفته عبر المحجر الحديدي
بركضه سريعه چيت بالشط
رُقيه: لا انت مخبل رسمي. مخبببل اااطلع ولكم ااالحگووووه راح يغرررگ.
طلع راسه من تحت الماي وصاح
كلشي أله حل هسه تروح ريحة العُطر.
رُقيه: و تروح ااانت وياااه اااطلع لا تغررگ اااطلع شلون ابتلينا.
سبَّاح ماهر لا تخافين. بس شوية الماي بارده.
أنوب يسبح بهل شتا والناس التمت تباوعله
وحق جدنا السابع اليصور اكسر الموبايل على صماخه.
تجمدت والله تجمدت حمام روسي في قلب بصرة الفيحاء.
رُقيه: دخييلچ مولاتي فاطمه دخيييلك يا علي. يمكن لان اااحنه هسه بأخر يوم من شهر 12واحتمال تُمطر بأي لحظه؟
فرك رقبته ويا القميص
هسه يروح العطر وما يزعجچ
بنيه ويا شاب وگفو بصفي البنيه حچت وگالت عايني شلون خاطر علمودچ
رُقيه: هذا يدري بروحه شمسوي عود ديصحح غلطه.
حچت وياي بهمس وگالت على الاقل يصحح غلطه مو مثل اللي عندي يذب الصوچ بيّه . الشاب حچآ بنتر وياها وراحو. بهل اثناء أبو گاع صعد الكورنيش كله ماي ويرجف رجف تقربت منه
رُقيه: إذا ريحة العطر بيك تروح تچيت من الجسر الإيطالي هل مره.
يشهد الحسين راحت الريحة ما ظل.
چنت اشم ريحة العطر بس مو هلگد قوي.
رُقيه: ماشي حالك. وين تروح هسه تمرض.
رجع شعره ليورا ويگول هسه ابدل!
رُقيه: شتبدل لا تخبلني بالشارع!
لا بالسياره عندي قاط احطياتي. والجامات مُظللة
عافني ورجع للسيارة اجيت ألحگه تذكرت رايح يبدل
رُقيه: ثول شبيچ تركيزچ وين هو راح يبدل انتي شكو شتسوين!
خمس دقايق ورجع يمي لابس قميص أبيض وبنطلون أسود چآن يشد حزام ساعته وعطس گال الحمد لله
رُقيه: يرحمك الله. تفضل هسه هاي تمرضت.
تمرضت من وراچ مس هااتسووو
رُقيه: لا تستهزء وانت بهل حاله
وحق جدنا السابع ما مستهزئ من صدگ عطست امشي امشي للسيارة.
طول الطريق وهو يعطس انوب ريحة العطر ما راحت من السيارة صرنا ثنينا نعطس وصلنا عند إشارة المرور
طفل دگ الجامه يبيع كلينس
رُقيه: دشتري منه خلصنا الكلينس من ورا مصايبك
نزل الجامه واشترى ثنين منه ومد ايده طلع العطر من الچكمچه انطاه. گله هذا الك.
رُقيه: بعديش مو طيح حظنها هل عطر الخايس
هل خايس حقه 200 ألف
رُقيه: تتشاقة. ريحته قويه هسه تطلع خلط ومقشمريك بيها.
خوزرني ورجعت حچيت.
رُقيه: ريحته قويه وفواحة اصلا توقعت تكون ماركة.
ما ادري شلون خلص اليوم وياه شويه نحب بعض شويه نتجادل شويه نخوزر بعض اخر شي من نزلني يم الباب
گال.
بعد عطلة راس السنة جلسة المحكمة وان شاء الله أبيل يطلع براءة منها. أول ما يطلع فورا نحظر للزفه مالتنا.
رُقيه: زفة ايش لعد وابن عمك؟
ابن عمي لذاك الوگت يتحسن ما لازم يتأجل الموضوع أكثر.
رُقيه: مو جنك مستعجل هوايا شنو السبب شكو بعد هذا الأسبوع؟
ماكو شي بعد هذا الأسبوع. اريدچ مرتي وتنوري بيتي شمعنى نأجل الموضوع؟
رُقيه: ها هيچ.
باس خدي وهمس اي هيچ ابتعدت ونزلت من السياره
ودعت من راح دخلت للبيت طلع ناجي بوجهي بينا متر واحد عيونه نظراته خزراته مو طبيعي شگد متغير مو ذاك ابد. قبل چنت اشوف شوية نور بعيونه هسه ظلام
نظرات مليانه حقد ينظرلي
ما حچآ وياي فورا تجاهلني وطلع.
من دخلت شفت ودق وحبوبه توهم واصلين
رُقيه: ناجي چآن ماخذچن للزياره؟
وَدق: اي لعد منو ياخذنا. بس تدرين كلش متغير
ما حچآ كلمة ويانه.
سُعاد: انتي وين چنتي منو رجعچ؟
رُقيه: وگاع رجعني. افترينا شويه.
وَدق: لازم ما عنده شي. هذا وتن من البارحه مگابل إيمار يگول للحظة چآن مات لوما ابو گاعج لحگه!
رُقيه: ها اي والله صحيح هم زين تلاحگه
اصلا منهن دريت واذا گلت ما چنت ادري وَدق تصرعني وتگول صيري مثلي خليه يحچيلچ كلشي.
عفتهن وصعدت غرفتي.
ال بتراء
باوعت بالساعه 12 الظهر اخذت نفس عميق.
السيارة اللي اجيت بيها وگفت گدام الشركة. وسيارة أصلان لحگتنا وگفت ورانا
السايق فتحلي الباب ونزلت رجلي لبست النظاره وطلعت من السياره عدلت الجاكيت على كتافي گلبي يدگ دمام والمظهر الخارجي سيدة أعمال مغروره وما شايفه گدامها
بتراء: لا يفوق الاسمها تالا
السايق گال ما سمعت طلبتي شي ابتسمت بتسليك گلتله انطيني الجنطه من السياره. انطاني الجنطه واصلان اجا بصفي.
أصلان: حفظتي التقديم البياني بخصوص الاسهم؟
بتراء: حفظتها من اول قراية
أصلان: ها يعني ريدي؟
بتراء: دمشي وراي ولا تسمعني صوتك المكروه
أصلان: أمَّان.
اخطي خطواتي واحس الموضوع كلش صعب شلون نعادي بعض! شلون الشغل راح يمشي! دخلنا لبناية الشركه
الكل حول انظاره علينا. اني واصلان بصف بعض واسمعهم يهمسون
هاي مو مرت المدير الجديد ليش جايه ويا هذا الرجال؟
ولج مرته طلعت بنت عدوهم وعافته.
بس انا سمعت الاستاذ رماها عند خوالها.
بتراء: وآني سمعتكم يا حلوين.
تقدمت رحت يمهم نزعت النظارة باوعت بيهم
بتراء: مطرودين، أصلان وضف غيرهم.
رجعت نظارتي ورحت بإتجاه المصعد واسمعهم
بصفتهااا منوو تطردناا
أصلان: بصفتها المديرة التنفذية بحصة 75 بالميه.
بتراء: لاني تعال. بدون إعطاء تبريرات.
اجا وراي للمصعد سد لباب وأخذت نفس بالراحه وهذا ينظرلي. عدلت الجاكيت على كتافي
بتراء: دير وجهك الخايس.
اصلان: مبين عليچ ما تفهمين شي بالشغل!
بتراء: صدگ هيچ مبين؟
أصلان: مبين مبين.
بتراء: اي غير خالك الخايس هو السبب
أصلان: اي خايس منهم هُمه ثنين.
بتراء: الخايس جسار منو غيره
ديلا انت ترتب الأمور.
أصلان: چآ شويه عامليني بإحترام او ما ارتب الأمور گدامچ.
بتراء: غصبا ما عليك ترتب الأمور او ادندن يم هاشم اگله ابن اختك ام البرستيجه يهدد.
أصلان: تحچين بأدب واحترام عن امي.
بتراء: خربحتى عصبيتك بيها برستيج مثل امك. انفتح المصعد دير وجهك ولا تحچي.
صار يدخن من المغثه ومجبور يسكت مشينا وهو كأنه يعرف كل زاويه بهل شركة گال خامس غرفة غرفة الإجتماعات وفعلا وصلنا يم باب الغرفه السكرتيرة وگفتنا
ميس: منو حظراتكم. اتأخرتوا الإجتماع بلش!
تدنى يحچي وياها
أصلان: حظرتها المُديرة التنفيذيه لأكبر حصه بالشركة. وحظرتي مساعد المديرة
السكرتيرة نظرتلي بتمعن
ميس: انتي نفسها زوجة المسيو على سَند؟
دگيت إيدي على مكتبها اخوزر بيها
بتراء: لا تخلين خشمچ يطلع من وجهچ.
عفتها بصدمتها ورحت للباب لزمت اليدة دخلت لغرفة الإجتماع واصلان وراي عم الهدوء من سمعوا
صوت خطواتي على سَند چآن منطي ظهره للباب ويشرح
المخطط البياني للأسهم
فجأة سكت صار يفتح قلم الجاف ويسده يفتح ويسده
تقدمت بإتجاهه وگفت وراه وأعضاء مجلس الإدارة على وجههم علامة استفهام. اندارلي نظرلي فوگ تحت قيم ستايلي وخوزر بيّه
أخذت القلم من بين أصابع ايده عُبرت بصفه أخذت مكانه
بتراء: كما ظاهر في المخطط البياني للأسهم.
ارتفعت الاسهم بشكل ملحوظ ففي الشهر الماضي نسبة 25 ارتفعت إلى 50 وبعد جلسة الأسبوع الماضي تضاعفت إلى 75 %.
هذا لا يُعقل...
قريت اسمه من گدامه ارثر
بتراء: مسيو آرثر هذا سوق التداول. ينزل الصاعد ويصعد النازل.
علي سَند: يعني قربيا تنزل اسهُمكم مثل ما صعدت.
بتراء: هه لا ما ينزل يتضاعف. انتظر وشوف بعد شويه
السيد الأدهم كيف باع حصته لبيت جسار ممكن حد يفهمني.
نظرله بإتزعاج جاوبه وگال.
علي سَند: باع حصته وصار إلى صار. الاجتماع انتهى
بتراء: ويت ويت، . كلمتك ما تمشي نمله بهل شركة.
شمرت القلم بوجه وهو لگفها رحت بإتجاه الطاوله أصلان سحبلي الكرسي
بتراء: ثانكس لاني
گعدت بمكان رئيس مجلس الإدارة قريت اسمه على
اللوحة الأستاذ على سَند رئيس مجلس الإدارة الجديدة .
بتراء: لاني جيب لوحة عليها اسم المديرة الأجدد من الجديد.
اصلان: كلشي جاهز.
دخل واحد للغرفة چنت شايفته يحرس حديقة البيت.
بس لا جسار مخلي هذا جاسوس ورانا او بالشركة يتجسس. دخل وشايل بإيده لوحة جديده على سَند اجا بصفي تدنى عيونه تجدح نار
علي سَند: جسار كبر راسچ علينا؟
بتراء: آني خليتكم براسي إلا ادفعكم الثَمن غالي.
أصلان أخذ اللوحه من إيده وخلاه گدامي
بتراء: مسيو على سَند اقرأ اسمي واعرف حجمك بهل شركه.
قرأ اسمي المكتوب بخط عريض
بتراء الجسار المديرة التنفيذيه ورئيسة مجلس الإدارة الجديدة شالها و رگعها بالگاع.
علي سَند: اول مره اشوف مأسورة لسنوات بإيد ابوها
تسند ابوها!
بقيت انظرله عجزت اجاوبه درت وجهي لباقي الاعظاء
بتراء: اللي يكمل شغله بهل شركه تحت إدارتي يا مرحبا بي والما يكمل. آني شراية للأسهم.
گام ارثر
أنا انسحب من الاستثمار. واعرض الاسهم للبيع
واحد منهم تركي اسمه يانور مدري يامور هم گام
انسحب من هذه الشركة. والأسهم للبيع.
بتراء: أستطيع أن أقول. تم شراء الأسهم من المسيو آرثر والمسيو. لحظه اقرأ اسمك مره ثانيه. مسيو يامور
گام هذاك اللبناني اسمه اديب
am so sorry. مسيو على سَند. بنسحب من الاستثمار.
علي سَند: بينا عقد موقع الموضوع مو بهل بساطة اديب!
بنسحب من العقد وأنت فيك تاخذ الأسهم بنسبة 5% انا مش ممكن اخسر أكتر من هيك!
بتراء: إذا المُتبقي؟
البقيه كلهم ظلو وأهم ثلاثي بين المستثمرين طلعوا من الشركه. رجعتي ظهري للكرسي.
بتراء: هسه اگدر أگول الإجتماع. إنتهى.
طلعوا اعظاء الإدارة نظرت للشاب بعده واگف
وعلي سند متخبل ما يعرف شيگول شنو يتصرف
بتراء: تعال انت شسمك؟
وگف بصفي اعرفه من زلمة جسار
مُنذر
بتراء: مُنذر. مُنذر ممكن تنصرف هذا مو چاي خانه هذا غرفة اجتماعات.
طلع من الغرفه واصلان سدت الباب على سَند وگع شكو شغلة عالميز ويحچي بصراخ
علي سَند: بتراء مستوعبة شسويتي!
أصلان: نصي صوت خاف منذر بره
هد عليه ضربه بوكس خربط ملامح وجه.
علي سَند: أنچب.
اخذت نفس عميق وعلى سَند فقد من العصبيه
علي سَند: دمرتي الشركة دمرتيها من اول اجتماع ألچ.
بتراء: هذا المطلوب تتدمرون.
انخطف لونه اجا وگف بصفي رفعت عيوني نظرتله. تدنى وشاف أصلان يباوع بينا. ابتعد وراحله يدفع بصدره ويطرده
علي سَند: ولي اطلع بره. ولي ااطلع بره لا انعل أبوك
أصلان: بتورة لا تتأخرين انتظرچ بالمكتب
ضربه بوكس ثاني
علي سَند: بتراء اسمها احچي عدل لا اگص لسانك.
راد يردله الضربه بس تراجع عنه! وحچا بِتَوعُد
أصلان: بسيطه بسيطه.
بتراء: لا تنغش بوجهه الحلو طبعه بارود. كلمة ثانيه ويطلع بروحك. لاني
علي سَند: ااطلع يا نالي لاني نعاالي ااطلع لا أكفر بيك وبيها.
طرده بره وحچة شي ويا السكرتيرة. رجع دخل للغرفة قفلها وطلع جهاز من جيبه طفى نظام كاميرة المراقبة بالغرفة. تقدم وهو ينزع جاكيته رخى الگرافة من رقبته
و فتح اول ثلاث زرار تدنى خلى وجه بوجهي.
علي سَند: عيدي شگلتي قبل لحظات؟
بتراء: لا تنغش بوجهه الحلو طبعه بارود. كلمة ثانيه ويطلع بروحك. لاني
علي سَند: گلتي هذا المطلوب تتدمرون.
خوزرني وابتعد يضرب ايده عالطاولة يحچي بعصبيه
علي سَند: خاااف من صددگ معااديتني خاف جسار غسل عقللچ!
كل جسمه ينتفض من العصبيه يخوزرني خزراته توتر أكثر من حچيه
بتراء: باوع، باوع ترا خانني التعبير چنت اقصد أگول هذا المطلوب حتى جسار يصدگني
علي سَند: تدرين شني.
بتراء: لا ما ادري شنو.؟
علي سَند: لعنة الله على ابوچ خوش.
بتراء: خوش.
بقى حاير شيسوي يجي ويروح محتار
علي سَند: منا للأسبوع الجاي نفلس. كل الأسهم تصير بأسم ابوچ ال. من وراچ ثلاث مستثمرين مهمين انسحبوا. شسوي هسه شسوي بييچ؟
نزعت الجاكيت وگمت تقدمت بإتجاه باوعلي فوگ تحت ابد مو راضي عن لبسي
بتراء: هسه احظني ما تسوي شي ثاني.
تقربت مررت ايدي لخصره وحظنته ثواني وما تردد حظني بكل قوته، يشم رقبتي ويبوسني.
شهل لبس هذا
بتراء: جسار جابهن شسوي اسايره.
والنعال أصلان؟
بتراء: عود مساعدي.
تگليله لاني!
بتراء: اسم دلعه
اسم نعله. نعلة على ابوه وامه نسل القنادر
ابتعدت عنه وگلت خل اشرحلك
بتراء: الأسهم اللي اشتريها من المستثمرين ينظافن للنسبه وتصير 80% من اول اجتماع. جسار راح ينبهر بيّه
علي سَند: وآنا انبعر بيچ. ناويه تخليني اطلع من الإسلام؟ من اول اجتماع طاح طيح نخسر هلگد!
بتراء: شبيك يروح ثور مدري ارثر يجي عشره مستثمر بمكانه.
علي سَند: وانتي تبعريها!
بتراء: هسه غير يخف علينا الحلو
علي سَند: صايره صلفه تحچين طگ بطگ!
بتراء: من ورا جِدالاتي مع ام البرستيجه بلقيس
علي سَند: دِ خل ادفعچ ثمن طولة لسانچ بالأول.
بعدين انعل سُلالتها الخايسه هي وابنها الخايس چنه يهودي.
ال عَزّه
كملت الاجتماع وطلعت شفت وسن جايه وبمكتبها
اليوم داومت متأخره! وحتى اجتماع ما حظرت
انطيت الملف للسكرتيرة مالتها
عزّهَ: خل توقعهن.
اجيت امشي فتحت الباب الموبايل على اذنها وحچت
وَسن: تعاي حُبي نشرب كوفي ونحچي.
عزّهَ: ونكرز حب شمس. اي بسطة بفرعكم مو شركة
وَسن: لينا جيبي چاي وحب شمس. عزوزه حُبي اعشق مُقترحاتچ فوتي.
اجت كضتني من زندني شگد كرهت تصرفها بس ما نترت ايدها گلت خل ما اهينها گدام السكرتيرة.
دخلت لمكتبها وسدت الباب وشمرت الموبايل عالتُخم
عزّهَ: مرة ثانيه إذا تلزميني هيچي اكسرها لإيدچ. شتريدين شعندچ غردي!
وگفت بطريقه مُثيره لابسه تنورة گصيره وضيكه
عليها جاكيت أطول. حچت
وَسن: حابة اسوي حفلة.
عزّهَ: من جماعة ميري كريسماس! شلون راح من بالي. روحي سوي حفلة وديحي آني شكو؟
وَسن: نديح سوا. افف انتي ما فتهمتي عليّه اقصد
مو بتراء تمشي بخطة هاشم عود يوگعون جسار
آني حابه نوگع الاخين. يعني كش ملك اثنين في واحد.
تعابير وجهي صارت صدگيه
عزّهَ: بنت هاشم جاي تحچي؟
وَسن: لا. البومة الشگره جاي تحچي. اريدهم واحد واحد يحترگون
دخلت لينا وجابت الچاي وحب شمس عافتهن وطلعت
گالت اگعدي خل نحچي، گعدت وهي گعدت خلت رجل على رجل تكرز حب شمس. مو طبيعيه ما اعرف شحجي عنها
وَسن: تفضلي انتي هم.
عزّهَ: ما اريد ثانيكو. احچي خلصيني
وَسن: ok. الشركة شركة عمي وعمچ ابو زوجج لا تتقيدين
اخذت من إيدها. منك الصبر يا الله
عزّهَ: احچي خلصيني واذا چنتي تلعبين بذيلچ اطيح حظج
وَسن: شبيچ حُبي ما تتحاچين ابن عمي شحاب بيچ.
عزّهَ: وَسن كضي لسانچ لا اكفر بيچ.
وَسن: اوك am sorry. حابه اخذ حقي من هاشم وجسار ثنينهم اذوني.
عزّهَ: وما لگيتي غيري تبليها!
وَسن: جاسر گال عليچ نچره شبيچ متردده وخايفه؟
تقربت حچيت بوجهها.
عزّهَ: آنا اخلي عيني بعين الشمس وما اكسرها.
وَسن: چا خلي إيدچ بإيدي ضد اعدائنا المُشتركين.
رجعت ظهري للتُخم گلبت عيوني بنفاذ صبر
عزّهَ: شكو براسچ.
وَسن: براسي حفلة باربكيو. شِواء.
عزّهَ: براس السنة؟
وَسن: no ما نلحگ. لازم نشويهم على نار هاديه.
الاريده منچ توافقين على شراء الأسهم مالتنا.
عزّهَ: لا انتي تسودنتي. الأسهم مالاتكم اسهم هاشم. نسبة 50 بالميه اسهم هاشم!
وَسن: واني أريده يخسرهن. اصلا هو عنده امبراطورية بالخارج هاي مجرد مُقبلات. يريد يغث جسار بيهن. فأريدچ شويه شويه تخلينا نخسر الأسهم بالسوق
عزّهَ: شراح تستفادين؟
ميلت راسها تلامس طرف شفتها
وَسن: شويه أبرد گلبي بهاشم.
عزّهَ: شسوا بيچ حتى كارهتيه؟
وَسن: حارمني من بنتي. أنتي شسوا بيچ ابوچ؟
عزّهَ: مصيبتچ اهون مصيبتي من ورا ابوچ وابويه
تخلى عن اختي علمود شويه املاك. وبعد 12 سنه ابوچ بعده رافض يرجعله بنته.
گعدت عدل وعافت الحب شمس من إيدها
وَسن: ما فهمت هاشم شمسوي. مشتري اختچ من ابوچ؟ مقابل املاك وسُلطة؟ لاه لاه لاه يا قليل الأصل.
خوزرتها وگمت ردت اطلع ما خلتني
وَسن: sorry. و فهميني وينها البنيه ليش توني اعرف الحقيقه؟
عزّهَ: تسوين روحچ ما تدرين عود جاسر ما حچالچ. او انتي ما شايفه البنيه!
وَسن: وغلاة بنتي ما اعرف بالسالفة عزّهَ تحچين صدك اختچ بإيد هاشم؟
عزّهَ: لا حبيت اسايرچ بمصيبتچ.
وَسن: ترا والله ما ادري بالموضوع اصلا ما شايفه البنيه!
عزّهَ: وَسن إذا حابة نتساعد نتساعد بشرط واحد تنطيني
عنوانها!
وَسن: ما اعرفها والله اكيد هاشم منطيها لناس يربوها
بس خل اوعدچ. ادور وراها اذا ساعدتيني.
عزّهَ: افكر بالموضوع.
عفتها وطلعت من مكتبها تلگاني عزام الجاي بإتجاه مكتبها
عزام: گالتلي بمكتب وسن. خير شبيچ؟
عزّهَ: خل نطلع وبالطريق احچيلك.
طلعنا من الشركة ساعه چانت بال6 ونص المُغرب.
طول الطريق حچيتله كلشي وسن اقترحته
عزام: هاي تلعب بالنار. شني كش مات اثنين في واحد
عزّهَ: مالّة وتريد تسوي حفلة باربكيو. ناس تدور على الطلايب
عزام: شگلتيلها؟
عزّهَ: گلت افكر بالموضوع.
عزام: وافقي.
نظرتله استغربت من كلامه
عزّهَ: تحچي صدگ انت!
عزام: اي صدگ ليش ما حابة نصفيهم عالحديدة مثل ما جسار ديخطط؟ إذا احنه نسوي مثلهم بس اثنين في واحد
جسار وهاشم.
عزّهَ: هاشم عنده امبراطورية بالخارج ما يأثر بي.
عزام: الهدف ما يكون عنده شي بالعراق. يخسر كلشي
رجعت راسي للمقعد المصايب ناقصنا وندخل بمصايب جديده ومن اختيارنا. انتبهت عليه يسوگ ومد ايده تلامس ايدي
عزام: لا تفكرين بشي ارتاحي.
عزّهَ: تدري شني بالي يم إيمار. خل نروح نزوره وهم متحمسه اشوف الخاله آيدا أريم دزلتي صورة من بعيد بس حابه اشوفها وجه بوجه.
ظل يراقب المرايا وحچا
عزام: ما نگدر.
عزّهَ: شني ما نگدر؟
زاد السرعه وخلى إيده حاجز بيني وبين دشبول السيارة.
السياره افترت مرتين بنص الشارع ورجع خلاها تمشي عدل وآني من الهبطة عجزت احچي او اصرخ
ولد ياااسين شووكت يعتقونا؟
عزّهَ: بسس انتبه عزام انتبه.
بس اريد افهم ياسين على شني ناوي ليش هلگد يكره ولد عمه لييش!
ياسين وولده حالفين يثبتون انه الدم يصيرماي حالفين!
عزّهَ: عداوته ويا ابن عمه الأدهم اااحنه شكووو عزام ااانتبه
سيارتين يلحگونا يريدون يتسببون بحادث حتى محد يشك.
سياره عبرتنا وبقى وحده لمن شفنا سيارة الشرطة بالطريق بطل يلحگنا. خليت إيدي على گلبي احاول يرجع ينبض طبيعي. وعزام ما وخر إيده من گدامي
عزام: لازم هَدآم يلگالهم حل!
عزّهَ: يا عيني عليك ما لگيت غير هدآم. يروح يهد عليهم بالتفگ والعباس.
عزام: لا آنا اگله شيسوي.
بعد هل هبطة ياريت ينحل موضوعهم. وصلنا للبيت
ودخلنا ما صدگت اخلص من سجى هل يومين. اجتي بلقيس ام البرستيج على گولة بتراء. تلگتنا بالباب.
بلقيس: هاا وين چنتوا؟
عزام: ها شعليچ؟
عزّهَ: فعلا ها شعليچ؟
بلقيس: بيت مو فندق.
عزّهَ: چا لا تصيرين رسبشن.
عُبرتها وعزام من وراي هم گللها چا لا تصيرين رسبشن صعدنا للغرفة بدلنا وانزلنا نتعشى بقت بس بتراء
ما نازلة توها رجعت راحت تبدل، شوية ونزلت جسار عيونه علينا وعلى نظراتنا دخلت بتراء وهي تمسي بالتُركي احسها انعدت من أصلان
بتراء: yi akamlar.
الكل جاوبها إلا آني وعزام سوينا روحنا ما معبريها.
گام يلماز سحبلها الكرسي وعزام شد ايده على الچطل
يلماز: تفضلي يا احلى مسا.
بتراء: ثانكس يلو. بس هذا ما يعني اسامحك على التحرش الصباحي.
أصلان غص بالماي، بلقيس وسعت عيونها مصدومه عزام بألف يا على ساكت على الموضوع، يلماز من التوتر گام يبتسم، اما جسار نظر لبتراء اردف.
جسار: يلماز ازعجج بشي؟
أصلان: لا يا خال اكيد بتراء تتشاقه صح بتراءء.
بتراء: يوك يوك. اخوك مو لحگني للسطح وحاول يحظني من ورا لو چآن يريد يشمرني من فوگ هيي چنت تريد تقتلني يلووو؟
يلماز گمز يريد يبرر
يلماز: يمييين عظيم ما ردت اقتلچ لا تبليني ما ردت اقتلها لاني احكييي
أصلان: يحب يتشاقه. اگعد.
بلقيس: يتشاقه والله دوم يسويها وياي.
بتراء: ابنچ مريض ومتحرش مو مهرج سيرك.
بلقيس: احچي عدل.
جسار: ابنچ العار باچر الصُبح يسافر بأول طيارة.
يلماز عصب وما يگدر يحچي منا أصلان يسكته ومنا امه
عود گام وطلع
بتراء: يبقى أو يظل ما احسبه بقُندرتي، لأن دگيته خوش دگ ضربته ضرب مُبرح.
عزام: خوش. عبالي تتقبلين الوضع.
بتراء: آني مو امك واتقبل الوضع. صدگ وينها؟
عافتلك البيت دادي؟
يتأمل بتراء الگاعده وتحچي بهل قوة. جاوبها
جسار: يم صديقتها. ما تعوف بيتها
بتراء: قِصة حُب وحرب. اتس نورمال.
بلقيس انسدت نفسها عن الأكل من ورا بتراء وعزام.
يسوي روحه يتعشى، رادت تگوم لزمتها من زندها
بتراء: عمة يا عمة يا عمة. اگعدي خل نحچي بالإنجازات اللي سويتها بأول اجتماع لإدارة المجلس.
نترت إيد بتراء وگعدت.
بتراء: خوش. بأول اجتماع مجلس إدارة گدرت أضيف نسبة 5%من أسهم المُستثمرين على الأسهم مالتنا. صار ألنا 80% من الشركة.
فعلياً انصدمت. عزام شمر الچطل وگام
عزام: انتوا على شني ناااوين؟
بتراء: ناوين ندمر بيت الباشا.
گام وطلع
عزّهَ: تتسممون بالعافية.
عفتهم وطلعت على غرفتي دخلت شفت عزام يحچي اتصال واضح ويا على سَند.
عزام: شلون تسمحلها هاي شجاي تسوي؟، عفيه عليك هي هيچي تسلمه الشركة على طبق من ذهب. تحلها؟
خل تجي آنا احچي وياها. مَعليك بيها اختي وشلون ما احاچيها احاچيها.
أنهى المكالمه نظرلي اعصابه نار بس يريد يتمالك نفسه
عزام: آرثر واديب ويامور طلعو من الشركه!
و العينتين يگول مرتي تحلها مثل ما توصلها.
عزّهَ: هسه تجي ونتفاهم وياها، أهدى شبيك تحلها يعني تحلها
راح للحمام وبهل اثناء اندگ باب غرفتي رحت فتحت ودخلت بتراء
بتراء: ييي ما عرفت شلون صعدت وينه عزوم؟
عزّهَ: بالحمام هسه يجي.
طلع عزام من شاف بتراء گاعده بالغرفة اجاها معصب يريد يرزلها
عزام: تعاااي فهميني شهل مهزلة؟
گامت هي حظنته بقى محتار شيسوي يبقى على موقفه لو يحظنها
عزام: شني يعني.
بتراء: يعني احظني بوسط ظلامهم لا تخليني بوحدي.
نظرلي ومحتار اشرتله بعيوني احظنها. فورا حظنها
ويبوس بشعرها.
عزام: انطي رگُبتي وما اخليچ.
لا صدگ طلعت مو سهلة وگدرت تخلي عزام يهدى، ابتعدت عنه وهي تگول خل اشرحلكم الخطة
گعدت تحچي ومن كملت احنه هم حچينا بموضوع وسن
بتراء: فرصة ما تنعاد. و
سكتت أشرت على الباب وهمست ام البرستيج تتسمع علينا. گامت بهدوء راحت فتحت الباب وجرتها للغرفة
بلقيس: هاي شبيييچ
بتراء: أُم البرستيجه تتسمعين عليناا؟
عزّهَ: والله عيب تخزين.
عزام: عركة نسوان ما علينا.
گام ومن عُبر بصف بلقيس گللها ام البرستيجه
ثنينا تعلمنا من ورا بتراء وكلماتها الغريبه عافنا وطلع برا
سدت الباب ولزمت بلقيس من زندها
بتراء: بشنو چنا نحچي؟
بلقيس: اانعل ااابوچ هديني
بتراء: وآني انعل سلف سلفاچ جاوبي.
بلقيس: گلتي فرصة ما تنعاد ما سمعت غير شيي توني اجيت
بتراء: اوووه صدگت. اااحلفي؟
بلقيس: ورااس أصلان.
عزّهَ: نعلان ماهو ابنها المدلل أحلفي بيلماز
بتراء: ههه عزوزه متطورة.
عزّهَ: والله من اجيت لهذا البيت تعلمت كلمات تَليق بأصحابها.
بتراء: لا تباوعيلها. باوعيلي لو اعرف مره ثانيه تتسمعين علينا اجرچ من هل شفقه مدري قُبعة مالتچ وامسح الطابقين بيچ، وعلى السَند أسويها.
بلقيس: إذا ما ندمتچ ما يطلع اسمي بلقيس.
دفعتها بره الغرفة وحچت
بتراء: تهديد مُثقف دِ روحي ام البرستيجه.
رگعت الباب بوجها وخلت إيدها على گلبها
وتحرك شفايفها بالكلمات ها شلون چنت مو طيحت حظها؟
عزّهَ: چوك گوزال بصوت هلال.
أريم
البارحه چنت ويا عمو ومرته بغرفتها ما گدرت اصعد يم سيرا ومن نامت الخاله صعدت لگيت عمو اشتر بوحده
يم غرفته. وهلال نايمه بسبب الأدوية. سألته گال هدآم طالع مو يمها وسألت عن سيرا. گال بعد شويه ترجع اكيد وراهم سالفة دگيت عليها ما جاوبت
انتظرتها ترجع ومن رجعت اجت ويا هدآم وكل ملابسها تراب گعدو حچولي شسوا بالدكتور المزيف الراد يقتل إيمار. سيرا جفصت وگالت وتن سوالنا أجواء. هنا.
عمو اشتر وسع عيونه گال شلون شلون رجعت عدلت على كلامها وگالت حچينا فيديو وسوالنا أجواء.
علي ما أعتقد. عمي اشتر ما صدگ عبن ظل يگول
خوش. تالي للساعة 12 بالليل فاضل رجع بإتصال من عمو اشتر گله عوف العليك عاصم يتصرف انت تعال رجع سيرا.
اجا وسيرا تتوسل تبقى عمو ما رضى گال ابوچ صرعني
يگول رجع بنتي. طبعا ما يدري آني يم عمو اشتر ببيت المزرعه. عباله سيرا اجت للبصره تشوف حبوبه
ف سيرا راحت ويا فاضل بقيت آني وحدي.
الليل كله ما نمته شويه انزل يم خالة آيدا وشوية اگعد يم إيمار اللي الحمد لله استقر وضعه. الليل كله بالي مشغول على أبيل شراح يصير بي بعد أيام الجلسه الأولى!
ما ادري شلون غفيت الصبح گعدت على إيد تلامس وجهي فزيت من الحلم عبالي أبيل. شفتها هلال گالت هاي اني
گمت انطيتها مجال وطلعت رحت يم عمو اشتر طلبت منه يرجعني لبيت المزرعة گلت ابدل واجيب ملابس وياي هلال هم لازم تبدل، اجا الاسمه عاصم عمو گاله.
كملت الشغل؟
اي.
چا تاخذ أريم للبيت وتبقى برا تنتظرها.
گال تمام. نزلت وياه قبل لا نطلع من المستشفى طلب مني
اغطي راسي بكبوس الهودي. والبس نظاره. سويت مثل ما گال بس اريد اطلع. الطريق هدوء وآني حچيت
أريم: أخذني للمركز.
مركز تجميل؟
أريم: نكتة ما تضحك. مركز الشرطة
من صدگ نكتة ما تضحك. ماكو روحه
أريم: تاخذي للمركز لو اچيت من السيارة؟
فورا قفل الأبواب ونظرلي.
الگدامچ مو ماجد الاثول. آنا اضحك اضحك وبعدين سُبراايز. خلينا حبابين وما نزعل من بعض. بعدني ما نسيت شسويتي حتى تشردين من البيت
أريم: نقطة زيت وطاوة حامية لا تبالغ ما حرگت البيت
تاخذني للمركز هسه.
احچي للمعلم اشتر وگله! اذا تلحين
أريم: شني يعني تمشي كلمتك عليّه وگف السياره. وگف.
أنوب ما جاوبني خابر على عمو وفتح سبيكر
الخاتون رايده تروح للمركز.
مَعليك من حچيها وديها للبيت.
أريم: ااشتور صدمتني والله ها صرت وياهم عليّه؟
مُفردات أبيل حاروگه بطليها. هدآم بالمركز يعني من يرجع ناخذچ تمام؟
أريم: هاا اي تمام. وعد؟
وعد لو رعد
أريم: انت انچب مَعليك. عمو تسمعني؟
لا ما يسمعچ خلص حچيه وقفل الخط بوجهنا
شهل حالة يا ربي. رجعت لمكاني گعدت وآني ساكته
من وصلت للبيت دخلت وبعدني اشم ريحة الدخان.
رشيت مُعطر جو وصعدت لغرفتي.
نزعت الكوت، تذكرت الكرت اللي أخذته من AXR بعده بجيب الكوت طلعته واحتاريت شسوي بي فتحت كر الموبايل خليت الكرت بظهر الموبايل ورجعت الكر
دخلت سبحت ومن طلعت لبست تراك خفيف من تراكات هلال. دزيت رساله ل عاصم گتله انام شويه وانزل
بقيت متمدده عالچربايه سارحة بأفكاري لحدما غفيت
ما گعدت إلا على صوت دگ الباب وعاصم يحچي
آنسه تأخرتي صار خمس ساعات نايمه. يا آنسه تجاوبين او ادخل للغرفه؟ خوما بيچ شي؟
بطرگ هل تراك الخفيف شني يفوت، ركضت للباب
أريم: تفووت لا تفووت ابدل واطلع.
چآ استعجلي.
قفلته وأخذت ملابسي بدلت ومشطت شعري
اخذت الكبوس لبسته. تذكرت باليوم اللي افترينا بشوارع بغداد.
يلا...
خرب عليَّه لحظة التأمُل، شلت موبايلي
وطلعت عبرته ورحت على غرفة هلال خليتلها
چم قطعة كملت شلت الجنطة وطلعت وياه
الساعه چانت 7 المسا من وصل للمستشفى صارت 8
گلت لعاصم ياخذ الجنطة ينطيها لهلال. راح هو.
وآني رحت بإتجاه غرفة خاله آيدا استغربت من الباب الچان مفتوح. تقدمت بخطوات سريعه اتبسمرت بمكاني
گدام الباب لمن شفت الغرفه ما بيها احد غير وحده لابسه عبايه نجفية على راسها منطيّه ظهرها للباب والمخده بإيدها. وخالة آيدا نايمه!